مترجم

پٹنہ:بہارسرکارنے گزشتہ برس اردو مترجم،معاون مترجم کی آسامی نکالی جس کی چوطرفہ تحسین کی گئی۔جدیوکے مسلم ممبران اسمبلی اسے نتیش سرکارکے سیکولرزم سے جوڑنے لگے۔لیکن تاحال بحالی تودور،امتحان تک نہیں ہوئے ہیںجس سے اس الزام کوتقویت مل رہی ہے کہ نتیش حکومت اردوکے لیے اورمسلمانوں کے لیے کچھ کرنانہیں چاہتی ہے بلکہ انتخابی موسم میں صرف لالی پاپ دے رہی ہے۔ اپریل میں امتحان ہوناتھاجسے لاک ڈائون کی وجہ سے ملتوی کردیاگیا،پھر اگست کی متعدد مجوزہ تاریخیں آئیں لیکن یہ سب تاریخیں گزر گئیں اوربہار سرکار،بہار اسٹاف سلیکشن کمیشن نے یہ بتانے کی بھی زحمت نھیں کی کہ ان تاریخوں میں امتحان نہیں ہوگا اور ہوگا تو کب ہوگا۔لاک ڈائون کابہانہ کیاجائے گا،لیکن اسی بہاراسٹاف سلیکشن کمیشن کی ویب سائٹ مسلسل اپ ڈیٹ ہورہی ہے اوردیگرامتحانات اورنوٹیفکیشن آرہے ہیں۔چنانچہ اگست میں یکم، پانچ، چھ، سات، اٹھارہ،انیس،بائیس،چوبیس،پچیس اوراٹھائیس تاریخوں کے نوٹیفکیشن ویب سائٹ پرموجودہیں ،یہی نہیں،تین ستمبرکوبھی تین نوٹیفکیشن آئے ہیں،لیکن اردوکے لیے فرصت نہیں ہے اورمترجم ومعاون مترجم کی آسامی پربحالی کے حوالے سے پراسرارخاموشی ہے۔ہاں جے ای ای،نیٹ کے ایکزام اورالیکشن کے لیے کورونا نہیں ہے ،بہارسرکاراس کے لیے تیارہے لیکن اردو مترجم کے امتحان کرانے میں کورونا ہے؟جدیوکے جومسلم لیڈران کل ویکنسی آنے پراچھل کودکررہے تھے،اورنتیش کوسیکولرزم کاسورمابتارہے تھے ،آ ج وہ خاموش ہیں۔سوشل میڈیاپرمسلمانوں کی طرف سے سخت ناراضگی کا اظہار کیا جا رہا ہے۔لوگوں کاکہناہے کہ مطلب صاف ہے نتیش حکومت کرناکچھ نہیں چاہتی ہے بس الیکشن کے لیے لالی پاپ دے رہی ہے۔ویسے بھی اسکول میں اردو کے حوالے سے سرکاری نوٹیفیکیشن سے نتیش سرکار کی اردو بلکہ مسلم دشمنی پرمسلسل سوال اٹھ رہے ہیں۔

(محمد صدیق المنشاوی کے 100 ویں یوم پیدائش پر خصوصی مضمون)

20 جنوری کا دن مجھ جیسوں کے لئے بہت اہم ہے۔مگراس سال 20 جنوری کی اہمیت اس لئے بڑھ جاتی ہے کہ تلاوتِ قرآن کی دنیامیں عالم اسلام کے مشہور قاری محمد صدیق المنشاوی کی پیدائش کو آج 100سال پورے ہوگئے ہیں۔
تلاوت قرآن کے ایک باذوق سامع کی حیثیت سے صدیق المنشاوی پر لکھنا میرے اوپر فرض تھا۔ایک عرصہ سے برادر خورد حافظ محفوظ محمد بھی اصرار کرتے آرہے ہیں کہ میں منشاوی مرحوم پر لکھوں۔پچھلے دنوں ان کی وفات کو 50سال پورے ہوئے تب بھی میں لکھ نہ سکا۔۔۔اب جب لکھ رہا ہوں تو ملک کے احوال اچھے نہیں ہیں اور ہر ذی شعور انسان اور خاص طورپر حساس قلم کار اس وقت ذہنی الجھنوں کے شکار ہیں۔۔۔ایسے میں صدیق منشاوی پر وہ تو شاید نہ لکھا جاسکے جس کی ان کی ذات مستحق ہے لیکن جو بھی لکھا جاسکے شاید اسی کی برکت سے موجودہ احوال میں جلد بہتری کی کوئی صورت نکل آئے۔
تجوید،مخارج اور صحت لفظی کی رعایت اور خوش الحانی کے ساتھ قرآن پاک کی تلاوت کی معلوم ابتدا افریقی عرب ملک مصر سے ہی ہوئی۔مصر نے بڑے بڑے نامور قراء پیدا کئے۔ان میں مصطفی اسماعیل اور قاری عبدالباسط کے نام صف اول میں سب سے نمایاں مقام پر ہیں۔کہتے ہیں کہ قرائت قرآن کی موجودہ روش کے موجد مصطفی اسماعیل تھے۔وہ 17جون 1905کو پیدا ہوئے تھے۔جب وہ تلاوت کرتے تھے تو ان کے اردگرد جمع ہونے والے لوگ حیرت میں ڈوب جاتے تھے۔کیونکہ قرآن پاک کو اس طرح’ طرز اور غنائیت کے ساتھ پہلی بار وہ کسی کو پڑھتے ہوئے سن رہے تھے۔
اس فن کو مصطفی اسماعیل کے بعدشیخ محمد صدیق المنشاوی نے کمال کو پہنچا دیا۔گوکہ ان کے والد صدیق المنشاوی بھی اپنے وقت کے معروف قراء میں سے تھے لیکن جو شہرت وعظمت محمد صدیق المنشاوی کے حصہ میں آئی وہ قابل رشک تھی۔مصطفی اسماعیل کی طرز اب رائج نہیں ہے۔لیکن ان کی طرز منفرد تھی۔محمد صدیق المنشاوی نے جب قرائت قرآن شروع کی تو وہ لوگوں کے دلوں میں گھر کرتے چلے گئے۔واقعہ یہ ہے کہ بیسویں صدی میں منشاوی صاحب کا نام عالم اسلام کے باہر بھی گھر گھر میں زبان زد عام ہوگیا۔انہوں نے اپنے استاذ شیخ ابراہیم السعودی سے فن تجوید اور قرآئت کے اصول وضوابط سیکھے۔وہ سبعہ عشرہ کے ماہرین میں تھے۔سبعہ عشرہ در اصل عربی میں 17کے عدد کو کہتے ہیں۔لیکن فن تجوید وقرائت میں سبعہ عشرہ اس فن قرائت کا نام ہے جس میں آیات کے بعض حصوں کو اور خاص طورپراسماء اور صیغوں کو مختلف انداز میں پڑھاجاتا ہے۔لیکن اس سے معانی میں کوئی فرق واقع نہیں ہوتا۔
دراصل عربی زبان دنیا کی تمام زبانوں میں سب سے فصیح‘سب سے بلیغ اور سب سے وسیع زبان ہے۔یہ مسلم ملکوں میں زیادہ تر ممالک کی زبان ہے۔لیکن ہر ملک میں اس کا لہجہ اور انداز مختلف ہے۔مثال کے طورپر کہا جاتا ہے کہ سب سے فصیح عربی زبان ملک شام میں بولی جاتی ہے۔اسی طرح مختلف ملکوں کے اپنے لہجے بھی ہیں۔مثال کے طورپرافریقی عرب ممالک کا لہجہ قدرے ٹھیٹھ ہے۔لیکن خلیجی عرب ممالک کا لہجہ کچھ مہذب اور اشراف کا سا ہے۔۔۔ مصر میں عربی زبان کوئی بہت زیادہ فصیح نہیں ہے اور عام بول چال میں مصری لوگ جیم (ج) کی جگہ گاف (گ) کی آواز نکالتے ہیں۔عام شہری ہی نہیں پڑھے لکھے لوگ بھی عام گفتگو میں جیم کو گاف ہی ادا کرتے ہیں۔لیکن قرآن پاک کی تلاوت اور قرآئت کرتے ہوئے جیم کو جیم ہی پڑھتے ہیں۔ظاہر ہے کہ یہ قرآن کا ہی اعجاز ہے۔
ہم نے جس گھرانہ میں آنکھ کھولی وہاں کوئی گانا‘غزل نہیں سناجاتا تھا۔وہاں صرف قرائت قرآن پاک ہی سننے کو ملتی تھی۔شیخ مصطفی اسماعیل‘محمد صدیق المنشاوی اور قاری عبدالباسط کی تلاوت کی کیسٹیں الماری میں بھری پڑی تھیں۔فجر کے بعد تو بلا ناغہ ہر روز کا معمول تھا۔گھر کے سب لوگ بیٹھ کر منشاوی اور عبدالباسط صاحبان کو سنتے تھے۔اس سے بھی پہلے بڑا سا ریڈیو ہوتا تھا‘اس پر صبح کو مختلف قراء کی تلاوت آیا کرتی تھی۔ایران‘پاکستان‘بنگلہ دیش‘یہاں تک کہ مصر کے ریڈیو سے مختلف قراء کی تلاوت نشر کی جاتی تھی۔ریڈیو مکہ سے تو بہت بعد میں تلاوت شروع ہوئی۔بہر حال والد محترم تجوید کے ساتھ قرآن پاک کی تلاوت کی اہمیت بتایا کرتے تھے۔اس لئے بچپن سے ہی یہ مزاج بن گیا تھا کہ اگر کوئی خلاف تجوید پڑھتا تھا تو بہت کوفت ہوتی تھی۔
ہر زبان کی اپنی حساسیت ہوتی ہے۔ عربی زبان سب سے زیادہ حساس زبان ہے۔وہ جتنی فصیح وبلیغ ہے اتنی ہی نزاکت سے مرصع بھی ہے۔ عربی میں تلفظ کا مسئلہ سب سے اہم ہے۔الف اور ع’ ہ ح اور ک اور ق کے فرق سے ترجمہ میں زمین وآسمان کا فرق پیدا ہوجاتا ہے۔ الحمد کا مطلب اگر تمام تعریف ہے تو الہمد کا مطلب لاش (نعش) ہے۔ آلمین اور عالمین کا ترجمہ بھی بہت مختلف ہے۔
جن لوگوں نے قرآن کو تجوید کے ساتھ نہیں پڑھا انہیں اس نزاکت اور حساسیت کا اندازہ تک نہیں ہو پاتا۔۔۔ لیکن جو لوگ تجوید سے واقف ہوتے ہیں انہیں مجہول قرائت سب سے زیادہ کھلتی اور اکھرتی ہے۔ ایسا لگتا ہے کہ کوئی سر پر لٹھ مار رہا ہے اور دل پر چھری چلا رہا ہے۔
بہر حال قرآن پاک کو پڑھنے کے تین مختلف طریقے ہیں۔تجوید‘ترتیل اور حدر۔ترتیل وہ ہے جو عام طورپر قراء حضرات خوش الحانی اور تکلف کے ساتھ قرائت کرتے ہیں۔حدر بہت جلدی جلدی پڑھنے کو کہتے ہیں۔حالانکہ تجوید تو مستقل ایک فن کا نام ہے۔لیکن مذکورہ دونوں طریقوں کے درمیان کے فن کا نام بھی تجوید ہے۔
امام جزری فرماتے ہیں:
والاخذ بالتجوید حتم لازم_من لم یجود القرآن آثم۔ یعنی فن تجوید کا سیکھنا لازم ہے۔جو قرآن کو تجوید کے ساتھ نہ پڑھے وہ گناہ گار ہے۔
شیخ محمد صدیق المنشاوی ان چند قرامیں سرفہرست ہیں جنہوں نے قرآن پاک کو ان تینوں اصناف میں پڑھا ہے۔ان کی تجوید‘ترتیل اور حدر کی تلاوت کی کیسٹیں پوری دنیا میں فروخت ہوتی تھیں۔اب تو نئے زمانے اور نئی تکنیک نے کیسٹوں کی ضرورت ختم کردی ہے۔۔اب تو یوٹیوب پر اتنا مواد موجود ہے کہ شاید ہی کسی اور پلیٹ فارم پر اتنا مواد یکجا ملے۔منشاوی صاحب نے دنیا کے بہت سے ممالک کا سفر کیا اور اپنی تلاوت سے لوگوں کو مسحور کردیا۔اللہ کا کلام تو ہے ہی ایسا کہ جو سمجھ کر پڑھیں اور سن کر سمجھ لیں ان کی دنیا روشن ہوجاتی ہے لیکن جو سمجھ نہ سکیں ان پر بھی تلاوت کا اثر ہوتا ہے۔
مصر کے دو تین قراایسے ہوئے ہیں کہ جن کومصرکے کئی نامی حکمران اپنے غیر ملکی اسفار میں ساتھ لے گئے اور مہمان ملک کے حکمرانوں کے سامنے ان سے تلاوت کرائی۔ان قراء میں منشاوی صاحب کا بھی نام ہے۔انہوں نے مسجد اقصی اور حرمین شریفین میں بھی اپنی قرائت سے فرزندان توحید کو محظوظ کیا۔منشاوی صاحب کی ایک ممتاز صفت یہ تھی کہ انہوں نے قرآ ن پاک کو تجوید وقرائت سے پڑھنے کے سلسلہ میں بچوں پر بھی محنت کی۔لہذا آج بھی یوٹیوب پر ان کی ایسی آڈیوز موجود ہیں جن میں وہ بچوں کو تجوید وقرائت سے پڑھا رہے ہیں۔بعض بچوں نے تو ان کی تلاوت کی ہوبہو نقل کی اور ان کو سننے والے یہ سمجھنے لگے کہ شایدیہ آواز منشاوی صاحب کے بچپن کی آواز ہے۔
منشاوی صاحب کو مصر میں فن قرائت پر اتھارٹی مانا جاتا تھا اور اس سلسلہ میں ان کی آراء کو حرف آخر تسلیم کیا جاتا تھا۔انہوں نے فن قرائت‘ قرآنی علوم اور قرآن کے مختلف پہلوؤں پر بہت سی کتابیں بھی تحریر کیں۔ان کی تلاوت سن کر بہت سے عیسائیوں نے اسلام قبول کیا۔یہ سلسلہ آج بھی جاری ہے۔امریکہ کی مشہور گلوکارہ جینفر گراؤٹ نے مراقش کی ایک فلم میں کام کیا تو وہ مراقشی عوام کے جذبہ خیر سگالی اور سخاوت وفیاضی سے بہت متاثر ہوئی۔
جینفر نے 2013 میں اسلام قبول کرلیا۔گوکہ یہ خبر 2014 میں ہی منظر عام پر آسکی۔لیکن جینفر پر قاری محمد صدیق المنشاوی کی تلاوت نے بہت زیادہ اثر کیا۔اس کا نتیجہ یہ ہے کہ آج جینفربھی ہوبہو منشاوی صاحب کی طرز میں تلاوت کرتی ہے۔اس کی ایک ویڈیو آج کل بہت گردش کر رہی ہے جس میں اس نے سورہ بقرہ کی آخری آیات—لایکلف اللہ نفسا الا وسعہا سے کافرین تک منشاوی صاحب کی ہی طرز میں قرائت کی ہے۔۔28دسمبر 2019 کو جینفر نے ایک جرنل کو انٹرویو دیتے ہوئے کہا تھا کہ قاری محمد صدیق المنشاوی میرے لئے دنیا کے سب سے ممتاز قاری ہیں۔
آج پوری دنیا میں شیخ منشاوی کی نقل کی جاتی ہے۔وہ محض خوش الحانی کے ساتھ قرائت ہی نہیں کرتے تھے بلکہ آیات کے مدوجزراور واقعات کے نشیب وفراز کو اپنے انداز میں بھی سموتے تھے۔جن آیات میں قیامت کا ذکر ہے منشاوی صاحب نے ان آیات کو مغموم انداز میں پڑھ کر ایمان کی حرارت تلاش کرنے والے سامعین کو ایک مستقل سامان فراہم کردیا ہے۔سورہ قاف (ق) کی وہ آیات جن میں قیامت کے دن کا ذکر ہے اور جس میں اللہ کے حضور بندوں اورشیطان کا مکالمہ ہوگا‘منشاوی صاحب نے اس انداز سے پڑھ دی ہیں کہ جو لوگ ترجمہ سمجھتے ہوں وہ روئے بغیر نہیں رہ سکتے۔شیطان کہے گا کہ اے اللہ میں نے اس کو(بندے کو) گمراہ نہیں کیااور وہ تو خود ہی گمراہ ہوگیا تھا۔ اللہ تعالی فرمائیں گے کہ میرے سامنے جھگڑو مت‘ میں نے تمہیں پہلے ہی انتباہ دیدیا تھا اور میری بات بدلتی نہیں۔۔۔اور نہ ہی میں اپنے بندوں پر ظلم کرتا ہوں۔
شیخ منشاوی کا انتقال محض 49 سال کی عمر میں ہوگیا تھا لیکن اتنی عمر میں ہی انہوں نے وہ تمام مقامات پڑھ دئے جو آج رائج ہیں ۔ آج بھی انہی کے حوالے دئے جاتے ہیں ۔
شیخ عبدالعزیز بن باز نے شیخ منشاوی کے تعلق سے کہا تھا کہ : اگر آپ قرآن کو اس طرح سننا چاہیں جس طرح وہ نازل ہوا تھا تو پوری توجہ کے ساتھ شیخ منشاوی کو سنیں۔ یہ ایک ایسی آواز ہے کہ جس سے آپ کبھی اکتائیں گے نہیں’ یہ آواز بالکل ایسی ہے جیسے صاف شفاف پانی کا بہتا ہوا چشمہ جو پیاسوں کی پیاس بجھا رہا ہے۔

اسد رضا

ناقدانہ ادب کی عزت ، سیاہ و سفید زلفوں سے آراستہ سر، دمکتی ہوئی پیشانی، تنقیدی بصارت کی نشانی، محققانہ ادب کی توقیر میں اضافہ کرنے والی ناک، اردو کے شعر وادب کی طرح بھرے بھرے رخسار، جن پر شرعی ریش اور غیر شرعی مونچھوں کی بہار، جمالیات کی بارش کرنے والے بلند ادبی قدلیکن جسمانی طور پر بوٹا سا قد اور فطری شرافت وذہانت کاحامل کوئی دانشور اگر کسی سمینار یا ادبی جلسے میں ناقدانہ انفرادیت اور عبرانی آمیز اردو میں فصاحت کی فرات اور بلاغت کی دجلہ بہاتا ہوا نظر آئے تو تسلیم کرلیجئے کہ آپ اکیسویں صدی کے مفکر اردو، منفرد ناقد ومحقق صحافت وادب کے دلکش امتزاج اور ادیب ناطق حقانی القاسمی کی زیارت بابرکت سے مشرف بہ تنقید ہوگئے۔
جناب حقانی القاسمی نے 15جولائی1970کو بہار پربہار کے ضلع ارریا میں ایک علم پرور خاندان میں آنکھیں کھولیں اور دارالعلوم دیوبند میں دینی اور علی گڑھ مسلم یونیورسٹی میں دنیوی تعلیم حاصل کرکے بڑے دانشوران اردو کی آنکھیں کھول دیں اور ان کے ہوش اڑادیے۔ حقانی صاحب نے علی گڑھ مسلم یونیورسٹی سے عربی ادبیات میں ایم اے اورایم فل کیا اور عربی، فارسی، اردو، ہندی اور انگریزی زبانوں پر دسترس حاصل کی اور پیشے کے طور پر انہوںنے اپنے لئے اردو صحافت کو منتخب کیا لیکن ان کارجحان ادب اور تنقید کی جانب زیادہ ہے لہٰذا اردو راشٹریہ سہارا سے حقانی القاسمی نے صحافتی سفر شروع کیا پھر وہ ہفتے وار ’اخبار نو ‘اورویکلی ’’نئی دنیا ‘‘ سے وابستہ رہے۔ عالمی شہرت یافتہ میگزین ’’استعارہ‘‘ کو بام مقبولیت تک پہنچانے میں صلاح الدین پرویز کے ساتھ ساتھ حقانی صاحب کا بھی اہم رول تھا۔ اس میگزین کو حقانی القاسمی نے اپنی تنقیدی بصارت اور تحقیقی بصیرت سے آگے بڑھایا۔ استعارہ کے بند ہوجانے کے بعد حقانی صاحب نے ماہ نامہ ’’بزم سہارا‘‘ اور عالمی سہارا میں اپنے قلمی اور علمی جوہر دکھلائے اور نہایت اہم ادبی مباحث شروع کئے۔ اردو میں طنزومزاح کو گیا گزرا اور دوسرے تیسرے درجے کاادب تصور کرنے والے قد آور ناقدین کرام اور دانشوران عظام کے قائم کردہ نظریاتی بتوں کو توڑنے کے لیے ہی حقانی صاحب نے ماہ نامہ’’بزم سہارا‘‘ میں اس سوال پر بحث کرائی تھی کہ کیا طنزومزاح دوسرے درجے کا ادب ہے۔اس چھوٹے قد کے بڑے ناقد نے تنقید کو ایک نیا علمی وجمالیاتی رخ عطاکیا اورمغرب ومشرق کے من گھڑت اصولوں اور نظریات کی جم کر پول کھولی۔ چونکہ موصوف عربی، فارسی، اردو ، انگریزی اور ہندی کی ادبیات بالخصوص کلاسیکی ادبیات پر گہری نظر رکھتے ہیں۔ لہٰذا ان کی تنقید پر بڑے بڑے پروفیسر انگلی اٹھاتے ہوئے ڈرتے ہیں۔ مثال کے طور پر حقانی القاسمی اپنے ایک مضمون ’واقیموالوزن بالقسط‘ میں رقم طراز ہیں: تنقید، تجسس اور تفحص کا عمل ہے، تنقید تخلیق کا مکاشفہ بھی کرتی ہے اور محاسبہ بھی، تنقید دراصل ایک طرح سے تخلیق کی توسیع وتفریج ہے، تنقید کوئی سائنسی ، طبیعیاتی یا ریاضیاتی عمل نہیں ہے۔‘‘
حقانی القاسمی کی تنقیدی بصیرت اور نظریاتی بصارت کا پرتو ہمیں ان کی کتب میں نظر آتا ہے۔ فلسطین کے چار ممتاز شعرائ، طواف دشت جنوں، لاتخف، دارالعلوم دیوبند: ادبی شناخت نامہ، تکلف برطرف، رینو کے شہر میں، خوشبو روشنی اور رنگ، بدن کی جمالیات، تنقیدی اسمبلاژ، ادب کو لاژ، شکیل الرحمن کاجمالیاتی وجدان اور آنگلیات وغیرہ حقانی القاسمی کی قابل ذکر کتب ہیں جن کی اردو دنیامیں کافی پذیرائی ہوئی۔ اب صورت حال یہ ہے کہ ہماری اردو زبان کا ہر چھوٹا بڑا،اعلیٰ وادنیٰ اور اہم وغیراہم مصنف ،مولف اور مترجم اپنے اور اپنی کتاب کے بارے میں حقانی صاحب سے مضمون لکھوانا او را س طرح اپنی قدر ومنزلت میں اضافہ کرانا چاہتا ہے۔ اب یہ بات دیگرہے کہ اپنی نسبی نجابت اور ادبی شرافت کے باعث حقانی القاسمی کسی کو مایوس نہیں کرتے۔ لیکن یہاں یہ تذکرہ بھی برمحل ہوگا کہ اپنی شرافت اور انکساری کے باوصف وہ غیور ہیں اور کسی بڑے سے بڑے افسر یا دانشور کی غلط باتوں کو برداشت نہیں کرتے۔ اگرچہ انہوںنے ماہ نامہ ’’بزم سہارا‘‘ اور ویکلی ’’عالمی سہارا‘‘ کو شہرت ومقبولیت کی بلندیوں تک پہنچایا لیکن راشٹریہ سہارا اردو، ادارہ کے ایک گروپ ایڈیٹر نے جب حقانی صاحب کی اَنا کو ٹھیس پہنچائی تو انہوںنے اس بڑی کمپنی کی ملازمت سے کنارہ کشی اختیار کرلی۔ حالانکہ گروپ ایڈیٹر کو اپنی غلطیوں کا احساس ہوا اور انہوںنے ادارہ کے کئی سینئر صحافیوں سے سفارش کرائی کہ حقانی صاحب سہارا میں دوبارہ اپنی ذمہ داریاں سنبھال لیں لیکن ہمارے اس غیر ت مند ادبی صحافی نے دوبارہ سہارا میں قدم نہیں رکھا۔ یہاں یہ بھی عرض کردوں کہ حقانی صاحب معاشی لحاظ سے ثروت مند نہیں ہیں البتہ ان کے پاس علم وادب کے بیش بہا خزانے ہیں جنہیں وہ اکثر اپنی تحریروں اور تقریروں کے ذریعے لٹاتے رہے ہیں۔ وہ اگرچہ خود حالات کی وجہ سے اپنی پی ایچ ڈی کی ڈگری حاصل نہیں کرسکے لیکن کئی ریسرچ اسکالروں کی تھیسس لکھنے میںعلمی وتحقیقی مدد کرکے انہیں ڈاکٹر آف فلاسفی بنواچکے ہیں۔ آج کل وہ یک موضوعاتی مجلہ ’انداز بیان‘ کی ادارت کررہے ہیں۔
حقانی القاسمی کی زبان قدرے مشکل ہوتی ہے۔ اس لیے مرحوم مظہر امام نے ایک مرتبہ ان کی اردو تحریروں اور فکر کی ستائش کرتے ہوئے فرمایاتھا: ’’ارے بھئی حقانی میاں اردو میں کب لکھو گے؟‘‘۔ یہ صحیح ہے کہ تنقید وتحقیق کی زبان عموماً مشکل ہوتی ہے لیکن یہ بھی حقیقت ہے کہ حقانی صاحب چونکہ عربی زبان کے بھی ماہر ہیں؛ لہٰذا ہمیں ان کے معنی عام اردو لغات میں نہیں ملتے ۔ دراصل اردو لغات میں عربی ،فارسی اور ہندی کے الفاظ کے معنی ومفہوم تو آسانی سے نظر آجاتے ہیں عربی ،عبرانی اور یونانی کے الفاظ واصطلاحات کے معنی تلاش وجستجو کے بعد بھی دکھائی نہیں دیتے۔ اسی لیے اردو کے بڑے بڑے پروفیسر اور دانشور حقانی القاسمی کی زبان وبیان کی روانی ،فکر کی جولانی اور بین السطور کی کہانی کو پڑھ کر انگشت بہ دنداں رہ جاتے ہیں۔اس لیے ڈاکٹر ایم صلاح الدین نے حقانی کو ’طرحدار ناقد‘ قرار دیاہے۔
حقانی القاسمی ایک ماہر مترجم بھی ہیں۔ انہوںنے انگریزی اور ہندی زبانوں سے اردو میں تراجم بھی کئے ہیں۔ وہ کسی بھی کتاب کا ترجمہ اس کی روح اور مفہوم کی گہرائی تک اتر کر اور جسم الفاظ ومعنی کو چھوکر کرتے ہیں۔ اسی لیے ان کے تراجم کی عموماً ستائش کی جاتی ہے۔ جس کازندہ جاوید ثبوت یہ ہے کہ انہوںنے گجراتی کے معروف ناول نگار جوزف میکوان کے مقبول ناول ’’انگلیات‘‘ کا اردو میں اتنا شاندار اور جاندار ترجمہ کیاتھا کہ اس پر حقانی القاسمی کو 2016میں پروقار ادارہ ساہتیہ اکادمی نے ایوارڈ برائے ترجمہ سے سرفراز کیاتھا۔ اگرچہ اردو دنیا اور ادبی حلقوں نے حقانی صاحب کی اتنی قدر نہیں کی جس کے وہ مستحق ہیں لیکن ایسا بھی نہیں کہ انہیں بالکل نظر انداز کردیا گیا ہو لہٰذا دہلی اردو اکادمی نے انہیں تخلیقی نثر کا ایوارڈ دیاتو اترپردیش اردو اکادمی اور مدھیہ پردیش اردو اکادمی نے بھی حقانی القاسمی کو ایوارڈ دے کر اپنی معتبریت اور توقیر میں اضافہ کیا۔ لیکن یہاں یہ تذکرہ بھی مناسب معلوم ہوتا ہے کہ حقانی صاحب اگرچہ متعدد اہم کتب کے مصنف ہیں لیکن وہ اپنی کتب مختلف اردو اکادمیوں کو برائے انعام نہیں بھجواتے۔ اس سلسلہ میں انہیں میں نے کئی بار سمجھایا بھی اور پیار سے ڈانٹا بھی لیکن اس بے لوث ادیب پر کوئی اثر نہیں پڑا۔ دریں اثنا حقانی القاسمی کے حساس د ل پر ایک بہت بڑا غم کا پہاڑ ٹوٹ گیا۔ ان کی ہونہار، قابل اور پیاری منجھلی بیٹی انیقہ اپنے اسکول میں ایک حادثہ میں گرکر فوت ہوگئیں۔ تاہم اس صابر وشاکر ادیب نے اس صدمۂ عظیم کو برداشت کیا اور وہ پھر اپنی علمی تنقیدی اور صحافتی سرگرمیوں میں مصروف ہوگئے لیکن اب بھی کبھی کبھی اپنی اس چہیتی بیٹی کو یادکرکے ان کی آنکھیں نم ہوجاتی ہیں۔
تخلیقی نقاد حقانی القاسمی کی شہرت بین الاقوامی ہے۔ لہٰذا بڑی بڑی دانش گاہوں، ادبی اداروں اور اردو اکادمیوں میں انہیں سمیناروں، اردو میلوں اور جلسوں میں مقالات پیش کرنے اور ادبی موضوعات پر تقریریں کرنے کے لیے مدعو کیا جاتا ہے۔ چونکہ حقانی صاحب قومی کونسل برائے فروغ اردو زبان کے ادارتی شعبے سے وابستہ ہیں۔ بطور ایڈیٹوریل صلاح کار ذمے داری پوری کررہے ہیں لہٰذا وہ ہر دعوت کو مشکل ہی سے قبول کرپاتے ہیں۔ بہرحال اپنے اس شعر کے ساتھ میں حقانی القاسمی کایہ خاکہ تمام کرتا ہوں کہ:
یوں ہی چلتا رہے یارب قلم اس کا صدیوں
رنگ تنقید کو تخلیق دیا ہے جس نے

Asad Raza
97- F, Sector-7
Jasola Vihar
New Delhi – 110025
Mob.: 9873687378