بہترتعلیم اورروزگارکے لیے نوجوان نقل مکانی پرمجبور:چراغ پاسوان

پٹنہ:

تین انجن کی سرکارمیں شامل لوک جن شکتی پارٹی (ایل جے پی) کے قومی صدر چراغ پاسوان نے کہاہے کہ بہتر تعلیم اورروزگارکے لیے بہار کے نوجوانوں کو مجبوراََجانا پڑتاہے۔بہار فرسٹ بہاری فرسٹ سفر کے دوران چراغ نے کہاہے کہ بہار کے باہر بہاریوں کو احساس کمتری سے دیکھا جاتا ہے، جس کا انہیں کافی دکھ ہے۔ چراغ نے کہاہے کہ ایک وقت تھا،جب ملک-دنیا سے لوگ اعلیٰ تعلیم کے لیے بہارآتے تھے۔ نالندہ اور وکرم شیلا یونیورسٹیوں کی پوری دنیا میں پہچان تھی،لیکن آج بہارکے نوجوان بہتر تعلیم اور روزگارکے لیے دوسرے علاقوں میں جانے پر مجبور ہیں۔ اس صورت حال کوتبدیل کرناہے۔ بتا دیں، چراغ ان دنوں بہارفرسٹ بہاری فرسٹ سفرکے لیے بہار کے دورے پرہیں۔اس سفر کے دوران وہ ریاست کے تمام اضلاع میں پہنچ کر رابطہ مہم چلا رہے ہیں اور 14 اپریل کو پٹنہ کے گاندھی میدان میں ہونے والی ایل جے پی کی بہار فرسٹ بہاری فرسٹ ریلی کے لیے لوگوں کومدعوبھی کررہے ہیں۔سفر کے دوران منعقد عوامی جلسوں میں امڑ رہی بھیڑاور لوگوں کے عوامی حمایت سے ایل جے پی کارکن کافی پرجوش ہیں۔اس سفرکونتیش کمار پرزیادہ سیٹوں کے لیے دبائوبنانے کی کوشش بھی سمجھاجاسکتاہے ۔سفرکے دوسرے مرحلے میں شمالی بہار کا دورہ کر رہے چراغ اس سے پہلے سمستی پوراور دربھنگہ پہنچے تھے، جہاں ایل جے پی کارکنوں اور حامیوں کی بھاری بھیڑ کی طرف سے نوجوان لیڈر کا پختہ خیر مقدم کیاہے۔یہاں انہوں نے کہا کہ آزادی کے ستر سال بعد بھی بہارکی اتنی ترقی نہیں ہو پائیی ہے، جتنی ہونی چاہیے۔سوال یہ ہے کہ چھ سال سے مرکزاورپندرہ سال سے ریاستی حکومت میں شامل ایل جے پی اس کے لیے کیوں ذمے دارنہیں ہے؟کیانتیش حکومت ناکام ہوئی ہے۔ایل جے پی صدر نے کہا کہ وزیراعلیٰ نتیش کمار کی قیادت میں گزشتہ 15 برسوں میں بہارمیں کافی کام ہواہے۔لیکن ابھی اور بھی کام ہونا باقی ہے، جس سے بہارتیار صوبہ بن سکے۔ اس کے لیے تعلیم، صحت اوربنیادی ڈھانچہ کومضبوط کرنا ہوگا۔ انہوں نے کہاہے کہ اگلے اسمبلی انتخابات میں این ڈی اے اتحاد کی جیت پکی ہے اورپھرسے نتیش جی کی قیادت میں ایک مضبوط حکومت کا قیام ہوگا۔ نتیش جی نے 15 برسوں میں بہار میں ترقی کی مضبوط زمین تیار کر دی ہے۔ اب اسی پلیٹ فارم سے ترقی کی نئی پرواز درج کرناہے۔ دوسرے ترقی یافتہ علاقوں کے مقابلے میں بہار صرف کافی پیچھے ہے۔