سونیا گاندھی کی بہار میں پہلی ورچوئل ریلی، جان بوجھ کر ملک میں خوف کا ماحول پیدا کیا جارہا ہے:سونیا گاندھی

پٹنہ:کانگریس کی عبوری صدر سونیا گاندھی نے جمعہ کے روز بہار کے چمپارن میں’ گاندھی چیتنا ‘ نامی ریلی سے ورچوئل میڈیم کے ذریعہ خطاب کیا۔ انہوں نے اپنے خطاب میں مرکزی حکومت کو شدید تنقید کا نشانہ بنایا۔ کانگریس صدر نے کہا کہ ملک میں جان بوجھ کر خوف کی فضا پیدا کی جارہی ہے، کچھ لوگ خوف ، سراسیمگی اور جذبات کی تجارت کرکے حکومت چلا رہے ہیں۔ سونیا نے لوگوں سے احتیاط برتنے اور صحیح فیصلہ لینے کا اپیل کی۔سونیا گاندھی نے چمپارن میں بابائے قوم مہاتما گاندھی کی مورتی کی بھی نقاب کشائی کی۔سونیا گاندھی نے کہا کہ کانگریس کی ہر پالیسی میں عوام کی شمولیت ناگزیر تھی ، لیکن آج کچھ لوگوں کے مفاد کے لئے پالیسیاں وضع کی جارہی ہیں۔ کانگریس نے پسماندہ ، دلتوں ، خواتین ، نوجوانوں اور کسانوں کے تحفظ اور انہیں خود کفیل بنانے کیلئے جتنے بھی قوانین وضع کئے ، انہیں کمزور کیا جارہا ہے ۔خیال رہے کہ اس سے قبل مہاتما گاندھی کے 151 ویں اور سابق وزیر اعظم لال بہادر شاستری کی 116 ویں یوم پیدائش کے موقع پر سونیا گاندھی نے کہا کہ کسان زرعی قانون کے خلاف سراپا احتجاج ہیں، لیکن حکومت سرد مہری کا مظاہرہ کررہی ہے ۔