ہندی اردوساہتیہ ایوارڈ کمیٹی کا 28واں پانچ روزہ فراقؔ بین الاقوامی فیسٹویل 8؍اکتوبر سے

لکھنؤ:’بہت پہلے سے ہم ان قدموں کی آہٹ جان لیتے ہیں۔تجھے اے زندگی ہم، دورسے پہچان لیتے ہیں‘…جیسے اشعار کے خالق مشہور شاعر رگھوپتی سہائے فراقؔ گورکھپوری پر مبنی ہندی اردو ساہتیہ ایوارڈ کمیٹی کا۲۸واں پانچ روزہ بین الاقوامی ادبی فیسٹویل8؍اکتوبرسے12؍اکتوبر تک منعقد کیا جائے گا۔افتتاحی پروگرام 8؍اکتوبر کو ڈی جی ولاس ہال ممبئی میں اور ادبی مذاکرہ سیشن لکھنؤمیں 9اور10؍اکتوبرکوہوگا۔ فیسٹویل میں معروف قلم کار،ادیب وشاعر شامل ہوں گے۔ایوارڈ کمیٹی کے جنرل سیکریٹری اطہر نبی نے فراق کو خراج عقیدت پیش کرتے ہوئے کہا کہ فراق کی شاعری کلاسیکی اور جدید شاعری کا حسین امتزاج ہے۔ ان کی زندگی کا ہر باب ہندوستانی ذہن وتہذیب کی نمائندگی کرتا ہے۔فراق گورکھپوری اردو کے ان شعرا میں سے ہیں جنہوں نے شاعری کو ایک منفرد مقام بخشا۔فراق ؔ اردفو شاعری میں ایک نئی آواز،نیالب ولہجہ،نیاطرزِاحساس،ایک نئی قوت،بلکہ ایک نئی زبان لیکر آئے ہیں۔مسٹرنبی نے مزیدکہاکہ کمیٹی اس سے قبل سابق صدر جمہوریہ اے پی جے عبدالکلام،کنوربے چین، گوپی چندنارنگ،اشوک چکردھر،مجروح سلطان پوری، ہری ونش رائے بچن، علی سردار جعفری جیسے مختلف اہم شخصیات پر27فیسٹویل بین الاقوامی سطح کے کراچکی ہے۔ جن میں امریکہ کناڈا، یوکے، مصر، افغانستان، پاکستان، قزاخستان، ترقی وغیرہ ممالک کے دانشواران نے شرکت کی تھی۔ انہوں نے مزیدبتایا کہ قلمکاروں اور ادبی شخصیات پر مبنی کتابوں بھی ایوارڈ کمیٹی کی جانب سے شائع کرائی گئیں۔مسٹر اطہرنبی نے بتایا کہ معروف شاعر فراق گورکھپوری کی حیات وخدمات پر مبنی اس فیسٹویل میں 8؍اکتوبرکو3بجے مہمان خصوصی معروف نغمہ نگارسمیرانجان ساہتیہ شرومنی ایوارڈسے سابق گورنراترپردیش رام نائیک کو سرفراز کریں گے۔رام نائیک کویہ اعزاز مراٹھی کتاب’’چریویتی-چریویتی کیلئے،جس کاترجمہ10زبانوں میںہوا ہے۔پدم بھوشن ایوارڈیافتہ ڈاکٹرگوپی چند نارنگ کو ان کی ادبی خدمات کیلئے لائف ٹائم ایچویمنٹ ایوارڈ، ہمدردیونیورسٹی کے وائس چانسلر پروفیسرحسنین9؍اکتوبر کو پیش کریں گے۔اس موقع پر12؍ اکتوبر کو فراق گورکھپوری کے نام پر منعقد ادبی شام میں انوپ جلوٹا اور متھلیش لکھنوی فراق کی غزلیں ونظمیں پیش کریں گے۔ساتھ ہی ممبئی کی فرحانہ فاطمہ اور کلکتہ کی اجنتا سرکار و انوپریا سنگھ ان کی غزلوں پر منحصررقص کتھک پیش کریں گی۔معروف غزل گوطلعت عزیز،مشہور نغمہ نگار انوپ جلوٹا کو بیگم اختر اعزازسے نوازیں گے۔پروفیسر انیس اشفاق، ڈاکٹر عباس رضا نیر، ڈاکٹر ساغرترپاٹھی، پروفیسرشیوپرکاش، پروفیسر عبیدالرحمن، پروفیسرشافع قدوائی،پروفیسراوشا شرما، سہیل کاکوروی سمیت ملک وبیرون ملک کے متعدددانشور،ادیب وشاعر اور قلمکار اپنا نظریہ پیش کریں گے۔سمینار کی صدارت دہلی یونیورسٹی کے ڈین فیکلٹی آف آرٹس پروفیسرارتضیٰ کریم کریں گے۔اطہرنبی نے بتایاہے کہ فیسٹویل میں 11؍اکتوبر کو ایک بین الاقوامی مشاعرہ کا بھی انعقاف کیا گیا ہے،جس میں معروف نغمہ نگار حسن کمال، شبینہ ادیب، جوہر کانپوری،حسن کاظمی، سردار چرن سنگھ بشر،شہریارجلال پوری،سہیل کاکوروی سمیت اہم کوی وشاعر شامل ہوں گے۔کوروناوباکی سنگینی کو دیکھتے ہوئے سبھی پروگرام انتظامیہ کے اصول وضوابط کے مطابق کمیٹی مدعوئین کی پیش کش آن لائن سوشل میڈیا وڈیجیٹل میڈیا کے ذریعہ پیش کی جائیں گی۔