دہلی:آل انڈیا یونانی طبّی کانگریس کی ایک میٹنگ ’’کورونا وائرس کے انفیکشن سے تحفظ‘‘ کے عنوان پر زیرصدارت پروفیسر ڈاکٹر سیّد فضل اللہ قادری منعقد ہوئی۔ میٹنگ میں اس بات پر اتفاق کیا گیا کہ کورونا وائرس اور دوسرے وائرل وبائی امراض سے گھبرانے کی ضرورت نہیں ہے بلکہ یونانی طریقہ علاج میں درج حفظ ماتقدم کو اختیار کرکے محفوظ رہا جاسکتا ہے۔
آل انڈیا یونانی طبّی کانگریس کے قومی سکریٹری ڈاکٹر صباحت اللہ امروہوی نے اظہار خیال کرتے ہوئے کہا کہ بنیادی طور پر ہمارے جسم کی قوت مدافعت مضبوط ہونی چاہیے اس کے لیے خمیرہ مروارید، خمیرہ گائوزبان عنبری جواہر والا اور دوسری مفرد دوائیں مثلاً زعفران اور ڈرائی فروٹ کے مغزیات خاص طور سے اخروٹ، بادام، چلغوزہ اور پستہ وغیرہ کا استعمال حسب استطاعت کیا جائے۔ اس کے علاوہ بہت سی دیگر ادویات اپنے معالج کے مشورہ سے استعمال کی جائیں۔ میٹنگ میں ڈاکٹر سیّد احمد خاں نے کہا کہ سنت نبوی کے مطابق اگر ہم اپنی لائف اسٹائل اختیار کریں تو ہر قسم کے وبائی امراض سے بچا جاسکتا ہے۔ انہوں نے کہا کہ موسمی پھل اور سبزیاں استعمال کی جائیں نیز سادہ اور تازہ غذا کا استعمال بھی ضروری ہے۔ انہوں نے حفظ ماتقدم پر زور دیتے ہوئے کہا کہ کھانے سے پہلے ہاتھ اچھی طرح دھویا جائے اور علاحدہ رومال کا استعمال کیا جائے۔ اس موقع پر ڈاکٹر عبداللہ خاں رئوف، ڈاکٹر ایس کے ایل حمیدالدین، ڈاکٹر ڈی آر سنگھ، حکیم عطاء الرحمن اجملی، حکیم محمد مرتضیٰ دہلوی اور حکیم عزیر بقائی وغیرہ نے بھی اظہار خیال کیا۔