اردو شاعری

رابطہ:9219782014

ہم جس عالمِ فانی میں سانس لے رہے ہیں اس کا خاصہ یہ ہے کہ یہاں اکثر ایسے ایسے واقعات و حالات رونما ہو جاتے ہیں جن کا تصور بھی نہیں ہوتا یا یہاں کبھی کبھی ایسا بھی ہوتا ہے کہ جس پر کچھ دیر کے لیے یقین کرنا مشکل ہوتا ہے۔ایسا ہی میرے ساتھ ۱۶ ستمبر ۲۰۲۰ء کی شب تقریباً ۱۰بجے کے قریب ہوا۔ میں فیس بک پر آن لائن تھا کہ اچانک ڈاکٹر تنویر گوہرؔمظفر نگری کی پوسٹ پڑھی کہ طنز و مزاح کے شاعر نشترؔ امروہوی کا انتقال ہوگیا ۔کچھ دیر کے لیے مجھے یقین نہ آسکا لیکن پھر سوچا کہ ڈاکٹر تنویر گوہرؔ غیر ذمے دارانہ اور غلط پوسٹ نہیں کر سکتے دل پھر بھی نہ مانا تو فوراً ڈاکٹر رضیؔ امروہوی کو فون لگا دیا ،چونکہ نشترؔامروہوی ان کے بہنوئی تھے۔ڈاکٹر رضیؔ امرہوی کے افسردہ لہجے نے میرے سوال سے پہلے ہی ثابت کر دیا کہ یہ خبرغم صحیح ہے پھر بھی میں نے ان سے سوال کیا’’خیریت؟‘‘تو انھوں نے کہا’’نہیں!!خیریت نہیں ہے‘‘۔وہ ایک لمحے خموش رہنے کے بعد بولے سید ین کا انتقال ہوگیا ہے۔میں نے وجہ پوچھی تو کہا کہ مجھے بھی ٹھیک نہیں معلوم اور اس کے بعدفون پر رابطہ ختم ہوگیا۔اب میرے سامنے ایک ہنستا مسکراتا سانولے رنگ کا گول چہرہ تھا۔وہ چہرہ سیدین عرف نشترؔ امروہوی کا تھا۔مجھے یاد آیا کہ ان سے میری پہلی ملاقات ۲۰۰۸ء میں علی گڑھ کی ایک ادبی نشست میں مرحوم عبدا لحکیم جالبؔ سیفی کے یہاں سراے رحمان میں ہوئی تھی۔جب میں شعرا کی فہرست بنا رہا تھا چونکہ نظامت مجھے ہی کرنی تھی۔اچانک ڈاکٹر مجیب شہزرکے ساتھ دو افراد نشست گاہ میں داخل ہوئے دونوں سوٹ بوٹ میں بہترین انداز میں، قیافے سے ہی ظاہر ہورہا تھا کہ دونوں ادیب یا شاعر ہیں۔ڈاکٹر مجیب شہزرؔ نے دونوں کا تعارف پیش کیا۔یہ ڈاکٹر رضیؔ امروہوی صاحب ہیں اور یہ نشترؔ امروہوی صاحب۔میں نے انھیں سلام کیااور ان کا استقبال کرتے ہوئے نشست گاہ میں ان سے بیٹھنے کی گذارش کی، نشست شروع ہوئی ایک کے بعد ایک شاعراپنی تخلیقات پیش کرتے رہے۔میرے ذہن میں اس وقت تک یہ واضح نہیں تھا کہ یہ دونوں افراد سنجیدہ شاعر ہیں یا طنز و مزاح کے لیکن جب نشترؔ امروہوی صاحب نے کلام پیش کیا تو مجھے دلاور فگار اور اکبر الہ آبادی کا کلام یاد آنے لگا ،مجھے لگا کہ ساغرؔ خیامی کے بعد طنز و مزاح کے حوالے سے معیاری کلام نشترؔ امروہوی صاحب سے سننے کو مل رہا ہے۔نشست میں نشترؔ صاحب کو خوب داد ملی اور ان کے بعض اشعار کو کئی مرتبہ سنا گیا۔مجھے اس دوران یہ تو نہ معلوم تھا کہ مرحوم کا مکتبِ فکر کیا ہے لیکن طنز و مزاح کے کلام سے بھی اندازہ ہو رہا تھا کہ موصوف محبِ رسولؐ اور عاشقِ آلِ رسولؐ ہیں۔ان سے اس نشست کے بعد بھی ملاقاتوں کا سلسلہ جاری رہا کیونکہ اس نشست کے بعد ڈاکٹر رضیؔ امروہوی سے مراسم کا سلسلہ برقرار ہوگیا تھا چونکہ وہ ان کے بہنوئی تھے تو جب وہ علی گڑھ آتے تو ڈاکٹر رضیؔ امروہوی کے توسل سے ان سے ملاقاتیں ہوتی رہتیں۔مرحوم خود میرے غریب خانے پر کئی بار تشریف لائے۔والد صاحب سید ہلال حسین نقوی صاحب سے ان کی تادیر گفتگو رہتی۔والد صاحب ان سے کلام کی فرمائش کرتے تھے وہ بلا کسی تردد کے کلام پیش کرتے اور پورے ماحول کو قہقہہ زاربنا دیتے۔اس کے علاوہ ان کے ساتھ کئی مشاعرے اور محفلیں پڑھنے کا بھی موقع ملتا رہا۔وہ جس محفل یا مشاعرے میں پہنچتے سامعین کو داد دینے پر مجبور کر دیتے۔ایسا ہی ایک واقعہ مجھے یاد آرہا ہے ۔۲۰۱۰ء ابنِ سینا اکیڈمی علی گڑھ کے ہال میں ایک مشاعرہ منعقد کیا گیا جس کی صدارت معروف ناول نگار پدم شری پروفیسر قاضی عبدالستار کر رہے تھے۔ان کی تنک مزاجی اور ادبی موقف سے ساری ادبی دنیا واقف ہے ۔وہ شاعری کو ثانوی درجہ دیتے تھے اور نثر کو اولیت دیتے تھے اور ایک طرح سے شاعری سے متنفر نظر آتے تھے۔میرے ایک استاد کے مطابق جب وہ شعبۂ اردو اے ایم یو علی گڑھ میں صدرِ شعبہ تھے تو شعبے کی جانب سے مشاعرے کا انعقاد کیا گیا تھا جس میں اس زمانے کے بڑے بڑے شعرا شرکت کر رہے تھے لیکن قاضی صاحب پروگرام میں نہ جا کر اپنے کمرے میں بیٹھے تھے ۔جب ایک بڑے شاعر کے کلام سنانے کی باری آئی توکسی صاحب نے ان سے کہا کہ اس وقت مشاعرے میں تشریف لے چلیں فلاں شاعر کلام پیش کر رہے ہیں تو انھوں نے برجستہ کہا’’میرے کان کوئی اگالدان ہیں کہ جو چاہے گا تھوک دے گا‘‘۔اس جملے سے قاضی صاحب کاشاعری کے بارے میں خیال واضح ہو جاتا ہے، لیکن میں نے خود دیکھا کہ انھوں نے نشترؔ امروہوی کو بغور سنا اور آخر میں خطبۂ صدارت میں ان کی تعریف کرتے ہوئے کہا کہ میری نگاہ میں طنز و مزاح کے حوالے سے دلاور فگار کے بعد جو شاعر متاثر کرنے کا فن جانتا ہے وہ نشترؔ امروہی ہے۔یہ سننا تھا کہ سارا ہال تالیوں کی گونج میں ڈوب گیا۔
نشترؔ امروہوی کے مزاج کی بات کی جائے تو یہ کہنے میں کوئی عار نہیں ہے کہ وہ نہایت خوش اخلاق،خوش مزاج اور متوازن قسم کے بذلہ سنج تھے۔وہ نہایت مشہور ہونے کے باوجود انا پرستی و تکبر سے دور تھے، جس سے ملتے تھے اس کو اپنا گرویدہ کر لیتے تھے۔وہ دوسروں کی بہت عزت کرتے تھے ،چاہے وہ کسی عمر یا کسی سن کا فرد ہو۔وہ اکثر فون پر لوگوں کی خیریت معلوم کرتے رہتے تھے۔مہمان نوازی میں بھی کوئی کسرنہ چھوڑتے تھے اس کا اندازہ مجھے اس وقت ہوا جب میں ایک مرتبہ ان کے یہاں دلشاد گارڈن دہلی میں گیا ،انھوں نے بہترین ضیافت کی ۔
ان کی شاعری ان کی شخصیت کا بھرپور اور مکمل آئینہ تھی۔جس طرح وہ سادہ لوح اور سادہ مزاج تھے اسی طرح ان کی شاعری میں سادگی و سلاست کا انداز پایا جاتا ہے خاص بات یہ ہے کہ انھیں آسان زبان میں نہایت گہری بات کہنے کا ہنر آتا تھا۔وہ بغض و کینہ اور فساد سے دور رہتے تھے۔اس بات کو انھوں نے ایک منقبتی کلام میں اس طرح کہا تھا:
نہ ہم ہیں اہلِ سیاست نہ ہم فسادی ہیں
حسینؑ والے ہیں ہم لوگ اتحادی ہیں
انھیں صرف طنز و مزاح پر ہی دسترس حاصل نہیں تھی بلکہ نعت و منقبت میں بھی ان کا ایک منفردانداز تھا۔رسولؐ اور آلِ رسولؐ کے وہ سچے عاشق تھے۔یہی وجہ ہے کہ وہ نعت میں بھی آلِ رسولؐ کے لیے کم از کم ایک شعر ضرور کہتے تھے۔مثلاً:
کہاں انسان سے ہو پائے گی مدحت محمدؐ کی
زباں کر ہی نہیں سکتی بیاں عظمت محمدؐ کی

عظیم المرتبت شبیرؑ کا وہ سجدۂ آخر
بڑھائی کربلا میں آپ نے عظمت محمدؐ کی
ان کی طنز و مزاح کی شاعری کا تجزیہ کریں تو ان کے مجموعۂ کلام ’’پوسٹ مارٹم‘‘کے مطالعے کی روشنی میں یہ کہا جا سکتا ہے کہ ان کے طنز میں نشتریت ضرور ہے لیکن یہ نشتریت اپنے ساتھ مرہم بھی لیے ہوئے ہے ،وہ کسی کی دل آزاری نہیں کرتے بلکہ اگر کہیں کوئی ایسا مرحلہ دیکھتے ہیںجو ناگوارِ خاطر ہو یا اگر کسی کی اصلاح مقصود ہو تو وہ نہایت خوش مزاجی کے ساتھ اس کا ذکر کرتے ہیں ،سمجھنے والے سمجھ جاتے ہیں کہ ان کا مقصد کیا ہے ،وہ کیا کہنا چاہتے ہیں اور کسی کو گراں بھی نہیں گذرتا۔ان کے یہاں طنز و مزاح دو الگ الگ شئے نہیں بلکہ طنز و مزاح ایک ہی سکے کے دو پہلو نظر آتے ہیں ۔وہ طنز و مزاح کو اس انداز میں شیر و شکر کر دیتے ہیں کہ وہ جن تک پہنچتے ہیں ان کے شعور کے لیے ایک دعوتِ فکر ہوتی ہے۔وہ طنز و مزاح کے نام پر پھکّڑ پن یا فحاشی نہیں پروستے ،وہ اپنے ہاتھ سے کبھی ادبی تقاضوں کو جانے نہیں دیتے۔انھوں نے سماج و کائنات میں جو زہر دیکھا اسے آبِ حیات سمجھ کر پیا اور قارئین کے سامنے اس کی ایسی صورت پیش کی جس سے ان کے ذہنی افق کو روشنی فراہم ہوسکے۔انھوں نے ادب کی مختلف اصناف میں طنز و مزاح کی شاعری کی ،ان کی بہت سی نظمیں نہایت مشہور ہوئیں۔مثلاً۔شکوہ اورجوابِ شکوہ۔ان دونوں نظموں میں انھوں نے علامہ اقبالؔ کی شاعری کے نقوش پر طنز و مزاح کے چراغ روشن کئے ہیں۔جو آسان کام نہیں،کیونکہ اقبالؔ کو سمجھنے کے ساتھ ساتھ ان کے پیغام سے استفادہ کرتے ہوئے نئی راہ وہ بھی طنز و مزاح کی دنیا میں نکالنا آسان نہیں ہے۔ان کی ایک نظم ’دعوتِ ولیمہ‘ بھی بہترین نظموں میں شمار کی جا سکتی ہے، جس میں انھوں نے اکثر ہونے والی ولیمے کی دعوتوں کا حال نہایت خوش اسلوبی سے بیان کیا ہے، ان کی یہ نظم ان کے مشاہدے اور بلندیِ فکر کی بہترین مثال ہے۔مثال کے لیے ایک بند ملاحظہ فرمائیں:
آئے کباب سیخ تو ہتھیا گیا کوئی
پلّے پڑا نہ کچھ بھی تو جھلّا گیا کوئی
چٹنی سمجھ کے سونٹھ وہاں کھا گیا کوئی
اور رائتے کو کھیر میں اوندھا گیا کوئی
اس ہڑبڑی میں ہوگئی کچھ ایسی گڑبڑی
پوری پلیٹ کھیر کی دولہا پہ جا پڑی
اسی طرح ان کی کئی نظمیں ایسی ہیں جن میں انھوں نے روزانہ کے حالات و معمولات اور زندگی کی متعدد پریشانیوں کا ذکر کیا ہے۔لیکن یہ مسائل قاری کے ذہن کو الجھاتے نہیں بلکہ اسے دشواریوں سے نکلنے کا حوصلہ عطا کرتے ہیں۔
انھوں نے نہ صرف مسدس بلکہ غزل کی فارم میں بھی مزاحیہ شاعری سے لوگوں کو متاثر کیا ۔مثلاً:
آج کل نفع کے نقصان کی ایسی تیسی
آپ کے مان کی سمان کی ایسی تیسی
کوئی بھی کام ہو رشوت کے بنا ناممکن
آپ کی جان کی پہچان کی ایسی تیسی
ایک بیٹی کے سوا کچھ نہ دیا سسرے نے
یہ ہے سامان تو سامان کی ایسی تیسی
گامزن ہم ہیں کرپشن میں ترقی کی طرف
چین کی روس کی جاپان کی ایسی تیسی
پندر ہ سو کی جگہ دو سو روپے پکڑا دو
پھر جو کٹ جائے تو چالان کی ایسی تیسی
گڑبڑا دے جو مہینے کا بجٹ دو دن میں
ایسے آجائے تو مہمان کی ایسی تیسی
اپنے لیڈر جو اتر آئیں ادا کاری پر
شاہ رخ خان کی سلمان کی ایسی تیسی
شعر بے بحر پڑھو شاعرِ اعظم بن جائو
سارے اوزان کی ارکان کی ایسی تیسی
چند سکوں کے عوض بیچ دیا جس نے وطن
ایسے ہندو کی مسلمان کی ایسی تیسی
جو بھی نشترؔ تری اس نظم میں ڈھونڈے کیڑے
ایسے ہر صاحبِ دیوان کی ایسی تیسی
مذکورہ اشعار سے نشترؔ امروہوی کا اسلوب اور فن آشکار ہے۔ان کے یہاں زمانے کا درد،وطن کی محبت،سماج کے بدلتے ہوئے اقدار کا نوحہ مزاح کے لباس میں خوبصورتی بکھیرتا ہوا نظر آتا ہے۔کیا خبر تھی کہ وہ اچانک اتنی جلدی اس دنیا فانی سے حقیقی دنیا کی طرف چلے جائیں گے اور اپنے قارئین کو ہنساتے ہناتے رلا جائیں گے:
آسماں تیری لحد پر شبنم افشانی کرے

ریسرچ اسکالر
رانچی یونیورسٹی ،رانچی

ای میل[email protected]
اردو کی ادبی تاریخ میں نعتیہ شاعری ایک مستقل صنف کی حیثیت سے بے حد مقبول ، شیریں اور دل نشیں صنف بن گئی ہے۔ ابتدا سے عہدِحاضر تک اردو میں نعت نگاری کا سرمایہ موجود ہے ۔ اس کا بھر پور محاسبہ کرنے کے بعد اس حقیقت کا اعتراف کرنا پڑتا ہے کہ اردو میں بہ مشکل کوئی ایسا شاعر ملے گا جس نے ایک بھی نعتیہ شعر نہ کہا ہو ۔
نعت گوئی سے مراد وہ شاعری ہے جس میں خالصتاً حضور اکرم صلی اللہ علیہ وسلم کی مدح کی جائے۔ اوصاف حمیدہ اور محاسنِ پاک بیان کئے جائیں۔ اس کے لیے ضروری ہے کہ ممدوح سے بے پناہ عقیدت ہو اور جب تک یہ پُرخلوص عقیدت اپنی تجلّی نہیں دکھاتی اور نعت گوئی میں خون جگر کے ساتھ عقیدت و محبت کی آمیزش نہیں ہو تی، نعت بے جان ہوجاتی ہے ۔ اس صنف میں جادو اعجازِ محبت سے جاگتا ہے جس کا تقاضا یہ ہے کہ جتنی مستی اور سرشاری کی کیفیت اُبھرے گی اتنا ہی کلام میں سوز، نکھار ، دل آویزی ، دل نشینی اور طرحداری پیدا ہوتی ہے ۔ ہیئتی اعتبار سے نعت گوئی کی شاعری کو غزل ، قصیدہ ، مثنوی، رباعی، قطعہ ، مربع، مخمس، مسدس، ترجیع بند، ترکیب بند ، مستزا وحتٰی کہ آزاد و معرّا کے پیکروں میں نظم کی جاسکتی ہے ۔
اردو کی نعتیہ شاعری میں ایک اہم اور نمایاں نام ڈاکٹر راحت اندوری کا ہے ۔ راحت اندوری کئی دہائیوں تک اردو مشاعرے کا سرتاج رہیں۔ مشاعرے کے سامعین نے انہیں تالیوں سے اُچھلایا اور واہ واہ سے بلند کیا۔
اپنی شاعری کے ضربِ کلامی سے راحت نے فسطائی طاقتوں کی سازشوں اور ناپاک منصوبوں کے بُت کو لہولہان کردیا۔ مجھے راحت کی نعتیہ شاعری پر اظہارِ خیال کرنا مقصود ہے -ان کی نعتیہ شاعری کا اختصاص یہ ہے کہ ان کے یہاں حضور اکرم ﷺ سے عقیدت و محبت کی خوشبو آتی ہے ۔ حضور اکرم ؐ کے فضائل و محامد کو اس عقیدت اور فنکا رانہ ہنرمندی سے راحت نے پیش کیا ہے ، یہ ان کے جذبے کی آئینہ دار ہے ۔
اپنی باتوں کی تائید میں چند اشعار پیش کرنا چاہوں گی ؎
امینِ حرف و صدا بھی یہیں کہیں ہوگا
شفیع روزِ جزا بھی یہیں کہیں ہوگا
یہ عاشقانِ رسولِ خدا کی محفل ہے
مجھے یقیں ہے خدا بھی یہیں کہیں ہوگا

تمام ذرے ستارہ صفت نہ ہوجائیں
یہ رہ گزر ہے یہی کہکشاں نہ ہوجاتی
اگر حضورؐ کا سایہ زمیں پہ پڑجاتا
تو یہ تمام زمیں آسماں نہ ہوجاتی
اندازہ لگایاجاسکتا ہے کہ حُبِّ رسول ہی راحت کی زندگی کا ماحصل ہے اور احساسات و جذبات کااصل مرکز ومحور ہے ۔
یہ تمام اشعار دل کی گہرائیوں سے اُبھرتے ہیں۔ الفاظ سادہ اور شفاف ہوتے ہوئے بھی شاعرانہ لطافت سے خالی نہیں ہیں۔ اشعار میں آنحضرت ﷺ سے والہانہ شیفتگی کی صاف اور روشن تصویر نظر آتی ہے ۔ اس سلسلے میں چند اشعار ملاحظہ ہوں جو سنجیدہ اور متین ہیں۔ ساتھ ہی جوش و عقیدت کے نور سے معمور بھی:
بند آنکھیں ہیں چارسو ہیں آپ
اس اُجالے کی آبرو ہیں آپ
نعت پڑھتا ہوں اور لرزتا ہوں
ایسا لگتا ہے روبرو ہیں آپ
راحت اندوری کا ایک نعتیہ قطعہ جو غیر معمولی حبِ رسول کا غماز ہے :
زم زم و کوثر و تسنیم نہیں لکھ سکتا
اے نبی، آپ کی تعظیم نہیں لکھ سکتا
میں اگر سات سمندر بھی نچوڑوں راحت
آپ کے نام کی اک میم نہیں لکھ سکتا
یہ اشعار شاعر کے جذبات دروں کے آئینہ دار ہیں۔ خیال میں پاکیزگی اور تقدّس ہے اور جذبات میں گہرائی وگیرائی بھی۔
راحت اندوری کا نعتیہ کلام پڑھنے سے قارئین کے دلوں میں ایمان و آگہی کے نور کا چشمہ اُبل پڑتا ہے اور روحانی کیف و سرور حاصل ہوتا ہے۔ عقیدت کے اس والہانہ پن میں بھی ادب و احترام کا خاص خیال رکھا گیا ہے۔ ایسے اشعار پڑھ کر محبّان نبی پر وجد کی کیفیت طاری ہوجاتی ہے۔ دیکھیں یہ اشعار:
کچھ دن سےمرے سوچ کی گہرائی بڑھ گئی
کچھ دن سے مرے فکر کی اونچائی بڑھ گئی
نعلین جب سے آپ کو دیکھے ہیں خواب میں
محسوس ہورہا ہے کہ بینائی بڑھ گئی
اشعار میں جذبات کی سچائی ہے خیالات کی صفائی کو نہایت ہی حسن و خوبی سے برتا گیا ہے اور تمام اشعار اتنے دیدۂ زیب اور جاذب نظر ہیں کہ قاری کی نگاہ جم کررہ جائے ۔ یہ اشعار راحت اندوری کی جدّت طرازی اور قوت ایجاد کے بہترین مظہر ہیں۔ انہوں نے جو کچھ کہا ہے پورے خلوص ، عقیدت اورصداقت سے کہا ہے ۔ یہ اشعار اتنے رواں ہیں کہ پڑھنے والے کے دل کو مسرت اور دماغ کو تازگی نصیب ہو تی ہے ۔ راحت اندوری سچّے عاشق رسول ہیں ، عشقِ رسول راحت کا عقیدہ محکم اور ایمان و ایقان ہے۔
ان کی دلی تمنّا ہے کہ جہاں تک ممکن ہو گنبدِ خضریٰ کی زیارت جلد سے جلد کی جائے ۔ اس کے لیے وہ بیتاب نظر آتے ہیں ۔ اُنہیں چین نہیں ملتا۔ ایسے اشعار عام فہم بھی ہیں لیکن سوز و گداز قلب اور عاشقانہ جذبات سے مملو بھی۔ حُبِّ نبی میں سرشار دیارِ حرم کی خاک کا پیوند بننے کی آرزو لے کر مچلتے ہیں۔
نمونۂ کلام کے چند اشعار یہ ہیں :
میں ہندوستان میں ہوں اور مدینہ پاس رہتا ہے
انگوٹھی دور رہتی ہے نگینہ پاس رہتا ہے
لگارکھی ہے لو سرکار کے دربار سے میں نے
اسی دربار سے جنت کا زینہ پاس رہتا ہے
کہیں اب کے برس بھی رہ نہ جائوں زیارت سے
بہت روتا ہوں جب حج کا مہینہ پاس رہتا ہے
نہ جانے کون سی دنیا میں رہتا ہوں وہاں جاکر
نہ مرنا پاس رہتا ہے نہ جینا پاس رہتا ہے
مجھے یہ کہنے میں ذرا بھی تامل نہیں کہ راحت اندوری نے اپنی نعتیہ شاعری کے توسط سے اپنی عقیدت و محبت کا انمول تحفہ جس قدر خلوص و محبت، عاجز و انکساری کے ساتھ پیش کیا ہے وہ اثر آفرینی کے حسن سے مملو ہے-
اس میں شاعر کے شکستہ دل کی فریاد بھی شامل ہے اور ہر شعر بارگاہِ نبوی میں خراجِ عقیدت پیش کرنے کے لیے بیتاب ہے ۔ مجھے کہنے دیجئے کہ راحت اندوری کی نعتیہ شاعری کے مطالعے سے قارئین کے دلوں میں ایمان و آگہی کے نور کا چشمہ اُبل پڑتا ہے اور روحانی کیف و سرور حاصل ہوتاہے۔ بلاشبہ راحت اندوری فنِّ نعت نگاری میں یدِ طولیٰ رکھتے ہیں یہی وجہ ہے کہ اُن کا نعتیہ کلام خلوص و محبت کے جذبے سے سرشار ، عشق و یقین کی خوشبو سے معطر اور تسلیم و رضا کے رنگ میں رنگا ہوا ہے ۔

راحت اندوری جیسے عظیم شاعر  جس کے قلم کی ایک جنبش ارباب اقتدار میں ہلچل پیدا کردیتی تھی، جس کا ایک مصرع افسردہ دلوں کے تسکین کا ساماں ہوا کرتا تھا، جس کا منفرد لہجہ جرات اظہار کا نمونہ  ہوتا تھا، جس کے کلام میں شائستگی اور شگفتگی ایسی کہ بے قرار دل کو قرار آجائے، ایسے سخنور کے لیے کچھ لکھنا یا بولنا سورج کو چراغ دکھانے کے مصداق ہوگا۔ مگر چوں کہ بڑے لوگوں کو خراج تحسین پیش کرنے کی روایت ہے، سو میں بھی اسی سلسلے کی ایک کڑی بننے کے لیے چند بے ربط جملے لکھ کر اس عظیم شاعر کے تئیں اپنی محبت کا نذرانہ پیش کرنے کی کوشش کر رہا ہوں۔

راحت کی شاعری نئی نسل کے لیے مشعل راہ تھی، راحت اندوری کو درجنوں مرتبہ اسٹیج پر سننے موقع ملا ،وہ غضب کے شاعر تھے ، سمندر کو کوزے میں بند کرنے کا ہنر جانتا تھا، بات چاہے کتنی تلخ ہو، وہ خوش اسلوبی سے ادا کرنے پر مکمل قدرت رکھتے تھے۔

راحت کا یہ شعر :

میں پربتوں سے لڑتا رہا اور چند لوگ

گیلی زمین کھود کر فرہاد ہو گئے

میرے ذہن میں تبھی سے پیوست ہے جب میں نے کئی سال قبل اسے پہلی بار انہی کی زبانی سنا تھا۔

زندگی کے نشیب و فراز اور تنگی و ترشی کے باوجود کبھی ان کے پائے استقامت میں لرزش نہیں آئی؛ بلکہ ہر موڑپر جرات کا مظاہرہ کیا ۔ حق گوئی اور بے باکی ان کے فن میں کوٹ کوٹ کر بھری تھی – ایمرجینسی جیسے  سخت اور مشکل ترین دور میں بھی راحت نے راحت کی سانس نہیں لی ؛بلکہ ارباب اقتدار سے آنکھوں میں آنکھ ڈال کر بات کی۔  ملک میں رونما ہونے والے حادثات سے وہ کبھی دل براداشتہ نہ ہوتے؛ بلکہ پہلے سے اور زیادہ قوت وجرات کا اظہار کرتے:

سبھی کا خونہ ہے  شامل یہاں کی مٹی میں

کسی کے باپ کا ہندوستان تھوڑی ہے

اس طرح کی بے شمار شاعری راحت کے خزانے میں ملے گی۔

راحت ایک ایسے انقلابی شاعر تھے جن کی شاعری آنے والی نسلوں میں اعتماد پیدا کرے گی۔  راحت نے اردو غزل کو وقار عطا کیا ،انہوں نے اردو شاعر ی کو نئی سمت دی۔

ذیل میں اپنی یاد داشت سے ان کے چند اشعارپیش ہیں، جو راحت مرحوم کی تخلیقی صلاحیتوں کی جیتی جاگتی مثال ہیں:

آنکھ میں پانی رکھو ہونٹوں پہ چنگاری رکھو

زندہ رہنا ہے تو ترکیبیں بہت ساری رکھو

 

اب تو ہر ہاتھ کا پتھر ہمیں پہچانتا ہے

عمر گزری ہے ترے شہر میں آتے جاتے

 

اس کی یاد آئی ہے سانسو ذرا آہستہ چلو

دھڑکنوں سے بھی عبادت میں خلل پڑتا ہے

 

بہت غرور ہے دریا کو اپنے ہونے پر

جو میری پیاس سے الجھے تو دھجیاں اڑ جائیں

 

بیمار کو مرض کی دوا دینی چاہئے

میں پینا چاہتا ہوں پلا دینی چاہئے

 

خیال تھا کہ یہ پتھراؤ روک دیں چل کر

جو ہوش آیا تو دیکھا لہو لہو ہم تھے

 

دوستی جب کسی سے کی جائے

دشمنوں کی بھی رائے لی جائے

 

روز پتھر کی حمایت میں غزل لکھتے ہیں

روز شیشوں سے کوئی کام نکل پڑتا ہے

 

شاخوں سے ٹوٹ جائیں وہ پتے نہیں ہیں ہم

آندھی سے کوئی کہہ دے کہ اوقات میں رہے

 

گھر کے باہر ڈھونڈھتا رہتا ہوں دنیا

گھر کے اندر دنیا داری رہتی ہے

 

مری خواہش ہے کہ آنگن میں نہ دیوار اٹھے

مرے بھائی مرے حصے کی زمیں تو رکھ لے

 

مزہ چکھا کے ہی مانا ہوں میں بھی دنیا کو

سمجھ رہی تھی کہ ایسے ہی چھوڑ دوں گا اسے

 

میں آ کر دشمنوں میں بس گیا ہوں

یہاں ہمدرد ہیں دو چار میرے

 

میں آخر کون سا موسم تمہارے نام کر دیتا

یہاں ہر ایک موسم کو گزر جانے کی جلدی تھی

 

میں نے اپنی خشک آنکھوں سے لہو چھلکا دیا

اک سمندر کہہ رہا تھا مجھ کو پانی چاہئے

نہ ہم سفر نہ کسی ہم نشیں سے نکلے گا

ہمارے پاؤں کا کانٹا ہمیں سے نکلے گا

 

وہ چاہتا تھا کہ کاسہ خرید لے میرا

میں اس کے تاج کی قیمت لگا کے لوٹ آیا

 

کالج کے سب بچے چپ ہیں کاغذ کی اک ناؤ لیے

چاروں طرف دریا کی صورت پھیلی ہوئی بیکاری ہے

 

ہم سے پہلے بھی مسافر کئی گزرے ہوں گے

کم سے کم راہ کے پتھر تو ہٹاتے جاتے

 

یہ ضروری ہے کہ آنکھوں کا بھرم قائم رہے

نیند رکھو یا نہ رکھو خواب معیاری رکھو

یہ ہوائیں اڑ نہ جائیں لے کے کاغذ کا بدن

دوستو مجھ پر کوئی پتھر ذرا بھاری رکھو

وہ مشاعروں میں قہقہہ لگاتے ہوئے حکومت کو چیلنج کرتا تھاـ اس کا قہقہہ مشہور تھا،سیاہ چہرے پر طنز کی بجلیاں کوندتیں اور اس کی مسکراہٹ سے ہزاروں تیر برستے اور کروڑوں لہو لہان ہو جاتے،میں کیوں لکھتا اس پر ؟ لکھتا تو سنجیدہ مہذب دانشوروں کے درمیان نشانہ بن جاتا،بازارواور مشاعرہ باز،یہ کوئی شاعری ہے ؟ مگر ایوان سیاست میں اس کے نام سے زلزلہ آ جاتا تھا،جب وہ کہتا تھا:
تمہارے باپ کا ہندوستان تھوڑی ہے
اور اتنا کہہ کر وہ تیز قہقہہ لگاتا جیسے حکمرانوں کو تنبیہ کر رہا ہو کہ سنبھل جاؤ،ہم بھی کسی آندھی ، کسی طوفان سے کم نہیں، ہم سے مت ٹکراؤ ـ
سنجیدہ فلسفوں کا کاروبار کرنے والو، جدیدیت اور پختہ ادب کی پہچان رکھنے والو ، ایک کہانی سنو، ایک ملاح تھا،اس کی کشتی میں ایک دانشور سوار ہوا، دانشور نے پوچھا ، کیا تاریخ سے تمہاری واقفیت ہے ؟ ادب سے ہے ؟ سائنس سے ہے ؟ جغرافیہ سے ہے؟ ملاح ہر بار انکار میں گردن ہلا دیتا اور دانشور ہر سوال کے بعد کہتا ، نہیں جانتے ، تمہاری زندگی بیکار ہے، اس درمیان کشتی میں پانی بھرنے لگا،ملاح نے دانشور سے سوال کیا”آپ تیرنا جانتے ہیں؟ ” دانشور نے انکار کیاـ نہیں جانتا،دریا میں کودنے سے قبل ملاح نے کہا ، پھر آپ کی زندگی بیکار ہے،
طوفان آ چکا،آندھیوں نے ہزاروں گھر پھونک دیے، بند کمروں میں ادب کی نمائش کرنے والے کیا جانیں کہ راحت اندوری کیا تھا ؟ منور رانا کی ضرورت کیوں ہے ؟ فسطائی طاقتیں پوری شدّت اور منصوبوں کے ساتھ مذہب ،مشترکہ وراثت اور تہذیب پر حملہ کر رہی ہیں، دانشوری کو طاق پر رکھیے،کیا آپ حکومت کے ایسے منصوبوں کو خاک میں ملا سکتے ہیں ؟ منور رانا اور راحت اندوری جیسوں کی آواز پوری دنیا کو ہلا دینے کی طاقت رکھتی ہے،سنجیدہ ادب لکھنے والوں اور سنجیدہ قاری کا قصور یہ ہے کہ وہ ابن صفی کو تو ضروری تسلیم کرتا ہے مگر راحت اندوری تک پہچنے میں روح فنا ہو جاتی ہے، آزادی یوں ہی مل گئی ؟ کیا اس وقت یہ پروپیگنڈا ضروری نہیں تھا کہ غلامی کی مخالفت کی جائے، آزادی کی چیخ کو آواز دی جائے اور اس وقت آزادی کے نغمے کس نے نہیں لکھے، سب نے لکھے، ہم آج اس مہذب دور میں زیادہ غلامی کے شکار ہیں، موب لنچنگ ، فسادات ، دو قانون، مسلمانوں کا الگ ، غیر مسلموں کا الگ،کوئی ادیب ہے جو مسلمانوں کے لئے جنگ کر رہا ہو،جنگ راحت کرتا تھا، ڈرتا نہیں تھا،بیباک تھا،کپل شرما شو میں بھی دو بار دعوت ملی، دونوں دفعہ چھا گیا اور پیغام بھی دے گیا کہ تمہارے باپ کا ہندوستان تھوڑی ہے ـ
مزہ چکھا کے ہی مانا ہوں میں بھی دنیا کو
سمجھ رہی تھی کہ ایسے ہی چھوڑ دوں گا اسے
ایک ہی ندی کے ہیں یہ دو کنارے دوستو
دوستانہ زندگی سے موت سے یاری رکھو
یہ سانحہ تو کسی دن گزرنے والا تھا
میں بچ بھی جاتا تو اک روز مرنے والا تھا
گھر سے یہ سوچ کہ نکلا ہوں کہ مر جانا ہے
اب کوئی راہ دکھا دے کہ کدھر جانا ہے
بہت غرور ہے دریا کو اپنے ہونے پر
جو میری پیاس سے الجھے تو دھجیاں اڑ جائیں
آنکھ میں پانی رکھو ہونٹوں پہ چنگاری رکھو
زندہ رہنا ہے تو ترکیبیں بہت ساری رکھو
ہم سے پہلے بھی مسافر کئی گزرے ہوں گے
کم سے کم راہ کے پتھر تو ہٹاتے جاتے
ہے میرے چاروں طرف بھیڑ گونگے بہروں کی
کسے خطیب بناؤں کسے خطاب کروں

وہ گونگا نہیں تھا ، بولنا جانتا تھا، وہ اپنی قیمت پہچانتا تھا، وہ جنگجو تھا، جب ضرورت ہوتی ، وہ بیدار کرنے آ جاتا، اب کورونا نے حقیقت سامنے رکھ دی اور یہ سوال خدا سے بھی ہے،خدا ، میرے خدا ، راحت کا جرم سنگین اور سیاسی ایوانوں میں بیٹھے خداؤں کو معافی ؟ یہ کیسا انصاف میرے خدا؟ کورونا اپنے ساتھ کیسے کیسے لوگوں کو لے گیا ، ان لوگوں کو جن کے دم سے زندگی اور کائنات کا حسن باقی تھا اور جو نفرتیں پھیلا رہے ہیں ، جو آگ لگا رہے ہیں ، جو ملک کو زخمی کر رہے ہیں ، تیری خوبصورت دنیا میں داغ لگا رہے ہیں ، انھیں زندہ رہنے کے لئے چھوڑ رکھا ہے یہ تفریق کیوں خدا ؟ یہ کیسا انصاف ؟
میں پھر ان سوالوں پر آتا ہوں ـ آزادی کے بعد کے فرقہ وارانہ فسادات، ادب کا خیمہ خاموش رہا، 1984ہوا پھر1992، کوئی ہلچل اس خیمے میں نظر نہیں آئی، کچھ ہلکی پھلکی علامتی کہانیاں لکھ دی گئیں۔1992 کے بعد کا منظر نامہ دیکھ لیجئے ـ خاموشی کی روایت قائم ہے، سیاسی عدم بیداری کی فضا قلم کے محافظ پیدا نہیں کرتی ـ جدیدیت کے علمبردار وں کو کوئی غرض نہیں کہ ملک کہاں جا رہا ہےـ بیمار مریضوں ،سوکھی انتڑیوں کے باسی مردہ قصّوں میں اگر زندگی کی حرارت نہیں تو یہ قصّے فقط الفاظ کی بھول بھلیاں کے سوا کچھ بھی نہیں ہیں،ترقی پسند زندہ مکالمے کرتے تھے،بیانات دیتے تھے ۔حق کے لئے جنگ کرتے تھے ۔ 1992کے بعد کا عام رویہ ہے کہ ادب کو عام اذہان اور مسائل میں کوئی دلچسپی نہیں۔نیند میں سویے ادیبوں پر آپ فخر کر سکتے ہیں تو کیجئے،لیکن وہ ادیب ہی کیا جسے بدلتے سیاسی منظر نامے کی چیخ سنائی نہ دے ـ
راحت یہ چیخ سنتا تھااور جب وہ لکھتا تھا تو اس کی چیخ ساری دنیا کی چیخ بن جاتی تھی:
ہم اپنی جان کے دشمن کو اپنی جان کہتے ہیں
محبت کی اسی مٹی کو ہندوستان کہتے ہیں
’میرے اندر سے ایک ایک کرکے سب ہوگیا رخصت
مگر اندر جو باقی ہے اسے ایمان کہتے ہیں‘
میں من کی بات بہت من لگا کے سنتا ہوں
یہ تو نہیں ہے تیرا اشتہار بولتا ہے
کچھ اور کام اسے جیسے آتا ہی نہیں
مگر وہ جھوٹ بہت شاندار بولتا ہے
میں اس کے چہرے کو دیکھتا، حضرت بلال حبشی کی یاد تازہ ہو جاتی ـ وہ چہرے سے سیاہ مگر اندر سے تندور اور ایسے تندور کی ابھی ضرورت تھی،جب اسلام کی عظمت کا آفتاب بلند ہوا ، مکہ کی وادیوں سے اذاں کی جو پہلی آواز گونجی وہ حضرت بلال کی تھی، مودی کی اس انداز میں خبر کون لے گا کہ وہ جھوٹ بہت شاندار بولتا ہے،کون کہے گا ، تمھارے باپ کا ہندوستان،یہ راحت ہی کہہ سکتے تھے اور راحت ہی چلے گئےـ اپنے نغموں سے اقلیتوں کے زخم پر مرہم رکھنے والا ، راحت پہنچانے والا چلا گیاـ