Nayab hasan

(استاذِگرامی مولاناصداقت حسین قاسمیؒ کی یادمیں)
نایاب حسن
ابھی کچھ دیر قبل استاذمکرم مفتی ثناءاللہ قاسمی اور دیگر چند احباب کے ذریعے خبر ملی کہ بالاساتھ(سیتامڑھی)کے بزرگ عالم دین اور دارالعلوم بالاساتھ کے استاذحضرت مولانا صداقت حسین قاسمی طویل علالت کے بعد انتقال کرگئے۔اناللہ واناالیہ راجعون۔ مولانا سے باقاعدہ تلمذکا شرف ہمیں حاصل نہ تھا،مگر وہ ہمارے استاذتھے،جن دنوں(غالباً2005میں)وہ ایک سرکاری مدرسے سے سبک دوش ہوکر آئے تھے اور دارالعلوم بالاساتھ میں ان کی تقرری ہوئی تھی،ان دنوں ہم وہاں عربی چہارم ،پنجم کے طالب علم تھے۔ویسے اس گاؤں میں انھیں پہلے بارہادیکھا تھا،مگر باقاعدہ دید و شنید کی نوبت اسی وقت آئی،جب وہ دارالعلوم بالاساتھ سے منسلک ہوئے۔ان کی شخصیت بڑی بھلی،ستھری اور نکھری ہوئی تھی،وہ دیوبندکے قدیم فضلامیں تھے اور مولانا سید ارشدمدنی کے رفیق درس تھے،اپنی طالب علمی اورخصوصامولاناارشد مدنی سے وابستہ واقعات بڑی دلچسپی سے سناتے،ان کی گفتگو،طرزِبیان،شستہ روئی و خندہ جبینی نے ہمیں بے حد متاثر کیا،ان کاسراپابھی بڑا نستعلیق تھا،ان کالباس و پوشاک عام علماسے منفرد ہوتا،دیکھنے میں بڑے وجیہ اور باعظمت لگتے اوران سے مل کر ،تبادلۂ خیال کرکے دل دماغ ان کی علمی و ادبی رفعت کا قائل ہوجاتا تھا۔
مولانا کی پوری زندگی مَدرَسی تعلیم و تدریس میں گزری،مگر ان کا مطالعۂ ادب حیرت ناک حد تک وسیع و عریض تھا،ہزاروں برمحل اشعاران کے نوک زبان تھے،جنھیں وہ عام گفتگو کے دوران بھی اتنی خوبی سے استعمال کرتے کہ باذوق سامع عش عش کرنے لگتا۔اسی وجہ سے جب ہماری کلاس کا کوئی گھنٹہ خالی ہوتا،تو ہم مولانا کو تلاش کرتے اور ان سے استفادے کے لیے اپنی کلاس میں انھیں مدعوکرتے،ہم نے ان سے کوئی کتاب نہیں پڑھی،مگر ان کی صحبت میں ہمیں کئی کتابوں کا علم حاصل ہوا۔جوش ،کلیم عاجز،فیض،پروین شاکر،ماہرالقادری اور دیگر ادیبوں اور شاعروں پر ان کامطالعہ بڑاعمیق تھا۔جوش کی مشہور نظم’’جنگل کی شہزادی‘‘جو لگ بھگ ساٹھ اشعار پر مشتمل ہے اور ’’فتنۂ خانقاہ‘‘جس میں لگ بھگ چالیس اشعار ہیں اور ان دونوں نظموں میں جوش نے سیکڑوں مفردات اور نئی نئی تعبییرات استعمال کی ہیں،یہ دونوں نظمیں مولانا کو ازبرتھیں اوراپنے مخصوص سٹائل میں جب وہ انھیں پڑھتے،تو سن کر مزاآجاتا تھا۔یہی نہیں،ان کے علاوہ بھی بیسیوں شعراکی غزلیں اور نظمیں انھیں یاد تھیں۔ہماری ادبی نشوونمامیں غیرمحسوس طورپرمولانامرحوم کی بے مثال وباوقارادبی شخصیت اور ان کی ادب نوازی و خردافروزی کاحصہ رہا۔ان کی تحریک پر ہی ہم نے جوش،کلیم احمد عاجز،مولانا دریابادی،ماہر القادری وغیرہ کو عمرکی اس منزل میں پڑھا،جب عام طورپرمدارس کے طلبہ ان کے ناموں سے بھی ناواقف ہوتے ہیں۔ جامعہ کے اختتامی پروگراموں میں عموماً میں اناؤنسرہوتا،تومقررین و شعراکو مدعوکرنے کے لیے مناسب وموزوں اشعار مولانا سے ہی حاصل کرتا اور وہ اشعار ایسے ہوتے،جو میرے لیے بالکل ناشنیدہ ہوتے اور نہایت معنی خیز!فارسی ادب کا ان کامطالعہ بھی بڑاعمیق تھااوروہ گلستاں و بوستاں کے سیکڑوں اشعارارتجالاًسناسکتے تھے۔مولاناکی شخصیت ایک جیدعالم دین،ایک عمیق النظر ادیب و ادب نواز کی تھی،ان کی عمردرس و تدریس میں بسر ہوئی اور تصنیف و تالیف کاانھیں موقع ہی نہیں مل سکا،ورنہ ان کے قلم سے علم و ادب کے گہرہاے آب دار و تاب دار سامنے آتے۔
مدارس کے ماحول میں ایسے اساتذہ خال خال ملتے ہیں،جن کی نظر اور نظریے میں اس درجہ وسعت و کشاد ہو اور جو طلبہ کے تئیں اتنے خیر خواہ ہوں اور ان سے اتنی بے تکلفی سے پیش آئیں کہ طلبہ ان کے گرویدہ ہوجائیں اور اپنی ہر مشکل بلا کسی جھجھک کےان سے بیان کرسکیں،مولانا مرحوم میں یہ خوبی کمال درجے میں پائی جاتی تھی۔ جب ہم عربی ششم میں تھے،تو اس زمانے میں مولانا کو نائب ناظم تعلیمات بنایاگیاتھا۔اس درجے میں اصول فقہ کی ایک اہم کتاب’حسامی‘‘پڑھائی جاتی ہے،یہ کتاب جن استاذکے پاس تھی،ہم ان سے مطمئن نہ تھے یا ہماری ذہنی سطح اتنی بلند نہ تھی کہ ہم ان کی درسی تشریحات کو سمجھ سکیں ؛چنانچہ عیدالاضحی تک کسی طرح ہم ان سے استفادے کی کوشش کرتے رہے،مگر پھرمعاملہ دگر گوں ہونے لگا،ہمیں سبق بالکل سمجھ میں نہ آتا،جس کی وجہ سے ہمارے تمام رفقائے درس پریشان تھے،ہم نے سوچاکہ اگر یہ کتاب فلاں استاذِمحترم پڑھائیں،توشاید ہمیں کچھ پلے پڑسکے،مگر مسئلہ یہ تھاکہ ایساممکن کیسے ہو؟بالآخرہم نے مولاناصداقت حسین صاحب سے ملنے اور اس سلسلے میں بات کرنے کا فیصلہ کیااوران کے سامنے اپنی مشکل پیش کی ،مولانا نے پوری کشادہ دلی اور کھلے پن کے ساتھ ہماری بات سنی ،ہم سے پوچھاکہ:تم لوگ یہ کتاب کن کے پاس پڑھنا چاہتے ہو؟ہم نے نام لیا اور انھوں نے فوراً ہامی بھرلی؛چنانچہ اگلے دن سے حسامی کا درس دوسرے استاذدینے لگے۔
مولاناکی شخصیت بڑی من موہنی اور شاداب تھی،اتنی کہ انھیں تصورکریں تو ذہن و دماغ کے پردے پر بے ساختہ یادوں کے حسین مناظر رقص کرنے لگتے ہیں۔ان کاطرزِپوشش،ان کے چلنے کا انداز،ان کا طورِگفتگو،پان کی سرخی میں ڈوبے ان کے لبوں سے جھڑتے ادب پارے،ان کی پاٹ دار آوازاور ان کی بے پناہ شفقت و محبت ہم جیسے طالب علموں کے لیے قیمتی سرمایہ ہیں۔ جب۲۰۱۲میں میں نے مشہور ادیب و خطیب و شاعرآغاشورش کاشمیری کی مختلف کتابوں سے مضامین کاایک انتخاب مرتب کرکے شائع کیا اور دیگر اساتذہ و کرم فرماؤں کے ساتھ مولاناکی خدمت میں بھی اس کاایک نسخہ ارسال کیا ،توکچھ ہی دن بعد مولانا نے مجھے فون کیااور اتنے حوصلہ افزاکلمات کہے کہ میں خوشی و مسرت سے لبریز ہوگیا،ان کی بے پناہ شفقت و محبت کی بارش میں بھیگ گیا۔پھر انھوں نے شورش کے ادبی امتیازات،خطابی فتوحات اور صحافتی خدمات پرنہایت وقیع گفتگوکی۔کچھ دن بعد جب میں گھرگیااوراساتذہ سے ملاقات کی غرض سے دارالعلوم بالاساتھ پہنچا،تو مولانا سے بھی ملاقات ہوئی،ملتے ہی گلے سے لگالیا،دیر تک دعائیں دیتے رہے،میری حقیر و معمولی قلمی سرگرمیوں پربے پناہ مسرتوں کا اظہار کیا۔اس کے بعد اپنی دوسری کتابیں بھی مولاناکی خدمت میں پیش کرنے اور ان کی دعائیں سمیٹنے کی سعادتیں ملتی رہیں۔اب کے عیدالاضحی کے موقعے پر میں گاؤں گیاتھا،مگروقت کی تنگی اور اپنی بدقسمتی کی وجہ سے بالاساتھ اپنی مادرعلمی اور اساتذہ کی خدمت میں حاضرنہ ہوسکا،ان دنوں وہاں عیدالاضحی کی تعطیل کے دن بھی تھے اور مجھے بالکل معلوم نہ تھاکہ مولاناعلیل ہیں،ورنہ ان کی خدمت میں ضرورحاضر ہوتا۔ ملال ہے کہ ایک عرصے سے مولاناسے کوئی رابطہ نہیں رہاتھا،اللہ پاک ان کی مغفرت فرمائے،ان کی تعلیمی و تدریسی خدمات کوقبول فرمائے اوروارثین واہلِ خانہ کو صبرِجمیل عطافرمائے۔(آمین)

نایاب حسن
قرآن کریم کاایک پہلو علمی ہے کہ اس کے ظاہری الفاظ و تعبیرات سے علوم و فنون کے مختلف پہلووں پر استدلال کیا جائے اور اس کا دوسرا پہلو خالص عملی اور انسان کی اجتماعی و انفرادی زندگی سے وابستہ ہے،قرآن کا ایک پہلو یہ بھی ہے کہ یہ ایک دائمی معجزہ ہے،جو ہمارے نبی پاکﷺکو دیاگیا تھااورتب کی فصیح و بلیغ عربی قوم سے لے کر آج تک کوئی بھی انسانی فردیا جماعت اس کی ایک آیت کا بھی مقابل ومماثل نہ پیش کر سکی۔آپ ؐسے پہلے حضرت موسیٰ علیہ السلام کو لاٹھی کا معجزہ دیا گیا تھا ،کہ اس کو پتھر پر مارنے سے نہر جاری ہوجاتی یا اسے زمین پر پٹکتے تو وہ سانپ کی شکل اختیار کرلیتی،اسی طرح حضرت داؤد علیہ السلام کے ہاتھوں میں لوہا موم ہوجایاکرتاتھا ، حضرت عیسیٰ علیہ السلام کو یہ معجزہ عطا کیا گیا تھا کہ وہ بیماروں پر ہاتھ پھیردیتے ،تو وہ صحت مند ہوجاتے یا مردہ ان کے حکم سے زندہ ہوجاتا؛ لیکن آخری پیغمبر حضرت محمدصلی اللہ علیہ وسلم کو قرآن کریم کاخالص علمی معجزہ دیا گیا ، یہ معجزہ قیامت تک کے لیے ہے ؛کیونکہ حضرت محمد صلی اللہ علیہ وسلم پر انبیا کا سلسلہ ختم کردیا گیا،آپ کے بعد کوئی نبی آنے والا نہیں ہے، آپؐ کے ذریعے لایاگیا دین قیامت تک کے لیے ہے؛اس لیے آپ کا یہ معجزہ بھی قیامت تک کے لیے ہے، یہی وجہ ہے کہ آج چودہ صدی کے بعد بھی قرآن کی تعلیمات تازہ ہیں اور قرآن نے جوحقائق بیان کردیے ہیں، وہ حرف بہ حرف سچ ہیں۔ سائنس داں اورمحققین صدیوں کی ریسرچ اور کھوج کے بعد آج جو باتیں بیان کررہے ہیں ، ان میں سے بہت سی باتیں قرآن چودہ صدی قبل ہی بیان کرچکاہے ۔
قرآن پاک کی اسی ابدیت وجامعیت کے پیش نظر اس کے معارف و نکات کی تشریح و تفسیر پر اب تک دنیا بھرکی سیکڑوں زبانوں میں ہزاروں کتابیں لکھی جاچکی ہیں اوریہ سلسلہ تاہنوز جاری و ساری ہے،ماہرینِ علوم و فنون نے مختلف حوالوں سے قرآن کو اپنی تحقیق کا موضوع بنایا اور اس سمندر سے علم و فکر کے رنگا رنگ موتی نکالے ہیں۔ہندوستان کو اس حوالے سے ایک طرح کا امتیاز حاصل ہے کہ یہاں مختلف زمانوں میں بے شمار تراجمِ قرآن لکھے گئے،تفسیریں لکھی گئیں اور قرآن پاک کی توضیح و تبیین پر علماومفکرین کی ایک بڑی جماعت نے اپنا علمی،ذہنی و فکری سرمایہ صرف کیا۔
اِس وقت ہمارے پیش نظر پروفیسر غلام یحیٰ انجم صاحب کی مرتب کردہ کتاب’’قرآن کریم کے ہندوستانی تراجم و تفاسیر کا اجمالی جائزہ‘‘ہے، جس میں شروع سے لے کر اب تک ہندوستان بھر میں قرآنیات پر ہونے والے کام کا تحقیقی جائزہ لینے کی قابلِ قدر کوشش کی گئی ہے۔پروفیسر صاحب معاصر علمی حلقے میں خاصے متعارف ہیں ،جامعہ ہمدرددہلی میں شعبۂ اسلامک اسٹڈیز کے سربراہ اور بیس سے زائد مختلف علمی و تحقیقی کتابو ں کے مصنف و مرتب ہیں۔زیر نظر کتاب بھی ان کی غیر معمولی محنت و کاوش ، دقت نظری وبصیرت مندی کا نمونہ ہے،اس کتاب میں انھوں نے ہندوستان میں عربی و اردو کے علاوہ تیلگو، بنگلہ، سنسکرت، گورمکھی،کنڑ،سندھی،کشمیری،گجراتی،ہندی،انگریزی وغیرہ زبانوں میں ہونے والے قرآن کریم کے تراجم و تفاسیر کا تعارف پیش کیاہے،ان کے تعارف میں انھوں نے بلا تفریق تمام مسالک و مکاتبِ فکر کے علماکے ذریعے لکھی گئی کتابوں کو پیش نظررکھاہے،مسلمانوں کے علاوہ عیسائی اور قادیانی تراجم و تفاسیرِ قرآن بھی مؤلف کے زیر تذکرہ آئے ہیں۔کتاب کے مشمولات کی جامعیت و ہمہ گیریت کو دیکھ کر اندازہ ہوتا ہے کہ انھوں نے شروع سے اب تک قرآنیات پر ہونے والے کاموں کا تقریباً احاطہ کرلیا ہے اوران کی یہ کتاب ہندوستان میں قرآنیات کی تفہیم،تفسیر و تحقیق کے تعلق سے ایک بہترین انسائیکلوپیڈیا قراردیے جانے کے لائق ہے۔
کتاب کا آغازترتیب وار پانچ تقریظوں سے ہوا ہے،ان سے قبل مؤلف نے اپنے ابتدائیہ میں کتاب کی تالیف کے تعلق سے اپنی محنت،متعلقہ موضوع کی وقعت و گیرائی اور اس کتاب کے مشمولات پر مختصر گفتگو کی ہے۔مقدمہ میں مؤلف نے قرآن اور تفہیمِ قرآن کے تعلق سے مختلف علمی پہلووں پر تفصیلی روشنی ڈالی ہے،سوصفحات میں پھیلا ہوا یہ مقدمہ علوم القرآن پر مؤلف کے درک و بصیرت کا آئینہ دار ہے اور قرآنِ کریم کے طالبِ علم کے لیے اس میں سیکھنے کے بہت سے پہلو ہیں،اس مقدمے میں فاضل مؤلف نے وحی کی اقسام،نزولِ قرآن کے مراحل،قرآن کریم کے نام،تلاوتِ قرآن کے آداب، ترجمہ، تفسیر، تاویل کی تعریف وتشریح،مفسرین کے طبقات ،مختلف زمانی مراحل میں لکھی جانے والی اہم تفاسیر کی نشان دہی اور ہندوستان میں تفسیر نویسی کے آغاز پر نہایت پر مغز اور علم ریز گفتگو کی ہے۔صفحہ نمبر۱۷۱؍سے اصل کتاب شروع ہوتی ہے،مختلف مرکزی عناوین کے تحت کتابوں کا تعارف پیش کیاگیا ہے،پہلا عنوان ہے ’’قرآن کریم کی ہندوستانی تفاسیر‘‘دوسرا عنوان ہے’’قرآن کریم کے بعض اجزاکی تفاسیر‘‘تیسراعنوان ہے ’’قرآن کریم کے اردوفارسی تراجم‘‘چوتھا عنوان ہے’’قرآن کریم کے منظوم تراجم و تفاسیر‘‘چھٹا عنوان ہے’’قرآن کریم کی آیاتِ احکام کی تفاسیر‘‘اس کے تحت بارہ کتابوں کا ذکر ہے،ساتواں عنوان ہے ’’تفاسیر قرآن کریم کی ہندوستانی شروح و حواشی اور تعلیقات‘‘اس کے تحت مختلف تفاسیر قرآن کی سو ہندوستانی شروح،حواشی وتعلیقات کا تعارف پیش کیا گیا ہے،آٹھواں عنوان ہے’’شیعی علماکے تراجم و تفاسیر‘‘اس کے تحت مختلف دور میں شیعی علماکے ذریعے کے کیے گئے ڈیڑھ سو سے زائد تراجم و تفاسیرِ قرآن کا ذکر ہے،نواں عنوان ہے’’قرآن کی موضوعی تفاسیر‘‘اس کے تحت آٹھ کتابوں کا تذکرہ ہے،دسواں عنوان ہے’’قرآن کریم کے قادیانی تراجم و تفاسیر‘‘اس کے تحت پندرہ کتابوں کا تعارف ہے،’’گیارہواں عنوان ہے’’عیسائی علماکے قرآنی تراجم‘‘اس کے تحت پانچ تراجمِ قرآنی اوران کے عیسائی مترجم کے نام نقل کیے گئے ہیں،بارہواں عنوان ہے’’قرآن کریم کے مختلف زبانوں میں تراجم‘‘جس میں مختلف زبانوں میں کیے گئے بہت سے تراجمِ قرآنی کا ذکر ہے ۔ تعارف میں عام طورپر زیر تذکرہ کتاب کا سن تالیف،مختصر تعارف،بعض مفسرین کے علمی مقام و مرتبہ کی تعیین اورکہیں کہیں نمونۂ ترجمہ و تفسیربھی درج کردیاگیا ہے، مؤلف نے حتی الامکان کوشش کی ہے کہ جس تفسیریا ترجمے کا ذکر کریں ،توساتھ میں کتاب اور صاحبِ کتاب کا مختصر تعارف بھی کرادیں،مگر اس کے باوجود بہت سی ایسی تفاسیر اور ترجمے رہ گئے،جن کے بارے میں مؤلف کوصرف کتاب اور مصنف کے نام کا پتا چل سکاہے،بہر کیف مجموعی طورپر یہ ایک غیر معمولی اہمیت کی حامل کتاب ہے اور اس سے ہندوستان میں(ماقبل ومابعدآزادی) گزشتہ سیکڑوں سال کے دوران قرآنیات پر ہونے والے کاموں کاایک خوب صورت خاکہ سامنے آجاتا ہے۔
بہت سی خوبیوں کے ساتھ اس کتاب میں بعض خامیاں بھی ہیں،حالاں کہ فی الجملہ کتاب کے اسلوب میں سلاست ووضاحت ہے،مگربعض جگہ زبان و بیان پیچیدہ ہوگیا ہے،کئی مقامات پر ایک کتاب کے تعارف کے دوران دوالگ الگ مراجع کے حوالے سے ایک ہی بات مکرر لکھی گئی ہے،صفحہ نمبر۲۸۵پر ’’اردوتفاسیر‘‘کے حوالے سے مولانایحی کاندھلوی سے منسوب تفسیر’’الکوکب الدری‘‘کا ذکرآیاہے،حالاں کہ ’’الکوکب الدری‘‘مولانا کی تفسیر نہیں ؛بلکہ عربی زبان میں سنن ترمذی کا نوٹ ہے،جسے بعد میں ان کے صاحبزادے مولانامحمد زکریاکاندھلوی نے اپنے حاشیے کے ساتھ دوجلدوں میں شائع کروایا ہے اور علم حدیث سے وابستگی رکھنے والے حلقوں میں مقبول و متداول ہے۔علی گڑھ سے ایک علمی و تحقیقی رسالہ’’تحقیقاتِ اسلامی‘‘کے نام سے جولائی ۱۹۸۲ء سے شائع ہورہاہے،اس کے موجودہ مدیر مولانا سید جلال الدین عمری اور معاون مدیرڈاکٹر رضی الاسلام ندوی ہیں،مؤلفِ محترم نے مولانا امین احسن اصلاحی کی تفسیر’’تدبرقرآن‘‘کا تعارف کراتے ہوئے اس رسالے میں شائع شدہ خورشید حسن رضوی کے مضمون کے حوالے سے تدبرقرآن کا تفسیری نمونہ پیش کیا ہے،مگر رسالے کانام وہ صفحہ نمبر۱۸۹؍پر’’تحقیقات‘‘اور اگلے صفحے پر’’سہ ماہی تعلیمات‘‘لکھ گئے ہیں،ظاہر ہے ایک تحقیقی تالیف میں اس قسم کی غلطی نظر انداز نہیں کی جاسکتی ،اسی طرح قرآن کریم کی آیتوں کی تعداد صفحہ نمبر۷۲؍پرچھ ہزار دوسوپچاسی لکھی ہے،جبکہ صفحہ نمبر۱۰۲؍پرچھ ہزار چھ سوچھیاسٹھ،حالاں کہ دوسری تعداد ہی زیادہ مشہور ہے،مگر فاضل مؤلف کو اپنی تحقیق کے مطابق کسی ایک ہی راجح تعداد کا ذکرکرنا تھا۔کئی جگہ عربی عبارتیں غلط املا میں لکھی گئی ہیں،جو یقیناً کمپوزنگ کی غلطیاں ہیں،مگر ان کی تصحیح ہونی چاہیے تھی،کئی اردو الفاظ بھی غلط کمپوزہوگئے ہیں،امید ہے کہ آیندہ ایڈیشن میں ان کی اصلاح کرلی جائے گی۔
بہر کیف پروفیسر غلام یحی انجم کی یہ کتاب ہندوستان میں علومِ قرآنی پر ہونے والے کاموں کا بھرپوراحاطہ کرتی ہے اور غالباً اردو زبان میں اپنی نوعیت کی یہ منفرد کتاب ہوگی،جس میں مختلف ادوارمیں مختلف طبقات ومکاتبِ فکر کے علماکے ذریعے کیے گئے قرآن پاک کے تراجم ،تفاسیرکا جامعیت کے ساتھ جائزہ پیش کیا گیاہے۔کتاب کی طباعت قومی کونسل برائے فروغ اردو زبان کے ذریعے ۲۰۱۷ء میں ہوئی ہے ،طباعت معیاری،دیدہ زیب اور خوب صورت ہے، ۶۰۰؍سے زائد صفحات پر مشتمل اس گراں قدر کتاب کی قیمت۲۶۰؍روپے نہایت مناسب ہے۔ امید ہے کہ موصوف کی یہ کتاب قرآنیات سے دلچسپی رکھنے والوں کے لیے گنجِ گراں مایہ اور آیندہ اس موضوع پر کام کرنے والوں کے لیے مشعلِ راہ ثابت ہوگی۔