بابری مسجد

(464 سالہ بابری مسجد کا 107سالہ قضیہ)

6 دسمبر 1992 کو بابری مسجد کے دہشت گردانہ انہدام کے بعد ایک طرف جہاں مسلمان صدمہ میں تھے وہیں دوسری طرف بی جے پی اور اسی قبیل کی دوسری شرپسند جماعتوں نے خوشیاں منائیں اور مٹھائیاں تقسیم کیں۔۔ان شرپسند جماعتوں سے وابستہ کارسیوکوں نے مختلف اخبارات کے صحافیوں کو جو بیانات اور انٹرویو دئے تھے ان میں اعتراف کیا تھا کہ انہوں نے اپنے لیڈروں کے جوش دلانے پر بابری مسجد کو ڈھاکر ’غلامی کے کلنک‘ کو مٹادیا ہے۔
تیسری طرف کانگریس پارٹی میں ایک طبقہ نرسمہاراؤ کے خلاف غصہ میں تھا۔۔نرسمہاراؤ نے‘اس وقت ٹی وی پر آکر قوم سے خطاب کیا جب سب کچھ ختم ہوچکا تھا۔۔انہوں نے یوپی کی بی جے پی حکومت پر حلف شکنی کا الزام لگایا اور اعلان کیا کہ بابری مسجد کو اسی جگہ از سر نو تعمیرکیا جائے گا۔
یہاں یہ بتانا بہت اہم ہوگا کہ کانگریس میں اس وقت کئی مسلم قائد موجود تھے۔۔ان میں سے کچھ تو وزیر بھی تھے۔غلام نبی آزاد‘احمد پٹیل اور سی کے جعفر شریف چند بڑے نام تھے۔ موخرالذکر اب زندہ نہیں ہیں لیکن جب دوسری صف کے مسلم قائدین ان سب کے ساتھ اکٹھے ہوکر نرسمہا راؤ سے ملنے گئے تو ان کا ارادہ استعفی دینے کا تھا۔۔سی کے جعفر شریف تو جیب میں استعفی رکھ کر لے گئے تھے۔۔ان لیڈروں کے ساتھ ہفت روزہ نئی دنیاکے ایڈیٹر اور مشہور صحافی شاہد صدیقی بھی تھے۔۔ وہ بھی بہت غصہ میں تھے۔۔اور بقول ان کے انہوں نے نرسمہاراؤ کو بہت سخت سست کہا بھی تھا۔۔ والله اعلم بالصواب۔ لیکن یہ مسلم لیڈرجب راؤ کے دربار میں پہنچے تو سب کا غصہ ٹھنڈا ہوچکا تھا اور کسی نے اپنی جیب سے استعفی نہیں نکالا۔
شرپسندوں کے حوصلے بلند تھے اور اب وہ نعرے لگارہے تھے کہ اب متھرا اور کاشی کی باری ہے۔ نرسمہاراؤ پراپوزیشن کا مسلسل دباؤ بڑھ رہا تھا۔۔انہوں نے بہر حال پارلیمنٹ سے ایک قانون پاس کرالیا جس کی رو سے 15اگست 1947 کو جس عبادت گاہ کی جو پوزیشن تھی اس کو بدلنا ممنوع قرار دیدیا گیا۔۔اس ایکٹ کو عرف عام میں عبادتگاہوں کے تحفظ کا قانون کہتے ہیں۔۔ لیکن بابری مسجد کے قضیہ کو اس ایکٹ کے نفاذ سے باہر رکھا گیا۔۔کہا یہ گیا کہ چونکہ اس کا معاملہ عدالتوں میں ہے اور وہ انتہائی متنازعہ ہوچکا ہے اس لئے اسے اس ایکٹ سے الگ رکھا گیاہے۔۔ لیکن یہ سمجھ میں نہیں آیا کہ پھر نرسمہاراؤ نے ملک کے وزیر اعظم کی حیثیت سے 6 دسمبر 1992 کی شام ٹی وی پر یہ وعدہ کیوں کیا تھا کہ بابری مسجد کو اسی جگہ از سر نو تعمیر کیا جائے گا؟
مسلمان چونکہ غصہ اور صدمہ میں تھے اور دوسری طرف خوشیاں منائی جارہی تھیں اس لئے انہوں نے جہاں جہاں بن پڑا احتجاج کیا۔۔لیکن ان کا احتجاج کرنا بھی شرپسندوں اور بی جے پی کو گوارا نہ ہوا۔۔ان پر حملے کئے گئے اور مابعد انہدام ملک بھر میں جو فسادات پھوٹے ان میں دو ہزار کے آس پاس بے گناہ جاں بحق ہوگئے۔۔فیض آباد میں بی جے پی کے ایک مسلم لیڈر تک کو نہیں بخشا گیا اوراس کی داڑھی نوچ کر خود اسے آگ کے حوالہ کردیا گیا۔۔اس نے دہائی دی کہ وہ بی جے پی میں ہے لیکن شرپسندوں نے کہا کہ مسلمان تو ہے اس لئے تجھے چھوڑ نے کا کوئی مطلب نہیں۔۔ یہ تمام معلومات اس وقت کے مختلف اخبارات میں شائع ہوئی تھیں۔۔ دنیا بھر سے انٹر نیشنل میڈیا نے بھی اس موقع پر کوریج کی اور پوری دنیا میں بابری مسجد کے انہدام اور مابعد مسلم کش فسادات پر غصہ کا اظہار کیا گیا۔۔شرپسندوں نے بہت سے صحافیوں پر بھی حملے کئے۔
شر پسندوں کے حوصلے بڑھتے چلے گئے اور مسلمان سر اٹھاکر چلنے سے گھبرانے لگے۔۔پورا دسمبر اسی میں گزرگیا۔جنوری 1993 میں بھی حالات سنور نہ سکے۔۔ممبئی‘مالیگاؤں اور بھیونڈی جیسے مقامات بھی فسادات اور فرقہ وارانہ کشمکش سے بہت متاثر ہوئے۔۔ ممبئی میں جنوری 1993میں لگاتار ایک سے زائد بم دھماکے ہوئے اور اسٹاک ایکسچینج کی بلڈنگ سمیت کئی مقامات کو سخت نقصان پہنچا۔۔257 لوگ جان سے ہاتھ دھوبیٹھے۔۔ نہیں معلوم کہ یہ بم دھماکے کس نے کئے تھے۔۔ لیکن پولس اور حکومت کا یہی کہنا تھا کہ یہ بم دھماکے داؤد ابراہیم نے کئے تھے۔اس ضمن میں اس کے خاندان کے کئی افراد کو سزا بھی ہوئی۔ لیکن یہ بھی ہوا کہ اس کے بعد شرپسندوں کے حوصلے بھی ٹوٹ گئے اور مسلمان خوف ودہشت کے سائے سے باہرآئے۔
ادھر انہدام سے پہلے سپریم کورٹ نے جس اسٹیٹس کو (صورتحال کا جوں کا توں رکھنے) کا حکم دیا تھا ہرچند کہ اس میں ہمالیائی تبدیلی آگئی تھی اور بابری مسجد کی جگہ اب مٹی کا ڈھیر اور اس پر رام کی مورتی تھی۔۔اس کی پوجا بھی شروع کردی گئی تھی اور درشن بھی جاری تھے۔۔لیکن مسلمانوں کے لئے اب بھی ’اسٹیٹس کو‘ ہی تھا۔۔الہ آباد ہائی کورٹ نے بھی انہدام کے بعدایک اور ’اسٹیٹس کو‘ لگادیا تھا۔۔ یعنی مسلمان اب بابری مسجد کے ملبہ کے پاس بھی نہیں پھٹک سکتے تھے۔۔اب وہاں پوری طرح شرپسندوں کا قبضہ تھا۔ ملک بھر میں جو فسادات ہوئے تھے ان میں بھی نقصان انہی کا ہوا تھا۔۔ اب وہ ہرطرف سے اور ہر طرح سے ٹوٹ چکے تھے۔۔ یہ فہم سے بالاتر ہے کہ اگر سپریم کورٹ کے حکم کی کھلی خلاف ورزی ہوئی تھی اور یوپی کے وزیر اعلی کلیان سنگھ نے عدالت میں دئے گئے حلف نامہ کی دھجیاں اڑائی تھیں توصورت حال کو درست کرنے کیلئے مرکز ی حکومت کے ہاتھ کس نے پکڑ رکھے تھے۔
نرسمہاراؤ سے تمام اپوزیشن پارٹیاں جو مطالبہ 6 دسمبر 1992 سے پہلے کر رہی تھیں اس پر بابری مسجد کے انہدام کے بعد عمل کیاگیا۔ راؤ نے یوپی کی حکومت کے ساتھ ہی راجستھان اور مدھیہ پردیش کی بی جے پی حکومتوں کو بھی برخاست کردیا۔۔ اس کا کوئی فائدہ نہ ہونا تھا نہ ہوا۔۔ابھی راؤ کے پاس پورے چار سال تھے۔مگر راؤ نے بابری مسجد کی از سر نوتعمیر کیلئے کچھ نہیں کیا۔۔ 1996 میں جب لوک سبھا انتخابات ہوئے تو نرسمہاراؤ نے پوری طاقت جھونک دی اور مسلم مذہبی قائدین کو خریدنے کیلئے تجوریوں کے دہانے کھول دئے۔چونکہ عام مسلمان ان سے سخت ناراض تھے لہذا انہوں نے بعض نام نہاد مسلم قائدین کی خدمات حاصل کیں اور انہیں اس کا ’نذرانہ‘ بھی دیا گیا۔۔ کیا بریلوی‘کیا دیوبندی سبھی کو خریدنے کیلئے اپنے قاصد دوڑائے۔ لیکن مسلمانوں کی ناراضگی میں کمی نہیں آئی اور نرسمہاراؤ کا دوبارہ وزیر اعظم بننے کا خواب بھی بابری مسجد کی طرح منہدم ہوگیا۔ کہتے ہیں کہ نرسمہاراؤ سے کانگریس قیادت خاصی ناراض رہی اور وہ کانگریس میں شجر ممنوعہ بن گئے۔ سونیا گاندھی نے قیادت سنبھالی اور راؤ نواز لوگوں کو حاشیہ پر لگادیا۔ 1996 میں حکومت بی جے پی کی بن گئی اور اٹل بہاری باجپائی وزیر اعظم بن گئے۔ لطف کی بات یہ ہے کہ نرسمہاراؤ نے جن نام نہاد مسلم قائدین اور دانشوروں کو خرید کر ان کی خدمات حاصل کی تھیں 1997 میں ان قائدین اور دانشوروں نے اٹل بہاری باجپائی کیلئے کام کیا۔
اب آئیے ایک بار پھر دسمبر 1992میں لوٹتے ہیں۔۔ بابری مسجد کے مجرمانہ اور دہشت گردانہ انہدام کے بعد یوپی پولیس نے دو ایف آئی آر درج کیں۔۔ پہلی ایف آئی آر (نمبر197-92) لاکھوں نامعلوم کارسیوکوں کے خلاف درج کی گئی۔۔ دوسری ایف آئی آر (نمبر 198-92) بی جے پی کے چند بڑے لیڈروں کے خلاف درج کی گئی۔ان میں ایل کے اڈوانی‘مرلی منوہر جوشی‘اوما بھارتی‘اشوک سنگھل‘ونے کٹیار اور وشنو ہری ڈالمیا وغیرہ شامل تھے۔ اس کے علاوہ 47 ایف آئی آر مزید درج کی گئیں جن میں صحافیوں پر حملے سے متعلق شکایات تھیں۔
اسی کے ساتھ 16دسمبر 1993کو مرکزی وزارت داخلہ نے ریٹائرڈ جسٹس من موہن سنگھ لبراہن کی سربراہی میں ایک کمیشن آف انکوائری بھی قائم کردیا۔اس کمیشن کو لبراہن کمیشن کے نام سے جانا گیا۔بنیادی طورپراس کمیشن کو ان تمام سلسلہ وار واقعات کی تحقیقات کرکے اپنی رپورٹ تین مہینے کے اندر پیش کرنی تھی جوبابری مسجد کے انہدام کا سبب بنے۔اس کی تحقیقات کے لئے 6 نکات قائم کئے گئے تھے جن کی رو سے کمیشن کو یہ بھی تفتیش کرنی تھی کہ انہدام میں حکومت یوپی اور اس کے وزیروں اور افسروں کا کیا کردار رہا‘سیکیورٹی میں کہاں کمی رہی اور مختلف تنظیموں کا کیا کردار رہا۔اسی طرح میڈیا پر حملوں کی بھی تفتیش اسی کمیشن کو کرنی تھی۔۔ ہم اس کمیشن کی تفصیلی رپورٹ پر تیسری قسط میں روشنی ڈالیں گے۔ لیکن اتنا جاننا اہم ہوگا کہ جس کمیشن کو محض تین مہینے کے لئے بنایا گیا تھا اس نے رپورٹ تیار کرنے میں 17سال لگادئے۔ کمیشن کو 48 مرتبہ ایکسٹنشن دیا گیا۔ یہ اپنے آپ میں ایک ریکارڈ بات تھی۔
بابری مسجد اب موجود نہیں تھی۔۔لیکن یوپی حکومت کی سازش کا ایک نیا رخ سامنے آیا۔۔ نامعلوم لاکھوں کارسیوکوں کے خلاف درج ایف آئی آر تو سی بی آئی کو سونپی گئی جو مرکز کے تحت آتی ہے۔لیکن بی جے پی کے بڑے لیڈروں کے خلاف درج دوسری ایف آئی آر کو یوپی کی مقامی انٹلی جنس یونٹ سی آئی ڈی کے سپرد کیا گیا۔پھر 27 اگست 1993 کو تمام معاملات سی بی آئی کے سپرد کردئے گئے۔اس وقت یوپی میں صدر راج نافذ تھا۔اکتوبر 1993 میں سی بی آئی نے اڈوانی اور دوسروں کو سازش کا ملزم مانتے ہوئے چارج شیٹ داخل کردی۔
حیرت انگیز طورپر سی بی آئی کی اسپیشل کورٹ نے مئی 2001 میں بی جے پی کے ان تمام لیڈروں کے خلاف جاری کارروائی کو ختم کردیا۔۔سی بی آئی کو اس کے خلاف اپیل کرنے میں تین سال لگے اور اس نے نومبر 2004 میں الہ آباد ہائی کورٹ کی لکھنؤ بنچ میں بی جے پی لیڈروں کے خلاف کارروائی کو ختم کرنے کے خلاف اپیل دائر کی۔۔اس پر مزید حیرت انگیز طور پر ہائی کورٹ نے 6سال لگائے اورمئی 2010 میں سی بی آئی کی اس اپیل کو یہ کہتے ہوئے خارج کردیا کہ اس میں کوئی دم نہیں ہے۔۔ فروری 2011 میں سی بی آئی نے اس فیصلہ کے خلاف سپریم کورٹ میں اپیل دائر کی۔۔اس پر سپریم کورٹ نے بھی 6 سال لگادئے اور مارچ 2017 میں اڈوانی وغیرہ کے خلاف سازش کے الزامات کو برقرار رکھنے اور اڈوانی وغیرہ اور کارسیوکوں کے خلاف جاری الگ الگ مقدمات کویکجا کرنے کے احکامات دیدئے۔
ادھر 1986 میں مقامی عدالت کے ذریعہ بابری مسجد کا تالہ کھولنے کے حکم کے خلاف جو اسٹیٹس کو الہ آباد ہائی کورٹ نے لگایا تھا اس میں ٹائٹل سوٹ (یعنی بابری مسجد کس کی ملکیت کی زمین پر بنی ہے) کا مقدمہ بھی چل رہا تھا۔اس مقدمہ کا فیصلہ 24 سال بعدستمبر 2010 میں آیا۔تین رکنی بنچ نے 2:1کی اکثریت سے یہ فیصلہ کردیا کہ بابری مسجد اور اس سے ملحق زمین (2.77 ایکڑ) کو تین حصوں میں تقسیم کرکے سنی سینٹرل وقف بورڈ‘ رام للا براجمان اور نرموہی اکھاڑے کو دیدیا جائے۔۔ دو ججوں کی رائے ایک تھی جبکہ تیسرے جج کی رائے مختلف تھی۔۔ لیکن اس نکتہ پر تینوں متفق تھے کہ جس جگہ اس وقت رام کی مورتی رکھی ہے اور جو مسجد کی کلیدی محراب تھی‘ وہی جگہ رام للا براجمان کو دی جائے گی۔۔ حالانکہ تینوں نے یہ تسلیم کیا کہ یہ مورتی 23 دسمبر 1949کی شب میں وہاں رکھی گئی تھی۔
8000 صفحات پر مشتمل اس فیصلہ میں جسٹس سدھیر اگروال نے کہا کہ اندرونی احاطہ پر ہندو مسلم دونوں کا حق ہے۔جسٹس ایس یو خان نے کہا کہ ہندو اور مسلمان دونوں صدیوں سے ایک ساتھ عبادت کرتے آئے ہیں اور یہی اس مقدمہ کی بے مثال خوبی ہے۔۔ انہوں نے اس بات کو تسلیم نہیں کیا کہ بابری مسجد کسی مندر کو توڑ کر بنائی گئی تھی تاہم یہ ضرور کہا کہ بابر کے حکم پر مسجد اس جگہ بنائی گئی تھی جہاں ایک لمبے عرصہ سے ٹوٹے ہوئے مندر کے باقیات پڑے ہوئے تھے۔۔ لیکن باقی دو ججوں نے کہا کہ مسجد مندر کو توڑ کر بنائی گئی تھی۔
بہر حال اس فیصلہ پر مسلمانوں کے تو اتفاق کرنے کا سوال ہی نہیں تھا خود ہندو فریقوں نے بھی اس سے عدم اطمینان ظاہر کیا۔۔نرموہی اکھاڑے کو اس پر اعتراض تھا کہ اسے اندرونی احاطہ سے محروم کردیا گیا اور اسے صرف رام چبوترہ دیا گیا جبکہ رام للا براجمان (بی جے پی وغیرہ) کو 2.77 ایکڑ زمین کی تقسیم پر ہی اعتراض تھا۔۔لہذامئی 2011 میں سپریم کورٹ نے اس فیصلہ پر اسٹے لگادیا۔
اب تین نکتے بہت اہم باقی رہ گئے ہیں۔۔جسٹس لبراہن کمیشن کی رپورٹ‘ سپریم کورٹ کا حتمی فیصلہ اور اڈوانی وغیرہ کو سازش کے تمام الزامات سے بری کرنے کا لکھنؤ کی اسپیشل کورٹ کا تازہ فیصلہ۔۔سچی بات یہ ہے کہ بابری مسجد کے صاف ستھرے قضیہ کو کانگریس‘ بی جے پی‘ان دونوں کی حکومتوں‘مقامی عدالتوں‘ہائی کورٹ اور خود سپریم کورٹ نے بھی خوب الجھایا اور اتنا پیچیدہ بنادیا کہ آخر میں خود سپریم کورٹ کو ہی بابری مسجد کی جگہ ہندوؤں کے حوالہ کرنے کے لئے آرٹیکل 142 کے تحت اپنے انتہائی خصوصی اختیارات کا استعمال کرنا پڑا۔۔ یعنی کوئی ثبوت نہیں‘کوئی شہادت نہیں لیکن چونکہ بابری مسجد کا نام ونشان مٹانا تھا اور مسلمانوں کو محروم کرتے ہوئے جگہ ہندؤں کے حوالہ کرنی تھی اس لئے سپریم کورٹ نے آئین کی سب سے خطرناک دفعہ 142 کا استعمال کرڈالا۔ میں دوبارہ استعمال کر رہا ہوں کہ آئین کی دفعہ 142 سب سے خطرناک ہے۔اور جس دور میں ہم جی رہے ہیں اس میں تو انتہائی خطرناک ترین ہے۔

جب سے” بی جے پی” برسراقتدار آئی ہے، اس وقت سے ہندو مسلم کے مابین بہت ہی دوری ہو نےلگی ہے اور ہر ہندو مسلمانوں کو اپنا جانی و مالی دشمن خیال کرنے لگا ہے۔متعصب ہندو افراد ہر روز کسی نہ کسی صوبہ میں ایک نہ ایک معصوم عن الخطا مسلمان کو فرضی جرائم کی پاداش میں اس وقت تک اپنے ظلم و ستم کا نشانہ بنائے رکھتے ہیں، جب تک کہ اس کی روح قفس عنصری سے پرواز نہیں کر جاتی ہے، ہندو مسلم کے مابین دوری کی اس سے بڑی اور کیا دلیل ہو سکتی ہے؟۔
اسی طرح اس کی حکومت میں جو جسے اور جب چاہتا ہے دھمکی دیتا ہے اور افسوس کہ اس کے خلاف کوئی کاروائی بھی نہیں ہوتی ہے، جس کی وجہ سےظالموں کاظلم آئےدن بڑھتے ہی جا رہا ہے ،اوراب تو عدلیہ بھی ظالموں کے ظلم کے فروغ میں ایک اہم رول اداکررہی ہے ،نیزحکومت و عدلیہ بھی اب یہی چاہتی ہےکہ مسلمانوں پر خوب ظلم و ستم ڈھائے جائیں۔اورمسلمانوں پر ہر چہار جانب سے یلغاریں ہوں اور مسلمانوں کو ظلم و ستم کی چکی میں خوب پیساجائے ،تاکہ انہیں حکومت وعدلیہ کے خلاف کچھ بولنے کی جرأت بھی نہ ہو،اور وہ غلامانہ زندگی جینے پر مجبور ہوجائیں۔
یہی وجہ ہے کہ اب ہندوستان میں نہ ہی مسلمانوں کی جانیں محفوظ ہیں، نہ عزتیں، نہ اموال اور نہ ہی مساجد ومدارس اور خانقاہیں،الغرض سب کچھ غیرمحفوظ ہیں۔
ہر ملک میں ملک سے ظلم وستم کے خاتمے اور ظالم مظلوم کے مابین عدل و انصاف کے قیام کے لیے عدلیہ کا قیام عمل میں آتا ہے اور عدلیہ اسی وقت تک عدلیہ کہلانے کا حق رکھتا ہے،جب تک اس کے ذریعے عوام الناس کوان کے ہر معاملے میں عدل و انصاف ملے اور وہ عدل و انصاف کو اپنا فرض منصبی بھی سمجھتی ہو، نیز اس کے ذریعے ملک میں امن و امان بھی قائم رہے ؛مگر جب عدلیہ ہی خود عدل و انصاف کا جنازہ نکالنے لگے اور ملک میں بدامنی کی فضا قائم کردے،تو پھر ملک میں ظلم و ستم ایک عام سی بات نہیں ہوگی، تو پھر اور کیا ہوگی؟۔
ابھی حال ہی میں یعنی 30 /ستمبر 2020ء کو مسلمانوں کے ساتھ بڑا ظلم و ناانصافی کا مظاہرہ کرتے ہوئے سی بی ائی کی خصوصی عدالت نے 28/سالہ قدیم مقدمہ بابری مسجد انہدام کے تمام ہی ملازمین کو معصوم عن الخطا قرار دے کر بری کر دیا ہے۔
سی بی ائی کی خصوصی عدالت نے ان 32/ ملزمین کو یہ کہتے ہوئے بری کردیا ہے:کہ ان کے خلاف ٹھوس ثبوت فراہم نہیں ہوسکے ہیں ،انہوں نے مسجد انہدام کے لیے مشتعل ہجوم کو روکنے کی کوششیں کی تھیں،سی بی آئی کے ذریعہ فراہم کردہ آڈیواور ویڈیو ریکارڈنگ کی صداقت ثابت نہیں ہوسکی ہے اور یہ بھی کہا:کہ مسجد کی شہادت پہلے سے منصوبہ بند نہیں تھی، یعنی کسی منصوبے کے تحت مسجد کو شہید نہیں کیا گیا تھا، جج ایس کےیادو نے کہا :کہ یہ ایک حادثاتی واقعہ تھا اور حتمی تجزیہ یہ ہے کہ سماج دشمن عناصر نے مسجد کا ڈھانچہ شہید کیا تھا، جب کہ ملزمین انہیں ہجومی اشتعال سے روکنے کی کوششیں کررہے تھے؛ اس لیے یہ ملزمین مجرم نہیں؛بل کہ خیرخواہ ہوئے،(30/ستمبر 2020ء،سماج نیوزسروس ایجنسیاں)۔
جب کہ یہ یہ ایک حقیقت ہے کہ اصل ملزم و مجرم یہی لوگ ہیں، دنیا اچھی طرح جانتی ہے کہ دن کی روشنی میں مکمل منصوبہ بندی کے ساتھ بابری مسجد کو شہید کیا گیا، دنیا نے یہ بھی دیکھا کہ کن لوگوں نے اللہ کے گھر کی بے حرمتی کی اور اسے زمین بوس کردیا، ایسا بھی نہیں ہے کہ ان کے ملزم ہونے کی دلیلیں موجود نہیں ہیں؛ بل کہ آج بھی ویڈیو میں ان کی تصویریں دیکھی جا سکتی ہیں، شاید اسی لیے تو ملکی اور بین الاقوامی میڈیا نے ان کے ویڈیو بنا لیے تھے،کہ کہیں ان کے حامین انہیں معصوم قرار دے کر ان کی رہائی کا اعلان نہ کردے اور ایسا ہی ہوا بھی کہ سی بی آئی کی خصوصی عدالت نے بالآخرسارےحتمی براہین کونظر انداز کرتےہوئے،رکیک ولچر تاویلات کے ذریعے انہیں معصوم قرار دےکررہائی کااعلان کرہی دیا۔
جب کہ 9/نومبر 2020ء کو عدالت عظمی سپریم کورٹ کی پانچ رکنی آئینی بینچ نے بابری مسجد -رام جنم بھومی حق ملکیت پراپناجانب دارانہ اور غیر منصفانہ فیصلہ رام مندر کےحق میں سناتے وقت ،چند حقائق و شواہد کا کھلے لفظوں میں اعتراف بھی کیا تھا ،وہ حقائق وشواہد مندرجہ ذیل ہیں: وہ اعتراف یہ تھا کہ اجودھیامیں سن 1528ء میں ظہیر الدین بابر کے حکم سے ان کے کمانڈر میر باقی نے خالی جگہ میں بابری مسجد تعمیر کیا تھا، وہاں کسی طرح کا کوئی مندر نہیں تھا ،22/ 23/ دسمبر کی رات میں بابری مسجد میں مورتیوں کا رکھناغیرقانونی اور مجرمانہ عمل تھا،جن لوگوں نے جن کے اشاروں سے بابری مسجد کی عزت وحرمت کو تار تار کیا ،ان تمام کو اس کی پاداش میں کیفر کردار تک پہنچانا چاہیے تھا، اسی طرح 6/دسمبر 1992ء کو بابری مسجد شہید کرنا، کسی بھی طرح صحیح نہیں تھا،ان ظالموں نے بابری مسجد شہید کرکے دین اسلام، مسلمان اور شعائراللہ کا مذاق اڑایا ،یہ ظلم بھی ناقابل برداشت تھا۔ اسی طرح ہندوؤں کا ایک دعوی یہ بھی تھا کہ یہاں پہلے سے مندر تھا، جسے توڑ کر بابری مسجد تعمیر کی گئی تھی، اس دعوٰی بےبنیاد کو بھی عدالت عالیہ نے یہ کہہ کر مسترد کر دیا کہ بابری مسجد کی داغ بیل خالی جگہ میں ڈالی گئی تھی، وہاں کبھی بھی کسی طرح کا کوئی مندر نہیں تھا۔نیز ان کاایک دعوٰی یہ بھی تھاکہ آثارقدیمہ کی کھدائی میں کچھ ایسےڈھانچےبھی دستیاب ہوئےتھے،جن سےصاف معلوم ہوتا تھا کہ پہلےوہاں مندرتھا،جسےتوڑ کربابری مسجد بنائی گئی تھی ،سپریم کورٹ نے ہندوؤں کےاس باطل دعوٰی کوبھی یہ کہہ کر ردی کی ٹوکری میں ڈال دیاکہ آثار قدیمہ کی کھدائی میں کوئی ایک بھی ایساڈھانچہ نہیں مل سکا،جس سے یہ دعوٰی قائم کیاجاسکے کہ "بابری مسجد "کی جگہ پہلے”مندر”تھا،جسےمنہدم کرکےبابری مسجد بنائی گئی تھی ۔
یہ چندحقائق ہیں ،جن کاعدالت عظمی نےاقرار کیاہے اور ان سےہرہندوستانی خواہ وہ مسلم ہویامشرک بخوبی واقف ہے ؛بل کہ میں تویقین کامل کےساتھ کہتاہوں کہ سی بی آئی کی خصوصی عدالت کےجج صاحبان بھی بباطن ان ہی 32/شرپسند افراد کوبابری مسجدانہدام کےاصل مجرم تسلیم کرتےہوں گے؛مگر پھر بھی یقینی شواہد ودلائل سےپہلوتہی اختیار کرتےہوئے سی بی آئی کی خصوصی عدالت کامن چاہی فیصلہ صادر کرنا،انتہائی افسوس ناک ہے اور ظلم وستم پرمبنی حیران کن یہ فیصلہ جمہوری اور سیکولر ملک کےلیے ایک بدنما داغ ہے ۔
مجھےحیرانی اس بات کی ہے کہ بابری مسجد انہدام کا مقدمہ ایک ایسامقدمہ ہے ،جس کےحقیقی ملزمین کی شہادت ہربیناشخص دیتاہے؛حتی کہ بعض ملزمین بھی گاہے بگاہے خود اقرار جرم بھی کرچکےہیں کہ واقعی بابری مسجد انہدام کےاصل مجرم ہم ہی ہیں اور عدالت عالیہ کےحقائق کےاعتراف سے بھی یہی معلوم ہوتاہے کہ اس کےنزدیک بھی اس کےحقیقی مجرم یہی 32/افراد ہیں ،پھر بھی سی بی آئی کی خصوصی عدالت کاحقائق کےخلاف فیصلہ سنانا،چند بڑے اور اہم سوالات ضرور پیداکرتاہے۔
بالفرض ہم مان بھی لیتےہیں کہ یہ 32/افراد ملزم نہیں ہیں، توپھر بالآخر اس کےملزم کون ہیں؟کیابابری مسجد خود بخود شہید ہوگئی تھی؟اگر خود بخود شہید ہوگئی تھی تواتنابڑاہنگامہ کیوں بڑپاہواکہ بابری مسجد کی جگہ پہلے رام مندرتھا؟اور پھرظلمانہ فیصلے کےذریعے اس پراب قابض بھی ہوگئے۔
کیاسی بی آئی کی خصوصی عدالت نےعدالت عظمی پریہ الزام عائدنہیں کیاکہ اس نے جوبابری مسجد شہادت کےچند حقائق وشواہد کااعتراف کیا،وہ غلط تھا؟اور سی بی آئی کی خصوصی عدالت کاسپریم کورٹ پریہ الزام عائد کرنا،قطعی درست نہیں ہوسکتاہے؛کیوں کہ سپریم کورٹ نے ایسےحقائق کااعتراف کیاہے،جن سے ہرشخص اچھی طرح باخبر ہے،ان کاانکاردرحقیقت ایساہی ہے کہ کوئی دن کےاجالے میں کہے:کہ یہ دن نہیں؛ بل کہ رات ہے۔
اسی سے یہ سوال بھی پیدا ہو گیا کہ جب حقائق کی روشنی میں ملزمین کی شناخت یقینی تھی، تو پھر کیوں سی بی ائی کی خصوصی عدالت نے سارے براہین کا انکار کرتے ہوئے ایک ظالمانہ فیصلہ سنایا؟کیا عدالت کامعنی ظلم کرنا ہے؟ اگر ظلم ہی کرنا ہے،تو پھر عدالت کیسے؟۔
یقینا سی بی ائی کی خصوصی عدالت اپنے اس ظالمانہ فیصلے کے ذریعے ملک میں ظلم و ستم کی مختلف راہیں کھول دی ہے،اس فیصلہ کواگر سراپاظلم ہی کہہ دیا جائے،تو کوئی غلط نہیں ہوگا،اس لیے اس فیصلے کی جس قدر بھی مذمت کی جائے بہت ہی کم ہے۔
اس ظالمانہ فیصلہ کےتناظرمیں چند بڑے مذہبی اور سیاسی قائدین کے اقوال پیش خدمت ہیں: آل انڈیا مسلم پرسنل لا بورڈ کے جنرل سیکریٹری حضرت مولانا محمد ولی رحمانی صاحب نے کہا: کہ یہ ایک بے بنیاد فیصلہ ہے، جس میں شہادتوں کو نظر انداز کیا گیا ہے اور قانون کابھی پاس ولحاظ نہیں رکھا گیا ہے، مولانا نے کہا: کہ یہ فیصلہ اسی ذہنیت کا آئینہ دار ہے ،جوذہنیت حکومت کی ہے اور اس کا اظہار بابری مسجد کیس میں سپریم کورٹ کے ججوں نے کیا تھا،مولانا نے مزید کہا:کہ لوگوں کویادہوگا کہ بابری مسجد کی شہادت کے عظیم حادثہ کے بعد ملک میں فرقہ وارانہ تعصب کی لہر چل پڑی اوربڑے پیمانے پر مسلمانوں کے جان ومال کانقصان ہوا۔
سی بی آئی کی خصوصی عدالت کایہ فیصلہ مسجد کی شہادت کی ذمہ داری کسی پرنہیں ڈالتا،توکیاوہ سارامجمع اورسارے لوگ جو بی جے پی میں بہت بڑی حیثیت کےمالک رہے ہیں،مسجد کوشہید نہیں کیا؟یاکسی غیبی طاقت نے مسجد کی عمارت کونیست ونابود کردیا؟یقینایہ فیصلہ ناانصافی کی تاریخ میں ایک مثال کی حیثیت سے پیش کیا جائے گا ۔
جمعیت علمائے ہند کے صدراور دارالعلوم /دیوبند کےاستاذ حدیث حضرت مولانا سیدارشدمدنی صاحب نےکہا:کہ سی بی آئی کورٹ یہ کہہ رہی ہےکہ ان 32/ملزمین کاکوئی قصور نہیں ہے اور یہ باعزت بری کیےجاتےہیں،عقل حیران ہے کہ اس کوکس چیز سے تعبیر کیاجائے،اس فیصلے کوکس نظریہ سےدیکھاجائے ،کیااس فیصلہ سےعوام کاعدالت پراعتماد بحال رہ سکےگا؟۔
مسلم پرسنل لاء بورڈ کے رکن اوربابری مسجد ایکشن کمیٹی کے کنوینر ایڈوکیٹ ظفریاب جیلانی نےکہا:کہ ایک بارپھرمسلم فریق کوانصاف نہیں ملا،عدالت جن ویڈیو اور آڈیوکوثبوت نہیں ماناہے،وہی اصل میں ثبوت ہیں، ہمارے پاس متبادل موجود ہے،ہم صلاح و مشورہ کرکےہائی کورٹ کارخ کریں گے ۔
جمعیت علمائے ہند کےجنرل سکریٹری حضرت مولانا محمودمدنی صاحب نے کہا:کہ سی بی آئی کورٹ کایہ فیصلہ انتہائی تشویش ناک ہے؛ کیوں کہ جہاں ایک طرف اس سے فسطائی عناصرجوکہ دیگر مساجد کوبھی اپنےظلم وستم کانشانہ بناناچاہتےہیں،انہیں شہ ملےگی اور ملک میں امن وامان کوزبرست خطرہ لاحق ہوگا،تووہیں دوسری طرف اقلیتوں اورکمزورطبقات کےدرمیان مایوسی پھیلےگی اورعدالتوں پراعتماد میں کمی آنے کےباعث بہت سارے تنازعات پرامن طریقے سےحل کیےجانےکےبجائےزورزبردستی اورتشدد کےذریعے طےکرنےکارواج قائم ہوگا۔

(مضمون میں پیش کردہ آرا مضمون نگارکے ذاتی خیالات پرمبنی ہیں،ادارۂ قندیل کاان سےاتفاق ضروری نہیں)

(ایڈیٹر ممبئی اردو نیوز)

ہاتھرس گینگ ریپ اور یوگی و مودی سرکار کی بے حسی کا ایک تجزیہ

یہ نیو انڈیا ہے !
ریپ، گینگ ریپ یہاں جائز ہے ۔ یہاں لوگ، اعلیٰ ذات والے شدت پسند ، زعفرانی رنگ والے ہندوتوادی ، خاکی وردی پوش درندے ، یہ سب ہی اقلیتوں، پچھڑوں پر ظلم کرنے کے لیے آزاد ہیں ۔ اگر مسلمانوں کی عبادت گاہیں گرائی جائیں اور سب کے سب مجرم کیمرے کی آنکھ میں قید ہو جائیں اور سارے مجرموں کے چہرے روز نکلتے سورج کی طرح سب کے سامنے ہوں تب بھی عدالت انہیں باعزت بری کردیتی ہے، کیونکہ جو ٹھوس ثبوت عدالت کے سامنے پیش کیے گئے ہیں، عدالت کی نظر میں وہ بےبنیاد ہیں، پھسپھسے ہیں ۔ دیکھ ہی لیں بابری مسجد کی شہادت کے سارے مجرم بری ہی ہو گئے ۔ یہاں سب کی نظروں کے سامنے دھنٌا سیٹھوں کو غریبوں کی خوراک، غریبوں کی سواریاں اور غریبوں کے جھونپڑے دے دیئے جاتے ہیں اور کوئی غریب اُف نہیں کرتا، کیونکہ اُف کر ہی نہیں سکتا، اُف کرنے کی یہاں اجازت نہیں ہے ۔ کسانوں سے اس کی روزی روٹی کا سہارا چھین لیا جاتا ہے اور سارا میڈیا، چند ایک کو چھوڑ کر، واہ واہ کرتا ہے ۔ کسان سوال کرتے ہیں تو لاٹھیاں کھاتے ہیں ۔ یہاں اگر کوئی حقوقِ انسانی کی تنظیم کالے چہروں کو بے نقاب کرتی ہے، اکثریت کے ڑعم میں مبتلا فسادیوں اور نیتاؤں کے ہاتھوں ایک فرقے کی نسل کشی کو ساری دنیا کے سامنے اجاگر کرتی ہے تو اسے تنگ کر کے یہاں سے کھدیڑ دیا جاتا ہے یا اسے خود اپنا بوریا بستر لپیٹنے پر مجبور کر دیا جاتا ہے ۔ ایمنسٹی انٹرنیشنل کی مثال لے لیں ۔
جی یہ نیو انڈیا ہے! یہاں ہر وہ بات جو حکومت کے حق میں اور عوامی مفادات کے خلاف ہو، وہ نیو نارمل ہے ۔ مآب لنچنگ نیو نارمل ہے، بیف کے بہانے دہشت گردی کے الزام میں گرفتاری نیو نارمل ہے ۔ اور گینگ ریپ، اور ریپ کے بعد متاثرہ کی زبان کاٹ لینا، اس کے ہاتھ پیر توڑ دینا، ریڑھ کی ہڈی کو فریکچر کر دینا نیو نارمل ہے ۔ اگر متاثرہ مرجائے تو اس کے والدین اور بھائی کی اجازت کے بناء اس کی لاش رات کے اندھیرے میں جلا دینا نیو نارمل ہے ۔ متاثرین کو ان کے گھر میں مجرم کی طرح بندی بنا دینا نیو نارمل ہے ۔ اپوزیشن چلٌاے ، میڈیا متاثرین سے ملنا چاہے تو ان پر سخت ترین قدغن لگا دینا نیو نارمل ہے ۔ جی تالیاں بجائیں، خوشیاں منائیں کہ اب ہم سب اس نیو انڈیا کے شہری ہیں جہاں ہر عوام مخالف پالیسی، اقدام اور سرگرمی نیو نارمل ہے ! اب ہم اس نیو انڈیا میں سانس لیتے ہیں جہاں آنے والے کل کو سانس لینا بھی ممکن نہیں رہ جائے گا ۔
ہاتھرس کے بولگڑھی گاوں کے اس دلت پریوار کی یہی حالت بنا دی گئی ہے جس کی ایک جواں سال بیٹی کو، جسے اب ہاتھرس کی بیٹی کہا جا رہا ہے،اعلیٰ ذات کے ٹھاکروں نے ریپ کیا اور پھر اس قدر پیٹا کہ چند روز بعد وہ اسپتال میں چل بسی ۔ پولیس نے نہ اس کو فوری طبی سہولت دی نہ ہی ملازمین کے خلاف فوری کارروائی کی نہ ہی گینگ ریپ کے الزام کو قوی کرنے کے لیے فوری جانچ کروائی ۔ اب اس کی لاش جبرا جلانے کے بعد اس کے پریوار کو گھر کے اندر قید کر دیا گیا ہے، موبائل چھین لیے گئے ہیں، پولس کے اعلیٰ افسر اور ڈی ایم جن کا نام پروین کمار ہے، اس پریوار کو مسلسل دھمکا رہے ہیں کہ میڈیا آج یہاں ہے، کل نہیں رہے گا، آپ سرکار کی بات مان لیں ۔ سرکار کی بات مان لینے کے کئی مطلب نکالے جا سکتے ہیں، ایک تو یہ کہ یہ کہہ دیں کہ ان کی بیٹی کا ریپ نہیں ہوا ہے، یا یہ کہ مجرموں کو پہچاننے سے انکار کردیں یا پھر یہ کہ پوری طرح خاموش ہو کر بیٹھ جائیں اور یوگی سرکار جو معاوضہ دے اسے خوشی سے قبول کر لیں اوربیٹی کے ریپ اور اس کی دردناک موت کو دماغ سےنکال کر پولیس کو سارے معاملے پر سفیدی پوتنے دیں ۔ ایک پریوار کو آزادی کے ساتھ دکھ منانے کی چھوٹ بھی نہیں ہے ۔ یہی تو کسی کو سانس لینے سے روکنا ہے ۔ یو پی کے وزیراعلیٰ یوگی آدتیہ ناتھ ،جن کا فلسفہ ہے کہ کوئی اگر تمہیں مارے تو اسے پٹک کر مارو، اب ہاتھرس معاملہ میں زبردست عوامی غصے اور اپوزیشن کے سخت ترین احتجاجات کے بعد یہ کہنے پر مجبور ہوئے ہیں کہ یو پی میں ماتاؤں اور بہنوں کے سمان سوابھیمان کو گزند پہنچانے والے کو ملیا میٹ کر دیا جائے گا، ماں بہن کی حفاظت کی
یو پی سرکار پابند ہے، لیکن اس بے شرمی اور بےغیرتی سے بھرے بیان کو حقیقت کی روشنی میں دیکھا جائے تو پتہ چلتا ہے کہ یہ سب ہوا میں کہا جا رہا ہے ۔ ہاتھرس کے بعد بلرام پور میں ایک دلت لڑکی کا گینگ ریپ ہوا، وہ بھی مر گئی، اعظم گڑھ میں ایک چھوٹی بچی کی عصمت تار تار کی گئی، بھدوہی میں ایک نابالغ دلت بچی کو ریپ کرنے کے بعد اس کے سر پر اینٹوں سے اتنی ضربیں لگائی گئیں کہ وہ مر گئی ۔ یہ اتنی بربریت ان زانیوں میں کہاں سے سما گئی ! شایداقتدار کو اپنے باپ داداؤں کی جاگیر سمجھنے والوں کی خاموشی نے انہیں ہر طرح کے ظلم کی چھوٹ دے رکھی ہے ۔ یہ خاموشی کوئی ایک دن کی نہیں ہے برسہا برس کی ہے ۔ نیشنل کرائم ریکارڈ بیورو کے تازہ اعداد و شمار نیو انڈیا کی، جو وزیراعظم نریندر مودی اور وزیراعلیٰ یوگی کا انڈیا ہے، حقیقت اجاگر کرتے ہیں ۔ مودی راج میں 2019ء میں ملک بھر میں خواتین کے خلاف جرم کے 405861 واقعات ہوئے ہیں جن میں سے 59853 واقعات یوگی کے یو پی کے ہیں ۔ جی ہاں یو پی عورتوں پر بالخصوص دلت عورتوں پر جرائم کے معاملے میں ساری ریاستوں میں سرفہرست ہے ۔ سال2018ء کے مقابلے خواتین کے خلاف ملک بھر میں جرائم میں 7 اعشاریہ 3 فیصد کا اضافہ ہوا ہے ۔ ہر روز ریپ کی 87 وارداتیں ہوتی ہیں ۔ بی جے پی کی حکومت والی ریاست آسام میں عورتوں کے خلاف جرائم کا فیصد سب سے زیادہ ہے جبکہ یو پی میں بچیوں کے خلاف سب سے زیادہ جنسی زیادتی کے معاملات ہیں 7444 ۔ یہ وہ اعداد و شمار ہیں جو ریکارڈ ہوئے ہیں جو ریکارڈ ہونے سے رہ گئے ہیں وہ کتنے ہیں اس کا کوئی اندازہ نہیں ہے ۔ دلچسپ بات یہ ہے کہ قتل اور اغوا کی وارداتیں گھٹی ہیں لیکن نیو انڈیا میں جہاں بیٹی بچاو بیٹی پڑھاو کا نعرہ لگایا جاتا ہے ریپ کی وارداتیں بڑھتی ہی چلی جا رہی ہیں ۔ ویسے بھی کٹر ہندوتوادی ساورکر نے ریپ کو دوسروں کے خلاف ایک ہتھیار کی طرح استعمال کرنے کی آزادی دے رکھی ہے ۔اور پھر انتظامیہ اور پولیس کی اپنی ترجیحات ہوتی ہیں، ان میں دلتوں، پچھڑوں اور اقلیتوں کا بھلا شامل نہیں ہے ۔ مثلاً یہ دیکھیں کہ قانون کہتا ہے کہ کسی لڑکی کے پرائیوٹ پارٹ کو چھونا یا اس کو جنسی طور پر ہراساں کرنا بھی ریپ ہے مگر یو پی پولیس کے اعلی افسر، ایڈیسنل ڈی جی پی پرشانت کمار یہ کہتے ہوئے شرم نہیں محسوس کرتے کہ پوسٹ مارٹم کی رپورٹ کہتی ہے کہ لڑکی، مطلب ہاتھرس کی بیٹی، کے جسم پر مادہ منویہ نہیں ملا لہٰذا یہ مان لیا جائے کہ لڑکی کا ریپ نہیں ہوا ہے ۔ یہ وہی اے ڈی جی پی ہیں جو سارے میڈیا کو جبرا یہ قائل کروا رہے تھے کہ ہاتھرس کی بیٹی کا انتم سنسکار گھر والوں کی اجازت سے کیا گیا ہے ۔ میڈیا جسے بولگڑھی گاوں میں گھسنے نہیں دیا جا رہا ہے، جیسے ایمرجنسی لگی ہو اور یہ روک پورے ایک مہینے کے لیے ہے ! بھلا یوگی سرکار کیا چھپانا چاہتی ہے؟ کیوں میڈیا پر ناجائز پابندی لگا رکھی ہے؟ کیوں دفعہ 144 لگائی گئی ہے؟ کیا صرف اس لیے کہ جب کانگریس کے راہل گاندھی اور پرینکا گاندھی اور دوسری سیاسی پارٹیوں کے لیڈران متاثرین سے ملنا چاہیں تو ان سے دھکا مکی کی جائے، لاٹھیاں برسائی جائیں؟ یوگی سرکار اس کام کی ماہر ہے، لوگوں نے دیکھا ہی ہے کہ کیسے سی اے اے اور این آر سی مخالف احتجاجیوں پر یوگی کی پولیس نے لاٹھیاں ہی نہیں گولیاں چلائی ہیں، املاک قرق کی ہے اور یو اے پی اے جیسے سخت ترین قانون کے تحت انہیں کال کوٹھڑیوں میں ڈالا ہے ۔ اصل میں ہم سب دوسروں پر ہو رہے مظالم پر اپنی آنکھیں بند رکھنے کے عادی ہو چکے ہیں اس لیے بیٹیوں کی عصمتیں تار تار ہو رہی اور وہ جان سے ماری جا رہی ہیں ۔ پیچھے مڑ کر دیکھیں تو گجرات اور مظفر نگر کے فسادات نظر آئیں گے جہاں ریپ کو ایک فرقے کے خلاف ہتھیار کی طرح استعمال کیا گیا تھا ۔ ایسا نہیں کہ سول سوسائٹی نے شور نہیں مچایا یا معاملے عدالت میں نہیں گئے ۔ سب ہوا لیکن ہم انہیں ہی کرسیوں پر بٹھاتے رہے جو قصورواروں کے سرپرست تھے ۔ گجرات میں ایک بلقیس بانو کے سوا کس کو انصاف ملا، وہ بھی اس لیے کہ بلقیس بانو ڈٹی رہی ۔ عشرت جہاں اور کوثر بی آج بھی انصاف سے محروم ہیں، ان کی روحیں تڑپ رہی ہوں گی ۔ یہ بھی تو ہندوستان کی بیٹیاں تھیں ۔ مظفر نگر کے خاطیوں کو تو یوگی سرکار نے آنکھیں بند کر کے معافی دے دی ! معافی پانے والوں میں وہ ’ مجرم‘ شامل ہیں جو مظفر نگر کے فسادات کے دوران عصمت دری اور عصمت دری کی شکار خواتین کے بچوں کے قتل میں ملو ث تھے ۔ مظفر نگر فسادات کے دوران اپنی عزت وآبرو کھونے والی عورتیں آج بھی انصاف کے لئے آواز اٹھارہی ہیں ، یہ سب بھی ’ ہندوستان کی بیٹیاں‘ ہیں ۔ گورکھپور کے فسادات کے دوران ، جس کا الزام یوگی آدتیہ ناتھ کی اشتعال انگیز تقریر کو جاتا ہے ( اب یوگی نے خود پر چلنے والے اس معاملے کو ختم کردیا ہے ۔ کیونکہ خود ہی سیاّں ہیں اور خود ہی کوتوال ) بے آبرو ہونے والی خواتین بھی ’ ہندوستان کی بیٹیاں‘ تھیں ۔۔۔ اور یہ سب ہندوستان کی بیٹیاں ہونے کے ناطے وزیراعظم مودی کی بھی بیٹیاں ہوئیں ، مگر یہ آج تک انصاف کے لئے بھٹک رہی ہیں ۔ مودی جی کی زبان سے نہ ان سب کے لیے اور نہ ہی ہاتھرس کی بیٹی کے لیے کوئی ایک لفظ نکلا ہے ۔ نہ ہی ان کا یہ تحریر لکھے جانے تک کوئی ٹوئٹ آیا ہے ۔ اصل میں بی جے پی میں جو سیاست دان شامل ہیں ان میں سے بہت سے ہیں جن پر عورتوں کے خلاف جنسی زیادتی اور جرم کے معاملات درج ہیں ۔ اناو کے ریپ اور بی جے پی کے رکن اسمبلی کلدیپ سینگر کی مثال لے لیں جسے اب ریپ اورقتل کے جرم میں سلاخوں کے پیچھے ڈال دیا گیا ہے ۔ چونکہ یہ برسراقتدار ٹولے کا رکن اسمبلی تھا اس لیے اس کی گرفتاری بڑے دنوں تک ٹلتی رہی تھی ۔ سارے ملک کی طرف سے دبائو پڑنے کے بعد اسے گرفتا ر کیاگیا تھا ۔ یہ سیاست کی گندگی کا ایک معمولی سا نمونہ تھا۔ یوپی کی کرسی پر جو ’یوگی‘ براجمان ہے وہ ذات کا ٹھاکر ہے، سینگر بھی ٹھاکر لہٰذا اس کا ٹھاکر ذات سے ہونا کام آیا ۔ ریاست کے اعلیٰ پولس افسران بھی ٹھاکر ہی ہیں ۔ تو یہاں کسی کی گرفتاری کا فیصلہ چاہے، وہ عصمت دری کا مجرم ہی کیوں نہ ہو، اس کی سیاست کے رنگ ’ہرا‘ ، ’گیروا‘ ، ’لال‘ اور اس کی ذات پات کی بنیاد پر ہی کیا جاتا ہے اس لیے انصاف کی امید کم ہی نہیں بلکہ ہوتی ہی نہیں ہے ۔ کٹھوعہ میں ننھی آصفہ کے ریپ اور قتل کا معاملہ مہینوں اس لیے دبا رہا کہ وہ بچی مسلمان تھی اور ملزم غیر مسلم تھے اور ان غیر مسلم ملزمین کے پیچھے ساری بی جے پی پارٹی کھڑی ہوئی تھی ۔ اب بی جے پی کا معاملہ لے لیں؛ اس پارٹی کا ریکارڈ بڑا ہی عجیب وغریب ہے۔ ’ایسوسی ایشن فار ڈیمو کریٹک ریفارم‘ (اے ڈی آر) کی ایک رپورٹ پر غور کریں جس میں بتایاگیا ہے کہ کوئی 48 ؍ممبران پارلیمنٹ و ممبران اسمبلی نے یہ اعتراف کیا ہے کہ ان پر خواتین سے متعلق جرائم کے معاملات درج ہیں ۔ ان میں سب سے زیادہ بی جے پی کے قانون ساز ہیں ۔ ان کی تعداد 12 ہے۔ بھاجپائی قصور واروں میں یوپی کے اناو ریپ معاملے کے رکن اسمبلی کلدیپ سنگھ سینگر کا نام بھی شامل ہے۔ جن قانون سازوں پر خواتین سے متعلق جرائم کے معاملات درج ہیں ان میں 45 ممبران اسمبلی اور تین ا یم پی ہیں۔ اب یہ بھی دیکھ لیں کہ ان پر الزامات کیسے کیسے ہیں ۔ ان پر عورتوں پر مجرمانہ حملے سے لے کر اغوا، جبراً شادی کرنے اور عصمت دری تک کے معاملات درج ہیں ۔ گھریلو تشدد اور عورتوں کی ٹرافکنگ کے معاملات بھی ان پر ہیں ۔ جی ہاں ہمارے ممبران اسمبلی اور ممبران پارلیمنٹ میں ایسے بھی ہیں جو عصمت دری کے ملزم ہیں بالخصوص بی جے پی کے ۔ (سوشل میڈیا پر تو بی جے پی کو لوگوں نے ’بھارتیہ بلاتکار پارٹی‘ تک لکھ دیا ہے) ۔ سوامی چنمیا نند بی جے پی کی واجپئی سرکار میں وزیر مملکت برائے داخلہ تھے، ان پر 2019ء میں ایک طالبہ نے، جو ان ہی کے کالج میں زیر تعلیم تھی ، جنسی زیادتی کا الزام لگایا تھا لیکن یوگی نے انہیں کلین چٹ دے دی، اب وہ دودھ کے دھلے ہیں ۔ یہ لمبی فہرست ہے نام گنوانے کا موقعہ نہیں ہے لیکن یہ کہنے سے کوئی ڈر بھی نہیں ہے کہ بی جے پی میں بہت سارے چہرے ایسے ہیں جنہیں سلاخوں کے پیچھے ہونا چاہیے تھا ۔ ہاتھرس ریپ معاملہ میں کیا ہوگا کچھ کہا نہیں جا سکتا ہے ۔ آلہ آباد ہائی کورٹ نے از خود اس معاملے کا نوٹس لیا ہے، متاثرین اور پولیس اہلکاروں کو طلب کیا ہے، دیکھتے ہیں کہ وہاں کیا ہوتا ہے ۔ اب تو عدالتیں جب تک کوئی مبنی بر انصاف فیصلہ نہ دے دیں یقین کرنے کو دل نہیں چاہتا کہ انصاف ہوگا ۔ بابری مسجد معاملہ میں دو فیصلوں نے عدالتوں پر سے بھروسہ تقریباً ختم کر دیا ہے ۔ سپریم کورٹ کے سابق چیف جسٹس رنجن گگوئی نے تمام ثبوتوں کو نظر انداز کر کے بابری مسجد کی زمین رام مندر کے لیے سونپ دی اور راجیہ سبھا میں جا کر بیٹھ گئے ۔ اور سی بی آئی کی خصوصی عدالت کا جو فیصلہ ابھی ابھی آیا ہے اس پر کیا کہا اور کیا لکھا جائے سمجھ میں نہیں آتا ۔جج صاحب نے تو سارے ہی ثبوت ردی کی ٹوکری میں پھینک کر 28 سال کے مقدمے کے ملازمین کو چند منٹ کے اندر ہی باعزت بری کر دیا ۔ یہ انصاف کا خون ہے، انصاف کے نام پر ناانصافی ہے ۔ لہذا ہاتھرس میں بھی ممکن ہے ایسا ہی انصاف کر دیا جائے ۔ اعلیٰ ذات کے منصف کو ثبوت ممکن ہیں نظر ہی نہ آئیں ۔ اس لیے ضروری ہے کہ ہوگی اور مودی دونوں پر دباو بنا رہے ۔ کانگریس، ترنمول، عام آدمی پارٹی اور دیگر پارٹیاں شور مچاتی رہیں، ہم جانتے ہیں کہ یہ سب سیاست ہے، لیکن سیاست تو نربھیا اور کرپشن کے نام پر بی جے پی نے بھی کی تھی، جیسے کو تیسا ! مظاہرے ہوں احتجاج ہوں تاکہ نیو انڈیا کے حکمرانوں کی کچھ تو نیند آڑے ۔ اگر اتنا بھی نہ کیا گیا تو پھر یہ تو نیو انڈیا ہے ہی، یہاں سب نیو نارمل ہے ۔ ریپ اور گینگ ریپ اور بربریت میں اضافہ ہی ہوتا جائے گا اور وہ بھی، جو خود کو محفوظ سمجھتے ہیں، اپنی بہو بیٹیوں کو زانیوں کے ہاتھوں سے بچا نہیں سکیں گے ۔
پس نوشت : میڈیا بڑا خفا ہے، سوائے ارنب گوسوامی کے ریپبلک چینل کے ۔ کاش کہ یہ خفگی پہلے سے ہوتی، کاش کہ میڈیا گودی میں جاکر نہ بیٹھا ہوتا ۔ اگر ایسا ہوتا تو بہت کچھ بدلا ہوا ہوتا ۔ اچھا ہے کہ میڈیا پر جب پڑی ہے تو اسے کچھ ہوش آیا ہے ۔ امید یہی رکھنی چاہیے کہ یہ ہوش برقرار رہے گا ۔ ویسے یہ امید سچ ثابت ہو گی اس کا یقین بالکل نہیں ہے ۔

(مضمون میں پیش کردہ آرا مضمون نگارکے ذاتی خیالات پرمبنی ہیں،ادارۂ قندیل کاان سےاتفاق ضروری نہیں)

عام کہاوت ہے کہ قانون اندھا ہوتا ہے لیکن بابری مسجد شہید کرانے میں نامزد زندہ بچے ہوئے سبھی بتیس ملزمان کو با عزت بری کرنے و الے سی بی آئی کورٹ کے اسپیشل جج ایس کے یادو نے ثابت کردیا کہ اگر قانون اندھا ہوتا ہے تو عدالتوں میں بیٹھے جج ان کی طرح بہرے ہوتے ہیں۔جنہیں چشم دید گواہان کی باتیں سنائی نہیں دیتیں۔ ایس کے یادو نے اپنے فیصلے میں لکھا کہ لال کرشن اڈوانی، مرلی منوہر جوشی، کلیان سنگھ، اوما بھارتی، نتیہ گوپال داس اور ونئے کٹیاروغیرہ نے بابری مسجد توڑنے کے لئے کسی کو بھڑکایا نہیں تھا۔ سماج اور قانون دشمن عناصر نے مسجد توڑی تھی یہ لوگ تو گرانے والوں کو روکنے کا کام کررہے تھے۔ عدالت نے کہا کہ ملزمان کے خلاف معقول ثبوت نہیں ہے سی بی آئی نے جو آڈیو اور ویڈیو ثبوت عدالت میں پیش کئے ان کی بنیاد پر کسی کو سزا نہیں دی جاسکتی۔ جج یادو نے اپنے بہرے ہونے کا ثبوت خود ہی پیش کرتے ہوئے کہا کہ جو آڈیو سی بی آئی نے عدالت میں پیش کئے وہ صاف سنائی نہیں دیتے۔ اٹھائیس سال بعد مقدمہ کا فیصلہ آیا ہے۔ اس مقدمہ کی سماعت کے دوران تین سو اکیاون گواہوں کے بیان ہوئے جن میں سے بیشتر نے اڈوانی، جوشی اور اوما بھارتی سمیت تمام ملزمان کے خلاف ہی گواہی دی۔ اب جج صاحب بے چارے تو بہرے تھے اس لئے انہوں نے گواہان کے بیانات سنے ہی نہیں۔ ثبوت کے طور پر چھ سو سے زیادہ دستاویزی ثبوت عدالت میں پیش کئے گئے۔ ان کا بھی کوئی اثر نہیں ہوا کیونکہ قانون تو اندھا ہے۔ ایودھیا پر سپریم کورٹ نے گزشتہ سال جو فیصلہ دیا تھا اس میں صاف کہا تھا کہ بابری مسجد کا توڑا جانا غیر قانونی اور ملک کے آئین اور قانون کی ربریت بھری خلاف ورزی تھی اس کے ذمہ داران کو سخت سزا دی جانے چاہیئے۔
سی بی آئی کے اسپیشل جج ایس کے یادو نے اس قسم کا فیصلہ دے کر انصاف، قانون، آئین اور عدلیہ میں یقین رکھنے والوں خصوصاً ملک کے مسلمانوں کا بھروسہ توڑا ہے۔ اگر وہ ان ملزمان کو ایک دن کی علامتی سزا سناتے ہوئے کہہ دیتے کہ یہ علامتی سزا ہے اس لئے ملزمان کو جیل بھیجنے کی ضرورت نہیں ہے۔ تب بھی لوگوں کا عدلیہ میں یقین قائم ر ہتا۔ فیصلہ سنانے کے فوراً بعد جج یادو رٹائر بھی ہوگئے۔ ان کا رٹائرمنٹ تو ایک سال پہلے تیس ستمبر کو ہی ہوگیا تھا لیکن انہیں اسی فیصلےکے لئے ایک سال کی توسیع دی گئ ی تھی۔
فیصلہ آتے ہی لال کرشن اڈوانی جئے شری رام کہتے ہوئے میڈیا کے سامنے آگئے۔مرلی منوہر جوشی نے اسے ایک تاریخی فیصلہ قرار دیا ملک کے وزیر دفاع راجناتھ سنگھ نے ’ستیم وجئتے) ٹوئٹ کرکے اپنی خوشی ظاہر کی۔ اپنی زہرلی تقاریر کے لئے بدنام رہے دو ملزمان خود کو اچاریہ بتانے والے راجستھان کے دھرمیندر اور ونئے کٹیار نے فیصلہ سننے کے فوراً بعد کہا کہ اب متھرا اور کاشی کی تحریک شروع کی جائے گی۔بی جے پی کے لوگوں نے پورے ملک میںپٹاخے داغ کر اور گھروں پر روشنی کرکے اس فیصلے کا خیر مقدم کیا۔ کئی مقامات پر وشو ہندو پریشد اور وشوہندو پریشد کے لوگوں نے غیرضروری نعرہ بازی کرکے مسلمانوں کو چڑھانے اور بھڑکانے کی بھی کوششیں کں لیکن مسلمانوں نے ہوشمندی سے کام لیا اور کہیں بھی ٹکراؤ نہیں ہونے پایا۔
مسجد توڑے جانے کے سلسلے میں چھ دسمبر ۱۹۹۲ کو ہی دو مقدمات درج کرائے گئے تھے۔ ایک مقدمہ شام کو سوا پانچ بجے نا معلوم کار سیوکوں کے نام تھا تو اس کے فوراً بعد پانچ بج کر پچیس منٹ پر دوسرا مقدمہ لکھوایا گیا جس میں اڈوانی، جوشی سمیت انچاس لوگوں کو نامزد کیاگیا ساتھ ہی یہ بھی لکھا گیا کہ ان کے ساتھ ہزاروں کار سیوک بھی تھے۔ ملزمان میں اب جو بتیس بچے تھے انہیں جج ایس کے یادو نے بری کردیا ان میں لال کرشن اڈوانی، مرلی منوہر جوشی، اوما بھارتی، ونئے کٹیار، رتمبھرا دیوی، سچانند ساکشی، برج بھوشن سنگھ، پون کمار پانڈے، ستیش پردھان، جئے بھگوان گوئل، کلیان سنگھ، رام چندر کھتری، سدھیر ککڑ، سنتوش دوبے، امرناتھ گوپال، پرکاش شرما، جئے بھان سنگھ پبیا، دھرمیندر سنگھ گوجر، رام جی گپتا، للو سنگھ، چپت رام، کملیش ترپاٹھی، گاندھی ی ادو، اوم پرکاش پانڈے، ونئے کمار رائے، وجئے بہادر سنگھ، نوین بھائی شکلا، اچاریہ دھرمیندر دیو، آر این شریواستو، رام ولاس ویدانتی، دھرم داس اور مہنت نرتیہ گوپال داس جن سترہ ملزمان کی سنوائی کے دوران موت ہوگئی ان میں وجئے رادھے سندھیا، بالا صاحب ٹھاکر، اشوک سنگھل، وشنو ہری ڈالمیا، موریشور ساٹھے، رام نارائن داس، مہا منڈلیشور، جگدیش مونی، ونود کمار وتس، لکشمی نارائن داس، رمیش پرتاپ سنگھ، ڈی وی رائے، مہنت اودیدھناتھ، بیکنٹھ لال شرما، پرم ہنس رام چندر داس، ستیش کمارناگر اور ہر گووند سنگھ۔
مسجد کی شہادت کے سلسلے میں دو کریمنل کیس درج کئے گئے تھے۔ پہلاایف آئی آر نمبر ۱۹۷ اور دوسرا ایف آئی آر نمبر ۱۹۸۔ ۱۹۷ والے ایف آئی آر میں لاکھوں کار سیوکوں کے خلاف کیس درج کیا گیا، جس میں آئی پی سی کی دفعہ ۱۵۳ اے(مذہبی بنیاد پر دشمنی پھیلانا)، ۲۹۷(قبرستان میں قبضہ کرنا)، ۳۳۲(سرکاری ملازمین کو اس کے فرائض سے ڈگمگانے کے لئے جان بوجھ کر چوٹ پہونچانا)، ۳۳۷(دوسروں کی زندگی اور نجی سلامتی کو خطرے میں ڈالنا)، ۳۳۸(زندگی خطرے میں ڈال کر سنگین چوٹ پہونچانا)، ۳۹۵(ڈکیتی) اور ۳۹۷(لوٹ پاٹ، موت کی وجہ بننے کی کوشش کے ساتھ ڈکیتی) کے تحت کیس درج کیا گیا تھا۔
ایف آئی آر نمبر ۱۹۸ میں آٹھ لوگوں کے نام تھے: لال کرشن اڈوانی، ایم اے جوشی، اوما بھارتی، ونئے کٹیار، سادھوی رتمبھرا اور وشو ہندو پریشد کے لیڈر اشوک سنگھل، گری راج کشور اور وشنو ہری ڈالمیا کا نام ہے۔ ان لوگوں کے خلاف آئی پی سی کی دفعہ ۱۵۳ اے(مذہب کی بنیاد پر دشمنی پھیلانا)، ۱۵۳-بی(دنگا کرانے کے ارادے سے بھڑکا حرکتیں کرنا) اور ۵۰۵ (لوگوں کو بھڑکانے کے لئے بھڑکاؤ بیان دینے) کے تحت کیس درج کرایا گیا تھا۔
فیضان مصطفیٰ: حیدرآباد واقع نیلسار لاء یونیورسٹی کے وائس چانسلرفیضان مصطفیٰ نے بی بی سی نمائندہ دویا آریہ سے بات چیت میں کہا کہ یہ فیصلہ مایوس کن ہے اور بھارت کی کریمنل جوڈیشیل سسٹم کے لئے ایک دھکا ہے۔ انہوں نے کہا،’بی جے پی شیو سینا کے لیڈران کے اس وقت کے بیانات موجود ہیں، تب جو دھرم سنسد منعقد ہورہی تھیں، ان میں دیئے نعرےدیکھے جاسکتے ہیں، جو کارسیوک اس دن آئے تھے وہ کلہاڑی، پھاوڑے اور رسیوں سے لیس تھے، جس سے صاف ظاہر ہوتا ہے کہ ایک سازش تھی۔ پروفیسر مصطفیٰ کہتے ہیں کہ اتنے بڑے جرم کے لئے کسی کا گناہ گار نہ پایا جانا ملک کے نظم و نسق کے لئے اچھا نہیں ہے۔ انہو ں نے کہا،’اس سے لگتا ہے کہ سی بی آئی اپنا کام ٹھیک سے نہیں کرپائی کیونکہ اتنے آڈیو، ویڈیو ثبوت اور ساڑھے تین سو سے زیادہ چشم دید گواہان کے بیانات کے باوجود ٹھوس ثبوت نہ مل پانے کی بات سمجھ نہیں آتی۔ پروفیسر مصطفیٰ کے مطابق جانچ ایجنسی اور پراسیکیوشن کا الگ الگ اور آزاد ہونا ضرور ی ہے۔ ملک کی سب سے بڑی جانچ ایجنسی، سی بی آئی ، وزارت داخلہ، بھارت سرکار کے تحت آتی ہے۔
اسد الدین اویسی : بابری مسجد گرائے جانے کے معاملے میں فیصلہ آنے کے بعد اے آئی ایم آئی ایم کے صدر لوک سبھا ممبر اسد الدین اویسی نے میڈیا سے بات کرتے ہوئے کہا کہ یہ تاریخ کا ایک سیاہ دن ہے۔جب مجرمان کو کلین چٹ دی گئی ہے۔ انہوں نے کہا کہ یہ آخری فیصلہ نہیں ہے۔ سپریم کورٹ کا فیصلہ آخری ہوتا ہے۔ کورٹ کے فیصلے سے متفق نہ ہونا عدالت کی توہین نہیں ہے۔ آپ ہی کی چارج شیٹ میں لکھا ہے کہ اوما بھارتی نے کہا ایک دھکا اور دو، کلیان سنگھ نے کہا تعمیر پر روک ہے توڑنے پر نہیں، یہ تاریخ کا کالا دن ہے۔ آج مجرمین کو کلین چٹ دی گئی ہے۔ سی بی آئی اپیل کرے گی یا نہیں یہی دیکھنا ہے اسے اپنی آزادی برقرار رکھنا ہے تواپیل کرنی چاہئیے۔ اگر وہ نہیں کریں گے تو ہم مسلم پرسنل لاء بورڈ سے کہیں گے کہ اس کے خلاف اپیل کریں۔ اس دن جادو ہوا تھا کیا؟ آخر کس نے یہ کیا؟ بتائیے ہماری مسجد کو کس نے شہید کیا؟ بابری مسجد کے توڑنے کے گناہ گاروں کو بے گناہ قرار دے کر پیغام دیا گیا ہے کہ کاشی متھرا میں بھی یہی کرتے چلو رول آف لاء کی فکر نہیں ہے وہ کرتے جائیں گے کلین چٹ ملتی جائے گی۔ دلتوں اور مسلمانوں کے معاملات میں انصاف نہیں ہوتا ہے پوری دنیا کے سامنے ہوا چھ دسمبر اگر کوئی کہتا ہے کہ بھول جاؤ آگے بڑھو کیسے بھول جائیں کیا پیغام دے رہے ہیں ہم فیصلے سے؟
پرشانت بھوشن: سینئر وکیل پرشانت بھوشن نے بی بی سی نمائندے دتیا آریہ سے کہا اس فیصلے سے یہی مانا جائے گا کہ عدالتوں میں انصاف نہیں ہوتا ہے بس ایک بھرم رہتا ہے کہ انصاف کیا جائے گا۔ انہوں نے کہا کہ یہی ہونا متوقع تھا کیونکہ مسماری کے کیس میں فیصلہ آنے سے پہلے ہی زمین کے مالکانہ حق پر فیصلہ سنا دیا گیا وہ بھی اس فریق کے حق میں جو مسجد ڈھائے جانے کا ملزم تھا۔ پرشانت بھوشن کے مطابق اس سے مسلمان طبقے میں نفرت میں اضافہ ہوگا کیونکہ کوئی بھی فیصلہ انہیں اپنے حق میں نہیں لگے گا۔ انہوں نے یہ بھی کہا کہ مسلمان طبقہ کو دوئم درجہ کا شہری بنایا جارہا ہے۔ ان کے سامنے اس وقت اور بڑی چنوتیاں ہیں جیسے جیسے ہندو راشٹر کی تعمیر کی کوششیں ہورہی ہیں ویسے ویسے ان میں مایوسی پیدا ہورہی ہے۔
سنجئے راؤت: شیو سینا کے راجیہ سبھا ممبر سنجئے راؤت نے بابری مسجد کی شہادت معاملے میں آئے فیصلے پر رد عمل ظاہر کرتے ہوئے کہا کہ پچھلے سال رام جنم بھومی معاملے میں سپریم کورٹ کے فیصلے کے بعد بابری مسجد توڑنے کے معاملے کی اہمیت ہی ختم ہوگئی تھی۔ اس فیصلے کا خیرمقدم کرتے ہوئے انہو ںنے کہا کہ خصوصی عدالت کا یہ مقدمہ پچھلے سال آئے سپریم کورٹ کے فیصلے اور وزیراعظم کے ہاتھوں بھومی پوجن کرنے کے بعد بے معنی ہوچکا تھا۔ انہو ںنے ساتھ ہی کہا کہ اگر بابری مسجد کو نہیں ڈھایا گیا ہوتا تو ایودھیا میں رم مندر کا بھومی پوجن نہیں ہوپاتا۔ سنجئے نے کہا کہ اب ہمیں اس معاملے کو بھول جانا چاہئیے۔
پاکستان نے کہا شرمناک: اس فیصلے کے بعد پاکستان کو بھی بولنے کا موقع مل گیا۔پاکستان نے بابری مسجد گرائے جانے کے معاملے میں آئے فیصلے کی سخت مذمت کرتے ہوئے ملزمان کو بری کئے جانے کو شرمناک بتایا ہے۔ پاکستان کی وزارت خارجہ نے ایک بیان جاری کرکہا ہے اگر دنیا کے مبینہ سب سے بڑے جمہوریہ میں انصاف کا تھوڑا بھی احساس ہوتا تو وہ لوگ جنہوں نےکھل کر ایک مجرمانہ حرکت کی تھی ڈینگیں ہانکی تھیں وہ بری نہیں ہوئے ہوتے۔ بیان میں اس فیصلے کو بی جے پی- آر ایس ایس کی حکومت میں ایک کمزور عدلیہ کی ایک اور مثال بتایا ہے۔ جہاں جارح ہندوتو نظریات انصاف اور بین الاقوامی اصولوں کے سبھی اصولوں پر بھاری پڑتی ہے۔ پاکستانی وزارت خارجہ نے لکھا ہے کہ بھارت کے سپریم کورٹ نے پچھلے سال بابری مسجد کی زمین کو انہی لوگوں کو رام مندر بنانے کے لئے دینے کا فیصلہ دے کر ایک غلط راہ دکھا دی تھی جنہو ںنے تاریخی مسجد کو گرا دیا تھا۔ اور آج کا فیصلہ اس فیصلے کے بھی خلاف ہے جس میں یہ بات درج کی گئی تھی کہ مسجد کو توڑنا انصاف اور قانون کی سخت مخالفت تھی۔ اس نے لکھا ہے کہ ایودھیا کے فیصلے سے جوش میں آکر ہندو کٹرپنتھی اب سرکار میں بیٹھے آر ایس ایس کی شہ پر متھرا میں کرشن مندر کے بغل میں و اقع شاہی عید گا ہ مسجد کو بھی ہٹانے کی کوشش کررہے ہیں۔ پاکستان نے بھارت سرکار سے اپیل کی ہے کہ وہ اقلیتوں اور خاص کر مسلمانوں اور ان کے مذہبی مقامات اور اسلامی مقامات کی سلامتی یقینی بنائیں۔ ساتھ ہی پاکستان نے عالمی برادری، اقوام متحدہ اور دیگر انٹرنیشنل تنظیموں سے بھی توقع کی ہے کہ وہ بھارت میں اسلامی دھروہروںکی حفاظت کے لئے اپنا رول نبھائیں گے۔

(مضمون میں پیش کردہ آرا مضمون نگارکے ذاتی خیالات پرمبنی ہیں،ادارۂ قندیل کاان سےاتفاق ضروری نہیں)

(464 سالہ بابری مسجد کا 107سالہ قضیہ)

پہلی قسط

بابری مسجد کے قضیہ پر پچھلے 70 برسوں میں اور خاص طورپر آخری 34 برسوں میں جتنا لکھا گیا ہے اتنا شاید ہی آزاد ہندوستان میں کسی اور موضوع پر لکھا گیا ہو۔شمالی ہندوستان کے صوبہ اتر پردیش کے قصبہ ایودھیا میں 1528میں تعمیر ہونے والی یہ مسجد 464 سال تک قائم رہی لیکن اب اس کا نام و نشان بھی باقی نہیں ہے۔۔ اب وہاں حکومت ہند کی فعال شمولیت کے ساتھ رام مندر کی تعمیر شروع ہوگئی ہے۔اس مندر کا سنگ بنیاد وزیر اعظم نریندر مودی نے 5 اگست 2020 کو خود رکھا تھا۔شاید یہ اس کا جواب تھا کہ جس طرح 1528 میں شہنشاہ بابر (کے کمانڈر میر باقی) نے ایک مسجد کی بنیاد رکھی تھی اسی طرح ٹھیک 492 سال بعد 2020 میں وزیر اعظم نریندر مودی نے بھی رام مندر کی بنیاد رکھ دی۔

لیکن یہاں ایک بڑا فرق ہے۔ یہ فرق ہمیشہ تاریخ کے صفحات میں درج رہے گا اور آنے والی نسلیں یہ جانتی رہیں گی کہ شہنشاہ بابر نے 1528میں جو مسجد بنائی تھی اس کے کسی مندر کو توڑ کر بنانے کا کوئی ثبوت سپریم کورٹ تک کو نہیں ملا تھا۔جبکہ نریندر مودی نے جس رام مندر کا سنگ بنیاد رکھا تھا وہ یقینی طور پر ایک مسجد کو توڑ کر بنایا گیا تھا۔یہ مسجد 6 دسمبر 1992 کو دن کے اجالے میں بی جے پی‘بجرنگ دل‘وی ایچ پی اور شو سینا کے ہزاروں کارسیوکوں نے منہدم کردی تھی۔اس موقع پر بی جے پی کے تین درجن سے زائد ممتاز لیڈر بھی وہاں موجود تھے اور کارسیوکوں کو جوش دلا رہے تھے۔ان میں رام مندر تحریک کے سرخیل لال کرشن اڈوانی‘مرلی منوہر جوشی‘اوما بھارتی‘اشوک سنگھل‘ ونے کٹیار اور وشنو ہری ڈالمیا بھی شامل تھے۔

تاریخ یہ بھی یاد دلاتی رہے گی کہ جس طرح مندر توڑ کر مسجد بنانے کا کوئی ثبوت نہ ملنے کے باوجود اور بابری مسجد کی زمین کی ملکیت ہندؤں کے حق میں ثابت نہ ہونے کے باوجود ملک کی سب سے اعلی عدالت سپریم کورٹ نے بابری مسجد کی زمین کو رام مندر کی تعمیر کے لئے ہندؤں کے حوالہ کردیا تھا اسی طرح مسجد کے انہدام کے 28سال بعد 2020 میں لکھنؤ میں سی بی آئی کی اسپیشل عدالت نے مذکورہ تمام ملزمین کو (اور تاریخ کی نظر میں مجرمین کو) سازش اور انہدام کے ہر الزام سے بری کردیاتھا۔۔ واقعہ یہ ہے کہ بابری مسجد کے ساتھ ناانصافی کے عمل میں فیض آباد اور لکھنؤ کی مقامی عدالتوں کے ساتھ ساتھ سپریم کورٹ بھی برابر شامل رہی۔ اس ضمن میں الہ آبادہائی کورٹ کو قدرے مستثنی رکھا جاسکتا ہے۔تاریخ بتائے گی کہ مقامی عدالتوں اور سپریم کورٹ سے ہزار درجہ بہتر فیصلہ تو الہ آباد ہائی کورٹ نے ہی کردیا تھا۔اس کی تفصیل آگے بیان کی جائے گی۔لیکن اس نکتہ پرمورخ یہ سوال بھی اٹھائے گا کہ (گوکہ خود ہندو فریق بھی اس فیصلہ سے مطمئن نہیں تھا) حکومتوں‘عدالتوں اور مختلف سیاسی پارٹیوں کی شرپسندی سے واقف ہوجانے کے باوجود بابری مسجد کا فریق کیوں الہ آباد ہائی کورٹ کے اس فیصلہ پر اکتفا نہ کرسکا۔

آئیے اب ذرا دوسری طرف رخ کرتے ہیں۔ہندوستان میں اس وقت (2020 میں) سرکاری اعداد و شمار کے مطابق نوجوانوں کی آبادی 34.33 فیصد ہے۔ظاہر ہے کہ اس وقت جن کی عمریں 30 تا 35 برس ہیں انہیں بھی بابری مسجد کے قضیہ اوراس کے انہدام کا کچھ زیادہ اندازہ نہیں ہوگا۔پھر 1992میں الیکٹرانک میڈیا بھی اس پیمانہ کا نہیں تھا۔ذرائع ابلاغ بھی وسیع تر نہیں تھے۔زیر نظر مضمون کی دوسری قسط میں لکھنؤ کی عدالت کے تازہ فیصلہ کا بھی جائزہ لیا جائے گا لیکن مناسب معلوم ہوتا ہے کہ مختصر ہی سہی دور حاضر کی نسلوں کے لئے ایک سلسلہ وارٹائم لائن بیان کردی جائے۔

جیسا کہ اوپر ذکر کیا گیا بابری مسجد کی تعمیر شہنشاہ بابر کے کمانڈر میر باقی نے 1528میں کی تھی۔اس مسجد میں 421 سال تک باجماعت نماز ادا ہوتی رہی۔ تین صدیوں کے بعد سخت گیر عناصر نے مسجد کے خلاف سازش شروع کردی لیکن پہلی معلوم سازش 1885میں رونما ہوئی۔ مسجد کی تعمیر کے 357 برس بعد مہنت رگھوبیر داس نے فیض آباد کی ضلع عدالت میں ایک درخواست دائر کی اوربابری مسجد کے احاطہ کے باہر ایک سائبان (Canopy) بنانے کی اجازت مانگی۔لیکن ضلع عدالت نے اس درخواست کو مسترد کردیا۔1885میں ہندوستان کے انتظام وانصرام پر مکمل طورپر انگریزوں کا قبضہ تھا۔عدالت کے ذریعہ ہندؤں کی درخواست کو مسترد کرنے کی وجہ لازمی طورپر قانونی استدلال کی کمی تھی۔عدالت کوہندؤں کا کوئی مالکانہ حق نہ بابری مسجد پر نظر آیا ہوگا اور نہ ہی اس کے باہر کے حصہ پر۔۔

انگریزوں پر ہندو مسلم آبادی کو آپس میں لڑانے کا الزام لگتا رہا ہے۔۔لیکن یہاں انگریزوں نے اس موقع کو استعمال نہیں کیا اور ہندؤں کے دعوے کو بے بنیاد پاکر اس درخواست کو مسترد کردیا۔مسجد کے احاطے کے باہر سائبان کی تعمیر کی درخواست یقینی طوپر ایک سازش کے تحت ہی کی گئی تھی لیکن انگریزوں نے سازش کے اس موقع کا استعمال نہیں کیا۔اس سازش کے 64 سال کے بعد اور ملک کی آزادی کے تقریباً ڈیڑھ سال بعد ہندؤں نے پھر ایک بڑی سازش کی اور 23 دسمبر 1949 کی شب 50-60 لوگوں نے بابری مسجد کی دیوار پھاند کر مرکزی محراب میں رام کی مورتی رکھ دی۔اس سے پہلے اکھل بھارتیہ راماین مہاسبھا نے بابری مسجد کے باہر 9 دنوں تک بغیر کسی وقفہ کے راماین کا پاٹھ پڑھنے کا پروگرام منعقد کیا اور آخری دن وہ حرکت انجام دیدی۔بالکل اسی طرح جس طرح 43 سال بعد 1992 میں پہلے علامتی کارسیوا کے نام پر ہزاروں لوگ جمع ہوئے اور پھربابری مسجد کو منہدم کردیا۔۔

چوری چھپے مورتی رکھنے کے چند ہفتوں بعد 1950 کے اوائل میں فیض آباد کی عدالت میں دو درخواستیں دائر کی گئیں۔گوپال سملا وشارد نے بابری مسجد کے اندر چوری سے رکھی اس مورتی کی پوجا کرنے کی اجازت مانگی جبکہ پرم ہنس رام چندر داس نے پوجا کے تسلسل اور مورتی کو نہ ہٹائے جانے کا مطالبہ کیا۔۔اس کے 9 سال بعد نرموہی اکھاڑا نے بابری مسجد کو اس کے حوالہ کئے جانے کیلئے درخواست دائر کی۔

23 دسمبر 1949 کو بابری مسجد میں آخری بار عشاء کی نماز باجماعت ادا ہوئی تھی۔اس کے بعد پھر اس مسجد میں نماز نہیں پڑھی جاسکی۔اور پھر 43 سال بعد اس کی شہادت واقع ہوگئی۔ یہاں سوال یہ پیدا ہوتا ہے کہ کیا 1885سے 1992تک یعنی کل 107سال تک سازش کے علاوہ بھی کچھ ہوا؟

1961میں یوپی سنی سینٹرل وقف بورڈ نے بابری مسجد کو اس کے حوالہ کئے جانے کی درخواست عدالت میں دائر کی۔.. درخواست گزار کے طور پر ہاشم انصاری پیش ہوئے ۔ فیض آباد کی ضلع عدالت میں یہ مقدمہ 36 سال تک چلتا رہا اور فروری 1986میں اچانک عدالت نے بابری مسجد کا تالہ کھول کر اسے پرستش کے لئے ہندؤں کے حوالہ کئے جانے کا فیصلہ کردیا۔۔ یہاں پھر سوال پیدا ہوتا ہے کہ جس طرح غلام ہندوستان میں 1885میں انگریزوں کے تسلط کے دوران اسی فیض آباد کی عدالت نے ہندو فریقوں کی عیاری پر مبنی دائر درخواستوں کو مسترد کرکے ایک بڑی سازش کو ناکام بنادیا 1950سے 1986 تک آزاد ہندوستان میں (کانگریس حکومت کے دوران) فیض آباد کی اسی عدالت نے کیوں معاملہ کو اتنا طول دیا اور کیوں آخر کار اس سازش کو کامیاب کردیا۔۔ اس سوال کا جواب شاید اس سوال کے اندر پوشیدہ مل جائے کہ 23 دسمبر 1949 کی شب چوری چھپے مورتیاں رکھنے ہی کیوں دی گئیں اور جب وہاں پچھلے نو دنوں سے سخت گیر ہندؤں کا راماین پاٹھ پروگرام چل رہا تھا تو انتظامیہ اور حکومت نے حفظ ماتقدم کے تحت کوئی سخت انتظام کیوں نہیں کیا؟۔۔۔

اسی سے وابستہ سوال یہ ہے کہ جب 1528 سے 1949 تک وہاں نماز باجماعت ادا ہو رہی تھی تو انتظامیہ اور حکومت نے چوری چھپے مورتیاں رکھنے والوں کے خلاف کیا کارروائی کی؟ کیوں مسجد میں تالہ لگایا گیا اور کیوں مسلمانوں کو وہاں نماز پڑھنے سے محروم کیا گیا؟چوری چھپے مورتی رکھنا ایک مجرمانہ عمل تھا لیکن اس مجرمانہ عمل کو جاری رکھنا حکومت کا اس سے بڑا مجرمانہ عمل تھا۔کیا اس عمل میں کانگریس کے اس وقت کے وزیر اعظم پنڈت جواہر لعل نہرو کی شمولیت نہیں تھی؟

بہر حال فروری 1986میں مقامی عدالت کا فیصلہ آتے ہی مسجد کا تالہ کھول دیا گیا۔اس وقت یوپی میں کانگریس کے ویر بہادر سنگھ وزیر اعلی تھے جبکہ ملک کے وزیر اعظم راجیو گاندھی تھے۔آخر اس فیصلہ کے خلاف فوری طورپر حکومت کیوں ہائی کورٹ نہیں گئی؟ کیوں ہنگامی حکم کی درخواست نہیں کی گئی؟اس کے بر خلاف سرکاری ٹیلیویزن دور درشن پر اس فیصلہ کی خوب تشہیر کی گئی اور وہاں ہندؤں کو پوجا کیلئے ساری آسانیاں فراہم کی گئیں۔۔پورے ملک سے ہندوؤں نے وہاں جانا شروع کردیا۔اگست 1989 میں الہ آباد ہائی کورٹ نے صورت حال کو جوں کا توں رکھنے کا حکم دیا۔۔ یعنی مسلمان بابری مسجد سے دور رہیں اور ہندو بدستور پوجا کرتے رہیں۔۔۔

یہاں یہ بتانا ضروری ہے کہ بابری مسجد کا تالہ کھلنے کے بعد مسلمانوں کی طرف سے سیاسی اقدام کی تحریک مرکزی طور پر دہلی سے شروع ہوئی۔اس تحریک میں چند نام بہت بڑے تھے۔مثال کے طورپر سید شہاب الدین‘شاہی امام عبداللہ بخاری‘ابراہیم سلیمان سیٹھ‘غلام محمود بنات والا اورسلطان صلاح الدین وغیرہ۔ اس کے علاوہ دوسری سطح کے مسلم لیڈر بھی اس تحریک سے وابستہ ہوئے۔ان میں ظفر یاب جیلانی‘قاسم رسول الیاس‘جاوید حبیب وغیرہ تھے۔ لیکن دوسری جانب تالہ کھلنے‘پوجا شروع ہونے اور ہائی کورٹ سے "اسٹیٹس کو” کے حکم کے باوجود بی جے پی نے اس تحریک کو مزید آگے بڑھایا۔

راجیو گاندھی کے خلاف ان کی جماعت کے وشوناتھ پرتاپ سنگھ جب الگ ہوکر سیاسی میدان میں آئے تو ان کے ساتھ اتحاد میں شامل ایک طرف جہاں بایاں محاذ تھا وہیں بی جے پی بھی تھی۔بی جے پی کے پاس اس وقت تک لوک سبھا میں صرف دو سیٹیں (اٹل بہاری باجپائی اور ایل کے اڈوانی کی) ہوا کرتی تھیں۔لیکن وشوناتھ پرتاپ سنگھ کی عنایت اور رام مندر تحریک کے سبب بی جے پی دوسے 88 سیٹوں تک پہنچ گئی۔ اڈوانی بابری مسجد کی جگہ رام مندر کی تعمیر کے مطالبہ کو لے کر 25 ستمبر 1990 کو سومنات سے رتھ یاترا لے کر نکلے اور پھر جہاں جہاں گئے فسادات کی ایک خونی لکیر چھوڑتے چلے گئے۔۔ وہ ایک دن میں 300 کلو میٹر کا سفر کرتے اور کم سے کم 6 جلسوں کو خطاب کرتے۔۔ اس رتھ کو صرف بہار میں جاکر بریک لگا جب اس وقت کے وزیر اعلی لالو پرساد یادو نے اڈوانی کو پٹنہ میں ہی گرفتار کرکے دہلی واپس بھیج دیا۔

ادھر مسلمانوں کی تحریک بھی عروج پر تھی۔شاید آزاد ہندوستان کی تاریخ میں دہلی کے بوٹ کلب پر لاکھوں مسلمان پہلی بار جمع ہوگئے تھے۔لیکن اسٹیج پر مسلم قائدین ایک دوسرے سے نبرد آزما ہوگئے اور مسلمانوں کی بنی بنائی ہوا اکھڑ گئی۔سید شہاب الدین اور شاہی امام دونوں اپنی گرم طبیعت کو اعتدال میں نہ رکھ سکے۔ اڈوانی کی تحریک بڑھتی چلی گئی اور ان کے ساتھ کئی سخت گیر تنظیمیں بھی جڑ گئیں۔

اکتوبر 1990میں سخت گیر کار سیوکوں نے بابری مسجد پر چڑھ کر اسے منہدم کرنے کی کوشش کی۔لیکن اس وقت یوپی میں ملائم سنگھ کی حکومت تھی۔پولس نے گنبد پر چڑھے ہوئے کارسیوکوں پر گولی چلائی اور ایک درجن سے زائد ہلاک ہوگئے ۔۔ اس کے بعد 1991 کے الیکشن میں بی جے پی حکومت میں آگئی‘ کلیان سنگھ یوپی کے وزیر اعلی بنے اورشرپسندوں کی بہار آگئی۔۔1992 میں مرکز میں کانگریس کی حکومت تھی لیکن وہ یوپی میں بی جے پی کی حکومت کو بابری مسجد کے خلاف منصوبے کو آگے بڑھانے سے روکنے میں ناکام رہی۔اسوقت وزیر اعظم نرسمہاراؤ تھے۔۔ رام مندر کی تحریک اب نکتہ ارتکاز (Saturation point) پر تھی۔

دسمبر 1992 میں ایودھیا میں ہزاروں کارسیوکوں کو جمع کرکے پھر کارسیوا کا پروگرام بنایا گیا۔نرسمہاراؤ کو اپوزیشن سمیت خود ان کی پارٹی کے لوگوں نے بھی متنبہ کیا۔ یہاں تک کہ قومی یکجہتی کونسل National Integration Council کی میٹنگ میں نرسمہاراؤ سے کہا گیا کہ وہ یوپی حکومت کو برخاست کردیں کیونکہ انٹلی جنس رپورٹوں کے مطابق بھی شرپسندوں کے عزائم اچھے نہیں ہیں اور یوپی حکومت فعالیت کے ساتھ انہیں راہ دے رہی ہے۔اسی دوران معاملہ سپریم کورٹ میں گیا اور بی جے پی/وی ایچ پی کی کارسیوا کو روکنے کی گزارش کی گئی۔عدالت نے تمام تر اندیشوں کے باوجود یوپی کے وزیر اعلی کلیان سنگھ کے اس حلف نامہ پر یقین کرکے محدود کارسیوا کی اجازت دیدی جس میں کہا گیا تھا کہ یہ محض علامتی کارسیوا ہوگی اور حکومت مسجد کو کوئی گزند نہ پہنچنے دے گی۔

ادھر قومی یکجہتی کونسل نے نرسمہا راؤ سے کہا کہ وہ بابری مسجد کے تحفظ کے لئے اقدامات کریں اور یوپی حکومت پر بھروسہ نہ کریں۔نرسمہاراؤ نے کہا کہ ہنگامی حالات سے نپٹنے کیلئے ہماری تیاری پوری ہے اور پیرا ملٹری فورسز پوری طرح تیار ہیں۔ 5دسمبر 1992 کو لکھنؤ میں ونے کٹیار کے گھر پر بی جے پی لیڈروں کی میٹنگ ہوئی جس میں (سی بی آئی کی چارج شیٹ کے مطابق) یوپی کے وزیر اعلی کلیان سنگھ نے کہا کہ سپریم کورٹ نے تعمیر پر پابندی لگائی ہے توڑ پھوڑ پر نہیں۔6دسمبر کو صبح سے ہی ان تمام لیڈروں نے مائک پر نفرت انگیز تقریریں کرنی شروع کردی تھیں اور کارسیوکوں کا حوصلہ بڑھایا جارہا تھا۔آخر کار کارسیوک مسجد کے گنبدوں پر چڑھ گئے اور کدالوں سے توڑنے لگے۔بعد میں رسیاں باندھ کر گنبدوں کو گرادیا گیا۔چند گھنٹوں میں ہی 464 سال پرانی مسجد کو زمیں بوس کردیا گیا۔اور وہاں رام للا کو بٹھاکر میک شفٹ (عارضی مندر) بنادیا گیا۔ اسی رات وہاں بھجن کیرتن بھی شروع کردیا گیا۔

پورا ملک دیکھتا رہا۔حکومت دیکھتی رہی۔وزیر اعظم دیکھتے رہے۔اور سپریم کورٹ بھی دیکھتا رہا۔تمام وعدے اور حلف نامے دھرے کے دھرے رہ گئے۔اپوزیشن سمیت متعدد لیڈر اور مسلم قائدین چیختے رہے لیکن پہلے گنبد کی شہادت سے آخری اینٹ کے گرنے تک نرسمہاراؤ خاموشی سے دیکھتے رہے۔۔ وہ چاہتے تو سریع الحرکت کارروائی کرکے ٹوٹی پھوٹی بابری مسجد کو بکھرنے سے بچاسکتے تھے۔۔ان کی بھیجی ہوئی فورس کوئی زیادہ دور نہیں تھی۔۔۔لیکن انہوں نے مجرمانہ خاموشی اختیار کی اور بابری مسجد کو مکمل طور پر شہید ہوجانے دیا۔

میرا موقف یہ ہے کہ بابری مسجد کے خلاف سازش تیار کرنے میں ایک طرف جہاں ہندو جماعتوں سے لے کر بی جے پی تک سرگرم عمل تھی وہیں پنڈت جواہر لعل نہرو‘راجیو گاندھی اور نرسمہاراؤ بھی اس سازش کا متحرک حصہ نہ سہی تو خاموش حصہ ضرور تھے۔

(مضمون میں پیش کردہ آرا مضمون نگارکے ذاتی خیالات پرمبنی ہیں،ادارۂ قندیل کاان سےاتفاق ضروری نہیں)

رنجن گگؤیی نے بابری مسجد کا فیصلہ سنایاـ چالیس دن تک عدالت چلتی رہی اور عدالت نے قبول کیا کہ رام جنم بھومی کا معاملہ بہت حد تک فرضی ہےـ مسلمانوں کا پلڑا بھاری تھا، فیصلہ آیا، جہاں سب کچھ فرضی تھا ، وہ جیت گئے، کہا گیا کہ عقیدے کی بنا پر فیصلہ سنایا گیا ہےـ یہ بھی کہا گیا کہ ایسا نہ ہوتا تو ملک میں فرقہ وارانہ فسادات شروع ہو جاتے ـ عقیدہ ہندوؤں کے پاس تھا،عقیدہ مسلمانوں کے پاس نہیں تھا . دو انصاف دو قانون کی جو واہیات شکل عدلیہ نے پیش کی ، اس کی نظیر ساری دنیا میں نہیں ملے گی،اس وقت بھی یہ سوال پیدا ہوا کہ پھر سیدھے سیدھے فیصلہ دے دیتے ، چالیس دن تک سنوائی کی کیا ضرورت تھی ـ
بابری مسجد کے مجرم بری ہو گئے . تمام شواہد آج بھی سرچ کرنے پر مل جائیں گے . جوشی کے کندھے پر سوار اوما بھارتی، دہشت گردکدال پھاوڑوں کے ساتھ اینٹ سے اینٹ بجاتے ہوئے لاکھوں کا مجمع اور اس سے قبل دہشت اور وحشت کا رتھ ، جو جمہوریت کی سڑکوں کو روندتے ہوئے بڑھا ، اور اس وقت رتھ کے مہارتھی اڈوانی کو کہاں علم تھا کہ وقت نے انھیں ایک ایسے بلیک ہول میں پھیکنے کی تیاری کر لی ہے کہ ان کی باقی زندگی ان کے لئے بوجھ بن جائے گی . فیصلہ ٢٨ برس بعد آیا . فیصلہ سنانے والا جج اسی دن ریٹائر ہونے والا تھا، اس نے اخبار نہیں دیکھاتھا،ٹی وی پر دہشت گردوں کے حملے نہیں دیکھ تھے،اس نے کہا ، دھول اڑ رہی تھی اور کسی کا چہرہ واضح نہیں تھا،صرف اتنا بتانے میں ٢٨ برس لگ گئےـ
ہاتھرس ، بلرام پور – ھاتھرس میں یوگی کی پولیس رات تین بجے منیشا کے جسم پر پیٹرول ڈال کر آگ لگا دیتی ہےـ منیشا کا ریپ اور قتل کرنے والوں کی حمایت کرتی ہے . بڑی ذات کے ہندو لاکھوں کی تعداد میں جمع ہو کر عصمت دری کرنے والوں کی حمایت کرتے ہیں ـ پیٹرول ڈال کر آگ لگانے والے نر بھکشی کو موت کی سزا کیوں نہ دی جائے ؟ آر ایس ایس نے اس جاہل ڈھونگی کو وزیر ا علی کی کرسی دیتے ہوئے یہ ضرور غور کیا ہوگا کہ اسی جاہل شخص نے اپنی تقریر میں مسلمان عورتوں کو قبر سے نکال کر بلاتکار کرنے کو کہا تھا، جو مسلمانوں کو قبرستان بھیجے وہ وزیر ا علیٰ،جو قبر سے نکال کر ریپ کرنے کو کہے ، اسے ہندوستان کی سب سے بڑی ریاست تحفے میں دی جائے، میڈیا نے آواز بلند کی،مگر مجھے اس میڈیا پر بھروسہ نہیں ہے،جب میڈیا کو مزید قاروں کے خزانے کی تلاش ہوتی ہے تو اس کی آواز بدل جاتی ہے . ایک زمانہ تھا ، جب ارنب گو سوامی بھی فسطائی طاقتوں کے خلاف چیختے تھے .قیمت مل گئی تو فسطائی طاقتوں کے لئے چیخنے لگے .کردار بدل گیا . اسی فیصد کانگریسی این ڈی اے کا حصّہ بنے،کردار بدل گیا . ملک غارت ہوا .کوئی آواز نہیں .ملک تباہ ہوا .کوئی آواز نہیں، کروڑوں کے روزگار گئے ، کوئی آواز نہیں ـ کسانوں کو کمزور کرنے کے لئے قانون آیا ، کوئی آواز نہیں،مسلمان سڑکوں ، شاہراہوں ، گلیوں میں مارے جاتے رہے اور میڈیا کے آتشی بیانات انھیں ہلاک کرنے کے لئے مخالفت کی صدا بلند کرتے رہے . اس میڈیا پر بھروسہ نہیں ـ
ایک برس قبل ٹائم میگزین رپورٹ کے حوالے سے ایک مختصر جائزہ پیش کیا گیا تھا . جائزے میں مودی کو ، ملک کو تقسیم کرنے والا قرار دیا گیا . ایک دنیا ہماری سیاست پر نظر رکھ رہی ہے . کیا حقیقت میں تقسیم کے راستے کھل گئے ہیں ؟
فسطائی طاقتیں انسانی نفسیات کا مطالعہ رکھتی ہیں۔ ہٹلر کے پاس بھی فدایین تھے –جو اسکے اشاروں پر ایک لمحے میں جان دے دیا کرتے تھے — ملک کے موجودہ حالات مسلمانوں کے لئے بد تر ہوئے جا رہے ہیں ـ حکومت یہ سمجھنے کی کوشش کر رہی ہے کہ مسلمانوں کو زیر کرنے کے لئے کیا کیا تدبیریں کی جا سکتی ہیں .ہم مسلسل شکست سے دوچار ہوتے رہے . تمام فیصلے ہمارے خلاف ،انصاف دو حصّوں میں تقسیم،حکومت کے پاس مسلمانوں کو زیر کرنے کے لئے ایک لمبی فہرست ہے ـ پھر ایک کے بعد دوسرا نشانہ لگنا شروع ہو جاتا ہے-حکومت کی فسطائی منطق کے سامنے آپ بے بس اور مجبور ہیں۔ممکن ہےکہا جائے لاوڈ اسپیکر پر اذان نہ دیں،محلے میں ایک مسجد کی جگہ تین مسجدیں کیوں ؟ ایسی چھوٹی چھوٹی باتوں پر بھی آپکو زیر کیا جائے گا .یاد کیجئے حکومت بننے کے ساتھ ہی راج ناتھ سنگھ نے پہلا بیان ملک کے سیکولر اور لبرل کردار پر دیا تھا .در اصل فسطائی طاقتوں کو ان دو لفظوں سے ڈر محسوس ہوتا ہے — فسطائی طاقتیں پوری شدّت اور منصوبوں کے ساتھ مذہب ،مشترکہ وراثت پر حملہ کر رہی ہیں . کیا یہ تقسیم کی شروعات نہیں ہے ؟ ہماری ملت اور گنگا جمنی تہذیب کو چند برسوں میں کچلنے کی سازش ہوئی ہے ۔ تصویر کا ایک رخ یہ ہے کہ ایسے مواقع پر پر جوش و خروش کا مظاہرہ کیا جاتا تھا ۔لیکن نئی فسطائی تھذیب نے آپس کی دوستی کو مضبوط کرنے کا خوبصورت بہانہ بھی ہم سے چھین لیا ہے۔پرب تیوہار کے موقع پر سب سے بڑا خطرہ فرقہ وارانہ فساد کا ہوتا ہے ۔ایک مخصوص نظریہ کے لوگوں نے ملت ،اخوت بھائی چارگی کے درمیان زبردست دیوار حائل کر دی ہے .پچھلے کچھ برسوں میں ہم لگاتار ایسے موقعوں پر حادثوں سے دوچار ہوتے رہے ہیں دو برس 26 جنوری کے موقع پر کاس گنج میں ،ہم دیکھ چکے ہیں کہ قومی پرچم لہرانے کے جذبے کو بھی کس طرح ایک مخصوص نظریہ کے لوگوں نے کچلنے کی کوشش کی۔ہماری حب الوطنی بھی ان لوگوں کو منظور نہیں ۔ کاس گنج کے معصوم مسلمانوں نے اپنے دل کی آواز سنی اور پرچم لہرانے کی کوشش کی تو بھگوا بریگیڈیر نے نہ صرف انکے معصوم جذبوں کو ٹھیس پہچایی بلکہ جب صورت حال نازک ہوئی تو حب الوطن مسلمانوں پر پولیس نے گرفتاری کے بعد غداری کی دفعہ بھی لگادی اور سیکو لرزم کے صدیوں پرانے لباس کو تار تار کر دیا۔. ہندوستان آھستہ آھستہ تقسیم کی طرف جاتا ہوا نظر آ رہا ہے . زیادہ تر مخالف بیانات کا پس منظر یہ ہے ،کہ دنگے بھڑکے نفرت کا پر تشدد ماحول پیدا ہوا۔ملک کے حالات خراب ہوئے۔ ملک کے مختلف حصّوں میں آگ لگی۔انسانیت داغدارہوئی — سامانوں کو نقصان پہچا۔. ایسے اشتعال انگیز بیانات سامنے اہے جنہونے گووند پانسرے ،بھولکر ،کلبرگی ، پہلو خان ،اخلاق کو مارنے میں نمایاں کردار ادا کیا .یہ وحشت اور دہشت کو زندہ کرنے والے ملک مخالف بیانات تھے جنہوں نے گاو رکشکوں کے متعدد مشتعل ہجوم کو پیدا کیا .انکے تشدد کے واقعات سڑکوں پر آج بھی عام ہیں ـ پاکستان اور قبرستان بھیجو جیسے نعرے دینے والے ،قانون اور آئین کی شق سے کس دائرے میں آتے ہیں ؟۔کیونکہ ایسے ہر اشتعال انگیز بیان کے بعد فسادات ،انسانوں کی ہلاکت ،جان و مال کے نقصان جیسی خبریں سامنے آی ہیں ۔اس مکمل جایزے پر آئیے تو بیشتر نیوز چینل اور میڈیا ہندوستانی جمہوریت کا مذاق اڑاتا ہوا نظر آتا ہے .۔۔ان میں سے زیادہ تر چینلوں نے مخالف آگ بھڑکا کر انسانی جانوں کا زیاں کیا ہے۔اور آج بھی کر رہے ہیں . ترسیل اور ابلاغ پر حکومت کا دباو قایم . ہے . اخبارات اور ٹی وی چنیلز سے اعتماد اٹھ چکا ہے ۔ الیکشن کمیشن اور عدالتیں بھی شک کے دائرے میں ہیں . متھھی بھر سیکولر لوگوں کی بے چینی بتاتی ہے کہ ملک کہاں جا رہا ہے ۔یہ میرا انڈیا نہیں ہے . ایک مخصوص نظریہ کی پارٹی نے شہہ اور مات کاایسا کھیل شروع کیا ہے ، جس کے صفحات عالمی سیاست کے لئے بھی نئے ہیں۔
حکومت کے تمام سیاسی مہرے پٹ چکے ہیں . ہر طرح کی ناکامیاں سامنے ہیں . پھر بھی سیاست کے ان گلیاروں میں جشن ہے . کیونکہ زعفرانی بندر ان کے ساتھ ہیں . تازہ صورت حال کو دیکھتے ہوئے کیا ملک ایک بڑے انقلاب کے لئے تیار ہے ؟ ایسا لگتا نہیں ہے . انتخابات میں شکست و فتح کے کھیل کا کویی مطلب نہیں رہ گیا . این ڈی اے شکست خانے کے بعد مہرے خرید کر حکومت بنا لیتی ہے . یہ کوئی اور ملک ہے ـ یہ میرا ملک نہیں ہے ـ

(مضمون میں پیش کردہ آرا مضمون نگارکے ذاتی خیالات پرمبنی ہیں،ادارۂ قندیل کاان سےاتفاق ضروری نہیں)

بابری مسجد ملکیت کے مقدمہ میں فاضل جج نے یہ تومان لیاتھاکہ مسجدکسی بھی مندر کوتوڑکرنہیں بنائی گئی تھی اورمسجدکوتوڑنادرست نہیں تھا، اس سے یہ بات بھی بتادی گئی کہ جولوگ مسجدتوڑنے، اس کے لئے منظم طریقہ سے رتھ یاترانکالنے اورملک کے اس خطہ سے لے کراس خطہ تک لوگوں کوابھارنے اوران کے ذہنوں میں مسجد توڑنے کی پلاننگ کرنے کے کام میں شریک رہے، وہ سب کے سب مجرم ہیں، یہ بات بابری مسجد ملکیت کے فیصلے سے بالکل واضح ہے؛ لیکن لکھنؤ کی سی بی آئی عدالت نے، جہاں اس تعلق سے مقدمہ 28ٌٌسالوں سے چل رہاتھا، 30ستمبرکویہ فیصلہ سنایاکہ اس تعلق سے جن زندہ 32لوگوں پرفردجرم عائدتھا، وہ سب کے سب بے گناہ ہیں، ان کے خلاف کوئی ایساثبوت اورکوئی ایسی شہادت نہیں ملی، جس سے یہ ثابت کیاجاسکے کہ یہ لوگ مسجدکے توڑنے یا اس کے لئے لوگوں کوابھارنے میں شریک تھے۔
یہ فیصلہ بس ایساہی ہے ، جیسے دن کی روشنی میں ، بھرے مجمع میں کسی کے گال پرزناٹے دار تھپڑ رسید کیاجائے اوراس سے مکرجایاجائے اوریہ ماننے کے لئے ہرگزتیارنہ ہوا جائے کہ تھپڑرسیدکیاگیاہے، اسے کہتے ہیں سینہ زوری، اسے کہتے ہیں داداگری، اسے کہتے ہیں دبنگائی، آج کل ہمارے ملک میں یہی سب چل رہاہے، ’’جس کی لاٹھی، اس کی بھینس‘‘ سنتے اورپڑھتے آئے تھے، اب کھلی آنکھوں اس کا مشاہدہ کیاجارہاہے، عدالت میں ایک مورتی ہوتی ہے، جس کی آنکھوں پرپٹی بندھی رہتی ہے، اس کامطلب تو یہ ہے کہ یہ انصاف کی دیوی ہے، کسی ایک کی طرف نہیں دیکھتی؛ لیکن میں سوچاکرتاتھا کہ جب پٹی بند ھی ہوئی ہے تودیکھے گی کیسے؟ اورجب دیکھے گی نہیں توفیصلہ کیسے کرے گی؟ معلوم ہوا کہ انصاف کی دیوی دیکھ کرنہیں، سن کرفیصلے کیاکرتی ہے، اب ظاہرہے کہ سنانے والاجتنے اچھے رنگ ڈھنگ سے اپنی سنادے اورجس سے دیوی متاثرہوجائے، فیصلہ تواسی کے حق میں ہوگا، اگرآنکھ کھلی ہوتی توکم از کم چہرہ کے اکسپریشن سے تویہ معلوم ہی ہوجاتاکہ بولنے والاجھوٹاہے یا سچا، اب جاکریہ لوجک سمجھ میں آئی۔
بابری مسجد ملکیت کے تعلق سے جوفیصلہ ہوا، اس میں گگوئی نے کہاتھا کہ 1949میں مسجد کے اندر مورتی رکھناعبادت گاہ کی بے حرمتی کا عمل تھا، 1992میں اسے منہدم کیاجانا قانون کی خلاف ورزی تھی اور1949میں مسلمانوں کومسجدسے بے دخل کئے جانے کاعمل قانون کے تحت نہیں تھا، آج انہیں تین نکتے پربات کرتے ہیں، سب سے پہلی بات ’’1949میں مسجد کے اندرمورتی رکھناعبادت گاہ کی بے حرمتی کا عمل تھا‘‘، توسوال یہ ہوتاہے کہ یہ بے حرمتی کس نے کی؟ اس کوسزادی گئی یانہیں؟ اگرنہیں دی گئی توکیوں؟ اوراگردی گئی اتنی ہلکی کیوں دی گئی ، جس سے حوصلے بلند ہوئے اوربعد کے واقعات رونماہوئے؟ یہ معاملہ بہت حساس تھا، اس معاملہ کواس وقت کی حکومت نے کس انداز میں لیا؟ سنجیدگی کے ساتھ یا رواروی میں؟ اگرسنجیدگی کے ساتھ لیاتوپھرمعاملہ اتناآگے کیسے بڑھا؟ اوراگرسنجیدگی کے ساتھ نہیں لیا توپھرتوساراقصوراس کی وقت حکومت کاہے، اوریہی ظاہرہے، جیساکہ ملکیت کے فیصلہ اورشیلانیاس کے وقت سننے کوملاکہ ہرکانگریسی اس پرفخرکررہاتھا کہ بابری مسجدکے تعلق سے سارے کام انھوں نے کئے اورافسوس بھی ہورہاتھا کہ کریڈٹ بی جے پی لے رہی ہے۔
اس پرپھریہ سوال ہوتاہے کہ ان سب کرتوتوں کے باوجود ہمارے قائدین نے ہمیں کانگریس کا دم جھلاکیوں بناکررکھا؟ پہلے ہی مرحلہ میں اسے مسترد کیوں نہیں کردیا تھا؟ اگراسی وقت اسے مستردکردیاجاتااورپوری قوم کودوسراپلیٹ فارم مہیاکردیاجاتاتوسوال ہی نہیں ہے کہ آج کی طرح خون کے آنسو بہانے پڑتے، مولاناابوالکلام آزاد بڑے سیاست داں تھے اورپورے دم خم کے ساتھ بولتے تھے؛ لیکن اخیرزمانہ میں مہربہ لب ہوگئے تھے، وہ توکانگریس سے نہیں نکل سکتے تھے کہ انھوں نے بھرپورطریقے سے مسلم لیگ کی مخالفت کی تھی؛ لیکن ان کے علاوہ جوروشن دماغ تھے، دورس تھے، مفکرتھے، انھوں نے اس کومحسوس کیوں نہیں کیااوراگرمحسوس کیاتوخاموش کیوں رہے؟ یہ اوراس قسم کے سوالات آج کے حالات کودیکھ کربہت ساروں کے ذہن میں کلبلارہے ہیں۔
بابری مسجدملکیت کے فیصلے میں دوسری بات یہ بھی کہی گئی کہ ’’1949میں مسلمانوں کومسجدسے بے دخل کئے جانے کاعمل قانون کے تحت نہیں تھا‘‘، اس پرسوال یہی ہے کہ مسلمانوں کومسجدبے دخل کرنے کاکام کس نے کیا؟ کسی فردیاتنظیم نے تونہیں؛ بل کہ حکومت نے ہی کیا، مطلب صاف ہے کہ بابری مسجد کے تعلق سے جتنے بھی ’’کارنامے‘‘ انجام دئے گئے، حکومت کی نگرانی میں دئے گئے اورجس حکومت کی نگرانی میں دئے گئے، ہم اسی کے خادم بن کررہے؛ حتی کہ چندسالوں پہلے آسام الیکشن کے موقع سے بدرالدین اجمل کی پارٹی کے خلاف بھی ہم ہی نے جلسے جلوس کئے اوراپنی قوم کے فردکوووٹ دینے سے اپنی ہی قوم کے لوگوں کوروکا، سوال ہے کیوں؟ یہ بھی سوال ہے کہ جس حکومت نے سارے کارنامے انجام دئے؛ بل کہ مسلمانوں کوتعلیمی، معاشی اوردیگرترقیات سے روکنے میں کسی بھی طرح سے کوئی کسرباقی نہیں رکھا، ہم آج بھی اسی کے لئے نرم گوشہ رکھتے ہیں، یہ ہماری سادگی ہے کہ جس کی وجہ سے ہم بیمارہوئے، اسی سے دوابھی لے رہے ہیں:
میرکیاسادہ ہیں، بیمارہوئے جس کے سبب
اسی عطارکے لونڈے سے دوالیتے ہیں
یاکم فہمی ہے اور1947کے فسادات کی وجہ سے جوخوف وہراس ہمارے دل میں ڈالاگیاتھااورجس کافائدہ ہمیشہ سے اٹھایاگیا، ہم اس کوسمجھ نہیں سکے، آپ کیاسمجھتے ہیں کہ سچرکمیٹی کی رپورٹ آپ کی ہم دردی میں تھی؟ بہت سارے لوگ ایسا نہیں سمجھتے، وہ سمجھتے ہیں کہ یہ رپورٹ یہ بتانے کے لئے تھی کہ ہم نے اپنے دورحکومت میں مسلمانوں کوہرطرح سے پیچھے رکھا، تعلیم میں بھی، معیشت میں بھی اورسیاست میں بھی، اس کااندازہ کم از کم اب توہوہی جاناچاہئے اوراب بھی ہمیں سنبھل جاناچاہئے، اگرآج بھی بھی نہیں سمجھے تو پھرکبھی نہیں۔
اب آیئے تیسری بات پر، یعنی’’ 1992میں اسے منہدم کیاجانا قانون کی خلاف ورزی تھی‘‘، ظاہرہے کہ سوال یہ ہوگا کہ یہ خلاف ورزی کس نے کی؟ جس نے کی ، کیاانھیں گرفتارکیاگیا؟ اگرنہیں توکیوں؟ جب بابری مسجد منہدم کی گئی، اس وقت بھی حکومت کانگریس کی ہی تھی، اس کے پاس ملک کی ساری طاقتیں تھیں، بھیڑکوروکنے کی کوشش کیوں نہیں کی گئی؟ اس روٹ کی سبھی گاڑیوں کوبند کیوں نہیں کیاگیا؟ فوج پہلے سے ہی تعینات کیوں نہیں کی گئی؟ پھرجب مسجد ٹوٹ گئی تواس کے بعد حکومت نے کیاذمہ داری نبھائی؟ اس کے خلاف چلنے والے مقدمات میں اتنی تاخیرکیوں ہوتی رہی؟ اس کی فائلیں کیوں غائب ہوئیں؟ وہ افسران کہاں غائب ہوگئے، جن کے ہاتھوں سے فائلیں غائب ہوئی تھیں؟ ان کاسراغ کیوں نہیں لگایاجاسکا؟ مجرمین کے خلاف مقدمات اٹھائیس سال تک کیوں چلتے رہے؟ فاسٹ ٹریک عدالت قائم کرکے اسی وقت فیصلے کیوں نہیں کئے گئے؟ ان تمام سوالوں کے گھیرے میں ہے اس وقت کی حکومت؛ لیکن ظاہرہے کہ جواب کچھ بھی نہیں ہوسکتا۔
آج اٹھائیس سال کے بعدانہدامی کارروائی کے مجرمین کے تعلق سے فیصلہ آیا، وہ بھی سی بی آئی کی عدالت سے اورفیصلہ بھی کیسا؟ ایساکہ ساری دنیاحیران، 32کے 32مجرمین دودھ کی طرح دھلے ہوئے، جب کہ کئی مجرمین نے توخوداپنی زبان سے بھی اقرارکررکھاہے کہ ہم اس کے حصہ تھے اورسب سے اہم بات ’’رتھ یاترا‘‘ کوکوئی بھول سکتاہے کیا؟ لیکن یہ ثبوت نہیں ہیں، بندآنکھوں والی دیوی جوٹھہری، اس کافیصلہ توہی ہوگا، جواسے سنایاجائے گا؛ بل کہ جواس سے کہلوایاجائے گا، یہاں بھی وہی ہوا؛ لیکن یہ خلاف توقع بھی نہیں تھا، جب ملکیت کافیصلہ ہوا، اسی وقت معلوم ہوگیاکہ اب آگے کیاہونے والاہے؟ لیکن سوال پھربھی قائم ہے کہ جس کی وجہ سے ہم بیمارہوئے ، اسی کے پاس دوالینے کے لئے جاناہے یاکسی اورعطارکوڈھونڈھاجائے گا؟

ایڈیٹر ممبئی اردو نیوز

کیا یرقانی ٹولہ بابری مسجد کی شہادت کا مجرم قرار پائے گا ؟
اس سوال پر فیصلہ آج سے ٹھیک چوتھے دن ہونا ہے ۔ اور جو 32 یرقانی کٹگڑے میں کھڑے ہوئے ہیں وہ بی جے پی یا آر ایس ایس یا وی ایچ پی یا بجرنگ دل کے معمولی قسم کے لیڈر نہیں ہیں، ان میں ایل کے اڈوانی، کلیان سنگھ، مرلی منوہر جوشی، اوما بھارتی، سادھوی رتھمبرا، ونئے کٹیار اور مہنت نرتیہ گوپال داس جیسے کٹر ہندوتوادی شامل ہیں ۔ سی بی آئی کے وکیل للت سنگھ کے مطابق لکھنئو کی خصوصی سی بی آئی کورٹ میں رواں مہینے کی پہلی تاریخ کو استغاثہ اور دفاع، دونوں ہی کی طرف سے بحثیں مکمل ہوچکی ہیں اور فاضل خصوصی جج ایس کے یادو نے فیصلہ لکھنا شروع کر دیا ہے ۔ سپریم کورٹ نے پہلے خصوصی عدالت کو 31 اگست کو ہی اس مقدمے کو مکمل کرکے فیصلہ سنانے کی ہدایت دی تھی مگر بعد میں ڈیڈ لائن میں ایک مہینے کا اضافہ کر دیا ۔ ویسے بھی ایک بڑی اکثریت کا یہ ماننا ہے کہ بابری مسجد کی شہادت کی مجرمانہ سازش کا معاملہ 27 برسوں سے زیر سماعت ہے فیصلے میں ایک یا دو مہینے کے ادھر یا اُدھر ہونے سے کیا فرق پڑنے والا ہے !
بات سچ ہے ! بابری مسجد مجرمانہ سازش کے مقدمہ نے ایک لمبا راستہ طے کیا ہے ۔ درمیان میں تو یہ لگنے لگا تھا کہ شائد بابری مسجد کے قصور وار بغیر کسی مقدمے کا سامنا کیے ڈھٹائی کے ساتھ اپنے سیاہ کارنامے پر سینہ پھلاتے رہیں گے ، خصوصاً اس وقت جب 2014ء میں نریندر مودی کی بھاجپائی سرکار نے ملک کی حکومت پر قبضہ کیا تھا ۔ لیکن سپریم کورٹ کی مداخلت نے مقدمہ کی سماعت کا راستہ صاف کیا اور اب فیصلے کی گھڑی ہے ۔ فیصلہ جو بھی آئے، یرقانی ٹولہ بری ہو یا سزا پائے، مقدمے نے یہ یقینی بنا دیا ہے کہ اس ٹولی کا نام جب بھی لیا جائے گا بابری مسجد کی شہادت کو اور اس میں ان کے کردار کو ضرور یاد کیا جائے گا ۔ اگر یہ بری بھی ہو گئے تو لوگ اتنا تو کہیں گے ہی کہ یہ بابری مسجد کے ملزم تھے ۔ اور اگر قصوروار پائے گیے تو مجرم کہلائیں گے ہی ۔
وہ 6 دسمبر 1992ء کی سیاہ تاریخ تھی جب ایودھیا میں برسہا برس سے سر اٹھائے کھڑی تاریخی بابری مسجد کو شہید کر دیا گیا تھا ۔ اسی روز دو ایف آئی آر درج کی گئی تھیں، پہلی ایف آئی آر تھی کرائم نمبر 197/1992 اور دوسری ایف آئی آر تھی کرائم نمبر 198/1992 ۔ پہلی ایف آئی آر نامعلوم کارسیوکوں کے خلاف درج کی گئی تھی، ان پر ڈکیتی، چوری، زخمی کرنے اور عوامی عبادت گاہ کے تقدس کو پامال کرنے نیز مذہب کی بنیاد پر دو فرقوں کے درمیان منافرت پھیلانے وغیرہ کے معاملات عائد کیے گئے تھے جبکہ دوسری والی ایف آئی آر بی جے پی، وی ایچ پی، بجرنگ دل اور آر ایس ایس سے تعلق رکھنے والی آٹھ شخصیات کے خلاف تھی، ان پر رام کتھا کنج سبھا سے نفرت بھری تقریریں کرنے کا الزام تھا ۔ یہ آٹھ افراد تھے ایل کے اڈوانی، اشوک سنگھل، ونئے کٹیار ،اوما بھارتی، سادھوی رتھمبرا، مرلی منوہر جوشی، گری راج کشور اور وشنو ہری ڈالمیا ۔ مذکورہ افراد میں سے تین، گری راج کشور، اشوک سنگھل اور وشنو ہری ڈالمیا کی موت ہو چکی ہے ۔ اس معاملہ میں ایک اہم موڑ لبراہن کمیشن رپورٹ کی پیشی کے بعد آیا ۔ اس کمیشن کا قیام بابری مسجد کی شہادت کے دس دن بعد 16دسمبر1992ء کو کیا گیا تھا ۔ جسٹس ایم ایس لبراہن پنجاب ہریانہ ہائی کورٹ کے جج تھے ۔ انہیں یہ ذمہ داری سونپی گئی کہ وہ بابری مسجد کی شہادت کو ممکن بنانے والے واقعات اور حالات پر رپورٹ پیش کریں ۔ حالانکہ حکومت نے انہیں تین مہینے کی مدت میں رپورٹ پیش کرنے کے لیے کہا تھا مگر اس کمیشن کی مدت کار میں 48 بار توسیع کی گئی، اس پر تقریباً آٹھ کروڑ روپے کی لاگت آئی، اور 1992ء میں بنایا گیا کمیشن 2009ء میں جاکر اپنی رپورٹ پیش کر سکا! کوئی 17 سال بعد ! اس وقت منموہن سنگھ کی سیکولر مانی جانے والی سرکار تھی ۔ حالانکہ بہت سارے لوگ لبراہن کمیشن کی رپورٹ کو بے مصرف قرار دیتے ہیں لیکن اس رپورٹ نے ایک بہت اہم کام یہ کیا ہے کہ بابری مسجد کی شہادت کو منصوبہ بند گہری سازش قرار دے کر 68 افراد کو مسجد کی شہادت کا ملزم بتایا ہے اور باقاعدہ ان کے خلاف کارروائی کی سفارش کی ہے ۔ 68 ملزموں کی فہرست میں ملک کے سابق بھاجپائی وزیراعظم اٹل بہاری واجپئی کا بھی نام شامل ہے، جو اب دنیا سے آٹھ چکے ہیں ۔ یہ واجپئی ہی تھے جنہوں نے کارسیوکوں سے کہا تھا کہ ایودھیا کی زمین پر بہت روڑے اور پتھر ہیں جا کر اسے سمتھل کردو ۔ بات مقدمہ کی ہے، پہلے دونوں ایف آئی آر پر للت پور کی خصوصی عدالت میں سماعت شروع ہوئی تھی بعد میں ایف آئی آر 197 کا معاملہ سی بی آئی کو سونپ کر لکھنئو کی عدالت میں لے آیا گیا اور ایف آئی آر 198 کی تفتیش اسٹیٹ سی آئی ڈی کو سونپ کر رائے بریلی کی خصوصی عدالت میں سماعت شروع کی گئی ۔ اب ایف آئی آر 197 میں مجرمانہ سازش کی، آئی پی سی کی سیکشن 120 بی، بھی شامل کر دی گئی ۔ سی بی آئی نے 5 اکتوبر 1993ء میں دونوں ایف آئی آر کی مشترکہ چارج شیٹ پیش کی، سی بی آئی کا یہ کہنا تھا کہ چونکہ دونوں ہی ایف آئی آر کے معاملات ایک ہی واقعے سے متعلق ہیں لہذا تمام معاملات میں مشترکہ مقدمہ چلانے کی وافر بنیاد ہے ۔ اس موقع پر شیوسینا پرمکھ بال ٹھاکرے، واردات کے موقع پر یوپی کے وزیراعلیٰ رہے کلیان سنگھ وغیرہ کے نام بھی ملزموں کی فہرست میں شامل کیے گئے ۔ یوپی سرکار نے 8 اکتوبر 1993ء کو نوٹیفیکیشن جاری کیا کہ اب دونوں ہی ایف آئی آر کو ملا دیا گیا ہے اور مشترکہ مقدمے کی سماعت لکھنئو کی خصوصی عدالت میں ہوگی ۔ خصوصی عدالت نے تمام ہی معاملات میں مجرمانہ سازش کے سیکشن کو شامل کرنے کی ہدایت دی اس طرح اڈوانی اینڈ کمپنی، جس پر صرف نفرت آمیز تقریریں کرنے کا الزام تھا، مجرمانہ سازش کی قصور وار بھی قرار پائی ۔ لیکن جیسے کہ باطل کا طریقہ ہے معاملے کو طول دینے کے لیے اڈوانی سمیت دیگر ملزموں نے مذکورہ حکم کو ہائی کورٹ میں چیلنج کیا ، دلیل یہ دی کہ چونکہ ان پر مجرمانہ سازش کا الزام ایف آئی آر 197 کے سبب لگایا گیا ہے جبکہ ان کی ایف آئی آر 198 میں یہ الزام نہیں تھا لہٰذا اسے ختم کیا جائے ۔ ہائی کورٹ نے ان کا مقدمہ دوبارہ رائے بریلی کی خصوصی عدالت میں بھیج دیا اور سی بی آئی سے کہا کہ اگر ان کے پاس ان افراد کے خلاف مجرمانہ سازش کی شہادتیں ہیں تو وہ اضافی چارج شیٹ کی شکل میں رائے بریلی کی خصوصی عدالت ہی میں پیش کی جائیں ۔ 2003ء میں رائے بریلی کی خصوصی عدالت نے اڈوانی پر لگے الزامات کو ناکافی قرار دے کر انہیں بری کردیا ۔ شائد اس روز اڈوانی ہی کیا سارا سنگھ پریوار بہت خوش ہوا ہوگا، لیکن خوشی تھوڑے ہی دن کی تھی کیونکہ الہ آباد ہائی کورٹ نے 2005ء میں مداخلت کرکے مقدمے کی سماعت پھر شروع کروادی، بس ہوا یہ کہ اڈوانی اور دوسروں پر سے مجرمانہ سازش کا معاملہ ہٹا لیا گیا ۔ مجرمانہ سازش کا معاملہ ہٹائے جانے کے بعد سی بی آئی نے سپریم کورٹ کا دروازہ کھٹکھٹایا اور 2017ء میں سپریم کورٹ نے حکم دیا کہ تمام معاملات کا مشترکہ مقدمہ لکھنئو کی خصوصی عدالت ہی میں چلایا جائے اور سب پر، اڈوانی پر بھی، مجرمانہ سازش کا معاملہ چلے ۔ پھر سپریم کورٹ نے 31 اگست 2020ء کو مقدمے کا فیصلہ سنانے کی ڈیڈ لائن مقرر کی جسے بعد میں ایک مہینے کے لیے بڑھا دیا گیا، اب فیصلہ آج سے چوتھے روز آیا ہی چاہتا ہے ۔
اس معاملے کے چند کرداروں کو دلچسپ بھی کہا جا سکتا ہے اور زہریلے بھی ۔ مثلاً اڈوانی، جوشی اور اوما بھارتی ۔ سپریم کورٹ کے ذریعہ ’مجرمانہ سازش‘ کا مقدمہ چلانے کے حکم کے بعد اوما بھارتی کی زبان سے نکلا ہوا یہ جملہ ہم سب ہی نے سنا ہے کہ ’کچھ ڈھکا چھپا نہیں تھا ہم نے تو یہ کھلے عام کیا ہے‘ ۔ یہ ’اعتراف جرم‘ تھا مگر ’اعتراف جرم ‘ کے بعد بھی اوما بھارتی کو نریندر مودی نے وزارت میں شامل رکھا تھا ۔ خیر اب اوما بھارتی کو باہر کی راہ دکھا دی گئی ہے، نہ ہی وہ اب ایم پی ہیں نہ ہی وزیر، اور نہ ہی بی جے پی میں کسی بڑے عہدے پر ۔ کلیان سنگھ تو شہید بابری مسجد کے مجرم ہیں ہی، انہیں ’ایک روز کی سزا‘ ہوچکی ہے۔ مگر، ایک ایسے معاملے میں، جس نے سارے ملک کو فرقہ وارانہ بنیادوں پر تقسیم کردیا تھا ، جس نے ملک میں ہندوئوں اور مسلمانوں کے درمیان نفرت کی ایک خلیج حائل کردی ہے ، جو ملک بھر میں فرقہ وارانہ فسادات کا سبب تھا، جس نے ممبئی کو دو مرحلوں میں آگ کے شعلوں میں ڈھکیلا، جس کی وجہ سے ممبئی کے بم بلاسٹ ہوئے، ’صرف ایک روز کی سزا‘ بے معنی ہے ۔ کلیان سنگھ کا قصور بہت شدید ہے۔ کلیان سنگھ کی سزا بھی بابری مسجد کی شہادت کے سلسلےمیں نہیں تھی بلکہ اس لیے تھی کہ انہوں نے مرکزی حکومت کو جو حلف نامہ دیا تھا کہ بابری مسجد پر کوئی آنچ نہیں آئے گی، وہ جھوٹ ثابت ہوا تھا۔ شہادت میں ان کے ’ہاتھ‘ اور سازشی ٹولے کے ساتھ ان کی ساز باز کا معاملہ کہیں اہم ہے اور سپریم کورٹ نے یہی کہا کہ عدالت اس کی شنوائی کرے ۔ کلیان سنگھ کو بچانے کی بہت کوشش کی گئی، انہیں راجستھان کا گورنر بنایا گیا تھا ۔ حالانکہ گورنری ایک آئینی عہدہ ہے اور جوشخص ملزم ہو اسے آئینی عہدے پر رہنے کا کوئی حق نہیں ہوتا لیکن اس ملک کی حکومت جب سے مودی اینڈ کمپنی کے ہاتھ آئی ہے ہر وہ کام ہو رہا ہے جو کبھی نہیں ہوا، جسے کبھی ہونا بھی نہیں چاہیے تھا ۔ ان دنوں کلیان سنگھ کی، جو 88 سال کے ہیں، صحت بہت بُری ہے، انہیں کورونا نے دبوچ لیا تھا ۔ لیکن انہوں نے جو کیا ہے وہ تو سامنے آنا ہے ۔ اب ایک تصویر دکھاتے ہیں ؛ تصویر 6 دسمبر 1992ء کی ہے ۔ ایک ایسی تصویر جو شرمناک بھی ہے‘مکروہ بھی اورجس سے ملک کی ایک بہت بڑی بلکہ سب سے بڑی اقلیت کے خلاف نفرت کااظہار بھی عیاں ہے اوریہ گھمنڈ بھی نظرآرہا ہے کہ ’ہم جو چاہیں گے کریں گے تم لوگ ہمارا کچھ نہیں بگاڑسکوگے۔‘یہ تصویر یرقانیوں کی’بے شرمی‘اور’بے غیرتی‘کی علامت ہے ۔ تصویر شہید بابری مسجد کے دو’ قصورواروں‘ کی ہے اوریہ اس وقت اُتاری گئی تھی جب کارسیوک بابری مسجدکے گنبدوں پر چڑھے ہوئے تھے اورانہوں نے پہلا گنبدگرا دیاتھا ۔ تصویر میں کل کی مرکزی وزیر اوما بھارتی کل کے مرکزی وزیر مرلی منوہر جوشی کی پیٹھ پر تقریباً لدی ہوئی نظرآرہی ہیں‘دونوں کے ہی ہونٹوں پر’مسکراہٹ‘ہے ۔ ایک ایسی مسکراہٹ جس میں فتح کانشہ،طاقت کاگھمنڈاورزعم اورمسلمانوں سے نفرت کا کھلا اظہار سب کچھ نظرآرہا ہے ۔ آج یہ مسکراہٹ والی تصویر یرقانی ٹولے کی ’بے شرمی‘اور’بے غیرتی‘کی پہچان بن گئی ہے۔تصویر میں ملک کے سابق وزیر داخلہ لال کرشن اڈوانی نظر نہیں آرہے ہیں مگرجس وقت یہ تصویر کھینچی گئی تھی وہ قریب ہی موجودتھے ۔ 6؍دسمبر 1992ء کی’سیاہ تاریخ‘کو جب ڈیڑھ سے دولاکھ کی تعداد میں جمع کارسیوکوں سے خطاب کرنے کے لیے اڈوانی پہنچے تھے توان کا پُرجوش خیر مقدم ہواتھا….اور ہوتابھی کیوں نہ یہ اڈوانی ہی تھے جو ان تمام کارسیوکوں کےایودھیامیں جمع ہونے کا محرک تھے ۔ یہ ان کی ’رتھ یاترا‘ہی تھی جس نے سارے ملک کو ایک کونے سے لے کر دوسرے کونے تک اس طرح سے ’دھارمک جنون‘میں مبتلا کردیاتھا کہ لوگ منھ اٹھائے ایودھیا کی طرف بڑھتے چلے گئے تھے ۔
یاد ہے سب ذرا ذرا ! 1989ء اور اس کے بعدمیں دورتھ یاترائیں شروع ہوئی تھیں،ایک رتھ یاترا مرلی منوہر جوشی کی تھی،اوردوسری اڈوانی کی ۔ جوشی کی رتھ یاترا اڈوانی کی رتھ یاترا کے مقابلے پھیکی تھی کیونکہ اڈوانی نے اس رتھ یاترا کو اپنی بھی اوربی جے پی کی بھی سیاسی زندگی کو عروج پر پہنچانے کاذریعہ بنایاتھا ۔ رتھ یاترا گجرات کے سومناتھ مندر سے شروع کی گئی تھی‘اس کامقصد یہ پیغام دیناتھا کہ ’’جس طرح محمودغزنوی کے ہاتھوں تباہ وبرباد کیے گئے سومناتھ مندرکی تجدید کاری ہوئی ہے اسی طرح بابر کے ہاتھوں تباہ وبرباد کیے گئے رام جنم استھان کی، وہاں جبراً بنوائی گئی بابری مسجدکو ڈھا کر، تجدید کاری کی جائے گی۔‘‘رتھ یاترا منصوبہ بند تھی،ملک کے ہندوؤں کو متحد کر کے ایودھیا بھیجنا اس کا مقصدتھا ۔ اس کے لیے جگہ جگہ اڈوانی نے انتہائی اشتعال انگیزتقریریں کیں، نتیجتاً رتھ یاترا جہاں سے گذری وہاں فرقہ وارانہ جھڑپیں ہوئیں،سرکاری اعداد وشمار کے مطابق ان جھڑپوں میں 550 لوگ مارے گئے۔اسی لیے یہ ’خونی رتھ یاترا‘کہلائی ۔ بہار میں لالوپرساد یادو نے تواس ’خونی رتھ یاترا‘کو روک دیامگر مرکز کی کانگریسی حکومت ہمیشہ کی طرح ہاتھ پر ہاتھ دھرے بیٹھی رہی۔
مذکورہ پس منظر میں ایودھیا کی وہ تحریک منظم ہوئی جس کانتیجہ 6؍دسمبر 1992ء کے روزایودھیا میں بابری مسجد کی شہادت نکلا۔ مسجدشہید کی جائے گی اس کی پوری منصوبہ بندی تھی ۔ یوپی کی کلیان سنگھ اورمرکز کی نرسمہا راؤکی سرکاریں اس وقت بھی خاموش بیٹھی تھیں جب’اسپیشل ٹرینوں‘سے کارسیوکوں کےجتھے ایودھیا پہنچنا شروع ہوئے تھے ۔ فیض آباد سٹی اورایودھیا کے اسٹیشنوں پر کارسیوکوں کا’سواگت‘وی ایچ پی اورآر ایس ایس کے رضا کارکر رہے تھے۔ایودھیا میں سڑکیں دکانیں سج گئی تھیں۔’رام کتھا کنج‘میں سنگھی اوربھاجپائی لیڈروں نے قیام کا انتظام کرلیاتھا اورروزانہ کارسیوکوں کو ’بھاشن ‘دیا جاتااورانہیں بابری مسجد کو’گرانے‘کی ’تربیت‘دی جاتی تھی۔رام کتھا کنج کے ٹیلے پر تربیت کے لیے لوگ جمع ہوتے تھے۔بابری مسجد کی شہادت سے ایک روز قبل بابری مسجد کی شہادت کے لے آخری مگر’عملی تربیت‘دی گئی۔بابری مسجد سے ملحق قبرستان پر دھاوا بولاگیا،قبروں اورروضوں کو مسمار کر کے اٹھارویں صدی کے صوفی بزرگ قاضی قدوہؒ کی درگاہ کو منہدم کردیاگیا۔مگرآنکھیں نہ انتظامیہ کی کھلیں،نہ کلیان سنگھ حکومت کی اورنہ نرسمہاراؤسرکارکی ۔ 6؍دسمبرکو کوئی گیارہ بج کر پچاس منٹ پر کارسیوکوں نےمظلوم بابری مسجد کی دیواروں اورگنبدوں پر چڑھنا اوراسے شہید کرنا شروع کیا۔اس سے قبل رام کتھا کنج کے قریب بنے اسٹیج سے اڈوانی بے حد اشتعال انگیز تقریر کرچکے تھے۔اومابھارتی نعرے لگارہی تھیں ’ایک دھکا اور دو بابری ڈھانچہ توڑدو‘ ۔ ایک بجے بابری مسجد کا پہلا گنبد شہید ہوا اور دوپہر کے تین بجکر 35 منٹ تک ساری مسجدشہید کردی گی۔یہ اتوار کادن تھا ، اس روز ملک کے آئین کے معمارباباصاحب امبیڈکر کی برسی بھی تھی ۔ جو تاریخ’یوم آئین‘ہوناتھی وہ’یومِ شرم‘بن گئی۔یہ کہا جاتاہے کہ اڈوانی نے کارسیوکوں کو بابری مسجد کے گنبدوں اورچھت سے اتارنے کی کوشش کی تھی۔یہ بھی کہا جاتاہے کہ انہوں نے سادھوی اومابھارتی کوبھیجاتھا کہ وہ کارسیوکوں کو سمجھائیں۔اگرایسا ہے بھی توبھی یہ سوال اپنی جگہ برقرارہے کہ کیایہ اڈوانی ہی نہیں تھےجنہوں نے کارسیوکوں کوایودھیا میں جمع کیاتھا؟کیا انہوں نے کارسیوکوں کو اکسانے والی تقریر نہیں کی تھی؟اورکیا یہ اوما بھارتی نہیں تھیں جو’بابری ڈھانچہ توڑدو‘کے نعرے لگارہی تھیں؟جو ہنستے ہوئے جوشی کی پیٹھ پر لدی ہوئی تھیں؟سب کچھ صاف ظاہر ہے جیسا کہ اوما بھارتی سپریم کورٹ کے ذریعے مجرمانہ سازش کامقدمہ پھر سے شروع کرنے کے فیصلے کے بعدکہہ چکی ہیں کہ’ہم نے توسب کچھ کھلم کھلا کیا۔‘اس روز یعنی 6؍دسمبر کو اڈوانی کو بابری مسجد کی فکر نہیں تھی انہیں کارسیوکوں کے تحفظ کی فکر تھی۔وہ یہ نہیں چاہتے تھے کہ شہادت کے عمل میں کارسیوک زخمی ہوں یا اوپر سے گرکر مر جائیں۔ اڈوانی رام مندرکی تحریک کا’بنیادی چہرہ‘تھے ۔ کہاجاتاہے کہ’وقت پلٹ کرآتاہے‘وہ گناہ جو بہت پیچھے رہ جاتے ہیں ایک ایسے وقت پر سامنے آکھڑے ہوتے ہیں جب گنہ گارکو اس کی امید بھی نہیں ہوتی۔مگر یہی اللہ کی سنت ہے ۔ لوگوں کے خون سے اڈوانی اینڈکمپنی کے ہاتھ سرخ ہیں،انہیں جوابدہ توہونا ہی ہے….ثبوتوں کا انبار لگا ہے، عدلیہ نے اگرانصاف کیاتواڈوانی اینڈکمپنی کو سزاہوگی، 6 ؍دسمبر کاسارا واقعہ ایک’سچ‘کی طرح عیاں ہے۔ کچھ لوگ کہہ رہے ہیں کہ اب جبکہ بابری مسجد کی جگہ ہی سپریم کورٹ نے رام مندر کے لیے ہندوؤں کو سونپ دی ہے تو اس مقدمے اور اس کے فیصلے کے کوئی معنیٰ نہیں رہ جاتے ۔ مرحوم ہاشم انصاری کے بیٹے اقبال انصاری نے مقدمہ ختم کرنے کا مطالبہ کیا ہے، ان کا کہنا ہے کہ کہ کسی کو مجرم نہ قرار دیا جائے ۔ یہی مطالبہ وی ایچ پی کا ہے ۔ لیکن جس سپریم کورٹ نے مسجد کی جگہ مندر کے لیے سونپی ہے اسی سپریم کورٹ نے مسجد کے انہدام کو غیر قانونی اور مجرمانہ قرار دیا ہے، لہذا بہتر یہی ہوگا کہ فیصلہ ہو جائے ۔ اقبال انصاری اور ان ہی جیسے دوسرے لوگ بھلے فیصلہ نہ چاہیں میں اور میرے جیسے بہت سے لوگ فیصلہ چاہتے ہیں، اس سے کم از کم ایک بار پھر ہمیں یہ جاننے کا موقع مل جائے گا کہ کیا واقعی ملک کی عدالتیں مکمل غیر جانبدار رہ گئی ہیں ۔

سرفرازاحمد القاسمی
رابطہ: 8099695186

5اگست کوکھلےعام ملک کی جمہوریت کاجنازہ اوراس کی تدفین کردی گئی،اوریہ پیغام دینے کی کوشش کی گئی کہ اب جمہوریت نام کی چڑیا کا بھارت میں کوئی وجود نہیں رہ گیاہےاور یہ کہ آنےوالے دنوں میں اس متعصب،سنگھی اورفرقہ پرست حکومت کاہرقدم "ہندوراشٹر”کی جانب ہوگا، سوال یہ ہے کہ کیا بھارت ہندو راشٹر کے اس بھاری بھرکم بوجھ کو اٹھانے کےلئے تیارہے؟پڑوس کاایک چھوٹا ساملک "نیپال”جواس بوجھ کو زیادہ دنوں تک اپنے سر پرنہ رکھ سکا اوربالآخر اس نے اس بوجھ کواتار پھینکا،کیابھارت اس کا متحمل ہوگا؟اس کا جواب تو آنے والا وقت دےگا،اس ملک کےحالات آگے کیاہوں گے اور یہ کس رخ پر چلےگا یہ آنے والاوقت طے کرےگا،لیکن اتنی بات ضرور ہے کہ ابھی ملک کی باگ ڈورجن لوگوں کےہاتھ میں ہے، یہ لوگ ییقیناً یہاں کے عوام کے خیرخواہ اورہمدرد نہیں ہیں،یہ ایسے لوگ ہیں جنہیں صرف اقتدار چاہئےاوراس کےلئے وہ کسی بھی حدتک جاسکتے ہیں،عوام کیا چاہتے ہیں،حکومت سےان کا کیامطالبہ ہے،ملک کے کروڑوں عوام کےلئے ان لوگوں کےلئے کوئی لائحۂ عمل نہیں، صرف ایک مخصوص ایجنڈا جومذہبی منافرت پر مبنی ہے اس کو نافذ کرنے کےچکر میں یہ لوگ جلد بازی میں ہیں،ظاہر ہے ایسی حکومتوں کاوجود زیادہ دنوں تک نہیں رہ سکتا،5اگست کو جس طرح قانون کی دھجیاں اڑائی گئیں اس کو دنیاںے دیکھا، کس طرح جمہوریت کوپیروں تلے روندا گیایہ بھی دنیا نے دیکھا،جمہوریت کاجنازہ تو اسی دن نکل گیا تھا،جس دن دہشت گردوں نے بابری مسجد کو شہید کیااوراس پھر اس دن جس دن تمام دستاویزات اورثبوت وشواہد کے باوجود ملک کی سب سے بڑی عدالت”سپریم کورٹ”نے فیصلہ مسجد کے حق میں نہ کرکے،بابری مسجدکی تقریباً 70ایکڑ زمین انھیں لوگوں کےحوالے کردی،جن لوگوں نےاس کو شہید کیاتھا،کیا یہ مضحکہ خیز نہیں ہے ؟عدالت نے یہ ساری چیزیں دیکھنے کے باوجود مسلمانوں کےخلاف فیصلہ دیا،اس طرح جمہوریت کاجنازہ 9نومبر2019 کے دن نکال دیا اورجوکچھ بچاتھا اسے گذشتہ 5اگست کو پوراکردیاگیا،یعنی جمہوریت کی تدفین کردی گئی،اب جولوگ یہ سمجھ رہے ہیں کہ بابری مسجد قضیے کے بعد ہندو مسلم کےدرمیان نفرت کی جوخلیج انگریزوں نے پیداکی تھی وہ ختم ہوجائے گی،وہ لوگ یقیناً بہت بڑی غلط فہمی کے شکار ہیں،بلکہ اس کے بعد یہ نفرت کاسلسلہ اورآگے بڑھےگا،بابری مسجد کی طرح ملک بھر کی کم ازکم 3000مساجدان سنگھیوں کی فہرست میں ہیں، جن پرخطرات کےبادل منڈلانے لگے ہیں،کاشی اور متھرا کاقضیہ عدالت پہنچ چکاہے،کیاآپ کولگتاہے کہ جن لوگوں نے زبردستی طاقت کےبل بوتے پر بابری مسجد کوچھین لیا،وہ لوگ اب خاموش ہوجائیں گے؟ان کے حوصلے اور بلند ہوچکے ہیں اوراب یہ مٹھی بھر لوگ شرپسندی پراترآئے ہیں۔
بابری مسجد ایک اکیلی مسجد نہیں ہے جس کےساتھ ظلم ہوا اوراسے شہید کرکے وہاں اب مندر تعمیر کیا جارہا ہے،ایسی اوربھی کئی مساجد ہیں جنھیں حکومت کی جانب سے شہیدکیاگیااورپھران کی دوبارہ تعمیر کے جھوٹے وعدے کئےگئے کہ شہید مسجد دوبارہ تعمیر ہوگی۔ ٹھیک اسی طرح جس طرح بابری مسجد کی شہادت کےوقت مسلمانوں سےاس وقت کی حکومت نے وعدہ کیاتھااوریقین دلایاتھا،لیکن کیاہوا؟کیا بابری مسجد اب تک تعمیر ہوئی؟ ٹھیک اسی طرح اب ریاستی حکومت بھی مساجد شہید کرکے ان سے جھوٹے وعدے کررہی ہے،میں بات کررہاہوں ریاست تلنگانہ کی ،جہاں دوچار سال کے عرصے میں کم ازکم پانچ مساجد کوکسی نہ کسی بہانے سے شہید کردیا گیا اورکئی سال گزرنے کےبعد بھی ان میں سے ایک بھی مسجد اب تک دوبارہ تعمیر نہ ہوسکی،ان مساجد کو حکومت کےلوگوں نے خود شہید کیا اور مسلم قائدین اس معاملے میں ابھی تک ضمیر فروشی کامظاہرہ کررہے ہیں،آئیے ذرادیکھتے ہیں کہ حیدرآباد اورتلنگانہ کی پانچ کون کونسی مساجد کوکس وجہ سے شہید کیاگیا اور پھر سیاسی پارٹی اور مسلم لیڈران نے ان کی بازیابی کےلئے کیاکوششیں کیں؟
متحدہ آندھرا پردیش کے دارالحکومت شہر حیدرآباد میں 2007 میں جب کانگریس کی حکومت تھی،اس وقت انٹرنیشنل ایرپورٹ سے متصل”مسجد عمرفاروقؓ "ایرپورٹ کی توسیع اور تعمیر کے نام پرشہیدکی گئی،جہاں پانچوں نمازوں کےعلاوہ جمعہ کی نماز بھی ہوتی تھی،ایرپورٹ کےمسافراور ملازمین کےلئے وہ ایک واحد مسجد تھی جس کو شہید کردیاگیااور یہ مسجد اب تک دوبارہ تعمیر نہ ہوسکی،احتجاج کے باوجود حکومت نے اب تک اسے تعمیر نہ کرایا،وہ جگہ آج بھی ایسی ہی پڑی ہے۔
تلنگانہ ریاست الگ ہونے کے بعد شہر کی ایک اور مسجد جسے”مسجد یکخانہ عنبرپیٹ”کے نام سے جاناجاتاتھا،سڑک کی توسیع کے نام پردوسال قبل اس کوبھی شہید کردیاگیا،لوگوں نے جب احتجاج کیا،توحکومت کے نمائندوں نے نرسمھاراؤ کی طرح مسلمانوں سے جھوٹا وعدہ کیا کہ دوبارہ اس مسجد کوہم تعمیر کریں گے،لیکن یہ صرف وعدہ ہی رہا ۔ آج بھی وہاں پرپولس کاپہرہ ہے اور وہاں نماز پڑھنے کی اجازت نہیں ہے۔
2014میں لوک سبھا اور راجیہ سبھا میں ہنگاموں کے درمیا تلنگانہ کو ریاست بنانے والا بل پاس ہوااور ایک نئی ریاست وجود میں آگئی،یہ نئی ریاست بننےکے بعد اقتدار جن کے ہاتھ میں گیا انھوں نے وعدہ کیاکہ ہم اس ریاست کو”بنگارو تلنگانہ”یعنی سنہرا تلنگانہ بنائیں گے،لیکن 6سال گذرنے کےبعد اب تک ایسا کچھ نہیں ہوا ،نہ ہی اس جانب کوئی پیش قدمی کی گئی،ریاست کے مسلمانوں سے موجودہ حکومت نے جتنے وعدے کئے تھے وہ سب کاغذی ثابت ہوئے،گویا یہ کہاجاسکتاہے کہ ریاست کی موجودہ حکومت بھی مرکز کی سنگھی حکومت کے نقش قدم پر ہے اور مسلم دشمنی ان کی رگوں میں موجود ہے،سیکولرزم کا چولا پہننے والا کےسی آر،اندر میں "خاکی نیکر”زیب تن کئے ہوئے ہے،یہ نرسمھا راؤ کو اپنا گرو بھی بتاتاہے اور آج کل نرسمھاراؤ کی صدی تقاریب منانے کااس نے اعلان کیاتھا،جو ایک سال تک منائی جائیں گی اور ان پرکروڑوں روپے خرچ کیے جارہے ہیں،پورے شہر میں نرسمھاراؤ جو بابری مسجد کی شہادت کااصل اورکلیدی مجرم ہے اس کی تصویریں لگادی گئی ہیں۔ سوال یہ ہے کہ مسلمانوں اور ان کی مساجد سے نفرت کرنے والوں سے دوستی کرنےوالے اوران کو اپناگرو بتانے والے”سیکولر سی ایم”مسلمانوں کے دوست کیسے ہوسکتے ہیں؟
عنبر پیٹ کی "یکخانہ مسجد”کی شہادت کے صرف دوماہ بعد،شہر حیدرآباد سے متصل ضلع کھمم کے کتہ گوڑم میں ایک مسجد غیر قانونی کہہ کر محکمہ جنگلات کے عہدے داروں نے شہید کردی،اور اب تک یہ مسجد تعمیر نہ ہوسکی، ریاست کی یہ تیسری مسجد ہے جسے حکومت کے لوگوں نے شہید کیا۔
گزشتہ ماہ یعنی ماہ جولائی کے پہلے ہفتے میں حیدرآباد سکریٹریٹ کی دومساجد”مسجد ہاشمی”اور دوسری "مسجد معتمدی”جوسکریٹریٹ کےعلاقے میں واقع تھیں جوآزادی سے قبل نظام حیدرآباد،میرعثمان علی نے تعمیرکی تھی اوران دونوں مساجد میں نمازیں ہورہی تھیں،انھیں بھی منظم طور پرانتہائی خفیہ انداز میں شہید کردیاگیا،شہادت سے کئی دن قبل ان مسجدوں کے امام، مؤذن اورخادموں کومسجد آنے سے منع کردیاگیاتھا،ایک ہفتے کے بعد جب یہ خبر لوگوں تک پہنچی اور چہ می گوئیاں شروع ہوئیں، تو سی ایم کےسی آر نے ایک پریس کانفرنس کی،جس میں انتہائی بےشرمی کےساتھ جھوٹ بولتے ہوئے یہ کہاکہ”اوپر سے ملبہ گرنےکی وجہ سےمسجد کومعمولی نقصان پہنچاہےجس کا مجھے بےحد افسوس ہے”یہ کام اتنی رازداری سے کیاگیا کہ سکریٹریٹ کوآنے والی تمام سڑکوں کو دوکیلو میٹر پہلے ہی بندکردیاگیاتھا، جوملازمین سکریٹریٹ کی انہدامی کارروائی میں شریک تھے انھیں موبائل لےجانے کی اجازت نہیں تھی،میڈیا کے نمائندوں پربھی پابندی لگادی گئی تھی،اس طرح سکریٹریٹ کے ساتھ ان دونوں مساجد کوشہید کردیا گیا، سکریٹریٹ کی پوری عمارت 8ایکڑ پر مشتمل تھی،اس طرح نیاسکریٹریٹ جوحکومت تعمیر کررہی ہے یہ 8 ایکڑ زمین پر تعمیر ہورہاہے اور پہلی قسط کےلئے 500کروڑ روپے اس کی نئی تعمیر کےلئے جاری کیے گئے ہیں، سکریٹریٹ کا یہ پوراحصہ مسجد کے نام پر وقف ہے،اسی سرزمین پرسکریٹریٹ تعمیر کیاگیاتھا، یہ عمارت بھی شہر کی خوبصورت عمارتوں میں سے ایک تھی، جسے نظام حیدرآباد نے تعمیرکیاتھا،آج کل کےسی آر ان عمارتوں کو چن چن کر منہدم کرارہے ہیں جونظام حیدرآباد کی یادگار ہیں،ان دونوں مساجد کی شہادت کے بعد لوگوں کی بےچینی کودیکھتےہوئے، اگرچہ کے سی آرنے یہ بیان دیاہے کہ حکومت کے خرچ سے سکریٹریٹ کے علاقے میں ہی ایک خوبصورت مسجد تعمیرکرائی جائےگی،یہ دونوں مسجدیں غلطی سے شہید ہوگئیں،جب چیف منسٹر کایہ بیان آیاتو "نقیب ملت”اور پورے ملک کے مسلمانوں کے قائد بننے کے دعویدار ایم پی اسد اویسی صاحب نے چیف منسٹر کومبارکباد دی اور ان کا شکریہ اداکیا،لیکن سوال یہ ہے کہ کیاشہید مساجد اسی مقام پر تعمیر ہوں گی؟اور جب دومسجدیں شہید کی گئیں توصرف ایک مسجد ہی حکومت تعمیر کرائےگی؟اس کی وضاحت بھی حکومت کانمائندہ نہیں کررہاہے، سوال یہ بھی ہےکہ جس سی ایم نے گزشتہ 6سال میں مسلمانوں سے صرف وعدہ کیا،جن میں سے ایک بھی اب تک پورانہیں ہوا کیسے یقین کرلیاجائے کہ وہ مسجد کو تعمیر کرائیں گے؟خود غرضی اور مفاد پرستی اس حد تک سرایت کرچکی ہے کہ اب مسلم لیڈران اور مسلم پارٹی کے قائدین بھی ضمیرفروشی کی راہ پر چل پڑے ہیں،انھیں صرف اپناعہدہ عزیز ہے ،قوم کیا چاہتی ہے وقت کی ضرورت کیا ہے، مسلم لیڈران یہ سوچنے سے قاصر ہیں۔ ہرایک کواپنی پارٹی اور اینا مفاد عزیز ہے، ریاست میں پانچ مساجد شہید ہونے کے باوجود اب تک کسی مسلم عہدے دار نےاستعفی تک نہیں دیا اورنہ کوئی مؤثر احتجاج درج کرایا، مسلم تنظیموں کےکئی عہدے داران کی منافقت دیکھئے کہ انھوں نے صرف اردو اخبارات میں مذمتی بیان تودے دیا لیکن اپنے عہدوں کو چھوڑنے کےلئے وہ تیار نہیں۔
حیدرآباد کی مسلم سیاسی پارٹی جوحکومت میں شریک ہے اور جسے پورے ملک کے مسلمانوں کی فکر ہے، یہ اپنی ریاست اوراپنے گھرمیں اتنے حساس معاملے پرمصلحت کی چادر اوڑھے ہوئے ہے۔ یہ بابری مسجد کی شہادت پر ایک زمانے تک سیاست توکرتے رہے اور مگرمچھ کے آنسو بہاتے رہے لیکن اپنے شہر کی مساجد کی بازیابی کےلئے اب تک انھوں نے کوئی لائحہ عمل تیار نہیں کیا،سی اے اے اور این آر سی کے احتجاج کے موقع پر ان لوگوں کاکردار بھی افسوسناک تھا،شہر میں یہ لوگ ایک شاہین باغ نہ قائم کرسکے اور نہ ہی اس میں لوگوں کاکوئی تعاون کیا، ملک کی آزادی کےبعد جس طرح کانگریس اوردیگر سیاسی پارٹیوں نے مسلمانوں کو نقصان پہنچایا اور حاشیہ پرلاکھڑاکیا ،مجھے یہ کہنے میں کوئی عار نہیں کہ نام نہاد مسلم پارٹیوں اور مسلم لیڈران نے بھی اپنے مفاد کےلئے قوم کوبیچا اور برباد کیا،آج ملک بھر میں مسلمانوں کی جوحالت ہے،اس میں نام نہاد مسلم لیڈران اور موروثی قیادت کابھی اہم کردارہے،اس لئے اب مسلمانوں کو نئے سرے سے سوچنا ہوگا کہ آخر ہماراسچادوست کون ہے اور دشمن کون ہے؟ملک کے مسلمان انتہائی نازک دور سے گزررہے ہیں ۔ ایسے میں اگرہم نے ایک منظم منصوبہ بندی نہ کی اور مناسب لائحۂ عمل طے نہ کیا، تو پھر اللہ ہی ہمارامالک ہے۔
حالات دن بہ دن بد سے بدتر ہوتے جارہے ہیں، ایسے میں یہ وقت ہمارے لئے انتہائی غور وفکر اور سنجیدگی کے ساتھ کوئی راہ نکالنے کی ہے،قیادتیں وہی پائیدار ہوتی ہیں اورحقیقی قیادت وہی کہلاتی ہے، جو مسلسل جدوجہد،عزم مصمم،اخلاص ورمزشناسی کے ذریعے وجود میں آتی ہے،موروثی قیادت قوم کی نیا پارلگائےآج کے زمانے میں اس کے امکانات بہت کم ہیں؛ اس لئے حقیقی قیادت ہمیں پیدا کرناہوگا، ورنہ اسی طرح کی سودے بازی ہوتی رہےگی اور قوم کو بیچاجاتارہے گا،اللہ تعالیٰ خیر کامعاملہ فرمائے۔

مسعود جاوید

ما بعد آزادی ہند ،تقسیم ہند، ١٩٤٧ کے فوراً بعد خاک و خون کے المناک واقعات ، ان کے تھمنے کے بعد فرقہ وارانہ فسادات کا لا متناہی سلسلہ، مخصوص ذہنیت کی منظم جماعت کی طرف سے ، ابتدا میں محدود تعداد میں ہونے کے باوجود، مسلم تشخص کو مٹانے کی پے در پے کوشش، سیکولر حکومت کی جانب سے پس پردہ اس اینٹی مسلم جماعت کی حمایت اور مسلمانوں کے حقیقی مسائل پر سردمہری !بات کہاں سے شروع کی جاۓ؟ کہیں سے شروع کرتا ہوں ختم اس پر ہوتی ہے کہ ملت اسلامیہ ہند کے گونا گوں مسائل کو ملی قیادت اور مسلم سیاسی لیڈروں نے زخم سے ناسور بننے دیا اس کے بعد ان مسائل کے حل کی طرف سنجیدہ کم سنجیدہ یا غیر سنجیدہ توجہ دی۔
بابری مسجد قضیہ
٢٣ دسمبر ١٩٤٩ مسجد میں غیر قانونی طور پر مورتی رکھی گئی مقدمہ ہوا اور مسجد میں عدالتی فیصلہ آنے تک کے لئے تالا لگا دیا گیا۔
یکم فروری ١٩٨٦ ڈسٹرکٹ کورٹ کے فیصلے پر تالا کھولا گیا۔۔۔ یوپی اور مرکز میں مضبوط کانگریس کی حکومت تھی۔
٦دسمبر ١٩٩٢ مسجد شہید کی گئی۔ مرکز میں کانگریس کی حکومت تھی۔
٢٠١٠ میں ہائی کورٹ نے تالا کھلوانے کے فیصلے پر اعتراض درج کراتے ہوئے اسے غیر قانونی بتایا۔
٩نومبر ٢٠١٩ کو عدالت عظمیٰ نے تسلیم کیا کہ :
١- ١٩٤٩ میں رام للا پرکٹ نہیں ہوۓ تھے بلکہ مجرمانہ طور پر مورتی رکھی گئی تھی۔
٢- مسجد میں ١٩٤٩ تک نماز ادا کی جاتی تھی۔
٣- مندر توڑ کر مسجد نہیں بنائی گئی۔
٤- مسجد غیر قانونی طور پر ١٩٩٢ میں توڑی گئی۔ #تاہم عدالت عظمی نے اس بابری مسجد – رام جنم بھومی متنازع زمین کو رام جنم بھومی ٹرسٹ کو سونپنے کا حکم دیا۔
٥ پانچ اگست ٢٠٢٠ بھومی پوجن یعنی مندر تعمیر کا افتتاحی تقریب ہوا۔
١٩٤٩ سے لے ٢٠١٤ تک اچھی تعداد میں ملی شخصیات اور بااثر مسلم سیاسی لیڈران اقتدار میں شامل معاون اور حامی رہے (جواہر لعل نہرو سے لے کر آئرن لیڈی اندرا گاندھی اور سوفٹ ہارٹیڈ راجیو گاندھی تک، اور سیکولر وزرائے اعظم چندر شیکھر اور وی پی سنگھ تک )۔۔۔ یہ مسلم رہنما انعامات و اعزازات سے نوازے جاتے رہے، لیکن اس مسئلے کا مناسب حل نہیں نکالا گیا۔
شمالی دہلی میں فرقہ وارانہ فسادات ہوتے ہیں مسلمانوں کی جان و مال کا نقصان ہو رہا ہے لوگوں کے مکانات اور دکانوں میں آگ لگا دی جاتی ہے لوگ جان بچانے کے لیے اپنے گھروں کو چھوڑ کر بھاگ رہے ہیں مساجد کی بے حرمتی کی جا رہی ہے اور پولیس کی زیادتی اور غیر جانبدرانہ تصرفات کی رپورٹ آرہی ہے۔ ۔۔۔۔ تمام بڑی ملی تنظیموں کے مرکزی دفاتر دہلی میں ہیں مگر قائدین خاموش ہیں کوئی وزیر داخلہ اور متعلقہ وزراء و افسران کے سامنے ان مظلوموں کی جان و مال کی فریاد نہیں کرتا کوئی دھرنا پر نہیں بیٹھتا آخر کیوں ؟ ۔ ۔۔۔۔۔ اس کے کئی دنوں کے بعد ملی تنظیموں کے نمائندے ریلیف کا کام شروع کرنے کا اعلان کرتے ہیں۔ یعنی پہلے جان و مال کا نقصان ہونے دیں پھر ان لٹے پٹے بچے ہوئے مسلمانوں کی مدد کے لئے آئیں۔
مظفر نگر فرقہ وارانہ فسادات۔۔۔ حالات اتنے خراب ہوۓ کہ عدالت عظمیٰ کو از خود نوٹس لینا پڑا۔۔۔ یوپی اسمبلی میں ستر ممبران کوئی استعفیٰ نہیں کوئی دھرنا پردرشن نہیں وزیر اعلی کے داہنے ہاتھ سمجھے جانے والے نے بھی کوئی احتجاج نہیں کیا ملی تنظیموں نے کوئی اجتماعی ردعمل کا عندیہ تک نہیں دیا۔ اس کے بعد ریلیف اور دو تین کمروں پر مشتمل مکانات کی تعمیر!
ٹارگیٹڈ اینٹی کمیونل رایٹ قانون بنانے کی عوامی تحریک چلانے کی ضرورت پر توجہ کب دی جائے گی؟ اس بل کو کانگریس نے ٢٠٠٨ سے ٹھنڈے بستہ میں رکھا یہاں تک کہ ٢٠١٤ میں شکشت فاش کو گلے لگا کر اقتدار سے باہر ہوئی۔
کشمیر کی صورت حال کا ذمے دار کون ہے۔ جب مرکز میں اقتدار کے پایہ کے لوگوں کے ساتھ کشمیری لیڈروں کا یارانہ تھا ان دنوں سنجیدگی سے اس کا حل نہیں ڈھونڈا ٣٧٠ ختم کرنے کا اعلان بہت پہلے انتخابی منشور کے ذریعہ کر دیا گیا تھا۔۔۔۔ مگر اس پر توجہ نہیں دی گئی کوئی اس گمان میں رہا کہ بی جے پی مرکز میں حکومت نہیں بنا پائے گی تو کوئی بی جے پی کے ساتھ الائنس کر کے ریاست میں حکومت بناتی ہے۔۔۔ یہاں تک کہ وہ دن آ گۓ کہ نظر بند رہنا پڑ رہا ہے۔
بات یہیں ختم نہیں ہوتی، منشور میں موجود تمام نقاط پر عملدرآمد ہوگا۔ ہمارے ملی لیڈران کہتے رہیں کہ کامن سول کوڈ کے نفاذ میں خود غیر مسلموں کے لئے پیچیدگیاں پیدا ہوں گی اس لئے یہ بل پیش نہیں کیا جائے گا ! پھر اچانک ایک دن بل پاس ہو جائے گا۔ ابھی اس کا خدشہ ہے، کبھی کھل کر کبھی دبے لفظوں میں اظہار کیا جاتا ہے یعنی ابھی زخم ہے عنقریب ناسور بن کر ابھرے گا۔

(مضمون میں پیش کردہ آرا مضمون نگارکے ذاتی خیالات پرمبنی ہیں،ادارۂ قندیل کاان سےاتفاق ضروری نہیں)

لیجئے فرزندان اسلام کیلئے ایک اور مسجد تیار ہو گئی ہے، جہاں وہ اپنے رب کے حضور سر بسجود ہو سکیں گے۔ ترکی کے افسانوی شہر استنبول کے وسط میں تاریخی عمارت آیا صوفیہ 85 برسوں بعد عبادت کے لیے کھولی جا رہی ہے، جبکہ اس کے بغل ہی میں آسمانی رنگ کی 17ویں صدی کی تعمیر شدہ خوبصورت اوروسیع و عریض سلطان احمد جامع واقع ہے، جہاں کے میناروں سے دن میں پانچ وقت تکبیریں گونجتی رہتی ہیں اور اسکی صفیں نمازیوں سے پر ہونے کا انتظار ہی کرتی رہتی ہیں۔برسوں کی عدالتی کارروائی کے بعد اسی ماہ ترکی کی عدالت عظمیٰ یعنی کونسل آف اسٹیٹ نے وزارت سیاحت کی ملکیت کے دعوے کو خارج کرکے اس تاریخی عمارت آیا صوفیہ کو فاتح سلطان مہمت (محمد)ٹرسٹ کے حوالے کردیا۔ اس طرح اس نے ترکی کی کابینہ کے 24 نومبر 1934ء کے فیصلہ کو رد کر دیا، جس کی رو سے اس عمارت کو وزارت سیاحت کے حوالے کرکے میوزیم میں تبدیل کردیا گیا تھا۔

چونکہ برسوں تک دہلی میں اپنے صحافتی کیریئر کے دوران میں نے بابری مسجد کی عدالتی کارروائی کا بغور مشاہدہ کیا ہے اور مسجد کو مسمار کرنے اور رام مندر بنانے کی مہم کو کور کیا ہے، اسلئے آیا صوفیہ کا ایودھیا میں بابری مسجد کے قضیہ کے ساتھ موازنہ کرنا بیجا نہ تھا۔ ترکی کی عدالت عظمیٰ یعنی دانستے کی پانچ شاخیں ہیں، جن میں آئینی عدالت، دائرہ اختیار طے کرنے والی عدالت، عام مقدموں کی شنوائی کرنے والی عدالت، کونسل آف اسٹیٹ یا انتظامی مقدموں کی شنوائی کرنے والی عدالت اور فوجی معاملات کی شنوائی کرنے والی عدالت شامل ہے۔ یہ مقدمہ کونسل آف اسٹیٹ کے زیر غور تھا۔ چونکہ یہ فیصلہ اورمنسلک دستاویزات زبان ترکی میں تھے ’ زبان یار من ترکی و من ترکی نمی دانم‘ کے مصداق اس پر کوئی فوری تجزیہ کرنے کی پوزیشن میں نہیں تھا۔ بس نیور رپورٹرز کی ذریعے ہی اس فیصلہ کے مندرجات تک رسائی حاصل تھی۔ پچھلے ایک ہفتہ سے کچھ ترک ساتھیوں کی وساطت سے عدالتی فیصلہ اور کارروائی کی تفصیل اور اس سے منسلک دستاویزات پڑھ کر یہ ادراک ہوا کہ جج حضرات اس کے علاوہ اور کوئی فیصلہ دے ہی نہیں سکتے تھے۔ زیادہ سے زیادہ وہ فیصلہ دینے میں تاخیر کر سکتے تھے۔

عدالت جب کسی کیس کو شنوائی کیلئے منظوری دیتی ہے تو اسی وقت Questions of Lawیعنی قانونی نکات یا سوالات بھی طے کرتی ہے، جن پر فریقین بحث کرتے ہیں اور ان ہی نکات پر عدالت فیصلہ دینے کی مجاز ہوتی ہے۔ بابری مسجد کے قضیہ کی طرح عدالت نے جو نکات طے کئے ہوئے تھے، وہ یہ تھے کہ اس متنازعہ عمارت کا ٹائیٹل یعنی مالکانہ حقوق کس کے پاس ہیں؟ بھارت کی عدالت یا ترکی کی عدلیہ کے پاس یہ کیس سرے سے ہی نہیں تھا ، کہ عمارت مندر، مسجد یا کلیسا تھی۔

بھارت میں تو بعد میں عدالت نے بھگوان رام یا رام للا کو فریق تسلیم کرکے مقدمہ کی نوعیت بد ل دی ، مگر ترکی میں چلے اس مقدمہ کی کارروائی کے دوران گریک آرتھوڈوکس چرچ نے کبھی فریق بننے کی ضرورت محسوس نہیں کی۔ لہٰذا یہ مقدمہ صرف وزارت سیاحت اور ایک نجی ٹرسٹ کے درمیان تھا اور دونوں آیا صوفیہ کی عمارت اور زمین کی ملکیت کا دعویٰ کررہے تھے۔ اگرآرتھو ڈوکس چرچ نے اس دوران کوئی پیٹیشن دائر کی ہوتی تو شاید مقدمہ کی نوعیت بدل جاتی۔ بابری مسجد کا کیس بھی ایک سیدھا سادا سا ملکیتی معاملہ تھا۔ 1949ء کو جب مسجد کے منبر پر مورتی رکھی گئی اور مقامی انتظامیہ نے تالہ لگا کر مسلمانوںکی عبادت پر پابندی لگائی تو مقامی وقف بورڈ اور ایک شخص ہاشم انصاری نے اس کے خلاف کورٹ میں فریاد کی کہ اس جگہ کی ملکیت طے کی جائے۔ جج صاحبان نے برسوں کی عرق ریزی کے بعد قانون اور آئین کی پروا کیے بغیر ہندوئوں کی استھا یعنی عقیدہ کو اپنے فیصلے کی بنیادبنا دیا۔ عدالت کا کہنا ہے کہ ہندوئوں کا عقیدہ ہے کہ بھگوان رام کا جنم ’گربھ گرہ ‘ یعنی مسجد کے مرکزی گنبد کے نیچے ،عین محراب و ممبر کے پاس ہوا تھا ۔’’ایک بار اگر آستھا قائم ہوجائے تو عدالت کو معاملے سے دور رہنا چاہئے اور عدالت کو عقیدت مندوں کی آستھا اور عقیدے کے معاملے میں مداخلت سے پرہیز کرنا چاہئے۔

تاریخی دستاویزات کے مطابق قسطنطنیہ یا استنبول میں پہلا آیا صوفیہ یا کلیسا چوتھی صدی میں رومی بادشاہ قسطنطین نے بنایا تھا جو روم کا پہلا عیسائی بادشاہ تھا اور جس کے نام پر اس شہر کا نام بیزنطیہ سے قسطنطنیہ رکھا گیا تھا۔لیکن آج جو عمارت ایستادہ ہے ، اسکو شہنشاہ جسٹینین نے چھٹی صدی میں تعمیر کرایا۔ یہ عظیم الشان عمارت دس ہزار کاریگروں اور مزدورںنے صرف پانچ سالوں میں مکمل کی۔آیا صوفیہ میں ہر پتھر کی اپنی کہانی ہے۔اس کو بنانے کیلئے شہر افسس میں ہیکل آف آرٹیمس ، مصر میں سورج کے مندر ، لبنان میں بعلبک کے ہیکل سے استون لائے گئے۔آخر یہ دیو ہیکل استون اتنی دور سے کیسے منتقل کئے گئے ہنوز ایک راز ہے۔ اس کا گنبد گول کے بجائے چپٹا ہے اور یہ اب ترکی کے فن تعمیر کا لازمی جز ہے۔

سلطان محمد فاتح کے ہاتھوں فتح قسطنطنیہ تک یہ عمارت مسیحیوں کا دوسرا بڑا مذہبی مرکز بناتھا۔ تقریباً پانچویں صدی عیسوی سے مسیحی دنیا دو بڑی سلطنتوں میں تقسیم ہو گئی تھی، ایک سلطنت مشرق میں تھی جس کا پایہ تخت قسطنطنیہ یا استنبول تھا، اور اس میں بلقان، یونان، ترکی، شام، مصر اور افریقہ وغیرہ کے علاقے شامل تھے، اور وہاں کا سب سے بڑا مذہبی پیشوا بطریق (Patriarch) آرتھو ڈوکس کلیسا فرقہ کا مذہبی پیشوا تھا۔جس کا ہیڈ کوارٹر آیا صوفیہ تھا۔ دوسری بڑی سلطنت مغرب میں تھی جس کا مرکز روم (اٹلی) تھا۔ یورپ کا بیشتر علاقہ اسی کے زیر نگیں تھا، اور یہاں کا مذہبی پیشوا پوپ رومن کیتھولک کلیسیاکا مذہبی پیشوا تھا، جس کا پایہ تخت اب ویٹیکن میں ہے۔ آیا صوفیہ 900 سالوںتک دنیا کا سب سے بڑا گرجا گھررہا ۔ عمارت کا ایک اور دلکش پہلو موزیک یعنی رنگ برنگی پچ کاری ہے۔ پتھر کے ٹکڑوں کو چاندی ، رنگین گلاس ، ٹیراکوٹا اور رنگین ماربل سے لیس کرکے یہ پچ کاری بنائی گئی ہے اور بتایا جاتا ہے کہ اس میںکئی ٹن سونا بھی استعمال ہواہے۔ محراب کے بالکل اوپر سیدھ میں پچی کاری کے بیچ میں حضرت عیسیٰ علیہ السلام کی تصویر ہے۔ ان کے دائیں طرف حضرت مریمؑ اور بائیں طرف حضرت جبرائیلؑ کی تصاویر ہیں۔ موزیک میں ایک اور شخصیت دکھائی دیتی ہے جو حضرت عیسیٰ علیہ السلام کے سامنے گھٹنوں کے بل بیٹھا ہوا ہے۔ یہ شخص بازنطینی شہنشاہ لیونور ششم ہے۔حضرت عیسیٰ علیہ السلام کے ہاتھوں میں انجیل ہے، جس کے سروورق پر قدیمی رومن میں ’’ سلام ہو ، میں کائنات کا نور ہوں‘‘ لکھا ہوا ہے۔ موزیک کی سب سے اہم اور حیرت انگیز خصوصیت یہ ہے کہ عیسیٰ کے دائیں اور بائیں حصوں پر چہرے کے تاثرات مختلف ہیں۔ چاروں کونوں پر ڈھالوں میں ہر ترک مسجد کی طرز پر پر اللہ، محمد، ابو بکر، عمر، عثمان اور علی نہایت خوشخط لکھ کر لگایا ہوا ہے۔

تعجب کی بات ہے کہ چھ صدیوں تک مسجد کا کار منصبی انجام دینے اور نمازیوں کی میزبانی کرنے کے باوجود ان تصاویر کو چھیڑا نہیں گیا ہے۔ورنہ کسی مسجد میں تصویر کی کوئی گنجائش نہیں ہوتی ہے۔ اگرچہ استنبول میں اس انوکھے ڈھانچے نے پوری تاریخ میں بہت سی آفات دیکھی ہیں ۔ حیرت کی بات ہے کہ آیا صوفیہ کی تباہی یا لوٹ ماردوسرے مذاہب نے نہیں بلکہ خود عیسائیوں نے انجام دی۔فاتح سلطان محمد نے استنبول کو فتح کرکے اسکو مسلمانوں کے لئے عبادت گاہ کے طور پرمختص کیا۔ اس نے عمارت میں ایک مینار کو شامل کردیا۔ بعد کے حکمرانوں نے اس کے آس پاس بڑی دیواریں بنائی، جنہوں نے اس عمارت کو گرنے سے بچا کر رکھا ہے۔ ترکوں اور مسیحیوں کے بیچ خون ریز معرکہ کے بعد جب 1453ء میں قسطنطنیہ یا استنبول فتح ہوا تو عیسائی مذہبی رہنماؤں ، عورتوں اور بچوں نے اسی کلیسا میں اس خیال سے پناہ لے لی تھی کہ کم از کم اس عمارت پر مسلمانوں کا قبضہ نہیں ہو سکے گا۔ مشہور انگریز مؤرخ ایڈورڈ گبن کا کہنا ہے کہ پادریوں نے صدیوں سے ایک جھوٹی بشارت کی تھی کہ جب دشمن قسطنطین ستون کے قریب پہنچ جائیں گے تو آسمان سے ایک فرشتہ ہاتھ میں تلوار لیے نازل ہوگا اور اس آسمانی ہتھیار کے ذریعے سلطنت ایک ایسے آدمی کے حوالے کر دے گا جو اس وقت اس ستون کے پاس بیٹھا ہوگا۔لیکن ترک فوج اس ستون سے بھی آگے بڑھ کر عمارت کے اندرونی دروازے تک پہنچ گئی ۔کوئی فرشتہ آسمان سے نازل ہوا اور نہ صلیبیوں کی شکست فتح میں تبدیل ہوئی۔ کلیسا میں جمع عیسائیوں کا ہجوم آخر وقت تک کسی غیبی امداد کا منتظر رہا۔ بالآخر سلطان محمد فاتح اندر داخل ہوگئے، اور ایک مختصر تقریر میں سب کے جان مال اور مذہبی آزادی کی ضمانت دی۔اسی دن سلطان نے نماز ظہر اسی عمارت میں ادا کی۔

عدالت میں جو قدیم دستاویزات پیش کئے گئے ، ان کے مطابق سلطان محمد نے اس عمارت کو مال کے ذریعے خریدا تھا۔ ٹرسٹ کے وکیل سلامی کارامان کے مطابق چونکہ یہ عمارت صرف عبادت گاہ نہیں، بلکہ صدیوں سے مسلمانوں کے خلاف سیاسی اور عسکری مرکز بھی تھا، اسلئے مسلمان اس کو بطور باقی رکھنے کے پابند اور مشروط نہ تھے ۔ اس بڑے چرچ کے ساتھ جو توہمات اور باطل عقیدے وابستہ تھے انھیں بھی ختم کرنا تھا۔

عدالت میں دلائل پیش کرتے ہوئے ان کا کہنا تھا کہ سلطنت عثمانیہ کے خاتمہ تک تقریباً پانچ سو سال تک اس عمارت میں پنجوقتہ نماز ہوتی رہی اور اس دوران ترکی میں بسے عیسائیوں نہ یورپی ممالک میں کسی نے اس پر دعویٰ پیش کیا۔ ان کا کہنا تھا کہ ترکی میں اس وقت 435قدیم کلیسا آن بان اور شان کے ساتھ موجود ہیں، جن کو کسی نے کوئی گزند نہیں پہنچائی ہے۔ ان کی مزید دلیل تھی کہ سلطان نے اس عمارت کو اور آس پاس کی زمین کو اپنے ذاتی مال سے خریدا اور اس کی مکمل قیمت کلیسا کے راہبوں کو دی، علاوہ ازیں سلطان نے اس مصرف کے لیے بیت المال سے بھی قیمت بھی نہیں لی بلکہ پوری قیمت اپنی جیب سے ادا کرکے عمارت اور زمین کو وقف کر دیا۔

استنبول یونیورسٹی کے ایک سابق پروفیسر محمد عبداللہ احسن کے مطابق فاتح قسطنطنیہ سلطان محمد خلیفہ دوم حضرت عمرؓ کی تقلید کرسکتے تھے، جب انہوں نے یرشلم فتح کرنے کے بعد کلیسا میں نماز ادا کرنے سے منع کردیا تھا۔ خلیفہ کو ڈر لاحق تھا کہ کہیں مسلمان اسکو بعد میں مسجد نہ بنالیں۔ مگر ان کا کہنا ہے کہ قسطنطنیہ کی فتح کے وقت تک یورپ میں مسلمانوں کو سخت عذاب سے گذرنا پڑ رہا تھا۔ 1453میں یہ فتح اسوقت نصیب ہوئی، جب اسپین میں مسلمانوں کا ناطقہ بند کیا گیا تھا ۔ مفتوحہ علاقوں میں عیسائی مساجد کو شہید کرکے گرجا گھروں میں تبدیل کررہے تھے۔ قرطبہ شہر پر قبضہ کے بعد تو صلیبیوں نے قتل و غارت گری کی انتہا کر دی تھی اور دنیا کی اس وقت کی سب سے بڑی اور خوبصورت جامع مسجد قرطبہ میں نماز پر پابندی عائد کرکے گرجا گھر میں تبدیل کردیا گیا تھا۔ پروفیسر حسن کہتے ہیں کہ سلطان نے اس قدم سے یورپ میں مسلمانوں کا جو دبدبہ قائم ہوا، س سے کافی عرصہ تک خطے میں امن و امان قائم رہا۔ مگر ان کاکہنا ہے کہ سلطان کے قدم کو ایک رول یا قانون قرار نہیں دیا جاسکتا ۔ نظریہ ضرورت کے تحت اسکو استثناء حاصل ہوسکتا ہے۔ اب جب یورپ اور امریکہ میں مسلمانوں کی عبادت گاہیں خاصی حد تک محفوظ ہیں۔ کئی جگہوں پر تو عیسائی راہب خود ہی مسلمانوں کو گرجا گھروں میں نماز ادا کرنے کی دعوت دیتے ہیں، اسلئے اگر ترک سلطان آج زندہ ہوتے تو اپنے قد م پر نظر ثانی کرتے۔

مگر وکیل سلامی کارامان کا کہنا ہے کہ 1934ئمیں جب مصطفیٰ کمال اتا ترک کے دور میں جب کابینہ نے اس عمارت کو وزارت سیاحت کے حوالے کیا، یہ ایک طرح سے ایک پرائیویٹ پراپرٹی پر قبضہ کرنا تھا۔ اگر وزارت سیاحت نے اس وقت عمارت کو میوزیم میں تبدیل کرنے سے قبل اس عمارت کو وقف ٹرسٹ سے خرید لیا ہوتا، تو مقدمہ کی نوعیت ہی مختلف ہوتی۔ دنیا میں کہیں بھی مسلمان فاتحین نے دوسرے مذاہب کی عبادت گاہوں کو مسجدیں بنانے سے عام طور پر پرہیز کیا ہے۔ کہیں جگہوں پر ان عبادت گاہوں کے پجاریوں نے اسلام قبول کرکے خود ان کو مساجد میں تبدیل کیا ہے، جس کی مثال کشمیر ہے۔

اس پورے قضیہ کادلچسپ پہلو یہ ہے کہ جہاں جنوبی ایشیا اور دیگر ممالک میں سیکولر اور لبرل طبقہ، ترک عدالت اور صدر رجب طیب اردوان کی طرف سے آیا صوفیہ کو مسجد میں تبدیل کرنے میں عجلت سے کام لینے پر لعن و طعن کررہا ہے، ترکی کی دو اہم سیکولر پارٹیاں یعنی اتا ترک کی سی ایچ پی اور ترک قوم پرست ایم ایچ پی نے اس فیصلہ کی پر زور حمایت کی ہے۔ دراصل سلطان محمد اور اتا ترک ، مذہبی اور نظریاتی اقدار سے بالاتر ترک قوم پرستی کی نشانیان تصور کی جاتی ہیں۔سیکولر ترکوں کیلئے آیا صوفیہ ترک قوم پرستی کا مظہر ہے۔ مگر دیکھنا یہ ہے کہ خطے میں ترکی کو ایک مڈل پاور کے بطور منوانے کے بعد آیا صوفیہ کو مسجد میں تبدیل کروانا ، اردوان کے سیاسی مفادات کو کس قدر تقویت پہنچاتا ہے۔

ترکی میں بیشتر لوگ معترف ہیں کہ اردوان کے دور میں ترکی نے ترقی کے زینہ تیزی کے ساتھ طے کئے ہیں۔ 2003ئتک اپنے بجٹ کیلئے عالمی اداروں پر منحصر یہ ملک ایک دہائی میں ہی امداد دینے والا ملک بن کر جی 20 اور ترقی یافتہ ممالک کی تنظیم آرگنائزیش آف اکنامک کوآپریشن اینڈ ڈیولپمنٹ کا ممبربن چکا ہے۔ شام، لیبیا، افریقہ ، فلسطین، آذربائیجان اور دیگر خطوں کے عوام ترکی کی طرف آس لگائے بیٹھے ہیں۔ یہی پہلو آجکل اصل تہذیب، وقار، عظمت، عزت و شہرت کے آئینہ دار ہیں۔

مذہبی اور قوم پرستانہ جذبات کو برانگیختہ کرکے بس ایک حد تک ہی عوام کو متاثر کیا جاسکتا ہے، مگر اگر ان کے معاشی حالات کو بہتربناکر اور اقوام عالم میں ان کو تفخر کے ساتھ جینے اور کھڑے ہونے کے سامان مہیا کرواہیں جائیں تو یہ کامیابی دیرپا اور پائیدار ہوتی ہے۔

دنیا کی سب سے پرانی عبادت گاہ ہونے کے ناطے ، آیا صوفیہ نے 1500 سالوں سے پوری انسانیت کے لئے اپنے دروازے کھول رکھے ہیں ۔امید ہے کہ آئندہ بھی یہ عمارت رواداری ، حسن سلوک ، ایک دوسرے کو برداشت کا سبق انسانیت کو سکھاتی رہیگی ۔ اسی کے ساتھ اب عبادت گاہوں کو مسمار کرنا اور انکو تبدیل کرنے کی کارروائیاں بھی بند ہونی چاہئے۔بیشتر اقوام نے، ماضی میں جب وہ غالب رہی، کوئی نہ کوئی ایسی حرکت ضرور کی جو کسی نہ کسی کو تکلیف پہنچانے کا سبب بنی ہے۔ اگر ان تاریخی واقعات کا انتقام موجودہ دور میں لینے کا سلسلہ شروع ہو جاتا ہے‘ تو اس کا اختتام کہیں نہیں ہو گا ۔

تحریر: عبد الخالق (سکریٹری جنرل لوک جن شکتی پارٹی)
ترجمہ مولانا محمد عادل فریدی، امارت شرعیہ پھلواری شریف، پٹنہ
۹/ نومبر ۹۱۰۲ء کو ہندوستان کی جمہوریت اور انصاف کے لیے تاریخ کی سب سے تاریک رات کے طور پر یاد رکھا جا ئے گا۔اسی دن سپریم کورٹ کی آئینی بنچ کے پانچ ججوں نے فیصلہ سنایا کہ ایودھیا میں واقع شہید بابری مسجد کی زمین کو رام مندر کی تعمیر کے لیے بھگوان ”رام للا“ کے حوالہ کر دیا جائے۔المیہ یہ ہے کہ سپریم کورٹ نے اپنے فیصلہ میں تسلیم کیا کہ مسجد کو شہید کرنا ”قانون کی خلاف ورزی“ تھی، لیکن اس کے با وجود سپریم کورٹ نے مسجد شہید کرنے والوں کو زمین مسلمانوں کے سپرد کرنے کا پابند نہیں بنایا۔اس کے بر خلاف سپریم کورٹ نے ہندوؤں کو زمین سپرد کرتے ہوئے نہایت بچکانہ دلیل دی کہ ہندو اس کو بھگوان رام کی جائے پیدائش مانتے آئے ہیں۔ یعنی کھلے طور پر آستھا اور عقیدے نے انصاف اور قانون پر فتح حاصل کر لی۔
آئین کے پیش لفظ میں ہندوستان کا جو تصور پیش کیا گیا ہے وہ کتنا خوبصورت ہے، ہندوستان کے اس خوبصور ت چہرے کا قتل کر دیا گیا۔ اب تک ہمارے سیکولرزم کا مطلب یہ تھا کہ یہاں مختلف مذاہب، رسم و رواج او رتہذیب و ثقافت کو قبول کیا گیا ہے اور ان کی منفرد شناخت کو تسلیم کیا گیا ہے،اس میں تمام مذاہب کے لئے مساوات اور احترام ہے،کسی بھی مذہب کو عوامی سطح سے مکمل طور پر بے دخل کرنا ہمارے سیکولرزم کا حصہ نہیں ہے۔ بلا شبہ مہاتماگاندھی کے سیکولرزم کی بنیاد ایسے مذہبی عقیدے پر تھی جس نے انہیں سچائی، رواداری، دوسرے مذاہب کوبرداشت کرنے اور عد م تشدد کے نظریہ پر مضبوطی سے جمادیا تھا۔ان نظریات و افکار کی گہری چھاپ ان کے افعال و اعما ل پر تھی، لیکن آج سیاست اور مذہب کی خطرناک ملاوٹ کا استعمال اقلیتوں کے خلاف ایک ہتھیار کے طور پرکیا جا تا ہے۔ پچھلے مہینے ہمارے وزیر دفاع نے فرانس سے پہلے رفائیل جنگی جیٹ طیارے کی وصولی کے موقع پر پورے بین الاقوامی تام جھام کے ساتھ شستر پوجا کی۔ایک ایسے ملک میں جو کثیر المذاہب شناخت رکھتا ہے اور مختلف عقیدوں اور رسم و رواج پر فخر کرتا ہے، وہاں کھلے عام نیشنل سیکورٹی کے ساتھ ہندوازم کی علامتوں کو شامل کرنا بھی اکثریتی مذہب کو غیر متنازعہ اولیت دینے کا کھلا اعلان ہے۔گویا کہ ہندوتو اب ہندوستان کا سرکاری مذہب ہو چکا ہے۔
اس تناظر میں ایودھیا کا فیصلہ بالکل بھی حیرت انگیز نہیں ہے، فیصلہ آنے سے پہلے کے مراحل میں سپریم کورٹ کی پروسیڈنگ کے دوران ہم دیکھتے رہے ہیں کہ کس طرح سے پوری شدو مد کے ساتھ ببانگ دہل تحریک چلائی گئی اور سپریم کو رٹ کی آئینی بنچ پر دباو ڈالا گیاکہ وہ ایسا فیصلہ سنائے جو رام مندر کی تعمیر کے حق میں ہو۔مختلف ہندو مذہبی رہنماؤں نے کھلے عام الیکٹرونک میڈیا کا استعمال کر کے بھگوان رام اور ہندو سماج کی جیت کا فاتحانہ انداز میں جشن منایا۔یہ بھی اخباروں میں آیا کہ کس طر ح بی جے پی کے ممبر پارلیامنٹ ساکشی مہاراج نے اپنے اس اعلان سے معاملہ کو گر ما دیا تھا کہ رام مندر کی تعمیر ۶/ دسمبر سے پہلے شروع ہو جائے گی، ۶/ دسمبر وہ تاریخ ہے جس دن بابری مسجد کو شہید کیا گیاتھا۔سب سے اہم پیشگی جشن کا موقع وہ تھا جب دیوالی کے موقع پر ایودھیا میں پانچ لاکھ دیے روشن کیے گئے تھے، اس جشن نے ان کی جیت کی امیدوں کو اور بڑھا دیا تھا۔یوگی آدتیہ ناتھ اور آر ایس ایس نے صبر کرنے اورتحمل برتنے کی اپیلیں کیں، یہ بھی سپریم کورٹ کے لیے ایک خاموش اشارہ تھا کہ اگر فیصلہ ہندوؤں کے خلاف آئے گا، تو بڑا فسادبرپا ہو گا اور اس کے نتیجے میں بڑے پیمانے پر سماجی بد امنی پیداہو گی۔ان سب کے پیچھے کا پیغام صاف تھا؛ کہ رام مند ر ہندو سماج کابہت بڑا جذباتی معاملہ ہے اور کورٹ کو اس کے حق میں فیصلہ کرنا ہی ہو گا۔
بلاشبہ سپریم کو رٹ کو اس طرح کے کسی دباؤ یا زبردستی کی ضرورت ہی نہیں تھی، ماضی میں بھی ہماری عدالت عظمیٰ نہ صرف ہندوتوکی معاشرتی طاقت اور بالادستی کو تسلیم کر چکی ہے بلکہ اس کو جائز بھی ٹھہرا چکی ہے۔ یہ حقیقت ہے کہ ۶۹۹۱ء کے اپنے ایک فیصلہ میں یہ کہہ چکی ہے کہ ہندوتو ایک ”طرز زندگی“ ہے اور ہندوستانیت کا مترادف ہے، یعنی ایک یونیفارم کلچر کا فروغ جو ملک میں موجودتمام الگ الگ کلچر اور تہذیب و ثقافت کے درمیان کے فرق کو ختم کر دے۔سپریم کورٹ کایہ نظریہ بالکل ہندو تو کے اسی نظریہ کی عکاسی تھا جو ہندو مذہب کی تمام دوسرے مذاہب اور ثقافتوں پربالادستی کی بات کرتا ہے۔سپریم کورٹ نے مختلف مواقع پر کئی بار اس متنازعہ فیصلہ پرنظر ثانی اور ترمیم کا حکم جاری کیا۔جس کی وجہ سے ہندو تو کے حامیوں کا یہ فاتحانہ دعویٰ ثابت ہو گیا کہ سپریم کورٹ نے ہندوتو ا کے سنگھی نظریہ پرقانونی مہرلگا دی ہے۔اکثریت کے اعتقاد پر سپریم کورٹ کی حد سے زیادہ غفلت کا مقابلہ سیدھے طور پرمسلمانوں کی حساسیت سے ہے۔۴۹۹۱ء میں سپریم کو رٹ نے اپنے ایک فیصلہ میں کہا تھاکہ ”مسجد میں نمازپڑھنا اسلام کا لازمی حصہ نہیں ہے۔ اورمسلمان کہیں بھی نماز پڑھ سکتے ہیں حتی کہ کھلی جگہ میں بھی“سپریم کورٹ کے اس ریمارک سے مسلمان بھونچکے رہ گئے تھے۔ایودھیا کا جو فیصلہ آیا ہے آج کے حالات کو مد نظر رکھتے ہوئے شاید پہلے سے ہی اس کا اندازہ ہو گیا تھا، کیوں کہ یہ فیصلہ ایک ایسے وقت میں آیا ہے جب ہندوتواور اس کے حامی حکومتی اداروں اورعوام دونوں کو کنٹرول کررہے ہیں۔
۰۱۰۲ء میں الٰہ آباد ہائی کورٹ کے بنچ نے اس معاملہ میں تجرباتی و مشاہداتی حقائق میں توڑ مروڑ، غیر یقینی تاریخی اعداد و شمار،گمراہ کن رپورٹس اور آستھا کی بنیاد پر فیصلہ سنانے کا کام کیا تھا۔اپنے فیصلہ میں انہو ں نے جن دلیلوں کا سہارا لیا تھا، اس کو”بادشاہ سلمان کا حل“ (یہ انگریزی کا محاورہ ہے، بائبل کے ایک قصہ پر مبنی ہے، جس میں بادشاہ سلمان نے ایک بچے کے بارے میں یہ حل پیش کیا تھا جس کے لیے دو عورتیں لڑ رہی تھیں ہر ایک کا دعویٰ تھا کہ وہ اس کی ماں ہے، معاملہ بادشاہ کی عدالت میں پہونچا تو بادشاہ نے یہ حل پیش کیا کہ بچے کے دو ٹکڑے کر کے ایک ایک ٹکڑا دونوں عورتوں کو دے دیا جائے۔)سے تعبیر کیا جا سکتا ہے۔عدالت نے متنازعہ زمین کو تین برابر حصوں میں تقسیم کر کے تینوں مدعیوں کو ایک ایک حصہ حوالہ کرنے کا حکم دے دیا، مدعی اور ان کے حامی اس یکطرفہ اور ناقابل عمل فیصلہ سے حیران رہ گئے جس میں کوئی فاتح قرار نہیں دیاگیا۔گویا فیصلہ کے باوجود حقیقت میں معاملہ جوں کا توں برقرار رہا۔اور جیسا اندیشہ تھا ناراض فریقوں نے سپریم کور ٹ کا دروازہ کھٹکھٹایا اور اس کے نتیجہ میں ملک کو ۹ / سالوں کا طویل انتظار کرنا پڑا۔
سپریم کورٹ کو متنازع زمین کی ملکیت کے انتہائی متنازعہ ہونے اوراس معاملے میں دونوں جانب سے زبردست دباؤ کا احساس تھا، لہٰذا اس تنازعہ میں عدالتی کارروائی کے ساتھ ساتھ مرکزی فریقوں کو شامل کر کے ثالثی کے ذریعہ حل تلاش کرنے کی کوشش بھی ہوتی رہی۔ایسا معلوم ہوتا ہے کہ کسی سمجھوتہ پررضامندی ہوچکی تھی،لیکن پھر دونوں طرف سے سخت گیروں نے اس کو ختم کردیا۔معاہدے کی وسیع شکل یہ تھی: (الف) مسلمان متنازعہ مقام پر دعویٰ چھوڑ دیں گے۔(ب) مسلمانوں کو مسجد کے لیے متبادل جگہ اورفنڈ دیا جائے گا۔(ج)اور ریاست”ورشپ ایکٹ ۱۹۹۱ء“کے نفاذ کو یقینی بنائے گی، جس کے مطابق کسی بھی عبادت گاہ کو منتقل کرناممنوع ہے۔سپریم کورٹ نے بنیادی طور پر اس معاہد ہ نامہ کی توثیق کی ہے۔
مسلمان بخوبی واقف ہیں کہ وہ لوگ جو مندر کے حامی ہیں وہ معاشرتی، سیاسی اور قانونی شعبوں میں حاکمانہ عہدوں پر قابض ہیں۔ وہ جانتے ہیں کہ ان کی پرامن زندگی کی واحد امید، عارضی ہی سہی، متنازعہ مقام پر ان کے حقوق کی بازیابی تھی، لیکن اس معاملہ میں انصاف کا گلا گھونٹ دیا گیا۔
اب وہ یہ دعا کر رہے ہیں کہ ان کی دوسری عبادت گاہیں پلیسز آف ورشپ ایکٹ ۱۹۹۱ء کے تحت محفوظ رہیں۔لیکن اس کے ساتھ ساتھ وہ اس بات سے بھی واقف ہیں کہ کشمیریوں کو بھی یقین تھاکہ دفعہ ۰۷۳/کی خلاف ورزی نہیں کی جا سکتی ہے،مسلمانوں کو اس بات کا بخوبی ادراک ہے کہ آج کے ہندوستان میں اکثریت کا نقطہ نظر غالب رہے گا، اور اس بارے میں کسی کی پرواہ نہیں کی جائے گی۔
جسٹس او ہومس کا یہ تبصرہ مشہور ہے کہ”سپریم کورٹ کورٹ آف لا(قانون کی عدالت)ہے کورٹ آف جسٹس(انصاف کی عدالت) نہیں ہے۔“ لیکن ایودھیا کیس میں سپریم کورٹ نے نہ تو قانو ن کا خیال رکھااور نہ انصاف کی پرواہ کی۔اس نے اکثریت کی آستھا کو تقویت بخشی ہے جس کے بھگوان کو متنازعہ مقام سونپ دیاگیاہے۔
(مضمون نگا سول سروس میں رہے ہیں اور لوک جن شکتی پارٹی کے سکریٹری جنرل ہیں، مضمون میں پیش کیے گئے خیالات ان کے ذاتی ہیں۔)