مسجد

جب سے” بی جے پی” برسراقتدار آئی ہے، اس وقت سے ہندو مسلم کے مابین بہت ہی دوری ہو نےلگی ہے اور ہر ہندو مسلمانوں کو اپنا جانی و مالی دشمن خیال کرنے لگا ہے۔متعصب ہندو افراد ہر روز کسی نہ کسی صوبہ میں ایک نہ ایک معصوم عن الخطا مسلمان کو فرضی جرائم کی پاداش میں اس وقت تک اپنے ظلم و ستم کا نشانہ بنائے رکھتے ہیں، جب تک کہ اس کی روح قفس عنصری سے پرواز نہیں کر جاتی ہے، ہندو مسلم کے مابین دوری کی اس سے بڑی اور کیا دلیل ہو سکتی ہے؟۔
اسی طرح اس کی حکومت میں جو جسے اور جب چاہتا ہے دھمکی دیتا ہے اور افسوس کہ اس کے خلاف کوئی کاروائی بھی نہیں ہوتی ہے، جس کی وجہ سےظالموں کاظلم آئےدن بڑھتے ہی جا رہا ہے ،اوراب تو عدلیہ بھی ظالموں کے ظلم کے فروغ میں ایک اہم رول اداکررہی ہے ،نیزحکومت و عدلیہ بھی اب یہی چاہتی ہےکہ مسلمانوں پر خوب ظلم و ستم ڈھائے جائیں۔اورمسلمانوں پر ہر چہار جانب سے یلغاریں ہوں اور مسلمانوں کو ظلم و ستم کی چکی میں خوب پیساجائے ،تاکہ انہیں حکومت وعدلیہ کے خلاف کچھ بولنے کی جرأت بھی نہ ہو،اور وہ غلامانہ زندگی جینے پر مجبور ہوجائیں۔
یہی وجہ ہے کہ اب ہندوستان میں نہ ہی مسلمانوں کی جانیں محفوظ ہیں، نہ عزتیں، نہ اموال اور نہ ہی مساجد ومدارس اور خانقاہیں،الغرض سب کچھ غیرمحفوظ ہیں۔
ہر ملک میں ملک سے ظلم وستم کے خاتمے اور ظالم مظلوم کے مابین عدل و انصاف کے قیام کے لیے عدلیہ کا قیام عمل میں آتا ہے اور عدلیہ اسی وقت تک عدلیہ کہلانے کا حق رکھتا ہے،جب تک اس کے ذریعے عوام الناس کوان کے ہر معاملے میں عدل و انصاف ملے اور وہ عدل و انصاف کو اپنا فرض منصبی بھی سمجھتی ہو، نیز اس کے ذریعے ملک میں امن و امان بھی قائم رہے ؛مگر جب عدلیہ ہی خود عدل و انصاف کا جنازہ نکالنے لگے اور ملک میں بدامنی کی فضا قائم کردے،تو پھر ملک میں ظلم و ستم ایک عام سی بات نہیں ہوگی، تو پھر اور کیا ہوگی؟۔
ابھی حال ہی میں یعنی 30 /ستمبر 2020ء کو مسلمانوں کے ساتھ بڑا ظلم و ناانصافی کا مظاہرہ کرتے ہوئے سی بی ائی کی خصوصی عدالت نے 28/سالہ قدیم مقدمہ بابری مسجد انہدام کے تمام ہی ملازمین کو معصوم عن الخطا قرار دے کر بری کر دیا ہے۔
سی بی ائی کی خصوصی عدالت نے ان 32/ ملزمین کو یہ کہتے ہوئے بری کردیا ہے:کہ ان کے خلاف ٹھوس ثبوت فراہم نہیں ہوسکے ہیں ،انہوں نے مسجد انہدام کے لیے مشتعل ہجوم کو روکنے کی کوششیں کی تھیں،سی بی آئی کے ذریعہ فراہم کردہ آڈیواور ویڈیو ریکارڈنگ کی صداقت ثابت نہیں ہوسکی ہے اور یہ بھی کہا:کہ مسجد کی شہادت پہلے سے منصوبہ بند نہیں تھی، یعنی کسی منصوبے کے تحت مسجد کو شہید نہیں کیا گیا تھا، جج ایس کےیادو نے کہا :کہ یہ ایک حادثاتی واقعہ تھا اور حتمی تجزیہ یہ ہے کہ سماج دشمن عناصر نے مسجد کا ڈھانچہ شہید کیا تھا، جب کہ ملزمین انہیں ہجومی اشتعال سے روکنے کی کوششیں کررہے تھے؛ اس لیے یہ ملزمین مجرم نہیں؛بل کہ خیرخواہ ہوئے،(30/ستمبر 2020ء،سماج نیوزسروس ایجنسیاں)۔
جب کہ یہ یہ ایک حقیقت ہے کہ اصل ملزم و مجرم یہی لوگ ہیں، دنیا اچھی طرح جانتی ہے کہ دن کی روشنی میں مکمل منصوبہ بندی کے ساتھ بابری مسجد کو شہید کیا گیا، دنیا نے یہ بھی دیکھا کہ کن لوگوں نے اللہ کے گھر کی بے حرمتی کی اور اسے زمین بوس کردیا، ایسا بھی نہیں ہے کہ ان کے ملزم ہونے کی دلیلیں موجود نہیں ہیں؛ بل کہ آج بھی ویڈیو میں ان کی تصویریں دیکھی جا سکتی ہیں، شاید اسی لیے تو ملکی اور بین الاقوامی میڈیا نے ان کے ویڈیو بنا لیے تھے،کہ کہیں ان کے حامین انہیں معصوم قرار دے کر ان کی رہائی کا اعلان نہ کردے اور ایسا ہی ہوا بھی کہ سی بی آئی کی خصوصی عدالت نے بالآخرسارےحتمی براہین کونظر انداز کرتےہوئے،رکیک ولچر تاویلات کے ذریعے انہیں معصوم قرار دےکررہائی کااعلان کرہی دیا۔
جب کہ 9/نومبر 2020ء کو عدالت عظمی سپریم کورٹ کی پانچ رکنی آئینی بینچ نے بابری مسجد -رام جنم بھومی حق ملکیت پراپناجانب دارانہ اور غیر منصفانہ فیصلہ رام مندر کےحق میں سناتے وقت ،چند حقائق و شواہد کا کھلے لفظوں میں اعتراف بھی کیا تھا ،وہ حقائق وشواہد مندرجہ ذیل ہیں: وہ اعتراف یہ تھا کہ اجودھیامیں سن 1528ء میں ظہیر الدین بابر کے حکم سے ان کے کمانڈر میر باقی نے خالی جگہ میں بابری مسجد تعمیر کیا تھا، وہاں کسی طرح کا کوئی مندر نہیں تھا ،22/ 23/ دسمبر کی رات میں بابری مسجد میں مورتیوں کا رکھناغیرقانونی اور مجرمانہ عمل تھا،جن لوگوں نے جن کے اشاروں سے بابری مسجد کی عزت وحرمت کو تار تار کیا ،ان تمام کو اس کی پاداش میں کیفر کردار تک پہنچانا چاہیے تھا، اسی طرح 6/دسمبر 1992ء کو بابری مسجد شہید کرنا، کسی بھی طرح صحیح نہیں تھا،ان ظالموں نے بابری مسجد شہید کرکے دین اسلام، مسلمان اور شعائراللہ کا مذاق اڑایا ،یہ ظلم بھی ناقابل برداشت تھا۔ اسی طرح ہندوؤں کا ایک دعوی یہ بھی تھا کہ یہاں پہلے سے مندر تھا، جسے توڑ کر بابری مسجد تعمیر کی گئی تھی، اس دعوٰی بےبنیاد کو بھی عدالت عالیہ نے یہ کہہ کر مسترد کر دیا کہ بابری مسجد کی داغ بیل خالی جگہ میں ڈالی گئی تھی، وہاں کبھی بھی کسی طرح کا کوئی مندر نہیں تھا۔نیز ان کاایک دعوٰی یہ بھی تھاکہ آثارقدیمہ کی کھدائی میں کچھ ایسےڈھانچےبھی دستیاب ہوئےتھے،جن سےصاف معلوم ہوتا تھا کہ پہلےوہاں مندرتھا،جسےتوڑ کربابری مسجد بنائی گئی تھی ،سپریم کورٹ نے ہندوؤں کےاس باطل دعوٰی کوبھی یہ کہہ کر ردی کی ٹوکری میں ڈال دیاکہ آثار قدیمہ کی کھدائی میں کوئی ایک بھی ایساڈھانچہ نہیں مل سکا،جس سے یہ دعوٰی قائم کیاجاسکے کہ "بابری مسجد "کی جگہ پہلے”مندر”تھا،جسےمنہدم کرکےبابری مسجد بنائی گئی تھی ۔
یہ چندحقائق ہیں ،جن کاعدالت عظمی نےاقرار کیاہے اور ان سےہرہندوستانی خواہ وہ مسلم ہویامشرک بخوبی واقف ہے ؛بل کہ میں تویقین کامل کےساتھ کہتاہوں کہ سی بی آئی کی خصوصی عدالت کےجج صاحبان بھی بباطن ان ہی 32/شرپسند افراد کوبابری مسجدانہدام کےاصل مجرم تسلیم کرتےہوں گے؛مگر پھر بھی یقینی شواہد ودلائل سےپہلوتہی اختیار کرتےہوئے سی بی آئی کی خصوصی عدالت کامن چاہی فیصلہ صادر کرنا،انتہائی افسوس ناک ہے اور ظلم وستم پرمبنی حیران کن یہ فیصلہ جمہوری اور سیکولر ملک کےلیے ایک بدنما داغ ہے ۔
مجھےحیرانی اس بات کی ہے کہ بابری مسجد انہدام کا مقدمہ ایک ایسامقدمہ ہے ،جس کےحقیقی ملزمین کی شہادت ہربیناشخص دیتاہے؛حتی کہ بعض ملزمین بھی گاہے بگاہے خود اقرار جرم بھی کرچکےہیں کہ واقعی بابری مسجد انہدام کےاصل مجرم ہم ہی ہیں اور عدالت عالیہ کےحقائق کےاعتراف سے بھی یہی معلوم ہوتاہے کہ اس کےنزدیک بھی اس کےحقیقی مجرم یہی 32/افراد ہیں ،پھر بھی سی بی آئی کی خصوصی عدالت کاحقائق کےخلاف فیصلہ سنانا،چند بڑے اور اہم سوالات ضرور پیداکرتاہے۔
بالفرض ہم مان بھی لیتےہیں کہ یہ 32/افراد ملزم نہیں ہیں، توپھر بالآخر اس کےملزم کون ہیں؟کیابابری مسجد خود بخود شہید ہوگئی تھی؟اگر خود بخود شہید ہوگئی تھی تواتنابڑاہنگامہ کیوں بڑپاہواکہ بابری مسجد کی جگہ پہلے رام مندرتھا؟اور پھرظلمانہ فیصلے کےذریعے اس پراب قابض بھی ہوگئے۔
کیاسی بی آئی کی خصوصی عدالت نےعدالت عظمی پریہ الزام عائدنہیں کیاکہ اس نے جوبابری مسجد شہادت کےچند حقائق وشواہد کااعتراف کیا،وہ غلط تھا؟اور سی بی آئی کی خصوصی عدالت کاسپریم کورٹ پریہ الزام عائد کرنا،قطعی درست نہیں ہوسکتاہے؛کیوں کہ سپریم کورٹ نے ایسےحقائق کااعتراف کیاہے،جن سے ہرشخص اچھی طرح باخبر ہے،ان کاانکاردرحقیقت ایساہی ہے کہ کوئی دن کےاجالے میں کہے:کہ یہ دن نہیں؛ بل کہ رات ہے۔
اسی سے یہ سوال بھی پیدا ہو گیا کہ جب حقائق کی روشنی میں ملزمین کی شناخت یقینی تھی، تو پھر کیوں سی بی ائی کی خصوصی عدالت نے سارے براہین کا انکار کرتے ہوئے ایک ظالمانہ فیصلہ سنایا؟کیا عدالت کامعنی ظلم کرنا ہے؟ اگر ظلم ہی کرنا ہے،تو پھر عدالت کیسے؟۔
یقینا سی بی ائی کی خصوصی عدالت اپنے اس ظالمانہ فیصلے کے ذریعے ملک میں ظلم و ستم کی مختلف راہیں کھول دی ہے،اس فیصلہ کواگر سراپاظلم ہی کہہ دیا جائے،تو کوئی غلط نہیں ہوگا،اس لیے اس فیصلے کی جس قدر بھی مذمت کی جائے بہت ہی کم ہے۔
اس ظالمانہ فیصلہ کےتناظرمیں چند بڑے مذہبی اور سیاسی قائدین کے اقوال پیش خدمت ہیں: آل انڈیا مسلم پرسنل لا بورڈ کے جنرل سیکریٹری حضرت مولانا محمد ولی رحمانی صاحب نے کہا: کہ یہ ایک بے بنیاد فیصلہ ہے، جس میں شہادتوں کو نظر انداز کیا گیا ہے اور قانون کابھی پاس ولحاظ نہیں رکھا گیا ہے، مولانا نے کہا: کہ یہ فیصلہ اسی ذہنیت کا آئینہ دار ہے ،جوذہنیت حکومت کی ہے اور اس کا اظہار بابری مسجد کیس میں سپریم کورٹ کے ججوں نے کیا تھا،مولانا نے مزید کہا:کہ لوگوں کویادہوگا کہ بابری مسجد کی شہادت کے عظیم حادثہ کے بعد ملک میں فرقہ وارانہ تعصب کی لہر چل پڑی اوربڑے پیمانے پر مسلمانوں کے جان ومال کانقصان ہوا۔
سی بی آئی کی خصوصی عدالت کایہ فیصلہ مسجد کی شہادت کی ذمہ داری کسی پرنہیں ڈالتا،توکیاوہ سارامجمع اورسارے لوگ جو بی جے پی میں بہت بڑی حیثیت کےمالک رہے ہیں،مسجد کوشہید نہیں کیا؟یاکسی غیبی طاقت نے مسجد کی عمارت کونیست ونابود کردیا؟یقینایہ فیصلہ ناانصافی کی تاریخ میں ایک مثال کی حیثیت سے پیش کیا جائے گا ۔
جمعیت علمائے ہند کے صدراور دارالعلوم /دیوبند کےاستاذ حدیث حضرت مولانا سیدارشدمدنی صاحب نےکہا:کہ سی بی آئی کورٹ یہ کہہ رہی ہےکہ ان 32/ملزمین کاکوئی قصور نہیں ہے اور یہ باعزت بری کیےجاتےہیں،عقل حیران ہے کہ اس کوکس چیز سے تعبیر کیاجائے،اس فیصلے کوکس نظریہ سےدیکھاجائے ،کیااس فیصلہ سےعوام کاعدالت پراعتماد بحال رہ سکےگا؟۔
مسلم پرسنل لاء بورڈ کے رکن اوربابری مسجد ایکشن کمیٹی کے کنوینر ایڈوکیٹ ظفریاب جیلانی نےکہا:کہ ایک بارپھرمسلم فریق کوانصاف نہیں ملا،عدالت جن ویڈیو اور آڈیوکوثبوت نہیں ماناہے،وہی اصل میں ثبوت ہیں، ہمارے پاس متبادل موجود ہے،ہم صلاح و مشورہ کرکےہائی کورٹ کارخ کریں گے ۔
جمعیت علمائے ہند کےجنرل سکریٹری حضرت مولانا محمودمدنی صاحب نے کہا:کہ سی بی آئی کورٹ کایہ فیصلہ انتہائی تشویش ناک ہے؛ کیوں کہ جہاں ایک طرف اس سے فسطائی عناصرجوکہ دیگر مساجد کوبھی اپنےظلم وستم کانشانہ بناناچاہتےہیں،انہیں شہ ملےگی اور ملک میں امن وامان کوزبرست خطرہ لاحق ہوگا،تووہیں دوسری طرف اقلیتوں اورکمزورطبقات کےدرمیان مایوسی پھیلےگی اورعدالتوں پراعتماد میں کمی آنے کےباعث بہت سارے تنازعات پرامن طریقے سےحل کیےجانےکےبجائےزورزبردستی اورتشدد کےذریعے طےکرنےکارواج قائم ہوگا۔

(مضمون میں پیش کردہ آرا مضمون نگارکے ذاتی خیالات پرمبنی ہیں،ادارۂ قندیل کاان سےاتفاق ضروری نہیں)

(464 سالہ بابری مسجد کا 107سالہ قضیہ)

پہلی قسط

بابری مسجد کے قضیہ پر پچھلے 70 برسوں میں اور خاص طورپر آخری 34 برسوں میں جتنا لکھا گیا ہے اتنا شاید ہی آزاد ہندوستان میں کسی اور موضوع پر لکھا گیا ہو۔شمالی ہندوستان کے صوبہ اتر پردیش کے قصبہ ایودھیا میں 1528میں تعمیر ہونے والی یہ مسجد 464 سال تک قائم رہی لیکن اب اس کا نام و نشان بھی باقی نہیں ہے۔۔ اب وہاں حکومت ہند کی فعال شمولیت کے ساتھ رام مندر کی تعمیر شروع ہوگئی ہے۔اس مندر کا سنگ بنیاد وزیر اعظم نریندر مودی نے 5 اگست 2020 کو خود رکھا تھا۔شاید یہ اس کا جواب تھا کہ جس طرح 1528 میں شہنشاہ بابر (کے کمانڈر میر باقی) نے ایک مسجد کی بنیاد رکھی تھی اسی طرح ٹھیک 492 سال بعد 2020 میں وزیر اعظم نریندر مودی نے بھی رام مندر کی بنیاد رکھ دی۔

لیکن یہاں ایک بڑا فرق ہے۔ یہ فرق ہمیشہ تاریخ کے صفحات میں درج رہے گا اور آنے والی نسلیں یہ جانتی رہیں گی کہ شہنشاہ بابر نے 1528میں جو مسجد بنائی تھی اس کے کسی مندر کو توڑ کر بنانے کا کوئی ثبوت سپریم کورٹ تک کو نہیں ملا تھا۔جبکہ نریندر مودی نے جس رام مندر کا سنگ بنیاد رکھا تھا وہ یقینی طور پر ایک مسجد کو توڑ کر بنایا گیا تھا۔یہ مسجد 6 دسمبر 1992 کو دن کے اجالے میں بی جے پی‘بجرنگ دل‘وی ایچ پی اور شو سینا کے ہزاروں کارسیوکوں نے منہدم کردی تھی۔اس موقع پر بی جے پی کے تین درجن سے زائد ممتاز لیڈر بھی وہاں موجود تھے اور کارسیوکوں کو جوش دلا رہے تھے۔ان میں رام مندر تحریک کے سرخیل لال کرشن اڈوانی‘مرلی منوہر جوشی‘اوما بھارتی‘اشوک سنگھل‘ ونے کٹیار اور وشنو ہری ڈالمیا بھی شامل تھے۔

تاریخ یہ بھی یاد دلاتی رہے گی کہ جس طرح مندر توڑ کر مسجد بنانے کا کوئی ثبوت نہ ملنے کے باوجود اور بابری مسجد کی زمین کی ملکیت ہندؤں کے حق میں ثابت نہ ہونے کے باوجود ملک کی سب سے اعلی عدالت سپریم کورٹ نے بابری مسجد کی زمین کو رام مندر کی تعمیر کے لئے ہندؤں کے حوالہ کردیا تھا اسی طرح مسجد کے انہدام کے 28سال بعد 2020 میں لکھنؤ میں سی بی آئی کی اسپیشل عدالت نے مذکورہ تمام ملزمین کو (اور تاریخ کی نظر میں مجرمین کو) سازش اور انہدام کے ہر الزام سے بری کردیاتھا۔۔ واقعہ یہ ہے کہ بابری مسجد کے ساتھ ناانصافی کے عمل میں فیض آباد اور لکھنؤ کی مقامی عدالتوں کے ساتھ ساتھ سپریم کورٹ بھی برابر شامل رہی۔ اس ضمن میں الہ آبادہائی کورٹ کو قدرے مستثنی رکھا جاسکتا ہے۔تاریخ بتائے گی کہ مقامی عدالتوں اور سپریم کورٹ سے ہزار درجہ بہتر فیصلہ تو الہ آباد ہائی کورٹ نے ہی کردیا تھا۔اس کی تفصیل آگے بیان کی جائے گی۔لیکن اس نکتہ پرمورخ یہ سوال بھی اٹھائے گا کہ (گوکہ خود ہندو فریق بھی اس فیصلہ سے مطمئن نہیں تھا) حکومتوں‘عدالتوں اور مختلف سیاسی پارٹیوں کی شرپسندی سے واقف ہوجانے کے باوجود بابری مسجد کا فریق کیوں الہ آباد ہائی کورٹ کے اس فیصلہ پر اکتفا نہ کرسکا۔

آئیے اب ذرا دوسری طرف رخ کرتے ہیں۔ہندوستان میں اس وقت (2020 میں) سرکاری اعداد و شمار کے مطابق نوجوانوں کی آبادی 34.33 فیصد ہے۔ظاہر ہے کہ اس وقت جن کی عمریں 30 تا 35 برس ہیں انہیں بھی بابری مسجد کے قضیہ اوراس کے انہدام کا کچھ زیادہ اندازہ نہیں ہوگا۔پھر 1992میں الیکٹرانک میڈیا بھی اس پیمانہ کا نہیں تھا۔ذرائع ابلاغ بھی وسیع تر نہیں تھے۔زیر نظر مضمون کی دوسری قسط میں لکھنؤ کی عدالت کے تازہ فیصلہ کا بھی جائزہ لیا جائے گا لیکن مناسب معلوم ہوتا ہے کہ مختصر ہی سہی دور حاضر کی نسلوں کے لئے ایک سلسلہ وارٹائم لائن بیان کردی جائے۔

جیسا کہ اوپر ذکر کیا گیا بابری مسجد کی تعمیر شہنشاہ بابر کے کمانڈر میر باقی نے 1528میں کی تھی۔اس مسجد میں 421 سال تک باجماعت نماز ادا ہوتی رہی۔ تین صدیوں کے بعد سخت گیر عناصر نے مسجد کے خلاف سازش شروع کردی لیکن پہلی معلوم سازش 1885میں رونما ہوئی۔ مسجد کی تعمیر کے 357 برس بعد مہنت رگھوبیر داس نے فیض آباد کی ضلع عدالت میں ایک درخواست دائر کی اوربابری مسجد کے احاطہ کے باہر ایک سائبان (Canopy) بنانے کی اجازت مانگی۔لیکن ضلع عدالت نے اس درخواست کو مسترد کردیا۔1885میں ہندوستان کے انتظام وانصرام پر مکمل طورپر انگریزوں کا قبضہ تھا۔عدالت کے ذریعہ ہندؤں کی درخواست کو مسترد کرنے کی وجہ لازمی طورپر قانونی استدلال کی کمی تھی۔عدالت کوہندؤں کا کوئی مالکانہ حق نہ بابری مسجد پر نظر آیا ہوگا اور نہ ہی اس کے باہر کے حصہ پر۔۔

انگریزوں پر ہندو مسلم آبادی کو آپس میں لڑانے کا الزام لگتا رہا ہے۔۔لیکن یہاں انگریزوں نے اس موقع کو استعمال نہیں کیا اور ہندؤں کے دعوے کو بے بنیاد پاکر اس درخواست کو مسترد کردیا۔مسجد کے احاطے کے باہر سائبان کی تعمیر کی درخواست یقینی طوپر ایک سازش کے تحت ہی کی گئی تھی لیکن انگریزوں نے سازش کے اس موقع کا استعمال نہیں کیا۔اس سازش کے 64 سال کے بعد اور ملک کی آزادی کے تقریباً ڈیڑھ سال بعد ہندؤں نے پھر ایک بڑی سازش کی اور 23 دسمبر 1949 کی شب 50-60 لوگوں نے بابری مسجد کی دیوار پھاند کر مرکزی محراب میں رام کی مورتی رکھ دی۔اس سے پہلے اکھل بھارتیہ راماین مہاسبھا نے بابری مسجد کے باہر 9 دنوں تک بغیر کسی وقفہ کے راماین کا پاٹھ پڑھنے کا پروگرام منعقد کیا اور آخری دن وہ حرکت انجام دیدی۔بالکل اسی طرح جس طرح 43 سال بعد 1992 میں پہلے علامتی کارسیوا کے نام پر ہزاروں لوگ جمع ہوئے اور پھربابری مسجد کو منہدم کردیا۔۔

چوری چھپے مورتی رکھنے کے چند ہفتوں بعد 1950 کے اوائل میں فیض آباد کی عدالت میں دو درخواستیں دائر کی گئیں۔گوپال سملا وشارد نے بابری مسجد کے اندر چوری سے رکھی اس مورتی کی پوجا کرنے کی اجازت مانگی جبکہ پرم ہنس رام چندر داس نے پوجا کے تسلسل اور مورتی کو نہ ہٹائے جانے کا مطالبہ کیا۔۔اس کے 9 سال بعد نرموہی اکھاڑا نے بابری مسجد کو اس کے حوالہ کئے جانے کیلئے درخواست دائر کی۔

23 دسمبر 1949 کو بابری مسجد میں آخری بار عشاء کی نماز باجماعت ادا ہوئی تھی۔اس کے بعد پھر اس مسجد میں نماز نہیں پڑھی جاسکی۔اور پھر 43 سال بعد اس کی شہادت واقع ہوگئی۔ یہاں سوال یہ پیدا ہوتا ہے کہ کیا 1885سے 1992تک یعنی کل 107سال تک سازش کے علاوہ بھی کچھ ہوا؟

1961میں یوپی سنی سینٹرل وقف بورڈ نے بابری مسجد کو اس کے حوالہ کئے جانے کی درخواست عدالت میں دائر کی۔.. درخواست گزار کے طور پر ہاشم انصاری پیش ہوئے ۔ فیض آباد کی ضلع عدالت میں یہ مقدمہ 36 سال تک چلتا رہا اور فروری 1986میں اچانک عدالت نے بابری مسجد کا تالہ کھول کر اسے پرستش کے لئے ہندؤں کے حوالہ کئے جانے کا فیصلہ کردیا۔۔ یہاں پھر سوال پیدا ہوتا ہے کہ جس طرح غلام ہندوستان میں 1885میں انگریزوں کے تسلط کے دوران اسی فیض آباد کی عدالت نے ہندو فریقوں کی عیاری پر مبنی دائر درخواستوں کو مسترد کرکے ایک بڑی سازش کو ناکام بنادیا 1950سے 1986 تک آزاد ہندوستان میں (کانگریس حکومت کے دوران) فیض آباد کی اسی عدالت نے کیوں معاملہ کو اتنا طول دیا اور کیوں آخر کار اس سازش کو کامیاب کردیا۔۔ اس سوال کا جواب شاید اس سوال کے اندر پوشیدہ مل جائے کہ 23 دسمبر 1949 کی شب چوری چھپے مورتیاں رکھنے ہی کیوں دی گئیں اور جب وہاں پچھلے نو دنوں سے سخت گیر ہندؤں کا راماین پاٹھ پروگرام چل رہا تھا تو انتظامیہ اور حکومت نے حفظ ماتقدم کے تحت کوئی سخت انتظام کیوں نہیں کیا؟۔۔۔

اسی سے وابستہ سوال یہ ہے کہ جب 1528 سے 1949 تک وہاں نماز باجماعت ادا ہو رہی تھی تو انتظامیہ اور حکومت نے چوری چھپے مورتیاں رکھنے والوں کے خلاف کیا کارروائی کی؟ کیوں مسجد میں تالہ لگایا گیا اور کیوں مسلمانوں کو وہاں نماز پڑھنے سے محروم کیا گیا؟چوری چھپے مورتی رکھنا ایک مجرمانہ عمل تھا لیکن اس مجرمانہ عمل کو جاری رکھنا حکومت کا اس سے بڑا مجرمانہ عمل تھا۔کیا اس عمل میں کانگریس کے اس وقت کے وزیر اعظم پنڈت جواہر لعل نہرو کی شمولیت نہیں تھی؟

بہر حال فروری 1986میں مقامی عدالت کا فیصلہ آتے ہی مسجد کا تالہ کھول دیا گیا۔اس وقت یوپی میں کانگریس کے ویر بہادر سنگھ وزیر اعلی تھے جبکہ ملک کے وزیر اعظم راجیو گاندھی تھے۔آخر اس فیصلہ کے خلاف فوری طورپر حکومت کیوں ہائی کورٹ نہیں گئی؟ کیوں ہنگامی حکم کی درخواست نہیں کی گئی؟اس کے بر خلاف سرکاری ٹیلیویزن دور درشن پر اس فیصلہ کی خوب تشہیر کی گئی اور وہاں ہندؤں کو پوجا کیلئے ساری آسانیاں فراہم کی گئیں۔۔پورے ملک سے ہندوؤں نے وہاں جانا شروع کردیا۔اگست 1989 میں الہ آباد ہائی کورٹ نے صورت حال کو جوں کا توں رکھنے کا حکم دیا۔۔ یعنی مسلمان بابری مسجد سے دور رہیں اور ہندو بدستور پوجا کرتے رہیں۔۔۔

یہاں یہ بتانا ضروری ہے کہ بابری مسجد کا تالہ کھلنے کے بعد مسلمانوں کی طرف سے سیاسی اقدام کی تحریک مرکزی طور پر دہلی سے شروع ہوئی۔اس تحریک میں چند نام بہت بڑے تھے۔مثال کے طورپر سید شہاب الدین‘شاہی امام عبداللہ بخاری‘ابراہیم سلیمان سیٹھ‘غلام محمود بنات والا اورسلطان صلاح الدین وغیرہ۔ اس کے علاوہ دوسری سطح کے مسلم لیڈر بھی اس تحریک سے وابستہ ہوئے۔ان میں ظفر یاب جیلانی‘قاسم رسول الیاس‘جاوید حبیب وغیرہ تھے۔ لیکن دوسری جانب تالہ کھلنے‘پوجا شروع ہونے اور ہائی کورٹ سے "اسٹیٹس کو” کے حکم کے باوجود بی جے پی نے اس تحریک کو مزید آگے بڑھایا۔

راجیو گاندھی کے خلاف ان کی جماعت کے وشوناتھ پرتاپ سنگھ جب الگ ہوکر سیاسی میدان میں آئے تو ان کے ساتھ اتحاد میں شامل ایک طرف جہاں بایاں محاذ تھا وہیں بی جے پی بھی تھی۔بی جے پی کے پاس اس وقت تک لوک سبھا میں صرف دو سیٹیں (اٹل بہاری باجپائی اور ایل کے اڈوانی کی) ہوا کرتی تھیں۔لیکن وشوناتھ پرتاپ سنگھ کی عنایت اور رام مندر تحریک کے سبب بی جے پی دوسے 88 سیٹوں تک پہنچ گئی۔ اڈوانی بابری مسجد کی جگہ رام مندر کی تعمیر کے مطالبہ کو لے کر 25 ستمبر 1990 کو سومنات سے رتھ یاترا لے کر نکلے اور پھر جہاں جہاں گئے فسادات کی ایک خونی لکیر چھوڑتے چلے گئے۔۔ وہ ایک دن میں 300 کلو میٹر کا سفر کرتے اور کم سے کم 6 جلسوں کو خطاب کرتے۔۔ اس رتھ کو صرف بہار میں جاکر بریک لگا جب اس وقت کے وزیر اعلی لالو پرساد یادو نے اڈوانی کو پٹنہ میں ہی گرفتار کرکے دہلی واپس بھیج دیا۔

ادھر مسلمانوں کی تحریک بھی عروج پر تھی۔شاید آزاد ہندوستان کی تاریخ میں دہلی کے بوٹ کلب پر لاکھوں مسلمان پہلی بار جمع ہوگئے تھے۔لیکن اسٹیج پر مسلم قائدین ایک دوسرے سے نبرد آزما ہوگئے اور مسلمانوں کی بنی بنائی ہوا اکھڑ گئی۔سید شہاب الدین اور شاہی امام دونوں اپنی گرم طبیعت کو اعتدال میں نہ رکھ سکے۔ اڈوانی کی تحریک بڑھتی چلی گئی اور ان کے ساتھ کئی سخت گیر تنظیمیں بھی جڑ گئیں۔

اکتوبر 1990میں سخت گیر کار سیوکوں نے بابری مسجد پر چڑھ کر اسے منہدم کرنے کی کوشش کی۔لیکن اس وقت یوپی میں ملائم سنگھ کی حکومت تھی۔پولس نے گنبد پر چڑھے ہوئے کارسیوکوں پر گولی چلائی اور ایک درجن سے زائد ہلاک ہوگئے ۔۔ اس کے بعد 1991 کے الیکشن میں بی جے پی حکومت میں آگئی‘ کلیان سنگھ یوپی کے وزیر اعلی بنے اورشرپسندوں کی بہار آگئی۔۔1992 میں مرکز میں کانگریس کی حکومت تھی لیکن وہ یوپی میں بی جے پی کی حکومت کو بابری مسجد کے خلاف منصوبے کو آگے بڑھانے سے روکنے میں ناکام رہی۔اسوقت وزیر اعظم نرسمہاراؤ تھے۔۔ رام مندر کی تحریک اب نکتہ ارتکاز (Saturation point) پر تھی۔

دسمبر 1992 میں ایودھیا میں ہزاروں کارسیوکوں کو جمع کرکے پھر کارسیوا کا پروگرام بنایا گیا۔نرسمہاراؤ کو اپوزیشن سمیت خود ان کی پارٹی کے لوگوں نے بھی متنبہ کیا۔ یہاں تک کہ قومی یکجہتی کونسل National Integration Council کی میٹنگ میں نرسمہاراؤ سے کہا گیا کہ وہ یوپی حکومت کو برخاست کردیں کیونکہ انٹلی جنس رپورٹوں کے مطابق بھی شرپسندوں کے عزائم اچھے نہیں ہیں اور یوپی حکومت فعالیت کے ساتھ انہیں راہ دے رہی ہے۔اسی دوران معاملہ سپریم کورٹ میں گیا اور بی جے پی/وی ایچ پی کی کارسیوا کو روکنے کی گزارش کی گئی۔عدالت نے تمام تر اندیشوں کے باوجود یوپی کے وزیر اعلی کلیان سنگھ کے اس حلف نامہ پر یقین کرکے محدود کارسیوا کی اجازت دیدی جس میں کہا گیا تھا کہ یہ محض علامتی کارسیوا ہوگی اور حکومت مسجد کو کوئی گزند نہ پہنچنے دے گی۔

ادھر قومی یکجہتی کونسل نے نرسمہا راؤ سے کہا کہ وہ بابری مسجد کے تحفظ کے لئے اقدامات کریں اور یوپی حکومت پر بھروسہ نہ کریں۔نرسمہاراؤ نے کہا کہ ہنگامی حالات سے نپٹنے کیلئے ہماری تیاری پوری ہے اور پیرا ملٹری فورسز پوری طرح تیار ہیں۔ 5دسمبر 1992 کو لکھنؤ میں ونے کٹیار کے گھر پر بی جے پی لیڈروں کی میٹنگ ہوئی جس میں (سی بی آئی کی چارج شیٹ کے مطابق) یوپی کے وزیر اعلی کلیان سنگھ نے کہا کہ سپریم کورٹ نے تعمیر پر پابندی لگائی ہے توڑ پھوڑ پر نہیں۔6دسمبر کو صبح سے ہی ان تمام لیڈروں نے مائک پر نفرت انگیز تقریریں کرنی شروع کردی تھیں اور کارسیوکوں کا حوصلہ بڑھایا جارہا تھا۔آخر کار کارسیوک مسجد کے گنبدوں پر چڑھ گئے اور کدالوں سے توڑنے لگے۔بعد میں رسیاں باندھ کر گنبدوں کو گرادیا گیا۔چند گھنٹوں میں ہی 464 سال پرانی مسجد کو زمیں بوس کردیا گیا۔اور وہاں رام للا کو بٹھاکر میک شفٹ (عارضی مندر) بنادیا گیا۔ اسی رات وہاں بھجن کیرتن بھی شروع کردیا گیا۔

پورا ملک دیکھتا رہا۔حکومت دیکھتی رہی۔وزیر اعظم دیکھتے رہے۔اور سپریم کورٹ بھی دیکھتا رہا۔تمام وعدے اور حلف نامے دھرے کے دھرے رہ گئے۔اپوزیشن سمیت متعدد لیڈر اور مسلم قائدین چیختے رہے لیکن پہلے گنبد کی شہادت سے آخری اینٹ کے گرنے تک نرسمہاراؤ خاموشی سے دیکھتے رہے۔۔ وہ چاہتے تو سریع الحرکت کارروائی کرکے ٹوٹی پھوٹی بابری مسجد کو بکھرنے سے بچاسکتے تھے۔۔ان کی بھیجی ہوئی فورس کوئی زیادہ دور نہیں تھی۔۔۔لیکن انہوں نے مجرمانہ خاموشی اختیار کی اور بابری مسجد کو مکمل طور پر شہید ہوجانے دیا۔

میرا موقف یہ ہے کہ بابری مسجد کے خلاف سازش تیار کرنے میں ایک طرف جہاں ہندو جماعتوں سے لے کر بی جے پی تک سرگرم عمل تھی وہیں پنڈت جواہر لعل نہرو‘راجیو گاندھی اور نرسمہاراؤ بھی اس سازش کا متحرک حصہ نہ سہی تو خاموش حصہ ضرور تھے۔

(مضمون میں پیش کردہ آرا مضمون نگارکے ذاتی خیالات پرمبنی ہیں،ادارۂ قندیل کاان سےاتفاق ضروری نہیں)