سوشل میڈیا

چند دنوں قبل برقی پیغام رسانی کے لیے سب سے زیادہ استعمال ہونے والے موبائل ایپ واٹس ایپ نے اپنی پرائیوسی پالیسی میں تبدیلی کا عندیہ دیا اور ساتھ ہی یہ بھی اعلان کردیا کہ جو صارف بھی اس تبدیل شدہ پالیسی سے اختلاف کرے گا،اس کا اکاؤنٹ 8/فروری کو ڈیلیٹ کردیا جائے گا۔یہ اعلان دنیا بھر میں واٹس ایپ استعمال کرنے والے کرڑوں صارفین کوموصول ہوا۔رپورٹس کے مطابق پہلے مرحلے میں یہ پیغامات ہندوستانی صارفین کو موصول ہوئے، جن میں زیادہ تفصیل تو نہیں بتائی گئی، مگر جب صارف اس پر کلک کرتا تو اس کے سامنے واضح پیغام نمودار ہوتا۔واٹس ایپ کی جانب سے جاری ہونے والے پیغام میں بتایا گیا کہ کمپنی کس طرح آپ کی ذاتی معلومات حاصل کر کے انھیں فیس بک کے لیے استعمال یا اسے فراہم کرے گی۔ مزید بتایا گیا کہ واٹس ایپ سروس استعمال کرتے ہوئے آپ کسی دوسرے بزنس کے ساتھ رابطے میں آتے ہیں، تو اس کی تمام معلومات کمپنی کے پاس پہنچ جاتی ہیں،جن کو فیس بک کی زیرملکیت دیگر ایپلی کیشنز سے شیئر کیا جاسکتا ہے۔واٹس ایپ کی جانب سے جاری نئی پالیسی کے مطابق ادارے کو اپنی مارکیٹنگ، سپورٹ، تبدیلیاں اور سروسز کو بہتر بنانے کے لیے صارفین کی معلومات درکار ہیں، جو نئی پالیسی کو قبول کیے بغیر حاصل نہیں کی جاسکتیں۔اس سلسلے میں کمپنی کے ترجمان کاکہنا تھا کہ ”واٹس ایپ اپنی سروسز کو بہتر کرنے کے لیے فیس بک اور دیگر تھرڈ پارٹی کمپنیوں کے ساتھ مل کر کام جاری رکھے ہوئے ہے، واٹس ایپ صارفین کی معلومات ان سے شیئر کی جاتی ہیں، اس اقدام کا مقصد صارفین کے مسائل کو حل کرنا ہے“۔
مگر اس اعلان کے بعد فوراً پوری دنیا میں بالعموم اور ہندوستان میں بالخصوص واٹس ایپ کے خلاف شدید ناراضی و بے اعتمادی پھیل گئی اور لوگ تیزی سے واٹس ایپ کے متبادل کی تلاش میں نکل پڑے۔رائٹرزنے اس حوالے سے ایک رپورٹ شائع کی کہ واٹس ایپ کو ابھی تک ہندوستان میں بڑے پیمانے پر اَن انسٹال نہیں کیا گیاہے؛ لیکن پرائیویسی کے بارے میں فکرمند صارفین حریف ایپس جیسے سگنل اور ٹیلی گرام کو تیزی سے ڈاؤن لوڈ کررہے ہیں۔ تحقیقاتی فرمز کا کہنا ہے کہ صارفین کی جانب سے ایسا کرنے سے ان ایپس کے ڈاؤن لوڈ چارٹس بڑھ رہے ہیں اور یہ ایپس بھارت میں پہلی مرتبہ ہر جگہ عام ہورہے ہیں۔ ہندوستان میں 40 کروڑ صارفین واٹس ایپ کا استعمال کرتے ہیں اور سب سے زیادہ شدید رد عمل یہیں دیکھا جارہا تھا،جس کی وجہ سے واٹس ایپ نے پچھلے ہفتے کم از کم 10 انگریزی اور ہندی اخبارات میں کروڑوں روپے لاگت کے اشتہاری پیغامات شائع کرائے اور اپنے صارفین کو یقین دہانی کروانے کی کوشش کی کہ ان کی ذاتی معلومات کے ساتھ چھیڑ چھاڑ نہیں کیا جائے گا اور یہ کہ کمپنی کے اعلان کو غلط سمجھا گیا ہے۔واٹس ایپ نے ایک اخبار میں کیے گئے اعلان میں کہا کہ آپ کی پرائیویسی کا احترام ہمارے ڈی این اے میں شامل ہے۔میسجنگ ایپ نے کہا کہ اس کی پرائیویسی پالیسی اپ ڈیٹ کسی بھی طریقے سے آپ کے دوستوں اور اہل خانہ کے ساتھ آپ کے پیغامات کی پرائیویسی کو متاثر نہیں کرتی۔واٹس ایپ نے یہ بھی کہا کہ پرائیویسی پالیسی کی تبدیلیاں صرف صارفین کے کاروباری تعلقات سے متعلق ہیں۔ اتناہی نہیں،واٹس ایپ نے کم ازکم دودن تک سٹیٹس کے ذریعے بھی تمام صارفین کو مطمئن کرنے کی کوشش کی اور وضاحت کرتا رہا کہ واٹس ایپ آپ کی ذاتی معلومات کسی سے شیئر نہیں کرتا ہے۔
واٹس ایپ کی سکیورٹی کے حوالے سے نئے خدشات کے بعد روسی میسنجر ٹیلی گرام کی صارفین کے تعداد عروج پر پہنچ گئی، ٹیلی گرام کے بانی نے اسے انسانی تاریخ کی سب سے بڑی ڈیجیٹل ہجرت قرار دیا۔روسی میڈیا کے مطابق روسی میسنجر ٹیلی گرام نے امریکہ،ہندوستان اور پاکستان سمیت دنیا بھر میں مقبولیت کے ریکارڈ توڑ دیے۔ٹیلی گرام کی جانب سے سوشل میڈیا پر کہا گیا کہ اس عالمی رجحان کے بعد دو صدور نے اپنے ٹیلی گرام چینلز شروع کیے، جس میں برازیل کے صدر جیر بولسنارو اور ترکی کے صدر رجب طیب اردگان شامل ہیں۔بانی کا کہنا ہے کہ فرانسیسی صدر ایمانویل میکرون اور یوکرین کے صدر ولادی میر زیلینسکی کے علاوہ اسرائیلی وزیر اعظم بینجمن نیتن یاہو سمیت متعدد دیگر عالمی رہنماؤں نے بھی ٹیلی گرام میسنجر میں اندراج کیا ہے۔انہوں نے کہا کہ ہمیں یہ اعزاز حاصل ہے کہ سیاسی رہنماؤں کے ساتھ ساتھ متعدد عوامی تنظیمیں غلط استعمال سے نمٹنے اور اپنے معاشروں میں اہم امور کے بارے میں آگاہی پھیلانے کے لیے ٹیلی گرام پر انحصار کر رہی ہیں۔ٹیلی گرام کے بانی نے زور دے کر کہا کہ میسنجر مبہم الگورتھم پر عمل نہیں کرتا جس سے یہ طے ہوتا ہے کہ صارف اپنی مرضی کا مواد ہی دیکھ سکیں گے۔اس سے قبل ڈوروف نے اعلان کیا تھا کہ ٹیلی گرام استعمال کرنے والوں کی تعداد 500 ملین سے تجاوز کر چکی ہے جبکہ صرف 3 دنوں میں 25 ملین افراد ٹیلی گرام کا استعمال شروع کرچکے ہیں۔کچھ لوگوں نے ترکی الاصل میسیجنگ ایپ بی آئی پی(BIP)کی طرف بھی ہجرت کی،خاص کر بنگلہ دیش اور انڈونیشیا وغیرہ میں زیادہ لوگ اس کی طرف منتقل ہوئے۔بہر کیف چند دنوں کے مسلسل ہنگاموں اور واٹس ایپ کی وضاحتوں کے بعد اب معاملہ کچھ ٹھنڈا ہوتا نظر آرہاہے،ویسے بات اگرواقعتاً پرائیویسی کے تحفظ کی کریں تو فی الحقیقت انٹرنیٹ استعمال کرنے والے کسی بھی شخص کی اب کوئی پرائیویسی نہیں رہ گئی؛کیوں کہ آپ کوئی بھی ایپلی کیشن انسٹال کرتے ہیں تو وہاں آپ کو اپنی ذاتی معلومات،درست فون نمبر یا ای میل آئی ڈی ہی سہی،ہر حال میں دینا ہوتی ہیں،اس کے بغیر آپ اسے انسٹال نہیں کرسکتے،استعمال نہیں کر سکتے؛بلکہ نیااسمارٹ فون لیتے ہی اسے ایکٹیو کرنے کے لیے سب سے پہلے انٹرنیٹ کے سہارے اس پر اپنا اکاؤنٹ بنانا ہوتاہے،تبھی آپ کا فون چلے گا،اس کے بغیر چل ہی نہیں سکتا اور ظاہر سی بات ہے کہ اکاؤنٹ بنانے کے لیے آپ کو ذاتی معلومات تو دینی ہی ہوں گی،پس اب پرائیویسی وغیرہ کا کوئی مطلب نہیں رہ گیا۔انٹرنیٹ،اینڈرائڈموبائل اور آئی فون کے عہد میں اگر پرائیویسی پچانی ہے،تو سرے سے ان چیزوں سے کنارہ کش رہنا ہوگا،ورنہ تو قدم قدم پر آپ کے ذہن میں اندیشے پنپتے رہیں گے۔ایک بہتر قدم وہ بھی ہوسکتا ہے،جس کی طرف 18/جنوری کو دہلی ہائی کورٹ نے اس تعلق سے دائر درخواست کی سماعت کرتے ہوئے رہنمائی کی ہے کہ اگر آپ کو واٹس ایپ کے تعلق سے اندیشے ہیں،تو اسے اپنے فون سے ڈیلیٹ کردیں؛ کیوں کہ اگر زیادہ گہرائی میں جائیں گے،تو کسی بھی سوشل پلیٹ فارم پر آپ کی پرائیویسی محفوظ نہیں ہے۔ پس کونسا ایپ استعمال کرنا ہے اور کونسانہیں،یہ آپ کی پسنداور متعلقہ ایپ کی خوبیوں،فیچرز پر منحصر ہے،اس کے لیے یہ دلیل غالباً بیکار ہی ہوگی کہ فلاں کمپنی ہماری ذاتی معلومات کی حفاظت کرے گی اور فلاں نہیں کرے گی۔

ثنا خان صاحبہ نے جب توبہ کی، دین کی طرف پلٹیں، ظاہر ہے ہر دیندار شخص نے اس سے خوشی محسوس کی، سوشل میڈیا پر متعدد اہل علم نے ان کو اس پر مبارکباد بھی دی. لیکن پھر جس طرح وہ چہرہ کھول کر میک اپ کر کے ویڈیوز بنا کر آیات وأحاديث پڑھنے لگیں دین پسند طبقے میں اسے انتہائی تشویش کی نظروں سے دیکھا گیا، پھر بھی لوگ خاموش رہے، البتہ وہ نوجوان جو سوشل میڈیا پر دینداری کا چولا پہن کر اپنی ہوسناک طبیعت کو تسکین پہنچاتے ہیں انہوں نے ثناء خان کے انسٹا اکاؤنٹ پر خوب لائک اور کمنٹ کیے اور خوب داد وتحسين سے نوازا، ایسا لگتا تھا کہ جیسے ثناء خان سے پہلے کبھی کسی نے دین کی بات کی ہی نہیں تھی ـ خیر ان سب کے بعد ثناء خان نے مفتی انس صاحب سے نکاح بھی کر لیا. ظاہر ہے اس فیصلے پر بھی کوئی عقلمند کیوں اعتراض کرے گا، لیکن حیرت اس پر ہوئی کہ مفتی صاحب نے اپنی نئی نویلی دلہن کے ساتھ الگ الگ پوز میں تصویریں کھنچائی، ویڈیوز بنوائے اور انہیں سوشل میڈیا پر نشر کیا ، کم از کم ایک مفتی اور ایک بالیوڈ سے توبہ کر لینے والی خاتون سے ایسی توقع نہیں تھی. خیر ہم نے پھر بھی ان سارے معاملات پر کوئی تبصرہ کرنا مناسب نہیں سمجھا کہ خود علماء کے طبقے میں بہت سارے لوگ اس قسم کی باتوں کو دوسرا رنگ دینے لگتے ہیں ـ
مگر آج ایک ویڈیو پھر منظر عام پر آیا ہے جس میں مفتی صاحب اور ان کی یہ تائب ہو چکی زوجۂ محترمہ ایک دوسرے کو آیت الکرسی پڑھ کر نظر بد سے دور کر رہے ہیں؟ یہ کیا ہو رہا ہے بھائی؟ یہ کون سا دین پیش کر رہے ہیں آپ لوگ؟ کیا آیت الکرسی کی فضیلت بیان کرنے کے لیے اب ایسے ہی اوچھے طریقے اپنائے جائیں گےـ
جناب مفتی انس صاحب اور محترمہ ثناء خان صاحبہ! میاں بیوی کے درمیان بیشک شدید محبت ہونی چاہیے، ہر اعتبار سے ایک دوسرے کی فکر ہونی چاہیے مگر یہ رشتہ، محبت اور تعلق نہایت نجی اور پرائیویٹ چیز ہے، ہمارے دین میں قطعاً اس کی گنجائش نہیں ہے کہ میاں بیوی یوں اپنی محبت وتعلق کی نمائش کرتے پھریں. دنیا بھر میں بہت سارے لوگ ضرور اس قسم کی سطحی کرتے ہیں مگر وہ اسلام کے نام پر نہیں کرتے، مگر آپ دونوں کی ان حرکتوں سے اسلام رسوا ہو رہا ہے، ایک مفتی اور عالم کی شبیہ داغدار ہو رہی ہے، توبہ اور دین کی طرف رجوع کا ایک غلط مفہوم اور پیغام نوجوانوں میں جا رہا ہےـ
اگر آپ دونوں واقعی اپنی ازدواجی زندگی شریعت کی روشنی میں گزارنا چاہتے ہیں تو اللہ کے واسطے یہ اوچھی حرکتیں بند کر دیں اور ایک دوسرے کے ویڈیو سوشل میڈیا پر نہ ڈالیں. ثنا صاحبہ! زائرہ وسیم کی مثال آپ کے سامنے موجود ہے، اللہ کی اس بندی نے جب سے انڈسٹری چھوڑنے کا اعلان کیا ہے اور توبہ کی ہے اس کے بعد اپنی کوئی تصویر یا ویڈیو سوشل میڈیا پر نہیں ڈالا ہے، آپ جس طرح ویڈیو بنا بنا کر دین کی باتیں کر رہی ہیں معاف کریں ہمارا دین اس کی اجازت نہیں دیتاـ
امید ہے آپ دونوں میری اس تلخ نوائی کو برداشت کریں گے اور اپنی اصلاح کریں گےـ

نئی دہلی:کچھ سوشل میڈیا پلیٹ فارمز پر نصف سے زیادہ خواتین کو آن لائن ہراساں یا بدسلوکی کا سامنا کرنا پڑتاہے۔ ایک نئے سروے میں یہ انکشاف ہوا ہے۔ یہ اعدادوشمار ہندوستان میں لڑکیوں کے حقوق اور مساوات کے لئے کام کرنے والی ایک غیر سرکاری تنظیم (این جی او) پلان انٹرنیشنل کے ذریعہ کئے گئے ایک سروے سے حاصل ہوا ہے۔ آن لائن زیادتی اور ہراساں کرنے کی وجہ سے لڑکیوں کو سوشل میڈیا چھوڑنے پر مجبور کیا جارہا ہے۔سوشل میڈیا پر کی جانے والی اس تحقیق میں کہا گیا ہے کہ 58 فیصد سے زیادہ لڑکیوں کو کسی نہ کسی طرح کی زیادتی کا سامنا کرنا پڑا ہے۔ پلان انٹرنیشنل نے اس سروے میں برازیل، ہندوستان، نائیجیریا، اسپین، تھائی لینڈ اور امریکہ سمیت 22 ممالک میں 15 سے 25 سال کی عمر میں 14000 لڑکیوں اور خواتین کو منتخب کیا۔سروے میں 58 فیصد سے زیادہ لڑکیوں کا خیال ہے کہ انہیں آن لائن بدسلوکی کا سامنا کرنا پڑتا ہے۔ سروے میں بتایا گیا ہے کہ پانچ میں سے ایک (19 فیصد) نوجوان لڑکی آن لائن ہراساں ہونے کی وجہ سے سوشل میڈیا کا استعمال روک یا کم کر دیتی ہے۔ سوشل میڈیا پر ہراساں ہونے کے بعد ہر 10 میں سے ایک (12 فیصد) نے سوشل میڈیا پر اظہار رائے کے انداز کو تبدیل کیاہے۔خواتین پر حملے کے واقعات سوشل میڈیا پر عام ہیں۔ حملے کے واقعات فیس بک پر سب سے زیادہ عام ہیں، جہاں 39 فیصد خواتین نے بتایا کہ انہیں ہراساں کیاگیا۔ دوسری طرف انسٹاگرام پر 23 فیصد خواتین، واٹس ایپ پر 14، اسنیپ چیٹ پر 10، ٹویٹر پر 9 اور ٹک ٹاک پر 6 فیصد خواتین کو بدسلوکی یا ہراساں کیے جانے کا سامنا کرنا پڑا ہے۔سروے کے مطا بق ہراساں کی جانے والی تقریبا نصف لڑکیوں کو جسمانی یا جنسی تشدد کا خطرہ تھا۔ ان میں سے بہت سی لڑکیوں نے بتایا کہ بدسلوکی نے انہیں ذہنی طور پر متاثر کیا اور ایک چوتھائی جسمانی طور پر غیر محفوظ محسوس ہوا۔ پلان انٹرنیشنل کے چیف ایگزیکٹو آفیسر (سی ای او) این برجٹ کے مطابق، سوشل میڈیا پر یہ ہراسانی جسمانی نہیں ہے، بلکہ اس سے خواتین کے اظہار رائے کی آزادی کو خطرہ لاحق ہے۔خاص بات یہ ہے کہ دنیا بھر کی لڑکیوں کی جانب سے فیس بک، انسٹاگرام، ٹک ٹاک اور ٹویٹر کو ایک کھلا خط لکھا گیا ہے، جس نے سوشل میڈیا کمپنیوں سے اپیل کی ہے کہ وہ زیادتی کی اطلاع دینے کے لئے زیادہ مؤثر طریقے اپنائیں۔

نئی دہلی:ٹیم انڈیا کے سابق کپتان مہندر سنگھ دھونی نے انٹرنیشنل کرکٹ کو الوداع کہہ دیا ہے۔ دھونی نے سوشل میڈیا کے ذریعے ریٹائرمنٹ کا اعلان کیا ہے۔ دھونی پہلے ہی ٹیسٹ کرکٹ کو الوداع کہہ چکے ہیں۔ انہوں نے ایک ویڈیو شیئر کی ، جس میں ان کے پسندیدہ گلوکار کشور کمار کا گایا ہوا گانا ‘مین پل دو پل کا شاعر ہوں.’۔بج رہا تھا۔ اس گانے سے دھونی نے بین الاقوامی کرکٹ کو الوداع کہا ہے۔ انہوں نے اپنا آخری بین الاقوامی میچ پچھلے سال جولائی میں کھیلا تھا۔ 2019 کے ورلڈ کپ کے سیمی فائنل میں بھارت کو نیوزی لینڈ کے خلاف شکست کا سامنا کرنا پڑا تھا اور یہی دھونی کا آخری بین الاقوامی میچ تھا۔ دھونی ٹیم انڈیا کے سب سے کامیاب کپتان رہے ہیں۔ وہ دنیا کے واحد کپتان ہیں، جس نے اپنی کپتانی میں ٹیم کو تین تین آئی سی سی ٹرافیز دی ہیں۔ دھونی کی کپتانی میں ہندوستان نے 2007 کا ٹی 20 ورلڈ کپ ، 2011 ورلڈ کپ اور 2013 میں چیمپئنز ٹرافی ٹائٹل اپنے نام کیا ہے۔ دھونی ریٹائرمنٹ کے بعد بھی انڈین پریمیر لیگ میں کھیلیں گے۔ دھونی چنئی سپر کنگز کے کپتان ہیں اور آئی پی ایل کے 13 ویں سیزن کے ٹریننگ کیمپ میں شرکت کے لئے چنئی پہنچ گئے ہیں۔