نئی دہلی:کانگریس کے سابق صدر راہل گاندھی نے لوک سبھا میں وزیر اعظم نریندر مودی کے بیان کے بعد جمعرات کو الزام لگایا کہ مودی نے ملک کو درپیش سب سے بڑے مسئلے بے روزگاری کے بارے میں کوئی بات نہیں کی اور صرف توجہ بھٹکانے کی کوشش کی۔گاندھی نے لوک سبھا میں صدارتی خطاب پر شکریہ کی تجویز پر ہوئی بحث پر وزیر اعظم کے جواب کی جانب اشارہ کرتے ہوئے پارلیمنٹ کے احاطے میں نامہ نگاروں سے گفتگوکے دوران یہ بات کہی۔انہوں نے کہاکہ آج ملک کے سامنے سب سے بڑا مسئلہ روزگار کا ہے، معیشت کا ہے،ہر نوجوان چاہتا ہے کہ پڑھائی کے بعد ملک اس کو روزگار دے۔ انہوں نے کہاکہ ہم نے وزیراعظم سے کئی بار کہا کہ آپ ملک کے نوجوانوں کو روزگار کے بارے میں بتائیے،وزیر اعظم جواب نہیں دے پائے،وہ روزگار کے بارے میں ایک لفظ نہیں بول سکتے۔وزیر خزانہ نے بھی اپنی تقریر میں روزگار کے بارے میں کچھ نہیں بولا۔ کانگریس لیڈر نے دعوی کیاکہ وہ بھٹکانے کی کوشش کر رہے ہیں،کبھی جواہر لال نہرو کی بات کریں گے، کبھی پاکستان کی بات کریں گے اور کبھی بنگلہ دیش کی بات کریں گے،بس روزگار کی بات نہیں کریں گے۔ انہوں نے کہا کہ وزیر اعظم نے ہر سال دو کروڑ لوگوں کو روزگار دینے کا وعدہ کیا تھا، لیکن نئے روزگار کی بات چھوڑیئے، گزشتہ سال ایک کروڑ نوجوانوں کی نوکری چلی گئی۔
Tag: