Editor qindeel

محمد طارق اعظم

کرونا وائرس کے علاج کے تعلق سے برادران وطن کے شدت پسند حلقے کی طرف سے گائے کے پیشاب نوشی کی مجلس کا اہتمام کیا گیا تھا اور یہ دعویٰ کیا گیا تھا کہ اس وائرس اور اس کے علاوہ دیگر مہلک مرض کا بھی کافی و شافی علاج اس گائے موتر میں موجود ہے۔ دعوے کی یہ صدا رہ رہ کر اس حلقے کی جانب سے وقتاً فوقتاً بلند ہوتی رہتی ہے، گو کہ اس وقت یہ صدا سنائی نہیں دے رہی ہے۔ اپنے دفاع میں یا مذہب اسلام پر نشانہ سادھتے ہوئے کچھ لوگوں کی طرف سے یہ بات کہی جاتی ہے کہ ہندوؤں کے لیے جس طرح گاؤ موتر مقدس اور پینا باعث شفا اور ثواب ہے ٹھیک یہی معاملہ اونٹ کے پیشاب کا مسلمانوں کے یہاں ہے، جبکہ یہ بات خلاف واقعہ ہونے کے ساتھ سراسر الزام ہے۔ اس طرح کی بےبنیاد باتوں سے سیدھے سادے مسلمان بھی متاثر ہوئے بغیر نہیں رہتے ہیں، اس کا اندازہ ان سوالوں سے ہوتا ہے جو ہمیں مسلمانوں کی طرف سے موصول ہوتے ہیں۔ خیر ہمیں گائے کے پیشاب سے کچھ سروکار بھی نہیں ہے اور نہ تحریر کا ہی یہ مقصود ہے۔ اس تحریر کا مقصود دراصل اونٹ کے پیشاب کے بہانے حدیثِ رسول پر کیے جانے والے اعتراض کا علمی جواب دینے کے ساتھ اس تعلق سے مسلمانوں کے ذہنوں پر چھائے گرد و غبار کو صاف کرنا ہے۔
حضور اکرم صلی اللّٰہ علیہ وسلم نے قبیلۂ عرینہ کے لوگوں کو پیشاب کے پینے کا حکم کیوں اور کس پس منظر میں دیا تھا، اس تعلق سے علمائے اسلام نے جو کچھ لکھا ہے اس کی تفصیل ذکر کرنے کے بجائے ایک واقعے کا ذکر کرنا ضروری سمجھتا ہوں، جس میں اس اعتراض کے جواب کے ذکر کے ساتھ ساتھ دیگر اعتراضات کے بھی سائنٹفک جواب دیے گئے ہیں۔ واقعے کے راوی ڈاکٹر محمود احمد غازی صاحب رحمہ اللّٰہ (1950 – 2010) ہیں۔ ڈاکٹر صاحب رحمہ اللّٰہ ماضی قریب کی مشہور علمی شخصیت گذرے ہیں، ان کے علمی اور تصنیفی یادگار میں علوم اسلامی پر پیش کیے گئے محاضرات نہایت ہی اہم اور نمایاں ہیں جو اب زیور طباعت سے آراستہ ہو کر مقبول عوام و خواص ہیں۔
اس واقعے کو ڈاکٹر صاحب نے محاضرات حدیث کے محاضرہ "علوم حدیث دور جدید” میں بیان کیا ہے۔ یہ واقعہ دراصل ایک مکالمہ ہے جو دو مشہور بڑے پائے کے اسکالر کے درمیان ہوا ہے۔ جواب دینے والے ڈاکٹر حمید اللہ صدیقی پیرس رحمہ اللّٰہ (1908 – 2002) تھے، علمی دنیا میں ان کی شخصیت محتاجِ تعارف نہیں ہے، یہ سراپا فنا فی العلم تھے۔ سیرت اور حدیث کے حوالے سے انہوں نے کئی اہم عظیم خدمات انجام دیں ہیں جو ہمیشہ علمی حلقوں میں قدر کی نگاہ سے دیکھی جائیں گی۔ اعتراض کرنے والے ڈاکٹر مورس بکائی (1920 – 1998) تھے، ان کا تعارف ڈاکٹر محمود احمد غازی صاحب رحمہ اللّٰہ کی زبانی پڑھیے؛ "فرانس کا ایک مشہور مصنف تھا جس کا نام ڈاکٹر مورس بکائی تھا۔ وہ ایک زمانے میں غالباً پورے فرانس کی میڈیکل ایسوسی ایشن کے صدر تھے۔ سائنس دان ہیں اور بہت بڑے ہارٹ اسپیشلسٹ ہیں۔ وہ شاہ فیصل مرحوم کے ذاتی معالج تھے اور شاہ فیصل مرحوم کا علاج کرنے کے لیے ان کو وقتاً فوقتاً ریاض بلایا جاتا تھا۔
ایک مرتبہ ان کو ریاض بلایا گیا، تو یہ سرکاری مہمان کے طور پر ہوٹل میں ٹھہرے اور کئی روز تک شاہ فیصل سے ملاقات کا انتظار کرتے رہے۔ ظاہر ہے کسی وقت بھی بادشاہ کی طرف سے ملاقات کا بلاوا آسکتا تھا، اس لیے کہیں آ جا بھی نہیں سکتے تھے۔ ہر وقت اپنے کمرے میں رہتے تھے کہ اچانک کوئی کال آئے گی، تو چلے جائیں گے۔ وہاں ہوٹل کے کمرے میں قرآن پاک کا ایک نسخہ انگریزی ترجمہ کے ساتھ رکھا ہوا تھا۔ انہوں نے وقت گزاری کے لیے اس کی ورق گردانی شروع کر دی۔ عیسائی تھے، اس لیے ظاہر ہے کہ کبھی قرآن پاک پڑھنے کا اتفاق نہیں ہوا تھا۔ اس انگریزی ترجمہ کی ورق گردانی کے دوران میں خیال ہوا کہ قرآن پاک میں بعض ایسے بیانات پائے جاتے ہیں جو سائنسی نوعیت کے ہیں۔ مثلاً بارش کیسے برستی ہے؟ انسان کی ولادت کن مراحل سے گزر کر ہوتی ہے؟ اس طرح اور بھی کئی چیزوں کی تفصیلات کا تذکرہ تھا۔
چوں کہ وہ خود میڈیکل سائنس کے ماہر تھے اور سائنس ہی ان کا مضمون تھا، اس لیے انہوں نے ان بیانات کو زیادہ دلچسپی کے ساتھ پڑھنا شروع کیا۔ ایک بار پڑھنے کے بعد انہوں نے قرآن پاک کو دوبارہ پڑھا، تو ان مقامات پر نشانات لگاتے گئے، جہاں سائنس سے متعلق کوئی بیان تھا۔ چند دن وہاں رہے، تو پورے قرآن کا ترجمہ کئی بار پڑھا اور اس طرح کے بیانات نوٹ کرتے گئے۔ اس سے ان کے دل میں خیال پیدا ہوا کہ اگر اسی طرح کے بیانات بائبل میں بھی ہوں اور ان کے ساتھ قرآن کے بیانات کا تقابل کیا جائے، تو دلچسپ چیز سامنے آسکتی ہے۔
انہوں نے واپس جانے کے بعد اس مشغلہ کو جاری رکھا اور بائبل میں جو اس طرح کے بیانات تھے، ان کی نشان دہی کی اور پھر ان دونوں بیانا ت کا تقابلی مطالعہ کیا۔ اس میں انہوں نے خالص سائنسی معیار سے کام لیا۔ ظاہر ہے کہ وہ مسلمان نہیں تھے اور قرآن کے ساتھ کوئی عقیدت مندی نہیں تھی۔ انہوں نے خالص Objectively اور خالص سائنسی تحقیق کے پیمانے سے قرآن پاک اور بائبل کے بیانات کو دیکھا اور اس نتیجے پر پہنچے کہ قرآن پاک میں سائنسی نوعیت کے جتنے بیانات ہیں وہ سب کے سب درست ہیں اور بائبل میں سائنسی نوعیت کے جتنے بیانات ہیں، وہ سب کے سب غلط ہیں۔
انہوں نے ان نتائج پر مشتمل ایک کتاب شائع کی: "The Bible Quran and Science” جس کا اردو اور انگریزی سمیت بہت سی زبانوں میں ترجمہ ملتا ہے۔”
ٹھیک اسی نوعیت کا مطالعہ انہوں نے صحیح بخاری کا بھی اور نتیجہ مطالعہ مقالے کی شکل میں ڈاکٹر حمید اللہ صدیقی پیرس کی خدمت میں پیش کیا۔ اس دلچسپ روداد کو ڈاکٹر غازی صاحب ہی کی زبانی ملاحظہ کیجیے؛ ” اس کتاب کے بعد اسلامیات میں ان کی دلچسپی مزید بڑھ گئی اور انہوں نے تھوڑی سی عربی بھی سیکھ لی۔ ڈاکٹر حمیداللہ سے ان کی مراسم اور روابط بڑھ گئے۔ دونوں پیرس میں رہتے تھے۔ بعد میں ان کو خیال ہوا کہ اسی طرح کا مطالعہ صحیح بخاری کا بھی کرنا چاہیے۔ انہوں نے صحیح بخاری کا مطالعہ بھی شروع کردیا۔ صحیح بخاری میں سائنسی نوعیت کے جتنے بیانات تھے ان کی الگ سے فہرست بنائی۔ انہوں نے اس طرح کے غالباً سو بیانات منتخب کیے۔ ان سو بیانات کا ایک ایک کرکے جائزہ لینا شروع کیا اور یہ دیکھا کہ کس بیان کے نتائج سائنسی تحقیق میں کیا نکلتے ہیں؟ یہ سب بیانات جمع کرنے کے اور ان پر غور کرنے کے بعد انہوں نے ایک مقالہ لکھا جو ڈاکٹر حمیداللہ صاحبؒ کو دکھایا۔ یہ واقعہ ڈاکٹر حمیداللہ صاحب نے مجھے خود سنایا۔
ڈاکٹر حمیداللہ صاحب کا کہنا تھا کہ جب میں نے اس مقالہ کو پڑھا، تو اس میں لکھا ہوا تھا کہ صحیح بخاری کے جو سوبیانات میں نے منتخب کیے ہیں، ان میں سے اٹھانوے بیانات تو سائنسی تحقیق میں صحیح ثابت ہوتے ہیں۔ البتہ دوبیانات غلط ہیں۔ ڈاکٹر مورس بکائی نے جن دوبیانات کو غلط قرار دیا تھا، ان میں سے ایک تو صحیح بخاری میں درج حضور اکرمؐ کا یہ ارشاد ہے جس میں آپؐ نے فرمایا کہ جب کھانے میں کوئی مکھی گر جائے، تو اس کو اندر پورا ڈبو کر پھر نکالو۔ اس لیے کہ مکھی کے ایک پر میں بیماری اور دوسرے میں شفا ہوتی ہے۔ تم دونوں پروں کو اس میں ڈبو دو، تاکہ شفا والا حصہ بھی کھانے میں ڈوب جائے۔ جب وہ گرتی ہے، تو بیماری والا حصہ کھانے میں پہلے ڈالتی ہے۔ ڈاکٹر بکائی کا خیال تھا کہ یہ غلط ہے۔ مکھی کے کسی پر میں شفا نہیں ہوتی، مکھی تو گندی چیز ہے۔ اگر کھانے میں مکھی گر جائے، تو کھانے کو ضائع کردینا چاہیے۔ انہوں نے کہا کہ یہ بات سائنسی طور پر غلط ہے ۔
دوسری بات جو انہوں نے غلط قرار دی، وہ بھی صحیح بخاری ہی کی روایت ہے۔ عرب میں ایک قبیلہ تھا عرنیین کا، بنو عرینہ کہلاتے تھے۔ یہ لوگ مشہور ڈاکو تھے اور پورے عرب میں ڈاکے ڈالا کرتے تھے۔ اس کے قبیلہ کے کچھ لوگ مدینہ آئے اور اسلام قبول کیا یا اسلام قبول کرنے کا دعویٰ کیا اور رسولؐ اللہ سے کچھ مراعات اور مدد مانگی۔ رسولؐ اللہ نے ا ن کو مدینہ میں ٹھہرنے کے لیے ٹھکانا دیا اور کچھ صحابہ کو ان کی مہمان داری کے لیے مقرر کیا۔ مدینہ کی آب وہوا ان کو موافق نہیں آئی اور وہ بیمار ہوگئے۔ بیماری کی تفصیل یہ بتائی کہ ان کے رنگ زرد ہوگئے، پیٹ پھول گئے اور ایک خاص انداز کا بخار جس کو آج کل "Yellow fever” کہتے ہیں، ان کو ہوگیا۔ جب رسولؐ اللہ نے یہ بیماری دیکھی، تو آپؐ نے ان سے فرمایا کہ تم مدینہ کے باہر فلاں جگہ چلے جاؤ۔ مدینہ منورہ سے کچھ فاصلے پر ایک جگہ تھی جہاں بیت المال کے سرکاری اونٹ رکھے جاتے تھے۔ وہاں جاکر رہو۔ اونٹ کا دودھ بھی پیو اور پیشاب بھی پیو۔ بات عجیب سی ہے، لیکن بخاری میں یہی درج ہے۔ چناں چہ انہوں نے یہ علاج کیا اور چند روز وہاں رہنے کے بعد ان کو شفا ہوگئی۔ جب طبیعت ٹھیک ہوگئی، تو انہوں نے اونٹوں کے باڑے میں رسولؐ اللہ کی طرف سے مامور چوکیدار کو شہید کردیا اور بیت المال کے اونٹ لے کر فرار ہوگئے۔ رسولؐ اللہ کو پتا چلا کہ یہ لوگ نہ صرف اونٹ لے کر فرار ہوگئے ہیں بلکہ وہاں پر متعین صحابیؓ کو بھی اتنی بے دردی سے شہید کیا ہے کہ ان کے ہاتھ پاؤں کاٹ دیے ہیں۔ گرم سلاخ ٹھونس کر آنکھیں پھوڑ دیں اور صحابیؓ کو گرم ریگستان کی گرم دھوپ میں زندہ تڑپتا ہوا چھوڑ کر چلے گئے ہیں اور وہ بے چارے وہیں تڑپ تڑپ کر شہید ہوگئے ہیں، تو حضورؐ کو یہ سب سن کر بہت دکھ ہوا اور صحابہ کرامؓ کو بھی اس پر بہت غصہ آیا۔ حضورؐ نے صحابہ کو ان کا پیچھا کرنے کے لیے بھیجا اور وہ لوگ گرفتار کرکے قصاص میں قتل کردیے گئے۔
اس پر مورس بکائی نے ڈاکٹر حمیداللہ سے کہا کہ یہ بھی درست نہیں ہے۔ سائنسی اعتبار سے یہ غلط ہے۔ کیوں کہ پیشاب تو جسم کا Refuse (مسترد کردہ شے) ہے۔ انسانی جسم خوراک کا جو حصہ قبول نہیں کرسکتا اسے جسم سے خارج کر دیتا ہے۔ ہر مشروب کا وہ حصہ جو انسانی جسم کے لیے ناقابلِ قبول ہے، تو جسم سے خارج ہوجاتا ہے اور اسی طرح جانور کا پیشاب بھی انسانی جسم کے لیے قابل قبول نہیں ہوتا۔ لہٰذا اس سے علاج کا تو سوال ہی پیدا نہیں ہوتا۔
ڈاکٹر حمیداللہ نے اس کے جواب میں ڈاکٹر مورس بکائی سے کہا کہ میں تو سائنس دان ہوں، نہ میڈیکل ڈاکٹر۔ اس لیے میں آپ کی ان دلائل کے بارے میں سائنسی اعتبار سے تو کچھ نہیں کہہ سکتا، لیکن ایک عام آدمی کے طور پر میرے کچھ شبہات ہیں جن کا آپ جواب دیں، تو پھر اس تحقیق کو اپنے اعتراضات کے ساتھ ضرور شائع کر دیں۔ ڈاکٹر صاحب نے کہا کہ میں نے میٹرک میں سائنس کی ایک دوکتابیں پڑھی تھیں۔ اس وقت مجھے کسی نے بتایا تھا کہ سائنس دان جب تجربات کرتے ہیں، تو اگر ایک تجربہ دومرتبہ صحیح ثابت ہوجائے، تو سائنس دان اس کو پچاس فیصد درجہ دیتا ہے اور جب تین چار مرتبہ صحیح ثابت ہوجائے، تو اس کا درجہ اور بھی بڑھ جاتا ہے۔ اس طرح چار پانچ مرتبہ کے تجربات میں بھی اگر کوئی چیز صحیح ثابت ہوجائے، تو آپ کہتے ہیں کہ فلاں بات سو فیصد صحیح ثابت ہوگئی۔ حالاں کہ آپ نے سو مرتبہ تجربہ نہیں کیا ہوتا۔ ایک تجربہ تین چار مرتبہ کرنے کے بعد آپ اس کو درست مان لیتے ہیں۔ ڈاکٹر مورس بکائی نے کہا کہ ہاں واقعی ایسا ہی ہے۔ اگر چار پانچ مرتبہ تجربات کا ایک ہی نتیجہ نکل آئے، تو ہم کہتے ہیں کہ سو فیصد یہی نتیجہ ہے۔ اس پر ڈاکٹر حمیداللہ نے کہا کہ جب آپ نے صحیح بخاری کے سو بیانات میں سے اٹھانوے تجربہ کرکے درست قرار دے دیے ہیں، تو پھر ان دو نتائج کو بغیر تجربات کے درست کیوں نہیں مان لیتے؟ جب کہ پانچ تجربات کرکے آپ سو فیصد مان لیتے ہیں۔ یہ بات تو خود آپ کے معیار کے مطابق غلط ہے۔ ڈاکٹر مورس بکائی نے اس کو تسلیم کیا کہ واقعی ان کا یہ نتیجہ اور یہ اعتراض غلط ہے۔ دوسری بات ڈاکٹر حمید اللہ نے یہ کہی کہ میرے علم کے مطابق آپ میڈیکل سائنس کے ماہر ہیں، انسانوں کا علاج کرتے ہیں۔ آپ جانوروں کے ماہر تو نہیں ہیں تو آپ کو پتا نہیں کہ دنیا میں کتنے قسم کے جانور پائے جاتے ہیں؟ کیا آپ کو پتا ہے کہ دنیا میں کتنی اقسام کی مکھیاں ہوتی ہیں؟ کیا آپ نے کوئی سروے کیا ہے؟ دنیا میں کس موسم میں کس قسم کی مکھیاں پائی جاتی ہیں؟ جب تک آپ عرب میں ہر موسم میں پائی جانے والی مکھیوں کا تجربہ کر کے اور ان کے ایک ایک جزو کا معائنہ کر کے لیبارٹری میں چالیس پچاس سال لگا کر نہ بتائیں کہ ان میں کسی مکھی کے پر میں کسی بھی قسم کی شفا نہیں ہے،اس وقت تک آپ یہ مفروضہ کیسے قائم کر سکتے ہیں کہ مکھی کے پر میں بیماری یا شفا نہیں ہوتی۔ڈاکٹر مورس بکائیے نے اس سے بھی اتفاق کیا کہ واقعی مجھ سے غلطی ہوئی۔پھر ڈاکٹر صاحب نے کہا کہ اگر آپ تحقیق کر کے ثابت کریں کہ مکھی کے پر میں شفا نہیں ہوتی تو یہ کیسے پتا چلے گا کہ چودہ سو سال پہلے ایسی مکھیاں نہیں ہوتی تھیں،ہو سکتا ہے ہوتی ہوں،ممکن ہے ان کی نسل ختم ہو گئی ہو۔جانوروں کی نسلیں تو آتی ہیں اور ختم ہو جاتی ہیں۔روز کا تجربہ ہے کہ جانوروں کی ایک نسل آئی اور بعد میں وہ ختم ہو گئی۔ تاریخ میں ذکر ملتا ہے اور خود سائنس دان بتاتے ہیں کہ فلاں جانور اس شکل اور فلاں اُس شکل کا ہوتا تھا۔ ڈاکٹر مورس نے اس کو بھی درست تسلیم کیا۔
پھر ڈاکٹر حمید اللہ صاحب نے کہا کہ جہاں تک اس بات کا تعلق ہے کہ حضور نے اونٹ کا پیشاب پینے کا حکم دیا، حالانکہ شریعت نے پیشاب کو ناپاک کہا ہے، بالکل صحیح ہے۔ یہ حیوانی بدن کا مسترد کردہ مواد ہے۔ یہ بھی درست ہے۔ لیکن ڈاکٹر صاحب نے کہا کہ میں بہ طور ایک عام آدمی (Layman) کے یہ سمجھتا ہوں کہ بعض بیماریوں کا علاج تیزاب سے بھی ہوتا ہے۔ دواؤں میں کیا ایسڈ شامل نہیں ہوتے؟جانوروں کے پیشاب میں کیا ایسڈ شامل نہیں ہوتا؟ ہو سکتا ہے کہ بعض علاج جو آج خالص اور آپ کے بقول پاک ایسڈ سے ہوتا ہے تو اگر عرب میں اس کا رواج ہو کہ نیچرل طریقے سے لیا ہوا کوئی ایسا لیکویڈ جس میں تیزاب کی ایک خاص مقدار پائی جاتی ہو ،وہ بطور علاج کے استعمال ہوتا ہو تو اس میں کون سی بات بعید از مکان اور غیر سائنسی ہے۔پھر ڈاکٹر صاحب نے کہا کہ آج سے کچھ سال پہلے میں نے ایک کتاب پڑھی تھی۔ ایک انگریز سیاح تھا جو جزیرہ عرب کی سیاحت کر کے گیا تھا۔ اس کا نام ’’ڈاؤنی‘‘ تھا۔ 1924- 25- 26 میں اس نے پورے عرب کا دورہ کیا تھا اور دو کتابیں لکھی تھیں، جو بہت زبردست کتابیں اور جزیرہ عرب کے جغرافیہ پر بڑی بہترین کتابیں سمجھی جاتی ہیں۔ ایک کا نام Arabia deserta اور دوسرے کا نام Arabia Petra ہے۔یعنی جزیرہ عرب کا صحرائی حصہ اور جزیرہ عرب کا پہاڑی حصہ۔ انہوں نے کہا کہ اس شخص نے اتنی کثرت سے یہاں سفر کیا ہے۔ یہ اپنی ایک یادداشت میں لکھتا ہے کہ جزیرہ عرب کے سفر کے دوران ایک موقع پر میں بیمار پڑ گیا،پیٹ پھول گیا، رنگ زرد پڑ گیا اور مجھے زرد بخار کی طرح ایک بیماری ہو گئی، جس کا میں نے دنیا میں جگہ جگہ علاج کروایا، لیکن کچھ افاقہ نہیں ہوا۔آخرکار جرمنی میں کسی بڑے ڈاکٹر نے مشورہ دیا کہ جہاں تمہیں یہ بیماری لگی ہے وہاں جاؤ، ممکن ہے کہ وہاں کوئی مقامی طریقہ علاج ہو یا کوئی عوامی انداز کا کوئی دیسی علاج ہو۔ کہتے ہیں کہ جب میں واپس آیا تو جس بدو کو میں نے خادم کے طور پر رکھا ہوا تھا اس نے دیکھا تو پوچھا کہ یہ بیماری آپ کو کب سے ہے؟ میں نے بتایا کہ کئی مہینے ہو گئے ہیں اور میں بہت پریشان ہوں، اس نے کہا کہ ابھی میرے ساتھ چلیے ، وہ مجھے اپنے ساتھ لے کر گیا اور ایک ریگستان میں اونٹوں کے باڑے میں لے جا کر کہا،آپ کچھ دن یہاں رہیں اور اونٹ کے دودھ اور پیشاب کے سوا کچھ اور استعمال نہ کریں،چناں چہ ایک ہفتے تک یہ علاج کرنے کے بعد میں بالکل ٹھیک ہو گیا۔ مجھے حیرت ہے۔
ڈاکٹر حمید اللہ نے ڈاکٹر مورس سے کہا یہ دیکھیے کہ 1925- 26ء میں ایک مغربی مصنف کا لکھا ہوا ہے۔ اس لیے ہو سکتا ہے کہ یہ سابق طریقۂ علاج ہو۔ مورس نے اپنے دونوں اعتراضات واپس لے لیے اور اس مقالے کو انہوں نے اپنے دونوں اعتراضات کے بغیر ہی شائع کر دیا۔”
ڈاکٹر محمود احمد غازی رحمہ اللّٰہ اس واقعے پر اپنے خاص اسلوب میں تبصرہ، تجزیہ اور ماحصل بیان کرتے ہوئے ذکر کرتے ہیں؛ "یہ واقعہ میں نے اتنی تفصیل سے اس لیے بیان کیا کہ علم حدیث میں ایک نیا پہلو ایسا ہے جو اس کے سائنسی مطالعہ سے عبارت ہے۔ حدیث کی کتابیں سائنس کی کتابیں نہیں ہیں۔ حدیثِ رسول کی کتابوں کو سائنس یا طب کی کتاب قرار دینا ان کا درجہ گھٹانے کے برابر ہے۔ حدیث پاک کا درجہ ان تجرباتی انسانی علوم سے بہت اونچا ہے۔ حدیث میں جو بیانات ہیں یہ سارے کے سارے زبان رسالت سے نکلے ہوئے ہیں۔ اس لیے ان کو سائنس یا طب کی کتاب قرار دینا تو بے ادبی ہے۔ البتہ ان کتابوں میں جو بیانات سائنسی اہمیت رکھتے ہیں ان کی روشنی میں میں سائنس کا مطالعہ مفید ہوگا۔ سائنسدان اگر اس پر تحقیق کریں گے تو سائنس کے نئے گوشے ان کے سامنے آئیں گے ل۔ یا کم از کم کم ان کے ایمان اور عقیدہ میں پختگی آسکتی ہے کہ رسول اللہ صلی اللہ علیہ وسلم نے آج سے چودہ سو سال پہلے جو بات فرمائی تھی وہ آج بھی سائنس کے میزان پر پوری اترتی ہے۔ اگر سائنس کے طلبہ اس نقطہ نظر سے علم حدیث کا مطالعہ کریں گے تو بہت سی نئی چیزیں ان کے سامنے آئیں گی۔” ( محاضرات حدیث، 449 – 454)
ڈاکٹر غازی صاحب کے یہ عطر بیز جواہر پارے جہاں مطالعہ حدیث کے سلسلے میں اصول کا درجہ رکھتے ہیں وہیں مطالعہ قرآن مجید میں بھی یہ اصول اور رہنما کا درجہ رکھتے ہیں۔ ہر طالب علم کو مطالعہ قرآن مجید اور حدیث شریف میں اس اصول کو حرزِ جاں بنا کر رکھنا چاہیے۔

(مضمون میں پیش کردہ مضمون نگار کے ذاتی خیالات کی بنیاد پر قندیل کاان سے اتفاق ضروری نہیں)