ایم ودود ساجد

مودی حکومت کے وضع کردہ شہریت کے قانون CAA کے خلاف دسمبر 2019 سے مارچ 2020 تک دہلی کے شاہین باغ میں منعقد ہونے والے تاریخی احتجاج کے تعلق سے سپریم کورٹ نے جو فیصلہ دیا ہے وہ نیا نہیں ہے۔اس سے پہلے 2018 میں مزدور کسان شکتی سنگٹھن بنام حکومت ہند کے مقدمہ میں بھی وہ ایسا ہی ایک فیصلہ سناچکی ہے۔ فرق اتنا ہے کہ 2018 کا فیصلہ ایک خاص واقعہ کو محیط تھا اور اس میں مظاہرین کی تعداد اور دائرہ کو محدود کردیا گیا تھا جبکہ شاہین باغ والے فیصلہ میں سپریم کورٹ نے فیصلہ کے اثرات اور پولیس کے اختیارات کا دائرہ بڑھا دیا ہے۔

2018 میں کاشتکاری سے وابستہ مزدوروں کی جماعتوں نے جو دھرنا دیا تھا وہ جنتر منتر پر تھا۔۔ عدالت نے مظاہرین کی تعداد محدود کرنے اور احتجاج کے جمہوری حق کے ساتھ دوسرے شہریوں کے چلنے پھرنے کی آزادی کے حق کا بھی احترام کرنے کی تلقین کی تھی۔جبکہ شاہین باغ کے فیصلہ میں یہ دائرہ بڑھا دیا گیا ہے۔اس میں پولیس اور انتظامیہ کو ایک طرح سے کھلی چھوٹ کا واضح اشارہ دیدیا گیا ہے کہ آئندہ ملک میں جب بھی کوئی ”شاہین باغ“رونما ہو تو عدالت میں آنے کی بجائے اس سے خود نپٹا جانا چاہئے۔

عدالت نے اپنے فیصلہ میں شاہین باغ کے احتجاج کے Leaderless یا بے قائد ہونے کا بھی بطور خاص ذکر کیا ہے۔اس سلسلہ میں عدالت نے ان مذاکرات کاروں کی دو رپورٹوں سے استفادہ کیا ہے جن کو خود سپریم کورٹ نے ہی مقرر کیا تھا اور جن کو شاہین باغ اس امید میں بھیجا گیا تھا کہ وہ مظاہرین سے بات کرکے انہیں اس پر آمادہ کریں گے کہ وہ آنے جانے کا راستہ کھول دیں یا کسی دوسری جگہ بیٹھ کر اپنا احتجاج جاری رکھیں۔
مذاکرات کاروں نے اپنی رپورٹ میںAbsence of leadership (قیادت کے فقدان)اور Presence of influencers(اثر ورسوخ والوں کی موجودگی)کا ذکر کرتے ہوئے کہا ہے کہ انہی دو عناصر کے سبب یہ مظاہرہ محض خواتین کی آواز اور ان کی طاقت کا محور نہیں رہ گیاتھا۔سپریم کورٹ کی سہ رکنی بنچ نے کہا کہ عدالت نے دو سینئر مذاکرات کاروں (سنجے ہیگڑے اور سادھنا راما چندرن) کو اس کوشش کے تحت مقرر کیا تھا کہ خول سے باہر آکر مظاہرین سے بات چیت کے ذریعہ مسئلہ کا حل نکل آئے۔عدالت نے کہا کہ ہمیں اس بات کا افسوس نہیں ہے کہ مذاکرات کاروں کی کوششیں بار آور نہ ہوسکیں۔اس لئے کہ کوشش کرکے نا کام ہوجانا اس سے بہتر ہے کہ کوشش بالکل ہی نہ کی جائے۔

عدالت نے پہلی رپورٹ کا ذکر کرتے ہوئے کہا کہ ”۔مطالبات بہت وسیع تھے اور کم سے کم آمد و رفت کا مسدود راستہ کھولے جانے کے لئے کسی درمیانے راستہ تک پہنچنا مشکل نظر آیا۔“ دوسری رپورٹ کا حوالہ دیتے ہوئے عدالت نے کہا کہ ہمیں یقین ہے کہ مذاکرات کاروں نے اپنی سی بھر پور کوشش کی لیکن کوئی نتیجہ برآمد نہیں ہوا۔عدالت نے اس رپورٹ کا ذکر کرتے ہوئے کہا کہ احتجاج کے مقام پر لوگوں کی تعداد میں بھی آخر کارکمی آگئی تھی۔“

عدالت نے ایک اور نکتہ کی طرف اشارہ کرتے ہوئے کہا کہ نجی گفتگو میں مظاہرین (کی طرف سے مذاکرات کرنے والے) جو کچھ کہتے تھے عوامی بیانات اور احتجاج کو خطاب کرتے وقت وہ اس سے بالکل مختلف بولتے تھے۔ اس کے علاوہ خواتین تو جہاں ٹینٹ کے اندر بیٹھتی تھیں باہر مرد رضا کاروں اور راہ گیروں کی بڑی بھاری تعداد موجود رہتی تھی جسے آمد و رفت کے راستہ کو مسلسل مسدود رکھنے میں دلچسپی تھی۔ایک مثال دیتے ہوئے کہا گیا کہ کورونا کی وبا کے آنے کے بعد 20 مارچ 2020 کو جب مظاہرہ گاہ کا دورہ کیا گیا توٹینٹ کے اندر کوئی 35-40 تخت رکھے تھے جن میں سے ہر تخت پر دو تین خواتین بیٹھی تھیں۔یعنی کل 75-100 خواتین تھیں جبکہ باہر 200 یا اس سے زیادہ تعداد میں مرد موجود تھے جن کا مظاہرہ سے تعلق تھا۔

عدالت نے رپورٹ کے حوالہ سے کہا کہ آنے کا جانے کا ایک طرف کا راستہ ٹینٹ نے مسدود کر رکھا تھا جبکہ دوسری طرف کا آدھا راستہ لائبریری‘انڈیا گیٹ کا بہت بڑا ماڈل اور لوہے کا بنا ہوا ہندوستان کا سہ رخی نقشہ نصب کرکے روک دیا گیا تھا۔لوہے کے اس نقشہ کو بہت مضبوط لوہے کے سہاروں پر رکھا گیا تھا اور لوہے کے ان سہاروں کو بہت بڑے پتھروں سے روک کر رکھا گیا تھا جن کو ہلانا بہت مشکل تھا۔

عدالت نے اپنے فیصلہ میں لکھا: ایسا ظاہر ہوتا ہے کہ مظاہرین کی رہ نمائی کیلئے قیادت کے فقدان اور مظاہرین کے بہت سے گروپوں کی موجودگی ایسے اثر ڈالنے والے افراد کی موجودگی کا سبب بنی کہ جن کے ایک دوسرے سے مختلف مقاصد تھے۔۔ اس کا نتیجہ یہ ہوا کہ یہ مظاہرہ محض خواتین کی طاقتور آواز نہیں رہ گیا تھا اور خود یہ خواتین بھی مظاہرہ کو کنٹرول کرنے کی صلاحیت کھوچکی تھیں۔

عدالت نے اپنے فیصلہ میں مزید لکھا کہ ممکنہ طور پر مظاہرین کو وبا کے بڑھنے کا بھی احساس نہیں تھا اور اسی لئے وہ دوسری جگہ منتقل ہونے کو تیار نہ ہوئے۔ آخر کار یہ احتجاج ”اللہ کی مداخلت“ (Hand of God) کے سبب ختم ہوا۔. عدالت نے یہ بھی لکھا کہ ”یہ بات ذہن میں رکھنی چاہئے کہ انگریزوں کی حکمرانی کے خلاف ظاہر کئے جانے والے اختلاف کے طور طریقوں کا موازنہ خود اپنی جمہوریت میں کئے جانے والے اختلاف سے نہیں کیا جاسکتا۔۔۔ آئین اختلاف رائے کے حق کی ضمانت دیتا ہے لیکن کچھ فرائض کی ادائیگی کی ذمہ داریوں کے ساتھ۔

عدالت نے اپنے فیصلہ میں ایک اہم بات یہ بھی لکھی: آئین کا آرٹیکل 19 (1) (A) اظہار رائے کی آزادی دیتا ہے اور آرٹیکل 19(1) (B) حکومت کے کسی ایکشن یا عدم ایکشن کے خلاف کسی جگہ بغیر ہتھیار جمع ہوکر مظاہرہ کا حق دیتا ہے اور اس حق کا ریاست (حکومت) کو بھی احترام کرنا چاہئےـ

(مضمون میں پیش کردہ آرا مضمون نگارکے ذاتی خیالات پرمبنی ہیں،ادارۂ قندیل کاان سےاتفاق ضروری نہیں)

مسلمانوں سے بدلہ لینے کےلیے۔ ایم ودود ساجد

مشرقی دہلی کے فسادات کے سلسلہ میں دہلی پولیس نے دو مسلم نوجوانوں کے قتل اور فساد پھیلانے کے مقدمہ میں 18 ملزموں کے خلاف ایک اضافی چارج شیٹ داخل کی ہے۔اس چارج شیٹ کے مشمولات بڑے دلچسپ ہیں۔۔فسادات کے دوران ہاشم علی اور اس کے بھائی عامر علی کا قتل گوکل پوری میں ہوا تھا جس کا مقدمہ چیف میٹرو پولیٹن مجسٹریٹ پرشوتم پاٹھک کی عدالت میں چل رہا ہے۔۔پولیس نے اس چارج شیٹ میں دفعہ 153-A اور 505 بھی شامل کی ہے۔۔ یہ دونوں دفعات بالترتیب مختلف طبقات کے درمیان رنگ‘نسل‘مذہب اور زبان کی بنیاد پر دشمنی کو فروغ دینے اورمذہب کی بنیاد پر دوسرے طبقہ کے متاثرین سے بدلہ لینے کے لئے کسی جگہ اکٹھا ہونے سے بحث کرتی ہیں۔

آپ کو یاد ہوگا کہ مارچ 2020 میں‘ میں نے اس سلسلہ کے ایک سے زائد مضامین لکھے تھے۔ان مضامین میں بہت سے غیر مسلم صحافیوں کی رپورٹوں کی بنیاد پر کئی اہم نکات شامل کئے تھے۔ان میں سے ایک اطلاع یہ تھی کہ پولیس نے 125 نوجوانوں کے ایک وہاٹس ایپ گروپ کودریافت کیا ہے جو 25 فروری کی صبح ہی تشکیل دیا گیا تھا اور جس کا نام ’کٹر ہندوایکتا‘ ہے۔

26 ستمبر کو پولیس نے جو اضافی چارج شیٹ داخل کی ہے اس میں مذکورہ گروپ میں ہونے والی گفتگو کے کچھ اقتباسات بھی شامل کئے ہیں۔ان میں سے ایک جگہ گروپ کا ایک ممبر ’بنی‘ Binni کہتا ہے: بھائی آر ایس ایس کے لوگ آگئے ہیں یہاں سپورٹ میں‘۔ پولیس نے لکھا ہے کہ یہ میسج 25 فروری کو تشکیل دئے گئے مذکورہ گروپ میں رات کو 8 بج کر ایک منٹ پر لکھا گیا تھا۔

ہاشم علی وغیرہ کے قتل اور فساد پھیلانے کے الزام میں جو نوجوان جیل میں ہیں ان کے نام یہ ہیں: لوکیش کمار سولنکی‘ پنکج شرما‘ سمت چودھری‘ انکت چودھری‘ پرنس‘ جتن شرما‘ وویک پنچل‘ رشبھ چودھری اورہمانشو ٹھاکر۔۔اس کے علاوہ مزید 9 ملزم ہیں جو ابھی تک گرفتار نہیں کئے جاسکے ہیں۔۔ پولیس نے اس چارج شیٹ میں لکھا ہے کہ مذکورہ وہاٹس ایپ گروپ 25 فروری 2020 کو مسلم طبقہ سے بدلہ لینے کیلئے بنایا گیا تھا۔

پولیس نے وہاٹس ایپ گروپ پر ممبروں کی باہمی گفتگو کے جو چند اقتباسات پیش کئے ہیں ان میں ایک جگہ وہ گفتگو ہے جس میں یہ لوگ مدرسوں اور مسجدوں کو تباہ کرنے اور مسلمانوں کو قتل کرنے کی بات کر رہے ہیں۔۔ پولیس نے ایک جگہ لکھا ہے کہ: وہاٹس ایپ گروپ پر باہمی گفتگو کے مطابق ان لوگوں نے ہندؤں پر حملہ کرنے کے جواب میں مسلمانوں کو سبق سکھانے کی ساز ش کی۔۔ وہ لاٹھی ڈنڈوں‘چھڑیوں‘ تلواروں اور آتشیں اسلحہ سے لیس تھے اور انہوں نے ہاشم علی‘ اس کے بھائی عامر علی سمیت 9 بے گناہ مسلم افراد کو قتل کیا تھا۔

چارج شیٹ میں مزید لکھا گیا کہ: مذکورہ الزام اس حقیقت سے بھی ثابت ہوتا ہے کہ یہ نوجوان مسلمانوں سے بدلہ لینے کیلئے اس پروپگنڈے کی نچلے درجہ کی حماقت کو سمجھنے میں ناکام رہے کہ وہ اپنی کمیونٹی کے محافظ ہیں اور اسی لئے انہوں نے یہ وہاٹس ایپ گروپ تشکیل دیا۔گروپ کے افراد نے اپنی انفرادیت کو ضم کرتے ہوئے ایک ’ہجوم‘کی ذہنیت سے کام کرنا شروع کردیا۔۔جے شری رام اور ہر ہر مہادیو جیسے فاتحانہ مقدس نعروں نے ان کے دماغ کو ماؤف اور ان کی تخلیقی فطرت کو مفلوج کرکے رکھ دیا۔

چارج شیٹ میں کپل مشرا کا بھی ذکر آیا ہے۔بتایا گیا ہے کہ وہاٹس ایپ گروپ کی گفتگو میں کپل مشرا کا نام بھی لیا گیا۔۔ 25 فروری کی شب 9 بج کر 13 منٹ پر ایک ممبر نے لکھا: میں دیکھ رہا ہوں کہ بہت سے سمجھ دار لوگ لکھ رہے ہیں کہ کپل مشرا قصوروار ہے۔آخر کپل مشرا نے (ایسا) کیا کہہ دیا ہے؟ یہی نا کہ اگر روڈ کلیر نہ کیا گیا تو سی اے اے کے حامی بھی روڈ پر آجائیں گے؟ یہ بھی اسی طرح آئینی طور پر جائز ہے جس طرح یہ دنگائی اپوزیشن اور پروٹیسٹ کے نام پر روڈ کو بلاک کئے ہوئے ہیں۔آخر الٹی میم دینے میں کیا غلط ہے۔ جو لوگ یہ کہہ رہے ہیں کہ کپل مشرا نے آگ بھڑکائی اور اسی کی وجہ سے یہ سب ہوا وہ جامعہ (تشدد) اور شاہین باغ (احتجاج) کا ذمہ دار کسے سمجھتے ہیں؟ -امانت اللہ اور شرجیل کے بارے میں بھی بات کرو-اگر کپل مشرا کی باتو ں کی وجہ سے دنگا بھڑکا ہوتا تو پورے دیش میں آگ لگ جاتی“۔
یہاں دہلی پولیس کی چارج شیٹ کی بات ختم ـ
میں اس چارج شیٹ پر اپنا تجزیہ پیش کرنے کے لئے تیار کرچکا تھا کہ ذہن میں آیا کہ آج کسی ماہر قانون سے اس کا تجزیہ معلوم کیا جائے۔۔اس ضمن میں میں نے معروف وکیل اور دہلی بار کونسل کے وائس پریذیڈنٹ حمال اختر ایڈوکیٹ سے بات کی۔انہوں نے کہا کہ یہ فسادات فرقہ وارانہ تھے اوران کا سی اے اے کے خلاف احتجاج سے کوئی لینا دینا نہیں ہے۔۔۔انہوں نے پولیس کی مذکورہ چارج شیٹ پر اپنی رائے ظاہر کرتے ہوئے کہا کہ پولیس نے ممکن ہے کہ اس یکطرفہ کارروائی کا جواز پیدا کرنے کیلئے اس طرح کی چارج شیٹ تیار کی ہو جو وہ مسلمانوں کے خلاف کر رہی ہے لیکن یہ ایک اچھی چارج شیٹ ہے اور اس موقع کو مسلمان اپنے حق میں استعمال کرسکتے ہیں۔انہوں نے کہا کہ چارج شیٹ میں آر ایس ایس اورکپل مشرا کا ذکر پولیس نے اپنے انداز میں کیا ہے اورممکن ہے کہ دونوں کو بچانے کی کوشش کی ہو لیکن میں سمجھتا ہوں کہ چارج شیٹ میں یہ بہت اہم نکات شامل ہوگئے ہیں۔

حمال اختر نے کہا کہ اگر پولیس نے آر ایس ایس کا ذکر شامل کیا ہے تو سمجھ لیجئے کہ آر ایس ایس کا ذکر شامل کرنے کی کوئی بہت بڑی مجبوری ہوگی۔۔ انہوں نے کہا کہ اگر اس کیس کو انتہائی فہم وشعور کے ساتھ لڑا جائے تو اسی بنیاد پر آر ایس ایس پر پابندی لگوائی جاسکتی ہے اور کپل مشرا کے خلاف متاثرین کی طرف سے درخواست دے کر اسے عدالت میں گھسیٹا جاسکتا ہے۔

(مضمون میں پیش کردہ آرا مضمون نگارکے ذاتی خیالات پرمبنی ہیں،ادارۂ قندیل کاان سےاتفاق ضروری نہیں)

(464 سالہ بابری مسجد کا 107سالہ قضیہ)

6 دسمبر 1992 کو بابری مسجد کے دہشت گردانہ انہدام کے بعد ایک طرف جہاں مسلمان صدمہ میں تھے وہیں دوسری طرف بی جے پی اور اسی قبیل کی دوسری شرپسند جماعتوں نے خوشیاں منائیں اور مٹھائیاں تقسیم کیں۔۔ان شرپسند جماعتوں سے وابستہ کارسیوکوں نے مختلف اخبارات کے صحافیوں کو جو بیانات اور انٹرویو دئے تھے ان میں اعتراف کیا تھا کہ انہوں نے اپنے لیڈروں کے جوش دلانے پر بابری مسجد کو ڈھاکر ’غلامی کے کلنک‘ کو مٹادیا ہے۔
تیسری طرف کانگریس پارٹی میں ایک طبقہ نرسمہاراؤ کے خلاف غصہ میں تھا۔۔نرسمہاراؤ نے‘اس وقت ٹی وی پر آکر قوم سے خطاب کیا جب سب کچھ ختم ہوچکا تھا۔۔انہوں نے یوپی کی بی جے پی حکومت پر حلف شکنی کا الزام لگایا اور اعلان کیا کہ بابری مسجد کو اسی جگہ از سر نو تعمیرکیا جائے گا۔
یہاں یہ بتانا بہت اہم ہوگا کہ کانگریس میں اس وقت کئی مسلم قائد موجود تھے۔۔ان میں سے کچھ تو وزیر بھی تھے۔غلام نبی آزاد‘احمد پٹیل اور سی کے جعفر شریف چند بڑے نام تھے۔ موخرالذکر اب زندہ نہیں ہیں لیکن جب دوسری صف کے مسلم قائدین ان سب کے ساتھ اکٹھے ہوکر نرسمہا راؤ سے ملنے گئے تو ان کا ارادہ استعفی دینے کا تھا۔۔سی کے جعفر شریف تو جیب میں استعفی رکھ کر لے گئے تھے۔۔ان لیڈروں کے ساتھ ہفت روزہ نئی دنیاکے ایڈیٹر اور مشہور صحافی شاہد صدیقی بھی تھے۔۔ وہ بھی بہت غصہ میں تھے۔۔اور بقول ان کے انہوں نے نرسمہاراؤ کو بہت سخت سست کہا بھی تھا۔۔ والله اعلم بالصواب۔ لیکن یہ مسلم لیڈرجب راؤ کے دربار میں پہنچے تو سب کا غصہ ٹھنڈا ہوچکا تھا اور کسی نے اپنی جیب سے استعفی نہیں نکالا۔
شرپسندوں کے حوصلے بلند تھے اور اب وہ نعرے لگارہے تھے کہ اب متھرا اور کاشی کی باری ہے۔ نرسمہاراؤ پراپوزیشن کا مسلسل دباؤ بڑھ رہا تھا۔۔انہوں نے بہر حال پارلیمنٹ سے ایک قانون پاس کرالیا جس کی رو سے 15اگست 1947 کو جس عبادت گاہ کی جو پوزیشن تھی اس کو بدلنا ممنوع قرار دیدیا گیا۔۔اس ایکٹ کو عرف عام میں عبادتگاہوں کے تحفظ کا قانون کہتے ہیں۔۔ لیکن بابری مسجد کے قضیہ کو اس ایکٹ کے نفاذ سے باہر رکھا گیا۔۔کہا یہ گیا کہ چونکہ اس کا معاملہ عدالتوں میں ہے اور وہ انتہائی متنازعہ ہوچکا ہے اس لئے اسے اس ایکٹ سے الگ رکھا گیاہے۔۔ لیکن یہ سمجھ میں نہیں آیا کہ پھر نرسمہاراؤ نے ملک کے وزیر اعظم کی حیثیت سے 6 دسمبر 1992 کی شام ٹی وی پر یہ وعدہ کیوں کیا تھا کہ بابری مسجد کو اسی جگہ از سر نو تعمیر کیا جائے گا؟
مسلمان چونکہ غصہ اور صدمہ میں تھے اور دوسری طرف خوشیاں منائی جارہی تھیں اس لئے انہوں نے جہاں جہاں بن پڑا احتجاج کیا۔۔لیکن ان کا احتجاج کرنا بھی شرپسندوں اور بی جے پی کو گوارا نہ ہوا۔۔ان پر حملے کئے گئے اور مابعد انہدام ملک بھر میں جو فسادات پھوٹے ان میں دو ہزار کے آس پاس بے گناہ جاں بحق ہوگئے۔۔فیض آباد میں بی جے پی کے ایک مسلم لیڈر تک کو نہیں بخشا گیا اوراس کی داڑھی نوچ کر خود اسے آگ کے حوالہ کردیا گیا۔۔اس نے دہائی دی کہ وہ بی جے پی میں ہے لیکن شرپسندوں نے کہا کہ مسلمان تو ہے اس لئے تجھے چھوڑ نے کا کوئی مطلب نہیں۔۔ یہ تمام معلومات اس وقت کے مختلف اخبارات میں شائع ہوئی تھیں۔۔ دنیا بھر سے انٹر نیشنل میڈیا نے بھی اس موقع پر کوریج کی اور پوری دنیا میں بابری مسجد کے انہدام اور مابعد مسلم کش فسادات پر غصہ کا اظہار کیا گیا۔۔شرپسندوں نے بہت سے صحافیوں پر بھی حملے کئے۔
شر پسندوں کے حوصلے بڑھتے چلے گئے اور مسلمان سر اٹھاکر چلنے سے گھبرانے لگے۔۔پورا دسمبر اسی میں گزرگیا۔جنوری 1993 میں بھی حالات سنور نہ سکے۔۔ممبئی‘مالیگاؤں اور بھیونڈی جیسے مقامات بھی فسادات اور فرقہ وارانہ کشمکش سے بہت متاثر ہوئے۔۔ ممبئی میں جنوری 1993میں لگاتار ایک سے زائد بم دھماکے ہوئے اور اسٹاک ایکسچینج کی بلڈنگ سمیت کئی مقامات کو سخت نقصان پہنچا۔۔257 لوگ جان سے ہاتھ دھوبیٹھے۔۔ نہیں معلوم کہ یہ بم دھماکے کس نے کئے تھے۔۔ لیکن پولس اور حکومت کا یہی کہنا تھا کہ یہ بم دھماکے داؤد ابراہیم نے کئے تھے۔اس ضمن میں اس کے خاندان کے کئی افراد کو سزا بھی ہوئی۔ لیکن یہ بھی ہوا کہ اس کے بعد شرپسندوں کے حوصلے بھی ٹوٹ گئے اور مسلمان خوف ودہشت کے سائے سے باہرآئے۔
ادھر انہدام سے پہلے سپریم کورٹ نے جس اسٹیٹس کو (صورتحال کا جوں کا توں رکھنے) کا حکم دیا تھا ہرچند کہ اس میں ہمالیائی تبدیلی آگئی تھی اور بابری مسجد کی جگہ اب مٹی کا ڈھیر اور اس پر رام کی مورتی تھی۔۔اس کی پوجا بھی شروع کردی گئی تھی اور درشن بھی جاری تھے۔۔لیکن مسلمانوں کے لئے اب بھی ’اسٹیٹس کو‘ ہی تھا۔۔الہ آباد ہائی کورٹ نے بھی انہدام کے بعدایک اور ’اسٹیٹس کو‘ لگادیا تھا۔۔ یعنی مسلمان اب بابری مسجد کے ملبہ کے پاس بھی نہیں پھٹک سکتے تھے۔۔اب وہاں پوری طرح شرپسندوں کا قبضہ تھا۔ ملک بھر میں جو فسادات ہوئے تھے ان میں بھی نقصان انہی کا ہوا تھا۔۔ اب وہ ہرطرف سے اور ہر طرح سے ٹوٹ چکے تھے۔۔ یہ فہم سے بالاتر ہے کہ اگر سپریم کورٹ کے حکم کی کھلی خلاف ورزی ہوئی تھی اور یوپی کے وزیر اعلی کلیان سنگھ نے عدالت میں دئے گئے حلف نامہ کی دھجیاں اڑائی تھیں توصورت حال کو درست کرنے کیلئے مرکز ی حکومت کے ہاتھ کس نے پکڑ رکھے تھے۔
نرسمہاراؤ سے تمام اپوزیشن پارٹیاں جو مطالبہ 6 دسمبر 1992 سے پہلے کر رہی تھیں اس پر بابری مسجد کے انہدام کے بعد عمل کیاگیا۔ راؤ نے یوپی کی حکومت کے ساتھ ہی راجستھان اور مدھیہ پردیش کی بی جے پی حکومتوں کو بھی برخاست کردیا۔۔ اس کا کوئی فائدہ نہ ہونا تھا نہ ہوا۔۔ابھی راؤ کے پاس پورے چار سال تھے۔مگر راؤ نے بابری مسجد کی از سر نوتعمیر کیلئے کچھ نہیں کیا۔۔ 1996 میں جب لوک سبھا انتخابات ہوئے تو نرسمہاراؤ نے پوری طاقت جھونک دی اور مسلم مذہبی قائدین کو خریدنے کیلئے تجوریوں کے دہانے کھول دئے۔چونکہ عام مسلمان ان سے سخت ناراض تھے لہذا انہوں نے بعض نام نہاد مسلم قائدین کی خدمات حاصل کیں اور انہیں اس کا ’نذرانہ‘ بھی دیا گیا۔۔ کیا بریلوی‘کیا دیوبندی سبھی کو خریدنے کیلئے اپنے قاصد دوڑائے۔ لیکن مسلمانوں کی ناراضگی میں کمی نہیں آئی اور نرسمہاراؤ کا دوبارہ وزیر اعظم بننے کا خواب بھی بابری مسجد کی طرح منہدم ہوگیا۔ کہتے ہیں کہ نرسمہاراؤ سے کانگریس قیادت خاصی ناراض رہی اور وہ کانگریس میں شجر ممنوعہ بن گئے۔ سونیا گاندھی نے قیادت سنبھالی اور راؤ نواز لوگوں کو حاشیہ پر لگادیا۔ 1996 میں حکومت بی جے پی کی بن گئی اور اٹل بہاری باجپائی وزیر اعظم بن گئے۔ لطف کی بات یہ ہے کہ نرسمہاراؤ نے جن نام نہاد مسلم قائدین اور دانشوروں کو خرید کر ان کی خدمات حاصل کی تھیں 1997 میں ان قائدین اور دانشوروں نے اٹل بہاری باجپائی کیلئے کام کیا۔
اب آئیے ایک بار پھر دسمبر 1992میں لوٹتے ہیں۔۔ بابری مسجد کے مجرمانہ اور دہشت گردانہ انہدام کے بعد یوپی پولیس نے دو ایف آئی آر درج کیں۔۔ پہلی ایف آئی آر (نمبر197-92) لاکھوں نامعلوم کارسیوکوں کے خلاف درج کی گئی۔۔ دوسری ایف آئی آر (نمبر 198-92) بی جے پی کے چند بڑے لیڈروں کے خلاف درج کی گئی۔ان میں ایل کے اڈوانی‘مرلی منوہر جوشی‘اوما بھارتی‘اشوک سنگھل‘ونے کٹیار اور وشنو ہری ڈالمیا وغیرہ شامل تھے۔ اس کے علاوہ 47 ایف آئی آر مزید درج کی گئیں جن میں صحافیوں پر حملے سے متعلق شکایات تھیں۔
اسی کے ساتھ 16دسمبر 1993کو مرکزی وزارت داخلہ نے ریٹائرڈ جسٹس من موہن سنگھ لبراہن کی سربراہی میں ایک کمیشن آف انکوائری بھی قائم کردیا۔اس کمیشن کو لبراہن کمیشن کے نام سے جانا گیا۔بنیادی طورپراس کمیشن کو ان تمام سلسلہ وار واقعات کی تحقیقات کرکے اپنی رپورٹ تین مہینے کے اندر پیش کرنی تھی جوبابری مسجد کے انہدام کا سبب بنے۔اس کی تحقیقات کے لئے 6 نکات قائم کئے گئے تھے جن کی رو سے کمیشن کو یہ بھی تفتیش کرنی تھی کہ انہدام میں حکومت یوپی اور اس کے وزیروں اور افسروں کا کیا کردار رہا‘سیکیورٹی میں کہاں کمی رہی اور مختلف تنظیموں کا کیا کردار رہا۔اسی طرح میڈیا پر حملوں کی بھی تفتیش اسی کمیشن کو کرنی تھی۔۔ ہم اس کمیشن کی تفصیلی رپورٹ پر تیسری قسط میں روشنی ڈالیں گے۔ لیکن اتنا جاننا اہم ہوگا کہ جس کمیشن کو محض تین مہینے کے لئے بنایا گیا تھا اس نے رپورٹ تیار کرنے میں 17سال لگادئے۔ کمیشن کو 48 مرتبہ ایکسٹنشن دیا گیا۔ یہ اپنے آپ میں ایک ریکارڈ بات تھی۔
بابری مسجد اب موجود نہیں تھی۔۔لیکن یوپی حکومت کی سازش کا ایک نیا رخ سامنے آیا۔۔ نامعلوم لاکھوں کارسیوکوں کے خلاف درج ایف آئی آر تو سی بی آئی کو سونپی گئی جو مرکز کے تحت آتی ہے۔لیکن بی جے پی کے بڑے لیڈروں کے خلاف درج دوسری ایف آئی آر کو یوپی کی مقامی انٹلی جنس یونٹ سی آئی ڈی کے سپرد کیا گیا۔پھر 27 اگست 1993 کو تمام معاملات سی بی آئی کے سپرد کردئے گئے۔اس وقت یوپی میں صدر راج نافذ تھا۔اکتوبر 1993 میں سی بی آئی نے اڈوانی اور دوسروں کو سازش کا ملزم مانتے ہوئے چارج شیٹ داخل کردی۔
حیرت انگیز طورپر سی بی آئی کی اسپیشل کورٹ نے مئی 2001 میں بی جے پی کے ان تمام لیڈروں کے خلاف جاری کارروائی کو ختم کردیا۔۔سی بی آئی کو اس کے خلاف اپیل کرنے میں تین سال لگے اور اس نے نومبر 2004 میں الہ آباد ہائی کورٹ کی لکھنؤ بنچ میں بی جے پی لیڈروں کے خلاف کارروائی کو ختم کرنے کے خلاف اپیل دائر کی۔۔اس پر مزید حیرت انگیز طور پر ہائی کورٹ نے 6سال لگائے اورمئی 2010 میں سی بی آئی کی اس اپیل کو یہ کہتے ہوئے خارج کردیا کہ اس میں کوئی دم نہیں ہے۔۔ فروری 2011 میں سی بی آئی نے اس فیصلہ کے خلاف سپریم کورٹ میں اپیل دائر کی۔۔اس پر سپریم کورٹ نے بھی 6 سال لگادئے اور مارچ 2017 میں اڈوانی وغیرہ کے خلاف سازش کے الزامات کو برقرار رکھنے اور اڈوانی وغیرہ اور کارسیوکوں کے خلاف جاری الگ الگ مقدمات کویکجا کرنے کے احکامات دیدئے۔
ادھر 1986 میں مقامی عدالت کے ذریعہ بابری مسجد کا تالہ کھولنے کے حکم کے خلاف جو اسٹیٹس کو الہ آباد ہائی کورٹ نے لگایا تھا اس میں ٹائٹل سوٹ (یعنی بابری مسجد کس کی ملکیت کی زمین پر بنی ہے) کا مقدمہ بھی چل رہا تھا۔اس مقدمہ کا فیصلہ 24 سال بعدستمبر 2010 میں آیا۔تین رکنی بنچ نے 2:1کی اکثریت سے یہ فیصلہ کردیا کہ بابری مسجد اور اس سے ملحق زمین (2.77 ایکڑ) کو تین حصوں میں تقسیم کرکے سنی سینٹرل وقف بورڈ‘ رام للا براجمان اور نرموہی اکھاڑے کو دیدیا جائے۔۔ دو ججوں کی رائے ایک تھی جبکہ تیسرے جج کی رائے مختلف تھی۔۔ لیکن اس نکتہ پر تینوں متفق تھے کہ جس جگہ اس وقت رام کی مورتی رکھی ہے اور جو مسجد کی کلیدی محراب تھی‘ وہی جگہ رام للا براجمان کو دی جائے گی۔۔ حالانکہ تینوں نے یہ تسلیم کیا کہ یہ مورتی 23 دسمبر 1949کی شب میں وہاں رکھی گئی تھی۔
8000 صفحات پر مشتمل اس فیصلہ میں جسٹس سدھیر اگروال نے کہا کہ اندرونی احاطہ پر ہندو مسلم دونوں کا حق ہے۔جسٹس ایس یو خان نے کہا کہ ہندو اور مسلمان دونوں صدیوں سے ایک ساتھ عبادت کرتے آئے ہیں اور یہی اس مقدمہ کی بے مثال خوبی ہے۔۔ انہوں نے اس بات کو تسلیم نہیں کیا کہ بابری مسجد کسی مندر کو توڑ کر بنائی گئی تھی تاہم یہ ضرور کہا کہ بابر کے حکم پر مسجد اس جگہ بنائی گئی تھی جہاں ایک لمبے عرصہ سے ٹوٹے ہوئے مندر کے باقیات پڑے ہوئے تھے۔۔ لیکن باقی دو ججوں نے کہا کہ مسجد مندر کو توڑ کر بنائی گئی تھی۔
بہر حال اس فیصلہ پر مسلمانوں کے تو اتفاق کرنے کا سوال ہی نہیں تھا خود ہندو فریقوں نے بھی اس سے عدم اطمینان ظاہر کیا۔۔نرموہی اکھاڑے کو اس پر اعتراض تھا کہ اسے اندرونی احاطہ سے محروم کردیا گیا اور اسے صرف رام چبوترہ دیا گیا جبکہ رام للا براجمان (بی جے پی وغیرہ) کو 2.77 ایکڑ زمین کی تقسیم پر ہی اعتراض تھا۔۔لہذامئی 2011 میں سپریم کورٹ نے اس فیصلہ پر اسٹے لگادیا۔
اب تین نکتے بہت اہم باقی رہ گئے ہیں۔۔جسٹس لبراہن کمیشن کی رپورٹ‘ سپریم کورٹ کا حتمی فیصلہ اور اڈوانی وغیرہ کو سازش کے تمام الزامات سے بری کرنے کا لکھنؤ کی اسپیشل کورٹ کا تازہ فیصلہ۔۔سچی بات یہ ہے کہ بابری مسجد کے صاف ستھرے قضیہ کو کانگریس‘ بی جے پی‘ان دونوں کی حکومتوں‘مقامی عدالتوں‘ہائی کورٹ اور خود سپریم کورٹ نے بھی خوب الجھایا اور اتنا پیچیدہ بنادیا کہ آخر میں خود سپریم کورٹ کو ہی بابری مسجد کی جگہ ہندوؤں کے حوالہ کرنے کے لئے آرٹیکل 142 کے تحت اپنے انتہائی خصوصی اختیارات کا استعمال کرنا پڑا۔۔ یعنی کوئی ثبوت نہیں‘کوئی شہادت نہیں لیکن چونکہ بابری مسجد کا نام ونشان مٹانا تھا اور مسلمانوں کو محروم کرتے ہوئے جگہ ہندؤں کے حوالہ کرنی تھی اس لئے سپریم کورٹ نے آئین کی سب سے خطرناک دفعہ 142 کا استعمال کرڈالا۔ میں دوبارہ استعمال کر رہا ہوں کہ آئین کی دفعہ 142 سب سے خطرناک ہے۔اور جس دور میں ہم جی رہے ہیں اس میں تو انتہائی خطرناک ترین ہے۔

(464 سالہ بابری مسجد کا 107سالہ قضیہ)

پہلی قسط

بابری مسجد کے قضیہ پر پچھلے 70 برسوں میں اور خاص طورپر آخری 34 برسوں میں جتنا لکھا گیا ہے اتنا شاید ہی آزاد ہندوستان میں کسی اور موضوع پر لکھا گیا ہو۔شمالی ہندوستان کے صوبہ اتر پردیش کے قصبہ ایودھیا میں 1528میں تعمیر ہونے والی یہ مسجد 464 سال تک قائم رہی لیکن اب اس کا نام و نشان بھی باقی نہیں ہے۔۔ اب وہاں حکومت ہند کی فعال شمولیت کے ساتھ رام مندر کی تعمیر شروع ہوگئی ہے۔اس مندر کا سنگ بنیاد وزیر اعظم نریندر مودی نے 5 اگست 2020 کو خود رکھا تھا۔شاید یہ اس کا جواب تھا کہ جس طرح 1528 میں شہنشاہ بابر (کے کمانڈر میر باقی) نے ایک مسجد کی بنیاد رکھی تھی اسی طرح ٹھیک 492 سال بعد 2020 میں وزیر اعظم نریندر مودی نے بھی رام مندر کی بنیاد رکھ دی۔

لیکن یہاں ایک بڑا فرق ہے۔ یہ فرق ہمیشہ تاریخ کے صفحات میں درج رہے گا اور آنے والی نسلیں یہ جانتی رہیں گی کہ شہنشاہ بابر نے 1528میں جو مسجد بنائی تھی اس کے کسی مندر کو توڑ کر بنانے کا کوئی ثبوت سپریم کورٹ تک کو نہیں ملا تھا۔جبکہ نریندر مودی نے جس رام مندر کا سنگ بنیاد رکھا تھا وہ یقینی طور پر ایک مسجد کو توڑ کر بنایا گیا تھا۔یہ مسجد 6 دسمبر 1992 کو دن کے اجالے میں بی جے پی‘بجرنگ دل‘وی ایچ پی اور شو سینا کے ہزاروں کارسیوکوں نے منہدم کردی تھی۔اس موقع پر بی جے پی کے تین درجن سے زائد ممتاز لیڈر بھی وہاں موجود تھے اور کارسیوکوں کو جوش دلا رہے تھے۔ان میں رام مندر تحریک کے سرخیل لال کرشن اڈوانی‘مرلی منوہر جوشی‘اوما بھارتی‘اشوک سنگھل‘ ونے کٹیار اور وشنو ہری ڈالمیا بھی شامل تھے۔

تاریخ یہ بھی یاد دلاتی رہے گی کہ جس طرح مندر توڑ کر مسجد بنانے کا کوئی ثبوت نہ ملنے کے باوجود اور بابری مسجد کی زمین کی ملکیت ہندؤں کے حق میں ثابت نہ ہونے کے باوجود ملک کی سب سے اعلی عدالت سپریم کورٹ نے بابری مسجد کی زمین کو رام مندر کی تعمیر کے لئے ہندؤں کے حوالہ کردیا تھا اسی طرح مسجد کے انہدام کے 28سال بعد 2020 میں لکھنؤ میں سی بی آئی کی اسپیشل عدالت نے مذکورہ تمام ملزمین کو (اور تاریخ کی نظر میں مجرمین کو) سازش اور انہدام کے ہر الزام سے بری کردیاتھا۔۔ واقعہ یہ ہے کہ بابری مسجد کے ساتھ ناانصافی کے عمل میں فیض آباد اور لکھنؤ کی مقامی عدالتوں کے ساتھ ساتھ سپریم کورٹ بھی برابر شامل رہی۔ اس ضمن میں الہ آبادہائی کورٹ کو قدرے مستثنی رکھا جاسکتا ہے۔تاریخ بتائے گی کہ مقامی عدالتوں اور سپریم کورٹ سے ہزار درجہ بہتر فیصلہ تو الہ آباد ہائی کورٹ نے ہی کردیا تھا۔اس کی تفصیل آگے بیان کی جائے گی۔لیکن اس نکتہ پرمورخ یہ سوال بھی اٹھائے گا کہ (گوکہ خود ہندو فریق بھی اس فیصلہ سے مطمئن نہیں تھا) حکومتوں‘عدالتوں اور مختلف سیاسی پارٹیوں کی شرپسندی سے واقف ہوجانے کے باوجود بابری مسجد کا فریق کیوں الہ آباد ہائی کورٹ کے اس فیصلہ پر اکتفا نہ کرسکا۔

آئیے اب ذرا دوسری طرف رخ کرتے ہیں۔ہندوستان میں اس وقت (2020 میں) سرکاری اعداد و شمار کے مطابق نوجوانوں کی آبادی 34.33 فیصد ہے۔ظاہر ہے کہ اس وقت جن کی عمریں 30 تا 35 برس ہیں انہیں بھی بابری مسجد کے قضیہ اوراس کے انہدام کا کچھ زیادہ اندازہ نہیں ہوگا۔پھر 1992میں الیکٹرانک میڈیا بھی اس پیمانہ کا نہیں تھا۔ذرائع ابلاغ بھی وسیع تر نہیں تھے۔زیر نظر مضمون کی دوسری قسط میں لکھنؤ کی عدالت کے تازہ فیصلہ کا بھی جائزہ لیا جائے گا لیکن مناسب معلوم ہوتا ہے کہ مختصر ہی سہی دور حاضر کی نسلوں کے لئے ایک سلسلہ وارٹائم لائن بیان کردی جائے۔

جیسا کہ اوپر ذکر کیا گیا بابری مسجد کی تعمیر شہنشاہ بابر کے کمانڈر میر باقی نے 1528میں کی تھی۔اس مسجد میں 421 سال تک باجماعت نماز ادا ہوتی رہی۔ تین صدیوں کے بعد سخت گیر عناصر نے مسجد کے خلاف سازش شروع کردی لیکن پہلی معلوم سازش 1885میں رونما ہوئی۔ مسجد کی تعمیر کے 357 برس بعد مہنت رگھوبیر داس نے فیض آباد کی ضلع عدالت میں ایک درخواست دائر کی اوربابری مسجد کے احاطہ کے باہر ایک سائبان (Canopy) بنانے کی اجازت مانگی۔لیکن ضلع عدالت نے اس درخواست کو مسترد کردیا۔1885میں ہندوستان کے انتظام وانصرام پر مکمل طورپر انگریزوں کا قبضہ تھا۔عدالت کے ذریعہ ہندؤں کی درخواست کو مسترد کرنے کی وجہ لازمی طورپر قانونی استدلال کی کمی تھی۔عدالت کوہندؤں کا کوئی مالکانہ حق نہ بابری مسجد پر نظر آیا ہوگا اور نہ ہی اس کے باہر کے حصہ پر۔۔

انگریزوں پر ہندو مسلم آبادی کو آپس میں لڑانے کا الزام لگتا رہا ہے۔۔لیکن یہاں انگریزوں نے اس موقع کو استعمال نہیں کیا اور ہندؤں کے دعوے کو بے بنیاد پاکر اس درخواست کو مسترد کردیا۔مسجد کے احاطے کے باہر سائبان کی تعمیر کی درخواست یقینی طوپر ایک سازش کے تحت ہی کی گئی تھی لیکن انگریزوں نے سازش کے اس موقع کا استعمال نہیں کیا۔اس سازش کے 64 سال کے بعد اور ملک کی آزادی کے تقریباً ڈیڑھ سال بعد ہندؤں نے پھر ایک بڑی سازش کی اور 23 دسمبر 1949 کی شب 50-60 لوگوں نے بابری مسجد کی دیوار پھاند کر مرکزی محراب میں رام کی مورتی رکھ دی۔اس سے پہلے اکھل بھارتیہ راماین مہاسبھا نے بابری مسجد کے باہر 9 دنوں تک بغیر کسی وقفہ کے راماین کا پاٹھ پڑھنے کا پروگرام منعقد کیا اور آخری دن وہ حرکت انجام دیدی۔بالکل اسی طرح جس طرح 43 سال بعد 1992 میں پہلے علامتی کارسیوا کے نام پر ہزاروں لوگ جمع ہوئے اور پھربابری مسجد کو منہدم کردیا۔۔

چوری چھپے مورتی رکھنے کے چند ہفتوں بعد 1950 کے اوائل میں فیض آباد کی عدالت میں دو درخواستیں دائر کی گئیں۔گوپال سملا وشارد نے بابری مسجد کے اندر چوری سے رکھی اس مورتی کی پوجا کرنے کی اجازت مانگی جبکہ پرم ہنس رام چندر داس نے پوجا کے تسلسل اور مورتی کو نہ ہٹائے جانے کا مطالبہ کیا۔۔اس کے 9 سال بعد نرموہی اکھاڑا نے بابری مسجد کو اس کے حوالہ کئے جانے کیلئے درخواست دائر کی۔

23 دسمبر 1949 کو بابری مسجد میں آخری بار عشاء کی نماز باجماعت ادا ہوئی تھی۔اس کے بعد پھر اس مسجد میں نماز نہیں پڑھی جاسکی۔اور پھر 43 سال بعد اس کی شہادت واقع ہوگئی۔ یہاں سوال یہ پیدا ہوتا ہے کہ کیا 1885سے 1992تک یعنی کل 107سال تک سازش کے علاوہ بھی کچھ ہوا؟

1961میں یوپی سنی سینٹرل وقف بورڈ نے بابری مسجد کو اس کے حوالہ کئے جانے کی درخواست عدالت میں دائر کی۔.. درخواست گزار کے طور پر ہاشم انصاری پیش ہوئے ۔ فیض آباد کی ضلع عدالت میں یہ مقدمہ 36 سال تک چلتا رہا اور فروری 1986میں اچانک عدالت نے بابری مسجد کا تالہ کھول کر اسے پرستش کے لئے ہندؤں کے حوالہ کئے جانے کا فیصلہ کردیا۔۔ یہاں پھر سوال پیدا ہوتا ہے کہ جس طرح غلام ہندوستان میں 1885میں انگریزوں کے تسلط کے دوران اسی فیض آباد کی عدالت نے ہندو فریقوں کی عیاری پر مبنی دائر درخواستوں کو مسترد کرکے ایک بڑی سازش کو ناکام بنادیا 1950سے 1986 تک آزاد ہندوستان میں (کانگریس حکومت کے دوران) فیض آباد کی اسی عدالت نے کیوں معاملہ کو اتنا طول دیا اور کیوں آخر کار اس سازش کو کامیاب کردیا۔۔ اس سوال کا جواب شاید اس سوال کے اندر پوشیدہ مل جائے کہ 23 دسمبر 1949 کی شب چوری چھپے مورتیاں رکھنے ہی کیوں دی گئیں اور جب وہاں پچھلے نو دنوں سے سخت گیر ہندؤں کا راماین پاٹھ پروگرام چل رہا تھا تو انتظامیہ اور حکومت نے حفظ ماتقدم کے تحت کوئی سخت انتظام کیوں نہیں کیا؟۔۔۔

اسی سے وابستہ سوال یہ ہے کہ جب 1528 سے 1949 تک وہاں نماز باجماعت ادا ہو رہی تھی تو انتظامیہ اور حکومت نے چوری چھپے مورتیاں رکھنے والوں کے خلاف کیا کارروائی کی؟ کیوں مسجد میں تالہ لگایا گیا اور کیوں مسلمانوں کو وہاں نماز پڑھنے سے محروم کیا گیا؟چوری چھپے مورتی رکھنا ایک مجرمانہ عمل تھا لیکن اس مجرمانہ عمل کو جاری رکھنا حکومت کا اس سے بڑا مجرمانہ عمل تھا۔کیا اس عمل میں کانگریس کے اس وقت کے وزیر اعظم پنڈت جواہر لعل نہرو کی شمولیت نہیں تھی؟

بہر حال فروری 1986میں مقامی عدالت کا فیصلہ آتے ہی مسجد کا تالہ کھول دیا گیا۔اس وقت یوپی میں کانگریس کے ویر بہادر سنگھ وزیر اعلی تھے جبکہ ملک کے وزیر اعظم راجیو گاندھی تھے۔آخر اس فیصلہ کے خلاف فوری طورپر حکومت کیوں ہائی کورٹ نہیں گئی؟ کیوں ہنگامی حکم کی درخواست نہیں کی گئی؟اس کے بر خلاف سرکاری ٹیلیویزن دور درشن پر اس فیصلہ کی خوب تشہیر کی گئی اور وہاں ہندؤں کو پوجا کیلئے ساری آسانیاں فراہم کی گئیں۔۔پورے ملک سے ہندوؤں نے وہاں جانا شروع کردیا۔اگست 1989 میں الہ آباد ہائی کورٹ نے صورت حال کو جوں کا توں رکھنے کا حکم دیا۔۔ یعنی مسلمان بابری مسجد سے دور رہیں اور ہندو بدستور پوجا کرتے رہیں۔۔۔

یہاں یہ بتانا ضروری ہے کہ بابری مسجد کا تالہ کھلنے کے بعد مسلمانوں کی طرف سے سیاسی اقدام کی تحریک مرکزی طور پر دہلی سے شروع ہوئی۔اس تحریک میں چند نام بہت بڑے تھے۔مثال کے طورپر سید شہاب الدین‘شاہی امام عبداللہ بخاری‘ابراہیم سلیمان سیٹھ‘غلام محمود بنات والا اورسلطان صلاح الدین وغیرہ۔ اس کے علاوہ دوسری سطح کے مسلم لیڈر بھی اس تحریک سے وابستہ ہوئے۔ان میں ظفر یاب جیلانی‘قاسم رسول الیاس‘جاوید حبیب وغیرہ تھے۔ لیکن دوسری جانب تالہ کھلنے‘پوجا شروع ہونے اور ہائی کورٹ سے "اسٹیٹس کو” کے حکم کے باوجود بی جے پی نے اس تحریک کو مزید آگے بڑھایا۔

راجیو گاندھی کے خلاف ان کی جماعت کے وشوناتھ پرتاپ سنگھ جب الگ ہوکر سیاسی میدان میں آئے تو ان کے ساتھ اتحاد میں شامل ایک طرف جہاں بایاں محاذ تھا وہیں بی جے پی بھی تھی۔بی جے پی کے پاس اس وقت تک لوک سبھا میں صرف دو سیٹیں (اٹل بہاری باجپائی اور ایل کے اڈوانی کی) ہوا کرتی تھیں۔لیکن وشوناتھ پرتاپ سنگھ کی عنایت اور رام مندر تحریک کے سبب بی جے پی دوسے 88 سیٹوں تک پہنچ گئی۔ اڈوانی بابری مسجد کی جگہ رام مندر کی تعمیر کے مطالبہ کو لے کر 25 ستمبر 1990 کو سومنات سے رتھ یاترا لے کر نکلے اور پھر جہاں جہاں گئے فسادات کی ایک خونی لکیر چھوڑتے چلے گئے۔۔ وہ ایک دن میں 300 کلو میٹر کا سفر کرتے اور کم سے کم 6 جلسوں کو خطاب کرتے۔۔ اس رتھ کو صرف بہار میں جاکر بریک لگا جب اس وقت کے وزیر اعلی لالو پرساد یادو نے اڈوانی کو پٹنہ میں ہی گرفتار کرکے دہلی واپس بھیج دیا۔

ادھر مسلمانوں کی تحریک بھی عروج پر تھی۔شاید آزاد ہندوستان کی تاریخ میں دہلی کے بوٹ کلب پر لاکھوں مسلمان پہلی بار جمع ہوگئے تھے۔لیکن اسٹیج پر مسلم قائدین ایک دوسرے سے نبرد آزما ہوگئے اور مسلمانوں کی بنی بنائی ہوا اکھڑ گئی۔سید شہاب الدین اور شاہی امام دونوں اپنی گرم طبیعت کو اعتدال میں نہ رکھ سکے۔ اڈوانی کی تحریک بڑھتی چلی گئی اور ان کے ساتھ کئی سخت گیر تنظیمیں بھی جڑ گئیں۔

اکتوبر 1990میں سخت گیر کار سیوکوں نے بابری مسجد پر چڑھ کر اسے منہدم کرنے کی کوشش کی۔لیکن اس وقت یوپی میں ملائم سنگھ کی حکومت تھی۔پولس نے گنبد پر چڑھے ہوئے کارسیوکوں پر گولی چلائی اور ایک درجن سے زائد ہلاک ہوگئے ۔۔ اس کے بعد 1991 کے الیکشن میں بی جے پی حکومت میں آگئی‘ کلیان سنگھ یوپی کے وزیر اعلی بنے اورشرپسندوں کی بہار آگئی۔۔1992 میں مرکز میں کانگریس کی حکومت تھی لیکن وہ یوپی میں بی جے پی کی حکومت کو بابری مسجد کے خلاف منصوبے کو آگے بڑھانے سے روکنے میں ناکام رہی۔اسوقت وزیر اعظم نرسمہاراؤ تھے۔۔ رام مندر کی تحریک اب نکتہ ارتکاز (Saturation point) پر تھی۔

دسمبر 1992 میں ایودھیا میں ہزاروں کارسیوکوں کو جمع کرکے پھر کارسیوا کا پروگرام بنایا گیا۔نرسمہاراؤ کو اپوزیشن سمیت خود ان کی پارٹی کے لوگوں نے بھی متنبہ کیا۔ یہاں تک کہ قومی یکجہتی کونسل National Integration Council کی میٹنگ میں نرسمہاراؤ سے کہا گیا کہ وہ یوپی حکومت کو برخاست کردیں کیونکہ انٹلی جنس رپورٹوں کے مطابق بھی شرپسندوں کے عزائم اچھے نہیں ہیں اور یوپی حکومت فعالیت کے ساتھ انہیں راہ دے رہی ہے۔اسی دوران معاملہ سپریم کورٹ میں گیا اور بی جے پی/وی ایچ پی کی کارسیوا کو روکنے کی گزارش کی گئی۔عدالت نے تمام تر اندیشوں کے باوجود یوپی کے وزیر اعلی کلیان سنگھ کے اس حلف نامہ پر یقین کرکے محدود کارسیوا کی اجازت دیدی جس میں کہا گیا تھا کہ یہ محض علامتی کارسیوا ہوگی اور حکومت مسجد کو کوئی گزند نہ پہنچنے دے گی۔

ادھر قومی یکجہتی کونسل نے نرسمہا راؤ سے کہا کہ وہ بابری مسجد کے تحفظ کے لئے اقدامات کریں اور یوپی حکومت پر بھروسہ نہ کریں۔نرسمہاراؤ نے کہا کہ ہنگامی حالات سے نپٹنے کیلئے ہماری تیاری پوری ہے اور پیرا ملٹری فورسز پوری طرح تیار ہیں۔ 5دسمبر 1992 کو لکھنؤ میں ونے کٹیار کے گھر پر بی جے پی لیڈروں کی میٹنگ ہوئی جس میں (سی بی آئی کی چارج شیٹ کے مطابق) یوپی کے وزیر اعلی کلیان سنگھ نے کہا کہ سپریم کورٹ نے تعمیر پر پابندی لگائی ہے توڑ پھوڑ پر نہیں۔6دسمبر کو صبح سے ہی ان تمام لیڈروں نے مائک پر نفرت انگیز تقریریں کرنی شروع کردی تھیں اور کارسیوکوں کا حوصلہ بڑھایا جارہا تھا۔آخر کار کارسیوک مسجد کے گنبدوں پر چڑھ گئے اور کدالوں سے توڑنے لگے۔بعد میں رسیاں باندھ کر گنبدوں کو گرادیا گیا۔چند گھنٹوں میں ہی 464 سال پرانی مسجد کو زمیں بوس کردیا گیا۔اور وہاں رام للا کو بٹھاکر میک شفٹ (عارضی مندر) بنادیا گیا۔ اسی رات وہاں بھجن کیرتن بھی شروع کردیا گیا۔

پورا ملک دیکھتا رہا۔حکومت دیکھتی رہی۔وزیر اعظم دیکھتے رہے۔اور سپریم کورٹ بھی دیکھتا رہا۔تمام وعدے اور حلف نامے دھرے کے دھرے رہ گئے۔اپوزیشن سمیت متعدد لیڈر اور مسلم قائدین چیختے رہے لیکن پہلے گنبد کی شہادت سے آخری اینٹ کے گرنے تک نرسمہاراؤ خاموشی سے دیکھتے رہے۔۔ وہ چاہتے تو سریع الحرکت کارروائی کرکے ٹوٹی پھوٹی بابری مسجد کو بکھرنے سے بچاسکتے تھے۔۔ان کی بھیجی ہوئی فورس کوئی زیادہ دور نہیں تھی۔۔۔لیکن انہوں نے مجرمانہ خاموشی اختیار کی اور بابری مسجد کو مکمل طور پر شہید ہوجانے دیا۔

میرا موقف یہ ہے کہ بابری مسجد کے خلاف سازش تیار کرنے میں ایک طرف جہاں ہندو جماعتوں سے لے کر بی جے پی تک سرگرم عمل تھی وہیں پنڈت جواہر لعل نہرو‘راجیو گاندھی اور نرسمہاراؤ بھی اس سازش کا متحرک حصہ نہ سہی تو خاموش حصہ ضرور تھے۔

(مضمون میں پیش کردہ آرا مضمون نگارکے ذاتی خیالات پرمبنی ہیں،ادارۂ قندیل کاان سےاتفاق ضروری نہیں)

سپریم کورٹ نے امیش دیوگن کے خلاف درج مختلف ایف آئی آر کو کالعدم کرنے کی پٹیشن پر آج تفصیلی بحث کے بعد فیصلہ محفوظ کرلیا۔

میں نے پروسیڈنگ کا مشاہدہ کرنے اور پھر اس کو لفظ بہ لفظ پڑھنے کے بعد یہ اندازہ لگایا ہے کہ سپریم کورٹ کی خواہش ہے کہ نوئیڈا میں درج ایف آئی آر پر تفتیش ہو اور باقی تمام ایف آئی آر کو سیکشن 161 یا سیکشن 162 کے تحت بیانات میں تبدیل کردیا جائے اور شکایت کنندگان کو بطور گواہ تسلیم کرلیا جائے ۔

واضح رہے کہ تلنگانہ اور مہاراشٹر میں بھی امیش دیوگن کے خلاف ایف آئی آر کرائی گئی ہیں ۔آج تلنگانہ اور مہاراشٹر سرکار کے وکیلوں نے بھی بحث کی اور عدالت سے استدعا کی کہ ان کے صوبوں میں درج ایف آئی آر کو کالعدم نہ کیا جائے ۔۔۔ انہوں نے دلیل دی کہ ہر چند کہ مدعا علیہ (امیش دیوگن) ایک ہی شخص ہے اور ایک ہی موقع کے خلاف یہ تمام ایف آئی آر ہیں تاہم ان کے صوبوں (تلنگانہ اور مہاراشٹر) میں درج ایف آئی آر میں الزامات کی نوعیت مختلف ہے۔

یہاں یہ ذہن میں رکھنا ضروری ہے کہ سب سے پہلی ایف آئی آر راجستھان کے اجمیر میں ہوئی تھی۔ اس کے بعد کوٹا میں ہوئی۔پھر نوئیڈا میں ہوئی۔ امیش دیوگن کی کوشش ہے کہ اگر ساری ایف آئی آر کالعدم نہ ہوں اور کوئی ایک باقی رہے تو پھر نوئیڈا میں درج ایف آئی آر باقی رہے۔ کیوں کہ ایک تو اس کا دفتر نوئیڈا میں ہے اور دوسرے وہاں یوگی کی سرکار ہے جو امیش دیوگن کی حمایت کر رہی ہے۔

یہ بھی یاد رکھنا چاہئے کہ امیش دیوگن نے بھی خود کو دھمکی دینے والوں کے خلاف ایک مبہم سی ایف آئی آر کرا رکھی ہے۔ لیکن جب اس کے وکیل نے اس ایف آئی پر بات کرنی شروع کی تو راجستھان سرکار کے وکیل نے اسے یہ کہہ کر روک دیا کہ سپریم کورٹ میں آپ کی ایف آئی آر زیر بحث نہیں ہے۔

آج کی سماعت بڑی لمبی اور دلچسپ تھی۔تاہم زیادہ تر وقت خالص قانونی موشگافیاں ہوتی رہیں جو عوام کے لئے دلچسپی کا سامان نہیں رکھتیں ۔راجستھان سرکار چاہتی ہے کہ چونکہ اوریجنل ایف آئی آر اجمیر میں ہوئی تھی اس لئے ارنب گوسوامی کے کیس کی بنیاد پر اس کیس میں بھی اجمیر کی ایف آئی آر باقی رکھی جائے ۔امیش دیوگن کے وکیلوں کی کوشش ہے کہ اجمیر کی ایف آئی آر کالعدم کردی جائے ۔ راجستھان سرکار کے وکیل منیش سنگھوی اور اجمیر کے شکایت کنندہ کے وکیل سشیل کمار نے اچھی بحث کی۔

سب سے شاندار’ دلائل سے بھرپور اور متاثر کن بحث مہاراشٹر سرکار کے وکیل رضوان مرچنٹ نے کی۔ ان کے استدلال کا خلاصہ یہ تھا کہ ہر ایف آئی آر کی اپنی اہمیت ہے اور ہر شکایت کنندہ ایک الگ اکائی ہے لہذا کوئی ایف آئی آر کالعدم نہ کی جائے اور ہر ایف آئی آر پر تفتیش ہو۔ انہوں نے امیش دیوگن کی بدزبانی کی بھی کئی مثالیں دیں اور کہا کہ علاؤالدین خلجی موضوع بحث تھا لیکن امیش دیوگن نے ایک بار نہیں بلکہ تین بار خواجہ معین الدین چشتی کو لٹیرا کہا۔ انہوں نے بتایا کہ خلجی ہندوستان میں اس وقت آیا جب خواجہ چشتی اس دنیا سے کبھی کے رخصت ہوچکے تھے۔

بہر حال صحیح صورتحال تو فیصلہ آنے کے بعد ہی سامنے آسکے گی لیکن یہ بات واضح ہے کہ امیش دیوگن کے نٹ بولڈ کسے ضرور جائیں گے ۔

(مضمون میں پیش کردہ آرا مضمون نگارکے ذاتی خیالات پرمبنی ہیں،ادارۂ قندیل کاان سےاتفاق ضروری نہیں)

سدرشن ٹی وی کے معاملہ میں اب لگتا ہے کہ مرکزی حکومت سپریم کورٹ کے تیور کو دیکھ کر گھبرا گئی ہے۔ آج اس سلسلہ میں پانچویں سماعت تھی۔۔ ایک خاص منصوبہ کے تحت اس مقدمہ میں مداخلت کاروں (فریقوں) کی تعداد بھی بڑھتی جارہی ہے۔۔۔کافی مداخلت کاروں کو اجازت دیتے رہنے کے بعد آج سپریم کورٹ نے ایک اور فریق کی مداخلت کی درخواست پر ناگواری کا اظہار بھی کیا۔۔ ایشیا نیٹ ٹی وی کے بانی ششی کمار کی طرف سے کلی سوارم راج ایڈوکیٹ نے کہا کہ مجھے بھی Intervene کرنا ہے۔اس پر جسٹس چندر چوڑ نے کہا کہ کسی نہ کسی مرحلہ پر سماعت کو ختم ہونا ہے۔ ہر اچھی چیز کا ایک خاتمہ ہوتا ہے۔

آج کارروائی شروع ہوتے ہی مرکزی حکومت کے وکیل اور سالیسٹر جنرل تشار مہتا نے عدالت کو بتایا کہ حکومت نے سدرشن ٹی وی کو آج چار صفحات کا نوٹس جاری کیا ہے اور اس کا جواب 28 ستمبر کی شام پانچ بجے تک مانگا ہے۔اگر کوئی جواب موصول نہ ہوا تو یکطرفہ فیصلہ کردیا جائے گا۔یہ ایک تفصیلی شو کاز نوٹس ہے جس میں کہا گیا ہے کہ مرکزی حکومت کے مطابق پروگرام میں بیان کردہ حقائق بادی النظر میں پروگرام کوڈ کے مطابق نہیں ہیں۔۔ انہوں نے عدالت سے کہا کہ کیا یہ مناسب نہ ہوگا کہ عدالت 28 ستمبر تک کارروائی کو موخر کردے۔

اس پر جسٹس چند رچوڑ نے کہا کہ اگر ہم نے اُس وقت کیس کو نہ سنا ہوتا تو اب تک تو تمام ایپی سوڈ دکھائے جاچکے ہوتے۔۔ اس پر تشار مہتا نے کہا کہ میں سمجھتا ہوں کہ عدالت کی مداخلت آخری راستہ ہونا چاہئے۔۔ اس پر خاتون ایڈوکیٹ شاہ رخ عالم نے کہا کہ اگر کیس نہ سناجائے تو کیا ایک آئینی عدالت‘ عدالتی صوابدید کیلئے سیلابی راستہ کھول سکتی ہے۔۔ اس پر تشار مہتا نے کہا کہ میں نے عدالتی صوابدید کی بات کی ہی نہیں۔۔ جسٹس چند ر چوڑ نے کہا کہ ایڈوکیٹ شاہ رخ اپنے حلف نامہ پر بات کر رہی ہیں۔شاہ رخ نے کہا کہ حکومت مسلسل بے عملی اور صوابدید کے مطابق کارروائی کا مظاہرہ کرتی رہی ہے۔

بہر حال جسٹس چندر چوڑ نے کہا کہ میں اس سلسلہ میں اپنے ساتھی ججوں سے بات کرکے بتاتا ہوں۔کچھ وقفہ کے لئے بنچ کے مائک اور کیمرے خاموش کردئے گئے۔بنچ نے جب کارروائی شروع کی تو سابق سول سروینٹس کے گروپ کے وکیل انوپ جارج چودھری نے کہا کہ پٹیشنر کی حیثیت سے مجھے سماعت کو موخر کرنے پر کوئی اعتراض نہیں ہے۔ایڈوکیٹ گوتم بھاٹیا نے کہا کہ باوجود اس کے کہ اگر حکومت نے اس اشو کو حل کردیا تب بھی وسیع تناظر والے نکات تو قائم ہیں۔اس پر بنچ نے کہا کہ ہم یہ نہیں کہہ رہے ہیں کہ اگر حکومت نے کوئی فیصلہ لے لیا تومعاملہ ختم ہوجائے گا۔

جسٹس چندر چوڑ نے پوچھا کہ کیا مرکزی وزارت اطلاعات ونشریات کے سامنے پٹیشنر اپنا موقف رکھیں گے؟ اس پر تشار مہتا نے کہا کہ قانون اس کی اجازت نہیں دیتا۔ہم صرف سدرشن ٹی وی کو سنیں گے۔

اس پر جسٹس کے ایم جوزف نے قدرے شدت کے ساتھ کہا کہ اگر کوئی شکایت کی جائے تو آپ کو شکایت کنندہ کو سننا ہے۔ فطری انصاف کا اصول اس کا متقاضی ہے کہ آپ ان کو سنیں۔۔کیا پٹیشنر کی بات کو سننا غیر قانونی ہوگا؟ اس پر تشار مہتا نے کہا کہ اگر 10ہزار شکایتیں موصول ہوں تو ہم ان کو نہیں سن سکتے۔میں اس کو قبول کرنا نہیں چاہتا۔وزارت اطلاعات ونشریات کے فیصلہ لینے کے بعد آپ اس کا جائزہ لے سکتے ہیں۔

ایڈوکیٹ سنجے ہیگڑے نے ( حکومت کے وکیل سے) پوچھا کہ کیا آپ زکوۃ فاؤنڈیشن آف انڈیا کو سننا پسند کریں گے کیونکہ اس اشو کے محور میں ہمارا نام آرہا ہے۔اس پر تشار مہتا نے کہا کہ یہ فیصلہ کرنا حکومت کا کام ہے۔اس پر جسٹس چندر چوڑ نے کہا کہ کم سے کم پٹیشنرکو تو سنئے۔تشار مہتا نے کہا کہ مائی لارڈس ہم نہیں سن سکتے۔ایک بُری حقیقت نے عدالت کو متوجہ کیا لیکن اسے بُری نظیر نہیں بنایا جاسکتا۔جسٹس چندر چوڑ نے کہا کہ پٹیشنر وزارت اطلاعات ونشریات کے سامنے اپنا موقف رکھنا چاہتا ہے۔اس پر انوپ جارج چودھری نے کہا کہ ہم تو عدالت میں ہی استدلال کرنا چاہیں گے۔اور اگر حکومت کا فیصلہ ہمارے خلاف ہوا تو ہم اسے چیلنج بھی کریں گے۔

اس کے بعد جسٹس چندر چوڑ نے فیصلہ لکھوادیا۔انہوں نے کہا کہ چونکہ حکومت نے سدرشن ٹی وی کو نوٹس جاری کردیا ہے اور اس کا جواب 28 ستمبر تک مانگا ہے اس لئے سماعت موخر کی جارہی ہے۔نوٹس پر قانون کے مطابق عمل آوری ہونی چاہئے اور حکومت کے ذریعہ لئے گئے فیصلہ کی رپورٹ عدالت کے سامنے رکھی جانی چاہئے۔اگلی سماعت 5 اکتوبر کو ہوگی۔اور 15ستمبر کو پروگرام پر جو اسٹے دیا گیا تھا وہ جاری رہے گا۔

مدھو کشور کے وکیل روی شرما نے کہا کہ میری موکل کے ذریعہ سدرشن ٹی وی پر دئے گئے بیان کو نفرت آمیز بیان قرار دیا گیا ہے لہذا مجھے 15منٹ درکار ہیں۔اس پر جسٹس چندر چوڑ نے کہا کہ ہم مداخلت کاروں کو عدالت کے قیمتی 15منٹ نہیں دے سکتے۔آپ اپنی بات تحریری طورپر داخل کرا سکتے ہیں۔اس پر مدھو کشور کے وکیل نے کہا کہ ہمارے خلاف جو الزامات لگائے گئے ہیں مجھے ان کا جوب دینا ہے۔اس پر جسٹس چندر چوڑ نے توجہ نہ دیتے ہوئے اعلان کردیا کہ اب عدالت 5 اکتوبر کو دن میں دو بجے سماعت کرے گی۔

میرا تجزیہ:

جو حکومت سدرشن پر الزامات کے باوجود اور پروگرام کے ٹریلر میں شرانگیز منافرت کے باوجود اسے پروگرام دکھانے کی اجازت دے کر 28 اگست سے 21 ستمبر تک سپریم کورٹ میں اس کا دفاع کر رہی تھی آج پانچویں سماعت میں اسے اچانک کیا سوجھی کہ اس نے سدرشن کو بقول اس کے ایک سخت نوٹس جاری کردیا۔

میرا تجزیہ یہ ہے کہ حکومت ہر حال میں سدرشن کو بچانا چاہتی ہے اور اس کی آڑ میں ارنب گوسوامی اور امیش دیوگن جیسے زہریلے اینکروں اور ان کے چینلوں کی ناک میں ممکنہ طور پر نکیل ڈالے جانے پر پیشگی باندھ لگانا چاہتی ہے۔ عدالت اس وقت سدرشن کے علاوہ وسیع تر نکات سن رہی ہے اور تین میں سے دو سینئر جج اس معاملے میں سخت رویہ اختیار کئے ہوئے ہیں ۔۔۔ اسی لئے حکومت نے نوٹس کا ڈرامہ کیا ہے اور کوئی سخت فیصلہ لینے سے عدالت کو روکنے کی کوشش کی ہے۔

(واضح رہے کہ تیسری جج جسٹس اندو ملہوترا نے پانچ سماعتوں میں اب تک صرف ایک مرتبہ تبصرہ میں حصہ لیا ہے) اس پر بہر حال اس سے زیادہ نہ میں کوئی تبصرہ کروں گا اور نہ احباب کو کرنا چاہئے ۔

اب زکوٰۃ فاؤنڈیشن کا بدلا ہوا رویہ بھی ملاحظہ کیجئے۔ آج حکومت کے مذکورہ بالا اقدام پر اس نے ستائش کا پٹارا کھول کر رکھ دیا۔انگریزی میں ان کے وکیل نے ایک بیان جاری کرکے کہا ہے کہ زکوٰۃ فاؤنڈیشن آف انڈیا حکومت کے اس اقدام پر والہانہ شکریہ ادا کرتی ہے۔ حیرت ہے کہ زکوٰۃ فاؤنڈیشن کو دہلی ہائیکورٹ اور سپریم کورٹ میں حکومت کے اب تک کے رویہ اور پھر سدرشن کو اجازت دینے اور ابتدا کے چار ایپی سوڈ دکھادئے جانے کے بعد بھی حکومت پر اتنا پیار آرہا ہے کہ وہ ایک منصوبہ کے تحت چلی گئی ایک چال پر اس کا شکریہ ادا کرتے ہوئے زمین پر بچھے جارہے ہیں ۔۔ اسی منافقت نے ملت کو بے وقعت بناکر رکھ دیا ہے۔

(مضمون میں پیش کردہ آرا مضمون نگارکے ذاتی خیالات پرمبنی ہیں،ادارۂ قندیل کاان سےاتفاق ضروری نہیں)

ایم ودود ساجد

آج میڈیا اسٹار ورلڈ پر انتقامی سیاست کے عذاب پر بات کرنے کا موقع ملا، یہ انٹرویو کل نشر ہوگا، اس انٹرویو میں’ میں نے بتایا ہے کہ ہندوستان کی سیاسی تاریخ میں موجودہ دور انتقامی سیاست کا سب سے بدترین دور ہے۔

ہندوستان میں انتقامی سیاست کوئی نئی چیز نہیں ہے،لیکن جس بے شرمی اور کھلی غنڈہ گردی کے ساتھ 26 مئی 2014 کے بعد سے اس کا استعمال ہورہا ہے اور جس طرح آئینی اور حکومتی اداروں کو اس کے لئے استعمال کیا جارہا ہے وہ تاریخ میں پہلی بار دیکھنے کو مل رہا ہے۔

وزیراعظم نے ہندوستان کو علانیہ طور پر کانگریس سے پاک کرنے کا جو بیڑا اٹھایا تھا وہ اپوزیشن سے پاک ہندوستان کے عملی اقدامات تک پہنچ گیا ہے۔ اپوزیشن اس حد تک لاغر ونحیف ہے کہ اب خود اپنے دفاع سے بھی قاصر ہے۔اب بی جے پی اور آر ایس ایس ہندوستان کو ‘مسلمانوں سے پاک’ کرنا چاہتی ہیں؛ لیکن یونیورسٹیوں کے طلبہ نے احتجاج کی آندھی چلا کر بے دم اپوزيشن میں بھی کچھ حرکت پیدا کردی ہے۔حکومت بہر حال اس صورتحال سے کچھ خائف لگتی ہے۔

انتقامی سیاست کا سب سے خوفناک چہرہ یوپی کے وزیر اعلی کا ہے۔ انہوں نے مظاہرین سے بدلہ لینے کی جو دھمکی دی تھی یوپی پولیس اس پر پوری شدت اور خوفناکی کے ساتھ عمل کر رہی ہے۔ یوپی پولیس کا جو شرمناک چہرہ سامنے آیا ہے اس نے روح میں لرزہ پیدا کردیا ہے۔

مجھے حال ہی میں آندھرا پردیش کے شہر وجے واڑہ کے سفر کا موقع ملا۔ وہاں چندرا بابو نائیڈو کی پارٹی کو شکست دے کر وائی ایس جگن موہن ریڈی نے سرکار بنائی ہے۔ ان کی پارٹی YSR Congress کو 175 میں سے 151 سیٹیں ملی ہیں، لہذا اب جگن موہن ریڈی بھی بھیانک قسم کی انتقامی سیاست کے مرض میں مبتلا ہوگئے ہیں ـ

نئی ریاست تلنگانہ کی تشکیل کے بعد حیدر آباد تلنگانہ کی راجدھانی ہوگیا۔ لہذا آندھرا پردیش کی راجدھانی کے لئے نائیڈو حکومت نے 15 لاکھ کی آبادی والے شہر وجے واڑہ کو منتخب کیا۔ نئی مجوزہ راجدھانی کے مقام کو امراوتی کا نام دیا گیا۔کرشنا ندی کا بیراج امراوتی اور وجے واڑہ شہر کو ایک دوسرے سے جوڑتا ہے۔شدید گرمی مگر کم فضائی آلودگی اور پُرسکون ماحول کے لئے مشہور وجے واڑہ کے کسانوں سے راجدھانی کی تعمیر کے لئے زمینیں خرید لی گئیں ۔

لیکن جگن موہن ریڈی کی انتقامی سیاست نے وجے واڑہ کی تمام امیدوں پر پانی پھیر دیا۔ میں جس روز وہاں ایک پروگرام میں شریک تھا شہر کا چپہ چپہ پولیس اور پیرا ملٹری فورس کے تسلط میں تھا۔ ٹائمز آف انڈیا نے لکھا تھا کہ تمام اپوزیشن لیڈر گھروں میں نظر بند کردیے گئے ہیں اور سیکیورٹی کی وہی صورت ہے جو کشمیر میں دفعہ 370 کے خاتمہ سے پہلے ہوگئی تھی؛ کیوں کہ وزیراعلیٰ اپنی کابینہ کے ساتھ میٹنگ کر رہے تھے جس میں یہ فیصلہ ہونا تھا کہ نئی راجدھانی کہاں بنائی جائے ۔میرے ڈرائیور نے ایک روز پہلے ہی تاریخی کرشنا بیراج دکھاتے ہوئے بتایا تھا کہ چندرابابو نائیڈو نے بیراج کے ستونوں پر جو خوبصورت قمقمے لگوائے تھے جگن ریڈی نے انہیں ہٹوادیا ہے۔یہ قمقمے ہزاروں خاندانوں کے کسب معاش کا ذریعہ بن گئے تھے اور سیاح دور دور سے انہیں دیکھنے آتے تھے۔ اب جگن ریڈی ہر اس نشانی کو مٹانا چاہتے ہیں جو نائیڈو نے قائم کی تھی۔

آپ جگن ریڈی کی انتقامی ذہنیت کا کرشمہ دیکھئے کہ یہ کہہ کر وجے واڑہ کی مجوزہ راجدھانی کی حیثیت کو ختم کردیا گیا کہ چندرا بابو نائیڈو اور ان کے لیڈروں نے ڈیڑھ لاکھ کروڑ کی بے نامی زمینیں خرید رکھی ہیں ۔ اب اپوزیشن کے ساتھ ساتھ وہ کسان بھی حکومت کے خلاف سراپا احتجاج بنے ہوئے ہیں جن سے راجدھانی کی تعمیر کے لئے حکومت نے زمینیں خرید لی تھیں ۔

اب آئیے دیکھتے ہیں کہ جگن ریڈی کی کابینہ نے کیا احمقانہ فیصلہ کیا ہے :

1- اسمبلی کی عمارت وجے واڑہ میں تعمیر ہوگی۔

2- سیکریٹریٹ یعنی وزراتوں کے دفاتر وشاکھا پٹنم میں تعمیر ہوں گے۔

3- اور ریاست کی ہائی کورٹ کرنول میں قائم ہوگی۔

وشاکھا پٹنم’ وجے واڑہ سے 347 کلو میٹر دور ہےـ

کرنول’ وجے واڑہ سے 344 کلو میٹر دور ہے،جبکہ وشاکھا پٹنم’ کرنول سے 691 کلو میٹر دور ہے۔

یعنی اسمبلی’ سیکریٹریٹ اور ہائی کورٹ جیسے ایک دوسرے سے منسلک ادارے اب ایک دوسرے سے دور تین مختلف شہروں میں ہوں گے۔ یہاں کے عام لوگوں’ وکیلوں’ موکلوں’ متاثرہ لوگوں’ سیاستدانوں اور دوسرے طبقات کو جن مسائل کا سامنا کرنا پڑے گا ان کا بس تصور ہی کیا جاسکتا ہے۔ یہ انتقامی سیاست کا کتنا کریہہ چہرہ ہے!

انتقامی سیاست کا یہ جذبہ اس وقت پیدا ہوتا ہے جب ووٹر کسی ایک پارٹی کو سادہ اکثریت سے بھی زیادہ اکثریت دیدیتے ہیں ۔ اس وقت پورا ملک پریشان ہے۔ وہ ہندو طبقات بھی پریشان ہیں جنہوں نے بی جے پی کو عدیم المثال اکثریت سے دوسری بار حکومت سونپ دی تھی۔ ایسے میں مسلمانوں کی ذمہ داری بڑھ جاتی ہے۔ وہ اپنے قول وعمل میں اس کا خیال رکھیں کہ جو ہندو حکومت سے ناراض ہوگئے ہیں وہ ہماری کسی بے احتیاطی کے سبب پھر منحرف نہ ہوجائیں ۔