ابیات قندیل

پرانے زمانے میں (کتنا پرانا یہ نہیں پتہ) خواتین گھر سے باہر جاتے ہوئے چادر اوڑھا کرتی تھیں،پھر آہستہ آہستہ برقعہ ایجاد ہوا.یہ کس نے ایجاد کیا اور کب ایجاد ہوا اور ایجاد ہوا یا دریافت،یہ میرا موضوع نہیں،
اس لیے آگے چلتے ہیں ـ
شروع میں برقعے شٹل کاک جیسے ہوا کرتے تھے جسے سنبھالنے والی خواتین بھی اب گزر گئیں،اب برقعے سیدھی پیروں تک کی قمیض جیسے ہوتے ہیں ـ عموماً ان کا رنگ سیاہ ہوتا ہے لیکن بہت سے اور اچھے رنگ بھی دستیاب ہیں،جنہیں استعمال کیا جا سکتا ہے کہ سیاہ رنگ دھوپ کی حرارت جذب کرنے میں باقی رنگوں کی نسبت ماہر ہےـ کچھ لوگوں کا خیال ہے کہ برقعے کا رنگ سیاہ ہی ہونا چاہئیے ورنہ کاہے کا پردہ،لیکن ہمیں اس سے اختلاف ہے،ایسا کوئی مذہبی قانون موجود نہیں اور ویسے بھی”وجودِ زن سے ہے تصویرِ کائنات میں رنگ” ـ
خیر ابھی ہمارا موضوع یہ بھی نہیں، اس لیے آگے چلتے ہیں ـ برقعے کے بہت سے استعمالات ہیں ـ فلموں میں اسے گھر سے بھاگنے کے لیے استعمال کیا جاتا ہےـ نقلی اور اصلی ڈراموں میں اسے ممنوعہ جگہیں گھومنے کے لیے استعمال کیا جاتا ہےـ البتہ کالجوں اور یونیورسٹیوں میں اس کے استعمالات کے حوالے سے بہت تنوع موجود ہےـ کچھ لڑکیاں برقعے کو بطور پردہ استعمال کرتی ہیں،
کچھ کپڑوں کے محدود برانڈ ہونے کی وجہ سے اسے پہنتی ہیں،کچھ اتنی سست ہوتی ہیں کہ صبح 8 بجے کی کلاس سے پانچ منٹ پہلے اٹھ کر بنا منہ دھوئے شٹل کاک چڑھا لیتی ہیں اور کچھ اس دن پہنتی ہیں جس دن لائٹ چلی جائے اور کپڑے استری نہ ہو سکیں ـ
برقعے کو آپ جس مقصد کے لیے بھی استعمال کریں یہ آپ کی مرضی ہے، میری آج کی گفتگو کا موضوع یہ بھی نہیں ـ
مندرجہ بالا سبھی پہلو متنازع ہیں اور میں صرف ایک پہلو پہ بات کرنا چاہتی ہوں جس سے سبھی کو اتفاق ہوگاـ وہ یہ اللہ کی بندیو! برقعے کو جس بھی مقصد کے لیے استعمال کرو،کم ازکم میلے گندے،آٹھ آٹھ دن تک بغیر دھوئے بدبودار برقعے مت استعمال کرو، پیروں سے نیچے تک گھسٹتے،دور دور تک پھیلے گھیر دار کپڑے سے اردگرد کا کوڑا کرکٹ سمیٹتے،مہینہ مہینہ دھوئے بغیر محض پرفیوم کے چھڑکاو سے نہ خود مہکیں نہ اپنے اردگرد کو مہکا کر ان کا سانس لینا دو بھر کریں
اور جو مرضی کریں کم از کم برقعے کے ساتھ "یہ” زیادتی نہ کریں،برقعے کو بخش دیں!

ترکی کی انتظامی عدالت کے حکم کے بعد بعض لوگ آیا صوفیا کی ابتدائی حثیت کے بارے میں سوالات کر رہے ہیں کہ ۱٤٥٣ء میں اس کو مسجد بنانا درست نہیں تھا اور مطالبہ کر رہے ہیں کہ فقہ کی کتابوں میں سے ایسا کوئی قول پیش کیا جائے جس سے یہ ثابت ہوتا ہو کہ چرچ کو مسجد میں تبدیل کرنا جائز ہے۔

میں نے پہلے بھی اس کا تذکرہ کیا تھا کہ ۱۹۲۸ء تک دنیا کا دستور یہی تھا اور اسی طرح قرطبہ و غرناطہ کی کئی مساجد کو چرچوں میں تبدیل کیا گیا تھا لیکن بعض سنجیدہ دوستوں کا مطالبہ ہے کہ وہ بھی غلط اور یہ بھی غلط ہے ان سے گزارش ہے کہ:

بزور شمشیر (عنوۃ) اور بزور “صلح” جو مفتوحہ علاقے مسلمانوں کے پاس رہے ہیں ان کے احکام میں فرق ہے اس لیے دونوں کے درمیان فرق کو ملحوظ رکھتے ہوئے آیا صوفیا پر رائے دیں کیوں کہ بزور شمشیر جو علاقے فتح ہوئے ہیں ان میں تصرف کا اختیار فاتح کے پاس ہوتا ہے جیسا کہ ابن قیم الجوزیہ (ت ٧٥١ھ) نے احکام أھل الذمہ ۱۲۰۰/۳ میں لکھا ہے۔

اگر قرون اولی کے کسی فاتح نے چرچوں کو بحال رکھا ہے تو وہ احسان کی مثالیں ہیں کہ مسلمان فاتحین نے اس وقت کے ذمیوں پر احسان کیا تھا کیوں کہ وہ قانون کے پاسدار تھے جزیہ دیتے تھے اور مسلمانوں کے ساتھ خوش تھے اس لیے ان کے عبادت خانوں کو اسی حال پر چھوڑا تھا۔

یہی وجہ ہے کہ اکثر فقہا نے “جاز” کے الفاظ استعمال کیے ہیں کہ اگر چرچوں کو اپنے حال پر چھوڑا جائے تو جائز ہے اس کا مفہوم مخالف یہ ہرگز نہیں کہ اگر حیثیت تبدیل کی جائے تو حرام ہے اور آج بھی ہمارا یہی ماننا ہے کہ اگر خلیفۂ وقت کے مطابق مصلحت اس میں ہے کہ وہ بزور شمشیر مفتوحہ علاقوں کے چرچوں کو اپنے حال پر چھوڑ دیں تو اس میں کوئی حرج نہیں بلکہ جائز ہے اور مثالیں موجود ہیں۔

رہی بات آیا صوفیا کی تو اس کی تاریخ اور ہےـ ترکی کے مستند تاریخی وثائق کے مطابق سلطان محمد الفاتح نے ١٤٥٣ء میں فتح کے بعد اس میں پہلا جمعہ پڑھایا تھا لیکن اس کو رسمی طور پر جامع مسجد میں تبدیل نہیں کیا تھا،اس وقت کے اہل علم کے ساتھ جو احناف ہی تھے،ان کے ساتھ مشورہ کیا اور آیا صوفیا کو اپنے ذاتی پیسوں سے خریدا جس کی رسیدیں اور کاغذات تاحال موجود ہیں اور سرکاری فرمان جاری کیا کہ آج سے یہ وقف ہے،کسی کو بھی اس زمین کو مسجد کے علاوہ کسی اور مقصد کے لیے استعمال کی اجازت نہیں ـ اگر استعمال کیا گیا تو اس پر اللہ تعالی کی لعنت ہو۔

محترم بیرسٹر ظفر اللہ خان صاحب نے سوال کیا کہ استنبول فتح ہوا تو کس سے خریدا گیا تو اس کا جواب یہ ہے کہ استنبول فتح کی تاریخ بتاتی ہے کہ سلطان محمد الفاتح نے کوئی خون ریزی نہیں کی تھی، حکومت نہیں تھی لیکن یہاں عرصۂ دراز تک عیسائی موجود تھے، جو ان ممتلکات کے دعویدار تھے، جن سے یہ خریدا گیا تھا اور یہ کوئی نئی بات نہیں کہ عیسائیوں سے مسلمانوں نے چرچ خریدا ہو ـ عصر قریب میں ہی اس کی کئی مثالیں موجود ہیں ۔

شاید یہی وجہ ہے کہ جب حکومت وقت نے آیا صوفیا کو میوزیم بنانے کے مصطفی کمال اتاترک ۱۹٣٤ء کے حکم کو عدالت میں چیلنج کرنے کا فیصلہ کیا، تو ان کو کسی دشواری کا سامنا کرنا نہیں پڑا اور نہ عدالت کو فیصلے میں کوئی تردد کا، کیوں کہ اس کی ملکیت کے کاغذات موجود ہیں جس کا تقریبا ہر ترکی کو علم ہے، اس لیے فیصلہ سے قبل و بعد مخالف سیکولر پارٹیوں نے پر زور مخالفت بھی نہیں کی بلکہ کئی سیاستدانوں نے اس کی تحسین کی یہاں تک کہ سابقہ صدارتی امیدوار محرم اینجہ جو نظریاتی کمالسٹ ہے،اس نے ٹویٹ کرتے ہوئے کہا کہ اگر مجھے دعوت دی گئی تو میں بھی افتتاحی تقریب میں نماز پڑھنے آیا صوفیا جاؤں گا۔

نوٹ؛ یہ سند بعد میں سرکاری ریکارڈ کے لیے لاطینی حروف میں تحریر کی گئی ہے اور اصل کے ساتھ موافق کی تصدیق کی گئی ہے۔

ڈاکٹرمحمدرضی الاسلام ندوی 

میری بہو صالحہ نے شام کو ، جب میں دفتر میں تھا ، روتے ہوئے فون کیا : ” بابا (دادا) کا انتقال ہوگیا _” میں نے انّا للہ و انا الیہ راجعون پڑھی اور کہا : ” فوراً تیّار ہوجاؤ،ہم چلتے ہیں”ـ بھائی آفتاب عالم صاحب نے فوراً لکھنؤ تک کی فلائٹ کا ٹکٹ بک کرادیا، چھوٹے بھائی نے لکھنؤ گاڑی بھیج دی،اس طرح الحمد للہ فجر سے قبل گھر پہنچ گیا اور جنازہ میں شرکت کا موقع مل گیاـ

میرے وطن میں بدعات و خرافات کا بڑا زور ہے، تجہیز و تکفین ، نماز جنازہ اور تدفین وغیرہ میں لوگ بہت سی ہندوانہ اور بہت سی غیر شرعی رسوم پر عمل کرتے ہیں اور جو ان رسوم سے اجتناب کرے اسے ‘ وہابی’ کہتے ہیں،اس اعتبار سے میں بھی وہابی مشہور ہوں،شدّت پسندی اس حد تک ہے کہ نماز جنازہ سے قبل اعلان کیا جاتا ہے کہ وہابی لوگ الگ ہوجائیں اور نماز پڑھانے والا وہابی ہو تو اس کے پیچھے نماز نہیں پڑھتےـ

خاندان کے لوگوں نے مجھ سے کہا کہ میں نماز پڑھاؤں، میں نے جواب دیا : ” ایسا نہ ہو کہ اس سے انتشار ہو اور کچھ لوگ نماز نہ پڑھیں”ـ انھوں نے اطمینان دلایا کہ ایسا نہیں ہوگا،میں نے بہتر سمجھا کہ نماز سے قبل کچھ تذکیر کردوں ـ

میں نے عرض کیا کہ موت سے بڑا کوئی واعظ نہیں،میت کی نعش ہر شخص کو یاد دہانی کراتی ہے کہ اسے بھی مرنا ہے، موت کسی کو اور کبھی آسکتی ہے، بوڑھا بھی مرتا ہے ، ادھیڑ عمر کا بھی ، جوان بھی ، نوجوان بھی ، بچّہ بھی ، مرد بھی ، عورت بھی _ ہر شخص کو فکر کرنی چاہیے کہ پتہ نہیں کہ کب اس کی موت آجائے _ اللہ تعالیٰ کا ارشاد ہے :

” اے لوگو جو ایمان لائے ہو ! اللہ سے ڈرو جیسا کہ اس سے ڈرنے کا حق ہے _ تم کو موت نہ آئے مگر اس حال میں کہ تم مسلم ہو _” (آل عمران :102)

میں نے عرض کیا کہ ہم میں سے ہر شخص کو اس کی فکر کرنی چاہیے کہ وہ اپنے ساتھ کیسے اعمال لے کر جائے گا _ مرنے کے بعد نہ اس کا مال اس کے کچھ کام آئے گا نہ اہل و عیال اس کو کچھ نفع پہنچا سکیں گے _ اللہ کے رسول صلی اللہ علیہ و سلم نے فرمایا ہے :” آدمی کے ساتھ تین چیزیں جاتی ہیں : دو واپس آجاتی ہیں ، ایک آگے ساتھ جاتی ہے : آدمی کا مال اور اس کے اہل و عیال واپس آجاتے ہیں ، اس کا عمل آگے جاتا ہے _” (بخاری :6514 ،مسلم:2960)

میں نے عرض کیا کہ اللہ کے رسول صلی اللہ علیہ و سلم نے فرمایا ہے : ” تین چیزیں ہیں جن کا نفع آدمی کو اس کے مرنے کے بعد بھی پہنچتا رہتا ہے :(1)کوئی ایسی چیز چھوڑ جائے یا کام کرجائے جس سے لوگ برابر فائدہ اٹھاتے رہیں _(2)کوئی ایسا علم چھوڑ جائے جس سے لوگ برابر استفادہ کرتے رہیں _ (3) ایسی اولاد چھوڑ جائے جو اس کے لیے دعا و استغفار کرتی رہے  _(مسلم:1631)    ہمارے علاقے میں بدعات کا اتنا زور ہے کہ نماز جنازہ سے قبل میلاد ہوتا ہے ، فاتحہ پڑھی جاتی ہے ، بتاشے بٹتے ہیں ، قبر میں نعش کے ساتھ ‘عہد نامہ ‘ نامی ایک کتاب رکھی جاتی ہے ، بعض لوگ مٹھائی اور کھانے پینے کا سامان بھی رکھتے ہیں ، تدفین کے بعد جب لوگ رخصت ہونے لگتے ہیں تو کوئی شخص اذان دیتا ہے  _ اس موقع پر بعض رشتے داروں نے ان سب کی تیاری کرلی تھی ، لیکن میں نے آخر میں سختی سے کہا کہ یہ سب چیزیں نہیں ہوں گی _ گھر والوں نے تائید کی اور الحمد للہ کوئی غیر شرعی عمل نہیں ہواـ

بعد میں معلوم ہوا کہ بعض لوگوں نے میرے نماز پڑھانے کی وجہ سے نماز جنازہ میں شرکت نہیں کی ، بعض لوگ نماز میں شامل تو ہوئے ، لیکن بعد میں ملامت کرتے ہوئے پائے گئے کہ وہابی کے پیچھے نماز پڑھی ، پتہ نہیں، ہوئی بھی یا نہیں _ اظہارِ ناراضی کے لیے وہ تدفین میں شامل نہیں ہوئےـ

افسوس ، مسلمانوں میں کس قدر جہالت عام ہے ؟! ان کے درمیان کس قدر اصلاح کا کام  کرنے کی ضرورت ہے؟!!