Tag:

urdu news

اردو اخبار کی دنیا،سچ بولنے والوں کی دنیا-مشرف عالم ذوقی

by قندیل 4 مئی, 2020

میں نہیں جانتا آپ کیا سوچتے ہیں ؟ مگر آج کی تاریخ میں ہندوستانی اردو صحافت بہت آگے ہے، کیا دو ایک انگریزی اخبار کو چھوڑ کر کوئی ایسا انگریزی اخبار آپ کو نظر آتا ہے جو سچ بولتا ہو ؟ انقلاب جاگرن والوں کا ہے مگر سچ بولنے کی ہمت ہے .ممبئی اردو نیوز ، منصف ، سیاست ، میرا وطن ،اودھ نامہ, آگ ، کس کس کا نام لیا جائے،آپ پڑھئے تو سہی کیا کوئی ہندی اخبار ایسا ہے جو سچ بولتا ہو ؟ ایک بھی نہیں اور دو ایک اخبار کو چھوڑ دیا جائے تو یہ بھی دیکھئے کہ اردو اخبار کن مشکلات کا سامنا کر رہا ہےـ وسائل محدود،مگر حق کے لئے آواز بلند کرنے میں سب سے آگے،احساس کمتری کو نکالئے،اردو پڑھئے،اخبارات خریدیے، فضا تیار کیجئے،اس کے بعد کا قدم میڈیا پر قبضہ ہےـ آپ خریدیں گے تو سرکولیشن میں اضافہ ہوگاـ اب تو اردو اخبارات کو اشتہار بھی نہیں ملتے،ان لوگوں نے ہی اردو کو زندہ رکھا ہے،ہر اردو جاننے والا اردو اخبارات ضرور خریدے، ایک نہیں،کم از کم دو تین ـ ہم مل کر چلیں گے، تبھی آگے بڑھیں گےـ
ایک عام سا سوال ہے کہ کیاانگریزی اور ہندی اخبارات کو مسلمانوں کے مسائل سے کوئی لینا دینا نہیں ہے؟ کیا مسلمانوں کی خبریں ان اخباروں میں سرخیاں تب ہی بنتی ہیں، جب کوئی مسلمان انہیں شک کے گھیرے میں نظر آتا ہے؟جسٹس کاٹجو بھی میڈیا سے بار بار یہ درخواست کرچکے ہیں کہ جب تک سچائی سامنے نہ آئے آپ فرضی تحریکوں اور نام کا سہارانہ لیں لیکن ایسا لگتا ہے غیر اردو اخبارات اور میڈیا ایماندارنہ صحافت کا راستہ بھول کر مسلم دشمنی کا ثبوت دے رہے ہوں۔
زیادہ تر اردو اخبارات کا فوکس مسلم مسائل پر ہوتا ہے۔ یہ بری بات نہیں ہے۔ کیونکہ اگر اردو اخبارات بھی مسلم مسائل کو ترجیح نہ دیں تو کون دے گاـ غیر اردو اخبارات کا مسخ شدہ چہرہ تو پہلے ہی سامنے آچکا ہےـ لیکن اس رویے نے نہ صرف اردو اخبارات کے سیکولر ڈھانچے پر سوالیہ نشان لگائے بلکہ مسلمانوں کا وہ طبقہ پیداکیا، جو احساس کمتری کا شکار ہے۔ اردو اخبار میں مسلمانوں کے علاوہ بھی وہ سب ہوتا ہے جو کسی معیاری اخبار میں ہونا چاہیےـ
ہم اس بات سے واقف ہیں کہ فسادات اور دہشت گردی کے پس پردہ ہندستانی میڈیا کہیں نہ کہیں عام مسلمانوں کے جذبات کو مجروح کررہا ہے۔ فرضی انکاﺅنٹرس کے واقعات پر غیر اردو اخبارات اور میڈیا کی خاموشی ہمیں پاگل کرتی ہے۔ ابھی حال میں انڈیا ٹوڈے نے ایک سروے میں بتایا کہ ہندستانی مسلمان گھروں میں کم اور جیلوں میں زیادہ ہیں۔ اتر پردیش میں مسلسل فسادات میں مسلمانوں کا خون ہوتا رہا۔ کبھی ہجومی تشددکے نام پر،کبھی مخصوص لباس کی وجہ سے مسلمانوں کو مسلسل نشانہ بنایاگیا۔لیکن غیر اردو اخبارات خاموش رہے۔ حکومت بے قصور مسلمان نوجوانوں کو حراست میں لیے جانے کے باوجود اپنی گھناﺅنی سیاست میں مصروف رہی ـ صرف اردو اخبارات تھے جو ان خبروں کو نمایاں طور پر شائع کررہے تھے۔
غیر اردو اخبارات اور میڈیا کا رول شروع سے مسلم مخالفت کا رہا ہے۔ فرضی انکاﺅنٹر پر یہ میڈیا چیختا ہے مگرجب مسلمان بے قصور ثابت ہوتا ہے تو یہ میڈیا خاموش ہوجاتا ہے۔
اردو اخبارات ہماری ضرورت ہیں، اردو اخبار کا حصّہ بنیں ـ احساسِ کمتری کا شکار نہ ہوں کہ آپ کے گھر اردو اخبار آتا ہے، جو سوال کریں ، انھیں یہ ضرور بتائیں کہ ہر موسم میں اردو اخبار ہی سچ بولتا ہےـ

(مضمون میں پیش کردہ آرا مضمون نگارکے ذاتی خیالات پرمبنی ہیں،ادارۂ قندیل کاان سےاتفاق ضروری نہیں)

4 مئی, 2020 0 comment

تجزیہ

کیا کورونا وائرس سے جنگ ہم اس طرح لڑیں گے؟

by قندیل 4 اپریل, 2020

written by قندیل

شکیل رشید(ایڈیٹرممبئی اردونیوز)
مجھے دفاع نہیں کرنا ہے۔
تبلیغی جماعت کے امیر مولانا سعد کاندھلوی اور ان کے رفقاء نے نادانی بھی کی، لاپروائی بھی برتی، وہ’مجرم‘ ہیں۔ اور ان کے ’جرم‘ کو ’سنگین‘ کہا جا رہا ہے اسی لیے ان کے خلاف ایف آئی آر درج کر کے کارروائی شروع کردی گئی ہے ۔ قانون حرکت میں آگیا ہے انہیں جو سزا ملنی ہوگی، اور ملنی چاہیے، وہ ملے گی ۔لیکن ایک سوال اس تعلق سے ضروری ہے، بھلے اس سوال کا کوئی جواب نہ دے؛ کیا یہ کہنا کہ تبلیغی جماعت کے ذمےداران ’کورونا جہاد‘ کر رہے تھے، وہ اس ملک میں ’کورونا وائرس‘ پھیلا رہے تھے لہٰذا وہ ’غداران وطن‘ ہیں، صحیح ہے؟ اس سوال پر ہم آگے غور کریں گے فی الحال ہم اپنے گریبانوں میں جھانک کر دیکھتے ہیں کہ کیا ہم سب عوام وخواص، امیروغریب، ہندو، مسلمان، سکھ، عیسائی، پنڈت، سورن، دلت، دیوبندی، بریلوی، شیعہ، پترکار، صحافی، جرنلسٹ، موحدین، ملحدین، ایم پی حضرات، ممبران اسمبلی، سیاستدان، سی ایم کیجریوال، پی ایم نریندر دامودر مودی ’مجرم‘ نہیں ہیں؟ کیا ہم سب نے اپنے اعمال و افعال اور اپنی حرکتوں، اپنے اقدامات و احکامات سے سارے بھارت کو خطرے میں نہیں ڈال دیا ہے؟
ملک میں جنوری کے آخری مہینے میں کورونا وائرس کا مریض پایا جاتا ہے اور چین کے حالات سے یہ واضح ہو جاتا ہے کہ یہ’وباء‘ آس پاس ہی نہیں ساری دنیا میں پھیل سکتی ہے ۔مگر ہمارے ملک کے ارباب حل و عقد بھی اور عوام و خواص اور امیر و غریب بھی اپنے حال میں مست اور مگن رہتے ہیں ۔ہماری مرکزی وزارت صحت 13 مارچ کو باقاعدہ یہ اعلان کرتی ہے کہ ’’میڈیکل ایمرجنسی جیسی کوئی بات نہیں ہے‘‘ جبکہ کورونا وائرس کے اثرات ساری دنیا پر پڑنے شروع ہو چکے ہیں، لوگ مر رہے ہیں اور بڑی بڑی طاقتیں اس کے سامنے گھٹنے ٹیک رہی ہیں!! ہمارے وزیراعظم مودی فروری کے مہینے میں اس ’وباء‘ سے بے پروا امریکہ کے صدر ڈونالڈ ٹرمپ کی میزبانی کا فریضہ نبھا رہے ہیں، احمدآباد کے اسٹیڈیم کولاکھوں افراد سےبھر دیتے ہیں ۔اس بھیڑ میں ’غیرملکی‘ بھی ہوتے ہیں!! آج احمدآباد ملک میں کورونا وائرس سے پھیلنے والی بیماری ’کووڈ 19‘ کا ایک مرکز بن گیا ہے ۔گجرات میں سب سے زیادہ اموات یہیں ہو رہی ہیں اور ریاست میں سب سے زیادہ مریض بھی احمدآباد ہی میں ہیں ۔اس کا ذمہ دار کون ہے؟ پی ایم مودی، ٹرمپ یا وہ بھیڑ جو اسٹیڈیم میں جمع تھی، یا وہ غیرملکی جو اس وقت وہاں موجود تھے؟ شاید اس سوال کا جواب بھی یہ دے دیا جائے کہ اس کی ذمہ دار بھی تبلیغی جماعت ہے! یہ جواب اس لیے ممکن ہے کہ اس ملک کے حکمراں اسی طرح کا جواب چاہتے ہیں ۔اور انہوں نے اپنے پروپیگنڈے سے عوام کو کچھ اس طرح سے ’ہپنا ٹائز‘ کر دیا ہے کہ عوام سے ایسے جواب کی ہی توقع ہے ۔
کیا یہ سوال آج نہیں اٹھنا چاہئے کہ جب جنوری ہی میں کورونا وائرس کا خطرہ سر پر منڈلانے لگا تھا تب پی ایم مودی کو اس کے سد باب کے لیے منصوبہ بندی کرنے کی بجائے ٹرمپ کی میزبانی کی فکر کیوں تھی؟ پی ایم مودی کی کورونا وائرس وباء کے تعلق سے بےحسی، لاپروائی اور بے فکری کا اندازہ اس حقیقت سے لگایا جا سکتا ہے کہ انہوں نے اس پر پہلی بار عوام کے درمیان زبان؛ 19 مارچ کو کھولی جب انہوں نے جنتا سے یہ اپیل کی کہ 22 مارچ کو ایک دن کا ’جنتا کرفیو‘ لگایا جائے گا وہ اس میں تعاون کریں ۔اور شام کے 5بجے تالی یا تھالی یا سنکھ بجا کر اس وائرس کے خلاف جنگ لڑنے والوں کی حوصلہ افزائی کریں ۔حالانکہ 13 مارچ کو ان کی وزارت صحت یہ اعلان کر چکی تھی کہ ’’ میڈیکل ایمرجنسی جیسی کوئی بات نہیں ہے‘‘ اور اس اعلان کے بعد دہلی کے وزیراعلیٰ کیجریوال حکم امتناعی لگا چکے تھے، مہاراشٹر میں وزیراعلیٰ ادھو ٹھاکرے نے 31 مارچ تک کے لیے ’لاک ڈاون‘ کا اعلان کر دیا تھا ۔گویا یہ کہ ریاستیں چوکنا ہوچکی تھیں، احتیاطی تدابیر اختیار کر رہی تھیں جن میں سب سے اہم احتیاط ایک دوسرے سے دوری بنانے کی تھی، مگر ہمارے پی ایم تالی اور تھالی کا اعلان کر کے لوگوں کو جیسے یہ آزادی دے رہے تھے کہ وہ جشن منائیں!! اور یہی ہوا، خوب تالیاں، تھالیاں اور سنکھ بجے، لوگوں نے باقاعدہ ڈھول تاشے بجائے ۔سڑکوں پر، بالخصوص گجرات کی، جشن کا سماں تھا، لوگ جمع تھے، گربا ناچ رہے تھے ۔ساری ’سماجی دوری‘ غارت ہو کر رہ گئی!! اور پھر جو ہونا تھا وہی ہوا۔یہ سوال اٹھے گا کہ جو ہجوم سڑکوں پر جمع ہوا تھا کیا اس میں ’کووڈ 19‘ کا کوئی مریض نہیں تھا؟ اگر نہیں تھا تو گجرات میں تیزی سے کورونا وائرس کی وباء کیوں پھیل رہی ہے اور اس کا ذمہ دار کون ہے؟ پی ایم نے 22 مارچ کو ’جنتا کرفیو‘ کے اعلان کے بعد، جس طرح اچانک کسی کو بھی، ریاستوں کے وزرائے اعلیٰ کو بھی اعتبار میں لیےبغیر ’نوٹ بندی‘ کا اعلان کیا تھا ’دیش بندی‘ کا اعلان کر دیا۔ کسی تیاری کے بغیر شب میں 8 بجے اعلان کیا اور رات کے 12 بجے سے ’دیش بندی‘ لاگو کر دی ۔یہ غریبوں کا دیش ہے، مزدوروں کا دیش ہے، یومیہ اجرت پر کام کرنے والوں کا دیش ہے، یہ نوکری چاکری کرنے والوں کا دیش ہے، ٹھیلے لگانے، سڑکوں پر سونے والوں اور بھکاریوں کا دیش ہے، ظاہر ہے چار گھنٹے کی مدت میں 21 دنوں کی ’دیش بندی‘ کے لیے سامان جٹانا یا اپنے عارضی ٹھکانوں سے اپنے اپنے گاوؤں کو جانا ممکن نہیں تھا، ریلیں، بسیں اور ہوائی جہاز جب بند ہوں، گاڑیاں سڑکوں پر نہ دوڑ رہی ہوں، تب زندگی کس قدر سونی اور اجڑی لگتی ہے اور کیسی بے بسی طاری ہوتی ہے اس کا آج ساری دنیا کو خوب اندازہ ہے ۔مگر وہ جو بےگھر و در و ٹھکانہ تھے انہیں تو ہر حال میں اپنے گھروں کو جانا تھا۔ایک خوف تھا کہ وہ کیا کریں گے، سب نے، ان کے سیٹھوں حکمرانوں نے انہیں مرنے کے لیے سڑکوں پر ڈھکیل دیا تھا، انہوں نے اپنے بچوں، ضعیفوں اور گھر والیوں کو کندھوں پر بٹھایا، کچھ دہلی کے آنند وہار پہنچے کچھ کہیں اور ۔یوپی سرکار اور کیجریوال سرکار دونوں نے بسوں کے انتظام کا اعلان کر رکھا تھا، پر بسیں ندارد تھیں، پھر لوگوں کے پیدل قافلے، یوپی، بہار، پنجاب اور ایم پی وغیرہ کی طرف چل پڑے ۔یہ ہزاروں کی تعداد میں تھے۔یہ راستے میں کہیں دل کے دورے سے اور کہیں سڑک حادثے میں مرے ۔خودکشی بھی کی۔زیادہ تر بھوک سے مرے ۔یہ لوٹے گئے، پولس کے ہاتھوں بے رحمی سے پیٹے گئے ۔مودی سرکار کا یہ ’غریب دشمن‘ چہرہ کوئی پہلی بار سامنے نہیں آیا ہے، یہ چہرہ بار بار سامنے آیا ہے اور اگر مودی سرکار رہی تو پھر سامنے آئے گا ۔کون ہے مزدوروں اور غریبوں کی اس درگت کا ذمہ دار؟ سپریم کورٹ میں مودی سرکار کے وکیل تشار مہتا نے کہا ہے کہ یہ جو لوگ پیدل گئے ہیں ان میں 30 فیصد کورونا وائرس متاثرین ہو سکتے ہیں! یہ کتنا بڑا فیصد ہے! یہ اپنے گاوؤں میں جب پھیلیں گے تو کتنوں ہی کو متاثر کریں گے،لاکھوں کو! ان میں سے نہ جانے کتنے مریں گے، بھلا یہ جو لاشیں بچھیں گی (اللہ نہ کرے) ان کا وزن کس کے کندھوں پر ہوگا؟ مودی اور کیجریوال سرکار کی بے حسی اور لاپروائی اس کا سب سے بڑا سبب ہو گی اور یہ انسانیت کا قتل عظیم ہو گا ۔
ایک بات جو پہلے کہنا تھی اب کہے دیتا ہوں ۔ٹرمپ کی آمد کے دوران دہلی کا جو مسلم کش فساد شروع ہوا تھا، وہ کیا تھا؟ زعفرانیوں کا الیکشن میں ہارنے کا ’انتقام‘ ۔کورونا وائرس نے خطرے کی گھنٹی بجا دی تھی لیکن مودی سرکار بھی اور کیجریوال سرکار بھی، این پی آر، آین آر سی اور سی اے اے کی تحریکوں اور شاہین باغ سمیت ملک بھر کے شاہین باغوں کو کچلنے کے لیے سارا زور لگا رہی تھی ۔کاش اس وقت حکمراں جاگ اٹھے ہوتے تو شاید کورونا وائرس کی شدت اتنی نہ بڑھتی ۔مگر اس وقت مسلمان نشانے پر تھے اس سب سے آنکھیں موندے تھے۔اور آج پھر مسلمان نشانے پر ہیں! کورونا وائرس کی وباء کو مسلمانوں سے جوڑ دیا گیا ہے، گویا کہ ان مسلمانوں نے جو اس ملک میں رہنے کے لیے شہریت کے کالے قانون کے خلاف احتجاج کرتے رہے ہیں اس وائرس کو لا کر اپنی اور اپنے بچوں ہی کی موت کا انتظام کیا ہے؟!! تبلیغی مرکز نظام الدین کے، ان دنوں کے اجتماع کا کسی بھی صورت میں دفاع نہ کیا جا سکتا ہے نہ کوئی کر رہا ہے، لیکن میڈیا کے اس زہریلے پروپیگنڈے کو بھی قطعی جائز نہیں مانا جا سکتا اور نہ مانیں گے کہ یہ ’کورونا جہاد‘ ہے۔یہ بات قبول نہیں کہ کوئی کسی مسلمان کو دیکھ کر اسے ’کورونا بم‘ کہے۔یہ قبول نہیں کہ اس بہانے مسجدوں اور مدرسوں پر چھاپے مارے جائیں اور گھر کی چھت پر باجماعت نماز ادا کرنے والوں پر مقدمہ درج کیا جائے ۔اور داودی بوہرہ جماعت کے مسلمانوں کی’تھال دعوت‘کی تصاویر پھیلا کر یہ گھٹیا الزام عائد کیا جائے کہ’مسلمان کورونا وائرس پھیلانے کے لیے برتن جھوٹا کر رہے ہیں‘! اور نہ ہی یہ قبول ہے کہ مختلف ریاستوں میں جو ’پکڑے‘ گئے ہیں انہیں تبلیغی مرکز کا بتا کر ’کورونا بم‘ کہہ کر ذلیل کیا جائے اور سلاخوں کے پیچھے ڈال دیا جائے ۔جانتے ہیں کہ کورونا کے ممکنہ مریضوں میں بہت سے غیر مسلموں کو بھی تبلیغی کہہ کر اور مان کر پکڑا گیا ہے!! یہ نفرت کا وائرس ہے، یہ کورونا وائرس سے زیادہ خطرناک ہے ۔ہم یہ سوال دریافت کر سکتے ہیں کہ بھلا 30 مارچ تک یہ جو بنارس کے مندر سے لے کر جموں اور تروپتی کے مندر تک (اپریل میں کیرال اور شرڈی میں رام نومی کی پوجا بھی اس میں شامل کر لیں) بے شمار شردھالو آتے جاتے رہے ہیں، اور یہ منادر کھلے رہے ہیں تو کیا اس سے کورونا وائرس پھیلنے کا خطرہ نہیں بڑھا، کیا لاک ڈاون کی خلاف ورزی کرکے گوبراورگئوموتر پارٹی سے ملک خطرے میں نہیں آیا، کیا یوپی کے وزیراعلیٰ یوگی نے ’دیش بندی‘ توڑ کر ایودھیا میں جورام للا کی پوجا کی جس میں بڑی تعداد میں لوگ شریک تھے اس سےوباء کا خطرہ نہیں بڑھا، شیوراج چوہان کی حلف برداری کی پر ہجوم تقریب اور یدی یورپا کی بھیڑ بھاڑ والی شادی کی دعوت میں شرکت سے یہ خطرہ نہیں بڑھا، 23 مارچ تک پارلیمنٹ چلی تو کیا دیش خطرے میں نہیں پڑا، پر ہم یہ سب دریافت نہیں کریں گے کیونکہ کوئی جواب نہیں ملے گا۔ مگر یہ سب تقریبات اسی قدر ملک کو خطرہ میں ڈالنے والی تھیں جس قدر کہ تبلیغی جماعت کا اجتماع ۔لوگ یہ سوال پوچھ رہے ہیں، ان میں بہت سارے ہندو ہیں، کہ صرف تبلیغی جماعت ہی کیوں ’مجرم‘، کیجریوال اور مودی سرکار کیوں نہیں، امیت شاہ اور وزارت خارجہ کیوں نہیں؟ یہ غیر ملکی جنہیں اب بلیک لسٹ کیاگیا ہے کیسےبھارت آئے، ویزے کس نے دئے، ائرپورٹ پر غیر ملکیوں کی اسکریننگ کیوں نہیں ہوئی؟ اور دہلی پولس کیوں سوئی رہی؟
تبلیغی مرکز نے لاپروائی کی، نادانی کی بلکہ مجرمانہ غفلت برتی جس کے اثرات تین طرح سے پڑ سکتے ہیں، ایک تو یہ کہ جوتبلیغی متاثرین یہاں وہاں پھیلے گی وہ لاتعداد افراد میں کورونا وائرس پھیلائیں گے۔جان بڑی قیمتی ہوتی ہے اس کا خیال جماعت نے نہیں رکھا، دوسرا اثر یہ کہ مسلمان معتوب ٹھہریںگے بلکہ معتوب ٹھہرنے لگے ہیں،ممکن ہے کہ ’لنچنگ‘ جیسے حالات نہ پیدا ہو جائیں، اور تیسرا بڑا نقصان یہ ہوگا کہ حضرت مولانا الیاس کاندھلویؒ نےخلوص اور لگن سے جس تحریک کوپروان چڑھایا وہ خطرے میں پڑ جائے گی، مرکز پر تالا ڈال دیا گیا ہے یہ کیسی افسوس ناک خبرہے اور یہ صرف نادانی، ہٹ دھرمی اور من مانی کی وجہ سے مشورے نہ ماننے کے سبب ہوا ہے۔ مگر صرف مرکز پر جو ٹھیکرا پھوڑا جا رہا ہے وہ درست نہیں ہے کیونکہ اس نے انتظامیہ سے خط و کتابت جاری رکھی تھی، بھلا یہ سرکاری ذمےداران، افسران، پولس، کیجریوال اور مودی سرکار کیوں حرکت میں نہیں آئی؟ کیا اس کا مقصد تبلیغی جماعت کو پھنسانا تھا؟ حقیقت یہی ہے کہ یہ سب کے سب ’مجرم‘ ہیں۔جو لوگ کورونا وائرس سے مرے اور جو مریں گےیہ ان سب کے ’قاتل‘ ہیں۔اور ہم سب بھی کہ ہم احتیاط نہیں کر رہے ہیں، سڑکوں پر میلے لگا کر اپنی اور دوسروں کی جانیں خطرے میں ڈال رہے ہیں ۔اب بھی وقت ہے احتیاط برت لیں، وباکو ہندو اور مسلم نہ بنائیں مل جل کر متحد ہو کر اس سے لڑیں ورنہ لاشیں اٹھانے والے نہیں ملیں گے ۔

(مضمون میں پیش کردہ آرا مضمون نگارکے ذاتی خیالات پرمبنی ہیں،ادارۂ قندیل کاان سےاتفاق ضروری نہیں)

4 اپریل, 2020 0 comment

قندیل

خداراان احتجاجات کومشرف بہ اسلام مت کیجیے!

by قندیل 14 دسمبر, 2019

written by قندیل

نایاب حسن
پورے ملک میں این آرسی/سی اے بی کے خلاف احتجاج ایک پرزور آندھی کی شکل اختیار کرچکاہے،ایسا لگتاہے کہ اب یہ آندھی تھمنے والی نہیں ہے،یہ بل اب حکومت اور عوام کے درمیان آرپارکی جنگ میں تبدیل ہوسکتاہے۔اس کے خلاف ہندوستان ہی نہیں،عالمی سطح پر آوازیں اٹھ رہی ہیں،اقوامِ متحدہ سے لے کر انسانی حقوق کی تنظیموں تک کی طرف سے اسے ردکیاجارہاہے،فوری طورپر اس کے جواثرات مرتب ہوئے ہیں ان میں بنگلہ دیشی وزیر اور جاپانی وزیر اعظم تک کا دورہئ ہند ملتوی ہونا اور خود ہندوستانی وزیر داخلہ امیت شاہ کا اروناچل کا دورہ رد ہونا شامل ہے۔عالمی میڈیا میں کئی ایسی رپورٹس اور مضامین شائع ہوچکے اور ہورہے ہیں،جن میں اس بل کی قانونی و دستوری خامی پر پر زور بحثیں ہورہی ہیں۔
قابلِ ذکر بات یہ ہے کہ این آرسی اور مجوزہ شہریت ترمیمی بل کے خلاف احتجاج ابھی دوچار دن سے نہیں ہورہاہے،گزشتہ کئی مہینے سے ہورہاہے،البتہ اب سے ہفتہ بھر پہلے تک یہ شمال مشرقی ریاستوں آسام و تری پورہ و اروناچل وغیرہ میں ہورہاتھا اورجب سے پارلیمنٹ سے یہ بل پاس ہواہے،تب سے اس کا دائرہ پورے ملک تک پھیل چکاہے اورکل سے تو اس کی شکل ایک تحریک کی ہوچکی ہے۔متعدد سیاسی تجزیہ کار اسے ایک نئی سول نافرمانی تحریک سے بھی تعبیر کررہے ہیں،گویاہندوستان کوایک بار پھر سسٹم کے مظالم و زیادتی سے آزادی کے لیے پوری قوت سے میدانِ احتجاج میں آنا ہوگااور ایسا لگ رہاہے کہ یہ ملک اس کے لیے بالکل تیار ہے۔اگر اپوزیشن کی کوئی مرکزی پارٹی مثلاً کانگریس اس تحریک کو تمام تر دستیاب طاقت و قوت کے ساتھ اٹھاتی ہے،توعین ممکن ہے کہ اس کے لیے زندگیِ نو کا سامان ہوجائے اور گزشتہ چھ سال سے جس سیاسی بن واس کااسے سامنا ہے،وہ ختم ہوجائے۔کانگریس کو غالباً اس کا ادراک ہے؛چنانچہ اس کی طرف سے آج رام لیلامیدان میں ”بھارت بچاؤ“ریلی کا انعقاد کیاگیاتھا،جس میں سونیاوراہل اور پرینکاسمیت دسیوں دیگر کانگریسی لیڈران اور ہزاروں کی تعداد میں عوام موجودتھے۔امید کی جانی چاہیے کہ کانگریس اسی عنوان سے یہ ریلی ملک بھر میں کرے گی اور شہریت ترمیمی بل کے نقصانات اور اس کے خطرناک مضمرات و عواقب سے اس ملک کے عوام کو روشناس کروائے گی۔یہ بل تو سرے سے گاندھی جی کے نظریہئ ہندوستان کے خلاف ہے،اگر آپ مذہب کی بنیاد پر کسی کو ہندوستان کا شہری بنائیں گے یا اسے ہندوستان سے نکالیں گے،تویہ تو ہندوستان کے آئین و دستور کی اساس کے ہی منافی ہے۔اسی چیز کوبنیاد بناکر ملک کے بیشتر حساس شہری،دانشوران اور سماجی کارکن احتجاج کررہے ہیں۔
چند دنوں سے مسلمانوں کے احتجاج میں بھی تیزی آئی ہے،خصوصاً علی گڑھ مسلم یونیورسٹی،جامعہ ملیہ اسلامیہ اور دارالعلوم دیوبندوغیرہ کے طلبہ کے احتجاجات کے بعد عام مسلمانوں کے درمیان اس بل کے تعلق سے جاننے،سمجھنے اور پھر اس کی مخالفت کرنے کاماحول بناہے، کل جمعہ کی نماز کے بعد ملک کے مختلف شہروں میں جمعیۃ علماے ہندنے بھی اپنے طورپر احتجاج کیا،جنتر منتر پر ہونے والے احتجاج میں مولانا محمود مدنی بھی موجود تھے۔مسلمانوں کی طرف سے ہونے والے احتجاج میں ایک چیز جودیکھنے میں آرہی ہے اور وہ سراسر نقصان دہ ہے،وہ ہے خالص مذہبی جذباتیت کا اظہار اور احتجاج کے دوران نعرہئ تکبیر وغیرہ لگانا،گویاوہ کسی مذہبی میدانِ جنگ میں اترے ہوئے ہیں اور کفرواسلام کی معرکہ آرائی ہورہی ہے۔بھائی آپ تواحتجاج میں اب اترے ہیں،آپ سے کئی ماہ قبل سے تو غیر مسلم اس آگ میں کودے ہوئے ہیں، ذراشمال مشرقی ریاستوں کی خبر لیجیے،توپتاچلے گاکہ وہاں کے ہندوکس قوت اور بے خوفی کے ساتھ اس حکومت کے خلاف ڈٹے ہوئے ہیں۔احتجاج کرتے ہوئے نماز پڑھنے کی جو تصویریں سوشل میڈیاپر وائرل ہورہی ہیں اور ان پر جو”ایمان افروز“کیپشنز لکھے جارہے ہیں،وہ مسلمانوں کی ایمانی حرارت کوبھلے ہی تازہ کرنے والے ہوں،مگر سوشل پلیٹ فارم پر جب یہ چیزیں آئیں گی،توموجودہ زہرناک سیاسی ماحول میں ان کا منفی اثر مرتب ہونابھی یقینی ہے اور عین ممکن ہے کہ ان احتجاجات میں ”مذہبی روح“پھونکنے کی وجہ سے دھیرے دھیرے ہم میدان میں تنہارہ جائیں اور معاملہ ہاتھ سے جاتارہے۔آزاد ہندوستان کی تاریخ میں ایسے دسیوں سانحات رونما ہوچکے ہیں کہ ہم نے قومی،وطنی ودستوری ایشوز کومشرف بہ اسلام کردیااور اس کی وجہ سے ہمیں شرمناک ناکامیوں کا سامنا کرنا پڑا ہے۔ان موقعوں پر جذبات کی کھیتی کرنے والے بعض افراد اور جماعتوں کو توسرخیاں بٹورنے کا موقع مل جاتا ہے،مگر مجموعی طورپر مسلمان بری طرح پِٹ جاتے ہیں۔پس ہمارے ذہن میں یہ حقیقت اچھی طرح رہنی چاہیے کہ یہ بل صرف مسلمانوں کے خلاف نہیں ہے،کئی اعتباروں سے یہ ہندووں کے بھی خلاف ہے؛بلکہ یہ دراصل ہندوستان کی جمہوری روح،اس کی ہزاروں سال کی تہذیبی و انسانی روایت،گاندھی جی کے نظریہئ ہندوستان اورآزادہندوستان کے معماروں کے ذریعے تیارکردہ دستور کے خلاف ہے۔تمام تر احتجاجات اور احتجاجی نعروں کا زور اسی پر ہونا چاہیے۔یہ اسلام اور کفر کی جنگ ہرگزنہیں ہے،یہ جنگ اس بات کی ہے کہ ہندوستان ستر سال قبل اختیارکردہ سیکولرزم کی راہ پر چلے گا یامٹھی بھر فرقہ پرست اور تنگ نظرطالع آزماؤں کے ہاتھوں شکست کھاجائے گا!

14 دسمبر, 2019 0 comment

تجزیہ

شہریت ترمیمی بل:ہرش مندرکیوں مسلمان ہونا چاہتے ہیں؟

by قندیل 10 دسمبر, 2019

written by قندیل

عبدالعزیز
مسٹر ہرش مندر اپنے سماجی اور فلاحی کاموں کی وجہ سے پورے ملک میں جانے جاتے ہیں۔ موصوف 20 سال تک مدھیہ پردیش اور چھتیس گڑھ کے قبائلی علاقے میں آئی اے ایس افسر کی حیثیت سے کام کرتے رہے۔ عوام کے حق اطلاعات کی قومی مہم کے وہ اساسی ممبر ہیں۔ بندھوا مزدور اورمینٹل ہوسپیٹل کے اور نیشنل ہیومن رائٹس کمیشن آف انڈیا کے کور گروپ کے ممبر تھے۔ اوربہت سے فلاحی اداروں کے ممبر رہ چکے ہیں۔ 2010ء میں سونیا گاندھی نے ہندستان کے قومی مشاورتی کونسل کا انھیں ممبر بنایا تھا۔
He was appointed a Member of India’s National Advisory Council by the council President Sonia Gandhi in June 2010. He convened the working groups on the Food Security Bill, Land Acquisition and Rehabilitation Bill, Child Labour Abolition, Urban Poverty and Homelessness, Disability Rights, Bonded Labour, Street Vendors and Urban Slums, and co-convened the groups on the Communal and Targeted Violence Bill, Dalits and Minorities and Tribal Rights, among others. His tenure was not renewed in 2012.
He is currently the Director of the Centre for Equity Studies, an autonomous institution engaged in research and advocacy on issues of social and economic justice and equity. He is also the founder of the campaigns Aman Biradari, for secularism, peace and justice; Nyayagrah, for legal justice and reconciliation for the survivors of communal violence; Dil Se, for street children; and Hausla for urban homeless people. He has also been appointed the Special Commissioner to the Supreme Court of India for the purpose of monitoring the implementation of all orders relating to the right to food (PUCL vs Union of India and others, Writ Petition 196 of 2001).
اتنے سارے فلاحی اداروں کے شاید ہی ہندستان میں کوئی ممبر ہو۔ ایسا لگتا ہے کہ انسانیت کیلئے جو ان کے دل میں درد ہے اور ہندستان کا جو ان کا تصور ہے NRC اور CAB کی وجہ سے ان کو بھاری صدمہ پہنچ رہا ہے۔ جس کی وجہ سے انھوں نے ایک ایسا اعلان کیا ہے جو ایک بڑے دھماکے سے کم نہیں ہے۔ آج (11دسمبر) ان کا ایک مضمون انگریزی روزنامہ ’دی انڈین ایکسپریس‘ میں شائع ہوا ہے۔ پہلے انھوں نے جامع دلائل کی روشنی میں ثابت کیا ہے کہ شہریت کا ترمیمی بل کس قدر غیر انسانی، غیر دستوری اور غیر اخلاقی ہے۔ مضمون کے آخر میں وہ لکھتے ہیں کہ ”اگر شہریت ترمیمی بل پاس ہوا تو میں فیصلہ کرچکا ہوں کہ سول نافرمانی کروں گا۔ سب سے پہلے میں مسلمان ہونے کا اعلان کروں گا۔ اورایسے شہریوں کے ساتھ لڑائی لڑوں گا جن کو ستانے کی کوشش کی جائے گی۔ جب این آر سی کا قومی پیمانے پر کام شروع ہوگا تو میں اس کا بائیکاٹ کروں گا اور کوئی بھی دستاویز دینے سے انکار کردوں گا اور اپنے لئے اسی سزا کا مطالبہ کروں گا جو مسلمان بھائیوں اوربہنوں کو حراست کیمپ یا کسی اور طرح سے ان کو حقوقِ شہریت سے محروم کرنے کے بعد دیا جائے گا“۔
ایسے حالات میں جبکہ چاروں طرف اندھیرا ہے روشنی کی یہ کرن جو بحر ظلمات پر بھاری ہے۔ ایسے لوگ دنیا میں ہمیشہ حق کے پاسبان ہوتے ہیں اور زمین کا نمک کہلاتے ہیں۔ علامہ اقبال نے تاتاریوں کے حملے کے حوالے سے کہا تھا ؎
’ہے عیاں یورش تاتار کے افسانے سے…… پاسباں مل گئے کعبے کے صنم خانے سے‘
کب کس کو اللہ تعالیٰ ہدایت دیدے اور اس کے دل کو حق و انصاف سے معمور کردے کہا نہیں جاسکتا۔ جگر مراد آبادی نے سچ کہا ہے ؎
’اللہ اگر توفیق نہ دے انسان کے بس کا کام نہیں …… فیضانِ محبت عام سہی عرفانِ محبت عام نہیں‘
انھوں نے اپنے مضمون میں لکھا ہے کہ”دستور مستقل محاصرے میں ہے۔ جب سے نریندر مودی دوبارہ برسر اقتدار آئے ہیں دستور کو تیز چھری سے ذبح کرنے کی کو شش کی جارہی ہے۔ اگر پارلیمنٹ میں شہریت ترمیمی بل پاس ہوگیا تو وہ پنجڑے میں بند ہوجائے گا اور اس کی روح قفس عنصری سے پرواز کر جائے گی اور ایک ایسی نئی قوم ابھر کر سامنے آئے گی جس کے اندر غیظ و غضب، برہنہ طاقت، اکثریتی جارحیت اور اقلیتوں کیلئے دشمنی اور عناد پائی جائے گی۔ اس بل کے ذریعے حقوق کی تقسیم ہوگی کہ کس کو کتنا اور کس طرح دیا جائے۔ کون ہندستان سے تعلق رکھتا ہے اور تعلق رکھنے کی کیا شرائط ہوں اور حقیقت میں ہندستان کا تعلق کس سے ہے اور کس سے نہیں ہے؟ ان بیہودہ چیزوں کی جانچ پڑتال کی جائے گی“۔
ایک بنگالی نژاد آسامی قاضی نیل نے کہا ہے کہ ”یہ ملک میرا ہے لیکن مجھے اس ملک کا باشندہ نہیں مانا جارہا ہے (یعنی میں اپنے گھر میں بے گھر ہوں)“۔ وہ ہندستان سے محبت کرتا ہے لیکن ہندستان اسے اپنانے سے گریز کرتا ہے۔ ان سب سوالوں کا مفصل جواب انسانی نقطہ نظر سے دستور میں محفوظ ہے۔
دستور میں ہر ایک ہندستانی کو برابری کا حق دیا گیا ہے، خواہ وہ کسی بھی مذہب اور عقیدے سے تعلق رکھتا ہو۔ عیسائی، پارسی، ہندو، سکھ اور جینی سب کے برابر مسلمانوں کو بھی حق دیا گیا ہے۔ آزادی سے پہلے سنگھ پریوار کے ہیرو اور نظریہ ساز وی ڈی ساورکر نے ہندو مسلمان کے نظریے کو پیش کیا تھا۔ اسے بعد میں مسلم لیگ نے اپنالیا۔ ہندستان کی دستور ساز اسمبلی نے وی ڈی ساورکر نے مسلم لیگ کے دو قومی نظریے کو مسترد کردیا۔ اس آئیڈیا کو بھی مسترد کردیا کہ ہندستان کا تعلق صرف ہندوؤں سے ہے۔ جواہر لعل نہرو نے اعلان کیا کہ ”ہم ہر کسی کو ہندستانی تسلیم کریں گے جو اپنے آپ کو ہندستانی شہری کہے گا“۔ بی جے پی گورنمنٹ نے ’سی اے بی‘ کو پارلیمنٹ پیش کرکے پرانے زخموں کو پھر تازہ کردیا ہے اور ایک ایسا قانون بنانے جارہی ہے جو مذہب اور عقیدے کی بنیاد پر ہے اور مسلمانوں کو دوسرے درجے کا شہری قرار دینے کی بات درج ہے۔ شہریت کے قانون میں آزادی کے بعد کئی ترمیمات ہوئی ہیں لیکن کبھی بھی مذہب اور عقیدے کی بنیاد پر کسی کی تفریق نہیں کی گئی۔ آسام میں 19لاکھ لوگوں کو غیر شہری قرار دیا گیا ہے۔ ان میں سے جو غیر مسلم ہوں گے اس بل کے ذریعے انھیں شہریت دے دی جائے گی اور جو مسلمان ہوں گے ان کو شہری حقوق سے محروم کر دیا جائے گا۔ ایک طرح سے’سی اے بی‘ این آر سی ہی کیلئے بنائی گئی ہے۔ سی اے بی کے قانون ہونے کے بعد یہ پیغام ہوگا کہ مسلمانوں کے سوا جن کے پاس بھی دستاویز ہو یا نہ ہو ان کو شہریت دی جائے گی۔ اس کا مطلب یہ ہوا کہ مسلمانوں کو ہر طرح سے خوف و دہشت میں مبتلا کیا جائے گا۔
کیونکہ دستاویز کے ذریعے مذہب کی شناخت کی جائے گی جو خود ایک پیچیدہ مسئلہ ہوگا، کیونکہ دستاویز ہی اس کا مذہب اور عقیدہ ثابت کرے گا۔ میں ایک مذہب کے ماننے والوں میں پیدا ہوسکتا ہوں اور جب میں بالغ ہوجاؤں تو اسے مسترد کرسکتا ہوں یا میں ایسے والدین کے گھر میں پیدا ہوجاؤں جن کا کوئی مذہب ہی نہ ہو۔ اگر مذہب کو خصوصی بنیاد حاصل ہوجاتا ہے سٹیزن شپ قرار دینے یا نہ قرار دینے کا تو آخر کس دستاویز کو تسلیم کیا جائے گا؟ اگر میں رفیوجی ہوں تو مجھے حراست کیمپ میں بھیج دیا جائے گا۔
اس سے تو صاف صاف ظاہر ہوتا ہے کہ جو ملک کا دستور ہے وہ ناقابل عمل ہے۔ اس کا وجود بے معنی ہوکر رہ جائے گا۔جو لوگ حکومت کی کرسی پر ہوں گے یا ان کے ماتحتین ہوں گے وہ جس کو جب چاہیں گے اور جس طرح چاہیں گے پریشان کرنے کی کوشش کریں گے“۔ ہرش مندر نے اپنے مضمون میں اس طرح کے بہت سے سوالات اٹھائے ہیں۔ اس طرح کے سوالات اور لوگ بھی اٹھا رہے ہیں۔
انگریزی اخبار ’دی ٹائمس آف انڈیا‘ نے بھی آج (11دسمبر) اپنے اداریہ میں لکھا ہے کہ ”CAB appears to being pushed through without adequate thought of social, political, constitutional and foreign policy consequences. The Rajya Sabha, acting as India’s House of Elders, may want to give it a hard look. (سماجی، سیاسی، دستوری اور خارجہ پالیسی کے نتائج کے بارے میں شہریت ترمیمی بل پیش کرتے ہوئے صحیح طور پر غور و فکر سے کام نہیں لیا گیا ہے۔ راجیہ سبھا میں بزرگ اور تجربہ کار ممبران ہوتے ہیں، ان کو چاہئے کہ اس بل کو نظر غائر سے دیکھیں)۔ اداریہ میں لکھا گیا ہے کہ اس طرح کی نقصان دہ اور خطرناک سوچ کو ختم کرنا چاہئے کیونکہ شہریت ترمیمی بل مسئلہ حل کرنے کے بجائے بہت سنگین مسائل پیدا کرسکتا ہے۔
نریندر مودی اور امیت شاہ دونوں اس وقت اپنی پارٹی میں بھی اور ملک میں بھی آمر ہوچکے ہیں۔ جس کی وجہ سے کسی بہتر اور صحت مند سوچ یا فکر کا پیدا ہونا مشکل ہے۔ اقتدار کا نشہ ہر نشہ سے بدتر ہوتا ہے۔ انسان جب تک تباہ و برباد نہیں ہوجاتا اور جب تک بے جا اختیارات سے محروم نہیں ہوتا وہ صحیح سوچ اور سمجھ سے قاصر ہوتا ہے۔ خوشامدیوں کا ایسا گھیرا ہوتا ہے کہ خوشامدی اس کی بے جا تعریف و توصیف کرکے اسے کہیں کا نہیں رکھتے۔ اس وقت بی جے پی کے اندر یہ بحث جاری ہے کہ امیت شاہ دو بلوں کو پاس کراکر بی جے پی میں اپنی قیادت کا لوہا منوالیا ہے۔ بعض یہ کہہ رہے ہیں کہ کئی لحاظ سے امیت شاہ نریندر مودی سے آگے ہوگئے ہیں۔ اگر چہ نریندر مودی کی طرح ان کا کرشماتی کردار نہیں ہے لیکن وہ نریندر مودی سے زیادہ جرأت مند معلوم ہوتے ہیں۔ بی جے پی کے لوگ پارلیمنٹ میں امیت شاہ نے جو الٹے سیدھے جوابات دیئے ہیں اس پر بھی وہ بہت خوش ہیں۔ حالانکہ ان کا ہر جواب جھوٹ سے بھرا ہوا تھا اور تاریخی حقائق سے پرے تھا۔ بی جے پی میں وہ جتنے بھی مقبول ہوجائیں لیکن دانش مندوں میں ان کی نادانی اور حماقت پوشیدہ نہیں رہ سکتی۔ بی جے پی کے ایم پی یہ بھی کہہ رہے کہ مودی جی نے امیت شاہ کو آگے بڑھاکر اپنے جانشیں کو مقرر کرلیا ہے۔ ایک وقت تھا واجپئی اور ایڈوانی جی میں مقابلہ کیا جاتا تھا۔ ایڈوانی جی نے واجپئی کو خود ہی وزیر اعظم کا چہرہ ہونے کا انتخابی موقع پر اعلان کیا تھا۔ دونوں کا انداز ان دونوں کی طرح نہیں ہے۔ واجپئی جی میں بردباری تھی۔ ایڈوانی کی جو جارحیت تھی اس کو واجپئی کم کرنے کی کوشش کیا کرتے تھے۔ ایڈوانی واجپئی کی بے جا تعریف بھی نہیں کرتے تھے۔ امیت شاہ جو نریندر مودی کے چہیتے ہوئے ہیں اس کی وجہ یہ ہے کہ امیت شاہ مودی کی تعریف و توصیف میں رطب اللسان ہوتے ہیں۔ لگتا ہے کہ مودی کو خوشامد اور حاشیہ برداری بہت پسند ہے۔ امیت شاہ سے زیادہ اس کمزوری کو کون جانتا ہوگا۔ امیت شاہ نریندر مودی کی اسی کمزوری کا فائدہ اٹھا رہے ہوں گے۔ اب تو دونوں ایک دوسرے سے اتنے قریب ہوگئے ہیں کہ لوگ مودی حکومت کہنے کے بجائے مودی-شاہ حکومت کہنے لگے ہیں۔ میرے خیال سے دونوں ملک کیلئے بلا ہیں اور حکومت آفت کے مترادف ہے۔ خدا ہی جانتا ہے کہ یہ بلا یا آفت کب ٹلے گی؟
E-mail:[email protected]
Mob:9831439068

10 دسمبر, 2019 0 comment

قومی خبریں

اردو زبان و تہذیب کے سب سے بڑے جشن ’جشنِ ریختہ‘ کی آمد

by قندیل 10 دسمبر, 2019

written by قندیل

چھٹے جشن ریختہ کی سہ روزہ تقریبات 13تا15 دسمبر کو میجر دھیان چند نیشنل اسٹیڈیم، دلی میں منعقد ہوں گی
نئی دہلی: چھٹے جشن ریختہ کی سہ روزہ تقریبات کا آغازکل یعنی13 دسمبر سے دلی کے میجر دھیان چند نیشلک اسٹیڈیم میں ہونے جارہا ہے۔ جشن ریختہ اپنی گزشتہ پانچ تقریبا ت کی غیر معمولی کامیابی کے سبب دنیا بھر میں اردو زبان و تہذیب کے سب سے بڑے جشن کے طور پر جانا جاتا ہے۔ اس بار پھر سال کے اختتام پر یہ جشن دلی اور باہر کے لوگوں کے لیے اردو زبان،ادب اور تہذیب کو قریب سے جانین اور اس کے مختلف ذائقوں کو محسوس کرنے کا سبب بنے گا۔13 دسمبرشام چھ بجے معروف ادبی اور سیاسی شخصیت کرن سنگھ جشن کا افتتاح کریں گے۔ اس کے بعد انتہائی مقبول صوفی موسیقی کار ہرشدیپ کور اپنے نغموں سے محفل کو رونق بخشیں گی۔ 14 اور15 دسمبر کو ادبی مذاکرے، داستان گوئی، چہار بیت، ڈراما، قوالی،غزل سرائی،نوجوان شاعروں کی محفل، خواتین کا مشاعرہ،خطاطی، فلم اسکرینگ اور بہت سی دلچسپ تقریبات کے ذریعے اردو زبان اور اس کے تہذیبی رنگوں کو پیش کرنے کی کوشش کی جائے گی۔ جشن میں ہر بار کی طرح اس بار بھی ادب، فلم،تھیٹر اور آرٹ کی دنیا سے اہم ترین شخصیات شامل ہورہی ہیں، جن میں خاص طورپر گوپی چند نارنگ، شمس الرحمان فاروقی، منور رانا، جاوید اختر، راحت اندوری، استاد شجاعت خان،، رضا مراد، چندن داس، سچن پلگاونکر، تشار گاندھی، شمیم حنفی، انْبھو سنہا، دویا دتا، پویاش مشرا، مظفر علی، ہرشدیپ کور، جسپندر نرولا، تشار گاندھی، لبنیٰ سالم، منجری چترویدی، شبنم ورمانی، میتھلی ٹھاکر، استاد رضا علی خان اور پوجا گایتونڈے قابل ذکر ہیں۔جشن میں ہر سال کی طرح اس سال بھی چار اسٹیج ہوں گے اور چاروں ایک ساتھ الگ الگ رنگ اور ذائقے بھرے پروگراموں سے جلوہ آفروز ہوں گے۔ 14تاریخ کو اردو پریمیوں کے لیے معروف نقّاد اور ادیب پروفیسر گوپی چند نارنگ اور شافع قدوئی کی میر تقی میر پر بات چیت سننا ایک یاد گار تجربہ ہوگا۔ وہیں دوسری طرف بزم خیال میں مشہور و معروف شاعر فرحت احساس اور ابھیشیک شکلا کی اردو شاعری پر ماسٹرکلاس ایک الگ اور انوکھی پہل ہے، جس سے اردو شاعری سیکھنے اور سمجھنے کی خواہش رکھنے والے اور اردو شاعری کا شوق رکھنے والے تمام لوگ اردو شاعری کے اسلوب اور فن کے بارے میں جان سکیں گے۔ اس بار جشن میں ایک اہم گفتگو اردو زبان اور اس سے جڑی تمام بولیوں کے حوالے سے بھی ہوگی جس میں علی گڑھ سے تشریف لا رہے پروفیسر مولا بخش،سراج اجملی اور حیدراباد سے تشریف لا رہے شاہد حسین اپنے خیالات کا اظہار کریں گے۔ ان کے ساتھ دلّی یونورسٹی کے پروفیسر محمد کاظم بھی موجود ہوں گے۔معروف شاعر منوّر رانا اور راحت اندوری مشاعرہ اور اس کی تہذیب پر روشنی ڈالیں گے۔ اس کے ساتھ مہاتما گاندھی کی ایک سو پچاسویں سالگرہ پر ان کو خراج عقیدت پیش کرتے ہوے ایک سیشن ہوگا جس میں گاندھی جی کے پوتے تشار گاندھی اور ان کے ساتھ معروف نقاد علی احمد فاطمی اور سہیل ہاشمی موجود ہوں گے۔ مشہور صوفی گلوکارہ میتھلی ٹھاکر اپنی دھرتی کے سر سے محفل میں مٹھاس گھو لیں گی۔ اس کے بعد جاوید صدّیقی اور مظفّر علی ادب اور سنیما پر بات کریں گے،وہیں محفل خانے میں جاوید اختر اور سیف محمود ساحرلدھیانوی کی زندگی اور شاعری پر اپنے خیالات کا اظہار کریں گے۔ تیسرے دن کی شروعات محفل خانہ میں شبنم ورمانی کی آواز میں کلام کبیر سننے سے ہوگی۔ اسی دن بھی بلدیپ سنگھ گرو نانک کی زندگی اور ان کے پیغام پر روشنی ڈالیں گے اور نانک جی سے متلعق روحانی نغمے گائیں گے۔اسی دن گرو نانک کے روحانی ریختہ پر بھی ایک اہم سیشن ہوگا جس میں اختر الواسع، جسپال سنگھ اور ناشر نقوی حصّہ لیں گے۔ اس بار جشن میں ایک اہم گفتگو غالب کے حوالے سے بھی ہوگی۔ اس سیشن میں معروف نقاد شمس الرحمان فاروقی غالب کی زندگی اور ادب پر پون ورما سے بات چیت کرتے ہوے نظر آئیں گے۔ اسی دن خواتین چہار بیت بھی جشن ریختہ کی ایک خاص پیش کش ہوگی۔ اسی کے ساتھ اردو ہندی ہندستانی پر ایک گفتگو میں اہم علمی و ادبی شخصیات شامل رہیں گی۔ علی رفات فتیحی، سدھیش پچوری، ویر بھارت تلوار اس اہم موضوع پر بلرام شکلا سے بات کرتے ہوے نظر آئیں گے۔ ممتاز نقاد شمیم حنفی اسی دن پروفیسرانیس الرحمان کے ساتھ اقبال کی ادبی سفر پر بات کریں گے۔ موسیقی کے شائقین کے لیے ستار نواز استاد شجاعت خان کو سننے کا بھی ایک خاص موقع ہوگا۔ ساتھ ہی معروف فلم اداکارہ دویا دتّا کچھ دل کی اور کچھ دنیا کی باتیں کرتی ہوئی نظر آئیں گی۔ مشہور داستان گو ہمانشو واجپئی اور رجنی چاندیول داستان لکھنو پیش کریں گے۔ اس سب کے علاوہ متعدد علمی و ادبی شخصیتیں جشن کی رونق میں اضافہ کریں گی۔ اردو تہذیب اور کلچر کی نمائندگی کے لیے اردو بازار کا بھی اہتمام کیا جارہا ہے،جس میں اردو تہذیب کی یادگاروں کو نمائش اورخرید و فروخت کے لیے پیش کیا جائے گا۔ کھان پان کے شوقین لوگوں کے لیے ایک فوڈ کورٹ بھی لگایا جا رہا ہے جس میں کشمیری،حیدر آبادی، لکھنوی اور پرانی دلی کے پکوانوں کی بہار ہوگی۔ جشن ریختہ کے موقعے پر ریختہ فانڈیشن کے بانی سنجیو صراف کا کہنا ہے کہ ”ہماری کوشش اردو زبان و تہذیب کو فروغ دنیا ہے۔ ریختہ ویب سائٹ کے ساتھ جشن ریختہ کی تقریبات بھی ہماری انہیں کوششوں کا حصہ ہیں۔ گزشتہ پانچ برس میں جشن ریختہ کو ملی بے پناہ کامیابی اور ہر طبقے و عمر کے لوگوں میں اس کی مقبولیت نے ہمارے ارادوں کو مضبوط کیا ہے۔اس سال بھی ہم پوری توانائی کے ساتھ اس جشن کا انعقاد کر رہے ہیں۔ ہمیں یقین ہے کہ ہر سال کی طرح اس سال بھی یہ جشن اردو کی مٹھاس اور اس کی تہذیب میں پوشیدہ یگانگت کے پیغام کو دور تک لے کر جائے گا۔“

10 دسمبر, 2019 0 comment

تجزیہ

کیاشہریت ترمیمی بل مسلمانوں کے خلاف نہیں ہے؟

by قندیل 10 دسمبر, 2019

written by قندیل

عبدالعزیز

موجودہ شہریت کا ترمیمی بل جو لوک سبھا میں پاس ہوگیا ہے اور راجیہ سبھا میں پاس ہونا باقی ہے 1955ء کے شہریت کے قانون کو ترمیم کے ذریعے جو قانون بنایا جارہا ہے وہ ہندستان کے دستور دفعہ 14 اور دفعہ 21کے صریحاً خلاف ہے، جس میں صاف صاف کہا گیا ہے کہ قانون کے سامنے سب برابر ہیں۔ اس بل میں کہا گیا ہے کہ بنگلہ دیش، افغانستان اور پاکستان سے جو ہندو، سکھ، عیسائی، جین اور بدھ مت کے لوگ آئیں گے ان کو شہریت دی جائے گی۔ مسلمانوں کو اس سے الگ رکھا گیا ہے۔ جس کا مطلب یہ ہے کہ مسلمانوں کو شہریت نہیں دی جائے گی۔ آر ایس ایس اور بی جے پی نے پہلے ’این آر سی‘ کی بنیاد پر یہ ہوا کھڑا کیا کہ ہر ایک کو جو درانداز ہے چن چن کر ملک سے باہر نکالا جائے گا۔ آسام میں 2014ء کے بعد این آر سی کی مہم تیزی آئی اور 30 اکتوبر 2019ء میں اس کی فائنل لسٹ شائع ہوئی، جس میں 19 لاکھ آسامی باشندوں کو غیر شہری قرار دیا گیا ہے۔ اس لسٹ کے مطابق تقریباً 12 لاکھ غیر مسلم ہیں اور 7 لاکھ مسلمان۔ جب یہ بل قانون بن جائے گا تو اس بل کے تحت 12لاکھ ہندوؤں کو ہندستان کی شہریت دی جائے گی اور سات لاکھ مسلمانوں کے ساتھ ظالمانہ سلوک کیا جائے گا۔ آس پاس کا کوئی ملک مسلمانوں کو اپنے ملک میں آباد کرنے کیلئے تیار نہیں ہوگا۔ جس کی وجہ سے ایسے لوگوں کو حراست کے کیمپ میں رکھا جائے گا۔ یہ شہریت کا ترمیمی بل جو راجیہ سبھا میں پیش کیا جانے والا ہے اسی مقصد کیلئے بنایا جارہا ہے کہ این آر سی کے ذریعہ جو لوگ غیر شہری قرار دیئے جائیں گے ان میں مسلمانوں کے علاوہ جو بھی ہوگا اس کو آسانی سے ہندستانی شہریت دے دی جائے گی۔ بل میں کہا یہ جارہا ہے کہ پڑوس کے تین ممالک میں مسلمانوں کو پریشانی یا اذیت کا سامنا نہیں کرنا پڑتا اس لئے کہ ان ممالک میں مسلمانوں کی اکثریت ہے اور یہ ممالک اسلامی ممالک کہلاتے ہیں۔ یہ بات جو کہی جارہی ہے وہ محض مسلمانوں کو شہریت سے اور شہری حقوق سے محروم کرنے کیلئے کہی جارہی ہے۔ اس بل کے پیچھے جو مقصد ہے وہ مسلمانوں کو دوسرے درجے کا شہری بنانے کی سازش ہے۔ یہ بات نہ صرف مسلمان سمجھ رہے ہیں بلکہ فرقہ پرستوں کے علاوہ سارے لوگ سمجھ رہے ہیں۔

گزشتہ روز امیت شاہ جو صحیح معنوں میں جھوٹوں کے شاہ (بادشاہ) ہیں ان کو اس بل کی مدافعت میں کئی جھوٹ بولنے پڑے، لیکن جو سب سے بڑا جھوٹ اور وہ بھی سفید جھوٹ تھا وہ یہ تھا کہ یہ بل مذہب کی بنیاد پر نہیں ہے اور نہ مسلمانوں کے خلاف ہے، جبکہ یہ سراسر مذہب کی بنیاد پر ہے اور ایک خاص فرقے کے ساتھ مذہب کی بنیاد پر امتیاز کیا جارہا ہے۔ علامہ اقبال نے کہا تھا ؎ ’جو کرے گا امتیازِ رنگ و خوں مٹ جائے گا‘۔ علامہ ہی نے آج کے حالات کو اپنی دوبیں آنکھوں سے دیکھ لیا تھا ؎ ’وطن کی فکر کر ناداں مصیبت آنے والی ہے- تری بربادیوں کا مشورہ ہے آسمانوں میں‘ – ’نہ سمجھوگے تو مٹ جاؤگے ہندوستان والو! تمہاری داستاں تک بھی نہ داستانوں میں‘۔

آر ایس ایس اور بی جے پی کے لوگ دانستہ یا نادانستہ طور پر ملک میں امتیاز رنگ و خوں کی وجہ سے دوسری تقسیم کی طرف یا دوسری بار خانہ جنگی کی طرف لے جارہے ہیں۔ اپوزیشن خاص طور پر کانگریس کی طرف سے جو یہ بات کہی جارہی ہے کہ سنگھ پریوار والے مذہب کی بنیاد پر ملک کو تقسیم کر رہے ہیں اس کی مدافعت کیلئے امیت شاہ نے دوسرا جھوٹ بولا اور یہ کہا کہ کانگریس نے مذہب کی بنیاد پر اگر ملک کو تقسیم نہ کیا ہوتا تو آج اس بل کو پیش کرنے کی ضرورت نہ ہوتی۔ سدھیندرا کلکرنی نے جو ایل کے ایڈوانی کے دست راست تھے کہا ہے کہ ”امیت شاہ سیاہ قانون کی مدافعت سفید جھوٹ کے ذریعے کر رہے ہیں، جبکہ ان کو معلوم ہے کہ نہ کانگریس کے ذریعے تقسیم ہند ہوا اور نہ کانگریس نے اس تقسیم کو تسلیم کیا بلکہ یہ مسلم لیگ نے کیا۔ کانگریس سیکولر انڈیا کو تسلیم کرتی ہے اور اس کے قیام کیلئے کوشاں رہتی ہے“۔ مشہور تاریخ داں عرفان حبیب نے کہا ہے کہ ”تم (امیت شاہ) لوک سبھا کے فلور پر ایسی بات کہتے ہو کیونکہ تم تاریخی حقائق کو نہ سمجھنے اور نہ ماننے کیلئے تیار ہو“۔ ایک اور تاریخ داں ایس راگھون نے رام منوہر لوہیا کی کتاب "Guilty Men of India’s Partition and tweeted” (تقسیم ہند کے قصوروار لوگ)کا حوالہ دیاکہ ”اس کے بارے میں کوئی شک نہیں کہ جو لوگ اکھنڈ بھارت کیلئے نعرہ بلند کرتے ہیں یعنی یہ موجودہ جن سنگھ اور ہندو مت کی روح کے غیر ہندو جانشینوں نے برطانیہ اور مسلم لیگ کو ملک کی تقسیم میں بھرپور مدد اور معاونت کی“۔

بہت سے لوگ یہ سمجھتے ہیں کہ دو قومی نظریے کے بانی مبانی مسلم لیگ یا محمد علی جناح ہیں، لیکن حقیقت یہ ہے کہ جن سنگھیوں کے ہیرو اور نظریہ ساز وی ڈی ساورکر نے 1923ء میں اپنے مضمون ”ہندوتو“ میں دو قومی نظریے کا ذکر کیا تھا، جسے 23مارچ 1940ء میں مسلم لیگ نے اپنی ایک قرار داد کے ذریعے منظور کیا تھا۔ 1937ء میں ہندو مہا سبھا کے ایک اجلاس میں احمد آباد میں ساورکر نے دو قومی نظریہ کی وکالت کرتے ہوئے کہا تھا کہ ”یہ زیادہ بہتر ہے کہ مرض کی تشخیص کی جائے اور مہلک بیماری کو نظر انداز نہ کیا جائے۔ ہم لوگوں کو چاہئے کہ تلخ حقیقت کو تسلیم کرلیں۔ وہ تلخ حقیقت یہ ہے کہ ہندستان ایک قوم یا متحدہ قوم نہیں ہے بلکہ دو قوموں پر مشتمل ہے۔ ہندو اور مسلمان“۔ دستور کے ایک کلیدی معمار ڈاکٹر بی آر اامبیڈکر نے کہا تھا کہ ”یہ عجیب و غریب بات ہے کہ مسٹر ساورکر اور مسٹر جناح ایک دوسرے کی مخالفت کرتے ہیں لیکن دو قومی نظریے کو ماننے یا تسلیم کرنے میں دونوں میں مکمل اتفاق ہے۔ دونوں نہ صرف اتفاق کرتے ہیں بلکہ اصرار کرتے ہیں کہ ہندستان میں دو قومیں بستی ہیں۔ ایک ہندو قوم ایک مسلم قوم“۔

گزشتہ روز کانگریس نے سوشل میڈیا پر ایک مہم زور و شور سے دن بھر چلائی اور ایک پیغام یہ پھیلایا کہ ”بی جے پی کی حکومت اور برطانوی حکومت میں خصوصیت کے لحاظ سے کوئی فرق نہیں ہے۔ اپنی برتری کیلئے یہ جماعت ملک کے لوگوں کو دو حصوں میں تقسیم کر رہی ہے۔ برطانوی حکومت نے ہندو مسلمانوں کو لڑانے اور حکومت کرنے کا فیصلہ کیا تھا اور ملک کو سارے وسائل و ذرائع کو لوٹا تھا اور یہاں کے باشندوں کو تکلیف اور مصیبت میں مبتلا کیا تھا۔ آج یہی حال بی جے پی اور آر ایس کی حکومت کا ہے۔ دونوں حکومت میں بہت سی مشابہتیں ہیں۔ کانگریسی لیڈر منیش تیواری نے لوک سبھا میں گزشتہ روز کہا کہ کانگریس نے نہیں بلکہ دو قومی نظریہ کا بانی مبانی ساورکر ہیں۔ لوک سبھا میں اپوزیشن کے لیڈران نے دلائل اور دستور کی دفعات کی روشنی میں بتایا کہ بل کو واپس لینا چاہئے کیونکہ یہ دستورِ ہند کے خلاف ہے اور ملک کے تکثیری معاشرے کو تہس نہس کر دے گا۔ اس بل کے ذریعے ملک کی ایک دوسری تقسیم کی بنیاد ڈالی جارہی ہے، جس سے ملک مضبوط و مستحکم نہیں ہوگا۔ ایک خاص فرقہ کو نشانہ بناکر سارے بنیادی حقوق سے محروم کرکے ملک کے بھلے ہونے کے بارے میں سوچنا صریحاً حماقت اور نادانی ہے۔ بی جے پی کے ایم پی کی تعداد لوک سبھا میں 303 ہے اور اس کے اتحادی بھی ہیں اس لئے اسے معلوم تھا کہ تقریروں اور سوال و جواب کے سیشن سے کچھ ہونے والا نہیں ہے۔ جب ووٹنگ ہوگی تو بی جے پی کی سازش کامیاب ہوجائے گی اور یہ بل منظور ہوجائے گا۔ لوک سبھا میں بی جے پی کا یہ مقصد پورا ہوگیا۔ راجیہ سبھا میں 11نومبر کو یہ بل پیش کیا جائے گا، وہاں اگرچہ بی جے پی کو اکثریت حاصل نہیں ہے لیکن یہ کہا جارہا ہے کہ توڑ جوڑ کے ذریعے راجیہ سبھا میں بھی بی جے پی Manage کرنے میں کامیاب ہوجائے گی۔ دونوں ایوانوں میں پاس ہونے کے بعد بل ایکٹ میں تبدیل ہوجائے گا اور صدر جمہوریہ کے دستخط اور نوٹیفیکیشن کے بعد اسے قانون مانا جائے گا۔

اس میں کوئی شک نہیں بہت سے لوگ سپریم کورٹ میں اس کو چیلنج کریں گے۔ سپریم کورٹ دستور کی دفعہ 14 اور دفعہ 21 کی روشنی میں فیصلہ ہے قانون سب کیلئے برابر ہے۔ مذہب، ذات پات، رنگ و نسل، زبان و جنس کی بنیاد پر کسی کے ساتھ تفریق یا امتیاز نہیں کیا جائے گا۔ اب دیکھنا یہ ہے کہ سپریم کورٹ میں کیا ہوتا ہے؟ سپریم کورٹ نے بابری مسجد کے معاملے میں جو فیصلہ کیا ہے اور کشمیر کے معاملے میں جو اس کا رویہ اب تک ہے اس کی وجہ سے سپریم کورٹ سے اچھی توقع رکھنا مشکل ہے۔ اب مسلمانوں اور انصاف پسند شہریوں کیلئے مذکورہ بل یا قانون کے خلاف جمہوری طریقے سے زبردست مہم یا آندولن چلانے کے سوا کوئی چارہ نہیں ہے۔ انگریزوں کی غلامی سے نجات حاصل کرنے کیلئے جس طرح ہندو اور مسلمانوں نے مل جل کر جدوجہد کی تھی اسی پیمانے پر یا اس سے بڑھ کر جدوجہد کرنے کی ضرورت ہوگی۔ اس وقت فرقہ پرست عناصر جو آج برسر اقتدار ہیں برطانیہ کے وفادار تھے اور جنگ آزادی میں شامل نہیں تھے۔ اس وقت برطانیہ کی حکومت نہیں ہے لیکن بقول کانگریس موجودہ حکومت برطانوی حکومت کے مشابہ ہے۔ لہٰذا اس معاملے میں سیاسی اور غیر سیاسی جدوجہد کی ضرورت ہوگی۔ سیاسی پارٹیوں پر غیر سیاسی جماعتوں کے مقابلے میں ذمہ داری زیادہ ہے۔ اس وقت کانگریس کی رہبری اور قیادت میں آزادی کیلئے جنگ لڑی گئی تھی۔ گاندھی، نہرو اور مولانا ابوالکلام آزاد جیسی عظیم شخصیتیں آزادی کی جدوجہد میں شامل تھیں۔ ایسی عظیم شخصیتیں اس وقت تو نہیں ہیں لیکن شخصیتیں جدوجہد اور عظیم مقصد کیلئے کام کرنے سے عظیم بنتی ہیں۔ امید ہے کہ یہ دوسری جدوجہد سے اور فرقہ پرستوں سے آزادی کیلئے بہت سی شخصیتیں ابھر کر سامنے آئیں گی اور لوگوں کی قیادت اور رہبری کریں گی۔

E-mail:[email protected]

Mob:9831439068

10 دسمبر, 2019 0 comment

مقبول ترین

اردو ڈراما مقابلے میں طلبا و طالبات نے بہترین ڈرامے پیش کیے

by قندیل 10 دسمبر, 2019

written by قندیل

ئی دہلی:اردو اکادمی، دہلی اسکولوں کے طلباء و طالبات میں تعلیم کا ذوق و شوق پیدا کرنے اور ان میں مسابقت کا جذبہ پیدا کرنے کے لیے ہر سال تعلیمی مقابلے منعقد کرتی ہے۔ ان مقابلوں میں اول، دوم اور سوم آنے والے طلباء و طالبات کو انعام دیتی ہے اور بچوں کی ہمت افزائی کے لیے کنسولیشن انعام بھی دیتی ہے۔ ان مقابلوں میں تقریری، فی البدیہہ تقریری، بیت بازی، اردو ڈراما، غزل سرائی، کوئز(سوال و جواب)، مضمون نویسی و خطوط نویسی، خوشخطی مقابلے اور امنگ پینٹنگ مقابلہ شامل ہیں۔ یہ تعلیمی مقابلے دہلی کے پرائمری تا سینئر سیکنڈری اردو اسکولوں کے طلباء و طالبات کے درمیان منعقد ہورہے ہیں۔ یاد رہے کہ یہ مقابلے 13/دسمبر تک جاری رہیں گے۔

آج اردو ڈراما مقابلہ برائے مڈل زمرہ(چھٹی تا آٹھویں جماعت کے طلبا و طالبات) منعقد کیا گیا جس میں ڈاکٹر ہادی سرمدی اور ڈاکٹر جاوید حسن نے جج کے فرائض کی ذمہ داری ادا کی۔ اس مقابلے میں 16اسکولوں کے 112طلبا و طالبات نے مختلف موضوعات پر ڈرامے پیش کیے۔جج صاحبان کے فیصلے کے مطابق کریسنٹ اسکول، موجپور کو پہلے انعام کا مستحق قرار دیا گیا۔ دوسرے انعام کے لیے گورنمنٹ سروودیہ کنیا ودیالیہ، نورنگر کو دوسرے انعام کے لیے مستحق قرار دیا گیا اور تیسرے انعام کے لیے حکیم اجمل خاں گرلز سینئر سیکنڈری اسکول، دریا گنج اور اینگلوعربک سینئر سیکنڈری اسکول، اجمیری گیٹ کو مستحق قرار دیا گیا۔ ان کے علاوہ حوصلہ افزائی انعام کے لیے گورنمنٹ سروودیہ کنیا ودیالیہ، کورٹ روڈ، کڑکڑی روڈ، وشواش نگر اور رابعہ گرلز پبلک اسکول گلی قاسم کو مستحق قرار دیا گیا۔ ان انعامات کے علاوہ طلبا و طالبات کی انفرادی اداکاری کی بنیاد پر جن طلبا و طالبات کو انفرادی انعام کے لیے منتخب کیا گیا ان میں سیدہ مدیحہ احمد بنت نوید احمد،سندس عالم بنت عادل رشید(خدیجۃالکبریٰ گرلز پبلک اسکول، جوگا بائی)،عائشہ بنت انصار حسین (زینت محل گورنمنٹ سروودیہ کنیا ودیالیہ، جعفرآباد)،ایشا خان بنت مجیب الرحمن،عائشہ بانو بنت محمد مصطفی(ہمدرد پبلک اسکول، سنگم وہار)،ناصحہ خاں بنت اجمل خاں،علینہ بنت نعیم اختر (گورنمنٹ گرلز مڈل اسکول، چوہان بانگر)،مہوش بنت شرافت حسین اور خدیجہ بنت آفتاب عالم(حکیم اجمل خاں گرلز سینئر سیکنڈری اسکول، دریا گنج)،ارم بنت عبدالرحمن(گورنمنٹ گرلز سینئر سیکنڈری اسکول، چشمہ بلڈنگ)،محمد ریّان ولد محمد وسیم،محمد کاشف ولد محمد شاہد اورمحمد ثاقب ولد محمد خالد(اسلامیہ مڈل اسکول، پہاڑی بھوجلہ)،سبحانہ فیض بنت فیض احمد اورمدیحہ نور بنت محمد عارف(رابعہ گرلز پبلک اسکول، گلی قاسم جان)،رضوانہ بنت محمد رازق(گورنمنٹ گرلز سیکنڈری اسکول، ڈپٹی گنج)،علیشان ولد شریف (گورنمنٹ بوائز سینئر سیکنڈری اسکول، ڈی بلاک، جہانگیرپوری)،سامعہ انصاری بنت محمد شاہد اورارشان خان ولد نثار خاں (ڈاکٹر ذاکر حسین میموریل سینئر سیکنڈری اسکول، جعفرآباد)،انایہ خاں بنت فہیم احمد(کریسنٹ اسکول، موجپور)،امان اللہ ولد محمد عاصم اورمحمد عمیر ولد محمد نفیس(اینگلو عربک سینئر سیکنڈری اسکول، اجمیری گیٹ)،سبحانہ وسیم بنت محمد وسیم(گورنمنٹ سروودیہ کنیا ودیالیہ، نور نگر)،ختیجہ بنت محمد انوار اورمہک ناز بنت عبدالسلام(گورنمنٹ سروودیہ کنیا ودیالیہ، اندر لوک) کے نام شامل ہیں۔

ڈراموں کے اختتام پرجج صاحبان نے اپنے تاثرات کا اظہار کرتے ہوئے بچوں کے ذریعے پیش کیے گئے ڈراموں کی تعریف کی اور ڈراموں میں پوشیدہ باریک باریک نکات کو سامنے رکھ کر بچوں کو ان کی اہمیت سے واقف کرایا۔ انھوں نے کہا کہ ڈرامے ہوں یا کوئی اوردیگر مقابلے ان میں الفاظ کی ادائیگی کا بڑا عمل دخل ہوتا ہے اس لیے اساتذہ کو چاہیے کہ ڈرامے کی پیش کش سے قبل الفاظ کی ادائیگی پر خاص توجہ دیں۔

10 دسمبر, 2019 0 comment

تجزیہ

ہمارے مسائل کیسے حل ہوں گے؟

by قندیل 9 دسمبر, 2019

written by قندیل

ترتیب: عبدالعزیز

زندگی ایک ہے، مگر اس کے مسائل بے شمار و لانہایت، ان مسائل کو حل کرنا تو درکنار کوئی آدمی اس کا دعویٰ بھی بجا طور پر نہیں کرسکتا کہ ان تمام مسائل حیات کو جامع طریق پر گن ہی سکے! روٹی کا مسئلہ اور پھر اس کے شاخسانے! …… پانی کا مسئلہ، کپڑے کا مسئلہ، سر چھپانے کیلئے مکان کا مسئلہ، صحت کا مسئلہ، انصاف کا مسئلہ، تعلیم کا مسئلہ، امن کا مسئلہ، جنگ کا مسئلہ…… مسائل انفرادی اور اجتماعی، معاشی، معاشرتی، ذہنی و نفسیاتی، خانگی و تمدنی، تہذیبی اور مذہبی، فکری و جذباتی، قومی اور بین الاقوامی…… شعوری اور لاشعوری مسائل!! کہ جن میں سے پھر ہر مسئلے کے شاخ درشاخ اجزاء ہیں۔ نت نئے مسائل کا ایک دیو پیکر لامتناہی جال سا دیدہ و دل اور فکر و نظر کے آسمان و زمین میں پھیلا ہوا ہے۔

ایک طرف مسائل کا یہ ہوش ربا ہجوم ہے اور دوسری طرف یہ حوصلہ فرسا منظر کہ ان میں کسی بھی ایک مسئلے کے سامنے کوئی بھی کامیاب حل آدمی کی خود ساختہ تدابیر کے ہاتھوں میں موجود نہیں! جو حل سوچا گیا تجربات اس کو پامال و سرنگوں کر ڈالا۔ جو تدبیر عمل میں لائی گئی اس کو ناکامی کا منہ دیکھنا پڑا۔ جو دوا استعمال کی گئی اس نے درد میں اور اضافہ ہی کردیا!…… ایک دو نہیں بے شمار تدابیر کی ناکامیاں اَنگنت لاشوں کے ڈھیر کی طرح ان میں سے ہر ایک مسئلے کے چاروں طرف پڑی سڑ رہی ہیں اور ان لاشوں کے درمیان یہ مسائل سر اٹھا اٹھاکر آدمی کی طرف دیکھتے ہیں اور آدمی ان مسائل کی طرف خوف، کشمکش، مایوسی اور اضطراب و کرب کے ناگفتہ بہ عالم میں آنکھیں پھاڑ پھارڑکر دیکھ رہا ہے۔ کبھی وہ ان کی طرف دیکھتا ہے اور کبھی گھبرا کر آنکھیں بند کرلیتا ہے۔ کبھی ڈرتے ڈرتے ان کی طرف قدم اٹھاتا ہے اور کبھی ان سے پیٹھ پھیر کر بھاگ پڑتا ہے۔

مگر مسائل زندگی پرچھائیوں کا ہجوم تو نہیں کہ ان سے شعور کی روشنی کے بعد مایوسی کی تاریکی میں برائے نام بھی نجات حاصل ہوجائے! وہ تو زندگی کے ٹھوس حقائق ہیں۔ عملی مسائل ہیں، چلتے پھرتے سوالات ہیں، آدمی جدھر بھاگتا ہے وہ اس کے ساتھ ساتھ بھاگتے ہیں۔ وہ فرار اختیار کرتا ہے تو وہ اس کا پیچھا کرتے ہیں۔ وہ خاموش ہوتا ہے تو وہ اس کو آواز دیتے ہیں۔ وہ چیخنے لگتا ہے تو وہ اس کے چاروں طرف جمع ہونے لگتے ہیں اور وہ سو جاتا ہے تو پریشان خوابوں کے آسیبی حملے کی شکل اختیار کرلیتے ہیں۔ نہ ان سے بیداری کو نجات ہے نہ غفلت کو۔ آدمی ان پر قہقہہ مارنا چاہتا ہے تو وہ اس کے حال پر رونے لگتے ہیں۔ وہ رونے لگتا ہے تو وہ اس کی بزدلی پر قہقہے لگاتے ہیں۔ کہیں اور کسی طرح وہ ان مسائل کی زد سے باہر نکل جانے میں کامیاب نہیں ہوسکتا۔

ان سے نجات کی صرف ایک ہی راہ ہے۔ ایک ہی طریقہ ہے اور وہ یہ کہ ان کو فی الواقع حل کیا جائے۔ان کو بھلایا نہیں جاسکتا۔ نہ ان کو گھٹایا جاسکتا ہے اورنہ مٹایا جاسکتا۔ یہ زندگی کے ساتھ شروع ہوتے ہیں اور زندگی کے ساتھ ختم نہیں ہوتے! زندگی کے بعد بھی ہر آدمی اپنے ناکام مسائل کے الجھاؤ اسی دنیا میں دوسروں کیلئے اپنے پیچھے چھوڑ جاتا ہے اور ان کی جوابدہی کا بارِ گراں اپنے ایمان کے سر پر لئے ہوئے دوسری دنیا میں داخل ہوتا ہے۔ جہاں سے وہ کسی دوسرے آدمی کو اپنے احوال کی نہ کوئی خبر بھیج سکتا ہے اور نہ کسی دوسرے شخص کے بس میں یہ ہے کہ وہ اس کی کوئی ادنیٰ سی بھی مدد کرسکے۔

کیا آج مسائلِ حیات کی یہ گفتگو کسی بھی معقول آدمی کی نظر میں غلو اور مبالغہ کی فہرست میں شمار ہوسکتی ہے؟ ان تلخ حقائق پر افسانوں کا شبہ کیا جاسکتا ہے؟ ممکن ہے کبھی کوئی کورا فلسفی یا تخیل کی دنیا میں رہنے والا شاعر یہ بات کہہ دے تو کہہ دے، لیکن آج جبکہ زندگی اپنی تمام انفرادی، اجتماعی اور عالمگیر وسعتوں میں ان تمام مسائل کا ننگا اور وحشیانہ رقص سر کی آنکھوں سے دیکھ رہی ہے اور کانوں سے ان کا شور سن رہی ہے اور ہاتھوں سے ان کی سنگینی اور کھردراہٹ کو چھو رہی ہے تو کون ہے جو ہلکا سا تصور بھی کرسکے کہ یہ مسائل ہی نہیں ہیں بلکہ محض ذہنی اُپج اور تخیل کی پیداوار ہیں۔

آج آدمی کی زندگی کا ہر گوشہ ان مسائل کے شور سے گوشہئ محشر بنا ہوا ہے۔ خاندانی نظام کے ٹکڑے ہوچکے ہیں۔ معاشرتی نظم پارہ پارہ ہے،قومی ڈھانچہ بگڑا پڑا ہے، بین الاقوامی زندگی تلپٹ ہورہی ہے۔ نظریں سراسیمہ ہیں، کان پھٹے جارہے ہیں۔ شعور مفلوج ہے۔ لاشعور مجروح، دل و دماغ سر و گریباں ہیں۔ جنسی انارکی قیامت بن چکی۔ عدالتی نظام تماشا ہو گیا۔ تعلیمی اداروں پر طلباء پتھراؤ کر رہے ہیں۔ بیویاں شوہروں سے غداری کر رہی ہیں اور شوہر بیویوں سے، اولاد اپنے ماں باپ پر حملہ آور ہے۔ پولس مجرموں کے ساتھ، انصاف کے دروازے بند ہیں۔ علمی ایجادات کی کوکھ سے تباہ کاریاں جنم لے رہی ہیں۔ فکری افق گمراہیوں سے تاریک ہیں۔ روحانی سکون کا تصور تک محال ہوچکا۔ جسمانی کھنڈروں میں بیماریوں اور وباؤں کا طوفان سا آگیا ہے۔

اور یہ سب کچھ اس دور میں ہورہا ہے جبکہ زندگی کے اسباب و وسائل اپنے نقطہئ عروج پر ہیں۔ سائنس کی روشنی سے آسمان کے دور افتادہ گوشے تک روشن ہیں، مگر زندگی زمین کی سیاہ رات میں ٹھوکریں کھاتی اور سر پیٹتی پھر رہی ہے۔ راکٹ اور طیارے خلائی کُرّوں کو چھو رہے ہیں اور کشش ارضی سے باہر نکل کر لامتناہی فضاؤں میں پرواز کر رہے ہیں، مگر زندگی کو زمین پر چلنا دو بھر ہورہا ہے۔ انسانی آلات امراض کا سینہ چیر چیر کر غیر مرئی جراثیم کو گرفت میں لے چکے مگر زندگی، بے کیف زندگی میں اضافہ ہورہا ہے اور جینے کی مدت گھٹ رہی ہے۔

ناکامی کا سبب کیا ہے آخر؟ یہ ٹریجڈی جو ختم ہوتی نظر نہیں آتی، پھیلتی بڑھتی اور سب کچھ اپنی لپیٹ میں لیتی چلی جارہی ہے اس کا نقطہئ آغاز ہے کیا؟ یہ وہ سوال جو ان تمام مسائل کا بنیادی مسئلہ ہے۔ اگر ہم چاہتے ہیں کہ مسائل کا کوئی حل ہمارے ہاتھ آئے تو ہمیں اس بنیادی مسئلے سے پہلا قدم اٹھانا اور اس پر پہلی نظر ڈالنا قطعاً ضروری ہوگا۔ جو فرد اپنے افرادی مسائل کو حل کرنے کا سنجیدگی سے خواہاں ہے اس کو بھی اسی طرح سوچنا ہوگا اور جو گروہ اپنے گروہی اور اجتماعی مسائل کو حل کرنے کا آرزو مند ہے اس کو بھی اسی زاویے سے اپنی سوچ کا آغاز کرنا ہوگا۔ بنیاد کی درستی میں ہی پوری عمارت کی درستی کا راز تلاش کیا جاسکتا ہے اور بیج کے اندر جھانک کر ہی پورے درخت کی گزشتہ و آئندہ تاریخ کا بھرپور مطالعہ ممکن ہے۔ ایٹم ہی کے اندر کائنات کی اصل تصویر چھپی ہوئی ہے۔ ہر شے اپنی اصل ہی سے چلتی ہے اور اصل ہی کی طرف واپس آتی ہے۔ زندگی کی ہر حقیقت ایک گولائی کا سفر ہے۔ کُل شئیٍ یرجع الٰی اصلہٖ، ہر شے جہاں سے شروع ہوتی ہے وہیں آکر ختم ہوتی ہے تو درحقیقت مسائل کے نقطہئ آغاز کا سراغ ان کی انتہا اور انجام کا سراغ ہے۔

ناکامی کی اصل وجہ یہ ہے کہ آدمی نے اپنے مسائل کو خدا سے بے نیاز ہوکر خود ہی حل کرلینے کی ہولناک حماقت کا ارتکاب کر ڈالا ہے۔ وہ خود کوئی مسئلہ نہ کبھی حل کرسکا ہے اور نہ کبھی حل کرسکے گا۔ ہاں اس کو خدا سے ان تمام مسائل کو حل کرانے کیلئے زندگی کے سفر کا از سر نو آغاز کرنا ہوگا اور اسی انداز پر اس کا سفر اسے اس کی منزل مقصود تک پہنچا سکے گا۔ زندگی ایک راستہ ہے جس کے سیکڑوں پیچ و خم ہیں۔ مسائل اس سفر کی تحریک ہیں اور فکر و نظر اس سفر کا نقشہ اور خاکہ ہیں اور جدوجہد سفر ہے جو اس خاکے میں رنگ بھرتی ہے اور کامیابی۔ حقیقی ابدی کامیابی اس سفر کی منزل مقصود اور ساحل مراد ہے، لیکن کسی بھی سفر کیلئے صرف اتنا ہی سامانِ سفر کافی نہیں۔ منزل پر پہنچنے کیلئے جس بنیادی شے کی ضرورت ہے وہ نہ راستہ ہے، نہ نقشہئ سفر بلکہ وہ بنیادی شے جو منزل پر رسائی کی ضمانت دیتی ہے اور جس کے بغیر یہ تمام ساز و سامان محض صفر ہے اور کچھ نہیں۔ اس کا نام ہے ”ہدایت“ اور ’ہدایت‘ خدا نے کسی کے ہاتھ میں نہیں رکھی۔ یہ وہ تحفہ ہے جو اگر کسی کو حاصل کرنا ہے تو خود خدا کے دست خاص سے ہی حاصل کرنا ہے۔ خود خدا کا در ہی اس متاعِ بے بہا کو طلب کرنے کا واحد در ہے۔ واحد آستانہ ہے۔ اس در کو چھوڑ کر ہدایت کیلئے آدمی جس دروازے پر بھی دستک دے گا وہاں اس کو ہدایت کی جگہ ضلالت اور صرف ضلالت نصیب ہوگی۔ علم بھی جہل بن جائے گا۔ عقل بھی دیوانگی بن جائے گی۔ دولت بھی افلاس میں ڈھل جائے گی۔ سامان بھی بے سرو سامانی میں تبدیل ہوکر رہ جائے گا۔ آج کا دور اس حقیقت کا جیتا جاگتا ثبوت ہے۔ آج کامیابی اور فلاح کا جتنا سامان آدمی کے پاس ہے اتنا شاید کبھی بھی نہ تھا، لیکن آدمی آج جس قدر کامیابی سے محروم اور تہی دامن و تہی دست ہے اتنا وہ شاید کبھی بھی نہ تھا اور اس تمام ساز و سامان میں ہمیں جس شے کی کمی…… واحد کمی نظر آرہی ہے وہ بھی وہی ایمان باللہ اور ہدایت طلبی کی کمی ہے۔ آج اس دنیا میں صرف جذبہئ زندگی اور عبودیت کے سوا کیا کچھ موجود نہیں؟ …… یہ ہے وہ اصل چیز جس نے عہد حاضر کو کامیاب ساز و سامان کے ٹھیک قلب میں ناکامی ونامرادی کا ایک ماتم کدہ بناکر رکھ دیا ہے۔ (استفادہ از کتاب:کیا ہم مسلمان ہیں)

E-mail:[email protected]

Mob:9831439068

9 دسمبر, 2019 0 comment