اردو زبان

قومی اردو کونسل کے لا پینل کی آن لائن میٹنگ،قانون کے طلبہ کو اردو زبان میں ریفریشر کورس کروانے کا منصوبہ

نئی دہلی:(پریس ریلیز)قومی کونسل برائے فروغ اردو زبان کے لا پینل کی آن لائن میٹنگ کا انعقادعمل میں آیاجس کی صدارت پینل کی چیئر پرسن پروفیسر نزہت پروین خان نے کی۔اس موقعے پر شرکا کا استقبال کرتے ہوئے کونسل کے ڈائریکٹر ڈاکٹر شیخ عقیل احمد نے کہا کہ ہندوستان کے قانونی نظام میں اردو زبان کو مرکزیت حاصل رہی ہے اور اس میں سیکڑوں اردو الفاظ و اصطلاحات استعمال کی جاتی ہیں۔ اسی وجہ سے قومی اردو کونسل نے یہ طے کیا ہے کہ عدالتی و قانونی شعبے سے وابستہ افراد اور طلبہ کو اس حدتک اردو سکھانے کا اہتمام کیا جائے کہ وہ ان الفاظ کے معنی بخوبی سمجھ سکیں جو عدالتی کارروائیوں میں استعمال ہوتے ہیں۔ ڈاکٹر عقیل نے کہا کہ اردو والوں کے لیے بھی ملکی دستور کے نکات اور عدالتی نظام میں مستعمل اصطلاحات کی جانکاری ضروری ہے اوراسی ضرورت کی تکمیل کے لیے کونسل کے لاء پینل کے ذریعے مسلسل غورو خوض کے بعد قانون سے متعلق مختلف پہلووں پر کتابیں شائع کی جاتی ہیں۔ہمارا عزم ہے کہ اردو والوں کو ہندوستانی قانون میں ہونے والی تمام تر ترمیمات اور نئے بننے والے قوانین سے باخبر رکھیں تاکہ وہ اپنے حقوق و فرائـض کی کامل آگاہی کے ساتھ اپنی شہری ذمے داریاں ادا کرسکیں۔
اس میٹنگ کے دوران پچھلی میٹنگ کی تجاویز کی منظوری کے ساتھ مختلف امور پر تبادلۂ خیال کیا گیا۔ عدالتی و پولیس سسٹم میں استعمال ہونے والے اردو الفاظ کے معانی کی تفہیم کے لیے لاء کالجز اور عدلیہ سے وابستہ افراد اور طلبہ کے لیے ریفریشر کورس کے منصوبے کو جلد ازجلد عملی جامہ پہنانے پر زور دیا گیا اور یہ طے ہوا کہ اس سلسلے میں تمام لاء کالجز کے ساتھ چیف جسٹس آف انڈیا اور تمام ریاستوں کے ہائی کورٹس کے چیف جسٹس اور ڈائریکٹر نیشنل جیوڈیشل اکیڈمی کو بھی خط بھیجا جائے اور ان کے جواب کے مطابق اگلا قدم اٹھایا جائے۔اس موقعے پرخواجہ عبدالمنتقم نے مدارس اور اسکول کے طلبہ کوبنیادی قانونی اصطلاحات سے آگاہ کرنے ،نیز ہندوستان میں صارفیت کے قانون اور موجودہ حکومت کے ذریعے صارفین کے لیے بنائے گئے قانون کی تشریح و توضیح پر مشتمل کتابوں کی ترتیب کا خاکہ پیش کیا،اس کے علاوہ دیگر متعدد پروجیکٹس بھی زیرِ بحث آئے اور یہ طے کیاگیا کہ ان کی اہمیت و افادیت کے مطابق کونسل کی جانب سے ان کی اشاعت کا اہتمام کیا جائے گا۔ساتھ ہی قانون سے متعلق پہلے سے زیر ترتیب مسودوں کی جلد ازجلد تکمیل پربھی زور دیا گیا۔
میٹنگ میں جن حضرات نے شرکت کی ان میںڈاکٹر شکیل معین، ڈاکٹر ظفر محفوظ نعمانی، جناب مصطفیٰ خان ایڈووکیٹ، جناب ایس اقبال احمد، جناب محمد شہنشاہ خان، محترمہ ڈاکٹر شمع کوثر یزدانی (اسسٹنٹ ڈائریکٹر اکیڈمک)، ڈاکٹر فیروز عالم (اسسٹنٹ ایجوکیشن آفیسر) اور محترمہ ذیشان فاطمہ خاص طورپر قابل ذکر ہیں۔

قومی اردو کونسل کے زیراہتمام دوروزہ عالمی ویبینار اختتام پذیر،ملک و بیرون ملک کے دو درجن سے زائد دانشوران اور مقالہ نگاروں کی شرکت ، الیکٹرانک اور سوشل میڈیا کے دورمیں فروغِ اردوکے امکانات و مسائل اور اردو مصنفین کی ذمے داریوں کا تفصیلی جائزہ لیاگیا

نئی دہلی:سوشل میڈیا اور الیکٹرانک میڈیا کی تیزرفتار ترقیات کے دور میں قلمکاروں کے سامنے بے پناہ امکانات ہیں اور اب ہمارے تخلیق کار جدید ٹکنالوجی کا استعمال کرکے زیادہ سے زیادہ قارئین تک پہنچ سکتے ہیں اور شہرت و ناموری حاصل کر سکتے ہیں ۔ ان خیالات کا اظہار قومی کونسل برائے فروغ اردو زبان کے تحت ‘الیکٹرانک و سوشل میڈیا کے دور میں اردو مصنفین کی ذمے داریاں’ کے عنوان سے منعقدہ دوروزہ عالمی ویبینارکے دوسرے دن افتتاحی خطاب کرتے ہوئے کونسل کے ڈائرکٹر ڈاکٹر عقیل احمد نے کیا۔ انھوں نے کہا کہ اب قاری یا سامع کی قلت کا مسئلہ نہیں رہا،نہ تخلیقات کی اشاعت میں مشکلات درپیش ہیں،آپ سوشل میڈیا اور انٹرنیٹ کا استعمال کرکے اپنے خیالات و افکار منٹوں میں ساری دنیا تک پہنچا سکتے ہیں۔ اب اردو کے فروغ کے لیے اور خود اپنی تخلیقی صلاحیتوں کے کماحقہ اظہار کے لیے بھی جدید ٹکنالوجی،سوشل میڈیا اور انٹرنیٹ سے آگاہی ضروری ہے۔ ویبینار کے مقالہ نگاروں نے اس بات پر زور دیا کہ سوشل میڈیا کی حیرت ناک ترقیات کے دور میں اردو زبان و ادب اور اردو تہذیب کے تحفظ کے لیے ہمیں منظم کوشش کرنی ہوگی ۔ ان کا کہنا تھا کہ سوشل میڈیا سے جہاں لوگوں تک رسائی آسان ہوگئی ہے اور اس کے بہت سے فائدے ہیں ،وہیں اس کی وجہ سے بہت سی منفی چیزیں بھی سامنے آرہی ہیں اور ہمیں ان منفی چیزوں سے بچتے ہوئے اپنی تخلیقات لوگوں تک پہنچانے کی تدبیرکرنی ہوگی۔ سوشل اور الیکٹرانک میڈیا کے تیز تر پھیلاؤ کے عہد میں زبان ومعلومات کی صحت و استناد پر توجہ دینا بھی ضروری ہے،ورنہ معمولی کوتاہی سے ہماری زبان کو غیر معمولی خساروں سے دوچار ہونا پڑ سکتا ہے۔ وکی پیڈیا جیسے اہم پلیٹ فارم پر بھی اردو قلمکاروں کے سرگرم ہونے کی باتیں سامنے آئیں اور یہ کہا گیا کہ جدید ٹکنالوجی کے ذریعے وجود میں آنے والے ترسیل و ابلاغ کے تمام ذرائع کو بھر پور طریقے سے اپنانا ہوگا،جب تک ہم پوری طرح ٹکنالوجی سے ہم آہنگ نہیں ہوں گے،اس پلیٹ فارم پر اپنی زبان اور ادب کو فروغ نہیں دے سکتے۔عالمی ویبینار کے پہلے تکنیکی سیشن کی صدارت پروفیسر نصیر احمد خاں نے کی اور نظامت کے فرائض ڈاکٹر عبدالحی (سی ایم کالج،دربھنگہ) نے انجام دیے۔ اس سیشن میں ملک و بیرون ملک سے نو مقالہ نگاروں نے اپنے مقالات پیش کیے۔ جن میں پروفیسر این کے درانی ،ڈاکٹر سید تقی حسن عابدی(کناڈا)،پروفیسر شہزاد انجم(دہلی)،جناب عارف نقوی(جرمنی)،پروفیسر شاہد رسول (کشمیر)،جناب نصر ملک(ڈنمارک)،جناب سید اقبال حیدر(جرمنی)،پروفیسر مرنال چٹرجی (اوڈیشہ) اور پروفیسر ناصر مرزا(کشمیر) کے نام شامل ہیں۔ دوسرے سیشن کی صدارت ڈاکٹر عبدالحق یونیورسٹی کرنول کے بانی وائس چانسلر پروفیسر مظفر علی شہہ میری نے کی اور نظامت ڈاکٹر شفیع ایوب(جےاین یو)نے کی،اس سیشن میں پانچ مقالات پیش کیے گئے، مقالہ نگاروں میں جناب عبدالسمیع بوبیرے(مہاراشٹر)،پروفیسر غلام ربانی(بنگلہ دیش)،پروفیسر غیاث الرحمن سید(دہلی)، ایلدوست ابراہیموف (آذربائیجان)،پروفیسر احتشام عالم خان(حیدرآباد) کے نام شامل ہیں۔ تیسرے سیشن کی صدارت پروفیسر آذرمیدخت صفوی نے کی،جبکہ نظامت کے فرائض ڈاکٹر محمد کاظم نے انجام دیے۔ مقالہ نگاروں میں ڈاکٹر عطاء اللہ خان کاک سنجری (کیرالا)،پروفیسر مشتاق احمد،ڈاکٹر سید زین الحق شمسی(بہار)،پروفیسراقبال احمد(یوپی)،پروفیسر احمدمحمد احمد عبدالرحمن(مصر)کے نام شامل ہیں۔چوتھے سیشن کی صدارت پروفیسر انور پاشا(جے این یو)نے کی اور نظامت کے فرائض ڈاکٹر امتیاز احمد (دہلی یونیورسٹی)نے انجام دیے۔ مقالہ نگاروں میں پروفیسر ابوذر عثمانی،پروفیسر راشد احمد(بنگلہ دیش)،جناب فہیم اختر(لندن)،پروفیسر حدیث انصاری(راجستھان)،ڈاکٹر ہما پروین(علی گڑھ مسلم یونیورسٹی)شامل تھے۔ویبینار کے آخر میں کونسل کے ڈائرکٹر شیخ عقیل احمد نے تمام شرکاء اورمقالہ نگاروں کا شکریہ ادا کیا اور کہا کہ اس دوروزہ ویبینار میں پڑھے جانے والے تمام قیمتی مقالات کو کونسل کی جانب سے کتابی شکل میں شائع کیا جائے گا اور اسے پوری دنیا کے ادیبوں اور اردو سے دلچسپی رکھنے والوں تک پہنچایاجائے گاتاکہ وہ ان مقالات سے کماحقہ استفادہ کر سکیں ۔انھوں نے یہ بھی کہاکہ سوشل اور الیکٹرانک میڈیا میں اردو کے بہتر استعمال اور اس سلسلے میں درپیش چیلنجز سے نمٹنے کے لیے قومی کونسل اپنا ہر ممکن کردار ادا کرے گی۔ اس سلسلے میں ملک و بیرون ملک کے دانشوران و اسکالرز کے مشوروں اور تجاویز کا بھی ہم خیر مقدم کریں گے اور انھیں عملی جامہ پہنانےکی کوشش کریں گے۔

اس ویبینار میں کونسل کی جانب سے ڈاکٹر کلیم اللہ(ریسرچ آفیسر)، جناب انتخاب احمد (ریسرچ آفیسر)،اجمل سعید(اسسٹنٹ ایجوکیشن آفیسر)،ٹیکنکل معاونین، دیگر اسٹاف اور ہندوستان و بیرون ہندسے محبین اردو اور دانشوران و اسکالرز بڑی تعداد میں موجود تھے۔

مہاتما گاندھی بین الاقوامی یونیورسٹی وردھا میں شعبۂ اردو کو برقرار رکھنے اور مہاتما گاندھی سینٹرل یونیورسٹی موتیہاری میں شعبۂ اردو کے قیام کے سلسلے میں وائس چانسلرز کے نام کونسل کی جانب سے مکتوب روانہ

نئی دہلی: موجودہ حکومت نے نئی تعلیمی پالیسی میں کہیں بھی اردو کی مخالفت نہیں کی ہے اور نہ ہی بنیادی تعلیمی نظام سے اردو کو خارج کرنے کا کوئی ذکر ہے۔ ملک کو 34 برسوں بعد ایک جامع قومی تعلیمی پالیسی ملی ہے جس کا سبھی کو استقبال کرنا چاہیے۔ یہ باتیں قومی کونسل برائے فروغ اردو زبان کے ڈائرکٹر ڈاکٹر شیخ عقیل احمد نے نئی تعلیمی پالیسی پر اظہارخیال کرتے ہوئے کہیں۔ انھوں نے کہا کہ پالیسی میں یہ واضح طور پر لکھا گیا ہے کہ آئین کے آٹھویں شیڈول میں درج سبھی زبانوں کے فروغ پر توجہ دی جائے گی اور اس مقصد سے اکیڈمیوں کا قیام کیا جائے گا، ساتھ ہی ان کی ترویج و ترقی کے سلسلے میں ہر ممکن اقدامات کیے جائیں گے۔ ملک کا آئین جب مادری زبان میں بنیادی تعلیم کی وکالت کرتا ہے تو پھرملک کی تعلیمی پالیسی میں اس کی خلاف ورزی کیسے ہوسکتی ہے؟اس پالیسی میں واضح طورپر یہ کہا گیا ہے کہ شروع سے پانچویں کلاس تک لازمی طورپر اور آٹھویں کلاس تک اختیاری طورپر ذریعۂ تعلیم مادری اور مقامی زبان ہوگی ،اس سے بھی سمجھا جاسکتا ہے کہ جن طلبہ کی مادری زبان اردو ہے وہ اردو میں ہی تعلیم حاصل کرنے کے مجاز ہوں گے۔ اس پالیسی کے تحت ملک کی تمام زبانوں کے تحفظ اوران کی ترقی کے لیے انڈین انسٹی ٹیوٹ آف ٹرانسلیشن اینڈ انٹرپریٹیشن(آئی آئی ٹی آئی ) کے قیام کے ساتھ ساتھ پالی، فارسی اور پراکرت جیسی زبانوں کے فروغ کے لیے قومی سطح کے اداروں کی بھی تشکیل کی جائے گی۔ انھوں نے کہا کہ یہ پالیسی اس لیے بھی بہتر ہے کہ اس میں فرسودہ نظام تعلیم کو ختم کر کے نئے انداز میں تعلیم دینے کی بات کی گئی ہے۔ طالب علموں کو بنیادی سطح پر ہی ووکیشنل تربیت دی جائے گی، انھیں کوڈنگ سکھائی جائے گی اور درجہ 6 سے ہی انٹرن شپ کا موقع فراہم کیا جائے گا۔ کتابی علم سے زیادہ خود سے کرنے اور سیکھنے پر توجہ دی جائے گی،آن لائن نظام تعلیم اور ورچوئل کلاسز کا سسٹم بہتر کیا جائے گا۔حکومت کا مقصد ہے کہ 2030تک ملک میں خواندگی کی شرح 100 فیصد تک پہنچائی جائے ۔ یہی نہیں 2020 میں اسکول چھوڑ چکے 2 کروڑ بچوں کو دوبارہ اسکول سے جوڑنے کی کوشش کی جائے گی۔اعلی تعلیمی نظام میں مضامین منتخب کرنے کی آزادی ہوگی،چنانچہ اگر ہندی، سماجیات یا فلسفےکے ساتھ کوئی حساب یا علم حیوانات پڑھنا چاہے تو پڑھ سکتا ہے۔ اسی طرح علم کیمیا کے ساتھ تاریخ بھی پڑھ سکتا ہے۔ اردو والے اپنی دلچسپی کا کوئی بھی سبجیکٹ منتخب کر سکتے ہیں۔ نئی تعلیمی پالیسی میں طالب علم خود ہی اپنی جانچ اور تعینِ قدر کرسکیں گے۔ایک بہت اچھی بات یہ بھی ہے کہ اس پالیسی میں جی ڈی پی کا 6 فیصد تعلیم پر خرچ کرنے کی بات کہی گئی ہے ۔ اس پالیسی کے نفاذ کے بعد ملک کا ایک بڑا طبقہ جو تعلیم سے دور تھا وہ بھی مین اسٹریم سے جڑے گا اور تعلیم کی جانب راغب ہوگا۔انھوں نے کہا کہ اردو والوں کو کسی بھی طرح کے خدشات دل سے نکالنے ہوں گے اور موجودہ حکومت کے تئیں کشادہ قلبی کا مظاہرہ کرنا ہوگا۔ ڈاکٹر عقیل نے یہ بھی بتایا کہ مہاتماگاندھی انٹرنیشنل یونیورسٹی وردھا کے داخلہ نوٹیفکیشن سے اردو کو حذف کیے جانے کےسلسلے میں ہم یونیورسٹی کے وائس چانسلرکو خط لکھ رہے ہیں کہ یونیورسٹی میں شعبۂ اردو کو برقرار رکھا جائے،اسی طرح کونسل کی جانب سے مہاتما گاندھی سینٹرل یونیورسٹی موتیہاری (بہار) کے وائس چانسلر کوبھی خط بھیجا جا رہا ہے کہ وہاں شعبۂ اردو قائم کیا جائے کیوں کہ اردو ہمارے ملک کی بائیس شڈٹولڈ زبانوں میں سے ایک اہم زبان ہے ، اس نے ہندوستان کی تاریخ و تہذیب کو سنوارنے میں غیر معمولی کردار ادا کیا ہے اور ہماری مشترکہ و سیکولر ثقافت کا گراں قدر سرمایہ اس زبان میں محفوظ ہے۔
ڈاکٹر عقیل نے کہا کہ اس حوالے سے جو بھی بحث طلب امور ہیں ان پر میں خود وزیر تعلیم عالی جناب رمیش پوکھریال نشنک جی سے بات کروں گا اور ان سے اردو پر خصوصی توجہ دینے کی گزارش کروں گا۔