رئیس صدیقی

ابھی آدھی سے زیادہ رات گزری تھی کہ نہ جانے کیوں اور کیسے میری آنکھ کھل گئی۔
میں نے بہت کوشش کی کہ سو جائوں، مگر نیند تھی کہ کسی طرح آنے کو راضی نہ تھی۔
میں نے لائٹ آن کی اور گھڑی دیکھی تو وہ صبح کے چار بجا رہی تھی۔ اچانک لیٹے لیٹے میں اُٹھ بیٹھا اور نئی نئی شرارتیں ذہن میں جنم لینے لگیں۔ بہت غور و فکر کے بعد میں نے یہ طے کیا کہ آج کچھ شرارتیں کرنی چاہیے کیوں کہ آ ج تو اسی کا دن ہے۔ بس پھر کیا تھا۔
’’چور چور … چور‘‘ چلّاتے ہوئے میں اپنی امی کے پلنگ پر منہ کے بل دھڑام سے گِر پڑا۔ آواز اتنی تیز تھی کہ ان کے ساتھ ساتھ ۔۔۔ سبھی بہن بھائی بھی جاگ اٹھے اور ایک دوسرے کا منہ تکنے لگے۔ چونکہ گھر پر والد صاحب نہیں تھے اس لئے ذرا امی بھی ڈریں اور فوراً سبھی کمروں کی لائٹ روشن کی اور پھر میرے کمرہ کا جائزہ لیا۔ میرے کمرہ میں چور تو چور ایک چوہا بھی نظر نہ آیا۔
کہا ں ہے چور ؟۔ جو چور چور چلّا رہے ہو!۔ امی بڑ بڑائیں۔
وہ سوالات پہ سوالات کئے جارہی تھیں اور میں بالکل خاموش اور گُم سُم بیٹھا ہوا تھا۔
اس طرح چند لمحے گزر گئے۔ اچانک میں نے ایک زور دار قہقہہ لگایا۔ اب تو سب لوگ اور ڈر گئے۔
کیا بات ہے رئیس ؟۔ ا می نے مجھے جھنجھوڑا۔
ارے واہ بھئی واہ ۔۔۔ آپ لوگ اس قدر ڈرپوک ہیں! میں نے تعجب ظاہر کرتے ہوئے کہا۔
بھیا ڈرنے کی تو بات ہے۔ میری چھوٹی بہن ناہید بولی۔
ارے پگلی آج فرسٹ اپریل ہے۔ میں نے اپنی معلومات کا اظہار کیا۔
اچھا تو آج آپ نے فرسٹ اپریل کا فائدہ اٹھاتے ہوئے ہم سب کو فول (بیوقوف) بنایا ہے۔میری بہن فردوس بولی۔
جی ہاں ، بہت دیر کے بعد آپ سمجھیں۔
یہ کہتے ہوئے میں اپنے کمرے کی طرف لپکا تاکہ میںامی کی خاطر تواضع سے محفوظ رہ سکوں۔
ابھی صبح دس بجے تھے کہ میں نے اپنی شرارتوں کا نشانہ بنانے کے لئے چند دوستوں کو منتخب کیا۔ میں نے اپنے دوست عاصم کے
ذریعہ اپنے محلے کے ہوٹل کے مالک قمر بھائی کو یہ اطلاع دی کہ ممبئی سے ٹرنک کال آیا ہے ۔جلدی آجائو۔
قمربھائی اپنی سبزی پوری وغیرہ چھوڑ کر میرے پاس بھاگے ہوئے آئے۔
قمر بھائی وقت ختم ہورہا تھا اس لئے آپ کے بھائی صاحب نے آپ کے نام ایک پیغام لکھوانے کے بعد فون رکھدیا۔
میں نے ایک کاغذ قمربھائی کی طرف بڑھاتے ہوئے کہا۔
انھوں نے جلدی سے پرچہ کھولا۔ ایں فرسٹ ۔۔ اپریل ۔۔۔ فول! انھوں نے پڑھتے ہوئے میری طرف دیکھا۔
قمر بھائی ، گستاخی معاف۔ آج پہلی ا پریل ہے۔ میں نے مسکراتے ہوئے کہا۔
پھر میں نے سوچا کہ بھئی کیوں نہ آج کسی رشتہ دار کو فول بنایا جائے۔ چنانچہ میں دوڑا دوڑا اپنی ممانی کے یہاں پہنچا۔ممانی! ممانی! میری امی کی طبیعت بہت خراب ہے ۔جلدی چلئے۔ آپ کو بلایا ہے۔
گھبراہٹ اور پریشانی کی ایکٹنگ کرتے ہوئے میں نے کہا۔
ممانی ہائے اللہ کرتے ہوئے پان و ڈلی وغیرہ کا بٹوہ سنبھالنے لگیں۔ میں موقع پاکر اسی بیچ امی کے پاس آیا اور ہانپتے ہوئے بولا۔
امی ۔ امی ۔ممانی کو دورہ پڑگیاہے ۔ جلدی چلئے۔ ماموں ڈاکٹر کو بلانے گئے ہیں۔
ارے! ۔۔ اچھا جلدی سے رکشہ بلائو۔ امی نے حکم دیا۔
میں جلدی سے رکشہ لے کر آیا۔ ابھی ہم رکشہ پر بیٹھ ہی رہے تھے کہ ممانی کا رکشہ آگیا۔ دونوں ایک دوسرے کا حیرت سے منہ تک رہے تھے اور میں ’’اپریل فول‘‘ بنایا کہہ کر بھاگ نکلا۔
پھر میں سامنے ٹیلر ماسٹر صاحب کے پاس گیا اور بولا۔
رشیدبھائی نے آپ کو یاد فرمایا ہے۔ شیروانی کی ناپ لینی ہے۔
ماسٹر صاحب نے اپناسامان سنبھالا اور رشید بھائی کے پاس آگئے۔ رشید بھائی کسی حساب کتاب میں مصروف تھے۔
بھئی جلدی کرو، ہمیں ایک اہم کام سے جانا ہے۔چونکہ دونوں گہرے دوست ہیں، اس لئے وہ بلا تکلف بولے۔
کیا مطلب ماسٹر صاحب؟ رشید بھائی ذرا فکر مند ہوئے۔
بھئی شیروانی کی ناپ دوگے یا نہیں؟۔ تم نے مجھے رئیس کے ذریعہ ا رجینٹ بلوایا ہے۔ ماسٹر صاحب بیزار ہوتے ہوئے بولے۔
رشید بھائی نے میری طرف دیکھا۔ میں ہنسی نہ روک سکا۔ رشید بھائی سمجھ گئے۔
بھائی جائیے… آج فرسٹ اپریل ہے۔ رئیس نے آپ کو فول بنایا ہے۔
ماسٹر صاحب کھسیاگئے مگر بے چارے اپنی جھینپ مٹانے کے لئے قہقہہ لگانے لگے۔
قریب چاربج رہے ہوں گے۔ میں نے فیصلہ کیا کہ اب کسی کو فول نہ بنایا جائے… آج لوگ بہت فول بن چکے۔ چنانچہ میں پڑھنے بیٹھ گیا۔
کچھ دیر کے بعد دروازے کی گھنٹی بجی ۔میں باہر آیا تو شکیل کو کھڑا پایا۔
ارے بھئی خیرت تو ہے؟ کہو ،کیسے آنا ہوا؟ میں نے پوچھا۔
رشید بھائی نے پرویز بھائی کانپور والوں کا فون نمبر پوچھا ہے ۔ اس پرچہ پر لکھ دو ۔
شکیل نے کاغذ بڑھاتے ہوئے کہا۔
میں نے پرچہ لیا اور اس کو کھولتے ہوئے اپنے کمرے کی طرف بڑھا۔
’’تمہارا چچا …!‘‘
اچھا تو میاں شکیل نے مجھے اپریل فول بنایا ہے۔ صبح سے میں لوگوں کو فول بنا رہا تھا اور یہ میاں مجھ کو بنا گئے۔ خیر کوئی بات نہیں ۔۔۔ میرا نام بھی رئیس ہے۔
یہ سوچتے ہوئے میں باہر آیا تاکہ کسی طرح سے شکیل کو بھی اپریل فو ل بنا سکوں ۔مگر شکیل وہاں سے جاچکا تھا۔
تمام ہوشیاری کے با وجود، اس طرح بیوقوف بننا مجھے بہت کھلا لیکن اسی وقت میرے اندر یہ احساس جاگا کہ میں بھی تو آج صبح سے لوگوں کو اپریل فول بنا رہا تھا ۔ انکا بھی دل اسی طرح د ُکھا ہوگا۔ وہ بھی اسی طرح شرمندہ ہوئے ہونگے۔
پس اسی وقت میں نے یہ عہد کیا کہ اب کبھی بھی، کسی کو بھی اپریل فول نہیں بنائونگا ٰ !

( کہانی کار ڈی ڈی ارد و و آل انڈیا ریڈیوکے سابق آئی بی ایس افسر ، ساہتیہ اکادمی قومی ایوارڈ و دلی اردو اکا دمی ایوارڈ سے سرفراز پندرہ کتابوں کے مصنف، مولف، مترجم،افسانہ نگار ، شاعرو ادیبِ اطفال ہیں)
Email:[email protected]
Mob: 9810141528

’’بچوں کا ادب لکھنا ،بڑوں کے لئے ادب لکھنے سے کہیں زیادہ مشکل ہے اور اس سے
زیادہ مشکل ہے بڑے ادیبوں کی پر خلوص توجہ!‘
یہ رائے رئیس صدیقی صاحب کی ہے جو کافی حد تک درست بھی ہے،لیکن خود موصوف اس مشکل اور دشوار کن مرحلہ سے بہت ہی کامیابی کے ساتھ گزر گئے ہیں۔کیونکہ ان کی کہانیوں کو پڑھ کر محسوس ہوتا ہے کہ یہ کہانیاں ہر لحاظ سے کامیاب کہانیاںہیں۔جہاں اس میں بچوں کی ذہنی کیفیت کا خیال رکھاگیاہے، وہیں ان کی نفسیات کو بھی مد نظر رکھا گیا ہے۔اور رہی بڑے ادیبوں کی بات توان کی کتاب پر آراء کو پڑھ کر اندازہ ہوتا ہے کہ یہ کہانیاں زیادہ تر بڑ ے ادیبوں کی توجہ کا مرکز رہی ہیں۔ان کے فن کو مخمورسعیدی،مظفر حنفی،پروفیسر محمدشاہدحسین ، ڈاکٹر تنویر احمد علوی،ڈاکٹر معصوم شرقی، رئیس الدین رئیس،اقبال انصاری،سہیل انجم، ڈاکٹر منور حسن کمال، ڈاکٹر ظفر مرادآبادی، ڈاکٹر شمع افروز زیدی اورسمیرالحق جیسے اہل فکرونظر نے سراہا ہے،فن پر بھرپور بات کی ہے اور فن کی باریکیوںپرمختلف اندازمیںروشنی ڈالی ہے۔
رئیس صدیقی کو بچوں کے ادب پر قدرت حاصل ہے۔ اس کا اندازہ اس بات سے لگایا جا سکتا ہے کہ اب تک بچوں کے لیے انکی پندرہ کتابیں شائع ہو کر مقبول خاص وعام ہو چکی ہیں۔
ان میں سے بچوں کی کہانیوں کے تین مجموعے ’’شیروں کی رانی‘‘،’’ننھابہادر‘‘اور’’شیرازی کی کہانیاں‘‘کو بہت پسند کیا گیا۔’’باتونی لڑکی‘‘بچوں کی کہانیوں کا چھوتھامجموعہ ہے جسے نئی دہلی کے قومی ادبی ادارہ، ساہتیہ اکادمی نے اپنے باوقار اعزاز ، ساہتیہ اکادمی کے بال ساہیتہ پرسکار ۲۰۱۸ سے سرفراز کیا ہے۔ باتونی لڑکی رئیس صدیقی کی چوبیس کہانیاں اور ایک درامہ پر مشتمل مجموعہ ہے۔
ٍ ۲۰۱۸ میں دیگر زبانوں کے اعزاز یافتہ بچوں کے ادیبوں کی عمر پر نظر ڈالی تو ایک اہم بات میری معلومات میں اضافہ کرتی ہے کہ کنّڑ زبان کے ادیب کی عمر ۸۸ برس، گجراتی ادیب کی عمر ۸۰برس، کشمیری ادیب کی عمر۷۵ برس، ہندی ادیب کی عمر ۷۲ برس ہے۔ رئیس صدیقی خوش نصیب ہیں کہ انہیں اتنی لمبی عمر کا انتظار نہیں کرنا پڑا۔گویاکہ یہ اعزاز زندگی میں ایک بار ، لائف ٹائم اچیومینٹ ایوارڈ کے مماثل ہے۔
بہر کیف ،رئیس صدیقی کی خوبی یہ ہے کہ انہوںنے چھوٹے چھوٹے واقعات کو بڑے دلچسپ اندازمیںکہانی کے پیرائے میں بیان کیا ہے اور ہرکہانی میں بچوں کو ترغیب دینے کی بھرپور کوشش کی ۔ ’سزا‘،’ضمیر‘اور’تلاش‘تینوں کہانیاں ایسی ہیں،جس میں اصلاح کا پہلو پوشیدہ ہے۔’سزا‘کہانی میں جہاں مصنف نے ایک ایسے شخص کو کہانی کا محور بنایاہے،جس کے پاس بے شمار دولت تھی لیکن اس کے دل میں رحم وکرم کا جذبہ بالکل نہیں تھااوروہ گھمنڈ میںچور ہوکر غریب ومفلس کو کچلنے لگاتھامگر وقت ایک ایسا کروٹ لیتا ہے کہ وہ شخص امیر سے غریب بن جاتا ہے۔اس کہانی کے ذریعہ مصنف نے یہ بات ذہن نشین کرانے کی کوشش کی ہے کہ انسان کا وقت ہمیشہ ایک جیسا نہیں رہتا۔’ضمیر‘کہانی میںبرائی کا بدلا اچھائی سے دینے کی ترغیب دی گئی ہے اور’تلاش ‘کہانی میں بچوں کی صحیح تربیت پر زور دیا گیا ہے۔ ـ اپریل فول‘ایک دلچسپ کہانی ہے ۔کہانی کی ابتداء میںتو محسوس ہوتاہے کہ یہ ایک اصلاحی کہانی ہے لیکن یہ ایک دلچسپ موڑپر ختم ہو جاتی ہے۔اسی طرح’شاہین‘کہانی میںبچوں کے بلند حوصلے کو کہانی کے پیرائے میںبیان کیا گیا ہے۔ساتھ ہی جانوروں کی نفسیات سے بھی واقف کرایا گیاہے۔’اب‘کہانی میں وقت کی اہمیت کی طرف اشارہ کیا گیاہے۔’باتونی لڑکی‘او’ر شرط‘میں جہاںبچوں کی دلچسپی کا بھرپور موادموجود ہے وہیں’،ٹکٹ ٹکٹ ٹکٹ؟‘کہانی دلچسپ ہونے کے ساتھ ساتھ سبق آموز بھی ہے۔’انسانیت کے مسکراتے پھول‘ایک مثالی کہانی ہے،جس میں انسانیت کے جذبہ کو بڑے مؤثر اندازمیں بیان کیا گیا ہے۔’ٹھوکر‘،’ معصوم آرزو‘او’رغریب مہمان‘بھی اسی نوعیت کی کہانیاں ہیں جس میں مصنف نے بچوں کوکوئی نہ کوئی پیغا م دینے کی کامیاب کوشش کی ہے۔’ریشمی جنگ‘ایک معلوماتی کہانی ہے جس میں انگلینڈ کی ریشمی جنگ سے روشناس کرایا گیا ہے ۔علاوہ ازیں ’’خان خاناں اور ان کی سخاوتیں‘‘باب کے تحت جہاں عبدالرحیم خان خاناںکا تعارف پیش کیاگیاہے ،وہیں ان کی سخاوتوں کو آسان الفاظ میںکہانی کے قالب میں ڈھال کر بیان کیا گیاہے۔’اس کے علاوہ مولانا روم اوران کی کہانیاں‘میں مولانا روم کی حکایات کا ذکر کیا گیاہے۔
اس مجموعے میں شامل زیادہ تر کہانیاں بہت اہم ہیں۔ان میں بچوں کی نفسیات،ان کا حوصلہ،معصومیت سب چیزوں کا خیال رکھا گیا ہے۔ان کہانیوں کی سب سے بڑی خوبی یہ ہے کہ ان میں نصیحت بھی ہے اورسیکھ بھی لیکن لہجہ کہیںبھی ناصحانہ نہیںہونے پایا ہے۔اسلوب بالکل سادہ ہے ۔چھوٹے چھوٹے جملوں کا استعمال کیا گیا ہے۔تلاش وتجسس بچوں کی فطرت کا اہم حصہ ہے جسے وہ دلچسپ انداز میں پڑھنا اور سننا پسند کرتے ہیں۔رئیس صدیقی کی کہانیوں میں یہ خوبی بدرجہ اتم موجود ہے۔
مجموعی طور پر،۲۵ کہانیوں پر مشتمل یہ کتاب ’ باتونی لڑکی‘بچوں کے لیے بہت اہم ثابت ہوگی جس سے بچے نہ صرف محظوظ ہوںگے بلکہ ترغیب و تحریک بھی حاصل کریںگے۔ ساہیتہ اکادمی نے اردو ادب اطفال کے تحت ، باتونی لڑکی کو ۲۰۱۸کا بال ساہتیہ پرسکار دیکر حق بہ حقدار رسد کے مصداق قابل ستائش فیصلہ کیا ہے ۔

ازبس کہ میری ادبی زندگی کا آغاز ہی بچوں کے لئے لکھنے سے ہوا ہے، بڑوں کے لئے تخلیقی، تنقیدی اور تحقیقی کام تو میں نے بعد میں انجام دیئے اور اس کڑوی سچائی کا سامنا ہوا کہ عصر حاضر میں ہر چند کہ تخلیق کار عموماً تنقید کی ناانصافیوں، جانبداریوں اور بالا دستیوں کا شکار ہے،مگر بلا شبہ نقادوں کی بے اعتنائی نے سب سے زیادہ ضرر بچوں کے ادیبوں اور شاعروں کو پہنچایا ہے!
فی زمانہ اردو جس کساد بازاری سے نبرد آزما ہے۔ اس کے نتیجے میں کتابیں اور رسالے خریدنے کی روایت اردو والوں میں بے حد ضعیف ہو گئی ہے۔ درسی کتب ہی اردو پڑھنے والے بچوں کو بہ مشکل دستیاب ہوتی ہیں تو بے چارے ادبی کتابیں کہاں سے خریدیںگے۔ایسے میں ادب اطفال سے متعلق فنکاروں کو مالی فوائد کی توقع ہی نہیں ہوتی۔ لے دے کر ان کے کام کا معاوضہ، شہرت اور تنقیدی اعتراف کے ذریعے ہی ممکن ہے لیکن ان کا احوال سطور بالا میں عرض کر چکا ہوں۔ نقادوں کو میرؔ، غالبؔ اور اقبالؔ سے فرصت ملے تو دوسری جہتوں پر نظر کریں۔
اس تناظر میں، مجھے رئیس صدیقی کی کتاب ’’جان پہچان‘‘ واقعی اچھی لگی۔ یہ ایک اہم کام ہے جو اکیس ایسے ادیبوں اور شاعروں کے انٹرویوز پر مشتمل ہے جنہوںنے اپنی عمر عزیز بچوں کے لئے کہانیاں، نظمیں، ڈرامے وغیرہ تخلیق کرنے میں کھپا دی ہے اور ان میں چند کو چھوڑکر بقیہ سبھی وہ قلم کار ہیں جن کا میدان عمل تا عمر اردوادب اطفال ہی رہا ہے۔
رئیس صدیقی چونکہ خود بھی بچوں کے لئے لکھتے رہتے ہیں، اس لئے ان کی گفتگو بڑی مسبوط، مربوط اور بچوں کے ادب کے مختلف ابعاد پر مرتکز نظر آتی ہے اور اس کے ساتھ وہ متعلقہ ادیب اور شاعر کے سوانحی کوائف نیز تخلیقی و انفرادی تجربات کو بھی کرید کرید کر روشنی میں لائے ہیں۔ جان پہچان میں شامل انٹرویوزکے سلسلہ میں چند اہم ناموں کا ذکر ضرور کرونگا ۔ شفیع الدین نیر ، اظہر افسر، احمد جمال پاشا ، مظہرالحق علوی ، عدیل عباسی ،جامی چڑیاکوٹی، مفتوں کوٹوی اور قیصر سرمست وغیرہ۔
مجھے یقین ہے کہ اردو کے ادبی حلقوں میں دلی اردو اکادمی کی مدد سے شایع، ۲۱ ادیبوں اور شاعروں کے انٹرویوز پر مبنی ۱۲۸ صفحات پر مشتمل یہ کتاب ، جان پہچان اور رئیس صدیقی کے اس کام کی قدر کی جائے گی کیونکہ یہ کتاب دستاویزی حیثیت کی حامل ہے۔