ڈاکٹر محمد رضی الاسلام ندوی

امسال رمضان المبارک میں ایک عشرہ کویت میں گزارنے کا موقع ملا _ وہاں کورونا اور لاک ڈاؤن کی وجہ سے دو برس سے عمومی اجتماعات بند تھے ، اب ان کا آغاز ہوا ہے تو تحریک اسلامی کے ذمے داروں کی خواہش ہوئی کہ میں ان کے درمیان کچھ وقت گزاروں ، تاکہ احباب کو کچھ تحریک ملے اور ان کی تربیت ہو _ روزانہ کبھی دو ، کبھی تین پروگرام ہوتے تھے _ وہاں کی بہت سی مساجد میں نماز ادا کرنے کا موقع ملا _ کچھ مساجد قدیم تھیں ، تقریباً 70 برس پرانی ، کچھ نئی ، خوب صورت طرزِ تعمیر کا نمونہ _ ان میں المسجد الکبیر شاید سب سے بڑی ، عالی شان اور خوب صورت ہے _ یہ تمام مساجد وزارۃ الاوقاف کے ماتحت ہیں اور ان کا نظم بہت عمدہ ہے _ ان مسجدوں کو دیکھ کر بہت خوشی ہوئی _ ان کی جن چیزوں نے متاثر کیا وہ درج ذیل ہیں :

* ہر نماز اول وقت میں ہوتی ہے _ وقت شروع ہوتے ہی اذان ہوتی ہے ، اس کے 10 یا 15 منٹ کے بعد جماعت کھڑی ہوتی ہے _ نظام الاوقات کے اسکرین بورڈ میں یہ بھی دکھایا گیا ہے کہ جماعت کھڑی ہونے میں کتنے منٹ باقی ہیں اور اگلی جماعت کتنے گھنٹے کے بعد ہوگی؟

* ہر مسجد میں قرآن مجید کے نسخے بڑی تعداد میں نظر آئے _ طاقوں میں سجے ہوئے نہیں ، بلکہ پوری مسجد میں پھیلے ہوئے _ چھوٹے سائز کے ، اوسط سائز کے اور بڑے سائز کے بھی _ رحلیں چھوٹی بھی اور اونچی بھی ، جن پر مصحف رکھ کر ، کرسی پر بیٹھ کر تلاوت کی جاسکے _ مختلف زبانوں میں تراجم قرآن بھی نظر آئے _

* تلاوتِ قرآن کرنے والوں کا انداز بھی جدا جدا نظر آیا _ کوئی قعدہ کی پوزیشن میں بیٹھ کر تلاوت کررہا ہے ، کوئی کھمبے ، دیوار یا فرشی کرسی سے ٹیک لگاکر ، کوئی کرسی پر بیٹھ کر _ امام کے برابر میں میز کرسی کا نظم ہے ، جس پر بیٹھ وہ کسی نماز کے بعد درس دیتا ہے _

* ایک مسجد میں جمعہ کی نماز پڑھی تو وہاں خطبہ اردو زبان میں سن کر تعجب ہوا _ دریافت کرنے پر پتہ چلا کہ جن علاقوں میں اردو بولنے والوں کی تعداد زیادہ ہے وہاں اردو میں خطبۂ جمعہ کا نظم کیا گیا ہے _

* کویت میں وزارتِ اوقاف کی جانب سے ‘جالیات’ کا نظام منظور شدہ ہے ، یعنی دیگر ممالک کی دینی تنظیموں کو اپنی سرگرمیاں انجام دینے کی اجازت ہے _ بعض مساجد ان کے انتظام میں دے دی گئی ہیں ، جن میں وہ اپنے پروگرام کرسکتے ہیں _ وزارتِ اوقاف اور ان جالیات کے درمیان اچھا ربطِ باہمی ہے _ وزارتِ اوقاف کے ایک پروگرام میں شرکت کرنے کا موقع ملا تو وہاں مختلف جالیات کے ذمے داروں سے ملاقات ہوئی _

* تمام مسجدیں ایر کنڈیشنڈ ہیں _ جگہ جگہ ٹشو پیپر کے ڈبے اور پانی کی بوتلیں وافر مقدار میں فراہم ہیں _ افطار کے لیے کھجوریں بھی ہیں _ باہر پارکنگ کا اچھا نظم ہے _ حمام اور وضو خانے بڑی تعداد میں اور صاف ستھرے ہیں _ مسجد کی عمارت سے متصل دوسری عمارت امام ، مؤذن اور مسجد کے عملہ کے لیے ہوتی ہے _

* وہاں تراویح کی 8 رکعتیں پڑھنے کا معمول ہے _ (گنتی کی چند مساجد میں 20 رکعت پڑھی جاتی ہے) امام بہت خوش الحانی ، تجوید اور ترتیل سے ساتھ ہر رکعت میں قرآن مجید کی چند آیات پڑھتا ہے _ (اس سے معلوم ہوتا ہے کہ وہاں ختمِ قرآن کا رواج نہیں)تراویح کے بعد وتر کی تین رکعتیں دو سلام سے پڑھی جاتی ہیں _ تیسری رکعت میں دعائے قنوت کے ساتھ دیر تک اور بھی دعائیں مانگی جاتی ہیں _

* ایک خاص بات یہ دیکھی کہ ہر مسجد میں خواتین کے لیے علیٰحدہ نظم ہے _ وہ تراویح اور بعض دیگر نمازوں کے لیے مسجد آتی ہیں _ ان کا باب الداخلہ الگ ہے اور ان کے مرکزی دروازے پر ‘مصلّی النساء’ لکھا ہوا ہے _ کسی طرح کا اختلاط اور بے پردگی نہیں ہوتی _ یہ دیکھ کر خیال آیا کہ کاش برِّ صغیر کے مسلمانوں نے بھی اسی طرح ہر مسجد میں خواتین کے لیے نظم کیا ہوتا _ جب اللہ کے رسول ﷺ نے خواتین کو مسجدوں میں آنے کی اجازت دی ہے اور مردوں کو صراحت سے منع کیا ہے کہ وہ انہیں مسجدوں میں آنے سے نہ روکیں تو فتنہ اور اندیشہ کے نام پر ان کے مسجد میں آنے کو مکروہ تحریمی کہنے کا انہیں کیا حق پہنچتا ہے؟ مسجدوں میں خواتین کے لیے علیٰحدہ انتظام نہ کرنا انہیں مسجدوں سے روکنا ہی تو ہے _

مجھے یہ بات بالکل سمجھ میں نہیں آتی کہ کوئی شخص کیسے خدا کے وجود کا انکار کرسکتا ہے؟ جب کہ کائنات کے ذرّے ذرّے میں ایسی نشانیاں پائی جاتی ہیں جو اس کا پتہ دیتی ہیں ـ

بعض لوگ فخریہ کہتے ہیں کہ وہ ملحد (Atheist) ہیں ، خدا کو نہیں مانتے _ مجھے لگتا ہے کہ وہ یہ بات بغیر سمجھے بوجھے کہہ دیتے ہیں ـ وہ ذرا بھی غور نہیں کرتے کہ کتنی نامعقول بات اپنی زبان سے نکال رہے ہیں ـ

انسان اپنے ارد گرد پر ایک نظر ڈالےـ وہ جس مکان میں رہتا ہے ، کیا وہ خود بخود بن گیا؟ وہ جس بیڈ پر لیٹتا ہے ، کیا وہ خود بخود وجود میں آگیا؟ وہ جس صوفے پر بیٹھتا ہے ، کیا وہ خود بخود تیار ہوگیا؟ وہ جو کتاب پڑھتا ہے ، جس قلم سے لکھتا ہے ، جس کاغذ پر لکھتا ہے ، کیا وہ خود بخود ظہور میں آگیا؟ وہ جو کھانا کھاتا ہے ، کیا وہ خود بخود تیار ہوگیا؟ اگر ایسا نہیں ہے ، یہ تمام چیزیں اُس وقت وجود میں آئی ہیں جب کسی نے انہیں وجود بخشا ہے تو اتنی بڑی کائنات کیسے خود بخود وجود میں آسکتی ہے؟ عقل کہتی ہے کہ ضرور اس کے پیچھے کوئی ہستی ہے جس نے کائنات کی تمام چیزوں کو وجود بخشا ہے اور جیسے چاہا ہے وہ وجود میں آئی ہیں ـ وہ ہستی ہی خدا ہےـ

بعض لوگ کہتے ہیں : یہ تو فطرت (Nature) ہےـ کائنات کی تخلیق کے پس پردہ نیچر کارفرما ہےـ اس کے مظاہر نیچر کے اصولوں میں جکڑے ہوئے ہیں ـ یہ حضرات یہ نہیں سوچتے کہ نیچر سے خدا کے وجود کا انکار نہیں ، بلکہ اثبات ہوتا ہےـ سورج ہزاروں برس سے صبح نکلتا اور شام کو ڈوبتا ہےـ اس کی وجہ سے سلسلۂ روز و شب جاری ہےـ اس کے نکلنے اور ڈوبنے کے اوقات متعین ہیں ، ان میں منٹ ، بلکہ سیکنڈ کا بھی فرق نہیں آتا _ چاند سے مہینے اور سال کی تعیین ہوتی ہے _ اس کی رفتار میں بھی کبھی فرق نہیں آیاـ نباتات ، پیڑ پودوں اور کھیتی کے اگنے ، بڑھنے ، پھل اور غلّہ دینے کے جو ضابطے ہیں ان میں کبھی فرق نہیں آیاـ یہ چیزیں ایک ایسی ہستی کا پتہ دیتی ہیں جس نے کائنات کی ان چیزوں کو لگے بندھے اصولوں کا پابند کر رکھا ہے ، جن کی پابندی پر یہ مجبور ہیں ـ

خود انسان اپنی پیدائش میں غور کرےـ وہ کیسے پیدا ہوتا ہے؟ کیسے پلتا بڑھتا ہے؟ بچپن سے جوانی ، پھر بڑھاپے کے مراحل سے گزرتا ہے ، یہاں تک کہ موت کی آغوش میں جا پہنچتا ہےـ اس کے اعضائے جسم کیسے کام کرتے ہیں؟ وہ آنکھ سے دیکھتا ، کان سے سنتا ، ناک سے سونگھتا اور زبان سے آواز نکالتا ہےـ کیا کبھی ایسا ہوا ہے کہ کسی نے آنکھ سے سونگھنا ، کان سے بولنا ، ناک سے دیکھنا اور زبان سے سننا شروع کردیا ہو؟ انسان کے اندرونی اعضاء : معدہ ، جگر ، دماغ اور دل وغیرہ کو جو کام سونپے گئے ہیں وہ صدیوں سے انہیں انجام دے رہے ہیں ـ یہ کھلی نشانی ہے کہ کوئی ایسی ہستی ضرور ہے جس نے انسان کی تخلیق کی ہے اور اس کے اعضاء کو مخصوص کام سونپ دیے ، جن کی انجام دہی سے وہ سرتابی نہیں کرسکتے، وہ ہستی ہی خدا ہےـ

غرض خدا کے وجود کی کھلی نشانیاں کائنات کے ذرّے ذرّے میں پائی جاتی ہیں ـ آدمی ان نشانیوں پر غور کرے تو وہ ضرور اس تک پہنچے گاـ کوئی شخص لاکھ اپنے کو ملحد کہے ، لیکن اگر وہ ان نشانیوں پر غور کرے تو وہ ضرور خدا کے وجود کا قائل ہوجائے گاـ

میدان میں بہت سے نوجوان پتنگ اڑا رہے تھےـ پورا آسمان پتنگوں سے بھرا ہوا تھا : رنگ برنگی ، چھوٹی بڑی ، چاند تارا والی ، دُم دار اور بھی کئی طرح کی ـ ماہر پتنگ بازوں کی اونچی اُڑان تھی اور نو سکھیا تھوڑی بلندی پر اُڑا رہے تھےـ ہر ایک کی پتنگ ایک ڈور کے ذریعے اس کے ہاتھ میں تھی ـ اس طرح وہ اسے اِدھر اُدھر نچا رہا تھا اور اوپر نیچے کررہا تھاـ جتنے اُڑانے والے تھے ان سے زیادہ تماشا دیکھنے والےـ اتنے میں ایک پتنگ کٹ گئی ـ بس پھر کیا تھا؟ تمام تماشائی اس کے پیچھے لگ گئے ـ پتنگ نیچے آتی گئی ـ یہاں تک جب وہ بالکل قریب آگئی تو سب اس کی طرف لپکےـ نتیجہ یہ ہوا کہ اُس پتنگ کے چیتھڑے اُڑ گئےـ

بے نکاحی عورت کا حال بھی کٹی پتنگ جیسا ہوتا ہےـ جب تک وہ نکاح کی ڈور سے بندھی ہوتی ہے ، دوسروں کے تصرف سے محفوظ رہتی ہےـ شوہر اس کی حفاظت کرتا ہے _ لیکن نکاح کی ڈور ٹوٹتے ہی دوسرے اسے للچائی ہوئی نظروں سے دیکھنے لگتے ہیں اور اسے اپنے قبضے اور تصرّف میں لینے کے حربے سوچنے کرنے لگتے ہیں ـ

سنا ہے کہ پڑوسی ملک کی ایک دوشیزہ نے ، جو مختلف اسباب سے شہرت کے دوش پر اُڑ رہی ہے ، یہاں تک کہ اسے نوبل پرائز سے بھی نوازا گیا ہے ، نکاح کے سلسلے میں ایک بڑی نامعقول بات کہی ہےـ اس نے کہا ہے : ” ‏مجھے اب تک یہ بات سمجھ میں نہیں آئی کہ لوگ شادی کیوں کرتے ہیں؟ اگر آپ اپنی زندگی میں کسی کے ساتھ رہنا چاہتے ہیں تو نکاح نامے پر دستخط کرنے کی کیا ضرورت ہے؟ صرف پارٹنر بن کر کیوں نہیں رہ سکتے؟”

نسلِ انسانی کے تسلسل کے لیے مرد اور عورت کا جنسی تعلق ضروری ہےـ یہ تعلق اگر قانون کے دائرے میں اور معاہدہ کے ذریعے ہو تو اسے ‘نکاح’ کہا جاتا ہے اور اگر یوں ہی ہو تو اسے Live in relationship کا نام دیا گیا ہےـ دنیا کے بیش تر سماجوں نے نکاح کو ضروری قرار دیا ہے، جب کہ اِدھر کچھ عرصے سے عالمی سطح پر لیو اِن ریلیشن شپ کو فروغ دینے کی کوشش کی جارہی ہےـ مذکورہ دوشیزہ کا یہ بیان اُسی عالمی ایجنڈا کا حصہ ہےـ

مرد و عورت کا جنسی تعلق قائم کرنا یا تو وقتی طور پر لذّت حاصل کرنے کے لیے ہوگا یا اولاد کے حصول کے لیے ـ پہلی صورت میں یہ سماج اور تمدّن سے بغاوت ہےـ یہ نہیں کہا جاسکتا کہ ہر مرد اور ہر عورت آزاد ہے _ وہ جس طرح چاہیں اپنی جنسی خواہش پوری کریں ـ جو مرد اور عورت محض لذّت کوشی کے لیے جنسی تعلق قائم کرتے ہیں وہ انسانی فطرت سے بغاوت کرتے ہیں ، سماج کو دھوکہ دیتے ہیں اور تمدّن کی پیٹھ میں چُھرا گھونپتے ہیں ـ اگر اس کی کھلی چھوٹ ہوتی تو روئے زمین پر انسانی آبادی کب کی ختم ہوچکی ہوتی ـ

اگر جنسی تعلق اولاد کے حصول کے لیے ہو تو وہ عورت بہت بڑی بے وقوف ہے جو مرد کو اپنی ذات سے لذّت حاصل کرنے دے ، پھر اس کے بعد کے تمام مراحل تنہا برداشت کرے ، مرد کا اس سے کوئی تعلق نہ ہو ـ دورانِ حمل اسے کوئی پریشانی ہو تو اسے تنہا جھیلے ، معاش کے ذرائع خود تلاش کرے ، وضع حمل کی تکلیف میں اسے کوئی سہارا دینے والا نہ ہو اور پیدائش کے بعد بچے کی پرورش خود کرے ، مرد کی اسے کچھ مدد حاصل نہ ہوـ

اسلام خاندان کی تشکیل کے لیے نکاح کو لازم قرار دیتا ہےـ اس کے نزدیک زوجین کا جنسی تعلق ناپائیدار تعلق نہیں ہوتاـ وہ اسے بہت زیادہ استحکام بخشتا ہےـ مردوں (یعنی شوہروں) کو عورتوں( یعنی بیویوں) کا ‘قوّام’ بنایا گیا ہےـ (النساء :34) قوّام کے معنیٰ ہیں : محافظ ، نگراں ، ضروریاتِ زندگی فراہم کرنے والاـ مسلمان شوہر اپنی بیوی سے ایک لمحہ کے لیے بھی غافل نہیں رہتا ، بلکہ نکاح کے بعد آئندہ زندگی کے ہر لمحے میں اسے تحفّظ فراہم کرتا ہے اور اس کی چھوٹی بڑی تمام ضرورتیں پوری کرتا ہےـ اس کی سرپرستی میں عورت فکرِ معاش سے بے پروا ہوتی ہے ، شوہر پر اس کی کفالت لازم ہوتی ہےـ شوہر عورت کا ‘باڈی گارڈ’ ہوتا ہے ، جو اسے سیکورٹی فراہم کرتا ہےـ آج کل سیکورٹی کے نام پر بہت پیسے خرچ کیے جاتے ہیں ـ گارڈ بھاری فیس لے کر صرف اپنے فرض نبھاتا ہے ، جس کو سیکورٹی دیتا ہے اس سے محبت نہیں کرنے لگتا ہےـ اسلام عورت کو شوہر کی شکل میں مفت سیکورٹی فراہم کرتا ہےـ اسے ایسا باڈی گارڈ فراہم کرتا ہے جو صرف اس کی سیکورٹی کے فرائض نہیں ادا کرتا ، بلکہ اس سے محبت بھی کرتا ہے اور اس پر اپنی جان نچھاور کرنے کے لیے ہمہ وقت تیار رہتا ہےـ

کتنی بے وقوف ہیں وہ عورتیں جو نکاح کے ادارہ کے خلاف بولتی ہیں ، اسے کم زور کرنے کی کوشش کرتی ہیں اور اس کے مقابلے میں صرف پارٹنر بن کر زندگی گزارنے کی وکالت کرتی ہیں ـ

اسی طرح کتنی نادان ہیں وہ عورتیں جو نکاح ہوجانے کے بعد معمولی معمولی باتوں پر شوہروں سے روٹھ جاتی ہیں ، ان سے الگ تھلگ رہنے لگتی ہیں اور تنازع اتنا بڑھالیتی ہیں کہ بالآخر بات علیٰحدگی (طلاق اور خلع) تک جا پہنچتی ہےـ

انہیں جان لینا چاہیے کہ نکاح ایک سائبان ہے ، جس میں عورت کو سکون ملتا ہےـ ایک سیکورٹی ہے ، جس سے اسے تحفظ حاصل ہوتا ہےـ ایک سرپرستی ہے ، جس میں رہ کر وہ اطمینان و سکون سے نسلِ انسانی کی پرورش کا کام انجام دیتی ہےـ

سیر و سوانح کی قدیم کتاب ‘وفیات الاعیان’ سے تمام اہل علم واقف ہوں گے ، جو علامہ ابن خلکان ( 608ھ/1211ء _ 681ھ/ 1282) کی تصنیف ہےـ اس کا پورا نام ‘وفیات الاعیان و انباء ابناء الزمان’ ہے _ اس کتاب میں مؤلف نے اپنے عہد تک کی نام ور شخصیات کا جامع تذکرہ جمع کردیا ہے ۔ اس موضوع پر عربی زبان میں بہت کتابیں ہیں اور اردو زبان بھی خوب مالامال ہے کہ اس میں مختلف علوم و فنون کی نمایاں شخصیات کی سوانح اور تذکروں پر بہت کتابیں لکھی گئی ہیں ـ اللہ تعالیٰ جزائے خیر عطا فرمائے برادر محترم و مکرم حکیم وسیم احمد اعظمی کو ، جنھوں نے اطبائے ہند و پاک کے حالاتِ زندگی جمع کرنے کا ایک بڑا پروجکٹ شروع کیا ہےـ بجا طور پر اسے طب کی ‘وفیات الاعیان’ کہا جاسکتا ہےـ

طبی دنیا حکیم اعظمی کی علمی و طبی خدمات سے خوب واقف ہے ـ طبی اداروں میں تعلیم حاصل کرنے والا کوئی شخص اگر ان سے ناواقفیت کا اظہار کرے تو اس کا مطلب یہ ہے کہ اسے دورانِ طالب علمی کتابوں سے کوئی واسطہ نہیں رہا ہےـ اس لیے کہ طبی نصاب کے بیش تر موضوعات پر ان کی کتابیں موجود ہیں ، مثلاً امراضِ نسواں ، امراضِ اطفال ، امراضِ اذن و انف و حلق ، کلیاتِ ادویہ ، علم الصیدلہ ، تحفظی و سماجی طب اور معالجات (4 جلدیں) ـ انھوں نے غیر نصابی موضوعات پر بھی خوب لکھا ہےـ
بیت الحکمت کی طبی خدمات ، محمد بن زکریا رازی ـ احوال و آثار ، اردو طبی رسائل و جرائدـ بر صغیر ہند و پاک میں اور مطالعہ مخطوطات _ طب یونانی کے خصوصی حوالہ سے ان کی چند اہم تصانیف ہیں ـ

وسیم صاحب مرکزی کونسل برائے تحقیقات طب یونانی (CCRUM ) کے لٹریری شعبہ سے وابستہ تھےـ انھوں نے متعدد مخطوطات کی ایڈیٹنگ میں حصہ لیا ہےـ اس کے علاوہ عرصہ تک کونسل کے ترجمان سہ ماہی ‘جہانِ طب’ کی ادارت بھی کرتے رہے ہیں _ ابھی چند برس قبل وہ وظیفہ یاب ہوئے ہیں ـ اس کے بعد بھی ان کی علمی و تحقیقی سرگرمیاں زوروں پر ہیں ـ طبیبوں میں ان کا امتیاز یہ ہے کہ وہ تنقیدی ذوق اور مزاج رکھتے ہیں ـ انھوں نے اپنی تحریروں میں تحقیق کا اعلیٰ معیار پیش کیا ہےـ وہ مصنفین کی اغلاط کی نشان دہی میں ذرا بھی رو رعایت نہیں کرتے ، چاہے وہ کوئی بھی ہوں ـ

زیر نظر کتاب ‘وفیات اطبائے ہند و پاک’ طبی سوانحی لٹریچر میں ایک قیمتی اضافہ ہےـ اطباء کے تذکروں پر اردو میں بہت سی کتابیں لکھی گئی ہیں ـ اِس کتاب کے پیش لفظ میں ان کی فہرست پیش کی گئی ہےـ ان سب کا مواد اس کتاب میں شامل کرنے کی کوشش کی گئی ہےـ خاص بات یہ ہے کہ اس میں حوالوں کا اہتمام کیا گیا ہےـ ہر شخصیت کا تذکرہ کرنے کے بعد ان مصادر و مراجع کی فہرست پیش کی گئی ہے جن سے مواد لیا گیا ہےـ اسے الف بائی ترتیب پر مرتّب کیا گیا ہےـ اس کتاب کو جلد اول کی حیثیت حاصل ہے ، اس لیے کہ اس میں صرف ان اطباء کا تذکرہ ہے جن کا نام الف سے شروع ہوتا ہےـ اس کا مطلب یہ ہے کہ یہ کتاب کئی جلدوں پر مشتمل ہوگی ـ

اس کتاب کو اصلاحی ہیلتھ کیئر فاؤنڈیشن نئی دہلی نے 2019 میں شائع کیا ہے _ لاک ڈاؤن (اواخرِ مارچ 2020) شروع ہونے سے کچھ دنوں قبل راقم سطور کو یہ مصنف سے ملی تھی ـ افسوس اور معذرت کہ ذہن سے اوجھل ہوجانے کی وجہ سے اس کا تعارف کرانے میں تاخیر ہوگئی ـ

ایک برس ہونے کو ہیں ، برادر عزیز محمد بشارت نواز(کراچی) کی معرفت مولانا ابن الحسن عباسی مدیر ماہ نامہ النخیل کراچی کا خط موصول ہوا تھا ، جس میں انہوں نے اطلاع دی تھی کہ وہ مذکورہ مجلے کا ‘مطالعہ نمبر’ نکالنا چاہتے ہیں اور خواہش کی تھی کہ میں بھی اس کے لیے ایک تحریر ارسال کردوں ـ مقررہ وقت تک میرے لیے کچھ لکھنا ممکن نہ تھا ، اس لیے میں نے معذرت کردی ، لیکن برادر بشارت نواز میرے لیے وقت بڑھاتے رہے، چنانچہ ان کے پیہم رابطہ کی وجہ سے میں نے اپنے طریقۂ مطالعہ کے بارے میں ایک تحریر تیار کرکے ارسال کردی ـ مولانا سید جلال الدین عمری ، صدر شریعہ کونسل و سابق امیر جماعت اسلامی ہند ، انجینیر سید سعادت اللہ حسینی، موجودہ امیر جماعت اور مولانا محمد یوسف اصلاحی ، رکن مرکزی مجلس شوریٰ جماعت و ناظم جامعۃ الصالحات رام پور (یوپی) کی تحریریں فراہم کرنے کا بھی ذریعہ بناـ اب یہ خصوصی شمارہ منظرِ عام پر آیا ہے تو یہ دیکھ کر بہت خوشی ہوئی کہ اس میں ہند و پاک کے مشہور اساطینِ علم کی بہت قیمتی تحریریں شامل ہیں ، جن میں انھوں نے مطالعہ اور تحریر و تصنیف کے سلسلے میں اپنے تجربات بیان کیے ہیں ـ

عموماً میدانِ علم کے نوواردان مجھ سے سوال کرتے ہیں کہ وہ مطالعہ کیسے کریں؟ کیا مطالعہ کریں؟ مطالعہ کرنے کے بعد کچھ یاد نہیں رہتا ، اسے ذہن نشین کرنے کا کیا طریقہ ہے؟ مطالعہ کے بعد لکھنے کا آغاز کیسے کریں؟ تحریر کو مؤثر ، شستہ اور رواں کیسے بنائیں؟ تصنیف و تالیف کی مشق کیسے کریں؟ وغیرہ ـ امید ہے ، النخیل کی یہ خصوصی اشاعت ان کے ان تمام سوالات اور ان جیسے دیگر بہت سے سوالات کے جوابات فراہم کرے گی ـ

ماہ نامہ النخیل کے اس خصوصی شمارے کو ہندوستان میں ‘یادگارِ زمانہ شخصیات کا احوالِ مطالعہ’ کے نام سے کتابی صورت میں شائع کیا گیا ہےـ اس کے ٹائٹل پر یہ عبارت درج ہے :
” دنیائے اسلام کی 80 سے زیادہ مشہورِ زمانہ علمی شخصیات و اہلِ قلم کے مطالعہ اور علمی سفر کی دل نشین روداد ، نئی نسل کے لیے مفید کتابوں کے انتخاب اور مطالعاتی زندگی کی رہ نمائی پر مشتمل ، مدیر ماہ نامہ النخیل کے سوال نامہ کے جواب میں لکھی گئی ناقابلِ فراموش تحریروں کا سدا بہار مجموعہ”ـ یہ اس مجموعے کا بالکل درست تعارف ہےـ

مولانا ابن الحسن عباسی کا بہت شکریہ کہ انھوں نے بڑوں کی تحریروں کے ساتھ میری تحریر بھی شامل کرکے مجھے بھی بڑا بنا دیا اور برادر بشارت نواز بھی میرے خصوصی شکریے کے مستحق ہیں کہ ان کے اصرار نے مجھ سے بھی اس موضوع پر لکھوایا ، ورنہ میں اس خوب صورت بزم میں شامل ہونے سے محروم رہ جاتاـ

یہ کتاب 700 سے زائد صفحات پر مشتمل ہےـ اسے مجلس تراث الاسلام دیوبند نے شائع کیا ہےـ اسے حاصل کرنے کے لیے مولانا بدر الاسلام قاسمی (9045909066) سے رابطہ کیا جاسکتا ہےـ

عزیزہ تشکیلہ خانم ، معاون سکریٹری جماعت اسلامی ہند حلقہ کرناٹک نے خواہش کی کہ میں ریاستِ کرناٹک کی سطح پر دینی مدارس کی عالمات و فاضلات کی کانفرنس کے افتتاحی اجلاس میں کلیدی خطبہ پیش کروں ـ میں نے بخوشی منظوری دے دی ـ

پروگرام کا آغاز عزیزہ عظمیٰ نائک کی تذکیر بالقرآن سے ہواـ انھوں نے سورۂ حم السجدۃ : 30 تا 33 کی عمدہ تشریح کی _ محترمہ امۃ الرزّاق نے افتتاحی کلمات پیش کیے ـ محترمہ نشاط محمدی نے ‘عہدِ نبوی میں خواتین کا کردار’ کے عنوان سے تقریر کی ـ انھوں نے صحابیات کی بہت سی مثالیں پیش کیں کہ وہ اسلام قبول کرنے ، دین سیکھنے ، اس پر چلنے ، اس کی راہ میں اذیتیں برداشت کرنے ، ان پر صبر و استقامت کا مظاہرہ کرنے اور اللہ کی راہ میں جہاد کرنے میں پیش پیش رہی ہیں ـ
پروگرام کا ایک اہم جز ‘معاشرے کی تعمیر میں عالمات کا رول’ کے عنوان پر مذاکرہ تھاـ اس میں شاہینہ بانو نے ‘خوش گوار خاندان ـ کتاب و سنت کی روشنی میں’ ، ثمینہ پروین نے ‘خواتین اور نئی نسل کی دینی تربیت’ اور مغیرہ صالحاتی نے ‘شرحِ خواندگی بڑھانے میں عالمات کا رول’ کے عناوین پر تقریریں کیں ـ ان عزیزات کی تقریریں بھی اچھی تھیں اور اندازِ پیش کش بھی پُر اعتماد تھا ـ ان پر تبصرہ کرتے ہوئے محترمہ ساجد النساء ، رکن ریاستی مجلس شوریٰ نے عالمات کو ان کی ذمے داریاں یاد دلائیں اور معاشرہ کی اصلاح میں سرگرم کردار سر انجام دینے پر ابھاراـ

مجھ سے ‘حالاتِ حاضرہ میں دعوتِ دین اور اس کے تقاضے’ کے عنوان پر اظہارِ خیال کرنے کو کہا گیا تھاـ میری گفتگو درج ذیل نکات پر مشتمل تھی :

(1) موجودہ حالات عالمی اور ملکی دونوں سطحوں پر مسلمانوں کے لیے سازگار نہیں ہیں ـ ان کے خلاف سازشیں ہورہی ہیں اور ان کی راہ میں مشکلات کھڑی کی جارہی ہیں ـ اسلام اجنبی ہوگیا ہے ، جس کی پیشین گوئی اللہ کے رسولﷺ نے کی تھی ـ (مسلم:3986) اور فرمایا تھا کہ ان حالات میں راہ حق پر جمے رہنا ہاتھ پر انگارے رکھنے کے مثل ہوگاـ (ترمذی :2260)

(2) حالات جیسے بھی ہوں ، دین کی طرف دعوت دینا ، اللہ کا پیغام عام کرنا اور اس کا کلمہ بلند کرنا ہر مسلمان کی ذمے داری ہےـ اسے دعوت ، شہادت علی الناس ، امر بالمعروف و نہی عن المنکر اور دیگر الفاظ سے تعبیر کیا گیا ہےـ

(3) دین کی مخاطب عورتیں بھی ہیں ، اسی طرح جیسے مرد ہیں _ وہ مردوں کا ضمیمہ نہیں ہیں ، بلکہ ان کی مستقل شخصیت ہےـ وہ نیک اعمال کریں گی تو اجر پائیں گی اور ان سے برے اعمال سرزد ہوں گے تو انہیں سزا مل کر رہے گی ـ اسی طرح دعوتِ دین کی ذمے داری مسلم مردوں کی طرح مسلم خواتین پر بھی عائد ہوتی ہےـ ان پر لازم ہے کہ وہ دین پر خود عمل کرنے کے ساتھ دوسروں تک بھی دین پہنچانے کی کوشش کریں ـ

(4) دعوت کا کام مومن مردوں اور مومن عورتوں کو مل جل کر انجام دینا ہےـ اللہ تعالیٰ کا ارشاد ہے : ” مومن مرد اور مومن عورتیں ، یہ سب ایک دوسرے کے رفیق ہیں ، بھلائی کا حکم دیتے اور برائی سے روکتے ہیں ، نماز قائم کرتے ہیں ، زکوٰۃ دیتے ہیں اور اللہ اور اس کے رسول کی اطاعت کرتے ہیں ـ” (التوبۃ :71) ابتدائی صدیوں میں خواتین دین کے ہر محاذ پر حدود و آداب کی رعایت کرتے ہوئے مردوں کے ساتھ مل کر سرگرمیاں انجام دیتی تھیں ـ

(5) معاشرہ کی اصلاح کے میدان میں عالمات و فاضلاتِ مدارس کا رول عام مسلمان خواتین سے بڑھ کر ہےـ انہیں نمونہ بننا ہےـ امہات المؤمنين کو مخاطب کرکے اللہ تعالیٰ نے فرمایا ہے : "تم عام عورتوں کی طرح نہیں ہو”ـ
(الأحزاب :32) اسی طرح عالمات و فارغاتِ مدارس بھی عام عورتوں کی طرح نہیں ہیں ـ اگر وہ اپنی ذمے داری نبھائیں گی تو انہیں دُہرا اجر ملے گا اور اگر وہ کوتاہی کریں گی تو انہیں سزا بھی بڑھ کر ملے گی ـ

جماعت اسلامی ہند کے قافلے میں الحمد للہ خواتین کی بھی بڑی تعداد شامل ہے اور وہ ہر سطح پر دینی سرگرمیاں بڑھ چڑھ کر انجام دے رہی ہیں ـ جماعت کی اعلیٰ اختیاراتی باڈی : مجلسِ نمائندگان ، مرکزی مجلسِ شوری ، ریاستی مجالسِ شوریٰ اور دیگر فورمز میں ان کی مؤثر نمائندگی ہےـ یہ چیز بہت خوش آئند ہے کہ ان میں دینی مدارس سے فارغ ہونے والی طالبات بھی قابلِ ذکر تعداد میں ہیں ـ معاشرہ کی اصلاح اس وقت تک ممکن نہیں جب تک خواتین و حضرات مل جل کر اس کے لیے جدّوجہد نہ کریں ـ

یہ کانفرس دو روزہ ہے _ آج ڈھائی بجے سے پانچ بجے شام تک پروگرام ہواـ اسی طرح کل بھی جاری رہے گاـ یہ معلوم ہوکر خوش گوار حیرت ہوئی کہ اس آن لائن کانفرنس میں 375 خواتین نے شرکت کی ـ یہ بھی اچھا لگا کہ تمام شریکاتِ کانفرنس نے اپنے ویڈیوز بند رکھے تھے ـ کنوینر کانفرنس کے ذریعے معلوم ہوا کہ عالمات نے اپنا واٹس ایپ گروپ بھی بنا رکھا ہے ، جس کے ذریعے وہ ایک دوسرے سے رابطے میں رہتی ہیں اور مل جل کر سرگرمیاں انجام دیتی ہیں ـ اللہ تعالیٰ ان کی جدوجہد کو قبول فرمائے اور اجر سے نوازے، آمین ـ

سیرت نبوی پر تالیف کا ایک نیا رجحان ماضی قریب میں ابھر کر سامنے آیا ہے ، جسے ‘فقہ السیرۃ’ کا نام دیا گیا ہے ، یعنی واقعاتِ سیرت سے دروس و نصائح کا استنباط کرنا اور موجودہ حالات میں ان سے رہ نمائی حاصل کرناـ اس انداز کی متعدد کتابیں عربی زبان میں لکھی گئی ہیں ، جن میں سے ایک اہم کتاب شام کے مشہور عالم ڈاکٹر محمد سعید رمضان البوطی کی’ فقہ السیرۃ النبویۃ’ ہےـ راقمِ سطور کی سعادت ہے کہ اسے اس کتاب کا اردو ترجمہ کرنے کی سعادت حاصل ہوئی ـ

اس کتاب کا ترجمہ کرنے کی کہانی عجیب ہےـ عرصہ پہلے مرکزی مکتبہ اسلامی پبلشرز نئی دہلی کے اُس وقت کے منیجر جناب محمد جاوید اقبال نے مجھے یہ کتاب ترجمہ کرنے کے لیے دی تھی ـ میں نے یہ ذمے داری قبول کرلی ، لیکن کافی عرصہ گزرنے کے باوجود ترجمہ کا کام چند صفحات سے آگے نہ بڑھ سکاـ میں نے شرماتے ہوئے جاوید اقبال سے مصروفیات کا عذر کیا اور ترجمہ کرنے سے معذرت چاہی ، لیکن انھوں نے عذر قبول نہ کیا اور کہا کہ یہ بہت اچھی کتاب ہےـ اس کا ترجمہ کرنا آپ کے لیے سعادت کی بات ہوگی ـ میں منھ لٹکائے ہوئے واپس آگیاـ

اس کے کچھ دنوں کے بعد ہوا یہ کہ میری اہلیہ کی طبیعت بہت زیادہ خراب ہوگئی ـ انہیں داخلِ اسپتال کرنا پڑاـ تیمارداری کرنے والا میرے علاوہ کوئی نہ تھاـ خواتین کے جنرل وارڈ میں میرا رکنا ممکن نہ تھاـ طے پایا کہ میں گھر پر ہی رات گزاروں گا ـ ناگہانی کوئی ضرورت ہوئی تو وہ مجھے فون کرکے بلالیں گی ـ اس اندیشے سے کہ کہیں گہری نیند میں فون نہ سُن سکوں ، میں نے رات بھر جاگ کر گزارنے کا فیصلہ کیا ـ خیال آیا کہ شب بیداری کا اس سے اچھا مصرف اور کیا ہو سکتا ہے کہ فقہ السیرۃ کا ترجمہ کرڈالوں ـ چنانچہ یہ معمول بنا لیا کہ اہلیہ کو رات کا کھانا اور دوائیں کھلاکر آتا اور ترجمہ کرنے بیٹھ جاتا تو فجر کی اذان پر ہی تسلسل ٹوٹتاـ اس طرح 500 سے زائد صفحات کی کتاب ، جس کے صرف چند صفحات کا ترجمہ کئی برس میں کرسکا تھا ، اہلیہ کی علالت کی وجہ سے 15 دنوں سے کم عرصہ میں اس کا ترجمہ مکمل کرلیاـ

کتاب کی اشاعت کے وقت میں نے سوچا کہ عرضِ مترجم میں اہلیہ کا ذکرِ خیر کردوں ، کہ اصلاّ یہ کام انہی کے حسنِ تعاون سے انجام پایا تھاـ لیکن جب یہ کتاب زیورِ طبع سے آراستہ ہوکر آئی اور اپنے نام پر ان کی نظر پڑی تو کہنے لگیں :”کیوں مجھے سرِ بازار رسوا کرتے ہیں ـ میرا نام کہیں نہ لکھا کریں ـ” خواتین کی اسی طرح کی بے نفسی کی بدولت مردوں کو بڑے بڑے کام انجام دینے کی توفیق ملتی ہےـ اگر عورتوں کا حسنِ تعاون نہ ہو تو مرد اپنے کو عاجز و درماندہ پائیں گےـ

یہ کتاب نشریات ، پاکستان سے ‘دروسِ سیرت’ اور مرکزی مکتبہ اسلامی پبلشرز نئی دہلی سے ‘سیرتِ رسول ـ دروس و نصائح’ کے نام سے شائع ہوئی ہےـ یہ سیرتِ نبوی کے موجودہ لٹریچر کی ایک اہم کتاب ہے اور میری بھی پسندیدہ کتابوں میں سے ہےـ اس کا ترجمہ کرتے ہوئے میرے اوپر سرشاری اور بے خودی کی کیفیات غالب رہی ہیں ـ اللہ تعالیٰ نے اسے مقبولیت عطا کی ہے ، اس کا مظہر یہ ہے کہ ہند و پاک میں اس کے متعدد ایڈیشن منظر عام پر آئے ہیں ـ اب یہ جان کر خوشی ہوئی کہ پاکستان کی طوبی ریسرچ لائبریری سائٹ پر اس کی پی ڈی ایف فائل اپ لوڈ کر دی گئی ہےـ اللہ تعالیٰ اس کے کارپردازوں کو جزائے خیر عطا فرمائے ، آمین
اس کا لنک درج ذیل ہے :

https://toobaa-elibrary.blogspot.com/2020/09/blog-post_25.html

ہم خواتین کو گھر کی چہار دیواری میں بند رکھنے پر چاہے جتنا اصرار کرلیں ، لیکن واقعہ یہ ہے کہ تاریخ کے روشن دور میں انھوں نے اپنی اصل ذمے داری : بچوں کی پیدائش ، پرورش اور تعلیم و تربیت کو بہ خوبی انجام دینے کے ساتھ اسلامی حدود کی پابندی کرتے ہوئے گھر کے باہر کے بھی بہت سے کام خوش اسلوبی سے کیے ہیں _ خاص طور سے علوم کی نشر و اشاعت میں ان کی خدمات زرّیں حروف سے لکھے جانے کے لائق ہیں _ اسلامیات کا میدان بھی اس سے مستثنٰی نہیں ہے ـ انھوں نے تصنیف و تالیف کا کام کیا ہے ، درس و تدریس کی خدمت انجام دی ہے ، تعلیمی ادارے قائم کیے ہیں اور ان کی سرپرستی کی ہے ، تعلیمی خدمات انجام دینے کے لیے لوگوں کو تیار کیا ہے اور ان پر اپنی دولت لُٹائی ہے ، غرض امت ان کے احسانات سے کبھی عہدہ برا نہیں ہوسکتی ـ

اللہ تعالیٰ جزائے خیر عطا فرمائے عزیزہ ڈاکٹر ندیم سحر عنبرین کو کہ انھوں نے تفسیر و علوم قرآنی میں خواتین کی خدمات پر تحقیقی کام کیا ہے ـ ان کی کتاب ‘خواتین اور خدمتِ قرآن’ ہدایت پبلشرز نئی دہلی سے شائع ہوگئی ہے ـ اسی طرح اللہ تعالیٰ جزائے خیر عطا فرمائے برادر محترم ڈاکٹر محمد اکرم ندوی (آکسفورڈ) کو ، جنھوں نے 45 جلدوں پر مشتمل اپنے عظیم الشان پروجکٹ کے تحت ساڑھے آٹھ ہزار ایسی خواتین کا تذکرہ جمع کردیا ہے جنھوں نے علم حدیث کی روایت ، تدریس اور تصنیف کی خدمت انجام دی ہے ـ ان کا یہ کام عربی زبان میں ہے ـ انگریزی زبان میں اس کا خلاصہ بہت پہلے Al_ Muhaddithat, Women Scholars in Islam کے نام سے طبع ہوچکا ہے ـ اس موضوع پر اور بھی کتابیں لکھی گئی ہیں ، جن میں عناية المرأة بالحديث النبوي (مشهور بن حسن آل سلمان) اور جهود المرأة في رواية الحديث (صالح يوسف معتوق) خصوصیت سے قابلِ ذکر ہیں ـ
حدیث کا میدان بہت وسیع ہے ـ احادیثِ رسول کو بہت سی کتابوں میں جمع کیا گیا ہے _ ان کی تدریس میں علماء نے اپنی عمریں کھپا دی ہیں ـ خوشی و مسرّت کا مقام ہے کہ اس میدان میں خواتین بھی پیش پیش رہی ہیں ـ چنانچہ انھوں نے بڑے بڑے محدثین سے کسبِ فیض کیا ہے اور خلقِ خدا کو خوب فیض بھی پہنچایا ہے ـ حدیث کی اہم ترین کتابوں میں صحیح بخاری ہے ـ بڑی تعداد میں خواتین نے اس سے بھی دل چسپی لی ہے اور اخذ و روایت میں شہرت پائی ہے ـ اس موضوع پر ڈاکٹر محمد بن عزوز کی ایک کتاب کا مطالعہ کرنے کا موقع ملا ، جس کا نام ہے : صفحات مشرقة من عناية المرأة بصحيح الإمام البخاري (روايةً و تدريساً) ـ 387 صفحات پر مشتمل یہ کتاب دار ابن حزم ، بیروت ، لبنان سے 1423 ھ/ 2002ء میں شائع ہوئی ہے ـ اس کتاب کا خلاصہ درج ذیل نکات کی شکل میں بیان کیا جاسکتا ہے :

والدین اپنے لڑکوں کے ساتھ لڑکیوں کو بھی محدثین کی مجالس میں بھیجتے تھے ، جہاں وہ احادیث کی سماعت و قراءت کرتی تھیں ـ
محدثین سے صحیح بخاری کی سماعت ، قراءت اور اجازت بہت سی خواتین کو حاصل ہےـ
خواتین سے استفادہ کرنے والوں میں صرف خواتین ہی نہیں ہوتی تھیں، بلکہ زیادہ تعداد مردوں کی ہوتی تھی ، چنانچہ صحیح بخاری کی قراءت ، سماعت اور اجازت بہت سے مردوں نے خواتین سے حاصل کی ـ
خواتین نے حدیث کی صرف روایت اور تدریس پر توجہ دی ہے ـ ان کا التفات تصنیف و تالیف کی طرف نہیں رہا ہے _ چنانچہ صحیح بخاری کی شرح کرنے والوں میں کسی خاتون کا نام نہیں ملتاـ
مشہور محدثات کو مسلم حکم راں اپنے ممالک میں بڑے اعزاز و اکرام کے ساتھ مدعو کرتے تھے ، تاکہ ان کی حکم رانی میں ان سے بڑے پیمانے پر استفادہ کیا جائے ـ

ڈاکٹر عزوز نے بہت سی دل چسپ مثالیں پیش کی ہیں کہ لوگ اپنی بیٹیوں ، پوتیوں ، نواسیوں ، بھتیجیوں ، بھانجیوں اور رشتے کی دیگر لڑکیوں کو حدیث کی تعلیم حاصل کرنے اور محدثین و محدثات سے استفادہ کے بھرپور مواقع فراہم کرتے تھے ، اسی طرح انھوں نے متعدد ایسے محدثین کا تذکرہ کیا ہے جن سے ان کی بیویوں نے حدیث کی روایت کی یا ان کی اجازت سے دوسرے بڑے محدثین سے استفادہ کیا _ اسی طرح متعدد ایسے محدثین کے نام درج کئے ہیں جنھوں نے خواتین کے سامنے زانوئے تلمّذ تہہ کیا ہے ـ

ڈاکٹر عزوز نے گیارہ(11) ایسی عظیم محدثات کا تذکرہ تفصیل سے کیا ہے جنھوں نے پوری زندگی صحیح بخاری کا درس دیتے ہوئے گزار دی اور ان سے بے شمار مردوں اور عورتوں نے اس کا درس لیا :

(1) کریمۃ المروزیۃ (م473ھ) سو برس کی عمر پائی ـ شادی نہیں کی تھی _ مکہ مکرمہ میں حدیث کا درس دیتی تھیں _ کئی مرتبہ صحیح بخاری ختم کی ـ ان کے درس میں بڑے بڑے علما حاضر ہوتے تھے _ خطیب بغدادی اور ابو المظفر سمعانی ان کے شاگردوں میں سے تھے _ بخاری کی کتابت بھی کرتی تھیں اور اس کے نسخوں کا مقابلہ کرتی تھیں ـ

(2) فاطمہ بنت محمد بن ابی سعد البغدادیۃ (م 539ھ) 94 برس کی عمر میں انتقال ہوا _ اصبہان میں بخاری کا درس دیتی تھیں _ ابن عساکر ان کے مشہور شاگرد ہیں ـ

(3) شھدۃ بنت أحمد البغدادیۃ (م 574ھ) سو برس کی عمر پائی _ عراق کی مشہور محدثہ ہیں _ فخر النساء لقب تھا _ شاگردوں کی بہت بڑی تعداد تھی _ علامہ ابن الجوزی ان کے مشہور شاگرد ہیں ـ

(4) کریمۃ بنت عبد الوهاب الزبیدیۃ الدمشقیۃ (م 641ھ) بنت الحبقبق کے لقب سے معروف تھیں _علمی خاندان سے تعلق تھا _ باپ ، چچا ، بھائی ، بہن سب محدث تھے _ کئی مرتبہ صحیح بخاری کی روایت کی _ شاگردوں کی بڑی تعداد تھی ـ

(5) فاطمۃ بنت جوھر المعروفۃ بالبطائحیۃ (م 711ھ) شوہر ، بیٹے ، پوتے ، سب محدث تھے _ انھوں نے دمشق اور مدینہ میں بہت سے محدثین سے سماعتِ حدیث کی ، پھر نصف صدی تک صحیح بخاری کے درس و روایت کا کام جاری رکھاـ

(6) ھدیۃ بنت عسکر الصالحیۃ (م 712ھ) صحیح بخاری کا درس دیتی تھیں ـ لوگوں نے بڑی تعداد میں ان سے فیض اٹھایا، جن میں مرد حضرات اور خواتین دونوں تھیں ـ

(7) ست الوزراء بنت عمر بن اسعد التنوخیۃ الدمشقیۃ (م 716ھ) آٹھویں صدی کی 3 سو محدثات میں سب سے زیادہ شہرت کی حامل تھیں ـ اوپر اور نیچے کی کئی نسلوں تک علمی خاندان تھاـ دادا اور باپ بھی محدث تھے _ دمشق سے مصر بلائی گئیں ، جب کہ اس زمانے میں مصر میں محدثین کی بڑی تعداد موجود تھی _ نیل کے کنارے واقع الجامع الناصری میں صحیح بخاری کا درس دیتی تھیں _ بڑے بڑے محدثین نے ان سے صحیح بخاری کی سماعت کی ـ 92 برس کی عمر میں انتقال ہوا ـ

(8) عائشۃ بنت محمد المقدسیۃ (ولادت 723 ھ) ان کے خاندان میں 4 صدیوں سے علم کا چرچا تھا _ بے شمار لوگوں نے ان سے حدیث کی روایت کی _ ان کے شاگردوں میں علامہ ابن حجر عسقلانی بھی ہیں ـ

(9) زینب بنت أحمد المقدسیۃ الصالحیۃ (ولادت 628 ھ) قدس ، دمشق ، قاھرہ اور مدینہ منورہ میں صحیح بخاری کا درس دیا ـ بے شمار لوگوں نے ان سے فیض اٹھایاـ

(10) جویریۃ بنت أحمد الھکاریۃ القاھریۃ (ولادت 704ھ) حافظ ابن حجر کے بیش تر معاصرین نے ان سے صحیح بخاری کا درس لیا ہے ـ

(11) فاطمۃ بنت أحمد العمریۃ الحرازیۃ (ولادت 710ھ) انھوں نے مکہ مکرمہ اور مدینہ منورہ دونوں جگہ صحیح بخاری کا درس دیا ہے ـ اسی وجہ سے محدّثۃ الحرمین کے لقب سے مشہور ہوئیں ـ

یہ تو صرف صحیح بخاری کا درس دینے والی مشہور خواتین ہیں ، دوسری کتبِ حدیث کی روایت ، سماع ، قراءت اور اجازت دینے والی خواتین کی تعداد کا تو شمار نہیں _ یہ وہ روشن اور درخشاں دور تھا جب نہ عورت ہونا تحصیلِ علم میں مانع تھا اور نہ کسی خاتون کے سامنے زانوئے تلمّذ تہہ کرنا مردوں کے لیے باعثِ عار ہوتا تھا _ عورتیں پوری آزادی کے ساتھ مردوں سے استفادہ کرتی تھیں اور مرد شرعی حدود کا پاس و لحاظ کرتے ہوئے خواتین سے علمی استفادہ کرتے تھے ـ لیکن پھر لڑکیوں اور عورتوں پر بے جا بندشیں عائد کی جانے لگیں ، ان کا کردار گھر کی چاردیواری تک محدود کردیا گیا ـ استفادہ و افادہ کے مواقع کم سے کم تر ہوتے گئے ، اس طرح عورتوں کا وجود تو روئے زمین پر باقی رہا ، لیکن ان کی علمی صلاحیتوں کو درگور کردیا گیا ـ اس مجرمانہ غفلت اور اعراض پر اب افسوس اور حسرت کے علاوہ اور کیا جاسکتا ہے؟؟!!

کچھ دنوں پہلے خبر آئی تھی کہ دہلی میں سکھوں کے زیر انتظام ایک اسپتال میں 700 روپے میں ڈائی لیسس (dialysis) کی جارہی ہے ۔ منتظم نے یہ بھی بتایا تھا کہ یہ فیس ان لوگوں کے لیے ہے جو اسے ادا کرسکتے ہیں ، ورنہ غریبوں کے لیے یہ سروس بالکل مفت ہے ، ان کے لیے کوئی فیس نہیں ۔ اب ایک ویڈیو کے ذریعے معلوم ہوا کہ دہلی کے گردوارہ بنگلہ صاحب میں ایک ایسا دواخانہ کھولا گیا ہے جس میں انتہائی کم قیمت پر دوائیں فراہم کی جارہی ہیں ۔ منتظم نے بتایا کہ اس دواخانے میں دہلی ہی نہیں ، بلکہ پورے ملک میں سب سے کم قیمت پر دوائیں دی جا رہی ہے _ اس کی وجہ انہوں نے یہ بتائی کہ یہاں دوا اسی قیمت پر دی جارہی ہے جتنی کمپنی میں اس پر لاگت آتی ہے۔ ایک مثال دینے کی غرض سے انھوں نے ایک دوا اٹھائی جس پر 118 روپے MRP لکھی ہوئی تھی۔ انھوں نے بتایا کہ یہ دوا ہمارے یہاں صرف 15 روپے میں ملتی ہے۔

سکھوں میں خدمتِ خلق کا جذبہ بہت زیادہ پایا جاتا ہے _ ہر گردوارہ میں لنگر ضرور چلتا ہے، جہاں مذہب کی تفریق کے بغیر کوئی بھی شخص پہنچ کر کھانا کھا سکتا ہے _ اس طرح کی خبروں کو پڑھ کر ، سن کر اور دیکھ کر خواہش پیدا ہوتی ہے کہ اس طرح کے رفاہی کام کیا ہم مسلمان نہیں کرسکتے؟ مخلوق کی خدمت کو اللہ تعالیٰ نے اپنی خدمت سے تعبیر کیا ہے اور اس کی انجام دہی کی بہت ترغیب دی ہے _ مسلمانوں کی جانب سے ایسے کام ضرور ہوتے ہوں گے ، لیکن ان کی خبر عام نہیں ہوپاتی _ مثلاً مجھے نہیں معلوم کہ دہلی میں کہیں مسلمانوں کے زیر انتظام کسی پرائیوٹ اسپتال میں اتنی کم فیس پر ڈائی لیسس ہوتی ہے ، یا مسلمانوں کے زیر انتظام کسی دواخانے میں اتنی کم قیمت پر دوائیں فراہم کی جاتی ہیں ۔

کاش ہم نام و نمود کے لیے نہیں ، بلکہ خدمت کے جذبے سے عبادت سمجھ کر ایسے کام انجام دے سکتے ۔