qindeel afsana

عبدالمنان صمدی،علی گڑھ

تین مرتبہ بیل (Bell)اور دو مرتبہ دروازے پر دستک دینے پر بھی جب اندر سے کوئی جواب نہیں آیا، تو زویا نے دروازے کو ہلکا سا پش(push)کیا ،جس کی وجہ سے دروازہ کھل گیا۔وہ لاکڈ(Locked) نہیں تھا بس ایسے ہی بھڑاہوا تھا، کمرے میں قدم رکھنے سے قبل زویا نے اندر جھانکنا بہتر سمجھا؛تاکہ اندر کا جائزہ لے سکے، جب اس نے اندر جھانکا ،تو اسے دور کرسی پر بیٹھا ایک شخص نظر آیا ،جو اپنی ٹھوڑی کے نیچے ہاتھ رکھ کر اور کھڑکی کی طرف رخ کیے ہوئے کسی اور دنیا میں گم تھا، زویا ہمت کرکے کمرے میں داخل ہوئی، اس کو امید تھی کہ اس کے قدموں کی آہٹ سے وہ شخص ،جو کھڑکی کی طرف رخ کئے ہوئے بیٹھا ہے ، اس کی طرف ضرور متوجہ ہوگا،زویا قدم آگے بڑھاتے ہوئے کمرے کا جائزہ لینے لگی، کمرہ کیا تھا، ایک کتب خانہ تھا، چاروں طرف کتابوں سے بھری الماریاں اور سامنے کی دیوار پر گھڑی کے ٹھیک نیچے شیشے کے فریم میں شیخ سعدی کا مشہور نعتیہ مصرع معلق تھا:
’’آنچہ خوباں ہمہ دارند، تو تنہا داری‘‘
اور کچھ رسائل و اخبارات بے ترتیب میز پررکھے ہوئے تھے۔
وہ کمرے کا جائزہ لیتے ہوئے اس شخص کے بالکل قریب آکر کھڑی ہوگئی۔
السلامُ علیکم!۔۔۔ السلام علیکم!۔۔۔سر السلام علیکم!۔
زویا نے دروازے پر دستک کی طرح تین مرتبہ پاس جا کر سلام کیا؛ لیکن جناب کے کان پر جوں تک نہ رینگی،جب اس نے دیکھا کہ جناب اس کی آواز سے ہی نہیں؛ بلکہ دنیا سے بھی بے خبر ہیں اور ایک بت کی مانند بیٹھے ہوئے ہیں، تو اس نے ایک قدم آگے بڑھ کر اس شخص کوجھنجھوڑا، نجابت صاحب کو زویا کی یہ حرکت بڑی ناگوار گزری ؛لیکن انہوں نے اس سے کچھ نہ کہا اور اپنے غصے پر قابو کرتے ہوئے بلند آواز میں کہا۔
’’Who are you?‘‘
نجابت صاحب نے غصے پر بھلے ہی قابو پالیا ہو؛ لیکن آواز میں سختی اور لہجے میں تلخی اب تک باقی تھی ،جس کی وجہ سے زویا کا گھبرانا لازمی تھا، اس نے گھبراتے ہوئے کہا۔
’’آئی ایم زویا‘‘( I am Zoya)
نجابت صاحب کی ایک عجیب سے عادت تھی کہ جب وہ غصے میں ہوتے ،تو انگریزی زبان کا استعمال کرنے لگتے ،ایک بار کسی دوست نے اس بارے میں پوچھا ،تو جناب نے بڑا دلچسپ جواب دیا، کہنے لگے: ’’دراصل غصے میں اردو زبان کا تلفظ بگڑجاتا ہے؛اس لیے ایسا کرتا ہوں‘‘۔
زویا نے ہمت کرکے کہا کہ: ’’میں علی گڑھ مسلم یونیورسٹی میں ریسرچ اسکالر ہوں‘‘۔
’’کس زبان میں ریسرچ کر رہی ہو؟‘‘
ان کے لہجے میں سختی اور تلخی اب تک برقرار تھی۔
’’فارسی‘‘
’’موضوع؟‘‘
’’خیام کی حیات و خدمات‘‘۔
’’یہاں کیسے آنا ہوا؟‘‘۔
’’میں نے یونیورسٹی میں آپ کے بارے میں بہت سنا اور پڑھا ہے، آپ کی شخصیت نے مجھے بہت متاثر کیا ہے، آپ نے جو مقالہ مولانا روم کی مثنوی پر تحریر کیا ہے، وہ اپنی مثال آپ ہے‘‘۔
’’علی گڑھ سے تہران یہ بتانے اور میرے قصیدے پڑھنے آئی ہو؟‘‘
نہیں!
’’پھر علی گڑھ سے تہران کیسے آنا ہوا؟اپنا پورا نام بتائیں‘‘۔
’’میرا نام زویا صدیقی ہے‘‘۔
نجابت صاحب نے مسکراتے ہوئے مزاحیہ انداز میں زویا کے چہرے کو دیکھتے ہوئے کہا۔
’’صدیقی وہ بھی تہران میں‘‘؟
جی!
’’صدیقی صاحبہ!لگتا ہے کہ معجزات کا سلسلہ ابھی تک جاری ہے‘‘۔
شاید!
جھجکتے ہوئے زویا نے جواب دیا۔
’’تہران آنے کی وجہ؟کوئی سمینار ہے کیا؟‘‘
’’نہیں!میری خالہ رہتی ہیں یہاں‘‘۔
’’کہاں، تہران میں؟‘‘
’’نہیں، اصفہان میں‘‘۔
’’اچھا!پھر تہران کیسے آنا ہوا؟‘‘
’’آپ سے ملاقات کرنے کے لیے‘‘۔
’’کوئی اور وجہ نہیں یہاں آنے کی؟‘‘
نہیں!
’’واقعی مجھ سے ملنے آئی ہو؟‘‘
جی!
’’کیا چاہتی ہو مجھ سے؟‘‘
اتنی گفتگو کرنے کے بعد نجابت صاحب کے لہجے میں نرمی آگئی۔
’’میں آپ سے محبت کرتی ہوں‘‘
زویا نے بے خوف اپنے جذبات کا اظہار کردیا۔
’’محبت؟‘‘
زویا کی بات سن کر نجابت صاحب نے ایک زوردار قہقہہ لگاتے ہوئے کہا۔
’’لگتا ہے تہران کی آب و ہوا آپ کو راس نہیں آرہی ہے، میرا مشورہ ہے کہ آپ ہندوستان لوٹ جائیں‘‘۔
’’سر میں واقعی آپ سے محبت کرتی ہوں‘‘۔
یہ کہتے ہوئے زویا نے ایک فائل نجابت صاحب کے سامنے میز پر رکھ دی،اس میں ان کی وہ تخلیقات موجود تھیں، جو ہندوستان اور بیرونی ممالک کے رسائل اور اخبارات میں شائع ہوئی تھیں اور کچھ جوانی کی تصاویر بھی تھیں ،جو نجابت صاحب کی تخلیق کے ساتھ چھاپی گئی تھیں ،نجابت صاحب نے جب فائل دیکھی ، تو ان کی تمام یادیں تازہ ہوگئیں، زویا نے پل بھر کے لیے نجابت صاحب کی ساری زندگی کا نقشہ اور اثاثہ ان کی میز پر رکھ دیا، وہ کچھ دیر کے لیے ماضی میں لوٹ گئے۔
کمرے میں یکایک سناٹا چھا گیا ،چاروں طرف سکوت کی صدائیں گونجنے لگیں،زویا بھی ہاتھ باندھے خاموش کھڑی رہی۔
’’یادِ ماضی عذاب ہے یارب‘‘
نجابت صاحب نے فائل بند کرتے ہوئے اختر انصاری کا یہ مصرع پڑھااور زویا کی طرف دیکھ کر مسکرائے۔
اور اس کو بیٹھنے کے لیے کہا۔
اس کی فائل نے نجابت صاحب کے زخم تازہ کردیے؛ لیکن اسے دیکھ کر انہیں خوشی ضرور ہوئی، کسی نے ٹھیک کہا ہے کہ’’ماضی کیسا بھی رہا ہو، کریدنے پر مزہ ہی دیتا ہے‘‘۔
’’ارے پیٹر (Peter)دوگلاس پانی لاؤ بھئی‘‘۔
نجابت صاحب نے خادم کو آواز دیتے ہوئے کہا۔
کچھ دیر کے بعد خادم پانی لے کر آیا۔
’’ارے پیٹر! چائے اور ناشتہ کا بھی انتظام کرو، ورنہ محترمہ علی گڑھ جاکر کہیں گی کہ نجابت صاحب نے چائے تک کے لیے نہیں پوچھا‘‘۔
نجابت صاحب علی گڑھ مسلم یونیورسٹی کے شعبۂ فارسی میں پروفیسر کے عہدے پر رہ چکے تھے؛ لیکن طالب علمی کے زمانے میں ایک سمینار شیخ سعدی کی حیات و خدمات پر شعبہ فارسی میں ہوا تھا ،جس میں تہران یونیورسٹی سے ایک پروفیسر احمد نژاد تشریف لائے تھے، نجابت صاحب اس وقت ایم اے سال آخر کے طالبِ علم تھے،انہوں نے پروفیسر نژاد کی شان میں ایک قصیدہ تصنیف کیااور اسے لے کر ان کی خدمت میں حاضر ہوئے ،جسے سن کر پروفیسر بہت خوش ہوئے اور انہوں نے ان کو تہران آنے کی دعوت دی اور سارے اخراجات اٹھانے کا وعدہ کیا، نجابت صاحب کچھ دنوں بعد تہران چلے گئے ،واپسی کرتے وقت نجابت صاحب نے یہ عہد کیا تھا کہ اگر موقع ملے گا، تو زندگی کے آخری ایام تہران میں ہی گزاروں گا؛ اس لیے رٹائرڈ ہونے کے بعد وہ مستقل تہران میں رہنے لگے۔
خادم کو چائے ناشتے کا حکم دینے کے بعد نجاوت صاحب زویا سے مخاطب ہوئے۔
’’جی! محترمہ فرمائیں،یہ خاکسار آپ کی کیا خدمت کر سکتا ہے؟‘‘۔
زویانے ذرا رکتے ہوئے کہا:
’’سر میں آپ سے محبت کرتی ہوں‘‘۔
’’محبت کرنے کا دعوی بھی اور سر کرکے مخاطب بھی کرتی ہو؟اتنا ادب!پہلے تو آپ کویہ معلوم ہونا چاہیے کہ محبت میں ادب گناہ کبیرہ کی حیثیت رکھتا ہے اور تمام علمائے عشاق کا اس پر اجماع ہے،خیر کوئی بات نہیں،پہلے عشق میں اس طرح کی خطائیں معاف ہوتی ہیں‘‘۔
’’پہلا عشق؟‘‘زویا نے حیرت سے پوچھا
’’جی پہلا عشق‘‘۔
’’لیکن عشق ایک ہی بار ہوتا ہے بار بار نہیں‘‘۔
’’خیر جانے دیں ان باتوں کو‘‘۔
’’پہلے آپ میرے کچھ سوالات کا جواب دیں، اس کے بعد فیصلہ لینا بہتر ہوگا‘‘۔
جی!
زویا نے اس اعتماد کے ساتھ ’’جی‘‘ کہا،گویا کہ وہ عشق کی منزل پانے کے لیے ہر طرح کے سوالات ا ور حالات کا سامنا کرنے کو تیار ہو۔
نجابت صاحب نے ذرا تلخ انداز میں کہا:
’’کیا آپ نے مجھے آج سے پہلے کہیں دیکھا ہے؟‘‘
’’نہیں‘‘۔
’’کیا مجھ سے کبھی خطوط کے ذریعے رابطہ کرنے کی کوشش کی ہے؟‘‘
’’نہیں۔۔۔ہاں ایک دو بار سوچاضرور‘‘۔
’’اچھا ایک بات بتاؤ؟‘‘۔
’’جی پوچھیے‘‘
’’کیا رات میں سوتے وقت تمہارے تکیے کے نیچے میری تصویر رہتی ہے؟‘‘۔
’’نہیں‘‘۔
’’تصویر تو نہیں، تخلیق ضرور رہتی ہے‘‘۔
’’اچھا!زویا تم نے ماہر نفسیات ولیم آسٹیکل کا نام سنا ہے؟‘‘۔
’’جی سنا ہے‘‘
’’ولیم آسٹیکل کے مطابق’’عورت کے لاشعور میں ایک آئیڈیل مرد بستا ہے، عورت ادھر متوجہ ہوتی ہے، جہاں اس کا آئیڈیل نظر آتا ہے، اکثر شاعر، ادیب اور مشہور شخصیات کو عورتیں اپنا آئیڈیل تصور کرتی ہیں اور اَن دیکھے عشق میں ملوث ہوجاتی ہیں،جیسا کہ تم‘‘۔
’’لیکن سر! ولیم آسٹیکل کی بات قابل تقلید ہوسکتی ہے، مگر قابل حجت نہیں‘‘۔
’’لیکن تم جس عمر میں ہو ،تمہارے لیے تقلید ہی حجت کا درجہ رکھتی ہے‘‘۔
’’میں کچھ سمجھی نہیں‘‘
’’زویا میری اور تمہاری زندگی کے تقاضے بہت مختلف ہیں،میں ایک ستّرسال کا بوڑھا آدمی ہوں، میر ی زندگی کے تقاضے الگ ہیں تمہاری زندگی کے الگ،تم ایک چوبیس سالہ خوبصورت دوشیزہ ہو، تم مجھ سے کتنا بھی عشق کرنے کا دعویٰ کرو؛ لیکن وہ کہلائے گا تو عشق مجازی ہی اورعشق مجازی میں جتنے تقاضے روح کے ہوتے ہیں اس سے کہیں زیادہ جسم کے ہوتے ہیں، داسی یا مجنوں بن کر تڑپا جا سکتا ہے جیا نہیں‘‘۔
’’سر چائے‘‘
پیٹر نے کمرے میں داخل ہوتے کہا۔
’’ہاں۔۔لے آؤ۔۔۔یہاں رکھ دو‘‘۔
پیٹر چائے رکھ کر چلا گیا۔
’’چلیے محترمہ چائے بنائیے۔۔یہ ایک بوڑھے شخص سے عشق کرنے کی سزا ہے‘‘۔
نجابت صاحب کی اس بات پر زویا مسکرادی۔
’’سر چینی کتنے چمچ؟‘‘
’’میرے لیے ایک ہی رکھیے گا‘‘۔
اِدھر زویا چائے بنانے لگی، اُدھر نجابت صاحب ایک بار پھر کھڑکی کی طرف دیکھنے لگے۔
’’سر چائے!۔۔کہاں کھوگئے تھے آپ؟‘‘۔
’’زویا وہ گھلتی ہوئی برف دیکھ رہی ہو، جو کچھ دیر پہلے تک پہاڑ پر جمی ہوئی تھی؛ لیکن وہ اب سورج کی تپش سے گھلنے لگی ہے‘‘۔
جی!
’’وہ پہاڑ نظر آرہا ہے، جو برف کے گھلنے سے نمودار ہوا ہے‘‘۔
’’جی سر! لیکن آپ کہنا کیا چاہتے ہیں‘‘۔
’’میں کہنا نہیں آپ کو کچھ دکھانا اور سمجھانا چاہتا ہوں‘‘۔
’’لیکن کیا؟‘‘
یہی کہ میری زندگی اس گھلتی ہوئی برف کی مانند ہے، جو سورج کی تپش سے گھلتی جارہی ہے اور بہت جلد گھل کر ختم ہوجائے گی اور تمہاری زندگی اس تناور پہاڑ کی طرح ہے ،جس پر نہ برفیلی بارش کا اثر ہوتا ہے اور نہ سورج کی تپش کا اور ویسے بھی تم مجھ سے نہیں اپنے آئیڈیل سے محبت کرتی ہو اور تمہارا آئیڈیل میں نہیں میری تخلیق ہے۔

ایم مبین
رات بارہ بجے کے قریب میٹنگ سے جب وہ گھرآئے ،تو اُنھوں نے شاکرہ کو بے چینی سے ڈرائنگ روم میں ٹہلتا ہوا پایا، اُس کی حالت دیکھ کر اُن کا دِل دھک سے رہ گیا اور ذہن میں ہزاروں طرح کے وسوسے سر اُٹھانے لگے، شاکرہ کی بے چینی سے انھوں نے اندازہ لگایا تھا کہ کچھ نہ کچھ ہوا ہے ،جس کی وجہ سے شاکرہ اِتنی بے چین ہے۔
وہ کمرے میں داخل ہوئے ،تو شاکرہ نے سر اُٹھا کر اُن کو دیکھا، اُس کے ہونٹوں پر ایک پھیکی سی مسکراہٹ اُبھری اور پھر اُس نے اپنا سر جھکا لیا۔جیسے وہ بہت کچھ اُن سے چھپانا چاہتی ہو، اگر نظریں مل گئیں ،تو اُسے ڈر ہے کہ وہ اُس کی آنکھوں سے سب کچھ پڑھ لیں گے۔’’کیا بات ہے، تم ابھی تک سوئی نہیں؟‘‘ اُنھوں نے شاکرہ سے پوچھا۔
’’نہیں، نیند نہیں آرہی ہے۔‘‘ شاکرہ نے جواب دیا۔
’’سب ٹھیک تو ہے؟‘‘ اُنھوں نے اپنے دِل پر جبر کرکے پوچھا۔
’’عادل کی حالت بگڑتی جارہی ہی۔‘‘ شاکرہ نے ایک ایک لفظ کو چبا کر کہا۔ ’’مسلسل دو گھنٹے سے چیخ چیخ کر اُس نے سارے بنگلے کو سر پر اُٹھا لیا تھا، پڑوس کے بنگلوں تک اُس کی چیخیں جارہی تھیں اور وہ لوگ بھی انکوائری کے لیے آرہے تھے، کمرے کی ہر چیز کو اُس نے تہس نہس کردیا ہے، مجبوراً ڈاکٹر کو بلا کر اُسے نیند کا انجکشن دینا پڑا؛ لیکن ڈاکٹر کہتا ہے اس انجکشن سے مضبوط سے مضبوط آدمی دس گھنٹوں تک سویا رہتا ہے؛ لیکن عادل کی جو حالت ہے، وہ جس اسٹیج میں ہے،مجھے ڈر ہے کہ دو گھنٹے بعد ہی اِس انجکشن کا اثر ختم ہوجائیگا اور اِس کی حالت پھر اُسی طرح سے ہوجائیگی، میرا مشورہ ہے کہ اب اس پر اور زیادہ جبر نہ کیا جائے، وہ جو ڈوز لیتا ہے اسے دے دیا جائے ،اسی سے وہ نارمل ہوسکتا ہے ،ایسی حالت میں زیادہ دِنوں تک رہنے سے اس کی جان کو خطرہ پیدا ہوسکتا ہے‘‘۔
شاکرہ کی باتیں سن کر اُن کا دِل ڈوبنے لگا۔ اُنھوں نے شاکرہ کو کوئی جواب نہیں دیا اور بے اختیار عادل کے کمرے کی طرف بڑھ گئے۔
عادل پلنگ پر بے خبر سورہا تھا۔
اُس کی اور کمرے کی حالت دیکھ کر وہ کانپ اُٹھے۔
کمرے میں کوئی بھی چیز ٹھکانے پر نہیں تھی، ہر چیز بکھری یا ٹوٹی ہوئی تھی، عادل کے سر کے بال نچے ہوئے تھے ،اس کے چہرے اور جسم پر کئی مقام پر زخموں کے نشانات تھے۔اُنھیں پتہ تھا جنون کے عالم میں عادل نے اپنے آپ کو ہی زخمی کیا ہوگا۔ ایسی حالت میں خود کو اذیّت پہنچانے سے ہی اُسے سکون ملتا ہے۔
زیادہ دیر وہ اور عادل کو دیکھ نہیں سکے اور تیزی سے کمرے کے باہر آگئے، شاکرہ کے ضبط کا باندھ ٹوٹ گیا تھا۔ اچانک وہ پھوٹ پھوٹ کر رونے لگی۔ اُس نے اپنے دونوں ہاتھوں سے اپنا چہرہ چھپا لیا تھا۔
’’خداکے لیے اب عادل پر اور کوئی جبر مت کیجئے، وہ جس حالت میں جیتا ہے اُسے اسی حالت میں زندہ رہنے دیجیے، کم سے کم وہ ہماری آنکھوں کے سامنے تو رہیگا، ورنہ ایسی حالت میں وہ ایک دِن مرجائیگا، اگر اُسے کچھ ہوگیا تو میرا کیا ہوگا؟ میری ایک ہی تو اولاد ہے۔ یہ ہماری زمین، جائداد، دھن، دولت سب عادل ہی کا تو ہے۔ وہ اکیلا ہی اِن سب کا وارث ہے، جب وہی نہیں ہوگا تو پھر اِن چیزوں کا کیا فائدہ؟ آپ نے کس کیلئے یہ سب کمایا ہے، عادل کیلئے ہی نا؟ پھر عادل کی زندگی کے دُشمن کیوں بن رہے ہیں، وہ جو چاہتا ہے اُسے دے دیجیے۔‘‘
’’تم مجھے عادل کی زندگی کا دُشمن کہہ رہی ہو؟‘‘
شاکرہ کی بات سن کر اُن کی آنکھوں میں آنسو آگئے۔
’’عادل میری اکلوتی اولاد ہے، یہ سب کچھ میں نے اُسی کیلئے تو کمایا ہے،مجھ سے اپنی اولاد کا پل پل مرنا دیکھا نہیں جاتا،اُس کی پل پل موت میرے لئے اِتنی بڑی سزا ہے ،جسے میں بیان نہیں کرسکتا۔ مجھ سے اس کی تڑپ دیکھی نہیں جاتی اور بس اِسی لئے اپنے آپ پر جبر کرتا ہوں، باپ ہوں نا۔سوچتا ہوں وہ اسی طرح تِل تِل مرنے کے بجائیایک بار مر جائے ،تو اسے بھی اس عذاب سے نجات مل جائے اورہم بھی صبر کرلیں گے۔‘‘
’’آپ ایسا کیوں سوچتے ہیں؟ خدا ہمارے بچے کو شفا دیگا۔‘‘
اُن کی بات سن کر شاکرہ تڑپ اُٹھی۔
’’اگر خدا ہمارے بچے کو کوئی بیماری دیتا،تو اُس کی ذات سے ہمیں شفا یابی کی اُمید ہوتی؛ لیکن یہ روگ تو ہمارے بیٹے نے خود پالا ہے اور میں سمجھتا ہوں اِس کا ذمہ دار ہے تمہارا بیجا لا ڈ و پیار اور میری کاروباری مصروفیات ،میرے کاروبار نے مجھے اِتنا وقت نہیں دیا کہ میں اپنے کاروبار کیساتھ ساتھ اپنی توجہ اپنے بیٹے پر بھی دے سکوں اور تمہارے لئے تو وہ تمہاری اکلوتی اولاد تھی، اُس کی ہر جائز، ناجائز فرمائش تمہارے سر آنکھوں پر تھی، بس یہی زہر تھا، جو اُس کی شریانوں میں بہتا گیا اور اُس کے وجود کا حصّہ بن گیا۔‘‘
شاکرہ نے کوئی جواب نہیں دیا، وہ سسکتی رہی۔
اُنھوں نے اندازہ لگالیا تھا کہ عادل کی کیا حالت ہوگی۔
ڈوز کا وقت پورا ہوگیا تھا اور اُسے اس کی سخت ضرورت تھی۔
وہ ٹال رہے تھے‘چاہ رہے تھے کہ عادل خود میں قوتِ اِرادی پیدا کرے اور وہ اس نشے کی گرفت سے باہر نکلنے کی کوشش کرے۔
دو دِن سے عادل اُن کے سامنے گڑگڑا رہا تھا۔
’’ڈیڈی! مجھے پیسے چاہیے، مجھے پانچ ہزار روپیوں کی سخت ضرورت ہے،پلیز مجھے پانچ ہزار روپے دے دیجیے، میں آپ سے وعدہ کرتا ہوں، میں مہینہ بھر آپ سے پیسہ نہیں مانگوں گا۔‘‘
لیکن اُنھوں نے پیسہ نہیں دیا۔
اِس بار اُنھوں نے اِس بات کا بھی خاص خیال رکھا تھا کہ عادل کے پاس کوئی قیمتی چیز نہ رہے، جسے فروخت کرکے وہ پانچ ہزار روپے حاصل کرلے اور اُس سے اپنی من چاہی مراد حاصل کرلے۔
اُنھوں نے شاکرہ کو بھی سخت تاکید کررکھی تھی۔
’’خبردار! اگر تم نے اُسے پیسے دئے تو، اگر مجھے پتہ چلا کہ تم نے اُسے پیسے دئے ،تو میں تمہیں گھر میں نہیں رکھوں گا۔‘‘
وہ دیکھنا چاہتے تھے کہ عادل اِس زہر کے بنا کتنے دِنوں تک رہ سکتا ہے۔
لیکن ایک دِن میں ہی عادل کی وہ حالت ہوگئی تھی کہ اُسے دیکھ کروہ خود بھی گھبرا گئے تھے۔
اُنھوں نے ڈاکٹر کو فون کرکے اس سلسلے میں گفتگو کی۔
’’باقر صاحب! آپ کی کوشش بیکار ہے، عادل آخری حدوں کو پار کرچکا ہے، اب وہ زہر ہی اُسے زندہ رکھے گا، آپ اپنے بیٹے کی زندگی چاہتے ہیں ،تو اسے وہ زہر دے دیجیے، اُس کی زندگی بڑھ جائیگی، آپ جتنے دِنوں تک اُسے اس زہر سے دُور رکھیں گے، اُس کی زندگی کم سے کم ہوتی جائیگی۔‘‘
’’ڈاکٹر! قیمتی سے قیمتی نشہ آور شراب، گرد، چرس، افیم اور اسمیک ،کیا کسی سے بھی کام نہیں چل پائیگا؟‘‘
’’باقر صاحب! ناگ کے زہر میں جو نشہ ہوتا ہے وہ ایک ہزار شراب کی بوتلوں میں بھی نہیں ہوتا اور جو شخص ناگ کے زہر کے نشے کا عادی ہو ،آپ اُسے شراب کی بوتل سے بہلانے کی کوشش کررہے ہیں؟ آپ کی یہ کوشش بیکار ہے باقر صاحب! اپنے بیٹے کی زندگی سے مت کھیلئے۔ اگر آپ اُسے زندہ دیکھنا چاہتے ہیں ،تو اُسے ز ہر دیجیے زہر، ناگ کا زہر!‘‘
عادل کیلئے اُنھوں نے دُنیا کے بڑے بڑے ڈاکٹروں سے رابطہ قائم کیا تھا۔
لیکن اُنھیں ہر طرف سے مایوسی ہی ملی تھی، ایک دو ڈاکٹروں نے دِلاسہ دیا تھا، مگر اِس بات کی اُمید نہیں دِلائی تھی کہ عادل اچھا ہوجائیگا۔
اپنے کمرے میں آنے کے بعد وہ کمرے میں ٹہلنے لگے۔
نیند اُن کی آنکھوں سے کوسوں دُور تھی، شاکرہ بستر پر لیٹی تھی، نیند اُس کی آنکھوں میں بھی نہیں تھی۔
اُنھیں پتا تھا سوکر کوئی فائدہ نہیں۔
تھوڑی دیر بعد ہی اُنھیں اُٹھنا پڑے گا۔
نیند سے جاگنے کے بعد عادل وہ ہنگامہ مچائیگا کہ سارا محلہ جاگ جائیگا۔
سب کچھ کیسے ہوگیا، اب سوچتے ہیں تو کچھ بھی سمجھ میں نہیں آتا،ڈاکٹروں کاکہنا ہے کہ عادل کو۱۲،۱۵سال کی عمر سے نشے کی لت ہے۔ وہ باقاعدگی سے اسکول اور کالج جاتا تھا، دِن، دِن بھر گھر سے غائب رہتا تھا اور رات دیر سے گھر آتا تھا، ماں پوچھتی تو بتادیتا تھا کہ اس دوست کیساتھ تھا یا اُس دوست کیساتھ تھا۔ شاکرہ عادل کی یہ آوارگیاں اُن سے چھپاتی رہتی تھی۔عادل کو خرچ کیلئے وہ بھی پیسے دیتے تھے اور شاکرہ بھی۔بس ان ہی پیسوں کی وجہ سے وہ غلط صحبت میں پڑ گیا۔ پہلے دوستوں نے اسے بیئر پلائی پھر وہسکی۔پھر اسے چرس، افیون، گانجا، اسمیک اور گرد کا چسکہ لگایا۔ ایل۔ ایس۔ ڈی اور دُوسری نشہ آور چیزوں کے ٹیکے وہ لینے لگااور انھیں اِس کا پتہ ہی نہیں چل سکا۔ اسکول میں کبھی فیل ہوتا ،تو کبھی ان کے رسوخ، وسیلے سے پاس ہوجاتا۔کالج میں بھی یہی حال تھا، اُنھوں نے اُسے کوئی ٹیکنیکل یا بڑے کورس میں داخل نہیں کیا تھا۔ وہ اُس کی ذہنی سطح سے اچھی طرح واقف تھے۔ان کا خیال تھا اگر عادل نے گریجویشن بھی کرلیااور اُن کا کاروبار اگر سنبھال نہ سکے ،تو کم از کم اس میں اُن کاہاتھ ہی بٹائے تو کافی ہے۔ اُنھوں نے اسے اچھے کالج میں داخل کیاتھا؛لیکن اس کی کارکردگی مایوس کن ہی رہی، ایک ہی کلاس میں دو دو تین تین سالوں کا قیام اس کا معمول بن گیا۔ جب وہ اُس کے بارے میں اپنے دوستوں سے بات کرتے ،تو دوست اُنھیں تسلّی دیتے تھے۔
’’بچوں میں جب تک ذمہ داری کا احساس نہ ہو وہ دِل سے کوئی کام نہیں کرپاتے ہیں، ہمارے بچوں کو پتہ ہے کہ پڑھنے کے بعد کچھ کرکے ہی وہ اپنا اور ہمارا پیٹ بھر پائیں گے؛ اِس لئے وہ پڑھائی میں دھیان لگاتے ہیں، عادل کیساتھ ایسا کچھ نہیں ہے، اُسے پتہ ہے کہ اُس کے باپ نے اُس کیلئے اتنا کمایا ہے کہ اُس کی سات پشتیں بھی بیٹھ کر کھائیں گی، اس لئے لاپرواہ ہوگیاہے،پڑھائی میں دھیان نہیں دیتا، کاروبار میں لگادو سب ٹھیک ہوجائیگا۔
لیکن اُنھیں عادل کو کاروبار میں لگانے کی نوبت نہیں آسکی۔ اِس دوران اُنھیں پتا چلا کہ عادل ڈرگس لیتا ہے اور نشے کا عادی ہوگیا ہے۔کئی بار نشے کی وجہ سے یا نشہ نہ ملنے کی وجہ سے اس کی حالت خراب ہوئی،ڈاکٹروں کو بتایا گیا، کئی بار اسے اسپتال میں داخل کیا گیا تھا؛ لیکن ڈاکٹروں نے صاف جواب دے دیا تھا۔
’’عادل نشے کی آخری حد پار کرچکا ہے، اُس سے نشہ چھڑانا بہت مشکل ہے، اب اگر یہ کوشش کی گئی ،تو اُس کی زندگی کو خطرہ پیداہوسکتا ہے‘‘۔
ایک دوبار مہنگے اسپتالوں میں رکھ کر عادل کے نشے کی لت چھڑانے کی کوشش کی گئی۔جب تک وہ اسپتال میں رہا،نشے سے دُور رہا؛لیکن گھر آتے ہی سب کی نظریں بچاکر آخر نشے کے اڈّے پر وہ پہنچ ہی گیا اور سارے کئے کرائے پر پانی پھیر گیا۔وہ بڑی اُلجھن میں تھے۔عادل پر توجہ دیتے ،تو کاروبار بدنظمی کا شکار ہوتا۔کاروبار پر توجہ دیتے ،تو عادل کی حالت بگڑتی جاتی تھی۔شاکرہ کو تو وہ بالکل خاطر میں نہیں لاتا تھا، کئی بار وہ اُس پر ہاتھ اُٹھا کر جانوروں کی طرح مار چکا تھا، یہ بات شاکرہ نے اُن سے چھپائی تھی، نشے میں اُسے کچھ ہوش نہیں رہتا تھا کہ سامنے اُس کی ماں ہے یا باپ ہے اور نشہ نہ ملنے پر بھی وہ پاگل ساہوجاتا تھا۔شاکرہ سے وہ نشہ کیلئے پیسہ لیا کرتا تھا،شاکرہ بھی ترس کھاکر اُس کو پیسے دے دیتی تھی، کم سے کم نشے میں تو وہ سکون سے رہے؛ لیکن آخر وہ نشے کی آخری حد کو پہنچ گیا۔
نشہ حاصل کرنے کیلئے وہ اپنے آپ کو ناگ سے ڈسوانے لگا،ناگ سے ڈسوانے کے بعد ایک ماہ تک وہ بالکل نارمل رہتا، ناگ کے زہر کا نشہ ایک ماہ تک اُسے مسرور رکھتا ؛لیکن زہر کا اثر ختم ہوتے ہی اُس کی حالت پاگلوں سی ہونے لگتی اور جب تک وہ اپنے آپ کو ناگ سے ڈسوا نہیں لیتا ،اُسے سکون نہیں ملتا تھا
اور خود کو ناگ سے ڈسوانے کیلئے وہ پانچ پانچ ہزار روپیہ تک دیتا تھا۔پچھلی بار اُس نے جب خود کو ناگ سے ڈسوایا ہوگا ،اُسے شاید ایک ماہ ہوگیا ہوگا، نشہ اُتر گیا تھا ؛اِس لئے اُس کی حالت پاگلوں سی ہورہی تھی،دو گھنٹے بعد انجکشن کا اثر ختم ہوگیا تھا۔عادل پھر جاگ اُٹھا تھا اور اُس نے ہنگامہ کھڑا کردیا ،اُنھوں نے اُسے کمرے میں ہی بند کرکے رکھا۔وہ جانتے تھے کہ اکیلا کمرے میں بند ہونے پر وہ اپنے آپ کو مار مار کر زخمی کرلے گا؛لیکن اُسے کھلا چھوڑنا اُس سے بھی زیادہ خطرناک ہوگا، وہ سویرا ہونے کی راہ دیکھنے لگے۔دِن نکلتے ہی جیسے ہی اُنھوں نے عادل کے کمرے کا دروازہ کھولا، عادل اُن کا گلا دبانے کیلئے دوڑا۔’’عادل! چلو میں تمھیں ناگ سے ڈسوانے لے چلتا ہوں۔‘‘
یہ سنتے ہی عادل کا سارا غصہ، جوش ٹھنڈا پڑگیا۔
وہ اُسے کار میں بٹھا کر چل پڑے،عادل اُنھیں راستہ بتاتا رہا۔
ایک جھونپڑپٹّی میں تنگ و تاریک گلیوں سے ہوکر وہ ایک ٹوٹے جھونپڑے کے پاس پہنچے۔
’’ار ے عادل سیٹھ! اِس بار لیٹ ہوگیا؟‘‘
’’چلو جلدی لاؤ‘‘
’’ مجھ سے برداشت نہیں ہورہا ہے۔‘‘ عادل چیخا۔
’’پہلے مال نکال!‘‘ وہ آدمی بولا۔ عادل نے ان کی طرف دیکھا، اُنھوں نے پانچ ہزار روپیے اُس آدمی کی طرف بڑھادیے۔
وہ آدمی اندر گیا، واپس آیا، تو اُس کے ہاتھ میں ایک سانپ کی پٹاری تھی، عادل زبان باہر نکال کر کھڑا ہوگیا۔اُس آدمی نے پٹاری کا ڈھکن کھولا،اُس میں سیایک کالے ناگ نے پھن اُٹھایا، اُس نے چاروں طرف دیکھا اور پھر عادل کی زبان پر ڈس لیا۔اُن کے منہ سے چیخ نکل گئی۔عادل کے منہ سے بھی چیخ نکلی، مگر یہ مسرت اور لذت بھری چیخ تھی، وہ سر سے پیر تک پسینے میں نہاگیا اور پھر لہراتا ہوا اُن کیساتھ چل دیا۔ اُنھوں نے جاتے ہوئے مڑ کر اُس آدمی اور پٹاری کے ناگ کو دیکھا،جس کا زہر اُن کے بیٹے کیلئے تریاق تھا۔
Mobile. 9322338918

آبیناز جان علی
موریشس
پنچوتی موریشس کے شمال کا ایک چھوٹا قصبہ ہے۔ یہاں کی آبادی کافی کم ہے اور زیادہ تر مفلوک الحال لوگ بستے ہیں۔ رضیہ اسی قصّبے کی لڑکی تھی۔ ایچ۔ ایس۔ سی کے بعد نرس کی ٹرینگ مکمل کر کے اس نے اپنے ضعیف ماں باپ کا نام روشن کیا۔ اسی سال وہ ریاض سے ملی جس نے اس کی سادہ لوحی اور نیک خصلتوں سے متاثر ہو کر رضیہ کے والدین سے اس کا ہاتھ مانگا۔ رضیہ کو بھی ریاض کا بھولاپن بہت بھایا اور اس نے شادی کے لئے حامی بھری۔ ریاض پاس کے گاؤں پلین دے روش کا رہنے والا تھا اور پورٹ لوئیس میں سرکاری نوکری کرتا تھا۔ ہر روز دونوں ایک ہی بس سے سفر کرتے۔ رضیہ بھی پورٹ لوئیس کے شفاخانے میں مقرر ہوئی۔ دورانِ سفر ریاض کی نگاہ رضیہ پر پڑتی۔ دوسری لڑکیوں کے مقابلے رضیہ کے چہرے پر غرور و تکبر کا نام و نشان نہ تھا۔ وہ چپ چاپ بیٹھی رہتی اور کنڈکٹر کے ساتھ خوش اخلاقی سے پیش آتی۔ ایک بار رضیہ نے ایک حاملہ خاتون کو اپنی جگہ بھی دی تھی اور پورٹ لوئیس تک بس میں کھڑی کھڑی سفر کرتی رہی۔
ریاض اپنی ماں اور بڑے بھائی کے ساتھ رہتا تھا۔ بڑے بھائی کی چار سال پہلے شادی ہو گئی تھی لیکن ابھی ان کا کوئی بچہ نہیں ہوا تھا۔ شادی کے بعد ریاض اور رضیہ ریاض کی والدہ اور اپنی جیٹھ اور جیٹھانی کے ساتھ ہی رہتے تھے۔ رضیہ کی جیٹھانی ڈاکٹرنی تھی۔ اس وجہ سے وہ ساس کی آنکھوں کا تارا تھی۔ جب ساس بیمار پڑتی تو منیزہ ہی ان کا خیال رکھتی اور دوائی اور انجیکشن کا انتظام کرتی۔ منیزہ کی دلی خواہش تھی کہ اس کا ایک بچہ ہو۔ اس نے کئی علاج کروائے اور آپریشن بھی کیا لیکن بے سود۔ منیزہ کی ساس اس کو ہر وقت دلاسا دیتی کہ اس کا بچہ ضرور ہوگا۔
شادی کے ایک سال بعد رضیہ کی گود میں ایک ننھی کلی کھل اٹھی۔ اس نے اپنی بیٹی کا نام تسنیم رکھا۔ اس کی بیٹی جنت کی اس نہر کی طرح تھی جو جنّتی آرام سے تخت پر بیٹھ کر جنت میں پئیں گے
’’دیکھئے ریاض ہماری بیٹی کی مسکان کتنی پیاری ہے۔ میں تسنیم کی پرورش میں کوئی کثر نہیں چھوڑوں گی۔ اس کو ہر فن میں ماہر بناؤں گی۔ کپڑے سینا، کھانا بنانا، کڑھائی کرنا، مصوری کرنا۔۔۔‘‘
’’تسنیم کو بڑی تو ہونے دیجئے۔ اب تو آپ کو صرف تسنیم ہی نظر آئے گی۔ آپ کی نظر میں ہماری اہمیت کم ہوتی جارہی ہے۔ ‘‘ ریاض ذرا جل کر کہتا۔
’’ایسی بات نہیں ہے۔ لیکن ماں بننے کا احساس ہی الگ ہوتا ہے۔ اور پھر ماں اور بیٹی کا رشتہ ہی الگ ہوتا ہے۔ میں اپنی ماں کی کتنی قریب ہوں۔ میں اور تسنیم بھی بہترین دوست بنیں گی۔ دیکھنا!‘‘ رضیہ خوشی سے کہتی۔
جب منیزہ نے پہلی بار تسنیم کو اپنی گود میں لیا تو تسنیم نے زور سے اس کی انگلی پکڑی تھی۔ اس پر منیزہ کی سونی گود کو اور اس کے دل کے اندر
خلائیں خود بخود پُر ہوگئیں۔
’’تسنیم تمہاری ایک نہیں دو دو مائیں ہیں۔‘‘ منیزہ نے اس ننھی سی جان سے کہا۔ اس پر رضیہ مسکرائی۔
تسنیم کی پیدائش سے گھر کا ماحول خوشگوار ہوگیا۔ سب کی جان اسی میں بسی تھی۔ کام سے لوٹ کر بڑے چچا اور منیزہ سب سے پہلے رضیہ کے کمرے میں جاتے۔ تین مہینے کی زچگی کی چھٹی کے بعد جب رضیہ نے پھر سے کام پر جانا شروع کیاتو اس کی ساس ہی بچی کا خیال رکھتی۔ کبھی کبھی منیزہ تسنیم کی دیکھ بھال کے لئے چھٹی لے کر گھر پر رہتی۔ امجد نوکری سے لوٹتے وقت تسنیم کے لئے کھلونے لاتا۔ شام کا کھانا بھی امجد ہی تسنیم کو کھلاتا۔ جیسے جیسے تسنیم بڑی ہوتی گئی اس کی شرارتیں بھی بڑھتی گئیں۔ کھانا کھانے میں ہمیشہ ناک چڑھاتی۔ ایسے میں امجد چچا اس کو باغ کی سیر کراتے اور بہلا پھسلا کر کھانا کھلاتے۔ ’’ وہ دیکھو بطخ۔۔۔‘‘جیسے ہی تسنیم کی نظر باغ کے تالاب میں تیرتے بطخ پر جاتی امجد فوراً چاول اور سبزی سے بھرا چمچ اس کے منہ میں ڈالتا۔
تین سال بعد رضیہ پھر سے ماں بنی۔ اس بار اس کا ایک لڑکا ہوا جس کا نام انور رکھا گیا۔انور کی پیدائش کے ایک سال بعد رضیہ کو چھ مہینے روڈیگس میں ٹرینگ کا آفر آیا۔(روڈیگس موریشس کے مشرق کی طرف ۵۶۰ کلومیٹر کی دوری پر واقعہ ہے اور جمہوریہ موریشس کے تحت آتی ہے۔) رضیہ کا جانا مشکل لگ رہا تھا۔ لیکن ریاض نے اصرار کیا کہ یہ روڈیگس دیکھنے کا اچھا موقعہ ہے۔ چنانچہ اس نے اپنی نوکری سے چھٹی لی اور انور اور رضیہ کے ساتھ روڈیگس چلا گیا۔ رضیہ ٹرینگ پر جاتا اور ریاض انور کی دیکھ بھال کرتا۔ تسنیم کی دادی نے اسے موریشس میں ہی چھوڑنے کی صلاح دی کیونکہ اب تسنیم اسکول جانے لگی تھی اور اس کی دیکھ بھال کے لئے چچا امجد اور چچی منیزہ تو تھے ہی۔
تسنیم سے دور رہنا رضیہ کو گوارا نہیں تھا لیکن اس نے اپنی ساس کا دل رکھنے کے لئے اس کی بات مان لی۔ پھر اس نے سوچا کہ روڈیگس میں دو دو بچے سمبھالنے مشکل ہونگے چونکہ وہ سارا وقت ٹریننگ میں مصروف رہے گی۔ چھ مہینے کافی جلدی نکل گئے۔ ان چھ مہینوں میں رضیہ نے کام کے سلسلے میں کافی کچھ سیکھا اور اسے زیادہ پیسے کمانے کا بھی موقعہ ملا۔ پھر بھی اس کے دل میں تسنیم کی کمی اسے کھائے جا رہی تھی۔ کام میں مصروف ہونے کے باعث جب وہ گھر پہنچتی تو کافی رات ہو جاتی۔ جب موریشس فون کرتی تو تسنیم سو چکی ہوتی۔ کئی مہینوں سے اس سے ٹھیک سے بات بھی نہیں ہوئی تھی۔
روڈیگس کی خوبصورتی سے ریاض اور رضیہ بہت متاثر ہوئے۔ وہاں کی زندگی میں ایک ٹہراؤتھا۔ بسیں بھی چالیس کلومیٹر سے زیادہ نہیں چلتی تھیں۔ تازے پھل، سبزیاں اور مچھلیاں بھی ملتی تھیں۔ ریاض کو وہ چھ مہینے بہت دلفریب لگے۔ اسے خوشی تھی کہ وہ موریشس کی تیز رفتار زندگی کو چند مہینے چھوڑ کر اپنے بیٹے کے ساتھ وقت گزار پایا۔ انور بالکل اس پر گیا تھا۔ وہی سانولا رنگ، تیز نقش، کھنگھریالے بال اور گہری بھوری آنکھیں۔ اپنے بیٹے کو دیکھ کر وہ فخر محسوس کرتا۔ ’بیٹا ہی گھر کا چراغ آگے لے جانے والا ہوتا ہے۔‘ یہ سوچتے ہی اس نے انور کو زور سے اپنی بانہوں میں جکڑ لیا۔
جیسے ہی رضیہ واپس موریشس آئی، گھر پہنچتے ہی اس نے سب سے پہلے تسنیم کو آواز دی۔
’’وہ منیزہ کے کمرے میں سو رہی ہے۔‘‘ اس کی ساس نے کہا۔
’’اچھا ۔‘‘ رضیہ نے اپنی مایوسی چھپانے کی کوشش کرتے ہوئے جواب دیا۔
’’ منیزہ نے تسنیم کو پڑھایا، نہلا کر کھانا کھلا کر سلا دیا۔ وہ تسنیم کا بڑا خیال رکھتی ہے۔‘‘ ساس کہتی گئی۔
رضیہ چپ رہی۔
رات کو کھانے کی میز پر ریاض اپنے بھائی اور بھابی سے روڈیگس کے گن گا رہا تھا۔ ’’نہایت ہی پرسکون جگہ ہے۔ وہاں کی مچھلیوں کا ذائقہ ہی کچھ اور ہے۔‘‘ ریاض کہتا گیا۔
اتنے میں ریاض کی ماں چھوٹی رکابی میں مرغی کی ترکاری لیتے ہوئے داخل ہوئی۔ اس نے اپنے بیٹوں اور بہوؤں کی پلیٹوں میں ترکاری رکھی۔ سب لوگوں نے کھانا شروع کیا۔ اتنے میں وہ کہہ اٹھی ’’ منیزہ نے تسنیم کا بہت خیال رکھا۔ تسنیم تو منیزہ سے اس قدر گھل مل گئی ہے کہ پوچھو مت۔‘‘ رضیہ کے ہونٹوں پر ایک خفیف تبسم تھا۔ اس کے دل میں ایک درد اٹھنے لگا۔ ساس نے پھر ریاض کی طرف دیکھتے ہوئے کہا۔ ’’ریاض تمہیں تو معلوم ہے کہ تمہارے بڑے بھائی اور بھابی اولاد کے لئے کتنے ترستے تھے۔‘‘ ریاض نے جب سر ہلایا تو انہوں نے پھر کہا: ’’ میں چاہتی ہوں کہ تسنیم کو منیزہ اور امجد ہی پالیں۔ پھر تمہارے پاس تو انور ہے ہی۔ تمہارا ایک ہی بھائی ہے۔‘‘
ریاض نے حسبِ معمول ماں کی بات فوراً مان لی۔’’ ہاں ماں تسنیم تو انہیں کی بیٹی کی طرح ہے۔ کیا فرق پڑتا ہے۔‘‘
رضیہ کی بھوک اسی وقت مٹ گئی۔ اس نے ریاض کی طرف دیکھا، پھر اپنی ساس کی طرف، پھر منیزہ کی طرف دیکھا۔ اس کی سانسیں رک سی گئیں۔ وہ کچھ بھی نہیں کہہ پائی۔ اس کے دل کی ڈھرکنیں کمزور ہو رہی تھیں۔
رات کو خوابگاہ میں اس نے ریاض سے کہا: ’’ آپ تسنیم کو دینے کے لئے راضی ہو گئے؟ آپ نے مجھ سے پوچھا بھی نہیں۔‘‘
’’ اس میں پوچھنے والی کیا بات ہے۔ ماں نے سوچ سمجھ کہ ہی یہ فیصلہ لیا ہوگا۔ منیزہ بھابی ہم سب کا کتنا خیال رکھتی ہیں۔ بچہ نہ ہونے کے باعث ان کی زندگی بے نور تھی۔ جب سے تسنیم آئی ہے ان کو راحت ملی ہے۔ پھر ہمارے پاس تو انور ہے نا؟‘‘
رضیہ کچھ نہیں کہہ پائی ۔ اس کی پیٹھ میں زور کا درد اٹھا۔ جیسے کوئی اس کے پیچھے جنجر سے اس پر وار کر رہا ہے۔
ریاض نے مزید کہا: بھیا اور بھابی ہم سے زیادہ فارغ البال ہیں۔ منیزہ بھابی اتنی بڑی ڈاکٹرنی ہیں۔ وہ تسنیم کی پرورش ہم سے بہتر کر پائیں گے۔‘‘
رضیہ کچھ نہیں کہہ پائی۔ اس کا کلیجہ پھٹ رہا تھا۔ اس کی آنکھوں سے آنسوؤں کا سیلاب جاری تھا اور اس کا شوہر سفر کی لمبی تھکان کے باعث لمبی تان رہا تھا جیسے کہ کچھ ہوا ہی نہیں ہو۔
تین مہینے بعد منیزہ اور امجد نے پلین دے روش چھوڑ کہ واکواہ میں مکان بنایا اور وہاں تسنیم کے ساتھ منتقل ہو گئے۔ جب رضیہ اور
ریاض روڈیگس گئے تھے تسنیم کی دیکھ بھال کرتے کرتے منیزہ کے دل میں ایک خوف نے گھر کر لیا تھا۔ امجد، تسنیم اور وہ ساتھ میں کتنے
خوش تھے۔ وہ سمندر کے کنارے جاتے۔ دونوں شفقت سے تسنیم کو گھروندہ بناتے دیکھتے۔ پھر لہریںآکر اس گھروندے کو بہا لے جاتے۔ وہ لہریں منیزہ کو یاد دلاتے کہ تسنیم ادھار کی خوشی ہے۔ وہ اس کی اپنی بیٹی نہیں ہے۔ اس پر منیزہ کا دل کانپ اٹھتا۔ بہت سوچنے کے بعد اس نے اپنی ساس سے منتیں کیں کہ تسنیم کواسے دے دیا جائے۔ اس کی ساس نے کبھی اس کی کوئی بھی بات سے انکار نہیں کیا تھا۔ لہٰذا وہ یہ سوچ کر مان گئی کہ امجد اور ریاض دونوں ہی اسی کے بیٹے ہیں۔ تسنیم ایک کے پاس رہے یا دوسرے کے، اس سے کوئی فرق نہیں پڑتا۔
ساس نے جب رضامندی دے دی پھر بھی منیزہ کو یہ خوف ستانے لگا کہ جب رضیہ آئے گی تو اس کا ردِ عمل کیا ہو گا؟ اس دڑ کی وجہ سے اس نے امجد کو واکوا میں زمین خریدنے اور مکان بنانے پر اکسایا۔ وہ بے اولاد ہونے کا بدنما داغ لے کر جینا نہیں چاہتی تھی۔
امجد ہمیشہ سے کامیابی کی سیڑھیاں چڑھنے کا مشتاق تھا۔ اسی وجہ سے اس نے اپنے کاروبار کو اتنا پھیلایا۔ وہ شہر میں رہنے کا متمنی تھا جہاں اس کی طرح اور کامیاب لوگوں کی رہائش تھی۔ سات مہینوں کے اندر گھر تیار ہو گیا اور تسنیم رضیہ کی زندگی سے چلی گئی۔ کسی نے سوچا نہیں کہ رضیہ کے دل پر کیا گزرے گی۔ رضیہ نے کبھی اپنے حق کے لئے آواز بلند کرنا نہیں سیکھا تھا۔وہ اپنا دکھ اپنے اندر رکھتی تھی۔
پندرہ سال بعد سلطانہ رضیہ سے پنچوتی گاؤں میں ملی۔ پندرہ سالوں میں موریشس میں کافی ترقیات ہوئی تھیں۔ بڑی بڑی عمارتیں بن گئیں۔ لوگوں کی طرزِ زیست اور معیارِ زندگی بھی بڑھ گئی۔ لیکن پنچوتی گاؤں میں کچھ خاص نہیں بدلا تھا۔ سلطانہ اور رضیہ ایک ہی اسکول میں پڑھتی تھیں۔ سلطانہ شادی کے بعد اپنے شوہر اور دو بچوں کے ساتھ اب پیرس میں رہتی ہے۔ وہ چھٹیوں میں اپنے والدین کے گھر رکی ہوئی تھی۔ مرکزی سڑک کے کنارے والی دکان سے روٹی لاتے وقت رضیہ اس کواملی کے درخت کے پاس والی بس اسٹاپ پر نظر آئی۔رضیہ بالکل نہیں بدلی تھی۔ اس کے چہرے پر وہی بچپن کی سادگی نمایاں تھی۔
’’ارے رضیہ کیسی ہو؟‘‘ سلطانہ نے رضیہ کے دونوں گالوں کو چومتے ہوئے پوچھا۔
’’اچھی ہوں۔ مجھے اپنی بیٹی کے اسکول جانا ہے۔ میں نے اس کے لئے حلوہ بنایا ہے۔ میں اس کے اساتذہ اور اس کے دوستوں کو دوں گی۔ یہ بس بھی نہیں آرہی ہے۔ تسنیم کو معلوم نہیں کہ میں آرہی ہوں۔ اس نے کئی بار منع بھی کیا کہ میں اس کے اسکول نہ آؤں لیکن اس کو دیکھے بغیر رہا نہیں جاتا۔۔۔ویسے تم کون ہو؟‘‘ رضیہ نے آخر میں پوچھا۔
سلطانہ کو رضیہ کی باتوں پر ذرا حیرت ہوئی۔ ’’ میں سلطانہ ہوں۔ ہم ساتھ میں پاس والی اسکول جاتے تھے۔ اسکول سے واپس آتے وقت اسی املی کے درخت پر پتھر مار کر املی توڑتے تھے۔ یاد ہے؟‘‘
’’اری ہاں سلطانہ! کیسی ہو؟ تمہارے بچے ہیں؟‘‘ رضیہ نے پوچھا۔
’’میں ٹھیک ہوں۔ میرے دو بچے ہیں۔ ایک بیٹا اور ایک بیٹی۔‘‘ سلطانہ نے جواب دیا۔
’’اپنی بیٹی کو کڑھائی کرنا، کروشیا کرنا اور کھانا بنانا سکھانا۔ لڑکیوں کے لئے یہ چیزیں جاننا اچھا ہوتا ہے۔ تسنیم مصّوری میں اچھی تھی۔
اس کے استاد بھی اس کے ہنر کی داد دیتے تھے۔ پھر منیزہ نے منع کردیا اورر اس نے مصّوری چھوڑ کر سائنسی مضامین کا انتخاب کیا۔‘‘
رضیہ کہتی گئی۔ سلطانہ نے غور کیا کہ رضیہ نے بال نہیں بنائے تھے اور اس کے کپڑے ایک دو جگہ پر پھٹے ہوئے تھے۔
’’منیزہ کون ہے؟‘‘ سلطانہ نے تذبذب کی حالت میں دریافت کرنا چاہا۔
’’بس آگئی۔ منیزہ تسنیم کو اعلیٰ تعلیم کے لئے لندن بھیج رہی ہے۔ پتہ نہیں پھر کب میں اپنی شہزادی سے ملوں گی۔ منیزہ بہت بڑی ڈاکٹرنی ہے۔ اس کے پاس بہت پیسے ہیں۔ میرے پاس کیا ہے؟‘‘ یہ کہتے ہوئے رضیہ کی آنکھوں سے آنسو نکلنے لگے۔ پھر وہ بھاگتی ہوئی بس میں سوار ہو گئی۔
سلطانہ کچھ دیر تک وہیں کھڑی رہی۔ گھر واپس آکر اس نے اپنی ماں کو سارا معاملہ کہہ سنایا۔
’’یہ تم کس پاگل کے گلے لگ گئی۔‘‘ ماں نے کہا۔
’’پاگل؟‘‘ سلطانہ کو حیرت ہوئی۔
’’ہاں اس کے شوہر نے اس کو چھوڑ کر دوسری شادی کر لی ہے۔ تب سے یہ اکیلی اپنے مرحوم والدین کے گھر میں رہنے آگئی۔‘‘ ماں نے بتایا۔
’’پھر رضیہ کے بچے؟‘‘ سلطانہ نے جاننا چاہا۔
’’رضیہ کی جیٹھانی کی کوئی اولاد نہ تھی۔ ساس کے کہنے پر رضیہ نے اپنی لڑکی جیٹھانی کو دے دی۔ بیٹی دینے کے بعد میاں بیوی کے رشتے میں خلل آنے لگا۔ بیٹی کی جدائی میں رضیہ کا دل اس قدر کڑوا ہوا کہ لڑکے کی طرف دھیان نہ دے پائی۔ پھر رضیہ اپنا ذہنی تواز کھو بیٹھی۔ پاگل خانے میں علاج کروایا۔ تب تھوڑی ٹھیک ہوئی۔ تب سے یہیں پنچوتی میں پڑی ہے۔ اپنے کام سے پنشن ملتی ہے۔ اسی پر گزارا کرتی ہے۔‘‘
’’بے چاری بدنصیب!‘‘ سلطانہ نے نفی میں سر ہلایا۔