سیتامڑھی: (شمس عالم قاسمی) تھانہ نانپور،بوکھرا پنچایت،کریم گنج جھٹکی کے زیر اہتمام بروز جمعہ 25 ستمبر کو مدرسہ اصلاح المسلمين میں ایک تعلیمی بیداری و انعامی اجلاس منعقد ہوا جس میں تقابلی امتحان میں شرکت کرنے والے گاؤں کے تمام مسلم و غیر مسلم طلبہ و طالبات کو عمومی انعامات، سرٹیفکیٹ اور اول، دوم، سوم پوزیشن حاصل کرنے والوں کو خصوصی انعامات اور سرٹیفکیٹ سے نواز کر حوصلہ افزائی کی گئی ـ
مدرسہ جامعہ سلمه للبنات کے مہتمم جناب قاری ریحان صاحب کی زیر صدارت اور جناب عبدالسميع صاحب کی زیر سرپرستی اجلاس کا آغاز ہوا جبکہ اس کی نظامت مدرسہ کریمیہ بشارت العلوم کے ناظم تعلیمات مولانا رضاء اللہ صاحب قاسمی نے فرمائی، معروف شاعر قاری مزمل حیات نے اپنے نعتیہ کلام سے سامعین کے قلوب کو محظوظ کیا، انڈین پبلک اسکول کے ذمہ دار مولانا سجاد خلیق قاسمی نے مجمع عام سے خطاب کیا اور علم کی اہمیت و افادیت پر روشنی ڈالی،دی سن رائز پبلک اسکول کے چیئرمین جناب شہباز صاحب نے بھی تعلیمی بیداری کے عنوان سے اپنے تجربات و مشاہدات سے سامعین کو آگاہ کیا، مولانا تنویر عالم مظاہری نے تنظیم کے اغراض و مقاصد و کارگزاری کو تفصیل کے ساتھ پیش کیا،جامعہ ملیہ اسلامیہ کے طالب علم اور اس پروگرام کے منتظم جناب فہیم اکرم نے شرکابزم سے گاؤں کی تاریخ اور جنرل نالج کے کئی سوالات کئے اور صحیح جواب دینے والوں کو میڈل سے نوازا،علاوہ ازیں پانچ طلبہ و طالبات نے بھی اس نشست میں اپنی تقریری صلاحیت کا بھر پور مظاہرہ کیا، تنظیم کے سرپرست مفتی حیدر جمال قاسمی، گاؤں کی معروف شخصیت حاجی مجیب الرحمن، ماسٹر جناب عقیل عرف چنو، ماسٹر ننہے کے علاوہ دیگر حضرات نے بھی بڑی تعداد میں شرکت فرماکر اس جلسہ کو کامیاب بنانے میں اہم کردار ادا کیاـ تنظیم کے صدر محمد شمس قاسمی نے اپنے ایک برقی پیغام کے ذریعے تقابلی امتحان میں شریک ہونے والے، اعلی نمبرات سے کامیابی حاصل کرنے والے تمام طلبا و طالبات کو مبارک باد پیش کی، ان کے روشن اور تابناک مستقبل کیلئے اپنے دلی جذبات و نیک خواہشات کا اظہار کیا، اجلاس میں شرکت کرنے والے مہمانوں، اس پروگرام کیلئے تعاون پیش کرنے والے کارکنوں اور گاؤں کے تمام ذمہ دار حضرات کا بھی تہ دل شکریہ ادا کیا اور پروگرام کے اشتہار کے ذریعہ پڑھے گا بہار بڑھے گا بہار کا نعرہ دے کر معاشرے میں سماجی ترقی اور تعلیمی بیداری کی فضا ہموار کرنے کی بہت ہی عمدہ کوشش کی گئی۔
