مالونی بلڈنگ سانحہ:جمعیۃعلما کے وفد کا دورہ،متاثرین کے لیے راحت رسانی کا نظم

ممبئی :آج جمعرات سہ پہر 3؍بجے مولانا حلیم اللہ قاسمی جنرل سکریٹری جمعیۃ علماء مہاراشٹر (ارشد مدنی ) کی قیادت میںمولانا محمد اسلم قاسمی ،مفتی افضل حسین قاسمی،حافظ محمد عرفان ،ڈاکٹر اسرار احمد،مولانا ظہیر الدین قاسمی،مولانا نذیر الاسلام قاسمی،مولانا وسیم قاسمی،محمد انس،حافظ سعید،حافظ کلام نابینا،اقبال بھائی ،نورالدین بھائی وغیرہ پر مشتمل ایک وفد نے گزشتہ شب ۱۱؍ بجے ممبئی میں ہونے والی شدید طوفانی بارش کے سبب کلکٹر کمپاؤنڈمالونی ملاڈ ویسٹ میں حادثہ کا شکار ہونے والی تین منزلہ عمارت کا دورہ کیا۔
خیا ل رہے کہ منہدم شدہ مکان میں۳؍ فیملی رہائش پذیر تھیں ۔اس حادثہ میں خواتین اور بچوں سمیت ۱۱؍ افراد شہید اور ۷؍ زخمی ہوئے تھے،مولانا حلیم اللہ قاسمی نے متاثرین سے ملاقات کی اورمیونسپل عملہ کی طرف سےخالی کرائے گئے متصلہ عمارت کے مکینوں جوحادثہ میں متاثر50؍ افراد کو محفوظ مقام پر پہونچا دیا کہ تین روز کے طعام کی ذمہ داری لیتے ہوئے مقامی ذمہ داروں کو تیس ہزار روپے حوالے کر دیے، اور ان کے مکان میں واپسی پر اگر ضرورت محسوس ہوئی تو ان کے لیے راشن بھی فراہم کیا جائے گانیز مقامی ذمہ داروں کو ہدایت دی کہ زخمیوں کو علاج و معالجہ کے لیے درکار جن دوائیوں کی ضرورت ہو اس کا آپ میڈیکل اسٹورسے انتظام کیجیے ،جمعیۃ علماء مہاراشٹر اس کی ادائیگی کرے گی ۔ اسی طرح ۹؍ سالہ فیضان جس کے سرپرستوں میں کوئی نہیں بچا ، اس کے تعلیم و کفالت کی ذمہ داری جمعیۃ علماء مہاراشٹر نےلی ہے۔واضح رہے کہ ممبئی کے مضافات میں واقع ملاڈ ویسٹ میں واقع کچی بستی میں شدید بارش کی وجہ سے حادثہ پیش آیا جس میں تادم تحریری گیارہ افراد کے جاں بحق ہونے کی اطلاع ہے جبکہ زخمیوں کی تعداد سات بتائی جارہی ہے جس میں ایک نو سالہ بچہ یتیم ہوگیا ہے جس کی کفالت کی ذمہ داری جمعیۃ نے اٹھائی ہے۔