بی جے پی

بھوپال :ریاست مدھیہ پردیش کے ضلع راج گڑھ میں بی جے پی اقلیتی مورچہ کے ضلع صدر اشرف قریشی نے ایک درخواست کرتے ہوئے کہا کہ اس بات کا خیال رکھیں کہ پارٹی میٹنگ میں اقلیتوں کے بارے میں ایسی زبان استعمال نہ کی جائے جس سے انہیں تکلیف ہو۔ پارٹی کے اقلیتی محاذ نے اپنا درد ظاہر کرتے ہوئے بھارتیہ جنتا پارٹی کے مدھیہ پردیش کے انچارج مرلی دھر راؤ کے سامنے اقلیت مخالف بیان بازی پر اعتراض کیا ہے۔ انہوں نے کہا کہ پارٹی اجلاس میں ایسی بات نہیں ہونی چاہئے جس سے اقلیتوں کو تکلیف ہو۔ اس نے کہا میں 10 لوگوں کو شامل کرتا ہوں اور 25 لوگ بھاگ جاتے ہیں۔ راج گڑھ میں بی جے پی اقلیتی مورچہ کے ضلع صدر اشرف قریشی نے کہا کہ میری درخواست ہے کہ جب بھی کوئی میٹنگ ہو، اس بات کو ذہن میں رکھا جائے کہ وہاں اقلیتیں بھی موجود ہوں۔ اس لیے ایسے وقت میں یہ بات ذہن میں رکھیں کہ آپ اس قسم کا کام نہ کریں یا ایسی بات نہ کریں جس سے ہمارے جذبات مجروح ہوں کیونکہ اس سے مجھے بہت تکلیف ہوتی ہے۔میں 10 لوگوں کو شامل کرتا ہوں اور 25 لوگ بھاگ جاتے ہیں۔ اس کے بعد اشرف قریشی نے پارٹی میں موجود لوگوں سے معافی بھی مانگی اور کہا کہ حاضرین اگر میری بات سے آپ کو تکلیف ہوئی ہے تو میں اس کے لیے معذرت خواہ ہوں۔ میں نے آپ کے سامنے اپنے دل کی بات رکھی ہے۔ انہوں نے کہا کہ دلبر سنگھ یادو جو کہ ضلع صدر ہیں وہ مجھے بہت سپورٹ کرتے ہیں۔ مجھے آگے بڑھانے کے لیے کام کریں اور میں تھوڑا سخت ہونے کے لیے معذرت خواہ ہوں۔

نئی دہلی:بی جے پی کے قومی صدر جے پی نڈا نے آج مرکزی حکومت کے جموں وکشمیر سے آرٹیکل 370 کو ہٹانے کی ایک بڑی کامیابی قرار دیا ہے۔ بی جے پی آج پورے ملک میں ڈاکٹر شیام پرساد مکھرجی کا یوم قربانی منارہی ہے۔ اس موقع پر بی جے پی ہیڈ کوارٹر میں منعقدہ ایک پروگرام میں جے پی نڈا نے شیام پرساد مکھرجی کو یاد کیا اور کہا کہ ڈاکٹر مکھرجی نے جموں و کشمیر میں آرٹیکل 370 کو منسوخ کرنے کے لیے ایک مہم شروع کی تھی ’ایک نشان ، ایک ودھان، ایک پردھان‘ کا نعرہ لگایا تھا۔ نڈا نے کہا کہ ڈاکٹر مکھرجی کو حقیقی خراج تحسین یہی ہوگا کہ ہم ان کے دکھائے ہوئے راستے پر چلیں ۔بی جے پی صدر نے کہا کہ آج ہم سب اس عظیم روح کو خراج تحسین پیش کرتے ہیں جنہوں نے ہندوستان کے اتحاد اور سالمیت کے لئے اپنی جان کا نذرانہ پیش کیا۔ شیام پرساد مکھرجی کی قربانی کو یاد کرتے ہوئے نڈانے کہا کہ وہ آزاد ہندوستان کے ان رہنماؤں میں سے تھے جنہوں نے ملک کی یکجہتی اور سالمیت کے لئے اپنی ہر چیز کی قربانی دی۔

ترجمہ:نایاب حسن

آل انڈیا مجلس اتحاد المسلمین (اے آئی ایم آئی ایم) کے رہنما اسدالدین اویسی مسلمانوں کے قومی رہنما بننے کی تیاری میں ہیں۔ ان کا انتخابی دائرہ حیدر آباد کے باہر مہاراشٹر اور اب بہار تک پھیل گیا ہے ، جہاں ان کی پارٹی نے اسمبلی اور میونسپل دونوں سیٹیں جیتی ہیں۔ 2019 کے لوک سبھا انتخابات میں مجلس نے حیدرآباد سے باہر مہاراشٹرمیں ایک نشست پر کامیابی حاصل کی تھی۔ مجلس کے عروج کی وجہ دراصل آر ایس ایس اور بی جے پی کا سیاسی اُٹھان ہے ، جو ہندوستانی مسلمانوں کو لگاتار مین اسٹریم سے علیحدہ رکھنے کی کوششوں میں مصروف ہے۔ 2011 کی مردم شماری کے مطابق اس ملک میں مسلمان کل آبادی کا 14.2 فیصد ہیں۔ بعض شہری حلقے ایسے ہیں کہ وہاں اگر مسلمان یک طرفہ ووٹ کریں تو مجلس کئی سیٹیں جیت سکتی ہے۔

اسدالدین کے والد صلاح الدین اویسی (1931-2008) حیدرآباد انتخابی حلقے کی نمایندگی کرنے والے رکن پارلیمنٹ تھے ، ان کی شبیہ قومی سطح کے  جدید مسلم رہنما کی نہیں تھی؛ان کے مقابلے میں ان کے بیٹے اسدالدین اویسی انگلینڈ سے تعلیم یافتہ ہیں ، انھوں نے بیرسٹری کی تربیت بھی حاصل کی ہے ، انھیں گہرا یقین ہے کہ ہندوستان میں مسلمانوں کی فلاح و بہبود کے لیے جمہوریت ایک ضروری سیاسی نظام ہے۔ انھوں نے 2012 میں یو پی اے سے علیحدگی اختیار کی ، جس کے بعد  ان کے قومی عزائم کو برق رفتاری حاصل ہوئی۔ اس کے بعد ہی وہ ایک ایسے مسلم چہرے کے طورپر سامنے آئے جسے بی جے پی / آر ایس ایس نے مسلسل تنقیدوں کا نشانہ بنایا۔

مجلس کے پھیلاؤ میں بی جے پی اور کانگریس دونوں کے لیے گہرے مضمرات پوشیدہ ہیں۔ مسلم سیاسی حلقہ کھڑا کرنے میں ان کی کامیابی کا فائدہ بی جے پی کو ہوگا اور دوسری طرف کانگریس بےحال ہوتی جائے گی۔ اگر مسلمان کانگریس سے دور ہوگئے تو بی جے پی کے ہر ریاست میں کامیاب ہونے کے امکانات بڑھ جائیں گے۔ کچھ علاقائی جماعتیں جیسے سماج وادی پارٹی اور آر جے ڈی بھی شکست سے دوچار ہوں گی؛ لہذا اویسی کا علانیہ مسلم لیڈر کے طور پر عروج جتنا مجلس اتحاد المسلمین چاہتی ہے ،اتنا ہی بی جے پی بھی چاہتی ہے۔

اسی طرح  ہندوستانی  مسلمانوں کی زندگی پر اس کا ایک اور اثر ہوسکتا ہے۔ چونکہ مسلم آبادی کا ایک بہت بڑا حصہ شہری علاقوں میں بساہوا ہے ؛ لہذا ان کی سیاسی تنظیمی سرگرمیوں میں اضافہ ہوگا اور ایک مذہبی – نظریاتی قیادت سامنے آئے گی۔ مسلم عوام بھی بڑے پیمانے پر سیکولر زم سے ناخوش ہیں ، جو انھیں اقلیتی- اکثریتی ڈسکورس میں الجھاتا ہے، جس میں ان کی مسلم شناخت ختم ہوگئی ہے۔

ایس سی / ایس ٹی / او بی سی و اقلیتی اتحاد کے پرانے نعرے میں بھی اب اتنا دم نہیں رہا۔ اگرچہ اویسی دلت مسلم اتحاد کی بات کرتے ہیں؛ لیکن اویسی کے پاس شودروں یا او بی سی سے خطاب کرنے کی کوئی زبان نہیں ہے۔ آر ایس ایس-بی جے پی گٹھ جوڑ اویسی کی جارحانہ مخالفت کرکے تلنگانہ جیسی ریاست میں اپنی گرفت مضبوط کرنا چاہتا ہے۔ بی جے پی؍آرایس ایس نے حیدرآباد شہر میں بنیادی طور پر او بی سی کو مسلمانوں کے خلاف متحرک کرکے اپنے لیے راستہ بنایا ہے ، جس کے واضح اثرات حالیہ بلدیاتی انتخابات میں دیکھے گئے ہیں۔ اب یہی سیاست وہ تلنگانہ کے دیہی علاقوں میں کریں گے۔ چونکہ ماضی میں مجلس کی  ایک آزاد نظام ریاست (جسے 1940 کی دہائی میں قاسم رضوی کی رضاکار تحریک کے دوران جنوبی پاکستان کہاجاتا تھا) کے مطالبے کی تاریخ رہی ہے؛ لہذا ہندوتوا طاقتیں آسانی سے پرانے شہر کو  پاکستان اور اویسی کو اس کا جناح قرار دے دیتی ہیں۔

حیدرآباد کی طرح بہت سے ایسے شہروں میں ، جہاں مسلمانوں کی خاصی آبادی ہے ، وہاں شودر/ او بی سی اور مسلمانوں کے درمیان کوئی گہرے تعلقات نہیں ہیں۔ او بی سی طبقے کے لوگ عموماً گوشت خور ہیں ؛ لیکن بہت سے لوگ نہیں بھی کھاتے ہیں۔ آر ایس ایس / بی جے پی نیٹ ورک ان اختلافات کو استعمال کرکے شودر / او بی سی عوام کومسلمانوں کے خلاف منظم کرنا چاہتا ہے۔ ذات پات کے حوالے سے اویسی نے حالیہ دنوں میں بولنا شروع کیا ہے، جبکہ ان کے تندگو بھائی تو تمام اوبی سیز کو ہندو ہی مانتے ہیں۔

در حقیقت اب تک کسی بھی مسلم رہنما اور دانشور نے ذات پات کے نظام اور اس کے فالٹ لائن کا کماحقہ مطالعہ نہیں کیا ہے۔ ان کی توجہ ہمیشہ ہندو- مسلم تقسیم و تفریق کے معاملات  پر رہی ہے۔ ذات پات کے نظام کے تضادات کے بارے میں ان کی تفہیم البیرونی کی کتاب الہند تک محدود ہے؛ لیکن ہندوستان میں ویدک کلچر کے دنوں سے ہی طبقاتی جبر کی ایک طویل تاریخ موجود ہے ،یہی جبر  11 ویں صدی میں مسلم حکومت کے قیام  کی تمہید ثابت ہوا تھا۔

آر ایس ایس-بی جے پی کی جعلی ہندوتوا قوم پرستی نے سیکولرزم کے نظریے کو چیلنج کردیا ہے ، جس میں مسلم رہنماؤں کو ایک مقام حاصل تھا۔ اویسی کی سربراہی والی مجلس بھی  مسلم قوم پرستی کی زبان بولتی ہے۔ چونکہ اویسی کے آباو اجداد نے حیدرآباد چھوڑ کر پاکستان جانے سے انکار کردیا تھا ؛ لہذا مجلس کے رہنما اپنی ہندوستانی مسلم قوم پرستی کو بی جے پی-آر ایس ایس کی مسلمانوں کو غیر ملکی یا پاکستانی قرار دینے کی کوشش کے خلاف ہتھیار کے طور پر استعمال کرتے ہیں؛ اسی لیے ہندوستان بھر کے مسلمان ان کی طرف متوجہ ہوسکتے ہیں، مگرجس طرح سنگھ مسلمانوں کو اپنے مستقل دشمن کے طور پر نشانہ بناتا ہے اور اس کے مقابلے میں جس طرح اویسی مسلمانوں کو انتخابی سطح پر منظم کرنے کی کوشش کر رہے ہیں ،یہ قومی انتشاراور بہ تدریج ملک تباہی کا باعث بن سکتی ہیں۔

(مضمون نگار معروف سیاسی مفکر،مصنف اور مولانا آزاد نیشنل اردو یونیورسٹی،حیدرآباد میں سینٹر فار سٹڈی آف سوشل ایکسکلوزن اینڈ انکلوزیو پالیسی کے ڈائریکٹر ہیں۔یہ مضمون آج روزنامہ انڈین ایکسپریس میں شائع ہوا ہے۔مضمون نگار کے خیالات سے مترجم یا قندیل کا اتفاق ضروری نہیں ہے۔)

ترجمہ:احمد الحریری

اکثر ایسا کہا جاتا ہے کہ بی جے پی انتخابات جیتنے کے لیے ہر وہ چیز جس کی اسے ضرورت ہوتی ہے کرلیتی ہے لیکن ایک چیز جو وہ نہیں کرتی اور خاص طور سے مودی اور شاہ والی بی جے پی، وہ یہ ہے کہ بی جے پی مسلمانوں کو شاید ہی کبھی ٹکٹ دیتی ہے، چاہے اس کی قیمت مسلم اکثریتی سیٹوں سے ہی کیوں نہ چکانا پڑے، بی جے پی کا مقصد صرف نشستیں جیتنا ہوتا تو وہ خوشی خوشی مسلمانوں کو ٹکٹ دیتی۔ ٹکٹ کی تقسیم میں مسلمانوں کو کچھ نمائندگی دے کر بی جے پی شاید مدھیہ پردیش، کرناٹک، دہلی اور راجستھان کے ریاستی انتخابات کو جیت سکتی تھی،انتخابات کی جیت پر اجارہ داری رکھنے والی پارٹی سے جڑنے کے لئے آپ کو بہت سے خواہش مند مسلمان مل جائیں گے،دوسری بہت سی کمیونیٹیز کی طرح مسلمان بھی اہل اقتدار کے ساتھ رہنے کو کوئی مسئلہ نہیں مانتے۔

یہ بے جے پی ہی ہے جو مسلمانوں کی خواہشات پر توجہ نہیں دیتی ، کیونکہ بی جے پی نظریہ جیسی چیزوں کو انتخابات جیتنے سے زیادہ ویلیو دیتی ہے، 2014 کے بعد تو یہ پہلے سے کہیں زیادہ صاف ہوگیا ہے کہ بی جے پی کا نظریاتی مقصد مسلمانوں کو پسماندگی کے اس نقطے پر لے آنا ہے کہ وہ منظر سے بالکل ہی غائب ہی ہوجائیں،ان کے نظریے کے اعتبار سے مسلمانوں کو خاموش اور گھروں میں قید رہنا چاہئے، مسلمانوں کو ایم ایل اے، ایم پی، منسٹر اور لیڈر نہیں بننا چاہئے، مسلمانوں کو آواز بلند نہیں کرنی چاہئے اور ان کے مطالبات نہیں سنے جانے چاہئیں۔

شہریت ترمیم بل مخالف مظاہروں میں ایک یا دو سڑک جام کردینا کون سا بڑا معاملہ تھا کہ دہلی میں فسادات بھڑک گئے؟شمالی دہلی میں ایک  ایسے روڈ کو جسے کوئی بھی سچ میں مسافروں کے لئے مسئلہ نہیں مانتا تھا کو بلاک کردینا کون سا بڑا معاملہ تھا؟لیکن بے جے پی کے لئے مسلم سیاسی آواز سخت ناقابل قبول تھی۔

بی جے پی اویسی کو پسند نہیں کرتی ہے:

یہ کہنا بالکل مذاق ہے کہ بی جے پی اویسی کے سیاست کے ارد گرد رہنے کو پسند کرتی ہے، بی جے پی داڑھی اور ٹوپی والے مسلم کو پسند نہیں کرتی ہے، میری سمجھ یہ ہے کہ بی جے پی پارلیمنٹ میں کھڑے ہونے والے ایک مسلم کو پسند نہیں کرتی ہے پھر وہ پہلی صف میں ایک ہندو راشٹر کے پارلیمنٹ میں مسلمانوں کی موجودگی کو کیوں پسند کرے گی؟

بہار کی سیاسی تاریخ میں ایسا پہلی بار ہوا ہے کہ حزب اقتدار میں ایک بھی مسلم ایم ایل اے نہیں ہے، بہار کی سترہ فیصد آبادی والی کمیونٹی کو بی جے پی نے ایک بھی ٹکٹ نہیں دیا، یہ واحد پارٹی ہے جو سیاسی  گلیاروں سے پوری کمیونٹی کو قوت کے ساتھ ختم کر دینا چاہتی ہے، کیا آپ سمجھتے ہیں کہ اسمبلی میں مجلس کے پانچ ایم ایل اے کو دیکھنا پسند کرے گی؟

پانچ سیٹوں پر مجلس کی جیت کے بعد وہی عام سی بحث شروع ہوگئی ہے کہ اویسی کے عروج کو جس طرح سے بی جے پی چاہ رہی ہے وہی ہورہا ہے کہ مسلم مسلم پارٹی کو اسی طرح سے ووٹ دیں جس طرح ہندو ہندو پارٹی کو ووٹ دیتے ہیں، بی جے پی کے ایجنڈہ کی یہ ایک غلط ترجمانی ہے، بی جے پی اور آر ایس ایس نے سیکولر جماعتوں کو مسلم ووٹوں کے تئیں شرمندہ کردیا ہے اور ایسا ہندوستانی سیاست اور عوامی زندگی میں مسلم کمیونٹی کی آواز کو خاموش کرا کر کیا جا رہا ہے، اس لئے اب اگر مجلس اور اویسی کے ذریعے مسلمانوں کو ایک سیاسی قوت حاصل ہورہی ہے تو اس سے بی جے پی کا مقصد پورا نہیں ہوتا ہے۔

بلکہ اس کے بجائے  بی جے پی تو چاہتی ہے کہ مسلمانوں کا مطلق کوئی ووٹ ہی نا ہو،اور دھیرے دھیرے یہ مقصد ترتیب وار این پی آر، این آر سی اور سی اے اے جیسے قوانین سے حاصل کیا جاسکتا ہے، یہ وہ قوانین ہیں جو بہت سارے مسلمانوں کو شہریت سے محروم کرسکتے ہیں،آسام میں این آر سی کی بار بار کوششیں یہ بتاتی ہیں کہ بی جے پی کس طرح انتخابی رول سے مسلم رائے دہندگان کی تعداد کم کردینا چاہتی ہے، اس سے نہ یہ کہ حزب اقتدار سے مسلم نمائندگی ختم ہوجائے گی بلکہ حزب اختلاف میں بھی مسلم نمائندگی نہیں رہے گی۔

بی جے پی کو اویسی کی ضرورت نہیں ہے:

پولرائزیش کے لئے بی جے پی کو اویسی کی ضرورت نہیں ہے کیونکہ  بی جے پی نے بہر حال پولرائزیش گیم کی منزل کو طے کر لیا ہے، اور اس میں اسے اویسی کی ضرورت نہیں ہے، مثال کے طور پر مسلمانوں کے خلاف اس جھوٹی خبر کو ہی لے لیجئے کہ جب پال گھر میں سادھوؤں کی ماب لنچنگ کر دی گئی تھی تو اس کے فوراً بعد مسلمانوں پر اس کا الزام لگا دیا گیا تھا،حالانکہ اس میں کوئی بھی فرقہ وارانہ پہلو نہیں تھا، اگر اویسی کے آئینی نیشنل ازم کا اظہار تھوڑا بھی بی جے پی لیڈران اور ان کے حمایتیوں کی راہ میں آتا ہے تب مسلمانوں پر ہندؤوں سے نفرت، پاکستان پرست اور گائے ذبح کرنے جیسی چیزوں کا الزام لگا دیا جاتا ہے۔

ایک بڑی غلط فہمی یہ ہے کہ ہندو رائے دہندگان صرف مذہب کی بنیاد پر ووٹ کرتا ہے، اگر مذہبی شناخت کافی ہوتی تو وزیراعظم مودی کو”خود انحصار ہندوستان”یعنی "آتم نربھر ” اور اس جیسے دوسرے جدید نعرے بیچنے کی ضرورت نہیں پڑتی،اس طرح کے رائے دہندگان جو بی جے پی کو ووٹ کرتے تھے وہ بہر حال بی جے پی کو ہی ووٹ کرینگے،اویسی کی موجودگی اور عدم موجودگی ہندوتوا ذہنیت کے حامل رائے دہندگان کو بی جے پی کے تئیں متاثر نہیں کرے گا۔

اویسی کی ضرورت کسے ہے؟

اگر اویسی کی کسی کو ضرورت ہے تو وہ مسلمان ہیں، ہندوستانی مسلمانوں کو پبلک ڈسکورس میں ایک آواز سے محروم کیا جارہا ہے کیونکہ وہ سیکولر پارٹیاں جو ان کے مفادات کے تحفظ کا دعویٰ کرتی تھیں وہ بھی خاموش ہوچکی ہیں بلکہ وہ خاموشی سے بڑھ کر ہندو بنیاد پرستی کے ساتھ عملی تعاون اور اشتراک کر رہی ہیں اگر آپ اروند کیجریوال، کمل ناتھ اور پرینکا گاندھی کی حالیہ سرگرمیوں کو دیکھیں گے تو یہ صاف نظر آئے گا۔

ایسے وقت میں اویسی ہندوستانی سیاست میں اچھائی کی ایک طاقت ہیں، وہ کوئی وزیر اعلیٰ یا وزیر اعظم نہیں بننے جا رہے ہیں اور وہ یہ جانتے بھی ہیں، انہیں جو کچھ حاصل ہوگا وہ یہ ہوگا کہ وہ مسلم ووٹوں کے لیے کچھ چیلنج پیدا کردیں گے جو سیکولر پارٹیوں کو اس بات کے اعتراف پر مجبور کرے گا کہ ہاں ہندوستان میں مسلمان ہیں اور ان کے ساتھ تمام سیاسی پارٹیوں کو اسی عزت کا معاملہ کیا جانا چاہیے جو دوسرے ووٹروں کے ساتھ کیا جاتا ہے۔

(آج سے ٹھیک 28 برس قبل، یعنی چھ دسمبر 1992 کو ہندو انتہا پسندوں نے ایودھیا میں قائم بابری مسجد کو منہدم کر دیا تھا۔ اس روز ہونے والے فسادات میں بابری مسجد کے علاوہ اور بہت سی مساجد اور املاک کو یا تو منہدم کیا گیا یا نذر آتش۔ اس واقعے کا آنکھوں دیکھا حال پڑھیے اس تحریر میں جو پہلی مرتبہ سنہ 2017 میں شائع ہوئی تھی۔ بشکریہ بی بی سی اردو)

طویل عرصہ گزر جانے کے باوجود چھ دسمبر کی یاد آتے ہی میں خود کو مانس بھون کی چھت پر پاتا ہوں اور بابری مسجد کے انہدام کا پورا منظر آنکھوں کے سامنے آ جاتا ہے۔مانس بھون وہی دھرم شالہ ہے جہاں میں اس واقعے سے دس سال قبل سنہ 1982 میں ایک بار ٹھہرا تھا۔ ایک صحافی دوست نے متنازع بابری مسجد دکھائی تھی جس کے باہری حصے میں ایک چبوترے پر کیرتن بھجن ہوتا تھا اور لوگ ’سیتا رسوئی‘ (سیتا کے کچن) اور رام کے ’کھڑاون‘ کے خیالی مقامات کے سامنے سر جھکاتے تھے۔اس رام چبوترے پر طویل عرصے سے رامانندی فرقے کے نرموہی اکھاڑے کا قبضہ تھا۔ نرموہی اکھاڑا سوا سو سال سے زائد عرصے سے وہاں مندر کی تعمیر کے لیے قانونی جنگ لڑ رہا تھا۔
مسجد کے اندر سنہ 1949 میں 22 اور 23 دسمبر کی درمیانی شب ضلع مجسٹریٹ کی مدد سے رام کی بچپن کی مورتی رکھی گئی۔ اس وقت کے وزیر اعظم جواہر لعل نہرو نے مسجد سے مورتی ہٹانے کا حکم دیا لیکن ضلع مجسٹریٹ نے اس پر عمل کرنے سے انکار کردیا۔ اسی وقت سے عدالت نے مسجد سیل کر کے نگران تعینات کر دیا۔ باہر پولیس کا پہرہ بٹھا دیا گيا اور عدالت کا مقرر کردہ پجاری وہاں پوجا کیا کرتا تھا۔
سنگھ پریوار یعنی ہندوتوا کے نظریات کی حامل جماعتیں طویل عرصے سے ایسے مسئلے کی تلاش میں تھیں جس کے ذریعے ذات پات میں منقسم ہندو برادری کو یکجا کیا جا سکے۔ یہ کہا جاتا ہے کہ اسی مقصد کے تحت سنہ 1984 میں رام جنم بھومی کی آزادی کی تحریک شروع کی گئی تھی۔
اس مہم کی وجہ سے یکم فروری سنہ 1986 میں عدالت نے متنازع احاطے کے تالے کھلوائے۔ جواب میں بابری مسجد ایکشن کمیٹی کا قیام عمل میں آیا۔دریں اثنا معاملہ ضلع عدالت سے نکل کر لکھنؤ ہائی کورٹ تک پہنچ گیا۔ سنہ 1989 کے عام انتخابات سے قبل مصالحت کی امید میں اس وقت کے وزیر اعظم راجیو گاندھی نے مسجد سے تقریباً 200 فٹ کے فاصلے پر رام مندر کا سنگ بنیاد رکھوا دیا۔راجیو گاندھی کو انتخابات میں شکست ہوئی جبکہ وی پی سنگھ اور چندرشیکھر کی حکومت میں بھی مصالحت کی تمام تر کوششیں بے کار ثابت ہوئیں۔ بھارتیہ جنتا پارٹی (بی جے پی) کے سینیئر رہنما لال کرشن اڈوانی نے گجرات کے سومناتھ مندر سے رام مندر کے لیے رتھ یاترا نکال کر سیاسی طوفان کھڑا کر دیا۔سنہ 1991 میں کانگریس ایک بار پھر دہلی میں بر سر اقتدار آئی اور پی وی نرسمہا راؤ وزیر اعظم بنے لیکن رام مندر کی تحریک کے طفیل انڈیا کی سب سے بڑی ریاست اتر پردیش میں پہلی بار کلیان سنگھ کی قیادت میں بی جے پی کی حکومت بنی۔
کلیان سنگھ نے سپریم کورٹ میں حلف نامہ داخل کیا کہ وہ مسجد کی حفاظت کریں گے جس کے بعد عدالت نے وشو ہندو پریشد (وی ایچ پی) کو علامتی کار سیوا کی اجازت دے دی۔ دوسری جانب وی ایچ پی اور بی جے پی کے رہنماؤں نے ملک بھر میں گھوم گھوم کر لوگوں سے بابری مسجد کو نیست نابود کرنے کی قسم لی تھی۔ ان کی حوصلہ افزائی کے لیے کلیان سنگھ نے اعلان کیا تھا کہ پولیس کار سیوکوں پر فائرنگ نہیں کرے گی۔
اس سے قبل سنہ 1990 میں ملائم سنگھ یادو نے کار سیوکوں پر فائرنگ کروائی تھی اور مسجد کی حفاظت کی تھی۔
کلیان سنگھ حکومت نے متنازع کیمپس کے قریب مجوزہ رام پارک کی تعمیر کے لیے وی ایچ پی کو 42 ایکڑ زمین دے دی تھی۔ اس کے علاوہ سیاحت کے فروغ کے نام پر بہت سے مندروں اور دھرم شالاؤں کی زمین حاصل کرکے اسے ہموار کر دیا گیا تھا اور فیض آباد – ایودھیا شاہراہ سے براہ راست متنازع مقام تک چوڑی سڑک تعمیر کر دی گئی تھی۔
ملک بھر سے آنے والے کارسیوکوں کے قیام کے لیے متنازع احاطے سے ملحق شامیانے اور ٹینٹ لگائے گئے تھے۔ انھیں لگانے کے لیے کدال، بیلچے اور رسیاں بھی لائی گئیں جو بعد میں مسجد کے گنبد پر چڑھنے اور اسے توڑنے کے کام میں آئیں۔ مجموعی طور پر متنازع مقام کے آس پاس کے علاقے پر کار سیوکوں کا ہی قبضہ تھا۔ ان لوگوں نے چار پانچ دن قبل ہی بعض قریبی مزاروں کو نقصان پہنچا کر اور مسلمانوں کے مکانوں کو آگ لگا کر اپنی جارحیت کا اظہار کر دیا تھا۔ اس کے باوجود سپریم کورٹ کے مقرر کردہ مبصر ضلعی جج پریم شنکر گپتا کہہ رہے تھے کہ علامتی کار سیوا پر امن طور پر کروانے کے لیے سارے انتظام اچھی طرح سے کیے گئے ہیں۔
ایک دن قبل یعنی پانچ دسمبر کو وی ایچ پی کے رہنما نے باضابطہ یہ اعلان کیا کہ وہاں صرف علامتی کارسیوا (پوجا) ہوگی۔ فیصلے کے مطابق کارسیوک دریائے سرجو سے پانی اور ریت لے کر آئیں گے اور مسجد سے کچھ فاصلے پر سنگ بنیاد کی جگہ اسے نذر کر کے واپس ہو جائیں گے۔
جیسے ہی اس کا اعلان ہوا کار سیوکوں میں غصہ پھیل گیا۔ جب وی ایچ پی کے اعلیٰ رہنما کارسیوک پورم پہنچے تو مشتعل کارسیوکوں نے انھیں گھیر لیا اور بہت بھلا برا کہا۔ ان کا کہنا تھا کہ رہنما کچھ بھی کہیں وہ اصلی کارسیوا یعنی مسجد کو منہدم کرکے ہی جائيں گے۔ شام تک کارسیوکوں نے کئی ٹی وی رپورٹرز اور کیمرہ مین کے ساتھ مار پیٹ کی۔ دوسری طرف بی جے پی کے رہنما اٹل بہاری واجپئی نے ایک عام اجلاس میں کارسیوکوں کی یہ کہتے ہوئے حوصلہ افزائی کی کہ سپریم کورٹ نے اس کی اجازت دی ہے۔
واجپئی شام کی ٹرین سے دہلی چلے گئے جبکہ ایل کے اڈوانی اور ڈاکٹر مرلی منوہر جوشی رات میں وزیر اعلیٰ کلیان سنگھ سے بات چیت کر کے ایودھیا پہنچ گئے۔ چھ دسمبر کی صبح جہاں ایودھیا میں ’جے شری رام‘ کے نعرے گونج رہے تھے وہیں فیض آباد چھاؤنی کے علاقے میں بڑی تعداد میں مرکزی نیم فوجی دستے اس تیاری میں تھے کہ جیسے ہی بلاوا آئے گا وہ ایودھیا کی جانب کوچ کریں گے۔ فوج اور فضائيہ بھی نگرانی پر تعینات تھی۔
یہ ایک حقیقت ہے کہ ریاستی حکومت نے ان کی تعیناتی پر اعتراض کیا تھا، یعنی ریاستی حکومت کی جانب سے واضح تھا کہ کار سیوکوں کے خلاف طاقت کا استعمال نہیں کیا جائے گا۔ مانس بھون کی چھت پر جہاں ہم صحافی یکجا تھے مسجد اس کے بالکل سامنے تھی۔ دائیں طرف پر جنم بھومی (مقام پیدائش) کے مندر کی چھت پر کمشنر، ڈی آئی جی اور پولیس کے اعلیٰ افسر تھے اور مانس بھون کی بائیں جانب رام کتھا کنج میں ایک اجلاس عام رکھا گیا تھا جہاں اشوک سنگھل، اڈوانی، جوشی، اوما بھارتی اور دیگر رہنما جمع تھے۔ مسجد اور مانس بھون کے درمیان سنگ بنیاد کے مقام کو پوجا کا مقام بنایا گیا تھا جہاں مہنت رام چندر پرمہنس اور دیگر سادھو سنیاسی جمع تھے۔ اسی جگہ پر گیارہ بجے سے علامتی پوجا ہونی تھی۔ آر ایس ایس کے اراکین سر پر زعفرانی پٹی باندھے حفاظت کے لیے تعینات تھے۔ ان کے پیچھے پولیس رسّہ لے کر تیار تھی تاکہ مخصوص لوگ ہی وہاں تک جا سکیں۔ تقریباً 10:30 بجے ڈاکٹر جوشی اور اڈوانی یگیہ کی جگہ پہنچے۔ ان کے ساتھ بہت سے کارسیوک وہاں داخل ہونے لگے۔ پولیس نے روکا لیکن انھوں نے بات نہیں مانی۔
اس کے بعد زعفرانی پٹی والے رضاکاروں نے ان پر لاٹھی چلانی شروع کر دی جس پر وہاں سخت ہلچل نظر آئی۔ دیکھتے دیکھتے سینکڑوں کارسیوک مسجد کی جانب دوڑتے نظر آئے۔ مسجد کی حفاظت کے لیے چاروں جانب لوہے کا جال لگایا گيا تھا۔ پیچھے سے ایک گروپ نے درخت پر رسّہ پھینک کر مسجد میں داخل ہونے کی کوشش کی۔ وی آئی پی کے لیے تعینات پولیس نے مزاحمت کرنے کی کوشش کی لیکن چند ہی منٹوں میں ایک ایک کرکے بہت سے کارسیوک مسجد کے گنبد پر نظر آنے لگے۔
انھیں دیکھ کر یہ نعرے گونجنے لگے: ’ایک دھکا اور دو، بابری مسجد کو توڑ دو۔‘ جلسہ گاہ سے اشوک سنگھل اور دیگر رہنماؤں نے کار سیوکوں سے نيچے اترنے کی اپیل بھی کی لیکن ان کا کوئی اثر نہیں ہوا۔کدال، بیلچہ جس کے ہاتھ جو سامان آیا اسی سے گنبد توڑنے لگا۔ بعض ہاتھوں سے ہی چونے سرخی سے بنی اس عمارت کو توڑنے لگے۔مسجد کی حفاظت پر تعینات مسلح سکیورٹی فورسز کندھے پر رائفلیں لٹکائے باہر نکل آئے۔ سارے افسران لاچار کھڑے تماشائی تھے۔
اسی دوران کارسیوکوں کے ایک گروپ نے آس پاس کے سارے ٹیلی فون تار کاٹ ڈالے۔ ان کا ایک گروپ مانس بھون پر چڑھ آیا اور تصاویر لینے سے منع کرنے لگا۔ میں نے اپنا کیمرہ ایک خاتون صحافی کے بیگ میں چھپا دیا؛ لیکن بہت سے فوٹوگرافروں کے کیمرے چھین کر انھیں مارا پیٹا گیا۔ 12 بجے تک مسجد توڑنے کا کام اپنے عروج پر پہنچ چکا تھا۔
اڈوانی کو یہ خدشہ تھا کہ نیم فوجی مرکزی فورس یا فوج فیض آباد سے آ سکتی ہے۔ لہٰذا انھوں نے لوگوں سے وہاں سے آنے والی سڑک کو جام کرنے کی اپیل کی۔
کہتے ہیں کہ کلیان سنگھ تک جب یہ خبر پہنچی تو انھوں نے وزیر اعلیٰ کے عہدے سے استعفیٰ دینے کی پیشکش کی لیکن اڈوانی نے انھیں یہ پیغام دیا کہ جب تک مسجد گر نہ جائے وہ استعفیٰ نہ دیں، کیونکہ استعفیٰ دیتے ہی ریاست مرکز کے کنٹرول میں چلی جائے گی۔ اسی دوران کچھ پجاری رام اور لکشمن کی مورتیاں نکال لائے۔ دیکھتے دیکھتے پانچ بجے تک مسجد کے تینوں گنبد مسمار ہو چکے تھے۔ اس کے بعد ہی کلیان سنگھ نے استعفیٰ پیش کیا۔ شام تک ریاست میں صدر راج نافذ ہو چکا تھا لیکن انتظامیہ کو سمجھ نہیں آیا کہ کیا کرنا ہے؟ بہرحال کارروائی کے خوف سے کارسیوک چپکے چپکے ایودھیا سے نکلنے لگے۔ بعض لوگ بطور نشانی مسجد کی اینٹ اپنے ساتھ لے چلے۔
اڈوانی، جوشی اور واجپئی جیسے بڑے رہنماؤں نے اس واقعے پر افسوس کا اظہار کیا۔ پولیس نے مسجد منہدم کیے جانے پر ہزاروں نامعلوم کار سیوکوں کے خلاف ایک مقدمہ درج کیا۔ چند منٹ بعد، بی جے پی اور وی ایچ پی کے آٹھ بڑے رہنماؤں کے خلاف اشتعال انگیز تقریر کرنے کا مقدمہ دائر کیا گیا۔ وزیراعظم نرسمہا راؤ دن بھر خاموش تھے لیکن شام کو انھوں نے نہ صرف اس واقعے کی مذمت کی بلکہ مسجد کی دوبارہ تعمیر کی بات بھی کی۔مرکزی حکومت کی ہدایت پر خصوصی ٹرینیں اور بسیں چلائی گئیں، جس سے کارسیوک اپنے گھروں کو جا سکیں اور انتظامیہ بغیر طاقت کا استعمال کیے متنازع مقام پر کنٹرول کر سکے۔ دوسری جانب منہدم مسجد کے ملبے پر ایک گروپ نے ایک عارضی مندر کی تعمیر شروع کر دی اور وہاں مورتیاں رکھ دی گئیں۔
سات دسمبر کی رات تک یہ جاننے کی کوشش کرتے رہے کہ انتظامیہ کب وہاں اپنا کنٹرول قائم کرتی ہے۔ اچانک صبح چار بجے کچھ ہلچل سی نظر آئي۔ جب ایودھ پہنچے تو دیکھا کہ انتظامیہ نے باقی ماندہ چند کارسیوکوں کو بھگا کر عارضی مندر کو اپنے کنٹرول میں لے لیا ہے، اور نیم فوجی دستے کے سپاہی عقیدت اور احترام میں رام (کے بچپن کی مورتی) کی زیارت کر رہے ہیں اور آشیرواد لے رہے ہیں۔ ہم نے بھی کچھ تصاویر لیں اور افسروں سے بات کی۔
اگر آپ چھ دسمبر کے پورے واقعے پر نظر ڈالیں تو آپ پائیں گے کہ اس دن صرف بابری مسجد نہیں ٹوٹی بلکہ اس دن ہندوستان کے آئین کی تینوں شاخ مقننہ، انتظامیہ اور عدلیہ کی ساکھ بھی ٹوٹ گئی۔ طاقت کو تقسیم کرنے کا وفاق کا مفروضہ ٹوٹا، قانون کی حکمرانی کی بنیاد ٹوٹی، جمہوریت کا چوتھا ستون یعنی میڈیا بھی کارسیوکوں کے حملے کا شکار ہوا اور اس کے ساتھ ہی سنگھ پریوار کے نظم و ضبط کا دعویٰ بھی ٹوٹا۔

نئی دہلی:ہاتھر س گینگ ریپ کے مجرموں کو بچانے اور اپنی ناکامی کو چھپانے کے لیے یوپی کی حکومت نے جونئی تھیوری پیش کی ہے وہ شرمناک اور متاثرین کے ساتھ ایک اور سنگین ظلم ہے ۔ سرکارکی ذمہ داری ہے کہ وہ مجرموں کو سزا دے اور متاثرین کو انصاف فراہم کرے لیکن حکومت اس پورے معاملہ پر اب فساد کی نئی تھیوری پیش کررہی ہے جس کا صاف مطلب ہے کہ سرکار کی منشاء مجرموں کو بچانا اور مسلمانوں کو بلی کا بکرا بناناہے ۔ ان خیالات کا اظہار آل انڈیا ملی کونسل کے جنرل سکریٹری ڈاکٹر محمد منظور عالم نے کیا ۔پنے ایک بیان میں ڈاکٹر محمد منظور عالم نے کہاکہ ہاتھرس میں جو کچھ ہواہے وہ بیحد شرمناک ہے ۔یہاں صرف ایک معاملہ نہیں ہے بلکہ کئی معاملے ہیں ۔ پہلا معاملہ لڑکی کے ساتھ گینگ ریپ کا ہے ۔ دوسرا معاملہ پولس اور انتظامیہ کی لاپرواہی کا جس نے چودہ دنوں تک کوئی توجہ نہیں دیا ۔ تیسرا معاملہ لڑکی کی لاش کو رات کی تاریکی میں اہل خانہ کی منظوری کے بغیر جلانے کا ہے ۔ چوتھا معاملہ ریپ سے انکارکا ہے ۔ پانچواں معاملہ مجرموں کو بچانے کا ہے ۔ چھٹا معاملہ میڈیا ۔اپوزیشن اور سول سوسائٹی کو کئی دنوں تک وہاں جانے اور متاثرہ کی فیملی سے ملنے سے روکنے کا ہے اور اب سب سے بڑا معاملہ یہ آگیاہے کہ سرکار فساد کی تھیوری پیش کررہی ہے کہ پاپولر فرنٹ آف انڈیا کے ساتھ مل کر کانگریس اور دیگر اپوزیشن پارٹیوں نے ایک سازش کے تحت یہ سب کیا ۔ ان کی منشاء وہاں دنگا اور فساد کرانے کی تھی ۔ یوگی آدتیہ ناتھ ۔ نریندر مودی اور بی جے پی کی شبیہ بگاڑنے کیلئے یہ سب ہاتھر س میں کیاگیا ۔سرکار کی یہ تھیوری ملک اور جمہوریت کیلئے شرمناک ہے ۔ ا س کا مطلب یہ ہے کہ سرکار متاثرہ کے ساتھ انصا ف نہیں کرنا چاہتی ہے ۔ پی ایف آئی اور اپوزیشن کو بلی کا بکرا بناکر اس معاملہ کو ہندو مسلمان کی لڑائی میں بدلنا چاہتی ہے ۔ بی جے پی کی یہ پرانی روش ہے اور اس مرتبہ بھی سرکار اپنی ناکامی چھپانے کیلئے یہی ہتھکنڈ ہ اپنارہی ہے ۔ آل انڈیا ملی کونسل اس کی شدید مذمت کرتی ہے اور یہ امیدہے کہ بھارت کے سیکولر عوام سرکار کی اس گھنائونی سازش کو سمجھیں گے اوراس تھیوری پر بھروسہ کرنے کے بجائے متاثرہ لڑکی کو انصاف دلانے کی مانگ جاری رکھیں گے تاکہ خواتین کا تحفظ یقینی بن سکے ۔شرپسندوں اور درندوں کے دلوں میںقانون کا خوف پیدا ہوسکے ۔

نئی دہلی:مرکزی وزیر اسمرتی ایرانی نے راہل گاندھی کو ہاتھرس کے دورے پر سخت نشانہ بنایا ہے۔ اسمرتی ایرانی نے کہا کہ راہل گاندھی متاثرہ افراد کے انصاف کے لئے نہیں بلکہ سیاست کے لیے ہاتھرس جارہے ہیں۔ راہل گاندھی کے ہاتھرس کے دورے کے پیش نظر دہلی-نوئیڈا ڈائرکٹ فلائی وے پر سکیورٹی انتظامات سخت کردیئے گئے ہیں۔مرکزی وزیر اور بی جے پی رہنما سمرتی ایرانی نے کہاکہ عوام کانگریس کی حکمت عملی سے واقف ہے۔اس لیے انہوں نے 2019 میں بی جے پی کوفتح دلائی ۔ انہوں نے کہاکہ جمہوری ملک میں سیاست دانوں کو روک نہیں سکتے ہیں، لیکن لوگ سمجھتے ہیں کہ راہل گاندھی کا ہاتھرس کا دورہ ان کی سیاست کے لئے ہے، مقتول کو انصاف دلانے کے لئے نہیں۔ آج صبح راہل گاندھی نے ٹویٹ کیا اور کہاکہ ہاتھرس کے اس متاثرخاندان سے ملنے اور ان کے دکھ بانٹنے سے دنیا کی کوئی بھی چیز مجھے روک نہیں سکتی ہے۔یوپی پولیس نے واضح کیا ہے کہ کسی بھی سیاسی جماعت کو گاؤں میں داخلے کی اجازت نہیں ہوگی۔ نوئیڈا پولیس نے کہا ہے کہ وہ راہل گاندھی اور دیگر رہنماؤں کو دہلی-نوئیڈا بارڈر سے آگے نہیں بڑھنے دیں گے۔ خیال کیا جارہا ہے کہ راہل اور پرینکا اور دیگر رہنما دوپہر کے بعد ہاتھرس کے لیے روانہ ہوں گے۔ اسی دوران ہاتھرس صدر کے ایس ڈی ایم پریم پرکاش نے کہا کہ میڈیا کو گاؤں میں متاثرہ کے لواحقین سے ملنے کی اجازت ہے، کیوں کہ اب ایس آئی ٹی کی تحقیقات مکمل ہوچکی ہیں۔

ترجمہ:نایاب حسن
عموماً ہندوستانی ریاستوں اور خاص طور پر یوپی میں مضبوط سیاسی ڈھانچہ اور سماجی (طبقاتی) اشتراک ہی الیکشن میں کامیابی حاصل کرتا، اقتدار سنبھالتا اورتھانوں کو کنٹرول کرتا ہے۔ تھانہ جو انتظامیہ کا سب سے کم تر درجے کا یونٹ ہوتا ہے،مگراس کا شہریوں کے ساتھ سب سے زیادہ رابطہ ہوتا ہے۔ اگر آپ لکھنؤ میں برسرِ اقتدار ہیں تو آپ ہی فیصلہ کریں گے کہ ان مقامی پولیس اسٹیشنوں کے پولیس آفیسر انچارج کون ہوں گے۔ اگر آپ ایک مضبوط ذات پات پر مبنی سیاسی دھارے سے آتے ہیں یا آپ اپنی برادری کے تئیں وفادار ہیں تو ممکن ہے کہ ان تھانوں کے ذمے داران یا تو ایک ہی ذات پات کے ہوں گے یا سیاسی طور پر غالب برادری کی طرف زیادہ جھکاؤ رکھتے ہوں گے۔ اس کا منطقی انجام یہ ہوگا کہ حکمراں برادری اور اس کے اتحادیوں سے باہر کی برادریوں سے تعلق رکھنے والوں کے لیے انصاف تک رسائی مشکل ہوگی۔
ہاتھرس کا چونکانے والا واقعہ سیاسی طاقت، ریاست کے طریقۂ کار اور سماجی حرکیات کے مابین اسی سنگین گٹھ جوڑ کا عکاس ہے۔ جب یوپی میں سماج وادی پارٹی برسر اقتدارتھی ،تب یادو انتظامی ڈھانچے پر حاوی تھے اور مقامی تھانے بنیادی طور پر یادو کا گڑھ مانے جاتے تھے۔ جب بہوجن سماج پارٹی اقتدار میں تھی ، تو دلتوں( جوعموماً اقتدار سے باہر ہوتے ہیں) کو مقامی پولیس تک زیادہ رسائی حاصل تھی۔ مگر بھارتیہ جنتا پارٹی ہندووں کو وسیع تر ہندو شناخت کا احساس دلاکر مجتمع کرکے انتخابات میں کامیابی حاصل کرتی ہے،جس کا مطلب یہ ہے کہ سیاسی طور پر مسلمانوں کی کوئی نمائندگی نہیں ہوگی ، جو ریاستی اداروں تک ان کی رسائی کو محدود کرتی ہے؛ لیکن خاص بات یہ ہے کہ ہندووں کے داخلی طبقاتی اختلاف کی وجہ سے بی جے پی کی زیرقیادت انتظامیہ نہ صرف مسلمانوں کو ریاستی اداروں سے دور رکھتی ہے؛بلکہ وہ خود ہندووں کی بعض برادریوں کو بعض دوسری برادریوں پر فوقیت دیتی ہے۔
در حقیقت یہی چیز ہمیشہ ہندو ووٹ کو متحد کرنے کی بی جے پی کی کوششوں کی راہ میں رکاوٹ رہی ہے۔ پچھلے چھ سالوں کے دوران پارٹی نے زیادہ سے زیادہ ہندووں کو اپنے اندر سمونے کوشش کی ہے اور بی جے پی کو ایک ایسی پارٹی کے طورپر پیش کیا گیا ، جو تمام ہندو ذاتوں کو قبول کرتی ہے اور روایتی اعلی ذات کی طرف جھکاؤ سے اوپر اٹھ کر سوچتی ہے۔اسی وجہ سے نہ صرف دلتوں نے بڑی تعداد میں بی جے پی کو ووٹ دیا ہے؛ بلکہ اِس وقت بی جے پی میں دلت عوامی نمائندوں کی تعداد سب سے زیادہ ہے اور انھیں پارٹی کے بنیادی ڈھانچے میں جگہ دینے کی کوشش کی گئی ہے؛ لیکن یوپی میں بی جے پی کا یہ اصول روایتی طبقاتی کشمکش اور اعلیٰ ذات کی برتری کے رجحان سے مسلسل متصادم ہے۔ یوگی حکومت ٹھاکروں کی حامی مانی جاتی ہے،سو وہاں پولیس کے طریقۂ کار میں واضح تعصب پایا جاتا ہے اورٹھاکروں کے علاوہ دوسرے سماجی طبقات کو حاشیے پر ڈالنے کی کوشش کی جاتی ہے۔ ہاتھرس صرف ایک انسانی المیہ اور یوپی حکومت کی انتظامی ناکامی نہیں ہے؛بلکہ یہ بی جے پی کی سیاسی ناکامی بھی ہے۔ اسے یہ سمجھنا چاہیے کہ مختلف برادریوں کے مابین ہم آہنگی انصاف کے بغیر ممکن نہیں ہے۔

پٹنہ:بہاراسمبلی انتخابات میں سیاسی جماعتوں کے ذریعہ ایک دوسرے پر الزامات لگانے کا دور چل رہا ہے۔ آر جے ڈی لیڈرتیجسوی یادونے کابینہ کی پہلی میٹنگ میں 10 لاکھ لوگوں کو مستقل ملازمت دینے کا وعدہ کیا ہے۔ اس پراین ڈی اے جملے بازی کررہاہے ۔ آر جے ڈی نے این ڈی اے اتحاد میں شامل افراد کو کنویں کے مینڈک سے تشبیہ دی ہے۔ آر جے ڈی کے آفیشل ٹویٹر ہینڈل کے ایک ٹویٹ میں کہاگیاہے کہ آپ جوکچھ بھی کر سکتے ہو ، کر کے دکھاؤ!۔ این ڈی اے نے 15 سالوں میں ثابت کیاہے کہ اس کے بس میں جھوٹ بولنے کے لیے کچھ نہیں ہے۔ وہ بیوقوف کنویں کے مینڈک ہیں جو کہتے ہیں کہ 10 لاکھ نوکری دیناممکن نہیں۔سارا بلیوپرنٹ یہاں تیارہے۔

نئی دہلی:بی جے پی کے رکن پارلیمنٹ تیجسوی سوریہ نے دعوی کیا ہے کہ بنگلور دہشت گردی سرگرمیوں کا مرکز بن گیا ہے ۔ اسی سلسلے میں انہوں نے مرکزی وزیر داخلہ امیت شاہ سے ملاقات کی ہے اور مطالبہ کیا ہے کہ کرناٹک کے دارالحکومت میں قومی تفتیشی ایجنسی (این آئی اے) کا مستقل دفتر قائم کیا جائے۔ بھارتیہ جنتا یووا مورچہ (بی جے وائی ایم) کا صدر مقرر کئے جانے کے اگلے ہی دن سوریہ نے کہا کہ بنگلورو میں بہت سے دہشت گردوں کے اڈوں کا پردہ فاش ہوا ہے۔ سوریہ نے دعوی کیا کہ دہشت گرد تنظیمیں شہر کو اپنی سرگرمیوں کا مرکز بنانا چاہتی ہیں۔ سوریہ نے بتایا کہ اس سلسلے میں دو دن قبل انہوں نے وزیر داخلہ امیت شاہ سے ملاقات کی اور بنگلورو میں این آئی اے کا دفتر کھولنے کی تاکید کی، جو جدید سہولیات سے آراستہ ہو اور جہاں ملازمین کی تعداد کافی ہو۔ انہوں نے کہاکہ وزیر داخلہ نے مجھے یقین دلایا ہے کہ وہ جلد از جلد پولیس سپرنٹنڈنٹ کے عہدے کے افسر کی نگرانی میں مستقل دفتر کھولنے کی ہدایت دیںگے۔لوک سبھا میں جنوبی بنگلور سیٹ کی نمائندگی کرنے والے سوریہ نے کہاکہ ہندوستان کی سلیکن ویلی گذشتہ چند سالوں میں دہشت گردی کی سرگرمیوں کا ایک مرکز بن چکا ہے۔ یہ تفتیشی ایجنسیوں کی گرفتاریوں اور دیگر انکشافات سے بھی واضح ہو گیا ہے۔ بی جے پی میں نئی ذمہ داری کے بارے میں انہوں نے کہا کہ وہ پہلے بی جے وائی ایم صدر کی حیثیت سے بہار کا دورہ کریں گے اور پارٹی کے نوجوان کارکنوں سے ملاقات کریں گے۔ بہار میں اسمبلی انتخابات اکتوبر اور نومبر میں تین مراحل میں ہوں گے۔

نئی دہلی:بی جے پی کی قومی نائب صدر اور مدھیہ پردیش کی سابق وزیراعلیٰ اوما بھارتی نے رشی کیش اور ہری دوار کے مابین ایک جگہ پرخود کوآئسولیٹ کرلیا ہے۔ اوما بھارتی نے ٹویٹ کرکے یہ معلومات دی ہیں۔ انھوں نے اپنے ساتھ رابطے میں آنے والے تمام لوگوں سے کہا ہے کہ وہ اپنا کورونا ٹیسٹ کروائیں اورانہیں محتاط رہناچاہیے۔ انہوں نے اپنے ٹویٹ میں اس بات کی تصدیق کی ہے کہ وہ کوروناوائرس سے متاثر ہیں۔ اوما بھارتی اتراکھنڈمیں ہیں۔اس دوران انھوں نے بیمار ہونے پرخودکوالگ کرلیا ہے۔ اوما بھارتی نے آج آدھی رات کو ٹویٹ کیاہے کہ میں یہ بات آپ کے نوٹس میں ڈال رہی ہوں کہ میں نے اپنے پہاڑی سفرکے اختتام کے آخری دن انتظامیہ سے گزارش کرتے ہوئے کورونا ٹیسٹ ٹیم کو بلایاکیونکہ تین دن سے زیادہ سے ہلکا بخارتھا۔انہوں نے کہاہے کہ میں نے ہمالیہ میں کوویڈ کے تمام قانونی اور معاشرتی فاصلے پر عمل کیا ہے،اس کے باوجودمیں کوروناپوزیٹیوہوگئی ہوں۔اوما بھارتی نے ٹویٹ کیاہے کہ میرے بھائی اور بہن جو بھی میرے ساتھ رابطے میں آئے ہیں یا اس ٹویٹ کو جانتے ہیں،ان سے میری اپیل ہے کہ وہ ان کی کورونا ٹیسٹ کروائیں اور احتیاطی تدابیراختیارکریں۔

چنڈی گڑھ:وزیراعلیٰ پنجاب کیپٹن امریندر سنگھ نے شرومنی اکالی دل کے قومی جمہوری اتحاد (این ڈی اے) چھوڑنے کے اقدام کو بادل خاندان کی مایوسی کے ساتھ سیاسی مجبوری کامعاملہ قرار دیاہے۔ وزیراعلیٰ نے کہاہے کہ زرعی بل پربی جے پی کی عوامی تنقیدکے بعدبادل خاندان کے پاس کوئی دوسراآپشن نہیں بچاتھا۔ہفتہ کی رات کی میٹنگ میں اکالی دل کے فیصلہ سازلوگوں نے متفقہ طور پر بی جے پی کے زیرقیادت این ڈی اے چھوڑنے کافیصلہ کیاہے۔ کیونکہ مرکزنے کم سے کم سپورٹ قیمت پرکسانوں کی فصلوں کی یقین دہانی کی مارکیٹنگ کے تحفظ کے لیے قانون سازی کی ضمانت دینے سے انکار کردیا ہے۔ یہ اجلاس اکالی دل کے صدر سکھبیر سنگھ بادل کے زیرصدارت ہوا اور این ڈی اے چھوڑنے کا فیصلہ اجلاس کے اختتام پرآیاجوتین گھنٹے سے زیادہ جاری رہا۔امریندر سنگھ نے کہاہے کہ شرومنی اکالی دل (ایس اے ڈی) کے اس فیصلے میں کوئی اخلاقی بنیادنہیں ہے۔ وزیراعلیٰ نے کہاہے کہ اکالیوں کے پاس ان سے پہلے کوئی چارہ نہیں تھاکیونکہ بی جے پی نے پہلے ہی یہ واضح کردیاتھاکہ اس نے ایس ڈی پرالزام لگایاتھاکہ وہ کسانوں کو زرعی بلوں کی بھلائی کے بارے میں راضی کرنے میں ناکام رہاہے۔

چنڈی گڑھ:بی جے پی کی اتحادی شرومنی اکالی دل کے سربراہ سکھبیر سنگھ بادل نے ہفتہ کے روزپنجاب حکومت سے مطالبہ کیاہے کہ فوری طور پر ایک آرڈیننس سامنے لایا جائے جس کے تحت ریاست کے زرعی بلوں کو یہاں پر لاگو ہونے سے روکنے کے لیے پوری ریاست کو زرعی مارکیٹ قرار دیا جائے۔ انھوں نےایک بیان میں کہاہے کہ وزیراعلیٰ کیپٹن امیندر سنگھ کو دن بھر اکالی فوبیامیں مبتلارہنے اوراپنے مخالفین کے خلاف بدنیتی پر مبنی الزامات عائد کرنے کی بجائے کسانوں کی حفاظت کے لیے اقدامات کرنے چاہئیں۔بادل نے کہاہے کہ پنجاب میں مرکز کے نئے قوانین کو روکنے کا واحد طریقہ یہ ہے کہ پوری ریاستی منڈی کو زرعی پیداوار کی منڈی قرار دیا جائے۔انھوں نے کہاہے کہ جس بھی علاقے کو مارکیٹ قرار دیا جائے گا وہ نئے قانون کے دائرے سے باہرہوگا۔

نئی دہلی:لیڈران کی جانب سے ایک دوسرے کو نشانہ بنانے کے دورمیں بہار اسمبلی انتخابات میں شدت آگئی ہے۔ کسان بل پر احتجاج کے دوران پپو یادو کی پارٹی جن ادھیکار پارٹی اور بی جے پی کارکنان کے درمیان جھڑپ ہوئی۔بی جے پی کارکنوں پرپپو یادوکے حامیوں کو پیٹنے کا الزام لگایا گیا ہے۔ پپو یادوکے حامی بی جے پی کے دفتر کا محاصرہ کر رہے تھے۔ اس دوران بی جے پی کارکنوں نے انھیں لاٹھیوں اور ڈنڈوں سے پیٹا۔ ہفتہ کے روز بہار کے سابق وزیر صحت اور آر جے ڈی رہنما تیج پرتاپ یادونے اس واقعے پرطنزکیاہے۔تیج پرتاپ یادونے ہفتے کے روز ایک ٹویٹ میں لکھاہے کہ تمام لوگوں کو مطلع کیا جاتا ہے کہ بہار بی جے پی کے دفتر سے گزرتے ہوئے انہیں لاٹھیاں ساتھ رکھنی ہوں گی ۔ بصورت دیگر وہ کچل دیئے جائیں گے۔کوشاشن باقی رہے گا لیکن خاموش تماشائی بن کر۔ اس واقعے پر جن ادھیکار پارٹی کے صدر اور سابق رکن اسمبلی پپو یادونے کہاہے کہ بہارکے عوام کسانوں کے لیے احتجاج کرنے والے ہمارے معزز سابق ایم ایل اے رام چندر یادو جی پربی جے پی کے غنڈوں کے حملے کا زبردست جواب دیں گے۔کسان مخالف نریندر مودی اور ان کے دہشت گردوں کو عوام جواب دے گی۔

نئی دہلی:بھارتیہ جنتا پارٹی (بی جے پی) نے پارٹی میں بہت ساری اہم تبدیلیاں کی ہیں۔ بی جے پی نے پارٹی کے قومی نائب صدر،قومی جنرل سکریٹری ، قومی جنرل سکریٹری (تنظیم) ، قومی کوآپریٹو جنرل سکریٹری اور قومی ترجمان سمیت متعدد اہم عہدوں میں تبدیلی کرتے ہوئے نئے چہروں کوبھی موقع فراہم کیا ہے۔اس کے ساتھ ہی بی جے پی نے تیجسوی سوریہ کوبھارتیہ جنتا یووا مورچہ کی کمان سونپی ہے۔بی جے پی کے قومی صدر جے پی نڈا نے بی جے پی کے مرکزی عہدیداروں کے ناموں کا اعلان کیا ہے۔ اس دوران بہت سارے بڑے لیڈروں کواہم عہدوں سے ہٹا دیا گیاہے اور نئے چہروں کوموقع دیاگیا ہے۔ نئے چہروں میں ، بی جے پی نے تیجسوی سوریہ کو یووا مورچہ کے قومی صدر کی ذمہ داری سونپی ہے۔ تیجسوی سوریہ سے پہلے پونم مہاجن یووا مورچہ کی قومی صدرتھیں۔تیجسوی سوریہ جنوبی بنگلورو لوک سبھاسیٹ سے بی جے پی کے رکن پارلیمنٹ ہیں۔ تیجسوی سوریہ پیشے کے لحاظ سے وکیل ہیں اور کرناٹک ہائی کورٹ میں بھی وکالت کرتے ہیں۔ اپنے متنازعہ بیانوں کے لیے مشہور تیجسوی سوریہ اس سے قبل بی جے پی یوتھ مورچہ کے ریاستی جنرل سکریٹری رہ چکے ہیں۔

ممبئی:بھارتیہ جنتا پارٹی (بی جے پی)کے لیڈر اور مہاراشٹرکے سابق وزیراعلیٰ دیویندر فڑنویس اورشیوسیناکے ممبرپارلیمنٹ سنجے راوت کے مابین ایک ملاقات ہوئی ہے۔ مہاراشٹر میں شیوسیناکی کانگریس اور این سی پی کے ساتھ مخلوط حکومت کے قیام کے بعد شاید دونوں لیڈروں کے درمیان یہ پہلی ملاقات ہے۔دیویندر فڑنویس اور سنجے راوت نے ممبئی کے ایک ہوٹل میں ملاقات کی۔ دراصل سنجے راوت شیوسینا کے ترجمان سامناکے لیے فڑنویس کا انٹرویو لینے جارہے ہیں۔ اسی دوران فڑنویس نے کہاہے کہ اس انٹرویو کو ترمیم کیے بغیر ہی شائع کرناچاہیے۔ نیزیہ بہار انتخابات کے بعد کیا جائے گا۔تاہم اس ملاقات کے پیچھے کسی بھی سیاسی خواہش کی تردیدکی جارہی ہے۔فی الحال دیویندر فڑنویس کی توجہ بہاراسمبلی انتخابات2020 پرمرکوزہے۔بہار کے انتخابات کے لیے بی جے پی نے دیویندر فڑنویس کو انتخابی انچارج مقرر کیا ہے۔بہارانتخابات کی تاریخوں کا بھی اعلان کردیا گیا ہے اور اس کے نتائج 10 نومبر کو آنے ہیں۔

لکھنؤ:سماج وادی پارٹی (ایس پی) کے صدر اکھلیش یادو نے مطالبہ کیا ہے کہ کورونا سے نمٹنے کے لئے بنائے گئے پی ایم کیئرز فنڈ کو عوام کیئرز فنڈ میں تبدیل کیا جائے۔ بدھ کے روز ایک ٹویٹ میں انہوںنے کہاکہ کیا بی جے پی جو انتخابی ریلی کے لئے لاکھوںایل ای ڈی ٹی وی پر اربوں روپئے خرچ کرتی ہے اس کے پاس اساتذہ اور طالب علموں کی آن لائن تعلیم کاانتظام کرنے کے لئے فنڈ نہیں ہے؟ انہوں نے کہا کہ بی جے پی حکومت ایمانداری کے ساتھ پی ایم کیئرس فنڈ کو عوام کیئرس فنڈ بنائے اور ملک کے مستقبل کی فکر کرے ۔ اکھلیش نے ٹویٹ کے ساتھ اپنی حکومت کے دور میں طلباء میں مفت لیپ ٹاپ تقسیم کرنے کی تصاویر بھی پوسٹ کیں۔ ایس پی صدر نے کورونا انفیکشن کی موجودہ صورتحال کے درمیان اسکول کھولنے کی بھی مخالفت کی۔ انہوں نے کہا کہ کورونا بحران میں تدریسی سیشن کو مستقل رکھنے کے لئے اسکولوں کا کھولنا کوئی محفوظ متبادل نہیں ہے۔ حکومت غریب خاندانوں میں فی طالب علم ایک سمارٹ فون، انٹرنیٹ نیٹ ورک اور بجلی فراہم کرے۔ نیز اساتذہ کو گھر پر ڈیجیٹل تعلیم کے لئے مفت ہارڈ ویئر دیں۔

سماجی کارکن و آرٹی آئی ایکٹوسٹ ساکیت گوکھلے نے شہزاد علی کو بتایا راشٹریہ علما کونسل کے دہلی چیپٹر کا سکریٹری،ثبوت کے طورپر ٹوئٹر پر پارٹی کا تقرری لیٹر بھی شیئر کیا

نئی دہلی:(قندیل نیوز) نیوز ایجنسی اے این آئی نے اپنے ٹوئٹر ہینڈل پرچار بج کر بیس منٹ پرچند تصویروں کے ساتھ ایک مختصر سی خبر پوسٹ کی جس میں لکھا تھا کہ’’شاہین باغ کے سوشل ایکٹوسٹ شہزاد علی نے دہلی بی جے پی صدر آدیش گپتا اور پارٹی لیڈر شیام جاجو کی موجودگی بی جے پی میں شمولیت اختیار کرلی۔ اس موقعے پر انھوں نے کہا کہ میں نے بی جے پی میں اس لیے شمولیت اختیار کی ہے کہ اس تصور کو غلط ثابت کرسکوں کہ بی جے پی مسلمانوں کی دشمن ہے۔ ہم مل کر ان سے سی اے اے سے متعلق مسلمانوں کے خدشات پر بات کریں گے‘‘۔

یہ خبرٹوئٹر پر اپلوڈ ہوتے ہی وائرل ہو گئی اور جہاں ایک طرف عام آدمی پارٹی اور کانگریس والے اسے اپنے حق میں استعمال کرتے ہوئے یہ ثابت کرنے میں لگ گئے کہ شاہین باغ کا احتجاج بی جے پی کے ذریعے اسپانسرڈ تھا،وہیں دوسری طرف مختلف سماجی کارکنان اور شاہین باغ احتجاج کا حصہ رہنے والے افراد شہزاد علی کے متعلق سوالات اٹھانے لگے۔ زیادہ تر لوگوں کا کہناہے کہ شہزاد علی شروع سے آخر تک شاہین باغ موومنٹ میں کہیں بھی نہیں تھا اور ہم نے کبھی اس کا نام بھی نہیں سنا،جبکہ کچھ لوگوں نے یہ کہاکہ شاہین باغ کا رہایشی ہونے اور شاہین باغ احتجاج کا حصہ رہنے میں فرق ہے اور ممکن ہے کہ یہ شخص شاہین باغ کا باشندہ ہو مگر اس کا این آرسی اور سی اے اے کے خلاف شاہین باغ میں تقریبا تین ماہ تک چلنے والے احتجاج سے کوئی تعلق نہیں تھا۔

وہیں دوسری طرف معروف سماجی کارکن اور آرٹی آئی ایکٹوسٹ ساکیت گوکھلے نے اپنے ٹوئٹر ہینڈل پر دو تصویریں شیئر کی ہیں،جن میں سے ایک راشٹریہ علماکونسل کے لیٹر پیڈ پر جاری ہونے والا تقرری نامہ ہے،جس میں یہ لکھا ہے کہ شہزاد علی کو دہلی پردیش کا سکریٹری بنایا جاتا ہے اور ساتھ ہی پارٹی کی توسیع و فروغ کی امید جتائی گئی ہے۔

اس خط کے اجرا کی تاریخ 11فروری 2019درج ہے۔ اور راشٹریہ علماکونسل دہلی کے صدر ایس ایم نوراللہ کے دستخط سے جاری ہوا ہے۔ ساکیت گوکھلے نے ایک دوسری تصویر انگریزی نیوز ویب سائٹ’’فرسٹ پوسٹ‘‘پرشائع شدہ علماکونسل کے قومی صدر مولانا عامر رشادی کے ایک انٹرویوکی شیئر کی ہے،جس میں انھوں نے ملک کی مبینہ سیکولر پارٹیوں پر تنقید کی تھی اورعلما کو نشانہ بناتے ہوئے کہا تھاکہ انھوں نے مسلمانوں کو نام نہاد سیکولر پارٹیوں کی حمایت پر اکساکر انھیں بی جے پی کا دشمن بنادیا ہے۔ یہ انٹرویو مذکورہ ویب سائٹ پر موجود ہے۔ ٹوئٹر پر شہزاد علی کی راشٹریہ علما کونسل کے لیڈروں کے ساتھ کئی تصویریں بھی گشت کر رہی ہیں۔ البتہ پارٹی کی طرف سے ابھی اس پر کوئی وضاحت نہیں آئی ہے۔

بہر کیف ٹوئٹر پر شام سے ہی یہ خبرٹرینڈ کررہی ہے اور مختلف قسم کے لوگ اپنی اپنی سوچ اور سمجھ کے مطابق مختلف آرا کا اظہار کررہے ہیں۔