Tag:

qindeelonline.com

نازی ازم اور ہندو قوم پرستی میں گہری مماثلت ہے:رحمن عباس

by قندیل 10 مئی, 2020

(ایوارڈ یافتہ ہندوستانی ناول نگار رحمن عباس نے 2019 میں "ہولوکاسٹ اور ہندوستان و پاکستان میں اقلیتوں کے مستقبل” کے موضوع پر تحقیق کی غرض سے یورپ میں کچھ عرصہ گزاراتھا۔ دراصل اس موضوع پر وہ ایک ناول لکھ رہے ہیں ، جس کے لیے مواد کی فراہمی اور متعلقہ مقامات و سانحات کے تاریخی پس منظر سے راست واقفیت کے لیے انھوں نے یہ سفر کیا تھا۔ یورپ میں نازیوں کے خلاف (8 مئی کو) یومِ فتح کے موقعے پر انھوں نے جرمن بیسڈ سہ لسانی ویب سائٹ قنطرہ (qantara.de) کے صحافی ڈومینک مولر کے ساتھ اپنے ناول کے پروجیکٹ اور ہندوستان میں ہندو قوم پرستی کے تشویشناک احیا پر تبادلۂ خیال کیا تھا۔ یہ پوری گفتگو مذکورہ ویب سائٹ پر شائع ہوئی ہے، ‘‘قنطرہ’’ کے شکریے کے ساتھ اردو قارئین کے لیے اس کا اردو ترجمہ پیش ہے۔ )

سوال:آپ ہندوستان کی سیکولر مسلم اقلیت کے رکن ہیں۔ جہاں ان دنوں مسلمانوں کے خلاف "کورونا جہاد” جیسا لفظ دھڑلے سے استعمال کیا جارہا ہے۔ آپ کے نزدیک ہندوستان کی موجودہ صورتحال کس حد تک خطرناک ہے؟
رحمن عباس: صورتحال انتہائی خطرناک ہے ؛کیونکہ یہ دائیں بازو کی نسل پرست طاقتوں کے مفاد میں ہے۔ ہندو قوم پرست اقلیتوں کی توہین کرتے ہیں اور انھیں تمام بیماریوں کی وجہ بتاتے ہیں ۔ ماضی قریب ہی میں عالمی برادری نے دیکھا ہے کہ ہندو قوم پرستوں نے کس طرح مسلم اقلیت کے خلاف نفرت پھیلانے کے لئے "لو جہاد” جیسی اصطلاح استعمال کی ۔ سیاسی طور پر پھیلائی گئی اس نفرت کی بنا پر ما وراے عدالت سرِراہ لوگوں کی جانیں لے لی گئیں اور اسے ایک منظم منفی پروپیگنڈے کے ذریعے معمول بنا لیا گیا ۔
ہم "کورونا جہاد” کوبھی اسی مہم کی توسیع کے طور پر دیکھ سکتے ہیں ،جس کو سوشل میڈیا ، مین سٹریم میڈیا اور حکمراں جماعت بی جے پی سے تعلق رکھنے والے سیاستداں چلا رہے ہیں۔ اس کے نتائج تمام ہندوستانی معاشرے میں نظرآرہے ہیں؛چنانچہ ہندو، مسلم سبزی فروشوں سے سبزیاں اور سامان خریدنے سے انکار کررہے ہیں ، کئی ہندو ڈاکٹروں نے مسلمان مریضوں کے علاج سے انکار کردیا،اسی طرح کے واقعات مسلسل پیش آرہے ہیں ۔
سوال:یورپ میں آپ کی تحقیق کا ہدف کیا ہے؟
رحمن عباس: مجھے اپنے اگلے ناول کے لئے ریسرچ گرانٹ ملی ہے۔ بنیادی طورپر اسی کے لیے میں نے یورپ کے مختلف مقامات کا دورہ کیا ؛تاکہ یہ سمجھنے کی کوشش کی جائے کہ یورپ میں نازی فکرکو کیسے فروغ حاصل ہوا؟ اس نے جرمن معاشرے کو کس طرح متاثر کیا؟ اور یہ آئیڈیالوجی کس طرح یہودیوں ، کمیونسٹوں ، سیاسی مخالفین ،سنتی، روما ، معذور اور دیگر جماعتوں کی بڑے پیمانے پر قتل و غارت گری اور نسل کشی کا سبب بنی؟
ہندوستان میں مسلمان ، دلت ، عیسائی اور قبائلی باشندے دائیں بازو کے انتہا پسندوں یا بالادست ہندو طاقتوں کے ہاتھوں امتیازی سلوک ، الگ تھلگ کیے جانے اور ظلم و ستم کے شکار ہیں ، اسی طرح پاکستان میں شیعہ اور ہندو اقلیتوں کو مسلم شدت پسندوں سے خطرہ ہے۔
جرمنی اور یورپ میں ہولوکاسٹ کے پس منظر کے طور پر جو کچھ ہورہا تھا اس کی مذمت کرنے میں سماجی وسیاسی حلقے اور نظریات کی ناکامی کا مَیں مطالعہ وتعین کرنا چاہتا تھا۔ میں برصغیر ہند کے عوام کو فاشزم کے رجحانات و خصائل سے آگاہ کرنے کے لیے جرمنی کے نازی عہد سے حاصل شدہ اہم اسباق سے متعارف کرواناچاہتا تھا۔
درحقیقت گزشتہ دو دہائیوں کے بارے میں میرا تجزیہ ، جس دوران برصغیر پاک و ہند میں بنیاد پرستی میں اضافہ ہوا ہے ، اسی طرح ہندوستان اور پاکستان دونوں ملکوں کی متعدد مذہبی و سیاسی تنظیموں کے سلسلے میں میری تحقیقات بھی ممکنہ نسل کشی کے خطرے کی نشاندہی کرنے کے لیے کافی ثبوت فراہم کرتی ہیں۔ ان ملکوں کی موجودہ صورتِ حال جرمنی میں نازیوں کے عروج کے زمانے سے کافی مشابہت رکھتی ہے۔
سوال:پچھلی صدی کے آغاز میں نازیوں کے دورِ حکومت میں جرمنی کی صورتحال سے ہندوستان کی موجودہ سیاسی صورتِ حال کس قدر مماثلت رکھتی ہے؟
رحمن عباس: نازی ازم ایک نسل پرست اور بالادستی کے حصول کانظریہ تھا۔ اس کے ماننے والوں نے قوم پرستی کو اپنے سیاسی مخالفین کو بدنام کرنے اور اقتدار تک پہنچنے کے لیے آلے کے طور پر استعمال کیا ۔اسی طرح قوم پرست سوشلسٹوں نے آریاؤں کی برتری کے نظریے کو عام کیا اور اس خیال کو بھی کہ وہی حکمرانی کے لائق ہیں۔
جس طرح نازیوں نے یہودیوں اور بہت سے دوسرے لوگوں کو بدنام کرنے کے لئے تمام دستیاب ذرائع کو استعمال کیا ،البتہ خاص طور پر یہودیوں کو جرمن مفادات کے تئیں غدار بتایا گیا اور ایڈولف ہٹلر نے پہلے 1933 میں یہودیوں کی تجارت و صنعت کے قومی بائیکاٹ کا اعلان کیا اور اس کے بعد 1935 میں نورمبرگ قوانین کے ذریعے یہودیوں کی شہریت اور ان کے بنیادی حقوق کوبھی کالعدم کردیا۔ ہندوستان میں بھی ٹھیک اسی طرح کے حالات پنپ رہے ہیں ۔ مسلمانوں کے خلاف ہندو قوم پرستوں کا پروپیگنڈہ جاری ہے ،جس کے نتیجے میں ہندوستانی شہریت کانیا ترمیم شدہ قانون لایا گیا ہے، یہ قانون ہندوستانی پارلیمنٹ سے دسمبر 2019 میں پاس ہو چکا ہے۔ اس قانون کے تحت تین ممالک (پاکستان ، بنگلہ دیش اور افغانستان) سے تعلق رکھنے والے تمام غیر مسلم تارکین وطن کو شہریت دی جائے گی،جبکہ ان میں سے کسی ملک سے تعلق رکھنے والے مسلمان تارک وطن کو ہندوستان کی شہریت نہیں دی جائے گی ، مزید برآں نئے شہری رجسٹر کی تیاری کے نام پر ہندوستانی شہریوں سے متعدد دستاویزات مانگے جارہے ہیں، جن میں والدین یا دادا دادی کے برتھ سرٹیفکیٹس بھی شامل ہیں،ان کے ذریعے سے ہی ان کی شہریت کی تصدیق کی جاسکتی ہے۔ ایسا صرف مسلمانوں کو اس ملک سے بے دخل کرنے کے ایجنڈے کے تحت کیا جارہا ہے۔

ترجمہ:نایاب حسن

10 مئی, 2020 0 comment

تجزیہ

ہم ’ہولوکاسٹ‘ نہیں بننے والے ہیں-محمد ہاشم خان

by قندیل 23 جنوری, 2020

written by قندیل

مِلان کندرا ایک جگہ لکھتا ہے’a man’s struggle against power is the struggle of memory against forgetting‘ یعنی ’اقتدار کے خلاف ایک آدمی کی جدو جہد فراموشی کے خلاف یاد داشت کی جدوجہد ہے۔ دوسرے لفظوں میں یوں کہہ لیں کہ اگر آپ طاغوتی مقتدرہ کے جبروتی نظام کے خلاف کچھ نہیں کرسکتے تو کم از کم اسے یاد رکھیں، فراموش مت کریں، ایسے ہی جیسے یہودیوں نے ارض موعود کو یاد رکھا تھا اور دانتوں سے زمین پکڑے اِنچ بہ اِنچ چلتے ہوئے ’منزل مرام‘ تک پہنچنے میں کامیاب ہوئے، آپ بھی جنونی اقتدار کی ہذیانی نرگسیت میں بدمست مودیوں، شاہوں، یوگیوں اور مردودوں، کو مت بھولئے گا، ایسے ہی جیسے یہودیوں نے ہٹلر کے’مرگ انبوہ‘ کو اقوام عالم کی آشوب گاہ ثابت کرتے ہوئے دنیا کو مظلومیت کا نیا بیانیہ عطا کیا۔ اب دنیا میں کوئی بھی ملک اپنی رعایا یا اقلیت پر خواہ آگ کی ہی بارش کیوں نہ کرے اس کے بیان کی شدت ’ہولوکاسٹ‘ پر جاکر دم توڑ دیتی ہے۔ اگر آپ کی پوری کمیونٹی کے سر پر آسمان آتش فگن ہے، نیچے ’ جُبِّ الْحَزَن‘ہے، آگے موت کا دوزخ اور پیچھے ذلتوں کا برزخ ہے تو کوئی بات نہیں کہ یہ ہولوکاسٹ نہیں ہے۔ بہ الفاظ دیگر اب مابعد جدید و متمدن دنیا آپ کی مدد کے لئے آگے نہیں آنے والی ہے، ایسے ہی جیسے فلسطین، کشمیر، چیچنیا، بوسنیا، روہنگیا اور اویغور میں شرمندگانِ خاک بوند بوند لہو پی رہے ہیں، اقوام مغرب کشتوں کے پشتے دیکھ رہی ہیں اور سر مژگاں تک نم نہیں ہورہی ہے ۔وجہ بتانے کی ضرورت نہیں کہ یہ کشتگان ستم ، یہ صاحبانِ خار و خس، یہ سگانِ تیرہ شب، یہ شہیدانِ آمد سحر کوئی اور نہیں ہم ہیں، یعنی کہ مسلمان ہیں، افتگادگان خاک ہیں۔ ہم ’ہولوکاسٹ‘ نہیں ہیں اور ہوں گے بھی نہیں۔اگر کوئی غلط فہمی ہے تو دل سے نکال دیں کہ کشمیر جیسی ایک چھوٹی سی ریاست کو 9 لاکھ جواں شیر فوجوں کی بکتر بند گاڑیاں تاخت و تاراج کرنے میں ناکام رہیں، آہنی بوٹوں کی جگر فگار چاپ دشتِ دہشت میں جوان ہونے والوں کو بھی اپنا مطیع و فرمانبردار نہیں بنا سکی، اور جب کوئی صورت بن نہیں پائی تو بہشت کو اٹھا کر دوزخ میں ڈال دیا تو پھر یہ ایک کروڑ کشمیریوں کا نہیں پچیس سے تیس کروڑ ہندوستانی مسلمانوں کا مسئلہ ہے۔ اگر روز آپ پانچ ہزار مسلمانوں کو جان سے ماریں گے تو کل پچاس ہزار دن لگیں گے اور جہاں تک حراستی مراکز کی بات ہے تو یہ کوئی نیا تجربہ نہیں ہوگا کہ مسلمان ایک طرح سے حراستی مراکز میں ہی رہتا ہے اور پھر کتنے حراستی مراکز قائم کریں گے اور کیا وہ محفوظ بھی رہ پائیں گے، کیا ایک دن خوف کی طاقت ان تمام آہنی دیواروں کو مسمار نہیں کرے گی؟
ہمارا وزیراعظم ’اربن نکسل‘ کی اصطلاح استعمال کرتا ہے یوں گویا ’رورل نکسل‘ کا ’آتنک‘ ختم ہوگیا ہو۔ تاریخ سے نابلد ناہنجاروں کو معلوم ہونا چاہئے کہ’اربن‘ لفظ ہی اس بات کی غمازی کررہا ہے کہ نکسلزم دیہات کو فتح کرتا ہوا شہر و قصبات میں داخل ہوچکا ہے۔ ہندوتو کی بھانگ پینے والے دونوں کور بھکتوں کو اگر ’گھر گھر مودی‘ کے علاوہ کچھ اور دکھائی دے تو انہیں معلوم ہوکہ ’رورل نکسل‘ نکسلی علاقوں میں نہ صرف اپنے بنیادی تصورات کے ساتھ زندہ ہے بلکہ آج بھی حکومت کے لئے اتنا ہی بڑا خطرہ ہے جتنا کہ وہ چارو مجمدار کے وقت تھا۔ نکسلزم اب صرف آدیواسیوں اور قبائلیوں کے حقوق کی لڑائی تک محدود نہیں رہا بلکہ اب یہ ایک نظریے میں تبدیل ہوچکا ہے، ایک ایسا نظریہ جو اب اربن نکسل کی شکل میں ’بھگوائیوں‘ کے لاشعور میں کابوس کی صورت جاگزیں ہوگیا ہے۔ شمالی ہندوستان کی ریاستوں میں چینیوں سے مشابہ چپٹی ناک والوں نے تو آزادی کے وقت سے ہی ہندوستان کی ناک میں دم کر رکھا ہے۔ دو سال قبل ڈوکلاہام کا واقعہ آپ کیسے بھول سکتے ہیں، چین اندر گھستا چلا آرہا ہے اور ہمارا وزیراعظم خیالی پروجیکٹوں کے فیتے کاٹ رہا ہے؟ ہندوستان جغرافیائی اور تہذیبی اعتبار سے ایک بڑا و اعلیٰ ظرف ملک ہے لیکن افسوس کی بات یہ ہے کہ ہمارے تعلقات پڑوسیوں کے ساتھ کبھی بھی خوشگوار نہیں رہے۔ مغرب میں پاکستان، مشرق میں بنگلہ دیش، شمال میں چین اور جنوب میں سری لنکا کے ساتھ ہمیشہ کچھ نہ کچھ ٹھنی رہی ہے۔ ایک بڑا ملک جب اپنی تہذیبی اقدار کا احترام کرنے کے بجائے پڑوسیوں کے ساتھ ’بگ بردر‘ کا سلوک اپنانے کی کوشش کرے اور علت ہائے نافرجام کہ ایک سطح پر اندرونی شورش کا شکار بھی ہو تو اسے کمزور ہونے سے دنیا کی کوئی طاقت نہیں روک سکتی۔ ’بھگوائیوں‘ اور ان کے دونوں مائی باپ کو یہ بات آج نہیں تو کل سمجھ میں آجائے گی کہ وہ امریکہ نہیں، ہندوستان میں رہتے ہیں اور اقتدار کا نشہ مثال قطرہ شبنم بہت جلد اتر جاتا ہے، برطانیہ کی تاریخ اٹھا کر دیکھ لیں، عہد جدید کے جیوپولیٹیکل منظرنامے میں دنیا اسے ’کتے کا دُم‘ سمجھتی ہے جس کے پاس بین الاقوامی مسائل میں امریکہ کی ہاں میں ہاں ملانے کے علاوہ کوئی اختیار نہیں رہ گیا ہے۔ سرمایہ داروں کے لئے صارفین کی کھیپ تیار کرکے اگر آپ سمجھتے ہیں کہ آپ سپرپاور بن گئے ہیں تو اس سوچ پر صرف رحم ہی کیا جاسکتا ہے۔
سماجی،سیاسی اور معاشی بحران کے اس دور میں این آر سی اور سی اے اے کے نام پر ہندوستان کے پچیس سے تیس کروڑ مسلمانوں کے خلاف’ بھگوائیوں‘ کا اعلان جہاد نشے میں مست ہونے کی حماقت کے علاوہ کچھ اور نہیں۔ ابھی تو یہ تحریک ابتدائی مرحلے میں ہے، اس آغاز کو اختتام نہ سمجھا جائے، یہ ممکن ہے کہ اگلے کچھ وقتوں میں تحریک سمٹ کر صرف مسلم شاہینوں تک محدود ہوجائے، دلت، پسماندہ و دیگر روشن خیال سیکولر طبقہ تاخیر کی سیاست’delay tactics‘ سے عاجز ہوکر واپس اپنے اپنے گوشہ عافیت کے اسیر ہو جائیں لیکن جیسا کہ کہاوت ہے ’phoenix rises from the ashes‘ یعنی ققنس اپنی راکھ سے دوبارہ جنم لیتا ہے، ہر ققنس اپنی تین سو چونچوں میں ابابیلوں والی کنکریاں لے کر اپنی اسی راکھ سے جنمے گا۔ امت شاہ کی توند، مودی کی کوٹ، یوگی کی لنگوٹ سب ٹھاٹ پڑے رہ جائیں گے۔ یہ سچ ہے کہ ابھی ہم خوف میں ہیں لیکن ابھی ہم نے اپنے خوف کی طاقت کو استعمال نہیں کیا ہے جیسا کہ کافکا نے کہا ہے۔ ’ “My ‘fear’ is my substance, and probably the best part of me‘۔ یہ ہمارا خوف ہے جو ہماری غیرت و انانیت کو مجروح ہونے سے بچاتا ہے، یہ بقا کا خوف ہے جو ہمیں مسترد اور رائیگاں ہونے سے بچاتا ہے۔ یہ ہمارا خوف ہماری سب سے بڑی طاقت ہے۔ خوف کی طاقت یہ ہے کہ سانپ کے حملہ کرنے سے قبل ہی اس کا سر کچل دو جو اس وقت بھگوائی حکومت کررہی ہے۔ابھی اس طاقت کو ہم نے استعمال نہیں کیا ہے۔اس مصاف میں اگر جان سے جانا ہی شرط ٹھہرا تو پھر وہ بھی ہوگا۔ بے فکر رہیں، ہم قانون کو ہاتھ میں لینے والے نہیں لیکن ہاں قانون کا نوالہ بھی بننے والے نہیں ہیں۔

23 جنوری, 2020 0 comment

تراجم

اینٹی سی اے اے تحریک کا پیغام:فخرسے کہوہم ہندوستانی مسلم ہیں-سگاریکاگھوش

by قندیل 20 جنوری, 2020

written by قندیل

ترجمہ:نایاب حسن

مودی حکومت کے ذریعے لائے گئے نئے شہریت قانون کے خلاف احتجاجات کی ایسی تصویریں سامنے آرہی ہیں،جن سے مسلمانوں کے تئیں روایتی سوچ کا خاتمہ ہورہاہے۔اس بار علمااور مذہبی شخصیات قیادت نہیں کررہی ہیں؛بلکہ قیادت کرنے والے نوجوان اور گھریلوخواتین ہیں۔یہ احتجاج خالص مسلمانوں کابھی نہیں ہے،جیساکہ ماضی میں سلمان رشدی،تین طلاق یا تسلیمہ نسرین کے معاملوں میں دیکھاگیاتھا،اس کے برخلاف یہ ایک نئی ہمہ گیر تحریک ہے،جس میں جامع مسجد کی سیڑھیوں سے شاہی امام کی بجائے چندشیکھر آزاد خطاب کررہاہے۔تمام طبقات و مذاہب کے طلبہ ساتھ مل کر”آزادی“کا غیر فرقہ وارانہ نعرہ لگارہے ہیں۔تمام مظاہرین کی ایک اہم اور توانادلیل یہ ہے کہ جب دستور وآئین کے مطابق قانون کی نظر میں تمام مذاہب کو یکساں اہمیت حاصل ہے،توہندوستانی پارلیمنٹ اکیسویں صدی میں کوئی بھی قانون سازی کرکے اس دستور میں مذہبی تفریق کا عنصر داخل نہیں کرسکتی۔
ان مظاہرین کے پاس ایک مضبوط ہتھیارہے اوروہ ہے ہندوستانی آئین کا”دیباچہ“۔کپڑے اور طرزِپوشش کا اختلاف یہاں معنی نہیں رکھتا،جینز،جیکٹ اور حجاب سب ساتھ ہیں۔اہم بات یہ ہے کہ شاہین باغ کی خواتین یا بنگلور کی سافٹ ویئر پروفیشنلزیا جامعہ کے طلبہ و طالبات کاپرانے مظلومیت و متاثرہونے کے تصور سے کوئی تعلق نہیں ہے، اس کی بجائے ان محب وطن ہندوستانیوں کی جانب سے پوری توانائی اور طاقت کے ساتھ برابری کے حقِ شہریت کا اظہار کیاجارہاہے۔
مظاہروں کے مقامات پر آپ کو ایسے بچے اور جوان نظر آئیں گے، جنھوں نے اپنے چہروں پرہندوستانی ترنگانقش کروا رکھاہے،ایسے مناظر عموماً ہندوستان کے کرکٹ میچوں یا یومِ آزادی کے موقعے پر دیکھنے کو ملتے ہیں۔شاہین باغ میں ایک انڈیاگیٹ اور ہندوستان کا ایک عظیم الشان نقشہ بنایاگیاہے۔آزادی کے ہیروگاندھی،بھگت سنگھ،امبیڈکر اور مولانا آزاد کی تصویریں ایک قطار میں لگائی گئی ہیں۔ان سب کو ایک ساتھ دکھانے کا آئیڈیا(جوکہ روایتی سیاست دان نہیں کرتے)ہی اس احتجاج کو نظریاتی طورپر منفرد بناتاہے۔
حیدرآبادمیں اسداالدین اویسی ترنگا ریلی نکال رہے ہیں اور یوم جمہوریہ کے موقعے پر چار مینارکوترنگاسے روشن کرنے کا منصوبہ بنایاہے۔ممبئی میں دھاراوی کی جگی جھونپڑیوں میں رہنے والے مسلمان اپنے مراٹھی پڑوسیوں کے ساتھ مل کر قومی گیت گارہے ہیں۔مجلس کے لیڈر وارث پٹھان نے پوری قوت کے ساتھ کہاکہ دوسرے لوگ بھلے ہی آسٹریلیا،امریکہ ہجرت کرجائیں مگر اس ملک کے مسلمان اپنے پیارے وطن ہندوستان کوکبھی نہیں چھوڑ سکتے۔
ایک سوال ہوسکتا ہے کہ کیامسلمان ڈرکے مارے اپنی حب الوطنی کا اظہار کررہے ہیں؟بی جے پی کہہ سکتی ہے کہ وطن سے محبت ووفاداری کا اظہار واعلان یقینی طورپر وہی چیز ہے، جس کا بی جے پی شروع سے مطالبہ کرتی رہی ہے، مگرحقیقت یہ ہے کہ مسلمانوں میں کسی قسم کا خوف نہیں ہے،وہ کھل کر اپنے خلاف ہونے والے تعصب کو چیلنج کررہے ہیں؛بلکہ وہ کسی بھی دقیانوسیت اور بھدی تصویر کشی کو صریحاً مسترد کررہے ہیں۔ساتھ ہی دیگر محب وطن افراد کے ساتھ صف بستہ ہونے کے لیے لوگوں میں بین المذاہب بھائی چارے اور یکجہتی کا شوقِ فراواں پیدا ہورہاہے۔مظاہرے میں شریک ایک شخص کاکہناہے”اب بہت ہوچکا ہے۔کیاہم ایودھیا فیصلے پر خاموش نہیں تھے؟کیاہم اس وقت بھی خاموش نہیں تھے، جب مویشیوں کی تجارت کے نئے قانون کے ذریعے ہمارے کاروبارکو نقصان پہنچایاگیا؟کیاہم اس وقت بھی چپ نہیں تھے، جب ہندوستان کی واحد مسلم اکثریتی ریاست کو وفاقی خطے(یونین ٹیریٹری) میں بدل دیاگیا؟کیاہم نے اپنی مسلسل ہتک کے باوجود امن وامان کی باتیں نہیں کیں؟مگراب جبکہ ہماری شہریت کو چیلنج کیاگیاہے،تو ہمیں اپنی مادرِ وطن سے مضبوط انتساب کے اظہاراورحکومت کے تئیں شدید ناراضگی جتانے میں کوئی جھجھک نہیں ہے“۔
یہ آواز صرف اکثریت پسندی کے خلاف نہیں ہے؛بلکہ ساتھ ہی یہ خود مسلمانوں کے ان دانشوروں (مثلاً ماضی قریب میں سید شہاب الدین)کے بھی خلاف ہے،جو ہندوستانیت کی بجاے مسلم شناخت پر زوردینے کی کوشش کرتے ہیں؛چنانچہ شاہین باغ کے احتجاج میں ”ہندوستان کے چارسپاہی- ہندو، مسلم،سکھ،عیسائی“جیسے نعرے تواتر کے ساتھ لگ رہے ہیں، جس سے یہ تیقن حاصل ہوتاہے کہ بین المذاہب اشتراک و اتحادکے ذریعےہی ایک حقیقی طورپر آزادہندوستان کی تعمیر و تشکیل ہوسکتی ہے۔
یوپی،مغربی بنگال اور منگلورومیں تشدد کے واقعات اور انتہاپسندانہ سیاست کی وجہ سے اس تحریک کے اخلاقی وقار کوکچھ ٹھیس پہنچی تھی ،مگر زیادہ تر احتجاجات تاحال پرامن ہیں اور ممکن ہے ان سے مخلصانہ وپرامن سول تحریک کے تئیں ایک بار پھر سے لوگوں کااعتمادویقین لوٹ آئے۔اب ذمے داری اکثریتی طبقے کی ہے،کیاسبھی ہندواس دستوری لڑائی میں شامل ہوں گے اور سیاست دانوں کے ذریعے کیے گئے اس دقیانوسی پروپیگنڈے کو ناکام ثابت کریں گے کہ ”مظاہرین اپنے کپڑوں سے پہچانے جاسکتے ہیں“؟
بی جے پی نے برطانوی استعمار کا لغت اپنالیاہے۔ایک تحقیقی کتاب‘Beyond Turk and Hindu’میں یہ بتایاگیاہے کہ کس طرح استعماری دورِ حکومت میں محکمۂ شماریات کے افسران نے ہندوستانیوں کوواضح طورپر”مسلم“اور ”ہندو“کے طبقوں میں تقسیم کیا۔اس سے پہلے برصغیر “Islamicate” اور“Indic”لوگوں کی آمدورفت کے لیے یکساں وسعت رکھتا تھا۔ان مظاہروں نے ان پرانے اشتراک و تعلقات کو زندہ کردیاہے اور مسلمانوں کے اس دعوے کو مضبوط کردیاہے کہ ہندوستان کی تاریخ میں ان کی حصے داری نہایت پرانی ہے۔
ان احتجاجات کومسلم ایشوکے طورپر دیکھنا غلط ہے،اسی طرح مظاہرین کے لیے بھی غلط ہوگاکہ وہ ”شناخت کی سیاست“کے تنگنائے میں منحصر ہوکررہ جائیں۔یہ وقت نئے دستوری اقدارکی بازیابی کے لیے جدوجہد اور دوقومی نظریے کوپوری قوت سے مسترد کرنے کاہے۔فی الحقیقت یہ مظاہرے اکثریت -اقلیت کی تقسیم سے ماورا ایک نئی سرگرم مسلم سٹیزن شپ کے ابھرنے کا موقع فراہم کرتے ہیں؛کیوں کہ اس تحریک کے ذریعے طاقت ورانداز میں یہ حقیقت سامنے آرہی ہے کہ مسلمانوں کی حب الوطنی کسی بھی اعتبار سے اس ”دیش بھگتی“سے کم نہیں ہے،جس کا ہندووں کودعویٰ ہے۔ان احتجاجات میں پوری قوت سے یہ احساس ابھر کرسامنے آرہاہے کہ:فخرسے کہو،ہم ہندوستانی مسلم ہیں!

(بہ شکریہ روزنامہ ٹائمس آف انڈیا)

20 جنوری, 2020 0 comment

تجزیہ

واہ پنڈت جی واہ!

by قندیل 19 جنوری, 2020

written by قندیل

ایم ودود ساجد

این ڈی ٹی وی نے بتایا ہے کہ آج شاہین باغ کے احتجاج میں 80 کی دہائی کے ‘اجڑے’ ہوئے کچھ پنڈت پہنچ گئے ۔انہوں نے ہاتھوں میں بینر لے رکھے تھے۔ان کا کہنا ہے کہ انہیں آج ہی کے دن یعنی 19 جنوری کو کشمیر سے اجاڑ دیا گیا تھا۔
یہ پنڈت شاہین باغ اس لئے نہیں پہنچے تھے کہ انہیں مظاہرین سے اظہار یکجہتی کرنا تھا،وہ تو CAA کی مخالفت ہی نہیں کرتے اور اس سلسلے میں حکومت کے ساتھ ہیں۔
ان کا کہنا ہے کہ فلم اداکار سوارا بھاسکر نے آج شاہین باغ میں جشن شاہین منانے کا اعلان کیا تھا جس میں کچھ غزل سرائی اور شعروشاعری کا منصوبہ تھا۔ اس پر فلم ساز وویک اگنی ہوتری نے ٹویٹ کرکے کہا تھا کہ آج ہی کے دن کشمیری پنڈتوں کو اجاڑا گیا تھا اور آج جشن شاہین منایا جارہا ہے لہذا آج شام کو پانچ بجے کشمیری پنڈت شاہین باغ پہنچ کر اس کے خلاف مظاہرہ کریں ۔وویک اگنی ہوتری کی مودی نوازی چھپی ہوئی بات نہیں ہے۔
این ڈی ٹی وی کو ایک کشمیری پنڈت نے بتایا کہ ہم سی اے اے کی حمایت کرتے ہیں اور یہاں ہم اپنے اجڑنے کی داستان سنانے آئے تھے۔ایک کشمیری پنڈت خاتون کچھ زیادہ ہی جوش میں تھی۔اس نے کہا کہ ان لوگوں نے (شاہین باغ کے مظاہرین نے) غلط اعلان کیا کہ ہم ان کی حمایت کرنے آئے ہیں ۔وہ کچھ اور کہتی اس سے پہلے ہی دوسرے پنڈت نے بات سنبھال لی۔اس نے کہا کہ شاہین باغ والوں نے ہمیں اپنی بات کہنے کےلئے اپنا اسٹیج پیش کیا اور ہمارا درد سن کر ہم سے اظہار یکجہتی کیا۔
مشہور کشمیری پنڈت اے کے رینا نے تو اسٹیج پر یہاں تک کہہ دیا کہ گو کہ ہم سی اے اے کی حمایت کرتے ہیں لیکن آپ لوگ اتنے دنوں سے یہاں جمع ہیں تو ہم آپ کا بھی درد سمجھتے ہیں ۔
تو وزیراعظم صاحب!
اب تو کچھ شرم کرلیجئے۔جن پنڈتوں کا نام لے کر آپ نے 80 لاکھ کشمیریوں کا دم گھونٹ دیا ہے وہ بھی اپنی بپتا سنانے کے لئے اُس اسٹیج کا سہارا لینے پر مجبور ہیں جو آپ کے مخالفین نے سجایا ہے۔۔۔ یہ پنڈت کتنے بھولے’ سادہ مگر مجبور ہیں کہ ہندوستان کے جس بڑے طبقے کی مخالفت کر رہے ہیں اسی کے پروگرام کو اپنی داستانِ رنج والم سنانے کے لئے استعمال کر رہے ہیں ۔ شاید انہیں بھی اب احساس ہوگیا ہے کہ ان کی بات دنیا اسی اسٹیج سے سنے گی جہاں سی اے اے کے خلاف ہزاروں خواتین ایک مہینہ سے سینہ سپر ہیں ۔

19 جنوری, 2020 0 comment

تجزیہ

عوامی تحریک نے مودی -شاہ جوڑی کو پیچھے دھکیل دیا

by قندیل 18 جنوری, 2020

written by قندیل

عبدالعزیز
11دسمبر 2019ء کو راجیہ سبھا میں شہریت ترمیمی بل 105 ووٹوں کے مقابلے میں 125 ووٹوں سے پاس ہوا۔ دوسرے روز صدر جمہوریہ نے سی اے اے پر اپنی مہر ثبت کردی۔ نوٹیفیکیشن کے بعد اسے قانون کا درجہ حاصل ہوگیا۔ اس کے بعد ہی سے ’سے اے‘ اور’این آر سی‘ کے خلاف احتجاج اور مظاہرے کا سلسلہ شروع ہوا۔ آسام اور دیگر علاقوں میں غیر معمولی احتجاج سے متاثر ہوکر وزیر اعظم نریندر مودی نے این آر سی کے سلسلے میں رام لیلا میدان دہلی میں سفید جھوٹ بولتے ہوئے کہاکہ لوگ این آر سی کے بارے میں بلا وجہ پریشان ہیں جبکہ این آر سی لاگو کرنے کے سلسلے میں نہ کوئی چرچا ہوا اور نہ کہیں اس کے نفاذ پر بات کی گئی اور نہ بحث و مباحثہ ہوا۔ حالانکہ ان کے خاص الخاص اور سائے کی طرح ان کے ساتھ رہنے والے امیت شاہ نے بیسیوں بار بیانات دیئے کہ این آر سی ملک بھر میں لاگو ہوگا اور چن چن کر دراندازوں کو ملک بدر کر دیا جائے گا۔ لوک سبھا اور راجیہ سبھا میں بھی انھوں نے بیان دیا۔ دونوں ایوانوں کے مشترکہ اجلاس میں صدر جمہوریہ نے بھی اپنے خطبے میں این آر سی کے نفاذکا ذکر کیا۔ اتنے بڑے جھوٹ کے بعد ایسا لگتا تھا کہ حکومت پیچھے کی طرف ہٹ رہی ہے، لیکن رام لیلا میدان میں سفید جھوٹ بولنے کے بعد دوسرے ہی دن ’این پی آر‘ کو پاس کرنے کے بعد اندازہ ہوا کہ مودی حکومت چور دروازے سے این آر سی کو نافذ کرنا چاہتی ہے۔ حکومت کے اس اقدام کے بعد عوام میں بے چینی اور اضطراب کی لہر دوڑ گئی۔ این آر سی اور سی اے اے کے خلاف جو احتجاج اور مظاہرے ہو رہے تھے اس میں تیزی آگئی اور وہ زور پکڑتا گیا۔
ایک ڈیڑھ ماہ ہونے کو آیا ہندستان کا پورا ماحول بدل گیا اور حکومت کے مزاج میں بہت حد تک تبدیلی آگئی۔ بات چیت کا انداز بھی بدل گیا۔ پاگل پن کے ساتھ ساتھ ہوش ٹھکانے بھی لگنے لگے۔ اتنی بڑی تبدیلی کیسے آئی؟ دیکھا جائے تو یونہی نہیں آئی۔ اس تبدیلی کیلئے یہ کہنا صحیح ہوگا کہ آگ کا دریا تھا جسے پار کرنا تھا۔ وہ دریا پار کرنے کیلئے موجودہ ظالم حکومت کا سامنا تھا۔ کشمکش شروع ہوئی، پولس مظالم کا سلسلہ دراز ہوا۔ گولی اور پستول کے استعمال کے ساتھ ساتھ دھمکیوں اور گرفتاریوں کے ذریعہ ڈرانے اور دھمکانے کا سلسلہ بھی شروع ہوا۔ ان سب کے باوجود تحریک اور احتجاج کرنے والوں کے پاؤں لڑکھڑائے نہیں۔ ثابت قدمی کا مظاہرہ ہوتا رہا۔ شاہین باغ جیسا احتجاج پورے ملک میں شہر شہر، گاؤں گاؤں، قصبہ قصبہ ہونا شروع ہوا۔ صرف یوپی میں پچیس سے تیس افراد شہید ہوئے۔ دوسری جگہوں میں چند لوگوں نے شہادت کا جام نوش کیا ہے۔ اس بڑی تبدیلی جس کا ذکر اوپر کی سطروں میں کیا گیا ہے خون و پسینے کا ثمر ہے۔ احتجاج اور مظاہرہ اتنا زور دار ہوگا نہ حکومت کے علم میں تھا اور نہ عوام کے دل و دماغ میں یہ بات تھی۔ اچانک اس کی شروعات ہوئی اور دیکھتے دیکھتے عوامی تحریک اور جدوجہد آج اس مقام پہ پہنچ چکی ہے کہ جو لوگ سیاسی حالات سے نابلد رہتے تھے ان کی بے خبری اس حد تک ہوتی تھی کہ سب کچھ گزر جانے کے بعد بھی وہ سمجھنے سے قاصر رہتے تھے کہ ملک میں کیا ہوا اور ہوگیا ہے۔ اب ایسے لوگ بھی اپنے گھروں، اپنے حجروں سے باہر آگئے۔ فلم انڈسٹری جو ملکی حالات سے لاتعلق تھے وہ بھی ان مظاہروں میں حصہ لینے لگے اور مظلومین کے ساتھ کھڑے ہوگئے۔ ایک ہفتہ پہلے کی بات ہے کہ مشہور تجزیہ نگار اور سماجی کارکن یوگیندر یادو سے خاکسار نے کہاکہ ان کی سمجھ میں یہ بات آرہی ہے کہ ہم لوگ آگے بڑھے ہیں اور احتجاج اور مظاہرین کے دشمن کچھ پیچھے ہٹے ہیں۔ یوگیندر یادو نے کہاکہ بات صحیح ہے لیکن لڑائی لمبی ہے۔
آج (18جنوری) کے ’دی ٹائمس آف انڈیا‘ میں مشہور کہانی نگار، مصنف اور صحافی چیتن بھگت کا ایک مضمون شائع ہوا ہے۔ جس کا عنوان ہے: "Why NRC must be shelved: It will be an expensive, gargantuan, pointless exercise that could trigger civil war in the worst case.” (کیوں نہ این آر سی کو ٹھنڈے بستے میں ڈال دیا جائے۔ یہ انتہائی خرچیلا، بے معنی، بے فائدہ عمل ہے جو خرابیِ حالات میں خانہ جنگی کی طرف لے جاسکتا ہے)۔ مضمون کے پہلے ہی پیرا گراف میں چیتن بھگت لکھتے ہیں کہ "NRC has caused huge controversy, polarised opinion, created massive anxiety and made people come out on the streets. The government is now on the back foot. However, it hasn’t done what it should – to officially withdraw it or put it in long-term cold storage.” (این آر سی کی وجہ سے زبردست تنازعہ، خیالات میں انتشار اور بے پناہ بے چینیاں اور اضطراب پیدا ہوا ہے جس کی وجہ سے لوگ سڑکوں پر آگئے ہیں۔ حکومت اس وقت بیک فٹ پر آگئی ہے۔ بہر کیف اسے یہ سب نہیں کرنا تھا اور اب اسے کیا کرنا چاہئے؟ اسے آفیشیلی واپس لے لینا چاہئے یا بہت دنوں تک اسے سرد خانے میں رکھ دینا چاہئے)۔
انھوں نے اپنے مضمون میں موجودہ حکومت کے بہت سے کاموں پر تنقید کی ہے اور اسے غلط اور بے فائدہ کام بتایا ہے۔ این آر سی، سی اے اے اور این پی آر کی مشق کو غیر ضروری قرار دیا ہے۔ آخر میں لکھا ہے کہ "We have an economy to work on, that’s exciting enough and needs to be the number one priority. NRC needs to take a rest for now, officially.” (ہم لوگوں کو معیشت کیلئے بہت کچھ کرنا تھا جو ہمارے لئے بہت جذباتی چیز ہے جو ترجیح اوّل کی حیثیت رکھتی ہے۔ این آر سی کو آفیشیلی آرام دینے کی ضرورت ہے)۔
مسٹر چیتن بھگت ان لوگوں میں سے ہیں جو مودی جی کے بہت گن گاتے تھے لیکن آہستہ آہستہ وہ بھی مودی جی سے متنفر ہوگئے۔ ان کے بے معنی اور بے سود عمل سے ان کو اب چڑ سی ہوگئی ہے۔ اس طرح بہت سے صحافی اور رائٹر ہیں موجودہ حکومت سے متنفر سے ہوگئے ہیں۔ دانشوروں اور سرکاری افسران میں بھی بہت سے لوگ مودی -شاہ کی جوڑی کو ملک اور دستور کیلئے خطرہ سمجھنے لگے ہیں۔ ان کے کاموں کو انسانیت کی تقسیم اور خانہ جنگی کا ذریعہ سمجھتے ہیں۔
عدلیہ کا رویہ بہت دنوں سے نامناسب اور مایوس کن تھا، لیکن دو چار دنوں سے عدلیہ میں اور اس کی سوچ میں لگتا ہے کچھ تبدیلی آئی ہے۔ سی اے اے، این آر سی، این پی آر کے سلسلے میں سپریم کورٹ میں 22جنوری کو سماعت ہے۔ سپریم کورٹ اگر آزادانہ ماحول میں بغیر کسی دباؤ اور اثر کے شہریت ترمیمی ایکٹ کو دستور ہند کی روشنی میں جائزہ لے گی تو اس قانون یا ایکٹ کو بغیر کسی پس و پیش کے رد کر دے گی۔ دوسرا امکان یہ ہے کہ مودی جی شاید سمجھ چکے ہیں کہ ان کے تعلق سے لوگوں کے اندر جو مقبول جذبہ(Popular Sentiment) تھا جو باقی نہیں رہا، لہٰذا Face Saving (بدنامی سے بچنے) کیلئے حکومت عدلیہ سے کچھ اس طرح رجوع کرسکتی ہے کہ اس پر روک (Stay)لگا دی جائے۔ اس طرح حکومت اپنے لوگوں کو یہ سمجھا سکے گی کہ اس نے تو کوشش میں کوئی کمی نہیں کی لیکن عدالت کے فیصلے کی وجہ سے وہ مجبور ہے۔ دوسرا امکان یہ ہے کہ عدالت کی طرف سے دوسری تاریخ دے دی جائے۔ سپریم کورٹ جو بھی فیصلہ دے اس کا اثر عوامی تحریک کو قبول نہیں کرنا چاہئے کیونکہ یہ لڑائی مودی اور شاہ سے نہیں ہے یا ان کے کسی عارضی کاموں سے نہیں ہے بلکہ ان کی سرپرست تنظیم آر ایس ایس سے ہے۔ آر ایس ایس کا ایجنڈا ’ہندو راشٹر‘ قائم کرنے کا ہے۔ اقوام متحدہ (UNO) نے آر ایس ایس کے بارے میں یہ رائے دی ہے کہ یہ دہشت گرد تنظیم ہے۔ اس بین الاقوامی ادارے کی رائے بے بنیاد نہیں ہے۔ آر ایس ایس سے منسلک افراد نے 17مقامات پر بم بلاسٹ کئے ہیں۔ سترہ عدالتوں میں آر ایس ایس کے ان لوگوں کے خلاف مقدمات زیر سماعت ہیں۔ (حوالہ: آر ایس ایس ہندستان کی سب سے بڑی دہشت گرد تنظیم- مہاراشٹر کے پولس کے ریٹائرڈ آئی جی ایس ایم مشرف)۔
ایس ایم مشرف صاحب نے اپنی ایک تقریر میں کہا ہے کہ ان کی کتاب کو شائع ہوئے پانچ سال سے زیادہ ہوگئے۔ ان کی کتاب کئی زبانوں میں شائع ہوئی ہے، پھر بھی اس کے مندرجات کو کسی نے چیلنج نہیں کیا ہے۔ بعض وجوہ سے آر ایس ایس کے لوگوں کے خلاف زیر سماعت مقدمات کے فیصلے میں دیر یا کوتاہی ہورہی ہے۔ اس حقیقت کے پیش نظر عوامی تحریک کو اس وقت تک جاری رہنا چاہئے جب تک کہ آر ایس ایس کے اثرات زائل نہ ہوجائیں یا اس کے کالے کرتوتوں کو دنیا اچھی طرح سے سمجھ نہ لے۔ ایک دلت لیڈر نے صحیح کہا ہے کہ مودی یا شاہ تو آر ایس ایس کے مہرہ ہیں۔ یہ ہٹ بھی گئے تو آر ایس ایس کسی اور مودی-شاہ کو بٹھا دے گا۔
عوامی تحریک کی خصوصیت: اس تحریک کی مقبولیت اور شہرت پر دو رائے نہیں ہے لیکن اسے مزید مضبوط و مستحکم کرنے کی ضرورت ہے۔ دوسری اہم بات یہ ہے کہ اس تحریک میں تعداد میں پہل اور پیش قدمی کے لحاظ سے مسلمان زیادہ نظر آتے ہیں۔ اس میں ہندو، مسلمان، سکھ، عیسائی سب شامل ہیں۔ یہ کسی ایک فرقہ یا ایک مذہب کی تحریک یا ایجی ٹیشن نہیں ہے بلکہ سارے مذاہب اور فرقوں کی تحریک ہے۔ مسلمان مرد اور عورتیں، یہاں تک کہ بچے، جوان اور طالب علم زیادہ دکھائی دے رہے ہیں۔ اس کی وجہ سے اسے مسلمانوں کی تحریک دشمنانِ جمہوریت یا دشمنانِ تحریک بتانے یا کرنے کی کوشش کر رہے ہیں۔ نریندر مودی نے جو بیان دیا تھا کہ جو لوگ احتجاج کر رہے ہیں ان کو کپڑوں سے پہچانا جاسکتا ہے۔ ان کا اشارہ اسی طرف تھا کہ یہ مسلمانوں کی تحریک ہے۔ لیکن دوسرے مذاہب اور فرقوں کے لوگوں کی شمولیت کی وجہ سے ان کی یا ان کے لوگوں کی بات بے وزن ثابت ہورہی ہے۔ اس تحریک کی سب سے بڑی خوبی یا خاصیت یہ ہے کہ دلتوں کا طبقہ آگے آگے دکھائی دے رہا ہے۔ تعداد میں کمی ہوسکتی ہے لیکن ان کے نوجوان لیڈر بے خوف و خطر اس تحریک کا حصہ بن گئے ہیں۔ یہی چیز مودی اور شاہ کیلئے بڑی الجھن کا باعث بنا ہوا ہے۔ دلتوں کے علاوہ سکھوں نے بھی بحیثیت مجموعی اس احتجاج کی حمایت کا اعلان کیا ہے۔شاہین باغ کے خواتین کے احتجاج کی یکجہتی کیلئے ریاست پنجاب سے ڈیڑھ سو مرد اور خواتین شاہین باغ اور جامعہ ملیہ اسلامیہ آئے۔ دلتوں کی شمولیت جذباتی طور پر نہیں ہے بلکہ ان کے ذہن میں یہ بات آگئی ہے کہ سب سے زیادہ غریب اور کمزور طبقہ ہے متاثر ہوگا۔ این آر سی یا این پی آر سے سب سے زیادہ دشواری یا تکلیف دلتوں کو ہوگی۔ یہ پہلا موقع ہے جب دلتوں اور مسلمانوں کے اتحاد کے مناظر دیکھنے کو مل رہے ہیں۔ ہندو مذہب سے تعلق رکھنے والے لوگ بھی بڑی تعداد میں شریک ہونے لگے ہیں۔
گزشتہ روز ایک کرکٹ میچ کے دوران ممبئی کے اسٹیڈیم میں ہندو مسلم نوجوانوں نے ایک ساتھ مل کر کالے قانون کے خلاف کھڑے ہوکر ایک انوکھا پر امن احتجاج کیا جسے دیکھ کر لوگ حیرت میں پڑگئے۔ ان کے سب کے کپڑے No NRC, No CAA, No NPR لکھا ہوا تھا۔ بہت سے لوگ مسلمانوں کی شمولیت پر چیں بہ جبیں ہیں لیکن ان کو معلوم ہونا چاہئے کہ مسلمان ہی کالے قانون کے سب سے زیادہ شکار ہوں گے۔ جس پر حملے ہوتے ہیں اس کو اپنے بچاؤ یا دفاع کا پورا حق ہے۔ دلتوں پر جب حملے ہوتے ہیں تو دلت اپنے بچاؤں کیلئے آگے آتے ہیں۔ آدیباسیوں پر حملے ہوتے تو آدیباسی اپنے تحفظ کیلئے سامنے آتے ہیں۔ اسی طرح کوئی بھی طبقہ خواہ مزدوروں کا ہو یا کسانوں کا ہو جب وہ مصیبت کا شکار ہوتا ہے تو اپنے بچاؤ کیلئے سامنے آتے ہیں۔ اتنی بات ضرور ہے کہ ہندو مسلم اتحاد کے ذریعہ جو مظاہرے ہوں گے ان کا اثر اچھا خاصا ہوگا لیکن مسلمانوں کے مظاہرے کو Under Estimate (کمتر) کرنا صحیح نہیں ہے۔ آزادی سے پہلے آزادی کی لڑائی میں خلافت کی تحریک میں مسلمان پیش پیش تھے اور آزادی کی تحریک میں بھی پیش پیش تھے جس کی وجہ سے تحریک کو زبردست تقویت حاصل ہوئی تھی۔ اس وقت کم و بیش وہی مناظر ہیں۔ اتحاد و اتفاق کے ان مناظر کو خدا نظر بد سے بچائے۔
E-mail:[email protected]
Mob:9831439068

18 جنوری, 2020 0 comment

قومی خبریں

جامعہ میں احتجاج کا ۲۹؍واں دن، شاہین باغ کے احتجاج کوہائی کورٹ سے راحت

by قندیل 10 جنوری, 2020

written by قندیل

مختلف سیاسی وسماجی شخصیتوں کی آمد،سخت سردی اور بارش کے باوجود مظاہرین پرجوش ، یواین اوکی تحقیقاتی ٹیم کا دورہ کل
نئی دہلی۔ ۱۰؍جنوری ( جامعہ کیمپس سے محمد علم اللہ کی رپورٹ) جامعہ ملیہ اسلامیہ میں شہریت ترمیمی قانون، این آر سی و این پی آر کے خلاف احتجاج کا آج ۲۹؍واں دن تھا۔ سخت سردی اور بارش کے باوجود لوگوں کا جوش ولولہ قابل دید تھا۔ آج جمعہ ہونے کی وجہ سے مظاہرین کی کچھ زیادہ ہی بھیڑ تھی۔ طلبا نے مجموعی طورپر اپنے عزم وہمت کا اعادہ کرتے ہوئے کہاکہ ہم اس تحریک کو اس وقت تک جاری رکھیں گے جب تک ہماری جان میں جان ہے۔ اس موقع پر طلبانے پرزور آواز میں حکومت کے خلاف نعرے بازی کی۔ طلبا کی ایک بڑی تعداد بھوک ہڑتال پر بھی بیٹھی ہوئی ہے۔ اسی درمیان طلبا کو حمایت دینے اور ان کے ساتھ اظہار ہمدردی کرنے والوں کا بھی تانتا بندھا ہوا ہے۔ بڑی تعداد میں سماجی کارکنان، دانشوران اور ملی قائدین ، یونیورسٹی وکالج کے پروفیسران طلبہ کے ساتھ اظہار یگانگت کےلیے گیٹ نمبر 7 باب مولانا ابوالکلام آزاد پر پہنچ رہے ہیں۔ آج کے اس احتجاج میں جن شخصیتوں نے خطاب کیا ان میں معروف دانشور پروفیسر زویا حسن، سپریم کورٹ کے ایڈوکیٹ ڈاکٹر زیڈ کے فیضان، معروف قلمکار اشوک کمار پانڈے، آل انڈیا مجلس اتحادالمسلمین کے ترجمان عاصم وقار، معروف اسلامی اسکالر مولانا یحییٰ نعمانی، یوتھ فور پیس کے جنرل سکریٹری علی نسیم رضی ، یوپی کانگریس کے نوجوان لیڈر سلمان خان علیگ، ایم ای ای ایم کے صدر سید فرمان احمد اور شعرا میں حسین حیدری، سومیہ دیپ مرشدآباد کے نام قابل ذکرہیں۔ آج کے احتجاج میں خطاب کرتے ہوئے معروف دانشورو جامعہ کے سابق وائس چانسلر مشیرالحسن کی اہلیہ پروفیسر زویا حسن نے کہاکہ آزادی کے بعد سے میں نے اتنی بڑی تحریک نہیں دیکھی ہے، نربھیا اور انا احتجاج بھی صرف دہلی تک ہی محدود تھا لیکن یہ احتجاج ملک بھر میں ہے۔ انہو ں نے کہاکہ شہریت ترمیمی قانون مذہب کی بنیاد پر تقسیم کرتا ہے۔سپریم کورٹ کے وکیل زیڈکے فیضان نے کہاکہ یہ سیاہ قانون آئین مخالف ہے، حکومت آپ کے احتجاج سے بوکھلائی ہوئی ہے، جامعہ کیمپس میں گھر کر دہلی پولس کے ذریعے تشدد پر انہو ں نے کہاکہ جو بھی جامعہ میں ہوا وہ وائس چانسلر اور پولس کی ملی بھگت سے ہوا۔ مجلس اتحادالمسلمین کے ترجمان عاصم وقار نے کہاکہ میں یہاں سیاست کرنے نہیں بلکہ اپنی ذمے داری نبھانے آیا ہوں کہ ہم اپنے حقوق اور آئین کے تحفظ کےلیے لڑیں، جس سے ملک کی روح بچی رہے، انہوں نے مظاہرین کا حوصلہ بڑھاتے ہوئے کہاکہ آپ سب اکیلے نہیں ہیں ہماری پارٹی آپ کے ساتھ ہے،یہ لڑائی صرف مسلم اور حکومت کے درمیان نہیں بلکہ یہ ملک اور حکومت کے درمیان کی لڑائی ہے۔ معروف اسلامی اسکالر مولانا یحییٰ نعمانی نے کہاکہ آپ جو کررہے ہیں زیادہ تر لوگ یہ کرتے ہوئے ڈرتے ہیں، انہوں نے کہاکہ اس تحریک کی خوبصورتی یہ ہے کہ اس میں ایک زبان، ایک نعرہ ہے ہم سب ایک ہیں۔ انہوں نے کہاکہ جامعہ نے پورے ملک کو جگا دیا ہے۔ اس موقع پر سبھی مقررین نے جامعہ کے طلبہ کی حوصلہ افزائی کی اور تحریک جاری رکھنے پر مبارک باد دی۔ڈاکٹر شکیل احمد خان ، کدوہ ، بہار سے ممبر قانون ساز اسمبلی نے کہا ، “یہ احتجاج اگلی نسل کے لئے ہے۔ ہمیں یہ سمجھنے کی ضرورت ہے کہ بی جے پی ایک اور عنوان لے کر آئے گی اور ہماری توجہ دوبارہ ہٹانے کی کوشش کرے گی لیکن ہمیں اپنے معاملے پر توجہ مرکوز رکھنا ہوگا اور لڑائی جاری رکھنا ہوگا۔ نوجوان لیڈر سلمان خان علیگ نے اپنے خطاب میں کہا کہ میں بابا صاحب امبیڈکر اوران کے آئین کو مانتا ہوں، انہوں نے کہاکہ ہم تعلیم یافتہ ہیں اور ہماری تعلیم بے کار ہے اگر ہم فرقہ پرست حکومت کے خلاف نہیں لڑے ، انہوں نے مظاہرین سے کہاکہ میں آپ سب سے گزارش کرتا ہوں کہ اس تحریک کو اتحاد کے ساتھ جاری رکھیں ـ ادھر دوسری جانب جنوبی دہلی کے شاہین باغ کا احتجاج بھی انتہائی جوش وخروش کے ساتھ جاری رہا۔ دہلی ہائی کورٹ نے شاہین باغ کے مظاہرین کو راحت دیتے ہوئے کہا ہے کہ یہاں سے مظاہرین نہیں ہٹیں گے۔ جس سے مظاہرین میں خوشی کی لہر ہے۔ ہائی کورٹ میں دائر عرضداشت میںں کہاگیا تھا کہ شاہین باغ علاقے میں شہریت ترمیمی قانون اور این آر سی کو لے کر ہورہے احتجاجی مظاہرے کی وجہ سے ڈی این ڈی فلائی اوور پر روز عوام کو مشکلات کا سامنا کرنا پڑتا ہے۔ ہائی کورٹ کے اس فیصلے کے بعد لوگوں میں خوشی کے آثار دیکھے گئے، اس موقع پر مظاہرین نے کہاکہ اب جو ہوجائے ہم اس کالے قانون کو واپس لیے جانے سے پہلے یہاں سے جانے والے نہیں ہیں، ہم پولس کی گولی کھانے کو بھی تیار ہیں، لیکن بنا سی اے اے قانون کو ہٹوائے ہم یہاں سے جانے والے نہیں ہیں۔ قابل ذکرہے کہ اتوارکو شام 7:30 بجےشاہین باغ کے احتجاج میں یو این او کی ٹیم اس احتجاج اور ملک کے موجودہ منظر نامے کا جائزہ لینے کے لئے آرہی ہےـ منتظمین نے اس موقع پر بڑی تعداد میں لوگوں سے شرکت کی درخواست کی ہےـ

10 جنوری, 2020 0 comment

تجزیہ

ڈبڈبائی، مگر فکرمند اور باحوصلہ نگاہیں

by قندیل 10 جنوری, 2020

written by قندیل

(ہر باعزت ہندوستانی کا درد، جسے بد نیت تخت نشین نظر انداز کرنے کی غلطی کر رہے ہیں۔)

محمد رضی الرحمن قاسمی
ینبع، مدینہ طیبہ

کندھے سے معصوم بچہ لگا تھا، اور وہ خاتون ڈبڈبائی آنکھوں سے مشہور ٹی وی صحافی رویش کمار سے بات کرتے ہوئے اس درد کا اظہار کر بیٹھیں، جو ہر باعزت ہندوستانی کا درد ہے کہ عوامی ووٹ سے منتخب ہونے والے کچھ بد نیت افراد کون ہوتے ہیں کہ کہ ایک سو کروڑ سے زیادہ ہندوستانیوں کی بے عزتی کریں اور ان سے یہ پوچھیں کہ تم لوگ اسی مٹی سے ہو،اسے ثابت کرو۔
یہ واقعہ 5 جنوری 2020 کی سرد رات کا ہے، جب وہ اپنے معصوم بچے کے ساتھ ملکی آئین کے مخالف قوانین "سی اے اے، این پی آر اور این آر سی” کے خلاف بیس دن سے زیادہ سے شاہین باغ میں مسلسل چلنے والے احتجاج میں یہ درد لئے موجود تھیں۔
سی اے اے، این پی آر اور این آر سی جیسے قوانین میں "ہر سمجھ دار اور باعزت ہندوستانی فرد” کو جو باتیں بہت زیادہ چبھتی ہیں، ان میں سب سے پہلی بات "بے عزتی کا احساس” ہے کہ عوامی ووٹ سے منتخب مٹھی پر بد نیت تخت نشین افراد (جن میں سے کئی پر متعدد جرائم کا الزام ہے اور کیس چل رہے ہیں اور کئی کورٹ سے سزا یافتہ بھی ہیں) باعزت ہندوستانیوں سے اپنی مٹی سے رشتے کا اور اس سے محبت کا ثبوت مانگ رہے ہیں۔
دوسری بات جو چبھتی ہے، وہ ایک جمہوری ملک میں مذہب کی بنیاد پر تفریق کر کے اس کا سیاسی فائدہ اٹھانے کی بد ترین کوشش ہے۔
تیسری بات جو چبھتی ہے، وہ ہندوستانی دستور کے بنیادی ڈھانچے میں ایسی تبدیلی لانے کی کوشش ہے، جس سے ملک کا جمہوری کردار ہی مخدوش ہو جائے گا اور اگر اس کو نہیں روکا گیا، تو آئندہ اور بھی بدترین اور عوام مخالف قوانین لانے کا راستہ کھل جائے گا۔
جامعہ ملیہ سے چلنے والی "سی اے اے، این پی آر اور این آر سی مخالف تحریک” نہ صرف پورے ہندوستان کے سمجھدار طلبۂ و طالبات کی آواز بن گئی ہے؛ بلکہ پورے ملک کے ہر انصاف پسند اور باعزت شہری کی آواز اور دل کی صدا بن گئی ہے، تسلسل کے ساتھ روزانہ ملک کے مختلف حصوں میں ہونے والے احتجاج اس کا واضح ثبوت ہیں، بلکہ شاہین باغ دہلی میں ہونے والا احتجاج (جس میں اکثریت خواتین کی ہے، جن میں سے بہتوں کے ساتھ چھوٹے چھوٹے معصوم بچے بھی ہوتے ہیں۔)اور اس جیسے بعض احتجاج ایسے بھی ہیں، جو پچیس دنوں سے زیادہ سے مسلسل چل رہے ہیں۔
یہ ملک گیر مسلسل ہونے والے احتجاج ہمیں ایک حقیقت بتاتے ہیں اور ساتھ ہی ان احتجاجات نے ہمیں بہت کچھ سکھایابھی ہےـ حقیقت یہ ہے کہ کوئی بھی قانون’ ملک اور ملک کے باشندوں کے لئے ہوتا ہے، جب ان تینوں قوانین کو ملک کے عوام نے رد کر دیا اور شدت سے ان پر نا پسندیدگی کا اظہار کر رہے ہیں، اس کے باوجود بھی تخت نشین بد نیت ٹولےکو ان قوانین کے نفاذ پر اصرارہے، جو صاف اس بات کا پتا دیتا ہے کہ اس بد نیت ٹولے کا مقصد ان قوانین سے وطن اور اہل وطن کی بہتری نہیں ہے؛ بلکہ ان سے غلط مقاصد کا حصول اور اپنے سیاسی فائدے کی ناپاک فکر ہے۔
اگر مقصد وطن اور اہل وطن کی بہتری ہوتا، تو عوام کی اس متحد آواز کو اہمیت دیتے ہوئے تخت نشین افراد فوری طور پر ان قوانین کو دستوری انداز میں ختم کرنا اپنی ذمے داری سمجھتے اور کرتے، نہ کہ یوں بے حسی اور انانیت دکھاتے کہ چاہے جو ہو، ہم اپنے فیصلے سے نہیں ہٹیں گے۔
ان ملک گیر مسلسل ہونے والے احتجاجات نے ہمیں بہت کچھ سکھایا اور بھولی باتیں یاد دلائی ہیں:
ان میں سے ایک یہ ہے کہ بد نیت ارباب اقتدار کے ٹولے کی کھلی ہوئی دستور مخالف حرکتوں نے ہر باعزت اور سمجھ دار ہندوستانی کو ہندوستان کاایک ذمے دار شہری ہونے کا احساس دلادیا۔
دوسرے یہ کہ یہ شعور بیدار کیا کہ آگ اپنے کسی بھی پڑوسی کے گھر میں لگے، اسے اپنا نقصان سمجھ کر اسے بجھانے کی کوشش کرنی ہے، یہی انسانیت ہے، ورنہ اس آگ کا شعلہ ہمارے گھر پہنچ کر ہمارے آشیانےکو بھی خاکستر کر دے گا۔
تیسرے یہ کہ ہندوستان کی خوبصورتی مختلف مذاہب و ادیان اور مختلف سوچ اور فکر کے لوگوں کے ایک ساتھ ہونے اور محبت سے رہنے میں ہے۔
چوتھے یہ کہ ووٹ دینا جمہوری ملک میں ایک بہت بڑی ذمے داری ہے، جس میں کی جانے والی نا سمجھی پورے وطن کو چند بد نیتوں کے ہاتھوں میں کھلونا بنادیتی ہے اور جس نا سمجھی اور جذباتیت کا درد اوراس سے ہونے والے نقصانات کی کسک وطن اور اہل وطن کو برسوں جھیلنی پڑتی ہے۔
پانچویں یہ کہ نوجوان نسل کی رہنمائی ضرور کی جائے؛ لیکن اس کے ساتھ ساتھ قیادت میں اُن کو اُن کا صحیح مقام دیا جائے کہ ایک بہتر، متوازن اور نڈر قوم کی تشکیل ہو سکے۔
ان ہونے والے احتجاجات نے ان اسباق و پیغامات کے ساتھ ساتھ ہم ہر باعزت ہندوستانی کو ایک بڑے امتحان میں کھڑا کردیا ہے، وہ امتحان ہے ہمت و حوصلہ کا، عزیمت کا، ڈٹے رہنے کا۔ ہم ہندوستانیوں کو اس امتحان میں کامیاب ہونا ہے، نہ ہمیں گھبرانا ہے، نہ پیچھے ہٹنا ہے، بس اپنے مشن کو لئے ہوئے ڈٹے رہنا ہے، یہ یاد رکھیں کہ جیت حق کی ہی ہوتی ہے، گو کبھی فاصلے تھوڑے لمبے ہوجاتے ہیں۔ یہ بھی یاد رکھیں کہ اقتدار کے نشے میں چور نا عاقبت اندیش تخت نشینوں کو اکثر نوشتۂ دیوار نہیں دکھائی دیتا ہے۔
ہندوستانی نوجوانو، طلبۂ و طالبات، باعزت اور انصاف پسند (مرد و خواتین )ہندوستانیو! ڈٹے رہو، اگر حکومت سمجھداری کا ثبوت دے گی تو ان ملک مخالف قوانین کو واپس لے گی کہ ملک کی سالمیت اور باشندوں کی بہتری سے بڑھ کر ان کی اَنا نہیں ہے، ورنہ جیسے ان سے پہلے کے مغرور و متکبر اور عوامی آواز کو نظر انداز کرنے والے نشانِ عبرت بن گئے، یہ بھی بن جائیں گے اور – ان شاء اللہ- ایسا ہی ہوگا، بس شرط ہے منزل پر نگاہ رکھ کر ڈٹے اور جمے رہنے کی۔

10 جنوری, 2020 0 comment

تجزیہ

کیا ’بھارت ‘میں مسلم نسل کشی ممکن ہے؟

by قندیل 10 جنوری, 2020

written by قندیل

توصیف القاسمی،مقصودمنزل، پیراگپور، سہارن پور
موبائل نمبر8860931450 :

جی ہاں! اس دنیا میں سب کچھ ممکن ہے۔ نسل کشی Genocideکے واقعات آسمان کے نیچے ایک مرتبہ نہیں کتنی ہی مرتبہ پیش آچکے ہیں،کوئی ضدی مفکر نہ مانے تو اس کا کوئی علاج نہیں، دراصل ایسے ضدی مفکر نسل کشی کو ایک فرقہ ، نسل، ذات، اہل مذہب کے ’مکمل خاتمہ ‘ کے طورپر لیتے ہیں اور ایسا ہونا ناممکن ہے یعنی مکمل خاتمہ زمین کے فرعونوں کے بس میں نہیں ورنہ یہ فرعون ایسا کر گزرتے۔
ہمارے نزدیک نسل کشی سے مرادکسی ایک فرقے ، ذات یا نسل پر زمین محدود کردینا یا زمینی وسعت اور اس پرموجود اسباب زندگی کا تنگ کردینا ہے۔ کیا ہمارے ملک بھارت میں مسلمانوں کے ساتھ ایسا ہوسکتاہے ؟ کیا بھارت میں اندلس Spainکی تاریخ دوہرائی جاسکتی ہے؟ جی ہاں! بالکل ، مگر مولانا وحید الدین خاں صاحب نے اس قسم کے خیال و اندیشوں کو نہ صرف سرے سے خارج کیاہے بلکہ ان کا مذاق بھی اڑایاہے۔ مثلاً ایک جگہ و ہ لکھتے ہیں :
’’یہ بات پچھلی نصف صدی سے مختلف شکلوں میں کہی جارہی ہے، ہندوستانی مسلمانوں کے دینی اور علمی حلقوں میں اس کا بار بار چرچا کیاگیاہے، مسلم خطیبوں نے اپنی تقریروں میں اور اصحاب قلم نے اپنی تحریروں میں مسلمانوں کو اس مفروضہ خطرے سے ہوشیارکرنے کی مسلسل کوشش کی ہے،ملی تشخص کی حفاظت اور نئی نسل کے مستقبل کے تحفظ کی تحریکیں زیادہ تر اِسی مخصوص ذہن کی پیداوار ہیں۔
یہ سراسر بے بنیاد خوف ہے، جو لغویت کی حد تک بے معنی ہے، یہ ویسی ہی بات ہےجیسے کسی دیہاتی سے ایک شخص نے کہا کہ ’تمہارا کان کوّا لے گیا ‘ وہ دیہاتی آدمی کوّے کے پیچھے دوڑنے لگا، اس نے اپنے کان پر ہاتھ رکھ کر یہ دیکھنے کی کوشش نہ کی کہ اس کا کان بدستور اس کے سر پر موجود ہے۔ ‘‘
(کتاب: ہندوستانی مسلمان، صفحہ ۶۹)
مولانا وحیدالدین خاں کے فکری تانے بانے اور اُن کی استدلالی لہریں نسل کشی کے اندیشے کو ماننے کے لیے بالکل تیار نہیں ہیں۔ انھوں نے قدیم اندلس Old Spain میں پیش آئے مسلم نسل کشی کے واقعے کی ضرب و تقسیم بھی کی ہے اورپھر انھوں نے بھارت میں مسلم خاتمۂ نسل کے لیے 40ہزار سال کا اندازہ قائم کیاہے۔ وہ لکھتے ہیں:
’’اب فرض کیجیے کہ ہندوستان میں قدیم اسپین کی تاریخ دوہرائی جاتی ہے اور یہ بھی فرض کیجیے کہ یہ عمل کسی بھی اندرونی یا بیرونی مداخلت کے بغیر بلا روک ٹوک مسلسل جاری رہتا ہے، تمام خلاف قیاس باتوں کو فرض کرنے کے بعد جوصورت حال پیش آئے گی وہ تاریخی معلومات کے مطابق یہ ہوگی:
’’انسائیکلوپیڈیا برٹانیکا(1984) نے اپنے آرٹیکل اسپین کی تاریخ (History of Spain) میں بتایاہے کہ مسلمانوں کی فتح کے وقت اسپین کے باشندوں کی کل تعداد تخمیناً 40لاکھ تھی،جو عرب مسلمان اسپین میں داخل ہوئے، ان کی تعداد تقریباً 50ہزار تھی، اس تعداد میں دو طریقے سے اضافہ ہوا، ایک ،توالد و تناسل کے ذریعے اور دوسرا ، اُن عیسائیوں کی شکل میں جو اسلام قبول کرکے مسلمانوں کی جماعت میں داخل ہوگئے۔اس طرح آخری دور میں اسپین کے 5بڑے شہروں میں مسلمانوں کی مجموعی تعداد تین لاکھ ستاسی ہزار (3,87000) تھی۔ (EB-17/419)حساب کی آسانی کے لیے اسپین سےمسلمانوں کے خاتمے کی مدت کو ایک سو سال مان لیجیے اور اسپینی مسلمانوں کی تعداد میں اضافہ کرکےاس کو پانچ لاکھ فرض کرلیجیے، اب دیکھیے کہ اسپین کی آزمودہ تدبیر کو اگر ہندوستان میں اختیار کیاجائے تو یہاں کے 20کروڑ مسلمانوں کا خاتمہ کرنے کے لیے کتنی زیادہ مدت درکار ہوگی۔ علم الحساب بتاتا ہے کہ خاتمہ نسل کے اس عمل کے پورا ہونے میں چالیس ہزار سال لگ جائیں گے۔ ایک سو سال میں پانچ لاکھ انسانوں کو ہلاک کرنے کی رفتار سے جو مدت قرار پاتی ہے، وہ یہی ہے۔ واضح ہو کہ خاتمہ نسل کے لیے چالیس ہزار سال کی یہ مدت بھی اُس وقت ہے ، جب کہ اس درمیان میں کوئی بھی ناموافق صورت حال پیش نہ آئے، مثلاً توالد و تناسل کے ذریعے مسلمانوں کی تعداد میں کوئی اضافہ نہ ہو، ہندو اپنی موجودہ طاقت کو مسلسل چالیس ہزار سال تک برقرار رکھیں،کوئی عالمی واقعہ اس رفتار میں خلل نہ ڈالے ، ہندوئوں کے ساتھ وہ واقعہ نہ ہو جو تاتاری ظالموں کے ساتھ ہوا، جنھوں نے پچاس برس کے اندر اسلام قبول کرلیا، حتیٰ کہ چالیس ہزار سال تک قیامت کی آمد بھی رُکی رہے،وغیرہ۔ ‘‘
(ہندوستانی مسلمان،صفحہ 70-71)
مولانا کوکوئی بتلائے کہ ’’تمہارا لگایا ہوا حساب فیل ہوچکاہے، جس عمل (خاتمۂ نسل) کے لیے چالیس ہزار سال کا اندازہ قائم کرکے بے بنیاد خوف کی بات کہی ہے، اب وہ خاتمہ نسل صرف اور صرف پارلیمنٹ کے آدھے گھنٹے کی کارروائی ہے، اس کے بعد قانون و انتظام کی پوری چین آپ کےگرد لپٹنی شروع ہوجائے گی اور بچوں کے جوان ہونےسے پہلے اور جوانوں کے بوڑھا ہونے سے پہلے آپ ڈٹینشن کیمپ میں ہوں گے ۔ ڈاکٹریاسرندیم الواجدی نے ماضی قریب کے چند واقعات کوسامنے رکھتےہوئے بالکل صحیح اندازہ قائم کیاہے،یعنی 30-32سال کے اندر یہ کام انجام دیا جاسکتا ہے۔ اسپین کی تاریخ دوہرائی جانے کے لیے نہ دو سو سال اور نہ چالیس ہزار سال، یہ طویل عرصہ حیات 4Gکے زمانے میں لطیفۂ محفل بن چکا ہے،اب اس تھکادینےوالےانتظار کی کوئی ضرورت نہیں رہی۔ رہی بات اقوام متحدہ کی ایمنسٹی انٹرنیشنل اور عالمی پریشر کی یا عالمی میڈیا کی تو یاد رکھنا چاہیے کہ یہ سب خوبصورت الفاظ اپنے اندر انتہائی بدبودار معنی رکھتے ہیں۔
مذکورہ اداروں کے ہوتے ہوئے ہی دس لاکھ روہنگیا مسلم بنگلہ دیش میں پناہ گزیں ہیں اور وہ بھی صرف دومہینے میں۔ مقتول ومہلوک کی تعداد الگ۔ مذکورہ اداروں کے ہوتے ہوئے ہی پورا شام تباہ ہوچکا، مذکورہ اداروں کے ہوتے ہوئے ہی چین کے صوبے سنگیانگ میں ایغور مسلم بدترین زندگی گزار رہے ہیں۔ حقیقت یہ ہے کہ ماضی میں ظلم و شروفسادکے طریقوں نے ترقی نہیں کی تھی ، موجودہ وقت میں انسانی دنیا نےہر میدان میں ترقی کی ہے، اس لیے ظلم ،شر و فساد و خاتمۂ نسل کے طریقوں میں بھی ترقی ہوچکی ہے۔ معلوم نہیں مولانا وحیدالدین خاں نے یہ معکوس حساب کیوں لگایا۔
مایوسی نہیں مقابلہ کیجیے!
خوفناک اندیشے اور ڈرائونے خواب ضروری نہیں کہ حقیقت ہی بن جائیں، اس لیے مایوس ہونے کی بالکل ضرورت نہیں، مزید یہ کہ مایوسی اہل ایمان کے نزدیک ’’علامت کفر ‘‘ ہے۔ہر بُرےوقت کو اچھی تدبیروں کے ذریعے ختم کیاجاسکتا ہے، بعض تدبیریں:
1۔ ہندوئوں میں طبقاتی نظام ایک اٹل حقیقت ہے ، اکثر وبیشتر ماہرین کے مطابق یہی طبقاتی سسٹم ہندو راشٹر کی راہ میں سب سے بڑی رکاوٹ ہے، مسلم پالیسی سازوں کے لیے ضروری ہے کہ اس طبقاتی نظام کے خدوخال کو مزید واضح اور متعین کرکے ہندو راشٹر کے ’’خواب و خیال ‘‘کو پیچیدہ قسم کا بلیک ہول بنادیں۔
2۔ میں نے دیکھا ہے کہ اگر ہم دلتوں اور سکھوں کے ساتھ اسلامی اخلاق و سلوک والامعاملہ کرتے ہیں تو وہ ہر میدان میں ہمارے ساتھ کھڑے رہتے ہیں خیال رہے کہ وہ بھی برہمن ازم کے ہم سے زیادہ ستائےہوئے ہیں۔ وہ تمام دلت، سکھ لیڈر حضرات جو جنونی ہندوئوں کے خلاف لکھتے، بولتے اور میدان عمل میں متحرک ہیں، ان کی حوصلہ افزائی اور انعام و اکرام کے لیے کھلے اسٹیج منعقد کیےجائیں۔
3۔ ہم ووٹ کی اہمیت اور ووٹ کی یکجائی کو جتناجلدسمجھ لیں گے اتنا ہی جلد ہمارا مسئلہ حل ہوجائےگا۔
4۔ قومی سطح پر ہماری ایک سیاسی پارٹی ہونی چاہیے، M.L.A, M.P کی سیٹوں پر قبضہ کیے بغیر ہماری آواز نہیں سنی جائے گی۔
5۔ تعلیم یافتہ اور باشعور افراد کو تلاش کرکے ان کو قیادت کا پلیٹ فارم دیاجائے۔آج حالت یہ ہے کہ خوشامدی وراثتی اور داغدار قائدین آگے ہیں اور ’’ اہل ‘‘ حضرات پیچھے ۔ یعنی ’’سچے کا منھ کالا ، جھوٹے کا بول بالا ‘‘۔
6۔ دین اسلام کو ’’مسلک و حضرت ‘‘ کےبدترین چنگل سے نکال کر ’’ما اُنزل من ربک ‘‘ بنایا جائے اور بعینہٖ اسی دین کی دعوت دی جائے اور یہی دین قابل عمل نظریۂ حیات ہے اور یہی دین ’’دین رحمت ‘‘ ہے، باقی سب کچھ تفرقہ بازی یا انتہا پسندی ہے۔
7۔ غیرمسلموں میں اسلام اور مسلمانوں سے متعلق غلط فہمیاں بہت زیادہ پھیلی ہوئی ہیں یا جان بوجھ کر پھیلادی گئی ہیں، ان غلط فہمیوں کو نشان زد کرکے باقاعدہ طورپر دور کیاجائے۔ تحریروں سے،تقریروں سے،ویڈیو زسے مطالعہ بین المذاہب وغیرہ سے۔
بروزجمعرات،9؍جنوری 2020ء

10 جنوری, 2020 0 comment

قومی خبریں

اردو زبان و تہذیب کے سب سے بڑے جشن ’جشنِ ریختہ‘ کی آمد

by قندیل 10 دسمبر, 2019

written by قندیل

چھٹے جشن ریختہ کی سہ روزہ تقریبات 13تا15 دسمبر کو میجر دھیان چند نیشنل اسٹیڈیم، دلی میں منعقد ہوں گی
نئی دہلی: چھٹے جشن ریختہ کی سہ روزہ تقریبات کا آغازکل یعنی13 دسمبر سے دلی کے میجر دھیان چند نیشلک اسٹیڈیم میں ہونے جارہا ہے۔ جشن ریختہ اپنی گزشتہ پانچ تقریبا ت کی غیر معمولی کامیابی کے سبب دنیا بھر میں اردو زبان و تہذیب کے سب سے بڑے جشن کے طور پر جانا جاتا ہے۔ اس بار پھر سال کے اختتام پر یہ جشن دلی اور باہر کے لوگوں کے لیے اردو زبان،ادب اور تہذیب کو قریب سے جانین اور اس کے مختلف ذائقوں کو محسوس کرنے کا سبب بنے گا۔13 دسمبرشام چھ بجے معروف ادبی اور سیاسی شخصیت کرن سنگھ جشن کا افتتاح کریں گے۔ اس کے بعد انتہائی مقبول صوفی موسیقی کار ہرشدیپ کور اپنے نغموں سے محفل کو رونق بخشیں گی۔ 14 اور15 دسمبر کو ادبی مذاکرے، داستان گوئی، چہار بیت، ڈراما، قوالی،غزل سرائی،نوجوان شاعروں کی محفل، خواتین کا مشاعرہ،خطاطی، فلم اسکرینگ اور بہت سی دلچسپ تقریبات کے ذریعے اردو زبان اور اس کے تہذیبی رنگوں کو پیش کرنے کی کوشش کی جائے گی۔ جشن میں ہر بار کی طرح اس بار بھی ادب، فلم،تھیٹر اور آرٹ کی دنیا سے اہم ترین شخصیات شامل ہورہی ہیں، جن میں خاص طورپر گوپی چند نارنگ، شمس الرحمان فاروقی، منور رانا، جاوید اختر، راحت اندوری، استاد شجاعت خان،، رضا مراد، چندن داس، سچن پلگاونکر، تشار گاندھی، شمیم حنفی، انْبھو سنہا، دویا دتا، پویاش مشرا، مظفر علی، ہرشدیپ کور، جسپندر نرولا، تشار گاندھی، لبنیٰ سالم، منجری چترویدی، شبنم ورمانی، میتھلی ٹھاکر، استاد رضا علی خان اور پوجا گایتونڈے قابل ذکر ہیں۔جشن میں ہر سال کی طرح اس سال بھی چار اسٹیج ہوں گے اور چاروں ایک ساتھ الگ الگ رنگ اور ذائقے بھرے پروگراموں سے جلوہ آفروز ہوں گے۔ 14تاریخ کو اردو پریمیوں کے لیے معروف نقّاد اور ادیب پروفیسر گوپی چند نارنگ اور شافع قدوئی کی میر تقی میر پر بات چیت سننا ایک یاد گار تجربہ ہوگا۔ وہیں دوسری طرف بزم خیال میں مشہور و معروف شاعر فرحت احساس اور ابھیشیک شکلا کی اردو شاعری پر ماسٹرکلاس ایک الگ اور انوکھی پہل ہے، جس سے اردو شاعری سیکھنے اور سمجھنے کی خواہش رکھنے والے اور اردو شاعری کا شوق رکھنے والے تمام لوگ اردو شاعری کے اسلوب اور فن کے بارے میں جان سکیں گے۔ اس بار جشن میں ایک اہم گفتگو اردو زبان اور اس سے جڑی تمام بولیوں کے حوالے سے بھی ہوگی جس میں علی گڑھ سے تشریف لا رہے پروفیسر مولا بخش،سراج اجملی اور حیدراباد سے تشریف لا رہے شاہد حسین اپنے خیالات کا اظہار کریں گے۔ ان کے ساتھ دلّی یونورسٹی کے پروفیسر محمد کاظم بھی موجود ہوں گے۔معروف شاعر منوّر رانا اور راحت اندوری مشاعرہ اور اس کی تہذیب پر روشنی ڈالیں گے۔ اس کے ساتھ مہاتما گاندھی کی ایک سو پچاسویں سالگرہ پر ان کو خراج عقیدت پیش کرتے ہوے ایک سیشن ہوگا جس میں گاندھی جی کے پوتے تشار گاندھی اور ان کے ساتھ معروف نقاد علی احمد فاطمی اور سہیل ہاشمی موجود ہوں گے۔ مشہور صوفی گلوکارہ میتھلی ٹھاکر اپنی دھرتی کے سر سے محفل میں مٹھاس گھو لیں گی۔ اس کے بعد جاوید صدّیقی اور مظفّر علی ادب اور سنیما پر بات کریں گے،وہیں محفل خانے میں جاوید اختر اور سیف محمود ساحرلدھیانوی کی زندگی اور شاعری پر اپنے خیالات کا اظہار کریں گے۔ تیسرے دن کی شروعات محفل خانہ میں شبنم ورمانی کی آواز میں کلام کبیر سننے سے ہوگی۔ اسی دن بھی بلدیپ سنگھ گرو نانک کی زندگی اور ان کے پیغام پر روشنی ڈالیں گے اور نانک جی سے متلعق روحانی نغمے گائیں گے۔اسی دن گرو نانک کے روحانی ریختہ پر بھی ایک اہم سیشن ہوگا جس میں اختر الواسع، جسپال سنگھ اور ناشر نقوی حصّہ لیں گے۔ اس بار جشن میں ایک اہم گفتگو غالب کے حوالے سے بھی ہوگی۔ اس سیشن میں معروف نقاد شمس الرحمان فاروقی غالب کی زندگی اور ادب پر پون ورما سے بات چیت کرتے ہوے نظر آئیں گے۔ اسی دن خواتین چہار بیت بھی جشن ریختہ کی ایک خاص پیش کش ہوگی۔ اسی کے ساتھ اردو ہندی ہندستانی پر ایک گفتگو میں اہم علمی و ادبی شخصیات شامل رہیں گی۔ علی رفات فتیحی، سدھیش پچوری، ویر بھارت تلوار اس اہم موضوع پر بلرام شکلا سے بات کرتے ہوے نظر آئیں گے۔ ممتاز نقاد شمیم حنفی اسی دن پروفیسرانیس الرحمان کے ساتھ اقبال کی ادبی سفر پر بات کریں گے۔ موسیقی کے شائقین کے لیے ستار نواز استاد شجاعت خان کو سننے کا بھی ایک خاص موقع ہوگا۔ ساتھ ہی معروف فلم اداکارہ دویا دتّا کچھ دل کی اور کچھ دنیا کی باتیں کرتی ہوئی نظر آئیں گی۔ مشہور داستان گو ہمانشو واجپئی اور رجنی چاندیول داستان لکھنو پیش کریں گے۔ اس سب کے علاوہ متعدد علمی و ادبی شخصیتیں جشن کی رونق میں اضافہ کریں گی۔ اردو تہذیب اور کلچر کی نمائندگی کے لیے اردو بازار کا بھی اہتمام کیا جارہا ہے،جس میں اردو تہذیب کی یادگاروں کو نمائش اورخرید و فروخت کے لیے پیش کیا جائے گا۔ کھان پان کے شوقین لوگوں کے لیے ایک فوڈ کورٹ بھی لگایا جا رہا ہے جس میں کشمیری،حیدر آبادی، لکھنوی اور پرانی دلی کے پکوانوں کی بہار ہوگی۔ جشن ریختہ کے موقعے پر ریختہ فانڈیشن کے بانی سنجیو صراف کا کہنا ہے کہ ”ہماری کوشش اردو زبان و تہذیب کو فروغ دنیا ہے۔ ریختہ ویب سائٹ کے ساتھ جشن ریختہ کی تقریبات بھی ہماری انہیں کوششوں کا حصہ ہیں۔ گزشتہ پانچ برس میں جشن ریختہ کو ملی بے پناہ کامیابی اور ہر طبقے و عمر کے لوگوں میں اس کی مقبولیت نے ہمارے ارادوں کو مضبوط کیا ہے۔اس سال بھی ہم پوری توانائی کے ساتھ اس جشن کا انعقاد کر رہے ہیں۔ ہمیں یقین ہے کہ ہر سال کی طرح اس سال بھی یہ جشن اردو کی مٹھاس اور اس کی تہذیب میں پوشیدہ یگانگت کے پیغام کو دور تک لے کر جائے گا۔“

10 دسمبر, 2019 0 comment

ستاروں کےدرمیاں

زندہ رہیں تو کیا ہے ،جو مر جائیں ہم تو کیا!

by قندیل 26 دسمبر, 2017

written by قندیل

( البیلے شاعر منیرنیازی کے یومِ وفات پر خاص پیشکش)
(قندیل ڈیسک)اردواور پنجابی کے شہرہ آفاق شاعر منیر نیازی 19 اپریل سنہ 1926 ء کو غیر منقسم ہندوستان کے ضلع ہوشیار پور پنجاب میں پیدا ہوئے، تقسیم کے بعد وہ پاکستان چلے گئے اور وہاں وہ کئی اخبارات و ریڈیو اور بعد میں ٹیلی ویژن سے وابستہ رہے، ان کی زندگی گوناگوں جدو جہد سے معمور تھی،وہ بیک وقت شاعر، ادیب اور صحافی تھے، وہ اردو اور پنجابی دونوں زبانوں میں شاعری کرتے تھے۔ اردو میں ان کے نصف درجن شعری مجموعے شائع ہوئے۔ جن میں’’ تیز ہوااور تنہا پھول‘‘،’’ جنگل میں دھنک‘‘،’’ دشمنوں کے درمیان شام‘‘،’’ سفید دن کی ہوا‘‘،’’ سیاہ شب کا سمندر‘‘،’’ ماہِ منیر‘‘، ’’چھ رنگین دروازے‘‘،’’ آغازِ زمستاں‘‘ اور ’’ساعتِ سیار‘‘شامل ہیں۔ ان کے علاوہ’’ کلیات منیر ‘‘کی بھی اشاعت ہوئی ،جس میں ان کا مکمل کلام شامل ہے، پنجابی میں بھی ان کے تین شعری مجموعے شائع ہوئے ۔
26دسمبر سنہ 2006کو لاہور میں اِس البیلے شاعر کا انتقال ہو گیا،منیر نیازی سرتاپا شاعر تھے، وہ صاحبِ اسلوب تھے، ان یکی شعریات میں ایسی انفرادیت ہے کہ ہزاروں شاعروں کی بھیڑ میں اُن کا کلام پہچانا جا سکتا ہے،دراصل ان کی شاعری اور شخصیت میں کوئی فرق نہیں تھا؛ کیونکہ ان کی شاعری جمالیاتی اظہار سے عبارت تھی۔ حقیقت یہ ہے کہ قدرت نے ان کو صرف شاعری کے لیے پیدا کیا تھا؛ اسی لیے وہ بے تکان لکھتے رہے اورزندگی کی آخری سانس تک انہوں نے شاعری کی،ان کا سیاسی اور سماجی شعور انھیں احتجاجی شاعری کرنے کے لیے اکساتا تھا؛ کیونکہ منیر نے خود کو کبھی بھی حکومتِ وقت کے ساتھ وابستہ نہیں کیا، وہ ہمیشہ حزبِ مخالف کا رول اد اکرتے رہے؛ اِسی لیے غزل میں بھی ان کا لب و لہجہ بلند آہنگ اور تلخ ہو جاتا ہے:
اس شہرِ سنگ دل کو جلا دینا چاہیے
پھر اس کی خاک کو بھی اڑا دینا چاہیے
ملتی نہیں پناہ ہمیں جس زمین پر
اک حشر اس زمیں پہ اٹھا دینا چاہیے
منیر کے لب ولہجے میں کڑواہٹ ضرور ہے،مگر سچائی اور صاف گوئی بھی ہے، وہ سب کچھ شعری پیراییمیں بیان کردیتے ہیں اور کچھ بھی نہیں چھپاتے، شاید انہیں چھپانا آتا بھی نہیں:
ہمیشہ دیر کر دیتا ہوں میں
ضروری بات کہنی ہو، کوئی وعدہ نبھانا ہو
کسی سے دور رہنا ہو ،کسی کے پاس جانا ہو
کسی کو موت سے پہلے کسی غم سے بچانا ہو
حقیقت اور تھی کچھ، اس کو جا کر یہ بتانا ہو
ہمیشہ دیر کر دیتا ہوں میں
اگرچہ انہیں فلمی شاعر کہا جاتا تو وہ برا مان جاتے؛ لیکن حقیقت یہ ہے کہ پاکستانی فلموں میں جتنی پاییکی غزلیں ملتی ہیں، ان میں بیشتر منیر ہی کی ہیں مثلاً:
اشکِ رواں کی نہر ہے اور ہم ہیں دوستو
اس بے وفا کا شہر ہے اور ہم ہیں دوستو
یہ اجنبی سی منزلیں اور رفتگاں کی یاد
تنہائیوں کا زہر ہے اور ہم ہیں دوستو
لائی ہے اب اڑا کے گئے موسموں کے باس
برکھا کی رت کا قہر ہے اور ہم ہیں دوستو
آنکھوں میں اڑ رہی ہے لٹی محفلوں کی دھول
عبرت سرائے دہر ہے اور ہم ہیں دوستو
یا پھر:
آ گئی یاد شام ڈھلتے ہی
بجھ گیا دل چراغ جلتے ہی
کھل گئے شہر غم کے دروازے
اک ذرا سی ہوا کے چلتے ہی
انہیں نا شناسی کا دکھ آخری دم تک رہا:
زندہ رہیں تو کیا ہے ،جو مر جائیں ہم تو کیا
دنیا سے خاموشی سے گزر جائیں ہم تو کیا
ہستی ہی اپنی کیا ہے زمانے کے سامنے
اک خواب ہیں جہاں میں بکھر جائیں ہم تو کیا
اب کون منتظر ہے ہمارے لئے وہاں
شام آگئی ہے لوٹ کے گھر جائیں ہم تو کیا
دل کی خلش تو ساتھ رہے گی تمام عمر
دریائے غم کے پار اتر جائیں ہم تو کیا
ان کی باغیانہ غزلوں میں ایک معروف غزل کے کچھ اشعار:
گھرا سبزہ در و دیوار پر آہستہ آہستہ
ہوا خالی صداؤں سے نگر آہستہ آہستہ
چمک زر کی اسے آخر مکانِ خاک تک لائی
بنایا ناگ نے جسموں میں گھر آہستہ آہستہ
منیر اس ملک پر آسیب کا سایہ ہے یا کیا ہے
کہ حرکت تیز تر ہے اور سفر آہستہ آہستہ
شاعری میں احتجاج کی آواز جب بھی بلند ہو گی منیر نیازی کا نام ضرور یاد آئے گا،ان کی اپنی زندگی یا پھر عمومی طور پر زندگی کی بہترین اوربھرپور عکاسی اس شعر سے ہوتی ہے:
اک اور دریا کا سامنا تھا منیر مجھ کو
میں ایک دریا کے پار اترا تو میں نے دیکھ

26 دسمبر, 2017 0 comment