ممبئی پولیس نے مہاجر مزدوروں سے کی اپیل:پولیس کواپنی تفصیلات فراہم کریں،ٹرین کا انتظام ہو جائے گا

ممبئی:کوروناوائرس پر قابو پانے کے لئے ملک میں جاری لاک ڈاؤن کے درمیان دوسری ریاستوں میں پھنسے مہاجر مزدوروں کو ان کے آبائی ریاست میں منتقل کرنے کا کام چل رہا ہے۔ملک کی اقتصادی راجدھانی ممبئی میں بڑی تعداد میں دوسری ریاستوں سے لوگ کام کرنے آتے ہیں۔اب انہیں واپس لانے کے لئے اسپیشل ورکرزٹرینیں چلائی جارہی ہیں۔ممبئی پولیس کے ایک سینئر افسر نے مہاجر مزدوروں سے اپیل کی ہے کہ ان کے لئے ٹرینوں کا انتظام کیا جا رہا ہے اور کوئی بھی ٹیمپو، ٹریکر یا ٹرک سے اپنے گھر نہیں نکلے۔ممبئی پولیس کے اسسٹنٹ کمشنر (اے سی پی) نند کشور مورے نے بتایا کہ ممبئی سے ہر روز 3-4 ٹرینیں چلیں گی۔آج زون 5 سے گونڈہ کے لیے ٹرین چل رہی ہے۔جس میںساڑھے گیارہ سو لوگ جا رہے ہیں۔رات کو پرتاپ گڑھ کے لیے ٹرین جانے والی ہے۔کل جونپور جائے گی میری سب سے درخواست ہے آپ جہاں ہیں وہیں انتظارکریں۔اپنا فارم بھر دیجیے آپ کو میڈیکل کی ضرورت نہیں ہے۔صرف اپنا ڈیٹیل پولیس اسٹیشن میں دے دیجئے آپ کی ٹرین کا انتظام ہو جائے گا۔آپ چوری چھپے ٹیمپو، ٹرک، ٹینکر سے مت جائیں۔تمام مسافروں کو بلانے کے بجائے پولیس نے لوگوں کو 25-30 لوگوں کے گروپ میں تقسیم کیا ہے۔ہر گروپ کا سربراہ بنایا گیا ہے۔ان سے ہی کاؤنٹر سے ٹکٹ خریدنے کے لئے کہا گیا ہے۔ریلوے نے بدھ کو کہا کہ اس نے ایک مئی سے اب تک 122 ورکرز اسپیشل ٹرینیں چلائی ہیں جن میںلاک ڈاؤن کی وجہ سے ملک کے مختلف حصوں سے پھنسے ہوئے سوا لاکھ سے زیادہ مزدوروں کو منزل تک پہنچایا گیا۔