سپریم کورٹ

نئی دہلی :گیان واپی مسجد معاملہ میں سپریم کورٹ میں ایک اور درخواست دائر کی گئی ہے۔ بی جے پی لیڈر اور وکیل اشونی اپادھیائے نے یہ درخواست دائر کی ہے۔ درخواست میں مسجد کمیٹی کی درخواست کو خارج کرنے کی استدعا کی گئی ہے۔درخواست میں کہا گیا کہ اسلامی اصولوں کے مطابق مندر توڑ کر بنائی گئی مسجد درست نہیں ہے۔واضح ہو کہ مسجد کمیٹی اس مفروضہ کو ہمیشہ کرتی رہی ہے ۔ درخواست میں کہا گیا کہ 1991 کا عبادت گاہوں کا قانون اسے کسی مذہبی مقام کی نوعیت کا تعین کرنے سے نہیں روکتا۔اشونی اپادھیائے نے عرضی میں کہا ہے کہ ان کے فریق کو بھی سنا جائے اور فریق بنایا جائے۔ اس سے قبل 2021 میں اشونی اپادھیائے نے عبادت گاہوں کے قانون کو سپریم کورٹ میں چیلنج کیا تھا، جس پر سپریم کورٹ نے مرکزی حکومت کو نوٹس جاری کیا تھا۔ اشونی اپادھیائے نے سپریم کورٹ میں داخل کی گئی مداخلت کی درخواست میں کہا ہے کہ آئین کا آرٹیکل 13(2) ریاست کو بنیادی حقوق چھیننے کے لیے قانون بنانے سے منع کرتا ہے، تاہم1991 کا قانون ہندوؤں، جینوں، بدھ مت کے ماننے والوں کے حقوق چھینتا ہے۔اس قانون میں بھگوان رام کی جائے پیدائش شامل نہیں ہے، لیکن بھگوان کرشن کی جائے پیدائش شامل ہے، حالانکہ دونوں بھگوان وشنو کے اوتار ہیں اور پوری دنیا میں یکساں طور پر پوجے جاتے ہیں، اس لیے یہ من مانی ہے۔خیال رہے کہ گیان واپی مسجد کمیٹی 1991ایکٹ کے تحت پیدا کئے مسئلہ کا حل چاہتی ہے ۔

نئی دہلی: سپریم کورٹ نے شمال مشرقی دہلی فسادات کیس کے ملزم دیونگنا کالیتا ، آصف اقبال تنہا اور نتاشا ناروال کی ضمانت کیس میں سماعت چار ہفتوں کے لیے ملتوی کردی ہے۔ سپریم کورٹ نے اشارہ دیا کہ وہ ضمانت کو منسوخ نہیں کرے گی ، لیکن کہاہے کہ ضمانت کے آرڈر میں قانون کی دفعات پر کوئی تبصرہ نہیں کرناچاہیے۔ سماعت کے دوران وکیل کپل سبل نے سماعت ملتوی کرنے کی درخواست کرتے ہوئے کہاہے کہ چارج شیٹ 20000 صفحات پر ہے اور یہ نوجوان ہیں۔ جسٹس سنجے کشن کول نے کہاہے کہ ضمانت کی کارروائی حتمی فیصلے کی نوعیت میں نہیں ہے۔ اس کے علاوہ ہائیکورٹ کو قانون کی دفعات پر بحث میں نہیں جانا چاہیے۔آج کل ضمانت کے معاملات پر ایک لمبی بحث جاری ہے اور سوال یہ ہے کہ کیا موجودہ صورتحال میں اتنا وقت دینا ضروری ہے؟ یہ ہمیں پریشان کرنے والی بات ہے۔ ضمانت کے ہر معاملے میں ایک لمبی بحث ہوتی ہے۔ ہم اس مسئلے میں مزید وقت دینے کی تجویز نہیں کرتے ہیں۔ جسٹس کول نے دہلی پولیس میں پیشی کرتے ہوئے سالیسیٹر جنرل تشار مہتا سے پوچھاہے کہ انہیں ضمانت ہوگئی ، کیا آپ انہیں تحویل میں لینا چاہتے ہیں؟ آپ ضمانت اور ہائی کورٹ کی تشریح کو چیلنج کررہے ہیں؟ اس پر تشار مہتا نے جواب دیاہے کہ ہم دونوں کو للکار رہے ہیں،ہم چاہتے ہیں کہ ہائی کورٹ کا حکم ختم کیا جائے۔ ایس سی کارکنوں کی درخواست کوپین ڈرائیو میں جواب داخل کرنے کی اجازت دیتا ہے۔

سپریم کورٹ آف انڈیا میں گزشتہ دنوں دو صحافیوں کے مقدمات پر شنوائی ہوئی، جس میں سپریم کورٹ نے دو الگ الگ فیصلے جاری کیے جن کے ذریعے ایسا لگتاہے کہ سپریم کورٹ کے جج صاحبان خود عدالتِ عظمیٰ کی توہین کا تاثر دے رہےہیں ـ

پہلا مقدمہ ارنب گوسوامی کا تھا ارنب گوسوامی ایک الکٹرانک نیوز چینل ری پبلک کے اینکر ہیں انہیں مہاراشٹر پولیس نے خودکشی کے ایک مجرمانہ معاملے میں گرفتار کیا تھا، انہیں سیشن کورٹ اور ہائیکورٹ سے ضمانت نہیں ملی کیونکہ ان کی گرفتاری ایک مجرمانہ معاملے کے تحت ہوئی تھی ناکہ کسی صحافتی سرگرمی کی بنیاد پر، گرچہ ارنب گوسوامی اور ان کے چینل کی صحافت درحقیقت ایک پروپیگنڈہ مشین ہے، وہ صحافت کے نام پر سرکاری چاپلوسی کا لاؤڈ اسپیکر بنے ہوئے ہیں، اور ملک میں نفرت و زہر پھیلانے کا کام کرتےہیں، چونکہ وہ بھارتی گودی میڈیا کی صحافتی بھیڑ میں گھسے ہوئے ہیں اس لیے انہیں صحافی مجبوراً لکھا جارہاہے وگرنہ ان کا غیررسمی نام ” سَنگھی سرکاری لاؤڈ اسپیکر ” ہی ہےـ

ایسے نفرت انگیز اور بدتمیز انسان کو خودکشی کے ایک مجرمانہ معاملے میں گرفتار کیا جاتاہے اور ریاستی ہائی کورٹ تک اسے ضمانت نہیں دیتی، نیز مہاراشٹر اسمبلی کی طرف سے ارنب کو نوٹس کے معاملے میں سپریم کورٹ ارنب کے لیے آئین کی دفعہ ۳۲ کا حوالہ دیتی ہے اور گرفتاری والے معاملے میں اسے شخصی آزادی Personal Liberty کے نام پر ضمانت دیتے ہوئے رہا کرنے کا فیصلہ سناتی ہے ـ

دوسرا مقدمہ ہے کیرالہ کے صحافی صدیق کپن کا، جوکہ درحقیقت Practical Journalist عملی صحافی ہیں، انہیں صحافتی سرگرمی کے دوران ہی گرفتار بھی کیاگیاہے، وہ ۵ اکتوبر کو اجتماعی عصمت دری کے معاملے میں رپورٹنگ کرنے جب ہاتھرس جا رہے تھے تب یوگی آدتیہ ناتھ کی فاشسٹ اترپردیش سرکار نے انہیں گرفتار کرلیا اور ان پر UAPA جیسی سنگین دفعات کے تحت مقدمہ قائم کرکے انہیں جیل میں ڈال دیا، صدیق ۵ اکتوبر سے جیل میں بند ہیں مگر انہیں آئین کی دفعہ 32 کا فائدہ بھی نہیں ملا، اور 16 نومبر کو سپریم کورٹ نے ان کی کے معاملے پر سماعت کرتےہوئے انہیں ضمانت دینے سے بھی انکار کردیا صدیق کے مقدمے کو ہائیکورٹ سے حل کرانے کی نصیحت بھی دی اور خانہ پری کرنے کے لیے ایک نوٹس اترپردیش کی فاشسٹ سرکار کو بھیجا ہے، سپریم کورٹ میں صدیق کی طرف سے معروف سینئر ایڈووکیٹ کپل سبل نے اچھی پیروی کی ـ

صدیق کپن کی گرفتاری پر ریاست کیرالہ کی صحافتی تنظیم Union of Working Journalist قانونی لڑائی لڑ رہی ہے، ساتھ ہی اس نے اسے صحافتی آزادی پر حملہ بھی قرار دیاہے، صدیق کی گرفتاری کو اکثریتی میڈیا کمیونٹی آزادانہ صحافت پر سرکاری ظلم مانتی ہے، لیکن ۱ مہینہ گزر جانے کے باوجود یہ صحافی سپریم کورٹ تک سے انصاف حاصل کرنے سے محروم ہے ـ

انصاف کا یہ Selective معیار کیوں ہے؟ ارنب گوسوامی جیسے سرکاری بھونپو کی گرفتاری کو وزیرداخلہ امیت شاہ نے صحافت پر حملہ اور ایمرجنسی کے مظالم سے تعبیر کیا تھا، مگر امیت شاہ صاحب سمیت تمام ہندوستانی وزیروں اور سرکاری نوکروں کی زبانیں صدیق کی صحافتی آزادی پر حملے کے خلاف گنگ ہے ـ

وہ تمام سرکاری وزرا، جو پروفیسر آنند تیلتمبڑے، گوتم نولکھا، شرجیل امام، خالد سیفی، ورورا راؤ،سٹین سوامی، اکھل گوگوئی، نتاشا، دیوانگنا، عشرت جہاں، آصف اقبال، گل فشاں، سدھا بھاردواج جیسے انصاف پسند، نظریاتی شخصیات اور حقوق انسانیت کے لیے محنت کرنے والوں کی گرفتاری پر خوشی مناتے رہے وہ ارنب کی گرفتاری پر حق آزادی کی دہائی دے رہےتھے وہ لوگ جو ہندوستان میں اپوزیشن پارٹیوں کی سرگرمیوں اور غلط سرکاری پالیسیوں سمیت سرکاری ظلم و زیادتیوں کے خلاف عوامی مظاہروں کو ملک سے غداری، دیش دروہ کی سرگرمیوں سے تعبیر کرتے نہیں تھکتے وہی بھاجپائی لوگ ارنب کی گرفتاری پر سڑکوں میں احتجاج کی کوشش کررہے تھے، لیکن ان کے احتجاج بھی آندولن کے انقلابی آہنگ اور صدائے احتجاج کی فطری اسپرٹ سے محروم بڑے ہی پھیکے پھیکے فلاپ شو تھے ـ

سپریم کورٹ کے چیف جسٹس بوبڈے صاحب کو بھی صدیق کی شخصی آزادی پر حملہ نظر نہیں آیا، وہی سپریم کورٹ جسے ابھی چند روز پہلے تک ارنب گوسوامی کی گرفتاری سے آزادی کی توہین نظر آرہی تھی اسی سپریم کورٹ نے صدیق کی حقِ آزادی پر آنکھیں موند لی ہیں، سپریم صاحب ! آپ کے یہ مختلف معیار آپکا وقر طے کر رہے ہیں ملک کے نوجوان انہیں کھلی آنکھوں سے دیکھ رہے ہیں ریٹائرڈ ہونے والے جج کو پارلیمنٹ کی کرسی پر بیٹھتے ہوئے دیکھ رہےہیں، ہم یقینًا سپریم کورٹ سے جاری فیصلوں کی مخالفت نہیں کرتے بلکہ آئینی حق کے تحت ان سے اختلاف کرتےہیں کیونکہ ہمیں احترام کا کلچر بچائے رکھناہے، سپریم صاحب آپ کو غور کرنا چاہیے کہ کنال کامرا جیسے اعلیٰ تعلیمیافتہ فکری جوان آپ سے کیوں خفا ہیں؟ ہم تو جس دن دیپک مشرا صاحب چیف جسٹس بن آئےتھے اسی دن سے افسوسناک ہورہےہیں، ڈیئر محترم سپریم کورٹ صاحب ! پرشانت بھوشن اور راجیو دھون آپکی عدالت میں سچ بولتے ہیں اور ان جیسے دیگر سینئر وکلاء، توجہ دیجیے کہ اب ملک میں قانون کے طلباء ججمنٹ سے زیادہ ان وکیلوں کی دلیلوں کو پڑھتے ہیں، مت بھولیے کہ وہ فیصلے جو انصاف کے ایوانوں سے ملاوٹ کے ساتھ باہر آتےہیں انہیں وقتی طورپر طاقت کے زور پر تو نافذ کیا جاسکتا ہے وہ تاریخ کی عدالت میں منصفانہ درج ہوتےہیں، آج آپ سپریم کورٹ کے جن عظیم مناصب پر بیٹھے ہیں کل پڑھی جانے والی تاریخ میں آپ کا ریکارڈ زیربحث آئےگا، کل کی تعلیم گاہوں میں قانون کی کتابوں میں آپکے فیصلوں پر آنے والی نسلیں تجزیہ اور تکرار کریں گی، کل وکالت اور ججز کی پڑھائی کرنے والے طلباء و طالبات آپ کی ان ریکارڈ فائلوں کو پڑھیں گے یہ آپ بھی جانتے ہوں گے شاید، جیسے عدالت و انصاف کا کوئی مذہب نہیں ہوتا اس کے صرف اصول ہوتےہیں ویسے ہی "تاریخ” کا کوئی دھرم نہیں ہوتا، فاشسٹ طاقت کے سہارے لکھی جانے والی بے اصولیاں غیرفطری ہوتی ہیں انہیں ان کی اصل جگہ تاریخ میں مل جاتی ہے، گاندھی کے قاتل گوڈسے کی عدالتی کارروائی میں سَنگھ کے سربراہ "ساورکر ” ناتھورام گوڈسے کی پشت پر تھے اور چند سالوں پہلے طاقتور امریکی صدر اوباما نیلسن منڈیلا کے جنازے میں قطار باندھے کھڑے تھے امید ہیکہ یہ حقائق آپکی نظروں میں ہوں گے، تاریخ کی عدالت میں بھاجپائی استعمار کی عدالتی تاریخ کا عنوان ہوگا ” دو صحافی ،ایک سپریم کورٹ، دو فیصلے "ـ

ہم لکھتے ہیں کیونکہ کیفی اعظمی کہتےہیں :

کوئی تو سود چکائے کوئی تو ذمہ لے

اس انقلاب کا جو آج تک ادھار سا ہے

نئی دہلی:یوپی کے گینگ ریپ کے مبینہ کیس میں لاء (قانون) کے 510 طلبہ نے سپریم کورٹ کے چیف جسٹس ایس اے بوبڑے کو خط لکھا ہے۔ قانون کے طلبہ نے سپریم کورٹ سے معاملے میں مداخلت کرنے کا مطالبہ کرتے ہوئے مجرم افسران کے خلاف کاروائی کی اپیل کی ہے۔ نوئیڈا کے دو قانون کے طلبہ نے اس خط پر دستخط کئے ہیں۔ مختلف یونیورسٹیوں اور کالجوں کے لاء طلباء کا نام درج ہے۔ خاص طور پر رات گئے متاثرہ بچی کی لاش کوجلانے پر طلبہ نے اعتراض کیا ہے۔خط میں لکھا گیا ہے کہ انسانی بنیادوں پر حکومت ہند نے حکومت پاکستان سے ایک دہشت گرد اجمل قصاب کی لاش لے جانے کی درخواست کی، یہ الگ بات ہے کہ حکومت پاکستان نے اسے قبول نہیں کیالیکن ہاتھرس میں یہ انسانیت پسندی اس خاندان کے ساتھ نہیں دکھائی گئی جس نے پوری زندگی ہندوستان میں بسر کی۔ وہ گھریلو لڑکی جس نے انتہائی گھناؤنے جرم میں اپنی جان گنوا دی۔اس خط میں مزید لکھا گیا ہے کہ پولیس نے مبینہ طور پر ایک بیان دیا ہے کہ فیملی سے مردہ بچی کی لاش کو جلا دینے کی اجازت لی گئی تھی، جبکہ متعدد مواقع پر متاثرہ کے اہل خانہ نے کہاہے کہ آخری رسومات ان کی مرضی کے خلاف انجام دی گئیں۔ پولیس کے پاس اپنے دعوے کو ثابت کرنے کے لئے ایسے دستاویزات موجود نہیں ہیں۔

جمعیت علماء ہند نے اپریل 2020 میں لاک ڈاؤن کے دوران تبلیغی جماعت سے متعلق بعض ٹی وی چینلوں اور اخبارات کی شر انگیزاور فرقہ وارانہ منفی رپورٹنگ کے خلاف سپریم کورٹ میں اپیل دائر کی تھی۔ کئی لمبی لمبی تاریخوں کے بعد آج اس اپیل پر تفصیلی سماعت ہوئی۔پچھلی سماعت میں سپریم کورٹ نے حکومت سے جواب طلب کیا تھا۔اس اپیل پرچیف جسٹس آف انڈیا ایس اے بوبڈے کی بنچ میں سنوائی ہورہی ہے۔آج بنچ نے حکومت ہند کے جوابی حلف نامے کی زبان پر سخت ناراضگی ظاہر کی۔

واضح رہے کہ جمعیت علماء ہند کی طرف سے جو اپیل دائر کی گئی تھی اس میں بہت سے اخبارات کے سینکڑوں تراشے اور ٹی وی چینلوں کی رپورٹوں کی سی ڈی جمع کرائی گئی تھی۔ آج جب بنچ نے سنوائی شروع کی تو حکومت کے ذریعہ داخل کئے گئے حلف نامے پر ناگواری ظاہرکی اور سالیسٹر جنرل تشار مہتا کی گوشمالی کی۔ حکومت کے حلف نامے میں کہا گیا تھا کہ تبلیغی جماعت سے متعلق غلط رپورٹنگ کا کوئی واقعہ رونما نہیں ہوا اور نہ ہی عرضی گزاروں نے ایسی کوئی مثال پیش کی۔

عدالت نے پوچھا کہ یہ حلف نامہ جونئر لیول کے افسر نے کیوں داخل کیا ہے؟ عدالت نے اس حلف نامہ کوپُر فریب اوردیدہ دلیری پر مبنی قرار دیا۔۔عدالت نے پوچھا کہ عرضی گزار نے جب اتنے واقعات شمار کرائے ہیں تو آپ کیسے کہہ سکتے ہیں کہ تبلیغی جماعت سے متعلق غلط اور منفی رپورٹنگ کا کوئی واقعہ رونما نہیں ہوا۔ عدالت نے حکم دیا کہ وزارت اطلاعات ونشریات کا کوئی سیکریٹری سطح کا افسر دوسرا حلف نامہ داخل کرے۔اب اگلی سماعت دو ہفتے کے بعد ہوگی۔

آپ کو یاد ہوگا کہ لاک ڈاؤن کا اچانک اعلان ہوجانے کے بعد تبلیغی جماعت کے مرکز (بستی حضرت نظام الدین) میں تین ہزار کے آس پاس تبلیغی افراد پھنس گئے تھے۔نقل وحمل کے تمام ذرائع اس وقت بند تھے اس لئے ان میں سے ایک ہزار سے زائد غیر ملکی افرا د کے توملک سے باہر جانے کا کوئی راستہ ہی نہیں تھا۔ان میں بہت سے لوگ ملک کے مختلف حصوں میں اشاعت دین کی غرض سے پہلے ہی پھیل گئے تھے۔

مختلف صوبوں کی پولیس نے ان تمام کو گرفتار کرکے کورنٹائن کیا‘پھر جیلوں میں بھیجا اور ان پر بہت سی سخت دفعات کے تحت مقدمات قائم کردئے۔ان میں سے 90 فیصد کے قریب ماخوذ تبلیغی افراد مختلف مقامی اور ہائی کورٹس کے بہترین فیصلوں کے سبب چھوٹ کر اپنے گھروں کو جاچکے ہیں۔ان میں سب سے شاندار فیصلہ بامبے ہائی کورٹ کی اورنگ آباد بنچ کا تھا۔اس فیصلہ پر میں لکھ بھی چکا ہوں اور اپنا ویڈیو ایپی سوڈ بھی بناچکا ہوں۔اس فیصلہ پر تبصرہ کرتے ہوئے میں نے کہا تھا کہ ایسا لگتا ہے کہ یہ فیصلہ انسانوں نے نہیں بلکہ فرشتوں نے لکھا ہے۔

بہر حال لاک ڈاؤن کے دوران تبلیغی جماعت کے لوگوں کو کورونا جہادی قرار دیا گیا اوراس پروپیگنڈے کی تشہیر میں بعض ٹی وی چینلوں اور اخبارات نے انتہائی گھناؤنا کردار ادا کیا۔تبلیغی افراد کے حوالہ سے ملک کے مسلمانوں کو بدنام کیا گیا اوران کے خلاف ملک بھر میں ایک زہریلی فضا بن گئی۔جمعیت علماء نے عدالت سے اپیل کی تھی کہ ان اخبارات اور چینلوں کو ضابطہ کا پابند بنایا جائے اور انہیں تبلیغی جماعت اور عام مسلمانوں کو بدنام کرنے سے روکا جائے۔

آج چیف جسٹس آف انڈیا نے حکومت کو خطاب کرتے ہوئے کہا:

"….. آپ عدالت کے ساتھ وہ سلوک نہیں کرسکتے جو آپ کر رہے ہیں۔۔یہ حلف نامہ کسی جونئر افسر کی طرف سے داخل کیا گیا ہے۔۔یہ حلف نامہ پُر فریب ہے اور یہ کہتا ہے کہ عرضی گزاروں نے منفی رپورٹنگ کی کوئی مثال ہی پیش نہیں کی۔آپ اتفاق نہ کریں وہ الگ بات ہے لیکن آپ یہ کیسے کہہ سکتے ہیں کہ عرضی گزاروں نے غلط رپورٹنگ کی کوئی مثال پیش نہیں کی۔سیکریٹری سطح کے افسر کو دوبارہ جواب داخل کرنا ہوگا جس میں ایسی غیر ضروری اور احمقانہ باتیں شامل نہ ہوں جیسی موجودہ حلف نامہ میں کہی گئی ہیں۔۔۔” اس پر سالیسٹر جنرل (حکومت کے وکیل) نے کہا کہ دوسرا حلف نامہ سیکریٹری لیول کا افسر تیار کرے گا اوراس کو وہ خود چیک کریں گے۔

چیف جسٹس نے کہا کہ حالیہ دنوں میں اظہار رائے کی آزادی کے قانون کا ہی سب سے زیادہ ناجائز استعمال ہوا ہے۔انہوں نے کیبل نیٹ ورک ایکٹ 1995کے سیکشن 20 کا حوالہ دیتے ہوئے حکومت سے پوچھا کہ کیا وہ اس ایکٹ کے تحت کیبل ٹی وی چینلوں پر پابندی لگاسکتی ہے؟۔سالیسٹر جنرل نے کہا کہ ایسی کوئی پابندی نہیں لگائی جاسکتی لیکن جمعیت علماء کے وکیل دشینت دوے نے کہا کہ حکومت پابندی لگانے کا اختیار رکھتی ہے۔عدالت نے ان سے کہا کہ وہ اگلی تاریخ پر اپنے اس نکتہ کو قانون کی روشنی میں ثابت کریں۔

میرا تجزیہ یہ ہے کہ سپریم کورٹ ابتدائی لیت ولعل کے بعد اب اس نتیجہ پر پہنچ گئی ہے کہ اس وقت ملک بھر میں بعض اخبارات اور ٹی وی چینل اظہار رائے کی آزادی کی آڑ میں زہر پھیلانے کا کاروبار کر رہے ہیں۔۔ظاہر ہے کہ ان چینلوں کو حکومت کی متحرک وفعال حمایت حاصل ہے۔اس طرح کے مختلف مقدمات میں حکومت نے جو موقف اختیار کیا ہے وہ اس کا کھلا ثبوت ہے۔آج کل سپریم کورٹ میں اس طرح کے کئی کیس چل رہے ہیں۔ان میں ارنب گوسوامی اورامیش دیوگن اور سدرشن ٹی وی کے خلاف دائر پٹیشن خاص طور پر اہمیت کی حامل ہیں۔چیف جسٹس کا اپنے تبصرہ میں یہ کہنا کہ اظہار رائے کی آزادی کے قانون کا حالیہ دنوں میں سب سے زیادہ ناجائز استعمال ہوا ہے‘کم اہم نہیں ہے۔

ہم اظہاررائے کی آزادی کے نہیں شرانگیزی اور منفی رپورٹنگ کے خلاف ہیں:مولانا ارشدمدنی

نئی دہلی:’’حالیہ دنوں میں اظہاررائے کی آزادی کا بے دریغ غلط استعمال ہوا ہے اور یہ کہ مرکزکی طرف سے جو حلف نامہ عدالت میں داخل کیا گیا ہے وہ نامکمل ہے اور حیلہ سازی وڈھٹائی پر مبنی ہے ‘‘چیف جسٹس آف انڈیا ایس اے بوبڑے نے یہ سخت تبصرہ آج اس پٹیشن پر سماعت کے دوران کیا جو کروناوائرس کو مرکز نظام الدین سے جوڑ کر مسلمانوں بالخصوص تبلیغی جماعت سے وابستہ لوگوں کی شبیہ کو داغدار کرنے اور ہندوؤں ومسلمانوں کے درمیان منافرت پھیلانے کی دانستہ سازش کرنے والے ٹی وی چینلوں اور پرنٹ میڈیاکے خلاف مولانا سید ارشدمدنی صدرجمعیۃ علماء ہند کی ہدایت پر سپریم کورٹ میں داخل کی گئی ہے ، اس پٹیشن پر آج چیف جسٹس آف انڈیا کی سربراہی والی تین رکنی بینچ نے سماعت کی چیف جسٹس آف انڈیا نے اس بات کیلئے بھی مرکزکو زبردست لتاڑ لگائی کہ اس نے اپنے حلف نامہ میں کہا ہے کہ اسے خراب یا منفی رپورٹنگ کا کوئی ثبوت نہیں ملا ، چیف جسٹس نے سالیسٹر جنرل تشارمہتاسے سوال کیا کہ آپ یہ کس طرح سے کہہ سکتے ہیں کہ غلط اور منفی رپورٹنگ کا کوئی واقعہ رونماہی نہیں ہوا ، عدالت نے یونین آف انڈیا کی نمائندگی کرنے والے سالیسٹر جنرل آف انڈیا تشار مہتاسے اس بات پر بھی اعتراض کیا کہ حکومت کی جانب سے جونیئر افسران کے ذریعہ داخل کردہ حلف نامہ میں یہ کیسے لکھ دیاگیا کہ عرضی گذار(جمعیۃ علماء ہند) نے بغیر کسی واقعہ اور حوالہ کے یعنی فیک نیوز کی تفصیلات دیئے بغیر پٹیشن داخل کردی ، عدالت نے تشار مہتا کو کہاکہ عرضی گذار نے پٹیشن میں تبلیغی جماعت کے تعلق سے چلائے جانے والی الیکٹرانک و پرنٹ میڈیا میں فرقہ وارانہ اور اشتعال انگیز خبروں سے متعلق تمام شواہد و ثبوت درج کئے ہیں۔چیف جسٹس نے تشار مہتا سے کہاکہ آپ عدالت سے اس طرح سے نہ پیش آئیں جس طرح آپ اپنے ماتحت افسران سے پیش آتے ہیں اور حلف نامہ نہایت ذمہ داری کے ساتھ حقائق پر مبنی داخل کریں جس پر تشار مہتا نے عدالت کو یقین دلایا کہ وہ اس معاملے کی اگلی سماعت پر سینئر افسر کے ذریعہ تیار کردہ تازہ حلف نامہ داخل کریں گے جو ان کی زیر نگرانی تیار کیا جائے گا۔عدالت نے سالیسٹر جنرل آف انڈیا تشارمہتا سے یہ بھی کہا کہ حلف نامہ میں یہ خصوصی طور پر تحریر کریں کہ ماضی میں ایسی شکایتوں پر مرکزی حکومت نے کن قوانین کے تحت کیا کارروائی کی ہے نیز کیا حکومت کو ٹیلی ویژن پر پابندی لگانے کا اختیار ہے ؟ چیف جسٹس آف انڈیا نے سالیسٹر جنرل آف انڈیا تشارکو مہتا کو حکم دیا کہ دو ہفتوں کے اندروزارت نشریات واطلاعات کے سیکریٹری کی جانب سے حلف نامہ داخل کرکے یہ بتائیں کہ ایسے نیوز چینلوںکے خلاف کیا کارروائی کی جاسکتی ہے ۔دوران سماعت چیف جسٹس آف انڈیا نے کہا کہ آزادی ٔ اظہار رائے کا حالیہ دنوں میں بے دریغ غلط استعمال ہوا ہے ،یعنی کہ چیف جسٹس یہ کہنا چاہ رہے تھے کہ آزادیٔ اظہار رائے کے نام پر جانب داری کا مظاہرہ کیا جارہا ہے۔ اسی درمیان جمعیۃ علماء ہند کی جانب سے بحث کرتے ہوئے سینئر ایڈوکیٹ دشینت دوے نے آج چیف جسٹس اے ایس بوبڈے، جسٹس اے ایس بوپنا اور جسٹس وی راما سبرامنیم کوبتایا کہ یونین آف انڈیا کی جانب سے داخل کیا گیا حلف نامہ عدالت کو گمراہ کرنے والا ہے نیز ہماری جانب سے داخل کردہ پٹیشن میں سیکڑوں خبروں کا حوالہ دیا گیا ہے جس میں تبلیغی جماعت اور مسلمانوں کو بدنام کیا گیا تھا ۔ایڈوکیٹ دشینت دوے نے عدالت کو بتایا کہ مرکزی حکومت کے حلف نامہ سے ایسا لگتا ہے کہ عرضی گذار نے پٹیشن داخل کرکے آزادی اظہار رائے پر پابندی لگانے کی کوشش کی ہے جبکہ ایسا بالکل بھی نہیں ہے ، اس کے برخلاف ہماری عدالت سے گذارش ہے کہ تبلیغی جماعت اور مسلمانوںکوبدنام کرنے والے ٹی وی چینلوں پر پابندی لگائی جائے۔اس معاملے کی سماعت بذریعہ ویڈیو کانفرنسنگ ہوئی جس کے دوران سینئر ایڈوکیٹ دشینت دوے کی معاونت کرنے کے لیئے ایڈوکیٹ اعجاز مقبول (ایڈوکیٹ آن ریکارڈ) اور ان کے معاونین وکلاء موجود تھے۔
آج کی قانونی پیش رفت پر اپنے ردعمل کا اظہارکرتے ہوئے جمعیۃعلماء ہند کے صدرمولانا سید ارشدمدنی نے کہا کہ چیف جسٹس آف انڈیا ایس اے بوبڑے نے آج کی سماعت کے دوران جو باتیں کہی ہیں اور جن کی انہوں نے وضاحت چاہی ہے اس سے ہمارے موقف کی مکمل تائید ہوگئی انہوں نے کہا کہ عدالت کے استفسار پر مرکزی حکومت کی طرف سے حیلہ سازی پر مبنی ایک نامکمل حلف نامہ کا داخل کیا جانا اس بات کا واضح ثبوت ہے کہ حکومت کی نیت میں کھوٹ ہے اوروہ متعصب میڈیا کے خلاف کوئی کارروائی نہیں کرنا چاہتی انہوں نے کہا کہ جمعیۃعلماء ہند نے اپنی عرضی میں ثبوت وشواہد کے ساتھ جو کچھ کہا ہے سالیسٹر جنرل آف انڈیا اس کو غلط ڈھنگ سے پیش کرنا چاہ رہے ہیں اور مرکزکی طرف سے داخل کئے گئے حلف نامہ میں بھی کچھ ایسا ہی تاثر دینے کی دانستہ کوشش ہوئی ہے کہ عرضی گزارنے اس طرح کی عرضی داخل کرکے اظہاررائے کی آزادی پر قدغن لگانے کی بات کہی ہے جبکہ سچائی یہ ہے کہ عرضی میں اظہاررائے کی آزادی پر پابندی لگانے جیسی کوئی بات سرے سے ہے ہی نہیں بلکہ یہ کہا گیا ہے کہ جو نیوز چینل ایک مخصوص قوم کو منصوبہ بند طریقہ سے اپنی شرانگیز اور یکطرفہ رپورٹنگ کے ذریعہ نشانہ بناکر ملک میں فرقہ وارانہ منافرت کو ہو ادینے کی دن رات سازشیں کرتے ہیں ان پر پابندی لگنی چاہئے اور ان کے لئے کوئی حتمی گائیڈلائن مقررکی جانی چاہئے ۔ مولانا مدنی نے کہا کہ یہ بڑی خوش آئند بات ہے کہ اس حوالہ سے جمعیۃعلماء ہند کو جو کچھ کہنا چاہئے تھا چیف جسٹس آف انڈیا نے اپنے تبصرے میں کہہ دیا ہے ۔ انہوں نے ایک طرح سے یہ کہہ کر کہ حالیہ دنوں میں اظہاررائے کی آزادی کا بے دریغ غلط استعمال ہوا ہے متعصب میڈیا کے کردارپرسے نقاب الٹ دی ہے ، مولانا مدنی نے آگے کہا کہ آئین نے ملک کے ہرشہری کو اظہارکی مکمل آزادی دی ہے ہم کلی طورپر اس سے اتفاق کرتے ہیں لیکن اگر اظہاررائے کی اس آزادی سے دانستہ کسی کی دل آزاری کی جاتی ہے کسی فرقہ یا قوم کی کردارکشی کی کوشش ہوتی ہے یا اس کے ذریعہ استعال انگیزی پھیلائی جاتی ہے تو ہم اس کے سخت خلاف ہیں ، آئین میں اس کی مکمل وضاحت موجود ہے ،انہوں نے ہاتھرس کے حالیہ واقعہ کا حوالہ دیتے ہوئے کہا کہ ایک مجبورلڑکی کی آبروریزی ہوتی ہے اسے سخت ذہنی وجسمانی اذیت دی جاتی ہے یہاں تک کہ بعد میں وہ اسپتال میں دم توڑدیتی ہے مگر اس واقعہ میں بھی ملک کی فرقہ پرست ذہنیت اور متعصب میڈیا ہندوومسلمان کا رخ تلاش کرنے لگتاہے کہا جارہا ہے کہ اس واقعہ کی آڑمیں اترپردیش میں بڑے پیمانہ پر دنگافسادبرپا کرنے کی بین الاقوامی سازش ہوئی ہے ، کیرالاسے ہاتھرس رپورٹنگ کرنے گئے کچھ مسلم صحافیوں کو گرفتارکرکے اب اس سازش کو حقیقت کا روپ دینے کی کوشش ہوئی ہے اور اس کے بعد ہی سے بیشتر نیوزچینلوں کا رویہ بدل چکا ہے ، متاثرہ لڑکی کو انصاف دلانے کی جگہ فرقہ پرست ذہنیت اوریہ نیوزچینل اب اس پورے واقعہ کو ہندومسلم کا رنگ دینے کی ہر ممکن کوشش کررہے ہیں ۔ مولانا مدنی نے کہا کہ اتنا سب کچھ ہونے کے بعد بھی میڈیا راہ راست پر آنے کو تیارنہیں ہے البتہ آج چیف جسٹس آف انڈیا نے جس طرح کے سخت تبصرے کئے ہیں اس سے اس بات کا قوی امکان ہے کہ اس معاملہ میں جلد ہی کوئی مثبت فیصلہ آئے گا اورفرقہ پرست ذہنیت اور متعصب میڈیا کے منہ میں لگام پڑجائے گی۔ واضح رہے کہ جمعیۃ علماء ہند کی جانب سے داخل پٹیشن میں گلزار احمد اعظمی مدعی بنے ہیں جس میں عدالت کی توجہ ان ڈیڑھ سو نیوز چینلوں اور اخبارات کی جانب دلائی گئی ہے جس میں انڈیا ٹی وی،زی نیوز، نیشن نیوز،ری پبلک بھارت،ری پبلک ٹی وی،شدرشن نیوز چینل اور بعض دوسرے چینل شامل ہیں جنہوں نے صحافتی اصولوں کو تار تار کرتے ہوئے مسلمانوں کی دل آزاری کی اور قومی یکجہتی کو نقصان پہنچانے کی ناپاک سازش کی تھی ان کے خلاف سخت کارروائی کرنے کی درخواست کی گئی ہے۔

نئی دہلی:سپریم کورٹ نے بدھ کے روزکہاہے کہ شاہین باغ جیسے عوامی مقامات پر غیر معینہ مدت کے لیے’ قبضہ کرکے‘ احتجاج قابل قبول نہیں ہے۔ جب کہ سی ا ے اے پرکئی درخواستیں سپریم کورٹ میں ہیں،لیکن ان پرابھی تک سماعت نہیں ہوسکی ہے۔جنوری میں یہ کہہ کرسماعت ٹال دی گئی کہ پہلے کشیدگی روکنی ہوگی،لیکن آٹھ ماہ بعدتک ان پرسماعت نہیں ہوسکی جن درخواستوں میں سی اے اے کی آئینی حیثیت کوچیلنج کیاگیاہے اورمذہبی بنیادپرقانون سازی قراردی گئی ہے۔احتجاج کے دوران سپریم کورٹ کی طرف سے تین مذاکرات کاربھی آئے تھے جووہاں موجودلوگوں کے جواب سے کافی متاثرہوئے ۔ شاہین باغ میں تاریخی احتجاج کا آغاز پچھلے سال دسمبر میں اس وقت ہوا تھا جب متنازعہ شہریت قانون کے خلاف موثر آواز اٹھی تھی۔یہ صداپوری دنیامیں سنائی دی اورپورے ملک میں جگہ جگہ شاہین باغ بنے ۔اس احتجاج کوبدنام کرنے کی ہرممکن کوشش کی گئی ،یہاں تک کہ فائرنگ تک کرائی گئی ۔عدالت نے کہاہے کہ دھرنا، مظاہرہ کسی مقررہ جگہ پر ہوناچاہیے اور قانون کے تحت عوامی مقامات یاسڑکوں پر قبضہ کرکے احتجاج کرنے یا ان کے حقوق کی پامالی کرنے سے لوگوں کو بڑی تعداد میں تکلیف کی اجازت نہیں ہے۔حالاں کہ مقامی لوگ باربارکہتے رہے ہیں کہ راستہ پولیس نے بیریکیڈلگاکرروکاہے اوراس وقت میڈیاکی ایک رپورٹ میں واضح طورپراسے دکھایابھی گیاتھا۔جسٹس سنجے کشن کول ، جسٹس انیرودھ بوس اور جسٹس کرشنا مراری کے بنچ نے اپنے فیصلے میں کہا ہے کہ احتجاج کے حق اور لوگوں کے آنے اور جانے کے حق جیسے حقوق کے درمیان توازن قائم کرنا ہوگا۔بینچ نے کہا ہے کہ جمہوریت اور اختلاف ایک ساتھ چلتے ہیں۔بینچ نے کہاہے کہ اس کا مطلب یہ ہے کہ تحریک کے عوام احتجاج کے وہ طریقے اپنائیں جو برطانوی حکمرانی کے خلاف اپنائے گئے تھے۔ بنچ نے کہاہے کہ عوامی مقامات پر مظاہروں کے لیے غیر معینہ مدت پر قبضہ نہیں کیا جاسکتا ، جیسا کہ شاہین باغ کیس میں ہے۔جب کہ مقامی لوگوں کاکہناہے کہ راستہ پولیس نے بندکیاتھا۔عدالت نے متنازعہ شہریت قانون کے خلاف احتجاج کے دوران گذشتہ سال دسمبر سے شاہین باغ جانے والی سڑک کو روکنے پر دائر درخواست پر اپنا فیصلہ سنایا۔ویڈیو کانفرنس کے ذریعے فیصلہ دیتے ہوئے بنچ نے کہاہے کہ دہلی پولیس جیسے حکام کو شاہین باغ کے علاقے کو مظاہرین سے خالی کرنے کے لیے کارروائی کرنی چاہیے تھی۔عدالت نے کہا کہ حکام کوخود ہی کارروائی کرنا ہوگی اور وہ ایسی صورتحال سے نمٹنے کے لیے عدالتوں کے پیچھے پناہ نہیں لے سکتے ہیں۔شاہین باغ روڈ سے رکاوٹ دور کرنے اور ٹریفک کو ہموار کرنے کے لیے ایڈوکیٹ امیت ساہنی نے درخواست دائر کی تھی۔عدالت عظمیٰ نے اس درخواست پر سماعت 21 ستمبر کو مکمل کی۔

نئی دہلی:اتر پردیش میں صدرراج کو نافذ کرنے کا مطالبہ کرتے ہوئے سپریم کورٹ میں درخواست داخل کی گئی ہے ۔جو تامل ناڈو کے رہنے والے وکیل سی آر جیاسوکن نے سپریم کورٹ میں درخواست دائر کی ہے۔ اس درخواست میں ہاتھرس کیس کا حوالہ دیتے ہوئے کہا گیا ہے کہ یوپی میں بنیادی حقوق کی پامالی کی جارہی ہے، لہٰذا صدر راج نافذ کیا جانا چاہئے۔ یوپی کے ہاتھرس میں ایک لڑکی کے ساتھ مبینہ اجتماعی عصمت اور قتل پر ملک بھر میں ناراضگی ہے۔ ملک میں متعدد مقامات پر مظاہرے کیے گئے ہیں۔ہاتھرس میں اجتماعی عصمت کا نشانہ بننے والی ایک 20 سالہ لڑکی کی 29 ستمبر کو دہلی کے صفدرجنگ اسپتال میں موت ہوگئی۔ اس واقعہ نے پوری قوم کو ہلا کر رکھ دیا ہے۔ ظلم کی انتہاکو پہنچنے والا یہ واقعہ 14 ستمبر کو یوپی کے ہاتھرس میں پیش آیا۔الہ آباد ہائی کورٹ نے اس معاملے پر از خود نوٹس لیا ہے۔ ہائیکورٹ کی لکھنؤ بنچ نے جمعرات کے روز کہا کہ ایک مجرموں نے مظلوم کے ساتھ زیادتی کی اور اس کے بعد کیا ہوا اگر یہ سچ ہے تو یہ ان کے کنبہ کے غم کو دور کرنے کے بجائے ان کے زخموں پر نمک چھڑکنے کے مترادف ہے۔ لاش کو ان کے گھر لے جانا چاہئے، لیکن ایسا نہیں کیا گیا۔ یہ معاملہ ہمارے سامنے آیا جس کا ہم نے جائزہ لیا ہے وہ عوامی اہمیت اور عوامی مفاد کا معاملہ ہے کیونکہ اس میں ریاست کے اعلی عہدیداروں پر الزامات شامل ہیں، جس کے نتیجے میں نہ صرف مقتولہ بلکہ اس کے کنبہ کے افراد کا بھی بنیادی انسانی حقوق کی خلاف ورزی ہوتی ہے۔ اہم بات یہ ہے کہ ہاتھرس کیس میں تشکیل دی جانے والی خصوصی تحقیقاتی ٹیم (ایس آئی ٹی) نے اپنی پہلی رپورٹ ریاستی حکومت کو پیش کی۔ اس رپورٹ کے بعد یوپی سرکار نے ہاتھرس کے ایس پی اور چار دیگر پولیس اہلکاروں کو معطل کردیا۔ ایس آئی ٹی کی رپورٹ کی بنیاد پر یوپی کے وزیر اعلی یوگی آدتیہ ناتھ نے ایس پی اور چار پولیس اہلکاروں کے خلاف کارروائی کرنے کی ہدایت دی ہے۔

ہاتھرس:ہاتھرس اسکینڈل کے حوالے سے سیاست جاری ہے۔ یوپی کے وزیر اعلی یوگی آدتیہ ناتھ نے پورے معاملے کی سی بی آئی تحقیقات کی سفارش کی تھی لیکن متاثرہ کے اہل خانہ اس سے مطمئن نہیں ہیں۔ متاثرہ کے اہل خانہ کا کہنا ہے کہ انہوں نے سی بی آئی انکوائری کا مطالبہ نہیں کیا۔ ان کا مطالبہ ہے کہ اس سارے معاملے کی تحقیقات سپریم کورٹ کے جج کے ذریعہ کی جائے۔ تاہم کنبہ نے اعتماد کا اظہار کیا کہ انہیں یوگی حکومت پر مکمل اعتماد ہے۔متاثرہ کے بھائی نے کہا کہ ہم نے سی بی آئی انکوائری کا مطالبہ نہیں کیا، کیوں کہ ایس آئی ٹی پہلے ہی اس معاملے میں محوِ تفتیش ہے۔ انہوں نے کہا کہ اس کیس کی تحقیقات سپریم کورٹ کے جج کے ذریعہ ہونی چاہئے۔ متاثرہ کے بھائی نے بتایا کہ کنبہ کسی بھی چیز سے مطمئن نہیں ہے۔ بہن کی راکھ اس وقت تک نہیں بہائی جائے گی جب تک کہ ملزموں کو پھانسی نہ دی جائے۔

نئی دہلی:کانگریس نے بدھ کے روز بابری مسجد انہدام معاملے میں سی بی آئی کی خصوصی عدالت کے فیصلے کو گذشتہ سال سپریم کورٹ کے فیصلے کے منافی قرار دیتے ہوئے کہا ہے کہ آئین ،معاشرتی ہم آہنگی اور بھائی چارے پر یقین رکھنے والا ہر شخص توقع کرتا ہے کہ صوبائی اور مرکزی حکومت اس غیر معقول فیصلے کے خلاف ہائی کورٹ میں اپیل دائر کرے گی۔ پارٹی کے چیف ترجمان رندیپ سورجے والا نے کہا کہ بابری مسجد انہدام معاملے کے تمام ملزموں کو بری کرنے کا خصوصی عدالت کا فیصلہ سپریم کورٹ کے فیصلے اور آئین سے پرے ہے۔ سپریم کورٹ کے پانچ ججوں پر مشتمل بینچ 9 نومبر 2019 کے فیصلے کے مطابق بابری مسجد کا انہدام غیر قانونی جرم تھا، لیکن خصوصی عدالت نے تمام مجرموں کو بری کردیا۔ خصوصی عدالت کا فیصلہ بھی سپریم کورٹ کے فیصلے کے صریح خلاف ہے۔انہوں نے الزام لگایاکہ پورا ملک جانتا ہے کہ بی جے پی-آر ایس ایس اور ان کے رہنماؤں نے سیاسی فوائد کے لئے ملک اور معاشرے کے فرقہ وارانہ ہم آہنگی کو توڑنے کے لئے مکروہ سازش کی تھی۔ اس وقت اترپردیش کی بی جے پی حکومت نے بھی فرقہ وارانہ ہم آہنگی کو توڑ نے کی اس سازش میں ملوث تھی ۔ سرجے والا نے کہاکہ یہاں تک کہ جھوٹے حلف نامے دے کر عدالت عظمیٰ کو بھی بہکایا گیا تھا۔ ان تمام پہلوؤں، حقائق اور شواہد کا جائزہ لینے کے بعد ہی سپریم کورٹ نے مسجد انہدام کو غیر قانونی قرار دیا تھا۔انہوں نے کہاکہ ہر وہ شخص جو آئین، معاشرتی ہم آہنگی اور بھائی چارے پر یقین رکھتا ہے وہ توقع کرتا ہے کہ صوبائی اور مرکزی حکومت خصوصی عدالت کے اس غیر معقول فیصلے اور ملک کے آئین کے بغیر کسی تعصب کے خلاف ہائی کورٹ میں اپیل دائر کریں گی۔ اور قانون کی تعمیل کریں گی۔واضح رہے کہ سی بی آئی کی خصوصی عدالت نے بدھ کے روز 6 دسمبر 1992 کو بابری مسجد کے انہدام معاملے میں طویل انتظار کے بعد تمام ملزموں کو بری کردیا۔ سی بی آئی کی خصوصی عدالت کے جج ایس کے یادو نے فیصلے میں کہا ہے کہ بابری مسجد انہدام سانحہ پہلے سے منصوبہ بند نہیں تھا، یہ ایک حادثاتی واقعہ تھا۔ انہوں نے کہا کہ ملزموں کے خلاف کوئی ٹھوس ثبوت نہیں ملا ۔

نئی دہلی:سپریم کورٹ نے بدھ کے روز ملک کی متعدد ریاستوں میں کورونا وائرس اور سیلاب کی صورتحال کے پیش نظر 4 اکتوبر کو ہونے والے یونین پبلک سروس کمیشن کےابتدائی امتحان 2020 کو ملتوی کرنے سے انکار کردیا۔جسٹس اے ایم کھانویلکر، جسٹس بی آر گوئی اور جسٹس کرشنا مراری کے بنچ نے مرکز سے کہا کہ وہ امیدواروں کو موقع فراہم کرنے پر غور کریں جو کورونا کی وبا کی وجہ سے اپنی آخری کوشش میں شامل نہیں ہوسکیں گے۔بینچ نے سول سروس کے 2020 کے امتحان کو 2021 کے ساتھ ملا کر منعقد کرنے پر غور کرنے سے انکار کردیا اور کہا کہ اس کے منفی اثرات مرتب ہوں گے۔بینچ کورونا وائرس اور سیلاب کی صورتحال کی وجہ سے کمیشن سروسزابتدائی 2020 امتحان دو سے تین ماہ کے لئے ملتوی کرنے کی دائر درخواست کی سماعت کررہی تھی۔اس کی مخالفت کرتے ہوئے یونین پبلک سروس کمیشن نے کہا تھا کہ 4 اکتوبر کو امتحان کے انعقاد کے لئے تمام ضروری تیاری کرلی گئی ہے۔یو پی ایس سی نے بتایا کہ پہلے سے طے شدہ نظام الاوقات کے مطابق امتحان 31 مئی کو ہونا تھا، لیکن اس کے ملتوی ہونے کے بعد چار اکتوبر کے انعقاد کا فیصلہ کیا گیا ہے۔کمیشن نے واضح طور پر کہا تھا کہ یہ حکومت ہند کی بنیادی خدمات کے لئے ایک امتحان ہے اور اب اس کو ملتوی کرنا ناممکن ہے۔

نئی دہلی:بدھ کے روز سپریم کورٹ میں سدرشن ٹی وی کیس میں سماعت ہوئی۔ مرکز نے شو بنداس بول میں یو پی ایس سی جہادپر سدرشن ٹی وی کوشوکاز نوٹس جاری کیا ہے۔ سالسٹر جنرل تشارمہتانے عدالت کوبتایاہے کہ مرکز نے آج سدرشن نیوز ٹی وی کو 4 صفحات پر مشتمل نوٹس جاری کیا ہے۔ اس میں کہا گیا ہے کہ پروگرام کے کوڈکی خلاف ورزی کے بارے میں 28 ستمبر کو شام 5 بجے سے پہلے ٹی وی کو تحریری جواب جمع کرانے کی ضرورت ہے تاکہ ان کے خلاف کارروائی کیوں نہ کی جائے؟ اگر نوٹس کاجواب نہیں ملا تو فیصلہ لیاجائے گا۔ سنٹر کے مطابق چینل کاشوپہلی نظرمیں پروگرام کوڈ کے مطابق نہیں ہے۔تشارمہتانے کہاہے کہ سماعت 28 ستمبر تک ملتوی کردی جانی چاہیے۔ جسٹس چندرچوڑ نے کہا کہ اگر معاملے کی سماعت نہ ہوتی تو شو اب تک مکمل طور پر نشر کیا جاچکا ہوتا۔ ہمیں اس کے بارے میں سوچنا چاہیے۔ ایس جی تشار مہتانے کہاکہ میرے خیال میں عدالت کی مداخلت ہی آخری فیصلہ ہونا چاہیے۔اس کے بعد سپریم کورٹ نے کیس کی سماعت 5 اکتوبر تک ملتوی کردی۔ سپریم کورٹ کے حکم کے مطابق بقیہ شوز کے ٹیلی کاسٹ پر پابندی جاری رہے گی۔

"۔۔۔۔ ملک کی سپریم کورٹ ہونے کی حیثیت سے ہم آپ کو یہ کہنے کی اجازت نہیں دے سکتے کہ مسلمان سول سروسز میں گھس پیٹھ کر رہے ہیں۔۔۔” جسٹس چندر چوڑ

"…… عدالت پر یہ بات واضح ہوتی ہے کہ اس پروگرام کا مقصد مسلم کمیونٹی کو بدنام کرنا اور اسے سول سروسز میں گھس پیٹھ کی مہلک کوشش کا ذمہ دار قرار دینا ہے۔۔۔۔۔” جسٹس کے ایم جوزف

28 اگست 2020 کو سدرشن ٹی وی کے زہریلے پروگرام پر پیشگی پابندی لگانے سے انکار کرنے کے بعد آخر کار آج سپریم کورٹ نے ’بنداس بول‘کے تحت ’سول سروسز میں مسلمانوں کے جہاد‘نامی پروگرام کے باقی ایپی سوڈ کے ٹیلی کاسٹ پر پابندی عاید کردی ہے۔

گوکہ یہ پابندی اگلے احکامات تک ہے اور اگلی سنوائی 17ستمبر کو ہے‘ تاہم سپریم کورٹ کی دو رکنی بنچ میں آج جو Proceedings درج ہوئیں وہ بہت حوصلہ افزا ہیں۔ 28 اگست کو یہ ضرور ہوا تھا کہ سپریم کورٹ نے مرکزی حکومت،پریس کونسل آف انڈیا اور سدرشن ٹی وی کو نوٹس جاری کردیا تھا جس کے جواب پر آج بحث ہوئی ـ

ادھر 28 اگست کو ہی جامعہ کے طلبہ دہلی ہائی کورٹ پہنچ گئے تھے جہاں سے اس پروگرام کے پیشگی ٹیلی کاسٹ پر مشروط پابندی عاید ہوگئی تھی۔ ہائی کورٹ نے مرکزی حکومت کو ہدایت دی تھی کہ وہ سدرشن ٹی وی کو نوٹس جاری کرے اور اس کا جواب مل جانے کے 48 گھنٹے کے اندر اس پر فیصلہ کردے۔حکومت نے حسب توقع مگر خلاف قانون سدرشن کے جواب پر فیصلہ کردیا اور اسے یہ زہریلا پروگرام ٹیلی کاسٹ کرنے کی اجازت دے دی۔معلوم ہوا ہے کہ سدرشن اس پروگرام کے 4 ایپی سوڈ دکھا چکا ہے اور کچھ باقی ہیں۔ سپریم کورٹ نے نہ صرف ان باقی ایپی سوڈز پر پابندی عاید کی ہے بلکہ اس سے آگے بڑھ کر آوارہ چینلوں کی ناک میں نکیل ڈالنے کا بھی اشارہ دے دیا ہے۔ دہلی ہائی کورٹ نے بھی وزارت اطلاعات ونشریات کے ذریعہ اجازت دیے جانے کے خلاف حکومت کو نوٹس جاری کردیا ہے۔

سدرشن ٹی وی کے ایڈیٹر اوراینکر سریش چوانکے نے اگست کے آخر میں ایک ٹویٹ جاری کرکے اس زہریلے پروگرام کا ٹریلر دکھایا تھا۔اس میں بتایا گیا تھا کہ ”مسلمان یوپی ایس سی کے ذریعہ جہاد“میں مصروف ہیں اور نوکر شاہی میں گھس پیٹھ کرکے بڑی سازش کر رہے ہیں۔

آج جب سپریم کورٹ میں اس معاملہ میں سنوائی شروع ہوئی توامیتابھ پانڈے اور نوریکھا شرما نے سابق سول سروینٹس کے نوتخلیق شدہ گروپ ’Constitutional Conduct’کی معرفت سپریم کورٹ میں درخواست دائر کرکے اس معاملہ میں پارٹی بنائے جانے اور’منافرت انگیز بیانات‘ پر قدغن لگانے کے لئے کچھ حتمی اصول وضع کرنے کی اپیل کی۔

سپریم کورٹ نے ملک کے پانچ ممتاز شہریوں پر مشتمل ایک کمیٹی بنانے کی ہدایت دی جو الیکٹرانک میڈیا کے لئے معیاری رہنما اصول اور ضابطے بنائے گی۔عدالت نے یہ واضح کردیا کہ "ہمیں اس کمیٹی میں سیاسی مزاج کے لوگوں کی ضرورت نہیں ہے بلکہ ہم ایسے شہریوں کو ممبر کے طورپر دیکھنا چاہتے ہیں جن کا رتبہ قابل ستائش ہو”۔انوپ جارج چودھری ایڈوکیٹ نے عدالت کو بتایا کہ پورے ملک میں سول سروسز میں کل 292 مسلمان افسر ہیں۔انہوں نے بتایا کہ اگر آپ سدرشن ٹی وی پر چلنے والے اس شو کی اسکرپٹ کو دیکھیں تو اس میں کہا گیا ہے کہ مسلمان سول سروسز میں گھس پیٹھ کر رہے ہیں۔مسلم اوبی سی دوسرے اوبی سی کا حصہ بھی ہڑپ کر رہے ہیں۔اس شو میں گراف کے ذریعہ مسلمانوں کیلئے حرام…..اور غدارکا لفظ استعمال کیا گیا ہے۔یہ بہت ہی بدقسمتی کی بات ہے۔

اس موقع پر جسٹس چندر چوڑ نے نوٹ کیا کہ پٹیشنر میڈیا رپورٹنگ کیلئے رہنما اصول چاہتے ہیں۔جسٹس کے ایم جوزف نے بہت ہی اہم بات کہی۔انہوں نے کہا کہ ”یہ دیکھنے کی ضرورت ہے کہ وزول میڈیا (ٹی وی) کس کی ملکیت ہیں اور کمپنی کے تمام شیئر ہولڈنگ کا اسلوب کیا ہے۔۔۔ یہ تمام تفصیلات عوام کی معلومات کیلئے کمپنی کی ویب سائٹ پر موجود ہونی چاہئیں۔کمپنی کا Revenue Model یعنی آمدنی کا نمونہ بھی ویب سائٹ پر ہونا چاہئے۔۔۔ معلوم ہونا چاہئے کہ حکومت کسی ایک چینل کو زیادہ اشتہارات اور کسی کو کم تو نہیں دے رہی ہے۔

جسٹس جوزف نے ٹی وی چینلوں پر ہونے والی Debates کے طریقہ کار اور ان کی نوعیت پر بھی سوال اٹھائے۔انہوں نے کہا کہ:”یہ بھی دیکھنے کی ضرورت ہے کہ بحث کے دوران اینکر کا کردار کیا ہوتا ہے۔جب دوسرے بولیں تو کیسے سناجاتا ہے۔یہ چیک کرنے کی ضرورت ہے کہ اینکر کتنا وقت لیتا ہے۔وہ (اینکرز) اسپیکر بند (Mute) کردیتے ہیں اور سوال پوچھتے ہیں۔

جسٹس چند رچوڑ نے سدرشن کیس پر واپس آتے ہوئے کہا: کہ اینکر (سریش چوہانکے) کو شکایت ہے کہ ایک خاص گروپ سول سروسز میں داخل ہو رہا ہے۔ انہوں نے اپنے تبصرے میں کہا:

1- یہ کتنی موذی اور چھل کپٹ والی بات ہے۔
2- ایسے احمقانہ الزامات خود یوپی ایس سی امتحانات پر بھی سوال کھڑے کرتے ہیں۔
3- یہ الزامات بغیر کسی حقیقی بنیاد کے ہیں۔
4- اس کی اجازت کیسے دی جاسکتی ہے؟
5- کیا ایک آزاد معاشرے میں ایسے پروگرام کی اجازت دی جاسکتی ہے؟
6- کیا میڈیا کیلئے ایسے نافذ العمل معیارات نہیں ہونے چاہئیں کہ جس کی رو سے خود میڈیا آرٹیکل 19(1)(a) کے دعوے پر پورا اتر سکے؟

(واضح رہے کہ یہ شرپسند چینل اسی آرٹیکل کا حوالہ دے کر شرپھیلانے کی آزادی چاہتے ہیں)۔

اس موقع پر مرکزی حکومت کے وکیل اور سالیسٹر جنرل تشار مہتا نے کہا کہ جسٹس جوزف کے بیان کے دو رخ ہیں۔میڈیا پر کنٹرول جمہوریت کے لئے خطرناک ہوگا۔اس پر جسٹس جوزف نے جواب دیتے ہوئے کہا: جب ہم صحافتی آزادی کی بات کرتے ہیں تو یہ مطلق (آزدای) نہیں ہے۔صحافی کو وہی آزادی ہے جو اس ملک کے دوسرے عام شہریوں کو حاصل ہے۔امریکہ کی طرح یہاں بھی صحافیوں کے لئے کوئی الگ قسم کی آزادی نہیں ہے۔ہمیں ایسے صحافیوں کی ضرورت ہے جو بحث کے دوران منصفانہ رویہ اختیار کریں۔

اس کے بعدجسٹس چندر چوڑ نے کہا: ملک کے بہترین (دماغوں) کے ذریعہ ان اقدامات کی تجاویز آنے دیجئے جو ہمارے پلیٹ فارم (عدلیہ) پر بحث میں معاون ثابت ہوں اور پھر معیار طے کئے جائیں۔اس وقت ایک اینکر (چوہانکے) ایک خاص کمیونٹی(مسلمانوں) کو نشانہ بنارہا ہے۔یہ کہنے کے لئے کہ ہم ایک جمہوریت ہیں ہمیں کچھ معیارات وضع کرنے پڑیں گے”ـ

اس پر سدرشن ٹی وی کے وکیل شیام دیوان نے جواب دینے کے لئے کچھ مہلت مانگی۔اس پر جسٹس چند رچوڑ نے کہا: آپ کا موکل (سدرشن) ملک کو برباد کر رہا ہے اور ہندوستان کی متنوع تہذیبی ثقافت کو قبول نہیں کر رہا ہے۔آپ کے موکل کو اپنی آزادی کا استعمال کرتے وقت احتیاط کرنی پڑے گی۔

سپریم کورٹ میں آج کی بحث بہت تفصیلی تھی۔لنچ کے وقفہ کے بعد جب عدالت دوبارہ بیٹھی تو جسٹس چندر چوڑ نے نیوز براڈ کاسٹرس ایسو سی ایشن (این بی سی اے) کی وکیل نشا بھمبھانی سے پوچھا: ” ہم آپ سے پوچھنا چاہتے ہیں کہ کیا لیٹر ہیڈ کے علاوہ بھی آپ کا کوئی وجود ہے؟ آخر آپ اس وقت کیا کرتے ہیں جب میڈیا کے ذریعہ جرائم کی متوازی تحقیقات چل رہی ہوتی ہیں اور ساکھ کو داغدار کیا جارہا ہوتا ہے؟

اس پر سالیسٹرجنرل تشار مہتا نے عدالت سے ہی پوچھ لیا کہ مثال کے طورپر وکیل گوتم بھاٹیا کچھ ایسا لکھ دیں کہ جس سے میں اتفاق نہیں رکھتا اور میں حساب بے باق کرنا چاہتا ہوں اور میں ایک ایسا گھناؤنا مضمون لکھ دوں کہ جس کا وہ جواب نہ دیں توپھر آپ (عدلیہ) اسے کیسے ریگولیٹ کریں گے؟ اس پر جسٹس چندر چوڑ نے جواب دیا: لیکن اس کا موازنہ آپ نفع کمانے والی اکائیوں سے نہیں کرسکتے؟علمی فائدے کیلئے دانشورانہ مضمون ایسی تنظیموں سے بالکل مختلف ہیں۔

جسٹس کے ایم جوزف نے کہا: پروگرام کوڈ کا ضابطہ نمبر6 کہتا ہے کہ کیبل ٹی وی پروگرام ایسی کوئی چیز نہیں دکھاسکتے کہ جو ایک خاص مذہب اور طبقہ کو نشانہ بنائے۔اس موقع پر پٹیشنر کے وکیل شادان فراست نے عدالت سے کہا کہ سدرشن کا پروگرام پورے طور پر سول سروسز میں موجود مسلمانوں کی شبیہ خراب کر رہا ہے۔انہیں دہشت گرد کہا گیا ہے۔منافرت انگیز بیانات ایسی چیز ہیں کہ جس کاحق جواب ممکن نہیں ہے۔ آخر اس بیان کا کیا جواب دیا جائے کہ سول سروسز میں مسلمانوں کو نہیں آنا چاہئے۔۔۔؟

سدرشن کے وکیل شیام دیوان نے رٹ کا جواب دینے کیلئے دوہفتہ کا وقت مانگا۔لیکن انہوں نے یہ قبول کرنے سے انکار کردیا کہ باقی ایپی سوڈ نہیں دکھائے جائیں گے۔جسٹس چندر چوڑ نے پوچھا کہ اس پروگرام کا لب لباب کیا ہے؟ تو دیوان نے جواب دیا کہ: وہ سمجھتے ہیں کہ یہ ایک تحقیقاتی اسٹوری ہے‘ اس کا تعلق ملک کی سلامتی سے ہے اور یہ لوگوں کے حق میں ہے۔اس میں (سول سروسز کی تیاری کرانے والے پرائیویٹ مسلم اداروں میں) ایسے ملکوں سے بھاری فنڈ آرہا ہے کہ جو ہندوستان کے دوست ممالک نہیں ہے۔اور سدرشن ٹی وی سمجھتا ہے کہ یہ اس کا فرض ہے کہ وہ لوگوں کو اس سے مطلع کرے۔

جسٹس جوزف نے کہا: جیسے ہی دوہفتوں کی مہلت ختم ہوگی یہ پروگرام بھی ختم ہوچکا ہوگا۔حکومت نے آپ سے کہا تھا کہ پروگرام کوڈ کی خلاف ورزی نہیں ہونی چاہئے۔اب جرمانہ کیا ہو؟

اس کے بعد شادان فراست نے عدالت کے سامنے سدرشن کے اس پروگرام کی کچھ کلپس رکھیں۔عدالت نے یہ کلپ غور سے دیکھیں۔اور فوراً سدرشن کو ہدایت دی کہ وہ17ستمبر تک باقی شوز نہ دکھائے۔۔۔ واضح رہے کہ 17ستمبر کو پھر سماعت ہوگی۔۔۔ شیام دیوان نے اس ہدایت پر سخت احتجاج کیا۔۔۔ انہوں نے کہا کہ پروگرام پر پیشگی پابندی عاید نہیں کی جاسکتی۔ہم چار شوز دکھاچکے ہیں۔اگر یہ پیشگی پابندی ہے تو میں استدلال کروں گا۔غیر ملکوں سے فنڈز آنے کا صاف لنک موجود ہے۔

اس پر جسٹس چندر چوڑ نے کہا: ہمیں تشویش اس امر کی ہے کہ جب آپ کہتے ہیں کہ جامعہ ملیہ اسلامیہ کے طلبہ اس گروپ کا حصہ ہیں جو سول سروسز میں گھس پیٹھ کر رہا ہے۔ہم اسے برداشت نہیں کرسکتے۔ ملک کی سپریم کورٹ ہونے کی حیثیت سے ہم آپ کو یہ کہنے کی اجازت نہیں دے سکتے کہ مسلمان سول سروسز میں گھس پیٹھ کر رہے ہیں۔آپ یہ نہیں کہہ سکتے کہ جرنلسٹ (چوہانکے) کو ایسا کرنے کی پوری آزادی ہے۔

اس کے بعد جسٹس چندر چوڑ نے سالیسٹر جنرل تشار مہتا سے پوچھا کہ کیا 9 ستمبر کو مرکزی وزارت اطلاعات ونشریات نے اس پروگرام کو11 اور 14 ستمبر کو دکھانے کی اجازت دیتے وقت دماغ کا استعمال کیا تھا؟ اس پر تشار مہتا کے پاس کوئی جوا ب نہیں تھا۔انہوں نے کہا کہ میں حکومت سے پوچھ کر بتاؤں گا۔اب 17ستمبر کو تشار مہتا کو عدالت کو یہ بتانا پڑے گا۔عدالت نے بہر حال تمام فریق کو سننے کے بعد مندرجہ ذیل فیصلہ لکھوایا:

”……وہ صورت حال بدل گئی ہے جو پیشگی پابندی کے مرحلے میں ہوتی ہے۔پٹیشنر نے بتایا ہے کہ فرضی خبریں دکھائی گئی ہیں۔اسکرین شاٹ‘ویڈیو کلپ اور اسکرپٹ کے ذریعہ عدالت کو یہ بھی بتایا گیا ہے کہ سول سروسز میں آنے کو گھس پیٹھ کی ایک ساز ش بتایا گیا ہے۔یہ بھی دلیل دی گئی ہے کہ یہ پروگرام ملک میں نفرت آمیز بیانات کا محور بن گیا ہے۔عدالت پر یہ بات واضح ہوتی ہے کہ اس پروگرام کا مقصد مسلم کمیونٹی کو بدنام کرنا اور اسے سول سروسز میں گھس پیٹھ کی مہلک کوشش کا ذمہ دار قرار دینا ہے۔یہ ہمارا فرض منصبی ہے کہ ہم کیبل ٹی وی ایکٹ کے پروگرام کوڈ پر عمل آوری کو یقینی بنائیں۔جمہوری معاشرے کی مستحکم عمارت‘آئینی حقوق کی پاسداری اور فرائض کی بنیاد مختلف فرقوں کی بقائے باہم پر ہے۔۔۔کسی ایک کمیونٹی کو بدنام کرنے کی کوشش کا ساتھ نہیں دیا جاسکتا۔ہمارا موقف یہ ہے کہ صورت حال میں تبدیلی آگئی ہے۔اب تک جو بھی شوز دکھائے گئے ہیں ان سے پروگرام کے نیچر اور مقصد کا پتہ چلتا ہے۔اس عدالت کے اگلے احکامات تک سدرشن نیوز کو مزید ایپی سوڈ اس نام سے یا کسی بھی نام سے براڈ کاسٹ کرنے سے روکا جاتا ہے“ـ

اس نے خود کو اسفنج کی طرح نرم رکھا اور اس کی ہتھیلیوں میں ماچس کی ایک تیلی تھی ، جس سے وہ کھیل رہا تھاـ
ہم چاہتے ہیں کہ تم جھوٹ بولو
— نہیں
ہم چاہتے ہیں کہ تم سچ سے انکار کرو
— نہیں
ہم تمہیں تین دن کا موقع دینا چاہتے ہیں
— نہیں
ایوان میں خاموشی، اس کے چہرے پر تیج ہے،وقار ہے،سنجیدگی ہے اور اس وقت اس کی موجودگی غنیمت ہے کہ وہ سچ بول رہا ہے،سچ جو ہمارے ادیب نہیں بولتے،سچ جو ادب نہیں بنتا، سچ جو صرف ایک تصور رہ گیا ہے،وہ کہتا ہے،اسے حراست میں لیا جائے،جواب ملتا ہے ہم تمہیں موقع دینا چاہتے ہیں،وہ کہتا ہے موقع کی ضرورت نہیں ـ
میں حیران ہوں ـ کیا میں برنارڈ شا، شیکسپئر کا کوئی ڈرامہ دیکھ رہا ہوں؟ کیا اس انداز کے ڈرامے آج بھی تحریر ہو سکتے ہیں؟وہ سقراط کے انداز میں کھڑا ہے اور کہتا ہے مجھے زہر کا پیالہ دے دو،ایتھنس کی گلیوں میں دہشت ہے،سقراط نے زہر پی لیا، وہ زہر پینے کو بیتاب ہے اور آج جب سچ کی آہٹ دور چلی گئی ہے،نا امیدی کا طوفان سب کو بہا لے گیا ہے ، نازی فوج کھڑی ہے، ڈیٹینشن سینٹر کے دروازے کھل گئے ہیں، سچ جھوٹ بن چکا ہے،نصاب کی کتابوں سے بھی سچ عنقا ہو چکا ہے، تنظیموں پر نظر ہے،ہر محکمہ جادوگر کا محکمہ ہے،جارج آرویل بیہوش پڑا ہے ، اس کا اینیمل فارم اداس ہے،اس کے ٹھاٹ پولیس کے ممبران مر چکے ہیں اور نئی اب و ہوا میں زیادہ طاقت ور بن کر ابھرے ہیں ، وہ ایک ماچس کی تیلی لیتا ہے جسے بلراج مینرا بھی نہیں کھوج سکے تھےـ منٹو جس کی چاہت لئے بیالیس برس کی عمر میں چلا گیا، کرشن چندر نے جس کی تلاش میں گدھوں سے ملاقات کی اور راما نند ساگر نے کہا انسان مر گیاـ اس نے ماچس سے تیلی نکالی،جوتے کے تلوں سے بجھا دی مگر آگ بھڑک اٹھی،آتش فشاں کا لاوا پھوٹا، اس سے کہا گیا”جھوٹ بولو”وہ سچ پر قائم رہاـ اس نے دوبارہ ماچس کی تیلی جلائی اور پاؤں سے بجھا دی اور خاموش رہ کر اس نے بتایا کہ ایک دن مسولینی مر گیا تھاـ ایک دن ہٹلر نے خود کشی کر لی تھی،ایک دن چنگیز مارا گیا، ایک دن ہلاکو اپنے ہی گھوڑے سے زخمی ہوا اور مر گیا، ایک دن سکندر بھی چلا گیاـ
میں اسے اب بھی ماچس کی تیلی جلاتے ہوئے دیکھ رہا ہوں ـ وہ ادب کی دنیا کا نہیں ہے،مگر میں حیران اس لئے ہوں کہ اس وقت وہ مکمل ادب کا ترجمان بن گیا ہے، گہرے ، فلسفیانہ ، سنجیدہ ادب کا ترجمان، وہ تذبذب یا اضطراب کی لہروں کے درمیاں نہیں ہے،اس کے بال گھنے ہیں،چہرے پر آگ کی آنچ تک نہیں، قد میانہ،مگر وہ پر سکون ہے، وہ لوگ پر سکون نہیں ہیں جو اسے چٹانوں سے دھکا دینا چاہتے ہیں،وہ بہت نرم دل ہے،وہ آہستگی سے پوچھتا ہے”تم نے جولیس سیزر پڑھا ہے؟” آہ! جولیس کے جانے کے بعد قلو پطرہ بھی چلی گئی، کوئی زندہ کب رہتا ہے،مگرسچ زندہ رہتا ہے، یہیں کہیں بوسیدہ حویلیوں میں ، گپھاؤں میں ، کھنڈرات میں،ایک دن ایوانوں میں بھی زندہ ہو جائے گا، وہ اس وقت بھی ماچس کی تیلی جلا رہا تھا جب سیاہ قانون نے دستک دی،شہریت کو بچانے ، آشیانے کو محفوظ رکھنے کی باری تھی،ملک کے دانشور اور دوسرے مذاہب کے لوگ بھی اٹھ کھڑے ہوئے اور اس لئے اٹھ کھڑے ہوئے کہ کچھ آشیانے جل رہے تھے، مٹی کا ٹکرا محفوظ نہیں تھا،وہ تیلی جلا کر دیکھ چکا تھا کہ جمہوریت اور آئین کا خاتمہ ہوا تو زندگی مشکل ہو جائے گی،فرانس کا انقلاب اسے آواز دے رہا تھا،اندھیرا تھا ، مگر وہ سب کچھ دیکھ سکتا تھا، اس نے جان لیا تھا ، خاموشی جرم بھی ہے سزا بھی ـ
فرانس میں کبھی بوربون خاندان کی حکومت تھی۔بادشاہ کے اپنے لوگ تھے، اپنا عدالتی نظام تھا،ہر شعبے پر حکومت تھی،عوام نے تنقید کا حق کھو دیا تھا، فرانس نے تمام عدالتی منصب فروخت کر دے تھے۔دولت مند تاجر منصبوں اور عہدوں کو خریدتے تھے ۔اس زمانے میں فرانس کے ججوں کی تنخواہیں کم تھیں،جج بادشاہ کے زیر نگران کام کرتے اور فیصلے لیتے تھے،رشوت خوری کا بازار گرم تھا۔ فرانس کی پارلیمنٹ میں صرف ایک ہی کام ہوتا تھا بادشاہ کے ہرحکم کو قانونی اورآئینی شکل دینا ،فرانس میں اس وقت بھاری ٹیکس نافذ تھے ۔ جی ایس ٹی نے چھوٹے چھوٹے تاجران کو مار ڈالا، روزگار ختم کر ڈالے، معیشت کی کمر ٹوٹ گئی،ملک ہزارو برس پیچھے چلا گیا اور ملک کے پٹری پر آنے کی صورت دور دور تک نظر نہیں آ رہی، فرانس کا بادشاہ پیرس سے بارہ میل دور "ورسائی” کے محل میں رہتا تھا ۔اس کے دربار میں اٹھارہ ہزار افراد موجود ہوتے تھے۔شاہی اصطبل میں انیس سوگھوڑے تھے جن کی دیکھ بھال کے لیے چالیس لاکھ ڈالر سالانہ خرچ ہوتے تھے اورباورچی خانہ کا خرچ پندرہ لاکھ تھا۔ فرانس بھی دیوالیہ تھا،وہاں لاکھوں مزدور بے کار تھے۔فرانس کے جیل خانے معصوم اوربے قصورلوگوں سے بھرے پڑے تھے، فرانس میں بادشاہ کے خلاف پیدا ہوئی نفرت انقلاب میں تبدیل ہو گئی ۔ 14جولائی 1789کا دن ، انقلاب کے اگتے سورج کا دن تھا ۔پیرس میں دو شاہی محافظ مارے گئے اور اس کے بعد فرانس میں وہ انقلاب آیا جس نے دنیا کا نقشہ بدل دیا۔ اس بار اس نے تیلی نہیں جلائی،صرف سوچا ، انقلاب سچ سے ہی آئےگا،کبھی حکمران انگریز تھے اب رنگ بدلے ہوئے مہرے، فرق کچھ بھی نہیں، پہلے انگریزوں سے ملک کو آزاد کرنا تھا اب مہروں سے آزاد کرنا ہے ـ
کاش ایک سگریٹ مل جاتی، افسوس وہ سگریٹ نہیں پیتا، شیکسپئر اور برنارڈ شا کو ضرور پڑھتا ہےـ وہ ہندوستان کی سپریم کورٹ میں سینئر وکیل ہے۔ وہ بدعنوانی ، خاص طور پر عدلیہ کی بدعنوانی کے خلاف اپنے احتجاج کے لئے جانا جاتا ہے۔ وہ انا ہزارے کے ذریعہ بدعنوانی کے خلاف جدوجہد میں اپنی ٹیم کا کلیدی رکن رہا ہے۔اس نے اروند کیجریوال اور کرن بیدی کے ساتھ حکومت کی بات چیت میں سول سوسائٹی کی وکالت کی تھی۔ جی سپیکٹرم گھوٹالہ کا کیس سپریم کورٹ میں لڑا تھا ۔ وکالت کے دوران اس نے عوام کی جانب سے 500 سے زیادہ مقدمات لڑے ہیں۔وہ شفاف سیاست اور امن و امان کی وکالت کرتا ہے۔ اس کا خیال ہے کہ ملک کا قانونی ڈھانچہ بدعنوانی سے پاک اور شفاف ہونا چاہئے۔
وہ مشہور وکیل شانتی بھوشن کا بیٹا ہےـ اس نے پرنسٹن یونیورسٹی سے معاشیات اور پھر فلسفہ کی تعلیم حاصل کی پھر ماچس لے کر ہندوستان آ گیا، جہاں اس نے الہ آباد یونیورسٹی سے قانون کی ڈگری حاصل کی۔اس نے پھر تیلی جلائی اور دعویٰ کیا کہ چودہ چیف ججز نصف کرپٹ ہیں،وہ مسلسل سچ بول رہا ہے اور عذاب سے دوچار ہےـ
اس بار اس نے دیر تک تیلی کو جلائے رکھا،اسے یقین ہے کہ کچھ دروازے کھلے ہیں،کچھ اور کھل سکتے ہیں،اسے یقین ہے کہ سقراط اس کے اس پاس ہےـاسے یقین ہے کہ تاریخ کے اس موڑ پر خاموش نہیں رہا جا سکتاـ اسے یقین ہے کہ گھومتا پھرتا رقص دکھاتا ہوا سورج کبھی کبھی نصف صدی میں اپنے اس پاس مندراتے کیڑوں جیسے تاریک سیارے کو ضرور نگل جاتا ہوگاـ اس نے بالوں میں انگلیاں پھیریں، وہ مطمئن ہے ، یہ تین دن بھی گزر جائیں گےـ

ترجمہ:نایاب حسن

میں نے معزز عدالت کا فیصلہ دیکھا۔ مجھے تکلیف ہوئی کہ مجھے اُس عدالت کی توہین کرنے کا قصوروار ٹھہرایا گیا ہے، جس کی عظمت ووقار کومیں نے مسلسل تین دہائیوں سے ایک درباری یا خوشامدی کی حیثیت سے نہیں؛ بلکہ ایک ادنی محافظ کی حیثیت سے، برقراراور محفوظ رکھنے کی کوشش کی ہے ، ذاتی طورپر بھی اور پیشہ وارانہ طریقے سے بھی۔ مجھے تکلیف اس بات کی نہیں ہے کہ مجھے سزادی جا رہی ہے؛بلکہ دکھ اس بات کا ہے کہ میرے تئیں عدالت کو شدید غلط فہمی ہوئی ہے۔

مجھے حیرت ہے کہ عدالت نے مجھے عدلیہ  کے ادارے پر ’’بدنیتی کے ساتھ جان بوجھ کرگھٹیا قسم کا حملہ کرنے‘‘کا مجرم ٹھہرایاہے۔ مجھے افسوس ہے کہ عدالت اس طرح کے حملے کے میرے مقصد کا کوئی ثبوت فراہم کیے بغیر ہی اس نتیجے پر پہنچی ہے۔ مجھے اس سے مایوسی ہوئی کہ عدالت نے مجھے اس شکایت کی کاپی تک بھیجنا ضروری نہیں سمجھا جس کی بنیاد پر ازخود نوٹس جاری کیا گیا تھا اور نہ ہی میرے جوابی حلف نامے اور میرے کونسل کی گزارشات کے باوجود یہ بتایا گیا کہ مجھے اپنی کن حرکتوں کا جواب دینا چاہیے۔

میرے لیے یہ یقین کرنا مشکل ہے کہ عدالت نے میرے ٹوئٹ کو ’’ہندوستانی جمہوریت کے اس اہم ستون کی بنیاد کو غیر مستحکم کرنے والا پایا ہے‘‘۔ میں صرف اس بات کا اعادہ کرتا ہوں کہ وہ دونوں ٹویٹس میرے ذاتی خیالات و نظریات کی نمائندگی کرنے والے تھے،جن کا اظہار کسی بھی جمہوریت میں جائز ہونا چاہیے۔ در حقیقت خود عدلیہ کی صحت مند کارکردگی کے لیے عوامی جانچ پڑتال مطلوب ہے۔

میرا یہ ماننا ہے کہ آئین کی حفاظت کے لئے جمہوریت میں کسی بھی ادارے پر کھلی تنقید ضروری ہے۔ ہم اپنی تاریخ کے ایسے لمحے سے گزر رہے ہیں، جب اعلی اصولوں کی پیروی کو معمول کی ذمے داریوں پر ترجیح دینا چاہیے ، جب آئینی فریضے کی تکمیل لازمی طور پر ذاتی اور پیشہ ورانہ فرائض پر مقدم ہونی چاہیے، جب مستقبل کے بارے میں اپنی ذمے داری کو نبھاتے وقت حال کے بارے میں زیادہ نہیں سوچنا چاہیے۔

خاص طور پر مجھ جیسے عدلیہ سے وابستہ شخص کے لئے حق کے اظہار میں ناکام رہ جانا فرض شناسی کی کمی ہوگی۔ میرے ٹوئٹس ہماری جمہوریت کی تاریخ کے اس نازک موڑ پرمحض اپنا فریضہ ادا کرنے کی ایک چھوٹی سی کوشش کا نمونہ تھے۔ میں نے کسی نامناسب سوچ کے ساتھ ٹوئٹ نہیں کیا تھا ۔اپنے ان ٹویٹس کے لئے معافی مانگنا،جو میرے خیالات و نظریات کے نمایندہ تھےاور ہیں، میرے لئے بے غیرتی کی بات ہوگی اوریہ ایک توہین آمیزعمل ہوگا؛لہذا میں صرف عاجزی کے ساتھ وہی عرض کرسکتا ہوں جوباباے قوم  مہاتما گاندھی نے اپنے مقدمے میں کہا تھا:’’ میں معافی کی درخواست نہیں کروں گا۔ میں آپ سے کشادہ ظرفی کا مظاہرہ کرنے کی بھی اپیل نہیں کروں گا۔  میں یہاں خوشی سے اس سزا کوقبول کرنے کے لیے کھڑاہوا ہوں،جسے کورٹ نے کسی جرم کا مرتکب ہونے کی وجہ سے مجھ پر عائد کرنے کا فیصلہ کیا ہے اور جو مجھے اس ملک کا ایک شہری ہونے کے ناطے اپنی اعلی ترین ذمے داری بھی معلوم ہوتی ہے‘‘۔

(مکمل بیان کا انگریزی ٹیکسٹ یہاں دیکھا جاسکتا ہے: https://theleaflet.in/wp-content/uploads/2020/08/Statement-Prashant-Bhushan.pdf)

نئی دہلی 7 اگست (پریس ریلیز)مسلسل زہر افشانی کرکے اور جھوٹی خبریں چلاکر مسلمانوں کی شبیہ کوداغدار اور ہندوؤں اورمسلمانوں کے درمیان نفرت کی دیوارکھڑی کرنے کی دانستہ سازش کرنے والے ٹی وی چینلوں کے خلاف داخل کی گئی جمعیۃ علماء ہند کی عرضی پر آج سپریم کورٹ آف انڈیا میں سماعت عمل میں آئی جس کے دوان عدالت میں مرکزی حکومت نے حلف نامہ داخل کرتے ہوئے جمعیۃ علماء ہند کی عرضداشت کو خارج کیئے جانے کی درخواست کی اور کہا کہ میڈیا کو خبریں نشر کرنے کی آزادی ہے جبکہ نیوز براڈ کاسٹ ایسو سی ایشن نے بھی حلف نامہ داخل کرتے ہوئے عدالت کو بتایا کہ عرضی گذار کو سپریم کورٹ سے شکایت کرنے سے پہلے اس کے سامنے مبینہ فیک نیوز چینلز کی شکایت کرنا چاہئے تھی اور اگر وہ اس پر کارروائی نہیں کرتے تب انہیں عدالت کا دروازہ کھٹکھٹا نا چاہئے تھا۔
اسی درمیان پریس کونسل آف انڈیا کی جانب سے پیش ہوئے سینئر ایڈوکیٹ پرتیش کپور نے کہا کہ ہم نے پچاس ایسے معاملات کو نوٹس لیا اور اس کی جانچ ہورہی ہے اور جلد اس پر فیصلہ جاری کریں گے، ایڈوکیٹ بھیمانی نے بھی کہا کہ انہیں بھی فیک نیوز کی سو سے زائد شکایتیں موصول ہوئی ہیں اوروہ اس پر کارروائی کررہے ہیں جس پر جمعیۃ علماء ہند کی جانب سے بحث کرتے ہوئے سینئر ایڈوکیٹ دشینت دوے نے چیف جسٹس آف انڈیا اے ایس بوبڑے، جسٹس اے ایس بوپننا اور جسٹس رشی کیش رائے پر مشتمل تین رکنی بینچ کو بتایا کہ یہ لوگ کچھ نہیں کررہے ہیں، دو ماہ سے زائد کا عرصہ گذر گیا ہے ابھی تک انہوں نے ایک شکایت پر مثبت کارروائی نہیں کی، بس عدالت میں بیان دے رہے ہیں کہ جانچ جاری ہے اور عدالت کا وقت ضائع کررہے ہیں۔
ایڈوکیٹ دوے نے کہا کہ یہ تنظیمیں صرف ایڈوائزری تنظیمیں ہیں، یہ کوئی ایکشن نہیں لے سکتی ہیں، صرف حکومت ایکشن لے سکتی ہے لہذا عدالت کو چاہئے کہ حکومت کو حکم جاری کرے جس پر چیف جسٹس نے کہا کہ وہ ایکسپرٹ باڈی کی رائے طلب کررہے ہیں اورایکسپرٹ باڈی کی رائے آنے کے بعد کارروائی کی جائے گی۔دوران بحث ایڈوکیٹ دشینت دوے نے عدالت کو بتایا کہ اپریل ماہ میں وزیر اعظم ہند نریندر مودی نے خودکہا تھا کہ کرونا بیماری کو مذہبی رنگ نہ دیا جائے اس کے بعد بھی نیوز چینلز نے اسے مذہبی رنگ دیا جس پر چیف جسٹس نے کہا کہ ہمیں ایکسپرٹ باڈی کی ضرروت ہے جو اس کی جانچ کریگی جس پر ایڈوکیٹ دوے نے کہا کہ ہم ابتک دو ماہ ضائع کرچکے ہیں۔ چیف جسٹس نے کہا کہ وہ رپورٹ طلب کررہے ہیں جس پر ایڈوکیٹ دوے نے کہا کہ رپورٹ طلب کرنے کی ضرورت ہی نہیں ہے۔جمعیۃعلماء ہند کی جانب سے داخل کی گئی عر ضداشت جس میں سیکریٹری قانونی امداد کمیٹی گلزار اعظمی عرض گذار بنے ہیں پربحث کرتے ہوئے ایڈوکیٹ دشینت دوے نے عدالت کو بتایا کہ پریس کونسل آف انڈیا اور نیوز براڈ کاسٹرس ایسو سی ایشن صرف ان کے ممبران پر کارروائی کرسکتی ہے لیکن اس معاملے میں کئی ایک ایسے ادارے بھی ہیں جو ان کے ممبر نہیں لہذا ان پر کاررائی کون کریگا؟ اس لیئے حکومت اس معاملے میں فیک نیوز چینلز پر کارروائی کرے۔ایڈوکیٹ دشینت دے نے عدالت کو بتایا اس معاملے میں حکومت بھی کچھ نہیں کررہی ہے جس پر چیف جسٹس نے کہا کہ یہ ہمارا تجربہ ہے کہ جب تک ہم حکومت کو حکم نہیں دیتے حکومت کچھ نہیں کرتی، چیف جسٹس نے یونین آف انڈیا کی نمائندگی کرنے والے ایڈوکیٹ تشار مہتا سے کہا وہ ان کو تنقید کا نشانہ نہیں بنا رہے ہیں لیکن یہ حقیقت ہے کہ عدالت جب تک حکومت کو حکم نہیں دیتی کچھ نہیں کرتی۔اسی درمیان چیف جسٹس آف انڈیا نے نیوز براڈ کاسٹر ایسو سی ایشن کو نوٹس جاری کرتے ہوئے ان سے دریافت کیا کہ آیا یہ معاملہ ان کے پاس بھیجا جاسکتا ہے جس پر ایڈوکیٹ دوے نے کہا کہ عدالت کو اس معاملے پر خود فیصلہ کرنا ہوگا کیونکہ اس طرح سے صرف وقت ضائع ہورہا ہے جس پر عدالت نے ایڈوکیٹ دوے کو کہا کہ وہ ان کی عرضداشت پر سماعت دو ہفتہ کے لیئے ملتوی کررہے ہیں اور اس درمیان ایکسپرٹ باڈی اور دیگر اداروں کو ان کی رائے داخل کرنے کا حکم دیا۔دوران بحث ایڈوکیٹ دوے نے عدالت کو بتایا کہ صحافتی اصول کا تو یہ تقاضہ ہے کہ کوئی بھی خبر شائع یا نشرکرنے سے پہلے اس بات کی باضابطہ طورپر تصدیق کی جائے کہ آیا خبر میں جو کچھ کہا گیا ہے صحیح ہے یاغلط مگر میڈیا ایسانہیں کررہا ہے، انہوں نے کہا کہ ہماراقانون یہ بھی کہتاہے کہ اس طرح کی کوئی خبر شائع یا نشرنہیں کی جانی چاہئے جس سے کسی شخص یا فرقہ کی بدنامی یا دل آزاری ہویا جس سے لوگوں کے مذہبی جذبات مجروح ہوتے ہوں۔اس سے قبل گزشتہ سماعت کے موقع پر ایڈوکیٹ آن ریکارڈ اعجازمقبول نے عدالت کی توجہ ان دیڑھ سو چینلوں اور اخبارات کی جانب دلائی تھی جس میں انڈیا ٹی وی،زی نیوز، نیشن نیوز،ری پبلک بھارت،ری پبلک ٹی وی،شدرشن نیوز چینل اور بعض دوسرے چینلوں کی جانب دلائی تھی جنہوں نے صحافتی اصولوں کو تار تار کرتے ہوئے مسلمانوں کی دل آزاری اور قومی یکجہتی کو نقصان پہنچانے کی ناپاک سازش کی تھی۔
واضح رہے کہ جمعیۃ علمائے ہند کے صدر مولانا سید ارشد مدنی کا نظریہ رہا ہے کہ میڈیا کو ملک کی یکجہتی، سماجی آہنگی، بھائی چارہ، مذہبی رواداری اور ہندو مسلم کے درمیان منافرت پھیلانے کی اجازت نہیں دی جانی چاہئے۔ ملک کے میڈیا ایک طبقہ ہر واقعہ کو مذہبی رنگ دینے، ہندو مسلم کے اتحاد کو تار تار کرنے، مسلمانوں کو بدنام کرنے کی دانستہ کوشش کرتا رہا ہے۔ مارچ اور اپریل میں کے مہینے میں تبلیغی جماعت کے سلسلے میں میڈیا کا رویہ اس کی جیتی جاگتی مثال ہے۔میڈیا کا ایک طبقہ جان بوجھ کر کورونا کے بہانے مسلمانوں کو بدنام کرنے کی سازش کی اور مسلمانوں کے خلاف زہر اگلنے میں کوئی کسر باقی نہیں رکھا۔ اس لئے اگر بے لگام اور غیر ذمہ دار میڈیا پر شکنجہ نہیں کسا گیا تو یہ ملک کے لئے تباہ کن ہوگا۔

نئی دہلی: آل انڈیا مسلم پرسنل لا بورڈ کے جنرل سکریٹری حضرت مولانا محمد ولی رحمانی صاحب نے ایک پریس بیان میں کہا ہے کہ بابری مسجد ملکیت مقدمہ میں سینئر ایڈوکیٹ جناب ڈاکٹر راجیو دھون کی خدمات ناقابل فراموش اور لاثانی ہیں۔ انہوں نے جس اخلاص، جرأت و بیباکی، حوصلہ و استقامت اور ثابت قدمی کے ساتھ یہ مقدمہ لڑا، باوجودیکہ ایک طبقہ کی طرف سے ان کی شدید مخالفت کی گئی، انھیں شدید تنقید کا نشانہ بنایا گیا اور ان کے خلاف سوشل میڈیا پر اہانت آمیز مہم چلائی گئی لیکن وہ اپنے موقف پر ڈٹے رہے اورٹس سے مس نہیں ہوئے۔ مسلم پرسنل لا بورڈ، پوری ملت اسلامیہ ہندیہ اور ملک کے امن پسند اور انصاف پسند افراد ان کی ان خدمات جلیلہ کے لئے انتہائی ممنون و مشکور ہیں۔
جنرل سکریٹری بورڈ نے فرمایا کہ مسلم پرسنل لا بورڈ (جس نے بابری مسجد ملکیت مقدمہ کے 8 میں سے 7 مقدمات کی پیروی کی تھی) نے اپنی مجلس عاملہ میں یہ فیصلہ کیا ہے کہ وہ سپریم کورٹ کے اس فیصلے پر نظر ثانی ( Review Petition) کی درخواست داخل کرے گا۔ اس سلسلے کی تیاریاں مکمل ہوچکی ہیں اور انشاء اللہ 9 دسمبر سے قبل 4 فریقوں کی طرف سے یہ درخواستیں داخل کردی جائیں گی۔ حسب معمول یہ سب کام ڈاکٹر راجیو دھون کی سرپرستی و سرکردگی میں انجام پارہا ہے اور آگے بھی ان ہی کی سرپرستی میں انجام پائے گا۔ اور جناب ایڈوکیٹ یوسف حاتم مچھالا صاحب، جناب ایڈوکیٹ ظفریاب جیلانی صاحب، جناب ایڈوکیٹ ایم آر شمشاد صاحب، جناب ایڈوکیٹ شکیل احمد سید صاحب، جناب ایڈوکیٹ ارشاد احمد صاحب، جناب ایڈوکیٹ فضیل احمد ایوبی صاحب، جناب ایڈوکیٹ نظام پاشا صاحب، جناب ایڈوکیٹ طاہر حکیم صاحب اور قابل اعتماد وکلاء کی پوری ٹیم کے ساتھ ریویوپٹیشن (Review Petition) میں کام کررہی ہے اور کرے گی۔ مسلم پرسنل لا بورڈ ان تمام قانون دانوں کا مشکور ہے کہ انہوں نے اپنی لیاقت، محنت اور اخلاص کے ساتھ لانبے عرصہ تک بابری مسجد مقدمہ میں وقت دیا اور کام کرتے رہے اور ان شاء اللہ آئندہ بھی ان حضرات کی صلاحیتیں بابری مسجد کے سلسلہ میں کام آئیں گی۔