اردو اکیڈمی دہلی

نئی دہلی:اردو اکادمی، دہلی اسکولوں کے طلباء و طالبات میں تعلیم کا ذوق و شوق پیدا کرنے اور ان میں مسابقت کا جذبہ پیدا کرنے کے لیے ہر سال تعلیمی مقابلے منعقد کرتی ہے۔ ان مقابلوں میں اول، دوم اور سوم آنے والے طلباء و طالبات کو انعام دیتی ہے اور بچوں کی ہمت افزائی کے لیے کنسولیشن انعام بھی دیتی ہے۔ ان مقابلوں میں تقریری، فی البدیہہ تقریری، بیت بازی، اردو ڈراما، غزل سرائی، کوئز(سوال و جواب)، مضمون نویسی و خطوط نویسی، خوشخطی مقابلے اور امنگ پینٹنگ مقابلہ شامل ہیں۔ یہ تعلیمی مقابلے دہلی کے پرائمری تا سینئر سیکنڈری اردو اسکولوں کے طلباء و طالبات کے درمیان منعقد ہورہے ہیں۔ یاد رہے کہ یہ مقابلے 13/دسمبر تک جاری رہیں گے۔
آج اردو ڈراما مقابلہ برائے سیکنڈری و سینئر سیکنڈری زمرہ(نویں جماعت تا بارہویں جماعت کے طلبا و طالبات) منعقد کیا گیا جس میں جناب یاسین پنڈت اور جناب تحسین منور نے جج کی حیثیت سے شرکت کی۔ اس مقابلے میں 17اسکولوں کے 119طلبا و طالبات نے مختلف موضوعات پر ڈرامے پیش کیے۔جج صاحبان کے فیصلے کے مطابق اینگلو عربک سینئر سیکنڈری اسکول، اجمیری گیٹ اور ڈاکٹر ذاکر حسین میموریل سینئر سیکنڈری، جعفرآباد کو پہلے انعام کا مستحق قرار دیا گیا۔ دوسرے انعام کے لیے گورنمنٹ گرلز سینئر سیکنڈری اسکول، وجے پارک، موجپور اور جامعہ سینئر سیکنڈری اسکول، جامعہ ملیہ اسلامیہ کو مستحق قرار دیا گیا جب کہ تیسرے انعام کے لیے راجکیہ سروودیہ کنیا ودیالیہ نمبر2، جامع مسجد کو مستحق قرار دیا گیا۔ ان کے علاوہ حوصلہ افزائی انعام کے لیے گورنمنٹ سروودیہ کنیا ودیالیہ نور نگرکو منتخب کیا گیا۔ ان انعامات کے علاوہ طلبا و طالبات کی انفرادی اداکاری کی بنیاد پر جن طلبا و طالبات کو انفرادی انعام کے لیے منتخب کیا گیا ان میں مریم بنت محمد اکرام (راجکیہ سروودیہ کنیا ودیالیہ، رادھے شیام پارک)،محمد فیض ولد ایوب علی(چندرشیکھر آزاد گورنمنٹ بوائز سینئر سیکنڈری اسکول، نیو فرینڈس کالونی)، سیدہ تفسیرفاطمہ رضوی ہدیٰ بنت سید غلام حسین(خدیجۃالکبریٰ گرلز پبلک اسکول، جوگا بائی)،جویریہ بنت محمد جاوید،عمارہ بنت محمد حسین (راجکیہ سروودیہ کنیا ودیالیہ نمبر2، جامع مسجد)،شمشیر ولد شمشاد احمد(گورنمنٹ بوائز سینئر سیکنڈری اسکول، سیماپوری)،رقیہ بنت ابرار احمد(گورنمنٹ گرلز سینئر سیکنڈری اسکول، چشمہ بلڈنگ)،ثنا اقبال بنت محمد اقبال(گورنمنٹ گرلز سینئر سیکنڈری اسکول، وجے پارک)، صابر ولد محمد مونس، نگار بنت شیخ محمد مشتاق، ایان ولد محمد یامین(ڈاکٹر ذاکر حسین میموریل سینئر سیکنڈری اسکول، جعفرآباد)،علیشہ بنت محمد ہارون(زینت محل گورنمنٹ سروودیہ کنیا ودیالیہ، جعفر آباد)، رونق حیدر ولد ڈاکٹر حیدرعلی(جامعہ سینئر سیکنڈری اسکول، جامعہ ملیہ اسلامیہ)،رِمشا بنت محمد یوسف،اقرا خان بنت ادریس خان(گورنمنٹ سروودیہ کنیا ودیالیہ نور نگر)، زین العابدین ولد محمد شکیل اور ریحان ولد محمد اویس (اینگلو عربک سینئر سیکنڈری اسکول، اجمیری گیٹ) کے نام شامل ہیں۔
ڈراموں کے اختتام پرجج صاحبان نے اپنے تاثرات کا اظہار کرتے ہوئے کہا کہ آج کی زندگی اور اس کے مسائل ایک بہت بڑا چیلنج بن کر ابھرے ہیں۔ مسابقت کے اس دور میں ہماری نئی نسل کو کارزارِ زندگی میں آگے بڑھنے کے لیے اور نمایاں مقام حاصل کرنے کے لیے نہایت سنجیدگی سے اپنے کیریئر کا انتخاب کرنا پڑرہا ہے۔ ضرورت ہے کہ وہ اپنے اندر پوشیدہ صلاحیتوں کو اپنے اور اپنے معاشرے کے لیے سودمند بناسکیں۔ اردو اکادمی، دہلی کو ان مقابلوں کے انعقاد کے لیے مبارکباد پیش کی اورکہا کہ اکادمی نے ہمیشہ بچوں کے اندر کی خوابیدہ صلاحیتوں کو اجاگر کرنے کا اہم کارنامہ انجام دیا ہے۔ انھوں نے اردو زبان اور ماضی میں اس زبان میں پیش کیے گئے قابلِ ذکر اور معرکۃالآرا ڈراموں کا بھی ذکر کیا اور ڈراما نویسوں کا بھی۔انھوں نے بچوں کے ذریعے پیش کیے گئے ڈراموں کی تعریف کی اور ڈراموں میں پوشیدہ باریک باریک نکات کو سامنے رکھ کر بچوں کو ان کی اہمیت سے واقف کرایا۔ اس موقع پر اکادمی کے وائس چیئرمین پروفیسر شہپر رسول نے بھی اپنے خیالات کا اظہار کرتے ہوئے کہا کہ ڈرامے ہوں یا کوئی اوردیگر مقابلے ان میں الفاظ کی ادائیگی کا بڑا عمل دخل ہوتا ہے اس لیے اساتذہ کو چاہیے کہ ڈرامے کی پیش کش سے قبل الفاظ کی ادائیگی پر خاص توجہ دیں۔

’’مادری زبان کی اہمیت‘‘ اور ’’شجرکاری اور ماحولیات‘‘ کے موضوع پر تقریری مقابلہ کا انعقاد
نئی دہلی:
اردو اکادمی، دہلی اسکولوں کے طلباء و طالبات میں تعلیم کا ذوق و شوق پیدا کرنے اور ان میں مسابقت کا جذبہ پیدا کرنے کے لیے ہر سال تعلیمی مقابلے منعقد کرتی ہے۔ ان مقابلوں میں اول، دوم اور سوم آنے والے طلباء و طالبات کو انعام دیتی ہے اور بچوں کی ہمت افزائی کے لیے کنسولیشن انعام بھی دیتی ہے۔ ان مقابلوں میںتقریری ، فی البدیہہ تقریری، بیت بازی ، اردو ڈراما، غزل سرائی، کوئز( سوال و جواب) ، مضمون نویسی و خطوط نویسی، خوشخطی مقابلے اور امنگ پینٹنگ مقابلہ شامل ہیں۔ یہ تعلیمی مقابلے دہلی کے پرائمری تا سینئر سیکنڈری اردو اسکولوں کے طلباء و طالبات کے درمیان منعقد ہورہے ہیں ۔ یاد رہے کہ یہ مقابلے 13؍دسمبر تک جاری رہیں گے۔
آج صبح ساڑھے دس بجے تقریری مقابلہ برائے سینئر سیکنڈری زمرہ بہ عنوان ’’مادری زبان کی اہمیت‘‘ کاانعقاد کیا گیا جس میں جج کی حیثیت سے جناب اشفاق احمد عارفی اور جناب جناب معصوم مرادآبادی نے شرکت کی۔ واضح رہے کہ عنوان اسکولوں کو پہلے ہی بھیج دیا گیا تھا۔مقابلے کے اختتام پراظہارِ خیال کرتے ہوئے جناب معصوم مرادآبادی نے کہا کہ تقریر کرنے میں جو سب سے بڑا ہنر ہے، وہ خود اعتمادی ہے اگر آپ اس پر یقین رکھتے ہیں تو زندگی کی کوئی جنگ ہار نہیں سکتے۔ آج کا زمانہ مقابلہ جاتی ہے۔ یہ مقابلہ تعلیم کا نہیں شخصیت کا بھی ہے۔ جب آپ تقریر کرتے ہیں تو وہ دوسروں پر کیسے اثر انداز ہوتی ہے اس پر غور کرنے کی ضرورت ہے۔ ا نھوں نے کہا کہ کچھ طلبا بڑی خوداعتمادی سے تقریر کررہے تھے اور کچھ بچوں میں خوداعتمادی کی کمی تھی۔ جب آپ مقابلہ جاتی پروگرام میں جارہے ہیں تو آپ کی تیاری کتنی ہے اس پر توجہ دینی چاہئے۔ جس زبان میں تقریر کررہے ہیں آپ اس کو کتنا سمجھتے ہیں یہ بھی توجہ چاہتی ہے اس لیے زبان پر عبور کے ساتھ ساتھ الفاظ کے زبر و زیر اور اس کے تلفظ پر زور دینے کی ضرورت ہے۔ آپ اچھے ادیبوں کو پڑھیں انھوں نے الفاظ کو کس طرح استعمال کیا ہے اس کو سمجھیں۔ الفاظ موتیوں کی طرح ہوتے ہیں انھیں سنبھال کر پروئیں، الفاظ کی تکرار سے بچیں اور یہ کوئی مشکل کام نہیں ہے بس اس کے لیے مطالعہ کی ضرورت ہے۔
جناب اشفاق احمد عارفی نے طلباواساتذہ سے مخاطب کرتے ہوئے کہا کہ میں جب بین ریاستی مقابلوں میں جاتا تھا تو ہمارے اساتذہ ہماری تیاری کرواتے تھے ، وہ ہم جو لکھتے تھے اس کو سنتے تھے۔ دراصل رٹنا اور اس کو آگے بڑھ کر سنانا یہ بھی بڑی بات ہے اس لیے کہ آگے چل کر وہ خود سمجھنے پر خود تیاری کریںگے۔ بولنے کی زبان اور اسٹیج پر اظہار خیال کی زبان میں تھوڑا فرق ہوتا ہے اس لیے اس پر بھی توجہ دینے کی ضرورت ہے۔ عام طور پر بچے اِس اور اُس پر توجہ نہیں دیتے۔ جب اساتذہ کے سامنے تیاری کریں گے تو یہ فرق ختم ہوجائے گا۔ مافی الضمیر کی ادائیگی کا جو فن ہے وہ سیکھتے سیکھتے ہی آتا ہے اس لیے گھبرانے کی ضرورت نہیں۔ انھوں نے کہا کہ اگر آپ مقابلہ جاتی امتحان میں شریک نہیں ہیں پھر بھی شرکت کریں اور اسٹیج پر کھڑے ہونے، تقریر کرتے وقت اپنے اشاروں پر توجہ دیں۔ جو بچے مقابلہ میں شامل ہیں، لیکن وہ انعام حاصل نہیں کرسکے ہیں وہ مایوس نہ ہوں، ان کے لیے آئندہ مواقع آئیں گے، مزید تیاری کرکے مقابلہ میں حصہ لیں انشاء اللہ ضرور کامیاب ہوںگے۔تقریری مقابلہ برائے سینئر سیکنڈری زمرے میںاِذین فاطمہ بنت عمران کے سوری اور زینب ایس قاضی بنت سلیم ایس ۔ قاضی(ہمدرد پبلک اسکول، سنگم وہار) کو نمبر مساوی ہونے کی بنیاد پر پہلے انعام کے لیے منتخب کیا گیا۔دوسرے انعام کے لیے محمد ابوذر ولد محمد ارشد(اینگلو عربک سینئر سیکنڈری اسکول، اجمیری گیٹ) کو منتخب کیا گیا جب کہ تیسرے انعام کے لیے من تشا پرویز بنت پرویز خان(جامعہ سینئر سیکنڈری اسکول، جامعہ ملیہ اسلامیہ) کو منتخب کیا گیا۔ ان کے علاوہ حوصلہ افزائی انعام کے لیے محمد زبیر ولد محمد نبیل(ڈاکٹر ذاکر حسین میموریل سینئر سیکنڈری اسکول، جعفرآباد) کو منتخب کیا گیا۔دوپہر ڈھائی بجے تقریری مقابلہ برائے سیکنڈری زمرہ کا انعقاد عمل میں جس کا موضوع تھا ’’شجر کاری اور ماحولیات‘‘۔ اس مقابلے میں جج کی حیثیت سے مفتی عطاء الرحمن قاسمی اور جناب دوست محمد نبی خان نے شرکت کی۔ جج کے فیصلے کے مطابق کائنات ضیابنت محمد ضیاء الرحمن(جامعہ سینئر سیکنڈری اسکول، جامعہ ملیہ اسلامیہ) کو اول انعام کے لیے منتخب کیا گیا۔ دوسرے انعام کے لیے عبدالمالک ولد عبدالواحد(اینگلو عربک سینئر سیکنڈری اسکول، اجمیری گیٹ) اور صالحہ انعام بنت انعام الرحمن(گورنمنٹ سروودیہ کنیا ودیالیہ، نور نگر) منتخب کیا گیا جب کہ تیسرے انعام کے لیے فاطمہ ثمین بنت ریحان(ہمدرد پبلک اسکول، سنگم وہار) منتخب کیا گیا۔ ا ن کے علاوہ حوصلہ افزائی کے لیے محمد حماد ولد راشد علی(اینگلو عربک سینئر سیکنڈری اسکول، اجمیری گیٹ) اورمہوش بنت محمد انجم(کریسنٹ اسکول، موجپور) کو منتخب کیا گیا۔