راشٹریہ جنتا دل

نئی دہلی: نیشنلسٹ کانگریس پارٹی کے سربراہ شرد پوار منگل کو غیر کانگریسی اپوزیشن جماعتوں کی میٹنگ کی میزبانی کریں گے۔ شردپوار نے اپوزیشن جماعتوں کی اس میٹنگ کو وزیر اعظم نریندر مودی اور بی جے پی کے خلاف متحد ہونے کے امکان کو تلاش کرنے کے لیے بلایاہے۔ کانگریس کومیٹنگ میں مدعو نہیں کیاگیاہے۔ ترنمول کانگریس کے رہنما یشونت سنہاراشٹرا منچ کے نمائندوں کے ساتھ ساتھ کچھ غیر کانگریس اپوزیشن جماعتوں کے رہنما کل شام چاربجے شرد پوار سے ملاقات کریں گے۔ راشٹریہ جنتا دل (آر جے ڈی) کے رہنما تیجسوی یادو کو بھی مدعو کیا گیا ہے لیکن پارٹی کے رکن پارلیمنٹ منوج جھا کل کل دہلی میں نہیں ہیں۔ اس میٹنگ کی تفصیلات اتوار کے روز انتخابی حکمت عملی نگار پرشانت کشور کے شرد پوار سے ملاقات کے بعد سامنے آئیں۔ پرشانت کشور نے پچھلے دو ہفتوں میں دوسری بار شرد پوار سے ملاقات کے بعد نریندر مودی کی بھارتیہ جنتا پارٹی کے خلاف اپوزیشن اتحاد کی بات چیت نے دو سال بعد ہونے والے عام انتخابات کے پیش نظر زور پکڑ لیا ہے۔ذرائع نے بتایا ہے کہ شرد پوار اور پرشانت کشور کے درمیان ملاقات دہلی میں ہوئی ۔ اس سے قبل گیارہ جون کو دونوں ممبئی میں این سی پی کے سربراہ کی رہائش گاہ پر ملے تھے۔ اتوار کی میٹنگ تقریباََآدھے گھنٹے تک جاری رہی ۔ لوک سبھا انتخابات کے پیش نظر کانگریس اور بی جے پی کے بغیر تیسرے محاذ اور وزیر اعظم مودی کو چیلنج کرنے کے لیے اپوزیشن کے مشترکہ وزیر اعظم کے امیدوار پر تبادلہ خیال کیا جاسکتا ہے۔ بہت سی جماعتوں نے ایسے گروپ میں شامل ہونے کی خواہش کا اظہار کیا ہے۔

پٹنہ:راشٹریہ جنتا دل نے بالآخر پہلے مرحلے کے انتخابات کے لیے 42 امیدواروں کی فہرست جاری کردی ہے۔ ووٹنگ کے پہلے مرحلے کے لیے کاغذات نامزدگی داخل کرنے کا آخری دن کل یعنی 8 اکتوبر ہے۔ راشٹریہ جنتا دل نے فہرست جاری کرنے سے پہلے ہی اپنے بہت سے امیدواروں کوسیمبل دے دیاہے۔پارٹی کے بہت سے امیدواروں نے بھی کاغذات نامزدگی جمع کروائے ہیں۔ جن امیدواروں نے پہلے مرحلے کے لیے اپنے کاغذات نامزدگی داخل نہیں کیے ہیں۔ انہیں کل تک فارم کوپْرکرنا ہے۔ آر جے ڈی نے جموئی سیٹ سے وجے پرکاش کو ٹکٹ دیا ہے۔ بی جے پی نے اس نشست سے سابق مرکزی وزیر دگ وجے سنگھ کی بیٹی شرییاسی سنگھ کو ٹکٹ دیا ہے۔اننت سنگھ کومکاماسے ٹکٹ ملا ہے۔ اننت سنگھ نے بھی کاغذات نامزدگی داخل کی ہے ۔پارٹی نے شیخ پورہ سے وجے سمراٹ کو ٹکٹ دیا ہے۔ وبھا دیوی آر جے ڈی کے ٹکٹ پر نوادہ سے الیکشن لڑ رہی ہیں۔آر جے ڈی نے پہلے مرحلے میں تین مسلم امیدواروں کو ٹکٹ دیا ہے۔ ان میں گووند پور سیٹ سے محمد کامران ، رفیع گنج سے محمد نہال الدین اوربانکاسیٹ سے ڈاکٹر جاوید انصاری شامل ہیں۔بتادیں کہ پہلے مرحلے کے 16 اضلاع کی 71 اسمبلی نشستوں پر ووٹ ڈالنے کے لیے کاغذات نامزدگی داخل کرنے کاعمل یکم اکتوبر سے شروع ہوگئی ہے۔ فارم بھرنے کی آخری تاریخ 8 اکتوبر ہے۔ امیدوار 12 اکتوبر تک اپنے نام واپس لے سکیں گے جبکہ پہلے مرحلے کے لیے 28 اکتوبرکوووٹ ڈالے جائیں گے۔

پٹنہ:بہار اسمبلی انتخابات سے پہلے بہوجن سماج پارٹی (بی ایس پی) کو اس وقت بڑاجھٹکا لگا جب اس کے ریاستی صدر بھرت بند نے ہفتہ کے روز راشٹریہ جنتا دل (آر جے ڈی) میں شمولیت اختیار کی۔ آر جے ڈی نے ٹویٹ کیاکہ بی ایس پی کے بہار پردیش کے صدر بھرت بند نے نیا بہار بنانے اور نوجوان مخالف بدعنوان نتیش حکومت کو ختم کرنے کے عزم کے ساتھ قائد حزب اختلاف تیجسوی یادو کی سربراہی میں آر جے ڈی میں شمولیت اختیار کی ہے۔ تیجسوی یادو نے بھرت بند کو آر جے ڈی کی رکنیت دلائی ۔ قابل ذکر بات یہ ہے کہ ریاست میں اسمبلی انتخابات کے لئے اوپیندر کشواہا کی راشٹریہ لوک سمتا پارٹی اور بی ایس پی کے مابین اتحاد ہوا ہے۔ اس اتحاد میں پیپلز پارٹی (سوشلسٹ) بھی شامل ہے۔

پٹنہ:بہار میں اہم پوزیشن پارٹی راشٹریہ جنتا دل کی سربراہی والے مہا گٹھ بندھن میں سیٹ شیئرنگ پر اتفاق رائے ہوگئی ہے ۔ ذرائع کے مطابق 243 رکنی اسمبلی کے لئے مہا گٹھ بندھن کی سب سے بڑی جماعت آر جے ڈی 143 نشستوں پر انتخاب لڑے گی، جبکہ کانگریس 70 نشستوں پر امیدوار کھڑا کرے گی۔ ذرائع کے مطابق بائیں بازو کی جماعتوں کو 28 سے 30 نشستیں ملی ہیں۔سیٹ شیئرنگ سے متعلق یہ معاہدہ پہلے مرحلے کی نامزدگی کے دوسرے دن ہوا ، حالانکہ اس کا باضابطہ اعلان نہیں کیا گیا ہے۔ ریاست میں پولنگ کا پہلا مرحلہ 28 اکتوبر کو 71 نشستوں پر ہونا ہے۔ دوسرے اور تیسرے مرحلے کے انتخابات 3 اور 7 نومبر کو ہونے ہیں۔ ووٹوں کی گنتی 10 نومبر کو ہوگی۔ پہلے مرحلے کے لئے نامزدگی جمعرات (یکم اکتوبر) سے شروع ہوگئی ہے۔ یہ 8 اکتوبر تک جاری رہے گی ۔