نریندر مودی

بھارت کے دارالحکومت نئی دہلی میں فنون لطیفہ اور قدیم دستاویزات کے شیدائیوں کے لیے اندرا گاندھی نیشنل سینٹر فار آرٹ، نیشنل آرکائیوز اور نیشنل میوزیم کی شاندار عمارات اور اس کے وسیع و عریض احاطے کسی جنت سے کم نہیں تھےـ

ان کا وجود میرے لیے بھی ایک نعمت تھاـ یہ تینوں عمارتیں دہلی کے وقار میں اضافہ کرتی تھیں اور ان کی وجہ سے میں بھی دہلی کے مکین ہونے کے ناطے فخر محسوس کرتی تھی ـ

نیشنل آرکائیوز میں تو پورے جنوبی ایشیاء کی تاریخ سمٹی ہوئی ہے. خلجی، تغلق، پٹھان، مغل اور برطانوی دورِ حکومت کی تمام تر دستاویزات اور فرامین یہاں محفوظ ہیں اور محقیقین کی راہ دیکھتے رہتے ہیں ـ

مگر اس وقت جب دہلی میں کورونا وائرس کی وباء نے پوری آبادی کو ہراساں کیا ہوا ہے اور اموات کی وجہ سے خاندان ٹوٹ پھوٹ کا شکار ہو رہے ہیں، بلکل اسی طرح وزیراعظم نریندر مودی کی طرف سے نیا دارالحکومت اور نئے سرکاری دفاتر و رہائش گاہیں بنانے کی ضد نے اس شہر کی روح کو زخمی کر کے رکھ دیا ہےـ

دہلی کا وسطی علاقہ، یعنی پارلیمنٹ ہاؤس سے انڈیا گیٹ تک اس وقت جیسے کوئی جنگ زدہ علاقہ لگتا ہے. ہر طرف کھدائی اور بڑے بڑے کھڈے. نیا شہر بسانے کے نام پر اندرا گاندھی نیشنل سینٹر آرٹ، نیشنل آرکائیوز اور نیشنل میوزیم سمیت کئی عمارات ڈھائی جا رہی ہیں. دہلی کی ثقافت و تہذیب ملبے کے ڈھیروں میں تبدیل ہو کر ہماری آنکھوں کے سامنے اس طرح ملیا میٹ ہو رہی ہے، جو شاید نادر شاہ یا تیمور لنگ کے حملوں کے وقت بھی نہ ہوئی ہوـ

بھارت کے افسر شاہی نظام میں، ایک اسکول یا ہسپتال بنانے کے لیے زمین کا ایک ٹکڑا حاصل کرنے میں ماہ و سال لگ جاتے ہیں. مگر تین کلومیٹر پر محیط اور ٢٠٠ بلین روپے کی لاگت والے اس پروجیکٹ کو بس چند روز میں ہی پاس کیا گیاـ

ایسے وقت میں، جب طبی سہولیات کے فقدان کی وجہ سے لوگ وبا سے ہلاک ہو رہے ہیں، حکومت کی نیا دارالحکومت بنانے کی ترجیح سے عوام بے حال ہیں. لاک ڈاؤن کے دوران بھی اس منصوبہ پر کام زور و شور سے جاری ہےـ اس سائٹ پر روزانہ ٣٠٠ سے زیادہ افراد کام کرتے ہیں اور ان کو لاک ڈاون سے استثنیٰ دیا گیا ہےـ

اس آرٹ سینٹر کے ساتھ کئی میری یادیں وابستہ ہیں ـ کھبی اس کے وسیع و عریض احاطے میں ریختہ فاؤنڈیشن کی طرف سے جشن اُردو برپا ہوتا تھا تو کبھی دور دراز کے صوبوں یا علاقوں کے رقص و موسیقی کے پروگرام، کبھی مشاعرہ تو کبھی کوئی سمیلین. غرض آرٹ اور کلچر کے دیوانوں کے لیے یہ کسی آستانے سے کم نہیں تھاـ اس سینٹر نے مجھے بھارت کے مسحورکن ثقافتی تنوع کو سمجھنے اور اس کی قدردانی سکھائی، جو فی الوقت اضطراب کا شکار ہےـ

فنون لطیفہ کے دیوانوں کے لیے اس احاطے میں وقت جیسے تھم جاتا تھا. اس کی لائبریری میں تقریباً تین لاکھ سے زیادہ کتب موجود تھیں. سامنے نمائش گاہ، جہاں ہر وقت ملک کے کسی نہ کسی گوشے کے کسی مصور کے شہ پاروں کی نمائش لگی ہوتی تھی ـ اس کے متصل آڈیٹوریم، جہاں آرٹ و کلچر سے وابستہ کسی شخصیت کے لیکچر سے آپ لطف اندوز ہو سکتے تھےـ اس کی ریفرنس لائبریری میں آچاریہ ڈاکٹر ہزارہ پرساد دویدی اور کرشنا کرپلانی جیسے ممتاز شہریوں کا ذاتی ذخیرہ موجود تھاـ

بدقسمتی سے حکمرانوں کی بے حسی، تنگ نظری اور ضد کی وجہ سے یہ جگہ اب تاریخ بن رہی ہے اور اس کے ذخیروں کے ضائع ہونے کا اندیشہ ہےـ تاریخ دان اور آرٹ اور کلچر سے محبت کرنے والے لوگ اس اہم جگہ کے ضائع ہونے پر ہلکان ہیں ـ

تقسیم سے قبل کے پنجاب اور سکھ ازم کے موضوع پر جب میں تحقیق کر رہی تھی تو مجھے اکثر نیشنل آرکائیوز جانا پڑتا تھا. یہ پورے جنوبی ایشیاء کی تاریخ کے علاوہ نایاب اور انمول میراث سمیٹے ہوئے ہےـ

سن ١٩٤٧ میں برصغیر کی تقسیم کے وقت نئی مملکتوں بھارت اور پاکستان کی افسر شاہی نے دفتری فرنیچر، خزانہ، فوج اور دیگر سازو سامان کو آپس میں بانٹ تو لیا مگر کتب اور آرکائیوز کا بٹوارہ نہیں ہواـ

اسی لیے آرکائیوز سے متعلق سبھی دستاویزات بھارت میں ہی رہیں.
مثال کے طور مغلیہ دور پر تحقیق کرنے والے کسی بھی محقق کو اگر شہنشاہ اکبر یا کسی دیگر فرمانروا کے کسی تحریری فرمان کا مطالعہ کرنا ہو تو وہ اسی بلڈنگ میں موجود ہےـ

برطانوی دور کے جاسوسوں کی رپورٹیں، اس بلڈنگ کے خزانے میں موجود ہیں. نیشنل آرکائیوز کے دہلی میں موجود ہونے اور اس کو سن ١٩٤٧ کے بٹوارہ کی مار سے بچانے کی وجہ سے بھارت میں ہمیشہ پاکستان اور بنگلہ دیش کی نسبت بہتر مورخ پیدا ہوئے ہیں ـ

چند برس قبل پاکستان کے دارالحکومت اسلام آباد میں موجود قائد اعظم یونیورسٹی کے ایک پروفیسر نے مجھے بتایا کہ بھارتی حکومت، پاکستانی یا بنگلہ دیش کے محققین یا مورخین کو اس آرکائیوز سے مستفید ہونے کی اجازت نہیں دیتی ہےـ

پہلے تو مجھے لگا کہ پروفیسر صاحب کسی پروپیگنڈہ کا شکار ہو گئے ہیں. ایسا کیسے ہو سکتا ہے کہ ان ممالک کے محقیقین کو اس مشترکہ وراثت سے دور رکھا جائے. مگر دہلی واپس آ کر معلوم ہوا کہ یہ بلکل سچ ہے. پاکستان اور بنگلہ دیش کے محقیقن اپنی تاریخ کے ماخذ اور اصل اور بنیادی دستاویزات کے مطالعہ اور ان پر اپنی رائے قائم کرنے کے حق سے پچھلے ٧٥ سالوں سے محروم ہیں ـ

زیادہ حیرت تو اس پر ہوئی کہ ابھی تک کسی نے اس پر آواز بھی نہیں اٹھائی ہے اور بنگلہ دیش یا پاکستان کے وزرائے اعظم یا دیگر حکمرانوں یا افسران نے اس کو کبھی بھارت کے ساتھ گفت و شنید کا بھی موضوع نہیں بنایا ہےـ

صرف ایک بار پاکستانی اخبار ڈیلی ٹائمز کے دہلی کے نمائندے نے بھارت اور پاکستان کے افسران کی ایک میٹنگ کے حوالے سے اس ایشو کو اٹھایا تھا لیکن بعد میں کسی نے بھی اس کو فالو نہیں کیاـ

اسی طرح کا خزانہ نیشنل میوزیم میں بھی موجود ہےـ چند برس قبل یہاں ‘کوڑی سے کریڈٹ کارڈ تک‘ پر ایک نمائش کا اہتمام کیا گیا تھا. دریائے سندھ کی تہذیب سے لے کر اب تک کی کرنسی کا سفر اس نمائش میں دکھایا گیا تھاـ یہ تصور کرنا مشکل تھا کہ ایک ہی چھت کے نیچے کرنسی کی تاریخ کا اس قدر نایاب خزانہ موجود ہو سکتا ہےـ تب ایک افسر نے مجھے بتایا کہ یہ تو صرف ان کے پاس موجود خزانہ کا صرف ٪٢٠ فیصد ہےـ

ماہرین کا کہنا ہے کہ عجائب گھر یا آرکائیو کی منتقلی خاصا پیچیدہ عمل ہے اور اس کے لئے برسوں کی محنت اور منصوبہ بندی کی ضرورت ہوتی ہےـ

اس قیمتی وراثت کو صندوقوں میں بھر کر اندھیری کوٹھریوں میں نہیں رکھا جا سکتا ہےـ انہیں انتہائی احتیاط کے ساتھ سنبھالنا پڑتا ہے تاکہ انہیں کوئی نقصان نہ ہوـ مزید یہ کہ منتقلی سے قبل نئی سائٹ بھی تیار ہونی چاہیےـ

ان تین عمارتوں کے علاوہ آٹھ دیگر عمارات، جن میں سے زیادہ تر آزادی کے بعد تیار کی گئی تھیں، کو بھی مسمار کیا جا رہا ہے تاکہ وزیر اعظم مودی کے لئے محل اور نئے سرکاری دفاتر تعمیر کرائے جائیں ـ

بھارت کے پہلے وزیر تعلیم مولانا ابوالکلام آزاد کی دہلی کی رہائش گاہ کو بھی مسمار کیا جا رہا ہےـ دیگر عمارات، جو گرائی جا رہی ہیں، اتفاقاً کسی نہ کسی صورت میں بھارت کے پہلے وزیر اعظم جواہر لال نہرو کے ساتھ تعلق رکھتی ہیں اور نہرو کے لیے مودی کی ناپسندیدگی کسی سے پوشیدہ نہیں ہےـ

نہرو کے ساتھ یہ نفرت کس قدر شدید ہے کہ بھارتی وزارت خارجہ کا صدر دفتر، جو نہرو بھون کے نام سے جانا جاتا ہے اور بس دس سال قبل ہی تعمیر ہوا اور جدید فن تعمیر کا ایک شاہکار مانا جاتا ہے، اس کو بھی مسمار کیا جا رہا ہے. اس سے زیادہ ستم ظریفی کیا ہو سکتی ہے؟

کہتے ہیں کہ آمروں کو آرٹ اور کلچر راس نہیں آتا کیونکہ ان کے ذریعے کسی نہ کسی صورت میں اظہار رائے اور موجودہ حالات کی عکاسی ہوتی ہےـ

تاریخ گواہ ہے کہ جس کسی بھی حکمران نے دہلی کی از سر نو تعمیر کی ہے، اس کو اس میں بعد میں بیٹھنا نصیب نہیں ہواـ قبل از تاریخ اس شہر کو اندر پرستھ کے نام سے پانڈوں کے سردار یڈھشٹر نے بسایا. یہ شہر آج کے چڑیا گھر اور شیر شاہ سوری کے بنائے گئے پرانے قلعہ کے پاس ہے. مگر پانڈوں کو اس شہر میں رہنا نصیب نہیں ہوا. نہ صرف وہ ملک بدر ہو گئے بلکہ انہوں نے جوئے میں اپنی مشترکہ بیوی دروپدی کو بھی کھو دیاـ

یہی کچھ واقعات بعد میں پرتھوی راج چوہان، علاؤ الدین خلیجی، فیروز شاہ تغلق، شیر شاہ سوری، شاہجہان اور بعد میں برطانوی حکمرانوں کے ساتھ پیش آئے. مگر یہ بھی ایک حقیقت ہے کہ ماضی میں آٹھ بار جن حکمرانوں نے دہلی کو ازسرنو تعمیر کرایا، انہوں نے پرانا شہر مسمار نہیں کیاـ

دہلی یونیورسٹی کے تاریخ کے پروفیسر سری رام اوبرائے نے مجھے بتایا کہ دہلی میں اس وقت جو کچھ ہو رہا ہے، وہ ماضی میں کبھی نہیں ہواـ
کہتے ہیں جو قومیں اپنی تاریخ کے ساتھ انصاف نہیں کرتیں وہ نیست و نابود ہو جاتی ہیں ـ ہمیں اس پر بھی غور کرنا چاہیے.!!!

صدر شعبۂ اردو،کالج آف کامرس،آرٹس اینڈ سائنس
اُتّر پردیش کو ہندستانی سیاست کا حقیقی کارخانہ کہا جاتا رہا ہے۔ایک مختصر مُدّت کے لیے گجرات ماڈل اور وہاں نریندر مودی کی حکومت کے کارناموں کو چھوڑ دیں تو ہندستان کے بُرے اور منفی سیاسی تجربات کا سب سے بڑا ماڈل ہمیشہ سے اُتّر پردیش ہی رہا ہے۔ آزادی کے بعد انگریزوں کی غلامی سے نجات اور ایک نئے جوش اور جذبے کے ساتھ حکومتوں کا جو سلسلہ شروع ہوا، اس میں اُتّر پردیش سب سے بڑی رکاوٹ کے طور پر سامنے آیا۔ یہ سوال قابلِ غور ہے کہ آخر کون سی بات ہے کہ ہندستان کے سب سے بڑے صوٗبے، سیاسی اعتبار سے سب سے زیادہ وزیرِ اعظم اور گورنر اور مرکزی وزرا عطا کرنے والے صوٗبے کو اب بھی پسماندگی کی مثال کے طور پر کیوں پیش کیا جاتا ہے۔آخر پنجاب، مہاراشٹر، ہریانہ، کیرل، کرناٹک اور آندھرا یا گجرات کی ترقّیوں کے ساتھ یہ صوٗبہ کیوں دوڑ سے باہر ہو گیا؟ سیاسی پُشت پناہی اور مواقع کے اعتبار سے اس صوٗبے کو تو ہر دور میں سبقت حاصل رہی۔
حقیقت یہ ہے کہ ہندستان کے اس سب سے بڑے صوٗبے کا المیہ یہ رہا کہ یہاں تہذیب و ثقافت اور سماجی انقلاب کی ہَوا تک بھی نہیں پہنچی۔ جاگیر دارانہ سماج انگریزوں کی غلامی کے بعد آزاد ہوتے ہی جمہوری دور میں خود کو سماجی غلامی کی بیڑیوں سے آزاد کرانے کی جِدّو جُہد میں اُترا ہی نہیں۔ سماجی اصلاح کے بغیر جمہوری ادارے محض بے روٗح ڈھانچا بن کر رہ جاتے ہیں اور سماج پھر سے پُرانی زنجیروں میں مُقیّد ہو جا تا ہے۔اُتّر پردیش کا المیہ یہ رہا کہ یہاں کانگریس اور مسلم لیگ (آزادی کے قبل) کے افراد اکثر و بیش تر جاگیر دارانہ سماج سے آتے تھے۔تقسیمِ ملک کے بعد سب کے سب کانگریس کا حصّہ ہو گئے اور یو پی کی کانگریسی حکومت نے ذات پات، مذہب اور اوٗنچ نیچ کی بنیادوں پر تفریقی سیاست کو ہی اہمیت دی۔ اس کے اصلی نتائج اب سامنے آ رہے ہیں۔
یہ کہنا مشکل ہے کہ ہندستان کی آزادی کے بعد کانگریسی حکومتوں نے فرقہ وارانہ سیاست سے خود کو الگ کر لیا تھا اور آزاد جمہوری ملک کے خوابوں میں مُنہمک ہو گئے تھے۔ آلِ احمد سروٗر نے آزادی کے بعد یو ۔پی۔ کی کانگریس حکومت کو فرقہ پرستی کا کھُلا کھیل کھیلنے والا قرار دیا۔انھوں نے’ہندستان کدھر‘ خطبے میں کہا ہے کہ دہلی میں نہروٗ کی سیکولر ڈیموکریسی چل رہی تھی مگر لکھنؤ میں گوبند بلبھ پنت اور ٹنڈن کی فرقہ پرست سرکار اپنے ایجنڈے میں مشغول تھی۔ یو ۔ پی۔ میں اردو تعلیم کا جو جنازہ اُٹھا، وہ بھی ایک سوچی سمجھی اسکیم کے تحت ہوا۔ پورے سماج میں ایک غیر روادارانہ ماحول بنایاگیا اور دیہی علاقوں میں فرقہ پرستانہ آگ لگا کر پورے معاشرے میں کانگریس نے مسلمانوں کے لیے اور ان کی زبان کے لیے عرصۂ حیات تنگ کیا۔
پہلا تجربہ فرقہ وارانہ ضرور تھا مگراحیا پسندی کے اپنے اصول ہوتے ہیں۔ ٹھیک جیسے غلامی کے آداب ہیں، ملوکیت کے اطوار ہیں اور اس کے برعکس جمہوریت،رواداری اور روشن خیال سماج کے طور طریقے ہوتے ہیں۔ آزادی کی جنگ کے دوران مساوات، یکجہتی اور سماجی انصاف کی ایک خاص تربیت ہوئی تھی مگر تقسیمِ ملک اور فساد کی آڑ لے کر خاص طور سے اُتّر پردیش میں فرقہ پرستی سے چکّے کو الٹا گھمانے کی کو شش ہوئی۔ اگلے مرحلے میں سماجی انصاف کا بھی جنازہ نکلنا تھا۔ جنگِ آزادی کے دوران اورآئین سازی کے مرحلے میں جس ہوش مندانہ ماحول میں برابری اور انصاف کے اسباق پڑھائے گئے تھے، سب کے سب دھرے رہ گئے۔
ایسا نہیں ہے کہ جاگیردارانہ جکڑ بندی میں صرف اُتّر پردیش کی حکومت اور پھر سماج کی شمولیت رہی۔ راجستھان، بہار، بنگال میں بھی یہ ماحول تھا مگر وہاں سماجی تحریکوں نے اس سلسلے سے مناسب کام کیے۔ پنجاب نے بھی جاگیر دارانہ ماحول سے کم و بیش آزادی حاصل کرنے کی مہم ۱۹۵۰ء کی دہائی میں ہی شروع کر دی۔ زمین کا مساویانہ بٹوارا اور روٹی کپڑا اور مکان کی مُہم نے کام کیا۔ دشواری یہی ہوئی کہ اُتّر پردیش میں پہلا تجربہ فرقہ پرستی کے حوالے سے ہی سامنے آیا اور احیا پسندوں کے لیے کارآمد ثابت ہوا۔ اب آگے کیا تھا، طاقت ور برادریوں کے افراد حکومت میں تھے، انھوں نے جمہوری اداروں کی چھانو میں اپنی طاقت اور دائرۂ اثر کو بڑھانے میں کامیابی پائی۔ نتیجہ یہ ہوا کہ کمزور طبقے کے افراد ، اقلیت کے پس ماندہ لوگ اور دلت بھائی بہنوں کے ساتھ عام خواتین اس نئی زندگی کا حصّہ ہی نہیں بن پائے یا انھیں اس ترقی میں شامل ہی نہیں ہونے دیا۔
اُتّر پردیش کا مسئلہ یہ ہے کہ وہاں نہ صرف کانگریس کی ترقی پسندانہ سیاست فیل ہوئی بلکہ وہاں سماج وادیوں کی سیاست بھی اسی جال میں پھنس کر ناکام ہوئی۔ رام منوہر ہوہیا، چودھری چرن سنگھ، کانگریس سے نکلے ہیم وتی نندن بہوگُنا، وشوناتھ پرتاپ سنگھ اور بعد میں ملائم سنگھ یادو اور ان کے خاندان کی سیاست۔اسی سلسلے میںمایاوتی جی کا نام بھی ہمیں شامل کرنا چاہیے۔ سرکاریں بنیں، ٹوٹیں اور پھر بنیں۔ محاذ قایم ہوئے اور ٹوٗٹے۔ مگر کسی نے ووٹ حاصل کرنے کے علاوہ سماجی انصاف، مساوات اور جمہوری تقاضوں کو عوام النّاس تک پہنچانے کی کوشش نہیں کی۔ لوگ اگر کہتے ہیں کہ ان میں بھی مکھوٹا سرکاریں رہیں۔ دیکھنے میں بر سرِ اقتدار آپ ہیں مگر آپ سے بالکل مختلف نقطۂ نظر کے افراد اندر سے حقیقی کام کر رہے ہیں۔ ملائم سنگھ اور ان کے خاندان یا کماری مایاوتی کا سیاسی زوال صرف اسی سازش کی وجہ سے ہوا۔اگر انھوں نے اپنی حکومت جن بنیادوں پر قایم کی تھی، پس ماندہ، غریب اور دلِت طبقے کے حقوق کی بازیابی کے لیے جس طرح ووٹ حاصل کیے تھے؛ حکومت کرتے ہوئے ان کاموں کو وہ لوگ یکسر بھول گئے۔
بہار اور اُتّر پردیش کم و بیش ایک ہی انداز کی سماجی دشواریوں کی بنیاد پر کھڑے ہیں مگر بہار میں کرپوری ٹھاکر اور ایک حد تک لالوٗ یادو کے عہد میں سماج کے کمزور طبقوں کی طرف داری میں حکومتوں کے سامنے آنے کے واقعات نظر آئے۔ درجنوں خوں آشام مواقع آئے مگر عوامی سطح پر مقابلے کے لیے کمزور لوگ سامنے آنے لگے اور حکومت نے بھی حسبِ گنجایش کمزوروں کی طرف داری کی۔ پولیس اور انتظامیہ کو بھی معلوم تھا کہ وہ اپنی حد سے آگے بڑھیں گے تو حکومت اور عوام برداشت نہیں کریں گے۔ اس لیے یہ ممکن ہوا کہ گذشتہ تیس برسوں میں چاہے کسی محاذ کی حکومت ہو، اس کا لیڈر سماج کے کمزور طبقے سے آئے گا۔ اب بھی طرح طرح کی سازشیں ہو رہی ہیں مگر فرقہ پرست جماعتوں کو بھی اپنی پس ماندہ قیادت کو ہی بہار میں آگے رکھنا پڑتا ہے۔
یہ سماجی شرم کی بات ہے کہ زنا کاروں، قاتلوں اور جرائم پیشہ افراد کی طرف داری میں اُتّر پردیش میں ایک طبقہ جلوس نکال رہا ہے۔ یہ علی الاعلان گذشتہ کئی برسوں سے ہو رہا ہے۔پہلے اندرونی طور پر یا انتظامیہ اور پولیس کی سطح پر یہ تماشے ہوتے تھے مگر اب یو پی کے وزیرِ اعلا کی وجہ سے بلند حوصلے کے ساتھ ایسی طاقتیں میدان میں آ گئی ہیں ۔اس کے برعکس کسی صحافی اور سیاسی کارندے کو متاثّرین سے ملنے نہیں دیا جا رہا ہے۔ پولیس اس طرح سے کام کر رہی ہے جیسے واقعی وہ جمہوری عہد میں نہ ہو بلکہ وہ کسی زمین دار کی نجی پولیس ہو اور اسے ظالموں کے ساتھ کھڑا ہونا ہے۔ ایک کے بعد ایک واقعات ہوتے جا رہے ہیں ، دلّی سے لے کر لکھنؤ تک کی حکومتوں کے مشاغل مختلف ہیں اور جو امکانات جاری ہو رہے ہیں ، اس سے اندازہ ہورہا ہے کہ حکومتوں کے اشارے سے سب کچھ ہو رہا ہے۔
اُتّر پردیش کا سیاسی کارخانہ جنگِ آزادی اور اس کے بعد آئین سازی کے دوران کے تمام مثالی کاموں پر کالکھ پوتنے کے لیے کاربند ہے۔بابری مسجدکے ہر دور کے معاملات پر نظر رکھیے تو یہ سمجھنا دشوار نہیں کہ سلسلہ در سلسلہ ظلم و جبر اور انصاف کے خون کی کہانیاں لکھی گئیں۔ پہلے بڑی عدالتوں کے دروازے کھٹکھٹا کر لوگ کئی بار حکومت کی بے انصافی سے نجات حاصل کر لیتے تھے۔ اب کم و بیش وہ راستابند ہوتا ہوا معلوم ہوتا ہے۔ لوگ یہ سوچنے گے ہیں کہ کیا اِسی دن کے لیے ہزاروں لوگوں نے اپنی جانیں گنوائی تھیں؟ جمہوریت کتاب میں لکھی ہوئی اچھی اچھی باتوں کا نظام ضرور ہے مگر اِسے زمین پر اُتارنے کے لیے ایمان اور انصاف کی ضرورت ہوتی ہے۔ فرانس کے انقلاب میں آزادی، مساوات اور بھائی چارہ کے تصوّرات کو اصول کی طرح تسلیم کیا گیا تھا۔ ہندستان کی آزادی کے دوران مہاتما گاندھی کا ان اصولوں پر ہمیشہ زور رہا۔ افسوس اس کا ہے کہ برہمن وادی نظام کی ترجیحات کو ہم جمہوری اداروںکے حوالے سے آگے بڑھانے میں منہمک ہیں۔ اس میں سماج اور ملک دونوں کی شکست طے شدہ ہے۔
بابری مسجد کا انہدام بھی ایک بربریت اور قبیلائی طور تھا۔ گجرات کے فسادات بھی اسی نہج پر سامنے آئے۔سی بی آئی اور عدالتوں کے راستے بھی کم و بیش اسی انداز کے ہیں۔ حکومتیں مضبوط لوگوں کے ہاتھوں کی لاٹھی ہو گئی ہیں۔ اس لیے کمزور کی جان، مال اور آبروٗ کی حفاظت نہیں ہو سکتی۔ یہ جمہوری حکومتوں کا طور نہیں ہے۔ یہ جنگلوں کے زمانے کے انسانوں کا راج ہے۔ اس جبر کے خلاف کوئی سیاسی پارٹی دل سے نہیں کھڑی نظر آتی ہے۔ خدا اپنے بندوں کی حفاظت کرے۔

(مضمون میں پیش کردہ آرا مضمون نگارکے ذاتی خیالات پرمبنی ہیں،ادارۂ قندیل کاان سےاتفاق ضروری نہیں)

صدرشعبۂ اردو، کالج آف کامرس، آرٹس اینڈ سائنس، پٹنہ(بہار)

مغر بی بنگال بھارتیہ جنتا پارٹی خواتین وِنگ کی صدر اگنی ماتا پال نے رام مندر کی بنیاد رکھنے کے پروگرام کے سلسلے سے اپنی پارٹی کے سربراہ نریندر مودی کے لباس کے شعور کی تعریف کرتے ہوئے انھیں ہندستان میں فیشن انڈسٹری کو ایک نئی شناخت دینے والے شخص کے طَور پر پہچاننے کی کوشش کی۔ محترمہ اگنی ماتا پال یوں بھی ایک فیشن ڈیزائنر ہیںاور بھارتیہ جنتا پارٹی میں تازہ واردین میں ہیں۔ اس لیے انھوں نے اپنے لیڈر کو اپنی پُرانی تربیت کے مطابق سمجھنے کی کوشش کی اور اسی طور سے عوام کے بیچ میں مودی کا شناخت نامہ پیش کیا۔وہ سابق وزراے اعظم میں جواہر لال نہرو کے لباس کے شعور کو پسند کرتی ہیں مگر ان کا کہنا ہے کہ ہمارے موجودہ وزیرِ اعظم اُن سے آگے نکل چکے ہیں۔
نریندر مودی جب تک آر۔ ایس۔ایس۔ کے کُل وقتی کارندے کے طَور پر گلی محلّوں میں گھوٗمتے رہے، ان کے شعور ِ لباس پر کسی کی توجّہ نہیں گئی۔ ان کی پُرانی تصویریں اس بات کی گواہ ہیں کہ وہ بے حد سادہ اور متین لباس کے قائل رہے۔ آر ۔ایس۔ایس۔ سے جب وہ بھارتیہ جنتا پارٹی کے سکریٹری بن کر دلّی پہنچے، اس زمانے میں بھی ایسا محسوس ہوتا ہے کہ نریندر مودی کودلّی کی ہوا نہیں لگی۔ کُرتا پاجامہ یا دھوتی کُرتے یا خاکی پینٹ اور کُرتے میں وہ کبھی فیشن ایبل آدمی کی طرح نظر نہیں آئے۔ وہ جب گجرات کے وزیرِ اعلا بنائے گئے، وہاں تقریباً چودہ سال کی وزارت میں ان کے دھج میں کوئی خاطر خواہ اضافہ نظر نہیں آیا۔ یہ یاد رہے کہ کپڑے کے مل اور کارخانوں کے لیے گجرات کی مرکزیت سے ہم سب واقف ہیں مگر وہاں کی فیشن انڈسٹری نے کبھی نریندر مودی کو اپنی مُٹّھی میں لینے میں کامیابی حاصل نہیں کی۔ وہ کم و بیش اسی سویم سیوک کی طرح سادگی اور بے فکری کا پیکر بنے رہے۔ ابتدائی دور میں ان کی مقبولیت اور رفتہ رفتہ قومی سطح کی پہچان میں اس ظاہری طَور کا بھی دخل ہے۔
۲۰۱۴ء کی آمد آمد تھی جب بھارتیہ جنتا پارٹی میں وہ رسّا کشی انجام کو پہنچی اور پارٹی کے متوقع وزیرِ اعظم امّید وار کے طَور پر نریندر مودی میدان میں آئے۔ ۲۰۱۴ء کے پارلیمانی انتخاب میں نریندر مودی نے ملک کے طوٗل و عرض میں بہت کامیابی کے ساتھ اپنے خطابات پیش کیے۔ یہ کہنا نامناسب نہیں ہو گا کہ اس انتخاب کی کامیاب مہم کی ہی پوری بھارتیہ جنتا پاری آج تک روٹیاں کھا رہی ہے۔ اسی دوران نریندر مودی نے کانگریسی وزیرِ اعظم، اس سے بڑھ کر ماں اور بیٹے کی سیاست کو اپنے قدموں سے روندتے ہوئے اپنی انتخابی مہم کے جارحانہ رُخ سے سب کچھ حاصل کر لیا۔ اس مہم کے دوران کبھی کبھی ایک دن میں نریندر مودی کی چار اور پانچ سبھائیں ہوتی تھیں ۔ ہندستانی سیاست میں دو خاص چیزیں اس وقت دیکھنے کو ملیں۔ ہر سبھا میں نریندر مودی کا لباس بدل جاتا تھا اور کانگریس کے لیڈران نے گھنٹے دو گھنٹے پہلے اپنی کسی تقریر میں کوئی بات پیش کی تھی، اس کا نریندر مودی بر محل جواب دیتے تھے۔ مطلب یہ ہے کہ سیاست کا کوئی معاملہ باقی ماندہ کے خانے میں نہیں رکھتے تھے۔ آج کا سوال ہے تو اُسے آج ہی جواب دے کر خارج کر دیا جائے۔اس دوران ٹیلی وژن کے ہر نشریے میں نریندر مودی کی ایک مختلف انداز کی تصویر دکھائی دیتی۔ہمیشہ موضوع بھی نیا ہوتا اور لباس بھی ۔ ظاہر ہے دونوں جہت سے ایسا اہتمام کسی دوسرے سیاسی قائد کے یہاں دیکھنے کو نہیں ملتا تھا۔ نریندر مودی کی بڑھتی ہوئی مقبولیت کا یہ ایک بنیادی سبب تھا۔
اس زمانے تک نریندر مودی نصف بانہوں کی شرٹ یا کُرتا پہنتے تھے۔ وزارتِ اعلا کے آخری دور میں کچھ عالمی اجتماعات میں وہ کورٹ اور پینٹ میں بھی نظر آ چکے تھے۔ اپنے کچھ غیر ملکی دَوروں میں بھی وہ مغربی جدّت پسندی کے ساتھ نظر آ چکے تھے مگر ان کی عوامی امیج لباس کی سادگی اور بے فکری کے ساتھ ہی قایم ہوئی تھی۔ مگر ۲۰۱۴ء کے انتخابات کے دوران نریندر مودی نے جتنے رنگ برنگے لباس پہنے اور اُتارے، اس سے یہ اندازہ ہونے لگا تھا کہ یہ سیاست کے ساتھ ایک نئے فیشن کے اَوتار کی بھی آمد آمد ہے۔ ایک متوقع وزیرِ اعظم کا انداز کیسا ہونا چاہیے، اسے ذہن میں رکھ کر نریندر مودی کی صوٗبائی حکومت اور بھارتیہ جنتا پارٹی نے ایسا نیا اندازاختیار کیا ہوگا کہ نریندر مودی کا وہ جادوٗ چل گیا اور وہ وزیرِ اعظم کی کُرسی پر جلوہ افروز ہوئے۔
نریندر مودی جیسے ہی وزیرِ اعظم ہوئے، اب صوٗرت بدلنے لگتی ہے۔ الیکشن کی مہم میں وہ ہاف شرٹ میں ہی نظر آتے رہے مگر وزیرِ اعظم کے طَور پر حلف برداری میں ان کا کُرتا مکمّل بانہوں کا نظرآیا۔ فوراً یہ بات سمجھ میں آنے لگی کہ ہاف پینٹ اور ہاف شرٹ کی زندگی سے اب وہ چھلانگ لگا ئیں گے۔ پھر تو ایک نئی زندگی شروع ہو گئی۔ امریکہ کے صدر ہندستان آتے ہیں ، ان کے استقبال کے لیے نریندر مودی کے لیے جو کوٹ تیّار ہوا ، اس وقت اس کی قیمت دس لاکھ روپے بتائی گئی تھی۔ رفتہ رفتہ نریندر مودی وزیرِ اعظم کے ساتھ ساتھ ایک فیشن ایبل شخص کے طَور پر بھی اُبھرنے لگے۔ ٹیلی وژن میں ان کی پانچ طرح کی مصروفیتوں کا گوشوارہ آئے گا تو آپ یقین کے ساتھ یہ کہہ سکتے ہیں کہ سب جگہ ان کا لباس اور ان کے کپڑوں کے رنگ بدلے ہوئے ہی ہوں گے۔ یعنی ٹیلی وژن سے خبریں دیکھنے والے افراد ایک ہی جیسے نریندر مودی کودیکھ کر اُکتائیںگے نہیں۔موقع و محل کے اعتبار سے ان میں واضح تبدیلی آپ محسوس کر سکتے ہیں۔ رفتہ رفتہ انھوں نے اپنے باڈی لینگویج میں بھی تبدیلی کی اور وہاں بھی پچھلے زمانے کا انداز نہیں رہا بلکہ انھوں نے ہاتھوں کے اشارے اورجسم کے اعضا سے بیان کو مستحکم کرنے کا نیا طَور قایم کیا۔ ضرورت کے مطابق مسکرا نا یا طنز کرنا بھی ان کے نئے انداز میں شامل ہو تا گیا۔
دنیا کی یہ ریٖت ہے کہ وہ اپنے قائدین کی نقل کرتی ہے۔ اگر ایسے لوگ نہ ہوں تو ان کی مقبولیت کا اندازہ کیسے ہو اور یہ بات بھی قابلِ توجّہ ہے کہ انھیں چاہنے والے نہ ہوں تو کس کے ووٹ سے وہ ایسے منصب تک پہنچیں گے۔ ایسا بھی نہیںہے کہ نریندر مودی ایسے پہلے وزیرِ اعظم ہیں جن کے انداز و لباس کی دنیا نقل کر رہی ہے۔ جواہر لال نہرو کی شروانی اور اس میں گلا ب رکھنے کا فیشن توصرف کانگریسیوںنے نہیں اپنایا بلکہ عوام و خواص میں بھی اُسے مقبولیت ملی تھی۔ مگر جواہر لال نہرو بھڑکتے ہوئے رنگوں کے شیدا نہیںتھے۔ اندر اگاندھی کے انداز کو بھی سیاست میں موجود خواتین نے اپنانے کی کوشش کی۔ راجیو گاندھی نے شال اوڑھنے کا ایک عجیب و غریب ڈھب اپنایا جسے کانگریس کے لوگوں نے ہوٗ بہ ہوٗ اپنانے کی کوشش کی۔
آزادی کی لڑائی میں مہاتما گاندھی نے کھادی اور سادہ لباس کی وکالت کی تھی۔ وہ خود بھی آدھا لباس پہنتے تھے اور ملک کے حالات کے پیشِ نظر اسے موزوں سمجھتے تھے۔ خاص طور سے ملک میں غربت اور پریشاں حالی کی وجہ سے ان کا ماننا تھا کہ جب تک سارے لوگوں کو پیٹ بھر کھانا اور پورا لباس میسّر نہیں آ جاتا، اس وقت تک انھیں یہ منظوٗر نہیں تھا کہ اپنے جسم پر پوٗرا لباس ڈالیں۔ انھیں یہ عادت غربت کا مذاق اُڑانے جیسی لگتی تھی۔
غالباً ۱۹۷۷ء کا دور تھا۔ ملک میں نئی وزارتیں بن چکی تھیں۔ بہار کے وزیرِ اعلا کرپوری ٹھاکر تھے۔ جے پرکاش نرائن کے گھر پر اس وقت جنتا پارٹی کے صدر چندر شیکھر جے ۔پی کی تیمار داری میں آئے ہوئے تھے۔ اسی دوران وہاں کرپوری ٹھاکر بھی پہنچ گئے۔ اس محفل میں سیاست اور سماج سے متعلق بہت ساری برگزیدہ شخصیات بھی موجود تھیں۔ اچانک چندر شیکھر جی اُٹھے اور اپنے دامن کو بھیک کے کاسے میں تبدیل کر تے ہوئے لوگوں کے سامنے باری باری سے پہنچنے لگے اور لوگوں سے بہار کے وزیرِ اعلا کے لیے کپڑا خریدنے کا چندہ طلب کرنے لگے۔ سب جانتے تھے کہ کر پوری ٹھاکر پھٹے پُرانے لباس میں اپنا کام چلالیتے ہیں۔ اس وقت بھی کرپوری ٹھاکر اسی انداز کے لباس میں موجود تھے۔ لوگوں نے فراخ دلی سے حسب استطاعت چندہ پیش کیا۔ اتنی رقم آ گئی کہ وزیرِ اعلا کے کئی لباس تیّار ہو سکتے تھے۔ چندر شیکھر جی نے وہ رقم جے پرکاش نرائن کے ہاتھ میں دی اور جے ۔ پی سے یہ گزارش کی کہ آپ انھیں یہ رقم دیتے ہوئے اس بات کی خاص ہدایت کریں کہ یہ کسی دوسرے کام میں نہ لگا دیں۔ جے ۔ پی۔ نے وہ رقم کرپوری ٹھاکر کو دی۔ وہیں اس وقت کے بہار کے چیف سکریٹری بھی موجود تھے۔ کرپوری ٹھاکر نے وہ رقم انھیں دیتے ہوئے یہ ہدایت دی کہ اس رقم کو وزیرِ اعلا ریلیف فنڈ میں جمع کر دیا جائے۔
کورونا کے آغاز کے دور میں وزیرِ اعظم نریندر مودی نے قوم کے نام جو خطابات شروع کیے، اس وقت انھوں نے ماسک کے بدل کے طور پر گمچھا یا دوپٹے کا بھی مشورہ دیا تھا۔ جنھوں نے وہ تقریر ٹیلی وژن پر سُنی تھی، اس میں بھی گمچھا رکھنے اور ہٹانے کے ڈرامائی انداز کو ملاحظہ کیا ہوگا۔ اس دن کے بعد آج تک نریندر مودی کی جتنی بھی تصویریں نظر آئیں، ان میں وہ نئے بارڈر اور پرنٹ کے گمچھوں کے ساتھ نظر آئے۔ وہ کار سیوک کے زمانے میں بھی گمچھوں کے ساتھ ہوتے تھے۔ اس زمانے میں وہ گمچھے تولیہ کا بدل ہوتے تھے اور ان سے کام لیے جاتے تھے مگر ابھی تونام نہاد منھ چھپانے کے ہی کام لیے جاتے ہیں۔ مگر ہمیشہ فیشن اوتار اسے اتنے رنگ اور اتنے انداز سے پیش کرتا ہے کہ یہ یقین ہی نہیں آتا کہ جمہوریت میں لوگوں کی گاڑھی کمائی سے جو رقم حکومت تک پہنچتی ہے ، اسی کا یہ فیّا ضانہ طَور اور یہ شاہ خرچی کیوں کر مناسب ہے۔ یہ شاہ خرچی اُس زمانے میں بھی آسمان کو چھوٗ رہی ہے جب ہندستان اور پوری دنیا مصیبتوں کے بھنور میں بے دم ہیں۔ کروڑوں لوگ بے روز گار ہوئے اور بھوکے مرنے کے لیے مجبور ہیں مگر جمہوری دور کا یہ نمایندہ ان سب سے بے پروا ہو کر اپنی فیشن پرستی کی داد لینے میں مصروف ہے اور کمال تو یہ ہے کہ اس کے ارد گرد بھی اس کے ایسے ہی چاہنے والے موجود ہیں جو اس کی عوامی جواب دہی سے پرے جا کر صرف ایک ذات اور شخصیت کے طور پر اُسے پہنچاننے کی کوشش کرتے ہیں۔ کسی بھی جمہوری ملک میں عوام کے پیسوں پر اپنے خوابوں کی فصیل سجانا نا مناسب ہے۔
پچھلے کچھ دنوں سے نریندر مودی کی داڑھی بڑھ رہی تھی اور بال بھی پیچھے کی طرف لمبے ہو رہے تھے۔ لاک ڈائون کے زمانے میں جب تمام سیلون بند تھے، سارے ہندستان کا کم و بیش یہی انداز تھا مگر اُس زمانے میں بھی نریندر مودی سجے دھجے دکھائی دے رہے تھے۔ مجھے اوّلاً یہ سوٗجھا تھاکہ یہ امیج رام بھکتی کی داد لینے کے لیے تیّار کی جا رہی ہے۔ پیلے لباس ، دوشالہ سب میں وہ سادھوٗ سنتوںکے نئے سردار کے طَور پر سامنے آئے۔ درشن میں اسی فیشن ایبل انداز میں انھوں نے دنڈوت بھی کیا۔ منھ کے بل زمین سے ایسے لگے جیسا کوئی دوسرا رام بھکت کہاں سے پیدا ہو سکتا ہے؟ دیکھنا یہ ہے کہ اب بال اور داڑھی کا یہ انداز کتنے دنوں تک قایم رہتا ہے۔ کبھی کبھی اندیشہ ہوتا ہے کہ اب حکم رانی کا نئے اوتار کا یہ چہرہ پہلے سے زیادہ فرقہ پرست ، پہلے سے بڑھ کر انصاف کا قاتل، پہلے سے بڑھ کر اقلیت اور محرورم طبقوں کا دشمن تو نہیں ہوگا؟ دیکھنے میں بیراگی مگر ملک کے عام لوگوں کی زندگی کا سودا گر؛خدا خیر کرے!!!

شکیل رشید(ایڈیٹر ممبئی اردو نیوز)

وزیراعظم نریندر مودی نے ایسا کیوں کیا؟کیا ایک سیکولر جمہوری ملک کے لیے یہ ٹھیک ہے؟

یہ سوال ایک صاحب نے بڑے ہی غصے سے پوچھا تھا۔ وہ اس بات پر خفا تھے کہ وزیراعظم نے قوم سے خطاب کرتے ہوئے آئندہ نومبر تک آنے والے سب ہی تہواروں کے نام لیے مگر بقرعید کا ذکر تک نہیں کیا۔ ان کا اشارہ 30 جون کے وزیراعظم کے اس خطاب کی طرف تھا جس میں انہوں نے کورونا کی وباء سے نمٹنے کے لیے لاک ڈاؤن اور بتدریج کیئے جا رہے اَن لاک کے دوران مرکزی سرکار کے اقدامات کا تذکرہ کرتے ہوئے رکھشا بندھن اور گنیش چترتھی سے لے کر دیوالی اور چھٹ تک ہر تہوار کا نام لیا تھا، اور لوگوں سے احتیاط برتنے کی درخواست کی تھی۔ حالانکہ بقرعید کا تہوار اگست ہی میں ہے لیکن ان کی زبان پر اس کا نام تک نہیں آیا تھا۔ ویسے انہوں نے کرسمس کا نام بھی نہیں لیا تھا، شاید اس لیے کہ سرکاری سہولیات صرف نومبر کے مہینے تک کے لیے ہی ہیں۔ یا یہ بھی ہو سکتا ہے کہ سرکاری سہولیات دسمبر تک رکھی ہی اس لیے نہ گئی ہوں کہ کہیں عیسائیوں کے تہوار کرسمس کا نام نہ لینا پڑ جائے۔ بات جو بھی ہو وزیراعظم نے اپنے خطاب میں صرف ہندو تہواروں کے ہی نام لیے۔ لیکن اس میں ناراض ہونے کی یا غصے میں آنے کی کیا بات ہے؟ وزیراعظم مودی نے ایسا نہ پہلی دفعہ کیا ہے اور نہ آخری دفعہ، انہوں نے پہلے بھی ایسے اقدامات کیے اور ایسی باتیں کہی ہیں جنہیں ایک طبقہ غیر جمہوری اور غیر سیکولر قرار دیتا رہا ہے۔ جب 2014 کے الیکشن ہونے والے تھے اور مودی ابھی گجرات کے وزیراعلیٰ ہی تھے تب عالمی نیوز ایجنسی رائٹر نے ان سے ایک انٹرویو لیا تھا جس میں ایک سوال گجرات کے 2002 کے مسلم کش فسادات سے متعلق تھا کہ کیا گجرات تشدد پر انہیں افسوس ہے؟ اس سوال کا جواب دیتے ہوئے مودی نے کتّے کے پلّے کی مثال دی تھی کہ میں ایک وزیر اعلیٰ ہوں یا نہ ہوں ایک انسان تو ہوں اگر کوئی کتّے کا پلّا گاڑی کے نیچے آجائے تو افسوس تو ہوگا ہی۔ چونکہ انہوں نے گجرات فسادات کے پس منظر میں یہ بات کہی تھی اس لیے اگر لوگوں نے یہ سمجھا کہ وہ فسادات میں مارے جانے والوں کو کتّے کے پلّے سے تعبیر کر رہے ہیں تو وہ یہ سمجھنے میں کچھ غلط بھی نہیں تھے۔ اور جو سیاست داں ملک کی سب سے بڑی اقلیت کے لیے پلّے والی مثال دے اس سے بھلا یہ امید کیسے کی جا سکتی ہے کہ وہ اپنے خطاب میں مسلمانوں کے تہوار بقرعید کا ذکر کرے گا!! ایسی کوئی بھی امید فضول ہے۔

دنیا جانتی ہے کہ وزیراعظم بننے کے بعد مودی نے سب کا ساتھ سب کا وکاس کا نعرہ تو لگایا مگر وکاس صرف ہندوتوادیوں کا ہی کیا۔ دراصل مودی سرکار نے پہلی پاری سے ہی اس راستے پر چلنا شروع کردیا تھا جو ملک کو ہندو راشٹر کی سمت لے جا سکے، اسی لیے فیصلے بھی ہندوؤں بلکہ ہندوتوادیوں کے مفادات کو مدنظر رکھ کر کیے گئے۔ اور دوسری پاری میں سب کا ساتھ سب کا وکاس کے نعرے کے ساتھ سب کا وشواس بھی نتھی کر دیا گیا، لیکن اس پاری کے آغاز ہی سے فیصلوں میں مسلم مخالفت کی شدت بڑھتی گئی، اور مسلم اقلیت کا جو رہا سہا وشواس تھا وہ بھی دم توڑ گیا۔ طلاق اور شادی کے عائلی قوانین میں مداخلت اس لیے نہیں تھی کہ مودی سرکار مسلم خواتین کی بےبسی اور بے کسی پر غمزدہ تھی، مداخلت صرف اس لیے تھی کہ مسلم اقلیت کو یہ باور کرایا جاسکے کہ سیکولر اور جمہوری کہلانے والے بھارت میں بھی ان سے ان کے مذہبی حقوق چھینے جا سکتے ہیں۔ اور حقوق چھینے بھی گئے۔ کبھی راست اور کبھی بالواسطہ۔ بابری مسجد تمام ثبوتوں کے باوجود رام مندر کی تعمیر کے لیے سونپ دی گئی، سی اے اے کے نام سے ناپسند لوگوں کی شہریت کو مشکوک کرنے کا ایک قانون پارلیمنٹ سے منظور کرا لیا گیا، اور اسے منظور کرانے میں نام نہاد سیکولر سیاسی پارٹیاں اور سیاست داں بھی شامل تھے، اس طرح بھارت میں مسلمانوں کے وجود پر سوالیہ نشان لگانے کا ایک آلہ حاصل کرلیا گیا۔ لہٰذا جو وزیراعظم مسلمانوں کی شہریت کو ہی مشتبہ بنانے کے لیے پیش پیش ہو اس سے بھلا یہ توقع کیسے کی جا سکتی ہے کہ وہ اپنے خطاب میں مسلمانوں کے تہوار بقرعید کا ذکر کرے گا!!

سی اے اے، این آر سی اور این پی آر مودی سرکار کے تین ایسے ‘کارنامے’ ہیں جو بھارت کی جمہوریت اور اس کے سیکولرزم کے دعوے کو کٹگھرے میں لا کر کھڑا کر دیتے ہیں۔ سی اے اے کے خلاف مسلمان اور بھارت کی دیگر اقلیتیں اور پچھڑے طبقات نے تو تشویش کا اظہار کیا ہی ہے، اقوام متحدہ اور یورپی یونین نے بھی تشویش ظاہر کی ہے۔ لیکن کیا کسی کی بھی تشویش پر حکومت کے کان پر جوں رینگی؟ جی نہیں!! مودی سرکار پر کوئی فرق نہیں پڑا بلکہ اس نے الٹے ان طلباء اور نوجوانوں کو اور ان خواتین کو جنہوں نے دہلی ہی نہیں ملک بھر میں آئین کے دائرے میں رہتے ہوئے یا بالفاظ دیگر آئینی حقوق کا استعمال کرتے ہوئے سی اے اے، این پی آر و این آر سی کے خلاف احتجاجی تحریکیں اور مظاہرے کیے تھے، قانونی اقدامات شروع کر دیے۔دہلی کے مسلم کش فسادات کے لیے انہیں ملزم بنا دیا اور یو اے پی اے جیسے سخت ترین قانون کے تحت ان کے خلاف کارروائی شروع کردی۔ دہلی کی پولیس نے ہر اس شخص کو نشانے پر لے لیا جو سی اے اے مخالف تحریک سے کسی نہ کسی صورت میں جڑا ہوا تھا۔ سرکار کے ایک اشارے پر ان کے نام بھی ایف آئی آر میں درج کر لیے گئے جو اپنی ساری زندگی فرقہ پرستی کے خلاف اور لوگوں کو ان کے حقوق دلانے کے لیے سینہ سپر رہے ہیں۔ ان ڈاکٹر حضرات پر بھی کارروائی کا خطرہ منڈلانے لگا ہے جنہوں نے فسادات کے دوران زخمیوں کو طبی امداد دی تھی۔ الہند اسپتال کے مالک ڈاکٹر انور کا نام ایک ایف آئی آر میں درج کر لیا گیا ہے۔ بھلا جو سرکار جمہوری اور آئینی تحریکیں نہ برداشت کر پاتی ہو اورفرقہ پرستی کے مخالفین اور حقوقِ انسانی کے کارکنان اور ڈاکٹر تک کو مجرموں کے کٹہرے میں کھڑا کرنے سے نہ ہچکچاتی ہو اس سرکار کے مکھیہ سے یہ امید کیسے کی جا سکتی ہے کہ وہ اپنے خطاب میں بقرعید کا ذکر کرے گا!!

اگر کسی حکومت کی جمہوریت اور سیکولرزم کے پیمانے کو ناپنا ہو تو اس کے لیے یہ کلیہ ہے کہ اس کے اداروں کی آزادی کو پرکھ لیا جائے۔جس ملک میں سرکاری ادارے اور ایجنسیاں جتنا آزاد ہوں گی اس ملک کا جمہوریت اور سیکولرزم کا دعویٰ اسی قدر مضبوط ہوگا۔ کیا بھارت میں ایسا ہے؟ ہم اوپر دہلی پولیس کا ذکر کر آئے ہیں، اس کے تعلق سے ابھی پچھلے دنوں ایک خبر شائع ہوئی تھی کہ وہ دہلی فسادات کے شکایت کنندگان پر شکائتیں نہ درج کروانے کے لیے اور گواہوں پر بیانات بدلنے کے لیے دباؤ ڈال رہی ہے۔ نثار احمد نامی ایک کپڑا تاجر نے باضابطہ عدالت میں درخواست کی ہے کہ پولیس ان کی شکایت درج نہیں کر رہی ہے بلکہ ان پر دباؤ ڈال رہی ہے کہ وہ چوری کی شکایت درج کروائیں۔ دہلی کے بھاگیرتھی وہار کے رہنے والے نثار احمد کا کہنا ہے کہ فروری میں دہلی فسادات کے دوران ان کی دکان اور ان کے مکان کو لوٹ لیا گیا تھا۔ نثار احمد نے لوٹ پاٹ میں حصہ لینے والے چند افراد کے نام بھی اپنی شکایت میں لکھے ہیں۔ انہوں نے کہا ہے کہ وہ عینی گواہ ہیں کہ فسادی جو تھے وہ آتے جاتے لوگوں کی شناخت کے لیے ان کی پینٹ اتار کر دیکھتے تھے اور تلوار سے کاٹ کر لوگوں کو نالے میں ڈال دیتے تھے، برقعہ پوش عورتوں کو بھی نہیں بخشا گیا اور ان کی خود کی اپنی دکان کو اور مکان کو لوٹ لیا گیا۔ پولیس ان کی شکایت درج کرنے کو تیار نہیں ہے۔ اور بی جے پی کے لیڈر دھمکیاں دیتے پھر رہے ہیں۔ یہ کوئی واحد معاملہ نہیں ہے۔ دہلی پولیس پر حقوقِ انسانی کی تنظیموں نے سنگین الزامات عائد کیے ہیں۔ الزام ہے کہ عینی گواہوں کی سینکڑوں تحریری گواہیاں دبا دی گئی ہیں، ان گواہیوں میں بی جے پی لیڈران بالخصوص کپل مشرا، انوراگ ٹھاکر اور پرویش ورما کی شر انگیزیوں کا بھی ذکر تھا۔ یہ وہی پولیس ہے جس پر، فیضان نامی ایک نوجوان کو جان سے مارنے کا اور فیضان کی والدہ قسمتن کی طرف سے بیان بدلوانے کے لیے دباؤ ڈالنے کا الزام ہے۔ دہلی پولیس پر یہ بھی الزام ہے کہ وہ ایک مخصوص کمیونٹی کو نشانہ بنا رہی ہے اور فسادات کے ملزمین اور کارروائیوں کی تفصیلات یہ کہہ کر بتانے سے انکار کر رہی ہے کہ یہ حساس معاملے ہیں۔ ظاہر ہے کہ پولیس آزاد نہیں ہے، اسے مودی سرکار میں نمبر دو کی پوزیشن کے حامل مرکزی وزیر داخلہ امیت شاہ کی انگلی کے اشارے پر کام کرنا پڑ رہا ہے اور وہ بڑی دلجمعی سے یہ کام کر بھی رہی ہے۔ یاد رہے کہ وہ جمہوریت ناقص ہوتی ہے جس میں پولیس غیر جمہوری طرز اپنائے، چاہے ایسا وہ حکومت کے اشارے پر کرے یا بااثر شخصیات کے اشارے پر۔ اب بھلا جس حکومت میں مسلمانوں کی جائز شکائتیں نہ سنی جا رہی ہوں، پولیس شکایت کنندگان پر شکایت نہ درج کروانے کے لیے دباؤ ڈالتی ہو اس حکومت کا حاکم کیوں مسلمانوں کے تہوار بقرعید کا ذکر کرے گا!!

اس سرکار کا ایک اور ادارہ ہے جسے حقوق انسانی کے قومی کمیشن کے نام سے جانا جاتا ہے۔ یہ ادارہ کتنی آزادی سے اور کتنے دباؤ میں کام کرتا ہوگا اس کا اندازہ جامعہ ملیہ اسلامیہ دہلی کے طلبہ پر کیمپس اور لائبریری کے اندر پولیس کے تشدد کی اس رپورٹ سے ہو جاتا ہے جو ابھی چند روز پہلے ہی سامنے آئی ہے۔ کمیشن کی ایک ٹیم نے ایس ایس پی منزل سینی کی قیادت میں جامعہ کا دورہ کیا تھا جہاں 15 دسمبر 2019 کو اطلاعات کے مطابق پولیس نے سی اے اے کے خلاف مظاہرہ کرنے والوں پر کیمپس کے اندر اور لائبریری میں زیادتی کی اور تشدد کیا تھا۔ کمیشن کی رپورٹ میں، سی اے اے کے خلاف جمع مظاہرین کی بھیڑ کو غیر قانونی قرار دیا گیا ہے، رپورٹ کے مطابق احتجاجیوں نے تشدد کیا، سرکاری اور پرائیوٹ املاک کو نقصان پہنچایا اور پولیس اہلکاران پر سنگ باری کی، پٹرول بم پھینکے اس لیے ان کا یہ دعویٰ کہ درست نہیں ہے کہ وہ احتجاج کے اپنے آئینی حق کا استعمال کر رہے تھے۔ کمیشن نے اپنی رپورٹ میں ایک ایسی بات کہی ہے جو اس کی غیر جانبداری پر سوالیہ نشان لگا دیتی ہے۔ کمیشن کا کہنا ہے کہ جامعہ ملیہ اسلامیہ کے احتجاج کے حقیقی مقاصد اور اس کے پس پشت حقیقتاً رہے لوگوں کی نقاب کشائی ضروری ہے کیونکہ لگ یہ رہا ہے کہ بڑی ہی ہوشیاری سے طلباء کی آڑ میں اس احتجاج کا انتظام کیا گیا۔ واضح رہے کہ بی جے پی سرکار بھی یہی کہتی چلی آ رہی ہے کہ مظاہروں کے پس پشت جو افراد ہیں وہ حکومت کو بدنام کرنا چاہتے ہیں۔ کمیشن نے پولیس ایکشن کی ساری ذمہ داری طلباء پر ڈال دی اور پولیس کے تعلق سے صرف یہ کہا کہ لائبریری کے اندر پولیس نے طلباء کی جو پٹائی کی اس سے بچا جا سکتا تھا۔ کمیشن کے اپنے الفاظ یہ ہیں "یہ پولیس کی غیر ذمے دارانہ حرکت تھی اس سے بچا جا سکتا تھا۔” کمیشن نے جو سفارشات پیش کی ہیں ان میں یہ تو کہا ہے کہ ان پولیس والوں کو شناخت کرکے جنہوں نے غیر ذمے داری سے طلباء کی پٹائی کی، ان پر مناسب کارروائی کی جائے، لیکن ان کے خلاف قانونی کارروائی کی کوئی سفارش نہیں کی ہے۔ کمیشن نے جامعہ انتظامیہ کو بھی ذمے دار قرار دیا ہے، پروکٹر آفس کو بھی اور مقامی پولیس کو بھی کہ وہ حالات سے بے خبر رہی لیکن تشدد کرنے والی پولیس کو تقریباً کلین چٹ دے دی ہے۔ حقائق سب کے سامنے ہیں، سی سی، فوٹیج اور پولیس تشدد کی ویڈیو کلپ ہیں۔ پولیس لائبریری کا دروازہ توڑ کر اندر داخل ہوئی تھی یہ سچ بھی لوگوں کے سامنے ہے۔ پولیس تشدد کی سینکڑوں تحریری گواہیاں داخل کی گئی ہیں، مگر ان سب کو نظرانداز کر دیا گیا ہے۔کمیشن کی رپورٹ سے واضح ہو جاتا ہے کہ وہ پولیس کو بچانے کی کوشش کر رہا ہے۔ حقوقِ انسانی کے قومی کمیشن کی اس رپورٹ کو جامعہ کے طلباء اور حقوق انسانی کے ماہرین اور سی اے اے مخالف کارکنان کے حقوق کے لیے بنے این جی او نے مسترد کر دیا ہے، ان کا کہنا ہے کہ یہ رپورٹ ایک مذاق ہے، ان کی طرف سے جاری ایک بیان میں کہا گیا ہے کہ اس رپورٹ کو پڑھ کر یہ لگتا ہے کہ یہ باتیں حقوق انسانی کے قومی کمیشن کی نہیں وزارت داخلہ کی ہیں۔ جس ملک میں حقوق انسانی کا قومی کمیشن تک نہ آزاد ہو وہاں جمہوریت اور سیکولرزم کی باتیں کیا کوئی معنی رکھتی ہیں؟ یہ سوال اپنے آپ میں جواب ہے۔ لہٰذا ان افراد سے جو مودی کے خطاب پر سوال اٹھا رہے ہیں کہ وزیراعظم نے بقرعید کا ذکر کیوں نہیں کیا، اتنا ہی کہنا ہے کہ وزیراعظم کو کیا پڑی ہے کہ وہ بقرعید کا ذکر کریں، وہ تو اس ملک کو ہندو راشٹر کی راہ پر لے جانے کی کوشش کررہے ہیں کہ یہی ان کا بنیادی مقصد ہے، اس لیے وہ کوئی ایسا کام نہیں کریں گے یا ایسی بات نہیں کریں گے جس سے ہندوتوادیوں کو یہ لگے کہ وہ ہماری نہیں غیروں کے مفادات کی فکر کرنے لگے ہیں۔

(مضمون میں پیش کردہ آرا مضمون نگارکے ذاتی خیالات پرمبنی ہیں،ادارۂ قندیل کاان سےاتفاق ضروری نہیں)