علی گڑھ:علی گڑھ مسلم یونیورسٹی کے کمیونٹی میڈیسن شعبہ کی ڈاکٹر سائرہ مہناز نے صحت عامہ کے موضوع پر منعقدہ آن لائن کانفرنس 2020میں ’’کووڈ سے پیدا شدہ حالات میں مہاجر مزدوروں کی صورت حال : ہندوستان کے تناظر میں‘‘ موضوع پر افتتاحی خطبہ پیش کرتے ہوئے کہا کہ مہاجر مزدور مختلف صوبوں کے معاشی نظام کو مستحکم بنانے میں اہم کردار ادا کرتے ہیں ، اس کے باوجود اس کے ثمرات سے وہ خود فیضیاب نہیں ہو پاتے۔ انہوں نے کہا کہ موجودہ کووڈ حالات میں ملک گیر تالا بندی کے ابتدائی دنوں میں مہاجر مزدوروں کو سب سے زیادہ اس کا خمیازہ بھگتنا پڑا اور انہیں روزگار کھونے کے ساتھ ہی بڑی تعداد میں ہجرت کے منفی اثرات برداشت کرنے پڑے۔ڈاکٹر مہناز نے کہا کہ کورونا تعدی سے پیدا شدہ حالات نے مہاجر مزدوروں کوسب سے زیادہ متاثر کیا ہے اور اس بات کی ضرورت ہے کہ ان کی بازآبادکاری اور روزگار کے لئے خصوصی اقدام کیے جائیں۔ اس کے ساتھ ہی ان کے لیے صحت خدمات کے نظام کو بھی مستحکم کیا جائے۔ڈاکٹر سائرہ مہناز کو ان کے خطبے کی بنیادپر آئندہ 14-15ستمبر کو بینڈنگ بین الاقوامی کانفرنس میں شرکت کے لیے اسکالر شپ سے سرفراز کیا گیا ہے۔