کیب

شمیم اکرم رحمانی

سیاسی جماعتوں کے مسلم لیڈران کاہمیشہ سے یہ المیہ رہاہے کہ یہ لوگ انتخابات میں کامیابی حاصل کرنے کے بعد یا کسی سیاسی عہدہ پر براجمان ہوجانے کے بعد مسلمان نہیں رہتے ؛بلکہ پارٹی کے وفادار غلام بن زندگی گزارتے ہیں ،ان کے لیے خدا ،رسول، قرآن اور ایمان بہت بعد کی چیزیں ہوتی ہیں یا وہ بھی نہیں ہوتیں، ان کا چلنا ،بیٹھنا، اٹھنا، بولنا اور خاموش رہنا پارٹی کے طے شدہ ایجنڈے کے تحت ہوتاہے اور وہ بھی ایمان کی قیمت پر، قوم ملک اور ملت کےلئے ہرگزنہیں ،دو تین لوگوں کے استثنا کے ساتھ یہی اب تک کی تاریخ رہی ہے۔

تازہ معاملہ نتیش کمار کے ایک مسلم ایم ایل سی صاحب کہاہے ،جناب مولانا یاسر ندیم الواجدی کے شو میں تشریف لائے والےتھے ،جہاں لائیو انہیں این آرسی کے تعلق سے گفتگو کرنی تھی؛ لیکن جب پروگرام کا وقت ہوا، تو اچانک معذرت خواہ ہوئے، وجہ یہ بتائی کہ اس معاملے میں پارٹی کااسٹینڈ کلیر نہیں ہے؛ بلکہ اس سے آگےبڑھ کر ڈھٹائی سے یہ بھی کہا کہ این آرسی مسلمانوں کے خلاف نہیں ہے، مولانا واجدی نے اس ریکارڈنگ کو ایک وڈیو کی شکل میں اپنے فیسبک پر اپلوڈ کردیا ہے، جسے ہر کوئی دیکھ اور سن سکتاہے۔

موصوف جس انداز سے ایم ایل سی منتخب ہوئے تھے، اس کی وجہ سے ان سے ایسی قبیح حرکت کی امید نہ تھی، ان کی پہلے کی دوچار گفتگو سے اندازہ بھی ہورہاتھا کہ جناب عالی مسلمانانِ ہند کے روشن مستقبل کے لئے جدجہد کررہےہیں اورکریں گے بھی؛ لیکن کیا کیاجائے کہ اس دنیا میں زیادہ ترچیزوں کا وجود خلافِ توقع ہی ہوتارہاہے، بالخصوص مسلمان ہند کےساتھ:

نہیں منّت کشِ تابِ شنیدن داستاں میری

خموشی گفتگو ہے بے زبانی ہے زباں میری

اقبال

نام لئے بغیر ہم جس ایم ایل سی صاحب کی بات کررہےہیں ،وہ تنہا نہیں ہیں ؛بلکہ جے ڈی یو میں موجود دوسرے مسلم لیڈرز بھی وہی کچھ کہیں گے، جو ہمارے ایم ایل سی صاحب نے کہا ہے، پرشانت کشور نام کا کوئی شخص تو بہتر رخ اپناسکتاہے ؛لیکن پارٹی میں موجود خالداور غلام رسول نام کے لوگ نہیں؛ کیونکہ پارٹی نے اگر انہیں باہرکاراستہ دکھادیا،تو وہ کہیں کے نہیں رہیں گے:

خدا تجھے کسی طوفاں سے آشناکردے

کہ تیرے بحر کی موجوں میں اضطراب نہیں

اقبال

مولانا محمود مدنی کے این آرسی پر دیے گئے بے تکے بیانات کے ساتھ ساتھ مذکورہ واقعے نے بھی ہمیں جھنجھوڑ کررکھ دیاہے۔ این آر سی جیسے خطرناک معاملے پر ایم ایل سی صاحب کی خاموشی؛ بلکہ دبے لفظوں میں حمایت نے ایک بار پھر ہمیں سبق دیاہے کہ ہمیں کسی بھی سوکالڈ سیکولرجماعت اور اس کے چمچے پراعتماد کرنے سے نہ صرف بازرہناہوگا؛بلکہ کسی طرح کی چھوٹی موٹی قیادت کھڑی کرنی ہوگی یا پہلے سے کھڑی قیادت کے گرد جمع ہوناہوگا اور اس ڈر کو ختم کرناپڑے گا کہ ہمارے متحدہونے سے ہندوبھائی بھی متحدہوجائیں گے ؛اس لئے کہ وہ تو متحدہوچکے ہیں ،دستور ہند کے باقی رہتے ہوئے اگر ہم نے متحدہ سیاسی محاذ کی تشکیل نہ کی اور مسلکی یا ذاتی مفادات کو بالائے طاق نہ رکھا، تو آنے والےایام مزید سخت ہوںگے اور یکے بعد دیگرے ہرطرح کےمسلک و مشرب سے منسک مسلمانوں کو اس کا خمیازہ بھگتنا پڑے گا، پھریہ کہ ہمارےاتحاد کی بنیاد کسی مذہب کی دشمنی نہیں ہونی چاہیے؛ بلکہ سیاسی ناانصافیوں کے خلاف جدجہد ہونی چاہیے، جس کی اجازت آئین ہند نے ہمیں دےرکھی ہے ،مجھے پتہ ہے کہ یہ اتحاد عوام سے نہیں، خواص کے چاہنےاور ہرطرح کی قربانیاں دینےکےلیے تیار رہنےسےہوگا ،عوام کی حیثیت ہمیشہ اس جانور کی سی رہی ہے ،جس کورسی پکڑکرچرواہاجدھر چاہتاہے ،لےجاتاہے!

صفدرا مام قادری

صدر شعبۂ اردو، کا لج آف کا مرس ،آرٹس اینڈ سائنس ،پٹنہ

جب سے ملک نریندر مودی اور امت شاہ کی مٹھی میں قید ہوا ہے، لوگوں پر چوطرفہ مار پڑ رہی ہے۔ نوجوانوںکے لیے روزگار نہیں، پیشے وران آہیں بھر رہے ہیں، کسان خود کُشی پر مجبور ہیں، گھریلو صنعتیں اور چھوٹی معیشت زوال کی آخری منزلوں میں ہیں، سامان کی قیمتیں آسمان چھو رہی ہیں، دن کے اُجالے میں جان اور آبرو پہ سب کی بن آئی ہے۔ عورتیں اور لڑکیاں غلیظ ذہنیت کا شکار ہورہی ہیں۔مجرم کھلی شاہ راہ پہ چل رہے ہیں، سماجی خدمت گار جیل میں ہیں اور حکومت کے لیے راوی چین لکھتا ہے۔ کسی وزیر کو شرم نہیں آتی ہے اور بڑے عہدے دار وں کو ان چھوٹے چھوٹے مسئلوں کے مقابلے عالمی سطح پر سیر و تفریح میں زیادہ لطف آتا ہے۔

جمعہ کے اخبارات میں یوپی اور حیدرآباد سے دو طرح کی خبریں آئیں۔ اترپردیش میں اجتماعی آبروریزی کا شکار ہوئی ایک خاتون کو آگ سے زندہ جلانے کی کوشش ہوتی ہے۔ اسے جلانے والے وہ لوگ تھے جو اس کے مقدمے میں ملزم تھے اور انھیں اسی روز ضمانت ملی تھی۔ حیدر آباد میں خاتون ڈاکٹر کے ساتھ جو ظالمانہ واقعہ پیش آیا، اس کے ملزمین کو پولیس کسٹڈی سے بھاگتے ہوئے مار گرایا گیا۔ کہیں سے پولیس کی تعریف بھی ہوئی کہ اس نے ان ملزمین کو ان کے کام کے حساب سے سزا دے دی۔ مگر اترپردیش میں جو ہوا، اسے کیا کہا جائے گا؟ جسے زندگی کی سزا ملی ہوئی تھی، اسے انھی ملزمین نے جان لے لینے کی کوشش کی۔ نوے فی صدی جل چکی وہ خاتون شاید ہی بچ سکے۔ حیدرآباد میں اگر پولیس نے ان کے جرم کے مطابق قرارِ واقعی سزا دی تب یہ سوال قائم ہوتا ہے کہ اترپردیش پولیس نے ضمانت یافتہ ملزمین پر نگاہ کیوں نہیں رکھی؟ اور متاثرہ خاتون کے تحفظ کے لیے پہلے سے انتظامات کیوں نہیں کیے گئے؟ کمال تو یہ ہے کہ ایسے سوال جب سوشل میڈیا میں اٹھے تو یو پی کے ایک وزیر نے یہ بھی کہا کہ جب سماج میں اتنی شدت پسندی آجائے گی تو بھگوان رام بھی ہوتے تو سب کی حفاظت کی گارنٹی نہیں لے سکتے تھے۔ جب حکومت چلانے والے خود کو اس قدر معذور سمجھیں تو عام آدمی کو یہ سمجھ میں آجانا چاہیے کہ اب سِوِل وار یا خانہ جنگی میں زیادہ دیر نہیں اور قانون کا راج کاغذ پہ لکھا ہوا ایک بے مطلب کا حکومتی جملہ ہے۔

جمہوریت کو دنیا کے ہر گوشے میں جو پذیرائی حاصل ہوئی اور ملوکیت پر اس نے اپنا تفوق ثابت کیا، اس کا بنیادی سبب یہی تھا کہ یہ نظامِ حکومت لوگوں کے ذریعہ، لوگوں کے لیے اور لوگوں کا ہے۔ کہتے ہیں کہ ووٹ پانے کے بعد کسی کو یہ یاد ہی نہیں رہتا کہ اسے کیوں ووٹ دے کر حکومت سازی کا موقع دیا گیا۔ بار بار یہ ہوتا ہے کہ حکومت بن گئی مگر عوام خود کو ٹھگے ہوئے محسوس کرتے ہیں۔ جے پرکاش نارائن ہندستانی جمہوریت میں عوامی نمایندوں کی واپسی کے حقوق کو بھی شامل کرنا چاہتے تھے مگر اس کے لیے کم سے کم سیاست داں تو تیار نہیں ہوسکتے۔ حکومت جب پارلیمنٹ میں پالیسیاں بناتی ہے، اس وقت اس کا اثر آخری آدمی پر کس قدر پڑے گا، اس کو سوچنے والا اس زمانے میں شاید ہی کوئی ملے۔ بلکہ اس بات پر غور و فکر زیادہ ہے کہ اس سے ریلائنس کو کیا ملے گا اور اڈانی کی مجموعی سرمایہ کاری میں کتنے فی صد کا اضافہ ہوگا۔ عوامی فلاح سے دور ذاتی فلاح یا بڑی طاقتوں کو مزید طاقت دینے والی حکومتوں کے دور میں اگر عام طور پر بے اطمینانی نظر آتی ہے تو اس پر حیرت نہیں ہونی چاہیے۔

موجودہ حکومت کے وزرا اور ممبرانِ پارلیمنٹ کے بیانات سے اگر منتخب سطریں جمع کرکے شایع کردی جائیں تو ہمیں یقین ہے کہ لطیفوں کی سب سے بڑی کتاب وہی بنے گی۔ اس حکومت کے وزرا کی منطقی قوت کا یہ عالم ہے کہ ان کے بیانات منطق کے طلبا کے کورس میں شامل کرنا چاہیے کہ کیسے غیر منطقی گفتگو کی جاسکتی ہے یا منطق اور غیرمنطق میںکیا فرق ہوتاہے؟ ایک بار منموہن سنگھ کی حکومت کے دوران جب ایل۔پی۔جی۔ سلنڈروں پر کتنا سبسیڈی دیا جائے، اس بابت فیصلہ کرنے میں اس زمانے کے وزیر رشید مسعود نے عوامی بیان دیا تھا کہ ان کے گھر ایک سلینڈر سے پانچ مہینے کھانا پکتا ہے۔ اسی طرح جب پیاز کی قیمتوں پر پارلیمنٹ میں بحث ہوئی تو جواہر لال نہرو یونیورسٹی سے پی ایچ۔ ڈی۔ کرکے وزیرِ خزانہ بنیں محترمہ نے بڑی سادگی سے یہ جواب دیا کہ ہم پیاز کھاتے ہی نہیں، اس لیے نہ ہمیں اس کی ضرورت ہے اور نہ اس کی قیمتوں سے کوئی سروکار۔ یہ راگ وزیرِ صحت اشونی چوبے نے بھی الاپا اور بتایا کہ پیاز، لہسن اور گوشت وغیرہ سے ان کی زندگی کا تعلق ہی نہیں ہے، اس لیے پیاز کی قیمتوں سے انھیں کیا غرض؟ انفارمیشن ٹکنالوجی کے وزیر جو کبھی مشہور وکیل مانے جاتے تھے، انھوںنے ٹیلی فون اور انٹرنیٹ کی شرحیں بڑھانے کے فیصلے کی مجبوری کی وجہ کانگریس کی سابقہ حکومتوں کو قرار دیا۔ پچھلے الیکشن میں ساکشی مہاراج تو کہہ ہی دیا تھا کہ اگر ووٹ نہ دوگے تو ہم شاپ دیں گے اور قوم کو بربادی کا دن دیکھنا ہوگا۔ مینکا گاندھی نے مسلمانوں کے علاقے میں جاکر یہ کہا کہ ہمیں معلوم ہے کہ آپ لوگ ہمیں ووٹ نہیں دیتے اور جیتنے پر ہمارے پاس کام کے لیے آتے ہیں۔ اب کی بار ووٹ نہیں دیا اور میں جیت گئی تو اس کا خمیازہ آپ کو بھگتنا پڑے گا۔ اترپردیش کے موجودہ وزیر اعلا اپنے الیکشن کی ریلیوں میں نعرہ ہی لگواتے تھے کہ تم ایک ماروگے تو ہم بیس ماریںگے۔

یہ مثالیں کسی ایک سیاسی جماعت کو تختۂ مشق بنانے کے لیے نہیں پیش کی گئی ہیں۔ یہ اقتدار کی طاقت ہے کہ وہ اندھا، بہرا، گونگا اور لنگڑا بنا دیتی ہے۔ دنیا کے بڑے بڑے ڈکٹیٹروں کو اچانک بہت برے دن دیکھنے پڑے۔ خود اپنے ہاتھوں سے اپنی جان لے لینی پڑی۔ حکومت کا نشہ آدمی کو صرف بے مروت اور بے فیض نہیں بناتا بلکہ اس سے عقل و خرد کی ساری پونجی چھین لیتا ہے۔ گائوں سے لے کر دلی تک بھارتیہ جنتا پارٹی کے لیڈروں کی بولی سنیے تو یہ اصول اپنے آپ سمجھ میں آجائے گا کہ کس طرح منصب کی طاقت میں سب اندھے ہوئے ہیں مگر کہا گیا ہے کہ گیدڑ کی جب موت آتی ہے تو وہ شہر کی طرف رُخ کرتا ہے۔ کسی خاتون کی آبرو ریزی ہوئی تو چار ایسے لوگ بھی بولنے والے سامنے آگئے کہ آبرو ریزی کی وجہ ان کا مغربی طرزِ لباس ہے۔ سو برس پہلے کا یاد کیجیے کہ عورتوں کو مدرسے اور اسکول تک اس لیے نہیں بھیجا جاتا تھا کیوںکہ یہ مان رکھا گیا تھا کہ وہاں پہنچنے سے ان کے کردار پہ حرف آئے گا۔ ایک طویل مدت تک اسی لیے انھیں پڑھنے بھی نہیں دیا گیا۔ اس پر بھارتیہ جنتا پارٹی میں کوئی زیادہ ہنگامہ آرائی بھی نہیں ہوئی۔

ابھی گوڈسے کے حوالے سے گاندھی واد تختۂ مشق بنا ہوا ہے۔ گوڈسے کے ہم خیال پارلیمنٹ سے لے کر اس کے باہر قدم قدم پر نظر آتے ہیں۔ ابھی سماج وادی پارٹی کی راج سبھا رکن مشہور اداکارہ جیا بچن نے حیدرآباد واقعے پر تقریر کرتے ہوئے یہ بھی کہا کہ ایسے ملزمین کی لوگوں کو چوک چوراہے پر جان لے لینی چاہیے۔ اگلے ہی دن پولیس نے ان کی جان لے لی۔ یہ انکائونٹر سچ ہے یا جھوٹ، یہ تو پتا نہیں معلوم بھی ہو پائے گا یا نہیں؟ پولیس کئی بار حکومت یا عوامی جذبات کے مطابق اپنا کام سادھنے میں یدِ طولیٰ رکھتی ہے۔

آج ہندستان میں ہر کونے میںبد امنی اور بے چینی ہے۔ جے۔ این۔یو۔ میں طلبا لاٹھی کھا رہے ہیں اور دلی یونی ورسٹی میں اساتذہ کی پٹائی ہورہی ہے۔ بنارس ہندو یونی ورسٹی میں بہ زورِ بازو دبنگ طالب علم یونی ورسٹی میں فیصلے بدلوالیتے ہیں۔ مکیش امبانی جب جیسا چاہیے پارلیمنٹ اور کابینہ سے اپنے من مطابق فیصلے کرالیں۔ پارلیمنٹ میں شب خونی فیصلے ہوتے ہیں اور ضدی انداز میں وزیر داخلہ یا وزیر اعظم قانون بنانے کے درپے ہوتے ہیں ۔ یہ جمہوری ملک کا طور نہیں اور نہ ہی یہ ایسا ملک اور قانون ہے جس کے لیے ہمارے بزرگوں نے اپنے خون بہائے تھے۔ حکومت سلجھے ہوئے انداز سے اور ایک متوازن تصور کے ساتھ چلتی ہے اور حکومت چلانے والوں کو یہ معلوم ہوتا ہے کہ ان کے پہلے بھی منتخب افراد نے ہی حکومت چلائی اور ان کے بعد بھی عوام کے انتخاب کے نتیجے میں جو اکثریتی پارٹی ہوگی، اسے ہی سرکار بنانی ہے۔ ایسے میں خیالات کا ایک تسلسل اور کام کرنے کا ایک سلسلہ نہیں ہوگا تو ڈھچکے لگیںگے۔ کبھی کبھی زیادہ ڈھچکے لگتے ہیں تو رسی ٹوٹ جاتی ہے۔ ابھی ملک کے سامنے جو رکاوٹیں نظر آرہی ہیں، اگر بھارتیہ جنتا پارٹی نے اپنا راستہ نہیں بدلا تو یہ ملک خانہ جنگی کے راستے پر بڑھ جائے گا۔ جس کی لاٹھی اس کی بھینس۔ممکن ہے اس میں قتل و خون اور جنگ و جدال کا سلسلہ اور بڑھ جائے۔ مگر تب لوگ حکومت اکھاڑ پھینکیںگے۔ نریندر مودی اور امت شاہ کو اپنے آس پاس چند غیر منسلک افراد کو رکھنا چاہیے جو انھیں ملک کی سچی صورت حال کو بتا سکیں یا ان کی آنکھوں پر پڑے پردوں کو ہٹا سکیں ۔ ورنہ ووٹ دینے والی قوم پچھتا تے پچھتاتے ایک دن بغاوت کے راستے تک پہنچ جائے گی۔ ہمیں ان خطروں کے لیے تیار رہنا چاہیے۔