رفیق سندیلوی
ازل کے بچھڑے ہُوؤں سے بھی مِل کسی لمحے
گیاہِ ہجر میں گُل بَن کے کِھل کسی لمحے
دھڑک دھڑک کے ہُوا خستہ حال پہلا دِل
اب ایک اور بناؤں گا دِل کسی لمحے
قیام تھا کہ سفر تھا، مُجھے نہیں بُھولا
صراحی سی تری گردن کا تِل کسی لمحے
مَیں خُشک چوب سا بے برگ و بَر رہوں گا کیا
نُمو پکڑ، مرے اندر بھی کِھل کسی لمحے
کہیں مَیں سمتِ دگر موڑ دوں نہ تیغ کا وار
ہُوئے جو ہاتھ مرے منفعِل کسی لمحے
اُسی طریق پہ جیسے کئے گئے یک جا
الگ کروں گا مَیں یہ آب و گِل کسی لمحے
بحال ہوگی بالاۤخر مری گُھٹی ہُوئی سانس
ہٹے گی خُود مرے سینے سے سِل کسی لمحے
بس ایک رَو میں تھے ہم دونوں,کچھ پتہ نہ چلا
بدن بدن میں ہُوا مُنتقِل کسی لمحے
مُجھے سفر نے رکھا ہے ہمیشہ تازہ دَم
کہ مَیں ہُوا ہی نہیں مُضمحِل کسی لمحے
الگ ہُوں خود کسی لمحے وُجودِ غیر سے مَیں
اور اپنی ذات سے ہُوں مُتّصِل کسی لمحے
ابھی تو تھامے ہُوئے ہُوں مَیں دامنِ تہذیب
کیا گیا جو مُجھے مُشتعِل کسی لمحے
کبھی کبھی کا پلٹنا بھی اک اذیّت ہے
مَیں چھوڑ دوں گا تُجھے مُستقِل کسی لمحے