تبدیلی مذہب کیس میں گرفتار مولانا کلیم صدیقی ڈیڑھ سال بعد رہا

لکھنؤ :مشہور مبلغ و داعی مولانا کلیم صدیقی ڈیڑھ سال بعد آج جیل سے رہا ہو گئے ۔ آج شام مولانا کے وکیل اسامہ ادریس ندوی نے ان کا جیل کے باہر استقبال کیا۔ الہ آباد ہائی کورٹ کی لکھنو بیچ سے ضمانت منظور ہونے کے تقریبا ایک ماہ بعد مولانا کلیم صدیقی کی جیل سے رہائی عمل میں آئی ہے ۔ واضح رہے کہ تبدیلی مذہب کیس میں مولانا کلیم صدیقی کو 5 اپریل کو مشروط ضمانت ملی تھی ۔ الہ آباد ہائی کورٹ کی لکھنؤ بنچ نے گزشتہ ڈیڑھ سال سے جیل میں بند مولانا کلیم صدیقی کی ضمانت منظور کی تھی۔ اتر پردیش اے ٹی ایس نے مولانا کلیم صدیق کو جبری تبدیلی مذہب کے الزام میں میرٹھ سے ستمبر 2021 کو گرفتار کیا تھا اور ان کے خلاف مختلف سنگین نوعیت کے مقدمات درج کرتے ہوئے جیل بھیج دیا گیا تھا۔ اس درمیان کئی مرتبہ ان کی ضمانت کی درخواست مسترد کر دی گئی تھی ، مولانا کے وکیل اسامہ ادریس ندوی نے سوشل میڈیا پر ان کی جیل سے رہائی کی اطلاع دیتے ہوئے پوسٹ کیا کہ الحمد للہ حضرت مولانا کلیم صدیقی صاحب جیل سے باہر آگئے ہیں۔ یونائٹیڈ اگینسٹ ہیٹ کے روح رواں ندیم خان نے لکھا کہ مولا نا کلیم صدیقی صاحب جیل سے باہر آگئے ہیں ،ضمانت کی مکمل کارروائی پوری گئی ہے ، ان سے فون پر بات کر کے دلی خوشی ہوئی۔