شہادت

نئی دہلی: بابری مسجد شہادت کیس میں سی بی آئی کی خصوصی عدالت نے اڈوانی ، جوشی ، اوما بھارتی سمیت تمام ملزمان کو بری کردیا۔ 6 دسمبر 1992 کو ایودھیا میں بابری مسجد کی شہادت کیس میں سی بی آئی کی خصوصی عدالت نے آج فیصلہ سنایا۔ اس معاملے میں بی جے پی کے سینئر لیڈرز ایل کے اڈوانی ، مرلی منوہر جوشی ، یوپی کے سابق وزیر اعلی کلیان سنگھ ، اوما بھارتی ، ونے کٹیار سمیت تمام 32 ملزموں کو بری کردیا گیا ہے۔ سبھی ملزموں کو آج خصوصی سی بی آئی جج ایس کے یادو نے 28 سال تک جاری رہنے والی سماعت کے بعد مسجد انہدام کے فوجداری مقدمے میں فیصلہ سنانے کے لئے طلب کیا تھا۔ تاہم بہت سارے ملزمین آج عدالت میں پیش نہیں ہوئے تھے۔

استاذ : المعہد العالی الاسلامی حیدراۤباد

حسین ؓنام ہے سفینۂ حق کے اس ناخدا کا جس نے ظلم کے گرداب گرہ گیرمیں بھی طوفان باد وباراں سے مقابلہ کیا، حسین ؓنام ہے کشتِ حجاز کے اس دہقاں کا جس نے لالۂ صحرائی کو خونیں قبا پہنائی، حسین ؓنام ہے قافلۂ سخت جاں کے اس میر ِکارواں کا جس کی اۤبلہ پائی کے نقوش نے منزل ِحق کا پتہ دیا، حسین ؓنام ہے خم خانۂ اسلام کے اس پیر ِمغاں کا جس نے تہی جام مے خواروں کا پیمانہ بادہ ٔشہادت سے لبریز کیا ، حسین ؓنام ہے اس پاسبانِ حرم کا جس کی ضرب کلیمی سے سنگ ِراہ دونیم ہوئے،حسین ؓنام ہے اس مجاہد ِجاں باز کا جس نے ظالم حکمرانوں سے پنجہ اۤزمائی کی، حسینؓ نام ہے اس مرد حق پسند کا جس نے باطل نظام کی بنیاد پر تیشے چلائے، حسین ؓنام ہے اس شاہین کا جس نے زاغوں کے نشیمن پر بجلیاں برسائیں، حسین ؓنام ہے اس شیخ ِحرم کا جس کے خون ِشہادت سے حرم کی داستان رنگین ہے:
غریب وسادہ ورنگیں ہے داستانِ حرم
نہایت اس کی حسینؓ ابتدا ہے اسماعیل ؑ

اسلام کی ابتدا بھی قربانی ہے اورانتہا بھی قربانی، اسلام نام ہے خدا کی رضا کے لیے اپنا سب کچھ قربان کر دینے کا ، اسلام کا مطالبہ ہے کہ خدا کے حکم کے اۤگے نفس کو بھی جھکایا جائے اور باطل طاقتوں کو بھی سر نگوں کیا جائے ۔حرم کی یہ داستان عجیب وغریب ہے، یہ سادہ بھی ہے اور رنگین بھی،رنگین اس لیے ہے کہ یہ شہادت وقربانی کی داستان ہے، سادہ اس لیے ہے کہ یہ نفسانی خواہشات اور دنیوی تعیشات سے نا آشنا ہے، اس داستان کا اۤغاز حضرت اسماعیل ؑکے جذبۂ قربانی سے ہوتا ہے اور اختتام حضرت حسینؓ کی شہادت پر ہوتا ہے۔ حرم کے پاسبان اگر نفسانی خواہشات کو قربان کرنے سے گریزاں ہیں اوران کے دلوں میں جام ِشہادت نوش کرنے کے مقدس جذبات ا نگڑائیاں نہیں لیتے تو پھر اس کا مطلب یہ ہے کہ ان کا قبلہ حرم نہیں بل کہ خواہشات کا صنم ہے ، انھیں اپنا قبلہ درست کرلینا چاہیے ؛ کیوں کہ حرم انھی لوگوں کا قبلہ ہے جن کی ابتدا حضرت اسماعیل ؑکا جذبۂ قربانی ہو اور انتہا حضرت حسینؓ کا جام شہادت ہو۔

حضرت حسین ؓکے اسوہ پر عمل کرکے اپنی جان قربان کرنے والا حیاتِ جاودں سے سرفراز ہوتا ہے اور تاریخ میں ہمیشہ یاد رکھا جاتا ہے:
حقیقتِ ابدی ہے مقام ِشبیری
بدلتے رہتے ہیں انداز کوفی وشامی

حضرت حسینؓ کا باطل کے اۤگے سر نہ جھکا کر حق کے لیے جان قربان کردینا ایسی جاودانی وابدی حقیقت ہے جو ہمیشہ یاد رکھی جائے گی اور ہر دور میں تسلیم کی جائے گی، حضرت حسینؓ کو شہید کرنے والے شامی حکمران اور حضرت حسینؓ سے بے وفائی کرنے والے کوفی باشندگان ملامت کے نشان اور ماضی کی داستان بن گئے مگر حضرت حسین امر ہوگئے۔ کوفی وشامی کا دغابازانہ اور ظالمانہ کردار ادا کرنے والے ستم ساز ودغاباز ہر زمانے میں سر اٹھاتے ہیں ، ان کا سر جھکانے اور ان کا گھمنڈ توڑنے کے لیے ہمیشہ ایک حسینؓ کی ضرورت پڑتی ہے۔ اۤج کے اس دور میں بھی ہر طرف باطل طاقتیں حق کو کچلنے کے لیے ایڑی چوٹی کا زور لگارہی ہیں، ظالم دندناتے پھر رہے ہیں، باطل نظام ہائے حیات نافذ کیے جاچکے ہیں، اجتماعی زندگی میں اسلامی تعلیمات اجنبیت کا شکار ہوچکی ہیں، ملوکیت کے اۤثار ِجنوں نے زندہ ضمیروں سے زنداں کو آباد کر رکھا ہے، جمہوریت کا چہرہ روشن تو ہے مگر اندروں چنگیز سے تاریک تر ہے، قومیت کے فتنے نے امت کو تصورِ امت سے بیگانہ کردیا ہے، خلافت کے خاتمے نے عالم اسلام کو مرکزیت سے محروم کردیا ہے،وہ قوم جس کی ہیبت سے صنم سہمے ہوئے رہتے تھے اور منہ کے بل گر کے ھو اللہ احد کہتے تھے اۤج وہی قوم خوف ودہشت کی علامت بن چکی ہے، کشمیر ہو یا فلسطین ، برما ہو چین ہر جگہ ظلم کی کاکل ِپیچاں کا بل روز افزوں ہے؛ مگر پاسبان ِحرم کی آستین عصائے کلیمی سے تہی ہے،قوم کی بیٹیاں اۤج بھی وامصیبتاہ کی صدا لگاتی ہیں مگر بحر ِعرب میں کوئی تلاطم برپا نہیں ہوتا۔ ایسے حالات کا رخ بدلنے کے لیے ، تاریخ کا دھارا موڑنے کے لیے، اسلامی نظامِ حکومت کے نفاذ کے لیے ، باطل کے دامان وگریباں کا فاصلہ ختم کرنے کے لیے ، ظالم طاقتوں کا پنجۂ خونیں موڑنے کے لیے، قومیت کا بت توڑنے کے لیے اور حق کی خاطر اپنی جان قربان کرنے کے لیے اۤج بھی ایک حسین کی ضرورت ہے، مگر :
قافلۂ حجاز میں ایک حسین بھی نہیں
گرچہ ہے تابدار ابھی گیسوئے دجلہ وفرات

دجلہ ہو یا فرات، نیل ہو یادنیوب، گنگا ہو یا جمنا سب کی موجیں مسلمانوں کے سفینہ ٔحیات سے اٹھکھیلیاں کھیل رہی ہیں ، اب بھی سب کے گیسو اۤبدار وتابدار اور سب کے گرداب پیچ دار وگرہ دار ہیں، ریگ ِعراق وشام کسی حسینؓ کی منتظر ہے، ایک ایسے حسینؓ کی جس کی زبان پر مصلحت پسندی کے چھالے نہ ہوں ، جس کے لبوں پر مفاد پرستی کے تالے نہ ہوں، جس کا دل دنیائے دوں کا اسیر نہ ہو، جس کو باطل کا خوف دامن گیر نہ ہو،کشتِ حجاز ایک ایسے حسینؓ کی راہ دیکھ رہی ہے جس کے دل میں شہادت کی تمنائیں چٹکیاں لیتی ہوں، جس کا دامن استغنا کی دولت سے مالا مال ہو ، جس کی اۤنکھوں میں باطل نظام کانٹے کی طرح چبھتا ہو، جو عزم وحوصلے کا پیکر ہو، جو ’ کلمۃ حق عند سلطان جائر‘ کو اپنی زندگی کا مشن سمجھتا ہو، جو غلبۂ حق کا خواب اپنی پلکوں پر سجاتا ہو اور رزم گاہ ِحق وباطل میں اس خواب کی تعبیر ڈھونڈتا ہو ،جو عشقِ خلیل کا امیں ہو، اور کوچۂ چاک ِگریباں کا مکیں ہو، اۤج حجاز کا قافلہ ایسے حسینؓ سے خالی ہے۔ اس قافلہ کا یہ حال ہے کہ غبارِ کارواں سے بھی خوف کھانے لگتا ہے، سنگِ گراں کو دونیم کرنے کے بجائے اس سے اپنا سر ٹکراتا ہے،ریگستان کے طوفان سے بچنے کے لیے ریت میں ہی اپنا سر چھپاتاہے، بجلیاں کڑکتی ہیں تو اپنے کانوں میں انگلیاں ٹھونس لیتا ہے، بادل برستا ہے تو پائینچے سمیٹ لیتا ہے، یہ قافلہ توشہ ٔ شہادت سے خالی ہے، اس کے دل میں ایمان کی انگیٹھی اتنی سرد ہوچکی کہ شوق ِشہادت کی چنگاری اپنے وجود کا احساس دلانے سے قاصر ہے۔ضرورت ہے کہ قافلہ ٔ حجاز کو عشق ِسرمدی کا جام پلایا جائے؛ کیوں کہ عشق جب پختہ ہوگا تو صدق ِخلیل ؑبھی ہوگا اور صبر ِحسین ؓبھی اور باطل کی سر کوبی کے لیے بدر وحنین بھی :
صدقِ خلیلؑ بھی ہے عشق، صبرِ حسینؓ بھی ہے عشق
معرکۂ وجود میں بدر وحنین بھی ہے عشق

یہ عشق جب پختہ ہوتا ہے تو دل سے موت کا ڈر نکلتا ہےکہ ایک دن تو مرنا ہی ہے ، موت سے ڈر کر زندگی لافانی نہیں ہوسکتی اور موت سے بھاگ کر حیات دوروزہ جاودانی نہیں ہوسکتی :
قُلْ لَنْ يَنْفَعَكُمُ الْفِرَارُ إِنْ فَرَرْتُمْ مِنَ الْمَوْتِ أَوِ الْقَتْلِ وَإِذًا لَا تُمَتَّعُونَ إِلَّا قَلِيلًا (الاحزاب: 16)
آپ کہہ دیجیے کہ اگر تم مرنے یا قتل ہونے سے بھاگ رہے ہو تو یہ بھاگنا تم کو کام نہ آئے گا اور تم کچھ ہی دنوں فائدہ اٹھاسکوگے۔
موت سے کس کو رستگاری ہے؟ آج سے ایک صدی قبل جو قائدین ومفکرین تھے آج ان میں سے کس کو ہم اپنے درمیان پاتے ہیں ؟ آج جو لوگ باحیات ہے کون اس کی ضمانت لے سکتا ہے کہ آنے والی صدی میں بھی باحیات ہوں گے؟ موت تو آکر رہے گی:
قُلْ إِنَّ الْمَوْتَ الَّذِي تَفِرُّونَ مِنْهُ فَإِنَّهُ مُلَاقِيكُمْ ثُمَّ تُرَدُّونَ إِلَى عَالِمِ الْغَيْبِ وَالشَّهَادَةِ فَيُنَبِّئُكُمْ بِمَا كُنْتُمْ تَعْمَلُون (الجمعة: 8)
آپ کہہ دیجیے : جس موت سے تم بھاگتے ہو، وہ ضرور ہی تم پر آکر رہے گی ، پھر تم اس خدا کی طرف لوٹادیے جاؤگے جو پوشیدہ کو بھی جانتا ہے اور ظاہر کو بھی، پھر وہ تم کو تمہارے کیے ہوئے کام بتا دے گا۔
علالت کی موت ہو یا شہادت کی ، موت تو آنی ہے، ہاں ! شہادت کی موت پر مغفرت کا پروانہ نصیب ہوتا ہے:
وَلَئِنْ قُتِلْتُمْ فِي سَبِيلِ اللَّهِ أَوْ مُتُّمْ لَمَغْفِرَةٌ مِنَ اللَّهِ وَرَحْمَةٌ خَيْرٌ مِمَّا يَجْمَعُون (آل عمران: 157)
اگر تم اللہ کے راستے میں مارے جاؤ یا مرجاؤ، تو اللہ کی بخشش اور رحمت حاصل ہوگی، جو اس سے کہیں بہتر ہےجس کو تم جمع کر رہے ہو۔
شہادت کی موت سے حیاتِ جاودانی اور آخرت کی کامرانی ملتی ہے:
وَلَا تَحْسَبَنَّ الَّذِينَ قُتِلُوا فِي سَبِيلِ اللَّهِ أَمْوَاتًا بَلْ أَحْيَاءٌ عِنْدَ رَبِّهِمْ يُرْزَقُونَ فَرِحِينَ بِمَا آتَاهُمُ اللَّهُ مِنْ فَضْلِهِ وَيَسْتَبْشِرُونَ بِالَّذِينَ لَمْ يَلْحَقُوا بِهِمْ مِنْ خَلْفِهِمْ أَلَّا خَوْفٌ عَلَيْهِمْ وَلَا هُمْ يَحْزَنُونَ يَسْتَبْشِرُونَ بِنِعْمَةٍ مِنَ اللَّهِ وَفَضْلٍ وَأَنَّ اللَّهَ لَا يُضِيعُ أَجْرَ الْمُؤْمِنِينَ (آل عمران: 169- 171)
جو لوگ اللہ کے راستے میں کام آئے ہیں، انھیں ہر گز مردہ خیال نہ کرو؛ بل کہ وہ اپنے رب کے پاس زندہ ہیں، انھیں روزی دی جاتی ہے۔ اللہ نے ان کو جو اپنا فضل عطا فرمایا ہے وہ اس سے شاداں وفرحاں ہیں ، اور ان کے بعد والے جو ابھی ان کے پاس نہیں پہنچے ، ان کے بارے میں بھی وہ خوشیاں مناتے ہیں ؛ اس لیے کہ نہ ان کو کچھ خوف ہوگا اور نہ وہ غمگین ہوں گے، وہ اللہ کی نعمت اور فضل پر خوش ہورہے ہیں، اور بے شک اللہ ایمان والوں کا اجر ضائع نہیں کرتے۔

قافلۂ حجاز اس حسین ؓکا منتظر ہےجس کا ایمان قرآن کی ان آیات پر اس درجہ ہو کہ وہ شہادت کی موت کے بہانے ڈھونڈتا ہو، جس کا دل ِبے نیاز ہردوجہاں سے غنی ہو، جو فقر کی دولت سے مالا مال ہو۔ کونسا فقر؟ وہ فقر نہیں جو کاسہ تھماتا ہے، وہ فقر نہیں جو دریوزہ گری سکھاتا ہے ، وہ فقر نہیں جو باطل سے سمجھوتے کراتا ہے، وہ فقر نہیں جو زبانِ حق تراشتا ہے، وہ فقر نہیں جو ظالموں کا دست نگر بناتا ہے، وہ فقر نہیں جو وقت ِقیام سجدے میں گراتا ہے، بل کہ یہ وہ فقر ِشبیری ہے جو استغنا کی دولت عطا کرتا ہے، جو خدا کے سوا سب سے بے نیاز کرتا ہے، جو باطل طاقتوں سے بے خوف کرتا ہے، جو فرعونوں کی ناک رگڑواتا ہے ، جو ظالموں کو ناکوں چنے چبواتا ہے، جو جام ِجمشید انڈیلتاہے اور تاج ِسکندری سے کھیلتا ہے، جو قیصر وکسری کے پرخچے اڑاتا ہے، جامۂ ملوکیت کی بخیہ ادھیڑتا ہے،یہ وہ فقر ہے جو "مِنَ الْمُؤْمِنِينَ رِجَالٌ صَدَقُوا مَا عَاهَدُوا اللَّهَ عَلَيْهِ” (احزاب: 23) (ایمان والوں میں سے کچھ لوگ وہ ہیں جنھوں نے اللہ کے ساتھ کیے ہوئے وعدے کو سچ کر دکھایا ) کے زمرے میں شریک کرتا ہے، یہ وہ فقر واستغنا ہے جواس اۤیت کی عملی تفسیر کراتا ہے: "الَّذِينَ قَالَ لَهُمُ النَّاسُ إِنَّ النَّاسَ قَدْ جَمَعُوا لَكُمْ فَاخْشَوْهُمْ فَزَادَهُمْ إِيمَانًا وَقَالُوا حَسْبُنَا اللَّهُ وَنِعْمَ الْوَكِيلُ” (اۤل عمران:173 ) (یہ وہ لوگ ہیں کہ جب ان سے لوگوں نے کہا کہ کفار تمہارے مقابلے میں اکٹھے ہوگئے ہیں؛ اس لیے تم ان سے ڈر کر رہو، تو اس بات نے ان کے ایمان میں اضافہ کردیا اور ان لوگوں نے کہا ہمارے لیے اللہ ہی کافی ہیں اور وہی بہترین کار ساز ہیں )، یہی فقر صحابہ کا ہتھیار تھا ، اور صحابہ نے اس فقر کو اپنایا تو روم وایراں کی بساط لپیٹ دی اور وسعتِ افلاک میں وہ تکبیر ِمسلسل لگائی کہ ایوانِ باطل میں غلغلہ ہائے اَلْاَمَاں برپا ہوگیا، یہ فقر جب ہاتھ اۤتاہے تو قیادت وسیادت کی باگ کا سرا بھی ہاتھ لگتا ہے، میری وسلطانی کا راز اسی فقر میں پنہاں ہے:
اک فقر ہے شبیری اس فقر میں ہے میری
میراثِ مسلمانی سرمایۂ شبیری

فقر وعشق، جرات وعزیمت، نظام حق کے نفاذ کی جہد پیہم ، وسعت افلاک میں تکبیر مسلسل اور دل میں انگڑائی لیتا شوق شہادت یہی حضرت حسینؓ کا سرمایہ ہے جو امت اسلامیہ کی حقیقی میراث ہے۔ اس سرمایۂ شبیری کی حفاظت خلوت کدوں میں محصور رہ کر نہیں کی جاسکتی اس لیے :
نکل کر خانقاہوں سے ادا کر رسم شبیری
کہ فقر خانقاہی ہے فقط اندوہ ودل گیری
خانقاہوں سے نکلنے کا مطلب خانقاہوں کی افادیت سے انکار نہیں ہے، تزکیہ واحسان ، تعلیم وتربیت اور دعوت وتبلیغ میں خانقاہوں کے تعمیری کردارکو کون فرموش کرسکتا ہے، نیز تاریخِ دعوت وعزیمت اس بات پر گواہ ہے کہ خانقاہوں نے بھی فقر ِشبیری کی پرورش کی ہے، بالاکوٹ کا قافلہ اسی خانقاہ سے نکلا سے تھا ، شاملی کا میدان گرم کرنے والے سر بکف وسربلند مجاہدین اسی خانقاہ سے رشتہ وپیوند رکھتے تھے ، تحریکِ ریشمی رومال کے قائدین بھی خانقاہی نظام کے ہی پروردہ تھے، ضرورت ہے کہ خانقاہ کے فقر ِدل گیری کو فقر ِشبیری میں بدلا جائے اور حضرت حسینؓ کا کردار اداکیا جائے۔

حسینؓ کردار ہے ظالم کے گریبان پر ہاتھ ڈالنے کا!
حسینؓ عنوان ہے باطل پر حق کے غلبہ پانے کا!
حسینؓ استعارہ ہے شوق شہادت پروان چڑھانے کا !
حسینؓ تیری عظمت کو سلام کہ تونے سر تو کٹایا لیکن جھکایا نہیں!
حسین ؓتیری جرات کو سلام کہ تونے ظالموں کے گریبانوں پر ہاتھ ڈالا!
حسینؓ تیری عزیمت کو سلام کہ تونے باطل کی اۤندھیوں میں بھی شمع حق کی لو بڑھائی!
حسین ؓتیری شہادت کو سلام کہ تونے ہمارے دلوں میں شہادت کی اۤتش ِشوق بھڑکائی!
سلام تجھ پر، تیری اۤل پر ، اہل بیت اطہار پر ، رسول اللہ کے اصحاب پر!