کسان تحریک:امیتابھ بچن کے گول مول ٹویٹ پرسوال،صاف صاف بتائیں،آپ کس طرف ہیں؟

ممبئی:کسان 2 ماہ سے زیادہ عرصے سے مرکزی حکومت کے متنازعہ زرعی قوانین کے خلاف احتجاج کر رہے ہیں۔ کسانوں کی تحریک کی حمایت میں ریحانہ ، میا خلیفہ ، مینا ہیریس اور گریٹا تھنبرگ جیسی بین الاقوامی مشہور شخصیات کے ٹویٹ کے بعدیہ تحریک ایک بار پھر زیر بحث آئی ہے۔ اس کے بعد اکشے کمار ، سنیل شیٹی ، اجے دیوگن ، کنگنا رناوت ، لتا منگیشکر ، سچن تندولکر جیسے لوگوں نے حکومت کی حمایت میں ٹویٹ کیا ہے اور اسے ہندوستان کا داخلی مسئلہ قرار دیا ہے۔جب کہ لوگوں کاسوال ہے کہ جب وزیراعظم نریندرمودی امریکہ میں’اب کی بارٹرمپ سرکار‘کہتے ہیں تویہ کسی ملک میں داخلی مسئلہ میں مداخلت نہیں ہوتی ہے؟اسی طرح اگرکوئی ملک بھارت کی تعریف کرتاہے تواسے بی جے پی اورمودی کی تعریف بتادیاجاتاہے اورپھرکہاجاتاہے کہ پوری دنیامیں ڈنکابج رہاہے۔لیکن جب کہیں تنقیدہوتی ہے تواسے داخلی مسئلہ بتاکرمعاملے کودوسرارخ دینے کی کوشش کی جاتی ہے۔ اگرچہ امیتابھ بچن نے ابھی تک کھل کر کوئی ٹویٹ نہیں کیا ہے لیکن انہوں نے ایک ٹویٹ کیا ہے ، جس کی وجہ سے لوگ انہیں سوشل میڈیا پر ٹرول کررہے ہیں اور پوچھ رہے ہیں کہ وہ کس کی حمایت کررہے ہیں؟ کیا آپ کسان ہیں یا حکومت؟ امیتابھ بچن نے ٹویٹ میں لکھاہے کہ منطقی چیز کا جواب منطقی طورپردیاجاسکتا ہے ، لیکن لاجک آستھاکا جواب نہیں ہے۔اس پر لوگ امیتابھ بچن سے براہ راست ٹویٹ کا مطالبہ کررہے ہیں۔ تاہم کچھ یہ بھی مانتے ہیں کہ امیتابھ دبے ہوئے الفاظ میں حکومت کی حمایت کر رہے ہیں۔