Rahat Indori

۱۱را؍ملکوں کے شعرا اور ادبا شرکت کریں گے،پروفیسر پیر زادہ قاسم کی صدارت ہوگی

پٹنہ۔۱۲؍اگست:اردو کے طرح دار شاعر اور بغاوت کی آواز راحت اندوری کے ارتحال کے غم میں بزمِ صدف انٹرنیشنل ۱۵؍ اگست کی شام کو ایک بین الاقوامی مذاکرۂ علمی اور مشاعرے کا انعقاد کر رہا ہے جس کی صدارت مشہور عالمی شاعر پروفیسر پیر زادہ قاسم کریں گے۔ اس یادگاری تقریب اور مشاعرے میں ہندو پاک کے علاوہ یورپ، امریکہ،کینیڈا اور خلیج کے شامل گیارہ ممالک کے دانش وران اور ممتاز شعرا شرکت کریں گے۔ اس موقعے سے منعقد ہونے والے مذاکرے کا موضوع ’ اردو: آزادی اور امن کی زبان-ایک عالمی تناظر‘ طَے کیا گیا ہے جس میں ہمارے ادبا و شعرا اور دانش وروں کے خصوصی خطابات ہوں گے۔
اردو زبان و ادب کی عالمی تنظیم بزمِ صدف انٹرنیشنل، دوحہ( قطر) کی جانب سے ممتاز شاعر راحت اندوری کی یاد میں آیندہ ۱۵؍ اگست ۲۰۲۰ء کی شب ہندستانی وقت کے مطابق ۹ ؍ بجے ، پاکستانی وقت کے مطابق ساڑھے آٹھ بجے اور قطر وقت کے مطابق ساڑھے چھے بجے شام میں ایک مذاکرہ اور عالمی مشاعرے کا پروگرام طے کیا گیا ہے۔ راحت اندوری مرحوم کے شاعرانہ مزاج کے عین مطابق مذاکرے کا عنوان ’ اردو: آزادی اور امن کی زبان-ایک عالمی تناظر‘ متعیّن ہے۔
پروگرام کی صدارت مشہور عالمی شاعر پروفیسر پیر زادہ قاسم کریں گے۔ انگلینڈ سے جناب باصر سلطان کاظمی، جرمنی سے محترمہ عشرت معین سیما، امریکہ سے محترمہ حمیرا رحمان، کینیڈا سے محترمہ شاہدہ حسن، ابو ظہبی سے جناب ظہور الاسلام جاوید، سعودی عرب سے جناب مہتاب قدر، دوبئی سے جناب ریحان خاں، کویت سے جناب مسعود حسّاس، قطر سے ڈاکٹر ندیم ظفر جیلانی دانش، جناب احمد اشفاق اور محترمہ ڈاکٹر آشنا نصرت، پاکستان سے جناب عباس تابش اور ہندستان سے پروفیسر شہپر رسول، پروفیسر ارتضیٰ کریم، جناب حسن کاظمی، پروفیسر صفدر امام قادری، ڈاکٹر واحد نظیر اور ڈاکٹر تسلیم عارف شرکت فرما رہے ہیں۔
پروگرام کی تفصیلات پیش کرتے ہوئے بزمِ صدف کے چیر مین شہاب الدین احمد، سرپرستِ اعلامحمد صبیح بخاری ،ڈائرکٹر پروفیسر صفدر امام قادری نے بتایا کہ یہ پروگرام زوٗم ایپ اور فیس بُک لائیو کے ذریعے عوام تک پہنچایا جائے گا۔ ان اصحاب نے وبائی حالات کے پیشِ نظر مرحوم راحت اندوری کے مقام ومرتبے کے مطابق اس یادگاری تقریب کے آن لائن انعقاد کی غرض و غایت واضح کی۔ پروگرام میں ابتدائی طور پر خراجِ عقیدت اور مذاکرے کو شامل کیا گیا ہے اور دوسری نشست میں عالمی مشاعرے کا انعقاد ہوگا۔
بزمِ صدف نے اردو شاعری اور شاعروں کے قدر دانوں سے التماس کیا ہے کہ راحت اندوری کو خراجِ عقیدت پیش کرنے کے لیے فیس بُک لائیو پر بڑی تعداد میں ہندستانی وقت کے مطابق ۹؍بجے شب میں جمع ہو ں اور اس پروگرام کو کامیاب بنائیں۔ اس موقعے سے دنیا کے گیارہ ممالک کے شعرا کے کلام سے بھی عوام روٗبہ روٗ ہوں گے۔

منفرد لب ولہجہ کے فنکار،محبت و بغاوت کے امتزاج کے پیکر،عالمی شہرت یافتہ،اردو کے جرأت مند شاعر راحت اندوری صاحب کل اس دار فانی سے کوچ کر گئے۔ اللہ مغفرت فرمائے اور لواحقین کو صبر جمیل عطا فرمائےـآمین
آرٹسٹ خواہ ادیب ہو شاعر ہو افسانہ و ناول نگار ہو ،مصور ہو،صحافی ہو یہ سب کے سب اپنے فرض منصبی کے تحت سماج میں نمودار ہونے والی برائیوں اور زیادتیوں کی نشاندہی کرتے ہیں ۔ اقتدار میں رہنے والے حکمرانوں کو ، مال و دولت کے نشے میں چور ارباب ثروت کو ، ضعیفوں کو کچلنے والے طاقتوروں کو کبھی خاطر میں لائے بغیر اپنے احساسات کو اپنی زبان،قلم اور برش کی وساطت سے عوام کے سامنے لانے کی جرأت کرتے ہیں۔
لیکن ہر شعبے میں اور ہر پیشے میں بعض فنکار ایسے بھی ہوتے ہیں جو منصب و جاہ ، اعزاز و اکرام اور مال و دولت کی ہوس میں یا استبدادی نظام کے آہنی پنجوں سے خوف زدہ ہو کر اپنے فنون اور ان کے فطری مطالبات کے ساتھ انصاف نہیں کر پاتے۔ راحت اندوری صاحب ان فنکاروں میں سے ایک تھے،جو ظلم کے خلاف آواز بلند کرنے میں کبھی متذبذب نہیں رہے، منافقانہ اسلوب کبھی اپنایا اور نہ کبھی مصلحت کی چادر اوڑھی۔ ان کے مشاہدات میں جو کچھ آیا دیانت داری کے ساتھ اس کا اظہار کر دیا ۔ تاہم ایسا نہیں ہے کہ وہ محض ایک باغی شاعر تھے۔ وہ بیک وقت محبت کے پھول بھی بکھیرتے تھے اور معاشرے میں پائے جانے والے زخموں پر نشتر بھی چلاتے تھے۔

اس کی یاد آئی ہے سانسوں ذرا آہستہ چلو
دھڑکنوں سے بھی عبادت میں خلل پڑتا ہے

راحت اندوری صاحب عوامی شاعر تھے،عام فہم اسلوب بیان اور طرز نگارش کی وجہ سے وہ عوام کے ذہنوں تک اپنے احساسات،جذبات اور خیالات کو پہنچاتے تھے یا عوام کی ترجمانی کرتے تھے۔ اس طرح وہ مشاعروں کو لوٹ لیتے تھے اور ان کے بے شمار اشعار زبان زدخاص و عام ہو جاتے تھے۔ اردو اور غیر اردو قارئین و سامعین عام انسان سے لے کر مقننہ کے ایوانوں میں نمائندگی کرنے والے بھی موقع کی مناسبت سے ان کے اشعار نقل کرتے ہیں۔ وہ ایک طرف حکومت وقت کو للکارتے تھے تو دوسری طرف عوام کو پست ہمتی کے خلاف کھڑے ہونے کے لئے ان کے حوصلے بلند کرتے تھے۔ وہ سیاسی لیڈروں پر تنقید کرنے کے ساتھ ساتھ اپنا احتجاج درج کراتے وقت اپنی حب الوطنی پر آنچ نہیں آنے دیتے تھے۔ وہ جبہ و دستار والے بزعم خود جنت کے ٹھیکیداروں کی بخیہ بھی اڈھیرتے تھے۔
ہاں میں مانتا ہوں وہ عمائدین اردو ادب کی طرح ثقیل اردو میں ادبی شہ پارے نہیں بکھیرتے تھے‌۔ وہ صاف گو تھے اور اپنے خیالات کے اظہار کے لئے بچ کر نکلنے والی تعبیرات کا استعمال نہیں کرتے تھے۔ وہ ادب برائے ادب نہیں،ادب برائے زندگی میں یقین رکھتے تھے۔ وہ گنجلک تعبیر اور مجرد ادب سے دور اپنے کلام کے توسط سے لوگوں کے دلوں میں گھر بنا لیتے تھے۔ اس لئے کہ ادبی شہ پارے اور تجریدی مصوری تک رسائی ایک محدود و مخصوص طبقہ کی ہوتی ہے۔ Abstract art کے شاہکاروں کی قدر و قیمت عموماً highly qualified صاحب ثروت خواتین و حضرات ہی سمجھ سکتے ہیں، عام لوگوں کو وہ محض مختلف رنگوں کا امتزاج نظر آتے ہیں،عام لوگوں کو ان تجریدی فن کے نمونوں کو سمجھنے کے لئے شرح کی ضرورت ہوتی ہے۔
شعر کی مقبولیت کا معیار ایک یہ بھی ہے کہ سننے اور پڑھنے والے کو فوراً یاد ہو جائے اس لئے کہ انہیں ایسا لگتا ہے کہ یہ ان کے خیالات، احساسات اور جذبات ہیں،جنہیں شاعر نے الفاظ و تعبیرات کا جامہ پہنا دیا ہے۔ خیالات کو زرق برق نہیں شستہ زبان،سنجیدہ موضوع اور حالات حاضرہ کی تمثیل کا پیرہن عطا کرنے میں راحت اندوری صاحب لاجواب تھے۔
١- سی اے اے این آر سی کے تناظر میں :
اپنی پہچان مٹانے کو کہا جاتا ہے
بستیاں چھوڑ کے جانے کو کہا جاتا ہے

٢- میڈیا کی غیر ذمہ دارانہ صورتحال پر :
سب کی پگڑی کو ہواؤں میں اچھالا جائے
سوچتا ہوں کوئی اخبار نکالا جائے

٣- ملک کی ابتر معیشت، غریبی بے روزگاری اور دوسری طرف غیر ضروری سرکاری اخراجات – سنٹرل وسٹا پروجیکٹ کے تحت ٩٢٢ کروڑ کی لاگت سے پارلیمنٹ کی مجوزہ نئی عمارت کی تعمیر :
نئے ایوان کی تعمیر ضروری ہے مگر
پہلے ہم لوگوں کو ملبے سے نکالا جائے

٤- بابری مسجد رام جنم بھومی پر عدالت کے فیصلے کے پس منظر میں :
انصاف ظالموں کی حمایت میں جائے گا
یہ حال ہے تو کون عدالت میں جائے گا

٥- مایوس کن حالات میں حوصلہ دیتے ہوئے :
آنکھ میں پانی رکھو ہونٹوں پہ چنگاری رکھو
زندہ رہنا ہے تو ترکیبیں بہت ساری رکھو

٦- اقلیتوں کے لیے مراعات پر :
میں نے اے سورج تجھے پوجا نہیں سمجھا تو ہے
میرے حصے میں بھی تھوڑی دھوپ آنی چاہیے

٧- حب الوطنی پر :
میں مر جاؤں تو میری اک الگ پہچان لکھ دینا
لہو سے میری پیشانی پہ ہندوستان لکھ دینا
٨- سیاسی اور غیر سیاسی لوگوں کے منافقانہ رویہ پر :
دلوں میں آگ لبوں پر گلاب رکھتے ہیں
سب اپنے چہروں پہ دوہری نقاب رکھتے ہیں

٩- معاشرہ میں خانگی کشیدگی اور جھگڑے پر :
میری خواہش ہے کہ آنگن میں نہ دیوار اٹھے
مرے بھائی مرے حصے کی زمیں تو رکھ لے

١٠- جرأت مندانہ زندگی گزارنے پر :
لوگ ہر موڑ پہ رک رک کے سنبھلتے کیوں ہیں
اتنا ڈرتے ہیں تو پھر گھر سے نکلتے کیوں ہیں

راحت اللہ قریشی عرف راحت اندوری بن رفعت اللہ قریشی 11اگست 2020ء بروز منگل بوقت پانج بجے شام موت سے ہار مان گئے، انہوں نے اربندو ہوسپیٹل اندور مدھیہ پردیش میں آخری سانس لی، زندگی کا روگ جسے لگا اسے موت سے ہار ماننی ہی پڑتی ہے،وہ قلب کے مریض تھے اور ذیابیطس ( شوگر ) نے ان کے قوی کو پہلےسے نڈھال کر رکھا تھا ، کرو ناکا بہانہ ہو گیااور دو روز میں سب کچھ تمام ہوگیا ؛ حالانکہ کہ وہ جس قوت ارادی کے مالک تھے اس کو دیکھتے ہوئے مشہور شاعراور ناظم مشاعرہ کمار وشواش نے پورے وشواش (یقین)کے ساتھ کہا تھا کہ اس بارکرو نا نے غلط جگہ کا انتخاب کیا ہے،خود راحت صاحب کو بھی یقین تھا کہ وہ اسے مات دے دیں گے، انہوں نے کرونا پازیٹو ہونے کی اطلاع خود ہی ٹیوٹئر پر دی تھی، اور مخلصین کو فون کرنے سے منع کر دیا تھا تھا اور کہا تھا کہ میرے بارے میں فیس بک اور سوشل میڈیاسے خبریں ملتی رہیں گی، خبر آئی تو زندگی کی نہیں موت کی، انہوں نے پہلے ہی کہہ دیا تھا کہ گھر سے یہ سوچ کر نکلا ہوں کہ مر جانا ہے۔۔ اب کوئی راہ دکھا دے کہ کدھر جانا ہے ۔ پوری ادبی دنیا میں اس خبر سے ماتم پسر گیا،سیاسی اورغیر سیاسی لوگوں نے تعزیتی بیانات جاری کیے۔اردو شاعری کے ایک عہد کا خاتمہ ہوگیا۔ عصری حسیت سے بھر پوراور سیاسی لوگوں کی دوغلی پالیسیوں پر ضرب کاری لگانے اورنوجوانوں کو پھولوں کی دکانیں کھولنے اور خوشبو کے بیوپار کی صلاح دینے والا شاعر ابدی نیند سو گیا،ان کے اندر جو جرأت اظہار تھی اورجسےوہ شاعری میں پورے طور پربرتتے تھے اس کی مثال فیض اور ساحر کے بعد اردو شاعری میں دیکھنے کو نہیں ملتی۔ ان کی شاعری کے ساتھ ان کا انداز پیشکش، (بوڈی لینگویج )بھی خاصا مرعوب اور متأثر کن تھا، اپنے مخصوص انداز اور حسین شاعری کی وجہ سے وہ اردو مشاعروں کی آبرو تھے، اور ملکوں ملکوں انہوں نے اردو شاعری کو مقبول و محبوب بنانے کا کام کیا تھا۔کرونا سے متأثر ہونے کی وجہ سے ان کا جنازہ ہوسپیٹل سے ان کے گھر نہیں لے جایا جا سکا اور اسی دن رات کے ساڑھے نو بجے اندور میں اے بی روڈ واقع چھوٹی خزرانی قبرستان میں جنازہ پڑھنے والوں کی محدود تعداد کی موجودگی میں ان کی تدفین عمل میں آئی، پسماندگان میں انہوں نے اہلیہ سیما راحت، تین بیٹے فیصل راحت ، ستلج راحت،سمیر راحت اور ایک بیٹی شبلی عرفان کو چھوڑا۔
راحت اندوری کا اصل نام راحت اللہ قریشی تھا ،شہرت انہیں ان کے قلمی نام راحت اندوری سے ملی، وہ اپنے والد رفعت اللہ قریشی کے گھر اندور میں یکم جنوری 1950ء بروز اتوار پیدا ہوئے والدہ مقبول النساء نے معاشی تنگی کے باوجود انہیں بڑے ناز و نعم سے پالا ، ان کے والد کپڑے کے ایک کارخانے میں کام کرتے تھے،ہائر سکنڈری تک کی تعلیم اندور کے نوتن اسکول سے حاصل کرنے کے بعد انہوں نے اسلامیہ کریمیہ کالج سے 1973ء میں بی اے ، برکت اللہ یونیورسٹی سے 1975ء میں ایم اے ، اور مدھیہ پردیش کی بھوچ اوپن یونیورسٹی سے 1985ء میں "اردو میں مشاعرہ” کے موضوع پر تحقیقی مقالہ لکھ کر ڈاکٹریٹ کی ڈگری حاصل کی، ان کے مقالہ کے نگراں ڈاکٹر عزیز اندوری تھے ،تدریسی زندگی کا آغازآئی کے کالج اندور سے کیا،انہوں نے دیوی اہلیہ وش ودہالیہ اندور میں سولہ سال قبل تک تدریس کے فرائض انجام دئیے۔
1968ءمیں ڈاکٹر راحت اندوری نے پہلا شعر کہا ” اس کے قبل و جاں نثار اختر کے ایک مصرع پر گرہ لگا چکے تھے ,جاں نثار اختر نے ان کے آٹو گراف پر لکھا تھا کہ "ہم سے بھاگا نہ کرو دور غزالوں کی طرح "راحت صاحب کے منھ سے دوسرا مصرع بے ساختہ نکلا”ہم نے چاہا ہے تمہیں چاہنے والوں کی طرح” اس کے بعد راحت شعر کہنے لگے ،انہوں نے دھوپ دھوپ،رت میرے بعد، پانچواں درویش،اورکن فیکون جیسی کتابیں دنیائے اردو ادب کو دیں،یہ ان کےمجموعہ کلام ہیں، جن میں ان کی شاعری کے مخصوص تیور کو دیکھا جاسکتا ہے۔27/مئ 1986ء کو ان کی شادی سیما نامی خاتون سے ہوئی،جو بعد میں سیما راحت سے مشہور ہوئیں۔1988ء میں انہوں نے مشہور شاعرہ انجم رہبر سے نکاح کرلیا ان کے بطن سے ایک لڑکا سمیر راحت پیدا ہوئے؛ لیکن یہ ازدواجی زندگی ان کو راس نہیں آئی۔1993ء میں یہ رشتہ طلاق پر ختم ہوا، سیما راحت نے راحت صاحب کی انسانی کمزوریوں اور کوتاہیوں کے باوجود آخری دم تک ان کا ساتھ نبھایا،البتہ راحت صاحب اور انجم رہبر کو ترک تعلق کا صدمہ پوری زندگی رہا، جس کا اظہار دونوں موقع ملتے ہی اپنے اشعار میں کرنے لگتے تھے۔
اللہ رب العزت نے راحت اندوری کے چہرے کی خوبصورتی لے کر دل بڑاخوبصورت بنادیاتھا، وہ ایک کامیاب نغمہ نگار اور مشہور مصور بھی تھے،انہوں نے مشہور مصور فدا حسین صاحب کے ساتھ بھی کام کیا تھا،ان کی شاعری میں رومانیت، زمانہ کے نشیب و فراز، سیاستدانوں کی بے راہ روی اور نیرنگیں حالات پر بھرپورتبصرہ ملتا، ان کی شاعری میں طنز و مزاح کی زیریں لہروں کا بھرپور احساس ہوتا ہے، وہ خود پر بھی طنز کرنے سے باز نہیں آتے تھے۔کہا کرتے کہ ایک نوجوان شاعر کو جو میری نقالی کی کوشش کرتا تھا ایک صاحب نے مشورہ دیا راحت اندوری بننے کے لئےصرف دانت ہی سفید نہیں کرنے پڑتے چہرابھی کالا کرنا پڑتا ہے، راحت اندوری نے ایک درجن سے زائد فلمی نغمے لکھے،جو منا بھائی، ایم بی بی ایس، آشیاں، فریب،مرڈر،غدار وغیرہ میں فلمائےگئے؛لیکن انہوں نے جلد ہی محسوس کر لیاکہ پروڈیوسر اور ڈائریکٹر کی جی حضوری ان کے بس میں نہیں ہے؛ چنانچہ انہوں نے فلمی دنیا سے خود کو الگ کر لیا اورساری توجہ شاعری اور مشاعروں پر دینی شروع کیں، اسٹیج مشاعرہ کے ساتھ انھوں نے ٹی وی چینلوں میں بھی آنا شروع کیا، سب ٹی وی کے پروگرام "واہ واہ کیا بات ہے بہت خوب”اور” کپل شرما "کے شو میں بھی ان کی طوطی بولتی تھی۔ ان کی شاعری کا اپنا رنگ و آہنگ تھا اور پیشکش کا انداز بھی اپنا تھااس لئے لوگ ان کو پسند کرتے تھے، انہوں نے ترقی پسندی کے خول میں خود کو بند نہیں کیا، جدیدیت اور مابعد جدیدیت سے بھی ان کا کچھ لینا دینا نہیں تھا،لیکن ان کی مقصد ی شاعری ترقی پسندی کی یاد دلاتی تھی، ترقی پسندوں نے معاشی جبرو استحصال اورانسانی محرومی اور نامرادی کو موضوع سخن بنایا تھا، راحت اندوری نے سماجی انتشار ،انسانی کرب، سیاسی بازیگری کو موضوع سخن بنایا،اور چونکہ کہ یہ موضوعات انسانی زندگی سے ہم آہنگ تھے اس لیے ان کی شاعری جگ بیتی بن گئی، جو سنتا اسے اپنی آواز معلوم ہوتی، یہی وجہ ہے کہ پاکستان،امریکہ، آسٹریلیا، کویت،متحدہ عرب امارات اور انگلینڈ میں بھی وہ یکساں مقبول تھے ،ان کے اشعار پر داد دینے کے لئےلوگ اتنے مستعد ہوتے کہ کبھی کبھی ان کو کہنا پڑتا کہ دوسرا مصرع تو مکمل ہونے دیجئے، وہ ایک غیور اورخوددارشاعر تھے، اس لیے وہ وہی سناتے تھے جو وہ سنانا چاہتے، فرمائشوں پر کچھ سنا دینایاحکمرانوں کے مشاعرہ میں موجود ہونے پر لہجہ بدل دینا ان کے بس کا نہیں تھا ،ان کے اندر جو جرأت اظہار تھی وہ ان کو اس پر مجبور کرتی تھی، وہ سامعین کی نفسیات کو سمجھتے تھے اور شعرکے انتخاب میں اس کا خاص خیال رکھتے تھے ،ان کی شاعری کی لفظیات بہت پر شکوہ اور خیالات بہت اعلی اور ارفع نہیں ہے،جس کو سمجھنے کے لئے بہت زیادہ ذہنی جمنا اسٹک کرنی پڑے ، وہ مواد اور الفاظ دونوں سامنے سے اٹھاتے تھے، جسے آپ عوامی کہہ سکتے ہیں، نظیر اکبر آبادی عوامی شاعر تھے لیکن وہ دور دوسرا تھا آج کی عوامی شاعری وہی ہے جو راحت اندوری نے کی، راحت نے غزلوں کے ساتھ حمدیہ اور نعتیہ شاعری بھی کی؛ جو کمیت کے اعتبار سے کم لیکن کیفیت کے اعتبار سے اعلیٰ و ارفع ہے، ان اشعار کو پڑھنے کے بعد ان کی ایمانی حرارت،اعتقادی استواری، اورکامل حب نبوی کا پتہ چلتا ہے، وہ سب کچھ ختم ہونے کا جہاں تذکرہ کرتے ہیں وہیں یہ بھی کہتے ہیں کہ ایک ایمان ہے جو اب تک باقی ہے۔ راحت اندوری گزشتہ چار ماہ سے اپنے طور پر ہوم کرنٹائن تھے ،صرف علاج و معالجہ اور چانچ وغیرہ کے لیے گھر سے نکلا کرتے تھے، سماجی فاصلہ کا بھرپور خیال رکھتے تھے، انھوں نے نیوز 18 پر عید کے موقع سے آخری بار اس کی جانب سے منعقد اسٹوڈیو مشاعرے میں اپنا کلام سنایا تھا، وہ لاک ڈاؤن سے بہت پریشان تھے اور انہیں اس کا غم ستا رہا تھا کہ مسجدوں کے دروازے بھی بند ہیں، ان کا آخری شعر اسی حوالے سے ہے۔ خاموشی اوڑھ کے سوئی ہیں مسجدیں ساری ۔کسی کی موت کا اعلان بھی نہیں ہوتا

وہ مشاعروں میں قہقہہ لگاتے ہوئے حکومت کو چیلنج کرتا تھاـ اس کا قہقہہ مشہور تھا،سیاہ چہرے پر طنز کی بجلیاں کوندتیں اور اس کی مسکراہٹ سے ہزاروں تیر برستے اور کروڑوں لہو لہان ہو جاتے،میں کیوں لکھتا اس پر ؟ لکھتا تو سنجیدہ مہذب دانشوروں کے درمیان نشانہ بن جاتا،بازارواور مشاعرہ باز،یہ کوئی شاعری ہے ؟ مگر ایوان سیاست میں اس کے نام سے زلزلہ آ جاتا تھا،جب وہ کہتا تھا:
تمہارے باپ کا ہندوستان تھوڑی ہے
اور اتنا کہہ کر وہ تیز قہقہہ لگاتا جیسے حکمرانوں کو تنبیہ کر رہا ہو کہ سنبھل جاؤ،ہم بھی کسی آندھی ، کسی طوفان سے کم نہیں، ہم سے مت ٹکراؤ ـ
سنجیدہ فلسفوں کا کاروبار کرنے والو، جدیدیت اور پختہ ادب کی پہچان رکھنے والو ، ایک کہانی سنو، ایک ملاح تھا،اس کی کشتی میں ایک دانشور سوار ہوا، دانشور نے پوچھا ، کیا تاریخ سے تمہاری واقفیت ہے ؟ ادب سے ہے ؟ سائنس سے ہے ؟ جغرافیہ سے ہے؟ ملاح ہر بار انکار میں گردن ہلا دیتا اور دانشور ہر سوال کے بعد کہتا ، نہیں جانتے ، تمہاری زندگی بیکار ہے، اس درمیان کشتی میں پانی بھرنے لگا،ملاح نے دانشور سے سوال کیا”آپ تیرنا جانتے ہیں؟ ” دانشور نے انکار کیاـ نہیں جانتا،دریا میں کودنے سے قبل ملاح نے کہا ، پھر آپ کی زندگی بیکار ہے،
طوفان آ چکا،آندھیوں نے ہزاروں گھر پھونک دیے، بند کمروں میں ادب کی نمائش کرنے والے کیا جانیں کہ راحت اندوری کیا تھا ؟ منور رانا کی ضرورت کیوں ہے ؟ فسطائی طاقتیں پوری شدّت اور منصوبوں کے ساتھ مذہب ،مشترکہ وراثت اور تہذیب پر حملہ کر رہی ہیں، دانشوری کو طاق پر رکھیے،کیا آپ حکومت کے ایسے منصوبوں کو خاک میں ملا سکتے ہیں ؟ منور رانا اور راحت اندوری جیسوں کی آواز پوری دنیا کو ہلا دینے کی طاقت رکھتی ہے،سنجیدہ ادب لکھنے والوں اور سنجیدہ قاری کا قصور یہ ہے کہ وہ ابن صفی کو تو ضروری تسلیم کرتا ہے مگر راحت اندوری تک پہچنے میں روح فنا ہو جاتی ہے، آزادی یوں ہی مل گئی ؟ کیا اس وقت یہ پروپیگنڈا ضروری نہیں تھا کہ غلامی کی مخالفت کی جائے، آزادی کی چیخ کو آواز دی جائے اور اس وقت آزادی کے نغمے کس نے نہیں لکھے، سب نے لکھے، ہم آج اس مہذب دور میں زیادہ غلامی کے شکار ہیں، موب لنچنگ ، فسادات ، دو قانون، مسلمانوں کا الگ ، غیر مسلموں کا الگ،کوئی ادیب ہے جو مسلمانوں کے لئے جنگ کر رہا ہو،جنگ راحت کرتا تھا، ڈرتا نہیں تھا،بیباک تھا،کپل شرما شو میں بھی دو بار دعوت ملی، دونوں دفعہ چھا گیا اور پیغام بھی دے گیا کہ تمہارے باپ کا ہندوستان تھوڑی ہے ـ
مزہ چکھا کے ہی مانا ہوں میں بھی دنیا کو
سمجھ رہی تھی کہ ایسے ہی چھوڑ دوں گا اسے
ایک ہی ندی کے ہیں یہ دو کنارے دوستو
دوستانہ زندگی سے موت سے یاری رکھو
یہ سانحہ تو کسی دن گزرنے والا تھا
میں بچ بھی جاتا تو اک روز مرنے والا تھا
گھر سے یہ سوچ کہ نکلا ہوں کہ مر جانا ہے
اب کوئی راہ دکھا دے کہ کدھر جانا ہے
بہت غرور ہے دریا کو اپنے ہونے پر
جو میری پیاس سے الجھے تو دھجیاں اڑ جائیں
آنکھ میں پانی رکھو ہونٹوں پہ چنگاری رکھو
زندہ رہنا ہے تو ترکیبیں بہت ساری رکھو
ہم سے پہلے بھی مسافر کئی گزرے ہوں گے
کم سے کم راہ کے پتھر تو ہٹاتے جاتے
ہے میرے چاروں طرف بھیڑ گونگے بہروں کی
کسے خطیب بناؤں کسے خطاب کروں

وہ گونگا نہیں تھا ، بولنا جانتا تھا، وہ اپنی قیمت پہچانتا تھا، وہ جنگجو تھا، جب ضرورت ہوتی ، وہ بیدار کرنے آ جاتا، اب کورونا نے حقیقت سامنے رکھ دی اور یہ سوال خدا سے بھی ہے،خدا ، میرے خدا ، راحت کا جرم سنگین اور سیاسی ایوانوں میں بیٹھے خداؤں کو معافی ؟ یہ کیسا انصاف میرے خدا؟ کورونا اپنے ساتھ کیسے کیسے لوگوں کو لے گیا ، ان لوگوں کو جن کے دم سے زندگی اور کائنات کا حسن باقی تھا اور جو نفرتیں پھیلا رہے ہیں ، جو آگ لگا رہے ہیں ، جو ملک کو زخمی کر رہے ہیں ، تیری خوبصورت دنیا میں داغ لگا رہے ہیں ، انھیں زندہ رہنے کے لئے چھوڑ رکھا ہے یہ تفریق کیوں خدا ؟ یہ کیسا انصاف ؟
میں پھر ان سوالوں پر آتا ہوں ـ آزادی کے بعد کے فرقہ وارانہ فسادات، ادب کا خیمہ خاموش رہا، 1984ہوا پھر1992، کوئی ہلچل اس خیمے میں نظر نہیں آئی، کچھ ہلکی پھلکی علامتی کہانیاں لکھ دی گئیں۔1992 کے بعد کا منظر نامہ دیکھ لیجئے ـ خاموشی کی روایت قائم ہے، سیاسی عدم بیداری کی فضا قلم کے محافظ پیدا نہیں کرتی ـ جدیدیت کے علمبردار وں کو کوئی غرض نہیں کہ ملک کہاں جا رہا ہےـ بیمار مریضوں ،سوکھی انتڑیوں کے باسی مردہ قصّوں میں اگر زندگی کی حرارت نہیں تو یہ قصّے فقط الفاظ کی بھول بھلیاں کے سوا کچھ بھی نہیں ہیں،ترقی پسند زندہ مکالمے کرتے تھے،بیانات دیتے تھے ۔حق کے لئے جنگ کرتے تھے ۔ 1992کے بعد کا عام رویہ ہے کہ ادب کو عام اذہان اور مسائل میں کوئی دلچسپی نہیں۔نیند میں سویے ادیبوں پر آپ فخر کر سکتے ہیں تو کیجئے،لیکن وہ ادیب ہی کیا جسے بدلتے سیاسی منظر نامے کی چیخ سنائی نہ دے ـ
راحت یہ چیخ سنتا تھااور جب وہ لکھتا تھا تو اس کی چیخ ساری دنیا کی چیخ بن جاتی تھی:
ہم اپنی جان کے دشمن کو اپنی جان کہتے ہیں
محبت کی اسی مٹی کو ہندوستان کہتے ہیں
’میرے اندر سے ایک ایک کرکے سب ہوگیا رخصت
مگر اندر جو باقی ہے اسے ایمان کہتے ہیں‘
میں من کی بات بہت من لگا کے سنتا ہوں
یہ تو نہیں ہے تیرا اشتہار بولتا ہے
کچھ اور کام اسے جیسے آتا ہی نہیں
مگر وہ جھوٹ بہت شاندار بولتا ہے
میں اس کے چہرے کو دیکھتا، حضرت بلال حبشی کی یاد تازہ ہو جاتی ـ وہ چہرے سے سیاہ مگر اندر سے تندور اور ایسے تندور کی ابھی ضرورت تھی،جب اسلام کی عظمت کا آفتاب بلند ہوا ، مکہ کی وادیوں سے اذاں کی جو پہلی آواز گونجی وہ حضرت بلال کی تھی، مودی کی اس انداز میں خبر کون لے گا کہ وہ جھوٹ بہت شاندار بولتا ہے،کون کہے گا ، تمھارے باپ کا ہندوستان،یہ راحت ہی کہہ سکتے تھے اور راحت ہی چلے گئےـ اپنے نغموں سے اقلیتوں کے زخم پر مرہم رکھنے والا ، راحت پہنچانے والا چلا گیاـ

نئی دہلی:مشہور شاعر راحت اندوری کا انتقال ہوگیا۔ کوویڈ۔19 کی تصدیق کے بعد70 سالہ راحت اندوری کو رات گئے اسپتال میں داخل کرایاگیاتھا۔ جہاں انہوں نے آج آخری سانس لی ہے۔ سیاست ،فلم ،ادب کی مشہورشخصیات نے ان کی وفات پرگہرے دکھ کا اظہار کیا ہے۔راہل گاندھی ،راج ناتھ سنگھ ،نتیش کمار،شیوراج سنگھ چوہان اوراروندکجریوال نے تعزیت کااظہارکیاہے ۔راہل گاندھی نے لکھاہے کہ اب میں نہ میں ہوں اور نہ باقی ہیں زمانے میرے۔ پھربھی مشہورہیںشہروں میں فسانے میرے۔الوداع ، راحت اندوری صاحب۔وزیردفاع راج ناتھ سنگھ نے ان کی موت پر غم کا اظہار کرتے ہوئے لکھا ہے کہ مقبول شاعر راحت اندوری کے انتقال کی خبر سے مجھے شدید رنج ہواہے۔ وہ اردو کی پرجوش شخصیت تھے۔ اپنی یادگار شاعری سے انہوں نے لوگوں کے دلوں پر انمٹ نقوش چھوڑے ہیں۔ آج ادبی دنیا کو ایک بہت بڑا نقصان ہوا ہے۔ غم کی اس گھڑی میں ان کے چاہنے والوں کے ساتھ میری تعزیت ہے۔مدھیہ پردیش کے وزیراعلیٰ شیوراج سنگھ چوہان نے ٹویٹرپرانہیں خراج عقیدت پیش کرتے ہوئے لکھاہے کہ لاکھوں دلوں پر اپنی شاعری سے راج کرنے والے مشہور شاعر ہردل عزیز راحت اندوری کی موت مدھیہ پردیش اور ملک کے لیے ناقابل تلافی نقصان ہے۔ میں خدا سے دعاگوہوں کہ وہ ان کی روح کو سکون عطا کرے اور ان کے اہل خانہ اور پیاروں کو یہ بے حد غم برداشت کرنے کی توفیق عطاکرے۔شیو راج سنگھ نے شعر کے ذریعہ اظہار تعزیت کرتے ہوئے لکھا ہے کہ راحت ، آپ ہمیں اس طرح چھوڑ دیں گے ، یہ سوچا نہیں تھا۔راہ کے پتھرسے بڑھ کرکچھ نہیں ہیں منزلیں ،راستے آوازدیتے ہیں،سفرجاری رکھو،ایک ہی ندی کے ہیں یہ دوکنارے ،دوستو،دوستانہ زندگی سے موت سے یاری رکھو۔آپ جس بھی دنیا میں ہیں ، سلامت رہیں ، سفرجاری ہے۔ دہلی کے وزیراعلیٰ اروند کیجریوال نے ٹویٹرپرلکھاہے کہ مشہورشاعر راحت اندوری صاحب کی موت کی خبر سن کر بہت افسوس ہوا۔ آج ملک نے ایک عظیم شخصیت کھو دیاہے۔ ان کی روح کو سکون ملے اور کنبہ کو یہ غم برداشت کرنے کی توفیق عطا کرے۔

اندور:مشہور شاعر راحت اندوری کو کورونا وائرس سے متاثر ہونے کی وجہ سے آج دیر رات اندور کے اربندو اسپتال میں داخل کرایا گیا تھا اور تازہ اطلاعات کے مطابق ان کا انتقال ہوگیاہےـ انھیں اندور کے اربندو اسپتال میں داخل کرایا گیا تھا جو کوویڈ اسپیشل اسپتال ہے۔ حالاں کہ ان کے بیٹے نے اطلاع دی تھی کہ خطرے کی کوئی بات نہیں ہے اور خود راحت اندوری نے بھی ٹوئٹ کے ذریعے اپنےمداحوں سے دعاؤں کی درخواست کی تھی کہ "دعا کیجیے کہ میں اس بیماری کو جلد سے جلد شکست دے سکوں "ـ مگر وہ اس بیماری کو شکست نہ دے سکے اور اسپتال میں ہی آخری سانسیں لیں ـ
واضح رہے کہ راحت اندوری ہندوستان کے مشہور شاعر تھے اور عالمی سطح پر بھی انھیں خاصی مقبولیت حاصل تھی۔ انھوں نے کم وبیش نصف صدی تک اردو مشاعروں پر اپنا سکہ جمائے رکھاـ اب تک اردو اور دیوناگری میں ان کے کئی شعری مجموعے بھی شائع ہوچکے ہیں اور انھوں نے بہت سی ہندی فلموں میں نغمے بھی لکھے ہیں۔ درس وتدریس سے بھی ان کا تعلق رہاـ وہ اپنے مخصوص بے باک لہجے کی وجہ سے پہچانے جاتے تھے اور اسی کی بدولت انھیں بلاتفریق مذہب تمام ادب نواز حلقوں میں مقبولیت حاصل تھی ـ ہندوستان کے سیاسی اتار چڑھاؤ کے حوالے سے بھی وہ اپنی بات کھل کر کہتے تھے اور اپنی کاٹ دار شاعری کے ذریعے ملکی و عالمی سیاست پر بر ملا تنقیدیں کرتے تھےـ یقینا ان کی وفات سے اردو شاعری کے ایک منفرد عہد کا خاتمہ ہوگیا ہےـ

اندور:مشہور شاعر راحت اندوری کورونا وائرس سے متاثر ہوگئے ہیں۔جس کے بعد مدھیہ پردیش کے اندور میں انہیں دیر رات اسپتال میں داخل کرایا گیا ہے۔راحت اندوری کے بیٹے ستلج نے اس بارے میں معلومات دیں،بعدازاں خود راحت اندوری نے بھی اس بارے میں ٹویٹ کیا۔ ستلج اندوری کے مطابق راحت اندوری کو اندور کے اربندو اسپتال میں داخل کرایا گیا ہے جو کوویڈ اسپیشل اسپتال ہے۔ انہوں نے یہ بھی کہا کہ خطرے کی کوئی بات نہیں ہے ، راحت اندوری صحت مند ہیں۔
راحت اندوری نے خودبھی ٹویٹر پر یہ معلومات دی ہیں۔ انہوں نے لکھا کہ’’کووڈ کی ابتدائی علامات نمودار ہونے کے بعد کل میرا کورونا ٹیسٹ کیا گیا تھا ، جس میں پازیٹیو رپورٹ آئی ہے۔ میں اربندو ہسپتال میں داخل ہوں ، دعا کیجیے کہ میں اس بیماری کو جلد سے جلد شکست دے دوں‘‘۔ ساتھ ہی راحت اندوری نے اپنے ٹویٹ میں لوگوں سے یہ بھی اپیل کی ہے کہ وہ ان کے بارے میں معلومات کے لیے انھیں یا یا ان کے کنبے کے افراد کوزیادہ فون نہ کریں ، ٹویٹر اور فیس بک کے ذریعہ معلومات ملتی رہیں گی۔
واضح رہے کہ راحت اندوری ہندوستان کے مشہور شاعر ہیں اور عالمی سطح پر بھی انھیں خاصی مقبولیت حاصل ہے۔ اب تک اردو اور دیوناگری میں ان کے کئی شعری مجموعے شائع ہوچکے ہیں اور انھوں نے بہت سی ہندی فلموں میں نغمے بھی لکھے ہیں۔