مودی

(ایڈیٹر ممبئی اردو نیوز)

ہمارے’ پردھان سیوک‘ نریندر مودی نے بالآخر کشمیریوں سے بات کرہی لی ۔

نعرہ بھی لگا دیا کہ ’ دل اور دلّی سے دوری کم ہونا چاہئے ‘ ۔ لیکن سچ یہی ہے کہ کشمیری آج بھی ’دل اور دلّی سے دور ہیں‘۔ اور شاید اس وقت تک دور رہیں جب تک کہ کشمیر کو مکمل ریاستی درجہ نہ ملِ جائے ، جو سیاسی قیدی جیلوں میں قید ہیں انہیں رہائی نہ ملِ جائے اور سارے کشمیر میں ، بشمول جموں ولداخ ، امن وامان کی فضا کا قیام نہ ہوجائے ، زندگی پھر سے رواں دواں نہ ہوجائے، اور ترقی کے راستے نہ کھل جائیں ۔ اور سب سے اہم کشمیریوں کی وہ ’ حیثیت‘ جو ان سے ’ چھین‘ لی گئی ہے ، اسے پھر سے بحال نہ کردیا جائے ، آسان لفظوں میں یہ کہ 35 اے اور آرٹیکل 370 کو پھر سے لاگو نہ کردیا جائے ۔

اب اگر ہم مذکورہ پس منظر میں کشمیر کے حالات پر اور وزیراعظم نریندر مودی اور مرکزی وزیر داخلہ امیت شاہ سے ، کشمیر کی آٹھ سیاسی پارٹیوں کے چودہ بڑے لیڈروں کی ، جن میں تین وزرائے اعلیٰ بھی شامل تھے ، جنہیں مرکزی سرکار نے ’ گپکا ر گینگ‘ کا لقب دیا تھا ، ملاقات پر نظر ڈالیں تو اندازہ ہوتا ہے کہ باتیں توہوئیں، وعدے بھی ہوئے ، لیکن ملاقات کا کوئی ایسا نتیجہ برآمد نہیں ہوا کہ یہ امید باندھی جاسکے کہ آنے والے دنوں میں کشمیر کے حالات تیزی کے ساتھ بدلیں گے ، اور وہاں کے لوگ چین اور سکون کی سانس لے سکیں گے ۔ کشمیر کا سیاسی منظر نامہ قدرے پیچیدہ ہے ، اور 2019ء میں 5 اگست کے روز آرٹیکل 370 اور 35 اے کے خاتمے کے بعد سیاسی منظر نامہ مزید پیچیدہ ہوگیا ہے ۔ کشمیری یہ سمجھتے ہیں کہ مذکورہ آرٹیکلوں کے تحت انہیں جو خصوصی درجہ حاصل تھا ، جو ان کی شناخت اور ان کی تہذیب وثقافت کی حفاظت کرتا تھا، اسے چھین لیا گیا ہے ، اور چھینے کا یہ عمل دانستہ کیا گیا ہے ، اس کے پس پشت بدنیتی ہے اور اس کا مقصد سارے کشمیر سے ان کی شناخت کو بھی ختم کرنا ہے اور ان کی تہذیب اور ثقافت کو بھی مٹانا ہے ۔ کشمیری اگر یہ سوچتے ہیں تو وہ اس میں حق بجانب بھی ہیں کیونکہ جیسے ہی آرٹیکل 370 اور 35 اے کا خاتمہ کیا گیا بی جے پی اور سنگھی لیڈروں کی طرف سے یہ آوازیں اٹھنے لگی تھیں کہ اب وہ کشمیر میں زمینیں بھی خریدیں گے اور اپنے کاروبار بھی لگائیں گیں۔ اور یہ آواز بھی تیز تھی کہ کشمیر کو اب اپنے رنگ میں رنگیں گے ، یعنی اسے ’گیروا‘ کردیں گے ۔ ظاہر ہیکہ اس سے نہ تو کشمیریوں کی ’ دل اور دلّی سے دوری‘ ختم ہوسکتی تھی او رنہ ہی کشمیر کے سیاسی حالات بی جے پی اور مودی کی مرکزی سرکار کے لیے بہتر ہوسکتے تھے۔ گذشتہ 22 مہینوں کے دوران کشمیری جِن حالات سے گزرے ہیں انہیں وہ اپنے لیے ’ ذلت‘ سمجھتے ہیں ۔کیا یہ درست نہیں ہیکہ کشمیر کو ایک بہت بڑی جیل میں تبدیل کردیا گیا تھا؟ نہ انٹرنیٹ اور نہ ہی سڑکوں پر نکلنے کی آزادی ، دوکان اور مکان سب بند، مسجدوں پر تالے ، دوسری عبادت گاہیں بند ، لیڈران نظر بند یا جیلوں میں مقید ، حتیٰ کہ تین سابق وزرائے اعلیٰ کو ، جو مودی اور شاہ کی اس میٹنگ میں شریک تھے ، بہت ہی سخت حالات سے گزرنا پڑاـ بالخصوص فاروق عبداللہ اور محبوبہ مفتی کو ، یہ نظر بند رہے، ا ن پر مقدمے قائم ہوئے ، فاروق عبداللہ کی تو املاک کی قرقی تک ہوئی ۔ ہاں غلام نبی آزاد قدرے محفوظ تھے ۔۔۔ باخبر ذرائع کا کہنا ہے کہ نیشنل کانفرنس میں بھی اور پی ڈی ایف میں بھی فاروق عبداللہ اور محبوبہ مفتی سے لوگ ، اس میٹنگ میں شریک ہونے پر ناراض ہیں، لوگ نہیں چاہتے تھے کہ یہ لوگ آرٹیکل 370 اور 35 اے کی بحالی سے پہلے مودی اور امیت شاہ سے کوئی میٹنگ کریں ۔ شاید اسی لیے محبوبہ مفتی نے ملاقات کے بعد 370 اور 35 اے کی بحالی کی بات کی ہے۔ فاروق عبداللہ بھی آرٹیکل 370 کے خاتمے کو قبول کرنے کو تیار نہیں نظر آتے ہیں۔

جو ملاقات ہوئی اس میں آرٹیکل 370 اور 35 اے پر بات تو ہوئی لیکن انہیں بحال کرنے کا کوئی وعدہ نہ مودی نے کیا اور نہ ہی امیت شاہ نے ۔۔۔ وعدہ کر بھی نہیں سکتے کہ یہ بی جے پی بلکہ آر ایس ایس کا نظریاتی معاملہ ہے ۔ آر ایس ایس کے نظریہ ساز شیاما پرساد مکھرجی کشمیر کو کوئی خصوصی درجہ دینے کے خلاف تھے اور سنگھ پریوارآج بھی کشمیر کو کسی طرح کا خصوصی درجہ دینے کو راضی نہیں ہے ۔ لہٰذ یہ سمجھ لیا جائے کہ بی جے پی کبھی بھی آرٹیکل 370 اور 35 اے کی بحالی پر راضی نہیں ہوگی ۔ ہاں ملاقات میں اس نے کشمیر کو ریاستی درجہ دینے کا ، حد بندی کا ، جلد الیکشن کرانے کا وعدہ کیا ہے ۔ دوسرے مطالبات کو ’غور ‘سے سنا ہے ، سیاسی قیدیوں کی رہائی کا مطالبہ ہے ، کشمیری پنڈتوں کی واپسی کی بات ہے اور کشمیر میں امن وامان کے قیام کی فکر ہے۔ وزیراعظم نریندر مودی اور امیت شاہ نے وعدے تو کیے لیکن کوئی نظام الاوقات نہیں بنایا ہے کہ فلاں فلاں تاریخ تک یہ وعدے پورے کیے جائیں گے ۔۔۔ تو کیا یہ سمجھ لیا جائے کہ جو ملاقات ہوئی اور وعدے ہوئے وہ بس یوں ہی تھے ، ان کا کوئی مطلب نہیں تھا؟ یہ تو سچ ہیکہ ملاقات کا کوئی فوری حل توبرآمد نہیں ہوا ہے لیکن اس ملاقات سے کم از کم بی جے پی کو اپنی صفائی پیش کرنے کا ایک موقع مل گیا ہے ۔ قومی اور عالمی سطح پر کشمیر مسئلے پر اس پر جو دباؤ بنا ہے اسے زائل کرنے کے لیے مرکزی سرکار یہ کہہ سکتی ہے کہ ’’ ہم بات تو کررہے ہیں‘‘ ۔ قومی سطح پرکئی ہدف نشانے پر ہیں، مثلاً یہ کہ گذشتہ 22 مہینوں کے دوران کشمیر میں بھلے ہی ’ کورونا‘ معاملے میں لوگوں کو اعلیٰ درجہ کی طبّی سہولیات بہم کی گئی ہوں ، لیکن زمینی صورتحال جو 22 مہینے قبل تھی، اس سے خراب ہی ہوئی ہے ۔کشمیری پنڈت اور جموں کے لوگ بھی مرکزی حکومت سے ناراض ہوئے ہیں ۔ بی جے پی نے کوشش کی تھی کہ کشمیر میں ایک ایسی سیاسی قیادت ابھاری جائے جو بی جے پی کے کام آسکے ، مگر اسے اس کوشش میں ناکام ہی ہوئی ہے ، اس سبب جمہوری اور سیاسی تعطل برقرار ہے ۔ کشمیر کا حل ’صدر راج‘ قطعی ٔ نہیں ہے ، ’سیاسی راج‘ ہے ۔ اور سیاسی عمل کو جاری کرنے کے لیے زمینی حالات کو سدھارنا ضروری ہے ۔۔۔ مودی نے اس سمت ایک پہل کی ہے ۔۔۔ جس طرح سے کشمیر میں جمہوری اقدار کو کچلا گیا اور انسانی حقوق کی پامالیاں کی گئیں، وہ افسوسناک ہیں ۔ ساری دنیا ، اسلامی ممالک ، یوروپ، امریکہ اور اقوام متحدہ نے بھارت سرکا رپر اس معاملے میں دباؤ بنایا ہے ۔ برسہا برس کے بعد اقوام متحدہ میں مسئلہ کشمیر کی گونج سُنی گئی ہے۔ پاکستان اس مسئلے پر مستقل دباؤ بنائے ہوئے ہے ۔ لہٰذا مودی سرکار کو قدم اٹھانے پر مجبور ہونا پڑا ہے ۔ یاد رہے کہ ہمارے وزیراعظم جلد ہی بائیڈن انتظامیہ سے ملیں گے، اور لوگ جانتے ہی ہیں کہ صدر امریکہ جو بائیڈن پہلے ہی کشمیر کے حالات پر اظہار تشویش کرچکے ہیں ، تو وہ اس معاملے پر سوال کرسکتے ہیں ، مودی کو جواب دینا ہوگا ۔ جواب بالخصوص حقوق ِ انسانی کی پامالیوں کا۔ حقوقِ انسانی کی کئی تنظیموں بشمول ’ فریڈم ہاؤس‘ نے بھارت پر سخت نکتہ چینی کی ہے اور اس کی کشمیر پالیسی کو آڑے ہاتھوں لیا ہے ، اور امریکہ نے ان سب پر اپنی تشویش ظاہر کی ہے ۔ مودی نے اس ملاقات سے ایک طرح کی پیش بندی کرلی ہے ۔۔۔ معاملہ ہند ۔ پاک د وطرفہ بات چیت کا بھی ہے ۔ یہ تو سچ ہے کہ سرحد پر گولہ باری رکی ہوئی ہے ، دراندازی بند ہے ، لیکن اہم بات ان دونوں ملکوں کے درمیان بات چیت ہے ، اس ملاقات سے اس کی ایک راہ کھل سکتی ہے۔اور بھارت کو پاکستان سے بات کرنا چاہیئے کہ یہ امن کی ایک راہ ہے ۔ اسے بھارت مخالف عناصر سے بھی ، جو قیدمیں ہیں بات شروع کرنی چاہئے ۔ ادھر افغانستان میں جو حالات سامنے آئے ہیں وہ بھی بھارت کے نقطۂ نظر سے اہم ہیں ۔ امریکی فوج کا وہاں سے انخلاء ہورہا ہے ، ممکنہ طور پر طالبان کا وہاں راج ہوسکتا ہے ۔ اور اگر طالبان اقتدار میں نہ آئے تب بھی یہ سوال برقرار ہے کہ افغانستان سے جب امریکی اور ناٹو افواج نکل جائیں گی تب وہاں کی صورتحال کیا ہوگی ، کیا افغانستان ، پاکستان اور طالبان ایک دوسرے سے قریب آئیں گے ، اور اگر قریب آئے تو اس کے اثرات کشمیر پر کیا پڑیں گے ؟ لہٰذا یہ ضروری ہوگیا ہے کہ کشمیر میں ایک طرح کا سیاسی عمل شروع کیا جائے ، نہ سہی 370 کی بحالی،تو اسے ریاستی درجہ دے کر اور الیکشن کراکر ۔ تو اگر تجزیہ کیا جائے تو یہ بات نکل کر سامنے آتی ہے کہ ملکی اور غیر ملکی دباؤ اتنا تھا کہ مودی اور شاہ نے کشمیری لیڈروں سے ملاقات کرکے ایک پیش بندی کرلی اور الیکشن کی ایک راہ بھی نکال لی ۔ رہی بات آرٹیکل 370 کی تو اس کا حل اب صرف اور صرف یہ ہے کہ کشمیری یا تو اسے بھول جائیں ، یا پھر ’ عدالت‘ ہی سے اس کا فیصلہ ممکن ہے ۔ مودی اور شاہ آرٹیکل 370 کسی بھی صورت میں بحال نہیں کرسکتے۔جہاں تک ’ ملاقات‘ کا تعلق ہے تو اسے فی الحال بے نتیجہ ہی کہا جائے گا لیکن اتنا تو ضرور ہے کہ آگے بڑھنے کی ایک راہ کھل گئی ہے ۔افسوس کہ مودی اور شاہ نے عجلت میں فیصلے لیے، اگر وہ 370 ہٹانے اور کشمیر کے حصے بخرے کرنے سے قبل ایسی ہی ’ ملاقات‘ کرلیتے تو شاید کشمیریوں کے لیے بھی اور ملک کے لیے بھی حالات آج جیسے بدتر نہ ہوتے ۔ لیکن بھلا ایک ایسے حکمراں سے جو خود کو ’ عقلِ کل‘ سمجھتا ہو اس کی توقع کیسے کی جاسکتی ہے !

اس بات میں اب کوئی شک نہیں ہے کہ انڈیا میں 2014 سے برسرِ اقتدار بھارتیہ جنتا پارٹی اس وقت ملک کے سیاسی پس منظر کی سب سے طاقتور جماعت ہے۔ وزیراعظم نریندر مودی کی قیادت میں اس نے دو عام انتخابات فیصلہ کن انداز میں جیتے ہیں اور اگرچہ اس نے ریاستیں کھوئی ہیں، تاہم اس کی انڈیا پر سیاسی گرفت مضبوط ہوتی رہی ہے۔حزب اختلاف کی مرکزی جماعت کانگریس کا کوئی واضح لائحہ عمل نہیں ہے، ماضی کی طاقتور علاقائی جماعتیں اپنے سارے حربے آزما چکی ہیں اور نریندر مودی کے خلاف کوئی حقیقی چیلنجر سامنے نہیں آیا ہے۔
ماہرِ سیاسیات سوہاس پلشکر اسے انڈیا میں دوسرا پارٹی حاوی نظام کہتے ہیں جہاں اندرا گاندھی کی کانگریس نے نصف صدی سے زیادہ پہلے ایک پارٹی کے حاوی رہنے والے نظام کو چلایا۔ بی جے پی وہ واحد جماعت ہے جس نے 1984 کے انتخابات میں کانگریس کی واضح کامیابی کے بعد پہلی مرتبہ ملک کے عام انتخابات میں واضح کامیابی حاصل کی ہے۔ سوہاس پلشکر کہتے ہیں کہ اندرا گاندھی کے بعد نریندر مودی وہ واحد رہنما ہیں جو ملک بھر میں مقبول ہیں۔ بی جے پی کی کامیابی کا سہرا مودی کی شخصیت، مذہبی سیاست، اور سخت قوم پرستی کو جاتا ہے۔ ان کی سیاسی مہم میں ان تھک محنت کرنے والے بہت سے کارکن ہیں جو کہ ان کی نظریاتی بنیاد رکھنے والی جماعتوں آر ایس ایس یا وی ایچ پی سے منسلک رہے ہیں۔ وی ایچ پی کو تجزیہ کار آر ایس ایس کا عسکری ونگ تصور کرتے ہیں۔
گذشتہ چند سالوں میں بی جے پی کو کافی زیادہ عطیات بھی دیے گئے ہیں جن کی تفصیلات منظرِ عام پر نہیں آئی ہیں۔ ساتھ میں اس جماعت کو میڈیا کی شدید حمایت حاصل رہی ہے۔ مگر ماہرِ سیاسیات ونے سیتاپاتی اپنے آئندہ آنے والی کتاب ’جگل بندی: مودی سے پہلے کی بی جے پی‘ میں یہ خیال پیش کر رہی ہیں کہ اگر ہم ایک لمحے کو رک کر دیکھیں کہ بی جے پی کے پاس ایسا کون سا گُر ہے کہ وہ کامیاب رہی ہے تو ہمیں معلوم ہوگا کہ اس کی وجہ اس کی قومی اتحاد سے نہ ہٹنے والی توجہ ہو سکتی ہے۔
اشوکا یونیورسٹی کی پروفیسر سیتاپاتی کہتی ہیں ’بہت چھوٹی سی عمر سے آر ایس ایس میں بچوں کو ایک مخصوص قسم کی ہندو تاریخ پڑھائی جاتی ہے جس میں شاندار ہندو معاشرہ ایک دوسرے کی کمر میں چاقو مار مار کر تباہ ہو گیا اور وہ ناکام ہی اس لیے ہوا کیونکہ وہ متحد نہیں تھا۔‘ ’ان کو مزید پختہ کرنے کے لیے مشقیں کروائی جاتی ہیں جو کہ صرف ورزش نہیں بلکہ جماعت میں ورزش ہے۔‘ لوگوں سے کہا جاتا ہے کہ وہ اکھٹے مارچ کریں، اور ایک دوسرے کے ساتھ کھیلیں، جیسے نجی کمپنیوں میں ٹیم سازی کی مشقیں ہوتی ہیں۔ ’اس سب کا مقصد اتحاد کی اہمیت کو اجاگر کرنا ہے۔ یہی یکساں یقین تنظیمی رویہ بن جاتا ہے۔ یہ دیگر جماعتوں کی طرح نہیں ہے۔‘
پروفیسر سیتاپاتی کہتی ہیں کہ بی جے پی کی کوشش ہے کہ وہ ہندوؤں کو متحد کر لے جو کہ انڈیا کی آبادی کا 80 فیصد سے زیادہ ہیں اور ایک ساتھ ووٹ دیں۔ یہی وجہ ہے کہ وہ ذات پات کی بات نہیں کرتے جو کہ روایتی طور پر ہندوؤں کو منقسم کرنے کی وجہ تھی۔ اسی لیے وہ اسلام مخالف آواز اٹھاتے ہیں اور قدیم ہندو کتابوں کا حوالہ دیتے ہیں۔‘ مگر دیگر جماعتوں کی طرح بی جے پی میں اپنے حصے کی مختلف آرا پائی جاتی ہیں۔ ابھی اسے اقتدار میں آئے صرف 12 سال ہوئے ہیں مگر ان کی انتخابی عمر 40 سال پرانی ہے۔ اقتدار میں نہ ہونے کا مطلب یہ ہے کہ آپ کے پاس دینے کو کچھ بھی نہیں ہے۔
جماعت کے اعلیٰ ترین رہنماؤں اٹل بہاری واجپئی اور لال کرشنا اڈوانی کے درمیان تعلقات اکثر کشیدہ رہتے تھے۔ یہ تو سبھی جانتے ہیں کہ کیسے واجپئی اور ان کی کابینہ کے کچھ لوگ مودی کے گجرات میں 2002 میں مسلم مخالف فسادات کے بعد وزیراعلیٰ رہنے کے خلاف تھے۔ ان مسائل کے دوران بھی پارٹی متحد رہی۔ پروفیسر سیتاپاتی کہتی ہیں کہ وہ ایک ایسی فیملی کی طرح ہے جو ایک دوسرے سے ناراض ہو کر بھی ایک ساتھ ہی رہتی ہے۔ ان کے اتحاد کی وجہ انڈین معاشرے کے مسائل کی گہری سمجھ بوجھ ہے۔‘ سیاسی جماعت عموماً مفادات کا اتحاد ہوتا ہے جو کہ ہمیشہ ایک ہی سمت نہیں ہوتے۔ انھیں کرشماتی شخصیت والے رہنما اکھٹا رکھتے ہیں، کچھ نظریات جوڑتے ہیں، تنظیمی ڈھانچہ کارآمد ہوتا ہے اور انڈیا کے معاملے میں ذات بھی متحد رکھتی ہے۔ مگر تفریقِ رائے، یا پارٹی کے اندر کشیدگی ایک عام سی بات ہے۔ انڈیا کی جماعتیں لیڈران کی انا کے مقابلوں اور دھڑے بندیوں کی وجہ سے تقسیم ہوتی رہتی ہیں۔ کئی رہنما کانگریس سے علیحدہ ہو کر کامیاب علاقائی جماعتیں بنا چکے ہیں۔ لیکن ابھی تک بی جے پی میں ایسا کچھ نہیں ہوا ہے۔
پہلے واجپئی اور اڈوانی اور اب مودی اور امت شاہ کی قیادت اور آر ایس ایس کی حمایت نے اسے جوڑے رکھا ہے۔ پروفیسر سیتاپاتی کہتی ہیں کہ ’میں جب کہتی ہوں کہ بہت سے بی جے پی کے رہنما مودی کو پسند نہیں کرتے تو کوئی خفیہ راز افشا نہیں کر رہی ہوتی۔ بہت سے بی جے پی، آر ایس ایس اور وی ایچ پی کے رہنما جن کے میں نے انٹرویو کیے ہیں مسٹر مودی کے نظریے سے مخلص ہونے اور انتخابات جیتنے کے طریقے کی تعریف کرتے ہیں۔ لیکن بہت سے انھیں بے رحم، خود کو بڑھا چڑھا کر پیش کرنے والا اور دوسروں سے کٹا ہوا سمجھتے ہیں۔‘
میلان ویئشناو کے الفاظ درست لگتے ہیں کہ بی جے پی ایک ’غیر معمولی جماعت‘ ہے۔ پرفیسر ویشناؤ واشنگٹن میں قائم کارنیگی اینڈؤمنٹ فار انٹرنیشنل پیس کے سینیئر فیلو ہیں۔ وہ کہتے ہیں کہ ’یہ ہندو قوم پرست تنظیموں کے ستاروں کے بڑے جھرمٹ کا ایک سیاسی بازو ہے۔ یہ بہت مشکل ہے کہ اس کے سیاسی وجود کو اس سے منسلک اتحادی اور برائے نام سیاسی اداروں سے علیحدہ کیا جا سکے۔ پھیلے ہوئے جال کے ماڈل کا مطلب ہے کہ بی جے پی نچلی سطح کی تنظیموں سے بہت طاقت حاصل کرتی ہے اور کہہ سکتے ہیں کہ اس کے گھنے نیٹ ورک لوگوں کو اس کی چھتری تلے ہی رکھتے ہیں۔‘
ایسا نہیں ہے کہ اختلافِ رائے رکھنے والوں نے بی جے پی کو کبھی نہیں چھوڑا۔ سیاست پر گہری نظر رکھنے والے اور کتاب ’آئیڈیالوجی اینڈ آئڈینٹٹی‘ کے شریک مصنف راہول ورما کہتے ہیں کہ ’پہیلی یہ ہے کہ وہ سیاسی طور پر زندہ نہیں رہ سکتے اور پارٹی میں واپس آ جاتے ہیں۔ شاید وجہ یہ ہے کہ بی جے پی ایک انتہائی نظریاتی جماعت ہے اور نظریاتی گوند اسے جوڑ کر رکھتی ہے۔ اور آپ ایسا دائیں اور بائیں بازو کی جماعتوں میں بھی پائیں گے۔‘ ایسی پیشنگوئی کرنا مشکل ہے کہ کیا بی جے پی ہمیشہ اکٹھی رہے گی؟ اس کے ’جارحانہ اور بے رحم‘ سیاست کے انداز کا مطلب ہے کہ انھوں نے اپنے دروازے دوسری جماعتوں کے اختلافِ رائے رکھنے والوں کے لیے، جن میں سے کئی داغدار بھی ہوتے ہیں، کھول رکھے ہیں۔ یہ نظریاتی پاکیزگی کے ناگزیر تضادات کی طرف لے جاتا ہے۔ ورما سوال کرتے ہیں کہ ’آپ کب تک تضادات کو سنبھالتے رہیں گے؟‘ یقیناً اس وقت تک جب تک پارٹی جیت رہی ہے۔ اسی وجہ سے بی جے پی کی بقا کے لیے انتخابات بہت ضروری ہیں۔ ورما کہتے ہیں کہ بی جے پی کی سماجی بنیاد پھیل رہی ہے لیکن اس کی قیادت ابھی بھی زیادہ تر اونچی ذات کے لوگوں پر مشتمل ہے۔ یہ ایک تضاد ہے جس کا سامنا مستقبل میں پارٹی کو کرنا پڑ سکتا ہے۔
نقادوں کا خیال ہے کہ بی جے پی کی اکثریتی سیاست ’انڈیا کے نظریے‘ کو بدل رہی ہے جو کہ سیکیولر اقدار کی وجہ سے زیادہ روادار اور باخبر تھا۔
پروفیسر سیتا پاتی کہتی ہیں کہ ’ان کا خیال جیت گیا تھا کیونکہ انھوں نے ایک ہو کر کام کیا تھا۔‘
(بشکریہ بی بی سی اردو)