Women’s day

8 مارچ عالمی یوم نسواں پر خواتین عالم کو مبارکباد پیش کرتے ہوئے ایک سوال پوچهتا ہوں کہ کیا آپ لوگوں کو کبھی یہ سوال پریشان کیا ہے کہ جمہوریت اور آزادئ نسواں کا سب سے مضبوط قلعہ امریکہ میں اب تک وہاں کے لوگوں نے کسی خاتون صدر کا انتخاب کیوں نہیں کیا؟ باراک اوبامہ کا انتخاب کرکے انہوں نے سیاہ فام کو صدر نہ بنانے کا کلنک تو ختم کردیا ہے اب دیکھنا ہے کہ کسی خاتون کو اس کے خاتون ہونے کی وجہ سے عملاً (قانوناً تو رکاوٹ نہیں ہے) کب تک اس منصب کی اہل نہیں سمجھا جائےگا. ” کھلونے دے کر بہلائی گئی ہیں” !
عورت کے ساتھ مساوات کی تلقین ، ان کو محض جنسی لذت کا ایک سامان سمجھنے کے خلاف پرکشس مگر کهوکهلے نعروں کے باوجود ان کا جنسی استحصال جو کہ دفتروں اور دیگر شعبہ حیات میں تو عام بات تهی مگر پچھلے دنوں شام میں جو( ریلیف) راحت رسانی اور انسانی ہمدردی کی تنظیموں کے بعض افراد نے روٹی کے چند ٹکڑوں کے عوض شام کی مجبور و بے کس فاقہ کش عورتوں اور جواں سال لڑکیوں کا جنسی استحصال کیا اس نے پوری دنیا کی انسانیت کو شرمسار کردیا ہے. اس طرح کے واقعات اگر تیسری دنیا کے ممالک میں ہوتے ہیں تو مغربی دنیا کی تنقید کا نشانہ بنتے ہیں اور بننا بهی چاہیئے . عورتوں کا جنسی استحصال کسی بهی جگہ ہو اور کسی بهی طبقہ امیر غریب ، تعلیم یافتہ ان پڑھ ، شہر کی رہنے والی یا گاؤں کی ، ایشیا اور لاطینی امریکہ میں ہو یا "پہلی دنیا” کے مہذب ترین دنیا امریکہ اور یورپ میں ، ہر جگہ قابل مذمت ہے مگر تنقید کا پیمانہ ایک ہی ہو اپنے لوگوں کے کالے کرتوتوں پر پردہ پوشی نہیں ہونی چاہئے. . ہمارے یہاں بھی ایسے غیر حساس سیاسی لیڈروں کی کمی نہیں ہے جن کی نظر میں جنسی زیادتی بہت معنی نہیں رکھتی اور انہیں اپنے "مرد برتری والا معاشرہ” پر فخر ہے . کبھی وہ کہتے ہیں کہ جنسی استحصال اور تشدد ایک زمانہ سے ہوتا آیا ہے اس لئے اس کی طرف زیادہ توجہ دینے کی ضرورت نہیں ہے تو کسی لیڈر نے کہا کہ اس طرح چھوٹے چھوٹے واقعات ہوتے رہتے ہیں یہ قابل اعتنا نہیں ہیں کسی لیڈر نے کہا کہ لڑکوں سے اس طرح کی حرکتیں ہو جایا کرتی ہیں.۔۔۔۔ یہ سب باتیں اس کی طرف اشارہ کرتی ہیں کہ ذہنی طور پر مرد اپنی تمام تعلیم و تربیت اور ترقی کے باوجود عورت کو عملاً ان کا صحیح مقام دینا نہیں چاہتا.

آزادی بھی ایک عجیب و غریب لفظ اور تصور ہے۔ سگریٹ نوشی صحت کے لئے بہت مضر ہے مگر فرد کی آزادی میں دخل اندازی نہیں کرنے کی وجہ سے اس پر پابندی عائد نہیں کی جا سکتی ! ایسا ہی کچھ حال شراب نوشی کا ہے۔۔۔ لیکن فرد کی آزادی میں مداخلت کے علاوہ بھی پس پردہ ایک سبب اور ہے اور وہ یہ کہ ان دونوں انڈسٹریز سے حکومت کے خزانے میں آنے والی آمدنی اور صنعتکاروں اور حکومتوں/ قانون سازوں کے مابین ” مفاہمت”۔

پاکستان اور تیسری دنیا کے کئی ملکوں میں "میرا جسم میری مرضی” کے نعرے سے کیا مقصود ہے یہ واضح ہونا چاہئے۔ کیا اس سے مراد جنسی آزادی ہے کہ جائز ناجائز کسی کے ساتھ جنسی تعلقات استوار کریں ؟ کیا جسم سے مراد ان کی کوکھ ہے کہ وہ چاہیں تو حمل کی اجازت دیں اور نہ چاہیں تو یہ کہ کر منع کر دیں کہ وہ بچے پیدا کرنے کی مشین نہیں ہیں ؟
کیا اس سے مراد ان کو اپنے جائز حقوق کو تسلیم کرانا ہے کہ ان کا وجود جنسی کھلونا نہیں ہے وہ اس معاشرے میں برابر کی شریک ہیں۔ معاملہ کنبے کا ہو یا معاشرے کا، ان کی رائے کو اہمیت دی جائے ان کا استحصال نہ کیا جائے ان کو پیر کی جوتی نہ سمجھا جائے۔۔۔۔۔ اس میں شک نہیں کہ دین اسلام ان کے حقوق کی ضمانت دیتا ہے لیکن مسلمان بالخصوص بر صغیر ہندوپاک اور بنگلہ دیش کے مسلمانوں نے غیر مسلموں کی تہذیب رسم و رواج سے متاثر ہو کر
"پروش پردھان” کی روش اپنائی اور نہ صرف عام مسلمان بلکہ علماء فقہاء دینی اداروں کے رہبران جماعتوں کے امیر و نقیب خانقاہوں کے مسند نشین سب نے اپنی بہن بیٹیوں اور بیویوں کے جائز حقوق ادا کرنے میں مجرمانہ کوتاہی کی ہے۔ کتنے ایسے گھرانے ہیں جہاں بیویوں کی کوئی اہمیت نہیں بیٹیوں کو بوجھ سمجھا جاتا ہے بہنوں کو ان کے دختری حق سے محروم کیا جاتا ہے اور بیٹیوں کو بیٹوں کے مقابل کمتر سمجھا جاتا ہے۔ باپ کی چھوڑی ہوئی جائیداد میں سے بہنوں کے حق ، جس کا ذکر قرآن کریم میں صراحت سے ہے، بھائی غصب کر لیتا ہے۔ خواتین پر عمومیت کے ساتھ اعتراض کرنے والے مرد حضرات کو مسئلے کے اس پہلو پر بھی توجہ دینی چاہیے۔

"میرا جسم میری مرضی” کا ایک تضاد یہ بھی ہے کہ خواتین چاہتی ہیں کہ وہ جس قدر جنسی ہیجان انگیز لباس زیب تن کریں ان کی مرضی ہے۔ وہ پبلک پلیس مارکیٹ مال پارک میں منی اسکرٹ پہن کر آئیں سی تھرو see through (اگر اس کا ترجمہ شفاف کیا جائے تو اس سے بہت زیادہ شرافت ٹپکتی ہے اور ایسا لگتا ہے یہ کوئی مثبت مفہوم میں ہے اس لئے منفی مفہوم کی ادائیگی کے لئے آر پار نظر آنے والا پار درشی) باڈی ٹائٹ سلم فٹنگ اور اتنا باریک ٹاپ اور ٹراؤزر کہ ایک ایک curve نشیب وفراز بغیر کوشش کۓ نظر آۓ پھر بھی انہیں کوئی نہ دیکھے ورنہ "گھورنے” کے جرم میں گھورنے والے کو سزا ہوسکتی ہے۔ ان خواتین کا کہنا ہے ” نظر نہیں نظریہ بدلو” ۔۔ لیکن ایسی ہی کوئی حرکت مرد کریں تو ان خواتین کو اعتراض ہوتا ہے ایسے مردوں کو غیر مہذب بدتمیز بد اخلاق کہا جاتا ہے۔۔ مرد اگر انڈر ویئر پہن کر پبلک پلیس میں جاۓ تو اسے مارشل کے ذریعے باہر کر دیا جائے گا !
چند سال قبل بچے کو اسکول پہنچانے گیا تو دیکھا گارڈ نے گارجین کو نوٹس بورڈ پر آویزاں نوٹس پڑھنے کو کہا جس میں لکھا تھا کہ بعض مرد حضرات صبح میں بچوں کو چھوڑنے جوگنگ یا کیجول ڈریس لوور میں آتے ہیں جس کی وجہ سے خواتین کو embarrassment ہوتی ہے اس لئے آئندہ ایسے لباس میں نہ آئیں۔۔۔ سادہ لفظوں میں یہ اس طرح کے کپڑوں میں بعض مردوں کے اعضاء کا پتہ چلتا ہے۔ اس نوٹس کے لئے ہم نے اسکول کے حساس انتظامیہ کی ستائش کی مگر یہ سوال ذہن میں رہ گیا کہ کیا خواتین کے لئے بھی کچھ اخلاقیات کا درس ہے؟

(مضمون میں پیش کردہ آرا مضمون نگارکے ذاتی خیالات پرمبنی ہیں،ادارۂ قندیل کاان سےاتفاق ضروری نہیں ہے)

احمد توصیف قدس/ کشتواڑ
[email protected]
عیسوی کلینڈر کے ماہِ مارچ کی ۸؍تاریخ کو ہر سال خواتین کے حقوق اور معاشرے میں اُن کی سماجی، سیاسی، تعلیمی و فلاحی خدمات کو خراجِ تحسین پیش کرنے کے لیے ’’ عالمی یومِ خواتین‘‘ (International Womens Day) منایا جاتا ہے۔ اِس روز دنیا بھر میں سرکاری و پرائیویٹ سطح پر مختلف تقریبات کا انعقاد ہوتا ہے جن میںسماجی، سیاسی، تعلیمی اور فلاحی شعبوں سے وابستہ معاشرے کی معروف ترین خواتین کو مد عو کرکے اُن کی خدمات کے اعتراف کے عوض میں اُنھیں اعزازات سے نوازا جاتا ہے۔ اِن تقریبات میں طبقۂ نسواں کے حقوق کے تحفظ اور اِس طبقے کی تعمیر و ترقی کے لیے کام کرنے کا عزم بالجزم کیا جاتا ہے۔ علاوہ ازیں دنیا میں عورتوں پر روا رکھے جارہے استحصال اور ظلم و تشدد پر تقاریر اور مقالے پیش کیے جاتے ہیں۔ان تقریبات کے علاوہ دنیا کے نمائندہ اخبارات میں طبقۂ خواتین کے موضوع پر مضامین شائع ہوتے ہیں، رسالے خصوصی شمارے شائع کرتے ہیں، مختلف سماجی ، ثقافتی اور غیر سرکاری جماعتیں(NGO’s) عورتوں کے حق میں ریلیوں اور خصوصی مہمات(Compaigns) کا انعقاد کرتی ہیں اورقومی و بین الاقوامی ٹی وی چینلوں پر ـ’’ ٹاک شوز اور بحث و مباحثوں‘‘ کے پروگراموں کابھی خصوصی اہتمام کیا جاتا ہے۔
’’ عالمی یومِ خواتین‘‘ کے پسِ منظر میں اگر جائیں تو معلوم ہوتا ہے کہ پہلا ’’ یومِ خواتین‘‘ 28فروری1909 ء کو امریکی سوشلسٹ پارٹی نے امریکہ کے شہر نیویارک میں منعقد کیا تھا۔ بعد ازاں 1910ء میں ڈین مارک کے شہر کوپن ہیگن میں خواتین کی ایک بین الاقوامی کانفرنس(International Womens Conference)کا اہتمام کیا گیا جس میں دنیا کے 17ممالک کی تقریباً 100نمائندہ خواتین نے شرکت کی۔ اس کانفر س میں عورتوں کے حقِ رائے دہی (Right to Vote) کی حمایت میں قرار داد منظور کی گئی۔ اِس کانفرنس کے اثرات دور رس ثابت ہوئے اور رفتہ رفتہ آسٹریا، ڈین مارک، جرمنی اور سویزر لینڈ جیسے ممالک میں بھی خواتین کے حق میں آوازیں بلند ہونے لگی۔ نیز عورتوں کو حقِ رائے دہی کے علاوہ نوکری،دولت کمانے اورپیشہ وارانہ تربیت (Vocational Training) کے حقوق حاصل ہونے کے لیے صدائیں گونجنے لگیں۔ ڈنمارک میں منعقد شدہ اِسی کانفرنس میں طے پایا کہ ہر سال مارچ کی ۸ تاریخ کو ’’ یومِ خواتین‘‘ منایا جائے گا۔1917ء کے انقلابِ روس میں جب وہاں عورتوںکو ووٹ دینے کا حق حاصل ہوگیا تو روس میں ۸ ؍مارچ کو قومی چھٹی کا اعلان کیا گیا۔1917ء سے 1975ء تک کے اِس عرصے میں مختلف ممالک میں سوشلسٹ اور کمیونسٹ طاقتیں یومِ خواتین کا خصوصیت سے اہتمام کرنے لگیں۔ اس طرح سے معلوم ہوتا ہے کہ ’’یومِ خواتین‘‘ کو دنیا میں متعارف کرانے میں کمیونسٹ اور سوشلسٹ نظریات کارفرما تھے جسے بعد ازاں 1975ء میں اقوام متحدہ کی جنرل اسمبلی نے مستعار لے کر ہر سال مارچ کی8 تاریخ کو عالمی سطح پر ’’ یومِ خواتین‘‘ منائے جانے کا اعلان کیا۔ تب سے ہر سال ’’Gender Equality ‘‘ کے ایک مخصوص نعرے کے تحت دنیا کے مختلف ممالک میں’’ یومِ خواتین‘‘ کا اہتمام تزک واحتشام کے ساتھ کیا جاتا ہے۔’’ عالمی یومِ خواتین‘‘ کے اِس ایونٹ کے لیے ہر سال ایک موضوع(Theme)کا انتخاب کیا جاتاہے۔ سال 2020 کے لیے "I am Generation Equality: Realizing Women’s Rights” کا موضوع منتخب ہوا ہے۔
’’ یومِ خواتین‘‘ سے جُڑی ابتدائی معلومات سے آشنائی ہونے کے بعد اِس بات کا علم حاصل کرنا ضروری ہے کہ آخر وہ کیا محرکات تھے کہ جس نے ’’یومِ خواتین‘‘کو منانے کی ضرورت کو اُجاگر کیا۔ تاریخ کا مطالعہ کرکے معلوم ہوتا ہے کہ مغرب میں جب نشاۃ ثانیہ کا دور چَل رہا تھا اور مذہب (عیسائیت) کے خلاف بغاوت کے آثار رونما ہونے لگے تو عورت میں بھی مذہب کے خلاف اظہارِ خیال کرنے کے جراثیم پنپنے لگے اور رفتہ رفتہ جب اُسے اظہارِ خیال کی آزادی میسر ہوئی تووہ مذہب کے چُنگل سے آزاد ہو کر روایات سے انحراف کر کے معاشرے میں مردوں کے مقابلے کا درجہ ڈھونڈنے لگی۔نیز عورتوں نے خود سے ہو رہی ظلم و زیادتی کی نشاندہی کی اور سماج میں اپنے حقوق، ضروریات اور ترجیحات کا بھی تعین کیا۔
اب سوال یہ پیدا ہوتا ہے کہ کیا واقعی آج عورت ذات کا یہ طبقہ روبۂ ترقی ہے؟ کیا اب اُسے وہ تمام معاشی و معاشرتی حقوق حاصل ہوگئے ہیں کہ جن سے محرومی کا یہ دکھڑا سناتے تھے؟ کیا عورت خود کفیل بن گئی ہے اور کیا اب اُسے کسی دوسرے کے سہارے کی ضرورت باقی نہیں رہی ہے؟ کیا واقعی عورت خود کا ایک الگ وجود اور تشخص قائم کرنے میں کامیاب ہوئی ہے؟ بالفاظِ دیگر کیا عورت ’’ مردوں اور عورتوں کے مابین‘‘ کے اس مقابلے میں مردوں سے آگے نکل گئی ہے ؟اِن تمام سوالات کے جوابات کھوجنے کے نتیجے میں جو معلومات ہمیں حاصل ہوتی ہیں، وہ انتہائی بھیانک اور چونکا دینے والی ہیں۔
آج پوری دنیا میں حوا کی بیٹی مظلومی و مقہوری کی زندگی بسر کر رہی ہے۔یہ جنسی تشدد کا شکار ہو رہی ہے۔ اِسے معاشرے میں جنسی لذت حاصل کرنے کا ایک آلہ قرار دیا جاتا ہے۔ اِس کے بدن سے کپڑے کم کر کے اِسے مردوں کو رجھانے کا ایک ذریعہ بنایا گیا ہے۔ خواتین کے اِس طبقے میں خودکشی کا رحجان تیزی سے بڑھ رہا ہے۔آج عورت کو فحاشیت و عریانیت کے اڈوں کی زینت بنایا گیا ہے۔ خواتین منشیات کا کثرت سے استعمال کر رہی ہیں، نتیجتاً اِن کا دماغی توازن بگڑ جاتا ہے۔ عورتوںکی عصمت دری اور قتل کی واردتوں میں حیرت ناک حد تک اضافہ ہو رہا ہے،اور اب تو معصوم اور ننھی کلیوں کی آبرو ریزی کر کے اُنھیں قتل کرنے جیسے گھنائونے واقعات بھی رونما ہو رہے ہیں۔ انسانیت کو شرمسار کردینے والے ایسے واقعات اب یورپ کے علاوہ ایشائی ممالک میں بھی ہو رہے ہیں( کچھ سال قبل قصور پاکستان کی زینب اور کھٹوعہ جموں کی آصفہ کے ساتھ پیش آئے سانحات اِس سلسلہ میں چشم کُشا ہیں)۔مغرب نے عورتوں کو مختلف ذرائع و سائل استعمال کر کے آزاد خیالی (روشن خیالی) کی جو پَٹی پڑھائی ہے، آج اِ س کے منفی اثرات ظاہر ہونے لگے ہیں۔ خواتین گھریلو امورات میں قدرے کم دلچسپی لینے لگی ہیں۔ نتیجتاً خاندانی نظام درہم برہم ہوکررہ گیاہے۔ زوجین کے مابین افہام و تفہیم کا فقدان پیدا ہوا ہے اور بچے تربیت سے محروم ہو رہے ۔ عورت خود کے حقوق کی فکر میں نجانے اپنے کتنے فرائض بھول گئی ہے۔آج اُسے گھریلوں ذمہ داریاں بوجھ محسوس ہونے لگی ہیں۔ خود کو اپنے خاندان سے دور کر کے یہ خواتین دراصل خاندانی نظام کا گلا گھونٹ رہی ہیں۔ مغرب میں بوڑھے والدین کو ’’ اولڈ ایج سینٹرس‘‘ میںبھیج دیا جاتا ہے تاکہ اِن کی اپنی اولادیں اپنے بوڑھے والدین کی حاجتوں اور ضرورتوں سے خود کو الگ کرکے ایک پُر تعیش زندگی گزار سکیں۔ اولڈ ایج سینٹرس کے رحجانات اب یورپ کے علاوہ دیگر ایشائی و عرب ممالک میں بھی پھیلنے لگے ہیں۔جو کام مردوں کے تھے، اُن میں عورت نے مداخلت کرکے اُن کاموں کا بیڑا غرق کر دیااور جو عورتوں کے کرنے کے کام تھے،اُن سے پہلو تہی اختیار کر کے عورت نے دراصل خاندانی نظام کی بیخ کنی کی ہے۔ بقول شاعر:
کہو ں کس سے کہ ہے سب کار اُلٹا
ہم اُلٹے، بات اُلٹی، یار اُلٹا
اب ایسی صورت میں ’’ یومِ خواتین‘‘ ( اصل میں خواتین کے جشن اور آزادی کے اعلان کا دن) کے نام سے ایک مخصوص دن کا تعین کرنے کی تُک سمجھ میں نہیں آتی۔خواتین کے حقوق وترقی کا غلغلہ کرنے والا یہ دن فی الحقیقت خواتین سے جُڑے خطرات و خدشات کا قلع قمع کرنے میں کلی طور ناکام ہوا ہے۔ ایک منطقی سوال یہ پیدا ہوتا ہے کہ خواتین کے حقوق کے لیے فلک شگاف نعرے لگاتے ہوئے ایک صدی سے زائد کا عرصہ گزر جانے کے باجود بھی آخراِن مسائل کے سدِ باب کے امکانات کیوں نظر نہیں آتے؟ تحقیق وتجزیوں کے مطابق تو خواتین سے جُڑے اِن مسائل میں روز افزوں اضافہ ہی ہو رہا ہے۔ حقیقت دراصل یہ ہے کہ ۸ مارچ کا یہ دن ایک ’’ فریب اور ڈھونگ‘‘سے زیادہ کوئی حیثیت نہیں رکھتا۔ ۸؍ مارچ کے معتقدین و منتظمین ہی آج خواتین برادری کے سب سے بڑے دشمن ہیں جنھوں نے خواتین کومن گھڑت اور مصنوعی اسباق پڑھائے کہ ’’ وہ سماج کا ایک مظلوم ترین طبقہ ہے‘‘ ’’ اِن کے حقوق غصب کیے گئے ہیں‘‘ ’’ اِن کو گھر کی چار دیواری میں محصور کیا گیا ہے‘‘ ’’ اِنھیں مردوں کے شانہ بشانہ کام کرنے کے حق سے محروم رکھا گیاہے‘‘ ’’ اِنھیں معاشرے کی باگ ڈور سنبھالنے کا بھرپور حق حاصل ہے‘‘ وغیرہ۔ جھوٹ، افترأ ، کجی اور تعصب پر مبنی یہ اسباق اس قدرزہریلے اور فاسد ثابت ہوئے ہیں کہ یہ نسلوں کو فکری، روحانی اور اخلاقی سطح پر پستی کی جانب دھکیلنے کا باعث بنے اور بن رہے ہیں۔
عورت دراصل مرد کے مقابلے میں ایک الگ جسمانی ساخت اور ذہنی صلاحیت رکھتی ہے۔ انھیں مردوں کے مدِ مقابل کھڑا کرنا دراصل قانون فطرت کے ساتھ ایک کھلی بغاوت ہے۔ سائنسی تحقیقات سے ثابت ہوا ہے کہ عورتوں کی نفسیاتی و ذہنی ساخت و صلاحیتیں مردوں کے مقابلے میں مختلف ہیں۔ عورت کا مردوں کے مقابلے میں جسمانی و ذہنی اعتبار سے الگ حیثیت رکھنے کے ہرگز یہ معنی نہیں نکلتے کہ عورت ذات مردوں سے کم تر اور ہیچ ہے۔ اسلام کی رو سے مردوں کو عورتوں پر کوئی فضیلت حاصل نہیں۔ صناع ِعالم نے عورت اور مرد کو ایک ہی مٹی سے وجود بخش کراِنھیں یکساں درجہ دیا ہے۔
8 مارچ کے یومِ خواتین کے پسِ منظر میں گزشتہ چند برسوں سے پاکستان میں ’’ روشن خیال‘‘ خواتین نے ’’ عورت مارچ‘‘ کا اہتمام کیا( اس سال بھی متذکرہ تاریخ کو ’’ عورت مارچ‘‘ کا اہتمام کیا جا رہا ہے) جس میںچند نعرے تخلیق کیے گئے ہیں۔یہ نعرے آج لوگوں کی توجہات کا مرکز بنے ہوئے ہیں۔ نعروں کے الفاظ یہ ہیں: میرا جسم میری مرضی،میری زبان میری مرضی،اپنا کھانا خود گرم کرو،طلاق یافتہ لیکن خوش،میرا دماغ میرا جسم میری طاقت، وغیرہ۔ ان نعروں کو لے کر میڈیا اور سوشل میڈیا پر گرما گرم بحثیں ہو رہی ہیں۔ ظاہر ہے یہ نعرے ہٹ دھرمی، بد اخلاقی اور بد تہذیبی کے دائرے میں آتے ہیں۔ چنانچہ ’’ عورت مارچ‘‘ اوران نعروں کی کڑی مذمت کی جانی چاہیے۔ نعروں کی مذمت کرنے کے یہ معنی نہیں ہیں کہ مذمت سازعورت کی آزادی کے خلاف ہیں۔ مذمت کی غرض دراصل یہ ہے کہ معاشرے کو جنسی انارکی میں دھکیلنے سے بچایا جائے۔ یہ نعرے فطرتِ نسواں کے خلاف سراسر بغاوت ہے اور بس!
آج عورت خود کو مظلوم قرار دیتی ہے ۔وہ خود کو محفوظ تصور نہیں کرتی۔لیکن اسلام کا مطالعہ کیا جائے تو معلوم ہوتا ہے کہ احترام نسواں کے لیے اسلام کی تعلیمات کس قدر واضح ہیں۔ محسنِ انسانیت ﷺنے خواتین کو نہ صرف احترام کی نگاہ سے دیکھابلکہ سماج میں اُن کے لیے اعلیٰ درجے کے حقوق بھی متعین کیے اور عورتوں کے وجود کو ایک کامیاب خاندان کے لیے سب سے اہم قرار دیا۔آج شرق و غرب میںعورتیں اسلام کا مطالعہ کرکے اِس کی آفاقی و حقیقت پر مبنی تعلیمات سے متاثر ہو کرزمانے کی سختیوں کو برداشت کرنے کے باوجود اسلام کے دائرے میںجوق در جوق شامل ہو رہی ہیں۔مریم جمیلہ،ہادیہ، یووان ریڈلی، لارین بوتھ اور ایسی ہی ہزاروں نومسلم خواتین اس کی زندہ وجاوید مثالیں ہیں۔ یہ ایسی خواتین ہیں کہ جنھوں نے صدقِ دل سے اسلام کا مطالعہ کیا اور جب اسلام کی آفاقی تعلیمات نے اِن کے اذہان و قلوب کو مسخر کیا تو فوراً اپنے اسلام لانے کا اعلان کر دیا۔لہٰذا ’’ عورت مارچ‘‘ کے طرفداروں کو اسلام کا بہ تفصیل مطالعہ کرنا چاہیے اور اگر وہ سچ میں حق کی تلاش میں ہیں ، تواُنھیں وہ حاصل ہو کر رہے گا۔
آج اگرچہ اسلام کو بد نام کرنے کے لیے سر توڑ کوششیں کی جارہی ہیں لیکن دشمنانِ اسلام جس قدر اِسلام کی مخالفت میں تحریکیں چلاتے اور نوبہ نو پروپیگنڈے کرتے ہیںاُسی قُدر متلاشیانِ حق اسلام کی جانب متوجہ ہو کر خود کو سپردِ اسلام کررہے ہیں۔ سی این این، بی بی سی اور وکی پیڈیا کی حالیہ رپورٹس کے مطابق اس وقت اسلام دنیا میں سب سے زیادہ تیزی سے پھیلنے والامذہب ہے۔ بی بی سی کی رپورٹ کے مطابق 2070 ء تک اسلام عیسائیت کو پیچھے چھوڑ کر دنیا کا سب سے بڑا مذہب بن جائے گا۔ پوری دنیا میں اسلام قبول کرنے والوںکی شرح میں خواتین کی شرح ہی سب سے زیادہ ہے۔
حقوقِ نسواں کے چیمپینوں اور ’’ یومِ خواتین‘‘ کے معتقدین و منتظمین کی عقلوں پر ماتم کرنے کو جی چاہتا ہے کہ جس عورت کو وہ تحفظ اور حقوق دینے کا دعویٰ کرتے ہیں، وہی عورت آج نوبہ نو مسائل، الجھنوں اور پریشانیوں میں اِس قدر غرق ہو چُکی ہے کہ گویا ایک آگ سی لگی ہوئی ہے اور عورت اِس آگ میں سر تا پیر جھُلس رہی ہے۔ یومِ خواتین کے روز بلند کیے جانے والے نعرے اور منظورشدہ قراردادیں سراب سے جنم لے کر سراب ہی میں کھو جاتی ہیں۔اِس صورت میں ’’ یوم خواتین‘‘’’ عورت مارچ‘‘ اور اِن جیسے ایونٹس سے مذموم عزائم ، مخفی مقاصد اور مکروہ سازشوں کی بو آتی ہے ۔ضرورت اس بات کی ہے کہ دجل و فریب کے اِس جال کو طشت ازبام کیا جائے تاکہ ہماری ملت کی مقدس مائیں اور بیٹیاںاِس کے اثرات سے محفوظ رہ سکیں۔

(مضمون میں پیش کردہ آرا مضمون نگارکے ذاتی خیالات پرمبنی ہیں،ادارۂ قندیل کاان سےاتفاق ضروری نہیں ہے)

محمدنبی چترالی

عورت تین طرح کی پائی جاتی ہے۔ ایک اس خوب صورت مذہبی و اخلاقی لبادے میں کہ "عورت کو مذہب نے سب سے زیادہ حقوق دیے۔” عورت ماں بھی ہے اور بہن بھی۔ اس کے پاؤں تلے جنت بھی ہے اور وہ پیکر مروت بھی ہے۔ اس عورت کا وراثت میں حق ہے۔ اس کے شوہر پر حقوق ہیں۔ بھائی اور والد سے کچھ مطالبے ہیں۔

دوسری عورت تخیل میں موجود ہوتی ہے اور اسی تخیلی عورت کی تصویر سے کائنات میں رنگ ہے۔ جو عورت انسانی تخیل میں پائی گئی ہے، وہ کچھ اس طرح کی ہے:وہ بیوی ہے تو گھر کی وزیراعظم ہے۔ وہ ماں ہے تو گھر بار کی رونق ہے۔ وہ بیٹی ہے تو مجسم پیار ہے۔ وہ بہن ہے تو بھائی کے لیے سرمایۂ جان ہے۔ اگر وہ طوائف بھی ہے تو لائق ہمدردی و احترام ہے۔ کہ پیشے میں عیب نہیں۔

ان دو اقسام کے علاوہ ایک تیسری قسم کی عورت بھی پائی جاتی ہے۔ یہ عورت میرے گھر میں ہے۔ یہ میرے پڑوس میں ہے۔ یہ میرے معاشرے میں ہے۔ یہ حقیقی عورت ذات ہے۔ جو دیدۂ عبرت نگاہ کے دیکھنے کی شے ہے۔
اس عورت کی کہانی میرے گھر سے شروع ہوتی ہے اور گھر گھر پر ختم ہوتی ہے۔ ہم دو بھائی ہیں اور پانچ بہنیں ہیں۔ والد صاحب الحمدللہ حیات ہیں۔ تیرہ سال پہلے حج کی فضیلت حاصل کی۔ زندگی کا ایک حصہ تبلیغ دین اور علماکی محفلوں میں بیتا۔ بڑےبھائی بھی والد کے نقش قدم پر چلتے ایک قدم آگے ہیں۔ حاجی وہ بھی ہیں اور سال، چار ماہ اور چلے میں اکثر ہوتے ہیں۔ آج کل بھی پنجاب کے کسی دور افتادہ علاقے میں کسی بھٹکے کو صراط مستقیم کی طرف کھینچ رہے ہیں۔
میں گھر میں سب سے چھوٹا ہوں۔ یونیورسٹی سے فارغ التحصیل ہوں۔ اور اپنی مرضی سے اپنی زندگی جی رہا ہوں۔
میری پانچ بہنیں ان پڑھ ہی رہیں۔ ان میں سے کسی ایک کی شادی بھی ان سے پوچھ کر نہیں ہوئی، کجا کہ مرضی کی ہوتی۔ ان کو وراثت میں کچھ نہیں ملا۔ والد اپنی عمر کا چراغ گل ہوتے دیکھ رہےہیں، مگر اپنی عمر میں یہ دیکھنا نہیں چاہیں گے کہ بیٹیوں کو جائداد میں ان کا حق ملے، ان پر جو تعلیم و روزگار کے در بند کیے گئے، معافی مانگیں۔
یہ اپنے گھر کی حقیقی عورت کی مکمل تصویر نہیں، تصویر کی ایک چھوٹی سی اکائی ہے۔ کاش بات صرف عورتوں کو ان پڑھ، جائداد میں حصہ نہ دینے، بےروزگار یا پھر شادی میں اپنی مرضی ٹھونسنے تک محدود رہتی۔ ان کے علاوہ بھی دہر میں بڑے ستم ہوئے اور ہوتے رہیں گے۔ سوال صرف یہ ہے کہ میرے والد، بھائی اور مجھے بطور مرد جو آزادیاں اور عیاشیاں میسر ہیں، وہ گھر میں موجود عورتوں کے حصے میں کیوں نہ آئیں؟ جواب ایک ہی ہے کہ عورت انسان نہیں۔
ہم تینوں جو گناہ کرتے ہیں، ہم سے سوائے خدا کے کوئی پوچھنے والا نہیں۔ مگر عورت سے خدا سے بھی بہت پہلے ہم پوچھتے ہیں۔ بالفاظ دیگرہمارے جسم پر ہماری مرضی ہے۔ مگر عورت کے جسم پر بھی، ان کی نہیں، ہماری مرضی ہے۔

چند مہینے پہلے کی بات ہے کہ سنا ہمارے پڑوس میں ایک صاحب نے بیوی کا سر پھوڑ دیا ہے۔ اس تشدد کی وجہ بڑی دلچسپ بھی اور کربناک بھی تھی۔ "یہ بھینس کی طرح سوتی رہی اور ہم سے صبح کی نماز فوت ہوگئی۔ اس نے جگایا نہیں” ان صاحب نے اپنی زبانی بتایا۔

اپنے رشتے داروں میں ایک ایسے شخص کو بھی جانتا ہوں کہ اس کے ہاں 17 بچے پیدا کیے گئے۔ تین شادیاں ہوئیں۔ وجہ یہ تھی کہ سب بیٹیاں پیدا ہو رہی تھیں، بیٹا پیدا کرنے کے لیے سترہ انسان نما جانوروں کا جنم ہوا۔ اور تین سوکنیں عمر بھر ایک دوسری کو کھاتی رہیں۔ اگر بیٹی کو انسان سمجھا جاتا تو کیا یہ سب کیا جاتا؟
وہ تاریک منظر بھی آنکھوں کے سامنے گھوم جاتا ہے جب جہیز کم لانے پر مردان میں ایک شخص نے بیوی کو تیسرے دن چلتا کر دیا۔
اپنے رشتے میں ہی غیرت کے نام پر قتل ہونے والی کمراٹ تھل میں بیاہی گئی اس ماں کو کیسے بھول سکتے ہیں جس کا بچہ پیدا ہوئے ابھی تین دن ہوئے تھے اور دیور نے سینے سے چمٹے بچے کو زبردستی لے کر ماں کو موت کے گھاٹ اتار دیا۔ اسی تھل کوہستان میں اس افضل کوہستانی کو بھی یاد کرتے ہیں تو کلیجہ پھٹ جاتا ہے۔ بات اتنی سی تھی کہ ایک ویڈیو منظر نامے پر نمودار ہوئی جہان چار لڑکیاں گا رہی ہیں اور دو مرد ناچ رہے ہیں۔ جرگہ کا فیصلہ ہوا۔ چار لڑکیوں کو قتل کردیا گیا۔ افضل کوہستانی برسوں پرانی روایت کو توڑنے اور عورت کو غیرت کے نام پر قتل کے خلاف اٹھ کھڑا ہوا۔ افضل کوہستانی کے تین بھائی مارے گئے۔ 6 مارچ 2019 کو ایبٹ آباد میں سرعام شہید کر دیا گیا۔ افضل کوہستانی عورت کو تو انسان ثابت نہ کرسکا۔ کہ وہ اب بھی اسی طرح پٹ رہی ہے۔ البتہ اپنے آپ کو درندوں کے اس معاشرے میں انسان ثابت کر گیا۔

عورت کو مذہب نے حقوق دیے۔ اس میں کلام نہیں۔ کیا اہل مذہب نے دیے؟حقوق کیا دینے تھے، جو ساتھ گوشت پوست لے کر آئی تھی، وہ تک چھین لی۔ تخیل کی دنیا میں یہ اقبال کے الفاظ میں کائنات کی تصویر میں رنگ بھرتی ہےاور اسی کے شعلے سے شرارِ افلاطوں ٹوٹا۔ کیفی عظمی کی بھاشا میں اس کے قدموں میں فردوسِ تمدن کی بہار ہے اور نظروں پہ تہذیب و ترقی کا مدار ہے۔ مگر مذہبی اور تخیلاتی دنیا سے الگ تھلگ ایک اور دنیا بھی آباد ہے۔ یہ حقیقت کی دنیا ہے۔ جہاں ایک طرف حافظ حمداللہ ہے تو دوسری طرف خلیل قمر ہے۔ اس دنیا میں موت کے ساتھ رقص کرتی چار کوہستانی لڑکیاں ہیں، تو دوسری طرف ایک جرگہ ہے اور بندوق برداروں کا ٹولہ ہے۔ یاں ایک طرف وراثت میں حق نہ پانے والی محروم بیٹی ہے، تو دوسری طرف جہیز نہ لانے پر دھتکاری جانے والی بہو ہے۔ یاں ایک طرف آل پاور فل بیٹا ہے اور دوسری طرف نحیف خستہ وزار بیٹی ہے۔ یاں ایک طرف بدکاری کرنے والے مرد کا چوڑا اور تمتماتا فخریہ سینہ ہے تو دوسری طرف زبردستی زیادتی کا نشانہ بننے والی سدا کی پھٹکار اور نفرت سہنے والی کھڑی عورت ہے۔ یاں ایک طرف باعزت بری ہونے والا مرد ہے تو دوسری طرف تیزاب زدہ چہرہ ہے۔

عورت مارچ کا اس کے سوا کوئی مقصد نہیں کہ حقیقی دنیا میں پائی جانے والی اس عورت کو سمجھا جائے اور اس تلخ حقیقت کو تسلیم بھی کیا جائے۔ حقیقت تسلیم کرنے کے بعد عورت کو انسان باور کیا جائے۔ بس۔ کوئی چاند تارے توڑ لانے کی بات تو نہیں کر رہا۔کوئی مرد خدا آئے اورعورت کو ساتھ لے کر چلے۔

عورت کے نام، ہمارا پیام:

رسم کے بت بند قدامت سے نکل
ضعفِ عشرت سے نکل وہمِ نزاکت سے نکل

نفس کے کھینچے ہوئے حلقۂ عظمت سے نکل
قید بن جائے محبت تو محبت سے نکل

راہ کا خار ہی کیا گل بھی کچلنا ہے تجھے
اٹھ مری جان مرے ساتھ ہی چلنا ہے تجھے

توڑ یہ عزم شکن دغدغۂ پند بھی توڑ
تیری خاطر ہے جو زنجیر وہ سوگند بھی توڑ

طوق یہ بھی ہے زمرد کا گلوبند بھی توڑ
توڑ پیمانۂ مردان خرد مند بھی توڑ

بن کے طوفان چھلکنا ہے ابلنا ہے تجھے
اٹھ مری جان مرے ساتھ ہی چلنا ہے تجھے!

(مضمون میں پیش کردہ آرا مضمون نگارکے ذاتی خیالات پرمبنی ہیں،ادارۂ قندیل کاان سےاتفاق ضروری نہیں ہے)