مسلمان

اسلام ایک مکمل ضابطہ حیات ہونے کے ساتھ ساتھ دین فطرت بھی ہے جو ان تمام احوال و تغیرات پر نظر رکھتا ہے جن کا تعلق انسان اور کائنات کے باطنی اور خارجی وجود کے ظہور سے ہے۔ یہ ایک مسلمہ حقیقت ہے کہ اسلام نے یونانی فلسفے کے گرداب میں بھٹکنے والی انسانیت کو نور علم سے منور کرتے ہوئے جدید سائنس کی بنیادیں فراہم کیں۔مذہب اسلام میں تعلیم کی اہمیت کا اندازہ اس بات سے لگایا جاسکتا ہے کہ رسول اللہ پر سب سے پہلی وحی میں جو آیت نازل ہوئی اس میں تعلیم کا ہی ذکر ہے۔ ’’پڑھ اپنے رب کے نام سے جس نے تمہیں پیدا کیا۔ رسول اللہ نے ارشاد فرمایا : علم کا حاصل کرنا ہر مسلمان مرد وعورت پر فرض ہے۔
سائنس و ٹکنالوجی سے مسلم امت کا تعلق کافی قدیم ہے ، یہ اتنا ہی پرانا تعلق ہے جتنی اس امت کی تاریخ۔ ابتداء سے ہی اس امت نے جہاں فقہ، حدیث ، قرآن کے ماہرین تیار کیے ہیں وہیں طب، طبیعات، جیومیٹری الجبرائ، فلکیات، کیمیا جیسے سائنسی علوم کے بے حساب اعلیٰ پائے کے ماہرین بھی پیدا کیے۔ اندلس جسے آج اسپین کہا جاتا ہے کسی دور میں مسلم تہذیب کا ایک اہم مرکز تھا اور ساتھ ہی اسے تقریباً ہر علم کے میدان میں یورپ کا استاد بھی مانا جاتا تھا۔
اسلام کے غلبے کے بعد سے ہی تعلیم کو زیادہ اہمیت دی گئی ہے۔ ان کی ایک عالمی تاریخ رہی ہے ان کے استفادہ کرکے ہی دوسری قوموں نے عروج حاصل کی۔مارکوئس کے الفاط میں:- ’’یہ مسلمانوں کاہی علم تھا، مسلمانوں کاہی فن تھا اور مسلمانوں کا ہی ادب تھا کہ جس کا یورپ بڑی حد تک مقروض ہے قرون وسطی کی تاریکی سے نجات حاصل کرنے میں‘‘۔ اہل یورپ کا دعویٰ ہے کہ سائنس کی تمام تر ترقی میں صرف ان کا حصہ ہے مگر اس حقیقت سے بھی کوئی انکار نہیں کرسکتا کہ تجرباتی سائنس کی بنیاد مسلمانوں نے ہی رکھی ہے اور اس کا اعتراف آج کی ترقی یافتہ دنیا نے بھی کیاہے۔ اس ضمن میں ایک انگریز مصنف اپنی کتاب ’’میکنگ آف ہیومینٹی‘‘ میں لکھتا ہے: "مسلمان عربوں نے سائنس کے شعبہ میں جو کردار داا کیا وہ حیرت انگیز دریافتوں یا انقلابی نظریات تک محدود نہیں بلکہ یہ ایک حقیقت ہے کہ آج کی ترقی یافتہ سائنس ان کی مرہون منت ہے‘‘۔
ہندوستان کی آزادی کے بعد یہ کہا جاتا ہے کہ بالعموم مسلمانوں کی معاشی، سیاسی، تہذیبی، سماجی اورعلمی و سائنسی ترقی کا سلسلہ تھم گیا ہے۔ مسلمانو ں میں کوئی قابل ذکر افراد پیدا نہیں ہوا جنھوں نے اپنے اپنے شعبہ ہائے حیات میں کارہائے نمایاں انجام دیے ہوں۔ اگرچہ یہ بات سچ ہے کہ تقسیم ہند کے بدولت مسلمانوں کے پڑھے لکھے اور ذی شعور طبقے کا ایک بڑا حصہ سرحد کے دوسرے پار سدھار گئے تھے جس نے اس قوم کو ہندوستا ن میں ایک بڑا دھکا پہنچایا وہیں یہ بات بھی درست ہے کہ مسلمانوں نے ان نامساعد حالات میں بھی اپنے قابلیتو ں اور ذہانتوں کا لوہا منوایا ہے۔ یہ کہنا کہ ان میں کوئی قابل ذکر افراد پیدا نہیں ہوا یہ کہنا مناسب نہیں ہے۔
ڈاکٹر اے پی جے عبد الکلام کا تعلق ہندوستان کے میزائل پروگرامس سے ہوگیا۔ ہندوستان کے سبھی میزائل پروگرامس میں انھوں نے ایک اہم رول ادا کیا۔ ایک غریب گھرانے سے پل کر بڑھنے والے اے پی جے عبدالکلام کی خدمات کے عوض انھیں ہندوستان کے اعلیٰ ترین اعزازات پدم وبھوشن اور بعدازاں بھارت رتن سے نوازا گیا۔ڈاکٹر سید ظہور قاسم کو ہندوستان کے انٹارٹیکا مشن کے لیے جانا جاتا ہے۔ 80کی دہائی میں ڈاکٹرقاسم نے ہندوستان کے اس طرح کے کئی مشنس کی قیادت کی۔ وہ ہندوستان کے 1981 انٹارٹیکا مشن کا حصہ تھے۔ پی وی نرسمہارائو کے دور میں آپ ہندوستانی پلاننگ کمیشن کے ممبر رہے۔ 89تا 1991کے درمیان آپ نے ملک کی مشہور یونیو رسٹی جامعہ ملیہ اسلامیہ کی وائس چانسلر کے ذمہ داری بھی ادا کی۔ علم سمکیات (Fisheries) ، ماحولیا ت اور Mari Cultureمیں آپ کی کافی خدمات رہیں آپ کی ان خدمات کے لیے ہندوستانی حکومت نے آپ کو اعلیٰ ترین قومی اعزازات پدم بھوشن اور پدم شری سے نوازا۔ انڈین سائنس کانگریس نے 2008میںآپ کو لائف ٹائم اچیومینٹ ایوارڈ سے نوازا۔ڈاکٹر سالم علی ہندوستان کے برڈ مین (Bird Man of India)کے لقب سے جاننے والے سالم معیزالدین علی ماہر طیوریات تھے جنھوں نے ہندوستان میں اپنی طرز کا پہلا پرندوں کا سروے کروایا اور پرندوں کے موضوع پر کئی کتابیں تصنیف کیں۔ Bharatpur Bird Sanctuary نیزSilent Valley National Park کے قیا م و تحفظ میں ان کا رول کافی اہم رہا۔ کئی پرندے اور پرندوں پر کام کرنے والے کچھ اداروں کو آپ کا نام دیا گیا ہے۔سالم علی کئی سائنسی اداروں کی ترقی اور مستحکم کرنے کے لیے بھی سرگرم رہے۔ ان کی خدمات کے لیے کئی اداروں اور یونیورسٹیزنے انھیں اعزازات اور ڈگریوں سے نوازا۔ ہندوستانی حکومت نے انھیں 1958میں پدم بھوشن اور 1976میں پدم وبھوشن سے نوازا۔ 1985میںو وہ راجیہ سبھا کے لیے بھی نامزد کیے گئے۔
ڈاکٹر عبید صدیقی ہندوستان کے مایہ ناز سائنسداں تھے۔وہ نیورو بائیلوجی اور جینیٹکس کے ماہر تھے۔ جنھوں نے ٹاٹا انسٹی ٹیوٹ آف فنڈامنٹل ریسرچ، نشنل سینٹر فار بائیلوجیکل سائنس کے قیا م میں اہم کردار ادا کیا۔ انھوں نے پی ایچ ڈیUniversity of Pennsylvania سے کیا۔ اپنے ریسرچ کے دوران انھوں نے کافی اہم تحقیقاتی کام انجام دیا۔ہومی بھابھا کی دعوت پر 1962میں انھوں نے TIFRممبئی میں مولیکیولر بائیلوجی یونٹ (Molecular Biology)قائم کیا۔ 1980کی دہائی میں ڈاکٹر صدیقی نے ذائقہ پر اپنا تحقیقی کام کیا جس نے جدید سائنس کو یہ سمجھنے میں مدد دی کہ ذائقہ اور سونگھنے کی حسیات دماغ میں کس طرح پہنچتی ہیں اور دماغ انھیں کس طرح سمجھ پاتا ہے۔ انھیں اپنے کام کے لیے کئی ایوارڈ سے نوازا گیا۔ ہندوستانی حکومت نے بھی انھیں پدم وبھوشن اور پدم بھوشن سے نوازا۔ پروفیسر ای اے صدیق ہندوستان کے مایہ ناز زرعی سائنس داں ہیں جنھوں نے اپنے کام کے ذریعے اعلیٰ معیار کی چاول کی کئی نئی اقسام کی پیداوار میںمدد دی۔ ہندوستانی حکومت نے انھیں ان کے کام کے لیے 2011میں پدم شری سے نوازا۔ ان کی تحقیق کا اصل میدان جینیٹک ریسرچ رہا جس کے ذریعے انھوں نے چاول کی کئی نئی اقسام ایجاد کی گئی۔ پوسا باسمتی 1، پوسا 2-21، پوسا 33، پوسا 4 اور پوسا 834جینے اقسام آپ کے نام معنون کی جاتی ہیں۔ ڈاکٹرقدسیہ تحسین علی گڑھ مسلم یونیورسٹی میں زولوجی کی پروفیسر ہیں۔ آپ ہندوستان کی دو سائنس اکیڈمی سے وابستہ رہے ہیں۔ Nematology کے میدان میں ان کی خدمات کے لیے انھیں ONTA (Organization Nematologists of Tropical America) کی جانب سے 2005میں خصوصی اعزاز سے نوازا گیا۔ اس اعزاز کو حاصل کرنے والی وہ ایشیا سے پہلی خاتون ہیں۔ Taxonomy, Biodiversity جیسے موضوعات آپ کے تحقیق کا مید ان رہے ہیں۔ Nematodesکی کئی نئی اقسام اور ان کی تفصیلات پر بھی آپ نے کافی کام کیا ہے۔ڈاکٹر شاہد جمیل مایہ ناز سائنسداں ہیں۔ آپ Hepatites Eوائرس پر اپنے ریسرچ کے لیے جانے جاتے ہیں۔ 2000میں انھیں ہندوستان کے اعلیٰ ترین سائنسی ایوارڈ شانتی سوروپ بھٹناگر ایوارڈ سے نوازا گیا۔ وائرس پر آپ کی تحقیقا ت کی ابتدا آپ کے قیام امریکہ کے دوران ہوئی جہاں انھوں نے Hepatities Bوائرس پر کام کیا۔ اس کے بعد انھوں نے Hepatities Eاور HIVوائرس پر تحقیق کی۔
ڈاکٹر احتشام حسنین ملک کے جانے مانے بائیلوجیکل سائنس داں ہیں جو بائیوٹیک سے مربوط کئی اداروں سے جڑے ہیں اور ساتھ ہی ملک کی کئی ریاستو ں میں سائنسی مشیر کا فریضہ انجام دے رہے ہیں۔ حکومت ہند نے آپ کو بائیوٹیک کے میدان میں آپ کی خدمات کے لیے پدم شری سے نواز ا۔اسی کے ساتھ جرمنی نے اپنے اعلیٰ ترین شہری اعزاز Order of Merit (ہندوستان کے بھارت رتن کے مماثل) سے بھی آپ کو نوازا۔ اس اعزاز کو حاصل کرنے والے آپ واحد ہندوستانی ہیں۔ ایک سائنس داں کے علاوہ آپ کی پہچان پالیسی ساز اور ایک قابل منتظم (ایڈمنسٹریٹر) کے طور پر بھی جانی جاتی ہے۔ڈاکٹر شمیم جیراجپوری ہندوستان کے ایک نمایاں با ئیلوجیکل سائنس داں ہیں جو nematologyکے میدان میں اپنی تحقیق اور کام کے لیے جانے جاتے ہیں۔ حکومت ہند کی وزارت ماحولیا ت کی جانب سے شروع کردہ Janki Ammal National Award for Taxonomyسب سے پہلے آپ کو عطا کیا گیا۔ ملک کے کئی سائنسی اداروں کی قیادت کا اعزاز بھی آپ کو حاصل ہوا ہے۔ آپ کی تحقیقات کا اصل میدان درختوں اور مٹی کے Nematodes رہے ہیں۔ آفرین علام بایومیڈیکل کمپنی SinonTherapeuties کی بانی اور سی ای او ہیں۔ انہوں نے میڈیکل میں باضابطہ نہ کوئی ڈگری حاصل کی اور نہ ہی وہ پی ایچ ڈی ہیں، علام کی توجہ کا مرکز کاربن ڈائس رہے ہیں۔ کاربن ڈائس کافی چھوٹے ذرات (NanoParticles)کو کہا جاتا ہے جو ادویات اور علاج کے دیگر ذرائع کو لے جانے والے ذرائع کا کام انجام دیتے ہیں۔ آئی آئی ٹی میں اپنے ریسرچ کو انھوں نے آگے بڑھایا۔ اور 2014-15کے آس پاس انھوں نے اپنے کمپنی کی بنیاد ڈالی۔ڈاکٹرسید محمود نقوی جیو لوجی کے مشہور سائنس داں ہیں۔ ہندوستان میں اس موضوع پر مہارت رکھنے والے چند لوگوں میں مانے جاتے تھے۔ 1960کے بعد انھوں نے محنت کے ذریعے تمام وسائل سے مالامال جیو کمیسٹری لیبویلٹریز کے قیام کو ممکن بنایا۔انیس الرحمن کو کمپیوٹرنگ اپلی کیشنس میں ان کی خدمات کے لیے جانا جاتا ہے۔ آج بھی کمپیوٹرز میں لکھے جانے والے کئی Codesکی بنیاد ان کے ذریعے دیے گئے۔ ڈاکٹر انیس الرحمن کو MolecularDynamics کا باوا آدم کہا جاتا ہے جو کمپیوٹر سے تعلق رکھنے والی فزکس کی ایک مخصوص شاخ ہے۔ American Physical Societyکی جانب سے فزکس میں قابل ذکر کارنامے کے لیے ہر سال انیس الرحمن ایوارڈ دیا جاتا ہے۔
آزادی کے بعد ہندوستان میں سائنس اور ٹکنالوجی کو جو سمت اور رفتار ملی اس کا سہرا بلاشبہ پنڈت جواہر لعل نہرو اور مولانا ابوالکلام آزاد کی قیادت اور وزارت کے سرجاتا ہے۔ ہندوستان میں نمبر ایک سائنس داں کی حیثیت سے جامعہ ملیہ اسلامی میں کیمسٹر ی کے پروفیسر عمران علی کا انتخاب ہوا ہے ۔ اسی طرح پوری دنیا کے دو فیصد سائنس دانوں میںا سے ایک حیثیت سے جامعہ ہمدرد نئی دہلی کے پرو وائس چانسلر ڈاکٹر احمد کمال بھی ہیں۔ڈاکٹر یوسف خواجہ حمید پر ہر ہندوستانی کو فخر ہوگا کیوں کہ کیمبرج یونیورسٹی نے اپنی کیمسٹری ڈپارٹمنٹ کا نام ان کے نام سے رکھا ہے۔ ڈاکٹر یوسف خواجہ حمید ہندوستان کی پوری دنیامیں ایلوپتھک دوا ساز کمپنی سپلا (CIPLA) کے مالکوں میں سے ہیں۔ ڈاکٹر یوسف خواجہ حمید اپنے زمانے کے نامور سائنس داں جرمنی سے کیمسٹر ی میں پی ایچ ڈی ہیں۔ اسی طرح فیشیریز (Fisheries) کے میدان میں جس شخص کو فادر آف انڈین فیشیریز کہا جاتا ہے وہ کیرالہ کے ڈاکٹر کے کْنہا علی کا نام ہے۔ جس آدمی نے سمندری نمکیات پر غیر معمولی کام کیا اور اپنی پہچان بنائی وہ مرزا محمد تقی خاں تھے جنہیں علمی اور سائنسی حلقوں میں ایم ایم تقی خاں کے نام سے جانا جاتا ہے۔ علم نباتات یعنی باٹنی میں لکھنؤ کے ڈاکٹر اختر حسین جو جامعہ ہمدرد کے پہلے وائس چانسلر بھی بنے اور علی گڑھ مسلم یونیورسٹی کے پروفیسررعایت خاں کا نام خاصہ اہم ہے۔ غیر نامیاتی علم کیمیا (InorganicChemistry ) میں پروفیسر وحیدالدین ملک نے علی گڑھ مسلم یونیو رسٹی اور ریجنل انجینئرنگ کالج رڑکی میں اپنے نام کو کام سے اونچا کیا۔ پروفیسر وحید الدین ملک کے علمی مرتبے، تحقیقی مہارت کی وجہ سے جھانسی یونیورسٹی، کشمیر یونیورسٹی سری نگر اور الہ آباد یونیورسٹی کا یکے بعد دیگرے وائس چانسلر بنایا گیا۔ علی گڑھ مسلم یونیورسٹی کے میڈیکل کالج میں مائیکرو بایولوجی میں پروفیسر سہیل احمد اور بایو کیمسٹر ی میں پروفیسر احمد صلاح الدین نے انتہائی خاموشی سے جو اعلیٰ و عرفا تحقیقی کام کیے وہ آج بھی جواہر لعل نہرو میڈیکل کالج کے لیے وجہ افتخار ہیں۔امروہہ جو اپنی ادبی زرخیزی کے لیے ساری دنیا میں جانا جاتا ہے اور جو رثائی ادب کا لکھنو کے بعد بڑا مرکز رہا ہے اس نے بھی ہمیں دو اہم سائنس داں دیے۔ جن میں ایک سید محمود نقوی مرحوم تھے جو علم طبقات الارض (Geo-Chemistry) کے غیرمعمولی ماہرین میں تھے۔ علی گڑھ کے تعلیم یافتہ تھے لیکن تقریباً چالیس سال تک حیدرآباد میں نیشنل جیو فیزیکل ریسرچ انسٹی ٹیوٹ سے جڑے رہے۔ ڈاکٹر نقوی کو مختلف اعزازات کے ساتھ 1983میں علم طبقات الارض کے مید ان میں شانتی سروپ بھٹناگر ایوراڈ سے سرفراز کیا گیا۔ اسی طرح ڈاکٹر سید وجیہ احمد نقوی کا نام سمندری آبی کیمسٹر ی، بایو جیو کیمسٹر ی میں خاصہ اہمیت کا حامل ہے۔ انہوں نے ہندوستان اور جرمنی کے مشترکہ تحقیقی پروجیکٹ میں چیف انڈین سائنٹسٹ کے طور پر غیرمعمولی خدمات انجام دیں۔ ڈاکٹر وجیہ نقوی کو بھی تمام علمی اعزازات کے ساتھ 1996میں شانتی سروپ بھٹناگر ایوارڈ سے نوازا گیا۔ وہ سائنس کے متعلق بے شمار انجمنوں اور بین الاقوامی تحقیقیہ پروجیکٹس کا حصہ رہے ہیں۔
ان سب کے باوجود آج مسلمان سائنسی علوم میں پیچھے رہنے کے باعث مادی اور معاشی ترقی میں بہت پسماند ہ ہوگئے ہیں۔آج زمانے میں جتنی بھی مصنوعات اشیاء خواہ وہ زندگی کے کسی بھی شعبے سے تعلق رکھتی ہوں ان کے ایجادات اور دریافت میں کسی مسلمان کا کوئی عمل دخل اوراعانت شامل نہیں ہے۔ آج دنیا میں مسلمانوں کے زیر تصرف 57ممالک ہیں جہاں مسلمانوں کی اپنی حکومت ہے۔ دنیا میں مسلمانوں کی آبادی تقریباً ایک ارب ساٹھ کروڑ پر مشتمل ہے لیکن یہ ہمارے لیے بڑی شرمندگی کی بات ہے کہ اب تک صرف تین مسلمانوں نے نوبل پرائز حاصل کیا۔ لیکن ان سب کے باوجود جب ان کا ماضی روشن رہا ہے تو امید ہے کہ مستقبل بھی تابناک رہے گا:
ذرا نم ہو تو یہ مٹی بہت زرخیز ہے ساقی

آج نہ تو شاہی امام سیدعبداللہ بخاری کا یوم پیدائش ہے اور نہ ہی یوم وفات۔ اس لیے آپ پوچھ سکتے ہیں کہ میں نے ان پر قلم اٹھانے کا فیصلہ کیوں کیا اور انھیں یادکرنے کی وجہ کیا ہے؟ میری نظر میں شاہی امام سیدعبداللہ بخاری اس ملت کے محسن تھے اور جو قومیں اپنے محسنوں کو فراموش کردیتی ہیں ان پر اللہ اپنے محسن اتارنا بندکردیتا ہے۔ آج اس مضمون کا محرک یہی خیال پریشاں ہے۔ یوں بھی جب سے ملت اسلامیہ ہند پر برا وقت پڑا ہے مجھے نہ جانے کیوں بار بار ان کی یادآرہی ہے۔ان کا نہ توسیاست سے کوئی ناطہ تھا اور نہ ہی وہ اس کے داؤپیچ جانتے تھے۔دراصل حالات نے انھیں مجبور کردیا تھا کہ وہ سیاست دانوں کے ساتھ اسٹیج شیئر کریں۔ حالانکہ ان کا یہ تجربہ زیادہ کارآمد ثابت نہیں ہوا، کیونکہ سیاست دانوں نے ان کے ساتھ بھی وہی سلوک کیا جو وہ اکثر ایسے لوگوں کے ساتھ کرتے ہیں جو برے وقت میں ان کے کام آتے ہیں۔

شاہی امام سید عبداللہ بخاری مرحوم دہلی کی شاہجہانی جامع مسجد کے بارہویں امام تھے۔دہلی کی جامع مسجد تعمیر کرنے کے بعد ان کے اجداد کو شاہجہاں نے بخارا سے خاص طورپر مسجد کی امامت کے لیے مدعو کیاتھا اور تب سے یہی خاندان اس منصب پر فائض ہے۔

سیدعبداللہ بخاری کی پیدائش 1922میں راجستھان میں ہوئی تھی۔ اس اعتبار سے آپ کہہ سکتے ہیں کہ یہ ان کی پیدائش کی صدی ہے۔ وہ اگر زندہ ہوتے تو ایک صدی کی عمر کو پہنچتے۔ انھیں خاندانی روایت کے مطابق1946 میں جامع مسجد کا نائب امام مقررکیا گیا اور8 جولائی 1973 کو انھوں نے اپنے والدسید حمیدبخاری کی جگہ شاہی امامت کا منصب جلیلہ منصب حاصل کیا۔ان کا انتقال 8 جولائی 2009 کو 87 سال کی عمر میں ہوا۔

میری خوش قسمتی یہ ہے کہ مجھے انھیں قریب سے دیکھنے اور سمجھنے کا موقع ملا۔ درجنوں بار ان کے انٹریوز لئے اور ان سے سینکڑوں ملاقاتیں ہوئیں۔بارہا ان کے دسترخوان پرلذیذ مغلئی کھانوں سے لطف اندوز ہونے کا موقع ملا۔لیکن جس ادا نے مجھے ان کا گرویدہ بنایا تھا،وہ ان کی بے پناہ جرات اور بے باکی تھی۔ وہ خدا کی بادشاہت پر یقین کامل رکھتے تھے اور ہر جمعہ کو نماز کے بعدلاکھوں فرزندان توحید کے درمیان اس یقین کو ان الفاظ میں دوہراتے تھے۔”ہم سب ایک ہی خدا کی بادشاہی پر یقین رکھتے ہیں اوراسی کے آگے اپنا سرنیاز جھکاتے ہیں“ واقعہ یہ ہے کہ جب وہ ان الفاظ کو اپنی گرجدار آواز میں منبر سے دوہراتے تھے تو نمازیوں کے بدن میں ایک عجیب قسم کی حرارت پیدا ہوتی تھی اور خدا پر یقین مضبوط ہوتا چلاجاتا تھا۔

آج ہندوستان میں مسلمانوں کو جن مسائل و مصائب کا سامنا ہے، ان میں مجھے دوردور تک شاہی امام جیسی جرات اور ہمت والا قائد نظر نہیں آتا۔ وہ کسی سے مرعوب نہیں ہوتے تھے مگر ان کا شخصی جاہ وجلال اور وجاہت ایسی تھی کہ ان سے ہرکوئی مرعوب تھا۔ مجھے یاد ہے کہ جب بھیونڈی کے فسادزدہ علاقوں کا دورہ کرنے کے لیے وہ بمبئی پہنچے تو سانتا کروزہوائی اڈے پر جہاز کے تمام ہی مسافر ان کی ایک جھلک پانے کے لیے قطارمیں کھڑے ہوئے تھے۔گول چہرہ، چوڑی پیشانی، سرپرخاص قسم کی چوکور ٹوپی،آنکھوں پر کالا چشمہ ان کی خاص پہچان تھی۔وہ ہمیشہ عربی توپ پہنتے تھے کہ اس میں ان کا بھاری بھرکم وجود سماجاتا تھا۔ آپ ان کے جذباتی طرز عمل اور فکر پرتنقید کرسکتے ہیں، لیکن ان کے اخلاص اور نیک نیتی پر انگلی نہیں اٹھاسکتے۔ انھوں نے پوری زندگی ملت کے نام وقف کی تھی اور وہ حکمرانوں سے برابری کی سطح پر گفتگو کرتے تھے۔

انھوں نے پوری زندگی عام انسانوں کی طرح گزاری۔وہ وی آئی پی کلچر کے قائل نہیں تھے اور نہ ہی مخصوص لوگوں کی محفلوں میں اٹھنا بیٹھنا پسند کرتے تھے۔ عام لوگوں کے درمیان بالکل عام انسانوں کی طرح رہتے تھے۔ ان کی شخصیت کا اصل ظہور ایمرجنسی کا دوران ہوا۔ سرکاری مظالم اورنس بندی کے خلاف وہ اپوزیشن کی ایک مضبوط آواز بن کر ابھرے۔اس دوران ایک مرتبہ جب آنجہانی وزیراعظم اندراگاندھی یوم آزادی کے موقع پر لال قلعہ کی فصیل سے خطاب کررہی تھیں تو ان کے مدمقابل شاہی امام جامع مسجد کے منبر سے دوبدو ان کی باتوں کو جھٹلارہے تھے۔اس دوران انتظامیہ نے جب مسجد کی بجلی کاٹ دی وہ تب بھی لاؤڈاسپیکر سے یہ کام کرتے رہے۔اندرا گاندھی کو اقتدار سے بے دخل کرنے والوں میں وہ سرفہرست تھے، کیونکہ انھوں نے جنتا پارٹی کی تحریک کے دوران اپوزیشن لیڈروں کے شانہ بشانہ انتخابی مہم چلائی تھی۔

یہ بات کم ہی لوگوں کو معلوم ہے کہ1977میں جنتا پارٹی سرکار بننے کے بعد جب وزیراعظم مرارجی ڈیسائی نے انھیں نائب صدر جمہوریہ کا عہدہ پیش کیاتو انھوں نے اسے حقارت سے ٹھکرادیا تھا۔ اس کے بعد 1989میں وی پی سنگھ کی قیادت والی جنتادل سرکار بنوانے میں بھی انھوں نے کلیدی رول ادا کیا تھا۔یہی وجہ ہے کہ آنجہانی وی پی سنگھ وزیراعظم کا حلف اٹھاکر سب سے پہلے شاہی امام سے آشیرواد لینے جامع مسجد کے اسی حجرے میں آئے تھے، جو ہرخاص وعام کے لیے کھلا ہوا تھا۔

ایمرجنسی کے بعدشاہی امام نے جے پرکاش نرائن، بابو جگجیون رام، چندرشیکھر، راج نارائن اور چودھری چرن سنگھ کے ساتھ درجنوں انتخابی جلسوں کو خطاب کیا اور ملک کے اندرسیاسی بیداری پیدا کی۔مجھے یاد ہے کہ جنتا پارٹی حکومت کا پہلا عوامی جلسہ رام لیلا گراؤنڈ میں منعقد ہوا تو شاہی امام اسٹیج پر پہلی صف میں بیٹھے تھے اور انھوں نے اس حکومت کو اپنا’عصا ئے شاہی‘دکھاتے ہوئے یہ باور کرادیا تھا کہ اگر حکومت اپنی راہ سے بھٹکی تو وہ اسے زمیں دوز کردیں گے۔ میں اس عوامی جلسے کا عینی گواہ ہوں۔

کہنے کو وہ شاہی امام تھے اور اسی خاندان کے چشم وچراغ بھی تھے جسے شاہجہاں نے جامع مسجد کی تعمیر کے بعد امامت کے لیے بخارہ سے طلب کیا تھا۔ وہ چاہتے تھے تو محل میں بھی رہ سکتے تھے۔لیکن وہ ہمیشہ اپنے چھوٹے سے حجرے میں بیٹھ کر ضرورت مندوں کی مدد کرتے تھے۔

آج ملک میں مسلمانوں کو جن حالات کا سامنا ہے ان میں مجھے ان جیسا کوئی بے لوث مسلم قائد نظر نہیں آتاجو حکومت کی آنکھوں میں آنکھیں ڈال کر بات کرسکے۔ آج کی مسلم قیادت مصلحت کے حصاروں میں قید ہے اور اسے ملک وملت سے زیادہ اپنے ذاتی مفادات کی فکر لاحق ہے۔ شاہی امام کی خوبی یہ تھی کہ ان کا کوئی ذاتی ایجنڈا نہیں تھا۔ نہ تو انھیں دولت کی چاہ تھی اور نہ ہی اقتدار سے انھیں کوئی سروکار تھا۔ان کا پسندیدہ اخبار روزنامہ ’پرتاپ‘ تھا جو اس دور میں اپنے تیکھے اداریوں کے لیے جانا جاتا تھا۔ یہ ادارئیے اکثر مسلمانوں پر تنقید سے لبریز ہوتے تھے۔ میں نے ’پرتاپ‘ کے علاوہ کوئی دوسرا اخبار ان کے ہاں نہیں دیکھا۔حالانکہ اس دور میں ’دعوت‘، الجمعیۃ‘اور ’قومی آواز‘ جیسے اخبار بھی شائع ہوتے تھے، لیکن وہ ’پرتاپ‘ ہی شوق سے پڑھتے تھے۔ اگر میں یہ کہوں تو بے جا نہیں ہوگا کہ مسلمانوں نے اپنے مخلص قائدین کی قدر نہیں کی اور انھیں موت کے بعد فراموش کردیا۔ میں ان مخلص قائدین میں ڈاکٹرعبدالجلیل فریدی، ابراہیم سلیمان سیٹھ، غلام محمود بنات والا، سلطان صلاح الدین اویسی اور سید شہاب الدین کو بھی شمارکرتا ہوں، جو آج ہماری یادداشت سے محو ہوچکے ہیں۔ خدا ان کی قبروں کو نور سے بھردے۔آمین

آر ایس ایس کے سربراہ موہن بھاگوت نے مسلمانوں کے تعلق سے گزشتہ 4جولائی کو جوعدیم المثال بیانات دئے‘ کہا جارہا ہے کہ ان کا سبب مشہور مسلم مفکرڈاکٹر خواجہ افتخاراحمد کی وہ ہمہ جہت اور جامع تقریر بنی جو انہوں نے موہن بھاگوت کے ذریعہ اپنی نئی کتاب کے اجرا سے پہلے کی تھی ۔خواجہ صاحب سے میرا تعلق تین دہائیوں پرانا ہے۔میں نے بہت قریب رہ کر بھی انہیں پرکھااور دور جاکر بھی۔ان کے جو بھی سیاسی نظریات رہے ہوں ان کی ایک خوبی نے مجھے بے حد متاثر کیا۔وہ 1992کے بعد ہر وزیر اعظم کے انتہائی قریب رہے لیکن میں نے کبھی انہیں’’ہاتھ پھیلاتے‘‘ ہوئے نہیں دیکھا۔ انہوں نے بابری مسجد کے انہدام کے بعدہندوستانی مسلمانوں کو پیش آنے والے مسائل کی سنگینی کو بھانپ کرایک طرف جہاں اس وقت کے وزیر اعظم نرسمہاراو کے سامنے پوری قوت کے ساتھ نہ صرف مسائل رکھے بلکہ ان کا حل بھی پیش کیاتو دوسری طرف بی جے پی کی حکومت کے دوران وزیراعظم اٹل بہاری باجپائی کے سامنے بھی ان کا یہی رویہ قائم رہا۔انہوں نے مسلمانوں کے جذباتی مسائل کے تناظر میں حکومت سے نہ تو ٹکراو کا راستہ اختیار کیا اور نہ ہی ذاتی مفادات کیلئے حکومت کے سامنے خود سپردگی کی۔انہوں نے زبانی جمع خرچ سے کام نہیں چلایا۔انہوں نے جو کچھ بھی کیا اسے دستاویز کی شکل دے دی۔ان کے اسی فقیدالمثال رویہ نے انہیں دونوں قائدین کے سامنے سرخرو اور قوم کے سامنے بے داغ رکھا۔4جولائی کو اپنی نئی کتاب کے اجرا کے موقع پر آر ایس ایس سربراہ کے سامنے انہوں نے ایک گھنٹے کی جو تقریر کی اس میں مسلمانوں کے حوالہ سے ایسی ایسی باتیں بھی پوری جرات کے ساتھ کہہ ڈالیں کہ اگر موہن بھاگوت مسلمانوں کے پلیٹ فارم پر آجائیں تو کسی بڑے سے بڑے قائد میں بھی وہ بات کہنے کی ہمت پیدا نہ ہو۔بہر حال اس نئی صورتحال پرمیں نے ان سے کچھ سخت سوالات پر مبنی گفتگو کی ہے۔
خواجہ افتخارکی مذکورہ کتاب ’دی میٹنگ آف مائنڈس‘ اے بریجنگ انی شئیٹوکے تین حصے ہیں۔اس میں1920سے2020تک کے درمیان تمام تر سیاسی وسماجی واقعات کا احاطہ کیا گیا ہے۔پہلے حصہ میں خواجہ افتخار نے 1920سے1947‘ تقسیم ہند‘آزاد ہندوستان ‘ سیکولر سیاست کے عروج وزوال پر سیر حاصل بحث کی ہے۔دوسرے حصہ میں مسلم قیادت ‘ان کی کامیابیوں‘ناکامیوں‘سیاسی لغزشوں اور بالغ نظری کے فقدان کا احاطہ کیا گیاہے۔تیسرے حصہ میں سنگھ پریوار پر مکمل بحث کی گئی ہے۔مسلمانان ہند اور سنگھ کے مابین ہر حساس مسئلہ کو‘جو ہمارے نزدیک ہے اور جو ان کے نزدیک ہے‘ زیر بحث وتجزیہ لایا گیا ہے۔اس کتاب کا طرہ امتیاز یہ ہے کہ یہ تمام متنازعہ مسائل کا باوقار حل پیش کرتی ہے۔
اس سلسلہ میں ہم نے ڈاکٹر افتخار احمد سے تفصیلی بات چیت کی۔انہوں نے کہاکہ آر ایس ایس تنظیم سے زیادہ ایک نہایت منظم نظریاتی جماعت ہے جو اجمالی طورپر ثقافتی مگر عملاً قومی وبین الاقوامی امور میں فیصلہ سازی کے عمل کو قطعیت کے ساتھ متاثر کرنے کے حوالے سے ایک تھنک ٹینک کی شکل میں زیادہ دیکھی جانی چاہئے۔یہ کہنا کہ محض میری تقریر کے جواب میں سرسنگھ چالک جی کی تقریر تھی درست نہ ہوگا۔البتہ اتنا ضرور ہے کہ جن موضوعات اور نکات کو ایمانداری سے میں نے اٹھایا انہوں نے اسی جذبہ کے ساتھ اپنے خیالات اور آر ایس ایس کے نظریات کی روشنی میں جوابات دیے۔اس سوال پرکہ کیا آپ کو سنگھ پریوار کے قول وعمل میں کوئی تضاد محسوس نہیں ہوتا؟انہوں نے کہا کہ قول وعمل میں تضاد ایک فطری وفکری عمل ہے۔مکمل مماثلت شاید عملاً ممکن ہی نہیں۔البتہ نیت میں اظہار اور پیغام کے حوالہ سے متعلقہ فریقین کو اپنی بات کو جس اسلوب اور جس بیانیہ کے ساتھ کہنا چاہئے اگر ایسا ہو تو اس کا خیر مقدم ہونا چاہئے۔جہاں سنگھ پریوار سے ہمیں شکایتیں ہیں وہیں ادھر بھی کچھ ایسا ہی ہے۔سنگھ پریوار اپنے واضح ایجنڈے کے مطابق کام کر رہا ہے۔وہاں ابہام نہیں ہے۔
انہوں نے کہاکہ مکالمہ ہی مہذب معاشروں کے مابین مفاہمت کے حصول کا واحد راستہ ہے۔مخاصمت سے مسائل مزید پیچیدہ ہوجاتے ہیں۔یہ عمل سنجیدہ ہونا چاہئے۔ماضی ‘حال اور مستقبل کے تقاضوں اور تبدیل ہوتی زمین کو ملحوظ رکھتے ہوئے حکمت عملی اور خیال سازی کے عمل کو آگے بڑھاناچاہئے۔ سابقہ سات دہائیوں میں جوسیکولر پارٹیاں اقتدار میں رہیں ان کے دور میں فسادات کا لامتناہی سلسلہ قائم رہا ‘تفتیش کے حوالہ سے جو کمیشن بنائے گئے ‘ان کی سفارشات اور متن کو عام نہیں کیا گیا‘ یہ سمجھا جاتا رہا کہ فسادیوں کا تعلق سنگھ سے ہے۔لیکن یہ محض بیانیہ ہی رہا۔اور آج بھی کچھ ایسا ہی ہے۔ 6 دسمبر کو بابری مسجد کی شہادت کے دن سنگھ ہر سال شوریہ دوس مناتا ہے۔سپریم کورٹ کے فیصلہ کے بعد اس سال نہ منانے کا جب فیصلہ ہواتو پورے ملک میں کہیں اس کو لے کر کوئی جشن اور تقریب نہیں ہوئی۔اس سے سنگھ کے اثر ورسوخ کو سمجھا جاسکتا ہے۔
خواجہ صاحب کا کہنا ہے کہ ہر تنظیم ‘ادارے‘ جماعت‘ معاشرے اور قوم میں ہر طرح کے عناصر ہوتے ہیں۔میرا نظریہ ہمیشہ یہ رہا ہے کہ اس اکثریت کو اخلاقی ومادی حمایت دے کرجو اعتدال اور مفاہمت کے راستے کو ترجیح دیتی ہے‘ اس کے ساتھ اشتراک عمل کو بڑھاکراس طرح کے چیلنج کا بہتر مقابلہ کیا جاسکتا ہے۔انہوں نے کہا کہ باجپائی مفاہمت کے قائل تھے۔ان کے یہاں بڑی گنجائش تھی۔انہوں نے نہ صرف سابقہ روایات واقدامات کو آگے بڑھایابلکہ مسلمانان ہند کے جذبات واحساسات کے حوالہ سے واضح موقف رکھا۔خواجہ افتخارنے بتایاکہ جب میں نے علی گڑھ مسلم یونیورسٹی میں اٹل بہاری باجپائی کے ہاتھوں باب سرسید کے افتتاح کی تجویز ان کے سامنے رکھی تو انہوں نے فوراً قبول کرلی اور کہا کہ مجھے کیا کرنا ہوگا۔میں نے کہا کہ یونیورسٹی کیمپس سے اتر پردیش سنچائی وبھاگ کالونی کی منتقلی‘میڈیکل وڈینٹل کالج کے متعلقہ مسائل کا حل اور سیٹوں میں اضافہ اور ڈھائی سو کروڑ کی خصوصی گرانٹ کا اعلان کرنا ہوگا۔وہ ان سب پر راضی ہوگئے۔لیکن علی گڑھ مسلم یونیورسٹی میں جو کچھ ہوا وہ دور اندیشی نہ تھی۔
خواجہ افتخار کا خیال ہے کہ پورا سنگھ‘ مع بی جے پی کے اچھے اور خوشگوار تعلقات چاہتا ہے۔شرائط پر گفتگو ہوسکتی ہے رشتے قائم نہیں ہوسکتے۔متنازعہ اشوزچھوڑنے کا عمل بھی دو طرفہ ہے یکطرفہ نہیں۔من حیث القوم ہم ردعمل کو حکمت عملی سمجھتے آئے ہیں۔جبکہ مثبت وتعمیری جوابات‘ خوشگوار پہلیں‘بیانات اور اقدامات کہیں زیادہ بہتر رویہ ورجحان ہیں۔ہمیں Reaction نہیں بلکہ Response کی طرف بڑھنا چاہئے۔ ہمارے یہاں قائدین کا ایک جم غفیر ہے ۔میں ان کو ذمہ داران ملت تصور کرتا ہوں۔بیشتر ان میں وہ افراد ہیں جن کا کم یا زیادہ حلقہ اثر ہے۔کچھ سیاسی جماعتیں بھی ہیں جن کا ریاستی سطح پر اثر ورسوخ ہے۔باہمی اشتراک عمل کو شعار بناکر‘ خالص پہل کو مسلم نہ رکھ کر‘ معاشرے کے تمام طبقات کو ساتھ لیتے ہوئے اورمخالفین کو بھی ساتھ رکھ کر‘ قومی وملی معاملات میں توازن اور امتزاج قائم کرکے حکمت عملی تشکیل دی جاسکتی ہے اورخاطر خواہ نتائج حاصل کئے جاسکتے ہیں۔کسی کو قطعی دوست اور کسی کو دشمن سمجھ کر مسائل کا حل نہیں نکلتا۔
میں نے پوچھاکہ آپ نے اپنی کتاب کے اجرا کیلئے آر ایس ایس کا اسٹیج کیوں چنا اور کیوں آر ایس ایس کے سربراہ موہن بھاگوت سے اس کا اجرا کرایا؟انہوں نے کہا کہ اس کتاب کے ذریعہ آج کی نسل کو صحیح تاریخ سے آگاہ کرنے‘ سیکولر سیاست کے عروج وزوال اور اس کی بحالی کے راستے پر سیر حاصل بحث اورمسلم قیادت سے سیدھی اور دو ٹوک بات کرنے کی کوشش کی گئی ہے۔اس کے علاوہ سنگھ کے سامنے اپنے موقف کے اظہار میں کسی بے جا مصلحت سے کام نہیں لیا گیا ہے۔سنگھ اور مسلمانان ہند کے مابین جو اختلافات ہیں ان کے حل کیلئے ان کی قیادت کے ساتھ بیٹھنا‘مکالمہ کرنا اور افہام وتفہیم کو فروغ دینا ضروری ہے۔لہذااس حوالے سے ضروری تھاکہ سنگھ کی قیادت کو ہی اس کتاب کے اجرا کیلئے مدعو کیا جائے۔بنیادی بات آر ایس ایس سربراہ کا اس کتاب کے اجرا کی درخواست کو قبول کرناہے اور 95سال میں ایسا پہلی بار ہونا اور ان کا اس بے باکی کے ساتھ اپنی بات کو رکھنامیرے اس فیصلہ کی حقانیت کو تسلیم کرنے کیلئے کافی ہے کہ یہ فیصلہ درست بھی تھا اور بروقت بھی۔
خواجہ صاحب کا خیال ہے کہ مسلمانان ہند موجودہ وزیر اعظم نریندرمودی کو آج تک نہیں سمجھ پائے۔ان کی ہر پہل کو تنقید کا نشانہ بناتے رہے۔ان کے بیانات کا مذاق بنانا‘ان کو سنجیدگی سے نہ لینا‘بے جا الزام تراشی اور ہر وقت گجرات فسادات کا رونا رونا‘اس سے آگے نہیں نکل پائے۔میں اس طرز عمل کو درست نہیں مانتا۔مودی صاحب ایک ایسے وزیر اعظم ہیں جن سے وہ کام لیا جاسکتا ہے جوشاید اس سے قبل کسی سے نہیں لیا جاسکا۔سنجیدگی کی ضرورت ہے!ان پر مکمل اعتماد کرکے‘ان کے خیالات سے ہم آہنگ ہوکر ان کی پہل کا خیر مقدم کرکے ‘ان کی یقین دہانیوں پر اعتبار کرکے‘ اپنے رشتوں میں ایک نئے باب کو رقم کیا جاسکتا ہے ۔ہمارا Track غلط ہے!ہم اپنے قبلہ کو درست کریں!ہر مسئلہ کا حل ممکن ہے!دلوں میں گنجائش دو طرفہ ہونا چاہئے!یہ عمل یکطرفہ نہیں ہوسکتا! موہن بھاگوت کے اس تاریخی بیان پر اگر مسلمانان ہند نے ریسپونس نہ دیا تو یہ وہ غلطی ہوگی جس کے تدارک کیلئے شاید پھر صدیاں درکار ہوں۔اس مرتبہ 95برس لگے۔آگے کا اندازہ لگانا مشکل نہیں ہونا چاہئے۔موصوف نے جس جرات کا مظاہرہ کیا ہے وہ کوئی انتہائی درجہ کا مدبر‘مفکر اور عاقل قائد ہی کرسکتا ہے۔اتنا واضح موقف جو ہر قسم کے ابہام وپہلوتہی سے پاک وصاف ہو‘اس کے بعد مسلمانان ہند اور ان کے ذمہ داران کی جانب سے پس وپیش میری نظر میں ایک طرف توسیاسی ‘اخلاقی اور نفسیاتی کوتاہ نظری ہوگی اور دوسری طرف متعلقہ ِشخصیات کی قائدانہ صلاحیت پر بھی سوال اٹھیں گے۔اس ایک فرد واحد کی تنہا کوشش وکاوش کا اتنا نتیجہ ہے۔پوری قوم اور اس کے ذمہ داران کا اگرساتھ ہو تو پھر !

بہار الیکشن سے عین قبل ریاست میں کئی مسائل بھڑک اٹھے ہیں،جنھیں حل کرنے یا یہ کہیں کہ سرد کرنے کی حکومتی تدبیریں بھی جاری ہیں۔کسی دلت کے قتل پر ایک وارث کو سرکاری نوکری،انٹر پاس غیر شادی شدہ لڑکیوں کواب دس کی بجاے پچیس ہزار اور گریجویشن پاس لڑکیوں کو پچیس کی جگہ پچاس ہزار روپے کا خصوصی اسکالرشپ ، حال ہی میں اسسٹنٹ پروفیسروں کی تقرری اور اردو مترجم و معاون مترجم کی تقرری کے لیے امتحانات کی ممکنہ تاریخ کے اعلانات کو اسی سلسلے کی کڑی قرار دیاجا سکتا ہے۔وزیر اعظم نریندر مودی بھی مختلف شعبوں میں کئی سو کروڑ کے منصوبوں کا افتتاح کر چکے ہیں،دربھنگہ ہوائی اڈے کی شروعات کی خبر ایک بار پھر انگڑائی لینے لگی ہے ۔انہی انتخابی مسائل و موضوعات میں ایک موضوع اردو کا بھی شامل ہوگیا ہے۔حالاں کہ اردو کے کچھ مسئلے مثلاً بہار اردو اکیڈمی ،اردو مشاورتی بورڈ وغیرہ جیسے سرکاری اداروں سے متعلق پہلے سے بھی موجود تھے ۔تازہ مسئلہ بھی مئی میں ہی پیدا ہوا تھااور وہ یہ تھا کہ ہائی اسکولوں میں اردو کو لازمی مضمون کی بجاے اختیاری مضمون قرار دے دیا گیا اور اب اساتذہ کی تقرری پانچ لازمی سبجیکٹ (ہندی،انگریزی، سماجیات، سائنس، ریاضی) اور ایک استاذ کی تقرری دوسری زبان کے لیے ہوگی جس میں سنسکرت، بنگلہ، میتھلی، بھوجپوری ،عربی و فارسی وغیرہ پہلے سے تھیں اور نئے یعنی پندرہ مئی دوہزار بیس کے محکمۂ تعلیم،بہار کے نوٹیفکیشن کے بعد اس ضمن میں اردو بھی شامل ہوگئی ہے،اس سے قبل مادری زبان اور دوسری راج بھاشا ہونے کی حیثیت سے اردو لازمی مضمون کی حیثیت سے شامل نصاب رہی ہے۔ نتیش کمار نے پہلی بار ہی حکومت میں آنے کے بعد یہ اعلان کیاتھا کہ بہار کے تمام اسکولوں میں اردو کے اساتذہ تقرر کیے جائیں گے،ان کی حکومت میں اردو کے حق میں کئی قابل ستایش قدم اٹھائے بھی گئے،اردو کے کئی ادارے بہار میں سرکاری سرپرستی میں چل رہے ہیں ،یہ الگ بحث کا موضوع ہے کہ ان اداروں سے اردو کے فروغ کا کیا اور کتنا کام ہو رہا ہے اور بہار کے اسکولوں میں کتنے اساتذہ کی سیٹیں ہنوز خالی ہیں۔
مئی والے نوٹیفکیشن کا علم اردو والوں کو تقریباً دو ماہ تک نہیں ہوسکا تھا یا معلوم تھا مگر اس پر خاموشی تھی ،غالباً جولائی کے آغاز یا جون کے اواخر میں ایک ہندی اخبار نے اس تعلق سے ایک خبر شائع ،پھر ڈاکٹر مشتاق دربھنگوی، مفتی ثناء الہدی قاسمی،ڈاکٹر سید احمد وغیرہ کے تفصیلی مضامین اس حوالے سے شائع ہوئے،بہار سٹیٹ اردو ٹیچرز ایسو ایشن بھی جولائی کے وسط سے اس معاملے میں سرگرم ہے،اس کی طرف سے 11جولائی کو ہی وزیر اعلیٰ کو خط لکھ کر توجہ دلائی گئی تھی۔اردو اخباروں میں کئی لوگوں کے بیانات شائع ہوئے اور اگست کے وسط تک بہار کے تقریباً تمام اردو والوں کویہ بات پتا چل گئی کہ حکومت نے ہائی اسکول سطح کے نصابِ تعلیم سے اردو سبجیکٹ کی لازمی حیثیت کو ختم کردیا ہے؛ چنانچہ پٹنہ و آس پاس میں موجود اردو کے سرکاری و غیر سرکاری اداروں سے وابستہ بعض سرگرم اشخاص سمیت عام اردو والے بھی بیدار ہوگئے،کچھ لوگوں نے وزیر تعلیم سے ملنے اور مسئلے کو حل کروانے کی کوشش کی،تو کچھ لوگوں نے احتجاج و مطالبۂ انصاف کا فریضہ ادا کیا۔ سوشل میڈیا اور اردو اخبارات میں بہار کے متعدد اضلاع سے ایسی تصویریں مسلسل نظر آرہی ہیں ،جن میں چند لوگ اپنے ہاتھوں میں پلے کارڈز اٹھائے بہار حکومت سے اردو کے ساتھ انصاف کرنے کا مطالبہ کر رہے ہیں اور جوں جوں الیکشن کے دن قریب آ رہے ہیں،یہ سلسلہ بھی تیز تر ہوتا جارہا ہے۔
اب ایک نیا نوٹیفکیشن محکمۂ تعلیم کا گشت کر رہا ہے،جس میں یہ کہا گیا ہے کہ جس اسکول میں بھی اردو یا دیگر دوسری زبانوں میں سے کسی ایک کے پڑھنے والے طلبہ ہوں گے،وہاں اس زبان کے استاذ کی تقرری ہوگی،مئی والے اور تازہ نوٹیفکیشن میں فرق یہ ہے کہ پہلے والے میں چالیس طلبہ کی حد بندی تھی،اس میں اس تعداد کو مبہم رکھا گیاہے،مگر حیثیت اردو کی دوسری بھاشا کی پہلے والے میں بھی تھی اور اس میں بھی ہے۔ یہ دوسرا اعلامیہ ستائیس اگست کا جاری کردہ ہے اور مدرسہ بورڈ کے موجودہ چیئر مین و انجمن ترقی اردو کی بہار شاخ کے سکریٹری عبدالقیوم انصاری کا کہنا ہے کہ یہ دوسرا نوٹیفکیشن انجمن ترقی اردو بہار کی کوششوں سے ہی جاری ہوا ہے،یہ بات انھوں نے جہان آباد میں ایک پریس کانفرنس کے دوران کہی ہے،ان کا ایک لمباسا بیان پچیس ستمبر کو بہار کے کئی اردو اخباروں میں شائع ہوا ہے۔اس سے قبل 11ستمبر کو انجمن ترقی اردو بہار کی جانب سے لگ بھگ آدھے پیج کا ایک اشتہار شائع کروایا گیا تھا،جس میں اردو اور اقلیتوں(مسلمانوں) کے حق میں نتیش حکومت کے فیصلوں،اقدامات اور منصوبوں کا گن گان کیا گیا تھا،اس کی ابتدائی سطروں میں مئی والے نو ٹیفکیشن اور اس کے بعد ستائیس اگست والے نوٹی فکیشن کا بھی ذکر تھا اور یہ لکھا گیا تھا کہ ’’انجمن ترقی اردو بہار کی کوششوں سے محکمۂ تعلیم نے 15-05-2020کو جاری کردہ اعلامیے میں ترمیم کرتے ہوئے 27-08-2020کو نیا اعلامیہ جاری کیا ہے،جس کے مطابق اگر سکینڈری و انٹر سطح کے اسکولوں میں اردو کا ایک طالب علم بھی ہوگا تو اس کے لیے استاذ کی تقرری کی جائے گی‘‘۔
ایک دلچسپ بات یہ ہے کہ انجمن ترقی اردو ہند کے صدر دفتر یعنی دہلی سے مختلف قسم کی آواز اٹھ رہی ہے اور اس کی بہار شاخ کا موقف کچھ اور ہے۔ چوبیس ستمبر کو اردو کے اخبارات میں انجمن ترقی اردو ہند کے ذریعے وزیر اعلی بہار کو انجمن کے قومی صدر پروفیسر صدیق الرحمن قدوائی،رکن مجلس عاملہ پروفیسر اختر الواسع اور سکریٹری اطہر فاروقی کے ذریعے روانہ کردہ ایک خط کے حوالے سے خبر شائع ہوئی ہے،جس میں انھوں نے بہار حکومت کے فیصلے کو غیر آئینی قرار دیتے ہوئے اس کی سابقہ حیثیت کو بحال کرنے کا مطالبہ کیا ہے۔ دوسرے نوٹیفکیشن کے حوالے سے آج روزنامہ قومی تنظیم و دیگر اردو اخبارات میں ایک خبر شائع ہوئی ہے،جس کا عنوان ہے’’محکمۂ تعلیم کی وضاحت،اردو کی لازمیت بر قرار‘‘،مگر خبر جے ڈی یو کے نو منتخب رکن قانون ساز کونسل پروفیسر غلام غوث اور اردو کونسل کے ناظم اعلیٰ ڈاکٹر اسلم جاوداں کی وزیر اعلیٰ بہار کے پرنسپل سکریٹری، محکمۂ تعلیم کے پرنسپل سکریٹری اور بہار ایگزامنیشن بورڈ کے چیئر مین کے ساتھ ہونے والی میٹنگ کے تعلق سے ہے، اس میں جو تفصیلات درج ہیں،ان سے معلوم ہوتا ہے کہ ان افسران نے بس زبانی یقین دہانی کی کوشش کی ہے۔غلام غوث صاحب کا کہنا ہے کہ’’ اردو والوں کے مطالبات کی تکمیل کی مہم جاری رکھیں گے‘‘،انھوں نے امید ظاہر کی ہے کہ ہمیشہ کی طرح محبانِ اردو کا تعاون انھیں حاصل رہے گا۔
بہار اسٹیٹ اردو ٹیچرس ایسوسی ایشن کے چند عہدے داروں نے مل کر24ستمبر کو حزبِ اختلاف کے لیڈر تیجسوی یادو کومیمورنڈم دیا ہے،تیجسوی نے رسمی طورپر یقین دہانی کروائی ہے کہ ’’وہ اپنی سطح پر اس مسئلے کو بھر پور طریقے سے اٹھائیں گے اور حکومت سے مطالبہ کریں گے کہ اردو کے ساتھ نا انصافی بند کرے‘‘۔ یکم ستمبر کو آرجے ڈی لیڈر عبدالباری صدیقی کابیان بھی اس ضمن میں آچکا ہے، انھوں نے کہا تھا کہ ’’اردو ٹیچر کی بحالی کے لیے چالیس طلبہ کی قید بہار سے اردو کو ختم کرنے کی سازش ہے ‘‘۔آرجے ڈی کے ممبر اسمبلی فیصل رحمن نے بھی 21ستمبر کو اس تعلق سے وزیر اعلیٰ کو خط لکھاہے۔ اس کے علاوہ جمعیت علما ے بہار اور امارت شرعیہ بھی اس تعلق سے بیان کی حد تک اپنی ذمے داری سے فارغ ہو چکی ہیں۔
الغرض ہائی اسکولوں کے نصاب میں لازمی طورپر اردو کی بقا کے سلسلے میں ایک طرف حکومت صفائیاں پیش کر رہی ہیں ،بہار ایگزامنیشن بورڈ کا پچیس ستمبر کو وضاحتی اشتہار بھی شائع ہوا ہے،دوسری طرف حکومتی موقف کے خلاف آوازیں بھی بہت زور وشور سے اٹھ رہی ہیں،مگر خاص بات یہ ہے کہ ان آوازوں میں کسی قسم کا اتحاد نہیں ہے،سب کی اپنی اپنی ڈفلی،اپنا اپنا ڈھول ہے۔گورنمنٹ کا نوٹیفکیشن جاری ہونے کے بعد کے دوڈھائی ماہ تک تو مکمل خاموشی رہی،گنے چنے دانشوران اور اہلِ قلم نے اس جانب توجہ دلائی ،تو بھی متعلقہ با اثر شخصیات یا ادارے سبک سری کا مظاہرہ کرتے رہے، مگر اب ایسا لگتا ہے کہ ہر کوئی الیکشن کے موسم کو غنیمت جانتے ہوئے ’’خادمِ اردو‘‘ اور’’قائدِ اردو‘‘ کا تمغہ اپنے نام کرنا چاہتاہے۔بہار میں اردو کے نام پر سیاست کی اپنی تاریخ ہے اور اسے اِس الیکشن میں بھی دہرانے کی کوششیں تیز ہو رہی ہیں۔اب تو ووٹنگ کی تاریخوں کےاعلان کے ساتھ انتخابی ضابطۂ اخلاق بھی نافذ ہوچکا ہے،تو شاید اس موضوع پر حکومت کی جانب سے کوئی نیا عملی اقدام یا وضاحت مشکل ہے ۔ سو دیکھنا یہ ہے کہ کیا حکومت اردو والوں مطمئن کر نے میں کامیاب ثابت ہوگی؟کیا اس نئے مسئلے کی وجہ سے جدیو اور این ڈی اے کے ووٹوں پر کچھ منفی یا مثبت اثر پڑے گا؟ اور کیا کسی دوسری پارٹی کو بھی اس کا فائدہ ہو سکتا ہے؟

معلوم نہیں مسلمانوں کے باشعور طبقہ کو بھی اس بات کا احساس ہے یانہیں کہ سرزمین ہندمیں ان کے خیموں کی طنابیں آہستہ آہستہ اکھڑتی جارہی ہیں۔مسلمانوںکا سب سے بڑا خیمہ جسے قلعہ کہنا چاہئے دینی مدارس تھے اب ان کے بند ہونے کی خبریں آرہی ہیں،یہ اسلامی قلعے آہستہ آہستہ زمیں بوس ہورہے ہیں ۔ مسلمانوں کا ایک بڑا خیمہ مسلم پرسنل لابورڈ تھا ،کئی سال سے نہ اس کا سالانہ جلسہ ہوا ہے نہ کوئی نیا انتخاب نہ اس کی کار گذاری نہ کوئی نقل وحرکت نہ کوئی بیان نہ کوئی اعلان، کچھ اپنی غلط اندیشی کچھ حکومت کی دشمنی کی وجہ سے چاروں خانے چت ۔حالات کا دباو اتنا سخت ہے کہ نہ کہیں فکر امروز ہے نہ اندیشہ فردا کا سراغ ہے ۔ تبلیغی جماعت مسلمانوں کی سب سے بڑی اصلاحی اور تربیتی جماعت تھی، اب نظام الدین میں اس کا دروازہ مقفل اورسارا کام معطل ہو چکا ہے، وہاں سے اب نہ کوئی جماعت جاتی ہے نہ وہاں آتی ہے ، جو جماعتیں آئی تھیں ان پر عدالتوں میں مقدمات درج ہیں،حکومت نے جو چارج شیٹ داخل کی ہے اورتبلیغی جماعت کے امیر مولانا سعد سے حکومت نے جو منقمانہ سوالات کئے ہیں ویسے سوالات آج تک کسی تنظیم سے نہیں کئے گئے ان سوالات کا جواب آسان نہیں یعنی اب برسوں تک جماعت کے ذمہ دار کو الجھا کر رکھنا ہے اور تبلیغی سرگرمیوں کولا محدود مدت تک بندر کھنا ہے، نظام الدین کی تبلیغی جماعت کی جو متوازی تبلیغی تنظیم ہے جسے شوری گروپ کہا جاتا ہے اس نے بھی خود کوحالات کی وجہ سے تقریبا لاک ڈاون کرلیا ہے ۔ دار المصنفین بہت اہم علمی اور تصنیفی ادارہ ہے اس کا سفینہ گرداب میں ہے ،ندوہ اور دیوبند کے بارے میں نہ جانے کب کیا خبر آجائے ،مسلمانوں کے سارے ادارے موت اور زیست کی کشمکش سے دوچار ہیں،خوف کا یہ عالم ہے کہ محض استمالت کے لئے اورمحض اظہار وفاداری کے لئے ایک شہر میں عیدین کے امام کے ایک مدرسہ میں مسٹر مودی کے خم ابرو کودیکھ کراور نگاہ خشمگیں سے ڈر کر اور خاطر داری اور خوشنودی کے لئے تھالیاں بجائی گئیں اور دیپک جلائے گئے اور حکومت کے ساتھ اظہار یک جہتی کرنے کے لئے جلسہ کا انعقاد ہوا ،اب امت کا سفینہ موج حوادث کی زد میں ہے ، خزاں نے مسلمانوںکے ایک ایک چمن پر چھاپہ مارا ہے، خوف ہے کہ مسلمانوں کی دینی تعلیمی ادارے یادگا رونق محفل بن کر رہ جائیں گے جن کاذکرآئندہ تاریخ کی کتابوں میں ہوگا اور مسلمانوں کی تہذیبی آثار کو دیکھ کر غم وحسرت کے ساتھ ،دیدہ گریاں کے سا تھ کوئی شخص اقبال کا یہ شعر پڑھے گا:
آگ بجھی ہوئی ادھر ٹوٹی ہوئی طناب ادھر
نہ جانے اس مقام سے گذرے ہیں کتنے کارواں
ایسا لگتا ہے مسلمانوں میں نہ کوئی مفکر ہے نہ دانشور، نہ کوئی منصوبہ سازقائد، نہ حالات کا تجزیہ نگار مبصر، اور نہ قرآن وحدیث اور تاریخ کی روشنی میں رہنمائی کرنے والا کوئی عالم دین ۔ البتہ اب بھی کچھ لوگ ہیں جو اپنی قامت کی درازی ثابت کرنے کے لئے اپنے نام کے ساتھ القاب کا طرہ پرپیچ وخم لگاتے ہیں ، صورت حال یہ ہے کہ دہلی میں سڑکوں کا نام تک بدلا جارہا ہے شہروں کے نام جن سے اسلامیت کی خو اور بو آتی تھی منسوخ کئے جارہے ہیں جامعہ ملیہ اسلامیہ اورمسلم یونیورسیٹی علی گڑھ کا تاریخی اور اسلامی کردار بھی اب اس دھوپ کی طرح ہے جو آفتاب کے ساتھ جاتی ہے ۔بابری مسجد جس پر اب دیدہ خونابہ بار کے آنسو کبھی نہیں رکیں گے تاریخ کے اوراق کے حوالہ ہے ، چار مینار کے شہر میں ایک مینار نما شخصیت ہے مگر وہ کب تک اور اس کی درازیاں کب تک ۔درسگاہ جہاد وشہادت کا ایک تناور درخت تھا جو آخری دم تک تیزوتند ہواوںکا مقابلہ کرتا رہا آخر کار وہ بھی پیوند زمیں ہوگیا،اس کا بیٹا ناصر بن نصیرصید زبوں ہے، اسیر زنداں ہے ، جو باپ کے جنازہ میں بھی شریک نہیں ہوسکا۔ عہد حاضر کے سب سے بڑے محدث بلکہ امیر المومنین فی الحدیث مولانا محمد یونس جونپوریؒ کہا کرتے تھے ’’ اس وقت ہندوستان میں مسلمان مکی دور سے زیادہ سخت حالات سے گذر رہے ہیں وہاں مکہ والوں کے پاس حکومت نہیں تھی فوج نہیں تھی ، بس قبائل تھے جواپنے بل بوتے پر مخالفت کرتے تھے ، یہاںپوری حکومت ہے فوج ہے ، سازشیں ہیں منصوبے ہیں ، اس لئے بہت احتیاط سے رہنے کی ضرورت ہے ‘‘۔( شیخ الحدیث مولانا محمد یونس جونپوری مرتبہ محمود حسن حسنی ندوی ص ۳۰۵) موجودہ ہندوستان کے بارے میں اقبال کا شعر صادق آتا ہے:
دیو استبداد ہے جمہوری قبا میں پایہ کوب
تو سمجھتا ہے یہ آزادی کی ہے نیلم پری
واقعہ ہے کہ یہاں گجرات اور دیگر فسادات میں مسلمانوں پر جو گذری وہ مکی زندگی کے مصائب سے زیادہ ہے ۔وہ ہندوستان جس کے چپہ چپہ پر مسلمانوں کی تہذیب وتمدن کی نشانیاں ہیں اس کو ہندو استھان بنا یا جارہا ہے۔ جب مسلمانوں کی عزت اور عظمت کی تمام نشانیاں اس ملک میں مٹادی جائیں گی اور صرف کھنڈرات باقی ر ہ جائیں گے اور اسپین کی تاریخ دہرائی جائے گی تومستقبل کے سیاحوں کے لئے جو گائیڈ ہوگا وہ تاریخ کا حوالہ دے کر کہے گا:
چمن میں تخت پر جس دم شہ گل کا تجمل تھا
ہزاروں بلبلیں تھیں باغ میں اک شور تھا غل تھا
کھلی جب آنکھ نرگس کی نہ تھا جز خار کچھ باقی
سناتا باغباں رورو یہاں غنچہ یہاں گل تھا
مستقبل کی منصوبہ بندی ضروری ہے لیکن اس سے پہلے ضروری ہے کہ ہم اپنی غلطیوں کو سمجھیں ، اگر ہم اپنی غلطیوںکونہیں جانیں گے توصحیح منصوبہ بندی نہیں کرسکیں گے۔ہمارے قائدین نے غلطی کو نہیںسمجھا۔ غلطی کو چند لفظوں میں بیان کریں تو ہم کہیں گے کہ اسلام جو ایک دعوتی مشن تھا اس کی گاڑی پٹری سے اترگئی ہے یہاں کوئی شخص پوچھ سکتا ہے گذشتہ صدیوں میں آخرجو اسلامی خدمات انجام دی گئیں وہ آخرکیا تھیں ،اان کا تعلق دعوتی مشن سے کیا نہیں تھا ۔ ذیل کی چند سطروںمیں علماء دین کی ان خدمات کا ذکر کیا جارہا ہے جو ہماری تاریخ کا جلی عنوان ہیں ۔
بلا شبہ ہندوستان مسلمانوں کی دعوتی تجدیدی اور اصلاحی کوششوں کا مرکز رہاہے ہندوستان کی اسلامی تایخ کے ابتدائی دور میں کاروان اہل دل نے اسلام کی اشاعت کا کام کیا اور ہزاروں اورلاکھوں لوگ دائرہ اسلام میں داخل ہوے مسلم سلاطین کی سرپرستی میں یہ ملک مسلمانوںکے لئے گلشن بے خار بن گیا ۔یہ داستان فصل گل راقم سطور نے اپنی کتاب ’’ دعوت اسلام، اقوام عالم اور برادران وطن کے درمیان ‘‘ میں بڑی خوش دلی اور فرحت وانبساط کے ساتھ بیان کی ہے ۔ہندوستان میں مشائخ روحانی اور علماء ربانی کے ذریعہ اور ان سے پہلے مسلمان تاجروں کے ذریعہ یہ کام انجام پایا۔ایک عرصہ کے بعد علماء دین نے محسوس کیا کہ ہندوستان کے قدیم مذاہب اور تہذیبوں کے خیالات وعادات بھی مسلمانوں پر اثر انداز ہور ہے ہیں اس لئے دعوتی اور تبلیغی کام کا رخ حفاظت دین اور تطہیر عقائد، رد بدعات واصلاح رسوم کی طرف مڑ گیا ۔یعنی اب دفاعی نوعیت کے کام کی طرف مسلمان علماء متوجہ ہوگئے ۔دعوتی کام یا اقدامی نوعیت کا کام پس پشت چلا گیا ۔اس وقت سے لے کر اب تک بحیثت مجموعی مسلم علماء اور قائدین کے کام کا رخ یہی رہا ہے ،بعد میں سیاسی تحریکیں بھی مسلمانوں میں اٹھیں لیکن برادران وطن کے درمیان دعوتی فکر کا زمانہ واپس ہی نہیں آیا ۔ صورت بایں جا رسید کہ دیوی دیوتاوں کی کثرت اور ان کی عبادت اور شرک کے طوفان کو دیکھ کر بھی اہل دین میں وہ بے چینی پیدا نہیں ہوئی جو ہونی چا ہئے اور جو پیغمبروں کو ہوتی تھی اور جس کا ذکر بار بارقرآن میں آیا ہے کہ کیا آپ ان ( مشرکوں )کے ایمان نہ لانے سے خود کو ہلاک کرڈالیں گے۔ انسان فورا عملی اقدام نہ کرسکے یہ بات قابل معافی ہے لیکن شرک کی گرم بازاری کو دیکھ کر دل کی بیچینی کا نہ ہونااور صرف مسلمانوں کے درمیان اصلاحی کام پر مطمئن ہوجانا ایمان کے کمزورہو جانے کی علامت ہے ،دل کی بیچینی اگر ہوگی تو انسان سوچے گا اور کام کا منصوبہ بنائے گا لیکن شرک کے طوفان اور کفر کے سیلاب کو دیکھ کوئی پریشانی دل کونہ ہو یہ ایمان کی صحت مندی کی علامت نہیں ۔
ہندوستان میں مسلمانوں کا ابتدائی دور دعوت وتبلیغ کا دور رہا ہے اس کے بعد مسلمانوں کی تاریخ کے سارے ابواب یا تو سیاست وحکومت کے ابواب ہیں یا علماء کی جانب سے حفاظت دین کے ابواب ہیں، حفاظت دین کے ا بواب میں علم حدیث کی ترویج واشاعت اور ان کی تدریس کا کام بھی ہے اور طریقت کو شریعت پر ترجیح دینے کے فلسفہ اور وحدۃ الوجوداور وصول الی اللہ کے غیر اسلامی طریقوں کے خلاف جہاد بھی ہے جس کی نمائندگی امام ربانی اور مجدد الف ثانی کرتے ہیں حفاظت دین کے ابواب میں قرآن وحدیث کی تعلیمات کی اشاعت اور قرآن وسنت سے براہ راست واقفیت کی تحریک بھی ہے اوراس باب کا معروف نام اور جلی عنوان حضرت شاہ ولی اللہ دہلوی اور ان کا خانوادہ ہے جنہوں نے قرآن مجید کے ترجمے کئے ،صحاح ستہ کے درس کو رواج دیا ۔حفاظت دین کے ابواب میں مشرکانہ عقائد وتہذیب اور بدعات ورسوم کے مقابلہ کی تحریک بھی ہے جس کی نمائندگی سید احمد شہید اور حضرت اسماعیل شہید کرتے ہیں ۔ حفاظت دین کے ابواب میں مدارس دینیۃ کا قیام اور علوم دینیہ کی اشاعت کا کام بھی ہے جس کا دور دار االعلوم دیوبند سے شروع ہوتا ہے جس کے بانی مولانا قاسم نانوتوی تھے۔ حفاظت دین کے ابواب میں مسلمان عوام وخواص تک اور شہر ودیہات تک دین کی بنیادی باتیںپہونچانے کی تحریک بھی ہے جس کے قائد مولانا الیاس کا ندھلوی تھے ،حفاظت دین کے ابواب میں مسلمانوں میں روحانیت پیدا کرنے اور عشق الہی کی چنگاری کو شعلہ بنا دینے کا کام بھی ہے جو خانقاہوں نے انجام دیا آخر زمانہ میں یہ کام سید الطائفہ حاجی امداد اللہ مہاجر مکی مولانا رشید احمد گنگوہی اور مولانا اشرف علی تھانوی کے ذریعہ انجام پایا ء حفاظت دین کے ابواب میں مغربی تہذیب ، کمیونزم اور الحاد کے مقابلہ اور مسلمانوں کو احساس کمتری سے بچانے کی تحریک بھی ہے جس کی قیادت علامہ اقبال اور مولانا ابو الاعلی مودودی نے کی ۔ حفاظت دین کے ابواب میں اردوزبان میں اعلی درجہ کے اسلامی لٹریچر کی اشاعت کا کام بھی ہے جس کی سربراہی علامہ شبلی اور ان کے شاگردوں نے کی ہے حفاظت دین کے ابواب میں سائنس اور مذہب کی کشمکش میں مذہب کی طاقتور حمایت کا کام بھی ہے یہ کام ڈاکٹر رفیع الدین ، مولانا عبد الباری ندوی اور وحید الدین خان نے بہتر طور پر انجام دیا مسلمانوں کی حفاظت کے ابواب میں مسلمانوںکو عصری تعلیم سے آراستہ کرنے کا کام بھی ہے جسے سرسید احمد خاں اور ان کے رفقاء نے انجام دیا ۔ یہ سب ہندوستان کی تاریخ میں ہمارے کاموں کا مختصرطائرانہ منظرنامہ ہے۔ یہ سارے کام مسلمانوں میں دین کی اشاعت کے کام بھی تھے اور دفاعی نوعیت کے کام بھی انہیں کہا جاسکتا ہے۔ لیکن اس پوری تاریخ میں برادران وطن تک دین توحیدکی اشاعت کے کام کا خلا ہے بہت مختصر طور بات کہی جائے تو اس طرح کہی جاسکتی ہے کہ ہندوستان میں مسلمانوں کی تاریخ بحیثیت مجموعی مشرکین کو دعوت الی اللہ دینے کے بجائے پشتینی مسلمانوںکو رجوع الی اللہ کی دعوت دینے کی تاریخ ہے یا مسلمانوںکو فکری اورنظریاتی حملوں سے بچانے کی تاریخ ہے۔ ابتداء میں مسلمان تاجروں خاص طور پر چشتی سلسلہ کے بزرگان دین نے دعوت دین کا جو شاداب درخت لگایا تھا جو برگ وبار لایا تھا وہ بعد میں خزاں رسیدہ بن گیا اور مسلمانوں کو آج جن حالات سے سابقہ پڑ رہا ہے وہ دعوت کے اسی بنیادی کام کے چھوٹ جانے کی وجہ سے پید ہوے ہیں دعوت کے بنیادی کام سے مراد وہ کام ہے جو پیغمبروں کی کوششوں کا محور رہا ہے ۔ یہ کام بے توجہی کا شکار کیوں ہوا اس کی وجہ یہ تھی کہ مسلمان علماء کے سامنے نمونہ حجاز کی سرزمین تھی اور خلافت کی مرکزی حکومت تھی وہاں دعوت کا یہ کام نہیں ہوتا تھا وہاں یہ کام اس لئے نہیں ہوتا تھا کہ وہاں غیر مسلم تھے ہی نہیں جو غیر مسلم چھوٹی سی اقلیت میں تھے وہ ذمی کی حیثیت سے رہتے تھے لیکن جہاں مسلمان ایسی سرزمین میں رہتے ہوں جہاں غالب اکثریت غیر مسلموں کی ہو وہاں نمونہ قرن اول کی مکی زندگی ہے اس زندگی کو مسلمانوں نے نمونہ اسپین سسلی ہندوستان کہیں نہیں بنایا اور کہیں دعوت کا کام نہیں کیا ۔ حالات کے رخ کو اگر اپنے فائدہ اور غلبہ کی طرف موڑنا ہے اور پیغمبروں کے اسوہ پر عمل کرنا ہے اور آخری پیغمبر ﷺ کی زندگی کو نمونہ بنانا ہے توہمیں دعوت کا نیامحاذ اس ملک میں قائم کرنا ہوگا۔کہ یہی انبیاء کا اصل محاذ ہے ، اس ضروری اور بنیادی کام کی طرف جو تمام انبیاء کرام کا اور پیغمبر آخر الزمان ﷺکا اصل کام رہاہے سب سے زیادہ توجہ اس دور میں( لٹریچر کی اشاعت کی حد تک) جماعت اسلامی نے کی ہے کہ اس نے ہندوستان کی تمام زبانوں میں قرآن کے ترجمے شائع کئے اور اسلامی لٹریچر تیار کیا۔غیر مسلموں میں کام کے اس خلا کی طرف علماء کو متوجہ کرنا مشکل اس لئے ہے کہ علماء حقیقت پسندی سے زیادہ عقیدت مندی کا مزاج رکھتے ہیں ہر مسئلہ میں وہ اس طرح سوچتے ہیں کہ واقعی یہ کام ضروری ہے تو ہمارے بزرگوں نے کیوں نہیں کیا ۔ ہندوستان کے علماء میں اس کام کی ضرورت کا سب سے زیادہ احساس مولانا ابو الحسن علی ندوی کو تھا کہ سیرت کا مطالعہ ان کی زندگی کا اورھنا بچھونا تھا انہیں برادران وطن کے درمیان کام کے خلا کاشدت کے ساتھ احساس تھا اور یہ احساس ہر اس شخص کو ہونا چاہئے جس نے انبیاء کرام کا اورسیرت نبوی کا گہرائی کے ساتھ مطالعہ کیا ہو، انبیاء اکرام پر ان کی کتاب النبوۃ والانبیاء فی ضوء القرآن ہے اورسیرت نبوی پر ان کی ایک نہیں متعدد کتابیں عربی اور اردو دونوں زبانوں میں ہیں، اللہ تعالی نے انہیں حکمت نبوی کا خوشہ چیں بھی بنایا تھا انہیں محسوس ہوا کہ قرن اول میں صحابہ کرام اور مشرکین مکہ کے درمیان روابط اور تعلقات موجو دتھے رشتہ داریاں بھی تھیں اور لسان قوم بھی ایک ہی تھی، سب ایک دوسرے کے شناسا تھے،اس لئے دعوت کی راہ میں کوئی رکاوٹ نہیں تھی لیکن ہندوستان میں تعلقات کا یہ سارا پلیٹ فارم جس پر دعوت کی بنیاد رکھنی تھی ٹوٹ پھوٹ کا شکار ہوچکا ہے اس لئے پہلے اہل وطن کو مانوس کرنے اور اسلام اور مسلمانوں سے ان کی اجنبیت دور کرنے کی ضرورت ہے اس لئے سوچ سمجھ کر انہوں نے پیام انسانیت کے نام سے تحریک شروع کی اور پورے ہندوستان میں شہر بشہر جلسے کئے اور برادران وطن کو خطاب کیا، مولانا عبد الکریم پاریکھ ان کے رفیق اور معاون خاص تھے ۔تصنیف وتالیف کے علاوہ دینی تحریکات کی رہنمائی مولانا کا میدان تھا،مولانا علی میاں کی سرگرمیاں عرب وعجم تک پھیلی ہوئی تھیں ، ان سب کے ساتھ ہندوستان برادران وطن سے مسلسل خطاب۔ اس قد وقامت کی کوئی شخصیت بر صغیر میں ماضی میں اور حال میں معاصرین میں اور متقدمین میں نہیں ملتی ہے ۔
ہجرت حبشہ کے زمانہ میں حضرت جعفر طیار نے نجاشی کے دربار میں دین اسلام کا جو تعارف کرایا تھا اسے غور پڑھئے انہوں نے کہا تھا:
’’اے بادشاہ ! ہم لوگ ایک جاہل قوم تھے بتوں کو پوجتے تھے مردا رکھاتے تھے بدکاریاں کرتے تھے ہمسایوں کو ستاتے تھے،بھائی بھائی پر ظلم کرتا تھا زبردست زیر دستوں کوکھا جاتے تھے اس اثناء میں ایک شخص ہم میں پیدا ہوا س نے ہم کو سکھایا کہ ہم پتھروں کو پوجنا چھوڑدیں سچ بولیں خونریزی سے باز آئیں یتیموں کا مال نہ کھائیں ہمسایوں کو آرام دیں ۰۰۰ ‘‘
یہ ہے دعوت اسلام کی تصویر اور مکی زندگی میں مسلمانوں کے کاموں کی جھلک ۔کوئی شخص انصاف سے بتائے کہ کیا ہماری تصویرہندوستان میں اس تصویر کے مطابق ہے یا ماضی میںاس کے مطابق رہی ہے اور اگر نہیں ہے تو ہم یہ حکم لگانے میں حق بجانب ہیں کہ اسلام کی گاڑی پٹری سے اتر گئی ہے اور صدیوں سے اتر گئی ہے ۔ آج بتوں کو پوجنے سے روکنا کتنا مشکل ہوگیا ہے اس لئے کہ جب روکنا اورلوگوں کو سمجھاناآسان تھااورہماری حکومت تھی اس وقت ہم نے یہ کام نہیں کیا۔
مسلمانوں کی اس ملک میں بہت سی تنظیمیں اور جماعتیں موجود ہیں بہت سے دار العلوم اور تعلیمی ادارے موجودہیں اگر ان کی تعداد کئی گنی ہوجائے اور ان کے کاموں کا دائرہ کئی گنا وسیع ہوجائے جب بھی صورت حال میں کوئی نمایاں تبدیلی واقع نہیں ہوگی جب تک کہ اس غلطی درست نہیں کیا جائے جو ہم کئی سو سال سے کرتے آرہے ہیں بحیثت ہم نے دفاعی نوعیت کے کام انجام دئے ہیں ہم نے مسلمانوں کی اصلاح کی تحریکیں اٹھائی ہیں ان کی افادیت اپنی جگہ پر  لیکن یہ وہ مکمل دعوتی کام نہیں ہے جو انبیاء نے انجام دیا ۔برادران وطن کو اسلام اور مسلمانوں سے مانوس کرنے کا کام اور غلط فہمیوں کو دور کرنے کا کام جو دعوت اسلام کا پہلا زینہ ہے فورا شروع کرنے کی ضرورت ہے یہ کام صرف کسی ایک ادارہ اور تنظیم کے کرنے کا نہیں ہے اورنہ اس کی کوئی ایک متعین شکل ہے اس کے بہت سے طریقے ہوسکتے ہیں ’’ہر گلے را رنگ وبوئے دیگرست‘‘جماعتوں اور تنظیموں کے قائدین سے استدعا ہے کہ وہ اپنے کو عقل کل سمجھنا چھوڑ دیں اور ان کے معتقدوں نے انہیں جس فلک چہارم کی زرکار کرسی پر جلوس افروز کردیا اس سے نیچے اتریں اور ہم جیسے فقیر راہ نشیں اور غم امروز و فردا سے رنجور وحزیں شخص کی بات بھی سن لیا کریں ۔ اس وقت برادران وطن کے سماج میں فجاسوا خلال الدیار کے انداز میں ہر دروازہ پر دستک دینے کی ضرورت ہے ہر شخص کو متوجہ کرنے کی ضرورت ہے اور ہر مسلم نظیم کو اس بات کو حرز جان بنانے کی ضرورت ہے کہ سب کے ساتھ الفت ومحبت سے پیش آنا بلا تفریق مذہب سب کے ساتھ انصاف کرنا اور مخلوق خدا کی نفع رسانی کے لئے سرگردان ہونا اس کی بڑی فضیلت ہے اور اللہ کے نزدیک یہ محبوب عمل ہے ۔ مولانا علی میاں نے اگرپیام انسانیت کے نام سے تحریک شروع کی تھی تو خدمت خلق کے عنوان سے دوسری جگہ دوسری تحریک شروع ہوسکتی ہے ۔ مقصد ایک ہے برادران وطن کے دلوںکو جیتنا اور ان کو اسلام اور مسلمانوں سے مانوس کرنا اور روابط کے استحکام کے بعد دین توحید کوان کے دلوں تک پہونچانا ۔ یہ کام مسلم دور حکومت میں آسان تھا اور اب ہندو احیائی تحریکوں کے عروج کے زمانہ میں مشکل ہوگیا ہے ظاہر ہے اس کام کا اجر بھی اب زیادہ ہوگیا ہے لیکن اب بھی تعلقات اور مراسم استوار کئے بغیر یہ کام نہیں انجام پاسکتا ہے، کوششوںکا اتنا فائدہ تو ضرور حاصل ہوگا کہ نفرتیںکم ہوں گی اور اگر روابط مضبوط ہوجائیں گے تو جانے کتنے کیمیاگرداعی ہوںگے جن کی کوششیں رنگ لائیں گی اور جو کسی یار مہرباں کے بارے میں کہیں گے:
لائے اس بت کو التجا کر کے
کفر ٹوٹا خدا خدا کر کے
ضروری ہے کہ یہ دعوتی شعور عام ہو اور مسلمانوں کا ہر مدرسہ چھوٹا ہو یا بڑا’’ لسا ن قوم‘‘ میں مہارت والے علماء تیار کرنے کی کوشش کرے اور غیر مسلموں سے مکالمہ کی اور ان کے درمیان لسان قوم میں تقریروں کی مشق طلبہ کو کرائے۔ برادران وطن کی تہذیب اور ر مذہب کے مطالعہ کو کورس میں داخل کرے ۔اور صرف ایسے ہی مدارس کو اہل شعور کا اور بالغ نظر علماء کا مدرسہ سمجھا جائے ۔صحاح ستہ پڑھانے والے علماء اور شیوخ الحدیث کو بھی یہ بتانے اور سمجھانے کی ضرورت ہے کہ اصل حدیثی خصوصیت جو امت کو ملنی چاہئے وہ پیغمبرانہ دعوتی کردار ہے جو آنحضرت ﷺ کی مکی اور مدنی زندگی میںنظر آتا ہے ۔لقد کان لکم فی رسول اللہ اسوۃ حسنۃ ۔ جماعت تبلیغ کے بزرگوںکویہ بات دین اسلام کی روشنی میں کہنے کی تھی کہ تبلیغ کے چھ اصول اگرچہ کہ صحیح ہیں لیکن منزل من اللہ نہیں ہیں کہ ان میں معمولی تبدیلی بھی نہ ہوسکے ۔ غیر مسلموں کوبراہ راست دعوت نہ سہی اگر اکرام مسلم کے اصول کے ساتھ برادران وطن کے ساتھ خدمت خلق اور خدمت انسانیت کی ایک شق کا کا اضافہ کرلیا جاتا تو آج تبلیغی جماعت کی بدولت لاکھوں غیر مسلم مسلمانوں کے قدراں ہوچکے ہوتے اورآج جو افسوسناک معاملہ تبلیغی جماعت کے ساتھ پیش آیاوہ پیش نہ آتا۔ لیکن ہندوستان کے مسلم قائدین نے گویا طے کر رکھا ہے کہ اپنی کسی غلطی کوتسلیم نہیں کریں گے۔اور غلطی پر غلطی کرتے چلے جائیں گے ۔

استاذ و مفتی دارالعلوم وقف دیوبند

ملک کا موجودہ منظر نامہ کسی باشعور شہر ی سے مخفی نہیں ہے ،چند دنوں قبل نئی تعلیمی پالیسی کا خاکہ منظر عام پر آچکا ہے،اس کے اثرات کیا ہوں گے او رمسلم بچوں کے عقیدہ و ایمان کے ساتھ ان کے مستقبل کو کیا خطرات لاحق ہوسکتے ہیں اس پر گفتگو ہورہی ہے ۔تعلیم ایک ایسا راستہ اور طریقہ ہے جس کے ذریعہ قوموں کے افکار و نظریات کو تبدیل کیا جاسکتا ہے ، ماضی میں بھی انگریزوں نے اپنے مقاصد کے حصول کے لیے اسی تعلیمی ہتھیار کا استعمال کیا تھا ۔
نئی تعلیمی پالیسی میں ویدانتا کے جن اصولوں کو نافذ کرنے کی بات کہی گئی ہے اس سے صاف ظاہر ہوتا ہے کہ حکومت بلا کسی قانون کے ہی یکساں سول کوڈ کے منصوبے کی تکمیل کرلے گی اور یکساں سول کوڈ صرف ایک سیاسی پینترہ رہ جائے گا ۔اس لیے کہ اس میں زبان ، تہذیب اور لباس ہر طرح کی یکسانیت کی بات کہی گئی ہے ،اور ہر بچے کو لازمی اسکولی تعلیم کے ذریعہ اس کے فکر و تہذیب اور عقیدہ و عمل پر شب خون مارنے کی کوشش کی گئی ہے ۔ ان حالات میں مسلم بچوں کا مستقبل یقینا خطرات کی زد میں ہے اور یہ ایک طویل منصوبہ ہے جسے رو بعمل لانے کی پوری کوشش ہورہی ہے ۔عصری تعلیمی نظام کس حد تک مہلک ہے اور ایمان و عقائد کو کس حد تک متأثر کرتے ہیں اس سلسلے میں مولانا گیلانی ؒکا ایک اقتباس ملاحظہ فرمائیں ۔مولانا گیلانیؒ ایک طویل تعلیمی تجربہ رکھتے تھے ، عصری اور دینی دونوں اداروں سے و ابستہ تھے،اور علم و ادب کے میدان میں بلند پایہ ہونے کے ساتھ قوت استدلال اور نتیجہ اخذ کرنے کے سلسلے میں ان کوکمال حاصل تھا، ہندوستان کے نظام تعلیم و تربیت پر ان کی دو جلدوں میں ضخیم کتاب ہے۔ مولاناگیلانیؒ عصر ی تعلیمی اداروں کے نقصانات کا تذکرہ کرتے ہوئے فرماتے ہیں :
(۱) ہندوستان میں مسلمانوں کی حکومت کے برخاست ہوجانے کے بعد حکومت مسلطہ نے تعلیم کا جو نظام ملک میں (اسکولوں اور کالجوں غیرہ کے نام سے قائم کیا مشاہدہ بتارہا ہے کہ اس نظام کی تعلیم سے استفادہ کرنے والے مسلمانوں میں بتدریج اسلامی زندگی سے بُعد پیدا ہوتا چلا جارہا ہے ، یہ واقعہ ہے کہ جن خاندانوں میں جدید تعلیم تیسری اور چوتھی پشت میں اس وقت تک پہنچ چکی ہے ان میں اسلام کا صرف نام رہ گیا ہے ، عام ا بتدائی باتیں بھی ان لوگوں کو اسلام کی معلوم نہیں ، یہ سنی ہوئی نہیں دیکھی ہوئی بات ہے کہ اچھے لکھے پڑھے لوگ جن کانام بھی مسلمان کا ساتھا لیکن وہ اپنے پیغمبر ﷺ کی شخصیت تک سے ناواقف نظر آئے ظاہر ہے کہ اپنے دین سے جواس حد تک دور ہوچکا ہو وہ دین کی دوسری باتوں سے کس حد تک واقف رہ سکتا ہے، یہ واقعہ ہے کہ جیسے جیسے دن گزرتے جاتے ہیں اس قوم کے نام نہاد مسلمانوں کی تعداد بھی بڑھتی چلی جارہی ہے او رحالات میں کوئی تغیر اگر خدا نخواستہ واقع نہ ہو تو یوں ہی یہ تعداد اور بڑھتی چلی جائے گی ۔
(۲) حکومت کا میلان عموما تعلیم کے لزوم کی طرف بڑھتا چلاجارہا ہے ا س وقت تک تو تعلیم کے دائرے کو وسیع ہی کرنے پر حکومت قناعت کررہی ہے لیکن وہ دن دور نہیں ہے کہ ملک کے ہر باشندے کو مجبور کیا جائے گا کہ حکومت کے منظورہ نصاب کی تعلیم لزوما اپنے بچے اور بچیوں کو دلائے جس کے معنی یہی ہوسکتے ہیں کہ عام مسلمانوں کو تھوڑا سا تعلق اسلام سے ابھی جو باقی ہے ، تعلیم کی و سعت اور اس کا لزوم اس تعلق کو بھی کمزور کرتا چلا جائے گا ، تعلیم یافتہ طبقہ سے مایوس ہو کر علماء اسلام جن عام مسلمانوں کی دینی عقیدت پر بھروسہ کئے ہوئے ہیں اس عقیدت کی عمر بھی زیادہ دراز نظرنہیں آتی ۔
(۳) مذہب کے خلاف ہر زمانہ میں مختلف تحریکیں مختلف بھیسوں میں رونما ہوتی رہی ہیں ان تحریکوں کا مقابلہ ہر زمانہ کے علماء نے ان تحریکوں کی گہرائیوں تک خود پہونچنے کے بعد کیا ہے اور ہے بھی یہی بات کہ مرض کا علاج مرض کے صحیح واقفیت کے بعد ہی ممکن ہے ؛لیکن مرض کو مرض جیسی ناپاک چیز قرار دے کر اگر طبیب اس کے جاننے سے گریز کرلے گا تو مریضوں کا علاج ہوچکا ۔(ہندوستان میں مسلمانوں کا نظام تعلیم و تربیت ۲/۴۰۱)
مولانا گیلانی کی باتوں کو بار بار غور سے پڑھیے، آج سے قریب ستر سال پہلے آزاد ہندوستا ن کے نظام تعلیم کے ابتدائی ڈھانچے سے ہی انہوں نے ان خطرات کا ادارک کرلیا تھا ، کہ ہر شخص اور ہر شہر ی کے لیے سرکاری تعلیم کولازمی قرار دیا جائے گااور بالآخر ۲۰۰۹ء میں یہ قانون بن ہی گیا کہ ہر بچے کو سرکاری تعلیم حاصل کرنا ضروری ہوگا، اس سے آپ اندازہ لگاسکتے ہیں کہ کس طرح مسلم بچوں کا ایمان اور اس کا مستقل خطرات کی زد میں ہے ۔
ایسے حالات میں کس طرح کے منصوبے کو عملی جامہ پہنایا جائے کہ مسلم بچوں کا مستقبل تابناک ہو ،عصری تعلیمی تقاضوں کو پورا کرتے ہوئے ان کے ایمان و عقیدہ کی حفاظت کی جاسکے ، تعلیم کے نام پر بھگوا کرن کرنے اور ہر ہندوستانی کو ایک رنگ میں رنگ کر مسلمانوں کو اسلامی تہذیب و ثقافت سے دور کرنے کی جو کوشش کی جارہی ہے اس کا مقابلہ کس طرح کیا جائے اور کس طرح اسلامی ثقافت کا فروغ اور تحفظ کیا جاسکے؟ اس سلسلے میں چند با تیں قابل توجہ ہیں ان پر عمل کرکے ممکن ہے کہ کسی حد تک نئی نسل کے تابناک مستقبل کا خواب تعمیر کیا جاسکے ۔
(۱) اسکول میں تعلیم پانے والے ہر بچے کے لیے دینیات کے نظام کو یقینی بنایاجائے ، اور کوشش کی جائے کہ اسکول میں تعلیم حاصل کرنے والا خاص کر انگلش میڈیم اسکول میں تعلیم پانے والا ہر بچہ مکتب کے نظام سے جڑے اور تین چار سال صرف ایک گھنٹے کے ذریعہ ان بچوں کو اسلام کے لازمی عقائد کی تعلیم دے دی جائے ، عبادات کی اہمیت ، ایمان کی عظمت ، کفر و شرک کی قباحت اور اس سے نفرت ان کے دلوں میں جاگزیں کردیا جائے ، اسلامی تاریخ کے روشن عنوانات سے ان کو واقف کرایا جائے ،حضرات انبیاء کرام علیہم السلام کی زندگی کے مختصر حالات ، آ پ ﷺ کی زندگی کے اہم پہلو ، سلاطین ہند کے مختصر واقعات اور اسلامی تہذیب کی ضرورت و اہمیت جیسے عنوانات سے متعارف کراکر ان کے دل کی سادہ تختی کو ان چیزوں سے اس طرح پُر کردیا جائے کہ دنیا کی کسی غلیظ اور مکروہ تربیت کے لیے ان بچوں کے لوح دل پر کوئی جگہ باقی نہ رہے۔
(۲)اسکول میں تعلیم پانے والے بڑے بچے، اسی طرح کالج میں تعلیم حاصل کرنے والے لڑکے اور لڑکیوں کے لیے مختصر اسلامیات کا کورس مرتب کیا جائے اور یہ بچے جہاں ٹیوشن پڑھتے ہیں وہیں پر یاکہیں اور مناسب جگہ حاصل کرکے اتوار کو ایک کلاس اسلامیات کی کرائی جائے جن میں اسلام کی اہم تعلیمات اسلام کے بنیادی عقائد،، نماز ،روزہ ، زکوۃ اور حج کے جملہ مسائل ،اسی طرح نکاح و طلاق ،وقف ،معلاملات ، اخلاقیات ، میراث وغیرہ مسائل کی اجمالی اور ضروری تعلیم دی جائے۔ایک سال پر یہ کورس محیط ہو جس میں سبق کی طرح بچوں کو پڑھایا جائے جلسے کی طرح بیانات نہ کرائے جائیں ،اور سال میں اس کا ایک امتحان لے کر مختصر اسلامیات کورس کا ان کو سرٹیفکٹ دیا جائے اس سے مسلم بچوں میں اسلام کے ضروری تعلیمات سے واقفیت ہوگی ، اور اسلام کے تئیں ان میں بیداری پیداہوگی ۔دیکھنے میں آتا ہے کہ مدارس کے فضلاء طلاق کے باب میں غلطی نہیں کرتے ہیں لیکن اسکول و کالج کے تعلیم یافتہ حضرات طلاق کے نظام سے ناواقف ہونے کی وجہ سے عموما غلطی کرتے ہیں ۔
(۳) جہاں پر مسلمان معاشی اعتبار سے مستحکم ہیں وہاں پر پوری کوشش ہونی چاہیے کہ سرکار کی ہدایات پر عمل کرتے ہوئے اگلش میڈیم اسکول قائم کئے جائیں او رشہر میں موجود معیاری ا دارے سے زیادہ بہتر معیاری اسکول قائم کیا جائے تاکہ ہمارے اسکول، ماڈل اسکول بن سکیں ۔ اس کے ذریعہ ہم اپنی نسل کے ذہنوں کوبدلنے والے منصوبوں کے خلاف آسانی سے کام کرسکتے ہیں،اپنی تہذیب و ثقافت کا تحفظ کرسکتے ہیں اور بچوں کے دل و دماغ کومغربی افکار کی یلغار سے بچا سکتے ہیںآزادی کے نام پر اباحیت کے جس دلدل میں دھکیلنے کی سازش کی جارہی ہے اس کے ذریعہ ہم اس کا تدارک کرسکتے ہیں ۔ اسی ضمن میں یہ بھی ضروری ہے کہ لڑکیوں کی تعلیم پر خاص توجہ دی جائے، اس لیے کہ منصوبہ بند طریقہ پر بچیوں کو ان کے ایمان سے بے دخل کرنے کی کوششیں ہورہی ہیں ، کوشش کی جائے کہ لڑکیوں کے لیے مسلم ادارے ترجیحی طورپر قائم کئے جائیں اور جہاں ایساممکن نہیں ہے وہاں بچیوں کے والدین کو بیدار ہو کر اپنے بچیوں کی نگرانی کا فریضہ انجام دینا چاہیے ۔
(۴) چار ستمبر کو مولانا امین عثمانیؒ کی ایک آن لائن تعزیتی نششت میں شریک ہوا تھا ، مولانا کی زندگی پر بہت سے حضرات اہل علم نے روشنی ڈالی ان کی خوبیوں میں ایک اہم خوبی کا تذکرہ مختلف حضرات نے کیا کہ مولانا امین عثمانی نئی نسل کی تربیت کا کام کیا کرتے تھے، مولانا امین عثمانی چوں کہ مولانا قاضی مجاہدالاسلام ؒ کے تربیت یافتہ تھے ، اور مولانا مجاہد الاسلام قاسمی ؒ کی خاص بات یہ تھی کہ وہ رجال ساز اور افراد ساز تھے، افراد سازی پر ان کی خاص توجہ تھی ، میں یہ سمجھتا ہوں کہ اس اس میدان میں کمی آگئی ہے ، تعلیم کے زمانے میں اساتذہ بچوں کی تربیت کرتے ہیں اور اسی تربیت کا نتیجہ ہوتا ہے کہ ہمارے فضلاء زندگی کے ہر میدان میں سرگرم عمل نظر آتے ہیں اور مادیت کے اس طوفانی اور سیلابی دور میں بھی فضلاء مدارس صلے اور انعام سے بے پرواہ اور معاشی زندگی سے بے نیاز رہ کر دین کی خدمات میں مصرف رہتے ہیں لیکن ایام تعلیم کے بعد جب ہمارے فضلاء کسی میدان میں کام پر لگ جاتے ہیں تو اس زمانے میں بھی ان کی تربیت کی ضرورت ہوتی ہے یہ ز مانہ ان کے شعورو ادارک اور احساس و ذمہ داری کا زمانہ ہوتا ہے، اس زمانہ میں تربیت اور افراد سازی سے پتھر کو پارس اور سیپ کو موتی بنایا جاسکتا ہے ، اوپر جن حضرات کا تذکرہ کیا گیا ہے یہ وہ لوگ تھے جو فضلاء مدارس کو ان کی صلاحیت کے لحاظ سے کام پر لگایا کرتے تھے ، ان کی تربیت اور حوصلہ افزائی کیاکرتے تھے ، اگر کسی قسم کی مدد کی ضرورت ہو تو معاشی یا علمی طرح سے مدد کیا کرتے تھے میں یہ سمجھتا ہوں اس میدان میں وسیع پیمانہ پر کام کرنے کی ضرورت ہے تاکہ قوم کو ان کی ضرورت کے مطابق کام کے افراد مہیا کرائے جاسکیں ۔اس سلسلے میں بڑے تعلیمی اداروں کو بھی توجہ دینے کی ضرورت ہے ہمارے جو فضلاء میدان عمل میں مصروف ہیں ان کے احوال کا جائزہ لیا جائے ان کی حوصلہ افزائی کی جائے اوران کو کام کے مناسب مواقع مہیا کئے جائیں اس وقت جس رفتار کے ساتھ ہمارے مدارس سے افراد فارغ ہورہے ہیں ان کو اس تناسب سے کام کی جگہیں نہیں مل رہی ہیں جس کی وجہ سے بہت سے ہمارے قیمتی جوہر ضائع ہوجاتے ہیں جب کہ یہ وہ افراد ہیں جن پر قوم کے ہزاروں روپیے اور بڑے اساتذہ کی دور رس تربیت کا حصہ لگا تھا دس یا بارہ سال ہم نے ان پر محنت کی تھی ان کا ضائع ہو جانا میں سمجھتا ہوں اپنی محنت کا ضائع ہونا ہے ان پرنظر نہ رکھنا اپنے ہی کام سے صرف نظر کرنا ہے۔ فکر کے نہا ں خانے میں یہ باتیں گردش کررہی تھیں اسے صفحات پر منتقل کرکے آپ کے سامنے پیش کیا ہے اس امید کے ساتھ اگر ان پر توجہ دی گئی تو وہ دن دور نہیں کہ نئی نسل کا مستقبل تابناک ہوگا۔

ابو معاویہ محمد معین الدین ندوی قاسمی

استاذ:جامعہ نعمانیہ، ویکوٹہ، آندھرا پردیش

نیک صالح اولاد اللہ تعالی کی طرف سے ایک نعمت ہے، رحمت وبرکت ہے، والدین کے لئے حصول جنت کا ذریعہ ہے۔سیدنا حضرت ابراہیم علیہ السلام نیک وصالح اولاد کی دعا مانگی تھی:رب هب لى من الصالحين، فبشرناه بغلام حليم۔ میرے پروردگار! مجھے ایک ایسا بیٹا دیدے جو نیک لوگوں میں سے ہو، چنانچہ ہم نے انہیں ایک بردبار لڑکے کی خوشخبری دی۔ معلوم ہوا کہ نیک صالح اولاد کے حصول کی دعا کرنا سنت انبیا ہے۔

اولاد میں بھی بیٹی بیش بہا عطیہ خدا وندی ہے، ارشاد باری تعالیٰ ہے:يهب لمن يشاء اناثاويهب لمن يشاء الذكور ۔وہ جس کو چاہتا ہے، لڑکیاں دیتا ہے، اور جس کو چاہتا ہے لڑکے دیتا ہے۔

بعض مفسرین نے آیت کے ذیل میں لکھا ہے کہ بچوں پر بچیوں کا مقدم کرنا اس بات کی دلیل ہے کہ بچیوں کی قدر ومنزلت زیادہ ہے، اسی طرح اسی آیت کے اشارے سے حضرت واثلہ بن اسقع رضی اللہ عنہ نے فرمایا کہ جس عورت کے بطن سے پہلے لڑکی پیدا ہو وہ مبارک ہوتی ہے۔ (معارف القرآن)

ہر مسلمان اپنی اولاد کی ولادت پر خوش ہوتا ہے، لیکن لڑکوں کے مقابلے میں لڑکیوں کی پیدائش پر زیادہ خوش ہونا چاہیے، احادیث مبارکہ میں بچیوں کی پرورش، دیکھ ریکھ کے بارے میں بڑے فضائل وارد ہوئے ہیں، ترمذی شریف کی روایت ہے:

عن انس بن مالك قال: قال رسول الله صلى الله عليه وسلم: من عال جاريتين دخلت أنا وهو الجنة كهاتين وأشار بأصبعيه۔ (سنن الترمذي:1913)

حضرت انس بن مالک رضی اللہ عنہ روایت کرتے ہیں کہ رسول اللہ ﷺ نے فرمایا جس نے دو لڑکیوں کی پرورش کی میں اور وہ دونوں جنت میں اس طرح داخل ہوں گے (یہ فرماتے ہوئے آپ ﷺ نے اپنی دونوں انگلیوں یعنی انگشت شہادت اور اس سے متصل انگلی کو ملا کر اشارہ فرمایا)

اسی طرح سنن ابن ماجہ کی روایت ہے:عن ابن عباس قال:قال رسول الله صلى الله عليه وسلم:ما من رجل تدرك له ابنتان فيحسن إليهما، ماصحبتاه أو صحبهما إلاأدخلتاه الجنة۔ (سنن ابن ماجة:3670)

حضرت عبداللہ بن عباس رضی اللہ عنہما روایت کرتے ہیں کہ رسول اللہﷺ نے فرمایا:جس شخص کے پاس دو لڑکیاں ہوں اور وہ ان کے ساتھ اچھا برتاؤ کرے جب تک کہ وہ دونوں اس کے ساتھ رہیں، یا وہ ان دونوں کے ساتھ رہے تو وہ دونوں لڑکیاں اسے جنت میں پہنچائیں گی۔

اتنی بڑی خوشخبری لڑکوں کے لئے نہیں بلکہ صرف لڑکیوں کی عمدہ تعلیم وتربیت کے لئے آئی ہے، صالح تربیت پر والدین کو جنت جیسی لازوال نعمت کا مژده عطا فرمایا۔

اب ہمیں دیکھنا ہے کہ ہمارے موجودہ معاشرہ میں بچیوں کی صحیح تربیت ہورہی ہے یا نہیں، کیونکہ یہی کونپلیں کل امت کی مائیں ہوں گی، آج اگر ان کی صحیح تربیت ہوگی تو کل ان کی گود میں پلنے والے اسلام کے ہیرو ہوں گے، یہ سچ ہے کہ بچے بچیوں کی تعمیر و ترقی کا سرچشمہ ماں کی گود ہی ہے، اسی لئے کہا جاتا ہے کہ ماں کی گود بچے کی پہلی تربیت گاہ ہوتی ہے، یہیں سے ان کی تعلیم وتربیت کا آغاز ہوتا ہے، اس درسگاہ میں جو کچھ ان کے ذہن و دماغ پر مرتسم ہوتے ہیں وہ زندگی بھر باقی رہتے ہیں:

خشتِ اول چوں نہد معمار کج

تا ثریا میں رود دیوار کج

معمار جب پہلی اینٹ ہی ٹیڑھی رکھتا ہے تو اخیر تک دیوار ٹیڑھی ہی رہتی ہے۔

موجودہ دور میں بچیوں کی تعلیم وتربیت میں بڑی غفلت برتی جارہی ہے،ہم اپنی بچیوں کی عمر کے بنیادی اور ابتدائی کچھ سال ( پانچ ،چھ سال کی عمر) یوں ہی ضائع کردیتے ہیں حالانکہ یہی عمر بچیوں کا سنورنے کا ہوتا ہے ، اس عمر میں ان کا ذہن و دماغ خالی ہوتا ہے جو کچھ اس میں ڈالا جائے گا وہ پتھر کی لکیر کی سی ہوجائےگی، انہیں سب سے پہلے اللہ و رسول کا نام ،کلمہ شہادتیں، سورہ اخلاص، سونے،اٹھنے،کھانے پینے وغیرہ کی دعائیں یاد کرائی جائیں، توحید و رسالت کی حقیقت ان کے دل و دماغ پر بیٹھایا جائے، سلام وکلام اور اسلامی آداب سکھلائے جائیں،نماز کی دعائیں یاد کرائیں، گھر کی مستورات جب نماز ادا کریں تو انہیں بھی اپنے قریب لاکر بیٹھائیں،جب سات سال کی عمر کو پہنچ جائیں تو انہیں نماز کا حکم دیں حدیث نبوی ﷺ ہے:

مروا اولادكم بالصلاة وهم ابناء سبع سنين،واضربوهم وهم ابناء عشر سنين،وفرقوابينهم فى المضاجع (سنن ابى داؤد:495)

رسول اللہ ﷺ نے فرمایا جب تمہارے بچے سات سال کے ہوجائیں تو انہیں نماز کا حکم دو، اور جب دس سال کے ہوجائیں تو نماز میں کوتاہی کرنے پر ان کو سزا دو، اور ان کے بستر الگ الگ کردو۔

حدیث شریف میں سب سے پہلے سب سے مہتم بالشان عبادت نماز کی پابندی کرانے کا حکم ہے، حالانکہ اس عمر میں ان پر نماز فرض نہیں ہے لیکن شوق و رغبت دلانے کے لئے دس سال کی عمر میں تادیب کے طور پر ہلکی پٹائی کی بھی اجازت ہے تاکہ رفتہ رفتہ ان کی نماز کی عادت ہوجائے اور پھر عادت عبادت بن جائے، اس عمر میں نماز کا حکم سے یہ بھی اشارہ ملتا ہے کہ انہیں تمام دیگر نیکیوں کے کام میں لگانا چاہیے۔

اسی طرح اس عمر کی بچیوں کو عموماًلباس وپوشاک میں کوئی خاص خیال نہیں کیا جاتا ہے، بلکہ اس عمر میں بچیوں کالباس خود والدین شوق سے الگ الگ ڈیزائن کے لاتے اور پہناتے ہیں، اس پر بچیوں کو داد و تحسین سے بھی نوازتے ہیں، ہمارے معاشرہ میں اکثر و بیشتر آٹھ ،دس سال تک کی بچیوں کو جنس و ٹی شرٹس، اور لیگی پہنایا جا رہا ہے، بعض ایسے ملبوسات ہوتے ہیں جس میں آدھے پیر کہنیاں عریاں ہوتی ہیں، بعض اتنا باریک و تنگ ہوتے ہیں کہ جس کی وجہ سے جسم کی بناوٹ نمایاں ہوتی ہیں،ایسے ہی ملبوسات کے بارے میں نبی کریم ﷺ نے فرمایا:

ونساء كاسيات عاريات(صحيح مسلم:2128) اور عورتیں جو کپڑے پہننے کے باوجود ننگی ہیں۔

بعض والدین سے جب کہا جاتا ہے کہ ایسے کپڑے نہ پہنائیں تو خود والدین کہتے ہیں کہ ابھی تو یہ بچیاں ہیں،جب بڑی ہوں گی تو نہیں پہنیں گی، جب کہ ظاہر کا اثر باطن پر پڑتا ہے، معلوم ہونا چاہیے کہ ہر لباس اپنا اثر رکھتا ہے:حضرت مفتی تقی عثمانی صاحب دامت برکاتہم فرماتے ہیں لباس کا معاملہ اتنا سادہ اور اتنا آسان نہیں ہے کہ آدمی جو چاہے لباس پہنتا رہے اس لباس کی وجہ سے اس کے دین پر اس کے اخلاق پر اس کی زندگی پر اس کے طرز عمل پر کوئی اثر واقع نہ ہو۔

یہ ایک مسلم حقیقت ہے اس کو شریعت نے تو ہمیشہ بیان فرمایا، اور اب نفسیات اور سائنس کے ماہرین بھی اس حقیقت کو تسلیم کرنے لگے ہیں کہ انسان کے لباس کا اس کی زندگی پر اس کے اخلاق پر اس کے کردار پر بڑا اثر واقع ہوتا ہے، لباس محض ایک کپڑا نہیں ہے جو انسان نے اٹھا کر پہن لیا بلکہ یہ لباس انسان کے طرز فکر پر اس کی سوچ پر اس کی ذہنیت پر اثر انداز ہوتا ہے۔(لباس کے شرعی اصول:4)

اس لئے چھوٹی چھوٹی بچیوں کو بھی ایسے ہی کپڑے پہنائیں جو شرعی لباس ہوں، تاکہ آگے چل کر ان کو ذہن و دماغ میں شرعی لباسوں کی اہمیت اور اس کی قدروقیمت باقی رہے، پھر انہی کی گود میں اہل اللہ اور بڑے بڑے اسلام کے جیالے تیار ہوں گے۔

مسعود جاوید

انگریزی استعماریت کے خلاف سب سے پہلے مسلمانوں نے پہلی جنگ ١٨٥٧ میں لڑی اس لئے کہ انگریزوں کی استعماریت کو ہندوستان، مسلمان اور اسلام کے لئے خطرے کو علما نے محسوس کر لیا تھا۔ ظاہر ہے متعدد اسباب کی بنا پر اس جنگ میں ناکامی کا منہ دیکھنا پڑا ۔ انگریز اور انگریز کے پروردہ مورخین نے اسے غدر، بغاوت اور mutiny کہا۔ بدقسمتی سے مسلمان بھی اس جنگ کو غدر یا بغاوت کہتے ہیں بعض مصنفین نے بھی اپنی کتابوں کا عنوان اسی محرک کے تحت ‘اسباب بغاوت ہند’ رکھا۔ ہمارے پاس 1857 سے 1947 تک کی جنگ آزادی کی طویل جد وجہد کی تاریخ ہے، ہمارے پاس مسلمانوں اور بالخصوص علما کی قربانیوں کی قابل فخر روداد ہے، ان حقائق کو پڑھنے اور نئی نسل کو پڑھانے اور سنانے کے لیے متعدد معتبر کتابیں ہیں لیکن افسوس ہم نے اس طرف کبھی توجہ نہیں دی ۔ اس کی بجائے ہم بعض لوگوں کے ذریعے پھیلاۓ بھرم ، فیک نیوز/پوسٹ کا سہارا لیتے ہیں۔
سچر کمیٹی رپورٹ کے مطابق مسلمانوں کی حالت دلتوں سے بھی بدتر ہے۔ اس کے لئے کچھ تو حکومت ذمہ دار ہےاور کچھ خود ہم ۔ دلتوں سے ابتر کی ایک چھوٹی سی مثال : امبیڈکر جینتی جس ہرش و اتساہ کے ساتھ منائی جاتی ہے کیا آزاد جینتی بھی کسی کو یاد رہتی ہے ؟ ہم نے خود اس معمارِہند کو بھلا دیا تو حکومت کی سردمہری کے تو کئی اسباب ہیں اس سے کیا شکوہ۔

بعض شعلہ بیان مقررین اور خود فریبی کے شکار لکھاری حضرات اس طرح کی غلط بیانی سے لوگوں کے اندر جوش بھرتے رہتے ہیں اور وقفہ وقفہ سے ایسی باتیں پوسٹ کرتے رہتے ہیں۔
یہ ایسا ہی ہے جیسے بہت سے واعظین جلسہ گاہوں اور منبروں سے من گھڑت احادیث، روایات اور بزرگوں کے کشف و کرامات بیان کرتے ہیں یا ایسی من گھڑت اور ضعیف حدیثوں پر مشتمل کتابوں کو پڑھتے پڑھاتے ہیں، سوال کرنے پر جواب دیا جاتا ہے کہ ترغیب و ترہیب کے لئے اس طرح کے باتیں سنائی جاتی ہیں۔ بعض مساجد میں نماز کے بعد اس کے پڑھنے کا اہتمام اتنی شدت سے ہوتا ہے کہ ناغہ کرنے والے امام صاحب کی چھٹی کر دی جاتی ہے۔

سوشل میڈیا پر ایک پوسٹ دیکھا، جس میں یہ دعویٰ کیا گیا ہے کہ "انڈیا گیٹ کی دیواروں پر کل 95,300 مجاہدین آزادی کے نام کندہ ہیں جن میں 61350 مسلمان، 8050 سکھ، 14480 پسماندہ، 10777 دلت اور 598 اونچی ذات کے تھے سنگھی صفر”ـ
جبکہ ویکیپیڈیا کے مطابق :
١- انڈیا گیٹ کی تعمیر کا کام 1921 میں شروع ہوا تھا اور 1931 میں اس کی نقاب کشائی کرکے افتتاح ہوا تھا ۔ یعنی جنگ آزادی 1947 سے 16 سال قبل۔
٢- کل 13,300 نام کندہ ہیں۔
٣- انڈیا گیٹ عالمی جنگ اول میں برطانوی-ہندوستانی فوج کے تحت فرانس اور دیگر ممالک میں 1914 سے 1921 کے درمیان 70،000 جان گنوانے والے فوجیوں کی یاد میں بنایا گیا تھا۔
٤- انڈیا گیٹ کی دیواروں پر کل 13,300 فوجیوں بشمول انگریز فوج، کے نام کندہ ہیں نہ کہ 95,300

یوسف کرمانی
ایودھیاپر سپریم کورٹ کا فیصلہ آنے کے باوجود اس کے اردگرد بچھی سیاسی بساط سمٹنے کانام نہیں لے رہی ہے۔مسلم پرسنل لابورڈ اور جمعیت علماے ہند نے کہاہے کہ 99 فیصد مسلمان چاہتے ہیں کہ اس معاملے میں سپریم کورٹ میں ریویوپٹیشن دائر کی جائے۔دوسری طرف سپریم کورٹ کے فیصلے کے مطابق مرکزی سرکار کو ایک ٹرسٹ بنانا تھا،جو ایودھیا میں رام مندرکی تعمیر کاکام سنبھالے گا۔25دن سے زیادہ ہوچکا ہے؛لیکن اب تک ٹرسٹ نہیں بنا۔اس ٹرسٹ میں جگہ پانے کے لیے تمام سادھو سنتوں کے اکھاڑے اور کئی خود ساختہ بابا الگ سیاسی بازی گری میں مشغول ہیں۔یہ بھی صحیح ہے کہ ایودھیا پر سپریم کورٹ کا فیصلہ اس معاملے سے جڑے لوگوں کے گلے نہیں اترا اور اس کے اختلافی پہلووں پر بحث مباحثہ جاری ہے؛لیکن یہاں زیر بحث 99فیصدمسلمانوں کے نام پر اٹھایاجانے والا مقدمہہے،جوبابری مسجد کی شہادت پر27سال پورے ہونے سے ٹھیک پہلے دائر کیاگیا ہے۔
ملاقات کے بعد:
جمعیت خود کو مسلمانوں کی سب سے بڑی تنظیم بتاتی ہے۔مسلم پرسنل لا بورڈ کے 101 اساسی ارکان ہیں،جن میں تمام فرقوں کے علما شامل ہیں۔فیصلہ آنے کے بعد بورڈ نے کچھ میٹنگیں کیں اور اس نتیجے پر پہنچا کہ ملک کے ننانوے فیصد مسلمان ریویوپٹیشن دائرکیے جانے کے حق میں ہیں۔ان کی رائے کو دھیان میں رکھتے ہوئے ہی اس نے اس سمت میں آگے بڑھنے کا فیصلہ لیاہے ۔بورڈ کے پاس معلوم نہیں کونسا اوزار ہے،جس کے ذریعے وہ اس نتیجے پر جاپہنچا کہ جو بورڈ چاہتاہے ،وہی ننانوے فیصد مسلمان بھی چاہتے ہیں۔بورڈ اگر اپنے ایک سو ایک ارکان کے درمیان ووٹنگ کروائے،تواس میں بھی ننانوے فیصد مسلمانوں کی رائے ریویوپٹیشن کے حق میں نہیں ملے گی۔بورڈ اگر اسے ننانوے فیصد مسلمانوں کی رائے نہ بتاکر خود تنظیم کی طرف سے پٹیشن دائر کرنے کی بات کہتا،تو کسی کو اعتراض نہیں ہوتا۔جس بورڈ کی تشکیل میں دس فیصد بھی عام مسلمان شامل نہیں ہیں،وہ ننانوے فیصد مسلمانوں کی آڑلے کر کیوں اپنی سیاست باقی مسلمانوں پر تھوپنا چاہتا ہے؟
جمعیت علماے ہند کے صدر مولانا ارشد مدنی نے ایودھیا پر فیصلہ آنے سے پہلے آر ایس ایس سربراہ موہن بھاگوت سے دلی میں واقع آرایس ایس ہیڈ کوارٹر میں ملاقات کی تھی۔کہنے کو تو بھاگوت نے انھیں ایک پروگرام میں بلایاتھا؛لیکن مولانا مدنی اور بھاگوت ڈیڑھ گھنٹے تک بات چیت کرتے رہے۔یہ ملاقات رواداری میں کی گئی تھی یا اس کا سیاسی مقصد تھا،کوئی نہیں جانتا۔ایودھیا پر فیصلہ اس کے بعد آیا،پھر جمعیت اور مولانا مدنی کے بیانات اس فیصلے پر تلخ سے تلخ ہوتے گئے اور بورڈ سے بھی پہلے انھوں نے سپریم کورٹ میں پٹیشن دائر کردی۔مدنی صاحب کوایودھیامعاملے کی تو فکر تھی؛لیکن شہریت ترمیمی بل اور این آرسی پر انھوں نے بھاگوت سے مسلمانوں کی فکرمندی شیئر نہیں کی اور ناہی ان سے ایسی کوئی یقین دہانی حاصل کرسکے کہ دونوں بلوں میں مسلمانوں کے ساتھ کوئی عیاری نہیں کی جائے گی۔
ایسی کوئی اطلاع نہیں ہے کہ ریویوپٹیشن دائر کرنے سے پہلے جمعیت علمائے ہند یا مسلم پرسنل لابورڈ نے مسلمانوں کی رائے جاننے کے لیے ان کے بیچ خود یا کسی ایجنسی سے کوئی سروے کرایاہو۔ایودھیا پر فیصلہ آنے سے پہلے ملک کی تمام مسجدوں میں جمعے سے قبل علمااور ائمہ نے یہ اپیل ضرورکی تھی کہ امن و امان قائم رکھیں؛لیکن فیصلہ آنے کے بعد ملک کی کسی مسجد میں کسی جمعے میں کسی امام کو یہ کہتے نہیں سناگیاکہ اس علاقے کے مسلمان بابری مسجد معاملے میں ریویوپٹیشن دائر کرنے کی مانگ کرتے ہیں یا اس معاملے میں بورڈ یا جمعیت کی رائے کی تائید کرتے ہیں۔اگر اس طرح کی اپیل ایک بھی مسجد میں ہوئی ہوتی، تو میڈیاکا ایک حصہ،جو مسلمانوں کے تئیں متعصب ہے،وہ اس کے پرچار پرسار میں کوئی کمی نہیں چھوڑتا۔خود بورڈیا جمعیت بھی اپنی پریس کانفرنس میں ایسے قدم کی جانکاری ضرور دیتی؛اس لیے بورڈیا جمعیت کا یہ کہنا گمراہ کن ہے کہ ننانوے فیصدمسلمانوں کی رائے ریویوپٹیشن کے حق میں ہے۔
مسلمانوں میں سپریم کورٹ کے فیصلے کو لے کر رنج اور غصہ ضرور ہے؛لیکن غیر متفق ہوتے ہوئے بھی انھوں نے فیصلے کو قبول کرلیاہے۔6دسمبر1992 کے سانحے کوبھی انھوں نے لگ بھگ بھلادیاہے۔سپریم کورٹ کا فیصلہ آنے کے بعد ملک کے کسی بھی شہر میں ایک بھی جلوس یا جلسہ اس فیصلے کے خلاف نہ ہونا یہی بتاتا ہے ۔کسی بھی مسلم تنظیم نے انفرادی طورپر بھی فیصلے کے خلاف کسی طرح کا پروگرام نہیں کیا۔کچھ مسلم سلیبریٹیز نے تو آگے جاکر یہاں تک کہاکہ تاریخ کاایک باب ختم ہوا،اس معاملے میں رویویوپٹیشن دائر کرنے کی ضرورت نہیں ہے۔البتہ لوگ پانچ ایکڑزمین سرکار سے لی جائے یانہ لی جائے، اس معاملے پر ضرورمنقسم نظر آئے۔
مضبوط تحریک کی ضرورت:
مسلم پرسنل لابورڈ اور جمعیت سمیت تمام مسلم تنظیموں نے زمین لینے یا نہ لینے کےایشوپر مسلمانوں کی رائے جاننے کے لیے ابھی تک کوئی پہل نہیں کی ہے۔ایودھیا پر فیصلے کے بعد ملک کے کئی شہروں میں بڑے بڑے جلسے اور عرس ہوئے ہیں؛لیکن وہاں آنے والے لاکھوں لوگوں سے بھی اس بارے میں کوئی رائے نہیں پوچھی گئی۔ضرورت اس بات کی ہے کہ مسلمانوں کو حساس ایشوزمیں نہ الجھاکران کی ترقی کے لیے ٹھوس تحریکیں چلائی جائیں۔ایودھیا سے بھی بڑاایشومسلمانوں کے لیے فی الحال شہریت ترمیمی بل اور این آرسی ہے،جن کے حوالے سے ان تنظیموں کے پاس کوئی حکمت عملی نہیں ہے۔
(اصل مضمون آج کے نوبھارت ٹائمس میں شائع ہواہے،مضمون میں ظاہر کردہ خیالات مضمون نگار کے ذاتی ہیں)

نئی دہلی: آل انڈیا مسلم پرسنل لا بورڈ کے جنرل سکریٹری حضرت مولانا محمد ولی رحمانی صاحب نے ایک پریس بیان میں کہا ہے کہ بابری مسجد ملکیت مقدمہ میں سینئر ایڈوکیٹ جناب ڈاکٹر راجیو دھون کی خدمات ناقابل فراموش اور لاثانی ہیں۔ انہوں نے جس اخلاص، جرأت و بیباکی، حوصلہ و استقامت اور ثابت قدمی کے ساتھ یہ مقدمہ لڑا، باوجودیکہ ایک طبقہ کی طرف سے ان کی شدید مخالفت کی گئی، انھیں شدید تنقید کا نشانہ بنایا گیا اور ان کے خلاف سوشل میڈیا پر اہانت آمیز مہم چلائی گئی لیکن وہ اپنے موقف پر ڈٹے رہے اورٹس سے مس نہیں ہوئے۔ مسلم پرسنل لا بورڈ، پوری ملت اسلامیہ ہندیہ اور ملک کے امن پسند اور انصاف پسند افراد ان کی ان خدمات جلیلہ کے لئے انتہائی ممنون و مشکور ہیں۔
جنرل سکریٹری بورڈ نے فرمایا کہ مسلم پرسنل لا بورڈ (جس نے بابری مسجد ملکیت مقدمہ کے 8 میں سے 7 مقدمات کی پیروی کی تھی) نے اپنی مجلس عاملہ میں یہ فیصلہ کیا ہے کہ وہ سپریم کورٹ کے اس فیصلے پر نظر ثانی ( Review Petition) کی درخواست داخل کرے گا۔ اس سلسلے کی تیاریاں مکمل ہوچکی ہیں اور انشاء اللہ 9 دسمبر سے قبل 4 فریقوں کی طرف سے یہ درخواستیں داخل کردی جائیں گی۔ حسب معمول یہ سب کام ڈاکٹر راجیو دھون کی سرپرستی و سرکردگی میں انجام پارہا ہے اور آگے بھی ان ہی کی سرپرستی میں انجام پائے گا۔ اور جناب ایڈوکیٹ یوسف حاتم مچھالا صاحب، جناب ایڈوکیٹ ظفریاب جیلانی صاحب، جناب ایڈوکیٹ ایم آر شمشاد صاحب، جناب ایڈوکیٹ شکیل احمد سید صاحب، جناب ایڈوکیٹ ارشاد احمد صاحب، جناب ایڈوکیٹ فضیل احمد ایوبی صاحب، جناب ایڈوکیٹ نظام پاشا صاحب، جناب ایڈوکیٹ طاہر حکیم صاحب اور قابل اعتماد وکلاء کی پوری ٹیم کے ساتھ ریویوپٹیشن (Review Petition) میں کام کررہی ہے اور کرے گی۔ مسلم پرسنل لا بورڈ ان تمام قانون دانوں کا مشکور ہے کہ انہوں نے اپنی لیاقت، محنت اور اخلاص کے ساتھ لانبے عرصہ تک بابری مسجد مقدمہ میں وقت دیا اور کام کرتے رہے اور ان شاء اللہ آئندہ بھی ان حضرات کی صلاحیتیں بابری مسجد کے سلسلہ میں کام آئیں گی۔

شمیم اکرم رحمانی

راجیو دھون نے بورڈ اور جمیعت کی طرف سے ایودھیا معاملہ میں جوکوششیں کی ہیں وہ نہ صرف قابل تحسین ہیں بلکہ قانون کی بالادستی کے لیے کی جانے والی کوششوں میں بہت نمایاں ہیں ـ ہر انصاف پسند ان کی کوششوں کو سلام کرتاہے، مجھے یقیں ہے کہ ان کی کوششیں تاریخ میں سنہرے حروف سے لکھی جائیں گی اور تاقیامت وطن عزیز کی اقلیتوں کے لیے حوصلے کا سامان بنیں گی ـ
ان کی جدوجہد کو دیکھ کر شروع میں ایسا محسوس ہورہاتھاکہ بورڈ اور جمیعت انہیں خراج تحسین پیش کرتی رہیں گی اسلئے کہ مفت میں سنیروکیل کا مسلمانوں کے حق میں اور فسطائیت کے خلاف چٹان بن کر کھڑا رہناکوئ معمولی بات نہیں ہے، وہ بھی راجیودھون نام کے ساتھ! اس معاملے کی اہمیت کاادراک وہی لوگ کرسکتے ہیں،جو ہندوستانی سیاست اورسنگھ کی پلاننگ سے واقفیت رکھتے ہیں ـ
لیکن وہی ہوا جو عام طور پر مسلمانوں میں ہوتارہاہےـ لوگ سازشوں کے آلۂ کار بن جاتےہیں، تھوڑے فائدے کےلئے مخلصین کو روند دیتےہیں اور ڈبل چہرے سے کام کرکے باغباں اور صیاد دونوں کوراضی رکھناچاہتے ہیں؛چنانچہ چند گھنٹے قبل افسوسناک خبر ملی کہ راجیودھون کو جمعیت نے وکالت سےبرطرف کردیاہے-
"سوفیصد ریویو پٹیشن کے مسترد کئےجانے والی بات” سے مجھے جن چیزوں کااندیشہ تھا ان میں ایک اندیشہ یہ بھی تھا کہ راجیو دھون جیسے مخلص افراد کو کہیں معاملہ سے الگ نہ کردیاجائےـ راجیو دھون کے حالیہ بیان کہ "مسلمانوں کے ساتھ ناانصافی ہوئی ہے” نے اس اندیشے میں مزید اضافہ کردیاتھاـ
خیر جوہوناتھا وہ ہوا اوراب یہ طے ہوچکاہے ہے کہ راجیو دھون جمعیت کی طرف سے ایودھیا معاملے کے ریویو پٹیشن میں جمعیت کے وکیل نہیں رہیں گےـ راجیو دھون جی نےخود اس کی اطلاع دیتےہوئے فیسبک پر لکھاہےکہ:
I have been informed that Mr Madani has indicated that I was removed from the case because I was unwell. This is total nonsense. He has a right to instruct his lawyer AOR Ejaz Maqbool to sack me which he did on instructions. But the reason being floated is malicious and untrue.
ترجمہ:مجھے خبر دی گئی ہے کہ مسٹر مدنی کے اشارے پر مجھے کیس سے ہٹا دیا گیا ہے؛ کیونکہ میری طبعیت خراب ہےـ یہ سراسر بے بنیاد بات ہےـ انہیں حق ہے کہ اپنے وکیل کے ذریعے مجھے کیس سے ہٹا دیں جو کہ انہوں نے کیا، لیکن جو وجہ دی جا رہی ہے وہ بیہودہ اور سراسر غلط ہےـ
گویاکہ اب وہ صرف بورڈ کی طرف سے معاملے کی پیروی کریں گےـ مجھے نہیں پتہ کہ مسلم پرسنل لا بورڈ کا ان کے ساتھ کیا طرز عمل ہوگا؛ لیکن ہم بورڈ کے ذمے داروں سے ہاتھ جوڑ کر درخواست کرتےہیں کہ راجیودھون جیسے مخلص لوگوں کی ہرطرح سے حوصلہ افزائی کریں اور ریویو پٹیشن دائر کرنے میں انہیں سب سے آگےرکھیں، یہ وہ بندہ ہے،جو اس اہم معاملے کی وجہ سے ہی فرقہ پرستوں کے نشانے پر رہاہےـ