نتیش کمار

نئی دہلی:بہار اسمبلی انتخابات سے قبل این ڈی اے میں تنازع پیدا ہوگیا ۔ ایل جے پی نے جے ڈی یو چیف نتیش کمار کی سربراہی میں انتخاب نہ لڑنے کا فیصلہ کرلیا ہے۔ یہ فیصلہ اتوار کو دہلی میں منعقدہ پارٹی کی پارلیمانی کمیٹی کے اجلاس میں کیا گیا ۔ لوجپا این ڈی اے میں من پسند نشستوں کی عدم فراہمی پر نالاں ہے۔ پارٹی صدر چراغ پاسوان نے کہا کہ ایل جے پی کی کچھ سیٹوں پر بی جے پی کے ساتھ دوستانہ لڑائی ہوگی، لیکن پارٹی لازماً ان تمام نشستوں پر اپنے امیدوار اتارے گی ، جہاں جے ڈی یوکے امیدوار ہوں گے، تاہم خیا ل رہے کہ پارٹی بی جے پی کے ساتھ اتحادبرقرار رکھے گی۔ چراغ پاسوان نے اس سلسلے میں ایک قرارداد منظور کی اور کہا کہ پارٹی کے ممبران اسمبلی وزیر اعظم نریندر مودی کو مضبوط بنانے کے لئے کام کرتے رہیں گے۔ اس تجویز کے ساتھ ، پارٹی نے اس پہلو کو آشکار کرنے کی کوشش کی کہ انتخابات کے بعد ضرورت پڑنے پر ایل جے پی اور بی جے پی بہار میں حکومت سازی کر سکتی ہے ۔پارٹی کے جنرل سکریٹری عبد الخالق نے کہا کہ ریاستی سطح پر اتحاد اور اسمبلی انتخابات میں جے ڈی یو کے ساتھ نظریاتی اختلافات کے سبب لوجپا نے بہار میں الگ سے انتخابات لڑنے کا فیصلہ کیا ہے۔ کئی نشستوں پر جے ڈی یو کے ساتھ نظریاتی لڑائی ہوسکتی ہے، تاکہ ان سیٹوں پر عوام فیصلہ کریں گے کہ بہار کے مفاد میں کون سا امیدوار بہتر ہے۔ایل جے پی بہار فرسٹ ، بہاری فرسٹ وژ ن کو نافذ کرنا چاہتی تھی،لیکن بر وقت پر اس تک اتفاق نہ ہوسکا۔ ہمارا لوک سبھا میں بی جے پی کے ساتھ مضبوط اتحاد ہے۔ ہم بہار میں بھی الیکشن لڑنا چاہتے تھے۔ ایل جے پی اور بی جے پی کے مابین کوئی تلخی نہیں ہے اب جب کہ لوجپا نے خود کو الگ کرنے کا فیصلہ کرلیا ہے ، تو بی جے پی اور جے ڈی یو کے لئے سیٹیں بانٹنا آسان ہوجائے گا۔ ذرائع کے مطابق جے ڈی یو اور بی جے پی نے آدھی نشستیں تقسیم کرنے کا فیصلہ کیا ہے۔اسمبلی کی 243 نشستوں پر جے ڈی یو اور بی جے پی 119 – 119 سیٹوں پر اپنے امیدوار کھڑے کریں گے۔ باقی 5 سیٹیں جیتن رام مانجھی کی ’ہم ‘ پارٹی کے کھاتے میں جائیں گی ۔

پٹنہ:انتخابی میدان میں اترنے کی قیاس آرائیوں کے درمیان وی آر ایس لینے والے سابق ڈی جی پی گپتیشور پانڈے ریاست کے چیف نتیش کمار سے ملنے کے لئے ہفتہ کے روز جے ڈی یو پارٹی کے دفتر پہنچے۔ اس دوران پارٹی میں میڈیا کے داخلے پر مکمل پابندی عائد تھی۔ جب سابق ڈی جی پی گپتیشور پانڈے نتیش کمار سے ملنے کے بعد باہر آئے تو انہوں نے میڈیا سے بات کی۔ سابق ڈی جی پی گپتیشور پانڈے نے کہاکہ میں نے وزیر اعلی نتیش کمار کے ساتھ کام کیا ہے اور اب میں سبکدوش ہوگیاہوں، لہذا میں ان کا شکریہ ادا کرنے آیا ہوں۔ انتخاب کے بارے میں کوئی بات نہیں ہوئی اور میں نے ابھی تک کوئی فیصلہ نہیں کیا ہے۔ فیصلہ کروں گا توبتادوں گا۔سابق ڈی جی پی گپتیشور پانڈے نے سی ایم نتیش کمار کی تعریف کرتے ہوئے کہاکہ انہوں نے مجھے کام کرنے کی مکمل آزادی دی ،اس لیے ان کا شکریہ ادا کرنے آیاہوں لیکن کوئی سیاسی بات نہیں ہوئی۔جے ڈی یو میں شمولیت کے سوال پر انہوں نے کہا کہ اس سلسلے میں ابھی کوئی فیصلہ نہیں لیا گیا ہے۔واضح رہے کہ ایک طویل عرصے سے گپتیشور پانڈے کے انتخاب لڑنے کی بحث زوروں پر ہے۔ گرچہ گپتیشور پانڈے نے ابھی تک اس حقیقت کو قبول نہیں کیا ہے، لیکن اس کو مسترد بھی نہیں کیا ہےاور اب ان کے جدیو میں شامل ہونے کی اٹکلیں تیز ہو گئی ہیں۔

پٹنہ:مودی حکومت زراعت سے متعلق تینوں بل پارلیمنٹ سے منظور کرانے میں کامیاب ہوگئی ہے۔ نتیش کمار کی پارٹی جے ڈی یومودی سرکار کے اس فیصلے پر ساتھ ہے جبکہ اس معاملے پر شرومنی اکالی دل نے حکومت چھوڑ دی ہے۔ جے ڈی یو نے پارلیمنٹ کے دونوں ایوانوں میں اس بل کی حمایت کی ہے۔ کسانوں کی تنظیمیں بل کے خلاف سڑک پر اکٹھی ہوگئی ہیں۔ ایسی صورتحال میں جے ڈی یو اب بی جے پی سے مختلف لہجے میں بول رہی ہے اور ایم ایس پی گارنٹیوں کامطالبہ اٹھارہی ہے۔ کسان مودی حکومت کے ذریعہ لائے گئے زرعی اصلاحاتی قانون کو اپنے مفاد میں نہیں مان رہے ہیں۔کسان ان تینوں بلوں کے خلاف ناراض ہیں اور متحدہوکر آواز اٹھا رہے ہیں۔کسان تنظیموں نے اس کے خلاف احتجاج کے لیے 25 ستمبر کو بھارت بند کا مطالبہ کیا ہے۔ نہ صرف کسان تنظیمیں بلکہ اپوزیشن جماعتیں بھی زرعی بلوں کے بہانے مودی سرکار کے خلاف متحرک ہو رہی ہیں۔ ایسی صورتحال میں جے ڈی یوپربھی سوالات اٹھ رہے ہیں جو کسانوں کو فائدہ پہنچانے کی صلاحیت رکھتے ہیں جس کی وجہ سے پارٹی نے اب یو ٹرن لے لیا ہے۔کسانوں کے معاملے پر جے ڈی یو نے اپنارویہ اسی طرح تبدیل کیا ہے جیسے سی اے اے اور این آر سی کے معاملے پر یو ٹرن لیا تھا۔ پارلیمنٹ کے دونوں ایوانوں میں جے ڈی یونے سی اے اے کی طرح زرعی بل کی حمایت کی ہے۔اب اس کا کہنا ہے کہ وہ اس معاملے میں کسان تنظیموں کے مطالبے کے ساتھ کھڑی ہے۔

بہار اسمبلی الیکشن میں مجلس کی ’سیریس انٹری ‘سے وہاں کا سیاسی منظرنامہ خاصا ہنگامہ خیز ہوتا جارہا ہے۔ کل اویسی نے دویندر یادو کی پارٹی کے ساتھ اتحاد کرکے اور اس کے دائرے کو مزید وسیع کرنے کا عندیہ دے کر معاملے کو اور بھی توجہ طلب بنادیا ہے۔

یہ صورت حال دو پارٹیوں کے لیے سب سے زیادہ تشویشناک ہے،ایک آرجے ڈی اور دوسری جے ڈی یو۔ چوں کہ اب تک بہار کے مسلمان زیادہ تر انہی دو پارٹیوں کو ووٹ دیتے آرہے ہیں،کانگریس ایک عرصے سے وہاں قابلِ ذکر پوزیشن میں نہیں ہے اور بی جے پی کو تو خیر مسلم ووٹ کی ضرورت بھی نہیں ہے۔ نتیش کمار نے جو لگاتار تین بار کامیابی حاصل کی،اس میں ان کے اپنے سیاسی توڑ جوڑ کے علاوہ مسلم ووٹ کا بھی خاص کردار رہا،انھوں نے اپنے دورِ حکومت میں کچھ اہم اور بنیادی انفراسٹریکچر  سے جڑے ہوئے کام بھی کروائے ،اس کا بھی انھیں فائدہ ہوا،’سوشاسن بابو‘انھیں لقب بھی مل گیا۔ البتہ 2015میں ان کو کامیابی عظیم اتحاد کے پلیٹ فارم سے ملی تھی،جس سے انھوں نےسال ڈیڑھ سال بعد ہی پلہ جھاڑ لیا اور واپس این ڈی اے میں چلے گئے۔ اس کے بعد موجودہ مرکزی حکومت کی سربراہی میں خصوصاً مسلمانوں کے حوالے سے جو متعصبانہ اقدامات سامنے آئے،ان میں خود نتیش بھی شامل رہے،تین طلاق کے معاملے میں انھوں نے تگڑم سے کام لیا،این آرسی ؍سی اے اے کے مسئلے پر بی جے پی کے ساتھ گئے،حالاں کہ پچھلے دنوں این پی آر پر اسمبلی سے انھوں نے تجویز پاس کروالی ہے کہ اس کا فارمیٹ پہلے جیسا ہی ہوگا،اس میں کوئی تبدیلی نہیں ہوگی۔مگر دیگر کئی معاملوں میں انھوں نے یا تو اپنے موقف کو واضح نہیں کیا یا اندر خانہ مرکزی حکومت کی حمایت کی۔ ادھر کچھ دنوں سے بہار کے مختلف اضلاع میں فرقہ وارانہ فسادات کے واقعات  میں بھی اضافہ ہوا ہے،ان سارے واقعات نے بہار کے مسلمانوں کو نتیش کمار کے تئیں بہت حد تک بد گمان کردیا ہے اور اب وہ کسی متبادل کی تلاش میں ہیں،مگر کیا وہ متبادل آرجے ڈی یا اس کی سربراہی میں قائم ہونے والا متوقع عظیم اتحاد ہو سکتا ہے،جس کے خط و خال تا حال واضح نہیں ہیں؛بلکہ خود آرجے ڈی کے کئی سینئر رہنما پارٹی سے روٹھ کر اِدھر اُدھر جا چکے یا اس کی تیاری میں ہیں؟ ایک قدآور آرجے ڈی لیڈر بابو رگھوونش پرساد تو پارٹی سے ناراضی کے ساتھ ہی آں جہانی ہو چکے ہیں،حالاں کہ دَل بدلنے کا یہ سلسلہ این ڈی اے کی پارٹیوں میں بھی چل رہا ہے،مگر من حیث المجموع یہاں جے ڈی یو اور بی جے پی مضبوط پوزیشن میں ہیں،جبکہ عظیم اتحاد کا اونٹ کس کروٹ بیٹھے گا،اس بارے میں کچھ نہیں کہا جاسکتا۔

لا لویادو کی عدم موجودگی میں نہیں لگتا کہ تیجسوی یادو عظیم اتحاد کے قیام اور اسے کماحقہ مینج کرسکنے کی پوزیشن میں ہیں،اس کی ایک جھلک ہم نے پچھلے سال لوک سبھا انتخاب میں دیکھی بھی ہے کہ تیجسوی اینڈ کمپنی نے بہت ہی بری چال چلی اور بے تدبیری،تجربے کی کمی اور ابلہانہ طریقِ کار کے کئی مضحکہ خیز نمونے دیکھنے کو ملے،جس کا نتیجہ یہ ہوا کہ لوک سبھا الیکشن میں بہار  کی چالیس سیٹوں میں سے انتالیس پر این ڈی اے کو کامیابی ملی اور پانچ چھوٹی بڑی پارٹیوں کے اتحاد نے مل کر صرف ایک سیٹ پر کامیابی حاصل کی۔ابھی اسمبلی الیکشن سے قبل جس طرح کی صورت حال ہے،اس میں مجھے نہیں لگتا کہ حالات بہت کچھ بدل سکیں گے،تیجسوی یادو سے لوگوں کو بڑی امیدیں تھیں،مگر ان کی سب سے بڑی خامی یہ ہے کہ نہ تو وہ اپنی پارٹی کے بڑے اور تجربہ کار لیڈروں کو کنونس کر سکنے کی صلاحیت رکھتے ہیں اور نہ ہی اتحادی جماعتوں کو مطمئن کرسکنے کی پوزیشن میں ہیں،اسی وجہ سے جیتن رام مانجھی عظیم اتحاد میں شامل ہوتے ہوتے رہ گئے،انھوں نے الیکشن سے پہلے پھر این ڈی اے کا دامن تھامنے میں عافیت سمجھی ہے۔ غالباً یہی وجہ ہے کہ لالو یادو کی ضمانت کی کوششیں پھر سے تیز ہو گئی ہیں،اگر وہ الیکشن سے قبل کچھ  دنوں کے لیے بھی باہر آسکیں،تو کچھ امید کی جا سکتی ہے۔
مجلس اتحاد المسلمین کے ذریعے بہار الیکشن میں ایک نیا محاذ کھولنے کی کوششیں آرجے ڈی اور جے ڈی یو دونوں ہی کے لیے خطرے کی گھنٹی ثابت ہوسکتی ہیں؛کیوں کہ اکیلے بھلے ہی مجلس کچھ بہتر کارکردگی کا مظاہرہ نہ کرسکے؛لیکن اگر مسٹر اویسی بہار کی دوسری پارٹیوں کے ساتھ ایک قابلِ ذکر  اور مؤثر اتحاد قائم کرنے میں کامیاب ہوجاتے ہیں،تو اس کا نتیجہ یقیناً زمینی سطح پر نظر آئے گا،اسی لیے آرجے ڈی اور جے ڈی یو کے مسلم رہنما خاص طورپر پیچ و تاب کھا رہے ہیں۔کل19ستمبر کو جہاں اویسی اور دویندر یادو نے اپنے اتحاد کا اعلان کیا،وہیں کل ہی جے ڈی یو کے ایم ایل سی خالد انور کی سربراہی میں ’ مسلمانوں کی ترقی میں نتیش کمار کا کردار‘ کے عنوان سے ایک ورچوئل کانفرنس کا انعقاد کیا گیا، جس میں بہار کے بہت سے اضلاع سے مسلم لیڈران اور عوام نے شرکت کی اور اس میں نتیش حکومت کے وزرا اشوک چودھری،نیرج کمار اور ایم ایل اے نوشاد عالم،ماسٹر مجاہد وغیرہ نے خطاب کیا اور سبھوں نے نتیش کے دورِ حکومت میں مسلمانوں کے لیے کیے جانے والے اقدامات اور منصوبوں کاگن گان کیا۔کل ہی ایک یوٹیوب چینل پر آرجے ڈی کے ریاستی یوتھ صدر قاری صہیب کی ساڑھے پانچ منٹ کی بات چیت دیکھنے اور سننے کو ملی،جس میں قاری صاحب اویسی اور مجلس پر بے پناہ غصے کا اظہار کررہے ہیں اور غصے میں انھوں نے بعض ایسی باتیں بھی کہی ہیں،جن کی ایک بڑی پارٹی کی نمایندگی کرنے والے شخص سے توقع نہیں کی جاسکتی،انھوں نے ایک جذباتی مقرر  کی  طرح بولتے ہوئے کہا کہ مجلس ٹی بی کے مرض کی طرح ہے،وہ مسلم نوجوانوں کو بارود کے ڈھیر پر کھڑا کررہی ہے،وہ مسلم نوجوانوں کے ہاتھ سے قلم چھین کر تلوار پکڑا رہی ہے وغیرہ وغیرہ ۔دو مختلف پارٹیوں کا باہمی سیاسی اختلاف کوئی اچنبھے کی بات نہیں،مگر اس اختلاف کے اظہار کا سلیقہ ہوتا ہے،ہمارے پٹنہ ہی کے شہرۂ آفاق شاعر کلیم عاجز کہہ گئے ہیں:

بات چاہے بے سلیقہ ہو کلیم

بات کہنے کا سلیقہ چاہیے

اس قسم کی گفتگو آرجے ڈی کے حق میں قطعی نہیں جا سکتی،البتہ اس سے پارٹی کو نقصان ہونے کا امکان ایک سو ایک فیصد ہے۔ اویسی سے ملک کے بے شمار مسلمانوں کو اختلاف ہے اور ان کی بہت سی باتیں،آرا  قابلِ اختلاف ہیں بھی،مگر اس کی وجہ سے کیا یہ کہنا درست ہے کہ مجلس مسلم نوجوانوں کے ہاتھ میں تلوار تھما رہی ہے؟آپ کو اندازہ بھی ہے کہ محض پارٹی میں سرخروئی حاصل کرنے کے لیے کہی گئی آپ کی اس بات کا اثر کتنا گہرا اور دور رس ہو سکتاہے؟اگر آرجے ڈی اسی قسم کے مسلم نیتاؤں کو آگے بڑھا کر مسلمانوں کا ووٹ حاصل کرنا چاہتی ہے،تو پھر اسے اپنی خیر منانی چاہیے!

پٹنہ:بہارسرکارنے گزشتہ برس اردو مترجم،معاون مترجم کی آسامی نکالی جس کی چوطرفہ تحسین کی گئی۔جدیوکے مسلم ممبران اسمبلی اسے نتیش سرکارکے سیکولرزم سے جوڑنے لگے۔لیکن تاحال بحالی تودور،امتحان تک نہیں ہوئے ہیںجس سے اس الزام کوتقویت مل رہی ہے کہ نتیش حکومت اردوکے لیے اورمسلمانوں کے لیے کچھ کرنانہیں چاہتی ہے بلکہ انتخابی موسم میں صرف لالی پاپ دے رہی ہے۔ اپریل میں امتحان ہوناتھاجسے لاک ڈائون کی وجہ سے ملتوی کردیاگیا،پھر اگست کی متعدد مجوزہ تاریخیں آئیں لیکن یہ سب تاریخیں گزر گئیں اوربہار سرکار،بہار اسٹاف سلیکشن کمیشن نے یہ بتانے کی بھی زحمت نھیں کی کہ ان تاریخوں میں امتحان نہیں ہوگا اور ہوگا تو کب ہوگا۔لاک ڈائون کابہانہ کیاجائے گا،لیکن اسی بہاراسٹاف سلیکشن کمیشن کی ویب سائٹ مسلسل اپ ڈیٹ ہورہی ہے اوردیگرامتحانات اورنوٹیفکیشن آرہے ہیں۔چنانچہ اگست میں یکم، پانچ، چھ، سات، اٹھارہ،انیس،بائیس،چوبیس،پچیس اوراٹھائیس تاریخوں کے نوٹیفکیشن ویب سائٹ پرموجودہیں ،یہی نہیں،تین ستمبرکوبھی تین نوٹیفکیشن آئے ہیں،لیکن اردوکے لیے فرصت نہیں ہے اورمترجم ومعاون مترجم کی آسامی پربحالی کے حوالے سے پراسرارخاموشی ہے۔ہاں جے ای ای،نیٹ کے ایکزام اورالیکشن کے لیے کورونا نہیں ہے ،بہارسرکاراس کے لیے تیارہے لیکن اردو مترجم کے امتحان کرانے میں کورونا ہے؟جدیوکے جومسلم لیڈران کل ویکنسی آنے پراچھل کودکررہے تھے،اورنتیش کوسیکولرزم کاسورمابتارہے تھے ،آ ج وہ خاموش ہیں۔سوشل میڈیاپرمسلمانوں کی طرف سے سخت ناراضگی کا اظہار کیا جا رہا ہے۔لوگوں کاکہناہے کہ مطلب صاف ہے نتیش حکومت کرناکچھ نہیں چاہتی ہے بس الیکشن کے لیے لالی پاپ دے رہی ہے۔ویسے بھی اسکول میں اردو کے حوالے سے سرکاری نوٹیفیکیشن سے نتیش سرکار کی اردو بلکہ مسلم دشمنی پرمسلسل سوال اٹھ رہے ہیں۔