جماعت اسلامی کے وفد کا دورۂ بھرت پور،مقتولین کے اہل خانہ سے ملاقات، قاتلوں کو قرار واقعی سزا دینے کا مطالبہ

نئی دہلی:جماعت اسلامی ہند کے نائب امیر پروفیسر سلیم انجینئر کی قیادت میں ایک وفد نے راجستھان کے بھرت پور ضلع کے گھاٹمیکا گائوں کا دورہ کیا اور وہاں جنید (35ا(ور ناصر (25)کے اہل خانہ سے ملاقات کی۔ان دونوں نوجوانوں کو اغوا کر کے بے دردی سے قتل کردیا گیا تھا اور ان کی لاشوں کو مہندرا بلورو کار میں رکھ کر آگ لگا دی گئی تھی۔یہ واقعہ پندرہ فروری کو پیش آیا تھا۔وفد نے دونوں مقتولین کے بھائیوں اور خاندان کے دیگر افراد سے ملاقات کی اور متاثرہ خاندانوں سے ہمدردی کا اظہار کیا۔ وفد نے گائوں کی عیدگاہ کا بھی دورہ کیا جہاں گائوں کے لوگ پندرہ فروری سے ہی احتجااجی دھرنا کررہے ہیں۔گائوں والوں کا مطالبہ ہے کہ تمام ملزمان کی فوری گرفتاری اور جنید اور ناصر کے خاندانوں کو ایک ایک کروڑ روپے معاوضہ دیا جائے۔
اس موقع پر پروفیسر سلیم نے کہا کہ ’’ ہم گائوں والوں کے احتجاج کی حمایت کرتے ہیں اور متاثرین کے خاندانوں کے ساتھ اظہار یکجہتی کرتے ہوئے دونوں خاندانوں کو ایک ایک کروڑ روپے راجستھان حکومت کی جانب سے ادا کئے جانے کا مطالبہ کرتے ہیں ۔ جماعت پوری مضبوطی کے ساتھ انصاف کے لئے ان کے ساتھ کھڑی ہے اور اس بات کو یقینی بنانے کے لئے ہر ممکن اقدامات کرے گی کہ متاثرین کے اہل خانہ کو انصاف ملے اور مستقبل میں ایسے واقعات کا اعادہ نہ ہو‘‘۔ پروفیسر سلیم نے کہا کہ ’’حیران کن بات یہ ہے کہ ہریانہ پولیس کے ہی کچھ افراد میوات خطے کے مسلمانوں کے خلاف اس قسم کی سرگرمیوں اور جرائم میں براہ راست ملوث ہیں۔ اگر چہ راجستھان پولیس نے کارروائی کرتے ہوئے ایف آئی آر درج کرکے ایک ملزم کو گرفتار کرلیا ہے لیکن ابھی بھی بقیہ ملزمین گرفتاری سے بچے ہوئے ہیں۔ اس لئے گائوں والے پولیس کی کارروائی سے مطمئن نہیں ہیں۔گائوں والوں کا مطالبہ ہے کہ تمام ملزمان کو گرفتار کرکے سزا دی جائے۔‘‘پروفیسر سلیم نے خاطی پولیس اہلکاروں کے خلاف قانونی کارروائی کا مطالبہ کرتے ہوئے کہا کہ جن پولیس والوں نے مجرموں کو زخمی متاثرین کے ساتھ جانے کی اجازت دی اور بعد میں ان کو کار میں بند کرکے آگ لگادی گئی گئی تھی ، ان کے خلاف قانونی کارروائی ہونی چاہئے‘‘۔
پروفیسر سلیم نے ان لوگوں کی بھی مذمت کی جو دونوں نوجوانوں کے قتل میں ملوث ملزمان کے حق میں احتجاج کررہے ہیں ۔انہوں نے کہا کہ ’’ راجستھان اور ہریانہ کی ریاستی حکومتیں اس معاملے میں ہونے والی تحقیقات میں مکمل تعاون دے اور اصل مجرموں کو قانون اور آئین کے مطابق انصاف کے کٹہرے میں لائے‘‘۔ وفد کو گائوں والوں نے بتایا کہ ہریانہ اور راجستھان کے میوات علاقے میں کئی سالوں سے ایک گروہ مجرمانہ سرگرمیوں میں ملوث ہے۔ہریانہ پولیس کا کردار مایوس کن ہے۔وہ مجرموں کی حمایت کررہی ہے۔ گائوں والوں نے یہ بھی بتایا کہ ہجومی تشدد کا شکار ہونے والوں کو مجرم خود ہی فیروز پور جھرکا تھانے لے گئے۔ اس کے باجود پولیس نے مجرموں کو گرفتار نہیں کیا ۔ ہریانہ پولیس نے مجرموں کو متاثرین کے ساتھ سنگین حالت میں جانے کی اجازت دی تھی۔