صفدر امام قادری

 

شعبۂ اردو،کالج آف کامرس،آرٹس اینڈ سائنس، پٹنہ

اخبارات و رسائل میں یہ خبر شاہ سرخیوں میں آنی چاہیے تھی کہ قوم و ملّت کے جاں سوز اور دوٗر اندیش علماے کرام نے ۱۹۲۱ء میں امارتِ شرعیہ کے نام سے جو ایک چھوٹا سا پودا لگایا، وہ سو برس کی منزل پار کرکے بے شک ایک تناور درخت بن گیا۔گذشتہ ڈیڑھ برسوں کے وبائی ماحول نے کسی جشن کی گنجایش کسی ادارے کے لیے نہیں چھوڑی ورنہ امارتِ شرعیہ بہار، جھارکھنڈ ، اڑیسہ اور آسام کا جتنا بڑا دائرۂ اثر ہے، اس کے اعتبارسے اس کا صد سالہ جشن پورے سال چلنا چاہیے تھا۔مگر رسمی طَور پر ہی جشنِ صد سالہ کو منا لینا ممکن ہُوا۔ مگر اِسی سو سال کی تکمیل سے ذرا پہلے اپریل ۲۰۲۱ء میں ساتویں امیرِ شریعت مولانا ولی رحمانی کا انتقال ہوا اور اپریل سے ان سطروں کے لکھنے تک جو سیاست، عالمانہ چپقلش اور علماے کرام کی ، علماے کرام کے ذریعے تذلیل اور خفّت و ردِّ خفّت کے جو مناظر دیکھنے کو مِلے، وہ حیرت انگیز ہیں اور ایسا لگتا ہے کہ بزرگوں کی امانت کو سرِ عام اور رُسوا سرِبازار کرنے کے لیے ہر کوئی در پَے ہے۔اب امیرِ شریعت کے انتخاب کی الگ الگ دو تاریخیں بھی سامنے آ چکی ہیں، اس لیے جنگ و جدال، مقدّمہ اور پولس کیس جیسے خدشات سے انکار کرنافصیلِ وقت پر واضح عبارتوں کو جھٹلانے جیسا معلوم ہوتا ہے۔

کہنے کو امارتِ شرعیہ اپنی طویل روایت اورضابطوں کی پابند ہے مگر الگ الگ وقتوں میں حسبِ ضرورت یا حسبِ سہولت اس میں ترمیم و اضافہ بھی کیا گیا۔آخر آخر میں وہ ادارہ ٹرسٹ در ٹرسٹ کے دائرۂ کار میں بھی چلا آیااور اب جتنے مسائل پیدا ہوں گے ، موجودہ عہد کے قوانین سے ان کی مطابقت لازم ہوگی اور ذرا سی پیچیدگی آنے پراصحابِ اقتدار اور انتظامیہ کی مداخلت کے امکانات اپنے آپ پیدا ہوجائیں گے۔ان خطرات کو ہر شخص سمجھ تو رہا ہے مگر زبان پر اور کھُلے منچ سے کوئی کہنے کے لیے تیّار نہیں ہے۔زبان سے رٹی رٹائی یہی بات ہر شخص یا تمام فریق ادا کر رہے ہیں کہ امارتِ شرعیہ کی مہتم بالشّان روایت اور اس کی ملّی خدمات کے پیشِ نظر اُس کا تحفّظ لازم ہے۔مگر اس تحفّظ کے اعلان میں بکھراو کے کتنے اوزار سب نے چھپا رکھے ہیں، اس کا اعلان بھلے نہ کیا جائے مگر دنیا آنکھیں کھول کر یہ سب کچھ دیکھ رہی ہے۔ افسوس اس کا ہے کہ متعلّقہ اکثر و بیش تر افراد اس حمّام میں ایک ہی جیسی کیفیت میں مبتلا نظر آ رہے ہیں۔

امارتِ شرعیہ کے ضابطے میں یہ بات موجود ہے کہ امیرِ شریعت جِسے چاہیں اپنا نائب مقرّر کر دیں۔اسی ضابطے کے تحت مولانا ولی رحمانی نے اپنی بیماری کے دوران مولانا شمشاد رحمانی کو نائب امیرِ شریعت نام زد کیا۔ فوری طَور پر سماج میں کوئی ردِّ عمل نہیں ہواجس کا مطلب یہ ہے کہ امیرِ شریعت نے جسے اپنا نائب بنایا، اُسے سب نے تسلیم کر لیا۔ حالاں کہ جمہوری عہد اور مذہبی صلاح و مشورہ کا اصول یہ کہتا ہے کہ امیرِ شریعت جب اپنا نائب مقرّر کریں تو کیوں نہیں مجلسِ شوریٰ اور اربابِ حلّ و عقد کی مجلس کا عِندیہ بھی جان لیں؟ کیوں کہ امیرِ شریعت کے نہیں رہنے پر نائب امیرِ شریعت تمام و کمال امیرِ شریعت کا درجہ رکھتا ہے۔اس میں پریشانی یوں بھی نہ ہونی چاہیے کہ امیرِ شریعت اپنا نائب یقینی طَور پر ایسے لائق و فائق کو منتخب کریں گے ، جن کی بزرگی اور قائدانہ صلاحیت پر انھیں یقین ہوگا۔مگر امارتِ شرعیہ کے ضابطے میں ایسی کوئی جمہوری شِق موجود نہیں۔ بزرگوں نے اپنی سادگی اور شرافت یا نیکی میں مستقبل کے خدشات پر نگاہ نہ رکھی۔یہ محض اتّفاق ہے کہ مولانا سجّاد سے لے کر مولانا شمشاد رحمانی تک سُلجھی ہوئی فکر کے افراد نائب امیرِ شریعت بنتے رہے اور قوم و ملّت کی آبروٗ کی سلامتی میں کوئی رخنہ پیدا نہیں ہوا۔

امارتِ شرعیہ کے ضابطے میں یہ ہے کہ امیرِ شریعت کے وصال کے تین مہینے کے اندر نائب امیرِ شریعت نئے امیرِ شریعت کے انتخاب کی کارروائی مکمّل کر لیں۔اس مدّت میں اگر وہ یہ کام انجام تک نہیں پہنچا سکیں تب مجلسِ شوریٰ اپنی نشست بُلائے گی اور نئے امیرِ شریعت کے انتخاب کے لیے ناظمِ امارتِ شرعیہ کو کارروائی مکمّل کرنے کی ہدایت دیے گی۔مسائل اِنھی دونوں پہلووں سے پیدا ہوئے۔مولانا ولی رحمانی بھی کورونا کی وبا میں رخصت ہوئے اور ان کی وفات کے تین مہینے گُزرنے تک واقعتا ایسی کوئی گنجایش قانونی طَور پر سماج میں موجود نہیں تھی کہ آٹھ سو اکیاون(۸۵۱) افراد کو کسی ایک جگہ پر جمع کر کے اربابِ حلّ و عقد نئے امیرِ شریعت کا انتخاب کرلیں۔اس لیے نائب امیرِ شریعت نے مجلسِ شوریٰ کی آن لائن نشست بُلائی اور شوریٰ نے وبائی صورتِ حال کے پیشِ نظر نائب امیرِ شریعت کو تین مہینے کی رُکاوٹ سے علاحدہ رکھا اور انھیں یہ حق دیا کہ حالات درست ہونے کی صورت میں انتخاب کی کارروائی وہ مکمّل کریں۔اگست میں انتخاب کی تاریخ متعیّن ہوئی اور مختلف حلقوں میں بانٹ کر الگ الگ انتخاب کے مراکز بنائے گئے۔اس میں کوئی قباحت نہیں تھی اور اس بات کا خیال رکھا گیا تھا کہ کسی ایک مرکز پر پچاس -ساٹھ سے زیادہ افراد نہ ہوں۔

اس انتخاب کی ایک شرط تھی کہ اربابِ حلّ و عقد کے ایک سو اکیاون(۱۵۱) ممبران کی توثیق کے بعد ہی کوئی آدمی امّید وار بن سکتا ہے۔ یہ بھی تھا کہ جو لوگ اپنی نام زدگیاں پیش کریں گے، اس کے مطابق بیلٹ پیپر تیار کیا جائے گا۔بعض جیّد علماے کرام جن کی باتیں ملک و قوم بہ غور سُنتی ہے، انھوں نے اس رائے دہندگی کے طریقے کو غیر اسلامی کہا۔ایک بڑے عالمِ دین نے یہ بھی کہا کہ بیلٹ پیپر کے ذریعہ امیرِ شریعت کا انتخاب سراسر اسلامی قانون کی خلاف ورزی ہے۔حالاں کہ اسی دوران اُن بڑے علما میں سے ایک نے پریس کے سامنے یہ بیان دیا کہ مجھے بہ اتّفاقِ رائے امیرِ شریعت منتخب کر لیا جائے تو مَیں اس کے لیے راضی ہوں۔ حالاں کہ یہ بات پہلے بحث میں آئی تھی کہ امیرِ شریعت بننے کا دعوی کرنا یا خواہش کا اظہار کرنا، یہ بزرگوں کی شان نہیں ہے ۔ اسی لیے امّید واری طلب کرنا یا نام زدگی کے کاغذات داخل کرنا غیر اسلامی ہے۔ مگر خود سے یہ دعوی کرنا کہ بہ اتّفاقِ رائے مجھے چُن لیا جائے تو مَیں خدمت کے لیے تیّار رہوں گا؛ کیا یہ خواہش کا اظہار نہیں ہے؟ حالاں کہ مختلف مراکز پر ووٹنگ اور بیلٹ پیپر کا استعمال وبائی اور قانونی دونوں صورتوں میں نادرست کہنا نامناسب تھا۔ ہاں، یہ ضرور تھا کہ ۸۵۱؍ ممبران والے ’اربابِ حلّ و عقد‘ سے ۱۵۱؍ افراد کی توثیق غیر ضروری تھی اور اس کے پس پشت مخفی مقاصد اندیشوں کو جنم دے رہے تھے۔ مختلف حلقوں سے اس کے ردِّ عمل میں ہنگامہ آرائیاں ہوئیں اور آخر کار یہ انتخاب اعلان سے آگے نہ بڑھ سکا اور التوا کے خانے میں چلا گیا۔

اس دوران ستمبر کے آغاز میں اچانک یہ خبر شایع ہوئی کہ مجلسِ شوریٰ نے اَلمعہدالاسلامی میں ایک نشست منعقد کی اور دس اکتوبر ۲۰۲۱ء کو امیرِ شریعت کے انتخاب کا فیصلہ کر لیا گیا۔ اسی خبر میں یہ بات بھی درج تھی کہ تین مہینے کی مدّت ختم ہونے کے بعد نائب امیرِ شریعت کا حقِ انتخاب ختم ہو گیا مگر اس سے چار مہینے قبل آن لائن مجلسِ شوریٰ میں آخر اُن کے اختیارات وبائی صورتِ حال کے پیشِ نظر بڑھائے گئے تھے، اُسے کیا مانا جائے؟ چند دنوں کی خاموشی کے بعد دس اکتوبر کے انتخاب کا اعلان امارتِ شرعیہ کی طرف سے جاری ہوا۔ یہ اتنا اہم موضوع تھا مگر قایم مقام ناظم کی جگہ پر کسی دوسرے شخص کا دستخط ثبت تھا۔ پھر بعد میں ناظم(قایم مقام) اور نائب امیرِ شریعت کے بیانات سے بھی یہ واضح ہوا کہ دس اکتوبر کو ہی یہ انتخاب عمل میں آئے گا۔ یہ بھی اعلان ہوا کہ اتّفاقِ رائے نہ ہونے پر پسندیدہ فرد کے نام کو لکھ کر بکس میں ڈالنے کی سہولت رہے گی۔ گویا یہ بیلٹ پیپر سے الگ قسم کی کوئی ’’اسلامی صورت‘‘ سامنے آ گئی۔

حقیقی سوالات کئی ہیں جنھیں اس اعلان میں پسِ پشت رکھا گیا۔ اگر مجلسِ شوریٰ میں ۱۰۱؍ ممبران ہیں تو ان میں سے کم از کم ۵۱؍ افرادجمع ہوئے بغیر اکثریت سے تاریخِ انتخاب کا فیصلہ کیسے ہو گیا اور اسے کیوں کر تسلیم کیا گیا؟ مجلسِ شوریٰ کی نشست کے دعوت نامے کب جاری ہوئے اور کب لوگوں کو اس کی اطّلاع دی گئی؟ آج کی تاریخ تک اس خاص نشست کی ویڈیو ریکارڈنگ سامنے نہیں آسکی جس سے یہ ثابت ہو سکے کہ اس نشست میں کم از کم ۵۱؍ ارکانِ شوریٰ شامل تھے۔ دستخط اور ان کی جعل سازیاں، فہرست ارکان کی خبرمیں شمولیت اور تشہیر جیسے معاملات پر اخبارات میں جگ ہنسائی ہو چکی ہے۔ ایسی صورت میں وہ مجلسِ شوریٰ کی نشست جس کی اطلاع تمام ارکان کو نہ دی گئی ہواور جس میں شریک افراد کی ویڈیو گرافی اور فوٹو گرافی نہ دستیاب کرائی گئی ہو؛ ایسی شوریٰ کی ہدایت کو نائب امیرِ شریعت یا قایم مقام ناظم نے کس طرح اور کیوں قبول کیا، یہ سمجھ سے پَرے ہے اور ان کی صواب دید پر سوال ہے۔

اب تازہ صورتِ حال یہ ہے کہ ایک اور مجلسِ شوریٰ نے نشست منعقد کی اور امیرِ شریعت کے انتخاب کی تاریخ ۹؍ اکتوبر متعیّن کر دی ہے۔ اس نشست کے لیے بھی کوئی اشتہار، دعوت نامہ یا اعلان پہلے سے نظر نہیں آیا۔ المعہد الاسلامی کی ستمبر کے آغاز کی مجلسِ شوریٰ کی نشست اگر غیر قانونی نہیں ہے تو یہ نشست بھی آئینی ہے۔دونوں شوریٰ کی نشستوں کے جو نتائج اخبارات تک روانہ کیے گئے ، ان میں محض چند ارکان کے نام اور کسی ایک کا دستخط ثبت ہے۔ اب اقبال کے لفظوں میں یہ سوال اربابِ حلّ و عقد پوچھتے ہیں:

خدا وندا یہ تیرے سادہ دل بندے کدھر جائیں

دس اکتوبرکے انتخاب کے لیے جو جگہ مقرّر ہے، وہ ۸۵۱؍ اربابِ حلّ وعقد کے لیے غیر مناسب ہے۔ ایک سو اور دو سو کے لیے وہ جگہ موزوں تھی مگر پتا نہیں کس عقل و شعور سے وہ جگہ چُنی گئی۔ وبائی صورتِ حال میں جسمانی دوری کا خیال رکھتے ہوئے کوئی کھُلی جگہ چُنی جانی چاہیے یا شری کرشن میموریل ہال یا اسی طرح بڑی جگہ ہونی چاہیے۔ تازہ تر اطلاعات کے مطابق ابھی تک ارکان کو کسی مجلس نے خطوط جاری نہیں کیے ہیں۔ باضابطہ طور پر اربابِ حلّ و عقد کی تصویروں کے ساتھ شناختی کارڈ بنوانے چاہئیں اور ووٹر لسٹ تصویروں کے ساتھ شایع کرکے پولس یا سِوِل انتظامیہ کے حوالے کر دیا جائے تاکہ جس تاریخ کو امیرِ شریعت کا انتخاب ہو، اربابِ حلّ و عقدکا جسمانی تحفّظ بھی ہو اور متوقّع انتشار یا علما کے پس پردہ جرائم پیشہ حلقے کی بہ راہِ راست شمولیت کا کوئی راستہ نہ کھُل جائے۔ مناسب یہ ہوگا کہ امارتِ شرعیہ، مجلسِ شوری اور اربابِ حلّ و عقد سے باہر کے افراد انتخابی عمل کے کار پرداز ہوں۔ امارتِ شرعیہ ٹرسٹ تو ہے ہی، کیا بُرائی ہوگی اگر کلکٹر یا کمشنر کی سطح کے کسی افسر اور اس کے اہل کاروں کو صاف و شفّاف طریقے سے انتخابی عمل کی تکمیل کے لیے دعوت دے دی جائے، ورنہ پنچایت اور اسمبلی یا پارلیمنٹ انتخابات کے اعمالِ بد کے مظاہر سے انکار ممکن نہیں۔

شعبۂ اردو، کالج آف کامرس، آرٹس اینڈ سائنس، پٹنہ

ہندستان میں مغربی حکمرانوں کے توسط سے مختلف علمی وسائل ان کے سامراجی منصوبوں کا حصّہ بن کر کبھی اعلانیہ طور پر یا کبھی چپکے سے ہمارے سماج کا حصّہ بنائے گئے ۔اسکول ،کالج اور یونی ورسٹیوں کے متوازی پریس اور اخبارات و رسائل کی باضابطہ اشاعت اس متعین جدید کاری کا ایک حصّہ تھا جس کے زیرِ اثر نئے ہندستان کی تعمیر و تشکیل کے بعض پیمانے وضع ہوئے۔انگریزی مقاصد سامراجی نقطۂ نظر کے ساتھ واضح جبر اور استحصال کے حربوں سے لیس تھے جسے ہندستانی سماج کے فروغ کی بنیاد تو ہرگز نہیں کہا جا سکتا مگر یہ سچائی بھی پیشِ نظر ہونی چاہیے کہ اس محدود فیضان سے بھی ہندستانی عوام وخواص کو تھوڑے بہت ایسے مواقع حاصل ہوئے جن سے وہ آزادانہ طور پر خود کو کھڑا کر سکتے تھے۔بے شک ان اشخاص میں اکثریت نے ذاتی استعداد کی بنیاد پر خود کو آراستہ کیاہوگیا۔مگر اس سے کیسے انکار کیا جائے کہ یوروپی قوم کے اپنے مخصوص مقاصد کے لیے قائم کردہ اداروں سے ہی دیسیوں نے چنگاری چن کر ایک عالَم کو روشن کرنے میں کامیابی پائی۔
ہندستان میں صحافت کی بنیاد انگریزی حکمرانوں کی کوششوں سے پڑی۔جیمس اگسٹس ہکی نے ۲۹ جنوری ۱۸۷۰ ء کو’’ ہکیز بنگال گزٹ‘‘ کے عنوان سے جو چار صفحات کا ایک پرچہ شایع کیا،اسے اس ملک میں صحافت کا پہلا نمونہ تسلیم کیا جاتا ہے۔یاد رہے کہ اس سے ڈیڑھ سو سال پہلے فرانس اور انگلینڈ سے اخبارات شایع ہونے لگے تھے جس سے اہالیانِ یورپ کی جدید تعلیمی سرگرمیوں میں اوّلیات بھی ظاہر ہوتی ہیں۔ہکّی کے گزٹ نے ہندستان میں صحافت کے بہت سارے اصول و ضوابط متعئن کر دیے ۔ہکی کے نقطۂ نظر کو اس کے ان جملوں سے واضح طور پر سمجھا جا سکتا ہے:
ــ’’میری پرورش بھی اس طرح کی نہیں ہوئی ہے کہ میں محنت و مشقت کی غلامانہ زندگی کا عادی بن سکوں لیکن ان سب باتوں کے باوجود روح و دماغ کی آزادی خریدنے کے لیے میں اپنے جسم کو بہ خوشی غلام بنا رہا ہوں۔‘‘
’’ یہ ہفتہ وار سیاسی وتجارتی اخبار ہے جس کے صفحات ہر پارٹی کے لیے کھلے ہیں لیکن اخبارکو کسی پارٹی سے تعلق نہیں ہے۔‘‘
یہ دونوں اصول اس بات کے شاہد ہیں کہ ہندستانی سماج میں جو پہلا اخبار شایع ہوا، اس کے مدیرکے سامنے آزادیِ اظہار اور حکومتی نابستگی کے اصول واضح تھے۔ہندستان میں صحافت کے مورخین نے اس عہد کے یوروپین افراد کی زندگی اور کلکتے کے معاشرتی ماحول کے نشیب وفراز کو سمجھنے کے لییاس نقشِ اوّل واضح کی ہے۔ خاص طور پر ایسٹ انڈیا کمپنی کے اہل کاروں کے سلسلے سے ایک تنقیدی رائے رکھنے کی وجہ سے اِس اخبار کو اُس سماج کا آئینہ تسلیم کیا گیا ہے۔ ہکی کی صحافیانہ شخصیت میں ایک بے اعتدالی بھی تھی اور بعض مورخین نے یہ بھی لکھا ہے کہ وارن ہیسٹنگز کے مخالفین کہیں نہ کہیں ہکی اور اس کے اخبار کو حسبِ ضرورت آلۂ کار بنا رہے تھے۔
ہکی کو حکومت کے عتاب در عتاب میں مبتلا رہنا پڑا ۔کئی بار جیل کی سزا ، اخبار اور پریس کی ضبطی اور ضمانت کے مسائل نے ایسا الجھا دیا کہ انھیں اپنی صحافتی زندگی کو سمیٹ لینا پڑا۔ہندستانی اخبار نویسی کا یہ پہلا سبق کچھ اس قدر باعثِ ترغیب رہا جیسے یہ لازم تسلیم کیا جائے کہ اخبار نویسی اور حکومت سے ٹکراؤ لازم ہے ۔یہ بات بھی قابلِ غور ہے کہ صحافت آزادیِ اظہار اور حکومتی جبر سے آزادی کااگر ذریعہ ہے تو اسے نباہنا بے حد مشکل ہے۔شاید اسی وجہ سے اُس دور کے متعدد اخبارات سے ایسٹ انڈیا کمپنی کے رشتے اچھے نہیں تھے اور جب جب کمپنی کے لیے گنجائش ہوتی، وہ انھیں اپنا شکار بنانے کی کوشش کرتی۔ اس میں یورپ سے تعلق رکھنے والے ایڈیٹر اصحاب بھی شامل تھے جنھیں ہکی کے بعد سرکار مخالف صحافت کے عوض جیل جانا پڑا ۔اسی مرحلے میں اس بات کے امکانات روشن ہوئے کہ ہندستان میں صحافت عوام و خواص کے تصّورات کی ترجمان بن کر اپنا وجود قائم رکھنے کے لیے سامنے آ سکتی ہے۔
انگریزی کے ساتھ ہی ہندستان کی متعدد زبانوں میں صحافت کے امکانات بہ تدریج روشن ہوتے گئے۔ ہکی کے اخبار سے ’جامِ جہاں نما‘ تک ؛نصف صدی کا ایک مختصر عرصہ بھی گزرا تھا مگر ہندستان کے طول و عرض میں صحافت ایک باضابطہ پیشے کے طور پر اُٹھ کر سامنے آتی ہے۔ گجراتی، مراٹھی، فارسی کے ساتھ ساتھ اردو کا سفر اس بات کا ثبوت ہے کہ آزادیِ اظہار اور مافی الضمیر کی ادائیگی کے لیے مادری زبان اور دیگر کاروباری زبانوں کی جانب لوگوں نے ہاتھ بڑھائے۔ اسے یوں نیک شگون کہا جاسکتا ہے کہ بعد کے عہد میں صحافت نے بالعموم اور اردو صحافت نے بالخصوص اپنا جو قومی مزاج ثابت کیا؛ اس کے لیے یہ لازم تھا کہ انگریزی زبان سے اور اس کی تربیت سے ہمارا راستہ تبدیل ہو۔ ہمیں معلوم ہے کہ’ جامِ جہاں نما ‘بھی اولاً اردو اخبار نہیں تھااور فارسی زبان میں ہی اس کی اشاعت ہوتی تھی مگر بہت جلد اخبار نے اس عوامی ضرورت کو سمجھنے میں کوئی کوتاہی نہیں کی جس کی شناخت ہم اردو جیسی عوامی زبان سے کر سکتے ہیں۔ اخبار نے اولاً ضمیمہ جات شایع کیے اور پھر یہ ایک مقصود بالذات اردو اخبار کے طور پر شایع ہوکر مقبول ہونے لگا۔ ابتدا میں اس اخبار پر ایسٹ انڈیا کمپنی کا ٹھپہ بھی لگا رہاجس کی وجہ سے صحافت کے مورخین نے اس کی آزادانہ شناخت پر کہیں کہیں سوالات بھی قائم کیے مگر محض پانچ چھے برسوں میں ایسٹ انڈیا کمپنی کی بیڑیوں سے بھی یہ ادارہ آزاد ہوگیا۔ مختلف مورخین نے اس کے شماروں کے جو نمونے اور اندراجات کے جو اشاریے تیار کیے ہیں،اس کی روٗ سے عتیق صدیقی کے لفظوں میں کہیں تو یہ اخبار عمرِ نوح لے کر سامنے آیا تھا۔ ’’اخترِ شاہنشاہی‘‘کے مطابق اس کی تالیف کے وقت ۱۸۸۸ء میں یہ اخبار جاری تھا۔
’جامِ جہاں نما ‘سے ’دہلی اردو اخبار‘یعنی ۱۸۳۷-۱۸۳۶ء تک کا سفر یوں تو پندرہ برسوں کا ہے مگر اس دوران ہندستان کی صحافت کی پوری دنیا بدل چکی تھی۔ قومی قوانین کی تبدیلی اور دیسی زبانوں کے آزادانہ فروغ کے مواقع اپنے آپ پیدا ہورہے تھے۔ اس دوران یہ بھی ہوا کہ اردو صحافت بنگال سے نکل کر ملک کے طول و عرض میں پھیلنے لگی تھی اور جغرافیائی اعتبار سے اس کا مزاج قومی ہونے لگا تھا۔ ان تمام تبدیلیوں کے لیے کسی ایک نمونے کی پہچان کرنے کی ضرورت ہوتی ہے تو اس وقت ہمیںدہلی اخباراوردہلی اردو اخبار کی طرف توجہ کرنی ہوتی ہے جسے مولوی محمد باقر نے تقریباً بیس برسوں تک شایع کیا۔ ابتدائی دور کی وہ تمام بحثیں جن میں اس اخبار کے لیے اردو کا سب سے پہلا نقش تسلیم کیا گیا تھا، متعدد شہادتوں کے بعد باطل ہوچکی ہیں۔ مولوی محمد باقر کے صاحب ز ادے محمد حسین آزاد کے اولیت کے سلسلے سے دعوے کا لعدم قرار دیے جاچکے ہیں۔ مگر ۱۸۵۷ء سے پہلے کے اردو اخبارات کی تاریخ اس ایک بات کی لازمی شہادت دیتی ہے کہ مدیر کی حیثیت سے ان دو ڈھائی دہائیوں میں اگر کوئی ایک شخصیت قدِ آدم شبیہہ کے ساتھ ہمارے پیشِ نظر ہوتی ہے تو وہ کوئی اور نہیں بلکہ مولوی محمد باقرہی ہیں۔ اردو کے طالب علم کے لیے مولوی محمد باقر کی شناخت کے دو اور واضح پیمانے ہیں۔ ایک تو یہی کہ وہ ہماری زبان کے صاحبِ طرز ادیب محمد حسین آزاد کے والد محترم ہیں ؛ اسی کے ساتھ وہ شیخ محمد ابراہیم ذوق کے ہم مشرب بھی ہیں۔ دہلی کالج سے بہ طور طالب علم اور استاد مولوی محمد باقر کا تعلق اہمیت کا حامل ضرور ہے مگر غدر میں ان کی زندگی کا انجام کچھ ایسے سامنے آیا جس نے نئے سرے سے باقر کو ، ان کی صحافت اور دیگر سرگرمیوں کو سمجھنے کا پس منظر عطا کیا۔ اب تاریخی اعتبار سے یہی حیثیت سب سے مقدّم ہے۔

مولوی محمد باقرکی مختصر سوانح حیات
محمد حسین آزاد نے کئی جگہوں پر اپنے خاندان کی تفصیلات بتانے کی کوشش کی ہے۔نبیرۂ آزاد آغا محمد باقر کے کتب خانے میں ایک کتاب کے حاشیے پر مولوی محمد باقر کے قلم سے ایک مختصر شجرہ مندرج ہے جس کی رو سے محققین نے عام طور پر مولوی محمد باقر کے اسلاف کی تفصیل بیان کی ہے۔ ان کے مورثِ اعلا ایران سے کشمیر پہنچے اور پھر دہلی میں آکر مستقل طور پر آباد ہو گئے۔ بعد میں یہی خاندان محمد حسین آزاد کی وجہ سے غدر کے بعد لاہور پہنچا اور اب بھی اس خاندان کے بعض افراد وہیں مقیم ہیں۔ مولوی محمد باقرکے والد مولوی محمد اکبر اور دادا اخوند محمد اشرف سلمانی تھے۔ ان سے پہلے کی خاندانی کڑیوں میں محمد آشور ، محمد یوسف، محمد ابراہیم وغیرہ کے نام درج ہوئے ہیں۔ محمد باقر کے والدایک مجتہد تھے اور علوم ِدین کے سلسلے سے انھوں نے ایک مدرسہ قایم کر رکھا تھا ۔مولوی باقر نے اولاً اسی مدرسے سے فیض حاصل کیا ۔اس کے بعد میاں عبد الرزّاق کے ادارے میں آگے کی تعلیم کے لیے شامل ہوگئے۔بتایا جاتا ہے کہ وہاں شیخ محمد ابراہیم ذوق ان کے ہم درس تھے ۔یہ رشتہ ایک طویل رفاقت میں بدل کر دہلی کی تہذیبی زندگی کے لیے قابلِ توجہ بن گیا۔مولوی محمد باقر اپنے والد کے تنہا فرزند تھے ۔اس وجہ سے تعلیم و تربیت پر خصوصی توجہ دی گئی۔انھوں نے مذہبی اور عصری دونوں تعلیم پائی ۔ دہلی کالج کے ابتدائی عہد کے طالب علموں میںان کا شمار ہوتا ہے ۔ایک مختصر مدّت تک سرکاری ملازمت میں شامل رہے ،پھر والد کے مشورے سے ملازمت سے علاحدہ ہو کر اردو صحافت سے باضابطہ طورپر منسلک ہونے سے پہلے وہ کار و بارسے بھی جڑ چکے تھے۔
مولوی محمد باقر کی تاریخِ پیدائش یا سالِ پیدائش میں محققین کے دوران اتّفاق رائے نہیں ہے۔خاندانی احوال اور دیگر اصحاب کی اطّلاعات کے مطابق ۱۷۷۰ ء ، ۱۷۸۰ء،۱۷۹۰ ء اور ۱۸۱۰ ء کے برس اس سلسلے سے سامنے آتے ہیں ۔چالس برس کے تخمینے کو شاید ہی کسی تحقیقی دائرۂ کار میں رکھ کر تولا جا سکتا ہے۔دو چار پانچ سال کے فرق کو قیاس کے حوالے سے فطری حیثیت دی جا سکتی ہے مگر چالس سال کا دورانیہ کسی بھی آدمی کو پریشانی میں ڈال سکتا ہے۔آغا محمد باقر نے غدر کے وقت ان کی عمر ۷۰ سال سے زائد بتائی ہے جس کی وجہ سے دوسرے قرائن سے مدد لے کر بعض محققین نے ۱۷۸۰ ء کو ان کا تخمیناً سالِ ولادت تسلیم کیا ہے۔مولوی محمدباقر سے شیخ محمد ابراہیم ذوق کے دوستانہ مراسم لڑکپن کے زمانے سے ہی بتائے جاتے ہیںجسے مقبول روایت کی حیثیت حاصل ہے۔ذوق ۱۷۸۲ ء میں پیدا ہوئے، اس اعتبار سے مولوی محمد باقر کا سالِ ولادت ۱۷۸۰ ء یا اس کے آس پاس معقول معلوم ہوتا ہے۔مگراسی کے ساتھ یہ حقیقت بھی ہے کہ۱۸۲۸ ء میں مولوی محمد باقر دہلی کالج میں اپنی تعلیم مکّمل کر کے مدرّس بنا دیے جاتے ہیں ۔اگر ۱۷۸۰ ء میں ہی وہ پیدا ہوئے تو کیا وہ ۴۸ سال کی عمر تک تحصیلِ علم میں مبتلا رہنے کے بعد ملازمت میں آئے؟ یہ قرینِ قیاس معلوم نہیں ہوتا ہے۔
سر سیّد احمد خاں کے ایک مکتوب سے یہ پتا چلتا ہے کہ محمد حسین آزاد کے والد سر سیّد کے بڑے بھائی کے ہم عمر تھے۔سر سیّد نے لکھا ہے :
’’مولوی محمد حسین آزاد صاحب سے اور میرے خاندان سے ایک ربطِ خاص ہے۔اُن کے دادا اور میرے والد میں ایسی دوستی تھی کہ لوگ بھائی بھائی سمجھتے تھے اور ان کے والد مولوی محمد باقر صاحب اور میرے بھائی مرحوم سے بہ سبب ہم عمری کے ایسا ہی ارتباط تھا۔‘‘
حیاتِ جاوید میں سر سیّد کے بڑے بھائی کے بارے میں یہ واضح اطلاع ملتی ہے کہ وہ سر سیّد سے چھے برس بڑے تھے۔اس اطلاع سے سر سیّد کے برادرِ بزرگ کی پیدائش کا سال ۱۸۱۱ء متعئن ہوتا ہے۔ڈاکٹر اسلم فرّخی اس بات پر اصرار کرتے ہیں کہ مولوی محمد باقر کا سنہ پیدائش ۱۸۱۰ء کے قریب متعئن کیا جاناچاہیے۔ڈاکٹر جمیل جالبی نے بھی اسلم فرخی کے تعین کردہ سال کو اہمیت دی اور اپنی تاریخ میں ایسے ہی قبول کیا ہے۔یہاں اُن مضامین اور کتابوں کا حوالہ لازم نہیں ہے جن میں مولوی باقرکی پیدائش کے سلسلے سے بڑی حتمی گفتگو کی گئی ہے کیو ںکہ اکثر افراد نے کسی ایک ماخذ کو اعتبار کے قابل سمجھا اور نقل در نقل کے مرتکب رہے ۔ڈاکٹر صادق اور ڈاکٹر اکرام چغتائی نے بھی مولوی محمد باقر کے سلسلے سے بہت سارے تحقیقی گوشوں کو روشن کیا اور حیات و خدمات کے سلسلے کے بعض پیچیدہ مسائل کو سلجھانے میںوہ اصحاب کامیاب ہوئے ہیں مگر وہ مولوی محمد باقر کے سالِ ولادت کے سلسلے سے کوئی بنیادی اشارہ فراہم نہیں کرسکے جس سے یہ مسئلہ حل ہوسکے۔۱۸۱۰ ء کے سال کو قبول کرنے میں چند مسائل ہمیں نتیجے تک پہنچنے سے روکتے ہیں:
الف۔ مولوی محمد باقر ۱۸۲۸ ء میں محض اٹھارہ برس کی عمر میں فارغ التحصیل ہو چکے تھے، یہ معقول نہیں معلوم ہوتا ۔
ب ۔ اٹھارہ برس کی عمر میں انھیں بہ طورِ مدرس منتخب کر لیا گیا اور وہ آیندہ چھے برسوں تک درس و تدریس کی ذمہّ داریاں ادا کرنے کے بعد ملازمت سے علاحدہ ہو گئے۔
ج۔ ذوق سے عمر میں ۱۸۱۰ ء کی پیدائش کے سبب مولوی محمد باقر ۲۸ برس چھوٹے ہیں۔ایسے میں دوستانہ تعلق بھی قرینِ قیاس معلوم نہیں ہوتا اور مولوی عبد الرزاق کے مدرسے میں ابتدائی دور کی یکجا تعلیم کے بارے میں بھی کچھ یقین سے کہنا معقول معلوم نہیں ہوتا۔
ان تحقیقی اعداد و شمار اور سوال و جواب کی روشنی میں یہ قرینِ قیاس معلوم ہوتا ہے کہ مولوی محمد باقر ۱۸۱۰ ء سے پہلے پیدا ہو چکے ہوں گے مگر یہ تاریخ کتنی پیچھے تک جائے گی اور ہم اسے تخمینے کے لیے بھی کہاں تک روک سکتے ہیں،یہ غیر معین ہے۔اب رہی بات جن لوگوں نے ۱۷۷۰ سے لے کر ۱۸۱۰ ء کے درمیان جتنے برس بھی اس کام کے لیے آزمائے ہیں ، وہ حتمی اور حقیقی تاریخیں کس طرح سے ہیں، اس کا ثبوت پیش کرنا ممکن نہیں ۔بس یہ یاد رہے کہ ۱۷۸۰ ء کی تاریخ سے بھی ذیل کے واقعات کی صداقت پہ کوئی حرف نہیں آتا ۔
i . محمد حسین آزاد کے سالِ پیدائش کے سلسلے سے بھی اچھے خاصے اختلافات موجود ہیں ۔۱۸۳۰ ء، ۱۸۳۳ ء اور ۱۸۳۵ ء کے سال جگہ جگہ ملتے ہیں۔ آغا محمد باقر نے تو دو جگہوں پر ۱۸۲۷ء اور ۱۸۲۹ ء بھی لکھا ہے۔آزاد کے پنشن کے معاملے میں ان کے سنہ ولادت کے سلسلے سے بعض اختلافات پنجاب کے اکاؤنٹنٹ جنرل کی نگاہ میں کھٹکے تھے اور انھوں نے ۱۸۹۲ء میں اس سلسلے سے وضاحت بھی طلب کی تھی۔محمد صادق نے محتلف شواہد کی بنیاد پر ان کی پیدایش کا سال۱۸۳۰ ء متعین کیا ہے ۔اگر باقر کی پیدائش ۱۸۱۰ ء بھی ہوتی ہے، تب بھی یہ قرینِ قیاس ہے کہ محمد حسین آزاد ۱۸۳۰ ء کے آس پاس پیدا ہوئے ہوں گے جب کہ ان کے والد کی عمر بیس برس ہو چکی تھی۔
.ii ۳۷۔ ۱۸۳۶ء میں دہلی اخبار شایع ہوا جب ان کی عمر۲۷۔ ۲۶سال تھی ،یہ بات قرینِ قیاس معلوم ہوتی ہے۔
.iii ۱۸۵۷ ء میں جب انھیں موت کی سزا دی گئی، اس وقت ۱۸۱۰ ء کی پیدائش کی رو سے وہ ۴۷برس کے ہوں گے جسے نادرست سمجھنا غیر ضروری ہے۔
مولوی محمدباقر کی تاریخ پیدائش میں جتنے بھی اختلاف رہے ہوں مگر ان کی زندگی کے آخری تیس برس ادبی مورخین کے لیے سب سے اہم ہیں۔ اس میں بھی آخری دو دہائیاں صحافت کے آغاز سے شہادت تک کے سفر کے دائرے میں قید ہیں۔اسی دوران وہ امتیازی حیثیت کے حامل شخص کے طور پر سامنے آتے ہیںاور مدرّس، صحافی، کاروباری اور بالآخر شہیدکے درجے تک پہنچتے ہیں۔اس اعتبار سے اس گفتگو میں مولوی محمد باقر کی زندگی کے اس دورانیے پر نگاہ رکھنے کی کوشش کی جائے گی جس کا نقطۂ آغاز ۱۸۲۸ ء مانا جا سکتا ہے اور ۱۶ ستمبر ۱۸۵۷ ء کو اس کاانجام قرار دیا جا سکتا ہے۔انھی تین دہائیوں کے حوالے سے ہماری گفتگو جاری رہے گی۔

دہلی اردو اخبار کا سالِ اجرا اور اشاعت
اردو صحافت کی تاریخ کے لیے یہ بات کم پیچیدہ نہیں کہ مولوی محمد باقر کی واحد یادگار ’’دہلی اردو اخبار ‘‘ آخر کب سے شایع ہوا۔۱۸۳۶، ۱۸۳۷ یا ۱۸۳۸ ؟ محققین نے ان سوالوں کو بہ نظرِ توجہ دیکھا اور ممکنہ حد تک ایک ایک چھوٹی بات کو پیشِ نظر رکھتے ہوئے اپنے نتائج کی طرف بڑھنے کی کوششیں کیں۔اصل دشواری یہ ہے کہ ابتدائی دور کے شمارے کہیں دستیاب نہیں اور غدر کے بعد مولوی محمدباقر کے خاندان کی جو بے سر و سامانی رہی،اس سے ضروری آثار کے محفوظ رہنے کی یکسر توقعات نہیں کی جا سکتیں۔اس اخبارکے ابتدائی شمارے جو دستیاب ہو ئے، وہ ۱۸۴۰ ء اور ۱۸۴۱ ء کے تھے۔چودھری عبد الغفور سرور کے نام مرقوم غالب کے ایک خط سے اس بات کا اندازہ ہوتا ہے کہ ۱۸۳۷ ء کے اکتوبر مہینے سے قبل سے یہ اخبار نکلتا تھا۔’آبِ حیات ‘میں محمد حسین آزاد نے ۱۸۳۶ ء کی تاریخ درج کی ہے ۔قاسم علی سجن لال ،مارگریٹا بارنس ، ڈاکٹر عبد السلام خورشید اور مولانا امداد صابری نے محمد حسین آزاد کے بیان کے مطابق اپنی کتابوں میں ۱۸۳۶ ء کو ہی اس اخبار کا سالِ اجرا قرار دیا ہے۔عتیق صدیقی اور نادر علی خاںنے ۱۸۳۷ء کو سالِ اجرا قرار دیا ہے۔ ۱۸۴۰ ء اور ۱۸۴۱ ء کی دو جلدیں جو نیشنل آرکایوز سے حاصل ہوئیں ،ان کے مطابق عتیق صدیقی نے اجرا کی تاریخ متعین کرنے کی کوشش کی۔۲۶ جنوری ۱۸۴۰ ء کا جو اوّلین شمارہ دستیاب ہوا، اس پر جلد سوم اور نمبر ۱۵۳ درج ہے۔اس سے ان محققین نے روشنی حاصل کر کے تاریخ میں پیچھے جانے کی کوشش کی۔عتیق صدیقی نے تخمینہ لگایا کہ دہلی اخبار کا اجرا جنوری ۱۸۳۷ء میں ہوا ہوگا۔مگر نادر علی خاں اسی طریقۂ کار کو آزماتے ہوئے اس بات کا اظہار کرتے ہیں کہ مولوی محمد باقر کے اخبار کا پہلا شمارہ ۲۳ فروری ۱۸۳۷ ء کو منظرِ عام پر آیا ہوگا۔
جناب عادل فراز نے دہلی اردو اخبار کے اجرا کے سلسلے سے ایک نیا حوالہ اخبار ’’ماہ افروز عالم‘‘ سے پیش کیا ہے ۔اس دور میں اخبارات ایک دوسرے کی خبروں کی نقل حوالے کے ساتھ شایع کرتے رہتے تھے۔دہلی اردو اخبار کے ۱۷ مئی ۱۸۳۶ ء کے شمارے سے ایک خبر ’’ماہ افروز عالم‘‘ کے شمارہ ۲۱ جولائی ۱۸۳۶ ء میں شایع ہوئی۔ہر چند اخبار نے اس خبر کا فارسی ترجمہ شایع کیا ہے مگریہ بات حتمی طور پر طے ہو جاتی ہے کہ ۱۸۳۶ء میں دہلی ارود اخبار نکل رہا تھا۔اس حوالے میں اخبارِ دہلی (دہلی اخبار)موجود ہے ۔معلوم ہو کہ آغاز سے ۳ مئی ۱۸۴۰ء تک اخبار کا نام ’’دہلی اخبار‘‘ رہا ۔۱۰ مئی ۱۸۴۰ء سے اس کے نام کے بیچ میں ’’اردو‘‘ کا اضافہ ہوا اور اس کا مکمل نام ’’دہلی اردو اخبار ‘‘ ہو گیا۔۱۲ جولائی ۱۸۵۷ ء کے شمارہ بابت جلد ۱۹ نمبر ۲۸ سے اس اخبار کا نام ’’اخبار الظفر‘‘ ہو گیا۔اس طور پر یہ باضابطہ انگریز مخالف اور بادشاہ کی حمایت میں سامنے آگیا ۔۱۳ ستمبر ۱۸۵۷ ء کو آخری شمارے کے ساتھ اس کی زندگی انجام کو پہنچی۔تین دنوں کو بعد خود مولوی محمد باقر بھی غدر کی بھینٹ چڑھا دیے گے۔بعض محققین نے یہ بھی بتایا ہے کہ یہ اخبار بیچ میں دو برسوں کے لیے بند ہو گیا تھا۔مگر اس پر اتفاق راے نہیں ۔سرکاری رپورٹوں سے بھی واضح طور پر یہ بات معلوم نہیں ہو پاتی کہ کن برسوں میں یہ اخبار التوا کا شکار رہا ۔حالاںکہ جلد نمبر کے شمار سے دو برس کے التوا کا اندازہ ہوتا ہے ورنہ ۱۸۳۶ سے ۱۸۵۷ تک ۲۱ یا ۲۲ جلدیں ہونی چاہیے تھیں۔جب کہ’ اخبار الظفر ‘کے آخری شمارے میں جلد ۱۹ ہی نظر آتا ہے۔ناموں کی تبدیلی سے اس اخبار کے شمارہ نمبر اور جلد نمبر کا اندراج بدلتا نہیں تھا۔کیوں کہ ۱۸۴۰ ء میں ’’دہلی اردو اخبار‘‘ اور ۱۸۵۷ ء میں ’’اخبار الظفر‘‘ ہونے کے باوجود پرانی گنتی چلتی رہی۔
’’دہلی اردو اخبار‘‘ میں بالعموم مولوی محمد باقر کا نام کسی حیثیت سے شایع نہیں ہوتا تھا۔اگر چہ وہ اخبار کے مالک اور ایڈیٹر دونوں تھے مگر اس کا باضابطہ کوئی اندراج نظر نہیں آتا۔۱۲جولائی ۱۸۴۰ ء کے شمارے میں ایک سرکلر کی تفصیل میں جو وضاحتیں شامل کی گئی ہیں،ان کی رو سے تو ایسا محسوس ہوتا ہے کہ مولوی محمد باقر اس اخبار کے لیے کوئی اجنبی شخص ہیں۔یہ اقتباس ملاحظہ کریں:
’’یہ ترجمہ کیا ہوا ہے مولوی محمد باقر نامی ایک صاحب کا جو سابق میں مدرس تھے مدرسہ خاص دہلی میں۔سر رشتہ داری کلکٹر اور تحصیل داری مدّت تک کی ہے ۔مال کے کام میں بہت مہارت رکھتے ہیں۔‘‘

دہلی کالج، ٹیلر اور مولوی محمد باقر
مولوی محمد باقر کی زندگی کے حوالے سے ایک انگریزشخص ٹیلرکا تذکرہ آتا رہاہے۔ٹیلر کا مکمّل نام فرانسس ٹیلر تھا۔دہلی کالج کے قیام اور اس کی ترقی کے معاملات میں ٹیلر کی بنیادی حیثیت تسلیم کی گئی ہے۔۱۸۲۵ء میں جب دہلی کالج کی بنیاد رکھی گئی، ٹیلر کو کالج کا سپرنٹنڈنٹ بنایا گیا۔ان کی تنخواہ ڈیڑھ سو روپے مقرر ہوئی۔۱۸۲۸ ء میں تین برس بعد ٹیلر کی تنخواہ میں ڈیڑھ سو روپے کا اضافہ کرکے اسے ماہانہ تین سو روپے دیے جانے لگے۔۱۸۲۵ء میں ہی مولوی محمد باقر بہ حیثیتِ طالب علم دہلی کالج میں داخل ہوئے ۔دونوں کے درمیان اسی دور میں ایک دوستانہ تعلق قایم ہوگیا ۔پھر ۱۸۲۸ ء میں وہ دہلی کالج میں بہ حیثیتِ مدرس منتخب ہوئے۔اس ملازمت میں بھی ٹیلر کی معاونت شامل رہی۔ٹیلر نے مولوی محمد باقر کی مدرسی کے دوران ان سے اردو اور فارسی زبانیں سیکھی تھیں۔
ٹیلر اور مولوی محمد باقر کے درمیان کی قربت اورخصوصی رشتے کوکئی ذرایع سے آسانی سے سمجھا جا سکتا ہے۔دہلی کالج میں قایم چھاپا خانہ فروخت کرنے کے لیے دفتری طورپر جب طے ہو گیا تو ٹیلر نے مولوی محمد باقر کو اُسے خرید لینے کا مشورہ دیا۔اصل قیمت سے بہت کم رقم پر یہ پریس بیچا گیا۔ٹیلر کے مشورے سے ہی مولوی محمد باقر نے ایک نیلام گھر بنوایا تھا ۔یہ نیلام گھر ہفتے میں ایک بار لوگوں کے لیے کاروباری طور پر کام کرتا تھا ۔اس روز تاجر اپنے نئے سامانوں کے ساتھ آتے، وہاں قیام کرتے اور پھر ملک اور بیرونِ ملک کے سامان بالخصوص عجائبات خریدے اور بیچے جاتے تھے۔مولوی باقر نے ٹیلر کے مشورے سے ہی اپنے صاحب زادے محمد حسین آزاد کا داخلہ دہلی کالج میں کرایا تھا۔
ٹیلر کا ۱۸۲۵ ء سے ۱۸۴۰ ء تک بہ حیثیت سپرنٹنڈنٹ دہلی کالج سے تعلق رہا۔ اس کے بعد بھی وہ قایم مقام پرنسپل کے طور پر کئی بار دہلی کالج سے متعلق ہوا ۔جب تک دہلی کالج سے ٹیلر کا کسی نہ کسی جہت کا رشتہ قایم رہا، مولوی محمد باقر کا بھی کالج سے رسمی یا غیر رسمی تعلق قایم رہا۔محمد اکرام چغتائی نے واضح لفظوں میں لکھا ہے کہ اشپرنگر کے دورِ پرنسپلی میں مولوی محمد باقر کا کالج آنا جانا بند رہا۔ٹیلر کے بارے میں دہلی ارود اخبار میں متواتر خبریں شایع ہوتی رہتی تھیں۔ان اطلاعات سے دونوں کے دوستانہ مراسم پورے طور پر ظاہر ہوتے ہیں۔۱۸۵۳ ء میں جب فرانسس ٹیلر نے انگلینڈ جانے کے لیے کالج سے رخصت حاصل کی،اس وقت دہلی کالج کے اسٹاف اور طلبا کی جانب سے ایک اعزازی تقریب منعقد ہوئی۔ اس موقعے سے ٹیلر کی تعلیمی خدمات کا کھلے دل سے اعتراف کیا گیا۔اس موقعے سے ٹیلر کے کارناموں کے بارے میں ایک مکمل عرض داشت پیش کی گئی۔ بعد میں وہ دہلی اردو اخبار میں تقریباً دو صفحات میں شایع کی گئی۔اس سے بھی ٹیلر اور ایڈیٹر دہلی اردو اخبار کے درمیان قریبی رشتے کو سمجھا جا سکتا ہے۔

مولوی محمد باقر کی شخصیت سے متعلق تنازعات
دہلی کی تہذیبی اور ثقافتی حیثیت کے بارے میں اطّلاعات جمع کرتے ہوئی یہ بات بھی معلوم ہوتی ہے کہ وہاں مسلمانوں کے بیچ مسلکی اختلافات شدید تھے اور وقتاً فوقتاً کسی واقعے یا حادثے سے اس میں شعلگی پیدا ہوتی رہتی تھی۔مرزا مظہر جان جاناں کا قتل اٹھارہویں صدی کے ان مسلکی اختلافات کا ایک کریہہ چہرہ سامنے لاتا ہے۔گہرائی سے دیکھنے پر یہ بھی پتہ چلتا ہے کہ ان تنازعات میں شاہی دربار ،حکّام اور امراو رئوسا بہر طور شامل رہتے ۔مولوی محمد باقر کا خاندان روادارانہ ماحول میں پھلا پھولا تھا۔مولوی باقر کے والد مجتہد تھے اور مولوی باقر کے یہاں بھی یہی انداز تھا۔انگریزوں نے فطری طور پر مسلمانوں کے مسلکی اختلاف کو گہرائی سے سمجھ رکھا تھا، اس لیے حسبِ ضرورت اسے اُبھارنے یا کچلنے میں وہ اپنی توجہ صرف کرتے تھے۔
۱۷۹۲ ء میں مدرسہ ٔ غازی الدین، ۱۸۲۵ ء میں دہلی کالج جہاں عربی فارسی کی تعلیم کا انتظام تھا،۱۸۲۸ میں انگریزی مضمون کی تعلیم کا سلسلہ؛ دہلی کالج کی یہ ایک مختصر سی تاریخ ہے۔نواب اعتماد الدولہ نے اپنی وفات سے چند ماہ پہلے دہلی کالج کے لیے ایک لاکھ ستّر ہزارروپے کی رقم وقف کر تے ہوئے ایک وصیت نامہ بہ زبانِ فارسی تیّار کرایا جس کی رو سے عربی ،فارسی اورسائنس کی تعلیم کی مد میں اسے خرچ کرنا تھا ۔نواب اعتماد الدولہ کے بعد نواب سیّد حامد علی خاں اس وصیت کے مطابق نگراں مقرر ہوئے ۔ٹیلر کی جب تنخواہ بڑھائی گئی تو نواب صاحب نے اس پر اعتراض کیا اور واضح لفظوں میں بار بار حکومت کو بتایا کہ وقف کی رو سے اس رقم سے ٹیلر کی تنخواہ دی جانی مناسب نہیں ہے۔کیونکہ ٹیلر مذہب ،مسلک یا زبان تینوں معاملات میں وقف کی رو سے اس رقم سے فیض پانے کااہل نہیں ہو سکتا ۔۱۸۴۰ ء میں آخر ٹیلر کو اِس اچھی تنخواہ سے دست بردار ہونا پڑا ۔ٹیلر اور نواب حامد علی خاں میں داخلی طور پر اسی مرحلے میں اختلافات پیدا ہوئے ۔ان اختلافات میں مولوی محمد باقر کسی نہ کسی جہت سے شریک ہو گئے بلکہ اس کی متعدد کریہہ شاخیں بھی یہیں سے نکلتی چلی گئیں۔
مولوی محمد باقر کو تمام علمی اور سماجی حیثیات کے باوجود شیعہ استاد کے طور پر دہلی کالج میںموقع نہیں دیا گیا اور لکھنو ٔ سے قاری جعفر علی کو اس کام کے لیے بلا یا گیا۔اس کے پیچھے نواب حامد علی خاںکا سیدھا ہاتھ تھا کیونکہ بار بار وہ حکومت کو یہ بات گوش گزار کراتے رہے کہ چونکہ معطّی کا مسلک شیعہ ہے ،اس لیے شیعہ طلبا کو الگ استاد فراہم کیا جائے۔اسی لیے قاری جعفر علی لکھنؤ سے بلائے گئے ورنہ ۱۸۴۰ ء تک دونوں مسلک کے طلبا ایک ہی استاد سے درس لیتے تھے۔نواب حامد علی خاں کالج کے باہر بھی مسلکی اعتبار سے بے دار شخص کے طور پر پہچان رکھتے تھے ۔اس دوران غالب کی وہ طرح طرح سے معاونت کرنے لگے اور ذوق کو درکنار کرنے کی کوشش کرتے رہے۔یہاں مولوی باقر کی صحافیانہ سرگرمیوں کے لیے نرم زمین تیارہوئی۔ان کے مربی اور دوست ٹیلر اور ذوق دونوں کی مخالفت میں چوں کہ نواب حامد علی خاں مرکزی حیثیت رکھتے تھے، اس لیے مولوی باقر نے ٹیلر اور ذوق کی طرف داری میں اپنے اخبار کے کالم سیاہ کیے۔یہی نہیں ،نواب حامد علی خاں کی مذمّت میں بھی خبریں شایع ہونے لگیں۔یہ اختلافات اس انداز سے بڑھتے جا رہے تھے جب محمد حسین آزاد کا ۱۸۴۵ ء میں دہلی کالج میں داخلہ ہوا تو ان کے مسلک کے اعتبار سے انھیں شیعہ استاد کے حوالے کیا گیا ۔کچھ دنوں تک محمد حسین آزاد نے قاری جعفرعلی سے درس لیا مگر مولوی باقر نے محمد حسین آزاد کا مضمون تبدیل کرا کر انھیں سنّی استاد کے حلقے میں ہی رکھنا قبول کیا۔کیونکہ وہ کسی ایسے استاد کے ذمّے اپنے صاحب زادے کو نہیں لگانا چاہتے تھے جو کسی نہ کسی طور ان سے کھلی دشمنی رکھتا ہو۔
مولوی محمد باقر اور قاری جعفرعلی کے درمیان آپسی مسلکی اختلافات تو ہو سکتے تھے مگر اس کی اصلی بنیاد دہلی کالج کی رنجش تھی۔دہلی کالج میں جب اشپرنگر۱۸۴۵ ء میں پرنسپل بن کر آیاتو ٹیلر سے اس کے واضح اختلافات قائم ہوگئے تھے۔جس طرح سے ٹیلر اور مولوی محمد باقر کی جوڑی بن گئی تھی، اسی طرح اس کے بعد کے زمانے میں اشپرنگر اور قاری جعفرعلی کی جوڑی کام کرنے لگی۔محمد اکرام چغتائی نے برلن میں واقع اشپرنگر کے ذاتی کتب خانے میں موجود متعدد ستاویزات سے استفادہ کرتے ہوئے محمد حسین آزاد اور ان کے والد اور اس موضوع کے متعلقات پر بہت ساری نئی معلومات فراہم کرنے میں کامیابی حاصل کی ہے۔اشپرنگر کے نام قاری جعفر کے متعدد خطوط سے دونوں کے ذاتی اور علمی رشتوں کے ثبوت ملتے ہیں۔اس ذخیرے میں اشپرنگر کے نام نواب حامد علی خاں کے بھی دو فارسی اور دو اردو مکاتیب موجود ہیں ۔ان سب سے اشپرنگر ،حامد علی خاں اور قاری جعفر علی کے قریبی رشتوںکی وضاحت ہو جاتی ہے ۔یہیں یہ بھی سمجھ میں آنا چاہیے کہ مسلکی اعتبار سے رفتہ رفتہ اختلاف کایہ لاوا بڑے پیمانے پر پھوٹنا ہی چھاہتا تھا۔
دہلی میں اہلِ تشیع کے درمیان دو طبقے پیدا ہو گئے: باقری اور جعفری ۔ دہلی اردو اخبار اس کا اکھاڑا بن گیا اور تقریباً چھے بر سوں تک دہلی کا مسلکی ماحول جیسے بگاڑ پر رہا، ویسا تاریخ میں بہت کم دیکھنے کو ملتا ہے۔دہلی کالج کے سابق اور موجودہ اساتذہ کی یہ مسلکی چپقلش سماجی اعتبار سے نا خوشگواراور غیر صحت بخش ثابت ہوئی۔سارا شہر اور اصحابِ دانش رفتہ رفتہ کسی کی طر ف داری اور کسی کی مذمّت میں شامل ہوتے چلے گئے۔۱۸۴۸ء سے ۱۸۵۴ ء کے دوران ان دونوں کے تنازعات اپنی انتہا کو پہنچے ہوئے تھے۔بے شک اس میں مولوی محمد باقر کو یہ فایدہ حاصل تھا کہ ان کے ہاتھ میں ایک اخبار تھا اور اس کا وہ حسبِ ضرورت اپنے مفاد میں استعمال بھی کرتے تھے۔
یہاں یہ بات ذہن نشیں ہونی چاہیے کہ مولوی محمد باقر کی شخصیت میں کچھ عدم توازن کے آثار ملاحظہ کیے جا سکتے ہیں۔ان کی شخصیت میں شعلگی تھی۔ وہ تیز ردِّ عمل کے قائل تھے اور کسی معاملے پر بھی فوری طور پر برہمی کا اظہار کر سکتے تھے۔مولانا امداد صابری نے انھیں آزاد خیال،وسیع النظر،خود دار اور حق گو انسان قرار دیا ہے مگر اخبار کے مشتملات کا تجزیہ کرتے ہوئے انھوں نے اس بات کا اقرار کیا ہے کہ بہ آسانی یہ سمجھا جا سکتا ہے کہ مولوی محمد باقر کے سماج میں کون سے دوست ہیں اور کن سے ان کی دشمنی ٹھنی ہوئی ہے۔ظاہر ہے کہ یہ اخبار اور صحافت کے معروضی کردار اور مثالی رویے سے مختلف بات ہے۔
یہ سمجھنا درست نہیں ہوگا کہ مولوی محمد باقر اپنی صحافت سے کوئی مثالی کردار خلق کر رہے تھے۔بے شک بہت سارے معاملوں میں وہ اعلا صحافیانہ اقدار کو آزمانے میں کامیاب ہوئے تھے۔مگر اس دور کی بعض آزادانہ رپورٹ اور دوسرے اخبارات میں پیش کردہ تجزیوں میں کئی بار مولوی محمد باقر پر صحافیانہ معیار سے بے پروائی برتنے کے الزامات عاید ہوئے۔ذیل میں اُس دور کی مختلف ذرایع سے حاصل شدہ رپورٹوں کے اقتباسات پیش کیے جاتے ہیں جن سے مولوی محمد باقر اور دہلی اردو اخبار کے صحافتی معیار پر چند سوالیہ نشانات قایم ہوتے ہیں:
’’ دہلی اردو اخبار ایک دریدہ دہن اخبار ہے،جو ذاتیات سے بھرا رہتا ہے۔ذی اثر مقامی شرفا ،جو اس اخبار کے ایڈیٹر کے مذہبی خیالات سے اختلافات رکھتے ہیں ،وہ ان کی پگڑیاں اُچھالا کرتا ہے۔‘‘

’’دہلی کالج کے اوّل عربی مدرس جعفر علی جو شیعہ ہیں، ان کے متعلق ایک خط اس اخبار میں شائع ہوا ہے، جس میں جعفر علی کو نا اہل اور اس عہدے کے لیے نا مناسب گردانا گیا ہے۔‘‘

’’ایڈیٹر اپنی ذاتی مخاصمت کی وجہ سے دہلی کالج کے ایک استاد مولوی جعفر علی پر انتہائی دریدہ دہنی سے ہتک آمیز حملے کرتا رہتا ہے۔مذہبی مباحث میں بھی وہ اکثر الجھ جاتا ہے۔‘‘

’’یہ ایک گندا اخبار ہے جو ذاتیات سے بھرا رہتا ہے ۔مقامی با عزت شرفاجو ایڈیٹر کے مذہبی خیالات سے اختلافات رکھتے ہیں ،یا جن سے کسی اور وجہ سے وہ ناراض ہیں،ان پر اپنے اخبار کے صفحات میں وہ براہِ راست یا با لواسطہ حملے کیا کرتا ہے۔‘‘
اسی طرح رسالہ ’ارشاد المومنین‘ (۱۲۷۰ھ) میں مولوی محمد باقر کے حوالے سے جوطرح طرح کے الزامات شایع ہوئے ہیں ،وہ ان کی طبیعت کی گرانی کا مظہر ہیں۔ذخیرۂ اشپرنگر میں محمد اکرام چغتائی صاحب کو خدا بخش نام کے ایک طالب علم کا خط بہ نام اشپرنگر حاصل ہوا جسے اس طالب علم نے اشپرنگر کو بھیجا تھا۔ اس خط پہ سنہ تحریر ۲۶ دسمبر ۱۸۴۸ ء درج ہے۔یہ طالب علم جماعتِ عربی اہلِ تشیع سے متعلق ہے اور مولوی جعفر علی کا براہِ راست شاگرد۔اس خط میں مولوی محمد باقر کے ذریعہ اپنے اخبار میں لگاتار سترہ مہینے سے مولوی سیّد جعفر علی کے سلسلے سے نازیبا خبریں چھاپنے کی اطّلاع دی گئی ہے۔اس طالب علم نے لکھا ہے کہ محمد باقر قایم مقام پرنسپل (ٹیلر) کے مصاحب ہیں ۔یہ بھی لکھا ہے کہ وہ شخص (مولوی محمد باقر) کہتا ہے کہ ڈاکٹر اشپرنگر تو نہیں ہیں، اب میں جو چاہوں، وہ کرا سکتا ہوں۔اس خط میں مولوی باقر پر مولوی جعفر علی کے طلبا کو پریشان کرنے اور دیگر اساتذہ کو تنگ و تباہ کرنے کی تفصیلات درج ہیں ۔ان شکایات میں بے شک مخالفانہ روش اور دشمنی کے امور بھی شامل ہوں گے۔مگر واقعات اور بیان کے اسلوب سے چھن چھن کر کچھ کیفیات سامنے آ رہی ہیں، ان کی رو سے مولوی محمد باقر کی شخصیت کی مخاصمت پسندی سے انکار کرنا مشکل ہے ۔ہر چند یہ بھی ایک حقیقت ہے کہ قاری جعفر علی اور مولوی محمد باقر کے بیچ جو اختلافات شروع ہوئے ، ان کے پیچھے نواب حامد علی خاں کا ہی پورا پورا ہاتھ تھا اور یہ جنگ مولوی باقر سے وہ آمنے سامنے لڑنا ضروری نہیں سمجھتے تھے بلکہ اس کام کے لیے انھوں نے مولوی جعفر علی کو آگے کر رکھا تھا۔دہلی اردو اخبار میں مولوی باقر بھی کسی نہ کسی جہت سے نواب حامد علی خاں کے حوالے سے چھوٹی بڑی منفی خبریں بھی شایع کرتے رہتے تھے۔
مولوی محمد باقر بے شک دہلی کی تہذیبی و ثقافتی زندگی میں مرکزیت رکھتے تھے اور ان کا اخبار شمالی ہندستان کا پہلا اخبار تھا ۔ایڈیٹر کی حیثیت سے بھی ان کا رُعب انگریزوں اور ہندستانیوں میں قایم تھا مگر شخصیت میں تعجیل پسندی اور زور آوری بنیادی حیثیت رکھتی تھیں۔کسی بھی کام میں بھڑ جانا اور مخالفین کو ان کے انجام تک پہنچا دینا ؛ان کے مزاج کا حصّہ تھا۔اس عہد میں صحافت واقعی بڑی چیز تھی اور اس سے ان کی سماجی حیثیت بھی بلند و بالا ہوئی۔مگر صحافتی کج رویاں اور حالات کے جبر میں ’’جوابِ آں غزل‘‘ پیش کرنے کی ان کی خصوصیت نے کئی بار صحافت کے غیر متوازن انداز کو آزمانے پر مجبور کیا ۔ممکن ہے، اس میں ٹیلر کی حکمتِ عملی کا بھی تھوڑا بہت دخل ہو مگر یہ سچائی مانی جائے گی کہ مولوی محمد باقر نے اپنی صحافیانہ زندگی میں کبھی کبھی صحیح راستے سے ہٹ کر مصلحت کو شی کو بھی اپنا شعار بنایا۔

دہلی اردو اخبار اور مولوی محمد باقر :اردو صحافت کے معیار ساز
یہ بات طے شدہ ہے کہ دہلی اردو اخبار نے اردو زبان کو صحافت کے آزادانہ طور پر معیار متیعن کرنے کے لیے اپنی خدمات پیش کیں۔دہلی اردو اخبار سے پہلے جو اخبارات شایع ہو چکے تھے ،ان سب کے مقابلے میں اس اخبار نے اپنے کاموں سے صحافتی معیار کا دعویٰ کیا۔اس زمانے کے سب سبے مہنگے اخبارات میں اس کا شمار ہوتا تھا ۔بیس روپے سالانہ رقم اس عہد کے اعتبار سے بڑی قیمت تھی۔شاید یہی وجہ ہو کہ یہ اخبار خواص میں اپنی زیادہ شناخت رکھتا تھا۔یوں بھی اخبار پڑھنے والا طبقہ غدر سے پہلے نہایت خاص اور با حیثیت طبقہ ہوتا ہوگا۔ہندستان میں تعلیم مٹھّی بھر لوگوں کے پاس تھی جو اخبار پڑھ سکتے تھے۔
مولوی باقر کا اختصاص کئی اسباب سے واضح ہے۔ان کا خاندان تعلیم یافتہ تھا اور تصنیف و تالیف کا سلسلہ ان سے پہلے سے وہاں موجود تھا۔اس عہد کی گنجایش کے مطابق اعلا تعلیم کے جو وسائل دہلی میںممکن تھے ،وہ اس کے فیض یافتہ تھے۔ہندستانیوں کے ساتھ ساتھ انگریزوں سے ربط ضبط ہونے کی وجہ سے نئی دنیا کا ایک خاکہ ان کے ذہن میں رہا ہوگا۔تدریس کی ذمہّ داریوں سے فراغت اور سرکاری ملازمتوںسے بے رخی کے ادوار گزارتے ہوئے وہ پوری ذہنی تیاری کے ساتھ میدانِ صحافت میں وارد ہوئے تھے۔پریس پہلے بٹھا لیا تھا جس کے بغیر اخبار نکالنا شاید ممکن نہیں تھا۔ہندستان کے سیاسی،سماجی اور تعلیمی ماحول سے بھی وہ پورے طور پر واقفیت رکھتے تھے۔
اس لیے جب مولوی باقرمیدانِ صحافت میں آئے تو ان کے کام نو آموزوں کی طرح نہیں ہو سکتے تھے۔اخبار کے کالم بڑے دانش مندانہ انداز سے طے کیے گئے۔’’حضورِ والا‘‘ اور’’ صاحب کلاںبہادر‘‘ جیسے کالم اور پھران کے لیے مخصوص جگہ کا تعین بتاتا ہے کہ صحافی کی حیثیت سے ان کا ذہن اپنے آپ میںکس قدر تربیت یافتہ تھا۔ اخبار کے جو اوراق محفوظ رہ سکے ،انھی بنیاد وںپر مولوی محمد باقر یا دہلی اردو اخبار کے معیار اور مقام کی گفتگو ممکن ہے۔بے شک یہ سرمایہ ہزاروں صفحات پر مشتمل ہے اور دو برس کے اخبارات تو ترتیب و تدوین کی منزلوں سے گزر کر ہر کس وناکس کے لیے دستیاب ہیں۔اردو صحافت کی تاریخ سے متعلق یا غدر کے بارے میں کوئی ایسی کتاب سامنے نہیں آ سکتی جس میں مولوی محمد باقر کے اس اخبار کے تراشے بہ طورِ مثال شامل نہ کیے گئے ہوں۔
دہلی اردو اخبار کی بنیادی اہمیت تو بالآخر ہم وطنوں کے مفاد کو محفوظ رکھنے اور انگریزوں کی عوام مخالف پالیسیوں کی وجہ سے قایم ہوتی ہے۔۳۱ مئی ۱۸۵۷ء کے اخبار میں بجا طور پر ہندستانیوں اور انگریزوں کے طریقۂ کار کو مقابلے میں رکھتے ہوئے بات کہنے کی کوشش کی گئی:
’’(انگریزوں) کے تکبر نے ان کو قہرِ الٰہی میں مبتلا کیا۔۔۔۔ اب کہاں ہیں انگلش مین اور فرنڈ آف انڈیا۔۔۔۔ اور وہ لن ترانیاں۔حکمت و حکومت داناؤں انگلستانیوں کی ‘‘
۱۲ اپریل ۱۸۵۷ ء کے اخبار میں بھی انیسویں ریجیمنٹ (بارک پور) کی سرگرمیوں کے بارے میں خبریں شایع ہونے لگتی ہیں۔۱۷ مئی ۱۸۵۷ ء کے دہلی اردو اخبار میں کھلے طور پر دہلی کے حالات اور ابتری کے واقعات کی اشاعت شروع ہو جاتی ہے۔اس دوران دوسرے مقامات سے متعلق بغاوت کی خبریں واضح الفاظ میں پیش کی گئی ہیں۔یہ اخبار کے نقطۂ نظر کا کُھلا اظہار ہے ۔یہ سلسلہ ۱۳ ستمبر ۱۸۵۷ ء تک کے آخری شمارے تک قایم رہتا ہے۔
اردو زبان کی ادبی تاریخ لکھنے والوں کے لیے دہلی اردو اخبار ایک بنیادی مآخذ کی حیثیت رکھتا ہے۔مولوی محمد باقر اور نوجوان ،اُبھرتے ہوئے ادیب محمد حسین آزاد کی علمی سرگرمیوں کو اس اخبار کے صفحات پر دیکھا جا سکتا ہے۔محمد حسین آزاد کی ابتدائی تحریریں اسی اخبار میں شایع ہوئیں۔اس لیے جب جب ان کی ادبی نشوونما کے بارے میں معلومات جمع کرنی ہوں گی،ایک محقق کو اس اخبار کے صفحات پلٹنے ہی ہوں گے۔غدر کے بعد اور انجمنِ پنجاب کی بزم میں ہمیں جو محمد حسین آزاد ملتے ہیں، وہ بنے بنائے ہوئے اور تربیت یافتہ ہیں مگر ان کی علمی تربیت گاہ دہلی اردو اخبار کے اوراق ہی تھے اور یہیں وہ لکھتے پڑھتے بڑے ادیب کی شکل میں سامنے آئے۔
دہلی اردو اخبار کی اشاعت کا وہ دور ہے جب وہاں ذوق،غالب اور مومن بستے تھے۔ذوق سے مولوی محمد باقر کی رفاقت اور محمد حسین آزاد سے شاگردی کا رشتہ تھا۔اس لیے ذوق کے حوالے سے ہر طرح کی اطّلاعات اس اخبار میں شایع ہوئیں۔ذوق کا کلام تو استاد ہونے کی وجہ سے بہادر شاہ ظفر سے اُوپر شایع ہوتا تھا۔غالب اورمومن سے متعلق اچھا خاصا سرمایہ اس اخبار کے صفحات میں موجود ہے۔ان کے علاوہ دوسرے اردوو فارسی شعرا جو اس دور میں نمایاں تھے، ان کی تحریریں بھی دہلی اردو اخبار میں اہتمام کے ساتھ شایع ہوتی تھیں۔یہ یاد رہے کہ اس زمانے میں شعرا و ادبا کے کے دواوین بہت مشکلوں سے شایع ہو پاتے تھے۔سب کے قلمی نسخے اور ان کی نقلیں ہی دستیاب ہوتی تھیں۔ایسے میں اس عہد کے درجنوںاہم شعرا و ادبا کی تحریروں کو دہلی اردو اخبار نے پختہ روشنائی میں پیش کر دیا اور انھیں ضایع ہونے سے بچا لیا ۔اکثر محققین نے ذوق،غالب اور مومن کے کلام کی تدوین میں دہلی اردو اخبار میں شایع شدہ کلام سے استفادہ کیا ہے ۔غالب کے اشعار میں جو ترمیم و اضافہ ہوا،اس کے بارے میں بھی اس اخبار سے واضح روشنی ملتی ہے۔
یہ سب کے لیے کھُلی حقیقت تھی کہ دہلی اردو اخبار شیخ محمد ابراہیم ذوق کا طرف دار ہے اور مرزا غالب سے فطری طور پر معاندانہ رویہ رکھتا ہے۔غالب کے خلاف مستقل طور پر خبریں شایع ہوتی تھیں۔جوئے کے الزام میںغالب کی گرفتاری کی خبر کو اس اخبار نے ۱۵ اگست ۱۸۴۱ ء کے شمارے میں تفصیل کے ساتھ شایع کیا تھا جس میں اطّلاعات سے بڑھ کر طنز اور اس سے بھی بڑھ کر معاندت کا طور دیکھا جا سکتا ہے۔ انہی وجوہات سے غالب اس اخبار کو نا پسندیدگی کی نظر سے دیکھتے تھے۔
دہلی اردو اخبار میں شایع شدہ خبروں سے اس کی عوامی پہنچ کا اندازہ کیا جا سکتا ہے ۔صرف دہلی ہی نہیں ہندستان کے طول و عرض سے خبروں کا حصول اور پھر ان کی اشاعت قابلِ توجہ امر ہے۔اس کے ساتھ ایران، انگلستان، افغانستان اورچند دوسرے ممالک کے بارے میں بھی بعض اوقات اطّلاعات شایع ہوتی تھیں۔عمومی سیاسی اور سماجی موضوعات کے ساتھ مذہبی اور تعلیمی امور بھی اخبار کے مدیر کے پیشِ نظر ہوتے تھے اور وقتاً فوقتاً چشم کشا تحریریں ان موضوعات کے حوالے سے بھی دیکھنے کو مل جاتی تھیں۔مسلمانوں کی تہذیبی زندگی کے علاوہ ہم وطنوں کے بارے میں بھی اچھی خاصی خبریں پیشِ نظر ہوتیں جن کی بنیاد پر آج ہم یہ نتیجہ اخذ کر سکتے ہیں کہ یہ اخبار کشادہ ذہنی اور اپنے مطالعۂ کائنات کی وجہ سے تاریخی کردار کا حامل ہے۔

مولوی محمد باقر کی شہادت کا قضیہ
اس بات میں کوئی بحث نہیں کہ ایّامِ غدر میں پہلا صحافی جو انگریزوں کی طرف سے موت کا مجرم قرار دیا گیا، وہ مولوی محمد باقر ہی تھے جنھیں غالباً ۱۳ ستمبر ۱۸۵۷ ء کو گرفتار کیا گیا اور آناً فاناً ۱۶ ستمبر ۱۸۵۷ء کو موت کی سزا دے دی گئی۔عتیق صدیقی نے باغی اخبار نویسیوں کے احوال پر اپنی کتاب ’’ہندستانی اخبار نویسی ‘‘ میں چند اطّلاعات فراہم کی ہیں۔جیسے ہی غدر کی ناکامی کے بعد انگریزی فوج دوبارہ دہلی پر قابض ہو گئی،اس کے بعد طرح طرح کی تادیبی کارروائیاں شروع ہوگئیں۔ اسی اسکیم کے تحت باغیوں اور ان کے مددگاروں کی تلاش شروع ہوئی ۔حکومتِ پنجاب کے سرکاری دستاویزات اس بات کی گواہی دیتے ہیں کہ جن اخبارات نے انگریزوں کی مخالفت کی اور ہم وطنوں کی طرف داری میں کسی طرح کا اقدام کیا ،ان پر عتابات نازل ہونا شروع ہوئے۔پنجاب میں سنسر شپ نافذ کر دی گئی۔پشاور کے اخبار ’’مرتضائی‘‘ کے مدیر کو باغیانہ مضامین لکھنے کے جرم میں قید کر لیا گیا اور اخبار کو بند کرنے کا حکم دے دیا گیا۔ملتان کے اخبارات پر بھی یہ سلسلہ قایم رکھا گیا۔سیالکوٹ سے نکلنے والے اخبار’’چشمۂ فیض‘‘ کے ایڈیٹر کو حکم دیا گیا کہ اپنے اخبار کووہ لاہور سے نکالے۔لاہور سے نکلنے والے دو دیگر اخبارات پربھی سخت نگرانی شروع ہوئی۔اسی طرح دہلی کے اخبارات بھی زد میں آئے اور لازمی طور پر اس کا اثر دہلی اردو اخبار پر بھی پڑنا تھا۔محمد حسین آزادکا نام بھی چوں کہ دہلی اردو اخبار کے مالک کے طور پر شایع ہوتا تھا،اس لیے وہ بھی گرفتار کیے جانے والوں کی فہرست میں شامل تھے مگر وہ خاموشی سے نکل بھاگنے میں کامیاب ہوئے۔
مولوی محمد باقر غدر میں قوم پرستی کے الزام میں شہید کیے جانے والے بے شک پہلے صحافی ہیں۔مگر ان کی شہادت کے اسباب پرگذشتہ ڈیرھ صدیوں میں اتنی گرد پڑتی رہی کہ حقیقت کتنی ہے اور فسانہ کتنا ،یہ سمجھنا مشکل ہوگیا ہے۔محمد حسین آزاد، ان کے صاحب زادے اور ان کے پوتے آغا محمد باقر کے بیانات میں جگہ جگہ قصہ گوئی کے عناصر شامل ہو گئے ہیں۔ مولوی عبد الحق ،مالک رام ،امداد صابری،منشی ذکاء اللہ، جہاں بانو بیگم،سر عبد القادر ،طالب الہٰ آبادی،ڈاکٹر محمد صادق، جیون لال،ڈاکٹر اسلم فرّخی اور محمد عتیق صدیق وغیرہ نے شہادت کے واقعے اور اس کے اسباب کی تہہ در تہہ جانچ پڑتال میں جس دقّتِ نظر کا ثبوت دیا ہے،وہ قابلِ توجہ تو ہے مگر کئی بار حقائق گُم ہونے لگتے ہیں اور اصل موضوع سے ذہن دوسری طرف منتقل ہو جاتا ہے۔تمام مبصّرین کے بنیادی نکات پر غور کریں تو کچھ باتیں بے شک قصّہ گوئی کے ذیل میں بھی آ جائیں گی۔یہ بات درست ہے کہ یہ قصّہ گوئی سینہ بہ سینہ روایت کی وجہ سے فطری رنگ آمیزی کا نتیجہ ہے اور حقائق کے سلسلے کی معلومات میں تحقیقی شگاف پُر کرنے کی کوشش سے زیادہ ان باتوں کو اہمیت نہیں دی جاسکتی۔
پرنسپل ٹیلر کے قتل کا الزام مولوی محمد باقر پر پورے طور پر عاید کیا گیا یا نہیں یا ٹیلر اس زمانے میں ہجومی تشدد کا شکار ہو کر اس دنیا سے رُخصت ہوا ،ایسے بہت سارے سوالوں کے جوابات اب تاریخ کے اندھیروں میں گُم ہیں۔یہ قصّہ کہ ٹیلر نے ان کاغذات پر اطالوی زبان میں یہ لکھ دیا تھا کہ ابتدامیں مولوی باقر نے میری جان بچانے کی کوشش کی مگر بعد میں مجھے چھوڑ دیا، یہ کہاں تک درست ہے، اس کی شہادت اب ناممکن ہے۔کہا جاتا ہے کہ انگریز افسر نے ان کاغذات کو لیتے ہوئے مولوی باقر سے ٹیلر کے بارے میں دریافت کیا اور جب اسے یہ معلوم ہوا کہ ٹیلر مارا گیا تو اس نے مولوی محمد باقر کو گرفتار کرا دیا۔واقعہ فطری اور حسبِ حال معلوم ہوتا ہے مگرٹیلر کی زندگی کے جو پچیس تیس برس دہلی میں گزرے اورمولوی محمد باقر سے ان کے جو روابط رہے،اس کی روشنی میں ٹیلر کے کردار کو مسخ کرنے جیسا ہے۔ان تین دہائیوں میں ایسا کوئی واقعہ نہیں جس کی رو سے یہ کہا جا سکے کہ ٹیلر مولوی محمد باقر کے تئیں معاندانہ رویہ رکھتا ہے۔اس کے عیسائی ہونے اور عیسائی مذہب کی تبلیغ و اشاعت کے امور کو اسی انداز میں سمجھنا چاہیے جیسے مولوی محمد باقر بھی مسلکی اعتبار سے مختلف مناقشوں میں بڑھ چڑھ کر حصّہ لیتے تھے مگران کی روادارانہ شخصیت میں اس سے کوئی واضح تبدیلی نہ ہوئی اور تین دہائیوں تک ٹیلر اور مولوی محمد باقر کے مراسم یکساں طور پر اور ہموار طریقے سے قایم رہے۔
مولوی محمد باقر کو انگریزوں نے ان کی قوم پرستی، بادشاہِ وقت سے خصوصی روابط اور عقیدت مندی، غدر کے باغیوں سے دوستانہ رشتہ ، خفیہ طور پر ہم وطنوں کی طرف داری ، غدر کی سرگرمیوںمیں براہِ راست شریک ہونا، غدر کے موقعے سے اخبار کے ذریعہ انگریزوں کی مذّمت کرنا اور انقلابیوں کی حوصلہ افزائی کرنا جیسے واضح الزامات کے عوض ماخوذ کیا۔ٹیلر کے قتل کا الزام زیادہ سے زیادہ ایک ضمنی سبب ہو سکتا ہے مگر مولوی محمد باقر پر قوم پرستی کے درجنوں ایسے الزامات ثابت ہو سکتے تھے جن پر انھیں موت کی سزا دی جا سکتی تھی۔
انقلابیوں کی خبروں کو اہمیت کے ساتھ شایع کرنا، اخبار کا نام تبدیل کرکے بادشاہ سے انسلاک کا واضح اعلان کرنا ، انگریز حکمرانوں کے خلاف بغاوت کے لیے ہم وطنوں کواخبار کے کالموں میں اکسانا اور جو انقلابی میدانِ کار زار میں تھے، ان کا حوصلہ بڑھانا جیسی باتیں مولوی باقر کی زندگی کی کُھلی کتاب کا حصّہ ہیں۔جیون لال کے روزنامچے میں ۱۷ مئی اور ۴ جون کی تاریخوں کے اندراجات میں یہ واضح طور پر لکھا ہوا ہے کہ مولوی محمد باقر پیدل فوج کی پلٹنوں کا حصّہ تھے اور افواجِ شاہی کے رُکن کی حیثیت سے خزانے کی حفاظت کے لیے مامور تھے۔۱۶ مئی ۱۸۵۷ء کو بہادر شاہ ظفر سے ان کی ملاقات اور دہلی کے انتظامات کے بارے میں غور و فکر کی اطّلاع جیون لال کے روز نامچے’’غدر کی صبح و شام‘‘میں ملتی ہے۔
غدر کے اوائل میں انگریزوں کی طرف سے ایک اشتہار جاری ہوا تھا کہ انگریز مسلمانوں کو اس ہنگامے کا قصور وار نہیں سمجھتے۔اس اشتہار میں اس بات کی وضاحت موجود تھی کہ کارتوسوں میں سور کی چربی نہیں ملائی گئی ہے بلکہ گائے کی چربی ملائی گئی ہے۔ان کا مقصد واضح تھاکہ ہندو مسلم اتحاد میں بکھراؤ آئے۔دہلی کے علمانے اس اشتہار کا جواب ایک دوسرے اشتہار سے دیااور انگریزوں کی سازش سے محفوظ رہے۔یہ جوابی اشتہار دہلی اردو اخبار کے چھاپاخانے میں شایع ہوا۔اشتہار کی پریس سے اشاعت بھی انگریزوں کے لیے ایک معقول جرم کی حیثیت رکھتی تھی اور موت کی سزا کے لیے یہ بات کافی تھی۔دہلی اردو اخبار میں لگاتار ایسی خبریں یا باغیوں کی فتح یابی پر اظہارِ مسرّت اور انگریز قوم پر لعن طعن کا سلسہ جاری رہتا تھا۔یہ تمام باتیں الگ الگ بھی انگریزوں کی نظر میں جان کے سودا کے لیے کافی تھیںاور یہی ہوا ۔ٹیلر کی موت ایک بہانہ بن گئی ورنہ مولوی محمد باقر کے لیے انگریزوں کے پاس الزام در الزام کی غیرمختتم کڑیاں موجود تھیں۔

اختتامیہ
مولوی محمد باقر کی شخصیت اور ان کے کارناموں کا اجمالی جائزہ ان کے عہد کو دیکھتے ہوئی صحافت کے ایک طالب علم کے لیے حیرت میں ڈال دیتا ہے۔مولوی محمد باقر نے اخبار کی اشاعت سے قومی ضرورتوں کو سمجھا اور اپنے مزاج کو موقع محل کی مناسبت سے بدلنے میں کامیابی حاصل کی۔صحافت میں گہرے اُترنے کے بعد اُنھیںہندستانی سماج کے مسائل اور سامراجی عتابات کو سمجھنے کے مواقع ملے۔دہلی کالج کی تربیت میں روادارانہ ذہن کی تشکیل ہو چکی تھی مگر اسے قوم و ملک کے مفاد میں آزمانے کی کوئی صورت سامنے نہیں آئی تھی۔دہلی اردو اخبار نے مولوی محمد باقر کو سچے اور اصل ہندستان کو سمجھنے کے لیے تیّار کیا ۔باقر چند برسوں کی صحافت کے بعد اپنے اخبار میں ہمیشہ قومی درد مندی سے لیس نظر آتے ہیں۔جیسے جیسے غدر کی طرف کارواں بڑھتا جاتا ہے، ملک کی ضرورت کے مطابق مولوی محمد باقر کی صحافت بھی بہ تدریج دیسی بدلتی جاتی ہے۔اسی صحافتی تربیت کا نتیجہ ہے کہ وہ بہ خوشی اپنی جان قربان کر سکے ۔بالعموم ہم ۱۹۴۷ء پر زیادہ مرکوز رہتے ہیں مگر یہ ایک سچائی ہے کہ ۱۸۵۷ء کے جاں باز اگر اپنی جانوں کو نہیں لٹاتے تو پتا نہیں کہ ہمیں آزادی ملتی بھی یا نہیں اور ہمارے صحافت پیشہ افراد ضرورت پڑنے پر مادرِ وطن کے لیے انسانوں اور لفظوں کی حرمت بچانے کے مقصد سے جان لٹانا سیکھ پاتے یا نہیں۔آج محمد باقر کی شہادت کی یاد اس لیے بھی لازم ہے کہ ہم طرح طرح کی سماجی اور صحافتی غلامیوں کی زد پر ہیں۔اختلاف، احتجاج اور جان کی بازی لگانے کی وہی گردان پھر سے کام آئے گی جو مولوی محمد باقر سے شروع ہوئی تھی۔یہ سبق ہمیں یاد رہے تو ہماری خراجِ عقیدت بھی سچی ہوگی اور ہم اپنے عظیم اسلاف کے پہترین وارث کہے جانے کے بھی حقدارہوں گے۔

ڈاکٹر الفیہ نوری

بزمِ صدف نے راحت اندوری کی یاد میں جو علمی مذاکرہ اور مشاعرہ منعقد کیا،اس کا خاص پہلو یہ تھا کہ اس میں ہم عصر شاعری کے اتنے اچھے نمونے سامنے آئے جس سے اس بات کا ثبوت فراہم ہو ا کہ آج بھی مشاعروں میں اگرمنتخب شعرا مدعو کیے جائیں اور کسی متشاعریا فضول قسم کے شاعر یا شاعر نماحضرات کو شامل نہ کیا جائے تواب بھی مشاعرے کا وقار بحال ہو سکتا ہے۔بزمِ صدف کے مشاعرے کی صدارت برطانوی شاعر اور بزمِ صدف بین الاقوا می ایوارڈ یافتہ باصر سلطان کاظمی نے کی اور نظامت کے فرائض بزمِ صدف نئی نسل ایوارڈ یافتہ شاعر اور ادیب ڈاکٹرواحد نظیرنے انجام دیے ۔صدر اور ناظم کے شامل مشاعرے میں چودہ شعرائے کرام شامل تھے۔ عوامی مشاعروں میں اکثراچھے شعرا بھی بازار کے مطابق شعر پیش کر کے اپنا اور مشاعرے کا معیار خراب کرتے ہیں مگربزمِ صدف کے آن لائن مشاعرے میں شروع سے ہی ایک ادبی وقاربحال رہا جس کی وجہ سے شعرائے کرام نے اپنے بہترین اشعار سے دنیا بھر کے سننے والوں کو محظوظ کیا۔فیس بُک لائیو اور دوسرے ذرائع سے دنیا کے درجنوں ملکوں میں شائقین اس مشاعرے کو دیکھ اور سُن رہے تھے ،اس لیے تمام شعرا نے اپنے چنندہ اشعار پیش کیے اور سب کے حلقۂ اثر میں اضافہ ہوا۔

مشاعرے کے آغاز سے پہلے ناظمِ مشاعرہ نے مکتبۂ صدف کی طرف سے ڈاکٹر عابدہ پروین اور نیلوفر یاسمین کی مرتبّہ صفدر امام قادری کے خاکوں کی کتا ب’ جانے پہچانے لوگ‘ کے اجرا کااعلان کیا۔وبائی صورتِ حال میں آن لائن اجرا کا یہ موقع سامنے آیا تھا ۔ واحد نظیر صاحب نے اپنے تعارفی کلمات میں اس بات کی وضاحت کی کہ بزمِ صدف اپنے ہر پروگرام میں اپنی تازہ مطبوعات کی اشاعت اور پیش کش کا انتظام کرتی رہی ہے ۔ اسی روایت کے سلسلے کو آگے بڑھاتے ہوئے اس بین الاقوامی مشاعرے میں معروف نقاد صفدر امام قادری کے پندرہ خاکوں کے مجموعے کا اجراعمل میں آیا۔اس کتاب میں صفدر امام قادری نے اپنے والد اشرف قادری اور والدہ کے ساتھ اپنے اساتذہ پروفیسر نا ز قادری، پروفیسر راحت حسین اور سید ہاشم رضا کے خاکے قلم بندکیے ہیں ۔ ان کے علاوہ ممتاز مصنفین شفیع جاوید ،وہاب اشرفی ،مجتبیٰ حسین ،اسرار جامعی، حبیب تنویر ،ش۔ مظفر پوری،مختار الدین احمد،محمد مختار وفا، مرزا کھونچ اور منظر سلطان کے خاکوں سے یہ کتاب آراستہ ہوئی ہے۔ واحد نظیر نے یہ توقع ظاہر کی کہ یہ کتاب علمی حلقوں میں پسندیدہ نگاہوں سے ملاحظہ کی جائے گی۔

یہ مشاعرہ ممتاز اور مقبول شاعر راحت اندوری کی یا د میں منعقد کیا گیا تھا، اس لیے ناظمِ مشاعرہ ڈاکٹر واحد نظیر نے راحت اندوری کی نعت سے محفل کا آغاز کیا۔ان دو اشعار پہ محفل جھوم اٹھی:

اگر نصیب قریبِ درِ نبی ہو جائے

مری حیات مری عمر سے بڑی ہو جائے

میں میم حے لکھوں اور پھر میم دال لکھوں

خدا کرے کہ یوں ہی ختم زندگی ہو جائے

مشاعرے کے پہلے شاعر کے طور پر جھارکھنڈ ، رانچی سے نئی نسل کے ابھرتے ہو ئے شاعر تسلیم عارف کو زحمتِ سخن دی گئی۔تسلیم عارف نے پہلے تحت اور پھر ترنم سے اپنے اشعار سنائے۔ان کے درج ذیل اشعار پہ خوب خوب داد ملی:

کوئی بھی ایسی ڈگر نہیں ہے

جہاں غموں کا گزر نہیں ہے

خدا کا جس دل میںڈر نہیں ہے

مری نظر میں بشر نہیں ہے

کویت میں مقیم مسعود حساس نے اپنے عہد کے حالات کو پیشِ نظر رکھتے ہوئے کئی غزلیں سنائیں۔زبان کی سطح پرانھوں نے تجربہ پسندی سے تمام سننے والوں کو متاثر کیا۔ان کی پیش کش کا انداز بھی بڑا رواں اور پُر اثر تھا۔ ان کے ذیل کے اشعار داد حاصل کرنے میں کا میاب رہے:

جسم سے ساتھ نبھانے کی مت امید رکھو

اس مسافر کو تو رستے میں ٹھہر جانا ہے

ذرا سی بات تھی دل پھر بھی آج بھر گیا ہے

قضا کے آنے سے پہلے ہی کوئی مر گیا ہوگا

اب اس پہ کیسے بھلا کوئی اعتبار کرے

زبان دے کے کئی بار وہ پلٹ گیا ہے

ڈاکٹر ندیم ظفر جیلانی دانش نے لندن سے مشاعرے میںشرکت کی ۔وہ بزمِ صدف قطر کے نائب صدر ہیں۔انھوں نے حالاتِ حاضرہ اور وبائی ماحول کے پیش ِ نظر چند ایسے اشعار پیش کیے جن سے بدلی ہوئی دنیا کا ہر پہلو روشن تھا۔انھوں نے مختلف غزلوں سے جو اشعار سنائے ،ان میں درج ذیل سب سے پسندیدہ قرار پائے:

اے چاند دیکھ تجھ سے ہی ملنے کی آس میں

نکلے ہیں ہم سفر پہ خلائی لباس میں

گنتی ہیں، ہندسہ ہیں اجل کے شمار میں

ہم کیا ہیں ہست و بوٗد کے اس کاروبار میں

ٹھہریں گے تھوڑی دیر مسافر پڑاو میں

کب تک رکیں گے خیمۂ نا پایدار میں

ٰدیکھو کسی کی یاد میں راتوں کو جاگ کر

بے چینوں کا لطف کہاں ہے قرار میں

دانش بلا وا دوست کا آجائے کس گھڑی

ہم سب کھڑے ہوئے ہیں اسی انتظار میں

بزمِ صدف کے اس مشاعرے میں قطر کی نمائندگی’ دست رس‘ شعری مجموعے کے خالق احمد اشفاق کر رہے تھے۔حالات کی بے یقینی اور زندگی کی صبر آزما کیفیتوں کو انھوں نے اپنے اشعار میں شامل کیا تھا۔انھو ں نے اپنے مخصوص انداز میں دو غزلیں پیش کیں جن کے مختلف اشعار پر انھیں خوب خوب داد ملی۔ چند اشعار ملاحظہ ہو ں:

جدھر بھی پانو رکھوں راستا بنا ہوا ہے

ترا وجود مسلسل دعا بنا ہوا ہے

کئی دنوں سے کوئی خیریت نہیں اس کی

خموشیوں کا عجب سلسلہ بنا ہوا ہے

ابھی ابھی تو میں لوٹا تمام کرکے سفر

نئے سفر کا نیا وسوسہ بنا ہوا ہے

آج اس کے جنازے میں ہے اک شہرصف آرا

کل مر گیا جو آدمی تنہائی کے ڈر سے

بزمِ صدف کی نئی نسل انعام یافتہ شاعرہ عشرت معین سیماجرمنی سے مشاعرے میں شریک ہوئیں۔وہ ایک ساتھ شاعر ، افسانہ نگاراورتنقید نگار ہیں۔انھوں نے عالمی حالات کے پیشِ نظر چندنئے اشعار پیش کیے جن میں ایک طرف بے بسی کی کیفیت تھی تو اسی کے ساتھ مقابلہ آرا ہو نے کا حوصلہ بھی نظر آیا۔ان کے جو اشعارپسند کیے گیے، ان میں سے چند حسبِ ذیل ہیں:

اب کے سوچا ہے کہ ہم جشن منا ہی لیں گے

خونِ ناحق سے چراغوں کو جلا ہی لیں گے

کب تلک پانو کی زنجیر کو روئیں ہم سب

آج اک رقص کی محفل کو سجا ہی لیں گے

اب ہے اس موجِ تلاطم سے بچانا مشکل

ہم سفینے کو کسی پار لگا ہی لیں گے

سر پہ ڈالی ہے جو تم نے مرے ارمانوں کی

ہم نے سوچا ہے کہ وہ خاک اُڑا ہی لیں گے

مشاعرے کے ناظم ڈاکٹر واحد نظیر کو بہ طورِ شاعر ڈاکٹر ندیم ظفرجیلانی نے مختصر تعارف کے ساتھ آواز دی۔واحد نظیر محقق ،نقاد،نعت خواں اور غزل گو کے طور پر معروف ہیں۔انھوں نے اپنی مرصّع غزل پیش کی جس کے ایک ایک شعر پر انھیں شعرائے کرام نے داد دی۔ان کی غزل لفظیات اور مزاج کے اعتبار سے بالکل مختلف تھی، اسی لیے انھوں نے خصوصی توجّہ حاصل کر نے میں کا میابی پائی۔چند اشعار ملاحظہ کریں:

جبینِ وقت پر منصف نے کب ہے فیصلہ لکھا

رہا محکوم ، حاکم نے اسے جب جو کہا لکھا

یہ کیسے دور میں لوح و قلم سونپے گئے ہم کو

پڑھے لکھوں کے کام آئے نہ کچھ بھی پڑھا لکھا

میں اپنا حال کیا لکھوں بس اپنے ملک جیسا ہے

بہت ہیں مسئلے لیکن نہیں کچھ مسئلہ لکھا

ہمارے چاند سے چندن کی خوش بوٗ بھی نکلتی ہے

پھر اس کو چاند سے اچھا لکھا تو کیا برا لکھا

اب مشاعرے میں ناظم نے بزمِ صدف کے ڈائریکٹر پروفیسر صفدر امام قادری کو آواز دی ۔ وہ نقاد اور محقق کے طور پر اپنی پہچان رکھتے ہیں مگر انھوں نے گاہے بہ گاہے شعر بھی کہے ہیںجو رسائل و جرائد میں شائع ہو تے رہے ہیں ۔ان کے ان شعار کو محفل میں تو جہ کے ساتھ سنا گیا:

لپٹا ہوا ہے جسم سے جو بوجھ ہٹ سکے

سوٗرج کرو بلند کہ سایہ بھی گھٹ سکے

منھ میں ایک لفظ نہیں، ہاتھ میں زنجیریں ہیں

گھپ اندھیرے میں مرے خواب کی تعبیریں ہیں

قتل کے خونیںمناظر دیکھتے رہ جائیں گے

اس وراثت میں ہمارے مسئلے رہ جائیں گے

سب کے کاندھے پر سلگتے موسموں کا قہر ہے

ایٹمی بارش میں آدم کھوکھلے رہ جائیں گے

اس نگر سے روٹھ کر کب کی گئی تازہ ہوا

آدمی کی شکل میں بس مرثیے رہ جائیں گے

کئی یگوں کے فسانے تھے میری آنکھو ں میں

یہ اور بات کہ خاموش و بے صدا میں تھا

ہر ایک سمت سے یلغار تھی رفیقوں کی

فراتِ وقت پہ سالارِ کربلا میں تھا

جدّہ، سعو دی عرب سے بزرگ شاعر مہتاب قدر بزمِ صدف کے اس مشاعرے میں شرکت فرما رہے تھے۔انھوں نے چند قطعات اور پھر غزل کے اشعار پیش کیے۔ ان کے کلام میں طنز اور روحِ عصر کی یکجائی سے ایک اثر آفریں کیفیت پیدا ہو رہی تھی۔ انھوں نے ایک مختصر سی نظم بھی پیش کی جس میں سماج اور دنیا میں امن قائم کرنے کے لیے انسانیت نواز قوتوں کو بے دار کرنے کا تازیانہ پیش کیا گیا تھا ۔ان کے چند اشعار ملاحظہ کریں ـ:

الٹ کے کاسہ اسے تاج کرکے دیکھتے ہیں

چلو فقیری میں اب راج کرکے دیکھتے ہیں

سنا ہے اس سے ترقی کی راہیں کھلتی ہیں

تو کل کے کام چلو آج کر کے دیکھتے ہیں

مشاعرے میں لکھنؤسے مقبول شاعر حسن کاظمی شریک تھے۔ حسن کاظمی نے خاص طور سے راحت اندوری کے ارتحال پر اپنے رقّت آمیز تاثرات کا اظہار کیا۔حسن کا ظمی اپنے دیرینہ تعلقات واضح کرتے ہو ئے راحت اندوری کی یا د میں ایک ایسی غزل پیش کرنے میں کامیاب ہوئے جس کا ہر شعر رنج و غم اور یادوں کی درد آمیزی سے تیار ہو ا تھا۔ان کی غزل کے چند اشعار ملاحظہ کریں:

کوئی نشان، کوئی نقشِ پا نہیں ملتا

وہ آس پاس ہے لیکن پتا نہیں ملتا

چہک سے جس کے مرے گھر میں ایک رونق تھی

کہاں گیا ہے وہ پنچھی، پتا نہیں ملتا

وہ ساتھ تھا تو مری رہ گزر بھی آساں تھی

بچھڑ گیا تو کوئی راستا نہیں ملتا

کبھی دعائیں نہ مانگیں ،بس اس بھرم کے لیے

میں مانگتا جو خدا سے تو کیا نہیں ملتا

بھری بہار میں کیسی ہوا چلی ہے حسن

کسی بھی شاخ کا پتّا ہرا نہیں ملتا

امریکہ سے محتر مہ حمیرارحمان بزمِ صدف کے اس مشاعرے میں شرکت کررہی تھیں۔نئی تانیثی شاعری میں ان کا ایک خاص مقام ہے۔انھوں نے نئے معنوی نظام سے پرانے الفاظ کو روشنی بخشی تھی۔حمیرارحمان کی شاعری میں مہجری سو ز اور گذشتگان کا ایک نوحہ بھی نظر آیا۔ ان کے بعض اشعار میں وبائی ابتلا کی کش مکش بھی دیکھنے کو ملی۔ان کے چند منتخب اشعار ملاحظہ ہو ں:

نڈر نہیں تھے مگر یہ کمال کرتے رہے

محبتوں میں بہت سے سوال کرتے رہے

وہ کون تھے جو کسی کے مقابلے پہ نہ تھے

مگر شکست کو ذاتی خیال کرتے رہے

کوئی چراغ حمیرا جلا نا آیا نہیں

اندھیرے بڑھنے کا پیہم ملال کرتے رہے

بہت دن ہو گئے ہیں غار سے باہر نکلنا ہے

ہمیں خود اپنے استفسار سے باہر نکلنا ہے

مہینوں سے کوئی اچھی خبر چھوٗ کر نہیں گزری

ہمیں ہر روز کے اخبار سے باہر نکلنا ہے

حمیرا جس میں رہ کر خواب سے رشتہ نہیں رہتا

ہمیں اس لمحۂ بے دار سے باہر نکلنا ہے

اس مشاعرے میں کینیڈاسے محترمہ شاہدہ حسن شریک ہوئیں۔اگرچہ انگریزی زبان وادب کی پروفیسر رہیں مگر ان کی بنیادی شناخت ایک اردوشاعرہ کی ہے ۔انھوں نے ہجرت در ہجرت کے مسائل ملاحظہ کیے ہیں ۔ اس لیے ان کی شاعری میں زندگی کا بے حد گہراشعور نظر آتا ہے ۔ وقت کی نہ جانے کتنی جانی انجانی راہیں ان کی شاعری میں یکجا ہو کر کلام کو جاودانی بخش رہی ہیں ۔چند اشعار ملاحظہ ہوں:

یہ اب نہ ہوگا کہ پھر ان آنکھوں کو خواب کو ئی نیا ملے گا

ہم اپنے سارے چراغ لے کر چلیںگے تو راستا ملے گا

شور اِ ک ہوش رُبا ہے مجھ میں

کتنا سنّاٹا بسا ہے مجھ میں

کبھی ہونے نہیں دیتا تنہا

کون یہ بول رہا ہے مجھ میں

سوکھے پتوں کی طرح اُڑتی ہوں

کس قدر تیز ہوا ہے مجھ میں

بہہ نکلتا ہے میری آنکھوں سے

اک سمندر جو چھپا ہے مجھ میں

تھام لیتا ہے مجھے گِرتے وقت

مجھ کو لگتا ہے خدا ہے مجھ میں

کسی نے پوچھا جو مجھ سے مری محبتوں کا جواز کیا ہے

میں رفتگاں کی روش کو سلام کرتی ہوئی ملوں گی

دہلی اردو اکادمی کے نائب صدر پروفیسر شہپر رسول کو ناظمِ مشاعرہ ڈاکٹر واحد نظیر نے ان کے بعض مشہور اشعار کا حوالہ دیتے ہو ئے شعر پڑھنے کے لیے مدعو کیا۔ہم عصر اردو شاعری میں شہپر رسول اپنے مخصوص معیار اورمنفرد اسلوب کی وجہ سے پہچانے جاتے ہیں ۔روایت اور جدت کے درمیان ایک ہم آہنگی اور امتزاج پیدا کرنے میں انھیں جو کامیابی ملی، اسی سے ان کے اشعار زبان زدِ خاص و عام ہیں۔انھوں نے شعرائے کرام کی فرمایش کا لحاظ رکھتے ہوئے متفرق اشعار کے ساتھ تین غزلیں پیش کیں:

میں نے بھی دیکھنے کی حد کر دی

وہ بھی تصویر سے نکل آیا

میری تنہائی کی خوابوں سے شناسائی ہے

یہ بھی اک زاویۂ انجمن آرائی ہے

بھیڑ میں تنہا کھڑا ہوں ، نظر آئوں کس کو

میری وحشت ہی یہاں میری تماشائی ہے

اس قلندر کو بھی مطلوب ہے شہرت شہپر

جس کو مجذوٗب سمجھتے ہو، وہ دنیا ئی ہے

محفل میں جب سے اس نے پکارا ہمارا نام

دشمن بنا ہوا ہے ہمارا، ہمارا نام

تم کو پکارتے ہیں ، ہمیں دیکھتے ہیں لوگ

جیسے کہ ایک ہی ہو تمھار ا ہمارا نام

بد دعا اس نے مجھے دی تھی، دعا دی میں نے

اُس نے دیوار اٹھائی تھی، گِرا دی میں نے

شہر سے میرے تعلق کا سبب پوچھا گیا

سادگی میں تری تصویر بنا دی میں نے

اس نے سیلاب کی تصویر بنا بھیجی تھی

اسی کاغذ سے مگر ناو بنا دی میں نے

ابو ظہبی سے جناب ظہور الاسلام جاوید شریک ِ بزم تھے۔وقت کے نشیب وفراز اور ہجرت کے صبر آزما مراحل میں زندگی کی بنتی اور بگڑتی شکلوں کو انھوں نے اپنے اشعار میںپیش کر کے مشاعرے کو عروج تک پہنچایا۔مختلف غزلوں کے جو اشعار لوگوں نے خصوصی توجہ سے سنے،ان میں سے چند ملاحظہ ہوں:

کسی کے سجدۂ حق پہ جبین رونے لگی

کسی نے ایڑیاں رگڑیں زمین رونے لگی

ہمیں معلوم ہے اس سے محبت کیسے کرنی ہے

کہاں پر بھول جانا ہے ، کہاں پر یاد رکھنا ہے

کوئی لمحہ تکبر کا کبھی طاری نہ ہو جائے

ڈرو اس سے وہی لمحہ کہیں بھاری نہ ہو جا ئے

دل ٹٹولا شبِ تنہائی تو محسوس ہوا

ہم بھی اے دوست ترے چاہنے والے نکلے

میں یہ سمجھا کہ کوئی نرم زمیں آ پہنچی

غور سے دیکھا تو وہ پانو کے چھالے نکلے

مشاعرے کی صدارت ممتاز شاعر ناصرکاظمی کے صاحب زادے برطانیہ میں مقیم جناب باصر سلطان کاظمی کر رہے تھے۔2018ء میں بزم،ِ صدف نے انھیں اپنا بین الاقوامی ایوارڈ پیش کیا تھا۔اردو کے مہجری سرمایۂ ادب میں باصر سلطان کاظمی کا ایک خاص مقام ہے۔ناظمِ مشاعرہ نے ان کا تعارف کراتے ہوئے یہ خاص بات بتائی کہ آس پاس کی چیزوں کو باصر سلطان کاظمی شعر کا قالب عطا کر دیتے ہیں۔باصر سلطان کاظمی نے کبھی طنز و مزاح کا روپ اختیار کیا اور کبھی اس میں اپنے عہد کا سوز پیوست کیا مگر ان کا کمال یہ تھا کہ کبھی ترسیل کی ناکامی ہاتھ نہیں آئی۔انھوں نے چند متفرق اشعار اور غزلوں سے سامعین کو سرشار کیا۔ان کے چند اشعار ملاحظہ ہوں:

ملتا نہیںہے دشت نوردی میں اب وہ لطف

رہنے لگا ہے ذہن میں گھر کا اثر سوار

پڑا ہے آج ہمیں ایک مطلبی سے کام

خدا کرے کہ اسے ہم سے کام پڑ جائے

ہر بار تم کو اس کا کہا ماننا پڑے

باصر یہ دوستی تو نہیں نوکری ہوئی

مجنوں سے کہو کٹ چکی اک عمرجنوں میں

باقی کسی معقول طریقے سے گزارے

بے کار سے پتھر ہیں چمکتے ہیں جو شب کو

پوشیدہ ہیں دن میں تری قسمت کے ستارے

مشاعرے سے پہلے مذاکرہ منعقد ہو ا تھا جس میں اردو کو آزادی اور امن کی زبان کے طور پر پہچاننے کی کوشش ہوئی تھی۔شعرائے کرام کا استقبال بزمِ صدف کے چیر مین جناب شہاب الدین احمد نے کیا ۔سرپرست اعلا جناب محمد صبیح بخاری نے وبائی ماحول میں ایسے پروگراموں کی ضرورت پر زور دیا۔بزمِ صدف کے ڈائریکٹر جناب صفدر اما م قادری نے دنیا کے مختلف ملکوں کے شعرائے کرام کا خاص طور سے شکریہ ادا کیا۔ جناب جاوید احمد اور جناب عابد انور صاحبان نے اس آن لائن پروگرام کو کامیاب بنانے والوں کا خاص طور سے شکریہ ادا کیا۔اس طرح یہ مشاعرہ ایک خاص معیار اور علمی وقار کے ساتھ ہندستانی وقت کے مطابق ڈیڑھ بجے رات میں اپنے انجام کو پہنچا۔

صفدر امام قادری
صدرشعبۂ اردو
کالج آف کامرس، آرٹس اینڈسائنس، پٹنہ

کل شام ہسپتال میں ہاتھوں میں ہاتھ لے کر دلاسہ دیتے رہے منحنی مگر صاف آواز میں اور اس سے بڑھ کر آنکھوں کے اشارے سے بھروسہ دیتے رہے اپنے کلیجے پر میرا ہاتھ رکھا اور پھر اپنے ہاتھوں کو میرے سرپہ رکھا مجھے کیا پتا تھا کہ دستِ شفقت کی یہ آخری چھاؤں بھی اس رات کے اندھیرے میں گم ہوجائے گی۔ ہسپتال کے کارندوں نے اطمنان دلایا کہ کہیں کوئی پریشانی کی بات نہیں ہے۔ ڈاکٹر نے اُن کے ناتی کو گھر جانے کے لیے کہا اور بتایا کہ کوئی تشویش کی بات نہیں ہے۔ ایک دن اور ہسپتال میں رہنے دیجیے پھر گھر لے جایئے مگر جیسے ہی ۲۱ دسمبر کی تاریخ نے اپنے قدم بڑھائے، وقت کی زنجیریں سمٹنے لگیں۔ ایک بجے رات میں ہسپتال سے فون گیا کہ حالات تشویش ناک ہے دیڑھ بجے رات میں وینٹلیٹر پر رکھا گیا اور پھر ڈھائی بجے رات کو وہ اگلے سفر کے لیے نکل پڑیں۔ اناللہ و انا الیہ راجعون۔
شفیع جاوید کا تعلیمی ریکارڈ میں یومِ پیدائش ۴ جنوری ۵۳۹۱ ہے مگر حقیقی تاریخ ۱۲ ستمبر کی ہے اور اس سال اس یادگار دن کو انھوں نے ڈاکٹر سید فضلِ رب اور عزیزم آصف ابرار اور ہمارے ساتھ مل کر بہ طورِ جشن منایا تھا۔ وہ مظفر پور میں پیدا ہوئے تھے جہاں ان کے والد پولس سرویس میں شامل تھے۔ محکمہئ تعلقاتِ عامّہ کے ڈائریکٹر کی حیثیت سے ۵۹۹۱ء میں وہ سبک دوش ہوئے ان کا پہلا افسانوی مجموعہ ”دائرے سے باہر“ ۹۷۹۱ء میں شائع ہوا تھا۔ اس کے بعد ”کھلی جو آنکھ“ (۲۸۹۱ء) ”تعریف اس خدا کی“ (۴۸۹۱ء)، ”وقت کے اسیر“ (ہندی ۱۹۹۱ء)، ”رات شہر اور میں“ (۴۰۰۲ء) اور ”بادبان کے ٹکڑے“ (۳۱۰۲ء) اب تک شائع شدہ افسانوی مجموعے ہیں۔ ان کے افسانوں کی کلیات ”حکایت ناتمام“ عنوان سے زیرِ طبع ہے۔۔ ان کے کالم اور مضامین کے مجموعے بھی طباعت کے مراحل میں ہیں۔ ان کے افسانوں کی کل تعداد تقریباً ۰۰۱ ہیں۔ ۳۵۹۱ء میں ان کا پہلا افسانہ دربھنگا سے شائع ہونے والے رسالے ماہ نامہ ”افق‘ میں ”آرٹ اور تمباکو“ عنوان سے شائع ہوا تھا۔ ان کی مختصر تحریریں، کتابوں پر تاثرات اور خود سوانحی نوشتہ جات اور ڈائریاں ہزاروں صفحات پر مشتمل ہیں۔ جنھیں اشاعت کا انتظار رہے گا۔۔
ترقی پسندی کے آخری دور اور جدید افسانہ نگاروں کے پہلے قبیلے کی جو مشترک نسل تھی، شفیع جاوید اسی سے تعلق رکھتے تھے۔ چھ دہائیوں سے زیادہ زمانے تک وہ لکھتے رہے مگر ضبط اور وہ پوشیدہ فن کے پرستار تھے۔ ٹھہر ٹھہر کر اور لفظوں سے زیادہ سرگوشیوں میں اپنے معنی پیوست کر دینے کے مشاق تھے۔ زندگی بھر عشق و محبت کے افسانوی مجاذ پر کھڑے رہے، جانی انجانی کہانیاں بناتے رہے مگر زندگی کی ویرانیاں، خوابوں کے انجانے راستے اور دکھوں کے گہرے سمندر کے مسافربنیں رہے۔ لفظوں میں معنی سے زیادہ احساس اور احساس سے زیادہ حُزن ملال اور پھر سب کے اوپر پُراسرار کیف کی باریک روا ڈال دینا جس سے افسانے میں زندگی اور موت، خوشی اور غم، حقیقت اور گمان اور جانی یا انجانی دنیا ؤں کا اتصال پیدا ہوجائے۔۔ یہ عجیب و غریب فن تھا۔ ایسا لگتا ہے، یہ فن شفیع جاوید پر ہی اپنے خاتمے کو پہنچا۔
آج کے زمانے میں شفیع جاوید کوئی مقبول افسانہ نگار نہیں تھے۔ حالاں کہ ان کے کارناموں پر کلیم الدین احمد، قرۃالعین حیدر، شمس الرحمان فاروقی، وہاب اشرفی اور لطف الرحمان جیسے ممتاز اہل قلم نے لکھا ہے وہ محکمہئ تعلقات عامّہ کی ملازمت میں تھے اور اس کے سب سے بڑے عہدے دار تھے وزیرِ اعلا اور بہار کے گونر کے پریس سکریٹری بھی رہے مگر مزاج بالکل مختلف پایا تھا۔ شہرت، اس کی طرف بھاگنے پر توجہ، اپنی پذیرائی کے لیے تمنا کرنا اور محفلوں میں بہ خوشی رونق افروز ہونا ان کے مزاج کا حصہ نہیں تھا۔ بھیڑ میں رہتے ہوئے تنہا ہونا اور گوشہ نشیں رہ کر ایک بڑی مدت گزار دینا شفیع جاوید نے اپنے لیے مخصوص کرلیا تھا۔ دمِ آخر تک صرف اپنی پسند کے لوگوں سے ملنا جلنا اور ان کے بیچ وقت گزار لینا یا ان سے بات چیت کرلینا یہ ان کا خاص انداز تھا۔ ورنہ وہ اپنی گوشہ نشینی میں کسی کو دخیل نہیں ہونے دیتے تھے۔ اہلیہ کے انتقال کے بعد تو گویا وہ اور بھی اس انداز کے ایک ضدی کی طرح کاربند رہنے لگیں۔ اکلوتے صاحب زادے کبھی ضد کرکے انھیں الہٰ آاباد اور کلکتہ لے جاتے مگر وہ اپنے تنہا آشیانے میں واپس آجاتے۔ اب تو کئی برس سے وہ اس گھر کو چھوڑنا ہی نہیں چاہتے تھے۔ اور وہیں سے اسپتال آئے اور آخری سفر کے لیے چل پڑے۔
گذشتہ دو دہائی سے زیادہ ہوئے، جب پٹنہ کے ہارون نگر کالونی میں شفیع جاوید اور پھر بعد میں وہاب اشرفی بھی منتقل ہوئے۔ ۸۹۹۱ء میں میرے والد کے انتقال کے بعد عظیم آباد میں رہتے ہوئے انھی دونوں بزرگوں کو میں اپنا سرپرست سمجھتا تھا۔ میرے بال بچوں کے علاوہ میرے درجنوں ایسے شاگرد ہوں گے جو ان دونوں بزرگوں کے حلقہئ ارادت میں شامل ہوئے اور ان میں سے کئی نے مل کر گذشتہ برسوں میں شفیع جاوید کے بکھرے کاموں کو سمیٹ کر کتابی شکل دینے کا کام کیا۔ ان میں سے کئی شاگرد ایسے خوش نصیب بھی ثابت ہوئے جنھوں نے اسپتال میں انھیں اپنی سانسوں کی آخری ڈور سلجھاتے ہوئے دیکھا اور ان سے دعائیں لیں۔ ہماری زندگی اور ہمارے کام میں ان کی توجہ اس قدر بڑھی ہوئی تھی جس کا اندازہ ہی نہیں کیا جا سکتا۔ مجھے کہیں سفر پہ جانا ہوتا، فون پر وہ حفاظت کی دعا پڑھ کر دم کرتے اور پھر تاکید کرتے کہ واپسی میں چلنے سے پہلے مجھے فون کرنا اور وہ مجھے دعا پڑھتے ہوئے خدا کی حفاظت میں پٹنہ تک بلا لیتے۔ ابھی ایک ہفتہ نہیں ہوا کہ انھوں نے فون کیا کہ میں آدھے راستے میں ہوں کالج پہنچ رہا ہوں۔ اس کے ٹھیک دو دن پہلے ہم انھیں ڈاکٹر کو دکھانے لے گئے تھے۔ ہم نے کہا کہ ہم خود آجاتے مگر انھوں نے کہا کہ تمہاری پسند کی بسکٹ آگئی تھی، اسے ہی پہنچانے آرہا ہوں۔ کالج کی سیڑھی پہ چڑھنے میں دشواری تھی ہم نے احاطے میں کرسی منگانی چاہی مگر وہ ایک بینچ پر ہی دھوپ میں بیٹھے اور مجھے ساتھ بٹھایا۔ میرے کچھ شاگرد آتے جاتے رہے اور ان سے دعا لیتے رہے۔۔ کالج کے کچھ ساتھی بھی آئے، ملے اور ان سے باتیں کرتے رہے۔۔ کسے اندازہ تھا کہ یہ شخص اب آخری سفر کی تیاری پر ہے۔
وہاب اشرفی اور سلطان اختر شفیع جاوید کے گہرے دوستوں میں رہے۔ وہاب اشرفی کہتے تھے کہ شفیع جاوید جملے اور پیراگراف لکھتے ہیں۔ ایک لفظ اور جملے میں ان کہے بول پیوست کرنے کا فن اب پتا نہیں کسی کو ملے گا یا نہیں۔ عظیم آباد سے باہر خورشید اکرم اور سرورالہدیٰ کا تذکرہ وہ کرتے رہتے تھے۔ پرانے دوستوں میں شمس الرحمان فاروقی کے بارے میں وہ روزانہ محو کلام ہوئے عظیم آباد سے ریحان غنی ان کے ایسے ملاقاتیوں میں تھے جن کا تواتر کے ساتھ ان کے یہاں آنا جانا رہا۔ ان کی گزارش پر وہ کچھ نہ کچھ اخبار کے لیے بھی لکھ دیتے تھے۔ جب سے فضلِ رب صاحب اس کالونی میں پہنچے، تب سے وہ بھی ان کی گوشہ نشینی کا سہارا بنے ہوئے تھے۔
بھیڑ سے الگ ہو کر وہ کتاب کا غذ اور یادوں میں بڑے سکون سے جی رہے تھے۔ جب جائیے، وہ کچھ پڑھتے ہوئے یا لکھ رہے ہوتے۔ ان کے مطالعے کا دائرہئ کار حیرت سے پرے ہے۔وہ تصوف سے لے کر سیاسیات تک اور مغربی علوم سے لے کر صحافت تک ہر میدان کی کتابیں پڑھتے تھے۔۔ ان کتابوں پر حواشی لکھنے اور پھر ان پر اپنے تاثرات ڈائری میں لکھتے۔ آدھے تاثرات تو وہ انگریزی میں لکھتے تھے۔ چہ جائے کہ وہ کتاب اردو کی ہی کیوں نہ ہو ان کی چھوٹی بڑی ڈائریوں کی تعداد سیکڑوں میں ہیں اور ان میں اپنے تاثرات لکھنے کا سلسلہ بھی پچاسوں برس پہلے سے ہے۔ کاش انھیں ترتیب دے کر عوام کے سامنے لے آتے۔ ان میں نامکمل افسانے اور ادھوری سیکڑوں چیزیں محفوظ ہیں۔
پچھلے کئی برس سے شفیع جاوید کے بکھرے کاموں کو جلد بند کرنے کی میری کوشش رہی ہمارے کئی شاگرد اس کام میں لگے رہے ہیں۔ رسائل کے دفینوں سے بہت ساری گم شدہ چیزیں حاصل ہوئیں۔ شفیع جاوید نے خود بھی اپنی بہت ساری بکھری چیزوں کو تلاش کرکے ہمیں دیا۔ ان کے نام آئے مشاہیر کے پچاسوں قیمتی خطوط بھی میرے سپرد کیا۔ ان سب کی ترتیب اور اشاعت کے سلسلے سے ہماری کوششیں جاری تھیں۔ ایک ہزار سے زیادہ صفحات کی تیاری مکمل ہو چکی تھی۔ بزمِ صدف کے پچھلے ۵۱ اگست کے پروگرام میں ان کے سلسلے سے ایک جلسہ اور تین چار کتابوں کے اشاعت کا ان کی موجودگی میں اعلان بھی ہوا تھا انشا اللہ یہ سب کام تو انجام تک پہنچیں گے مگر اب شمع محفل نہ ہوں گے۔ روتی ہوئی آنکھیں ہی خراجِ تحسین پیش کرتی رہیں گی۔
عظیم آباد اور مجھ پر پتا نہیں کیوں قہرِ الہیٰ نازل ہے۔ نومبر دسمبر سے خوف آتا ہے۔ ۲۱ نومبر کی ہی تاریخ تھی جب میرے والد رخصت ہوئے تھے۔ گذشتہ مہینے ۳۱ نومبر کو میرے برادرِ نسبتی پروفیسر نازقادری اس دنیا سے رخصت ہوئے اور ایک مہینہ بھی نہیں گزرا کہ ہمارے آخری سرپرست شفیع جاوید چل بسے۔ عظیم آباد کی محفلوں میں اب ایک چراغ سلطان اختر کا بچا ہے ورنہ وہاب اشرفی اور لطف الرحمان کے چلے جانے کے بعد اور شفیع جاوید کے گوشہ نشیں ہو جانے سے یوں ہی اندھیرا چھا گیا تھا۔ اب کون ہے جس کے لفظوں کو غور سے پڑھ کر اس معنی اور احساس کی گہرائیوں کی تلاش کی جائے گی۔ چلتے ہوئے سکّے زیادہ ہیں اور مشہور و معروف افراد کی ایک بھیڑ ہے مگر تحریر کی گہرائی اور نئے لکھنے والوں کو لکھنا سکھانے والا فن کار رخصت ہوگیا۔ وہ افسانہ نگاروں کے افسانہ نگار تھے۔ انشاپردازوں کے انشاپرداز تھے۔ ان کے مشہور افسانے ”بھولے بسرے گیت“ کا آخری جملہ یاد آرہا ہے:
”صبح کے ساڑھے سات بج چکے تھے اور بھولے بسرے گیتوں کا پروگرام ختم ہوچکا تھا۔“