Uday thakre

ممبئی:وزیراعلیٰ ادھو ٹھاکرے کو ایم ایل سی نامزد کرنے کے لیے مہاراشٹر حکومت نے کابینہ سے دو بار تجویز پاس کرکے بھیجا ہے، لیکن گورنر بھگت سنگھ کوشیاری نے ابھی تک اس پرکوئی فیصلہ نہیں لیا ہے۔ اس پرآئینی بحران بڑھتاجا رہاہے۔اس سے پہلے گورنرکوشیاری نے ہی راتوں رات فڑنویس اوراجیت پوارکوحلف دلایاتھاجس پرکافی کرکری ہوئی تھی اوریہ سرکارگرگئی۔مدھیہ پردیش میں بھی سیاسی ڈرامہ ہوا،اپوزیشن کاالزام ہے کہ وہاں حکومت گرانے اوربنانے کے لیے لاک ڈائون میں تاخیرکی گئی ۔گورنربھگت سنگھ کوشیاری سے کشیدگی کے درمیان وزیراعلیٰ ادھو ٹھاکرے نے منگل کی رات وزیر اعظم نریندر مودی کو فون کرکے ریاست کی سیاسی صورتحال پر تبادلہ خیال کیاہے۔ذرائع کے مطابق ادھوٹھاکرے نے مودی کو فون کر کے مہاراشٹر کی موجودہ سیاسی صورتحال پربات کی ہے۔اس دوران ادھوٹھاکرے نے کہاہے کہ اس اہم وقت میں ریاست میں سیاسی عدم استحکام درست نہیں ہے۔اس سے ریاست میں غلط پیغام جائے گا، جس سے بچنا چاہیے.۔ اس پر وزیر اعظم نریندر مودی نے ادھوٹھاکرے کویقین دلایا ہے کہ وہ جلد سے جلد اس معاملے کو دیکھیں گے۔سی ایم ادھو ٹھاکرے کی پی ایم مودی سے بات چیت کے دوران ادھو ٹھاکرے کوقانون ساز کونسل کا رکن نامزد کرنے کی تجویز کو لے کر مہاوکاس اگھاڑی (MVA) کا وفد گورنر بھگت سنگھ کوشیاری سے ملاہے۔ اس صورت میں ریاست کابینہ نے پیر کی شام گورنر کو دوسری بار پیشکش بھیجی تھیجس میں ادھو ٹھاکرے کوایم ایل سی کے لیے نامزدکرنے کی اپیل کی گئی ہے۔تاہم، گورنر بھگت سنگھ کوشیاری نے ابھی تک حکومت کی تجویز پر کوئی فیصلہ نہیں لیاہے۔شیوسیناالزام لگارہی ہے کہ بی جے پی مداخلت کرکے گورنرکوفیصلے سے روک رہی ہے جس سے ان کی شبیہ بھی متاثرہوگی جورات میں حلف برداری کاالزام جھیل رہےہیں،اورسرکارکوغیرمستحکم کرنے کی کوشش کی جارہی ہے۔