قندیل آن لائن

بحیثیت طالب علم ہمیشہ یہ جاننے کا خواہاں رہا کہ مسلم لیڈرشپ کے زمرے میں کون لوگ آتے ہیں۔ انتخابات میں حصہ لینے والے خواتین و حضرات ؟ سیاسی پارٹیوں سے وابستہ سرگرم افراد ؟ مسلمانوں کے مسائل کو لے کراٹھنے والے داڑھی ٹوپی والے علما و غیر علما جو کبھی
مکمل سنجیدگی دیانتداری دانشمندی کے ساتھ اور کبھی دانستہ غیر دانستہ غلط سمت میں عوام کو لے جاتے ہیں، کبھی مخلصانہ کوشش تو کبھی مصلحت کی دبیز چادر میں لپیٹ کر غلط اقدام کرتے ہیں ؟ یا روشن خیال عصری دانش گاہوں کے اعلی تعلیم یافتہ ؟ یا مسلم معاشرے میں موجود ذہین اور انگریزی میں زبان و قلم سے راۓ عامہ ہموار کرنے کی صلاحیت رکھنے والے؟ یا موجودہ اور سابق ججز، وکلا اور پولیٹکل سائنس کے پروفیسرز؟ یا سیاسی تجزیہ نگار خواتین و حضرات ؟ یا مسلم ریٹائرڈ وائس چانسلرز ، بیورو کریٹس اور ایلیٹس ؟
ہر بار ہمیں ہیں ہدف سنگ ملامت
الزام کسی اور کے سر کیوں نہیں جاتے
پچھلے دنوں بابری مسجد قضیہ پر فیصلہ آنے سے عین قبل بعض سابق وائس چانسلر بیورو کریٹس وغیرہ ایک یا دو بار دہلی اور لکھنؤ کے فائیو اسٹار میں پرکٹ ہوئے اور بحیثیت کل ہند مسلم لیڈرس انلکچولس متعارف کراتے ہوئے پریس کو مخاطب کیا اور مصالحت کی تجویز رکھی۔ظاہر ہے وہ تجویز جمہور مسلم کے لئے ناقابل قبول تھی‌۔ اس کے بعد وہ آل انڈیا مسلم لیڈرشپ تنظیم ہوا میں محلول evaporate ہو گئی۔ کیا تنظیم کسی خاص مقصد اور متعین موضوع اور چند دن اور گھنٹے کے لئے وجود میں آتی ہے اور چند گھنٹوں میں مقصد کی برآری نہ ہو تو بوریا بستر گول کر لیتی ہے؟ بھومی پوجن ہو یا کسی بھی مذہب کو فروغ دینے کا کاریکرم اس میں حکمران وقت کی شرکت اور سرکاری مشینری کا استعمال دستور کی ان دیکھی کرنا ہے ایسا کئی سیاسی تجزیہ نگار، ماہرین دستور اور بعض غیر جانبدار صحافی لکھ رہے ہیں۔ ایسے وقت میں وہ مسلم دانشور، صحافی، تجزیہ نگار وکلا، ججز اور ماہرین پولیٹیکل سائنس وغیرہ خلوت نشینی میں عافیت سمجھتے ہوئے خاموش کیوں ہیں؟ وہ اپنی رائے اپنا تجزیہ کیوں نہیں سامنے رکھتے ہیں؟
کانگریس کے سینیئر ترجمان مسلم لیڈر شکیل صاحب نے بابری مسجد پر عدالت کے فیصلے پر کل لب کشائی کی زحمت کی ہے۔ وہ ناقابل ستائش اس لئے ہے کہ اب وہ اقتدار میں ہیں اور نہ ‘کل ہند اپوزیشن ‘ کانگریس میں رہتے ہوئے یہ بات کہی تھی۔ کاش یہ باتیں وہ کانگریس میں رہتے ہوئے کرتے ! اسی طرح کانگریس کے بعض سینیئر مسلم لیڈرس مرکزی وزیر ریاستی وزیر اور بیوروکریٹس ریٹائرمنٹ کے بعد مسلم ایشوز پر زبان کھول رہے ہیں،کتابیں لکھ رہے ہیں،کانگریس کی کرتوتوں کو سیکولرزم کے چہرے پر بدنما داغ کہ رہے ہیں، ان کی آرا کی مصداقیت اس لئے مشکوک ہے کہ جب وہ کہنے کی صلاحیت رکھتے تھے پارٹی کے اقدامات پر مؤثر ہو سکتے تھے اس وقت وہ چپ رہے۔
مسلم دانشوروں اور قلم کاروں کا ایک بہت بڑا طبقہ روایتی ملی قیادت پر ہمیشہ کی طرح بابری مسجد قضیہ میں بھی لعن طعن کر رہا ہے۔ روایتی ملی قیادت نے اپنی محدود صلاحیت اور دینی بیک گراؤنڈ کے باوجود قضیہ کی پیروی کے لئے بہترین وکلا کی خدمات حاصل کیں۔ اس پوری مدت میں یہ تنقید کرنے والے کہاں تھے، کیوں نہیں اپنی صلاحیت اور لیاقت کے مطابق اپنی خدمات پیش کیں؟
تنقید، تنقیص، عیب جوئی، الزام تراشی اور برہنہ گفتاری کےذریعے ملی کام نہیں ہوتا اس کے لئے عوام سے جڑنا زمینی پکڑ بنانا ہوتا ہے۔خدمت کے جذبہ کے ساتھ ساتھ کام کرنے سے متبادل وجود میں آئے گا۔

(مضمون میں پیش کردہ آرا مضمون نگارکے ذاتی خیالات پرمبنی ہیں،ادارۂ قندیل کاان سےاتفاق ضروری نہیں)

میں نے آن لائن تدریس کا آغاز سولہ سال پہلے سنہ 2004
میں کیا تھا۔ اُس زمانے میں یاہو میسنجر کے ذریعے تعلیم کا سلسلہ شروع ہوا، بھارت میں اس وقت یاہو میسنجر نوجوان لڑکے لڑکیوں میں گپ شپ کرنے کے لیے جانا جاتا تھا۔ انٹرنیٹ شہروں میں بھی سست ہوا کرتا تھا، اس لیے یہ "شب گزار لوگ” لکھ کر ہی کام چلاتے تھے۔ امریکہ میں براڈ بینڈ سروس متعارف ہو چکی تھی، اس لیے میسنجر کی آڈیو سروس سے کام چل جایا کرتا تھا۔ 2003 میں اسکائپ متعارف ہوچکا تھا، جب ہم اس سے متعارف ہوے تو ہم نے میسنجر کو چھوڑ کر اسکائپ کو اپنا لیا۔ اس میں ویڈیو کی بھی عمدہ سہولت تھی۔ لیکن ایک آن لائن درس گاہ کے لیے جو لوازمات درکار تھے وہ دستیاب نہ تھے، یہاں تک کہ دوہزار نو میں ایک خطیر رقم خرچ کرکے دہلی کی ایک آئی ٹی کمپنی سے اپنا ایک سافٹ ویئر تیار کرایا جس میں وہ تمام لوازمات جیسے وائٹ بورڈ، اسکرین شیرنگ اور کلاس ریکارڈنگ وغیرہ تمام سہولیات تھیں، لیکن بھارتی کمپنیوں کے مشہور زمانہ غیر پیشہ ورانہ رویوں کی وجہ سے سالانہ اس سافٹ ویئر کو چلانے پر بڑی رقم خرچ کرنے کے باوجود میں زیادہ عرصہ تک اس کو باقی نہ رکھ سکا، یہاں تک کہ دو ہزار گیارہ میں "وِز آئی کیو” نامی ایک آن لائن تعلیمی سافٹ ویئر متعارف ہوا اور میں نے اس کا استعمال گزشتہ سال تک کیا۔ اب زوم، اسٹریم یارڈ اور گوگل میٹ کا دور چل رہا ہے اور ہم بھی زمانے کے ساتھ بدل رہے ہیں، لیکن ہمارے لیے یہ تبدیلی ممکن بھی ہے اور نسبتا آسان بھی۔

یہ پوری کہانی اس لیے لکھی تاکہ قارئین کو میرے سولہ سالہ آن لائین تدریسی تجربہ کا اندازہ ہوسکے۔ اپنے اس تجربے کی روشنی میں کہہ سکتا ہوں کہ مدارس کے نصاب کی آن لائن تدریس ان علاقوں میں جہاں مدارس نہیں ہیں یا ان افراد کے لیے جن کا اپنی گھریلو ذمےداریوں کی وجہ سے مدارس میں داخلہ لینا تقریبا ناممکن ہے، مناسب ہی نہیں بلکہ وقت کا تقاضہ ہے۔ اسی طرح آج کے دور میں مدارس کے طلباء کی ایک بڑی تعداد کرونا کی وجہ سے اپنے گھروں پر فارغ بیٹھی ہے، اگر ان طلبہ کے لیے قلیل مدتی علمی فکری اور لسانی کورسز کی آن لائن تعلیم کا انتظام ہو جائے تو یہ ان کے وقت کا بہترین استعمال ہوگا، یا چھوٹے مدارس عارضی طور پر اپنے مدرسین وطلبہ کی خاطر اگر آن لائن تعلیم کا آغاز کردیں تو بھی درست ہے، لیکن کچھ حلقوں کی طرف سے یہ بات شدت کے ساتھ دہرائی جا رہی ہے کہ بڑے مدارس میں بھی آن لائن تعلیم کا آغاز کر دینا چاہیے۔ ایک صاحب صاحب ٹی وی ڈبیٹ میں یہ کہتے ہوے بھی پائے گئے کہ ایک زمانے میں مذہبی طبقے نے پرنٹنگ پریس کی مخالفت کی تھی تو دیکھو آج ہم دوسروں کے مقابلے میں ترقی کے میدان میں کتنے پیچھے رہ گئے ہیں۔ ان کے مطابق آج اگر ہم نے آن لائن تدریس کا منہج اختیار نہیں کیا تو ہم دوسروں کے مقابلے میں پھر پیچھے رہ جائیں گے۔

بھارت میں جہاں آج بھی بیشتر علاقوں میں انٹرنیٹ کی اچھی سہولت موجود نہیں ہے اور اگر ہے تو ایسے لوگوں کی ایک بڑی تعداد بھی ہے جو اپنی مالی حیثیت کی بنا پر اسمارٹ فون نہیں رکھ سکتی، یہ وہ ملک ہے جہاں لائٹ بھی لگژری اشیاء میں شامل ہے، انٹرنیٹ تو بعد کی چیز ہے۔ پچھلے ماہ گجرات کے ایک بڑے مدرسے کے استاذ نے مجھ سے رابطہ کیا تاکہ ان پریشانیوں کا تکنیکی حل نکالا جا سکے۔ لیکن خراب انفراسٹرکچر کی وجہ سے کسی بھی طرح کا حل بھارت جیسے پچھڑے ہوئے ملک میں ممکن نہیں ہے۔ نیز تعلیم کا اگر کوئی حل نکل بھی گیا تو تربیت کا حل کیسے نکلے گا۔

دوسری اہم بات یہ ہے کہ ہمارے مدارس ہمارا شعار ہیں اور دشمن کے لیے آنکھ کا شہتیر۔ ان کی دیرینہ تمنا ہے کہ مدارس کل کے بجائے آج بند ہو جائیں۔ جس ملک میں تبلیغی جماعت کے اجتماعات سے کرو نا پھیلتا ہو، لیکن سپریم کورٹ کے حکم سے جگنناتھ یاترا میں کرونا کو داخلے کی اجازت نہ ہو، جہاں عید کی نماز سے کورونا کے انتشار کا سخت خطرہ ہو، لیکن شہید بابری مسجد کی مقبوضہ زمین پر مندر کی سنگ بنیاد کے موقع پر این ایس جی اور بلیک کمانڈوز کی سخت سکیورٹی کی وجہ سے کورونا کو داخلے کی اجازت نہ ہو، ایسا ملک جہاں ایک تعداد کورونا کے علاج کے طور پر تھالی نہ پیٹنے والوں کو غدار وطن کہتی ہو، ایسے ملک میں مدارس ہی امت مسلمہ کے تشخص کا أخری سہارا ہیں۔ اگر آپ یہ سمجھ رہے ہیں کہ مہینے دو مہینے میں تمام مدارس حسب سابق کھل جائیں گے اور اسلام کے ان قلعوں میں وہی ایمانی ہوائیں پھر چلنے لگیں گی، جو چند ماہ پہلے تک چل رہیں تھی، تو آپ خواب غفلت میں ہیں۔ ایسی صورت حال میں آن لائن تدریس کا آغاز دراصل تعلی پسندی کا شکار قوم کو یہ کہنے کا موقع دے گا کہ جب آپ کے یہاں تعلیم جاری ہے تو پھر آپ مدارس کو دوبارہ کھلوا کر، کورونا کیوں پھیلانا چاہتے ہیں۔ اس لیے بڑے مدارس اس طریقہ کار کو اختیار کیے بغیر ہی مستقبل میں تعلیم کا حسب سابق آغاز کرنے کے لیے دباؤ بنانے کی پوزیشن میں ہوں گے۔ ویسے بھی حالات پر نظر رکھنے والے کھل کر نہ سہی لیکن نجی مجلسوں میں یہ کہنے لگے ہیں کہ مدارس کا پچھلی حالت پر لوٹنا اب بہت مشکل ہے۔ کورونا ضرور موجود ہے، لیکن کورونا کی أڑ میں "چانکیہ نیتیوں” کی ہولناکی کسی وبا سے کم نہیں ہے اور اصل مسئلہ یہ ہے کہ "قضية ولا أبا حسن لها”، پیچیدہ معاملہ درپیش ہے لیکن اس کو حل کرنے کے لیے کوئی علی رضی اللہ عنہ جیسا زیرک اور قائد موجود نہیں ہے۔

(مضمون میں پیش کردہ آرا مضمون نگارکے ذاتی خیالات پرمبنی ہیں،ادارۂ قندیل کاان سےاتفاق ضروری نہیں)

ڈاکٹر مشتاق احمد
پرنسپل، سی ایم کالج، دربھنگہ
موبائل:9431414586
ای میل: [email protected]

کورونا وائر س نے پورے انسانی معاشرے کی زندگی کو مفلوج ومعطل کردیا ہے۔ دنیا کا کوئی ایسا ملک نہیں جو اس مہلک وبا کے خوف وہراس کی زد میں نہ ہو۔ کہیں زیادہ اور کہیں کم، لیکن خطہئ ارض کا کوئی ایسا حصہ نہیں جہاں کورونا نے دستک نہ دی ہو۔ یہی وجہ ہے کہ ڈبلو ایچ او نے جنوری کے آغاز میں ہی پوری دنیا کو متنبہ کیا تھا کہ دنیا ایک بھیانک وائرس سے مقابلہ کرنے کے لئے تیار رہے۔ لیکن اس وقت چند ملکوں کو چھوڑ کر بیشتر ممالک نے اس اشارے کو سنجیدگی سے نہیں لیا۔ نتیجہ یہ ہوا کہ چین کے شہر اوہان سے جواس مہلک وبا نے فضاؤں میں تیرنا شروع کیا اس نے دیکھتے ہی دیکھتے پوری دنیا کو اپنے دائرے میں لے لیا۔ترقی یافتہ ملکوں کو یہ وہم وگمان تھا کہ وہ سائنس اور ٹکنالوجی کی بدولت کسی بھی آفتِ ناگہانی کا مقابلہ کر سکتے ہیں لیکن اس کورونا نے یہ ثابت کردیا کہ انسان خوش فہمی میں مبتلا نہ رہے کہ قدرت کے آگے کسی کی ایک نہیں چلتی۔آج پوری دنیا میں اس وائرس پر قابو پانے کے لئے ہر ممکن کوشش ہو رہی ہے اور اب تک یہ بیماری لا علاج ثابت ہوئی ہے۔ بس انسانی احتیاط ہی اس سے نجات کا ایک ذریعہ ثابت ہوا ہے۔ یہی وجہ ہے کہ جہاں کہیں بھی کورونا کے اثرات ہیں وہاں انسانی نقل وحمل پر پابندی لگا دی گئی ہے اور اس کے ذریعہ ہی انسانی جانوں کو بچانے کی کوششیں جاری ہیں۔امریکہ جیسا ترقی یافتہ ملک اس کورونا سے سب سے زیادہ متاثر ہے اور اس کے بعد اٹلی، اسپین، فرانس اور جرمنی جہاں طبی سہولیات ہیں وہاں بھی اس کورونا نے کہرام مچا رکھا ہے۔
جہاں تک اپنے ملک ہندوستان کا سوال ہے تو عالمی تناظر میں یہاں کورونا نے وہ ستم نہیں ڈھایا ہے جو اس نے مغربی ممالک میں برپا کیا ہے۔لیکن آہستہ آہستہ اپنے وطن عزیز میں بھی کورونا متاثرین کی تعداد بڑھتی جا رہی ہے اور اموات بھی ہو رہی ہیں۔ اور اگر کورونا پر قدرے قابو پایا گیا ہے تو اس کی وجہ صرف اور صرف سماجی دوری ہے کہ عوام الناس نے ا س مہلک بیماری کو سنجیدگی سے لیا اور اپنے آپ کو گھروں میں مقید کرکے دوسروں کو اس بیماری کا شکار نہیں ہونے دیا۔ جتنے بھی افراد کورونا سے متاثر ہوئے انہیں فوری علاج کے لئے کورنٹائن کیا گیا اور جس کا نتیجہ خاطر خواہ بہتر رہاہے۔ البتہ ہمارے پاس اس کورونا کے وائرس کی پہچان کے لئے جو طبی کِٹ کی ضرورت تھی وہ کمیاب تھی اور اب بھی ہے اس کی وجہ سے جانچ میں کمی واقع ضرور ہوئی ہے اور طبی عملوں کو بھی جو حفاظتی آلات مہیا ہونے چاہئے وہ بھی کم دستیاب ہو سکے۔ چین سے بر آمد کِٹ کا ناکارہ ہونا بھی ہمارے لئے نقصان دہ رہا لیکن اس کے باوجود ہندوستان میں کورونا کے پھیلاؤکو روکنے میں بڑی کامیابی ملی ہے۔ لیکن اس پر قابو کے لئے جو اچانک لاک ڈاؤن یعنی خود ساختہ بندی کا اعلان کیا گیا اور اس میں توسیع در توسیع ہوتی چلی گئی اس کی وجہ سے ملک میں طرح طرح کے مسائل پیدا ہوگئے ہیں۔ اول تو پورے ملک میں افراتفری کا ماحول پیدا ہوگیا ہے کہ کروڑوں کی تعداد میں یومیہ مزدور فاقہ کشی کے شکار ہوگئے ہیں۔ وہ اپنے گھروں کو آنا چاہتے ہیں کہ بڑے شہروں میں چھوٹے بڑے تمام صنعتی کل کارخانے بند ہوگئے ہیں اور نجی کمپنیاں بھی بند ہوگئی ہیں۔ انفرادی طورپر جو مزدور یومیہ کاروبار کے ذریعہ اپنی زندگی بسر کر رہے تھے ان کے لئے بھی ایک بڑا مسئلہ پیدا ہوگیا ہے۔ گذشتہ ڈیڑھ ماہ سے وہ بیکار بیٹھے ہیں۔ ایک طرف زندگی بچانے کا خوف ہے تو دوسری طرف اشیائے خوردنی کی قلّت اور بھوک نے انہیں پریشان کر رکھا ہے۔ نتیجہ ہے کہ وہ ملک کے مختلف بڑے شہروں سے اپنے گاؤں کی طرف کوچ کر چکے ہیں۔ ہزاروں میل کی مسافت پیدل طے کرکے مہینوں سے لوگ چل رہے ہیں۔ تین سو سے زائد افراد کی راستوں میں موت ہو چکی ہے۔ ان مزدوروں پر کیا گذر رہی ہے اس سے ہم سب واقف ہیں اور اب حکومت نے بھی ان کی پریشانیوں کو سمجھا ہے اور ان مزدوروں کو اپنی ریاستوں اور اپنے گھروں تک جانے کی سہولت فراہم کی ہے۔ اب ٹرین اور بسوں کے ذریعہ ان مزدوروں کو ان کے گھروں تک پہنچانے کا کام کیا جا رہا ہے۔یہ تاخیر سے اٹھایا گیا ایک بہتر قدم ہے۔لیکن اس فیصلے کے بعد ایک بڑا خطرہ یہ ضرور پیدا ہوگیا ہے کہ اب وہ جب اپنے گاؤں کو آئیں گے تو اگر ان میں کوئی کورونا سے متاثر ہے اور ان کے پہنچنے سے قبل ان کی جانچ نہیں ہوئی یا کورنٹائن نہیں کیا گیا تو دیہی علاقے میں بھی کورونا کے وائرس کے پھیلنے کا اندیشہ ہے اور خدا نخواستہ ایسا ہوا تو وہ بہت ہی جان لیوا ہوگا۔ اس پر بھی مختلف ریاستوں کی حکومتوں کو کڑی نگاہ رکھنی ہوگی اورسماج کے لوگوں کو بھی بیدار رہنا ہوگا کہ کورونا متاثرین مزدوروں کے ساتھ کسی طرح کا نازیبا سلوک نہ کیا جائے بلکہ انہیں طبی سہولت فراہم کرائی جائے اور ان کی حوصلہ افزائی کی جائے کہ وہ مہینوں سے اذیت ناک زندگی جی کر اپنے گھروں کو واپس آئے ہیں۔
اب جب کہ حکومت نے ان علاقوں میں جہاں کورونا کا زور کم ہوا ہے وہاں حسب معمول زندگی بحال کرنے کی چھوٹ دی ہے لیکن سچائی یہ ہے کہ اب بھی خوف کا ماحول ہے۔ بالخصوص مزدور طبقوں کے اندر بس ایک ہی رٹ ہے کہ وہ اپنے گاؤں کو جائیں گے اور وہ روانہ بھی ہو چکے ہیں۔ ایسی صورت میں اگر کہیں چھوٹے بڑے کل کارخانے شروع بھی کئے جاتے ہیں تو انہیں مزدور نہیں مل پائیں گے اور پھر چوں کہ اس وقت پوری دنیا کا بازار معطل ہے اس لئے کوئی بڑا تاجر یہ خطرہ مول لینے کو بھی تیار نہیں ہے کہ وہ فوراً کاروبار شروع کرے۔اس لئے ملک کی معاشیات پر اس لاک ڈاؤن کے بہت ہی مضر اثرات ہوں گے۔کیوں کہ کسی بھی ملک کے جی ڈی پی کا انحصار ملک کے اندر ہونے والے منجملہ ترقیاتی کاموں اور تجارتی سرگرمیوں پر ہوتا ہے۔ اب جب کہ تقریباً دوماہ سے تمام تر بازار اور کل کارخانے بند ہیں۔ زراعت کے شعبے میں بھی بندی کے اثرات نمایاں ہیں کہ کسانوں کا مال بازار تک نہیں پہنچ پا رہا ہے۔ یہ وقت فصل ربیع کا ہے خاص کر گیہوں کی فصل تیار ہو چکی ہے لیکن مزدوروں کی کمی کی وجہ سے کھیتوں میں گیہوں برباد ہورہے ہیں اور جہاں کہیں بھی گیہوں تیار ہو رہا ہے اسے بازار تک لے جانا مشکل ہے۔ اسی طرح پھل سبزیوں کا بھی حال ہے کہ وہ کھیتوں میں نقصان ہو رہے ہیں۔ ہم سب جانتے ہیں کہ پیشہئ زراعت سے کروڑوں مزدوروں کو یومیہ مزدوری حاصل ہوتی ہے۔ دارجلنگ اور آسام کے چائے کے باغات میں تقریباً دس لاکھ مزدور کام کرتے ہیں وہ سب بھوک مری کے شکار ہو گئے ہیں اور چائے کی فصل کو جونقصان ہوا ہے اس سے ملک کی اقتصادیات کو بڑا خسارہ ہوگا۔ غرض کہ اس لاک ڈاؤن کی وجہ سے عالمی سطح کے بازار بند ہورہے ہیں اس سے بھی ملکی صنعت کاروں کی تجارت متاثر ہوگی اور ملکی بازاروں میں کام بند ہونے کی وجہ سے بھی چھوٹے بڑے صنعت کاروں کو خسارہ عظیم کا سامنا کرنا پڑے گا۔ایک سب سے بڑا مسئلہ اب دیہی علاقے میں پیدا ہونے والا ہے کہ مختلف شہروں سے کروڑوں کی تعداد میں مزدور اپنے اپنے گاؤں کو لوٹ رہے ہیں اور اگر گاؤں میں انہیں کام نہیں ملے گا تو پھر ان کی زندگی پریشان کن بن جائے گی اور یہ پریشانی سماج میں کئی طرح کی سماجی برائیوں کو جنم دے گی۔ جرائم کے واقعات میں اضافہ ہوگا، گھریلو تصادم بڑھیں گے اور اس سے نظم وضبط کا بھی مسئلہ کھڑا ہوگا۔ بالخصوص بہار جیسی ریاست جہاں کوئی بڑا صنعتی ادارہ نہیں ہے اور یہاں دس لاکھ سے زیادہ مزدوروں کی واپسی ہوئی ہے اگر اسے کام نہیں ملا تو کئی طرح کے مسائل پیدا ہو سکتے ہے۔ اگرچہ حکومت یہ دعویٰ کر رہی ہے کہ ان مزدوروں کو منریگا اوردیگر اسکیموں کے ذریعہ امداد دی جائے گی۔ لیکن سچائی یہ ہے کہ سرکاری سطح پر کوئی بھی مسئلہ اتنا جلد حل نہیں ہو پاتا جتنا کہ بلندبانگ دعویٰ کیا جاتا ہے۔
مختصر یہ کہ اب یہ امید تو بندھ رہی ہے کہ کورونا کا زور کم ہوگا اور چھوٹے بڑے شہروں میں آہستہ آہستہ کل کارخانے کھولے جائیں گے۔ بازار بھی حسبِ معمول کھلیں گے لیکن سب سے بڑا مسئلہ یہ ہوگا کہ اب اگر ایک طرف کل کارخانوں میں کام کرنے والے مزدور نہیں ملیں گے تو وہ چاہ کر بھی اپنے پروڈکشن کو نہیں بڑھا سکتے اور اس کا اثر ملک کی معاشیات واقتصادیات کے ساتھ ساتھ سماجیات پر بھی پڑنا لازمی ہے۔ اس لئے کورونا کے بعد کی دنیا کا سب سے بڑا مسئلہ اقتصادی بحران ہوگا اور اس پر قابو پانے کے لئے جو ملک جتنی جلدی اور جتنا ٹھوس لائحہ عمل تیار کر سکے گا اسے راحت مل سکتی ہے۔ ترقی یافتہ ملکوں نے ابھی سے اس پر غوروفکر شروع کردیا ہے۔ ہندوستان جیسے ترقی پذیر ملک کو بھی کورونا کے بعد ملک کی سمت ورفتار کے متعلق سنجیدگی سے لائحہ عمل تیار کرنے کی ضرورت ہے کہ دیگر ممالک کے مقابلے ہندوستان کی معاشی اور سماجی زندگی قدرے مختلف ہے۔یہاں پہلے سے ہی لاکھوں بیروزگار نوجوان روزگار کی تلاش میں دربدری کے شکار تھے اور اب تو کروڑوں کی تعداد میں مزدور طبقہ بیروزگار کا شکار ہوگیا ہے اور اس کا سیدھا اثر ملک کی اقتصادیات ومعاشیات پر پڑنا ایک فطری عمل ہے۔یہ ہمارے لئے ایک لمحہئ فکریہ ہے اس لئے ملک میں اس وقت ایک ایسی فضا سازگار کرنے کی ضرورت ہے جس سے ملک کی سالمیت بھی بر قرار رہے اور اقتصادی رفتار کو بھی تیزی حاصل ہو سکے اور اس کے لئے ملک کے سیاست دانوں کے ساتھ ساتھ مختلف شعبے کی نمایاں شخصیات کو بھی پہل کرنی ہوگی اورملک کے سامنے ایک تعمیری خاکہ پیش کرنا ہوگا کہ یہ وقت کا تقاضہ ہے کیوں کہ کورونا کے بعد کی دنیا بہت ہی تبدیل ہونے والی ہے۔

(مضمون میں پیش کردہ آرا مضمون نگارکے ذاتی خیالات پرمبنی ہیں،ادارۂ قندیل کاان سےاتفاق ضروری نہیں)