پروفیسر آذر می دخت صفوی ٹیگور نیشنل فیلو شپ سے سرفراز

علی گڑھ:ممتاز فارسی اسکالر پروفیسرآذرمی دخت صفوی، سابق ڈین، آرٹس فیکلٹی اور سابق صدر، شعبہ فارسی کو حکومت ہند کی وزارت ثقافت نے موقر ٹیگور نیشنل فیلوشپ برائے ثقافتی تحقیق (ٹی این ایف سی آر) سے سرفراز کیا ہے۔اس فیلو شپ کے تحت پروفیسر صفوی ہندوستانی ثقافت اور تاریخ سے متعلق فارسی کے قیمتی نسخوں پر کام کریں گی۔ اس فیلو شپ کے دوران 80 ہزار روپے ماہانہ اور سالانہ ڈھائی لاکھ روپئے کی ہنگامی گرانٹ دی جاتی ہے۔ یہ اعزاز ان اسکالرز کو دیا جاتا ہے جن کے پاس قابل قدر علمی یا پیشہ ورانہ اسناد ہیں اور جن کی علم کے فروغ میں نمایاں حصہ داری ہے۔پروفیسر صفوی نے کئی اعزاز حاصل کیے ہیں اور اپنی مادر علمی علی گڑھ مسلم یونیورسٹی کا نام روشن کیا ہے۔ بین الاقوامی سطح پر معروف فارسی اسکالر کی حیثیت سے انہیں کئی موقر اعزازات سے سرفراز کیا جا چکا ہے جن میں پریسیڈنٹ آف انڈیاایوارڈ، لائف ٹائم اچیومنٹ ایوارڈ، ایران، غالب ایوارڈ اور حکومت ایران کا سعدی ایوارڈشامل ہیں۔ وہ ہندوستان میں پہلی فارسی اسکالر ہیں جنھوں نے ٹیگور قومی فیلوشپ حاصل کی۔پروفیسر صفوی علی گڑھ مسلم یونیورسٹی کے فارسی ریسرچ انسٹی ٹیوٹ کی بانی اور سابق ڈائریکٹر ہیں۔ فی الحال وہ اس انسٹی ٹیوٹ کی مشیرہیں۔