توہینِ رسالت

بنگلور میں گزشتہ ہفتہ اہانت رسول ؐ کے واقعہ نے سوشل میڈیا کی افادیت پر کئی سنگین سوال کھڑے کر دئیے ہیں۔اس شرمناک واقعہ سے یہ ثابت ہوتا ہے کہ کوئی شرپسند کہیں بھی کوئی قابل اعتراض پوسٹ ڈال کر کسی شہر کے امن و امان کو غارت کرسکتا ہے۔یہ بات سبھی جانتے ہیں کہ اظہارخیال کی آزادی کے نام پر مسلمانوں کے دینی عقائد کو نشانہ بنانے کا چلن کوئی نیا نہیں ہے، لیکن جب سے شرپسندوں کو سوشل میڈیا کا پلیٹ فارم ہاتھ آیا ہے، وہ مسلمانوں کے خلاف اس کا بے دریغ استعمال کررہے ہیں۔آئے دن ایسے واقعات پیش آتے رہتے ہیں جن میں مسلمانوں کو مشتعل کرنے والی پوسٹیں ڈالی جاتی ہیں اور ان کے صبر وضبط کا امتحان لیا جاتا ہے۔اس قسم کے واقعات کے بڑھنے کا سبب یہ ہے کہ نہ تو سوشل میڈیا پر کسی کا کنٹرول ہے اور نہ ہی نظم ونسق قایم کرنے والی مشینری ان انتہائی سنگین معاملات کو سنجیدگی سے لیتی ہے۔سب سے زیادہ حیرت کی بات یہ ہے کہ اب تک توہین رسالت ؐکے شرمناک واقعات کو روکنے کے لئے کوئی قانون بھی وضع نہیں کیا گیاہے۔ یہی وجہ ہے کہ سوشل میڈیا پر اس قسم کے واقعات میں بے تحاشا اضافہ ہورہا ہے اور مسلمانوں کے ازلی دشمن اس کو ایک ہتھیار کے طور پر استعمال کررہے ہیں۔
یہ بات سبھی کو معلوم ہے کہ مسلمان اپنے پیارے نبیؐ سے بے پناہ عقیدت رکھتے ہیں اور وہ ناموس رسالت ؐپر اپنی قیمتی جانوں کا نذرانہ پیش کرنے سے بھی گریز نہیں کرتے۔لیکن یہ بھی ایک حقیقت ہے کہ اپنے آپ کو جان بوجھ کر ہلاکت میں ڈالنا اسلامی تعلیمات کے مطابق کسی بھی طور جائزنہیں ہے۔ اسلامی تعلیمات اس کی مخالفت کرتی ہیں۔ یہ ایسا حساس موضوع ہے جس پر مسلمان اپنے جذبات کو قابو میں نہیں رکھ پاتے اور وہ توہین رسالت ؐ کے کسی بھی واقعہ کے خلاف سراپا احتجاج بن کربے تحاشا سڑکوں پر نکل آتے ہیں، خواہ انجام کچھ بھی ہو۔ گزشتہ منگل کی رات کو بنگلور میں بھی یہی ہوا۔ایک قابل اعتراض فیس بک پوسٹ کے بعد تین مسلم نوجوانوں نے توہین رسالت ؐ کے خلاف احتجاج کرتے ہوئے اپنی قیمتی جانیں قربان کردیں۔کہا جاتا ہے کہ اگر بنگلورپولیس اس معاملے میں فوری کارروائی کرتی تو حالات اس درجہ خراب نہیں ہوتے اور نہ ہی تباہی وبربادی کے دل خراش مناظر دیکھنے کو ملتے۔یہ حقیقت ہے کہ پولیس نے اس معاملہ کی حساسیت کو سمجھنے میں بھول کی اور شکایت کنندگان پر عام تنازعات کی طرح آپسی سمجھوتہ کرنے کا دباؤ ڈالا۔جس سے نوجوانوں میں پہلے سے موجود اشتعال نے نئی کروٹ لی۔ توڑپھوڑ، آتش زنی اور لوٹ مار کا ایسا بازار گرم ہوا کہ بنگلور کے دوعلاقے میدان جنگ کا منظر پیش کرنے لگے۔ظاہر ہے کسی بھی معاملے میں قانون کو ہاتھ میں لینے یا تشدد میں شامل ہونے کی کسی بھی طور حمایت نہیں کی جاسکتی۔ مسلمانوں کو اس بات کا احساس ضرور ہونا چاہئے کہ حالات ان کے موافق نہیں ہیں اور اسلام دشمن طاقتیں تاک میں بیٹھی ہیں کہ وہ ذراسی بات کا بتنگڑ بناکر انھیں نرم چارہ سمجھ کر چباجائیں۔ ضرورت اس بات کی ہے کہ مسلمانوں کو کسی بھی حالت میں صبر وتحمل اور برداشت کا دامن نہیں چھوڑنا چاہیے۔ جس پیارے نبی ؐ کی محبت سے ہم سرشار ہیں، ان کی تعلیمات بھی یہی ہیں۔ انھوں نے نہ صرف اپنے دشمنوں کومعاف کردیا بلکہ دنیا کے سامنے صلہ رحمی اور درگزر کی ایسی مثالیں پیش کی ہیں جن کی دنیا میں کوئی نظیر نہیں ملتی۔ایسے میں اگر ہم اپنے پیارے نبیؐ کی خاطرتشدد میں شامل ہوتے ہیں یا پھر قانون کو اپنے ہاتھ میں لیتے ہیں تویہ سراسر رسول اکرم ؐ کی اعلیٰ تعلیمات کے خلاف ہے اور ہمیں اس سے ہر ممکن گریز کرنا چاہیے۔
بنگلور کے ان مسلم نوجوانوں کی سوجھ بوجھ اور دور اندیشی کی داد دی جانی چاہئے جنھوں نے تشدد، افراتفری اور اشتعال کے خطرناک ماحول میں بھی اپنے جذبات پر قابو رکھا اور اپنی جان پر کھیل کر ایک مقامی مندر کی حفاظت کی۔ اگر خدا نخواستہ مندر کو کوئی نقصان پہنچتا تو یہ واقعہ بدترین فرقہ وارانہ تشدد کا سبب بن سکتا تھا۔سمجھدار اور باشعور نوجوانوں کی کوشش دراصل اس پورے معاملہ کو فرقہ وارانہ رنگ دینے سے بچانے کی تھی جس میں انھیں کامیابی ملی۔
بنگلور معاملے کی جو تفصیلات سامنے آئی ہیں، ان کے مطابق کانگریس کے ممبر اسمبلی اکھنڈ نواس مورتی کے بھتیجے نوین نے فیس بک پر ایک ایسی پوسٹ لکھی جس میں اہانت اسولؐ کا ارتکاب کیا گیا تھا۔یہ پوسٹ ایک گھنٹے کے اندر پورے شہر میں پھیل گئی اور مسلمان اپنے زخمی جذبات کو لے کر سڑکوں پر نکل آئے۔ موقع غنیمت جان کر کچھ سماج دشمن عناصر بھی ان میں شامل ہوگئے اوراس مشتعل ہجوم نے سڑکوں پر افراتفری مچادی۔ سینکڑوں موٹر گاڑیوں کو نذرآتش کیاگیا۔کئی مکان پھونک دئیے گئے۔سڑکیں ویران ہوگئیں۔ چاروں طرف جلی ہوئی گاڑیاں، ٹوٹی ہوئی کھڑکیاں اور اینٹ پتھر بکھرے پڑے تھے۔ مشتعل ہجوم نے پولیس اسٹیشن کو بھی نہیں بخشا۔حالات کو قابو میں کرنے کے لئے پولیس نے آنسو گیس چھوڑی اورفائرنگ کی جس کے نتیجے میں تین نوجوان جاں بحق ہوگئے، جن کی شناخت واحد خاں، سید یٰسین پاشااور سید شیخ کے طور پر ہوئی۔
قابل ذکر بات یہ ہے کہ کانگریسی ممبر اسمبلی شری نواس مورتی کا تعلق دلت طبقے سے ہے اور ان کے مسلمانوں سے اچھے رشتے ہیں تاہم ان کے
بھتیجے نوین کے بارے میں کہا جاتا ہے کہ وہ بی جے پی کا حامی ہے اور اس نے حال ہی میں رام مندر کے شلانیاس کی بھی حمایت کی تھی۔اس کی پوسٹ کے بعد ممبر اسمبلی شرینواسن پر بھی حملہ کیا گیا۔ نوین کو پولیس نے گرفتار کرلیا ہے اور اس پورے معاملے کی مجسٹریٹ کے ذریعہ جانچ کرائی جارہی ہے۔قابل ذکر بات یہ کہ بنگلور تشدد کے سلسلہ میں مقامی انتظامیہ احتجاج میں شامل لوگوں سے ایسے ہی تاوان وصول کرنے کی تیاری کررہی ہے جیسا کہ اتر پردیش کی یوگی سرکار نے سی اے اے کے خلاف مظاہرہ کرنے والوں سے وصول کرنے کی کارروائی شروع کررکھی ہے۔کرناٹک کے وزیروزیر داخلہ باسوراج بومئی نے اس فساد کو منصوبہ بند قرار دیتے ہوئے اس کا الزام ایس ڈی پی آئی نامی مسلم تنظیم پر ڈالا ہے۔ ان کا یہ بھی کہنا ہے کہ مقامی سیاسی رقابتوں نے بھی اس معاملے میں گل کھلائے ہیں۔اب تک 200 افراد کو گرفتار کیا گیا ہے۔ گرفتار شدگان میں کانگریس کی سٹی کارپوریٹر ارشاد بیگم کا شوہر کلیم پاشا بھی شامل ہے۔ اس ہنگامہ آرائی کے پیچھے گزشتہ انتخابات اور آنے والے لوکل باڈیز کے انتخابات میں مقامی لیڈران کی رسہ کشی بھی بتائی جاتی ہے۔ پولیس خاص طور پر ایس ڈی پی آئی کے کردار کو محور میں رکھ کر جانچ کررہی ہے۔
یہاں بنیادی سوال یہ ہے کہ توہین رسالت ؐ کے ارتکاب کے بعد جب ایک ہزار سے زائد مظاہرین کے جی ہلی پولیس اسٹیشن کے باہر جمع ہوکر شاتم رسول ؐ کی گرفتاری کا مطالبہ کرنے لگے تو پولیس نے کارروائی کیوں نہیں کی اور وہ کیوں حالات کے بگڑنے کا انتظار کرتی رہی۔پولیس نے اس تشدد کے خوفناک شکل اختیار کرنے کے بعد شاتم رسولؐ کو گرفتا ر تو کیا، لیکن یہ اس وقت ہوا جب شہر دھواں دھواں ہوچکا تھا۔پولیس کی مہارت اسی میں سمجھی جاتی ہے کہ وہ حالات کے بگڑنے کا پہلے سے اندازہ لگائے اور شر پھیلانے والوں پر گہری نگاہ رکھے۔ یوں بھی بنگلور کی پولیس اپنی پیشہ ورانہ مہارت کے لئے مشہور ہے، لیکن اس معاملے میں اس کی کوتاہی اورلاپروائی کا نتیجہ جان ومال کے نقصان کی صورت میں برآمد ہوا ہے۔ لہٰذا کچھ تاوان اس سے بھی وصول کیا جانا چاہیے۔
یہاں سب سے بڑا سوال یہ ہے سوشل میڈیا کے اس سیلاب سے سماجی ہم آہنگی اورامن وامان کو جو خطرات لاحق ہورہے ہیں، ان پر آخر کیسے قابو پایا جائے۔ سوشل میڈیا کا دائرہ دن بہ دن پھیلتا چلا جارہا ہے لیکن اس پر کوئی کنٹرول نہیں ہے اور یہی وجہ ہے کہ یہ اب معاشرے کے لئے مضر ثابت ہونے لگا ہے۔اگر آپ اعداد وشمار کی رو سے دیکھیں تو حیران کن صورتحال سامنے آتی ہے۔اس وقت پوری دنیا میں روزانہ ایک ارب فیس بک، انسٹا گرام اور ٹوئیٹ کے ساتھ 65ارب واٹس ایپ میسج اور 239 ارب ای۔ میل کی آمدورفت ہوتی ہے۔قابل غور بات یہ ہے کہ ان میں اوسطاً ایک تہائی غلط، اسپیم اور فرضی ہوتے ہیں۔اسمارٹ فون اور انسٹا گرام سے لیس کروڑوں عوام کی وجہ سے سوشل میڈیاکمپنیوں کو ہندوستان سے تقریباً بیس فیصد بازار مل رہا ہے۔یعنی ہندوستان میں سوشل میڈیا کے ذریعہ روزانہ اوسطاً 20 ارب قابل اعتراض اور مجرمانہ معاملے ہورہے ہیں۔ لیکن نیشنل کرائم ریکارڈ بیوروکے اعداد وشمار کے مطابق2017 کے سائبر کرائم سے وابستہ21 ہزار 796 معاملے ہی پولیس نے درج کئے۔ یعنی باقی اربوں معاملوں میں نہ تو پولیس اور نہ ہی ڈیجیٹل کمپنیاں کوئی کارروائی کررہی ہیں۔ فیس بک اور واٹس ایپ پر منافرت پھیلانے والی بی جے پی لیڈران کی تقریروں کو نہ ہٹانے کی ضد نے صورتحال کو مزید سنگین بنادیا ہے۔

ڈاکٹر محمد نجیب قاسمی سنبھلی

(www.najeebqasmi.com)

11 اگست 2020 کو بنگلور کے ڈی جے ھلّی، پلی کیشی نگر کے کانگریسی ایم ایل اے ”اکھنڈا سری نواس مورتھی“ کے قریبی رشتے دار ”پی نوین“ نے فیسبوک پر آخری نبی صلی اللہ علیہ وسلم کے خلاف انتہائی غلاظت پر مبنی پوسٹ کی تھی۔ اس سے قبل بھی اس نے کئی مرتبہ ایک طبقہ کے لوگوں کے جذبات بھڑکانے کے لئے غلط میسیج پوسٹ کئے تھے مگر وقت پر اس کے خلاف کوئی کاروائی نہیں ہوئی۔ جس کے نتیجہ میں پی نوین کی پوسٹ کے خلاف علاقے کے مسلمانوں میں سخت غم و غصہ کا پھیلنا فطری بات ہے کیونکہ سارے دنیا جانتی ہے کہ مسلمان اپنے نبی حضور اکرم صلی اللہ علیہ وسلم کے متعلق شان میں ادنی سی گستاخی برداشت نہیں کرسکتا۔ مسلمان ہی نہیں بلکہ کسی بھی مذہب کے لوگ اپنے پیشواؤں کے خلاف اس نوعیت کی پوسٹ برداشت نہیں کرسکتے ہیں۔ اس سے قبل بھی سید البشر ونبیوں کے سردار حضور اکرم صلی اللہ علیہ وسلم کے خلاف گستاخانہ کلمات کہے گئے تھے۔ ایسے لوگوں کو جرم کے کٹہرے میں کھڑا کرکے ان کے خلاف کاروائی ہونی چاہئے کیونکہ اس طرح کے واقعات سے ملک میں امن وامان کے بجائے افراتفری، عدم رواداری اور عدم تحمل میں اضافہ ہی ہوگا، جس سے ملک میں ترقی کے بجائے عدم استحکام پیدا ہوگا، لوگوں میں نفرت اور عداوت پیدا ہوگی۔

25 اکتوبر 2018 کو یوروپی یونین کی عدالت برائے انسانی حقوق نے بھی اپنے تاریخ ساز فیصلہ میں پوری دنیا کو بتایا کہ حضرت محمد مصطفی صلی اللہ علیہ وسلم یا کسی دوسرے نبی کی شان میں توہین آمیز بات کہنا یا لکھنا آزادی رائے نہیں، بلکہ اس سے لوگوں میں نفرت وعداوت پیدا ہوتی ہے اور اس طرح کے واقعات سے دنیا میں امن وامان کے بجائے عدم رواداری اور عدم تحمل میں اضافہ ہی ہوگا۔ تاریخ شاہد ہے کہ برصغیر میں لاکھوں انسانوں کا دین اسلام قبول کرنا صرف اور صرف اُن کادین اسلام کو پسند کرنے کی وجہ سے تھا، کوئی زور زبردستی اُن کے ساتھ نہیں تھی۔ دین اسلام نے غیر مسلموں کے ساتھ بھی حسن سلوک کرنے کی درخشاں روایات قائم کی ہیں۔ ایک مرتبہ آپ ﷺکے سامنے ایک یہودی کا جنازہ گزرا تو آپﷺ اس کے احترام میں کھڑے ہوگئے۔ صحابہئ کرام نے پوچھا کہ غیر مسلم کے لیے ایسا احترام کیوں؟ تو آپﷺ نے ارشاد فرمایا: کیا وہ انسان نہیں ہے؟ (بخاری) لیکن جس طرح مذہب اسلام میں دیگر مذاہب کے پیشواؤں کی توہین کرنے کی اجازت نہیں ہے، اُسی طرح پور ی انسانیت کے نبی حضرت محمد ﷺ کی شان میں گستاخی برداشت نہیں ہے خواہ اُس کا مرتکب مسلم ہو یا غیر مسلم۔ مسلمان اپنے نبی کے احترام کے ساتھ دیگر انبیاء کرام کا مکمل احترام کرتا ہے بلکہ قرآن وحدیث کی روشنی میں کسی بھی شخص کے کامل مؤمن ہونے کے لیے ضروری ہے کہ وہ آخری نبی حضرت محمد مصطفیﷺ پر ایمان لانے کے ساتھ ساتھ دیگر انبیاء کرام پر بھی ایمان لائے، جبکہ دیگر آسمانی کتابوں کو ماننے کا دعویٰ کرنے والوں کی مذہبی تعلیمات کے مطابق حضرت محمد ﷺ کو نبی ماننے پر اُن کے مذہب سے ہی نکل جاتا ہے۔
اس سے قبل ہولینڈ حضرت محمد مصطفی ﷺ کی شخصیت سے متعلق کارٹون بنانے کا مقابلہ منعقد کرنا چاہتا تھا لیکن مسلمانوں کے پر امن احتجاج کے بعد اسے اپنے فیصلے سے رجوع کرنا پڑا۔ مذہب اسلام میں حضرت عیسیٰ علیہ السلام یا حضرت موسیٰ علیہ السلام کے متعلق اس نوعیت کا کوئی عمل کرنا تو درکنار اس کا ارادہ کرنا بھی غلط ہے، چنانچہ ایک مسلمان یہ سوچ بھی نہیں سکتا کہ وہ حضرت عیسیٰ علیہ السلام جن کو عیسائی حضرات اپنا پیشوا مانتے ہیں یا حضرت موسیٰ علیہ السلام جنہیں یہودی اپنا پیشوا تسلیم کرتے ہیں، کہ اُن کے متعلق کوئی غلط بات بھی اُن کی طرف منسوب کی جائے چنانچہ عملی طور پر پوری دنیا میں ایک واقعہ بھی ایسا نہیں ملتا کہ جس میں کسی مسلمان نے مسیحی یا یہودیوں کے پیشوا کی شان میں گستاخی کی ہو۔ جو واقعات بھی وقتاً فوقتاً پیش آتے ہیں وہ صرف اور صرف آخری نبی حضرت محمد مصطفی ﷺ کے متعلق آتے ہیں، لہٰذا عالمی برادری کو چاہئے کہ توہین رسالت کے مرتکبین کی سزا کے لیے سخت قانون بنائے تاکہ اظہار رائے کے نام پر حضرت محمد ﷺ کی شان میں گستاخی کا سلسلہ بند ہو۔

پوری دنیا کے ارباب علم ودانش کا موقف ہے کہ کسی شخص کی توہین وتحقیر کا رائے کی آزادی سے کوئی تعلق نہیں ہے کیونکہ تقریباً ہر ملک میں شہریوں کو یہ حق حاصل ہے کہ کہ وہ اپنی ہتک عزت کی صورت میں عدالت سے رجوع کریں اور ہتک عزت کرنے والوں کو قانون کے مطابق سزا دلوائیں۔ سوال یہ ہے کہ کسی شخص کی ہتک عزت کرنے والے کو قانوناً مجرم تسلیم کیا جاتا ہے، تو مذاہب کے پیشواؤں اور خاص طور پر انبیاء کرام کے لئے یہ حق کیوں تسلیم نہیں کیا جارہا ہے۔ اور مذہبی رہنماؤں کی توہین وتحقیر کو رائے کی آزادی کہہ کر جرائم کی فہرست سے نکال کر حقوق کی فہرست میں کیسے شامل کیا جارہا ہے؟ یہ آزادی رائے نہیں بلکہ صرف اور صرف اسلام مخالف تنظیموں اور حکومتوں کی انتہاپسندی اور فکری دہشت گردی ہے۔ اسلام نے ہمیشہ دنیا میں امن وسلامتی قائم کرنے کی ہی دعوت دی ہے۔

پوری امت مسلمہ متفق ہے اور دیگر مذاہب بھی اس کی تایید کرتے ہیں کہ حضرات انبیاء کرام کی توہین وتحقیر سنگین ترین جرم ہے۔ اس لئے کہ اس میں مذہبی پیشواؤں کی توہین کے ساتھ ساتھ ان کے کروڑوں پیروکاروں کے مذہبی جذبات کو مجروح کرنے اور امن عامہ کو خطرے میں ڈالنے کے جرائم بھی شامل ہوجاتے ہیں، جس سے اس جرم کی سنگینی میں بے پناہ اضافہ ہوجاتا ہے۔ قرآن وسنت اور دیگر مذاہب میں اس کی سزا موت ہی بیان کی گئی ہے کیونکہ اس سے کم سزا میں نہ حضرات انبیاء کرام کے احترام کے تقاضے پورے ہوتے ہیں اور نہ ہی ان کے کروڑوں پیروکاروں کے مذہبی جذبات کی جائز حد تک تسکین ہوپاتی ہے۔ ہاں یہ بات مسلم ہے کہ موت کی سزا دینے کا اختیار صرف حکومت وقت کو ہی حاصل ہے کیونکہ عام آدمی کے قانون کو ہاتھ میں لینے سے معاشرہ میں لاقانونیت اور افراتفری کو ہی فروغ ملے گا۔ لہٰذا حکومت وقت کی ذمہ داری ہے کہ توہین وتحقیر کے عمل کو سنگین جرم قرار دے کر مجرموں کے خلاف ضروری کاروائی کرے۔

پوری انسانیت کو یہ بھی اچھی طرح معلوم ہونا چاہئے کہ ہر مسلمان کے دل میں حضور اکرم ﷺ کی محبت دنیا کی ہرچیز سے زیادہ ہے کیونکہ شریعت اسلامیہ کی تعلیمات کے مطابق ہر مسلمان کا حضور اکرم ﷺ اور آپ کی سنتوں سے محبت کرنا لازم اور ضروری ہے۔ نیز حضور اکرم ﷺ کی زندگی میں ایسی اوصاف حمیدہ بیک وقت موجود تھیں جو آج تک نہ کسی انسان کی زندگی میں موجود رہی ہیں اور نہ ہی ان اوصاف حمیدہ سے متصف کوئی شخص اس دنیا میں آئے گا۔ آپ کی چند صفات یہ ہیں: عجز وانکساری، عفو ودرگزر، ہمسایوں کا خیال، لوگوں کی خدمت، بچوں پر شفقت،خواتین کا احترام، جانوروں پر رحم، عدل وانصاف، غلام اور یتیم کا خیال، شجاعت وبہادری، استقامت، زہد وقناعت، صفاء معاملات، سلام میں پہل، سخاوت وفیاضی اور مہمان نوازی۔ حضرت انس رضی اللہ عنہ سے روایت ہے کہ حضور اکرم ﷺ نے ارشاد فرمایا: تم میں سے کوئی اس وقت تک (کامل) مؤمن نہیں ہوسکتا جب تک میں اس کو اپنے بچوں، اپنے ماں باپ اور سب لوگوں سے زیادہ محبوب نہ ہوجاؤں۔ (صحیح بخاری وصحیح مسلم) ایک مرتبہ حضور اکرمﷺ حضرت عمر رضی اللہ عنہ کا ہاتھ پکڑے ہوئے تھے۔ حضرت عمرؓ نے عرض کیا: یا رسول اللہ! آپ مجھے ہر چیز سے زیادہ عزیز ہیں، سوائے میری اپنی جان کے۔ حضور اکرم ﷺ نے فرمایا: نہیں، اس ذات کی قسم جس کے قبضہ میں میری جان ہے (ایمان اس وقت تک مکمل نہیں ہوسکتا) جب تک میں تمہیں تمہاری اپنی جان سے بھی زیادہ عزیز نہ ہوجاؤں۔ حضرت عمرؓ نے عرض کیا: واللہ! اب آپ مجھے میری اپنی جان سے بھی زیادہ عزیز ہیں۔ حضور اکرمﷺ نے ارشاد فرمایا: عمر! اب بات ہوئی۔ (صحیح بخاری)

دنیا کی موجودہ صورت حال کو سامنے رکھ کر میں تمام مسلمانوں سے یہی درخواست کرتا ہوں کہ اپنے جذبات کو قابو میں رکھ کر حضور اکرم ﷺ کی تعلیمات کو اپنی عملی زندگی میں لائیں اور آپ ﷺ کے پیغام کو دوسروں تک پہنچانے میں اپنی صلاحتیں لگائیں۔ نبی بنائے جانے سے لے کر وفات تک آپ ﷺکو بے شمار تکلیفیں دی گئیں۔ آپﷺ کے اوپر اونٹنی کی اوجھڑی ڈالی گئی۔ آپ ﷺ کے اوپر گھر کا کوڑا ڈالا گیا۔ آپ ﷺ کو کاہن،جادوگر اور مجنوں کہہ کر مذاق اڑایا گیا۔ آپ ﷺ کی بیٹیوں کو طلاق دی گئی۔ آپﷺ کا تین سال تک بائیکاٹ کیا گیا۔ آپﷺ پر پتھر برسائے گئے۔ آپ ﷺ کو اپنا شہر چھوڑنا پڑا۔ آپ ﷺ غزوہ احد کے موقع پر زخمی کئے گئے۔ آپ ﷺ کوزہر دے کر مارنے کی کوشش کی گئی۔ آپ ﷺ نے کبھی ایک دن میں دونوں وقت پیٹ بھر کر کھانا نہیں کھایا۔ آپ ﷺ نے بھوک کی شدت کی وجہ سے اپنے پیٹ پر دو پتھر باندھے۔ آپ ﷺ کے گھر میں دو دو مہینے تک چولھا نہیں جلا۔ آپ ﷺ کے اوپر پتھر کی چٹان گراکر مارنے کی کوشش کی گئی۔ حضرت فاطمہ رضی اللہ عنہا کے سوا آپ ﷺ کی ساری اولاد کی آپﷺ کے سامنے وفات ہوئی۔ غرضیکہ سید الانبیاء وسید البشر کو مختلف طریقوں سے ستایا گیا، مگر آپ ﷺ نے کبھی صبر کا دامن نہیں چھوڑا، آپ ﷺ رسالت کی اہم ذمہ داری کو استقامت کے ساتھ بحسن خوبی انجام دیتے رہے۔ ہمیں ان واقعات سے یہ سبق لینا چاہئے کہ گھریلو یا ملکی یا عالمی سطح پر جیسے بھی حالات ہمارے اوپر آئیں، ہم ان پر صبر کریں اور اپنے نبی کے نقش قدم پر چلتے ہوئے اللہ سے اپنا تعلق مضبوط کریں۔