ملک میں کورونا وائرس کے27114 نئے مریض،مجموعی تعداد 8.2 لاکھ

نئی دہلی:ایک ہی دن ملک میں کورونا وائرس کے ریکارڈ 27114 نئے مریض سامنے آئے ہیں اور اس کے ساتھ ہی مریضوں کی کل تعداد آٹھ لاکھ سے تجاوز کرگئی۔یہ مسلسل آٹھواں دن ہے جب ملک میں کورونا وائرس کے معاملے میں 22000 سے زیادہ آئے ہیں۔ اعدادوشمار کے مطابق گذشتہ 24 گھنٹوں میں 519 افراد کی ہلاکت کے ساتھ ہلاکتوں کی تعداد 22123 ہوگئی ہے۔ہفتے کے روز ملک میں مریضوں کی تعداد بڑھ کر 820916 ہوگئی جن میں سے 283407 افراد زیر علاج ہیں اور 515385 افراد علاج کے بعد صحت یاب ہوچکے ہیں۔ اس طرح سے تقریباً62.78 فیصد مریض ٹھیک ہو چکے ہیں۔ گزشتہ 24 گھنٹوں میں 519 اموات میں سے 226 مہاراشٹر میں، تامل ناڈو میں 64، کرناٹک میں 57، دہلی میں 42، اتر پردیش میں 27 اور مغربی بنگال میں 26 اموات ہوئیں۔ان کے علاوہ آندھرا پردیش میں 15، گجرات میں 14، تلنگانہ میں آٹھ اور راجستھان میں چھ افراد ہلاک ہوئے ہیں۔ آسام اور جموں و کشمیر میں پانچ افراد، بہار، مدھیہ پردیش، اڑیشہ اور پنجاب میں چارچار، ہریانہ اور پڈوچیری میں تین تین اور چھتیس گڑھ میں دو افراد کی موت ہوئی۔