اس سال کورونا کی وجہ سے ہندوستان سے عازمین حج نہیں جائیں گے

نئی دہلی:مرکزی حکومت نے اس سال ہندوستان سے عازمین حج کے لئے نہ بھیجنے کا فیصلہ کیا ہے۔ مرکزی اقلیتی امور کے وزیر مختار عباس نقوی نے کہا کہ ایسا فیصلہ کورونا وائرس کے بحران کی وجہ سے کیا گیا ہے۔نقوی نے بتایاکہ گذشتہ رات سعودی عرب کی حکومت کے وزیر حج کا فون آیا تھا۔ انہوں نے پوری دنیا میں کورونا کی وبا کے بارے میں تبادلہ خیال کیا۔ انہوں نے بتایا کہ اس بار عازمین حج کو ہندوستان سے نہیں بھیجا جانا چاہئے۔اس لیے ہم نے سعودی عرب کو مدنظر رکھتے ہوئے، اس بار ہندوستانی حاجیوں کو نہ بھیجنے کا فیصلہ کیا ہے۔ انہوں نے بتایا کہ تمام 2 لاکھ 30 ہزار حجاج کرام کی رقم واپس کردی جائے گی۔ ہندوستانی حج کمیٹی نے گزشتہ ہفتہ حج پر نہ جانے کے خواہشمند افراد کو رقم واپس لینے کا اختیار بھی دیا تھا۔اہم بات یہ ہے کہ کورونا کی وجہ سے قیاس آرائوں کے بعد سعودی حکومت نے حج پر کچھ پابندیوں کی اجازت دی ہے۔ اس سال صرف سعودی شہری اور تارکین وطن حج کر سکتے ہیں۔ سعودی حکومت کا کہنا ہے کہ لوگوں کی حفاظت کے پیش نظر محدود تعداد میں لوگوں کو حج کی اجازت ہے۔ سعودی عرب میں مسلسل کورونا وائرس کے معاملے سامنے آرہے ہیں۔