کورونا وائرس

نئی دہلی:ہندوستان میں کورونا وائرس کے 80472 نئے کیسز کے بعد بدھ کے روز ملک میں متاثرہ افراد کی کل تعداد بڑھ کر 62 لاکھ سے زیادہ ہوگئی۔ وہیں صحت مند ہونے والے افراد کی تعداد بھی 5187825 ہوگئی ہے، جس سے صحت یابی کی شرح 83.33 فیصد ہوگئی ہے۔وزارت صحت کے مطابق ملک میں کل کیسزبڑھ کر 6225763 ہو گئے جبکہ مزید1179 افراد کی ہلاکت کے بعد اموات کی تعداد 97497 ہوگئی۔ان اعدادوشمار کے مطابق اس وقت ملک میں 940441 مریض زیر علاج ہیں، جو کل کا کیسز کا 15.11 فیصد ہے۔ ملک میں کورونا وائرس سے اموات کی شرح 1.57 فیصد ہے۔ ہندوستان میں 7 اگست کو کورونا کیسز 20 لاکھ، 23 اگست کو 30 لاکھ، 5 ستمبر کو 40 لاکھ، 16 ستمبر کو 50 لاکھ اور 28 ستمبر کو 60 لاکھ کو عبور کرچکے تھے۔انڈین کونسل آف میڈیکل ریسرچ (آئی سی ایم آر) کے مطابق ملک میں 29 ستمبر تک مجموعی طور پر 74196729 نمونوں کا ٹیسٹ کیا گیا تھا، جن میں سے 1086688 نمونوں کا منگل کو ٹیسٹ کیا گیا تھا۔اعداد و شمار کے مطابق گزشتہ 24 گھنٹوں میں مرنے والے 1179 افراد میں سے 430 افراد مہاراشٹرا سے تھے۔ اس کے علاوہ کرناٹک سے 136، پنجاب کے 75، تمل ناڈو سے 70، اترپردیش کے 63، مغربی بنگال سے 62، دہلی سے 48، مدھیہ پردیش اور چھتیس گڑھ سے 39 اور آندھرا پردیش کے 35 افراد شامل تھے۔وزارت کے مطابق ملک میں اب تک مجموعی طور پر 97497 افراد وائرس کی وجہ سے ہلاک ہوچکے ہیں۔ مہاراشٹرا میں سب سے زیادہ 36181 اموات ہیں۔ اس کے بعد تمل ناڈو میں 9453 افراد، کرناٹک میں 8777، آندھرا پردیش میں 5780، اتر پردیش میں 5715، دہلی میں 5320، گجرات میں 3439، پنجاب میں 3359، اور مدھیہ پردیش میں 2281 افراد ہلاک ہوچکے ہیں۔وزارت صحت نے بتایا کہ انفیکشن سے مرنے والے 70 فیصد سے زیادہ مریض دیگر بیماریوں میں بھی مبتلا ہیں۔

نئی دہلی:ملک میں کورونا کا قہر مسلسل بڑھ رہا ہے۔ گزشتہ کچھ دنوں سے روزانہ 85000 سے زیادہ کورونا کیسز رپورٹ ہورہے ہیں۔ اس دوران ہندوستان میں کورونا ٹیسٹنگ میں بھی اضافہ ہوا ہے۔ ملک میں گذشتہ 9 دنوں میں 1 کروڑ ٹیسٹ کیے گئے ہیں۔ ہندوستان امریکہ کے بعد دنیا کا دوسرا سب سے زیادہ ٹیسٹ کرنے والا ملک ہے۔ تاہم ہندوستان کی آبادی کو دیکھتے ہوئے فی دس لاکھ ٹیسٹ کے حساب سے ٹیسٹوں کی تعداد بہت کم ہے۔ہفتہ کو وزارت صحت کے جاری کردہ اعداد و شمار کے مطابق ملک میں گذشتہ 24 گھنٹوں کے دوران 85362 نئے کیسز درج ہوئے ہیں۔ اب تک مجموعی طور پر 5903932 کیسزرپورٹ ہوئے ہیں۔ وہیں گذشتہ 24 گھنٹوں میں 1089 مریض کورونا سے ہلاک ہوئے جبکہ اب کل تک 93379 افراد ہلاک ہوچکے ہیں۔ جن پانچ ریاستوں میں گذشتہ 24 گھنٹوں میںسب سے زیادہ نئے کیسزدرج ہوئے ہیں ان میں مہاراشٹر پہلے نمبر پر ہے۔ مہاراشٹرا میں کورونا کے 17794 نئے کیسز رپورٹ ہوئے ہیں۔ اس کے بعد آندھرا پردیش میں 7073، کرناٹک8655 ،تمل ناڈو میں 5,679، اوراتر پردیش میں 4,256 کیسز درج کیے گئے ہیں۔ اسی طرح گذشتہ 24 گھنٹوں کے دوران مہاراشٹرا میں سب سے زیادہ 416 مریض ہلاک ہوئے ہیں۔ اس کے علاوہ کرناٹک میں 86، اترپردیش میں 84، تمل ناڈو میں 72 اور پنجاب میں 68 اموات ہوچکی ہیں۔

نئی دہلی:ہندوستان سمیت دنیا بھر میں 180 سے زیادہ ممالک میں کورونا وائرس قہر جاری ہے ۔ اب تک 3.25 کروڑ سے زیادہ لوگ اس کا شکار ہوچکے ہیں۔ اس وائرس نے 9.88 لاکھ سے زیادہ افراد کو اپنی زد میں لیا ہے۔ یہاں تک کہ ہندوستان میں کورونا کیسز روزانہ بڑھ رہے ہیں۔ وزارت صحت کے ذریعہ ہفتہ کی صبح جاری کردہ اعداد و شمار کے مطابق ملک میں کورونا کیسز کی تعداد5903932 ہوگئی ہے۔ گذشتہ 24 گھنٹوں میں (جمعہ کی صبح آٹھ بجے سے ہفتہ صبح آٹھ بجے تک)، کورونا کے 85362 نئے کیسزرپورٹ ہوئے ہیں۔گزشتہ کچھ دنوں سے کورونا سے صحت یاب ہونے والے افراد کی تعداد میں مسلسل اضافہ ہورہا ہے۔ چوبیس گھنٹوں میں 93420 مریض ٹھیک ہوئے ہیں۔ اس دوران ملک میں 1089 لوگوں کی موت ہوئی ہے ۔ اب تک مجموعی طور پر 4849584 مریض ٹھیک ہو چکے ہیں۔ 93379 افراد ہلاک ہوچکے ہیں۔ 960969 ایکٹیوکیسز ہیں۔ صحت یابی کی شرح کے بارے میں بات کریں اس میں معمولی اضافے کے بعد یہ 82.14 فیصد تک پہنچ گئی ہے۔ مثبت شرح 6.36 فیصد ہے۔ 25 ستمبر کو 1341535 کورونا کے نمونے ٹیسٹ کئے گئے۔ اب تک مجموعی طور پر 70269975 نمونے ٹیسٹ ہو چکے ہیں۔واضح رہے کہ ہندوستان امریکہ کے بعد دوسرا سب سے زیادہ ٹیسٹ کرنے والا ملک بن گیا ہے، حالانکہ ہندوستان کی آبادی کے پیش نظر فی 10 لاکھ ٹیسٹ کے حساب سے ٹیسٹوںکی تعداد اب بھی بہت کم ہے۔ ہندوستان کی تقریبا تمام ریاستوں سے کورونا مریض سامنے آ رہے ہیں۔ بہت سی ریاستیں ایسی بھی ہیں جو اس وبا سے پاک ہوچکی تھیں، لیکن کورونا کی دوسری لہر کے بعد ان ریاستوں میں ایک بار پھر کیسز میں اضافہ ہواہے۔ کورونا سے سب سے زیادہ متاثرریاست مہاراشٹرہے۔

نئی دہلی:سعودی عرب نے کورونا وائرس کے انفیکشن کے بڑھتے ہوئے معاملات کے تناظر میں منگل کو ہندوستان آنے اور جانے والی پروازیں معطل کردی ہیں۔ یہ معلومات ایک سرکاری دستاویز میں دی گئی ہیں۔ منگل کو جاری کردہ ایک حکم میں سعودی عرب سول ایوی ایشن اتھارٹی (جی اے سی اے) نے کہا ہے کہ وہ سعودی عرب میں رہنے والے افراد سمیت مندرجہ ذیل ممالک (ہندوستان، برازیل اور ارجنٹائن) سے آمدورفت کو معطل کر رہا ہے۔ غیر ملکی ہندوستانیوں کی ایک بڑی تعداد سعودی عرب اور متحدہ عرب امارات میں مقیم ہے۔ پانچ دن پہلے، ایئر انڈیا ایکسپریس نے کہا تھا کہ دبئی سول ایوی ایشن اتھارٹی (ڈی سی اے اے) نے 28 اگست اور 4 ستمبر کو اپنی پرواز پر 24 گھنٹے کی روک لگائی ہے کیونکہ دو مسافروں کی آمد کی وجہ سے جو کورونا وائرس انفیکشن سے متعلق تصدیق نامہ رکھتے ۔ ایئر انڈیا ایکسپریس نے ایک دن کے قیام کے بعد ہفتہ سے دبئی کے لئے پرواز شروع کی۔ متحدہ عرب امارات (یواے ای) کی حکومت کے قواعد کے مطابق ہندوستان سے سفر کرنے والے ہر مسافر کو سفر سے 96 گھنٹے پہلے ہی آر ٹی پی سی آر ٹیسٹ کرانا ہوگا اور اس کے پاس ٹیسٹ میں کسی بھی قسم کے انفیکشن کی تصدیق ہونے والا سرٹیفکیٹ ہونا ضروری ہے۔

ناظم ادارہ کہف الایمان ٹرسٹ، حیدرآباد(تلنگانہ)
اُن دوستوں کی ،بزرگوں کی رائے بالکل صحیح اور حق بجانب ہے کہ online تعلیم ہر گز صحبت کا بدل نہیں ہے اور براہ راست، بالمشافہ، فیس ٹو فیس پڑھنے میں جو نورانیت ،برکت اور جو صفات کا منتقل ہونا اور جو تاثیر ہے،وہ online میں ہر گز نہیں ہو سکتی ہے۔ ہمارے اکابر اور سنت و شریعت کا عام طریقہ بھی یہ نہیں رہا اور اس کے کچھ نہ کچھ side effects ہونے کا بھی اندیشہ ہے کہ بچہ فون لے نہیں پا تا تھا لے لے گا ۔ بہت دیر تک بیٹھنے کی وجہ سے اور کان میں head phones لگانے کی وجہ سے صحت کا نقصان ہوگا وغیرہ وغیرہ۔
ان ساری باتوں کا اعتراف کرتے ہوئے،سر آنکھوں پر رکھتے ہوئے،اکابر جواب اجازت دے رہے ہیں اور اس کا رواج ضروری ہو چکا ہے اس کی وجوہات یہ ہیں:
1)ہم تدریس کتنی دیر کرییں گے، ڈھائی گھنٹہ کریں گے یا آٹھ گھنٹے ؟باقی کے اوقات کتنے گھروں میں تعلیم تربیت کے لیے گذر سکتے ہیں؟
2) عام طور پر یہ بات عرض کی جا رہی ہے۔ ہماری طرف سے online تو سبھی ہیں تبلیغی بھی ہیں اور غیر تبلیغی بھی ، مامور بھی ہے امیر بھی، شاگرد بھی ہے استاذ بھی ہے،بالعموم بیوی بھی ہے شوہر بھی ہے، بچے بھی ہیں ماں باپ بھی ہیں، online سبھی ہیں۔اس online ہونے کو تدریس کے لیے استعمال کرنا ہے، online ہوکر متکلم اور مخاطب کا رابطہ کردینا ہے، online ہونے کا ایک صحیح مصرف اور صحیح میدان ان کو بناکر دینا ہے۔
3) تیسرا پہلو جو غور کرنے کا ہے، وہ یہ ہے کہ مستقل حل کے طور پر ہم online نظام کو پیش نہیں کر رہے ہیں،یہ اصلی حل نہیں ہے،اضطراری حل ہے،emergency کا solution ہے،temporary ہے دائمی نہیں ہے، اخف الضررین اور اھون البلیتین اور نہ ہونے سے ہونا بہتر ہے،اس لئے اس کو موجودہ وقت میں رواج دیا جا رہا ہے،کتنے گاؤں، کتنے علاقے،کتنی بستیاں،کتنے گھرانے ایسے ہیں کہ جو خود تعلیم وتعلم کا سلسلہ شروع کرسکتے ہیں اورشروع کریں گے تو کون سی کتاب کتنی دیر پڑھیں گے،یہ سوچا جائے،عملی طور پر تقریباً چھ مہینے ہر آدمی نے تو تجربہ کرلیا، رمضان میں تو کسی قدر نماز، روزہ کا معمول رہا لیکن رمضان کے بعد سب کا وقت کیسے تباہ ہو رہا ہے، سستی، کاہلی،مختلف قسم کے امراض فون کا غلط استعمال،بچوں کے جھگڑے، شرارتیں، بیوی شوہر کے درمیان اُلجھن،خود ہمارے دعوت کے ساتھیوں میں بھی انفرادی ملاقاتوں کے نہ ہونے،ایک دوسرے کے سکھ دکھ میں حصہ نہ لینے کی وجہ سے بزدلی کی کیفیت،پست ہمتی کی کیفیت،مایوسی یا بے حسی کی کیفیت،اس طرح کی کیفیات کے مقابلہ میں بہت ضروری ہے ان کے ہمت و حوصلے کو oxygen دینے کا اور اس کا ایک ذریعہ یہ online تدریس بھی ہو سکتی ہے۔ آپ جانتے ہیں کہ آقا -صلی اللہ علیہ وسلم- نے خطوط کے ذریعے بھی تعلیم دی ہےاور کسی درجہ میں خطوط کا ایک بدل اس کو بھی سمجھا جا سکتا ہے ، اُن دوستوں کو سوچنا چا ہیے جو اس کا انکار کر رہے ہیں اور ان کی طبیعتیں ابھی تک منشرح نہیں ہوئی ہیں۔ اگر ہم online تعلیم شروع نہیں کریں گے تو باطل افکارکی online اشاعت شروع ہوچکی ہے اور اب ہماری نسلیں اُن سے زیادہ جڑتی جارہی ہیں ،گمراہ فکر کے حاملین کے قریب ہوتی جارہی ہیں۔
ہم نے حج میں خود یہ منظر دیکھا کہ ہمارے خیمے کی عورتیں ہمارے حلقے کو چھوڑ کر وہاں جاکر تفسیر سن رہی ہیں ،میرے محلے میں خود اس قسم کا حلقہ چلتا ہے جس میں لوگ جمع ہوکر online ان گمراہ افراد کے بیانات وغیرہ سنتے ہیں،غامدی صاحب کا فتنہ،گوہر شاہی کا فتنہ،الحاد کے فتنے،خدا بیزاری کے فتنے،کتنے ہزاروں challenges ہیں۔ اگر ہم نے اب شروع نہیں کیا تو یہ فراغت اور فرصت ہماری نسلوں کو ہمارے ہاتھ سے کھودینے کا ذریعہ نہیں بنے گی؟
میں زیادہ گفتگو کرکے اس تحریر کو دراز کرنا نہیں چاہتا لیکن اتنے پہلو ایک سمجھ دار آدمی کے لیے کافی ہیں ۔
اب تک ایسی emegency کی صورت حال ،عالمی وبا کی صورت حال پچھلے ساٹھ ستر سال میں پیش نہیں آئی اس لئے یہ طریقہ سوچا نہیں گیا،اب یہ وبا پیش آئی ہے،اب ہمارے اکابر اسے نظر تحسین سے دیکھ رہے ہیں۔ مفتی تقی عثمانی صاحب دامت برکاتہم نے خود فرمایاکہ: اب میں خود بھی online پڑھنے پڑھانے کا طریقہ سوچ رہا ہوں اور اسی طریقے سے ہمارے شہر کے بزرگان اور دوسرے لوگ کئی اس موضوع پر آ چکے ہیں۔
ایک اور پہلو سوچنے کا ہے جب ہر گھر اسکول بن چُکا ہے تو ہر گھر مدرسہ کیوں نہیں بن سکتا ہے؟ یا ہر گھر فحاشی کا اڈہ ،عریانیت کا اڈہ، فضولیات کا اڈہ اور گیمز کی مصروفیت کا ٹھکانہ بن سکتا ہے، تو مدرسہ اور دینی تعلیم کا ٹھکانہ آن لائن طریقے سے کیوں نہیں بن سکتا؟
یہ لوگ خود ہی اپنے دلوں پر ہاتھ رکھ کر سوچیں کہ گھر میں جس ماحول کے بنانے کی بات کہی جا رہی ہے، وہ بات بھی کیسے کہی جائے گی؟ اور اس بات کو لے کر چلنے والا عوام میں کتنابڑا طبقہ ہے؟ جب حالات کھلے تھے تب کتنے تھے؟ اب کتنے لوگ رہیں گے؟زمینی صورت حال سے نا واقفیت،میدانی صورت حال سے نا واقفیت کے نتیجے میں اس قسم کے شبہات ہیں۔ حضرت مولانا پیر ذو الفقار صاحب دامت برکاتہم کی ویب سائٹ” E-MAHAD "دیکھیے ۔ امریکہ اور مختلف دنیا کے چپے چپے کی عورتوں نے کیسے کیسے اُن کے courses سے استفادہ کیا ہے۔ online عالم کورس کرنے والے دسیوں، سیکڑوں شاگرد ہیں، جو دنیا بھر سے حضرت سے اور کئی onlineاداروں سے جڑے ہوئے کام کر رہے ہیں۔آپ ہمت وحوصلے کے ساتھ آگے بڑھیے۔

وہ مشاعروں میں قہقہہ لگاتے ہوئے حکومت کو چیلنج کرتا تھاـ اس کا قہقہہ مشہور تھا،سیاہ چہرے پر طنز کی بجلیاں کوندتیں اور اس کی مسکراہٹ سے ہزاروں تیر برستے اور کروڑوں لہو لہان ہو جاتے،میں کیوں لکھتا اس پر ؟ لکھتا تو سنجیدہ مہذب دانشوروں کے درمیان نشانہ بن جاتا،بازارواور مشاعرہ باز،یہ کوئی شاعری ہے ؟ مگر ایوان سیاست میں اس کے نام سے زلزلہ آ جاتا تھا،جب وہ کہتا تھا:
تمہارے باپ کا ہندوستان تھوڑی ہے
اور اتنا کہہ کر وہ تیز قہقہہ لگاتا جیسے حکمرانوں کو تنبیہ کر رہا ہو کہ سنبھل جاؤ،ہم بھی کسی آندھی ، کسی طوفان سے کم نہیں، ہم سے مت ٹکراؤ ـ
سنجیدہ فلسفوں کا کاروبار کرنے والو، جدیدیت اور پختہ ادب کی پہچان رکھنے والو ، ایک کہانی سنو، ایک ملاح تھا،اس کی کشتی میں ایک دانشور سوار ہوا، دانشور نے پوچھا ، کیا تاریخ سے تمہاری واقفیت ہے ؟ ادب سے ہے ؟ سائنس سے ہے ؟ جغرافیہ سے ہے؟ ملاح ہر بار انکار میں گردن ہلا دیتا اور دانشور ہر سوال کے بعد کہتا ، نہیں جانتے ، تمہاری زندگی بیکار ہے، اس درمیان کشتی میں پانی بھرنے لگا،ملاح نے دانشور سے سوال کیا”آپ تیرنا جانتے ہیں؟ ” دانشور نے انکار کیاـ نہیں جانتا،دریا میں کودنے سے قبل ملاح نے کہا ، پھر آپ کی زندگی بیکار ہے،
طوفان آ چکا،آندھیوں نے ہزاروں گھر پھونک دیے، بند کمروں میں ادب کی نمائش کرنے والے کیا جانیں کہ راحت اندوری کیا تھا ؟ منور رانا کی ضرورت کیوں ہے ؟ فسطائی طاقتیں پوری شدّت اور منصوبوں کے ساتھ مذہب ،مشترکہ وراثت اور تہذیب پر حملہ کر رہی ہیں، دانشوری کو طاق پر رکھیے،کیا آپ حکومت کے ایسے منصوبوں کو خاک میں ملا سکتے ہیں ؟ منور رانا اور راحت اندوری جیسوں کی آواز پوری دنیا کو ہلا دینے کی طاقت رکھتی ہے،سنجیدہ ادب لکھنے والوں اور سنجیدہ قاری کا قصور یہ ہے کہ وہ ابن صفی کو تو ضروری تسلیم کرتا ہے مگر راحت اندوری تک پہچنے میں روح فنا ہو جاتی ہے، آزادی یوں ہی مل گئی ؟ کیا اس وقت یہ پروپیگنڈا ضروری نہیں تھا کہ غلامی کی مخالفت کی جائے، آزادی کی چیخ کو آواز دی جائے اور اس وقت آزادی کے نغمے کس نے نہیں لکھے، سب نے لکھے، ہم آج اس مہذب دور میں زیادہ غلامی کے شکار ہیں، موب لنچنگ ، فسادات ، دو قانون، مسلمانوں کا الگ ، غیر مسلموں کا الگ،کوئی ادیب ہے جو مسلمانوں کے لئے جنگ کر رہا ہو،جنگ راحت کرتا تھا، ڈرتا نہیں تھا،بیباک تھا،کپل شرما شو میں بھی دو بار دعوت ملی، دونوں دفعہ چھا گیا اور پیغام بھی دے گیا کہ تمہارے باپ کا ہندوستان تھوڑی ہے ـ
مزہ چکھا کے ہی مانا ہوں میں بھی دنیا کو
سمجھ رہی تھی کہ ایسے ہی چھوڑ دوں گا اسے
ایک ہی ندی کے ہیں یہ دو کنارے دوستو
دوستانہ زندگی سے موت سے یاری رکھو
یہ سانحہ تو کسی دن گزرنے والا تھا
میں بچ بھی جاتا تو اک روز مرنے والا تھا
گھر سے یہ سوچ کہ نکلا ہوں کہ مر جانا ہے
اب کوئی راہ دکھا دے کہ کدھر جانا ہے
بہت غرور ہے دریا کو اپنے ہونے پر
جو میری پیاس سے الجھے تو دھجیاں اڑ جائیں
آنکھ میں پانی رکھو ہونٹوں پہ چنگاری رکھو
زندہ رہنا ہے تو ترکیبیں بہت ساری رکھو
ہم سے پہلے بھی مسافر کئی گزرے ہوں گے
کم سے کم راہ کے پتھر تو ہٹاتے جاتے
ہے میرے چاروں طرف بھیڑ گونگے بہروں کی
کسے خطیب بناؤں کسے خطاب کروں

وہ گونگا نہیں تھا ، بولنا جانتا تھا، وہ اپنی قیمت پہچانتا تھا، وہ جنگجو تھا، جب ضرورت ہوتی ، وہ بیدار کرنے آ جاتا، اب کورونا نے حقیقت سامنے رکھ دی اور یہ سوال خدا سے بھی ہے،خدا ، میرے خدا ، راحت کا جرم سنگین اور سیاسی ایوانوں میں بیٹھے خداؤں کو معافی ؟ یہ کیسا انصاف میرے خدا؟ کورونا اپنے ساتھ کیسے کیسے لوگوں کو لے گیا ، ان لوگوں کو جن کے دم سے زندگی اور کائنات کا حسن باقی تھا اور جو نفرتیں پھیلا رہے ہیں ، جو آگ لگا رہے ہیں ، جو ملک کو زخمی کر رہے ہیں ، تیری خوبصورت دنیا میں داغ لگا رہے ہیں ، انھیں زندہ رہنے کے لئے چھوڑ رکھا ہے یہ تفریق کیوں خدا ؟ یہ کیسا انصاف ؟
میں پھر ان سوالوں پر آتا ہوں ـ آزادی کے بعد کے فرقہ وارانہ فسادات، ادب کا خیمہ خاموش رہا، 1984ہوا پھر1992، کوئی ہلچل اس خیمے میں نظر نہیں آئی، کچھ ہلکی پھلکی علامتی کہانیاں لکھ دی گئیں۔1992 کے بعد کا منظر نامہ دیکھ لیجئے ـ خاموشی کی روایت قائم ہے، سیاسی عدم بیداری کی فضا قلم کے محافظ پیدا نہیں کرتی ـ جدیدیت کے علمبردار وں کو کوئی غرض نہیں کہ ملک کہاں جا رہا ہےـ بیمار مریضوں ،سوکھی انتڑیوں کے باسی مردہ قصّوں میں اگر زندگی کی حرارت نہیں تو یہ قصّے فقط الفاظ کی بھول بھلیاں کے سوا کچھ بھی نہیں ہیں،ترقی پسند زندہ مکالمے کرتے تھے،بیانات دیتے تھے ۔حق کے لئے جنگ کرتے تھے ۔ 1992کے بعد کا عام رویہ ہے کہ ادب کو عام اذہان اور مسائل میں کوئی دلچسپی نہیں۔نیند میں سویے ادیبوں پر آپ فخر کر سکتے ہیں تو کیجئے،لیکن وہ ادیب ہی کیا جسے بدلتے سیاسی منظر نامے کی چیخ سنائی نہ دے ـ
راحت یہ چیخ سنتا تھااور جب وہ لکھتا تھا تو اس کی چیخ ساری دنیا کی چیخ بن جاتی تھی:
ہم اپنی جان کے دشمن کو اپنی جان کہتے ہیں
محبت کی اسی مٹی کو ہندوستان کہتے ہیں
’میرے اندر سے ایک ایک کرکے سب ہوگیا رخصت
مگر اندر جو باقی ہے اسے ایمان کہتے ہیں‘
میں من کی بات بہت من لگا کے سنتا ہوں
یہ تو نہیں ہے تیرا اشتہار بولتا ہے
کچھ اور کام اسے جیسے آتا ہی نہیں
مگر وہ جھوٹ بہت شاندار بولتا ہے
میں اس کے چہرے کو دیکھتا، حضرت بلال حبشی کی یاد تازہ ہو جاتی ـ وہ چہرے سے سیاہ مگر اندر سے تندور اور ایسے تندور کی ابھی ضرورت تھی،جب اسلام کی عظمت کا آفتاب بلند ہوا ، مکہ کی وادیوں سے اذاں کی جو پہلی آواز گونجی وہ حضرت بلال کی تھی، مودی کی اس انداز میں خبر کون لے گا کہ وہ جھوٹ بہت شاندار بولتا ہے،کون کہے گا ، تمھارے باپ کا ہندوستان،یہ راحت ہی کہہ سکتے تھے اور راحت ہی چلے گئےـ اپنے نغموں سے اقلیتوں کے زخم پر مرہم رکھنے والا ، راحت پہنچانے والا چلا گیاـ