Tag:

قندیل نیوز

ہائی کورٹ کا حکم: ڈی یو ای میل اور پورٹل دونوں سے کرائے آخری سال کے آن لائن ایگزام

by قندیل 8 اگست, 2020

نئی دہلی:دہلی یونیورسٹی کے 2 لاکھ 70 ہزار فائنل ایئر کے طلباء ان آن لائن امتحانات کے منتظر ہیں۔ امتحانات 10 جولائی کو ہونے تھے، لیکن دہلی یونیورسٹی نے پورٹل میں کچھ تکنیکی خرابیوں اور دہلی ہائی کورٹ میں کچھ طلباء کی درخواست کے بعد امتحانات ملتوی کردیا تھا۔آج دہلی ہائی کورٹ نے فیصلہ دیا کہ سوالنا مہ طلبا کو پورٹل اور ای میل دونوں کے ذریعہ بھیجے جائیں، طلبا کو جوابی شیٹ اپ لوڈ کرنے کے لئے 1 گھنٹہ دیا جائے گا۔اگر طلباء کو آن لائن امتحان میں کوئی پریشانی ہوتی ہے تو وہ یونیورسٹی کو ای میل کے ذریعے آگاہ کرسکتے ہیں، اگر طلباء کا مسئلہ 48 گھنٹوں میں ختم نہیں ہوتا ہے توپھر گریونس کمیٹی طلبہ کے مسائل کو حل کرے ۔ گریونس کمیٹی کی صدرات دہلی ہائی کورٹ کے ریٹائرڈ جج جسٹس پرتبھا رانی کریں گی۔اس کے علاوہ کامن سروس سنٹر انٹرنیٹ کی سہولیات اور اس کی تیاری کو برقرار رکھے گا۔ دہلی ہائی کورٹ میں اوپن بک ایگزام کو ہی طلباء کی طرف سے چیلنج کیا گیا تھا، لیکن ہائی کورٹ نے کہا کہ آن لائن امتحان سے متعلق معاملہ سپریم کورٹ میں زیر التوا ہے، ایسی صورت میں دہلی یونیورسٹی کو آن لائن امتحان کرانا چاہیے یا نہیں، یہ فیصلہ سپریم کورٹ ہی کرے گا۔ عدالت نے کہا کہ 10 اگست سے شروع ہونے والے اوپن بک ایگزام کے بارے میں کس طرح کی تیاری کی جانی چاہئے اور طلبہ کو کونسی سہولت فراہم کی جانی چاہئے، ہم حکم جاری کررہے ہیں تاکہ طلباء کو پریشانی نہ ہو۔ 10 اگست سے شروع ہونے والے اوپن بک ایگزام کے لئے طلباء کو امتحان کے لئے مجموعی طور پر 4 گھنٹے دیئے گئے ہیں، جس میں سے جوابی شیٹ اپ لوڈ کرنے کے لئے 1 گھنٹہ دیا جارہا ہے۔

8 اگست, 2020 0 comment

قومی خبریں

گلزار دہلوی دہلی کی مشترکہ تہذیب کے بہترین نمائندے تھے: پروفیسر شہزاد انجم

by قندیل 13 جون, 2020

written by قندیل

شعبۂ اردو ،جامعہ ملیہ اسلامیہ کے زیر اہتمام گلزار دھلوی کے سانحۂ ارتحال پر آن لائن تعزیتی جلسے کا انعقاد

نئی دہلی: صدر شعبۂ اردو، جامعہ ملیہ اسلامیہ نئی دہلی پروفیسر شہزاد انجم نے گلزار دہلوی کی رحلت پر شعبے کی جانب سے منعقدہ گوگل میٹ آن لائن تعزیتی جلسے کے صدارتی کلمات میں گہرے رنج و ملال کا اظہار کرتے ہوئے کہا کہ وہ دہلوی تہذیب کی آخری نشانی تھے.انھوں نے مرتے دم تک اردو زبان و ادب ،کلاسیکی روایات، دہلوی کلچر، گنگا جمنی تہذیب، سیکولر اقدار اور حب الوطنی کی آبیاری کی ـ

پروفیسر شہپر رسول نے کہا کہ گلزار دہلوی اپنے طرز کے واحد آدمی تھے. ان کی وضع، زبان و اسلوب، لب ولہجہ، طرزِ زندگی، تشبیہات و استعارات سب انھیں کے ساتھ مخصوص تھا. انھوں نے اردو کاز کے لیے مسلسل جدوجہد کی. وہ خالص اردو کلچر کے سب سے ممتاز علم بردار اور صاحب طرز خطیب تھےـ

پروفیسر احمد محفوظ نے انھیں ہند ایرانی طرزِ حیات کا عملی نمائندہ قرار دیتےہوئے کہا کہ ان کی طبیعت میں کلاسیکی جمالیات رچی بسی تھی. ان کی شاعری سے قطع نظر ان کی شخصیت بھی بے مثال تھی.ایک پنڈت کی زبان سےبات بات پر قرآن وحدیث کے حوالے سن کر لوگ حیران ہوجاتے تھےـ

پروفیسر کوثر مظہری نے گلزار دہلوی کو خراج عقیدت پیش کرتے ہوئے کہا کہ وہ فرقہ پرستی، مذہبی تعصب اور گروہی منافرت کے سخت مخالف تھے.ان کی رحلت سے ایک تہذیب اور اسلوبِ زیست کا خاتمہ ہوگیاـ

پروفیسر عبدالرشید نے گلزار دہلوی کو دبستانِ دلی کا آخری آدمی قرار دیتے ہوئے کہا کہ اس عہد میں ان کے منہ سے نکلے الفاظ اور محاوروں کو سند کا درجہ حاصل تھاـ

ڈاکٹر عمران احمد عندلیب نے ان کی زندہ دلی، بذلہ سنجی اور محفلی خوش طبعیوں کو یاد کرتے ہوئے ان کے انتقال کو ایک عہد کی موت سے تعبیر کیاـ

تعزیتی جلسے میں شعبے کی جانب سے قرار داد پیش کرتے ہوئے ڈاکٹر خالد مبشر نے کہا کہ گلزار دہلوی کی شخصیت نفیس و نستعلیق اور اعلیٰ کلاسیکی تہذیبی اقدار کے سانچے میں ڈھلی تھی ـ

اس موقع پر ڈاکٹر محمد مقیم، ڈاکٹر محمد سمیع اور ڈاکٹر محمد آدم نے گلزار دہلوی کے اخلاق، رویے، آداب گفتگو اور ان کی بیش بہا اردو خدمات کو یاد کیاـ

آن لائن نشست میں شعبے کے اساتذہ میں پروفیسر ندیم احمد، ڈاکٹر مشیر احمد، ڈاکٹر جاوید حسن، ڈاکٹر ثاقب عمران اور ڈاکٹر ساجد ذکی فہمی نے بھی شرکت کی ـ

13 جون, 2020 0 comment

تجزیہ

کورونا:لاک ڈاؤن اور اقتصادی بحران

by قندیل 14 مئی, 2020

written by قندیل

ڈاکٹر مشتاق احمد
پرنسپل، سی ایم کالج، دربھنگہ
موبائل:9431414586
ای میل: [email protected]

کورونا وائر س نے پورے انسانی معاشرے کی زندگی کو مفلوج ومعطل کردیا ہے۔ دنیا کا کوئی ایسا ملک نہیں جو اس مہلک وبا کے خوف وہراس کی زد میں نہ ہو۔ کہیں زیادہ اور کہیں کم، لیکن خطہئ ارض کا کوئی ایسا حصہ نہیں جہاں کورونا نے دستک نہ دی ہو۔ یہی وجہ ہے کہ ڈبلو ایچ او نے جنوری کے آغاز میں ہی پوری دنیا کو متنبہ کیا تھا کہ دنیا ایک بھیانک وائرس سے مقابلہ کرنے کے لئے تیار رہے۔ لیکن اس وقت چند ملکوں کو چھوڑ کر بیشتر ممالک نے اس اشارے کو سنجیدگی سے نہیں لیا۔ نتیجہ یہ ہوا کہ چین کے شہر اوہان سے جواس مہلک وبا نے فضاؤں میں تیرنا شروع کیا اس نے دیکھتے ہی دیکھتے پوری دنیا کو اپنے دائرے میں لے لیا۔ترقی یافتہ ملکوں کو یہ وہم وگمان تھا کہ وہ سائنس اور ٹکنالوجی کی بدولت کسی بھی آفتِ ناگہانی کا مقابلہ کر سکتے ہیں لیکن اس کورونا نے یہ ثابت کردیا کہ انسان خوش فہمی میں مبتلا نہ رہے کہ قدرت کے آگے کسی کی ایک نہیں چلتی۔آج پوری دنیا میں اس وائرس پر قابو پانے کے لئے ہر ممکن کوشش ہو رہی ہے اور اب تک یہ بیماری لا علاج ثابت ہوئی ہے۔ بس انسانی احتیاط ہی اس سے نجات کا ایک ذریعہ ثابت ہوا ہے۔ یہی وجہ ہے کہ جہاں کہیں بھی کورونا کے اثرات ہیں وہاں انسانی نقل وحمل پر پابندی لگا دی گئی ہے اور اس کے ذریعہ ہی انسانی جانوں کو بچانے کی کوششیں جاری ہیں۔امریکہ جیسا ترقی یافتہ ملک اس کورونا سے سب سے زیادہ متاثر ہے اور اس کے بعد اٹلی، اسپین، فرانس اور جرمنی جہاں طبی سہولیات ہیں وہاں بھی اس کورونا نے کہرام مچا رکھا ہے۔
جہاں تک اپنے ملک ہندوستان کا سوال ہے تو عالمی تناظر میں یہاں کورونا نے وہ ستم نہیں ڈھایا ہے جو اس نے مغربی ممالک میں برپا کیا ہے۔لیکن آہستہ آہستہ اپنے وطن عزیز میں بھی کورونا متاثرین کی تعداد بڑھتی جا رہی ہے اور اموات بھی ہو رہی ہیں۔ اور اگر کورونا پر قدرے قابو پایا گیا ہے تو اس کی وجہ صرف اور صرف سماجی دوری ہے کہ عوام الناس نے ا س مہلک بیماری کو سنجیدگی سے لیا اور اپنے آپ کو گھروں میں مقید کرکے دوسروں کو اس بیماری کا شکار نہیں ہونے دیا۔ جتنے بھی افراد کورونا سے متاثر ہوئے انہیں فوری علاج کے لئے کورنٹائن کیا گیا اور جس کا نتیجہ خاطر خواہ بہتر رہاہے۔ البتہ ہمارے پاس اس کورونا کے وائرس کی پہچان کے لئے جو طبی کِٹ کی ضرورت تھی وہ کمیاب تھی اور اب بھی ہے اس کی وجہ سے جانچ میں کمی واقع ضرور ہوئی ہے اور طبی عملوں کو بھی جو حفاظتی آلات مہیا ہونے چاہئے وہ بھی کم دستیاب ہو سکے۔ چین سے بر آمد کِٹ کا ناکارہ ہونا بھی ہمارے لئے نقصان دہ رہا لیکن اس کے باوجود ہندوستان میں کورونا کے پھیلاؤکو روکنے میں بڑی کامیابی ملی ہے۔ لیکن اس پر قابو کے لئے جو اچانک لاک ڈاؤن یعنی خود ساختہ بندی کا اعلان کیا گیا اور اس میں توسیع در توسیع ہوتی چلی گئی اس کی وجہ سے ملک میں طرح طرح کے مسائل پیدا ہوگئے ہیں۔ اول تو پورے ملک میں افراتفری کا ماحول پیدا ہوگیا ہے کہ کروڑوں کی تعداد میں یومیہ مزدور فاقہ کشی کے شکار ہوگئے ہیں۔ وہ اپنے گھروں کو آنا چاہتے ہیں کہ بڑے شہروں میں چھوٹے بڑے تمام صنعتی کل کارخانے بند ہوگئے ہیں اور نجی کمپنیاں بھی بند ہوگئی ہیں۔ انفرادی طورپر جو مزدور یومیہ کاروبار کے ذریعہ اپنی زندگی بسر کر رہے تھے ان کے لئے بھی ایک بڑا مسئلہ پیدا ہوگیا ہے۔ گذشتہ ڈیڑھ ماہ سے وہ بیکار بیٹھے ہیں۔ ایک طرف زندگی بچانے کا خوف ہے تو دوسری طرف اشیائے خوردنی کی قلّت اور بھوک نے انہیں پریشان کر رکھا ہے۔ نتیجہ ہے کہ وہ ملک کے مختلف بڑے شہروں سے اپنے گاؤں کی طرف کوچ کر چکے ہیں۔ ہزاروں میل کی مسافت پیدل طے کرکے مہینوں سے لوگ چل رہے ہیں۔ تین سو سے زائد افراد کی راستوں میں موت ہو چکی ہے۔ ان مزدوروں پر کیا گذر رہی ہے اس سے ہم سب واقف ہیں اور اب حکومت نے بھی ان کی پریشانیوں کو سمجھا ہے اور ان مزدوروں کو اپنی ریاستوں اور اپنے گھروں تک جانے کی سہولت فراہم کی ہے۔ اب ٹرین اور بسوں کے ذریعہ ان مزدوروں کو ان کے گھروں تک پہنچانے کا کام کیا جا رہا ہے۔یہ تاخیر سے اٹھایا گیا ایک بہتر قدم ہے۔لیکن اس فیصلے کے بعد ایک بڑا خطرہ یہ ضرور پیدا ہوگیا ہے کہ اب وہ جب اپنے گاؤں کو آئیں گے تو اگر ان میں کوئی کورونا سے متاثر ہے اور ان کے پہنچنے سے قبل ان کی جانچ نہیں ہوئی یا کورنٹائن نہیں کیا گیا تو دیہی علاقے میں بھی کورونا کے وائرس کے پھیلنے کا اندیشہ ہے اور خدا نخواستہ ایسا ہوا تو وہ بہت ہی جان لیوا ہوگا۔ اس پر بھی مختلف ریاستوں کی حکومتوں کو کڑی نگاہ رکھنی ہوگی اورسماج کے لوگوں کو بھی بیدار رہنا ہوگا کہ کورونا متاثرین مزدوروں کے ساتھ کسی طرح کا نازیبا سلوک نہ کیا جائے بلکہ انہیں طبی سہولت فراہم کرائی جائے اور ان کی حوصلہ افزائی کی جائے کہ وہ مہینوں سے اذیت ناک زندگی جی کر اپنے گھروں کو واپس آئے ہیں۔
اب جب کہ حکومت نے ان علاقوں میں جہاں کورونا کا زور کم ہوا ہے وہاں حسب معمول زندگی بحال کرنے کی چھوٹ دی ہے لیکن سچائی یہ ہے کہ اب بھی خوف کا ماحول ہے۔ بالخصوص مزدور طبقوں کے اندر بس ایک ہی رٹ ہے کہ وہ اپنے گاؤں کو جائیں گے اور وہ روانہ بھی ہو چکے ہیں۔ ایسی صورت میں اگر کہیں چھوٹے بڑے کل کارخانے شروع بھی کئے جاتے ہیں تو انہیں مزدور نہیں مل پائیں گے اور پھر چوں کہ اس وقت پوری دنیا کا بازار معطل ہے اس لئے کوئی بڑا تاجر یہ خطرہ مول لینے کو بھی تیار نہیں ہے کہ وہ فوراً کاروبار شروع کرے۔اس لئے ملک کی معاشیات پر اس لاک ڈاؤن کے بہت ہی مضر اثرات ہوں گے۔کیوں کہ کسی بھی ملک کے جی ڈی پی کا انحصار ملک کے اندر ہونے والے منجملہ ترقیاتی کاموں اور تجارتی سرگرمیوں پر ہوتا ہے۔ اب جب کہ تقریباً دوماہ سے تمام تر بازار اور کل کارخانے بند ہیں۔ زراعت کے شعبے میں بھی بندی کے اثرات نمایاں ہیں کہ کسانوں کا مال بازار تک نہیں پہنچ پا رہا ہے۔ یہ وقت فصل ربیع کا ہے خاص کر گیہوں کی فصل تیار ہو چکی ہے لیکن مزدوروں کی کمی کی وجہ سے کھیتوں میں گیہوں برباد ہورہے ہیں اور جہاں کہیں بھی گیہوں تیار ہو رہا ہے اسے بازار تک لے جانا مشکل ہے۔ اسی طرح پھل سبزیوں کا بھی حال ہے کہ وہ کھیتوں میں نقصان ہو رہے ہیں۔ ہم سب جانتے ہیں کہ پیشہئ زراعت سے کروڑوں مزدوروں کو یومیہ مزدوری حاصل ہوتی ہے۔ دارجلنگ اور آسام کے چائے کے باغات میں تقریباً دس لاکھ مزدور کام کرتے ہیں وہ سب بھوک مری کے شکار ہو گئے ہیں اور چائے کی فصل کو جونقصان ہوا ہے اس سے ملک کی اقتصادیات کو بڑا خسارہ ہوگا۔ غرض کہ اس لاک ڈاؤن کی وجہ سے عالمی سطح کے بازار بند ہورہے ہیں اس سے بھی ملکی صنعت کاروں کی تجارت متاثر ہوگی اور ملکی بازاروں میں کام بند ہونے کی وجہ سے بھی چھوٹے بڑے صنعت کاروں کو خسارہ عظیم کا سامنا کرنا پڑے گا۔ایک سب سے بڑا مسئلہ اب دیہی علاقے میں پیدا ہونے والا ہے کہ مختلف شہروں سے کروڑوں کی تعداد میں مزدور اپنے اپنے گاؤں کو لوٹ رہے ہیں اور اگر گاؤں میں انہیں کام نہیں ملے گا تو پھر ان کی زندگی پریشان کن بن جائے گی اور یہ پریشانی سماج میں کئی طرح کی سماجی برائیوں کو جنم دے گی۔ جرائم کے واقعات میں اضافہ ہوگا، گھریلو تصادم بڑھیں گے اور اس سے نظم وضبط کا بھی مسئلہ کھڑا ہوگا۔ بالخصوص بہار جیسی ریاست جہاں کوئی بڑا صنعتی ادارہ نہیں ہے اور یہاں دس لاکھ سے زیادہ مزدوروں کی واپسی ہوئی ہے اگر اسے کام نہیں ملا تو کئی طرح کے مسائل پیدا ہو سکتے ہے۔ اگرچہ حکومت یہ دعویٰ کر رہی ہے کہ ان مزدوروں کو منریگا اوردیگر اسکیموں کے ذریعہ امداد دی جائے گی۔ لیکن سچائی یہ ہے کہ سرکاری سطح پر کوئی بھی مسئلہ اتنا جلد حل نہیں ہو پاتا جتنا کہ بلندبانگ دعویٰ کیا جاتا ہے۔
مختصر یہ کہ اب یہ امید تو بندھ رہی ہے کہ کورونا کا زور کم ہوگا اور چھوٹے بڑے شہروں میں آہستہ آہستہ کل کارخانے کھولے جائیں گے۔ بازار بھی حسبِ معمول کھلیں گے لیکن سب سے بڑا مسئلہ یہ ہوگا کہ اب اگر ایک طرف کل کارخانوں میں کام کرنے والے مزدور نہیں ملیں گے تو وہ چاہ کر بھی اپنے پروڈکشن کو نہیں بڑھا سکتے اور اس کا اثر ملک کی معاشیات واقتصادیات کے ساتھ ساتھ سماجیات پر بھی پڑنا لازمی ہے۔ اس لئے کورونا کے بعد کی دنیا کا سب سے بڑا مسئلہ اقتصادی بحران ہوگا اور اس پر قابو پانے کے لئے جو ملک جتنی جلدی اور جتنا ٹھوس لائحہ عمل تیار کر سکے گا اسے راحت مل سکتی ہے۔ ترقی یافتہ ملکوں نے ابھی سے اس پر غوروفکر شروع کردیا ہے۔ ہندوستان جیسے ترقی پذیر ملک کو بھی کورونا کے بعد ملک کی سمت ورفتار کے متعلق سنجیدگی سے لائحہ عمل تیار کرنے کی ضرورت ہے کہ دیگر ممالک کے مقابلے ہندوستان کی معاشی اور سماجی زندگی قدرے مختلف ہے۔یہاں پہلے سے ہی لاکھوں بیروزگار نوجوان روزگار کی تلاش میں دربدری کے شکار تھے اور اب تو کروڑوں کی تعداد میں مزدور طبقہ بیروزگار کا شکار ہوگیا ہے اور اس کا سیدھا اثر ملک کی اقتصادیات ومعاشیات پر پڑنا ایک فطری عمل ہے۔یہ ہمارے لئے ایک لمحہئ فکریہ ہے اس لئے ملک میں اس وقت ایک ایسی فضا سازگار کرنے کی ضرورت ہے جس سے ملک کی سالمیت بھی بر قرار رہے اور اقتصادی رفتار کو بھی تیزی حاصل ہو سکے اور اس کے لئے ملک کے سیاست دانوں کے ساتھ ساتھ مختلف شعبے کی نمایاں شخصیات کو بھی پہل کرنی ہوگی اورملک کے سامنے ایک تعمیری خاکہ پیش کرنا ہوگا کہ یہ وقت کا تقاضہ ہے کیوں کہ کورونا کے بعد کی دنیا بہت ہی تبدیل ہونے والی ہے۔

(مضمون میں پیش کردہ آرا مضمون نگارکے ذاتی خیالات پرمبنی ہیں،ادارۂ قندیل کاان سےاتفاق ضروری نہیں)

14 مئی, 2020 0 comment

نقدوتبصرہ

تزکِ بابری کا اردو ترجمہ-شکیل رشید

by قندیل 9 مئی, 2020

written by قندیل

(ایڈیٹر ممبئی اردو نیوز )

بھارت میں مغل سلطنت کی نیو رکھنے والے شہنشاہ بابر کی یادیں یا ڈائری ‘تزک بابری’ ترکی زبان سے اگر عبدالرحیم خانخاناں نے فارسی زبان میں ترجمہ نہ کی ہوتی تو شاید اس کا اردو زبان میں ترجمہ نہ ہوا ہوتا، اور ہم اردو والے ایک دلچسپ اور معلومات سے بھری کتاب پڑھنے سے محروم رہ جاتے۔فارسی کا ایک نامکمل نسخہ رشید اختر ندوی کو پنجاب پبلک لائبریری سے حاصل ہوا اور انہوں نے محنت سے اسے اردو کا جامہ پہنا دیا، وہ یقیناً اس کام کے لیے شکریے کے حقدار ہیں ۔فارسی کا یہ نسخہ ممبئی کے چترا پربھا پریس نے شائع کیا تھا جس کے مالک کوئی مرزا محمد شیرازی تھے ۔یہ ایک اہم تاریخی کتاب تو ہے ہی، یہ اپنے دور کی سماجی، ثقافتی، مذہبی اور ادبی صورت حال پر بھی بھرپور روشنی ڈالتی ہے ۔

اس کتاب سے بابر کا ایک پیچیدہ سا کردار بھی سامنے آتا ہے، بہادر بھی اور ظالم بھی اور کبھی کبھار میدان چھوڑنے والا بھی، بھائیوں اور عزیزوں سے جنگ کرنے والا بھی اور ان سے محبت کرنے اور قرابت داری نبھانے والا بھی، مذہبی بھی اور شراب ومعجون کا رسیا بھی ۔بابر کے والد عمر شیخ میرزا کا جب انتقال ہوا تب بابر کی عمر بارہ سال تھی اور اسی عمر میں وہ فرغانہ کے تخت پر بیٹھا پھر اس کی ساری زندگی جنگ و جدل میں گزری، کبھی بھائیوں سے اور کبھی ماموؤں اور رشتہ داروں سےاور کبھی دشمنوں سے ۔کتاب پڑھتے ہوئے یہ سوال ابھرتا ہے کہ یہ روز روز کی لڑائیاں کس لیے ہوتی تھیں؟ بابر کے ہاتھ سے فرغانہ سمیت دوسرے علاقے تک چھن گئے تھے، ایک جگہ بابر لکھتا ہے ” اس وقت دل بہت پریشان ہوا، سوچا کہ یہ کیا زندگی ہے! پہاڑوں سے سر پھوڑنے سے آخر کیا حاصلِ، نہ گھر ہی پاس ہے نہ کوئی قلمرو پاس رکھتا ہوں اور نہ کوئی سکھ چین ہی نصیب ہے” ۔یہ اقتباس مذکورہ سوال کا جواب دے دیتا ہے، جنگیں قلمرو کے لیے کی جاتی تھیں اور جو طاقتور ہوتا تھا وہ کمزور سے حکومت چھین لیتا تھا ۔بابر نے بھی حکومتیں چھینیں اور بابر سے بھی اس کی زمینیں چھینی گئیں ۔چھیننے والوں میں بابر کے ماموں اور چچا تک شامل تھے، بھائیوں نے بھی لشکر کشی کی ۔حالات یہ ہوئے کہ بابر کو آخشی سے بھاگنا پڑا اور چھپتے پھرنا پڑا، ایک اقتباس ملاحظہ کریں ” وہ لوگ کچھ دیر تک مجھے یہیں ٹہرائے رہےپھر رات ہی رات میں ایک اور مکان میں لے آئے جہاں آدھی رات تک رہے ۔آدھی رات کا وقت تھاکہ بابا سسرامی چھت پر چڑھا، پھر جلدی سے اترا اور کہنے لگا کہ یوسف داروغہ آ رہا ہے ۔ میں بہت ڈرا، میں نے اس سے فرمائش کی کہ باہر جانے اور خبر لائے کہ یوسف کیوں آیا ہے؟ وہ لوٹ کر آیا تو خبر دی کہ یوسف داروغہ کہتا ہے کہ آخشی کے دروازہ پر اسے ایک سپاہی نے بتایا کہ بادشاہ کرنان کی فلاں جگہ چھپے ہیں ” ۔چھپتے پھرنے والے بابر نے بعد میں کابل فتح کیا، پھر بھارت ۔بھارت پر بابر کاحملہ اس لئیے یادگار ہے کہ اس کے پاس بادشاہ ابراہیم لودھی کی لاکھ سے زائد فوج اور ہزاروں ہاتھیوں کے مقابلے فوجی قوت کم تھی ۔پانی پت میں گھمسان کی جنگ ہوئی جس میں لودھی مارا گیا اور بابر نے ہندوستان میں مغل حکومت کی بنیاد رکھ دی جو آٹھ سو سال تک چلی۔

بابر روزے بھی رکھتا تھا اور نمازیں بھی قضا نہیں کرتا تھا لیکن شراب اور معجون کا رسیا تھا، ایک جگہ بابر لکھتا ہے ” شام کو پیزادی مقام پر پہنچا، وہیں کے قاضی کےیہاں روزہ افطار کیا اور شراب کی محفل منعقد کرنے کی ٹھانی لیکن قاضی نے تنبیہ کی کہ شراب کی محفل اس سے پہلے کبھی میرے مکان پر نہیں جمی، یوں آپ بادشاہ ہیں ۔قاضی کے احترام میں، میں نے شراب کی محفل ملتوی کر دی ” ۔بابر نے اپنے ایک ‘عشق’ کا بھی ذکر کیا ہے، ” اسی دوران مجھےاردو بازار کے ایک خوبصورت لڑکے بابری نامی سے عشق ہوا لیکن یہ عشق کچھ عجیب طرح کا تھا، جونہی بابری میرے سامنے آتا میں شرم کے مارے اس کی طرف آنکھ اٹھا کر بھی نہ دیکھ سکتا۔ایک دن اچانک میں اپنے خدام کے ساتھ ایک گلی سے گزر رہا تھا کہ بابری اور مجھ میں مڈبھیڑ ہو گئی لیکن میری عجیب حالت تھی، میں بری طرح جھینپا اور بڑی سخت گھبراہٹ کے ساتھ آگے بڑھ گیا ۔مگر عشق نے دل و دماغ کو بری طرح سے اپنے چنگل میں لے لیا تھاننگے پاؤں اور ننگے سر کبھی باغوں میں گھومتا پھرتا اور کبھی پہاڑوں میں ” ۔

بابر نے اس تزک میں علماء، شعرا اور فنکاروں کا بھی تفصیلی ذکر کیا ہے ۔جامی کا تذکرہ ان کی شاعری کے حوالے سے ہے۔کئی شعرا پر نقد بھی کیا ہے ۔لکھا ہے ” اس دور کے شعرائے خراسان میں مولانا عبدالرحمن جامی سرفہرست ہیں، شاعر صیفی بھی خراسان کے دربار کا ایک مشہور شاعر تھا، کئی دیوان رکھتا تھا، ایک دیوان معمولی نوعیت کا ہے ” ۔

ہندوستان پر فتح کے بعد بابر نے ملک کے موسم، جانوروں پرندوں، پھلوں اور شہریوں کا اور رہن سہن کا تفصیلی ذکر کیا ہے، بابر لکھتا ہے ” ہندوستان میں مجھے لطافت کی کمی کا بہت احساس ہوا، یہاں کے لوگ کچھ خوبصورت بھی نہیں ہیں نہ ملنے جلنے کے آداب سے آشنا ہیں، ذہن بھی پست ہے، مروت اور خلق اور وضعداری میں بھی ہیٹے ہیں، ہنروں اورپیشوں کی ترتیب اور تقسیم بھی موزوں نہیں ہے، یہاں کا گھوڑا اچھا نہیں ہوتا، گوشت بھی مزیدار نہیں ہے ۔نہ انگور یہاں کے اچھے ہوتے ہیں نہ خربوزے اور نہ دوسرا پھل ہی لذیذ ہوتا ہے، نہ یہاں برف ملتی ہے نہ گرمیوں میں ٹھنڈا پانی ہی مہیا ہوتا ہے، بازاروں میں بکنے والی روٹی بھی خراب ہوتی ہے اور سالن بھی مزے کا نہیں ہوتا۔نہ یہاں حمام ہیں نہ مدرسوں کا رواج ہے ۔گھروں میں شمعیں، مشعلیں اور شمعدان بھی استعمال نہیں کئیے جاتےالبتہ چیکٹ کا رواج ہے” لیکن اس کے باوجود بابر نے ہندوستان ہی میں رہنا پسند کیا اور خوب عمارتیں اور چار باغ اور حوض بنوانے ۔بابر نےایک جگہ لکھا ہے ” ہندوستان میں سنگتراشوں کی کثرت کا اندازہ اس سے کیا جاسکتا ہے کہ میں نے جو عمارت آگرہ میں بنوانا شروع کی ہے اس کے لیے صرف آگرہ ہی میں سے ٦٨٠ سنگتراش جمع کر لئیے گئے ہیں، مزید برآں میں نے سیکری، بیانہ ،دولتپور ،گوالیاراور کول میں جو عمارتیں شروع کر رکھی ہیں ان میں چودہ سو اکیانوے سنگتراش مشغول ہیں ” ۔

کتاب میں رانا سانگا سے جنگ کی دلچسپ تفصیلات بھی شامل ہیں اور بابر نے کیسے ہندوستانی امراء کو، جن میں ہندو امراء بھی شامل تھے، جاگیریں دیں، خلعت سے نوازا اور کیسے ان کی غلطیوں کو معاف کرکے سب کا تعاون اور حمایت حاصل کی اس کا بھی دلچسپ ذکر ہے ۔بابر نے ہندوستان آنے کے بعد شراب پینے سے توبہ کر لی تھی مگر معجون کا نشہ ترک نہیں کیا ۔ایک اور دلچسپ بات یہ کہ تیمور کی نسل سے ہونے کا بابر نے اس طرح مظاہرہ کیا کہ جگہ جگہ سروں کے مینار لگوائے!! کتاب میں نہ بابری مسجد کا ذکر ہے اور نہ ہی منادر کی مسماری کا لیکن ایک جگہ چند بتوں کو توڑنے کا ذکر ہوا ہے.”ارد کے گردونواح میں پہاڑ کاٹ کاٹ کر مورتیاں بنائی گئی ہیں، یہ مورتیاں کچھ چھوٹی ہیں اور کچھ بڑی، ان میں سب سے بڑا بت بیس گز لمبا ہے ۔ارد گو دلچسپ مقام ہے مگر اس کے چاروں طرف بت ہی بت دکھائی دیتے ہیں اس لیے میں نے حکم دیا ہے کہ بت توڑ دیئے جائیں ” ۔

یہ ایک دلچسپ کتاب ہے، ترجمہ بھی اچھا ہے لیکن چونکہ یہ کمپوزنگ کی بجائے کتابت کرا کر شائع کی گئی ہے اور کتابت بھی اچھی نہیں ہے اس لیے آنکھوں کو بھلی نہیں لگتی۔ایک خامی حواشی کا نہ ہونا بھی ہے ۔کسی تاریخ داں کا مقدمہ بھی ضروری تھا ۔ترجمہ جس نسخہ سے کیا گیا وہ بھی نامکمل تھا، اس لیے ان خامیوں کو دور کرنے کے بعد یہ کتاب پھر سے شائع کی جانی چاہیے ۔اسے پاکستان کے ایک بڑے اشاعتی ادارے سنگ میل نے شائع کیا ہے ۔

(مضمون میں پیش کردہ آرا مضمون نگارکے ذاتی خیالات پرمبنی ہیں،ادارۂ قندیل کاان سےاتفاق ضروری نہیں)

9 مئی, 2020 0 comment

خاص کالم

ڈاکٹرظفر الاسلام خان:ہنگامہ ہے کیوں برپا؟

by قندیل 6 مئی, 2020

written by قندیل

ڈاکٹر جسیم الدین

(گیسٹ فیکلٹی، شعبۂ عربی دہلی یونیورسٹی، دہلی)

ممتازصحافی ودانشور،عظیم محقق و مترجم اور متعدد کتابوں کے مصنف ڈاکٹر ظفر الاسلام خان مشہور عالم و مفکر وحید الدین خاں کے فرزند ہیں، لیکن انھوں نے علمی،تحقیقی،صحافتی،فکری اور سماجی کاموں میں نمایاں خدمات انجام دے کر کارگہ عالم میں خود منفرد شناخت بنائی،شرافت ان کی شان ہے، انکسار ان کی پہچان ۔شہرت ومقبولیت کے منازل طے کرنے میں کبھی اپنے آباواجداد کی بیساکھی کا سہارا نہیں لیا۔ برصغیر ہند وپاک میں ہی میں نہیں،بلکہ عالمی سطح پر گنے چنے دانشوران میں آپ کا شمار ہوتاہے، آپ کو یہ مقام یونہی نہیں ملا، بلکہ شہرت ومقبولیت کی یہ منزل آپ کی شبانہ روز کی محنت کا ثمرہ ہے، عیش وعشرت کے اسباب مہیا ہونے کے باوجود آپ نے آرام طلبی کو کبھی اپنے پاس پھٹکنے نہیں دیا، بلکہ ہمہ وقت ملک وقوم کی خدمت میں خود کو گھلاتے رہے،لیکن آج حیرت وتأسف کا مقام ہے کہ ایک مناسب ومعقول رائے کے اظہار کو بنیاد بناکر مٹھی بھر شرپسند عناصر کے دباؤ میں آکر دہلی پولیس انھیں ہراساں کررہی ہے، اگر دہلی پولیس یہ سمجھتی ہے کہ ڈاکٹر ظفرالاسلام خان کو وہ پس زنداں کرنے میں کامیاب ہوجائے گی تو یہ اس کی بھول ہے، آج پوری قوم ان کے ساتھ ہے۔آخرڈاکٹر ظفرالاسلام خاں کا قصور ہی کیا ہے کہ رمضان کے مبارک ماہ میں عین افطار کے وقت دہلی پولیس کے اسپیشل سیل نے چھاپہ مار کارروائی کی۔یہ طرفہ تماشہ ہی ہے کہ دہلی میں فساد بھڑکانے کے اصل مجرمین آزاد ہیں،جب کہ انھیں پس زنداں ہونا چاہیے تھا، لیکن انصاف کا یہ دہرا معیار ہندوستان کی ساکھ کو عالمی سطح پر متاثر کرے گا، اس لیے حکومت وقت کو چاہیے کہ فساد کے اصل مجرمین کو کیفر کردار تک پہنچائے نہ کہ ایک سیدھے سادھے بے لوث خادم ملک وملت کے ساتھ ظلم وزیادتی پر اترے۔
ڈاکٹر ظفرالاسلام خاں صاحب ایک سنجیدہ،صاف ستھری شبیہ کے مالک ہیں، انھوں نے اپنے قرطاس وقلم کا استعمال ہمیشہ ملک وقوم کی خدمت میں کیا ہے، وہ ملک وقوم کے لیے جہاں گراں مایہ سرمایہ ہیں، وہیں کمزوروں اور بے بسوں کے لیے توانا آواز بھی ہیں، اس لیے ان کی خدمات کو مدنظر رکھتے ہوئے، شرپسند عناصر کی طرف سے ڈاکٹرصاحب کے خلاف شورش برپا کرنے والوں کے خلاف کارروائی ہونی چاہیے۔ نہ کہ ڈاکٹر ظفرالاسلام خاں کے خلاف ملک سے بغاوت کا مقدمہ درج کیا جاناچاہیے، یہ سراسر انصاف کا قتل وخون ہے۔اس ملک کا عدالتی نظام بھروسے مندرہاہے،یہی اس کا امتیاز ہے، اس لیے حکومت کو چاہیے کہ عدل وانصاف کو سبوتاز ہونے سے بچاتے ہوئے ڈاکٹر ظفرالاسلام کے خلاف لگائی گئیں دفعات کو واپس لے اور انھیں بے جا طورپر خوف وہراس میں ڈالنے سے باز آئے۔
یہاں میں ملت اسلامیہ ہند کے سربرآوردہ حضرات، تمام قومی وبین الاقوامی تنظیموں کے سربراہان سے بطور خاص اورعمومی طور پر ملک کے باشندگان ہر محب وطن سے بھی درخواست کرتا ہوں کہ وہ ہر پلیٹ فارم سے ڈاکٹر ظفرالاسلام خاں صاحب کے ساتھ ہونے والے ظلم وزیادتی اور ناانصافی کے خلاف صف بستہ ہوں، ورنہ اگر اس سادہ لوح،بے لوث خادم ملک و قوم پر ہاتھ ڈالنے میں دہلی پولیس خدانخواستہ کا میاب ہوگئی تو پھر ہندوستان میں (جس کی تاریخ ہمارے آباواجداد کے سرفروشانہ کارناموں سے مزین ہے) نسل نو ہر آنے والا دن مزید خوفناک ہوجائے گا، ظلم پر ظلم ڈھایا جائے گا اور اس کو روکنا تو درکنار اس کے خلاف صدائے احتجاج بلند کرنے والا بھی کوئی نہ ہوگا، اس لیے مصلحت پسندی کے خول سے باہر نکل کر کوئی مضبوط لائحہ عمل تیار کرنا ہوگا، تاکہ ملک میں شر پسند عناصر کی شر انگیزی پر نکیل کسی جاسکے.
آپ کو ڈاکٹر ظفر الاسلام خاں صاحب کا بیک گراؤنڈ بھی بتاتا چلوں کہ ڈاکٹر ظفرالاسلام خان نے جامعہ دار السلام عمر آباد میں ایک سال فارسی پڑھی۔ مدرسۃ الاصلاح سے درجہ سوم عربی پاس کیااور دار العلوم ندوۃ العلما سے پنجم عربی (اب عالمیت کے نام سے متعارف ہے) پاس کیا۔لکھنؤ یونیورسٹی سے عالم فاضل کورس کیا۔ قاہرہ یونیورسٹی سے اسلامی تاریخ میں ایم اے کیا۔ مانچسٹر یونیورسٹی سے 1987میں پی ایچ ڈی کی ڈگری حاصل کی۔
مصر میں قیام:
جامعہ ازہر کے کلیہ اصول الدین میں تعلیم حاصل کرنے کے بعد انھوں نے قاہرہ یونیورسٹی میں چند سال گزارے اور وہیں سے اسلامی تاریخ میں ایم اے کیا جس کے لیے مصر کی اکسچینج اسکالرشپ دو سال کے لیے ملی۔ پھر قاہرہ ریڈیو میں بحیثیت اردو اناؤنسر بھی کام کیا۔ فروری 1973 ء سے لیبیا کی وزارت خارجہ میں چھ سال بحیثیت مترجم و ایڈیٹر اپنی خدمات پیش کیں۔
مصر میں ان کے حلقہ احباب میں بہت سے ادبا، شاعر اور محققین رہے جن میں وزیر ڈاکٹر حلمی مراد جو پہلے عین شمس یونیورسٹی کے وائس چانسلر تھے، پھر وزیر تعلیم ہوئے۔ بڑے ادیب یحیٰ حقی، ڈاکٹر مصطفٰی محمود، شیخ محمد الغزالی، ڈاکٹر عبد الصبور شاہین تھے۔ صحافیوں میں جامعۃ القاہرۃ میں ہم سبق ڈاکٹر عبد الحلیم عویس تھے۔ان کے قیام کے وقت بعض ادبا وشعراء وصحافی جو اس وقت نوجوان تھے، بعد میں بہت مشہور ہو گئے، شاعر حسن توفیق، شاعر عفیفی مطر جو”سنابل”نامی ادبی پرچہ نکالتے تھے اور نقاد کمال حمدی بطور خاص قابل ذکر ہیں۔
انگلینڈ میں قیام:
اکتوبر 1979 میں لندن چلے گئے جہاں مزید پڑھنے کے لیے مانچسٹر یونیورسٹی میں پی ایچ ڈی میں داخلہ لے لیا۔ پی ایچ ڈی کا موضوع ” تصور ہجرت“ تھا جس میں بنیادی طور پر یہ معلوم کرنا تھا کہ مفسرین، علما حدیث اور فقہا نے حکم“ہجرت”کو کیسے سمجھا اور اسلامی تاریخ میں اس پر کیسے عمل کیا گیا۔ لیکن مزید پڑھنے کا موقع نہیں ملا کیونکہ مسلم انسٹی ٹیوٹ نے، جس نے انہیں بلایا تھا، اپنے کاموں میں اتنا مشغول کر دیا کہ ٹھیک سے پڑھائی کا وقت نہ مل سکا۔ کچھ کام کیا لیکن بہت زیادہ نہیں کرسکے۔ 1984 میں ہندوستان واپس آنے کے بعد وہ دوبارہ 1987 میں مانچسٹر گئے اور پی ایچ ڈی کی ڈگری حاصل کرکے لوٹے۔
صحافتی سرگرمیاں:
الحیاۃ نیوز پیپر،لندن(19991-1992)، عرب نیوز جدہ(1992-1997)، روزنامہ الریاض (1991-9192) میں نمائندہ کی حیثیت سے صحافتی خدمات انجام دیں۔علاوہ ازیں ’المجتمع‘ کویت، ’الاصلاح‘ دبئی، میں کالم بھی لکھے۔اسی طرح بی،بی،سی ریڈیو، ٹی وی لندن،وائس آف امریکا، واشنگٹن، جزیرہ سیٹلائٹ چینل، منارٹی وی بیروت، ریڈیو تہران، ایران اور آل انڈیا ریڈیو کی عربی سروس میں بحیثیت تجزیہ کار اور اناؤنسر اپنی صحافتی خدمات انجام دی ہیں۔اب وہ عربی اخبارات میں دہلی سے نمائندگی کرتے ہیں۔
تصانیف:
عربی، انگریزی اور اردو میں چالیس سے زائد کتابوں کے مصنف یا مترجم ہیں جن میں یہ دو کتابیں بھی شامل ہیں:
اسلام میں ہجرت
فلسطینی دستاویزات
دائرۃ المعارف الاسلامیہ یا انسائیکلوپیڈیا آف اسلام (Encyclopaedia_of_Islam) میں آٹھ مضامین برصغیر میں مسلمانوں کے حوالے سے شامل کر چکے ہیں۔
2000 سے ملی گزٹ اخبار نکال رہے ہیں جو ہندوستان میں مسلمانوں کے مسائل پر مرکوز ہے۔ یہ پرنٹ اور آن لائن دونوں صورتوں میں موجود ہے۔
چیریٹی الائنس کے بانی اور چیئرمین ہیں، یہ ادارہ ہندوستان میں فلاح و بہبود کے کام کرتا ہے۔ اس کے علاوہ اشاعتی ادارہ فاروس میڈیا اور پبلشنگ کے ڈائریکٹر بھی ہیں۔ جولائی 2017 میں ان کو دہلی اقلیتی کمیشن کا صدر بنایا گیا اور ہنوز اس عہدے پر برقرار ہیں۔اللہ تعالیٰ ہر چیز پر قادر ہے، دعا کیجیے کہ اللہ تعالیٰ شرپسندوں کی سازش کو ناکام بنائے اور ڈاکٹر صاحب ظالموں کے ظلم اور ریشہ دوانی کرنے والوں کی چیرہ دستی سے محفوظ رہیں۔
[email protected]
9711484126

6 مئی, 2020 0 comment

خاص کالم

دار العلوم دیوبند کے زمانۂ طالب علمی میں میرا مطالعہ

by قندیل 23 اپریل, 2020

written by قندیل

ڈاکٹر فاروق اعظم قاسمی

مشکی پور ، جمال پور ، کھگڑیا (بہار)

[email protected]

مادر علمی دار العلوم دیوبندمیں راقم کا داخلہ 1999میں ہو گیا تھا ۔ 2007 میں فضیلت کی سند سے مشرف ہوا ، اس کے بعد اسی ادارے سے دوسالہ انگریزی زبان کے ڈپلوما کی سند بھی حاصل کی ۔ ان دس برسوں میں 95 سے 98 فی صد کلاس کی حاضری و پابندی کے ساتھ بہت سی ایسی کتابوں کے مطالعے کی بھی توفیق ہوئی جن سے معلومات میں اضافہ ، زبان و بیان میں پختگی حاصل ہوئی اور ذہن و دماغ کے دریچے بھی کھلے ۔ فضیلت کے ابتدائی دو سالوں میں درسیات کے علاوہ کسی دوسری کتاب کے پڑھنے کا سوال ہی پیدا نہیں ہوتا بشرطیکہ طالب علم پڑھنے والا ہو اور سنجیدہ بھی ۔ کیوں کہ ساری کتابیں حفظ کرنے والی ہوتی ہیں ، نہ وقت اور نہ موقع ۔ ہاں تیسرے سال سے اتنا وقت مل جاتا ہے کہ طلبہ انجمنوں سے وابستہ ہو سکیں اور مطالعہ و تحریر کی مشق کر سکیں۔ چناں چہ میرے لیے بھی یہ حسین موقع آیا ، ضلعی اور صوبائی انجمنوں سے شناسائی ہوئی ، اب اس موضوع پر دوستوں سے گفت و شنید ہونے لگی اور اساتذہ سے مشورے بھی ۔ کچھ مخلص احباب نے روشنی عطا کی اور کچھ مشفق اساتذہ نے رہنمائی کی۔ اس سلسلے میں استاذ محترم مولانا سلمان صاحب بجنوری ، مفتی اسعد اللہ صاحب سلطان پوری کی ذات سرِفہرست ہے اور دوستوں میں شاداب سہیل اور مظہر سوپولوی کے نام یاد رکھے جانے کے لائق ہیں ۔ کچھ کتابوں نے بھی اندرون کو جھنجھوڑا اور منزل کا راستہ آسان کیا ۔ ایسی پیاری کتابوں کی کہکشاں میں مولانا علی میاں کی ‘ پاجا سراغ ِ زندگی’ ،شیخ عبد الفتاح ابو غُدہ کی’ وقت کی اہمیت ‘ ، مولانا محمد ساجد قاسمی کی ‘ تحصیل ِ علم میں اسلاف کی قربانیاں’ ، مولانا محمد اسلم قاسمی شیخو پوری کی ‘بڑوں کا بچپن ‘، مولانا محمد عمران خان ندوی کی ‘ مشاہیر اہل علم کی محسن کتابیں ‘ اور ماہنامہ ‘رفیقِ منزل ‘دہلی (مطالعہ نمبر) جیسی کتابیں بطور خاص شامل ہیں ۔ ان کتابوں نے میری مطالعاتی زندگی میں بڑا انقلاب بپا کیاجس کی چنگاری آج بھی گرم ہے تاہم مجھے پڑھاکو خاں ہونے کی خوش گمانی ہے،نہ ہی مجھے جوش بنا ہوش کا فارمولا پسند ہے ۔اساتذہ ، احباب اور کچھ رہنما کتابوں کے ذریعے سےمطالعے کا جو ایک رخ ملا اسی کا خوبصورت ثمرہ ان کتابوں اور ان کے مطالعے کو سمجھنا چاہیے ۔ ذیل میں مذکورہ کتابوں کی موضوع وار فہرست درج ہے ۔

سیرت :

النبی الخاتم :علامہ سید مناظر احسن گیلانی

خطبات مدراس:علامہ سید سلیمان ندوی

ذکررسول:مولانا عبد الماجد دریابادی

در یتیم:مولانا ماہر القادری

سفرنا مہ و سفرنامہ حج:

دربار نبوت کی حاضری:علامہ سید مناظر احسن گیلانی

شب جائے کہ من بودم: آغا شورش کاشمیری

سفرِحجاز :مولانا عبد الماجد دریابادی

کاروانِ حجاز :مولانا ماہر القادری

یہاں سے کعبہ ، کعبے سے مدینہ : ڈاکٹر کلیم احمد عاجز

بطواف کعبہ رفتم :مولانا اعجاز احمد اعظمی

جہانِ دیدہ :مفتی محمد تقی عثمانی

سوانح :

سیرتِ ابوذر غفاری :علامہ سید مناظر احسن گیلانی

شیخ الہندـ حیات اور کارنامے:مولانا اسیر ادروی

نقشِ دوام :مولانا انظر شاہ کشمیری

تذکرۃ الرشید :مولانا عاشق الٰہی بلند شہری

حیاتِ مولانا گیلانی :مفتی ظفیر الدین مفتاحی

مولانا مناظر احسن گیلانی :شخصیت و سوانح : ڈاکٹر ابو سلمان شاہجہاں پوری

سید عطاء اللہ شاہ بخاری :آغا شورش کاشمیری

میرے والد میرے شیخ :مفتی محمد تقی عثمانی

سوانح ائمہ اربعہ :قاضی اطہر مبارکپوری

سیرت شہید ٹیپو :مولانا الیاس ندوی

تذکرہ مجددِ الفِ ثانی :علامہ سید مناظر احسن گیلانی

تذکرہ شاہ ولی اللہ :علامہ سید مناظر احسن گیلانی

حیات مجاہد:مولانا خالد سیف اللہ رحمانی

نقوشِ اقبال :مولانا ابو الحسن علی ندوی ، ترجمہ : مولانا شمس تبریز خاں قاسمی

خود نوشت سوانح :

آپ بیتی مولانا عبد الماجد دریابادی: مولانا عبد الماجد دریابادی

احاطۂ دار العلوم دیوبند میں بیتے ہوئے دن :علامہ سید مناظر احسن گیلانی

زندگی کا علمی سفر :مفتی ظفیر الدین مفتاحی

تحدیث نعمت :مولانا محمد منظور نعمانی

ذاتی ڈائری :مولانا عبید اللہ سندھی

کالا پانی :مولانا محمد جعفر تھانیسری

پس دیوار زنداں :آغا شورش کاشمیری

وہ جو شاعری کا سبب ہوا :ڈاکٹر کلیم احمد عاجز

جہاں خوشبو ہی خوشبو تھی:ڈاکٹر کلیم احمد عاجز

جب فصلِ بہاراں آئی : ڈاکٹر کلیم احمد عاجز

میرے عہد کا دار العلوم :مولانا نسیم اختر شاہ قیصر

خاکے و تذکرے :

یادگار ِ زمانہ ہیں یہ لوگ :مولانا ازہر شاہ قیصر

لالہ و گل :مولانا انظر شاہ کشمیری

میرے عہد کے لوگ :مولانا نسیم اختر شاہ قیصر

جانے پہچانے لوگ :مولانا نسیم اختر شاہ قیصر

گلشنِ ہند کا علمی گلدستہ :سید آصف الدین ندوی قاسمی

میری زبان ، میرا قلم :ڈاکٹر کلیم احمد عاجز

چند کتابیں اور :

پاجا سراغ ِ زندگی :مولانا ابو الحسن علی ندوی

وقت کی اہمیت : شیخ عبد الفتاح ابو غُدہ، ترجمہ : مولانا عبد القدوس قاسمی

تحصیلِ علم میں اسلاف کی قربانیاں :مولانا محمد ساجد قاسمی

رہنمائے مطالعہ :مفتی جمیل احمد نذیری

مطالعہ کیوں اور کیسے :مولانا رحمت اللہ ندوی

مضمون کیسے لکھیں :مولانا اسعد قاسمی سنبھلی

صحتِ الفاظ :سید بدر الحسن

املا نامہ :ڈاکٹر گوپی چند نارنگ

حرف ِ شیریں :مولانا نور عالم خلیل امینی

فن خطابت : آغا شورش کاشمیری

مطالعہ شعر و ادب :پروفیسر محسن عثمانی ندوی

کچھ دینی و تاریخی کتابیں :

ہندوستان میں مسلمانوں کا نظام تعلیم و تربیت :علامہ سید مناظر احسن گیلانی

تدوینِ حدیث :علامہ سید مناظر احسن گیلانی

الجہاد فی الاسلام :مولانا سید ابو الاعلی ٰ مودودی

ہندوستانی مسلمان :مولانا سید ابو الحسن علی ندوی

انسانی دنیا پر مسلمانوں کے عروج و زوال کا اثر :مولانا سید ابو الحسن علی ندوی

مذہب و تمدن :مولانا سید ابو الحسن علی ندوی

حضرت امیر معاویہ اور تاریخی حقائق :مفتی محمد تقی عثمانی

آئینہ حقیقت نما :اکبر شاہ نجیب آبادی

عہد وسطیٰ میں مشترکہ تمدن اور قومی یکجہتی :محمود علی علیگ

سائنس اور اسلام :قاری محمد طیب قاسمی

دارالعلوم دیوبند- ادبی شناخت نامہ: حقانی القاسمی

قادیانیت شکن :عبد الرزاق

یہاں صرف وہ کتابیں درج کی گئی ہیں جو یاد رہ پائیں اورجن کا میں نے مکمل مطالعہ کیاہے، ان کے علاوہ درجنوں کتابیں ایسی ہیں جن کا آدھا ادھورا یا بعض ابواب یا پھر کچھ صفحات مطالعے میں آیا ان کا ذکر چھوڑ دیا گیا ہے ۔ تاریخ و جغرافیہ اور سماجیات سے متعلق درسی کتابوں کا ذکر بھی دانستہ چھوڑا گیا ہے کیوں کہ ان کے مطالعے کے پس پردہ شوق کم اور درسی مجبوری زیادہ تھی ۔

رسائل و اخبارات جنھیں دیکھنے ، مطالعہ کرنے اور ان سے استفادہ کرنے کے مواقع ہاتھ آئے:

ماہنامہ ‘دار العلوم’ ، دیوبند

ماہنامہ ‘تعمیر ِ حیات ، لکھنؤ

ماہنامہ ‘معارف ،اعظم گڑھ

ماہنامہ ‘ترجمان ِ دار العلوم ، دہلی

ماہنامہ ‘ترجمان ِ دیوبند ، دیوبند

ماہنامہ ‘القاسم، نوشہرہ پاکستان

ماہنامہ ‘الفاروق ، کراچی پاکستان

ہفت روزہ ‘ ختم نبوت ‘ ، کراچی

ماہنامہ ‘اذان بلال ، آگرہ

ماہنامہ ‘آجکل ، دہلی

”ایوان ِ اردو ، دہلی

ماہنامہ ‘امنگ، دہلی

ماہنامہ ‘پیام تعلیم، دہلی

ہفت روزہ ‘ہماری زبان ‘ دہلی

ماہنامہ ‘ہلال، رام پور

پندرہ روزہ ‘الرائد’ عربی ، لکھنو

روزنامہ ‘ راشٹریہ سہارا ، دہلی

ہفت روزہ ‘ عالمی سہارا، دہلی

روزنامہ ‘ قومی آواز ، دہلی

روزنامہ’صحافت ، دہلی

روزنامہ ‘ہندوستان اکسپریس ، دہلی

ان میں سے کچھ کا میں مستقل اور بعض کا غیر مستقل خریدار تھا، کچھ کو مانگ کر پڑھتا ،اسی طرح یہ اور ان کے علاوہ درجنوں رسائل کو دیکھنے اور مطالعہ کرنے کا موقع ماہنامہ ‘ دار العلوم ‘ دیوبند کے دفتر میں ملتا ۔

23 اپریل, 2020 0 comment

قومی خبریں

دہلی والوں سے ہوشیار، پتہ نہیں وہ کب، کون سا قانون لے آئیں:گلزار

by قندیل 29 دسمبر, 2019

written by قندیل

ممبئی: شہریت ترمیمی قانون کے خلاف ملک اور دنیابھرمیں احتجاجات ہورہے ہیں ۔اسی بیچ معروف شاعر،گیت کار اور فلم ساز گلزار نے بھی اس حوالے سے مرکزی حکومت پر طنز کیاہے۔گلزار نے کہا کہ ان دنوں مجھے دہلی والوںسے ڈر لگتا ہے کیونکہ کوئی نہیں جانتا وہ کب،کون سا قانون لے آئیں۔آندھی اور ماچس جیسی فلموں کے ڈائریکٹر گلزار نے کہا کہ جب ان کے دوست اور امر اجالا گروپ کے ادارتی مشیر یشونت ویاس دہلی سے ان سے ملنے کے لئے آئے تو وہ ڈر گئے تھے۔گلزار نے ہنستے ہوئے کہاکہ ان دنوں آپ نہیں جانتے کہ دہلی والے کیا قانون لے آئیں گے۔گلزار نے یہ بیان اخبار امر اجالاکی طرف سے منعقدہ ایک تقسیمِ ایوارڈ کی تقریب کے دوران دیا۔اس سے پہلے انہوں نے اپنی تقریر کے آغاز میں وزیر اعظم نریندر مودی پر بھی طنز کرتے ہوئے کہاکہ میں آپ کو ’متروں‘ سےمخاطب کرنے والا تھا، لیکن پھر میں رک گیا۔ یہ کہہ کرانہوں نے واضح طور پر مودی کے خطابی لب ولہجے کی طرف اشارہ کیاتھا۔

29 دسمبر, 2019 0 comment

تجزیہ

قدم ہمارا جو اٹھ گیا ہے وہ درمیاں میں نہیں رکے گا

by قندیل 28 دسمبر, 2019

written by قندیل

مولانا احمد حسین قاسمی،معاون ناظم امارت شرعیہ

ایک جمہوری ملک کو کسی ایک دھرم اور کسی خاص نظریات کا حامل بنانا دراصل اس ملک کی جمہوری حیثیت کو قتل کرنا ہے،یہ کوئی معمولی مسئلہ نہیں،اس ملک پر برسوں سے اس کے سیاہ بادل منڈلا رہے ہیں،جس کا ڈر تھا اس کا ظہور ہونے لگا ہے،سی اے اے(CAA)سیٹیزن شپ امینڈ منٹ ایکٹ ۹۱۰۲ء اس کا منہ بولتا ثبوت ہے،موجودہ حکومت نے اس کے ذریعہ اس ملک کو ہندتوا کے رنگ میں رنگ دینے کی خطرانک جرأت کی ہے،اور پوری دنیا میں اس قانون کے ذریعہ اس ملک کو وہی حیثیت دینے کا ارادہ کیاہے جو یہودیوں نے یروشلم کو دیا ہے۔ہندوستان ایک تعلیم یافتہ اور ترقی پذیر ملک ہے یہاں کے لوگ دنیا کے تمام ممالک میں نمایاں اور غیر معمولی خدمات انجام دیتے ہیں اور اس ملک کی عملی تصویر اور اس کی گنگا جمنی تہذیب اور پاکیزہ روایات کو اپنے گفتار وکردار سے پیش بھی کرتے ہیں،اس ملک کی تاریخ اور اسے سونے کی چڑیا بنانے نیز اس کے حسین تعمیری شاہکار کو ساتواں عجوبہ کا درجہ دینے کی بات کو دنیا کے عام لوگ بھی اچھی طرح جانتے ہیں،جنگ آزادی کے سارے زریں واقعات، اس کے سرفروشان وطن اور ملک کے گیسوئے برہم کے سنوارنے والے دیوانوں کے افسانے پوری دنیا میں خوب عام ہیں،ملک کے عام باشندے اور بیرون ملک کے سارے پڑھے لکھے لوگ اس ملک کی قدیم وجدیدتاریخ سے بخوبی واقف ہیں، موجودہ بر سراقتدار پارٹی کے پاس جمہوریت کا بدل ہندو راشٹر اور منو اسمرتی تو ہوسکتی ہے، تاہم یہاں کے عام سیکولر باشندگان ملک کے دل کو جیتنے کا کوئی نسخہئ کیمیا نہیں ہو سکتا،دنیا کی یہ تلخ حقیقت ہے کہ یہاں کوئی بھی حکومت جبر واستبداد کے ساتھ دیر تک قائم نہیں رہ سکی ہے، حکومت کی حکمت عملی اور اس کے مسلسل جابرانہ وظالمانہ رویوں نے عام شہریوں کو تلملا کر رکھ دیا ہے عوام اگر ہر چھوٹے بڑے مسئلہ پر روڈ پر نہیں آتے اور صدائے احتجاج بلند نہیں کرتے تو اس کا مطلب حکومت کو یہ ہر گز نہیں لینا چاہئے کہ لوگ اس کے ایجنڈے اور پلاننگ سے بے خبر ہیں،انہیں ان مسائل کا شعور نہیں ہے یا وہ سب کے سب ان کے حامی ہیں یہ ایک مسلمہ حقیقت ہے کہ یہ صدی سیکولرزم کی انقلابی صدی ہے، سیکولرزم نے دنیا کے اکثر وبیشتر انسانوں کے ذہن کو متاثر کیا ہے،ہندوستان اپنے پاس ماضی بعید سے ہی اپنے شہریوں کے تناسب اور تہذیبی و روایتی پس منظر میں ایک مستحکم سیکولرزم کا ڈھانچہ رکھتا ہے، اس کی ساخت اور رنگا نگ تہذیب وثقافت نے اس کی فطرت میں جمہوریت کا عنصر شامل کردیاہے،جواس کی عالمی پہچان اور روح کی حیثیت رکھتی ہے، اس سے بر سر پیکار ہونا اور اس کے بنیادی دستور سے چھیڑ چھاڑ کرنا ایسا ہی ہے، جیسے شہد کی مکھی پر ڈھیلا مارنا،CAAاور اس کے مبتدیات (NPR) وغیرہ اس کی جمہوری فطرت کے منافی ہیں،زمام اقتدار جن کے ہاتھوں میں ہے،وہ بہت سوچ سمجھ کر قدم آگے بڑھائیں،جمہوری ملک میں اقتدار واختیار عوام عارضی طور پر کسی پارٹی کے سپرد کرتے ہیں، بصورت دیگر عوام بہت جلد اپنے اختیارات واپس لے لیتے ہیں، جھارکھنڈ کے حالیہ اسمبلی انتخاب کے نتائج نے دو ٹوک فیصلہ کر کے حکومت کو بہت تلخ سبق دیا ہے۔
CAAکے حوالے سے دنیا بھر کے عوام وخواص کو معلوم ہوگیا کہ موجودہ حکومت نے اس کے ذریعے ہندو راشٹر کا دروازہ کھولنے کی ناپاک کوشش کی ہے اور سختی کے ساتھ سبھوں نے اس کی شدید مذمت کی ہے اور یہ احتجاج آزاد بھارت کی تاریخ میں فقط احتجاج نہیں؛ بلکہ اس نے ایک تاریخی اور انقلابی تحریک کی شکل لے لی ہے،لوگ اس قانون کے واپس لینے تک پورے شدومد کے ساتھ اس تحریک کو جاری رکھیں گے اور ایک پل کے لیے بھی نہ وہ تھکیں گے اور نہ ہمت ہاریں گے،اگر حکومت عوامی تحریک کو کچلنے یا کمزور کرنے اور ختم کرنے کی کوشش کرے گی،جیسا کہ بعض ریاستوں میں نظر آیا، تو حکومت کا یہ ناعاقبت اندیش اقدام اس کے ابدی زوال اور خاتمہ کا باعث ہو سکتا ہے۔
ہم اپیل کرتے ہیں اس ملک کے عام سیکولر شہریوں سے کہ وہ اب اپنے قدم ہر گز پیچھے نہ ہٹائیں، اصلی طاقت عوام کی طاقت ہے،عوام کو اس تحریک میں یہ ثابت کرنا ہوگا کہ اس ملک کی جمہوریت زیادہ طاقتور ہے یا یہاں کی بر سر اقتدار پارٹی۔اب یہ لڑائی فیصلہ کن مرحلے میں داخل ہو گئی ہے، اس کا رواں کے مسافروں کو اب پیچھے مڑ کر ہر گز نہیں دیکھنا ہے؛ بلکہ منزل قریب تر ہے اور منزل سے مستقل کامیابی کے ترانوں او زمزموں کی صدائیں آرہی ہیں،کہیں ایسا نہ ہو کہ منزل سے پہلے ہماری آنکھ لگ جائے یا ہم سست پڑ جائیں،ایساہواتو ہماری ساری قربانیاں بیکاراور ہمارے نونہالان اور عزیز طلبا وطالبات کا خون رائیگاں ہوجائے گا، چنانچہ اب ہمیں اپنی باقی ماندہ پوری جمہوری طاقتوں کو اور عوامی جذبات کو اس تحریک اور آندولن کی کامیابی میں جھونک دینا ہے۔

28 دسمبر, 2019 0 comment

تجزیہ

دہلی کے رام لیلا میدان میں آئین کا رام نام ستیہ – اشعر نجمی

by قندیل 22 دسمبر, 2019

written by قندیل

ابھی ابھی وزیر اعظم نریندر مودی کی تقریر سن کر اٹھا ہوں ، اگرچہ ان کی تقریروں کو سننا کسی بھی صاحب شعور و عقل کے لیے ہمیشہ آزمائشی رہا ہے ۔ جاوید اختر نے ایک بار کہا تھا کہ مودی جی کو تقریر کرتا اور سنتا دیکھ کر انھیں ان کے بچپن کا وہ دوا فروش یاد آجاتا ہے جو فٹ پاتھ پر جڑی بوٹیاں بیچا کرتا تھا اور اسی طرح ناک سے بولتا تھا اور ہانک لگایا کرتا تھا۔ جہاں تک میری بات ہے تو میں نے ہمیشہ ان کی تقریر کی بجائے راجیو شری واستو کی کامیڈی دیکھنے کو ترجیح دی۔ خیر، چونکہ جو اس وقت ملک کی صورت حال ہے، اس پر اپنے وزیر اعظم کا ردعمل دیکھنے کی خواہش تھی، سو پورے ایک گھنٹے سے زیادہ وقت ضائع کیا، بیچ بیچ میں کئی بار ریموٹ پر ہاتھ گیا لیکن پھر یہ سوچ کر چینل بدلنے کا ارادہ بدل دیا کہ اچھا قوال بھور میں گاتا ہے، ممکن ہے کہ آگے چل کر بے سُری تقریر قدرے سُر میں بدل جائے لیکن ہاتھ کچھ نہ آیا بلکہ آخر میں تقریر صرف ناک سڑکنے کی سمع خراشی میں بدل گئی۔ انھوں نے کیا بولا، اس کا ذکر کرنا تضیع اوقات ہوگا کہ سب جانتے ہیں کہ ان کے پاس بولنے کے لیے کبھی کچھ نیا نہیں ہوتا؛ وہی اپوزیشن، وہی کانگریس، وہی پاکستان، وہی گھس پیٹھیے، وہی اربن نکسل، وہی ممتا دیدی، وہی اپنی دو الیکشن کی کامیابیوں کا تذکرہ، وہی بیرون ملک میں اپنا ڈنکا پیٹنے کا ذکر وغیرہ وغیرہ۔ ایسا لگ رہا تھا جیسے وہ ملک کی موجودہ صورت حال پر بات کرنے کے لیے نہیں بلکہ کسی چناوی پرچار میں حصہ لینے آئے ہیں۔ لہٰذا اپنی اس تازہ ترین تقریر میں ایک سربراہ ملک کو قوم سے خطاب کرتے ہوئے جو بولنا چاہیے تھا، وہ اس پر یا تو گول مول بات کرکے گزر گئے یا ان اہم سوالوں کو نظر انداز کرگئے جو آج ملک کی سڑکوں پر نظر آ رہے ہیں۔

رام لیلا میدان میں ہونے والی اس تقریر میں شرکت کرنے والی بھیڑ کے ہاتھوں میں بی جے پی کا جھنڈا نظر آ رہا تھا، مجھے کسی کے ہاتھ میں ترنگا نظر نہیں آیا جو اس بات کا واضح اشارہ تھا کہ بھیڑ یا تو بی جے پی کے پارٹی ورکروں پر مشتمل تھی یا اس میں وہ مودی بھکت تھے جنھیں ٹرکوں پر لاد کر لایا گیا تھا جس طرح چناوی پرچاروں میں لایا جاتا ہے۔ مودی جی نے بھی اپنے بھکتوں سے نہیں پوچھا کہ بھیا ایک دو ترنگا ہی ساتھ لے آتے چونکہ ہم سے بڑا تو بھارت میں کوئی دیش بھکت ہی نہیں ہے۔ چلیے نہیں پوچھا، کوئی بات نہیں لیکن حیرت اس وقت ہوئی جب صرف ترنگا اٹھاکر احتجاج کرنے والے دیش بھر کے احتجاجیوں پر مودی جی نے سوال جڑ دیا کہ آپ نےآتنک واد اور پاکستان کے خلاف کبھی کیوں ترنگا نہیں اٹھایا؟ اس پر حسب توقع بھکتوں نے تالیاں بجائیں اور مودی جی کو خوش کردیا کہ اب بھی ان کے ساتھ کچھ ‘انڈ بھکت’ ہیں۔ گویا پاکستان کے خلاف بولنے والا دیش بھکت ہے لیکن مودی سرکار پر سوال اٹھانے والے دیش کے غدار ہیں۔ کُل ملا کر یہ ثابت ہوا کہ مودی جی کو اور ان کی سرکار کو دیش بھکت نہیں بلکہ مودی بھکت چاہئیں جن کے ہاتھوں میں بلا سے ترنگا نہ ہو، یوں بھی آر ایس ایس کے صدر دفتر (ناگپور) میں ایک زمانے تک تک ترنگا کی بجائے ہندو راشٹر کا جھنڈا لہراتا رہا تھا، جب اس پر عوام نے سخت تنقید کی تو انھوں نے بحالت مجبوری لگا لیا اور انگریزوں سے معافی مانگنے والے سب سے بڑے دیش بھکت بن گئے۔

مودی جی نے اپنی پرانی عادت کے مطابق اس ملک گیر احتجاج کو اپوزیشن کی شرارت قرار دے ڈالا، جب کہ یہ تحریک طلبا نے شروع کی اور بعد میں اس میں عام شہری بھی شامل ہوئے۔ان کے ہاتھوں میں کسی پارٹی کا جھنڈا نہیں تھا اور نہ ہی ان کا کوئی سیاسی قائد تھا۔ حتیٰ کہ اگست کرانتی میدان، ممبئی کے عظیم الشان احتجاج کے دوران جب کچھ کانگریسی لیڈر اسٹیج پر چڑھنے لگے تو عوام نے نعرے لگا کر انھیں نیچے اترنے پر مجبور کردیا۔ گزشتہ دنوں جب دہلی کے جنتر منتر میں بھی کانگریس کی قومی جنرل سکریٹری پرینکا گاندھی طلبا کے احتجاج میں شریک ہوئیں تو وہاں بھی انھیں اسی سبکی کا سامنا کرنا پڑا، طلبا نے انھیں لوٹ جانے پر مجبور کردیا۔ لیکن چونکہ مودی جی ایک ڈرپوک حکمراں ہیں، اس لیے انھیں یہ تسلیم و اعتراف کرنے میں دقت پیش آ رہی ہے کہ ان کے خلاف آج اس وقت سب سے بڑی اپوزیشن کانگریس نہیں بلکہ طلبا اور عوام ہے جو ان کے سامنے سیسہ پلائی ہوئی دیوار کی طرح کھڑی ہے۔

اس تقریر میں سب سے خطرناک حرکت مودی جی نے یہ کی کہ انھوں نے پولیس کو شاباشی دی اور کافی دیر تک دی، حتیٰ کہ ان کی حمایت میں نعرے تک لگوائے لیکن مجال ہے کہ انھوں نے پولیس سے ان 21 لوگوں کی موت کا حساب طلب کیا ہوجنھیں ملک کے مختلف علاقوں میں پولیس کی گولیوں سے اپنی زندگیاں قربان کرنی پڑیں؟ اپنےآئینی حقوق کے لیے لڑنے والے ان لوگوں کو ذکر کرنا تو دور کی بات، انھیں مارنے والی پولیس کو داد شجاعت دیتے ہوئے مودی جی نظر آئے۔ کیا ان کی یہ تقریر ملک بھر میں عوام کو مزید مشتعل کرنے کے لیے کافی نہیں ہے؟ طالبات کے گریبانوں میں ہاتھ ڈالنے والی اور انھیں لاٹھیوں سے بے رحمی سے پیٹنے والی پولیس کی پیٹھ تھپتھپاتے ہوئے مودی جی کو اپنے نعرے ‘بیٹی بچاؤ بیٹی پڑھاؤ’ کی یاد بھی نہیں آئی۔ آپ نے یہ تقریر آگ لگانے کی لیے کی تھی یا آگ بجھانے کے لیے؟ آپ جس طرح پولیس کو اپنی تقریر کے ذریعہ مزید تشدد پر اُکسا رہے تھے، عجب نہیں کہ اس کا ردعمل آنے والے دنوں میں مزید بھیانک ہوجائے اور اس کے ذمہ دار صرف آپ ہوں گے۔ آپ نے دہلی پولیس کو بطور خاص شاباشی دی ہے، لیکن کیا بطور وزیر اعظم نریندر مودی کایہ فرض نہیں بنتا تھا کہ پولیس کی اس واقعہ پر مذمت کرتے کہ جب شہریت ترمیمی بل کی حمایت میں ان کے بھکتوں نے کناٹ پلیس (دہلی) میں جلوس نکالا جس کی قیادت ان ہی کی پارٹی بی جے پی کا لیڈر کپل مشرا کررہا تھا، تو نعرہ لگایا گیا "دیش کے غداروں کو، گولی مارو سالوں کو۔”مودی جی!کیا اس بھڑکاؤ نعرے لگانے والے جلوس پر دہلی پولیس نے کوئی ایکشن لیا؟ کیا اس سے یہ واضح نہیں ہوجاتا کہ دہلی پولیس کو صرف جامعہ اور علی گڑھ کے بچوں اور دیگر احتجاجیوں پر لاٹھی ڈنڈے برسانے اور ان پر آنسو گیس چھوڑنے کے لیے آپ نے معمور کردیا ہے؟ کہا جارہا تھا کہ ملک میں 144 لاگو ہے، جس میں کوئی بھی مظاہرہ غیر قانونی ہوگا لیکن کیا آپ کے بھکت اور آپ کی حمایت میں نکلنے والے جلوس کو آپ نے 144 سے مستثنیٰ قرار دے دیا ہے؟ لیکن ظاہر ہے مودی جی تو وہی بولیں گے جو وہ ‘ہوم ورک’ کرکے آتے ہیں۔

‘شہریت ترمیمی قانون’ (CAA) پر مودی جی نے وہی گھسی پٹی باتیں دہرائیں جو ہم مظاہروں کے بعد گرگٹ کی طرح رنگ بدلنے والے بھاجپائیوں اور گودی میڈیا سے سن رہے ہیں، یعنی یہ قانون ہندوستانی مسلمانوں کے خلاف نہیں ہے بلکہ تین پڑوسی دیشوں سے آئے شرنارتھیوں کو شہریت دینے سے متعلق ہے۔ پھر وہ بار بار پڑھے لکھے لوگوں کو اور طلبا کو اسے پڑھنے اور سمجھنے کی تلقین کرتے بھی نظر آئے لیکن وہ پل بھر کے لیے اس بات پر نہیں شرمائے کہ اس ملک کے ریسرچ اسکالرز اور دانشوروں کی ڈگری ان کی طرح جعلی نہیں ہے، اور نہ وہ ان کے بھکتوں کی طرح ‘وہاٹس ایپ یونیورسٹی کے تعلیم یافتہ ہیں۔مودی جی! آپ کسے ‘مہاجر’ (شرنارتھی) اور ‘گھس پیٹھیے ‘ کا فرق سمجھا رہے تھے؟ آپ نے گاندھی جی اور سابق وزیر اعظم من موہن سنگھ کے بیانات کو مقتبس کرتے ہوئے (اس سے پہلے امیت شاہ بھی) کہتے ہیں کہ ‘پاکستان میں آستھا (عقائد) کے نام پر ظلم و جبر کے شکار اقلیتوں کو ان کی مرضی سے یہاں لانے کی بات کہی تھی۔ آپ سے پوچھنا یہ ہے کہ’ کیا گاندھی جی اور من موہن سنگھ نے کسی مخصوص مذہبی اقلیت کو اس سے باہر رکھنے کی بات بھی کہی تھی؟ کیا انھوں نے یہ کہا تھا کہ بس ‘آمنہ کے لال کو پانی نہ دیجیو؟’ اگر آپ کا مقصد ظلم و جبر کے شکار لوگوں کو اپنے ہاں بسانے کا ہے تو پھر شیعہ اور احمدیہ جیسی اقلیتیں کیوں اس میں شامل نہیں ہیں جن کی پوری کی پوری بستیاں جلا کر راکھ کردی جاتی ہیں، جنھیں سر عام قتل کردیا جاتا ہے اور جن کی عبادت گاہوں پر حملہ بولا جاتا ہے؟ یہی وہ نکتہ ہے جہاں آکر آپ کی بدنیتی آشکار ہوجاتی ہے اور لوگوں کو آپ کی غمگساری، مکاری میں بدلتی نظر آ جاتی ہے ۔

شہریت ترمیمی قانون (CAA) پر پاکستانی اقلیتوں کی بیٹیوں کے جبری نکاح ، تبدیلی مذہب پر آٹھ آٹھ آنسو بہانے والے مودی جی اس بات پر ذرا بھی نہیں شرمائے کہ ان کے اپنے ملک کی بیٹیاں ان ہی کی پارٹی کے ایم ایل اے، ایم پی اور پارٹی ورکروں کی زیادتیوں کی شکار ہیں۔ آپ نے ایک جملہ بھی ان کے خلاف کبھی نہیں بولا،شاید آپ کی نزدیک کی نظر کمزور ہے، آپ کو اپنی پارٹی کا لیڈر کلدیپ سنگھ سینگر تک نظر نہیں آیا ، پڑوسی ملکوں کی بیٹیاں نظر آ گئیں؟ اپنی بیٹیوں کو پولیس کی لاٹھیوں سے پٹوائیں گے اور پولیس کو سر عام اس پر شاباشی بھی دیں گےتو پڑوس کی بیٹیاں بھی آپ سے پناہ مانگیں گیں۔

آپ نے یہی ڈھٹائی دلتوں کے بارے میں دکھائی۔ اب چونکہ آپ کو اس ظالمانہ قانون کے خلاف ملک کے دیگر لوگوں کے ساتھ دلت بھی نظر آ رہا ہے تو آپ کو پاکستان کا دلت اچانک یاد آگیا لیکن اقوام متحدہ کی اس رپورٹ کو آپ نے آج تک درخور اعتنا نہیں سمجھا جس میں آپ کے دور اقتدار میں آپ ہی کے ملک میں رہنے والے دلتوں پر بڑھتے مظالم پر تشویش کا اظہار کیا گیا تھا۔ مجھے ڈرہے کہ آپ کسی دن اقوام متحدہ پر ہی یہ الزام نہ جڑ دیں کہ اس نے کانگریس سے ہاتھ ملالیا ہے۔دلتوں پر آپ کے دور اقتدار میں جو مظالم بڑھے ہیں، ا س کے اعداد و شمار کی رپورٹ بکھری پڑی ہے، میں یہاں صرف آپ کی توجہ 2019 میں دہلی میں ہی دلتوں کی مقدس شخصیت روی داس کے مندر کی مسماری پر مبذول کرتا ہوں، جس پر پورا دلت سماج مشتعل ہوگیا تھا اور سڑکوں پر اتر آیا۔ کیا آپ کی پسندیدہ دہلی پولیس نے ان شرپسندوں کی سرکوبی کی جنھوں نے یہ گھناؤنا کام کیا تھا اور دلتوں کے مذہبی جذبات کو سخت ٹھیس پہنچائی تھی، اورکیا آ پ نے مذہبی طور پر persecuted دلتوں پر اسی طرح آنسو بہائے جیسا کہ آج آپ پاکستان سے آنے والے دلتوں کی مظلومیت کا رونا رو کر انھیں اس احتجاجی مہم سے الگ کرنے کی بچکانہ کوشش کررہے ہیں؟ مودی جی، پہلے آپ اپنے ہی ملک کی اقلیتوں کو جو اکثریتوں کے مظالم سہہ سہہ کر زندہ ہیں، انھیں راحت دے دیجیے، انھیں تحفظ فراہم کردیجیے، پولیس کو ان پر لاٹھی برسانے کے لیے شاباشی دینی ترک کردیجیے، پھر آپ پاکستان، بنگلہ دیش اور افغانستان کے شرنارتھیوں کو مذہب کے نام پر پناہ دے کر انھیں اپنا ووٹ بینک بنانے کی سازش کیجیے گا۔ اور ایک مخلصانہ مشورہ دیتا ہوں اور وہ بھی بالکل مفت، کہ 7.9 کی GDP رکھنے والے بنگلہ دیش کے شرنارتھیوں کو جب آپ اپنے ملک میں شرن دینے کی بات کرتے ہیں تو اس وقت پوری دنیا منھ دبا کر آپ کی 4.5 GDP والے ملک پر ہنس رہی ہوتی ہے ، کیا یہ مضحکہ خیز نہیں ہے کہ جو ملک معاشی بدحالی کا شکار ہے، جہاں بیروزگاری اور مہنگائی عروج پر ہو، اس کا سربراہ اپنی حالت سدھارنے کی بجائے نسبتاً خوش حال پڑوسی دیشوں کے لوگوں کو ‘دعوت شیراز’ دیتا پھرے؟ کیا آپ ان شرنارتھیوں سے بھی یہاں پکوڑے تلوائیں گے؟

این آر سی پر بولتے ہوئے نریندر مودی نے لوگوں کا مذاق اڑانے کی کوشش کی لیکن ان کی مسکراہٹ اور ہنسی بہت پھیکی تھی،شاید اس پر ان کی کوئی تیاری نہیں تھی، لہٰذا انھوں نے بار بار ایک ہی جھوٹ بولا کہ این آر سی تو ابھی پارلیامنٹ میں پیش بھی نہیں ہوا، اس پر قانون بھی نہیں بنا تو پھر یہ ہنگامہ کیوں؟ مودی جی شاید عام ہندوستانیوں کو اپنے بھکتوں کی طرح احمق سمجھتے ہیں۔ ٹوئٹر کی صفائی تو آپ اور آپ کی پارٹی کرچکی ہے جس میں ایک نہیں متعدد بار آپ کے نیتاؤں بلکہ خود آپ کے وزیر داخلہ امیت شاہ نے زور دے کر کہا کہ این آر سی لاگو ہو کر رہے گا۔ ٹوئٹر کو گولی ماریے، پارلیامنٹ میں بھی امیت شاہ نے یہاں تک کہا تھا کہ شہریت ترمیمی قانون کے بعد این آر سی آنے والا ہے اور اسے بہرحال 2024 تک مکمل کرلیا جائے گا۔ کئی بار آپ کے وزیر داخلہ یہ بھی کہہ چکے ہیں کہ شہریت ترمیمی قانون اور این آر سی کو جوڑ کردیکھنا چاہیے لیکن جب عوام کادباؤ بڑھا تو آپ نے ٹوئٹر کی صفائی کے ساتھ ساتھ اپنے بیان کی صفائی بھی کردی لیکن افسوس آپ پارلیامنٹ میں دیے گئے بیان کو کیسے صاف کرپائیں گے، وہ تو پارلیامنٹ کے ریکارڈ کا حصہ بن گیا ہے۔ تو کیا یہ مان لیا جائے کہ ہندوستان کے عوامی احتجاج نے آپ کو ‘بیک فٹ’ پر جانے کے لیے مجبور کردیا اور آپ ڈھٹائی سے اپنی ہی بات کو جھٹلانے میں لگ گئے؟ لیکن ٹھہریے، یہ ضرور ہے کہ آپ شاید وقتی طور پر این آر سی کے متعلق تجاہل عارفانہ سے کام لے رہے ہیں لیکن اس سلسلے میں آپ کی نیت آج بھی وہی ہے جو پہلے دن تھی، اس کا ایک ثبوت آج کی تقریر میں آپ کا وہ بیان ہے کہ جو مسلمان بھارت کی مٹی میں جنما ہے، اس کے پُرکھے (اجداد) اس مٹی میں جنمے ہیں، اسے کوئی ڈر نہیں کوئی خطرہ نہیں۔ مودی جی! یہی تو وہ خطرہ ہے۔ جب کوئی شہری بشمول مسلمان دستاویز اور کاغذات کی بنا پر یہ ثابت نہیں کرپائے گا کہ اس کے اجداد یا پُر کھے اس مٹی میں جنمے ہیں تو ظاہر ہے بقول آپ کے وہ ‘گھس پیٹھیا ‘ ہی ہوگا، حتیٰ کہ جس شہری کے سرکاری ڈاکیومنٹس میں اس کے ناموں کی اسپیلنگ غلط بھی ہوجائے تو وہ کیسے ثابت کرپائے گا کہ وہ اس مٹی میں جنما ہے، آپ نے اگرچہ ناک گھما کر پکڑنے کی کوشش کی لیکن نتیجہ وہی بر آمد ہوتا ہے جو این آر سی کے تعلق سے روز اول سے عوام میں دہشت اور افراتفری چھائی ہوئی ہے۔ جب سابق صدر مملکت فخر الدین علی احمد کے نواسوں اور پوتوں کے سرکاری کاغذات اور شناختی کارڈز میں ناموں اور دیگر تفصیلات میں نقص ہوسکتا ہے جو انھیں این آر سی لاگو ہونے پر شہری ماننے سے انکار اور ‘گھس پیٹھیا’ قرار دے سکتا ہے تو ٌپھر ہما شما کس قطار میں ہیں؟

آخر میں وزیر اعظم نے CAA کو اپنے صوبوں میں لاگو نہ کرنے کا اعلان کرنے والے سربراہوں کا مذاق اڑاتے ہوئے کہا کہ وہ قانونی طور پر ایسا نہیں کرسکتے تو یہ بات قانوناً درست تھی لیکن سوال اٹھتا ہے کہ اگر وہ آخر تک اس قانون کو اپنی ریاستوں پر نافذ نہ کرنے کے فیصلے پر برقرار رہے تو آپ کیا کریں گے؟ ان تمام آٹھ نو ریاستوں پر صدر راج (President rule) نافذ کردیں گے؟ یعنی جن ریاستوں کے ووٹروں نے اپنی ریاست کے سربراہ کو چنا تھا، انھیں اپنی ضد کی وجہ سے معطل کردیں گے؟ پھر وہاں کے ووٹروں کا ردعمل کیا ہوگا؟ کیا ملک کے اتنے بڑے حصوں میں رہنے والوں کے جذبات کو آپ مشتعل کریں گے تاکہ وہ سڑکوں پر نکل آئیں اور آپ ان کی لاشیں بچھادیں؟کیا آپ ملک میں انارکی پھیلانے کی راہ ہموار کررہے ہیں؟ آپ کو ایسے حساس موضوع پر بولتے ہوئے دھیان رکھنا چاہیے کہ آپ کشمیر پر نہیں بلکہ ملک کے بیشتر صوبوں پر اپنی ضد تھوپنا چاہتے ہیں، کیا آپ اس ملک میں مزید دس کشمیر بنانے کی سوچ رہے ہیں؟پھر تو آپ کا بیرون ممالک میں ڈنکا خوب بجے گا جس کا تذکرہ آپ گزشتہ کئی برسوں سے بڑے فخر سے کررہے ہیں، اس وقت بھی پوری دنیا میں آپ ہی کا ڈنکا بج رہا ہے جس میں اقوا م متحدہ میں بجنے والے طبلے کی تھاپ بھی شامل ہے۔

آخر میں آپ نے عوام کو،طلبا کو ‘اہنسا’ (عدم تشدد) کا پاٹھ پڑھایا اور پولیس کی ‘ہنسا’ (تشدد) پر جے جے کار بھی کیا۔ شاید مودی جی کی ڈکشنری میں ‘ہنسا’ کے معنی آئینی احتجاج ہے۔

کُل ملا کر آج کی وزیر اعظم کی تقریر محض موجودہ صورت حال کی خانہ پُری ہی نہیں تھی بلکہ جس طرح انھوں نے پولیس کو ان کے کارناموں کی شاباشی دی، اپنے بھکتوں کو آشیر واد دیا، اس سے تو یہی پتہ چلتا ہے کہ ان کا جی ابھی ‘تشدد’ سے بھرا نہیں ہے ، یوں بھی امیت شاہ کچھ دنوں پہلے ہی کہہ چکے ہیں کہ جہاں تشدد کا کیچڑ ہوگا، وہیں کنول کھلتا ہے۔ سو، ہل من مزید۔

22 دسمبر, 2019 0 comment

قومی خبریں

یہ این آرسی نہیں،انارکی ہے:شتروگھن سنہا

by قندیل 20 دسمبر, 2019

written by قندیل

پٹنہ:معروف بالی ووڈایکٹر اور کانگریسی لیڈر شتروگھن سنہانے ایک نیوزچینل کو انٹرویودیتے ہوئے این آرسی اور سی اے اے پر زبردست تنقید کی ہے اور کہاہے کہ این آرسی دراصل انارکی ہے،جوپورے ملک کے امن وامان کو نقصان پہنچارہی ہے۔انہوں نے وزیراعظم مودی اور وزیر داخلہ امیت شاہ پر بھی نشانہ سادھااورکہاکہ یہ دونوں گرچہ عوامی حمایت ملنے کی وجہ سے اعلیٰ ترین عہدوں پر فائز ہیں مگراس کا مطلب یہ نہیں ہے کہ یہ دونوں ملک کے سب سے قابل لوگ ہیں،جس طرح انہوں نے بغیر سوچے سمجھے نوٹ بندی کا فیصلہ کیاتھا اسی طرح شہریت ترمیمی قانون پاس کیا ہے اور پورے ملک میں این آرسی کے نفاذ کا ارادہ رکھتے ہیں اور اب جب ملک بھرمیں احتجاجات ہورہے ہیں تو خبریں آرہی ہیں کہ یہ اس قانون پر نظر ثانی کررہے ہیں۔انہوں نے جامعہ ملیہ اسلامیہ اور علی گڑھ مسلم یونیورسٹی کے طلبہ کے ساتھ پولیس کی زیادتی کی بھی شدید مذمت کی اور کہاکہ پولیس نے مجرمانہ حرکت کی ہے اورجو لوگ اس معاملے میں ملوث ہیں ان کی نشان دہی ہونی چاہیے اورانہیں سزاملنی چاہیے،ساتھ ہی انھوں نے ملک بھر میں این آرسی اور سی اے اے کیخلاف احتجاج کرنے والے شہریوں سے اپیل کی ہے کہ وہ احتجاج کو پرامن رکھیں اور کسی قسم کے تشددسے پرہیز کرتے ہوئے اس غیر دستوری و غیر آئینی قانون کیخلاف احتجاج کریں۔

20 دسمبر, 2019 0 comment

تراجم

ہندوستانی جمہوریت کازوال(اداریہ واشنگٹن پوسٹ)

by قندیل 20 دسمبر, 2019

written by قندیل

ترجمہ:محمد امانت اللہ

ہندوستان اس وقت ایک مشتبہ دورمیں داخل ہوگیا ہےاورکسی جمہوریت میں اب تک سب سے طویل انٹرنیٹبین کاتمغہ اس ملک کےنام ہوگیاہے۔وزیر اعظم نریندر مودی کی حکومت نے اسی موسم گرما میں اچانک کشمیر کی خودمختاری کو کالعدم کیا تھا اور اس کی ریاستی حیثیت کے خاتمے کے ساتھ ساتھ ملک اور دنیا تک اس کی ڈیجیٹل رسائی بھی ختم کردی گئی تھی۔ حکام کا دعویٰ ہے کہ کشمیر میں(دیگر ظالمانہ تدبیروں کے ساتھ) بلیک آؤٹ اس لیے ضروری تھا کہ طبقاتی وفرقہ وارانہ تنازع میں الجھے ہوئے خطے کو خوشحالی کے دور میں لے جایاجائے اور یہ اس وقت تک رہے گا، جب تک کہ عوامی رابطے سے قومی سلامتی اور تحفظ کودرپیش خطرات ختم نہیں ہوجاتے ہیں۔ساڑھے چار ماہ بعد بھی 7 ملین افرادکا انٹرنیٹ اوردنیاسے رابطہ منقطع ہے۔ رپورٹس کے مطابق کشمیر کے دارالحکومت سری نگر میں ، ایک ہجوم آکر انہیں بذریعہ ٹرین70 میل دور لے جاتا ہے ، جہاں وہ اپنے جیسے اچانک پھنسے ہوئے لوگوں کا گھنٹوں لمبی لائنوں میں انتظار کرتے ہیں۔ وہ ای میل بھیجنے ، امتحانات کے لئے رجسٹریشن کرنے ، طبی معاملات میں ساتھیوں سے مشورہ کرنے یا ان کاروباروں کو بچانے کی کوشش کر تے ہیں جو اپنے گراہکوں تک نہ پہنچ پانے کی وجہ سے نیست و نابود ہورہے ہیں۔ انٹرنیٹ پر پابندی اتنے طویل عرصے تک جاری رہیہے کہ بہت سارے واٹس ایپ اکاؤنٹس غیر فعال ہونے کے سبب ڈی ایکٹیوہو گئے ہیں۔ہندوستانی ریاستوں میں انٹرنیٹ شٹ ڈاؤن کا مسئلہ پہلےسے ہی دنیا کے تمام ممالک کے مقابلے میں سب سے زیادہ ہے ، جس میں خطرناک وائرل افواہوں کو روکنے سے لے کر امتحانات میں چیٹنگ سے بچنے تک کے عذر شامل ہیں۔یہ اقدامات لوگوں کے تحفظ کی غیر جانبدارانہ کوشش کے بجائے اکثروبیشتر سیاسی احتجاج کو خاموش کرنے کے ایک آلے کے طور پر کیے جاتے ہیں۔ اکثروبیشتر معاملوں میں تشدد کے دوران انٹرنیٹ سے دور رہنا ہی زیادہ تشدد کا باعث ہوتا ہے۔لیکن کشمیر میں انٹرنیٹ کاانقطاع، اپنے دورانیے ، دائرے اور اس اعتبار سے قابل ذکرہے کہ اسے حکومت نے اپنی مسلم آبادی کی شہری آزادیوں اوراس کے وقاروعزت نفس کو کچلنے کے لئے استعمال کیا ہے۔

حکومت نے حال ہی میں ملک کے نئے شہریت کے قانون کے خلاف احتجاج کے جواب میں بھی کم از کم تین ریاستوںمیں انٹرنیٹ شٹ ڈاؤن کا حکم دیا ہے، جواس ملک کی اقلیت کو مزید حاشیے پرڈال سکتا ہے۔ چینی کمیونسٹ پارٹی کے اخبار ،The people’s Dailyمیں اس ہفتے ایک مضمون شائع ہواہے ،جس کاعنوان ہی لرزہ خیزہے ’’”ہندوستان میں انٹرنیٹ بندی خود مختار ملکوں کے لئے معمول کی بات ہے‘‘۔”اس میں کوئی حیرت کی بات نہیںکہچین جس عالمی اتحاد کاخواب دیکھ رہاہے،اس میں ہندوستان اس کا ایک قابل قدر ساتھی ہوگا، جہاں ممالک انٹرنیٹ پر شدید کنٹرول ، احتسابی عمل اور نگرانی کے ذریعے عوامی آزادی کو کچلاکریں گے۔ ہوسکتا ہے کہ ہندوستان نے کسی جمہوری ملک کے ذریعے سب سے طویل انٹرنیٹ بین کرنے والے ملک کا اعزاز حاصل کرلیا ہو؛ لیکن اہم سوال یہ ہے کہ اس مذموم راستے پر چلنے والا ملک کب تک صحیح معنوں میں جمہوری رہ سکتاہے؟

20 دسمبر, 2019 0 comment

تجزیہ

لمبی ہے غم کی شام مگر شام ہی تو ہے

by قندیل 11 دسمبر, 2019

written by قندیل

عبدالعزیز
مودی- شاہ کی دوسری اننگ کے سات مہینے پورے ہوئے لیکن ان سات مہینوں میں پورے ہندستان کو دونوں نے مل کر تگنی کا ناچ نچادیا۔ گزشتہ روز شہریت ترمیمی بل پاس ہونے کے بعد ملک میں ان دونوں کے ذریعہ جو اندھیرا پھیل رہا تھا وہ مزید پھیل گیا اور گہرا ہوگیا۔ ایسا نہیں ہے کہ اندھیرے کے بعد روشنی یا رات کے بعد صبح نہیں ہوتی ؎ ’لمبی ہے غم کی شام مگر شام ہی تو ہے‘۔ دوسری بار اقتدار پاتے ہی بی جے پی مینی فیسٹو کے مطابق دونوں نے کئی کام انجام دیئے۔ سب سے پہلے ’تین طلاق‘ کا قانون بنایا۔ اس کے بعد 370 اور 35Aدفعات ہٹاکر کشمیر کو دو حصوں میں تقسیم کردیا اور کشمیریوں کو ہر طرح کی آزادی اور حق سے محروم کردیا۔ چار مہینے سے زائد ہوگئے مگر شروع دن سے آج تک صورت حال جوں کا توں ہے۔ دنیا کو بتایا جارہا ہے کہ کشمیر میں حالات پورے طور پر نارمل ہیں۔ جو سفید جھوٹ کے سوا کچھ نہیں ہے۔ بی جے پی کے انتخابی منشور میں رام مندر کی تعمیر کا ذکر بار بار کیا گیا ہے۔ گزشتہ 9نومبر کو سپریم کورٹ نے اپنے الٹے سیدھے فیصلے کے ذریعے بابری مسجد کی زمین سنگھ پریوار کے ان شرپسند عناصر کے حوالے کردیا جنھوں نے بابری مسجد کو منہدم کیا تھا۔ آسام میں ’این آر سی‘ کی فائنل لسٹ کی اشاعت بھی 30 اکتوبر کو کردی گئی؛ حالانکہ بی جے پی کے لیڈر اور کارندے 19لاکھ میں جو 12 لاکھ ہندوؤں کو شہریت کے قومی رجسٹر سے باہر کردیا گیا ہے اس سے خوش نہیں ہیں۔ یہی وجہ ہے کہ آناً فاناً شہریت ترمیمی بل لوک سبھا اور راجیہ سبھا میں بی جے پی نے پاس کرالیا۔ اب یہ بل چند ہی مہینوں میں پورے طور پر قانون بن جائے گا۔ قانون بننے کے بعد ہی پہلا کام بی جے پی والے آسام کے ان بارہ لاکھ ہندوؤں کو جو شہریت کے قومی رجسٹر سے باہر ہیں ان کو شہریت فراہم کرنے کی کوشش کریں گے۔ جن مسلمانوں کے پاس شہریت کے دستاویز نہیں ہیں ان کو پریشان کرنے کی کوشش شروع ہوجائے گی۔ جن کے پاس دستاویز ہے بھی ان کو پریشانیوں کے مرحلوں سے گزرنا پڑے گا۔
کانگریس کی صدر محترمہ سونیا گاندھی نے 11 دسمبر کو ہندستان کی تاریخ کا سیاہ دن قرار دیا ہے۔ اپوزیشن کے دیگر لیڈروں نے بھی 11دسمبر کو جمہوریت اور دستور کیلئے برا دن قرار دیا ہے۔ کانگریسی لیڈر کپیل سِبّل نے راجیہ سبھا میں امیت شاہ کی طرف اشارہ کرتے ہوئے کہا ہے کہ بی جے پی کے ایجنڈے سے وہ بخوبی واقف ہیں۔ یہ سب کچھ جو مودی اور شاہ کر رہے ہیں وہ ہندو راشٹر بنانے کی ایک کوشش ہے۔ سابق وزیر داخلہ پی چدمبرم نے راجیہ سبھا میں کہا ہے کہ بی جے پی اپنے ہندوتو ایجنڈے کو مکمل کرنا چاہتی ہے۔ کانگریس کی طرف سے یہ اشارہ بھی ہے کہ سپریم کورٹ میں اس بل کو چیلنج کیا جائے گا۔ بل دستور کی دفعات 14، 15 اور 21 کے صریحاً خلاف ہے، جس میں ہر ہندستانی باشندے کو قانون کی نگاہ میں برابر قرار دیا گیا ہے۔ مذہب یا کسی بھی بنیاد پر بھید بھاؤ یا امتیاز کو خلافِ قانون کہا گیا ہے۔ بل میں مذہبی امتیاز رکھا گیا ہے۔ سپریم کورٹ سے امید کی جاسکتی ہے کہ اس قانون کو کالعدم قرار دیدے۔ اگر سپریم کورٹ ایسا نہیں کرتی اور بابری مسجد مقدمے جیسا فیصلہ کرتی ہے تو ایک بھیانک مستقبل دکھائی دے گا۔ سیاسی جماعتوں میں جو جماعتیں فرقہ پرستی اور فسطائیت کے خلاف ہیں، جمہوریت، سیکولرزم اور سوشلزم پر جو دستور ڈھانچے کے بنیادی عناصر ہیں ان پر یقین رکھتی ہیں وہ فسطائیت اور فرقہ پرستی کے خلاف جنگ آزادی کی طرح لڑائی لڑسکتی ہیں۔ سول سوسائٹی میں جو لوگ ہندستان میں انسانی حقوق، آزادی اور مساوات کے حامی ہیں اور فسطائیت اور فرقہ پرستی کے خلاف ہیں امید ہے وہ بھی اس میدان ِجنگ میں فسطائیت اور فرقہ پرستی کے خلاف لڑیں گے۔
مسلمانوں کی ذمے داریاں: جہاں تک مسلمانوں کا تعلق ہے تو ابھی تک کوئی ایسی قیادت ابھر کر سامنے نہیں آئی ہے کہ سارے مسلمان اس کی قیادت کو تسلیم کرتے ہوئے سنگھ پریوار کی انسانیت دشمنی اور مسلم دشمنی کے خلاف لڑائی کیلئے تیار ہوں۔ کچھ جماعتیں ضرور ہیں جو اپنی حیثیت اور قدرت کے مطابق مہم چلا رہی ہیں۔ جمعیۃ علماء ہند کے لیڈر مولانا ارشد مدنی نے قانونی لڑائی کا اعلان کیا ہے۔ جماعت اسلامی ہند ملک گیر پیمانے پر ’این آر سی‘ اور ’سی اے بی‘ کے خلاف تحریک چلا رہی ہے۔ دیگر پارٹیوں نے بھی اپنی اپنی حیثیت سے کچھ فیصلہ کیا ہوگا مگر ان کا فیصلہ ابھی تک عوام یا خواص میں ظاہر نہیں ہوا۔ مجلس اتحاد المسلمین کے رہنما اسدالدین اویسی نے لوک سبھا میں اس بل کی سخت مخالفت کی ہے اور ایوان کے اندر ممبران کی موجودگی میں اس بل کو ٹکڑے ٹکڑے بھی کیا ہے۔ اگر دیکھا جائے تو اسد الدین اویسی اس معاملے میں سب سے آگے نظر آتے ہیں۔ لیکن ان کا دائرہ محدود ہے۔ حیدر آباد میں ان کا کافی اثر ہے۔ ایک دو ریاستوں میں ان کے ایک دو ایم ایل اے بھی ہیں۔ دیگر ریاستوں میں بھی وہ جگہ بنانا چاہتے ہیں۔ اسد الدین اویسی یا ان کی پارٹی اس قدر طاقتور نہیں ہے کہ اکیلے وہ یا ان کی پارٹی اس جنگ کو لڑسکے۔ ان کی پارٹی کیڈر بیس بھی نہیں ہے۔
ہندستان میں مسلمانوں میں اگر کوئی پارٹی منظم، مستحکم اور کیڈر بیس ہے تو وہ جماعت اسلامی ہے۔ اگر ساری بڑی شخصیتیں اور جماعتیں ایک مشترکہ پلیٹ فارم سے فسطائیت اور فرقہ پرستی کے خلاف بھرپور طریقے سے جرأت مندانہ مظاہرہ یا مہم کا آغاز کرتی ہیں تو اس کے دور رس اثرات ہوسکتے ہیں۔ جو اپنی مدد آپ نہیں کرتا اس کی مدد خدا بھی نہیں کرتا اور دوسرے انسان بھی نہیں کرتے۔ اسی لئے کہا گیا ہے کہ "Self help is the best help” (اپنی مدد آپ کرنا سب سے بہتر مدد ہے)۔ قرآن میں اللہ تعالیٰ نے کہا ہے کہ ؎ ’خدا نے آج تک اس قوم کی حالت نہیں بدلی…… نہ ہو جس کو خیال آپ اپنی حالت کے بدلنے کا‘ (منظوم ترجمہ: مولانا ظفر علی خان)۔مسلمانوں کو پہلا کام مشترکہ کوشش مشترکہ پلیٹ فارم سے کرنے کی ضرورت ہے۔ دوسرا کام غیر مسلموں میں جو لوگ مخلصانہ طور پر سنگھ پریوار سے پنجہ آزمائی کر رہے ہیں ان کابھی بھرپور ساتھ دینا چاہئے۔ ان دوکاموں کے علاوہ جو سب سے بڑا کام ہے وہ یہ ہے کہ جو لوگ غریب، مفلس اور کمزور ہیں، اَن پڑھ ہیں ان کے دستاویزات کو تیار کرنے میں معاونت کرنا۔ ایسے لوگ بہتوں کے پڑوسی ہیں، بہتوں کے ماتحتین ہیں اور بہتوں کے عزیز و اقارب ہیں۔ اگر سب مل کر اپنے قریبی لوگوں کی مدد کرتے ہیں تو نہ صرف غیروں کی مدد ہوگی بلکہ اپنی مدد بھی ہوگی اورملت کا استحکام ہوگا۔
گزشتہ روز عارفہ خانم شیروانی نے جواہر لعل نہرو یونیورسٹی کے طالبعلموں اور دانشوروں کو خطاب کرتے ہوئے کہاکہ ”ان کے ڈرائیور نے کہا کہ آپ کے پاس تو سارے کاغذات ہوں گے، آپ تو اپنے آپ کو بچا لیں گی لیکن میرے پاس اور میرے خاندان کے لوگوں کے پاس کوئی کاغذ نہیں ہے اور نہ میرے بھائی کے پاس کوئی کاغذ ہے۔ ہم لوگ کیسے بچیں گے؟ کیا ہم لوگوں کو آپ بچالیں گی؟ میرا ڈرائیور جو مجھ سے یہ سوال کر رہا تھا تو اس وقت یا ابھی میرے پاس کوئی جواب نہیں ہے کہ میں اپنے آپ کو بچاسکوں گی کہ نہیں؟ اس کو بچاسکوں گی کہ نہیں؟“میرے خیال سے جو لوگ سوجھ بوجھ رکھتے ہیں ان کو اس طرح کی بات نہیں کرنی چاہئے کیونکہ چوپٹ راج تو ضرور ہے مگر ابھی ہندستان کو اندھیر نگری نہیں کہا جاسکتا۔ ابھی بہت سی امیدیں ہندستان جیسے ملک سے وابستہ ہیں۔ انھوں نے خود ہی کہا کہ جواہر لعل نہرو یونیورسٹی کا وجود یا ہرش مندر جیسی شخصیتیں ہندستان کے اس اندھیرے میں امید کی کرن ہیں۔ ایسی بہت سی امید کی کرنیں پورے ملک میں پھیلی ہوئی ہیں۔ سب مل کر روشن ستارے کا کام انجام دے سکتی ہیں۔ مسلمانوں کیلئے قرآن مجید اور سیرت رسولؐ سے رہنمائی ملتی ہے کہ مصائب اور مسائل جتنے بھی بھیانک ہوں ہمیں ڈرنا نہیں چاہئے۔ اگر ڈرنا ہے تو صرف خدا سے ڈرنا ہے۔ اگر خدا سے سچا لگاؤ یا تعلق پیدا ہوجائے اور خوف و ڈر دلوں میں سماجائے توکسی اور کے ڈر کے سمانے کی جگہ دل میں پیدا ہوہی نہیں سکتی۔ ہندستان کے جانباز سپاہی اور آزادیِ ہند کے عظیم رہنما مولانا محمد علی جوہرؔ نے سچ کہا ہے کہ ؎ ’کیا ڈرہے جو ہو ساری خدائی بھی مخالف…… کافی ہے اگر ایک خدا میرے لئے ہے‘۔ ؎ ’توحید تو یہ ہے کہ خدا حشر میں کہہ دے…… یہ بندہ دو عالم سے خفا میرے لئے ہے‘۔
مولانا محمد علی جوہرؔ نے پہلے توحید پرستی کی تعلیم دی ہے کہ آدمی ایسا توحید پرست ہوجائے اور ایسا حق پرست ہوجائے کہ اگر ساری دنیا مخالف ہوجائے تو اسے ڈرنے کی ضرورت نہیں ہے۔ اس لئے کہ خدا کی طاقت، عظمت اور اس کی قدرت کے سامنے کسی شئے یا ظاہری طاقت کی کوئی حیثیت نہیں ہے۔ یہ دل میں اگر مسلمان یہ بسالے اور ہاتھ پر ہاتھ دھرے نہ بیٹھے بلکہ الٰہی احکامات کی مکمل پابندی کرے تو اسے بھی کسی چیز یا کسی بھی طاقت سے ڈرنے کی ضرورت نہیں ہے۔ انسان میں ڈر صرف اس لئے پیدا ہوتا ہے کہ وہ خدا سے بے نیاز ہوجاتا ہے اور جب خدا سے بے نیاز ہوجاتا ہے، خدا سے ڈرنا چھوڑ دیتا ہے تو ہر ایک سے ڈرتا رہتا ہے۔ یہاں تک کہ سائے سے بھی ڈرتا ہے۔ لیکن ایک خدا کا ڈر اور ایک سجدہ انسان کو ہزاروں سجدوں سے نجات دے دیتا ہے۔
E-mail:[email protected]
Mob:9831439068

11 دسمبر, 2019 0 comment

قومی خبریں

غالب انسٹی ٹیوٹ کی گولڈن جبلی تقریبات20تا22/دسمبرمنعقدہوں گی

by قندیل 11 دسمبر, 2019

written by قندیل

نئی دہلی: غالب انسٹی ٹیوٹ اپنے علم و ادب کے50 سالہ سفر کو طے کرچکا۔1969 ء میں غالب کی وفات کے100 سال مکمل ہونے پر سابق وزیراعظم آنجہانی اندرا گاندھی، مرحوم فخرالدین علی احمد اورمرحوم ڈاکٹر ذاکر حسین نے ایک عظیم تقریب کا اہتمام کیا تھا۔اس تاریخی تقریب کے بعد غالب انسٹی ٹیوٹ کی بنیاد رکھی گئی۔1069ء سے ان ہی تواریخ میں نہایت ہی پُروقار اندازمیں غالب تقریب کا اہتمام کیا جاتارہاہے۔شاید پوری اردو دنیامیں یہ واحد تقریب ہے جو بغیر کسی وقفے کے 50سال سے ہورہی ہے۔ 2019 کا سال اس اعتبار سے بھی غالب انسٹی ٹیوٹ کے لیے اہم ہے کہ اس سال ادارہ گولڈن جبلی تقریبات کا اہتمام کر رہاہے۔ ان تقریبات میں بین الاقوامی سمینار ”غالب کی شاعری میں نفی و اثبات“کے موضوع پر منعقد کیاجائے گا۔ سمینارکا افتتاح 20 دسمبرشام ساڑھے پانچ بجے ہوگا جس میں جناب جسٹس اے۔ایم۔احمدی،سابق چیف جسٹس سپریم کورٹ آف انڈیا کے ہاتھوں غالب انعامات کی تقسیم ہوگی۔تقریب کی صدارت جناب جسٹس بدردرریز احمد،سابق چیف جسٹس،جموّں اینڈ کشمیر ہائی کورٹ فرمائیں گے۔ممتاز مؤرخ پروفیسرہربنس مکھیا تعارفی کلمات پیش کریں گے۔عہدِ حاضر کے ممتازنقاد پروفیسرگوپی چند نارنگ سمینارکاکلیدی خطبہ پیش کریں گے۔ غالب انعامات2019 پروفیسرعلیم اللہ حالی، پروفیسربلقیس فاطمہ حسینی، پروفیسرخالد محمود،پروفیسرشہپر رسول، جناب مظفر علی اورڈاکٹرنریش کو دیے جائیں گے۔یہ انعامات 75ہزار روپے نقد،ایک تمغہ اور سند پر مشتمل ہیں۔ سمینارکی افتتاحی تقریب میں غالب انسٹی ٹیوٹ کی تقریباً 15 نئی مطبوعات،سوینئر،غالب انسٹی ٹیوٹ کی علمی اور ادبی خدمات کے اعتراف میں تقریباً 50 علماکے مضامین کا خصوصی وولیوم، کلینڈر، ڈائری اورسالانہ سرگرمیوں کا اجرا بھی ہوگا۔سمینار کی افتتاحی تقریب کے اختتام پرمشہور و معروف غزل سنگر جناب طلعت عزیزغالب کی غزلیں پیش کریں گے۔

اس دفعہ سمینار میں ہندوستان کے علاوہ بیرون ممالک کے دانشور حضرات بھی شرکت فرمائیں گے۔ جن حضرات کی آمد متوقع ہے ان میں کینڈا سے ڈاکٹرتقی عابدی، جرمنی سے عارف نقوی، مصر سے پروفیسر جلال مصطفٰے الحفناوی،ڈاکٹر مروہ لطفی صلاح السباعی ہیکل اور ہندوستان سے پروفیسر انیس اشفاق، پروفیسر علی احمد فاطمی، پروفیسرابوالکلام قاسمی،پروفیسر صغیر افراہیم،پروفیسر قمرالہدیٰ فریدی،ڈاکٹرامتیاز احمد، ڈاکٹر نریش، ڈاکٹر شمیم طارق، ڈاکٹر یحییٰ نشیط،شین کاف نظام، ڈاکٹرثروت خان،پروفیسریعقوب یاور،ڈاکٹر غضنفر اقبال،ڈاکٹرمعراج رعنا، ڈاکٹرجاوید رحمانی،پروفیسر انیس الرحمن،ڈاکٹرسلیل مشرا،ڈاکٹرخالد علوی،ڈاکٹر تاریکا پربھاکر، ڈاکٹر پرویزشہریار،ڈاکٹر سنیل ترویدی، ڈاکٹرشفیع ایوب، ڈاکٹر محمدکاظم، پراگ ترپاٹھی،ڈاکٹر فرحت نادر رضوی قابلِ ذکر ہیں۔سمینار میں سات اجلاس ہوں گے جن میں سید شاہد مہدی،پروفیسر ارتضیٰ کریم، پروفیسر ابنِ کنول،پروفیسر شہپر رسول،پروفیسر انور پاشا، پروفیسر خواجہ محمد اکرام الدین، ڈاکٹر اطہر فاروقی،پروفیسر شہزاد انجم صدارتی فریضہ انجام دیں گے۔اختتامی اجلاس کی صدارت پروفیسر اخترالواسع کریں گے اور مہمانِ خصوصی وی۔این۔رائے بھی موجود رہیں گے۔

سمینار کے دوسرے روز یعنی21/دسمبر2019ء کوشب میں غالب آڈیٹوریم میں ایک عالمی مشاعرہ کا بھی اہتمام کیاگیاہے جس میں ڈاکٹر تقی عابدی، ڈاکٹر عارف نقوی،پروفیسر جلال مصطفٰے الحفناوی،جناب عتیق انظر اور مقامی شعرا میں پروفیسر وسیم بریلوی،ڈاکٹر نواز دیوبندی،پروفیسرشہپر رسول، ڈاکٹرشکیل حسن شمسی، شین کاف نظام،پروفیسرمہتاب حیدر نقوی، پاپولر میرٹھی، پروفیسر سراج اجملی، اقبال اشہر، منصورعثمانی، پروفیسراحمد محفوظ،ڈاکٹرراشد انور راشد،ڈاکٹر نصرت مہدی، فاروق جائسی،ملکہ نسیم، ملک زادہ جاوید، افضل منگلوری، معین شاداب،ڈاکٹر وسیم راشد،خورشید حیدر، راشد جمال فاروقی، ڈاکٹر عمیر منظر، صہیب احمد فاروقی، سلیم امروہوی اور خالد اعظمی موجود رہیں گے۔ نظامت کا فریضہ شین کاف نظام اور معین شاداب انجام دیں گے۔صدارت کا فریضہ ڈاکٹر سید تقی عابدی انجام دیں گے اورمہمانِ خصوصی کے طورپر ڈاکٹر ایس۔ فاروق موجودرہیں گے۔غالب تقریبات کے اختتام پر22/دسمبر کو شام چھ بجے ہم سب ڈرامہ گروپ(غالب انسٹی ٹیوٹ) کی طرف سے معروف ڈرامہ نگارجناب دانش حسین کا تحریر کردہ اُردو ڈرامہ ”داستانِ اجلال جادو“ دانش حسین کی رہنمائی میں اسٹیج کیا جائے گا۔

11 دسمبر, 2019 0 comment