شاہین باغ احتجاج کے خلاف اب سپریم کورٹ میں عرضی داخل

نئی دہلی: دہلی کے شاہین باغ میں شہریت قانون کو لے کر چل رہے مظاہرے کے خلاف بی جے پی کے سابق ممبر اسمبلی نند کشور گرگ نے سپریم کورٹ میں عرضی داخل کی ہے۔یہ لوگ ہائی کورٹ میں پھٹکارکھانے اورپولیس کولاء اینڈآرڈربحال رکھنے کی ہدایت کے بعداب سپریم کورٹ گئے ہیں۔ عرضی میں مطالبہ کیا گیا ہے کہ شاہین باغ میں مظاہرین کو ہٹایا جائے تاکہ کالندی کنج اورشاہین باغ کا راستہ پھر سے کھل سکے۔عرضی میں عدالت سے اپیل کی گئی ہے کہ عدالت مرکزی حکومت اور متعلقہ محکمہ کوراستہ خالی کروانے کا حکم دے۔ساتھ ہی عوامی مقامات پر دھرناکی پابندی لگانے کی بھی مانگ کی گئی ہے اور عدالت سے اس معاملے پر مرکزی حکومت سے گائیڈلائن بنانے کے لیے بھی حکم دینے کی درخواست کی گئی ہے۔بی جے پی لیڈر کی جانب سے دائر درخواست میں کہاگیاہے کہ طویل عرصے سے جاری دھرنے کی وجہ سے لوگوں کو بے حد پریشانی کاسامناکرناپڑرہاہے۔